من قتل كريستينا !!!

* من ذاكرة شرطي متقاعد .........


(( بعض الشخوص والاحداث التالية حقيقي ، وبعض محض خيال لذلك هي مجرد رواية ))

حمور زيادة - في روايته الكونج

الوقت ظهيرة احد ايام الخرطوم الساخنة
والضباط في القسم يقطعون الملل بالونسة
فمنذ اكثر من شهر لم تشهد دفاتر بلاغات القسم
اى بلاغ كبير وهي احوال على نعمتها إلا انها دائماً
ما تنذر بهدوء يسبق عاصفة اتية لامحالة ....
رئيس القسم الضابط العجوز قرر ان يقطع الملل بان
يغادر الى منزله مبكراً وهو يقول لضباطه الصغار
خمسة وثلاثين سنة شغل بوليس ما كفاية ساكين الشغلة دي
من عسكري نفر لي نقيب تلاتة دبابير !! وزي ما قالوا
(شغل البوليس ده لو بكمل كان جابو ليهو مقاول كملو ومشي) .....
والله كفاية ياعم حسن امشي البيت ونحن كان
في حاجة مهمة بنجي نكلمك ...... وبالطبع هم
يتحرقون شوقاً لمغادرته فا اقدم واحد فيهم يريد
ان يجلس على كرسي رئيس القسم وهو يمني نفسه
باليوم الذي يصبح فيه هذا الكرسي ملكاً له .!!!
اما محمد فيري في مغادرة عم حسن فرصة طيبة
للزوغة بدري بدري يقدر يمشي جامعة القاهرة
الفرع يلاقي زملائه من الطلاب النظاميين
يشوف اخبار الامتحانات شنو وهو الطالب المنتسب
الذي لاتمكنه ظروف عمله من حضور المحاضرات
وتبقي حلا وحمار لو لقي سميرة قاعدة في الجامعة
اهو يبقي ضرب عصفورين بي حجارة قراية
وعشرة ونسة ظريفة كده ........

أها

رمضان كريم يا حبيب

الصادق

عُمر يا رائع .. واصل ترِبت يداك

الاخوان الاعزاء جداً الصادق وعبداللطيف ...

الف شكر للمرور ... متابعتكم تسعدني جداً ...

ويا عبداللطيف ياااخ ما تكبر لي رأسي ساي ...

الملازم ندي قررت ان تنتهز الفرصة لممارسة
هوايتها المحببة في العكننة على المتحرين فهي
تظن ان عم حسن يحامي لهم باعتباره كان عسكري
زيهم وكم مرة وجهها بعدم مراجعة بلاغات المتحرين
وزجرهم لانها لاتملك الخبرة لذلك .... والان طالما
عم حسن مافي يبقي ده انسب وكت لزيارة مكتب
المتحرين وطلب بلاغاتهم للمراجعة ....
المتحري عبدالعاطي صاح في زملائه اممممممك
الكشة جاتكم ، سليمان رد عليه ياجماعة البت الكملانة
من لحم الدنيا دي البحلنا منها شنو !!! فرد عليه مصطفي
بحلكم منها الحلاني منها يمين قبل كم يوم طبقت ليك
فيها منظر ههههه تتذكر بلاغ الخواجة السرقو ######و
هههههههه يازول شلت البلاغ والخواجة ومشيت
دقيت ليك رجلي قدامه دقة كاااااااربة ومعها تحية زي
ما اتعلمت في مدرسة البوليس وقلت ليها ياجنابو ندي
طبعاً انت عارفه انو نحن ناس تعليمنا ما خالص وما قرينا
جامعة فعاوزك تتكلمي لي مع الخواجة ده بالانجليزي .....
يمين زولتكم بقت تتلفت زي الترزي يوم الوقفة !!!
وقالت لي انا اسه ما فاضية ههههههه اها من اليوم
داك بقت ما بتقول لي جيب بلاغاتك ....
طبعاً مافات على الملازم ندي ان هولاء المتحرين
عندما كانوا يمسكون بيومية تحري للمرة الأولي كانت
هي تغني مع زميلاتها في الروضة لمن كنت صغيرة
بلعب في التراب ماما لبستني الجزمة والشراب ......الخ
لذلك كان من الاجدي لها ان تحاول الاستفادة من
خبراتهم لا معاكستهم لاجل مظاهر عسكرية لن تفيدها
كثيراً في مستقبلها المهني وهي الرسالة التى كان عم حسن
يحاول ايصالها لها دائماَ .......

مكتب الشاويش النبطشي وعلى غير العادة كانت
تفوح منه رائحة عطر نسائي نفاذ ... غطت على رائحة
الحراسات الواقعة خلفه تماماً ..... فزوجة المتهم الثري
جات تزوره وهي تحمل معها وجبة الغداء التى كانت
تفوح منها رائحة الفراخ المحمر والتى ربما راقت لعساكر
المكتب اكثر من رائحة العطر النسائي !!!
وجود مثل هذا المتهم في حراسة القسم يضفي
بعض الحيوية والنشاط لدي مكتب البلاغات وحرس
الزنازين فالمشاركة في مثل هذه الوجبات تعد فرصة طيبة
للتغير من برنامج الفول والبوش اليومي .....
لكن الشهادة لله لاتمنح هذه الوجبة او غيرها مثل
هذا المتهم اى حظوة او معاملة خاصة من قبل هولاء
الافراد وانما هي مشاركة سودانية تلقائية ومعاملة يمكن
ان يحظي بها اى متهم يحضر له ذويه الطعام وسير
التحري والقضية بالطبع لا علاقة له بمايجري في
مكتب البلاغات او الحراسة فذاك شأن اخر ....

ويبدو ان العاصفة لم تتاخر وها هي تأتي بصحبة
الرجل الستيني الذي دخل مندفعاً الى مكتب الضباط
وهو في حالة انفعال شديد وتأثر شديد ....... وهو يصيح
بصوت عالي لاحول ولاقوة إلا بالله .... الحقوني ياجماعة
... كارثة ياجنابو كريستينا كتلوها !!!
يازول كدي اقعد وقول بسم الله في شنو ؟
وكريستينا دي منو والكتله منو !!!
طليقتي ياجنابو لقيته مكتولة في بيته وحالته
بشعة جداً منظر بطال جداً ياجنابو معقول في ناس
في الدنيا دي ممكن تعمل كده ... سفاحين العملوا كده
ربنا ينتقم منهم ....... ليه يااااااخ حرام عليهم ....
عملت ليهم شنو !!! ياااخ دي زولة طيبة وما
ممكن تكون دي نهايته بالطريقة دي !!
وانخرط في نوبة بكاء هستيري لم تشفع معها كل
كلمات المواساة والتعزية ومحاولة التخفيف عليه
هذا المشهد كان بداية لقصة حقيقة غريبة وطويلة
استمر التحري فيها ربما لاكثر من سنتين .......
فما اصل القصة ومن هو هذا الرجل الستيني
ومن هي المرأة المقتولة ....... ولماذا وكيف قتلت ؟
اسئلة كثيرة واجوبة كثيرة سنتعرف عليها من خلال
سردنا لوقائع هذه القصة ..........

على عجل اخذ الضابط افادة مختصرة من الرجل الستيني
وترك الشاويش النبطشي يقوم بالاجراءات المكتبية من
فتح البلاغ وتدوين اسم وبيانات المبلغ ..... الخ وانطلق
برفقة تيم المباحث ولم ينسي ان ينبه الشاويش النبطشي
لابلاغ تيم المعامل الجنائية لملاقتهم في مكان الحادث الذي
لم يكن يبعد عن القسم كثيراًويقع في نفس الحي .........
الرجل الستيني أو (جوزيف تادرس) كما عرف عن نفسه
افاد بانه وكعادته في المرور على منزل طليقته من حين
الى اخر حضر اليوم الى منزلها وصدم بمشهدها وهي
مقتولة وملقاة على جانب السرير في غرفة نومها والجثة
في حالة تعفن شديد !!!

عشرة دقائق أو اقل كانت كافية للوصول توقفت العربة
امام المنزل الذي بدأ الناس يتقاطرون ويقفون قبالته كنوع
من انواع الشمار السوداني الذي يساهم كثيراً في طمس
وتضييع الكثير من الاثار التى كان بالامكان رفعها
والتقاطها من مكان الحادث علها تفيد في كشف طلاسمه
وكان لابد من إجراء التامين اللازم لمكان الحادث
ومنع الفضوليين من الاقتراب اكثر او الدخول الى
حرم المنزل ....
المنزل كان هادئاً وساكناً بشكل يليق بهيبة الموت وحرمته...
وهو لايختلف عن كثيراً عن باقي منازل الحي الراقي
فحائطه القصير من النوع الذي لايحجب رؤية ما بداخله
ويتحدث عن زمن ما كان يحتاج فيه الناس لتعلية حوائط
منازلهم بحثاً عن الأمان وهو اول مايخبرك يخبرك عن
حضارات سادت ثم بادت فهو مبني على طراز قديم كان
فخماً في يوماً ما لكن يد السنين خطت مايكفي من
التجاعيد على حوائطه وازالت لونها فاصبح بلا لون
ولاطعم للحياة واقفرت حديقته الصغيرة في اجزاء منها
وتطاولت حشائشها في اجزاء اخري وتشابكت اغصان
الجهنمية الحمراء وارتفعت في شكل شيطاني ...

كريستينا أو (المجني عليها) كما ستسمي إعتباراً من
الأن تقيم لوحدها في هذا المسكن الكبير حسب ما افاد
المبلغ فقد ترك المنزل وسافر الابناء للدراسة ببولندا
موطن والدتهم الاصلي وتركوا لها الجدران وبقايا ذكريات
تقتات عليها وظلت متشبسة بالبقاء في السودان برغم
الوحدة والوحشة فهي تقول بانها عاشت في السودان اكثر
من ما عاشت في بلدها واحبت السودان واهله وتريد
ان تموت بسلام وتدفن في البلد الذي احبته ، حققت لها
الاقدار رغبة الدفن في السودان لكن للأسف لم تمت
بسلام لأن يداً اثمة كتمت انفاسها وحولتها الى رقم
في دفتر البلاغات وجثة في الثلاجة الوحيدة في المشرحة
يجاورها فيها اشخاص لم تلتقيهم في حياتها وشاء حظها
العاثر ان تلتقيهم في ظروف صعبة ولا سبيل الى
التعارف فداخل الثلاجة الباردة الصمت هو سيد الموقف
والكل في انتظار دوره على طاولة المشرحة ورائحة
الفورملين النفاذة تعبق المكان ومشرط الطبيب
ومهارته في إنتظارها عله يعين الشرطة في فك طلاسم
الجريمة التى قضت على احلامها في الموت بسلام ....

هذه الثلاجة كان للعم جاد مشرف المشرحة مأرب اخري
فيها فلا تستغرب اذا وجدت بداخلها جك موية بااااارد
او بطيخة اكثر برودة يتحرق شوقاً لالتهامها علها
تطفيء عنه حر الخرطوم الشديد تلك الايام ...
دائماً ما اكنت اظن بأن العم جاد ماهو إلا شبح فقد
تجمدت في وجهه معاني ومعالم الحياة وحلت محلها
نظرة الموت الجامدة فالرجل يعيش مع الموتي اكثر
من مايعيش مع الاحياء فهو يقيم في المشرحة ولايزوره
الا ضباط الشرطة وافرادها والطبيبين اللذان يعملان
في المشرحة وان ساقتك اقدار جثة ما في
انصاص الليالي فلاتخاف ان وجدته متغطي في طاولة
التشريح او على احدي النقالات وشخيره يطغي
على صوت ماكينة الثلاجة القديمة ومروحة السقف العتيقة ...
والعم جاد يفتخر بانه الشخص الوحيد في السودان الذي
بامكانه إخافة البوليس زاتوووو ولاينفك يحكي قصة
الضابط حديث العهد بالخدمة والذي لم يكن يعلم عن امر
العم جاد شيئاً .... حين دخل على نور الضوء الخافت
المتسرب من حوش المشرحة هو عساكره يحملون
جثة بعد منتصف الليل وعندما احس بهم العم جاد تملل
في طاولة التشريح وقبل ان يزيح الغطاء عن وجهه
كان الضابط وافراده يتسابقون هرباً من الجثة التى
نهضت من سبات الموت !!!!

دخلنا المنزل ورائحة الموت الذي نفر منه تزكم الانوف .......
قبل ساعة فقط اكتشف امر الجثة اما كم لبثت فهذا ما سيجيب
عليه الطبيب الشرعي وان كانت مشاهدة الجثة وحالة
الانتفاخ والبشاعة التى تبدو عليها تجيب بأن هذه الروح
المسكينة ربما فارقت الجسد قبل يومين او ثلاثة على الاقل
لتترك هذا الجسد يسرح فيه الدود وهو الذي يبدو انه كان
جميلاً ومرحاً في يوماً ما يحكي عن ذلك العديد من
الصور الموضوعة داخل بروايز جميلة على الحائط
او بعض الطاولات والاركان سبحان الله مغير الاحوال م
ن حال الى حال فمن يصدق ان هذه الشابة التى تختال
مرحاً في الصورة هي ذات الجثة المنتفخة الان ...
الجثة تتمدد في فوضي عارية على الارض واثار العراك
والاشياء المبعثرة تغطي مكان الحادث ....... هذا المجرم
القاسي لم يكفيه انه سلب هذه المسكينة روحها فقد سلبها
ملابسها التى تمزقت وهي تقاوم بضعف انسانة تخطت حاجز
الخامسة والخمسين على اقل تقدير ....

الاخ العزيز عمر رمضان كريم...

بالله واصل ونحن متابعين هذا السرد الجميل...

Quote: الاخ العزيز عمر رمضان كريم... بالله واصل ونحن متابعين هذا السرد الجميل...

الله اكرم يا ياسر وتصوموا وتفطروا على خير ...

الف شكر للمتابعة ...

تحياتي للاستاذ الجليل ادريس حسن ......

وصل تيم المعامل الجنائية وقاموا باخذ مئات الصور لكل
تفاصيل مكان الحادث ورفعت العديد من البصمات
والاثار وحرزت ملابس المجني (قميص النوم الممزق +
قطعة ملابس داخلية ممزقة) ... وبقيت المعضلة والمهمة
الشاقة وهي نقل الجثة الى المشرحة حتى يستكمل
الطبيب الشرعي فحصه ويصل الى تحديد سبب الوفاة
ووقت حدوثها بالتقريب واى ملاحظات اخري قد تفيد التحقيق ... سبحان اهل الانسان بكل روائحه العطرة ينقلب الى النقيض
بمجرد ان يصبح جثة خصوصاً في جرائم القتل او حوداث
الغرق وبالكاد تستطيع ان تتحمل هذه الرائحة التى
تميز الجثث ، التعود وتكرار الامر يجعل منه اكثر
سهولة لكن اجواء السودان الحارة وغرفة المجني عليها
المقفولة وطول المدة جعل الامر اصعبا بمكان ....... الا انه
وفي النهاية لابد من ما ليس من بد فنقل الجثة واجب
تفرضه قيم الانسانية قبل المهنية ولابد من القيام به
سعياً لستر الجثمان لاحقاً ولاحقاق العدالة وسنة القصاص
بالقبض على من ارتكب هذا الجرم الشنيع ........
ووانت تقوم بتلك المهمة يجب ان لاتنسي بانك تتعامل مع
جثمان له احترامه بموجب القوانين والشرائع السماوية فهو
ليس قطعة اثاث او خرقة بالية هذا جثمان انسان كرمه الله
سبحانه وتعالي ..... ويجب ان يحمل وينقل بما يليق من
عناية واحترام .... بهذا الفهم نقلت الجثة ووضعت علي
صندوق البوكس الذي حضرنا به الى مكان الحادث و
تحركت العربة الى مشرحة الخرطوم بشارع الحوادث الشهير
الواقع شمال مستشفي الخرطوم وهي المشرحة الوحيدة وقتها.

وصلنا المشرحة وقابلنا دكتور على الكوباني طبيب
المشرحة والشاعر الفنان في ذات الوقت في مفارقة كمفارقة
الحياة والموت (اختصاصي تشريح وشاعر) !!!!
جمعتني بدكتور على الكوباني العديد من البلاغات وكلها
بالطبع بلاغات قتل وانتحار والموت هو القاسم المشترك
بينها ......... دكتور الكوباني تميزه بخلافة شاعريته
العذبة ضحكته المجللة والابتسامة التى لا تفارق وجهه
ويذكرني به في المنبر اخونا ودالصايم نفس الملامح
والشبه ..........
الكوباني يجيد عمله بنفس اجادته نظم الشعر وهو القائل :
أنا شفته الملاك بإيدي سالمتو ...
بهرني بنورو..
خلاني مأسورو..
ان ضعته في بحورو..
انا عقلي فارقتو ...
انا شفته الملاك...
لو طلاك صباحو..
أو ضماك جناحو..
اكيد القلب بيشفى ...
وتاني تطيب جراحو ..
كمان لو شفته لونو..
سحرو الفي عيونو ...
تدور ترحل في كونو من حسنو ولطافتو ..
انا شفته الملاك... الراقي في وسامتو..
مرسومه ابتسامتو.. تفوق البدر صورتو وآيه الحسن هامتو..
دلال من غير تعالي.. رقه وذوق مثالي ...
زي الدر بيلالي في اصلو وداعتو انا شفته الملاك....
من يوم ما لقيتو.. كل الفات نسيتو ..
وفي قلبي اصطفيتو.. ودون الناس هويتو..
وصار لحياتي معني وفي احلامي جنه ...
بس الحظ تجنى وشال قلبي وسعادتو ...
دكتور الكوباني كان ولايزال حاذقاً مجيداً في عمله
اعد لنا تقرير التشريح المبدئي الذي جاء يحمل
مفاجأة قاسية ومؤلمة جداً حيث حدد سبب الوفاة بأنه
ناتج عن (اسفسيكيا الخنق) فقد تعرضت للخنق بقوة كبيرة
عندما اطبقت عليها ايادي ثقيلة كتمت انفاسها وازهقت
روحها ......... الى هنا لم يحمل الأمر جديد ولم تكن
تلك هي المفاجاة فملامح الجثة كانت تشير الى ذلك
لكن المفاجأة كانت !!!!

ان المجني عليها قد تعرضت للاغتصاب !!!
لاحول ولاقوة الا بالله ..... باله من هم هولاء
الوحوش الذين يقتحمون على امرأة في الخامسة والخمسين
من عمرها يصرعونها ويغتصبونها ويقتلونها ما هذه
البشاعة ماهذا الانحطاط البشري بلا وازع من ضمير
او دين او اخلاق.
عمل الشرطة في بعض الاحيان يدخلك في حتات
ضيقة خلاص وتلقي نفسك في مواجهة مواقف
لاتحسد عليها ....
فراق الاهل والاحبة بالموت أمر صعب ومؤلم لكن هو
اغلب الناس يسلمون به ويتقبلونه باعتباره من مسلمات الحياة
مهما شق عليهم لكن كيف تبلغ ذوي المجني عليها بانها
قد تعرضت للاغتصاب !!!! فهو امر شنيع وبشع
يضاعف بلاشك احزانهم على فقيدتهم .......
طيب هل نخفي هذا الأمر على الأقل في هذه المرحلة
لانه اذا ضبط متهمين من خلال التحقيق والمحاكمة
ستظهر هذه المعلومة بلاشك وسيعلمون عاجلاً
ام اجلاً .......
اتفقنا على ان نتكتم على هذا الامر لحين موافقة
النيابة على تسليمهم الجثمان بعد التشريح
ودفنه ومرور يوم او يومين على العزاء رحمة
بهذه الاسرة المكلومة .......
في بعض القضايا تحتفظ الشرطة بسر القضية وبعض
تفاصيلها ولاتبلغها لذوي المجني عليه ابداً خصوصاً
في قضايا الانتحار أو الموت في ظروف غامضة فبعض
الاسرار المتعلقة بنتيجة التشريح او التحقيق لاتفيد
الاسرة في شيء بخلاف ان تفجر ازمة او مشكلة او
تزيد احزان هذه الاسرة.

عزيزى عمر عثمان

تصوم وتفطر علي خير

خلاص بالنيابة عنك اقول

يتبع........

او كما يقول طلحة

Quote: زيزى عمر عثمان تصوم وتفطر علي خير خلاص بالنيابة عنك اقول يتبع........ او كما يقول طلحة

هههههههههههه ....

ازيك ياعباس يااااخ ورمضان كريم ....

كلم صاحبك ربيع يجي سودانيز دي عشان نضقل بيهو شوية كده ...

*** كنت وقتها فى المباحث وقد حضرت مكان الحادث .
*** وصفك للمجنى عليها ومكان الحادث أدق مما ورد بيومية التحري .
*** تادرس أعتقد أنه شخصية معروفة جدا الآن .
واصل
سردك
جميل

Quote: *** كنت وقتها فى المباحث وقد حضرت مكان الحادث . *** وصفك للمجنى عليها ومكان الحادث أدق مما ورد بيومية التحري . *** تادرس أعتقد أنه شخصية معروفة جدا الآن . واصل سردك جميل

سيادتو الطيب ....... علمتنا الحكي في سودانيز وزغت من الحكاية .....

ونحن عارفين يامافي الجراب ياحاوي ........ تعال احكي عليك الله ..

المنزل كان هادئاً وساكناً بشكل يليق بهيبة الموت وحرمته...
وهو لايختلف عن كثيراً عن باقي منازل الحي الراقي
فحائطه القصير من النوع الذي لايحجب رؤية ما بداخله
ويتحدث عن زمن ما كان يحتاج فيه الناس لتعلية حوائط
منازلهم بحثاً عن الأمان وهو اول مايخبرك يخبرك عن
حضارات سادت ثم بادت فهو مبني على طراز قديم كان
فخماً في يوماً ما لكن يد السنين خطت مايكفي من
التجاعيد على حوائطه وازالت لونها فاصبح بلا لون
ولاطعم للحياة واقفرت حديقته الصغيرة في اجزاء منها
وتطاولت حشائشها في اجزاء اخري وتشابكت اغصان
الجهنمية الحمراء وارتفعت في شكل شيطاني ...
janabo omer your describtive skill
is very high
as if am walking in street no 7

in Alamarat

Quote: as if am walking in street no 7 in Alamarat

*** كضـبا كاضـب

Quote: janabo omer your describtive skill is very high

باعتبارها شهادة من مهندس ..... تجدني اعتز بها جداً

شكراً ياعمر عثمان ياااخ

يوسف باعتباره اقدم ضابط بعد عم حسن حاول
انتهاز فرصة غياب عم حسن للانفراد بادارة ومتابعة
موضوع البلاغ فوجه محمد بتولي إجراءات التحري
في البلاغ وامره بالتحرك على الفور الى مكان الحادث
(طرشق ليهو مشوار الجامعة ذو المأرب المتعددة) ......
محمد طلب منه ارسال احد الافراد لابلاغ عم حسن
في البيت لاهمية البلاغ وما سيجره بكل تأكيد
من اهتمام المسئولين ورئاسة القسم والكمندانية ....
يوسف بالطبع لم يفت عليه ما قاله محمد لكن تعمد
تجاهل إخطار عم حسن وهو يمني نفسه بأن ذلك من
شانه إيقاع عم حسن في مشكلة مع رئاسة القسم على الأقل .....
الملازم ندي كانت تتحرق شوقاً للتحري في بلاغ
كبير مثل هذا وزيارة مكان الحادث فهي حتى
الان ولحداثة عهدها بالخدمة لم تقابل بلاغ قتل بعد !!!
هذا بخلاف رغبتها في مرافقة محمد فهي تري فيه
دائماً صورة الضابط النمر الضابط الشاطر بل ابعد من
ذلك ربما صورة الزوج الناجح ولم لا .... مشاعرها
الأولي بشأن مهنية محمد لم تكن تخفيها عنه او عن
جميع من في القسم وكانت تظن انها تخفي الجزء
الثاني من مشاعرها لكن ما لم تكن تعلمه ان عيونها
دائماً ما تفضحها وبالتالي كانت هي الوحيدة التى
تجهل ان الجميع يعلم بسرها الصغير.

زيارة مكان الحادث أو مسرح الجريمة دائماً ما تكون
هي المفتاح السري الذي يكشف ويبوح باسرار الجريمة
أول افادة من المبلغ عن مكان الحادث كانت ان باب
البيت الرئيسي كان مغلقاً وبالتالي فأن القاتل لابد ا
ن يكون قد تسور حائط البيت القصير للدخول الى البيت
فالحي من الاحياء الراقية الهادئة ومن الممكن ان يقفز
شخص الى داخل المنزل دون ان يراه احد باب
الغرفة التى وجدت فيها الجثة كان نصف مغلق اى بدون
مفتاح الملاحظة الثانية التى كانت اكثر اهمية هي
وجود بعض الحلي الذهبية والاشياء القيمة موجودة
على طاولة قرب سرير المجني عليها لم تمتد اليها
ايدي القاتل وهي اشارة تكشف ربما عن دوافع
الجريمة أو على الأقل تستبعد احتمال دافع السرقة
لم تكن هناك بصمات واضحة أو اثار يمكن ان تفيد
كثيراً في سير التحقيق ..... والبلاغ بشكله الراهن
يعد من البلاغات المغلقة حيث لاتوجد نوافذ او خيوط
تستيطع الامساك بها لتوصلك الى القاتل .....
استلم الملازم أول محمد اجراءات البلاغ إلا ان
رئاسة القسم استشعاراً منها باهمية البلاغ وغموضه
كلفت النقيب رئيس فرع الجنايات بمباشرة التحقيق بنفسه
يساعده تيم من الملازمين زائد تيم خاص من مباحث
القسم من المشهود لهم بالخبرة والدراية ......

اجتمع رئيس فرع الجنايات بتيم التحري ورئيس فرع
الجنايات من الضباط المشهود لهم بالخبرة والتخصص
في الجرائم الغامضة بالاضافة الى تمتعه بالشخصية
القوية والانضباط دار نقاش طويل عن المسار الذي
يجب ان يسلكوه للوصول الى القاتل
فيظل عدم وجود مؤشرات او دلائل واضحة ...
واخيراً تقرر اللجوء الى الطريقة التقليدية التى اثبتت
على الدوام فعاليتها ونجاعتها .... وهي طريقة الدائرة
العشوائية الموسعة بالقبض على اكبر عدد من
الشماشة الذين يكثرون في هذه المنطقة ........
كلف كل واحد الضباط بالقبض على مجموعة والتحري
معهم عدد كبير يفوق الخمسة وثلاثين خضعوا لتحري
مكثف من قبل التيم .... الطريف في الأمر انه ومن
خلال التحري مع هولاء الشماشة تكشف عن كثير
من بلاغات السرقات الخفيفة التى لم تكن هي الهدف
من التحري في الاصل.... في بعض الاحيان يتم غض
الطرف عن السارق لصغر سنه والاكتفاء بان يرشد عن
مكان بيعه للمسروقات ويتم إعادتها لاصحابها حتى
بدون بلاغات .......
يوماً بعد يوم كان العدد يتقلص باستبعاد من لم تثبت
له علاقة بالقضية او لم يقدم ما يفيد..... الى ان وصل
التحري الى احد الشماشة قدم افادة غاية في الاهمية
بل ربما وضع يد التيم على المتهمين فماذا قال
وكيف كانت لافادته هذه الاثر الكبير في فك
طلاسم هذه القضية ...........

الملازم ندي كانت في غاية السعادة وهي تزور مكان
حادث للمرة الأولي ومما ضاعف سعادتها رؤيتها
للملازم اول محمد وهو يرتدي قناع الشرطي الحقيقي
ويسيطر على مكان الحادث ويتحرك فيه كأنه مسرح
الرجل الواحد والجميع ينصاع لاوامره ايماناً منهم
بأنه بارع ويعرف ما يجب عمله بالضبط ، بالطبع لم
تتملك ندي نفسها وهي تصطدم بمنظر الجثة
البشع ورغم محاولاتها المتكررة بتغطية انفها بمنديل
منعاً لتسلل رائحة الجثة إليها الا انها فشلت في ذلك
فالامر اقوي من اى منديل او عطر وفي لحظة ما
شعرت بانها ستخرج كل ما في بطنها لذا انسحبت خلسة
ومضت الى الحمام الخارجي واستفرغت كل ما
في جوفها !!!
عادت بنفس الهدوء الذي خرجت به وهي تقول
بالتاكيد لم يلاحظ احد ذلك.
في الطريق الى المشرحة ركبت بجانب محمد
في العربية وفجأة وهم يتجاذبون اطراف الحديث
عن البلاغ وغيره ... قال لها بالمناسبة عااااااادي جداً
الزول يستفرغ عند أول مرة يري فيها مثل هذه الجثة !!!!
صمتت برهة وقالت لكن انت عرفت كيف يامحمد ؟!
ياملازم انت قايلاني شغال في مصنع البيبسي والَ شنو ؟! ضحكت بشدة وضحك هو ...
اخبار الحاجة شنو يامحمد سمعت انها عيانة
والله ياندي أمي تعبانة والمشكلة نحن ما عارفين
عندها شنو بالضبط مشينا لي دكاترة كتااااار وكل زول
يقول كلام ، طيب ما تسافروا مصر ... فكرنا في كده
لكن انت عارفه الظروف ذاته ما مساعدة اخوي
في الامارات يادوب اشتغل وانا هنا ياها ماهية البوليس
التعبانة دي ، طيب يامحمد ياااخ ممكن اطلب
منك طلب ، جداً اتفضلي ياندي ، خلينا اساعدك في
الموضوع ده ، انا عارف ياندي ما بتقصري لكن
الموضوع اكبر مني ومنك ، طيب بس انت اسمع
انا دايرة اقول شنو ما تستعجل .... مافي مشكلة نتكلم
مرة تانية لانو نحن وصلنا المشرحة خلاص ...
ندي وهي تنزل من العربية كانت تقول في سرها
ما اتعس هذا اليوم على كريستينا وعم تادرس وما اسعده
علي فقد اقتربت من محمد اكثر ....

على صعيد اخر كان هناك تيم صغير مكلف بالتحري
عن المجني عليها واسرتها ومعرفة كل صغيرة
وكبيرة عن الاسرة لانه بانتفاء دوافع السرقة كما اسلفنا
تنشط في الذهن الدوافع الاخري كالانتقام او الاغتصاب
في حد ذاته ... الخ وبدات المعلومات تتري عن المجني
عليها وأول شيء تم تأكيد معلومات بأن المرحومة لم
تكن سودانية الاصل بل هي بولندية عاشت في السودان
لزمن طويل جداً واصبحت سودانية كاملة الدسم لم
تحتفظ من جنسيتها البولندية الا باللون .....
وللمجني عليها اسرة صغيرة جداً وهي تقيم لوحدها الأن .......... لابد ان تضع في اعتبارك كمتحري في اى قضية
ان ليس كل مايرد اليك من معلومات او افادات
يكون صحيحاً 100% فبعض الشهود قد ي
ختلقون الروايات والشعب السوداني شعب ثرثار
كثيراً ما يردد اقوال منسوبة الى اخرين دون التثبت
من صحتها ...... فالبعض يتكلم عن سلوك المجني عليها
وعلاقتها المريبة ببعض الاشخاص او حتى الشماشة
الذين يرتادون المنطقة لم نحفل بهذه الاقوال كثيرة
وان كنا لم نسقطها من حساباتنا تماماً ...

منذ الوهلة الأولي للتحري مع هذا الشاهد (الشامسي)
كان واضحاً ان لديه ما يخفيه ..الحاسة البوليسية هي
التى تدفع الى الشك في شخص ما بانه يخفي شيئاً
وقد تصيب او تخطيء هذه الحاسة ويا ما تشككنا
في اشخاص لدرجة تقارب اليقين واتضح لاحقاً انهم ابرياء ..... على العموم حدسنا في هذا الشاهد لم يخيب فماذا قال
وكيف كانت لشاهدته الاثر الكبير في وضع التحقيق
في مسار واضح ربما يقود الى ضبط الجناة ...........
قال في يوم انا كنت قاعد بالصباح مرخم براي
زي الساعة حداشر بالصباح تحت الحيطة بتاعت بيت
المرحومة و..... كنت ضارب سلس
(السلس عبارة عن سلسيون صمغ يستخدم في لصق
لساتك العربات والعجلات ....) يشمه هولاء
الشماسة ويستخدمونه كمخدر بالتبادل مع شم
البنزين بواسطة قطعة قماش معطنة بالنبزين ...............
جوا تلاتة تنفار وقفوا قدام البيت حاولوا يفتحوا الباب
لقوهو مقفول ........ وبقو قاعدين يعاينو بالحيطة
جوه البيت ........ واحد فيهم قال ننط نخش بالحيطة
التاني قال ليهو لا ....... دقيقة اصبر وجاء ماشي
على الزول التخين و كان لابس جلابية ....... سلم على
وقال لي نحن اصحاب ست البيت والباب مقفول ويمكن
هي نايمة نحن عاوزنك تنط بالحيطة تفتح لينا الباب
من جوه ........... انا عاينت ليهو وقلت ليهو يازول
انا زول كويس ما عاوز مشاكل امشي خليني
.............هو قال لي ما تخاف مافي مشكلة اسه
انت فطرته ؟
قلت ليهو لا ..... قال لي طيب هاك القروش دي ا
فطر بيها بعد ما تفتح لينا الباب من جوه ........
القروش كانت كتيرة لكن ما عارفه كم زاتو ؟
نطيت سريع بالحيطة وفتحت ليهم الباب من جوه
ومشيت بالقروش اكلت جداد من الشواية باقي الشمس
جو خطفوا مني باقي الجدادة وانا رجعت جنب بيت
المرحومة ......... قبل ما اقعد في الضل قلت ادخل
اكشف جوه اشوف في شنو ؟
الباب كان مقفول من جوه انا نطيت بالحيطة زي قبيل
ومشيت عاينت بالشباك ........ انا لمن عاينت بالشباك
خفته وجريت طوالي نطيت بالحيطة وتاني تلاتة يوم
انا ما جيت راجع .......

لمن عاينت بالشباك شفت المرحومة واقعة في
الواطة وهدومه مشرطة وفي واحد من الجماعة طالع
فوقه اظنو بستعمل فيها !!!
انا ما وقفت مسافة طويلة وخفت وجريت لكن احتمال
انا لو شفت الجماعة ديل اقدر اعرفم ............
في واحد منهم كان زمان شامسي وبقي يشتغل مع
واحد ميكانيكي وانا زمن طويل ما شفتو
وكعادة اغلب الشهود في السودان الوصف تائه ومشتت ........ اوصاف ممكن تنطبق على ملايين الاشخاص الشاهد
السوداني لايركز في التفاصيل المفيدة وربما يغرق
في سرد تفاصيل غير مهمة ...
لكن على الاقل بشهادة هذا الشامسي اصبحنا الان
امام ثلاثة متهمين يجب القبض عليهم او على واحد منهم
الاقرب فيهم هو من نملك معلومات اكثر عنه
وهو صبي الميكانيكي الكان شماسي وعلينا ان نركز
على هذه الشخصية النصف معلومة بالنسبة الينا بدلاً
عن محاولة البحث على شخصيات قد لاتوجد الا في خيال
شاهدنا وهو أمر لم نستبعده ........

متابعين يا جنابو .. سرد سلس و ممتع .. بصراحة مدخل لمسلسل مثير.

يا باشا ..يعني مصر تشحتفنا كدة ياخ وفي نهارات رمضان دي.هاهاهاها
بالله عليك كمل لينا .نجضنا والله

Quote: يا باشا ..يعني مصر تشحتفنا كدة ياخ وفي نهارات رمضان دي.هاهاهاها بالله عليك كمل لينا .نجضنا والله

ههههههههههههههههه ........

هلا يا ادريس ............

تعرف الشحتفة دي ما مقصودة في كل الاوقات لكن الظروف في السودان ذاته

مشحتفة وبتشحتفنا معاها .......

جنابو سلام
قصة مثيرة جداً والواحد ما قادر يصدق انو السودان دا ممكن يحصل فيهو حاجات عجيبة زي دي

سردك جميل ياخ

في انتظار النهاية للقاتل او القتلة المثيرة واتمنى أن يكونوا لقوا حتفهم فيها

الصادق

Quote: جنابو سلام قصة مثيرة جداً والواحد ما قادر يصدق انو السودان دا ممكن يحصل فيهو حاجات عجيبة زي دي

هلا يا الصادق ........

يازول صدق ساكت وماخفي كان اعظم في بلاغات عجيبة وغريبة ...

طبعاً عضم القصة (جريمة القتل والاغتصاب) حقيقي 100% وبعض

الشخوص كذلك بالاضافة الى قليل من البهار للتعتيم على الشخوص الحقيقية

وإضفاء بعض النكهة ...........

Quote: متابعين يا جنابو .. سرد سلس و ممتع .. بصراحة مدخل لمسلسل مثير.

الف شكر ياعادل على المتابعة ........

وربنا يقدرنا نكون عند حسن ظنكم .......

افلت عم حسن من الكمين الذي نصبه لهو يوسف عندما
تعمد عدم ابلاغه بالمنزل عن البلاغ الجديد !!!
على امل ان يوقع ذلك عم حسن في مشكلة مع
رئاسة القسم !!!
بالطبع يوسف لم يعلم بأن محمد وقبل ان يتحرك
الى مكان الحادث طلب من عم بشير الصول ان
يرسل احد افراده بالعجلة الى منزل عم حسن بالاشلاق
القريب من القسم لابلاغه بالبلاغ !!!
استغرب يوسف جداً وصطدم وهو يري عم حسن
عائداً الى النقطة وعيونه تقدح بالغضب والشرر
لذا سارع بالنهوض من كرسي عم حسن بمكتب
رئيس النقطة وهو يقول متلعثماً اسه كنت بفتش في
زول ارسلو ليك ياعم حسن !!!
اسمع يا يوسف انا حركاتك دي ما بتفوت علي
وعلى بالطلاق انا اباريك الا اخلي ليك شغلة
البوليس دي خرم ابرة ياولد انا لمن كنت بوليس
يمين امك ما خطبوها بلاش لعب عيال معاك
اسه تعال وريني عملت شنو في البلاغ المهبب ده
وبلغت رئاسة القسم والا برضو عامل فيها
ابوعرام عليهم !!!
شرح لهو يوسف كل الاجراءات التى قام بها
لكن ما كان يشغل باله هو كيفية علم عم حسن
بالبلاغ وهو في منزله !!! سؤال ظل يشغله ردحاً
من الزمن وعندما استعصت عليه الاجابة قرر
نسيان الأمر وانتظار فرصة اخري في عم حسن !!!

تيم التحري قرر ان يركز جهوده في البحث عن
صبي الميكانيكي الذي ذكره الشاهد/المتهم (الشماسي)
وتم تفريغ تيم من المباحث بقيادة ضابط لجمع المعلومات
والبحث عن المذكور ...... بالطبع لم تكن المهمة سهلة
في ضوء المعلومات الشحيحة عنه والتباس وانطباق
الاوصاف التي ادلي بها الشاهد على عدد كبير من
الاشخاص ....... ونتيجة لذلك تخبط التيم وقبض
على عدد من المشتبه فيهم باعتبارهم الشخص
المطلوب إلا ان الشامسي استبعدهم الشامسي عند
عرضهم عليه ......في طابور الشخصية
(طابور الشخصية هو طابور او صف يشكل من
عدد 8 اشخاص يقف المتهم او المشتبه فيه بينهم
في ثلاثة مواقع مختلفة وفي كل مرة يطلب من
الشاهد المرور للتعرف عليه ، ويراعي بقدر الامكان
ان يكون هناك قدر معقول من التشابه بين الاشخاص
في الطابور والمتهم او المشتبه فيه ، وبعكس ما نراه
في الافلام من وقوف الشاهد خلف حاجز زجاجي يري
من خلاله افراد الطابور ولايرونه هم فأن طابور
الشخصية لدينا يتم عياناً بياناً)
برغم حالة الفشل التى لازمت كل الطوابير التى
عقدت إلا ان التيم ومن خلال تجاربه المتراكمة كان يشعر
بأن هذه المجهودات لن تضيع سدي وانهم يقتربون بشكل
او بأخر من القبض على ذلك المتهم فدائرة البحث اخذت
تضيق وتضيق في كل مرة ....... فالخرطوم حتى ذلك
الوقت لم تكن قد اتسعت بهذا الشكل ولم تكن قد ازدحمت
بالصورة التى نراها اليوم ، وعندما يستبد بهم اليأس كان
الملازم أول محمد يذكرهم دائماً بقصة (العالم ومساعده
حديث العهد بالخدمة فعندما فشلت التجربة التى يجرونها
للمرة المائة يأس المساعد الصغير وقال للعالم للأسف
لافائدة من كل ما قامنا به .. ضحك العالم وقال له لا بل
هناك مائة فائدة فقد علمنا وتأكدنا بما لايدع مجال
للشك بان الطرق المائة التى اتبعنها لا تصلح
لنجاح هذه التجربة)وكان محمد يقول لهم على الاقل
علمنا وتأكدنا بأن كل هولاء الاشخاص الذين قبضناهم
ابرياء ، مثل هذه الاقوال كانت ترفع من رصيد محمد
بين الافراد وتزيد من وتيرة الاعجاب به والايمان
بقدراته بل ان احدهم عندما قال محمد في رده على
يوسف في موضوعاً ما (ما لله لله وما لقيصر لقيصر)
سارع ذلك الفرد لابلاغ زملائه قائلاً والله جنابو محمد
ده غيرو فهمو الكتير ده حتى القرآن حافظو !!!!!!!!

Quote: in Alamarat

أعتقد الخرطوم 2

يا حليل ذلك المشتل الجميل.

Quote: أعتقد الخرطوم 2 يا حليل ذلك المشتل الجميل.

ياعمك شكلك كده ناقش الفيلم ده ....

Quote: تيم التحري قرر ان يركز جهوده في البحث عن صبي الميكانيكي الذي ذكره الشاهد/المتهم الشماسي وتم تفريغ تيم من المباحث بقيادة ضابط لجمع المعلومات والبحث عن المذكور ...... بالطبع لم تكن المهمة سهلة في ضوء المعلومات الشحيحة عنه والتباس وانطباق الاوصاف التي ادلي بها الشاهد على عدد كبير من الاشخاص ....... ونتيجة لذلك تخبط التيم وقبض على عدد من المشتبه فيهم باعتبارهم الشخص المطلوب إلا ان الشامسي استبعدهم الشامسي عند عرضهم عليه ......في طابور الشخصية

*** الظاهر دخل العضم يا عمك .




ـــــــــــــــــ
تلفونك مغلق !!!

Quote: ياعمك شكلك كده ناقش الفيلم ده ....

نحن أولاد الخرطوم يا جنابو.

Quote: نحن أولاد الخرطوم يا جنابو.

*** يا دينق حيرتنا !!!

*** عموما حلوه منك وكلو سنة وانت طيب

شنو يا جنابو ياااااخ؟؟؟

ما تتم لينا القصة.


غايتو جنس شحتفه.






سلامات يا راقي.

Quote: شنو يا جنابو ياااااخ؟؟؟ ما تتم لينا القصة. غايتو جنس شحتفه. سلامات يا راقي.

هلا يامحمد وكل عام وانت بخير ......

اخوك اخر رمضان بقي لا بشوف ولا بسمع وبعد داك دخل علينا العيد ...

لكن اها رجعنا نواصل بأذن الله .......

يعني يامحمد اصريت انك حتى ما تسمع مني
ورتبت لي امور سفر الحاجة واخدت اجازتك وانا
آخر من يسمع ابداً ياندي انا ما تعمدت الحكاية دي
وانت براك عارفه انا كنت مشغول كيف ومجهه
مابين مرض امي وبلاغ كريستينا .... والحمد لله
الامور اترتبت وانا حقيقة شاكرليك ولي شعورك الجميل ده ...
طيب طمني يامحمد انت رتبت الامور كيف !!!
والله ياندي ابوي باع عربيتو وعثمان اخوي برغم
ظروفو في ابوظبي غايتو قدر يرسل شوية قريشات
والتذاكر شلتهم بالدين من واحد صاحبنا عندو وكالة سفر ....
طيب يامحمد انت ما عارف انو نادر اخوي عندو
وكالة وانا بصراحة كلمتو وماكان عندو مانع .....
معليش ياندي اهي جات كده وخلينا يمكن لي قدام
نستفيد من تذاكر نادر دي ....
سرحت ندي بخيالها في كلمات محمد الاخيرة
وفي سرها تقول ياربي محمد يكون قاصد شنو بي
كلامو ده !!! خصوصاً انو اتكلم بصيغة الجمع !!!
افاقت على صوت محمد يلا ياندي مع السلامة
واشوف وشك بخير ان شاء الله .... مع السلامة
يامحمد وربنا يكتب سلامتك وسلامة الحاجة
ويطمنك عليها... انت يامحمد مالك مستعجل ما تقعد
شوية لالا مافي طريقة ياندي لانو عندي مشوار
ضروري للجامعة !!! الجامعة فيها شنو يامحمد
لالا بس عندي شوية حاجات كده !!!

يا الله يامحمد كنت متخيلة انك سافرت
وماجيت تودعني !!! معقولة بس ياسميرة !!
والله رغم انو وكتي ضايق لكن قلت لازم اجي اودعك ...
انا بتفائل بيك ياسميرة وان شاء الله تكوني وش خير
على في السفرة دي .... تعرف يامحمد رغم انو نحن
اتعرفنا علي بعض قريب لكن بالجد بحس انو بعرفك
لي زمن طووويل واسه لو ما انت مسافر مع الحاجة
كنت بقول ليك خليك ما تسافر .... يابت انتي بتحبيني
وال شنو .... احبك ليك شنو كمان ياشين بس عشان
الامتحانات قربت كنت عاوزاك تذاكر ....
الامتحانات ياكبيرة ههههههههههه وضحكت سميرة
ايضاً من اعماقها وارخت يدها لتغوص وتستسلم في
يد محمد وهو يضغط عليها ويقول ليها خلي بالك من
نفسك ياسميرة .. يلا لا اله الا الله .... وردت سميرة
محمداً رسول الله.
محمد عليك الله ا اضرب لي في تلفون ناس خالتي
عزيزة جيرانه ... طمني عليك وعلي الحاجة ...
جداً ياسميرة بس كلمي صاحبتك الصوته سمح ديك
ترد على التلفون بسرعة قبل ما يرد ابوهم ابو
صوت خشن داااك هههههه ان شاء الله يامحمد يرد
عليك ابوهم ويطلعك ليك بالسماعة بهناك .. قال صاحبتك
ام صوت سمح دييييك اقول ليك حاجة ماتضرب زاااتووو !!!
يلا تاني لا اله الا الله ... سميرة (محمداً رسول الله)
محمد محمد اضرب ما تشتغل بي كلامي الاخير ده ...
لم يرد وابتسم لها ابتسامة الموافقة وشعرت انها تمادت فا احنت رأسها
في دلال ممزوج بالخجل ....

بعد مضي اكثر من شهر ونتيجة لمعلومة وصلت
الى احد افراد التيم قاموا بمداهمة احد المنازل باحدي
المناطق العشوائية وعثروا على المتهم صبي الميكانيكي
المطلوب يغرق في نوم عميق ورائحة الخمر تفوح منه
بصورة مزعجة جداً واصبح في ايديهم الان صيد ثمين
وان صحت اقوال الشماسي فهم على وشك الكشف عن
غموض تلك الجريمة.
افاق المتهم من نومه مذعوراً وهو يري مجموعة من
افراد المباحث تحيط به وهم يحملون مسدساتهم واصواتهم
تأمره بالنهوض والاستيقاظ مع بعض الصفعات فنهض وهو
يترنح من اثار الخمر وهول المفأجاة ...
رئيس فرع الجنايات ورئيس تيم التحري استيقظ على
صوت طرق شديد علب باب منزلهم .. ياربي من هو
الطارق في هذه الساعة المتأخرة وعندما فتح الباب
وجد امامه الصول عبدالقادر بكرشه الكبيرة التى
كادت ان تخل بتوازنه وهو يضرب الارض بقدمه رافعاً
يده بالتحية تمام سعادتك خمشنا الراجل ... واهو راكب
في البوكس وراء .... مبروك ياعبدالقادر شغلكم نضيف
امشوا على القسم انا جاي وراكم طوالي ....
وفي القسم بدأ الاستجواب الأولي البيانات الشخصية
ودردشة بعيدة عن موضوع البلاغ الى ان واجهه بالسؤال
المباشر كتلتو كريستينا ليه يا ماجد !!!
كريستينا دي منو يا جنابو وكتلناها كيف !! انتو ياجنابو
اكيد قاصدين زول تاني !!!
تعرف ياجنابو انا ده الكلام الخايف منو ؟
خايف من شنو ياعبدالقادر ؟ خايف من جنس اللولوة
البسوي فيها الزول ده انت عارف يا جنابو لو كان
تميت نومتك وشربت شاي الصباح وجيت كان لقيتنا
اتونسنا ليك مع الزول ده كوييس وجيت لقيت الموضوع
نجيييض ماباقي الا على تسجيل الاعتراف القضائي قدام
مولانا !!! لالا ياعبدالقادر ياااخ انا ونستكم بعرفه
وماجد ده زول كويس براهو ح يتكلم !!! جداً ياجنابو
كان اتكلم خير وبركة وكان ما تكلم نحن غايتو جاهزين
للونسة !!!

خير ياعبدالقادر لكن كدي في الأول امشوا جيبوا
الشامسي وجهزوا لي طابور الشخصية وبعدين نشوف
الحاصل شنو !!!
تم إجراء الطابور وتعرف الشماسي على المتهم
المقبوض (ماجد) في الثلاث مرات وبسهولة شديدة .........
عودتنا التجارب ان افضل حالات الاستجواب للمتهمين
والتى من الممكن ان تظفر فيها بمعلومات وحقائق من
المتهم هي حالات الاستجواب الذي يتم مباشرة بعد
عقد طابور شخصية بواسطة شاهد أو طابور أثر بواسطة
قصاص الأثر او طابور استعراف بواسطة ال###### البوليسي
فهذه الطوابير بماتقدمه من بينة تضعف ثقة المتهم في نفسه
وتهزه بصورة كبيرة ربما تدفعه الى الاعتراف بدلاً عن
حالة الانكار والنفي ...
وبالفعل انهار المتهم عندما تعرف عليه الشاهد ثلاث
مرات واستغل فريق التحقيق حالة الانهيار هذه وامطروه
بوابل من الاسئلة وامطرهم هو بالاجابات !!!

في يوم أنا كنت ماشي في السوق وكنت ضارب
لي سيجارة وجعان شديد .... لاقاني واحد كان معانا
في شغل المكانيكة كنا شغالين سوا مع المعلم جمعة .....
المعلم جمعة طردنا من الشغل انا وعبده عشان
كنا بنجي متأخرين ومرات كتيرة بنجي والسكرة
بايتة معانا وعملنا ليهو مشاكل مع الزبائن
سلم علي وقال لي يازول انت وين انا لي زمن بفتش ليك
..... قلت ليهو والله ياعبده قاعد اهو لافي ساكت مرة مرة
الواحد يلقي ليهو حاجة يجازفه (يسرقه) ويبيعه تمشيهو
كم يوم !!!
قال لي انا عندي ليك شغلانة كويسة جداً وح نلقي
من وراءها قرشين حلوات ونشتت من السوق ده كلو كلو !!!
اها رأيك شنو ؟ قلت ليهو يازول انا موافق طوالي ...
طبعاً انا فكرت انو الشغلانة دي اكيد سرقة كبيرة وقمت
سألت عبده اها البيت الحنسرقو وين ؟! يازول سرقة
شنو الشغلانة دي اكبر من كده وفيها قروش كاش
اكتر من القروش الممكن نلقاها من وراء اى سرقة !!!
صراحة أنا رأسي ضرب واحترت جداً وقلت ليهو
ياعبده مالك عاوز تخوفني انت عارف نحن ما ناس
شغل كبير البنقو ده ياها علاقتنا بيهو نضرب لينا
سيجارة وبس لكن شغلو زاتو ما بنعرفو .. يازول بنقو
شنو الشغلة دي لا بنقو ولا سرقة !!! ياعبده ياخي
عليك الله اتكلم مالك عاوز تجنني اوعه تكون عاوز
تعمل إنقلاب يامعلم هههههههههه ..

تتذكر ياماجد الخواجية كريستينا .... ايوه ايوه
بتذكره ماله ؟! ودخلها شنو بالشغلانة دي !!!
يامغفل ماهي كريستينا ذاته هي الشغلانة !!! يازول انت
ما نصيح شغلانة شنو انت اوعه تكون صدقت كلام انها
بتصاحب الشماسة وبتدخلهم بيته وتديهم قروش ...
يامان دي وهمة سااااكت .... ياااخ اقول ليك حاجة
والله ياعبده بقيت ماعندك موضوع كلو كلو ......
ضحك عبده ودخل ايدو في جيبو وطلع رزمة قروش !!!
ماجد بقي يبحلق ويبلع في ريقو يا عبده ياعبده ده شنو
والقروش الكتيرة دي شنو معقول تكون نمت مع الخواجية
وادتك القروش دي كلها !!! يازول نمت شنو وصحيت شنو !!!
القروش دي عربون الشغل !!! ولمن نكتل الخواجية
بدونا قدر دي مرتين تاااااني !!!! قلت شنو نكتل منو !!
يازول انت الله ما ليك والا شنو ياعبده اسمع اديني
حق الفطور وانا لا سمعت لا شفت مالي ومال
كتل ياعمك دي فيها مشنقة وكده سلام يافردة.

الو الو الو .... السلام عليكم ... انا بتكلم من القاهرة
عاوز سميرة بت جيرانكم بس بسرعة لو سمحتي .....
اهلين يامحمد انت محظوظ سميرة ذاته قاعدة
معاي التقول عارفك ح تضرب هههههه
وخطفت سميرة السماعة ازيك يامحمد وكيفك
واخبارك واخبار الحاجة شنو ؟ والله ياسميرة
جينا وعملنا الفحوصات والدكاترة قالوا في ورم
ولازم يعملوا عملية ومفروض بكرة الصباح نخش
العملية .... انا مقلق شديييد ياسميرة واكتر شيء مقلق
بي انو أمي صابرة صبر عجيب وبتقول لي في كلام
غريب .... دايماً تقولي لي يامحمد ياولدي (مرض الموت
ما عندو علاج ما تخسر قروشك ساي وابقي عشرة
على اخوانك وابوك) .... لالا يامحمد ماتاخد بي كلامه ده
وان شاء الله تعملوا العملية وتبقي كويسة وتجوا راجعين
بالسلامة ... وليك علي يامحمد اخبز ليكم كعك عمرك
ما اكلت زيو .... شكراً ليك ياسميرة ما تتخيلي انو
انا ارتحت كيف بي سماع صوتك يلا مع السلامة
لا اله الا الله .... سميرة (محمداً رسول الله) ...

سلام شنو يازول انت بعد كده بقيت معانا جوه
الجك ولو ما اشتغلت معانا الشغل ده يمين انت
ذاتك نكتلك !!!! ده كلام شنو ياعبده تكتلني
انا ياعبده !!! يازول انا عشان قروش زي دي
بكتل ابوي زااااتوو !!!
بصراحة ياجنابو انا خفت شديد وعبده عيونو
كانت حمرة وشرارة عدييل كده وانا قلت ليهو
خلاص خلاص ياعبده انا موافق بس اسه
عليك اه م اديني افطر وبعدين نتفاهم ....
هو قال لي نمشي نفطر سوا ومشينا سوا لي
بتاع السمك وعبده نزل طلبات كتيييرة وضربنا
السمك وبعد داك ركبنا البص مشينا الحلة العشوائية
قيلنا في بيت حاجة كتيرة ... ضربنا البيرة الصاقتة
وكل واحد فينا جابو ليهو بت نام معاها وعبده
دفع حساب الحاجات دي كلها وقال لي اها يامان
رأيك شنو في برنامج زي ده يومي قلت ليهو واه ده
برنامج فل الفل بس لو الحكاية مافيها كتل بكون كويس !!!
عبده ضربني بونية قوية في صدري لمن قربت
اقع وقال لي اسمع هووي يافأرة يا تكتل انا نكتلك
وقع ليك الكلام ده والا اعيدو ليك ..... لالا وقع لي ياعبده ....
خلاص ابقي راجل اسه نحن ماشين نقابل
زول بخصوص الموضوع ده والزول ده هو الجاب
لي الشغل ... امشي قدام الزول اعمل حركات
النسوان بتاعتك دي عشان اطلع د...... !!!

رجعنا السوق انا وعبده وفي السوق لينا زول
عربي تخين كده واقف منتظرنا جنب الزقاق ...
عبده مشي عليهو وسلم عليهو بالاحضان كيف
ياحاج حامد ... تمام الحمد لهه ياعبده ...
ده ماجد ياحاج حامد الكلمت عليهو .... ايوه
عرفتو لكن مالو زولك ده فتررران كده وعيونو
مقلعة من بكانه !!! لا لا ده زول فردة صاقعة
بس نحن كنا مقيلين عند حاجة كتيرة وزي ما
انت عارف ههههههههههه
ان شاء اهم تبقي الحكاية كده ياعبده وزولك ده
يبقي راجل مايقوم يخوزق لينا الشغل ده !!! انا طبع
ا كنت خايف وببلع في ريقي لكن لمن اتذكرت تهديد عبده
لي قلت ليهو ياحاج حامد نحن بناكل النار ذاته ...
وهو قال لي يازول اسه مافي زول قال ليك اكل النار
نحن داير نكتل الخواجية دي وكل زول يشيل
نصيبو ويتخارج تاني يوم القيامة ما نتلاقي !!
جداً جداً بس نحن دايرين نكتل الخواجية دي
لي شنو ؟؟!!
حاج ماجد نهر عبده نهرة قوية يازول ده شنو
الزول العوقة الجبتو لينا ده !!! اسمع يامعلم نحن
عاوزين نكتل الخواجية عشان في زول ح يدينا
قروش كتيرة قصاد الشغلانة دي ..الزول
ده هو منو ؟ وعاوز يكتل الخواجية دي ليه
دي ما شغلتك ؟ واضح الكلام ده !!!!
واضح واضح ياحاج حامد

ديل أولادي ياجنابو كان عندهم امتحانات ويادوب
قدروا يجوا السودان .... وده عمكم رئيس فرع الجنايات
بالقسم ورئيس التيم المكلف بالتحقيق في قضية ماما ...
وهو راجل شاطر وابداً ما مقصر في التحقيق هكذا
عرف عم جوزيف بين ابنائه ورئيس تيم التحقيق
طبعا ياجنابو انا وريتهم كل الحاصل لكن هم برضوا
عاوزين يسمعوا منك ويطمئنوا على سير القضية ..
أول حاجة ياجماعة البركة فيكم وربنا يصبركم وعاوز
اطمئنكم انو القضية في ايدي امينة ويشهد الله انو نحن
مهتمين بالقضية دي اهتمام ما عادي لانها قضية ما
عاديةمن حيث المجني عليها ومن حيث مكان وقوعها
فهذا الحي يشهد للمرة الأولي جريمة من هذا النوع
بالاضافة الى ان الدافع لارتكاب هذه الجريمة حتى
الأن يبدو غامضاً او غير مفهوم !!! نحن عن طريق
واحد من الشماسة قبضنا على واحد من المتهمين اسمو
(ماجد) وهو اعترف باشتراكه في ارتكاب الجريمة مع
شخصين اخرين واحد اسمو (عبده) والتاني اسمو (حامد)
أو (حاج حامد) زي مابقولوا ليهو هم !!! وانو في زول
طلب من حاج حامد قتل المرحومة وهم كل هدفهم من
الجريمة دي القروش .... طبعا نحن لحدي الأن بنتعامل
مع كلام ماجد باعتباره حقيقة وبنفتش في باقي الجماعة
ولينا اكتر من شهر ما قدرنا نقبض عليهم او نصل
لطرف خيط يوصلنا ليهم .. لكن برضو وارد انو كلام
ماجد او اعترافه ده يكون نص الحقيقة وحكاية الاتنين
التانين ديل خيال منو وتسويف وإطالة للزمن ساكت ..
والله ياجنابو مع احترامي ليكم ولي جهودكم وده شغلكم
طبعاً انتو بتعرفوه احسن مني انا شايف انو كلام الولد
ده كلام فارغ ومضيعة زمن الولد ده كتل المرحومة
والولد ده كان عاوز يسرق وبكون سمع صوت
حركة خاف وجري ..... مافي زول عندوا مصلحة
في موت المرحومة ولا كان عندها عداوات مع
اى زول !!! وانا بفتكر انو الولد ده يمشي المحكمة
عشان ياخد جزائه !!!
ايد الاولاد كلام ابوهم بل كان اكثر حماس
في تأييد الفكرة وضرورة الاسراع في طي ملف
هذه القضية لانهم وبحسب كلامهم يريدون
ان يتجاوزا هذه المحطة الصعبة في اسرع وقت !!!
ودعهم رئيس التيم مع وعد بالاستماع الى وجهة
نظرهم وربما التفكير في الاخذ بها بشكل جدي !!!

Have no idea
BUT
something is telling me that
The father was the one who committed the crime

Am I wrong !!?

Quote: Have no idea BUT something is telling me that The father was the one who committed the crime Am I wrong !!?

ياشقيق انا ذاتي ما عارف

على قول المصريين ياخبر النهار ده بفلوس بكرة ببلاش ....

قربت .......

الملازم ندي دي منتظراك وراء الصيوان يامحمد
عاوزه تعزيك ... هكذا قال جنابو عم حسن لمحمد
بعد ان رفع معه الفاتحة !!!
خرج محمد الى الجهة الخلفية من الصيوان ولمح عدد
من البنات ونسوان الاهل كلهم في انتظار تعزيته
في وفاة امه .. اكثر وجه ميزه في وسط هذا العدد
كان وجه سميرة الحزينة ببلاغة وصدق ولم يفته ايضاً
ملاحظة ندي بحكم زيها الرسمي الذي ميزها عن البقية ...
رفع محمد يديه بالفاتحة ... الا ان خالته التى حضرت
من السفر قبل قليل لم تترك له المجال لاكمالها واحتضنته
بقوة وهي تبكي وتعدد في مأثر الفقيدة وعظمة فقدها ....
محمد لم يضجر من حضن خالته فقد كان يحتاج اليه
لقد تماسك اكثر من ما يجب وحان الوقت ليبكي كالاطفال
ويخرج هذا الحزن الهائل الذي يغمره .... في مصر
وبعد ان توفت الحاجة اثناء العملية لم يكن هناك
وقت للبكاء وكان عليه ان يتماسك حتى يستطيع اكمال
اجراءات السفر وكان عليه ان يتماسك حتى يساعد
والده الذي انهار بالكامل !!! وعندما وصلوا الخرطوم
كان عليه ان يواصل التماسك ويكمل مراسم التشييع
والدفن ويصبر شقيقاته ..... بكي محمد على صدر
خالته كما لم يبكي من قبل وبصورة جعلت باقي البنات
يبكون وبشدة ... ربما كان يبكي بعضهم لاجل المرحومة
لكن بلاشك فبعضهم كان يبكي لاجل محمد وحزنه ...
تدخل خاله وفرق بينه وبين خالته طالباً منهم الاستغفار
والدعاء والترحم على المرحومة ...
افاق محمد قليلاً وتلقي العزاء من باقي البنات ومن
ندي وسميرة وطلب منهم ان يتفضلوا الى داخل المنزل
وعاد الى الصيوان ...
انتي يا اختى دحن محمد ده بعرف البنوت ديل
كلهم من وين ؟ كان هذا مدخل حديث جانبي بين اثنين
من جارات المرحومة في الحي .... يا بت امي محمد
ماقالوا بقرا في الجامعة مع شغلو في البوليس .....
هي لكن قراية الجامعة وصحبت الجامعة بتخلي البنات
ديل يبكن ويتنخجن قدر ده !!! حتى البنية البوليسة دي
شايفها تبكي وتقشش في دميعاته اظنها كان ما لابسة
الكاكي ده كانت اتنخجت زيها وزي الباقيات !!!
والله يابت امي محمد ما ولد السرور وامه اه يرحمه
كانت زولة طيبة وبتتعاشر وانا كان عندي بت كان
عرستها ليهو .... انت خترك انا البنات عندي وكان
للسماحة سمحات وكان للقراية قاريات .... ما قلنا
حاجة فوق بناتك لكن القصة دي ما قسمة ونصيب !!
وكت بقت على بناتي بقت قسمة ونصيب قادر اه
ياناس الدنيا !!!

جنابو طبعا شاءت الاغدار ان لا نلتقى فى الخرطوم ورجعت انا الى مقر عملى فى الرياض
وانشاء الله الجايات اكتر من الرايحات .. وبالله ما تشحتف روحنا ...
تحياتى وودى الذى تعرف

يا جنابو محمد... اقصد جنتبو عمر
يا اخي ما عذبتنا... اسع رمضان التاني فضل ليهو خمسة شهور
مسلسل مكسيكي ولا كيف

تحياتي سعادتو عمر
القصة ماتعة دون أدنى شك
طريقة العرض ( رغم التخريمات الجانبية ) فهى أيضاَ جميلة
موعودون نحن إذاً بكاتب يغطي هذا الجانب ( غير المطروق كثيراً ) في ( أدب الجنايات ) - لو صحت التسمية -

ولكن

وآه من لكن هذه التي يسميها أهل اللغة ( حرف إستدراك )

لم يعجبني يا عمر بصراحة خوضك في أسرار والمشاعر الفتية لزميلتك الملازم ( وقتها ) ندى

الملازم ( وقتها ) ندى هى الآن رتبة أخرى وهى حتماً في وضع أسري مختلف ربما يسيئها ويسيئ أسرتها الكبيرة والصغيرة أن تنشر هكذا وعلى الملأ مشاعرها الصبية أو ( أسرارها الصغيرة )
ظني أنك عليم أنه ليس كل ما يعرف يقال
وأنه ليس كل ما يقال ينشر على الملأ


تعمدت ألا أورد أى إقتباسات لتكون الفرصة عندك كاملة للتعديل إن أقنعك كلامي
ولك المحبة كاملة
وعظيم الإحترام

Quote: تحياتي سعادتو عمر القصة ماتعة دون أدنى شك طريقة العرض ( رغم التخريمات الجانبية ) فهى أيضاَ جميلة موعودون نحن إذاً بكاتب يغطي هذا الجانب ( غير المطروق كثيراً ) في ( أدب الجنايات ) - لو صحت التسمية -

الف شكر ياعاطف ..........

Quote: لم يعجبني يا عمر بصراحة خوضك في أسرار والمشاعر الفتية لزميلتك الملازم ( وقتها ) ندى الملازم ( وقتها ) ندى هى الآن رتبة أخرى وهى حتماً في وضع أسري مختلف ربما يسيئها ويسيئ أسرتها الكبيرة والصغيرة أن تنشر هكذا وعلى الملأ مشاعرها الصبية أو ( أسرارها الصغيرة ) ظني أنك عليم أنه ليس كل ما يعرف يقال وأنه ليس كل ما يقال ينشر على الملأ تعمدت ألا أورد أى إقتباسات لتكون الفرصة عندك كاملة للتعديل إن أقنعك كلامي ولك المحبة كاملة وعظيم الإحترام

الان ازداد احترامي لك ياعاطف ... اخو بنات بالجد

بس داير اطمنك واطمئن كل اعضاء وقراء سودانيز اونلاين

الملازم ندي وسميرة وكثير من شخوص هذه القصة لاتوجد الا

في خيال الكاتب شخصي الضعيف ......

وزي ماقلت في مداخلة سابقة رداً على الأخ الصادق انو (عضم القصة)

جريمة القتل والاغتصاب حقيقي 100% وربما بعض الناس يعرفون

شخصية المرحومة الحقيقية زي الاخوان دينق والطيب عثمان يوسف

لكن كثير من باقي القصة هو بهار لزوم النكهة والتشويق ...

Quote: بس داير اطمنك واطمئن كل اعضاء وقراء سودانيز اونلاين الملازم ندي وسميرة وكثير من شخوص هذه القصة لاتوجد الا في خيال الكاتب شخصي الضعيف ......

جزيل الشكر سعادتو عمر على التوضيح الشافي



متابعين بشغف

تعرف يامحمد واهًت سفرتك دي قطعت رأسنا
عديل كده هكذا قال رئيس تيم التحري لمحمد
بعد ان صلوا المغرب ورفع فراش العزاء ....
ياسعادتك انتو الخير والبركة وباقي الشباب اكيد
ما بقصروا... واهحض ما قصروا يامحمد لكن انت عارف
برضو انو الناس ما كلها واحد وانت ماشاء الله خبرتك
ممتازة وبالجد انا افتقدتك جداً في البلاغ ده .... لانو زي
ما انت عارف انا باقي الشغل علي كتير ورئيس القسم
قال ما بفرغني للبلاغ واهو ماسك التيم وماسك فرع
الجنايات واهاح يامحمد كبسيبة ما يعلم بيها الا الله
انا سمعت من الشباب انو في زول اتقبض وبتفتشوا
على اتنين تانين ... صاح وبصراحة غلب حمارنا
اكتر من شهر مافي اى معلومة او طرف خيط !!!
وانا رغم انو عارف الظروف لكن بالجد لو في
طريقة تنزل الشغل من بكرة يكون احسن .... جداً جداً
ياسعادتك ده ما واجب والزول لازم يعصر على نفسو
شوية .... بس يمكن الصباح اتأخر شوية لحدي
ما ناس البلد يقوموا وبعد داك بجي طوالي ....
واهفر يامحمد الواحد خجلان منك لكن بالجد محتاجين
ليك والحمد لله ما خذلتنا ..

عشااان عارف حركاتكـ دي أنا ما دخلت البوست دا كلو كلو!
أها الليلة قلت جنابو دا بكون (سقف) .. النمش نشوف الحاصل!
ألاقيكـ لسع ما جبت باقي المتهمين! إنا لله ياخ!!



شكلو كـدا ح تكون في شخصية خفية في نهاية التحقيق
وداير يخلص من كرستينا عشان الورثة .. وقصة الاغتصاب
دي لفقت مع (منفّذ) الجريمة بالصدفة ساي!!

so who did it???

ودالصايم وعفراء ... تحياتي

والله معليش ياجماعة ... القصة قربت تنتهي لكن الاسابيع الفاتت صراحة كنت

مشغول جداً بموضوع المحل الجديد .... والقصة دي عاوزة روقة وكده

اوعدكم في القريب العاجل جداً بتكملة القصة ...

أنا عااااااارف!!

يا جنابو سلامات و تحيات لك علي السرد الجميل .....واصل

أخى عمر..لك التحية..

جذبتنى بصورة جميلة لمقتل كريستينا كأنى شاهد على ألأداث.

كمل جميلك كملو..........تقديرى وإحترامى.

ياااااخ القصة دي عقدتني عديييل كده لي يوم الليلة ما قادر اتمها تقول (كريستينا) دي كتلتها أنا :)

لكن ان شاء الله وبأذنه اكمل القصة دي قبل الارشفة ......

تعال تمها

جنابو عمر فى ذمتك دى
بالغت ولا ما بالغت؟؟؟؟؟؟

بالله القصة دى لسه ما تمت؟؟؟؟؟؟؟؟؟؟؟؟؟؟؟؟؟؟؟؟؟
حالتى مطنشة زى ود الصايم

فترررررررنا

Quote: فترررررررنا

هههههههههههههههههههههههههه
ههههههههههههههههههههههههههههههه
ياجماعة هوي العاوز يعرف باقي القصة دي يجيني في المكتبة
احكيها ليهو هههههههه يااااااااااخ الكتابة غلبتني عدييييييل

يا جنابو بالله بلا غلبتنى
بس شوف انت فاتح كم بوست ...
عليك الله ما تفترنا زيادة
والله والله نفسى اعرف من القاتل ؟؟ دددددمدم دم تررررارررررررا

Quote: يا جنابو بالله بلا غلبتنى بس شوف انت فاتح كم بوست ... عليك الله ما تفترنا زيادة والله والله نفسى اعرف من القاتل ؟؟ دددددمدم دم تررررارررررررا

ديك ما بوستات دقة سريعة لكن القصة دي عاوزه (عصف ذهني) هههههههههههه
البسمع عصف ذهني دي يقول ده الطيب صالح ههههههههههه

يا عمرانت ما كنت بتحضر مسلسلات مصرية؟؟؟!!!!!
مافى زول مطالبك بأى حبكة هسه وان نهاية منطقية للاحداث
اعمل الحلقة الاخيرة ورينا القاتل و قبضتوا كيف ..
وانسانا من الناس البحبوا ديلااااااك ههههههههههههههه
______________________________________
مداخلاتى القبل السنه دى بتوريك لاى مدى انى مهتمة اعرف القاتل
وفبضتو كيف....

يا عمر ياخ .. تكملها ولا أفتو ؟؟؟

هسى بقول ليهم القاتل منو .. وأحرق ليك الفلم

الاخ اسامة بالله فتوا طوالى
روحى حرقتنى و فترتاااااااا

نديهو إنذار 24 ساعه

بعدها بنفتو

جنابوووو عوووووك...
أنا في الشغل وداسة تلفوني تحت الطربيزة وعيوني حمرو لسة ما عرفنا قاتل كرستينا ...
تسلم ياخ متعة بالجد ياخي خلي المكتبة واشتغل رويات وقصص بوليسية.

اهلييييين محمد قالتها الملازم ندي عندما دخلت المكتب ووجدت
الملازم أول محمد جالساً على مكتبه
قالتها بفرحة غامرة لكنها سرعان ما انتبهت الى زملائها الذين اخذو
يبتسمون ويتغامزون في صمت ولم تجد مخرجاً غير ان تدير دفة فرحتها
الى حركة عسكرية وتخبط بقدمها في الارض وترفع يدها بالتحية بشكل جادي جداً
حمد لله على السلامة ياسعادتك !!!!!
اهلاً اهلاً ندي ازيك وكيفك وكيف ناس البيت ؟
واخبارك وامورك وعاملة كيف مع المتحرين .... كل ذلك ومحمد
لم يقصد سوى انتزاع ندي من دائرة الحرج الذي حست به وهي شعرت
بذلك وادركت ان محمد بذوقه العالي ولباقته المعهودة انما يقدم لها طوق النجاة !!!!
مضي النهار بطيئاً ومحمد في حالة انشغال لا تنتهي تارة تجده
مع المتحرين وتارة اخري في الزنازين
يراجع في قضايا المتحرين وموقف كل منتظر في الحراسة !!!
حانت ساعة الانصراف وتحرك الجميع الى حافلة الترحيل إلا محمد
الذي طلب منهم التحرك وعدم انتظاره لان لديه شغل لم ينتهي بعد !!!
ندي كذلك قالت بأن نادر شقيقها سيمر عليها لان لديهم مشوار !!!
شكراً يامحمد على تصرفك الجميل قبيل الصباح ...
ههههههه هو انت لسه فاكره يا ندي !!!
انا صراحة ماقصدت حاجة وتعبير عفوي طلع مني حكاية اهليييييين يامحمد دي !!!
يازولة ولا يهمك عادي عادي !!!
شايفه في البكاء كان في بنات كتاااااااااااار من الجامعة !!
ايوه ايوه ديل زملائي في الجامعة وبنذاكر سوا وكده !!!
هي جماعتكم دي كلها بنات وال شنو !!
هههههه انت شفتي البنات بس لكن في الصيوان كان في اولاد كتاااار قاعدين !!!
بس انت مالك مركزة مع الموضوع ده يعني !!!
ابداً ما مركزة ولا حاجة !! اها بلاغ كريستينا فيهو جديد !!

يعني في خطوات ما بطالة وغالباً انا من بكرة ح اتفرغ لشغل البلاغ ده !!
يعني ح تمشي رئاسة القسم وال شنو ؟
غالباً لكن اكيد يومي بمر عليكم !
ايوه ضروري يامحمد عليك الله !!!
ياعم عبدالقادر كدي جيبو لي الزول القبضتوهو في بلاغ كريستينا !!
جداً سيادتو محمد !!
تعال ياعوض امشي جيب ماجد من الحراسة !!
اهلاً ماجد اتفضل اقعد ...
شوف ياماجد نحن لحدي هسي ماشين معاك كويس ولو جارينا المبلغ عمك تادرس
والمحامي بتاعو كان ودينا القضية المحكمة في مواجهتك انت
بس وكان تكون منتظر الاعدام !!!
عشان كده ياماجد انت لازم تساعدنا وفي الاول تساعد رقبتك ولازم تلمنا
في (عبده) و (حاج حامد) ومنو الزول الاداكم القروش عشان تكتلو الخواجية !!!!
والله ياجنابو والمصحف انا مابعرف الزول ده منو ولا بعرف حاج حامد انا
صاحبي عبده وهو الورطني الورطة دي !!! وانا ممكن اساعدكم تلقو عبده
لانو انا بعرف كل الجخانيين الممكن يتلقي فيها !!! بس تعملو لي حساب بعدين ياجنابو !!!
جداً ياماجد لكن قبل ده كلو انت لازم تسجل إعتراف قضائي بكلامك ده كلو وبعدين نتفاهم !!
إعتراف قضائي ده شنو ياجنابو !!
يعني تمشي معانا قدام القاضي وتحكي ليهو القصة كلها زي ما حكيته لينا !!!
اها ياجنابو وكان قام مولانا القاضي حكمني اعدام وال حاجة !!!
لالا دي مافيها حكم ياماجد القضية لسه ما مشت المحكمة بس الزول لمن يقول
كلام حقيقي نحن بنسجل الكلام ده قدام القاضي !!! وال انت بتلعب علينا ساي !!!
لالا ياجنابو والله مابلعب عليكم خلاص نمشي للقاضي !!!

جنابو محمد البركة فيكم ياااخ اعفي لينا ما قدرنا نصلك في البيت انا كنت مسافر !!
ما بتقصر يامولانا والبركة في الجميع !!!
يامولانا عندنا المتهم ده اسمو ماجد وعاوزين نسجل ليهو إعتراف قضائي !!
جداً يامحمد بس ناس عمك عبدالقادر صول المباحث مايكون عصروا على الزول ده شديد !!!
ههههههه اهو الراجل قدامك يامولانا اسالو ؟
طيب خلاص خلوهو معاي انتظروا بره يامحمد واقفل الباب وراك !!!
اسمك بالكامل : ماجد ...............
عمرك كم : 25 سنة
انت عارف يعني شنو اعتراف قضائي ؟
ايوه عارف يامولانا !!!
طيب ياماجد في اى زول ضربك وال هددك عشان تقول الاعتراف ده ؟
لا يامولانا !!
طيب كويس اها اتكلم :

كويس انك قدرت تجي الجامعة يامحمد !
والله ياسميرة مرهق وتعبان وكمية بتاعت شغل ما عادية !!
عارفه يامحمد والله العظيم شايلة همك وعارف انو ظروفك صعبة لكن دي
السنة الاخيرة يامحمد ولازم تجتهد عشات تتخرج بتقدير !!!
تقدير !!! تقدير انت يااااااااخ ههههههه
تقدير شنو في الحر ده ياسميرة انا داير اتخارج مش اتخرج !! ان شاء الله مقبول
يازول مافي عوجة وماتشيل هم انا معاك !!!
يوم البكاء شايفه واحدة زميلتكم ضابطة !!
ايوه دي ندي !!!
وبتبكي قدر ده ما له !!
يمكن عشان كم مرة شافت امي ومرات امي كانت بترسل لينا اكل في القسم !!!
والله البشوف دموعه يقول قريبتك !!! والغريبة يامحمد تبكي وتحمر لينا !! في شنو ما عرفناها !!!
الكلام ده ما صاح ياسميرة معقولة تكون عملت كده !! خلينا هسي في المهم اها الدبارة كيف !!
انت مالك اتضايقت من كلامي يامحمد معليش انا ما قايله ندي دي عزيزة عليك قدر ده !!!
وزي ما قلت خلينا في المهم !!!
سميرة انت عارفه انا الكلام المافي محلو مابحبو كان فيك وال في ندي او غيره عشان
كده احسن تفهميني صاح !! يلا سلام عليكم انا ماشي !!!
طيب اقيف اصور ليك الورق ده !!!
خليهو يوم تاني انا تعبان جداً وماشي البيت يلا سلام !!!
الليلة يا نورة شكلو محمد زعل مني هسي اسوي شنو انا !!!
انت ذاتك الشلاقة ليك شغال جايبة ليهو سيرة ندي وما ندي !! يابت انا كلمتك
وقلت ليك الولد ده بريدك وندي بتريدو لكن هو ما شغال بيها بس انت ما دايرة
تصدقي القصة دي وتخلي الكبكبة اختك خبيرة ريدة وشواكيش ههههههههههههه هههههههه
والهو يانورة ضحكتني انا بالجد كنت محتاجة للضحكة دي بعد الموقف البايخ الحصل ده !!!!!

يامولانا انا زي ماقلت للجماعة المباحثية ديل انا ماعندي علاقة بالموضوع ده
انا جاني عبده وقال لي في زول بديني قروش لو كتلنا الخواجية كريستينا !!
وتاني لاقاني بي زول اسمو حاج حامد وهو قال بدينا القروش لكن نحن ما عندنا
شغلة بي منو داير يكتل كريستينا نحن بس نشتغل شغلتنا ونشيل قروشنا ونتخارج !!!
يوم الصباح زي الساعة 11 مشينا محل مواعيدنا مع حاج حامد جنب السوق الشعبي امدرمان
وركبنا معاهو في العربية انا وعبده ومشينا بيت المرحومة في واحد شماشي فتح لينا الباب
نحن دخلنا المرحومة اتخلعت وحاولت تكورك حاج حامد طوالي لفه العمه في خشمه ومسكه
من وراء وبقي يكورك فينا اخنقوها اخنقوها طوالي عبده مسك رقبته بي يدينو وانا صراحة كنت خايف شديد
حاج حامد قال امسك الكرعين لانو المرحومة كانت بتقاوم شديييييد انا مسكت الكرعين وانا برجف وبعد شوية
المرحومة صنت وبقت ما بتقاوم وحاج حامد قال خلاص ماتت !!! لكن قال نحن لازم نعمل تمويه !!
قلنا ليهو تمويه كيف !! قال استعملو المرحومة عشان عشان الناس تفهم انو الكتل المرحومة كتله عشان يستعمله بس !!
قلت ليهو طيب نحن ما نشيل الدهب ده عشان يقولو سرقة !!! قال لي انت اصلك خايب وغبي !!! لو شلنا الدهب ومشينا بعناهو الدهب ساهل بتعرف ورجلنا بتتجره في الموضوع نحن لازم ما نشيل اى حاجة من هنا مفهوم !!! عبده قال يلا خلاص تعال استعمل الزولة دي سريع خلينا نتخارج !!! انا قلت ليهو لا يااااخ انا مابقدر اعمل حاجة زي دي !!! قال لي خلاص بنديك قروشك ناقصه
حاج حامد قال ليهو والهه ياعبده انا ما خايف الا من الجنا الباطل ده جبتو لينا من وين !!!! انا خفت وسكتت ساي !! عبده استعمل المرحومة وبعد داك شرطنا ملابسه وخليناها في الواطة ومشينا بعد ما حاج حامد ادانا القروش !! لمن طلعنا بره حاج حامد قال خلاص يلا فرتقو وتاني مافي شيء بلمكم معاي لابعرفكم لا بتعرفوني !!!

تمام سعادتك المتهم ماجد سجل الاعتراف القضائي !!
شكرا يامحمد اتفضل اقعد !!
اها يامحمد بعد ده الخطوة الجاية شنو !!!
والله ياسعادتك البلاغ ده اخد زمن طويل والخيوط مبعثرة لكن نحن ما عندنا حل غير
نمشي في رواية ماجد دي لحدي النهاية انا شخصياً مقتنع بيها جداً ولازم نلقي عبده ده
وعبده هو البوصلنا لي حاج حامد وحاج حامد هو البوصلنا للزول المحرض على كتل المرحومة
طيب يامحمد انا عاوزك تقعد مع ماجد تاني ويحدد ليك الاماكن الممكن يتلقي فيها عبده او الجخانيين زي ماقال
وبعد داك نقوم نقسم المواقع دي على اتيام المباحث ونشوف البحصل شنو ؟
حاضر سعادتك وانصرف محمد من مكتب رئيس فرع الجنايات ورئيس تيم التحري في القضية !!!
اها ياماجد كدي تعال وريني الجخانيين الممكن نلقي عبده فيها !
سجل عندك ياجنابو !
حلة ارفع سدرك في كرتون بانتيو هنا جنب المدرعات ، عشوائي مونت كارلو هناااااك جنب السفارة
الصينية ، شارع لبنان في العشش في بيت علوية بت التبخ ، فريق نيران في انغولا امبدة ، او يكون مشي
لي اخوهو في ربك !!!
طيب عن ناس حاجة كتيرة مش ممكن برضو يكون هناك ؟
لالا ما بمشي ليها آخر مرة مشينا بعد كتلة المرحومة عبده كان سكران وسب دين لي حاجة كتيرة
وضربه عشان قالت ليهو مافي بنات !!! وهي قالت ليهو والله تجي تاني هنا بكلم ليكم المباحثية !!!

كده ياسعادتك بقي عندنا خمسة مواقع ممكن يكون عبده لابت فيها :
1- ارفع سدرك في بانتيو جنب المدرعات.
2- عشوائي مونت كارلو جنب السفارة الصينية في المنشية.
3- شارع لبنان في العشش في بيت علوية بت التبخ.
4- فريق نيران فريق نيران في انغولا امبدة.
5- ربك.
طيب بالنسبة للموقع الأول ده في دائرة إختصاصنا وتيمنا بتاع المباحث بتكفل بيهو ،
بالنسبة للموقع التاني فده ح ننسق مع تيم مباحث القسم الشرقي عشان هم بعرفو الحتة دي
احسن مننا وبرضو ننسق مع مباحث امتداد الدرجة التالتة بالنسبة لبيت علوية بت التبخ ومباحث
امدرمان بالنسبة لموقع فريق نيران ، الموقع الاخير ده طبعا خارج الولابة فالأمر متروك ليك ياسعادتك !!
ده كلام كويس وشغل نضيف يامحمد انا بعمل خطاب للرئاسة عشان مأمورية ربك دي وعاوزك
تجهز نفسك ليها لانو صراحة عندي احساس انو عبده ده بكون هناك !!!

ازيك ياندي ...
اهلييين محمد ........
تاني اهلييييين محمد ههههههههه
أنا اول شيء عاينت لمن ما لقيت زول جنبي حتى قلت ليك اهلييييييييين محمد ههههههههه
اها الاخبار شنو ؟
والله ماشين كويس والدائرة بدات تضيق شوية شوية احتمال بكرة وال بعد بكرة بالكتير امشي مامورية ربك !!
لي شنو ؟
في معلومة انو عبده احتمال يكون هناك !!
طيب ما يمشي زول غيرك جنابو يوسف الدغيل ده ما يودوهو المأمورية دي !!!
هههههه بالعكس ده بلاغي انا ولازم امشي فيهو بنفسي !!!
لكن يامحمد انت ما ملاحظ انك من ايام بكاء المرحومة ما ارتحت كلو كلو !! شيء بلاغ وشيء قراية وجامعة !!!
والهي ياندي كلامك صاح لكن اسوي شنو لا الشغل بتخلى ولا القراية بتتخلي !!
القراية تتخلي كيف مع سميرة العاملة ليك فيها ابلة الناظرة دي هههههه بالمناسبة امبارح جات سألت منك هنا !!
منو سميرة !! جات متين والساعة كم وانا كنت ووين !!
مالك مخلوع كده كدي قول بسم الهر !!!
جات امبارح نصت نهار وجابت ليك ورق مصور كده وقالت انت ليك اربعة يوم ما جيت الجامعة !!
اوكي اوكي !! خلينا في المهم عليك الها في كم بلاغ بتاعت سرقة عربات عند المتحري سليمان
البلاغات دي عاوزة تتراجع مع ناس مباحث الولاية لانو في عصابة اتقبضت عندهم شوفي البلاغات دي
مع سليمان لانو انا احتمال اسافر ربك في اى لحظة !!
جداً ياسعادتك !!!
شنو ياسعادتك دي وصارة لينا وشك كده !!! ما كنا كويسين قبل شوية !!!!
لالا مافي حاجة تمشي وتجي بالسلامة ان شاء الله !!!

تعرف ياجنابو محمد كل المحلات القاله ماجد طلعت مضروبه ساكت
بس غايتو البركة في انو لمينا في (عبدالرحمن جفاف) الكان شارد من الحراسة داك تتذكرو !!
معقوووولة ياحضرة الصول لميتو في عبدالرحمن جفاف !! كيف ما بتذكرو ده ما بتاع بلاغ القتل
بتاع المرحوم الكان لاعب سلة دااااك وشرد في نبطشية عمك الزين !! ولو ما رئيس القسم زول كارب
كان ضيع لي عمك الزين خدمتو الطويلة كلها !!! اصلو كان فاضل ليهو شهرين على المعاش !!!
وانت ياجنابو قايل شنو !!! انا اول ما قبضنا عبدالرحمن جفاف وديتو ليك قسم الدرجة التالتة !!
لي شنو ؟؟؟
عمك الزين بعد المعاش مابقي كاتب عرضحالات في الدرجة التالتة !!!
ياسلالالالام ياخ والله عم الزين ده مفروض يكون قاضي في محكمة العمد هنا والله !!!
اتخيل اول ما شاف عبدالرحمن جفاف دمعو جرن واتذكر موقف رئيس القسم معاهو !!!
عبدالرحمن قال ليهو اعفي لي ياحاج !! عمك الزين قال ليهو ياولدي انا هين وربنا ستره معاي امشي
كوس العفو من اهل الراجل الكتلتو داااااك !!!!!!!!!!!
اها ياجنابو انتو بقيتو قايمين باكر الصباح لي ربك كان ربنا هون !!
ان شاء الله ياعم عبدالقادر اها انت ما قايم معانا !!!
ياجنابو محمد عمك عبدالقادر ما انتهي كلاعب خالص والهand#24576; مشوار انغولا الامبارح ده هد حيلي !!!
وانا ذاتي كلها ستة شهور وامشي اكوس لي طربيزة جنب عمك الزين ههههههههههههه
ياعم عبدالقادر يااااخ انت قالو مرطب وماشاء اله اولادك اتين في السعودية ههههه !!
انت عارف ياجنابو اولاد ال###### ديل قبل ما نشوف قروشهم كويس قالوا عاوزين يعرسو ههههههه
المهم ياجنابو انا بحضر ليك خمسة افراد ومعاهم الرقيب اول كمال زول نجيييض وبصرف ليهم
اتين كلاشنكوف من المخزن زايد طبنجاتكم معاكم وربنا يوفقكم وابونورة السواق معاكم بس الزول ده
خلو بالكم منو كان دخل الحلة وشرب ليهو كببية بوردكم في الزلط ده هههههههه

سعادته عمر عثمان

سلام ليك ولضيوفك

شوف من دى أنا عرفتك حكاى وكاتب قصصى ما ساهل

سردك يوصل للغرض

خرج محمد الى الجهة الخلفية من الصيوان ولمح عدد
من البنات ونسوان الاهل كلهم في انتظار تعزيته
في وفاة امه .. اكثر وجه ميزه في وسط هذا العدد
كان وجه سميرة الحزينة ببلاغة وصدق ولم يفته ايضاً
ملاحظة ندي بحكم زيها الرسمي الذي ميزها عن البقية ...
رفع محمد يديه بالفاتحة ... الا ان خالته التى حضرت
من السفر قبل قليل لم تترك له المجال لاكمالها واحتضنته
بقوة وهي تبكي وتعدد في مأثر الفقيدة وعظمة فقدها ....
محمد لم يضجر من حضن خالته فقد كان يحتاج اليه
لقد تماسك اكثر من ما يجب وحان الوقت ليبكي كالاطفال
ويخرج هذا الحزن الهائل الذي يغمره ..

شفت الحتى دى لمن وصلت

كان وجه سميرة الحزينة ببلاغة وصدق ولم يفته ايضاً
ملاحظة ندي بحكم زيها الرسمي الذي ميزها عن البقية ...
رفع محمد يديه بالفاتحة ... الا ان خالته التى حضرت
من السفر قبل قليل لم تترك له المجال لاكمالها واحتضنته
بقوة وهي تبكي وتعدد في مأثر الفقيدة وعظمة فقدها ....
محمد لم يضجر من حضن خالته فقد كان يحتاج اليه

الحتة دى ياعمر أدمعت عينى وكانت
The climax of the Novel

أتنين

الملازم ندي وسميرة وكثير من شخوص هذه القصة لاتوجد الا

في خيال الكاتب شخصي الضعيف ....

يعنى صاحبك محمد خليته عمر الشريف محبوب البنات علينا

يا بخته

سلام عمر لاتترك هذه الموهبة

ومتعنا

عاجز عن شكرك ياصديق ياااااخ
بالجد الواحد بنبسط جداً لمن يلقي تجاوب وتفاعل من القاريء
وربنا يقدرني اكون عند حسن ظنك دائماً واقدر اتم القصة دي

ايوتن كده ياخ
فترررررررنا من الزرزة

عندك لغاية بكرة محضر القصة كامل يكون قدامى فى بورض الونسة ده :)

كنت قايلا كريستينا "الفونسو"!

جنابو
لسع فاكر
القريتو نسيتو
وسبب واحد يخليني أرجع تاني مافى
لم تخلص زبطها بالتسلسل وأمشي المطبعة وأعمل فى الغلاف
صورة كريستينا ..
ورسل لي فى الإميل..
كرهتنا ياخي !!!

يا جنابو سلام عليكم
عارف انا يمكن يوميا في طريقي للمكتب بجي ماري بالمكتبه ،اقول يا رب انزل للزول ده اقول ليه ماااااااعذبتنا ياخ.
لكن بيني وبينك الشحتفه دي اللذ حاجه في القصة دي.

تحياتي ومتابعين

يا عمر عثمان
علي بالطلاق ترجع الجماعه ديل قبال يمشو ربك
كريستينا دي انا الكتلتها
مش الاعتراف سيد الادلة




يا عمر عذبتنا خلص

احمد عبدالله ازيك ممكن تجيب لي بلاغ كريستينا وتجيني في المكتب دقائق !!!
كان هذا محور مكالمة (رئيس القسم مع رئيس فرع الجنايات ورئيس تيم التحري في البلاغ)
اهلاً احمد اتفضل اتفضل ..
شكراً سعادتك دي اوراق البلاغ سعادتك ...
يوميات التحري دي كلها في البلاغ ده !!!
ولسه البلاغ ما انتهي ياسعادتك !!!
لكن ان شاء الله خير شكلو كده في حاجة او هواء جاي بخصوص البلاغ ده !!!
والله يااحمد ضربوا لي ناس الرئاسة قبل شوية وقالوا انو المبلغ في البلاغ عمك
جوزيف تادرس ده مشي اشتكاك وقال انك معطل اجراءات البلاغ وما عاوز تقدم
المتهم المقبوض للمحاكمة !! وبرضو ضربو لي ناس النيابة وقالوا انو المدعي العام
طالب اوراق البلاغ وهم حيرسلوا جواب بالمعني ده !!!
واضح انو عمك جوزيف ده زول ماهين وعندو علاقات كويسة بالناس الفوق عشان
كده قدر بسرعة يحرك الأمور بالطريقة دي ، انا صراحة واثق في شغلكم وتقاريركم الدورية
عن البلاغ وقبل كل شيء انا اتكلمت مع ناس الرئاسة والنيابة وقلت ليهم اكيد في سوء تفاهم
حاصل ونحن بنبذل قصاري جهدنا في البلاغ ده وانك والتيم الشغال معاك من خيرة الضباط عندي !!!
والله ياسعادتك انا شاكر لحسن ظنك فيني والشباب المعاي ودفاعك عننا لكن
بصراحة ياسعادتك الزول ده بقي مزعج جداً وانا قدر ما حاولت افهمو انو التحري ما اكتمل
هو ماعاوز يقتنع وآخر مرة جاني صراحة طردتو من المكتب وقلت ليهو تاني ماتجي هنا !!!!!!!
لالا يااحمد ماصاح منك الراجل مكلوم ومرتو مكتولة !! والتحري فعلاً اخد زمن طويل !!!
هي ذاته ما مرتو طليقتو !!! والتأخير في التحري ما مننا لكن ظروف
وغموض القضية هو السبب !!!
ما فرقت مرتو طليقتو برضو في عشرة عمرة وبينهم اولاد !!!
ونحن مهما كان لازم نستحمل شوية !!
على العموم اكتب لي تقرير مفصل عن البلاغ وانتو وصلتو
وين وانا برد لي ناس الرئاسة !!! ورسل اوراق البلاغ بالسيركي لي مكتب
المدعي العام وانا افضل انك تمشي ليهو بي نفسك وتديهو مختصر شفهي وتسلمو الاوراق !!!
وفي نفس الوكت حاول اتصل بناس مامورية ربك شوفهم وصلوا لي حاجة وال لسه !!!!!!!!
جداً سعادتك !!!

ياحضرة الصول خلي الجماعة يطلعوا ماجد من الحراسة عشان نسوقو معانا ربك !!
لكن ياجنابو اذا عبده لمح ماجد معاكم في ربك حيعرف انكم كايسين ليهو والشغل
ده بقوم وعبده حيتخارج من ربك !!!
كلامك صاح ياحضرة الصول لكن مافي زول فينا بعرف عبده ولا عندنا ليهو صورة
فامافي حل غير نسوقو بس خلوهو يلبس جلابية وعمة ونحن ذاتنا نلبس جلاليب وعمم أو
سروال وعراقي ويبقي شكلنا تجار تجار مع البوكس ده هههه !!!
هلا هلا يادفعة مشتاقين والله انت عارف ياعثمان انو نحن من يوم التخريج
ما اتلاقينا تاني !!
سبحان الله يامحمد سنتين انت في السرير الفوق وانا في السرير التحت
وما كنا بنتفارق في الكلية شوف الدنيا دي كيف !!!
اها واخبارك شنو في ربك هنا وعامل شنو ؟
والله يامحمد الحمد لله واخوك طبعا ماسك تيم المباحث في الرئاسة
هنا بس طبعا الشغل ما كتير زيكم في الخرطوم !!!
كدي ياعمك ما نتلخم في الونسة السيد المدير عامل ليكم فطور كارب
امبارح طبعا جاتنا إشارة من الخرطوم بمأموريتكم دي !!!
طيب أول حاجة نودي المتهم ده نسلمو الحراسة عندكم وشوفو ليهو فطور وبعد داك نمشي !!
والله ياسعادتك نحن شاكرين على الفطور الجميل وعاوزين نستاذنك نمشي على الميز
ناخد لينا راحة شوية كده وبرضو نستاذنك اسوق دفعتي ده معاي لينا زمن ما اتلاقينا !!!
جداً ياجنابو اذنكم معاكم وعثمان يعتبر نفسو مفرغ معاكم 24 ساعة لحدي ما تقبضوا زولكم ده !!!
اها يادفعة الواطة مغربت حقو نقعد نرتب امورنا ونشوف خطة التحرك كيف !!!
تعرف ياجنابو محمد طالماً زولكم ده عندو قروش تحت يدو فشغلتو دي ما فايته واحد
من بيوت الدعارة او خانات البنقو تلقاهو تاكل هناك هنا عندنا اشهر بيتين للدعارة هم
بيت فايزة الحلبية وبيت زيتونة وديل عندهم احسن بضاعة في السوق !!! وخانات البنقو
عندك خانة عباس الاعرج وخانة حامد الكجر !!!
اها وانت رأيك نبدأ بمنو ياعثمان ؟
والله أنا رأي نداهم خانة عباس الاعرج في الأول !!!

جنابو عثمان انت ما عارف انو السوق اليومين ديل كاشف ومافيهو ابوالنوم !!!
عارفو ياعباس لكن زي ما بقول المثل (بيت الضبع مايخلاش) !!!
والله ياجنابو مافي شيء ياهو القندول الواحد ده وده استعمال شخصي هههههههه!!!
يازول انت موهوم وال شنو أستعمال شخصي يمين ده انا اديك بيهو تلاتة سنة في الرج
انت بتلعب وال شنو ياعباس !!!!
شوف ياعباس نحن قندولك ده بنلقي ليهو صرفة بس عاوزين منك حاجة !!!
تتصلح معانا بنتصلح معاك !!! تتلولو معانا بنتلولو معاك اها قلت شنو ؟؟
جداً ياجنابو عثمان طلباتك شنو ؟
نحن بنفتش لي زول اسمو (عبده) جاي شارد من الخرطوم !!! ماجد ده بوصف ليك شكلو !!!
عرفتو عرفتو زولكم ده اسمو (مختار) ما (عبده) !!!
مختار دفار المهم وينو الزول ده !!!
الزول ده جاني في الخانة كذا مرة وفعلاً لاحظت انو معاهو قروش وبشتري بأى سعر
وقال لي هو صنايعي وعاوز يفتح شغل ويستقر هنا في ربك، وتحتت عرفت انو مصاحب
(بت الخواجة) القاعدة في بيت فايزة الحلبية !!!!
كويس شكراً ياعباس وقندولك ده انا مابفتح ليك بيهو بلاغ وما بخليهو ليك هاك
يا حسن احرق القندول ده قبل نمشي !!!
واله يجنابو حرقت القندول زي الحرقت لي قلبي بس ربنا يعوض هههههه

بت الخواجة دي شنو كمان يادفعة !!!
بت الخواجة دي ياجنابو محمد بت سمحة جداً وصغيرة ظهرت فجأة في ربك
وما معروف جاية من وين !!
وليه سموها بت الخواجة !!!
الزولة يادفعة زرافة بس ولونه اصفر اها قامو الجماعة هنا سموها بت الخواجة هههههههه
السلام عليكم فايزة !!!
اهلين جنابو عثمان وضيوف الخرطوم ههههههههه
الشمار وصلك متين يامصيبة !!!
ياجنابو عثمان انا ماقلت ليك شغلني معاك في المباحث لكن اقل من صول مابقبل
ولازم اكون اقدم من حسنين الصول ههههههه والهت ادرشو ليك درش هههههههه
كدي خليك من الكلام الفارغ ده نحن عاوزين بت الخواجة !!!
والله ياجنابو عثمان (بت الخواجة) دي ليها اكتر من اسبوعين ما جات على
واصله من يوم ماعرفت الولد مختار ده بقت زي المجنونة وقالت شنو قال ليها بعرسك !!!
يعرس ركبو يايمة كان وقف لي حالي هههههههه الغبيانة كانت ماكلة وشاربة معاي في امان
ربها اها تقعد تباري لي جنس الوليد ده يوم القروشه تكمل بطرده ويشتت منها ده كمان كان
ما سوا ليهو جنا في بطنه خوزقه بيهو !!!!
واله ياجنابو عثمان انا من يومي مختار ده قلبي اباهو !!!
شكلو كده سوا ليهو مصيبة في الخرطوم وكت ناس الخرطوم القيافة ديل جونا زيارة ههههههههه
انت عجبك جنابو محمد ده وال شنو بتتضحكي كده ههههه!!!! بختك يادفعة ههههههه
مالو ما بعجبني طويل اخضر قيافة هههههههه
هي هي ماتسرحي لينا بي ناس الخرطوم ديل خليهم شوفي لينا المهم جماعتك ديل
ممكن يكون مشوا وين !! ممكن تكون مشت بيت زيتونة !!!
لالا ما بتمشي بيت زيتونة !!! لانو زيتونة قدر ما حاولت تسحبه مني البت
واعية ابت تمشي هههههه ياجنابو عثمان مالك انت ما عارف والناس كلها عارفه
انو زيتونة بي سماحته دي لكن ضكرية عشان كده البنات بخافو منها ههههههه !!!
ياااااااخ انت مصيبة خلاص الله يدينا خيرك المهم كان جاك اى شمار طوالي اديني خبر !!!
الخبر اديك ليهو انت وال لي جنابو محمد ههههههههههه
هههههه لا اديهو لي حسنين الصول هههههه
بري يايمة مابلزمني الصول اب كرش ده ههههههه عامل وشو زي آخر الشهر كده ههههه
اها يامحمد الفهم شنو !!
تعرف ياعثمان (عبده) ده غالباً حيكون اجر ليهو بيت والا نص بيت وتكل فيهو
مع بت الخواجة دي ونحن ما عندنا حل غير نتحرك بسرعة لانو اى تأخير الشمار
بصلو ويتخارج من ربك !!!

الاعزاء جداً .....
سهام المجمر ، سيف بشير ، معروف حمدين ، مروان محمود ، الزبير صالح
الف شكر للاهتمام والمتابعة واعفو لي عذبتكم هههههه
لكن صراحة الكتابة عاوزة مزاج رايق والشغلة في الخرطوم مشكلة بس ربنا
يهون ........ شيلو الصبر شيلو الغناء هههههههه

متكلين بمزاح يا جنابو


في انتظار البقية


تحياتي

اخيراً ياعبده وقعت في يدنا كنت هذه هي العبارة التى نطق بها محمد وهو
يوقظ عبده من نومه ليجد عدد من الرجال يشهرون مسدساتهم في وجه ويلمح من
بينهم صديقه الخائن ماجد وهو يطاطي رأسه في الارض !!!
والله ياعثمان يادفعة لو ما معلوماتك زولتك فايزة الحلبية دي كان سنة ما نلم في الزول ده !!!
تعرف يامحمد مش بقولو ليك المغني يغني وكل زول على هواه !!! اها فوزية دي
بقي عندها تار بايت مع عبده سرق منها بت الخواجة وزي ماقالت ليك سوقه وقف هههههههههه
والظريفة شنو قالت لي شنو !! الليلة عازمكم كرامة قبضة عبده ههههههههه
اها بتقعد تحضر معانا الكرامة والا بتشتت الخرطوم طوالي !!!
ياريت ياعثمان لكن انت براك عارفه البلاغ ده عامل لينا مشاكل قدر فلازم نتحرك طوالي !!!
طيب اسمعني يامحمد عليك الله في الخرطوم عاوزك تمشي تناوش لي في
الرئاسة قالو في كشف تنقلات طالع واخوك داخل على عرس دايرين نجي
نشم هواء الخرطوم دي شووووية هههههههه!!!
مافي مشكلة يادفعة نشوف ليك نقلية الاحتياطي المركزي مابرضو في الخرطوم هههههه
ههههههه احتياطي مركزي والله كويس انت شكلك كده يامحمد داير تعرس لي
عرس شهيد ههههه يازول انسي الفكرة العرس ذاتو خليناهو هههههههههههه

مبروك يامحمد شغل نضيف والهو انا طوالي ضربت كلمت ناس الرئاسة
انو المأمورية رجعت وتم القبض على المتهم الهارب !!! بس اقعد بي رواقة اكتب
تقرير المأمورية عشان نرسلو الرئاسة !!!
جداً ياسعادتك وسمعت قالو عمك جوزيف بي ورانا عمل غاغة شديدة ومشي اشتكاك وكده !!!
يازول دي عجاجة حدها السماء وناس الرئاسة عملوا لي مجلس تحقيق
قالوا كيف اطرد الراجل من المكتب !!!
اها والحصل شنو !!!
لا الحمد له الموضوع اتحفظ بي لفت نظر واعتذرت للراجل هههههه !!!
اخوك في زون ترقي لو ما كده كنت بتلولو معاهو بس قلنا نقفل الموضوع على كده !!!
وناس النيابة والمدعي العام قالو شنو !!!
ماقالو حاجة بس طلبو الاسراع في اجراءات البلاغ !!!
اها عبده حققتو معاهو !
طوالي في ربك حار حار مع خلعت قومتو من السرير فتحت لي يومية اخدت اقواله فيها !!
طبعا اول حاجة حاول يعمل فيها شفت لكن لمن عملت مواجهة بينو وبين ماجد رجع واعترف !!
بس اهم نقطة بتاعت الاغتصاب للمرحومة كل زول فيهم برميها على التاني !!!
طيب كويس لازم يامحمد تعمل طابور شخصية لي عبده بواسطة الشاهد الشماشي داك !
عشان يتعرف عليهو كبينة إضافية وبرضو ممكن يفصل ليك بين عبده وماجد في انو
لمن عاين بالشباك منو فيهم كان بستعمل في المرحومة ، وبعد داك تسجلوا اقوال عبده قضائياً
والاهم من ده كلو لازم عبده يوصلنا لي حامد العربي باسرعة فرصة ممكنة !!!
والهه ياجنابو ياهو الزول الطويل ده كان مع الجماعة التلاتة الجو في بيت المرحومة !!!
طيب منو في ديل كان بستعمل في المرحومة (ماجد) وال (عبده) !!!
مابقدر احدد ياجنابو انا في اللحظة ديك شفت الزول ده لمحة بس وخفت وجريت !!!
تعرف ياسعادتك للأسف انو الجثة كانت متحللة وناس المعامل الجنائية ماقدرو يرفعوا
عينة نضيفة من اثار الاغتصاب كان ممكن عن طريقه نقدر نفصل بين ماجد وعبده في الحتة دي !!!
اكيد يامحمد كان سهلو علينا المهمة لكن خلينا نمشي لي قدام ونشوف البحصل شنو !!!

متابعين يا جنابو وعجل بالله

Waiting..

Quote: Waiting

يامحمد جلال انت قايل مشوار ربك ده ساهل
خلو جنابو محمد ده يرتاح شووووية ...

يا جنابو افتكر 10 يوم كفاية عشان توصل جنابك محمد ده مش من ربك لو جاي من موزمبيق كان وصل :)
بعدين شوف ناس الكنبة التحتانية بتاعين الفيس بوك ديل برضو زعلانين منك

Quote: من قتل كريستينا !!!

من قتلها ؟؟؟

فوق

من اجل احراج جنابو عمر عثمان

ههههههههههههههه

Quote: فوق من اجل احراج جنابو عمر عثمان ههههههههههههههه

خالد انت شايقي وال شنو الغتاتة عليك شنو ياااااخ

والله صحي بوليس !

شايقي شديد والله صدق ؟
رغم اني ماغتيت :)


خليني اشكي ليك حالي وانت براك قدّر

يا سيد عمر هل تعلم اني كل فترة بضطر اكر البوست ده كلو واقراهو من اولو لاني بحس اني نسيت تسلسل الاحداث كان كيف ؟

اها اسي عندي ليك سؤال

اكروا تاني اسي وانتظر الجديد ولا انتظر الى حين ميسرة ؟ :)

Quote: شايقي شديد والله صدق ؟ رغم اني ماغتيت :)

انا ذاتي شايقي من الــ version المطور الما غتيت هههههههههه
والله ياخالد الكتابة صعبة بس ربنا يقدرني اتمها قريب شيلو الصبر

Quote: انا ذاتي شايقي من الــ version المطور

اتذكرت المقولة حقت ابوالقدح بيعرف محل يعضي رفيقو ديك

ههههههههه


ياسيدي عن نفسي غايتو على اقل من مهلك ولايهمك ياعزيز

الظروف مقدرة والله

تسلم ياجميل

يا جنابو محتاج لتلاتة سنين عشان تعرف القاتل!!!

علي راحتك يا جنابو أصلاً الهلال وطلع ونحن راجين السنة الجاية

قلت ليك علي راحتك يا جنابو
هلالنا وطار والموسم انتهى بالنسبة لنا

نحن قاعدين نسخن من السنة دي لحدي السنة الجاية
نجك ونشرب كركدي

البوست دا وين هسي

سلامات يا الصادق,,

Quote: البوست دا وين هسي

فى نمرة إتنين !!

يا جنابو تتمها ولا نتمها!!
معقولة تبدا القصة 2011 و
2013 قربت تنتهى وإنت مجرجر,,

مشتاقين ياخ,,

يا جنابك

معقولة بس

من رمضان ولي هسع ما تمت

هل تصدق انا اول مرة اشوف البوست ده

وفي قعدة واحدة قريتو للاخر

منترين

سواق لكن يا جنابو ههههههه

Quote: يا جنابك معقولة بس من رمضان ولي هسع ما تمت

وجاء رمضان التالي ولم تتم القصة!!
ولا زلنا في انتظار مواعيد عرقوب أقصد جنابو عمر :)

اليوم أول مره اشوف البوست دا وبقيت اقرا وارجع معقول البوست دا من 2011 وللأن ولا الجهاز يتاعي دا تواريخو ما مظبوطه معقول