والله الا يكون في أصبعك

عبدالماجد ضبطه اخوهوالأكبر مكردم (سفة التمباك في خشمه)
ابراهيم: تعال هنا يا عبدالماجد, إنت بِتْسِف تمباك؟!
عبدالماجد: أنا؟ أبداً , تمباك شنو كمان؟
يازول الـ في خشمك ده شنو؟
أنا خشمي مافيهو حاجة!!
ياولد الـ في خشمك ده ماتمباك؟
ابداً انا اصلاَ ماسفيت تمباك في حياتي!!
إبراهيم يضع سبابته في خشم عبدالماجد ويخرِت بها التمباك منه.
يازول ده شنو؟ ده ما تمباك؟
عبدالماجد: والله إلاَّ يكون في أصبعك.!!

أنا كنت قايل النكريبة الزي دي بتكون مرة واحدة في عمر الدنيا
ولن تتكرر من ناس آخرين ..
لكن عاينو في البورد ده
مش في ناس زي عبدالماجد ده.

أنا عارف إنو طبعاً البوست ده حايحتل الي الصفحات الأخيرة
بسرعة تضاهي سرعة إنهيار الجنيه السوداني لكن مش مهم.
انا دايماً بهمني البوست قروهو كم نفر مش تداخلوا فيه كم نفر.

ههههههههههههههههه
حلوة يا قريبك, المشكلة انو كلنا بقينا عبد الماجد

كيفك ياهندسة..
ياخ دي مسألة تحير الثعلب ذاتو.
أنا كان عارف بوست زي ده بجيبك لينا
كان كتبناه من زمنا البنكتب في الجرايد الحائطية
القصة دي قديمة من زمنا الـ في الإبتدائي
اتذكرتها بعد شفت النكريبة الـ في البورد ده

واضح إنو البورد ده ـ وُجِد ليكون مكانا للجدال
يقول ليك: ده جدل بيزنطي.. وكان الأولي ان يقال:
ده جدل سوداني.[/B]

واحد من ناس عطبرة سمع كورة هلال مريخ في الرادي
الهلال مغلوب ـ قال لا هو ما مقتنع الا تجي الجرايد بكره!!!

والله يا الفضلابي فقعتني من الضحك ..
ها زول تصدق مافي زول عايز يطلع نفسو غلط ..
انا في حياتي قابلتا ناس يغالطوك في اسمك ويقنعوك كمان ..
بس جماعتنا الهنا ديل حيروني والله ..
تجيب ليهو الكلام بي ديليلهو يكبر ليك اللفة ويقعد ويخرخر لمن انت تفهم حاجة ..



مشتاقين والله وكدى ..

يعني هسع كان جيتوا عالجتوا مشكلة النكريبة المتفشية دي
ما كان أخير من العوا الـ بلا الزعل من بعض ماعندها صمرة...
إنتوا كده بتحلوا في مشاكل ولا بِتْوَلِّدوا في مشاكل.

Quote: ها زول تصدق مافي زول عايز يطلع نفسو غلط .. انا في حياتي قابلتا ناس يغالطوك في اسمك ويقنعوك كمان .. بس جماعتنا الهنا ديل حيروني والله .. تجيب ليهو الكلام بي ديليلهو يكبر ليك اللفة ويقعد ويخرخر لمن انت تفهم حاجة ..

مرحبا هشام ـ
ومع النكريبة بس راجيين زول يغلط ـ عشان يبيحوا لنفسهم الغلط.


الناس في البورد ده زي الراجل الصايم رمضان
مرتو ختت الأكل للشفع
هو قعد يقول للشفع:
إنت يا احمد شيل العضم ده
عادل ده ماتظلموهو
اللِّحيمات خلوها لي أختكن ..
مرتو قالت ليهو آآجي ياراجل !! ماتخلي الولاد ياكلوا اكلن.
قال لها: آآهاآآ إنتي دخِّلتي قِدِدِيمك ده ـ ـ والله كمان الا افطر.
وتوووش في نص الشُفَّع.

أخير داك الـ أبوه فتح ليهو الباب والسجارة في خشم الولد.
قَبُل لا بوهو يسألو ـ ـ شبك ليك ابوهو:
ايوه بسجر بسجر بسجر.

مساطيل كبس عليهم البوليس في الغرفة ... جدعو السجارة بالشباك
البوليس قال ليهم قاعدين تسطلو مش كده !!!!!
ابداً ياجنابو حتى عاين سجارة في يدنا مافي !!!
طيب الدخاخين دي شنو ؟؟؟؟؟؟؟؟
والله ياجنابو نحن ذاتنا ما عارفين !!! نحن اجرناها كده !!!.

Quote: واحد من ناس عطبرة سمع كورة هلال مريخ في الرادي الهلال مغلوب ـ قال لا هو ما مقتنع الا تجي الجرايد بكره!!!

غايتو دي ( ملهاش حل )

الفاضلابي ههههههههه

وعشان نخزلك ونرفع البوست ده فوق

نقول ليك .......

نقول ليك

ابعد من ناس عطبرة

Quote: مساطيل كبس عليهم البوليس

هلا بالصفوة جنابو عمر
والله بوستاً جاب جنابو ده ـ مبروك بلحيل.
صاحبك وزميلك (جنابو) عبدالكافي . طبعاً هو معانا هنا في نيويورك.
اخوهو كان بتكلم معاهو بالتلفون من السودان.
اخوهو قال ليهو : ربنا يرد غربتكن ياعبدالكافي.
عبدالكافي قال ليهو: لا يا خوي انتو الربنا يرد غربتكن وتجونا هنا في امريكا.

*******************************************************

اها ياجنابو عمر راجين رايك في نكريبة المنبر دي.

Quote: ابعد من ناس عطبرة

سلامات ياعمدة
أنا كان بِعِدْت من ناس اتبرا ببقا زي السمكة المرقوها من الموية

في ناس هنا لما تلقي فرصة في زول اخطأ:
يسلقوهو وكأنهم معصومين.
تشوف كلامهم وتقريعهم له تقول دي ناس بلا خطايا.

والله يا ود الفاضلابي زي ما قلت الجدل السوداني بقى زي الجدل البيزنطي..
لكن في مواضيع هنا بدور فيها جدل تخليك تؤمن ان ناس الجدل البيزنطي شفوا جدلهم من الجدل السوداني..
لكن برضه بصراحة ما ننسى انو في مناقشات هنا في المنبر العام على مستوى رفيع من الصدق والشفافية والفهم.. وانا عندي لستة من 13 عضو في البورد بوستاتهم كلها صدق ومفهومية وعلى راس هؤلاء واصل علي..
والله يديك العافية

Quote: لكن في مواضيع هنا بدور فيها جدل تخليك تؤمن ان ناس الجدل البيزنطي شفوا جدلهم من الجدل السوداني.. لكن برضه بصراحة ما ننسى انو في مناقشات هنا في المنبر العام على مستوى رفيع من الصدق والشفافية والفهم.. وانا عندي لستة من 13 عضو في البورد بوستاتهم كلها صدق ومفهومية وعلى راس هؤلاء واصل علي.. والله يديك العافية

أميرة الأميرات بت السيد.
انا وكت شفت إسمك قلت اول شئ أدخل عشان أقول آمين.
لإنك دايماً في آخر كلامك بتقولي للزول ـ (والله يديك العافية)
ومعاك نقول آمين آمين ـ هو في أحسن من كده يا أميرة؟
نجي لي كلامك الـ في المداخلة:
أنا بتفق معاك إنو في ناس بتكتب كلام زي الفل.
وبتفق معاك إنو واصل واحد منهم ـ ـ.
لكن:
هؤلاء صاروا زي الشامة في جلد المرة الحلبية.
ومن أسف فإن القبيح طغي علي الجميل .. والموجب العذب غرق في مياه السالب الآسنة.
وكل واحد يدعي ان المعرفة نزلت عليه وحده.
والله يديك العافيك يابت السيد ـ البت الجدعة.

ههههههههههههههههه
الولد ابوه لقى سافي
وبرضو زرا
الولد دنقر علي الواطا وشال لي كتحة تراب
وقال لي ابو :
يا يابا كان انا بسف الترابا دي في خشمي ودعك التراب في خشمو وخلطو مع التمباك وبصقو

لكن ود لبشرى دا اكبر نكار

ماقيل في الجدل البيزنطي:
هو انهم كانوا يتجادلون حول جنس الملائكة إلي أن دهمهم العدو قبل أن يعدو للقتال عدته.
في السودان يقال:
الناس في شنو والحسانية في شنو؟ ويقال: أنهم كانوا مشغولين بسباق للحمير حتي دهمهم العدو ـ والله تعالي اعلم.

هلا ومرحبا ولد العم ـ
ود البشري نكَّار في الكورة بس.
زي زول أتبرا ده لما يتغلب الهلال.

رغم أن هناك فرقاً بين المراء والجدال إلا ان كلاهما يملأ هذا المنبر.
فالمراء هو:
{المراء، والمقصود به في اللغة: استخراج غضب المجادل، من قولهم: مريت الشاة، إذا استخرجت لبنها، وحقيقة المراء المنهي عنه: طعن الإنسان في كلام غيره؛ لإظهار خلله واضطرابه، لغير غرض سوى تحقير قائله وإظهار مزيته عليه. وإن كان المماري على حق ، فإنه لا يجوز له أن يسلك هذا السبيل؛ لأنه لا يقصد من ورائه إلا تحقير غيره والانتصار عليه.} (منقول)
وهذا النوع كما تعلمون موجود في المنبر وبكثرة.

أما الجدال

فهو من الجدل ، والجدل في اللغة : اللدد في الخصومة والقدرة عليها، وحقيقة الجدل في الاصطلاح الشرعي: فتل الخصم ورده بالكلام عن قصده الباطل. وهو مأمور به على وجه الإنصاف وإظهار الحق

روى أبو داود عن أبي أمامة -رضي الله عنه- أن رسول الله -صلى الله عليه وسلم- قال
"أنا زعيم ببيت في ربض الجنة لمن ترك المراء وإن كان محقا، وببيت في وسط الجنة لمن ترك الكذب وإن كان مازحاً، وببيت في أعلى الجنة لمن حسَّن خُلُقَه " رواه أبو داود، في كتاب: الأدب، باب:في حسن الخلق، (رقم الحديث): (4800).

واحد محكر سفتو في نص نهار رمضان اخوه قالو دا ازول ؟انت ماك صائم ؟قالو صائم والله بس احتمال اكنو ناسيها في خشمي من امس

هلا وغلا عثمان كرار

Quote: واحد محكر سفتو في نص نهار رمضان اخوه قالو دا ازول ؟انت ماك صائم ؟قالو صائم والله بس احتمال اكنو ناسيها في خشمي من امس

ضيف دقِّ الباب
صاحب البيت نادهو منوالـ في الباب؟
الضيف: ده أنا.
صاحب البيت: علي الطلاق ده ما إنت!!!
ده ياهو حال المنبر ده.

.

زميل المنبر أخونا الشايقي عنده لازمة بتقول:
فاوضني بلا زعل
الناس يقروا مداخلاته .. ويمروا علي اللازمة دي مرور الكرام.
ليهو حق لما حذفها من مداخلاته .. طالما الناس بتقراها وماتعمل بها.
طيب لزومها شنو؟
أنا كانت عا########ي كتير وتمنيت الناس اللي بكتبوا يتمثّلوا بها.
ــــــــــــــــــــــــــــــــ
التعديل ده عشان الكلمة الشلخها سيستم بكري ده
وتركت أصل المداخلة علي حالها عشان تعرفوا انو نحن ماشين بالبركة
يعني (شختك بختك) هسع كلمة (عاجـ بـا ني) دي عيبها شنو عشان يشلخها؟

الجملة المشلخة كانت:
نا كانت (عاجـ بـا ني) كتير وتمنيت الناس اللي بكتبوا يتمثّلوا بها.

الفاضلابي

يديك العافية

اهلنا زمان قالو الشينة منكورة

لكن بنقول الحكمة ضالة المؤمن انى وجدها اخذها

وحقيقة محاولة الانتصار للذات بالحق والباطل تكون من الادعياء

ولن تجدها ابدا عند اصحاب الفهم والفكرة

واحد العلماء قال اذا جادلني 100 عالم لغلبتهم

وان جادلني جاهل واحد لغلبني

الحبيب علي الفكي
هلا بيك كفيت واوفيت

Quote: اهلنا زمان قالو الشينة منكورة

حقيقة يا فكي كثير من الأمثال الشعبية السودانية فيها نظر.
فمثلا لو قالوا: الشينة مردودة لكان أفضل
وزي الأمثال بتاعة ود ابزهانا اراها تدعو لتثبيط الهمم وقتل الإبداع والصبر والمثابرة:
مثال ذلك:
كان غلبك سدها وسّع قدّها
ودار ابوك كان خربت شيل لك فيها شلية
في سفرتي الأخيرة {ايت لافته كبيييرة فى شارع حي تقول:
سمحة المهلة - طبعا ناس الخدمة المدنية مطبقين كلام اللافتة ده علي اصولو.

Quote: اهلنا زمان قالو الشينة منكورة لكن بنقول الحكمة ضالة المؤمن انى وجدها اخذها وحقيقة محاولة الانتصار للذات بالحق والباطل تكون من الادعياء ولن تجدها ابدا عند اصحاب الفهم والفكرة واحد العلماء قال اذا جادلني 100 عالم لغلبتهم وان جادلني جاهل واحد لغلبني

يا سلاااام عليك وعلي حديثك الطيب
اي نعم هي كلمة طيبة أصلها فرع في السماء وضاربة بجزورها في أعماق الأرض ثابتة
والحسنة بتمعط شارب الأسد

يقال أن ملك طلب مهر بنته ( صوفة من شارب الأسد ) وفشل كل الخُطاب .. وكل من نازل الأسد هزمه
لكن رجل طيب حسن الخُلق إنبرى ان يأتي بصوفة من شارب الأسد
وبالحسنة فعلاً نجح
كان يرمي من بعيد للأسد لحمة ويقترب كل شبر حتى صارت بينهما المعرفة حنين لعاطي ومُعطى
وصار بعدها يجالس الأسد ويطعمه ورتب بيده على رأسه ..
لآمن ويوم تف نتف لو صوفة من شارب الأسد
وذهب بها للملك وتزوج البنت
وصار المثل
الحسنة بتمعط شارب الأسد

ههههههههههههههههه@ فاضلابي
ياخ دي أنجض نجيضة في تاريخ
هذا المنبر الغالاط أهله!!


التور هنا بتحلب عادي!
والبنية على المتهم .. أي والله!!


فـ ..
ما تجوط لينا السوق بالله!!

Quote: التور هنا بتحلب عادي! والبنية على المتهم .. أي والله!!

هلا وغلا الزول السمح ودالصايم
الولد راح لي عمه . عمي أبوي قال ليك اديني الـ حمـا ر بتاعك ماشي بيهو مشوار.
العم: ياولد أرجع قول لي أبوك عمي قال ليك الـ حمـا ر حامل
الأبو: أرجع قول ليهو أبوي قال ليك كمان جانا حِمْل الحـ مـار؟
العم: قول لي أبوك انت قولة أبيييت ا مابتعرفها.

ود عمى سلامات الشوق مطر

ووووين انت ياخى

التمباك والسجائر
ديل اكتر شى بقرفنى فى الدنيا دى
وخاصة السجائر طوالى بتصيبنى قمة

انا والله مستغربة فى النسوان القاعديين مع رجال بدخنوا وبسفوا ديل

ياخى مقرف جداً نفسن بكون

Quote: التمباك والسجائر ديل اكتر شى بقرفنى فى الدنيا دى

هلا بنت عمي الغالية
باقي ليك الغلات ده ما أخير منه السجاير والتمباك؟
الرباطابي جارتو عندها تيـ س فحل راح عشان يستلفه منها.
الرباطابية شامَّة جارها فقالت ليهو:
ماعندي تيـ س أنا تيـ سي بعته.
الرباطابي: بعتيهو متين؟ نان امس الـ بي يَنْفٌر الليل كله فوق غنمك زي المكوجي الـ صَبْحان عليهو العيد ده شنو؟

الناس كتبت كتير عن مسألة الجدال في المنبر والسباب والشتم
ولامجيب - فبدل مانقول ليهم انتو بتأذنوا في مالطة نقول ليهم:
انتوا بتأذنوا في سودانيزاونلاين دوت حوش بكري دوت كوم.

سلام يا حبيب

بوستكم لخص العلة، بس القوا لينا الدواء :)
==
تقول الطرفة أن أحدهم كان يتوهم ويرى نفسه أنه حبة
ويعيش على هذا الوهم متحاشيا كل ما يمكن أن يؤذيه كحبة و خاصة الديوك.

أخذه أهله لأحد الشيوخ لمعالجته ،وبعد فترة من العلاج رأى الشيخ علامات إيجابية على سلوكه
فقال له: لقد تحسنت الآن
قال نعم واقتنعت أنني لست بحبه!

لكن!
البقنع الديك منو؟!

===

إن هنالك بعض الناس يكذبون كما يتنفسون، و اعتقد إن المشكلة الأكبر ليس في كذبهم فقط، لكن المشكلة إنهم يصدقون أنفسهم بلا شك. و ممكن يغالطك عشان يقنعك. و إذا حدث و فشل فى إقناعك بكذبة الواضح، فأكيد أنت فاقد تربوي، أو نسبة ذكاءك منخفضة و و وكمية من الواوات. ما عارف المرض دا اسمو شنو لكن ربنا يحفظنا و إياكم.

عبدالرحيم منصور
نيويورك
*
**

حبيبنا عبدالرحيم
الدواء:
*********
قالوا الأبلم (الأحمق) ماهو شقي. شقي الـ يقارنو. (ينقرن فيه)
وقديماً قيل: الحماقة أعيت من يداويها.
فأحسن دواء ـ التجاهل التجاهل التجاهل.
أو كما قال مصطفي محمود.

Quote: ، و اعتقد إن المشكلة الأكبر ليس في كذبهم فقط، لكن المشكلة إنهم يصدقون أنفسهم بلا شك.

تعرف يا استاذ عبدالرحيم كلامك ده ذكرني واحد كان شغال عامل في المجلس البلدي.
الضابط التنفيذي رفده - زملاؤه نصحوه ان يشكيه للمحكمة الراجل راح علي المحكمة واستعان بواحد من كتبة العرائض اللي بقعدوا قدام المحكمة.
العامل حكي للعرضحالجي طرف القصة بس - وزولك جبد ليهو فرخ فلسكاب وكررررررررررر
قلبة وعدلة -- بعد كتب العريضة قراها للعامل -- العامل انقد بكاء -- العرضحالجي قال ليهو:
بتبكي ليه؟ العامل قال ليهو: أنا ماكنت قايل نفسي مظلوم قَدُر ده.

يروي أنه كان رجلا يقال له أبو علقمــة " قال :
إن الـذئب الذي أكــــل يوسف عليـه السلام كـــان اسمه
" رجحــون" ، فقيل له :
ولكن الذئب لـم يــأكل يوسف ..
فقـــال :
إذاً هــو اسم الــذئب الــذي
لــم يأكـــل يوسف عليه السلام

في ناس في المنبر ده زي علقمة ده.
بي كِده يكون عندنا أبوعلقمة وعبدالماجد سوفار.

كثيرا ما أعجبتني قصيدة زهير إن ابي سلمي التي يقول فيها:

وأَعْلـَمُ مَا فِي الْيَوْمِ وَالأَمْسِ قَبْلَـهُ
وَلكِنَّنِـي عَنْ عِلْمِ مَا فِي غَدٍ عَـمِ

رَأَيْتُ المَنَايَا خَبْطَ عَشْوَاءَ مَنْ تُصِبْ
تُمِـتْهُ وَمَنْ تُخْطِىء يُعَمَّـرْ فَيَهْـرَمِ

وَمَنْ لَمْ يُصَـانِعْ فِي أُمُـورٍ كَثِيـرَةٍ
يُضَـرَّسْ بِأَنْيَـابٍ وَيُوْطَأ بِمَنْسِـمِ

وَمَنْ يَجْعَلِ المَعْروفَ مِنْ دُونِ عِرْضِهِ
يَفِـرْهُ وَمَنْ لا يَتَّقِ الشَّتْـمَ يُشْتَـمِ

وَمَنْ هَابَ أَسْـبَابَ المَنَايَا يَنَلْنَـهُ
وَإِنْ يَرْقَ أَسْـبَابَ السَّمَاءِ بِسُلَّـمِ

وَمَنْ يَجْعَلِ المَعْرُوفَ فِي غَيْرِ أَهْلِـهِ
يَكُـنْ حَمْـدُهُ ذَماً عَلَيْهِ وَيَنْـدَمِ

وَمَنْ لَمْ يَذُدْ عَنْ حَوْضِهِ بِسِلاحِـهِ
يُهَـدَّمْ وَمَنْ لا يَظْلِمْ النَّاسَ يُظْلَـمِ

وَمَنْ يَغْتَرِبْ يَحْسَبْ عَدُواً صَدِيقَـهُ
وَمَنْ لَم يُكَـرِّمْ نَفْسَـهُ لَم يُكَـرَّمِ

وَمَهْمَا تَكُنْ عِنْدَ امْرِئٍ مَنْ خَلِيقَـةٍ
وَإِنْ خَالَهَا تَخْفَى عَلَى النَّاسِ تُعْلَـمِ

لِسَانُ الفَتَى نِصْفٌ وَنِصْفٌ فُـؤَادُهُ
فَلَمْ يَبْـقَ إَلا صُورَةُ اللَّحْمِ وَالـدَّمِ

واري انها ذات علاقة بموضوع البوست.

يقول الله سبحانه وتعالى في سورة الحجرات:


{ يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ.}

أي لأجل التعارف لا لأجل التفاخر، (وكما يلاحظ فصدر الآية يخاطب الناس كافة.)
*******************************************************************************
هو الناس ماسمعت كلام ربنا جاية تسمع قوانين بكري؟

سوفار يمكن تلخيص المسائل التي يطرحها البوست في:
النكريبة والغلاط
الجدال والمراء
التشاتم
التفاخر بالأنساب
والباب مفتوح لمزيد ـ يعني ده بوست قُفة حلبية

اها رايك شنو في الأتنين الأتغالطو في شارع مدني الخرطوم
الأول: الشارع دا طبعا بتاع الخرطوم مدني
التاني : كضبا كاضب دا ياخوي شارع مدني الخرطوم
احتكمو للتالت
اسمع يا حبة دا شارع مدني الخرطوم ولا الخرطوم مدني؟

التالت: هو هسع الشارع وينو ذاتو؟؟؟

انا وافق الزول التالت دا غيتو

Quote: ماقيل في الجدل البيزنطي: هو انهم كانوا يتجادلون حول جنس الملائكة إلي أن دهمهم العدو قبل أن يعدو للقتال عدته.

يا خى الجماعة ديل اللتاريهم 25 سنه وماقدارين يغيروا حكومة

غايتو اختلاف الرأى لا يفسد للود قضية ما اتدعك خشما إلا فى المنبر دا
:
:
:
:
مع التحيات لله الزاكيات

Quote: غايتو اختلاف الرأى لا يفسد للود قضية ما اتدعك خشما إلا فى المنبر دا

مرحبتين حباب ودالحسين
خشمها اندعك والترابا في خشمو
زي ماقلت يا محمد هنا تختلف مع زول في راي إنت:
كضاب
كوز
عنصري
جلابي
كاره روحك
وكل عِبَر الدنيا فيك.
الكتابة في البورد شر لابد منه.
تسلم علي المرور المليان

في كمان نوع تاني من الاعضاء
نامن اكتب مداخلة في بوستاتهم
بحردو البوست ويطفشوا منه عشان مايردوا عليّ
بس انا ديل بعتبرهم ناس محترمين لانهم عاملين لي خاطر
وبي طفشتم كأنهم إختاروا أخف الضررين.
عادي ياجماعة الماديرني يجلي مداخلتي ويابوست ما دخلك فاضلابي.
أحسن زول كانت تراجي تجليني وتجي بعد شوية تقول لي يافاضلابي
شوف ـ (الفط ده حار كيفن) زولة علي نياتها
افتقدتها كثيراً -- العندو منها خبر يقول عووك.
في واحد من بوستات محمد حامد جمعة لقيتا عاملة فيدو
ادت فيهو المصريين بالحتة الـ فيها الحديدة ـ كيفتني شديد.

وفي ناس بدورو الزول يفتِل ليهم فوق راس حبِلُنْ
غير كده الغاغة تقوم ..

ـــــــــــــــــــــ
ياشباب ـ كلمة الغاغة دي ذكرتني حبيبنا طارق الكوتش
والله مشتاق لي مناكفاتو في الكورة ـ لعل المانع خير ياكوتش.
******************************************************
الكتابة الـ تِحت الشخيت دي بتزعل أخونا نجيلة
معليش ياود سنجة للفلسفة أحكام.

وفي ناس هنا يرقعوا جنب الـ قد.

Quote: ياخى مقرف جداً نفسن بكون

اكان جعانة بتشمي ريحتهم دى زى كارتر ديكلاريشن

Quote: اكان جعانة بتشمي ريحتهم دى زى كارتر ديكلاريشن

هووووي يامسنوح أرعي بيقيدك ـ بت عمي ده اختاها
نقوم ندق التور ضحي ـ واتو عريب ساكت من الهده بتفِزوا.

يعني عِلاَّ الواحد يجر ليهو بمبر ويقعد قدام البوست ده.
كل مرة البوست حاتل في قعر الصفحة زي الشافع المابعرف العوم



ــــــــــــــــــــــــــــــــــ
الشافع المابعرف العوم ده بنسميهو دُرَّابة بحر

المنبر ده زي الدوري السوداني
ما محتاج لي مدربين ولا لي حضري

أي زول ممكن يدفق أي كلام ـ وبكده يتكيف ويمشي

ــــــــــــــــــــــــــــ
الناس الذكرتهم أميرة بت السيد في بداية البوست حقهن محفوظ

Quote: سوفار يمكن تلخيص المسائل التي يطرحها البوست في: النكريبة والغلاط الجدال والمراء التشاتم التفاخر بالأنساب والباب مفتوح لمزيد ـ يعني ده بوست قُفة حلبية

تعرف يا حبيب
في الحتة بتاعت الغلاط دي صعبين شديد الزول تجي بي هنا تلقي جاك بهناك تمشي ليه هناك تلقي جاء راجع هنا
بزكروني نكتة الشيخ قالوا جوه مراة وراجل دايرين ليهم فتوي في طلقة وكانت الطلقة الثالثة قال ليهم الحاصل شنو قالوا ليه المراة دي قعد تكاوي في الراجل لمن الهلال اتغلب من اهلي شندي والراجل طلقها
الشيخ قال ليهم دي الكورة بتاعت الاسبوع الفات قالوا ليه ايو
قال ليهم الطلقة دي ما واقعة لانه القوون دا زاته كان اووف صايد

Quote: في الحتة بتاعت الغلاط دي صعبين شديد الزول تجي بي هنا تلقي جاك بهناك تمشي ليه هناك تلقي جاء راجع هنا

هلا بحبيب الكل
قلت لي الجماعة ديل زي صاحبك أبو علقمة بتاع رجحون ده ؟ ـ جوهو بي هنا مشي ليهن بي هناك.
واحد صاحبنا قال والله يا جنس رزقي أنا.
قالوا ليهو رزقك مالو؟
قال: أركب اسافر وراهو للخرطوم ـ رزقي يركب النيسان يرجع القضارف.

Quote: الشيخ قال ليهم دي الكورة بتاعت الاسبوع الفات قالوا ليه ايوه قال ليهم الطلقة دي ما واقعة لانه القوون دا زاته كان اووف صايد

قطع شك الشيخ ده بكون ود البشري.

التين ايدجر في وضع الاستاند باى دخل غرفة والده وهو ينتوى دخول غرفة الشغالة
مخاطبا والده مغالطا :عليكم الله دى طهورة تطهرونا ليها
شوف الغلاط الجد تقول لي صعوط!
جنى

من الذي يكتب بإسم عبد العزيز الفاضلابي ؟؟؟

جاء شيخ في حلتنا وجاب معاهوا ولد صغير

وشغال للجماعه اين الغلام واين ذهبت يا غلام المهم صاحبك عندو العشاء ثابت فته ومعاها دجاجه محمره

صاحبنا مسخوط ربنا ياخد بي يدو ويرجع لي اهلو سالم غانم سرق دجاجه الشيخ المحمره والشيخ لمن عرف القصه دق جرس اين الدجاجه

الجماعه قالوا ليهو سرقا فلان واتعشي بيها صاحبك جاء قاصدنا من ولمن وصلنا قال يا فلان انت مطرود من رحمة الله 15 يوم


المهم صاحبنا قال لا يمشي ويغالط الشيخ كيف هو مطرود من رحمة الله وكيف هو حرامي




خاار ج النص أكتشفنا معي مرور الوقت انو الشيخ مخلص وتاجر يعني زول دنيا



تحياتي يا عبدالعزيز ليك وللضيوف الكرام

وكان الإنسان أكثر شيء جدلاً (آية قرآنية)




ـــ
سلامات يا فاضلابي ..

الفاضلابي سلام
بوست اكثر من رائع عسى ولعل الناس تستفبد منه والمؤمن مرآة اخيه
هاك دى
القطر اتعطل فى محطة ام على
الجاعة نزلوا البحر وقالوا ياناس الزول المابعرف يعرف يعوم ماينزل
اهه فى واحد قالوا له يازول بتعرف تعوم قال لهم اخوكم تمساح ماتخافوا عليه
نزل ومن الحجره جب غطس مسااافه طويله ماطلع الجماعه قايلنو زولا غطاس
لما المسافه طالت اكثر من اللازم واحد قالهم نلحق الزول .. وغطسوا وراهوا وطلعوهو
..قالوا له كيف ياتمساح ... قالهم لاحوله ولاقوة الا بالله العوم نسيناهو تب
والجماعه قر قر قر قر قر
المكابره لزوما شنو؟؟؟؟

Quote: التين ايدجر في وضع الاستاند باى دخل غرفة والده وهو ينتوى دخول غرفة الشغالة مخاطبا والده مغالطا :عليكم الله دى طهورة تطهرونا ليها شوف الغلاط الجد تقول لي صعوط! جنى

جني لاتجيب لينا الهوا

Quote: من الذي يكتب بإسم عبد العزيز الفاضلابي ؟؟؟

تراجي
ودالمدير خليك في بِشِّيرك بالمنفاخ ـ ـ نحن بنبشر بالسرهيتا المضببة.

اخربو ليك؟

Quote: جاء شيخ في حلتنا وجاب معاهوا ولد صغير وشغال للجماعه اين الغلام واين ذهبت يا غلام المهم صاحبك عندو العشاء ثابت فته ومعاها دجاجه محمره

مرحبا بالشامي

واحد من ناس الشؤون الدينية (واعظ) عامل ليهم غلبه في الخرطوم نقلوه واحدة من مناطق الشِّدَة أدبة ليهو.
الجماعة المشي ليهم كل يوم بعد صلاة العِشا بعد الدرس يقولوا لشافع منهن :
أجري ياولد جيب عشا مولانا,, جيب عشا مولانا,, الشافع يجري يجيب ليهو قرعة مليانة لبن , مولانا يضربها ليك والجماعة ينصرفوا.
نامن يوم مولانا اكتشف انو الجماعة بعد ينصرفوا بمشوا يضربوا ليك المريسة ويطمبروا لآخر الليل.
يوم جابوا ليهو قرعة اللبن وهو تاريهو خلااااس الكاروشة منجضاهو.
شال ليك قرعة اللبن وفنننن ـ ـ وبي زهج قال ليهم:
عشا مولانا ـ عشا مولانا ـ عشا مولانا .. إنتوا الشؤون الدينية دي جايبا ليكن واعظ ولاِّ كديـ س؟

Quote: عشا مولانا ـ عشا مولانا ـ عشا مولانا .. إنتوا الشؤون الدينية دي جايبا ليكن واعظ ولاِّ كديـ س؟

هههههههههههها زولك اشواقو لحاجات مجراها اليمينا يا عزو

Quote: وكان الإنسان أكثر شيء جدلاً (آية قرآنية)

الحبيب تيسير
تحية طيبة..
كما قدمنا في صدر هذا البوست فالجدل بعضه محمود وبعضه مذموم
وهذا مانريد التنبيه له في هذا البوست واوردنا مقابلة بين الجدل والمراء.
ونورد طرفاً من خواطر الامام الشعراوي حول تلك الآية من سورة الكهف:

بسم الله الرحمن الرحيم

{وَلَقَدْ صَرَّفْنَا فِي هَذَا الْقُرْآن لِلنَّاسِ مِنْ كُلّ مَثَل وَكَانَ الْإِنْسَان أَكْثَر شَيْء جَدَلًا}

يقول الامام رحمه الله.
يقول تعالى: { وكان الإنسان أكثر شيء جدلا} [الكهف: 54] أي: كثير الخصومة والتنازع في الرأي، والجدل: هو المحاورة ومحاولة كل طرف أن يثبت صِدْق مذهبه وكلامه، والجدل إما أن يكون بالباطل لتثبيت حجة الأهواء وتراوغ لتبرر مذهبك ولو خطأً، وهذا هو الجَدل المعيب القائم على الأهواء. وإما أن يكون الجدل بالحق وهو الجدل البنّاء الذي يستهدف الوصول إلى الحقيقة، وهذا بعيد كل البعد عن التحيّز للهوى أو الأغراض.
ولما تحدَّث القرآن الكريم عن الجدل قال تعالى:

{ وَلاَ تُجَادِلُوأَهْلَ لْكِتَابِ إِلاَّ بالَّتِي هِيَ أَحْسَنُ.. } [العنكبوت: 46]
وقال:
{وَجَادِلْهُم بِالَّتِي هِيَ أَحْسَنُ..}

Quote: ..قالوا له كيف ياتمساح ... قالهم لاحوله ولاقوة الا بالله العوم نسيناهو تب والجماعه قر قر قر قر قر المكابره لزوما شنو؟؟؟؟

مرحبا حسن مختار ودالخليفة
الظاهر من مداخلتك إنك من جيهتنا ديك ـ من إندينا علي حسب لسان فيسل هليل.
المكابرة برضو ممكن نضيفها لمواضيع هذا البوست
*************************************************************
الجعلي سمع زول غرقان يصيح : يابومروة يابومرة.
الجعلي تُلُّبُتْ وراهو ,, وبقوا الاتنين يغتسوا ويقلعوا وماقادرين يمرقوا
شافوهم ناس نزلوا وراهم انقذوهم الاتنين ـ بعد عرفوا القصه سألوا الجعلي يازول إنت بتعرف تعوم؟ قال ليهم لا.
طيب وكت مابتعرف تعوم نازل وراهو ليه؟
الجعلي قال ليهم: هو قال يابومروة ولاّ قال يالعوامين؟

Quote: اخربو ليك؟

بتخربو يافرتاك العامرة
انا عارفك جابك عشا مولانا ده.

في ناس ينجروا ليك كلام من راسن وعاوزنك تصدقو
لكن في ناس بِتقَطِّع ليهم الـنجريبة في روسينن.
الـ نَجِر ممكن نضيفو لمواضيع البوست برضو.
بلدياتنا اول مرة يمشي الخرتوم ـ زار متحف الخليفة في امدرمان.
جاء يحكي للجماعة في الدكان:
شوف عيني ديل رحت متحف الخليفة لقيت محل وضؤ الامام المهدي
تريان (لين) لي يوم الليلة.
واحد من اعمامنا قال ليهو: ليه؟ أصلو كان بتوضأ بالزيت؟

نجي للناس الـلي بتستخدم عبارات تلبد وراها عشان تسئ
اما الي اشخاص او معتقدات الـخ ..
مثال ذلك:
عبارة مثل الإسلام السياسي ـ تلقي الواحد يستعملها للطعن في الاسلام
ويوهم الناس انه لايقصد الاسلام.

Quote: الجعلي سمع زول غرقان يصيح : يابومروة يابومرة. الجعلي تُلُّبُتْ وراهو ,, وبقوا الاتنين يغتسوا ويقلعوا وماقادرين يمرقوا شافوهم ناس نزلوا وراهم انقذوهم الاتنين ـ بعد عرفوا القصه سألوا الجعلي يازول إنت بتعرف تعوم؟ قال ليهم لا. طيب وكت مابتعرف تعوم نازل وراهو ليه؟ الجعلي قال ليهم: هو قال يابومروة ولاّ قال يالعوامين؟ ]

>>>>>>>>>>>>>>>>>>>>

الله يجازي محنك ود الفاضلابي
يعني حتخلينا نضحك ضحكة ود الصائم اسبوع كامل... لكن بصراحة دائما بنسمع ان الجعليين هم اصحاب المروة واهل الكرم والشهامة..حتى في نكات تيراب الكوميديا والفرق الأخرى بيصوروا الجعلي بأنه فعلا صاحب المروة وانه عنده استعداد يقدم مساعدته للكل دون فرز,,,, والسؤال المنطقي هو .. هل هذه الصفات الأصيلة والنبيلة لسع موجودة في الزمن الحالي .. ولا الكلام ده كان زمان.. وكده حدد لينا مناطق الجعليين في السودان بيبدأ من ياتو قرية وتنتهي في ياتو قرية..
والله يديك العافية

Quote: هلا بنت عمي الغالية باقي ليك الغلات ده ما أخير منه السجاير والتمباك؟ الرباطابي جارتو عندها تيـ س فحل راح عشان يستلفه منها. الرباطابية شامَّة جارها فقالت ليهو: ماعندي تيـ س أنا تيـ سي بعته. الرباطابي: بعتيهو متين؟ نان امس الـ بي يَنْفٌر الليل كله فوق غنمك زي المكوجي الـ صَبْحان عليهو العيد ده شنو؟

والله لكن مبالغة يا الفاضلابي كتلتنى بالضحك

[B]اميرة الاميرات ـ البنت الجدعة
صباحك ـ خير
اري يا اميرة ان المروة قيمة إنسانية لايختص بها شعب دون شعب او قبيلة دون أخري ـ علي الرغم من الأشياء التي رسخت عندنا كسودانين وتوارثتها الاجيال علي أنها خصائص وميميزات تفرقنا عن غيرنا هذا من ناحية مايدعيه السودانيون في الجملة ـ اما علي المستوي القبلي فقد نسبت لقبائل مختلفة قيم ولوازم ينقصها الدليل وغالباً ما تقوم علي التنميط والتعميم المُخِل.
فمثلاً ينسب للرباطاب المساخة ـ ويقصد بها سرعة البديهة. وينسب الي الشايقية الغتاتة ـ وهي في حقيقتها الحذر الزائد تجاه الآخرين.
كل هذه في رأيي موروثات شعبية لايسندها تحقيق كما اسلفت.
وبالعودة الي المرؤة ـ انا عشت في امريكا مدة كافية تجعلني اتعرف علي احوال اهلها بمختلف اصولهم الاثنية والثقافية .. فوجدت من اناس شهامة ومرؤة لاتقل عن تلك التي تفتحت عيوننا عليها ورضعناها مع لبن امهاتنا.
وان شاء الله اورد لك في مجال آخر نماذج من تلك التجارب حتي لايكون الحكم عاماً.
ودمت بخير ـ والله يديك العافية والمراد.

Quote: والله لكن مبالغة يا الفاضلابي كتلتنى بالضحك

بت عمي الغالية ـ وضاحة.
طبعاً نكتة زي دي ولاد البنادر مابفهموها ـ باستثناء ولاد إشلاقات البوليس.
هاك دي كمان:
شافع رباطاب أمه مَلَّحت ليهو كِسْرة بي لبن ـ ورجعت تعوس.
بعد شوية الكِسْرة حَفَّت (نِشفت) الشافع كورك لي امُّو.
يمه الكِسرة شِربَت اللبن
أمه بي نهرة: يا ولد ما تَشْرَبو ـ مَرَقَتبو من القدح؟

العزيزة أميرة بالنسبة لسؤالك عن مناطق الجعليين ارفق لك الوصلة هذه عساها تجيب علي بعض من سؤالك.
والله يديك العافية والمراد.


http://www.darg3l.com/############.php?f=114

أصبحنا واصبح الملك لله

المداهنة ـ بلغة البورد (كِسير التلج)
إن شاء الله تكون موضوع المداخلات القادمة

واحد أخونا (عضو في البورد ده) ...... أيامهم الصغار، طلع مع أخوانو الكبار في راس الراكوبة.
أبوهم جاء نهرهم ونزّلهم .... كل ما واحد ينزل، الأبو مستنيهو بي خيزرانة ... وصررررر ياخد نصيبو ويمشي.
فضل صاحبنا (وكان أصغرهم) أبوهو يقول ليهو: أنزل يا ولد ..... وهو يجوعر: (والله يابا أنا ما معاهم).

فاضلابي إزيك.

Quote: وهو يجوعر: (والله يابا أنا ما معاهم).

سلامات يابو العزائم
يعني ده من يومو كان مشروع بوردابي ناجح ..
ياخ ضحكتني نامن الخواجية الجنبي اتخلعت.
*****************************
وبي جوعيرا وحليفتا ـ ده فات عبدالماجد كدي
نان الراكوبة الطالع فوقها دي راكوبة الجيران.
ياخ ماتورينا ليهو عشان نَنجضو ليك.

شوفوا كسير التلج ده كيف
ناس اللغة العربية بسمّوه حسن التعليل
ده شاعر ملء السمع والبصر قال وقد أصاب مصر زلزل وكان عليها كافور الأخشيدي

ما زلزلت مصر من كيد يراد بها ** لكنها رقصت لعدلكم طربا
الزول ده كان بقا بوردابي كان الأنقاذ غلبت 10 صفر

ود الفاضلابي

والله وجدت كل ما اريد معرفته عن الجعليين وعن مناطقهم وقراهم . وطبعا اشهر قرية هي التراجمة .. وعرفنا الآن عن التراجمة الكثير الكثير,,.. والمعلومات كثيرة ومتوفرة .. اظنك انت جعلي يا ود الفاضلابي
والله يديك العافية

Quote: اظنك انت جعلي يا ود الفاضلابي

من جهة الأب أما من جهة الأم فهم كواهلة - سمعتي بي حبوبتنا (شغبة)؟
سنورد لكم طرفا من حكايتها وشعرها ان شئتم - وعشان نحكيها عاوزين عشرة توقيعات في البوست ده.

Quote: .. وعشان نحكيها عاوزين عشرة توقيعات في البوست ده.

............,,,,,,,,,,,,,,,,,,,,,,,,,,,,,,............

انا شاورت الموقعين ادناه وقالوا موافقين .. بس عليك تبدأ لينا بالأشعار والحكاوي.. والموقعين هم/

- وضاحة
- عواطف
- بسمات( قارئة خارجية
- عبد الحميد( قارئ خارجي من الفيس بوك)
-محمد البشرى( اول المتداخلين في البوست)
-هشام كمال
-المصور الشبلي
-خالد علي
- علي محمد
-ود الصايم
-ود منصور
( هسع ديل اكثر من عشرة,, وممكن كمان نزيدك لغاية عشرين ثلاثين.. لو حبيت..فوالله عندك نوادر يتمنى الكل قراءتها لأنها بتزيل عننا الكثير من هموم الغربة..
و انا متأكدة ناس ود شيقوق وحبيب الكل وجني وسيد احمد وابو الريش وحسن ومحمد ما حيكونوا معترضين لكن حيكونوا منتظرين بفارغ الصبر..

والله يديك العافية

مرحبا بالاميرة
لِحقتي تسوي كل ده ـ غايتو الجمهوريين لو شغلوك مدير لحملتهم الانتخابية الديمقراطيين حايكونوا في الباي باي.
خلاص يا أميرة (Your word as good as gold ) لحين ميسرة او كما يقول ودالمنسي.

سأتناول سيرة أميرة شعراء البطانة شغبة تلخيصاً ما أمكن التلخيص من كتيب المؤلفين :
عبدالقادر عوض الكريم الحسن وعمر عبدالرحيم كبوش – وقفات مع شعراء البطانة.
ذلك الكتيب علي صغر حجمه الا انه يحوي ثروة أدبية لا تقدّر بثمن.

كتب المؤلفان:
لايملك المرء إلا أن يحترم هذه المرأة الفنانة العظيمة. التي نصَّبت من نفسها أميرة علي قومها, في وقت كان ابطال قبيلتها من الكثرة بحيث لا تحصيهم ذاكرتها. والتي يدل شعرها دلالة كبيرة علي مدي عظمتها وقوة شكيمتها.
تنتمي شغبة إلي قبيلة الكواهلة فرع الشدايدة، تزوجت شغبة من الفارس "ود دقلش" من قبيلة المرغماب وهي فرع من فروع الكواهلة.
كما تزوجت شقيقتها "علابة" من أحد أفراد قبيلة البطاحين وأنجبت الشيخ برير أحد فرسان البطاحين. وكان قوي الشكيمة صلب العود وكأنما قٌدَّ قلبه من حجر. ولبرير هذا دور فعال في تاريخ حياة شغبة
سنتطرَّق إليه لاحقاً.
إستقي المؤلفان معلوماتهما عن شغبة من:
1- الشيخ أحمد علي كرف . من كبار رجالات القبيلة.
2 - الشيخ أحمد عوض الكريم. شيخ قبيلة الكمالاب.
3 - حسن النور علي. من زعماء القبيلة.
وكذلك كل من السادة أفراد قبيلة المرغماب وهم:
1 - سرالختم عبدالقادر . من زعماء القبيلة.
2 - عبدالله حمد شوراني. شيخ القبيلة وشاعرها.
3 - سليمان علي سليمان . من كبار رجالات القبيلة.
نواصل حين ميسرة إن شاء الله.

إرتبطت شغبة بزوجها "ود دقلش" وشغفها حباً تبادلانه سويا لدرجة ان مدحها وفخرها كاد يقتصر علي قبيلة زوجها "المرغماب" دون سائر القبائل بما فيها قبيلتها.
كانت شغبة قوية الشكيمة لاتركن لكونها أنثي خانتها الدلال والتلطف . كانت شعلة من النشاط تمارس ادواراً كان يمارسها الرجال عادة.
تميَّز شعرها بالرصانة والجودة. وكانت قاسية وجارحة خاصة عند استنفار قبيلتها لأخذ الثأر وهي تدفعهم للعراك مع الأعداء , أو عندما تدفعهم للإغارة علي القبائل الأخري لنهب إبلها.
شعرها الموجه لأعداء قبيلتها كالسيف البتار وهو مانسميه اليوم الحرب النفسية. وإن كان شعرها موجهاُ لقومها أشعل فيهم الحماسة والغيرة.
ولعل أقسي معركة حدثت لها كانت تلك التي دارت بين قبيلة البطاحين وقبيلة المرغماب "قبيلة زوجها" وفيها هجم الشيخ برير إبن أختها "علابة" يقود فرسان البطاحين الأقوياء علي قبيلة المرغماب, وهزمهم شر هزيمة, وقُتِل فيها "ود دقلش" زوج شغبة وإبنها "نائل" أمام ناظريها.
كانت المعركة حامية ثبت فيها فرسان القبيلتين, وكانت شغبة تقف إلي جانب رجال قبيلتها تبث فيهم الحماس, ولما رأت زوجها يسقط من فرسه حزَّ الألم في نفسها فقالت:

كُرْ يانوح من ده الخراب
عَجَبْ عينَيْ تَاكُلْ فيهو الكـِ لابْ
ود دقلش مَيَّحْ من الـرِّكَابْ
أَخيرْ ده مِنْ قُولَة جَفَلُوا المُرْغُمَاب.

* كُرْ: لفظ تقوله النساء للإستنكار عند سماعهن او رؤيتهن لموقف رهيب.
* يانوح: تتوسل بسيدنا نوح (عليه السلام)
* عجب عيني: قرة عيني ـ تعني بها إبنها "نائل"
* مَيَّح: فقد توازنه علي ظهر الفرس
* من الِّركاب: من ركاب فرسه ـ والركاب يطلق علي السرج وعلي الروافع المدلاة علي جانبي السرج ويضع الفارس قدمه فيها للركوب ويثبت قدميه داخلهما وهو علي متن الفرس.
* أخير ده: ذلك أحسن وأفضل.
* جفلوا: هربو من العدو وتركوا المعركة.

يقال والعهدة علي الرواة أن البيت الأول من القصيدة اعلاه قالته إمرأة أخري كانت تنافس شغبة علي الزعامة ولم تقله شغبة , ويعللون ذلك بأن شغبة لا يمكن أن تقول "كُرْ" لأنها كلمة خاصة بالنساء ودليل علي الضعف والخنوع وشغبة ليس كذلك.

نواصل إن شاء الله

إنتهت الحرب والألم يعتصر شغبة وهي تنظر الي الوادي "عِديد نوير"
ـ مسرح القتال ـ وقد عمه الخراب فقالت تخاطب الوادي:

يَقِّـنْ لـي خَـرابَـكْ يـاعْـدِيدْ نِـوِيـرْ
راحـوا النايْرِينْ فَضَلوا البِمَاسْحوا الكـيلْ
ود دقـلش يَكَـفِّي لي هَـوَايدَ الـلـيـل
ود نَـوَّاي كِـتِلْ فـارسْ التقيلة ام حِـيلْ
شـغبة ويـن تَقَـبِّل بي كـبيرةْ الضّْـيلْ

ــــــــــــــــــــــــــــــــــــ
* - يَقِّنْ : أصبر , تيقَّن (Make no doubt)
* - الـبِماسحوا الكيل: المترددون
* - هَـوايد اليل: آواخر الليل, دليل علي كرمه
* - ود نَوَّاي: أحد فرسان القبيلة
* - كبيرة الضيل: ناقتها كبيرة الضرع ـ وفير اللبن.

ظلت شغبة تلهب حماس ماتبقي من فرسان القبيلة شعراً وتحثهم علي الثأر من البطاحين لمقتل زوجها وفرسان قبيلتها حتي يعود الأمن ـ وحتي تتمكن من ورود ماء "عديد نوير" آمنة بناقتها "كبيرة الضيل"
وحتي يعود للوادي نضاره وعماره ـ بعد أن حوله البطاحين إلي ارض يباب.
أستجاب الفارس "حمد المليحابي" وهو احد فرسان المرغماب فشد رحاله الي حيث قبيلة الأمرار وموطنها منطقة "الـباك" وطلب منهم ان يساعدوه في أخذ الثأر من قبيلة البطاحين , ومكث عندهم عامين يجمع الفرسان ويعد الشبان لمعركة الثأر.
تقول الرواية أن قبيلة "الأمرار" أمدته بسبعة الاف شاب إشترط فيهم أن يكونوا من شاربي التمباك لأن شارب التمباك يكون أشد ضراوة في القتال.
عاد المليحابي يقود جيشاً عرمرماً مطعماً بشبان الأمرار خاض به معركة الثآر والكرامة ضد البطاحين ـ وينجلي غبار المعركة عن هزيمة ساحقة أُلْحقت بالبطاحين قتل فيها الكثيرين من فرسانهم وأُخذت إبلهم غنيمة وكان الصيد الثمين هو الشيخ برير الذي أُخذ أسيراً ليكون الهدية التي تِقَدَْم لشغبة لتبرد نار وترها في زوجها وابنها وفارس قبيلتها "ود نواي:

وفي المداخلة القادمة إن شاء الله نحكي لكم مشهد اللقاء بين شغبة والشيخ برير إبن أختها "علابة" وماذا قالت شغبة؟

ُكانت شغبة قد طلبت أن يؤتي بالشيخ برير حياً لتأخذ ثأرها بيدها, وقد حقق حمد المليحابي طلبها.
باخلاق الشجعان لم تُنْكِر شغبة شجاعة أعداءها "العركشاب" وثباتهم للقتال
ثباتاً فاق تصوُّرَها. فوصفتهم بالإقدام رغم انها صبَّت جام غضبها عليهم فقالت:

دُبْ الْعرْكشَابْ وَكْتَاً يَلوكوا المُرْ
تدبـتْ للكَـتال مِـتْلَ اْلـكبـاش الغــــرْ
يَـدعكـو علي الـصـف الـْ دِمِـيهـو تْـخُـرْ
وْ يَـصْفَا لُوْنُو مِـتِلْ دَهَـبْ الجِمَـارْ الحُرْ

* دُبْ: إسم فعل أمر بمعني: إخْسأ ـ البعض يقولون: تُبْ
* تدبت: تثبِت
* الكِتال: القتال

فهي تصف العركشاب"فرع من فروع البطاحين" اعداءها فتقول إنهم يتسابقون إلي صفوف القتال مثل الكباش الغر وأعظم مارأته منهم ان وجوهم تبدو صافية كلون الذهب المجمر رغم انهم يخوضون الوغي
والمعركة حامية الوطـ يس وهذه شهادة منها لأعدائها بثباتهم ورباطة جأشهم
عندما رأت شغبة فرسان قبيلتها مع فرسان الأمرار يتقدمهم حمد المليحابي
جادت قريحتها بهذه الأبيات التي خلدت معركة النصر إلي يومنا هذا فقالت:

حمـــد المـليحابي سَـدَرْ لـلبـــــاكْ
وسنتين بِدولِب في الـ بِشْرَبُوا التُمباك
كَـتَلْ الشيخ برير وحَرَقْ حَشَا الدَعَّـــاك
وجَــابْ الـ في الَّصفيـه رقهن بـتـراك

* كَتَلْ: قتل
* الدعَّاك: رضيع الناقة
* بتراك: يلمع

تذكر شغبة كيف أن "حمد المليحابي" ذهب اليالأمرار في الباك وجيَّش الجيوش وقاتل البطاحين وأسر زعيمهم "الشيخ برير" الذي سبق ان أذاقهم علقم الهزيمة وأخذ ممتلكاتهم وكان قاسياً عليهم بأخذه نياقهم الوالدة وترك صغارها تتوجع من الجوع والحنين لامهاتها , ولكن المليحابي وفرسانه استطاعوا أن يعيدوها ومعها إبل البطاحين المغلوبين علي أمرهم .
ويقول الرواة أن حمد المليحابي بعد ان سلَّم شغبة الشيخ برير حياً ربطته من خِلاف وأحضرت النقارة وأعدت لها العدة , وبدأت بالشيخ برير فقطعت يديه وحملتهما والدم يقطر منهما وبدأت تدق بهما علي النقارة في
وحشية متناهية وتغني في حقد ومرارة وتخاطب برير بقولها:

جِيدْ يابرير الضُقْتَ النُّكور والهولْ
وكسْرَ الهمبَروك عيش السديرة الخورْ
سـوقةَ اْلخَـدَمْ الْعَقَدَنْ قِفِيهِنْ شــولْ
كَتْـلَةَ البَرْمَكي مـع صبــاح الـ بولْ

* جيد: الحمد لله
* الضُقتَ: ذُقت
* الهمبروك: الزرع الذي لم ينضج بعد
* الخدم: تعني بها هنا الإبل حديثة الولادة
* العقدن: اللائي نظرن
* قفيهن: رقابهن
* كتلة البرمكي: تعني به الرجل الكريم والمقصود به هنا زوجها
* صباح الـ بول: تقصد به الصباح الباكر وقت ان اغار عليهم البطاحين مع ساعات الصباح الاولي.
للقصة بقية بإذن الله

تراكا يا ود الفاضلابي ما ساهل... معقولة انت داسي مننا الدرر والنفائس دي كلها .. هذا التراث المهم..

متابعين ومستمعين وقارئين كل حرف وكل كلمة .. فالمرء لا يمكن ان يمل من مثل هذا التراث .. فواصل سردك .. ولا نود ان نعلق الآن حتى لا نقطع بنات افكارك وتسلسل سردك
والله يديك العافية

إستمرت شغبة في غنائها الجنائزي تخاطب أسيرها "الشيخ برير" وهي تضرب بذراعيه بعد ان فصلتهما عن جسده وهي تقول:

جِيد يابرير ضُقْتَ النكـور إتْ حـي
وكسرَ الهمبروكْ عيشْ السِديرة الني
سُوقـةَ الخَدَمْ الـ عَقَدَنْ قِفِيهِنْ لَـيْ
كَتْـلَةْ البـرمـكي مع صباح الضَّـي
ــــــــــــــــــــ
* ضُقْتَ: ذُقْتَ
* وإتْ حي: وأنت حي
* صباح الضي: اول خيوط الضياء
(وأنا أميل هنا الي انها تقصد بـ (كَتْـلَةْ البرمـكي مع صباح الضَّـي) ابنها نائل الذي قتل يوم قتل "ود دقلش زوجها" فكأنها تقول له أنك قتلت "البرمكي" زوجها كناية عن الكرم مع صباح الضي "إبني" اي مع إبني في يوم واحد

B] تقول شغبة ومازالت يدا الشيخ برير تقطران دماً وهي تعزف بهما علي وقع لحنها الجنائزي:
الحمد لله الذي أذاقك يابرير مثل ماجنته يداك من المنكرات وقتلك الزوج الحبيب والإبن وإهلاكك الحرث والنسل.
[/B

واستمرت شغببة تقطع أعضاء الشيخ الأسير حتي مات , وتٌعرَف هذه المعركة بمعركة "الدباغات" وهي حفائر ماء تقع شرق أبي دليق.
وكان برير يتمتع بشجاعة نادرة لم تستطع مدية شغبة الحادة أن تؤثر فيه أو تبدي منه خضوع مما جعل شغبة تمدحه علي ثباته فتقول:

ودالعِزْ بـرير من ضَرْب النحاس مابخآف
وعِنْدو الدُكْرِي الـ بياخُد تلات أخْفَـاف
حَالِفْ بالطَّـلاق مَايْفوتْ بـنات عَـسَّاف
إلاَّ الـرَاس يَفَـارق الجِـتَّة واللَّكْتَـاف

Quote: متابعين ومستمعين وقارئين كل حرف وكل كلمة

يا أميرة أنا خايف ودالصايم وود البشري ديل يطالبوا بذهاب هذا البوست إلي خور بكري.
عشان مابرضو في البرير ده.هم عارفين المَغتَّا ـ (وش يشبه وشوش ناس شندي)
دي برضو عارفينها.
******************************************************************
معليش ده كسر لحاجز الرتابة ـ أصلو البوست ده زي ماقلنا قٌفة حلبية
تلقوا فيهو كل العاوزينو.

بعد موت الشيخ برير بيد شغبة قام إبن عم برير وكان يُدعي "اللين", وهو أحد فرسان البطاحين الأشداء وجمع قبائل جهينة والسدارنة ووعدهم انه إذا عُقَدَ له لواء النصر علي المرغماب سوف يترك لهم كل الغنائم وله الثأر فقط, وقد أقسم اللين قبل المعركة بأنه سوف يأخذ نساء المرغماب سبايا.
سمع أهل شغبة بعزم اللين علي غزوهم ولما كان الغزو يستهدف المال "الإبل" فكرت قبيلة شغبة تغيير مكان رعي إبلهم حتي لا ينهبها اللين وحلفه. ولكن شغبة الشجاعة المتعطشة لملاقاة اللين أشارت علي اهلها بالصمود وعدم مبارحة مضارب القبيلة.
ونظمت ذلك شعراً وقالت:

جَملي في أم شديدة قَلِّدو وهدو
والمال لي مَساديرو القُدُمْ وَدُّوا
والطـير ياسرَاحين الوجوه غَدُّو
والبِجْـفِلْ شَنَاعُـو للبنات ودُّوا

* قلدوا: قلدوا عنقه بالزينة
* هدوه: أجعلوه فحلاً للنوق
* المال: الإبل
* مساديرو القُدُمْ: مكان رعيها القديم
* سراحين الوجوه: أصحاب الوجوه الخشنة
* البِجفل: الذي يهرب من المعركة

وكده حدد لينا مناطق الجعليين في السودان بيبدأ من ياتو قرية وتنتهي في ياتو قرية.. والله يديك العافية
======================================================================

قال الشاعر حمدان يمدح ناظر عموم الجعلين الشيخ محمد إبارهيم فرح

من البسري لي السبلوقة
حدد دار أبوك
يا أبــ رسوة كدّق فوقا
الحالآك تسوقو بحلاوة وروقة
والكازاك حفرك ليهو
لي المخروقة

أختي أميرة السيد هذه هي حدود منطقة الجعلين
البسري : هو نهر الاتبراوي ( نهر عطبرة )
السبلوقة هو الشلال السادس قرب حجر العسل والمِسيكتاب جنوب
أبــ رسوة هو الأسد
كدّق اي امسك فيها قوي وكنكش فيها وما تفك منها شبر إلا بعد خراج روحك
الحالاك .. الذي كان حلو تعامل معك
بتحالي وتقربو ليك
الكازاك : المكازي هو المعاكس بتاع الغلاط الزي ود الصايم دا
حفرك ليهو لي المخروقة
والمخروقة هي عظمة الرجل مع الحوض
ايس بتحفر لي وتدفنو

أها يا أميرة جاك سيد الجلد والراس
ود المنسي أب سَرَهيتاً تشق الراس
مو زي شيقا ينقرِف في العنكوليب
والكلام يكوسو من دفاترو والكرَّاس

Quote: أها يا أميرة جاك سيد الجلد والراس ود المنسي أب سَرَهيتاً تشق الراس مو زي شيقا ينقرِف في العنكوليب والكلام يكوسو من دفاترو والكرَّاس

سموك الأميــــرة والأمارة حكراً ليكي
يا بت الرُجال كل الخُلوق رهن إيديكي
بديكي خبرو عرريب الدندر المتباهي
تحت الشدر جالس يرعى غنم أبليس ولآهي

Quote: وكده حدد لينا مناطق الجعليين في السودان بيبدأ من ياتو قرية وتنتهي في ياتو قرية.. والله يديك العافية

الأخت الفاضلة أميرة
حدود أراضي الجعليين وكما حددتها لك من قصيد الشاعر حمدان
هي من نهر عطبرة إلى شلال السبلوقة
لكن قد تجدي جعليين هنا وهناك الهجرات القديمة من أجل الزراعة والمرعى
كان سبب لكثير من الهجرات وشندي والمتمة هما معقل الجعليين
وأرجو أن لا يساء فهم المقصد لكن المعلومة تولد من معلومة والفائدة تعم
إيد مع إيد بتجدع بعيد

الزول القريزين دا ( شيقوق ) هسي بجي ناطي زي الصاعقة المخاوية
مخاوية .. او مخاوي دي يا أميرة معناها متلبسه جن مخاوي
لذا يقال للمجنون في عامية السودان ( مخاوي أو مخلوت ..والأصل في الكلمة مخلوط بجن .. المخاوي بكون قوي في بنيته ويقال قوته من قوة الجن الراكيو ....
لكن زولك ( شيقوق بعرفني زي جوع بطنو )
هيييييع يا المسنوح أنا الككو الفجخ الطين
جيتك إستعد

وهــــذا نص القصيد التي مدح فيها الشاعر حمدان
ناظر عموم الجعليين ( الحاج محمدإبراهيم فرح )
يقول فيها :

سمعتَّ بيك
شكرّوك لي
وعجبني شَكرتّك ...
صمد المتعاقيات ....
الصف تَهزّو نترتّك ...
الشنب المبرم ...
شوفتو ليك إتفرتّك ...
وا أسفي الشديد
من بدري ما عاشرتك

من البسري لي السبلوقة
حدد دار أبوك
يا أبـ رسوة كدّق فوقا
الحالآك تسوقو ...
بي سماحة وروقا
والكازاك حفرك ليهو
لي المخروقــــة ...

أسد الكداد القارح
حَجر غابتو تب
منع البفر والسارح
من نهراتّك ...
الفارس بحيض ..
والدارة تصبح طارح
قمر السبعتين
المو هلّا ود أمبارح

كلمة الضِل ...
حاشاك إن مشيت ساخيلّا
سترة الحال ...
وبتبذل مالك وضحيلّا
الفرسان وخيلا
شوفتك بتبرد حيلا
بتفرج ضيقها...
بعد أجوادا يغلب حيلة

Quote: ..من البسري لي السبلوقة حدد دار أبوك يا أبــ رسوة كدّق فوقا الحالآك تسوقو بحلاوة وروقة والكازاك حفرك ليهو لي المخروقة

>>>>>>>>>>>>>>>>>

عزيزي شيخ العرب ود المنسي

ما دام ود الفاضلابي سماك سيد الجلد والراس .. فده معناته ان جدودك كلهم جعليين .. وطبعا ده برضه واضح من هذه الأبيات الشعرية الرائعة لوصف مناطق الجعليين في السودان..
واولا شكرا على هذه المعلومة المفيدة لأن الشخص يمكن ان يحفظ الشعر اسهل من النثر .. وبعد شرحك لمعنى هذه الأبيات الشعرية فلا يمكن ان ننسى أين تقع مناطق الجعليين..
وهذا يذكرنا ما قرأناه ان الشعر في زمن الرسول الكريم(ص) كان مثل وسائل الاعلام في زمننا هذا .. لأن كل العرب آنذاك كان يحفظ الشعر.. وجاء إعرابي للرسول (ص) يريد ان يتعلم منه اوقات الصلاة وكم ركعة في كل صلاة..

وبدأ الرسول الكريم يعلمه بأن الظهر اربع ركعات والعصر اربع ركعات والمغرب ثلاث ركعات والعشاء اربع ركعات والصبح ركعتان.. وعندما يريد الرجل ان يستعيد ويسترجع ما قاله له الرسول(ص) ينسى ويلخبط في العدد.. وكان هناك شاعر يجلس بالقرب من الرسول الكريم وقال له :" دعني اعلمه يا رسول الله.. فأذن له الرسول الكريم بذلك فقال الشاعر للإعرابي:

يا رجل : ان الصلاة اربع واربع
ومن ثم ثلاث واربع
وصلاة الفجر لا تضيع

فحفظ الرجل اوقات الصلاة من أبيات الشعر ..
وكما قلت انت فإن قبائل الجعليين تنتشر في كل بقاع السودان لأن ظروف الحياة الاقتصادية الصعبة تحتم على الانسان ان يرتحل في ارض الله الواسعة طلبا للعيش الكريم..
والله يديك العافية والصحة..

تَجَمَّعَت قبائل جهينة والسدارنة بقيادة "اللين" ودارت معركة ضارية بين قبيلة شغبة والبطاحين في مكان يسمي "شَمُومْ" حيث عقد لواء النصر للمرغماب مرة أخري وقتل الفارس الجسور "اللين" وكان لشغبة دور عظيم في هذه المعركة اذ طلبت من كل شبان قبيلتها أن يخلعوا أمشاط شعرهم (الخلال) ويغرسوها في مكان معيّن, حتي اذا هرب أحدهم استطاع أن يعرفه الجميع وكذلك طلبت من المتزوجين أن يربطو أطفالهم خلف ظهورهم حتي لا تسول لهم أنفسهم الهروب من المعركة.
مات اللين في المعركة وكان مقتله بشعا اذ انغرست في جسده عشرات الحراب في لحظة واحدة حتي عندما سقط من ظهر فرسه لم يسقط جسده علي الأرض بل انغرست كعوب الحراب في الأرض وصار جسده معلقا لاحول له ولا قوة وانكشفت عورته, وهرب بقية المحاربين فتبعهم فرسان شغبة وضربوا أعناق من لحقوا بهم وقطعوا اذيال من اسرعت بهم خيولهم . انبسطت اسارير شغبة ربما لأول مرة منذ مقتل زوجها وابنها وبدأت تمدح فرسان قبيلتها وتذم أعداءها فقالت:
أهَـلي بُقَّةَ الحـنضل دوا الـجربان
أهلي الـ في قَفَاهُن بِربطوا الطُفلانْ
والله الـ بِـحَـالِقُنْ عـلي النسوان
يـرقـد رقـدة اللين كَـدِي عريان
****************************************
بقة: جرعة وهي ما يقال له بالعامية جغمة
قفاهن: خلفهم علي ظهورهم
* الطفلان: ألأطفال
* البحالقن: الذي يحوم حول نساءهم لسبيهن

Quote: عزيزي شيخ العرب ود المنسي ما دام ود الفاضلابي سماك سيد الجلد والراس .. فده معناته ان جدودك كلهم جعليين .. وطبعا ده برضه واضح من هذه الأبيات الشعرية الرائعة لوصف مناطق الجعليين في السودان.. واولا شكرا على هذه المعلومة المفيدة لأن الشخص يمكن ان يحفظ الشعر اسهل من النثر .. وبعد شرحك لمعنى هذه الأبيات الشعرية فلا يمكن ان ننسى أين تقع مناطق الجعليين.. وهذا يذكرنا ما قرأناه ان الشعر في زمن الرسول الكريم(ص) كان مثل وسائل الاعلام في زمننا هذا .. لأن كل العرب آنذاك كان يحفظ الشعر.. وجاء إعرابي للرسول (ص) يريد ان يتعلم منه اوقات الصلاة وكم ركعة في كل صلاة..

أميرة لك التحية مباركـــة سلااااام

تسلمي يا الأميرة ولي السمح قلتي
سردك مُنير قولة حق وكان ابت زندي
سمتك بت أصول تَبيِنو حروفك وتندَّي
ودا الصُح قلتو ليك لا بجامل لا مكري

نعم الحديث قولك .. فعلاً الشعر كانت أسهل وسيلة إعلامية تنئ عن كل مناحي وصف اي قبيلة أو مجموعة
لوقت قريب كانت القبائل تهتم كثير بشعراءها اللذين يرفعون قدرها بقولهم ( الشعر ) مدحاً وفخرا
مثال شاعر قبيلة الجعليين كان اسمه ود النصيح وكان رجل حكيم ...

ومثال
من مسرية المك نمر التي نظمها العبادي ويقال والعلم عند الله انه اقتبس كثير من شعر النصيح ( بالذات في المواقف التي أورد فيها
قول ود النصيح .. )
وقد تكون هذه الأبيات قد قالها ود النصيح فعلاً وقد يكون لا ويكون هو كلام الشاعر العبادي

مرة وفي جلسة في ديوان المك نمر .. بعد ان إتخذ المك موقف يجير فيه رجل ويحمية من النيل به من قبيلة اخرى
لاحظ المك نمر أن النصيح كان صامت ولم يدلي برأيه مع مستشاري المك عندما فتح لهم حق الاشارة ( أن يجير هذا الرجل أم لا )

وكلام المك نمر هنا قول العبادي
قال المك:
مالك يا النصيح ...
متل التقول في محنة
قوا أسمعنا ...
وبالصوت الجهور أفرحنا
أبدا لي بالحكمة
وأخير أنصحنا
وأختم لي بالحماس
وبي الفينا قول لي نحن

قال النصيح :

خلي عجب النفس ..
الدنيا قيدا قصيّر
ووشك أطرحو ...
لا تكون دوام متغيّر
كم سبق الأجل
خلّا الأمر متحير

ثم الحماس قال لي :
نحن الما إنجمع
لي فارغة كوم لمتنا
في قامة البلاد ..
تسمو مقاليد همتنا
تيجان الملوك
تعمل حِساب عمتنا

وكما أسلفت قد يكون القوله كله قول الشاعر العبادي وقد يكون قد اقتبسه من شعر ود النصيح
لان ود النصيح يقال انه كان يميل للرد في اي قول وحتى لو ونسة بأبيات من الشعر فالشعر كان حديثه
العادي مع الناس ... والله أعلم
أغلب شعره فقد لانه لم يكن مدوّن كتابة .ز فقط وصل لأجيالنا ما حفظه بعض الناس
وأكيد لو دوّن شعر ود النصيح لوصل إلينا مجلدات كُثر

لك الشكر والتقدير أميرة عرفتي كيف تستلي منا الحديث
وبالمناسبة ماني شيخ عرب ولا نشأت في بيئة قرية أو بادية ( وهي المناطق التي يتوفر فيها مثل هذا الحديث )
أخوك ود بندر ( لكن متهم شديد بهذا التراث )
ول قلت لك الحقيقة الثانية لَدُهشتي ( انا عشت اكثر من نصف عمري في بلاد أوروبا )
لك المودة والتقدير اميرة

تسخر شغبة من جهينة والسدارنة وتصف كيف غلبهم فرسان المرغماب فتقول:

إتْلَمَّـتْ جُـهَيْنِـة والسـدارنـة الـزُرٌقْ

وارْجُوهُنْ صَبَاحَاتْ الكواهلة الفُرُقْ

عَدُّوهُنْ شَمُومْ مِتْلَ النِّعَامْ الطُّرُقْ

فِسْـرَاعْ شَبَّـعُوا اللين كُـرَاسْـةً بُـرُقْ

خَلُّوا العَرْكَشَابْ رَاقْدِينْ شَتَاتْ في الحُرُقْ


* اتلمت: تجمعت

* ألزرق: سود اللون والوجوه الكالحة

* أرجوهن: انتظروهم

* الفرق: الشجعا
* كراسة برق: الحراب يلمع لونها لأنها مزينة بسلوك الفضة

* عدوهن شموم: طردوهم حتي جاوزا بهم وهو حفير بسهل البطانة دارت فيه المعركة
* الحرق: الأرض التي أصابها الحريق

Quote: خَلُّوا العَرْكَشَابْ

الفاضلابي العزيز وكريم
عليك الله معنى هذه المفردة ( العركشاب )
هل هي اسم لجماعة (من الناس المعادينهم )
ام مفردة تعني : انهم هوان ككلمة قرازين .. سهيت ... اضينات وغيرها من المفردات التي تعني أنهمناس ضعاف
لا قدرة لهم

تحياتي ومعزتي
أسعفنا بمعناها لو تيسر

هلا بابن عمي
العركشاب : من أحلاف البطاحين وهم فرع منهم يسكن البطانة. إشتهروا بالكرم والشهامة كما عرفوا بضراوتهم في القتال واستبسالهم في المعارك. وكان العركشاب قد دخلوا المعركة نصرة للبطاحين باعتبارهم فرع منهم وكانت معهم الفروع الاخري . العسافاب والعبادلة والعلاماب وقد ذكرتهم شغبة فيما تقدم من شعرها.

Quote: هلا بابن عمي العركشاب : من أحلاف البطاحين وهم فرع منهم يسكن البطانة. إشتهروا بالكرم والشهامة كما عرفوا بضراوتهم في القتال واستبسالهم في المعارك. وكان العركشاب قد دخلوا المعركة نصرة للبطاحين باعتبارهم فرع منهم وكانت معهم الفروع الاخري . العسافاب والعبادلة والعلاماب وقد ذكرتهم شغبة فيما تقدم من شعرها.

بارك ربي فيك فضلك يدوم يا الفضلابي
بالخير تشلوح ومعلـوتك تعم مو دابي
تمساح اتبراوي وشيقوق يصيح وا عذابي
كايتو المسنوح خلي اليفوت لي غــادي


متابعين مع شغبة والبطاحين نم وقل أطربنا

Quote: أخوك ود بندر ( لكن متهم شديد بهذا التراث ) ول قلت لك الحقيقة الثانية لَدُهشتي ( انا عشت اكثر من نصف عمري في بلاد أوروبا )

>>>>>>>

والله يا خالد ود المنسي لمن نقرا ليكم انت ود الفاضلابي بنفتكركم ناس بدو ساكت وقاعدين قدام خيمة في الخلا وقدامكم جمال وخرفان وبراد شاي ( شاهي) زي ما بيقول ود الكباشي، وبتقولوا في الدوبيت والشعر... هسع انت طلعت ود بندر وود الفاضلابي في امريكا .. وان دل هذا على شئ فإنما يدل على اصالتكم ومعدنكم الأصيل الذي لا ينسى الجذور .. وانني ارى ان حياة البادية وحياة الريف وطيبة اهل الريف والمودة والعشرة السايرة بينهم افضل الف مرة من جوطة المدن والتمدن الزائف ... ومباراة الشعر البدوي الأصيل بينك وبين ود الفاضلابي مباراة رائعة والحوار بينكم يجذبنا للإستماع وكلنا آذانا صاغية وانتما تتفوقان على انفسكما، ولعل هدوء البادية واهل الريف يصيبنا منه شئ وسط هذا الكم من الازعاج والتوتر وسرعة الحياة المنطلقة كالصاروخ الذي نعيش فيه في بلاد العم سام...
والله يديكم العافية

تمساح اتبراوي وشيقوق يصيح وا عذابي
كايتو المسنوح خلي اليفوت لي غــادي

لومـك بي أكايتو في الهـبيجة ام لهيب
والبـدخل هـنا كتالو ماببقا لينا صعيب
نتُرسو قـوافي نـامن رويسـو يشـيب
يزازي بالأسافير مرة يختا ومرة يصيب.

وتستمر شغبة في وصف حال الأعداء ابان المعركة فتقول:

إتْـلَمَّتْ جُهَيْنَةْ وطُرْطُرْ اُمْ هَبُّودْ
يَـحَسْبُوهُ كِـتَالْنْا بالحَجَر والعُودْ
اَرْجُوْهُنْ صَبَاحَاتْ الكواهلة قُعُودْ
فُسْرَاعْ شَبَّعُوا اللِّين من المَـتْرودْ
**************************************
* اتلمت: تجمعت
*
طرطر ام هبود: تحقير لهم حيث تشبههم بالرماد*

* كتالنا: قتالنا
* أرجوهن: انتظروهم
* المترود: الحراب التي حميت في النار وصقلت حتي صارت حادة

Quote: والله يا خالد ود المنسي لمن نقرا ليكم انت ود الفاضلابي بنفتكركم ناس بدو ساكت وقاعدين قدام خيمة في الخلا وقدامكم جمال وخرفان وبراد شاي ( شاهي) زي ما بيقول ود الكباشي، وبتقولوا في الدوبيت والشعر... هسع انت طلعت ود بندر وود الفاضلابي في امريكا .. وان دل هذا على شئ فإنما يدل على اصالتكم ومعدنكم الأصيل الذي لا ينسى الجذور .. وانني ارى ان حياة البادية وحياة الريف وطيبة اهل الريف والمودة والعشرة السايرة بينهم افضل الف مرة من جوطة المدن والتمدن الزائف ... ومباراة الشعر البدوي الأصيل بينك وبين ود الفاضلابي مباراة رائعة والحوار بينكم يجذبنا للإستماع وكلنا آذانا صاغية وانتما تتفوقان على انفسكما، ول..عل هدوء البادية واهل الريف يصيبنا منه شئ وسط هذا الكم من الازعاج والتوتر وسرعة الحياة المنطلقة كالصاروخ الذي نعيش فيه في بلاد العم سام... والله يديكم العافية

يا سلااااام يا أميرة
شاهي ... لها وقع في النفس تكيفك قبل ترشف بقة من الكبايى ( بي شفطة لها صوت ... حـــا يكيفني الشاهي دا شفففففففففف )
كنت ذات مرة في الزراعة لوقت متأخر بعد المغرب ( في عطلة وأنا عائد من المجر )
الترابلة ( المزارعين قجو كفتيرة الشاهي بي اللبن ... واللبن لبن ضأن .. وشادينها في بعر بقر جاف ... والله يا اميرة هذا كان أجمل طعم شاهي شربته في حياتي وبعدها وصلت لشئ ... أن دخان النار له أثر كبير في طعم ما طبخ فيه ... كدي قجي ليك حلة بي بعر بقر جا تلقيها أجمل شئ .. بي الحطب أقل درجة .ز بي الفحم تقل درجة لكن برضو حلوة .. بالغاز اقل درجة .. بالكهرباء بتكون شوية ما فيها طعم لكن مادة مالئة للبطن والبطن حوية ونملاها من التالاها .. وام الطبخ بالمياكرويف دي بسوي السرطان أبعدي منو يا أختي )
في مجداعة الدوبيت أنا متعدي ولا أجيده لكن الكلام لما أدور أداعب المسنوح ود شيقوق بشوية كلام صداقة تحفه مكاوه بجي برا تصدي ...
بلاد العم سام ( اليانكي ) الما هنا
الله يكون في عونك .. من بردها وعواصفها وترجعي لي أهلك سالمة أمينة وينصلح حال البلد الطاردة لبنوها
وكيف ننسى القديم والفات قديمو تاه بل نبحث وندقق في القديم كلما أتاحت الفرصة لذلك ودا المفروض نبش القديم يزودك بروح الماضي ويدفعك
وأنت تحمل سلاح وما نهضت الحضارات إلا بعد أن شربت القديم وتزودت به ( لكن مسك العصاية من النص بخليك زولاً فتيران ما قادر تحصل وتقيف في بكانك والناس عييييييييك تفوت وأنت تتلفت زي ابو التي تي ( نوع من الطيور )
أثر الريف في الحضر واضح وسوف أتناوله مرة لو مد الله في العمر ( ولحين ميسرة من الله )
تسلمي يا أميرة الحديث له طعم خاص في بوست رجل أعزه جداً ( الفاضلابي ) وحضرتك
ولك التقدير والأحترام
تحياتي

يا فاضلابي النضم في حياة شغبة الميرغابية
لا أكذبك كنت فيه أعلم القليل وجاء هذا البوست يدعم جانب ثقافي مهم
وإت بتعرف كيفن بريد مثل الحديث دا
كنت فقط أحفظ ما قالته في ولدها حسين وأعرف انها كتبت أسمها في تاريخ السودان رغم أن أسلوبها في الحياة كان فيه تعدي على جيرانها
لكي توسع رقعة أرضها وتقوى شوكة حُكمها ( وكان هذا عادي في ذلك الزمن ... التعدي بلا سبب .. مرات لأسباب واهية يمكن أن تحل لكن كانت الناس بتركب رأسها وما بترضى الحقارة .. ومرات كدي ساكت لما يشوف شيخ جماعة زاع صيته .. ويقوم ينوي بس يمرمغ لي نخرتو في الواطة )
المهم متابع بلهفة .. عشان كدي كتر لي ما تقعد كل مرة تدينا حقنة بي شوية بنسلين أملئ الحقنة لي الباطوس وأحقنا يا فاضلابي في كل مداخلة
هههههههههههه

اجيك لي المسنوح مقطوع الطاري
زولك بقى مانقستو عديل يخت اللابتوب في الغرفة ويشغل الفيديوها الحبشية ويتنخج زي الطرفة جنب البحر لما تهب الهبوب


لومـك بي أكايتو في الهـبيجة ام لهيب
والبـدخل هـنا كتالو ماببقا لينا صعيب
نتُرسو قـوافي نـامن رويسـو يشـيب
يزازي بالأسافير مرة يختا ومرة يصيب.

ود شيقوق إطير ماتحجيني بي إسمو
مسنوح مسخوت زولين فيهو ما بختلفو
زي دابي الرجيمة مأذي الخلق بي سمو
إتلافا ريح الخلوق قُبال يكمل نضمو

سلامات يابن عمي
حكاية شغبة مع ولدها حسين ستكون قريباً بإذن الله
وهي حكاية عجيبة ـ ونرجو المعذرة منكم ومن القارئ
الكريم علي انزال الحكاية بالقطاعي ـ فالمشاغل كتيرة
وشغالين بنظام الزول الـ بغتس في البحر ويبق ياخد ليهو
نفس ويغتس تاني ـ الدرر دايرا زول نفسو طويل.
اما زولك المسنوح ده قدر ما (دُودَرْتو) عشان يَقْبَضْ في شرك البوست ده ينْفُد منهاـ زي القطايا.

Quote: اما زولك المسنوح ده قدر ما (دُودَرْتو) عشان يَقْبَضْ في شرك البوست ده ينْفُد منهاـ زي القطايا.

ابن عمي سلاااام
أخد راحتك بس الشفقة لمعرفة القصة هي الدفعتنا نطلب
حقيقة لقمة العيش حارة والجري وراها بدور همة

زولك بوريك تجيبو كيف ( المسنوح ودشيقوق )

حكايتــو مع الشرك زي القطايا فطين
براوغ وينسرت سل السبيبة من العجين
بِجيبنّو الصبايا يقعد نايم مفتح عين
وأنا لابدلّو أنـا الككو الفجخ الطين

وتستمر شغبة في ازدرائها لأعدائها فتقول:

الـيـومْ يـاجْـهَينة حَـدَّكُـنْ فُـتّْوه
وْسَعيتُولْكُنْ خُيُولْ درب النُّكُور عُسْتُوه
فـارسْ السَبْعَتينْ جِـيدْ اللُّـقَا ضُقْتُوه
كُوسُولْكُنْ سَبِيبْ ضَنَبْ الحُصَانْ أكْـتُوه


* حدكن: مكانكم – أي تطاولتم أكثر من مقامكم
* سعيتولكن: ربيتم لكم خيلا
* درب النكور عستوه: طريق البدع والفعل المشين سلكتموه
* كوسولكن: ابحثو لكم عن
* أكتوه: اربطوه – في اشارة الي جز فرسان المرغماب اذناب خيول جهينة الهاربة بفرسانها.

تخاطب جهينة وتقول لهم لقد تعديتم حدودكم المرسومة لكم وفعلتم ما لم يكن في الحسبان يدعو للاستغراب وليس من طبيعتكم لأنكم أصبحتم أصحاب خيول والخيل لا يمتلكها الا الشجعان الشئ الذي استغرب له. فأنتم لستم أهلا لذلك. ولكن الحمد لله الذي جعلكم ترون بأعينكم فارسنا – فارس السبعتين وهو أحد فرسان المرغماب الأقوياء ويعرف باسم محمد وداحمد العامرابي.

ويقال أن محمد ود أحمد جري وراء أحد فرسان جهينة ولما أوشك أن يلحق به ضربه بسيفه ولكن حصان ذلك الفارس كان أسرع في الهرب من حصان محمد ود أحمد فقطع ذيله بدلا من أن يقطع رأس ذلك الفارس الهارب , فتتهكم عليهم شغبة وتقول: أبحثوا لكم عن شعر لتربطوا به ذيل ذلك الفرس حتي لايراه الناس فيعرفوا أنكم هربتم من المعركة , وفي هذا منتهي العار عليهم ودليل قاطع علي أنهم هربوا أمام فرسان قبيلتها خوفا علي أرواحهم.

الأخوة الفاضلابي وخالد وبقية المتداخلين
متابعة واهتمام لهذا البوست الرائع

Quote: من البسري لي السبلوقة حدد دار أبوك يا أبــ رسوة كدّق فوقا الحالآك تسوقو بحلاوة وروقة والكازاك حفرك ليهو لي المخروقة

الأخ خالد:
من البسلي لي السبلوقة
حجِّر دار أبوك يا أب رسوة كجِّر فوقا
الحالاك تسوقو بي سماحة وروقة
والعاداك حفرك ليهو للمخروقة
حجر وكجر: يحجر أي يزود عنها، يكجر (من الكُجرة الواحدة دي): أي يغطي الصقر غنيمته بجناحيه
أو يحدد التمساح (أب رسوة) منطقته ويمنع ورود الحيوانات

(البسلي قرية صغيرة غرب نهر عطبرة (مسقط رأسي)
على مسافة 20 ك تقريباً شرق الدامر)



تحياتي مثنى وثلاث ورباع

يا فضلابي براحة علي البوست دا ما الحق عشرة صفحتنا
عشان تسوقوه الربع الجاي
وفي باب كثير التلج دا حصلت قدامي واحدة شديدة خلاص

في وزارة كدا عملوا يوم لدعم نازحي ابكرشولا وتحديد في اليوم السابق لاعلان تحرير ابكرشولا وصاحبنا دا مديره اتبرع ليهم بي شنطة كبيرة ملايانة ملابس
تاني بعد اعلان تحرير ابكرشولا صاحبنا بتكلم مع مديره قال ولله رئيس شوف هدومك مبروكات كيف حرروا ابكرشولا هههههههههه

يا فضلابي براحة علي البوست دا ما الحق عشرة صفحتنا
عشان تسوقوه الربع الجاي
وفي باب كثير التلج دا حصلت قدامي واحدة شديدة خلاص

في وزارة كدا عملوا يوم لدعم نازحي ابكرشولا وتحديد في اليوم السابق لاعلان تحرير ابكرشولا وصاحبنا دا مديره اتبرع ليهم بي شنطة كبيرة ملايانة ملابس
تاني بعد اعلان تحرير ابكرشولا صاحبنا بتكلم مع مديره قال ولله رئيس شوف هدومك مبروكات كيف حرروا ابكرشولا هههههههههه

Quote: انا والله مستغربة فى النسوان القاعديين مع رجال بدخنوا وبسفوا ديل ياخى مقرف جداً نفسن بكون

في الفندق في شهر العسل العريس مرق حقت الصعوط ودردم سفتو وكان داسي الموضوع ايام الخطوبه
العروس : اوووب علي انت بتسف ؟
العريس : خلف كراعو وقالها انا بسف وبطلق
العروس: مامشكله انشاء الله تنفعك

Quote: في ناس هنا لما تلقي فرصة في زول اخطأ: يسلقوهو وكأنهم معصومين. تشوف كلامهم وتقريعهم له تقول دي ناس بلا خطايا.

الفاضلابى الحنين كيف حالك يا سمح
بالله لاقاك زول مسالم ومتصالح مع نفسه زى ود حسنة ده ؟
ياخى ديل خلصوا من يوم الحساب ونفضوا ايديهم وجو على المنبر
جنس وضـــ ـــاعتهم دى لاقتك؟؟

المنسي

Quote: ود شيقوق إطير ماتحجيني بي إسمو مسنوح مسخوت زولين فيهو ما بختلفو زي دابي الرجيمة مأذي الخلق بي سمو إتلافا ريح الخلوق قُبال يكمل نضمو

تعجبني وقت ترفع ضرعاتك لا فوق وتلولح حجباتك وتقوم تنده س ف ل ي ك البجيب ليك النضمي السمح من جبال واسو

Quote: تعجبني وقت ترفع ضرعاتك لا فوق وتلولح حجباتك وتقوم تنده س ف ل ي ك البجيب ليك النضمي السمح من جبال واسو

ههههههههههههه
يا الفاضلابي اخوي

جاك دابي الجبال الفي الحُجار متكّور
سمو فاير ينفث فيحيح مقلب عينو يدّور
وليد الدندر السهيت عِلا قاري ومتطوّر
بلقطو بي عصا كع بجيبو للجابرة مدوّر

اثبت يا عرريب وخلي الجقلبا ...
انا بازل ضراعي إلا أجيب خبرك ههههههه
نحن يمين
كان حرّت ندخل الجُلة ونجيب سوميت
وكان بردت بُكار ماهن صفايح زيت
هيييييييييييييع
أنـــا الكـ كّو ......

Quote: بالله لاقاك زول مسالم ومتصالح مع نفسه زى ود حسنة ده ؟

حباب ودالموج حبابو
حالي اللسان مرحابو
نور دارنا بي كتابو
ود حسنة عنوان جوابو

Quote: ياخى ديل خلصوا من يوم الحساب ونفضوا ايديهم وجو على المنبر

ماكابر مكابر إلا من غفلته عن نفسه

*********************************************************

اصبر لي في المسنوح بوريهو النكور وكتين عرف الدرب.

حكاية شغبة مع ولدها حسين

يحكي الرواة انه كان لشغبة ابن يدعي حسين وقد شب حسين هذا دينا تقيا وكان يدرس القرآن الكريم في احدي الخلاوي , وكان مجتهدا في حفظه , ولكن هذه الحال لم تعجب أمه , فكانت تراه والخمول ندين في الوقت الذي كانت تريده محاربا شجاعا مثل بني قومه فاطلقت شغبة قذيفة شعرية أصابت ولدها حسين في صميم كبريائه

أَريتَكْ يَاحْسين مَا أشوفْ لوحَك مَعَلَّقْ
وُيُـومَاً كَـاتِلِـنْ وُيُـومَاٍ مَـفَـلَّـقْ
وُيُومَاً فُوقْ ضَهَرْ اْلـ في شَايْتُو عَلَّق
قَـاعِـدْ ليْ للـزَّكا وْلَـقْطَ الْمـحَلقْ

فهي لاتريده جالساً هكذا يمسك بلوح الخشب يتعلَّم بل تريده بطلاً مثل فرسان قومها يسوق أمامه دَبُّوكة الإبل المسروقة وهو مضروب تنزف الدماء من رأسه , ويوماً يركب علي جمل حر سريع قوي.


إن اراد المولي
ـــــــــ
لشغبة مع إبنها هذا سجالات كثيرة نوافيكم بها

Quote: إن اراد المولي ـــــــــ لشغبة مع إبنها هذا سجالات كثيرة نوافيكم بها

يا اخي دي مرأة مركبة ماكينة خطرة بتاعت راجل عيونو حُمر
أريتا لو كان ولدها شيقوق دا كان شقتو وعلقتو منعراقيبو
كلام الله ما دايرا يعرفو
وشن طعم يكون فارس لو ما عرف حق الله صاح في البداية
واصل متابعين يا جميل

Quote: يا اخي دي مرأة مركبة ماكينة خطرة بتاعت راجل عيونو حُمر

صحيح يامنسي عرف التاريخ نساء تمْيَّزن بالصلابة والجلد والراي السديد
وتسيدن اقوامهن.

تسترسل شغبة رحمها الله في إالهاب مشاعر ولدها حسين لتحمله علي تبني اسلوب حياتها وحياة شبان قبيلتها فتقذفه بأخري قائلة:

يَاحسينْ أنا ماني أُمَّـكْ وُاِتْ مَاكْ وَلَدِيْ
بَطْـنَكْ كَـرَّشَتْ غَـيْ البَـنات ناسِـيْ
ودِقْـنَكْ حَـمَّسَتْ جِـلْدَكْ خَـرِشْ ما فيْ
لاكْ مَضْـرُبْ بِحـدِّ السِيـف نَكَـمِّد فيْ
ولاكْ مَضْرُب بي لِسَانْ الصيدْ نَفَصِّدْ فيْ

* بطنك كَرَّشت: كبرت وتعني أنه لم ينشغل بحب البنات مثل غيره لذلك لم ينحل جسمه.
* نَكَمِّد في: نعالج ونداوي بالمكمدات

يستجيب حسين لإستفزاز أمه فيجيبها بأبيات من الشعر فيقول:

مَحينَاك يالـوح وكـسَّرناك يادوَايَـــــه
لِهـيجْ الـحُمْ أحـسـن مـن القِـرايـــــــــةْ
وُقـلْبَتْ الـشَّـدْ عَـلي الـلَّفَضْ التَّنَايَه
ومـقَــالَـبْة الـبُـكـارْ كَـبْدَ السَّــحَـايَــــــه
* السحايه: المكان الذي ينبت فيه السحا وهو نبات تأكله الإبل.
يقول حسين: لقد محونا اللوح وكسرنا الدواية , (المحبرة) وكنا نستعملها في الخلوة والحبر الذي فيها كنا نُعِدَّه بخلط الرماد والصمغ (الكعكول) ونضع فيه سبيب ذنب البقر ونحفظه في إناء زجاجي به ماء. والأقلام تُصنع من بوص او من قصب الذرة. محا اللوح وكسر الدواية وتفرغ للنهيض والهمبتة والتمتع بأحاديث الفتيات والعيش حراً طليقاً مع جماله ونياقه. بقا
**********************************
زي المسنوح يا منسي.

ويحدث الرواة أن حسيناً في إحدي جولاته بحثاً عن إبل الآخرين لينهبها, رمت به الأقدار في ديار"المك" عجيب - المانجلك ـ أحد ملوك السلطنة الزرقاء وكان حسين يملك جملاً مؤصلاً وسريعاً لايسبقه جمل. وخوفاً من أن يستولي عليه "المك" فقد ذهب حسين لأحد السحرة فعمل له عملاً جعل الجمل يبدو في عين الناظرين خاملاً وحقيراً لايساوي شيئاً حتي أن الناس أطلقوا عليه اسم (الحِمَيِّرْ) تصغيراً لشأنه.
(وهذه تذكرني قصة الرجل الصالح مع السفينة في قصة سورة الكهف)
خدم حسين المك فترة طويلة من الزمن وأصبح مشرفاً علي خيل المك وفضل البقاء في ديار المك لأنه وقع في غرام إحدي بناته الجميلات ويقال إنها كانت تبادله حباً بحب.
وعلم المك بهذا الأمر فغضب غضباً شديداً , ولكنه لم يكن يصدق أن ترتفع عين حسين لتري إبنته. وفي ذات يوم وفيما كان حسين منهمكاً في تسريج الخيل رأي فتاته خارجة من خبائها فزفر زفرة حرَّي من أعماقه وقال يخاطب فتاته:

يَـادَغْـسَاة الـعيون بـلا مـرواد
تَحسْبِي حسين جايِّ للحصان قَـوَّادْ

ولكنه انتبه فجأة فرأي الملك خلفه فاستدرك:
لاكـين مُـو كَعَب رِفْقَاً مع اللَجوَادْ

* دغساة العيون: سوداء العيون
* مو كعب: ليس سيئاً
* الَّلجواد: الكريم ـ ويقصد في استدراكه أن رَفقة الملك ليست أمرا غير حسن.
***********************************************************************************
بلغة المنبر بقولوا عليهو وَسَّع اللفة.

لحين ميسرة
لي فوق

الفاضلابي الشوم قاصد الفتنة

المنسي الككو الفجغ الطين

Quote: كان حرّت ندخل الجُلة ونجيب سوميت وكان بردت بُكار ماهن صفايح زيت

انت ماك سمعت الهمباتي شن قال ؟

الزول البدور من البوادي ضريبة
يبقي موارك الغربه ويبعد الريبة
مايدني للهاملة البشوفا غريبة
الا السيدا في الدندر مسيلا زريبة

Quote: الفاضلابي الشوم قاصد الفتنة

هيييييع ود المنسي ـ الدابي مرق للمبارزة
جهِّز العدة

Quote: جهِّز العدة

زولك ميطي طااااب فنجان ما عندو - علا تجيهو بعدتك بتاعة منظمة الوحدة الافريقية

مجابدين ـ لوكوا الصبر

Quote: زولك ميطي طااااب فنجان ما عندو - علا تجيهو بعدتك بتاعة منظمة الوحدة الافريقية

Quote: Quote: زولك ميطي طااااب فنجان ما عندو - علا تجيهو بعدتك بتاعة منظمة الوحدة الافريقية

شيقوق ده يابت عمي أظنه يوم كتب المداخلة دي
كان سهران مع كورة حكمها ـ حكم روسيا البيضا.

معليش ياخوانا ـ ولدي أجريت له عملية والحمدلله من قبل ومن بعد تمت بنجاح.
حين ميسرة إن شاء الله نكمل معكم قصة حبوبتي شغبة المرغمابية.

الف سلامة ود عمى وما يشوف شر

الف حمد الله على سلامة الوليد .. والله يديه العافية ودوام الصحة.. وان شاء الله تاني ما يشوف شر ابدا..
والله يديكم العافية

الدعت الدندراوي
مرقتَّ من جحرك تكرج
جيتك إستعد
هسي نخت الميس
دحين حديد بلاقي حديد
بنبرةش الطرور وبثبت الصنديد

نورتَّ وفرهدتا
وبقيت تغير وتصل لعند وكري
هيييييييع انا رحل الكحل وكتين إميِّل
انا الرمد البخيل العين تسيل
أنا الشافو خلو

Quote: انت ماك سمعت الهمباتي شن قال ؟ الزول البدور من البوادي ضريبة يبقي موارك الغربه ويبعد الريبة مايدني للهاملة البشوفا غريبة الا السيدا في الدندر مسيلا زريبة

الهمباتي طه الضرير قال:

ولداً بطبق المسرى فوق المسرى
يخلف ساقو فوق ضهر أبـ قمائر ويسرى
حقب قربينو في جِرباتو ختَّ أبـ كسرة
فرقاً شتّى من ناس يما زيدي الكسرة

البوست ده ياعبد العزيز من البوستات التابعتها بى قوه عشان انت وضيوفك الكرام
خليتوهو واحه ماعاديه
تسلمو كلكم ياحبيبنا

الحبيب فاضلابي
كفراة وسلامـــة لوليدك وإن شا الله ما يشوف شر أبداً
امي عليها رحمة الله كانت تحضن أحمد وليدي في حجرها وتقولي يا خالد والله صدق المثل
ما أغلى من الضنى إلا ضنى الضنى
الضنى غالي
وصاحبي الفنان الرائع عضو البورد عندو وليد صغير قال والله يا خالد ما داير أطهرو ما بحمل لما يبكي بكى دلع بس بخلي كدي لما يطهر رقبتو برا زي سيدنا إبراهيم عليه الصلاة والسلام

ربنا يشفي الوليد ويحفظ لك كل بنوك يا فاضلابي

Quote: يَاحسينْ أنا ماني أُمَّـكْ وُاِتْ مَاكْ وَلَدِيْ بَطْـنَكْ كَـرَّشَتْ غَـيْ البَـنات ناسِـيْ ودِقْـنَكْ حَـمَّسَتْ جِـلْدَكْ خَـرِشْ ما فيْ لاكْ مَضْـرُبْ بِحـدِّ السِيـف نَكَـمِّد فيْ ولاكْ مَضْرُب بي لِسَانْ الصيدْ نَفَصِّدْ فيْ

إستوقفني اولاً
غي البنات ناسي

لاك مضروب بسيف نكمد في
الكمد في الجرح زمان يا فاضلابي كان بكون بالرماد
يكمدو الرماد في الجرح والجرح يشح وبعد الرماد يطهر بالقطران ليضمد الجرح

والفصد بكون لدم عاقد داخل الجسم

إذن فقد استطاع حسين أن يفلت من المك عجيب وحكمه عليه بالموت بفضل الله ثم بفضل ذلك الجمل السريع.
وأنشأ حسين مخاطباً جمله مبرراً سبب وجوده في ديار المك عجيب:
مَانْ مِـتِلْ ود فِـريجْ برعي البقر بالْمِــدْ
وْهَواي في بِتْ عَجِيبْ كُـولْةَ التَناية النِّـدْ
أَهَـلَكْ فـي أم شَـدِيدَة يالْـتَّمَـاغي الـقِدْ
ــــــــــــــــــــــــ
* مان: لست
* ودفريج: راع كان يرعي البقر مقابل بعض العطية.
* هواي: حبي
* كولة التناية: الظبية
* القِد: الرَسَن ـ يريد أن جمله من قوته وسرعته يكاد يقطع الرسن بمد رقبته الي الأمام وهو يجري فيكاد يقطع القد في قبضة صاحبه.

يستمر حسين في مخاطبة جمله فيصف له الطريق ويحثه علي الإسراع به فيقول:

دِيـكْ رِيـرَة اْم قَلُوتْ مَكْمنْ القِيمَانْ
ودَاك حَـجَر الصَّفيَّة مِقَابِـلْ الغُبْشان
وفـوق حَـ دَبَةْ كِشِيشَة بِقَرقِر الضَّهلان
شُدَرَاتْ وَدْ كُوَّة فِيهِنْ أُم قُرْقُدَاً نَدْيَان
ــــــــــــــــــــــــ
* ديك: تلك
* قلوت: صخور تجتمع فيها المياه وقت الخريف
* الغُبشان: إسم مكان
* حدبة كشيشة: إسم مكان أيضاً ـ (والحدبة هي ما ارتفع من الارض)
* الضهلان: الجائع ـ والمقصود هنا الضبع.

*******************************************************************
هلا ـ اميرة ووضاحة ـ ودعمي المنسي
آميين يارب ـ ونسأل الله ان يمتعكم وايانا بالصحة والعافية ـ ويحفظكم ويحفظ وليداتكن من كل شر.
ويا أميرة ووضاحة الكلام ده طبعاً باعتبار ماسيكون قريباَ بإذن الله.
ولما كان البوست قفة حلبية كما اسلفنا سنحاول وضع صورة للوليد عبدالرحمن وهو في المستشفي يستعد للعملية.

Quote: البوست ده ياعبد العزيز من البوستات التابعتها بى قوه عشان انت وضيوفك الكرام خليتوهو واحه ماعاديه تسلمو كلكم ياحبيبنا

هلا بفارس كردفان الغرة ام خيرا جوه وبره
كان داير تشبع من كلام الفروسية والهمبتة والنهيض
خليك قريب من ودالمنسي ده جرابو مليان دنميت
الله يستر علينا من المسنوح ود شيقوق ـ "ودالنِعِيسان"
يجي مْطَفِّر زي ابو الصقير ـ لكن المرة دي بي نخت لو
شركاًيغتس فيهو للمخروقة.

وصل حسين إلي ديار قومه سالماً ولكن المك عجيب زاد حقداً عليه وعلي قومه لأنه اعتبر حسين قد استباح شرفه واساء اليه إساءة بالغة بتلك العلاقة مع بنته. وهو الذي لايرقي لمستوي المك بحال. ثم هروبه اغضب المك زيادة علي غضبه من حبه وتشبيبه بابنته.

ارسل المك رسوله الي قبيلة المرغماب يطلب منهم ان يردوا اليه حسين
ويدفعوا له الأتاوة ويدينوا له بالولاء والطاعة. ولكن المك كان يجهل تماما مدي قوة المرغماب ومن ورائهم بني عمومتهم الكمالاب, فكان الرد كلمات بسيطة مليئة بالسُخـ رية والإعتزاز بالنفس قالتها شغبة لرسول المك عجيب:

قُـول للْمَكْ عَـجِيبْ مَا عِنْدَنا لِيكْ الآتْ
بَـرَادَقْ وَد بَـقِيعْ والـدُّكْرِي الكَـفَّاتْ
أَكِـلْنَا العَكَّة ونَــفْـطُرْ عَلِي نَـبَقَات
دَقَّـتْ نُـقَّـــارَةْ الـبَرَكَــــاتْ
عَرَضُوا ولاَدْ كَمَالْ جُوهَا الدُّبسْ قُتَّاتْ
________________________________________________
* الآت: فلوس
* بَرَادَقْ: إلا (تقصد ليس لدينا الا السيوف التي يصنعها ودبقيع والتي نسنخدمها في ضرب رقاب اعداءنا ـ وهي سيوف حادة تكفت الرقاب فتجندلها)
* الدكري: سيف حاد وقوي
* الكفات: القاطع
* العكة: ثمار الدوم
* البركات: النصر
* الدبس: السود ـ وتعني بهم قبيلة المرغماب

تستنكر شغبة طلب المك عجيب, وتقول له إنهم لن يدفعوا له أتاوة مهما كانت قوته وجبروته. وليس لديهم شئ يقدمونه له سوي الضرب بتلك السيوف القواطع والطعن بالحراب التي قام بصناعتها ذلك الرجل المسمي ود بقيع, وأن قومها شجعان يقضون يومهم في ساحة الوغي بدون أكل بل تكفيهم ثمار الدوم والنبق ترياقاً. حتي ينجلي غبار المعركة.
وعندما تدق نقارة حربهم تعني دائما ان النصر لهم والهزيمة لغيرهم , ثم تصور للمك عجيب في تحد الحالة التي يجدهم فيها عندما يأتي لحربهم فسوف يجد صناديد وأبطال قبيلة الكمالاب قد حضروا لبذل انفسهم مقاتلين الي جانب بني عمومتهم المرغماب والذين هم بدورهم جاؤا يسيرون علي مهل إلي ساحة الموت وكلهم فرسان قد عرفتهم كافة القبائل بالشجاعة والفروسية.

وتحكي الروايات أن حسينا ولد شغبة عَزَّ عليه أن تدخل قبيلته في حرب مع المك عجيب, فرجع وسلّم نفسه فداءاً لقبيلته وخوفاً من أن يكون سبباً في الخراب وموت ابرياء وآثر أن يموت وحده. ولعل أروع المشاهد وأعظمها تأثيراً أن وقف حسين أمام خادم المك عجيب وخاطبه قائلاً:

الـزِّيـنْ مَـابِفْسلْ والفَـسِلْ مـابزِينْ
والجِّنِـسْ الرخيص مـابِنْفَعو التَحْسِين
الـدِّخَلْ البُـطُنْ مـابْتَقْطَعُو السِّـكِينْ
يَا مَرْجَانْ نَعَلْ نَاسْ بِتْ عَجِيب طَيْبِين

____________________________________________
* الزين: الزول سمح الخِصال ـ * والفسل ضده
* نَعَلْ: لعل

يخاطب حسين خادم الملك المسمي "مرجان" فيقول له: إن الشخص طيب الأصل لايٌفْقَد الأمل فيه, أما ذلك الذي لا أصل له فلا يُرجي من ورائه خير. وأما ما حاك في صدر المك نحوي فلا أظنه يٌمحي بسهولة, ولا أعتقد أنه سوف يغفر لي زلتي, ثم يسأله عن حبيبته هل هي بخير؟ فلما سمع المك عجيب هذه الأبيات عفا عنه وسامحه لشجاعته.

عندما سمعت شغبة بما قاله إبنها سٌرَّت أيما سرور ليس لإفلاته من الموت ولكن لشجاعته وبسالته ومدحته بأبيات جميلة أجادت فيها الوصف وأبدعت أيما إبداع فقالت:

ولدي مٌو دَبَـادِبْ عِينَةْ أُم بَـشَّارْ
صَدْرَ الْبِرْزِمْ الـْ فِيهو الحَبُرْ عَشَّارْ
شِنْ بِلِدْ السُّنُطْ غير الدُّبَاغْ الحَـارْ
جِيدْ الـ مَاقالوا تَخَرا الرَّماد النار

* دبادب عينة ام بشار : تقصد أول موسم الأمطار
* صدر البرزم الـ فيهو الحُبر: تقصد وسط الخريف وهو المنزل الذي تبيض فيه الحباري وهي نوع من الطيور.
* الدباغ الحار : وهو شجر السنط والذي يثمر القرض ويستعمل في دبغ الجلود

تقول شغبة أن ولدها عظيم القيمة وليس مثل ذلك المطر الذي ينزل في بداية موسم الأمطار وتشبهه بذلك المنزل من منازل الخريف الذي تكثر فيه الأمطار وتبيض فيه الحباري ـ ـ ثم تقول إن إبنها من أبوين عظيمين وتحمد الله علي ان جعل الناس لايشمتون عليه ولا غرابة في ذلك فهو إبن شغبة ومن ظهر ذلك الفارس المُسمي "ود دقلش"

.

ولدي مٌو دَبَـادِبْ عِينَةْ أُم بَـشَّارْ
صَدْرَ الْبِرْزِمْ الـْ فِيهو الحَبُرْ عَشَّارْ
شِنْ بِلِدْ السُّنُطْ غير الدُّبَاغْ الحَـارْ
جِيدْ الـ مَاقالوا تَخَرا الرَّماد النار

لحين ميسرة

وتقول بعض الروايات أن أحد ملوك سنار قد تمكن من أسر شغبة وأخذها الي سنّار وهناك طلب منها أن تمكث معه وحاول اغرائها بأن يبني لها بيتاً جميلاً
فردت عليه متهكمة:

[B]دُبْ بُــيُوتاً مَا فِيهِنْ أُمْ كَــــــرَّاب
رُوُسٍـنْ قَـشْ قِـعـورِن في الْوِطِي رُتَّـابْ
أهَـلي يَاوْلِيد نَزَلُوا مَزَارْقَ الــطَّــــابْ
عُزَازْ النَّـاس أهـلـنا اللاَّخَـرِينْ بُــتَّابْ

* أم كراب: سرج الجمل ويسمي المخلوفة
* الـ وطي: الأرض
* مزارق الطاب: اسم مكان في البطانة

تقول شغبة ساخرة منه أن هذه البيوت عليها اللعنة فهي لاتحوي فيما تحويه من سروج الجمال’
كما أن رؤسها من القش وجدرانها من الطين’ وهي لم تألف مثل هذه البيوت الحقيرة في نظرها.
وتخاطبه بقولها: "ياوليد" تحقيراً لشأنه وتذكِّره بأن أهلها الآن ينزلون في أرض مزارق الطاب حيث الهواء الطلق’
وحياة الحرية والسعادة الحقيقية فأهلها هم أشرف الناس’ أما الآخرون فإنهم مجرد نفايات لاترقي الي معدنهم النقي الأصيل.

وتزداد آلام شغبة كلما مرّت بها أيام الأسر في تلك البلاد التي لم تأنس اليها فترسل زفرات حرَّي تفتأ تذكر البادية وأهلها فتقول:
اللِّيـلة عـلي السًّـــافِل بَـشُوفـلي سِـحَــابْ
ويـانـوح مِـنْ فَـرِيقَاً مَافِيهو شَدَّةْ أُمْ كَـــرَّابْ
رُوُسِــنْ قَـشْ قِـعورِن في الــْوِطِي رُتَّـــابْ
خُـشُومِنْ سُـودْ وعُــقُـبْ بِـسَوُّلِـنْ بَـــابْ
سُكَّــانِـنْ جُـهُـرْ ومــلاَحُــنْ الـــويكَاب
يَـادُوبْ لـي امْ شَـدِيدَة وشَــدَّةْ الخَـــــبَّابْ

* السافل: الشمال
* بشوفلي: اري
* خشومِن: مدخل الأبواب
* بسولن باب: يضعوا عليها أبواباً
* جُهُرْ: لا يرون ليلاً
* مًلاحُنْ: طبخهم
* الويكاب: طبيخ يصنع من رماد القصب واللبن. (ده يا وضاحة أكل ناس المسنوح ود شيقوق – الطيب بياكلو برماد العنكوليب)
* يادوب: كلمة تقال للتمني – أوبمعني : ياحليل أي أين حلًّ
* أم شديدة مكان في البطانة
* الخباب: الجمل السريع
تصف شغبة حالها وماتقاسيه من ألم بعدها عن ارض اهلها وتصف انها رأت في تلك الليلة سحباً تجمَّعت تجاه ديار قومها.
فترسل حسراتها علي فراق الأهل والعشيرة وتقارن بين اسلوب حياتها حيث هي وحياتها حيث انتزعت.
فهي تقول ان المكان الذي اجبرت علي العيش فيه خال من السارح(الجمل) بل هو خال من أي أثر يدل علي وجود جمال مثل السروج وغيرها من توابع الأبل.
ولاتري حيث أجبرت علي السكني غير بيوت من الطين والقش وليس أمام ساحتها ما يدل علي الخير من سعية ونحوه.
وفوق ذلك فهي سوداء المداخل تدل علي الفقر والقحط وأهلها لشدة بخلهم مع كل مظاهر الفقر البادية للرائي صنعوا ابوابا لمداخل هذه البيوت دليلا علي بخلهم وكراهيتهم للضيف.
ويأكلون الويكاب الذي لايمكن لها ولا لأحد من قومها أن يجعله طعاماً وتتمني أن ترجع الي بني قومها فى أم شديدة حيث الخير الوفير والحياة السعيدة الرغدة.

وكان مع شغبة وهي بعيدة عن أهلها رجل يقال له "جهاد" فتذكر اهلها معه وتقول في شوق وحسرة:
حِليلُنْ يَا جِهاد في قَهَبُونْ سَمُومْ ولاَّ سَمَاهُنْ جَادْ
نَزَلـوا فـي الـبَابـنُوتـه ورَبَّـحُوا الـــوَرَّادْ
ورَبَـطُوا غُـرْدَةْ السَـابِـلْ عـلي الشـــرًّادْ
عِـيالْ الـْبيبَشـابْ الـ بِمـِدُّوا الــــــزَّادْ
فِـيهُنْ شِـكِلـــيتْ جَـنًا حَـــمًّـــــادْ
بِـكْرِيهُنْ عـلي صَـف الـدًّرًقْ بِنــْـــقَادْ

* قهبون سموم: الجو الحار اللافح
* ولاَّ سماهُن جاد؟ : أم أمطرت سماؤهم
* البابنوته: مكان فيه حفير ماء
* كربوا: ربطوا
* الشرَّاد: النافر الشرود
* البيبشاب: فرع من قبيلة المرغماب
* البمدواالزاد: الكرماء
* شكيليت:فارس من فرع البيبشاب
* بِكْرِيهنْ: شبابهم اليُفَّع أو قد يكون المعني الجمل البكر.

تعبر شغبة تعبيرا صادقاً عن حنينها الي أهلها وتسأل جهاد:
أتراهم مازالوا في صيف لافح أم جادت عليهم السماء بالمطر الوفير الذي عرفت به أرض البطانة في ذلك الزمان.
أم تراهم نزلوا بذلك المكان المعروف بالبابنوته ولم يتعب جالبوا الماء في قطع المسافات الطويلة من أجلها؟
أم تراهم قد أسرجوا جمالهم وربطوا رسن الشرود منها؟ وتذكر شكيليت ولد حماد الذي تعزًّه.
وتذكر أيضاً شجاعتهم كباراً وصغاراً’ فهم والسيوف والدرَقْ أصدقاء.

ولشغبة اشعار جريئة والمتأمل في حياة هذه المرأة لايستغرب منها أن تقول شعراً جريئاً عجز المؤلف عن ذكره.
فقد عاشت مثل أي رجل آخر ولم يُتَوِّج حياتها الحياء ولم تحفل بأُنوثة.
ويقال أن ملك الفونج بعد أن عجز عن استمالة قلب شغبة’ نفاها الي دنقلا’ ولا نجزم بمدي صحة هذه الرواية ولكن علي أية حال
فإن شعرها يثبت أنها كانت في دنقلا حيث تقول:
اللـيلَة هَـبوبْ أهـلي مَلـَت نَفسي
ومِنْ رَطَنِي الضَنَاقلَة وا كَتيرْ هَـوَسِي
فَارَقْتَ الحُوَارْ الـ في الشَـبَكْ رَفَسِي
فَارَقْتَ الخِلْفَة المسَاري والجَمَلْ زَادي

* هبوب: نسمات
* مَلَتْ: ملأت
* نَفَسِي: رئتي
* الحوار: رضيع الناقة
* الشبك: شبكة تصنع من الحبال يوضع فيها رضيع الناقة.
* الخلفة: الناقة التي بلغ رضيعها العام
* المساري: السمينة
يغالبها الحنين الي ديارها وأرضها المعطاءة الخضراء ونسماتها المنعشة وهي ضاقت ذرعاً بلغة الدناقلة التي لاتفهمها.
وتقارن ألمها وهي في هذه الحال برضيع الناقة المحمول في شبكة الحبال وهو يرفس محاولاً التخلص منها.
وتذكر نياقها السمان يلقحها الجمل فتلد وتستمر دورة حياتها.

هييييييع يا شقبة ادي أبـ الرويس وأهلو فوق صنقوعم
عافي منك بت رجال وعزاز يا شغبة
حتى مليكم أدتو فوق رويسو
=================================
اللـيلَة هَـبوبْ أهـلي مَلـَت نَفسي
ومِنْ رَطَنِي الضَنَاقلَة وا كَتيرْ هَـوَسِي
فَارَقْتَ الحُوَارْ الـ في الشَـبَكْ رَفَسِي
فَارَقْتَ الخِلْفَة المسَاري والجَمَلْ زَادي

تمر شغبة في آخر حياتها بظروف حياتية تعيسة فقد فارقت الأهل والعشيرة والأحباب وقطعان الجمال وحياة الباديةالتي أحبتها.
وتبقي معها الذكريات فتذكر قبيلتها أيام كانت تقوم الحروب بينهم وبين أعدائهم فتقول:
حليل الْبِـــرْكبوا التيس أب صَريمــــةْ
وحِليل الْبِنْزِلوا حَدَبْ أُم قِضِيضِيمَـــة
وحِليل الجَــــــاهِلُنْ مَابْدُور تَعْلِيمَـــةْ
حِلِيلْ الْبِقطَعُوا الشَــكْ في العَزِيمَـــةْ
واهَلِي المُرْغُمَابْ يَادوبَة ليهم دِيمـةْ

Quote: ]تمر شغبة في آخر حياتها بظروف حياتية تعيسة فقد فارقت الأهل والعشيرة والأحباب وقطعان الجمال وحياة الباديةالتي أحبتها. وتبقي معها الذكريات فتذكر قبيلتها أيام كانت تقوم الحروب بينهم وبين أعدائهم

..................

نتابع بشغف واهتمام رواية الفارسة شغبة.. وانا اسميها فارسة لأن لديها شجاعة الفرسان.. كما كان يجب ان اقول القصة الحقيقة وليست الرواية ..لأن هذا التراث انما يمثل وقائع حقيقة حصلت ويتناقلها الأجيال جيل بعد جيل..
ولآ اظنك تقصد بقولك ان شغبة فارقت الأهل والأحباب وحياة البادية أنها فارقت الدنيا .. لأننا نظن انها فارقت حياة البادية إلى حياة المدينة وان قصتها ستتواصل إلى حين موعد أجلها المحتوم.. على الأقل في هذه المرحلة.. ولقد جعلتنا يا ود الفاضلابي نندمج مع شعرها ونتفاعل معها وذلك بتيسير فهمها بشرح معاني المفردات وإلا لما كنا فهمنا منها بيت شعر واحد...
والله يديك العافية

الصريمة: الرسن للجمل وتقصد الجمال الهائجة
حدب أم قضيضيمة: إسم مكان في البطانة
الجاهِلُن: صغيرهم ـ يقال للطفل.
العزيمة: الدعوة للاكل والشرب ـ دليل الكرم

تقول شغبة كم أشتاق لأهلي اولئك الذين يركبون الجمال الحرة التي تستعصي علي المِقود وهم قوم يعرفون الكثير لدرجة أن الطفل منهم لايحتاج إلي من يعلِّمه فهو متعلم فطرة (المثل السوداني ـ يقول ليك: البيضة الناجحة في بطن أها بِتْكاكي)
وتصف أهلها بالكرم فتقول إنهم يلحون علي ضيفهم ليأكل ويشرب ويحلفون ولايرضون الا اذا أبرِّ حلفهم ـ إنهم أهلي المرغماب الذين أحن إليهم إلي الأبد.
ولايُعرَف علي وجه الجزم أين كانت شغبة عندما سطَّرت هذه الأبيات الجميلة التي صبت فيها كل أحاسيس الحب والشوق والحنين وهي تذكر مراتعها وابلها وفرسان قبيلتها واهلها ولاتستطيع الوصول اليهم فتنظم جميل

الكلام لتعبر عن مكنون صدرها الذي أضناه الفراق وغمَّه البعد فتقول:

حِـلِيلْ الْـبِركَبوا الـتيس الُبشاري
وحْـلِيل الْـكَمَشُوا الخَلْفَة المسَاري
وحْـلِيل الْبِلْفَحُوا الـتُّوبْ العُشَاري
وحْلِيل الـ في الْكِتَالْ حَاكُوا الهِلالي

*حْلِيل : كلمة تقال للتعبير عن التساؤل بشوق ـ وتعني أين حَلُّوا.؟
*التيس البشاري: الجمل ـ نسبة الي قبيلة البشاريين حيث تمتاز جمالهم بالأصالة
*العُشَاري: الذي يبلغ طوله عشرون ذراعاً ـ دليل علي طول قامتهم

وتقول أيضا وهي تعيش البعد عن اهلها ومراتع صباها:

حِليلْ الهُـوجْ قِـبِيلْ زَمـن اللَّعَادي
حِليلْ الشَّـرَفُهنْ كَـازَي الـبَوَادي
حِليلْ البِـركَبوا الحَـافْرْ الْـبقَادِي
وحِليلْ الْمَخَرَفُنْ مِن الكَاهْلي غَادِي

* الهوج : لقب قبيلة المرغماب
* اللَّعادي: الأعداء
* الشرفهن: وجودهم
* كازي: غاظ
* الحافر البقادي: الفرس الأصيل
* الْمَخْرَفُنْ: المكان الذي يمضون فيه موسم الخريف
* الكاهلي: مكان جنوب البطانة

أُخْتُلِفَ في المكان الذي ماتت فيه شغبة فبعضهم يقول إنها رجعت من الأسر إلي ديارها في البطانة ويدعم تلك الرواية أنه وُجِدَ في شِعْرِها مايؤكدها, ويُقال أن بعض رجال قبيلتها ذهبوا إليها لتعود معهم لكنها رفضت العودة معهم فعادوا من حيث أتوا وعاود الكرة رجال من فرع الزماماب (أحد فروع المرغماب) فعادت معهم ولامها الأولون الذين ذهبوا اليها ورفضت العودة معهم فردت عليهم بأبيات رصينة قائلة:

شَغَبَةْ مـاتْلُمُوها في كلام الْحَرْ
وْطَاريَاهُن عَكَاكِيز البَحَر والبَرْ
أَوْلاَد أَبْ زُمَام البِركَبُوا اللَّشْقَرْ
النَّاسْ مِنْ خَيَالاَتُنْ جَمِيعْ تِنْصَرْ

* كلام الحر: حديث الغضب
* طَارياهُن: ذاكرة لهم ـ لم تنسهم
* عَكاَكيز: عِصِيْ
* خَيالاتُن: خيالاتهم

تقول: لاتلوموا شغبة ولاتؤاخذوها علي حديث قالته في ساعة غضب وتؤكد لهم أنها وإن قالت كلاماً أغضبهم فهي غير ناسية لهم وكأنها تقول لهم أنها فضلت العودة مع الزماماب وفاءاً منها لفضلهم أيام الحروب التي خاضتها قبيلتها وكيف أنهم ساندوا أهلها ضد أعدائهم وتصفهم بالعكاكيز ـ كناية عن أن العُكَّاز يتسنَّد عليه الإنسان إذا كبر سنه او الم به عجز. فكأنها تقول أن الزماماب عُرفوا بأنهم ذلك السند لمن يحتاجه في أي زمان ومكان.
وتصفهم بأنهم فرسان لايركبون الاّ الأشقر من الجمال لما تمتاز به من قوة وسرعة وأنهم يرعبون أعداءهم بمجرد أن يخطر علي بال الأعداء ذكرهم او بمجرد ان يروا ما يخيل اليهم ان هؤلاء الزماماب فتري أعداءهم يتداخلون في بعضهم البعض خوفاً ويمتلئون رعباً وكأنهم جُمِعوا في مكان واحد.

حين ميسرة

لحين ميسرة

ولشغبة وصف جميل للطبيعة:
إدَّنْــدَحْ سِــحَابْ شَغَبَة أبْ قَمَاقْمَاً غُـرْ
تِـسْـعَ ايَّـام لـيلٌـو ونَـهَـارو يـكــــــرْ
أســيَادْ الــــخِلي الـ تِـحْت الـسِّيـول بِيدُرْ
إتعَشُّوا الـ قِواْ ورَقَـدوا الضُّعاف بالـضٌّر

* إدندح: نزل قريباً من الارض
* قماقم: تعني السحاب الاسود وقد انعكست عليه اشعة الشمس وظهر وكأنه في قمته غُرَّة من شدة بياضها
* يكُر: يرعد
* الخلي: الناقة التي مات صغيرها
* الـ قِواْ: الاقوياء
* رَقَدوا: ناموا
* إتْعَشّوا: اكلوا وجبة العشاء
* أسياد: أصحاب
* بالضُّر: بالم الجوع ناموا علي الطَّوي

تذكر شغبة تلك الليلة المطيرة التي عاني فيها الناس ماعانوا فتقول:

العيشْ في القـُرافْ والنـار طَفاها السيلْ
واتعَشُّوا الـ قِِواْ ورَقَـدوا الضُّعافْ بالميلْ
قَامــــُوا لي العَبيدْ جَابُوا العَمَار بالكِيلْ
مِـنْ جَمَاجْمَاً فــي مَخَارِيقْ العُقُول هَاديل

*العيش: تقصد الذرة
* القراف: كيس من الجلد تحفظ بداخله الحبوب حتي لا يصيبها البلل
* العُمار: مفردها عُمرة وهو إناء يستخدم في حلب الأبل
* جماجم: هي الحفرة التي يوجد فيها الماء علي عمق قريب
* مخاريق: الموضع مابين رجلي الناقة الخلفية
* العقول: تعني بها الأبل الراقدة علي الأرض والمعقولة بالعقال

تقول شعبة:
كانت ليلة مطيرة لم تترك مكانا جافاً فوجد الناس كل صعوبة في صنع طعام لهم ولعيالهم ونام الضعفاء - وتقصد أعداءها – ناموا القوا أي لم يجدوا مايحلبونه لأنهم لا سعية لهم .
أما قومها الأقوياء أصحاب الأبل فقد ناموا وبطونهم مليئة , وتقول أنها تملك عبيداً قاموا اثناء المطر وأحضروا لها لبناً كثيراً وقد تدفقت مواعينهم من تلك النياق التي لايجف ولاينضب ضرعها.
وتشبه ضرع نياقها بحفرة الجَّمام تلك الحفرة التي توجد مياهها علي عمق قريب وكلما أخذ منها الماء امتلأت في الحال.

وتصف شغبة ليلة من ليالي الخريف وقد اخضرت الأرض وكساها العشب والنماء فقالت:

اللِّيلة عـــلي القِــــبْلة بَـدَا البحَّاتْ
والــحُمْ كـــَجَرَنْ بيتِنْ من الـــنُّقاطْ
خَـالَفَ الـتُّرْ ورا المّاصِعْ جَــرَنْ قَـاتَّاتْ
كَاكَا رَكــــــضَت واتْفـــالتَ النطَّاطْ
وبَـارُوك القَـــوَايِمْ في الـمَوَاهِلْ عَـاطْ

* البحات: البرق الذي يلمع في الشمال الشرقي
* الحًم: الفتيات
* خالف التر: الناقة التي مر حول علي ولادتها فتجري وراء الفحل
* كاكا: الحبارة – الطائر المعروف
* ركَضَتْ: حضنت بيضها
* اتفالت النطاط: بدا السحاب يظهر واحدة تلو الأخري
* باروك القوايم: ضعيفة القوائم التي لاتقوي علي الوقوف عليها وتعني بها الضفادع
* المواهل: أمكنة تجمع المياه – الحفائر – مفردها حفير
* عاط : صاح – وتقصد نقيق الضفادع علامات علي دخول الخريف

تقول شغبة:
لقد بدا البرق من جهة القبلة (القبلي) وبدأت النساء يغطين مداخل بيوتهن اتقاء المطر وجرت النياق وراء الذكور لتخصيبها وحضنت الحبارة بيضها تغطيه.
وبدأت السحب تتجمع في الفضاء الواحدة تلو الأخري في منظر بديع وبدأت الضفادع في النقيق فرحة ومستبشرةً بمقدم الخريف.
ولقد أبدعت شغبة ايما ابداع في وصف الطبيعة ورسمت لوحتها ووشَّتها بأبدع ما قيل من ألفاظ شعبية دارجة في زمانها.

ومدحت شغبة قومها كثيراً وافتخرت بهم كثيرا أيضاً ومن ذلك قولها:
أوَّل فـــي زَمـــان اللَّحـرَابْ
نقعُدْ في ضَرَي دَرَقْ الجَّنا الـتَّبَّبابْ
أولادُ أٌمَّاتْ قــنَاعاً مانَطَرِن عَيَّابْ
بي رَزق الحَسَادة بِكَــمِّلوا الشَباب
* في زمن اللحراب: زمن الحروب والغارات
* في ضري: في حِمَي – في ذُرَي
* الجنا: الشباب من فرسان قومها
* التَّباب: الذي ينهض سريعاً ساعة الطلب فهو علي فهو مستعد للزود علي القبيلة في أي وقت ولا يتكاسل في النهوض لملاقاة العدو
* أمات قناع: اللائي يغطين وجوههن ورؤسهن عفافاً
* مانطَرِنْ عَيَّاب: لم يعطين لأحد الذريعة ليذكرهن بعيب أو سؤ.

تذكر شغبة ماضيها وزمن المعارك والغارات تقول أنها ونساء قبيلتها عندما يهاجمهم الأعداء لا يخشين بأسهم
لأن فرسان قبيلتها الشباب الشجعان تعاهدوا علي عدم الهروب في المعارك لأنهم أولاد نساء عفيفات لا يعرفن العيب فهن مصونات.

وتقول أيضاَ:

أوَّل فـــي زمَـــان الـحَــرِب
نـقعد في ضَـراهُن مابْنَخَافْ السـلِبْ
أولاد أُمَّات قـنــَاعَاً مابِنَبِّحْ كـ لِـبْ
يَـدْعَكُوا علي الحَـرْبَة التَّرِيعَ القَــلِبْ

* يدعكوا: يتسابقون

تقول إننا في أيام المعارك والغارات لانحاف أن يسلبنا أحد لأن فرساننا الأقوياء هم حُماتنا.
وتقول أنها ونساء قبيلتها مقنَّعات محجبات ليس في سيرتهن عيب ولايحوم الغرباء حول منازلهن.
ولذا لاتسمع صوتاً للكـ لاب تطارد غريباً.
وهن أمهات فرسان لا يخافون الحراب مهما كان الموقِف مريعاً للقلوب.

وتقول في ذات المعني السالف:
وكْـــــتَاً تــجِينا اللَّحـرَاب
بِنْكـــيل الحِمِيسي وْنَنْفُضَ البُتَّابْ
بي زُرق الحَسَــادَة بِنْكَمِّل الشَّباب
ونَرْقُد في ضَرَي دَرقَ الجَّنا التَّبَّبابْ

هذا ماتوفر لدينا من سيرة الشاعرة الفارسة شغبة المرغمابية وحال توفرنا علي المزيد نوافيكم به بإذن المولي.
وبكده يا أميرة نكون اوفينا بطلبك قدر المستطاع والمتاح وعشان خاطرك كبير عندنا بذلنا مايمكن أن يكون تعبيرً عن مدي حبنا لك.
التحية لك وللأخوة والأخوات اللذين وقَّعوا - سواء من داخل المنبر او من خارجه - علي طلب سيرة الفارسة شغبة وشجعوني علي الكتابة عن أمراة كانت ملهمة والدتي عليها رحمة الله.
فقد كانت والدتي عليها رضوان الله تقرض الشعر سليقة وارتجالا وكانت دائماً تقول لنا انها حفيدة شغبة.
وجدي خال أمي سمي احدي بناته شغبة صلة لرحم كاد يسقط من بين ثقوب الذاكرة.

* يؤسفني أن اخبركم أنني لم أوثق لوالدتي شعرها الذي كانت تقوله وكان فقط مخزوناً في ذاكرتها واندثر بموتها عليها وعلي أمهاتكم رحمة الله وبركاته وعفوه ورضوانه.

واسمحوا لي أن اهدي هذه السيرة اهداء خاص لودعمي ود المنسي ,وبت عمي وضاحة والمسنوح ودشيقوق صديق الزمن الجميل.

الي حين ميسرة نرجع لموضوع عبدالماجد.

دمتم بالف خير

* يؤسفني أن اخبركم أنني لم أوثق لوالدتي شعرها الذي كانت تقوله وكان فقط مخزوناً في ذاكرتها واندثر بموتها عليها وعلي أمهاتكم رحمة الله وبركاته وعفوه ورضوانه.

واسمحوا لي أن اهدي هذه السيرة اهداء خاص لودعمي ود المنسي ,وبت عمي وضاحة والمسنوح ودشيقوق صديق الزمن الجميل.
=================================================================================
الفاضلابي جزاك الله كل خير عن تلك السيرة الحسنة الطيبة ادب
لحياة شغبة الميرغمابية
ونحن في انتظار شعر الوالدة عليها رحمة الله

ولحين ميسرة يا سيدي

ولد العم حبابك
حاولت اعتصار الذاكرة علَّها يخرح من ثناياها بعض نظم والدتي عليها وعلي امهاتكم الرحمة والرضوان
فما درّت الذاكره سوي جزء من كلام كانت تقوله لي جدتي لأمي فاطنة بت احمد وذلك انني نشأت ولداً وحيداً عند أبي مع بنتين بعد وفاة شقيقي عبدالغفار وشقيقتي شريفة.
فكانت جدتي لوالدتي تأمل أن أكبر وأتزوج ويصير عندي الكثير من البنين والبنات فآنس بهم عوضاّ عن نشأتي بلا أخ عندما كنت صغيراً.
فكانت كلما رأت مني مايسرّها تقول لي:
ضَكّـــــرْ اللُّــــــــوبيا
الحِبِبَة تبقا ويبَة

وهذا الكلام معناه أنها تراني وحيداً وسط البنات مثل حبة اللوبا الضكر فهي لاتتكاثر بنفسها لكنها تكون مُخَصِّبة لغيرها.
ومعني ذلك أن جدتي تأمل أن أتزوج وارزق الذرية التي تتكاثر بدورها لتصير الحبة الواحدة ويبة أي لوبا كثير

فاتني أن أشكر كل من تابع هذا البوست وارجو أن نكون أنا والمشاركون فيه قد كتبنا مايفيد

ود العم الفاضلابي
وضيوفه الكرم
سلام وتحية
عجبتني الثلاثة ونص بتاعة الفرجوني دي

حلوه ملامحو ..

وسمحا نور صباحات الشمس مابسامحو ..

ملايكي جمالو تتويج الجميلات طامحو ..

كان عذبني رايدو وكان جفاني مسامحو ..


شوف السماح والسماحة
جمال جوهر ومظهر

Quote: عجبتني الثلاثة ونص بتاعة الفرجوني دي حلوه ملامحو .. وسمحا نور صباحات الشمس مابسامحو .. ملايكي جمالو تتويج الجميلات طامحو .. كان عذبني رايدو وكان جفاني مسامحو ..

مرحبا ولد العم ولد الفكي
ياخ ده ماخلّي للسماح والحب فرضاً ناقص
شوف ود شوراني وَصَّف البت دي كيف:

سَـمْحَة سماحاً أسمَحْ من بنات الريلْ
وسـمحة خلاص سماحاَ ماتلقالو متيلْ
سـمحة الشوقا خلاَّ دمع عيوني يسيلْ
سمحة وسمحة عاجـ باني ومشيها تقيلْ

Quote: (البسلي قرية صغيرة غرب نهر عطبرة (مسقط رأسي) على مسافة 20 ك تقريباً شرق الدامر)

هلا وغلا بدرالدين
حباب أهـل البسلي نعم الأهل والنــاس
أهل الكرم ساساً قديم ليهو العوين حُرَّاس
قاصِدُن مـابخيب شافِعن للضيوف جَلاَّس
كان قستهُن بالنيل فيضهم غرَّق المقياس

Quote: هلا وغلا بدرالدين حباب أهـل البسلي نعم الأهل والنــاس أهل الكرم ساساً قديم ليهو العوين حُرَّاس قاصِدُن مـابخيب شافِعن للضيوف جَلاَّس كان قستهُن بالنيل فيضهم غرَّق المقياس

شكراً يا عزيزي لهذا الترحيب الحار
أي حرّم الفاضلاب أهلنا تب (لحمنا ودمنا)

رمضان كريم ومبارك علينا وعليكم جميعاً
نسآل الله ان يقدرنا واياكم علي الصيام والقيام
ويقبل منا ومنكم ـ آمين آمين

ود العم الفاضلابي

ود شوراني ملك ملوك مسدار الغزل بلا منازع

لا بتلحق ولا بتجارى

مفردتو غنية ووصفو ساحر وعينو نجيضة وريدو صادق

عشان كده مربوعاتو الغزلية باذخة وبتهبش في الوتر الحييَ

شوف المربع دا مليان كيف

يَـــاقُوتَةْ الحَضَرِي الحَضَارمِي زَبُونِكْ

عَــــازَه وغَـاليَه وطَلَعنْ في الثُريا فِنُونِـكْ

عَاليةْ أَردافْ ضَامْرَةْ هَاف وقَارِنْ نُونِكْ

إِنكَــــــال بالجمالَ لامِـن دَفَـقْ مَـاعُونِكْ

مرحبا ود العم الفكي
طبعاً الكلام الجميل ده كان رد علي الشاعر ود الدكيم الناجمابي
عندما أرسل الي شاعرنا ودشوراني الأبيات التالية:
دَمِّـكْ صَـافِي تَحـوير المَجَمَّرْ لـونـكْ
بَدرَ الْكون جَـبِينِك والظُلْمَة قــرونِـكْ
مَا داب إنتي زَي نَجَفَ اْلخَوَاجه عيونِـكْ
كيفْ يِتْدِّاويَ مِنْ أَلَمو ويطيب مجنونِـك

Quote: العريس : خلف كراعو وقالها انا بسف وبطلق العروس: مامشكله انشاء الله تنفعك

ود العم كرار ـ سلام مربع
ياخ المعذرة منك مداخلتك دي شفتها فقط قبل يومين

صهرنا شايقي ـ مرتو شبكتو ليك:
يالطيب دايرا لي قميص نوم ـ ـ يالطيب دايرا لي قميص نوم.
وكت كتَّرتها قال ليها:
إنتي يافلانة كان مالبستي قميص النوم ده جا تساهري؟

عشان اتأخرنا عليك هاك النمة دي هدية:

دَردَرني الفقُرْ لامِن بِقيت شِنـ كيتْ
وَدَّني الـغَبايِنْ لي جِـبَال فِـرْتِيتْ
إمَّاً جِبْتَ مَالاً فَرَّح أُم سُـــومِيتْ
وإِمَّاً فُوقْ جِبَال تَقَلي إنجَدَعْ مَاجِيتْ

* شِنـكـ يت: كبير السن
* ام سوميت: محبوبته

Quote: وصاحبي الفنان الرائع عضو البورد عندو وليد صغير قال والله يا خالد ما داير أطهرو ما بحمل لما يبكي بكى دلع بس بخلي كدي لما يطهر رقبتو برا زي سيدنا إبراهيم عليه الصلاة والسلام

سلام ابن عمي وربنا يتقبل منا ومنكم الصيام والقيام وصالح الأعمال
قصة صاحبك دي ذكَّرتني عمنا عثمان (الملقَّب بالأمير) لخلقه الرفيع
وكان رجلاً حنينا ومتواضعاً - يوم طهارة ولده رأي الولد متجرس ويبكي
فرقَّ قلبه وعندما حضر الطَهَّار إزداد خوف الولد فما كان من الأمير الاّ أن رفعه
فوق الحائط واوصاه بالهروب الي منزل جدته والإختباء هناك.
تفقَّد الناس الولد فلم يجدوه ونظروا الي الأمير فخانه صدقه وبدأ علي وجهه أنه يعلم مكان الولد
ولأنه كان لايكذب أبداً فلم يكلِّفهم سوي سؤاله عن مكان الولد ليخبرهم الحقيقة.
ــــــــــــــــــــــــــــــــــــــــــــــــــ
عثمان هذا كان لديه حـ مار ونفق هذا الحمار فوقف قبالة الحمار وأخذ يدعو الله رافعاً يديه الي ربه.
مرّ به أحد الأهالي فاستنكر مايفعله عثمان (الأمير) وباستهزاء قال له:
يا الدِّلا هة كمان جاتنا فاتحة الحـميـ ر ؟
لم يرد عليه الأمير حتي فرغ فالتفت الي المستهزئ قائلا:
لا أنا ما بقرأ الفاتحة علي الحُـ مـار!
أنا كنت بدعي ربي وبقول:
يارب انت جعلت هذا الحـ مار تحت يدي.
يارب لو في يوم أنا تركت هذا الحـ مار عطشان أو جوعان أو تركته في هجيرة
أو آذيته فاغفر لي يارب.
فتخيّلوا ماذا يكون شعور ذلك الرجل الذي استهزأ بهذا الرجل الطيب؟
اللهم أرحم عبدك عثمان بفضل هذا الشهر المبارك وانت خير الراحمين.
عمنا عثمان هذا يذكرني بالصحابي حضير رضي الله عنه في قناعته وايمانه وسنحكيها لكم في المداخلة التالية ان شاء الله

Quote: عمنا عثمان هذا يذكرني بالصحابي حضير رضي الله عنه في قناعته وايمانه وسنحكيها لكم في المداخلة التالية ان شاء الله

رُوي لي أن حضيراً رضي الله عنه كان في جيش للنبي صلواة الله وسلامه عليه. وكان الطعام قد شح وأُمِرَ أن يوزَّع علي كل رجل قطعة خبز وهو وشأنه فيها .. إن شاء ادخرها وان شاء اكلها كلها في وجبة واحد.
وذهب من اوكل إليهم توزيع الطعام علي الجيش ووزعوا الخبز ونسوا حضيرا ـ فلم يشكو لاحد وظل يكابد الجوع بالصبر والإحتساب.
فأخبر الامين جبريل حبيب الله بماوقع لحضير . . فأرسل النبي صلي الله عليه وسلم من يوصل الي حضير نصيبه من الطعام وقال له:
عندما تعطي حضيراً الخبز انظر ماذا يقول.
عاد الرسول من عند حضير ليخبر رسول الله صلي الله عليه وسلم:
أن حضيراً عندما أُعْطِيَ الخبز قال:
اللهم كما لم تنسْ حُضَيراً فاجعل حضيراَ لاينساك.
ماهذه العظمة؟

نعم والله ما هذه العظمة

وان شاء الله نشوفكم بعد الشهر الكريم وكل سنة وانتو طيببن
والله يديكم العافية

نذكِّر القارئ المبارك:
بالعفو والتسامح والتراحم
والمسارعة الي الخيرات في هذا الشهر المبارك

روي البخاري عن شداد بن أوس رضي الله تعالى عنه عن النبي صلى الله عليه وسلم قال: سيد الاستغفار: اللهم أنت ربي لا إله إلا أنت، خلقتني وأنا عبدك وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك علي وأبوء بذنبي، فاغفر لي فإنه لا يغفر الذنوب إلا أنت.
قال: من قالها من النهار موقناً بها فمات من يومه قبل أن يمسي فهو من أهل الجنة، ومن قالها من الليل وهو موقن بها فمات قبل أن يصبح فهو من أهل الجنة.
وقال رسول الله صلى الله عليه وسلم لفاطمة رضي الله عنها: ما يمنعك أن تسمعي ما أوصيك به، أن تقولي إذا أصبحتِ وإذا أمسيتِ: يا حيُّ يا قيوم برحمتك أستغيث، أصلح لي شأني كله ولا تكلني إلى نفسي طرفة عينٍ [رواه النسائي والبزار بإسناد صحيح].

هذه المادة منقولة من الموقع التالي:
http://islamic.telive.net/Azkar_Do3aa_Outer.aspx?cat_Id=24

الدعاء من الكتاب:
1- {رَبِّ اشْرَحْ لِي صَدْرِي * وَيَسِّرْ لِي أَمْرِي * وَاحْلُلْ عُقْدَةً مِنْ لِسَانِي * يَفْقَهُوا قَوْلِي} [طه: 25- 28].
2- {رَبِّ إِنِّي ظَلَمْتُ نَفْسِي فَاغْفِرْ لِي} [القصص: 16].
3- {رَبَّنَا ءامَنَّا بِمَا أَنْزَلْتَ وَاتَّبَعْنَا الرَّسُولَ فَاكْتُبْنَا مَعَ الشَّاهِدِينَ} [آل عمران: 53].
4- {رَبَّنَا ءاتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ} [البقرة: 201].ِ
5- {سَمِعْنَا وَأَطَعْنَا غُفْرَانَكَ رَبَّنَا وَإِلَيْكَ الْمَصِيرُ} [البقرة:285 ].

يعجبني هذا البيت
قد ينعم الله بالبلوي وإن عظمت ـ ـ ويبتلي بعض الناس بالنعم

الحسن بن صالح قال: سمعت شعيب بن حرب يقول: لاتجلس الا مع احد رجلين:
رجلٌ جلستَ اليه يعلِّمكَ خيرا فتقبل منه ، أو رجُلٌ تعلمه خيراً فيقبل منك، والثالث اهرب منه.

Quote: اها رايك شنو في الأتنين الأتغالطو في شارع مدني الخرطوم الأول: الشارع دا طبعا بتاع الخرطوم مدني التاني : كضبا كاضب دا ياخوي شارع مدني الخرطوم احتكمو للتالت اسمع يا حبة دا شارع مدني الخرطوم ولا الخرطوم مدني؟ التالت: هو هسع الشارع وينو ذاتو؟؟؟ انا وافق الزول التالت دا غيتو

مرحبتين ودالشيخ
رمضان مبارك
ديل زي الجماعة الـ كانوا بتغالطوا في دي الشمِشْ ولا القمرا.
مرَّ بيهم واحد مسطول وقَّفوهو:
ياخينا لو سمحت أنا وصاحبي ده مِتْغالتين هو بقول ديك الشمش
وأنا بقول ليهو دي القمرا.
المسطول: آسِف ياشباب أنا ما من البلد دي

حسين بن زياد قال: بعث بعض القضاة الي سيار بواسط فأتاه فقال له:
لِم لاتجئ إلينا؟
فقال له: إنْ أنت أدنيتني فتنتني ، وإن باعدتني غممتني ، وليس عندك ما أرجوه
ولاعندي ما اخافك عليه ثم قام.

عربي قالوا ليه رمضان قرب
قال: لأُبَدِّدن شَمله بالأسفار.

موقع مفيد نرجو لكم فيه التوفيق

http://www.waqfeya.com/category.php?cid=89

عن سويد بن غفلة قال: إن الملائكة تمشي امام الجنازة وتقول: ماقدّم؟ ويقول الناس: ماترك؟

عندما كنت طالب بالحقوق , سكنت معظم فترة دراستي في الثورة الحارة السابعة حيث يقيم خالي محمد بخيت رحمه الله رحمة واسعة.
جارنا بالحيطة العم حامد ـ من الجموعية حيث يقيم هو واسرته في المنزل المملوك للعم حامد.
ولده هو لاعب الموردة الحريف احمد حامد.
مانطَوِّل عليكن ـ عم حامد هذا لايتكلم كثيراً لكنه رجل سُكَّرَة حلو المعشر ومع انه رجل قليل الكلام إلا ان القليل يجيئ ساخراً مضحكاً
واحدة من طرائفه:
كان الوقت رمضان - وتعرفون رمضان الصيف في السودان وفي الثورة كمان. نار منقد بس.
كان الوقت قبيل مغيب الشمس بدقائق والبروش قد جُهِزت في الفسحة الواسعة وانتشرت الكاسات علي امتداد البروش التي فُرِشت في خطوط متوازية وحُفظت المسافات بين البروش بعناية والعصائر في اواني الزجاج تجعلك تنازع الصبر وتنظر ناحية الغرب تارة والي ساعتك اخري.
في هذه اللحظات كان العم حامد يمسك بلحة سوداء اللون بين اصابع كفِّه اليمني وكانت الكف ترتفع لتبلغ البلحة شفتي عم حامد ثم تنخفض لتستقر علي حِجره في انتظار الآذان وكان يبدوا عليه العطش في ذلك اليوم الشديد الحرارة حتي بدا للصائم ان نهاره اطول من كل النهارات .. او ان شمسه قد توقفت عن المسير لفترة في كبد السماء علي غير منوالها.
في هذه اللحظات بدأ احد الحاضرين يحكي عن كيف ان الرسول صلي الله عليه وسلم كان رحيما بالمؤمنين وكيف طلب من الله عز وجل ان يخفف علينا الصلواة من خمسين الي خمس في إشارة الي قصة الإسراء المعروفة وهنا تداخل احد الحاضرين قائلاً:
ياريت ياخ الرسول كان طلب من ربه يخفف لينا الصيام زي ما طلب منه يخفف لينا الصلاة..
هنا جاء صوت عم حامد والبلحة في يده يشير بها تجاه المتكلم:
ياخ العارفو منو يمكن رمضان ده كان السنة كلها

شهاب الدين ابوسنان قال: قال ابليس:
إذا استمكنت من ابن آدم ثلاثاً اصبت منه حاجتي:
إذا نسي ذنوبه ، واستكثر عمله ، وأُعْجِب برأيه

{وَوَصَّيْنَا الْإِنسَانَ بِوَالِدَيْهِ إِحْسَانًا حَمَلَتْهُ أُمُّهُ كُرْهًا وَوَضَعَتْهُ كُرْهًا وَحَمْلُهُ وَفِصَالُهُ ثَلَاثُونَ شَهْرًا حَتَّى إِذَا بَلَغَ أَشُدَّهُ وَبَلَغَ أَرْبَعِينَ سَنَةً قَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَصْلِحْ لِي فِي ذُرِّيَّتِي إِنِّي تُبْتُ إِلَيْكَ وَإِنِّي مِنَ الْمُسْلِمِينَ}

فتكون النتيجة كما قال الله سبحانه وتعالي في الآية التي بعدها:

{ اولئك الذين نتقبل عنهم أحسن ما عملوا ونتجاوز عن سيئاتهم في أصحاب الجنة وعد الصدق الذي كانوا يوعدون} (الأحقاف الآيات:)

عن علقمة بن مرثد قال:
إنتهي الزهد الي ثمانية من التابعين ، منهم الاسود بن يزيد . وكان يجتهد في العبادة ، ويصوم حتي يصفر ويخضر . فلما احتضر بكي . فقيل له ماهذا الجزع؟ فقال:
لااجزع؟ ومن احق بذلك مني؟ والله لو أُتيت بالمغفرة من الله عز وجل لأهمَّني الحياء منه بما قد صنعت.
إن الرجل ليكون بينه وبين الرجل الذنب الصغير فيعفو عنه ولايزال مستحيا منه.

قيل لعلقمة: افلا تدخل علي السلطان فتنتفع؟
قال: إني لا أصيب من دنياهم شيئاَ إلا أصابوا من ديني مثله.

زر بن حبيش الأسدي

هو: زِرٌّ بكسر اوله وتشديد الراء ـ بن حبيش بن حباشة الكوفي ، ابومريم ، ثقة مخضرم مات سنة إحدي او اثنتين او ثلاثة وثمانين ، وهو بن مائة وسبع وعشرين.

عن سويدالــــ كلـ بي ان زر بن حبيش كتب الي عبدالملك بن مروان كتاباً يعظه فيه فكان في آخر كتابه: ولا يطمعنَّك يا أمير المؤمنين في طول الحياة مايظهر من صحة بدنك، فأنت اعلم بنفسك، واذكر ماتكلَّم به الأولون:

إذا الرجالُ ولدت أولادُها ـ ـ ـ وبليت من كبر أجــــــــــســــادُها
وجعلت أسقامها تعتادها ـ ـ ـ فذلك زروع قد دنا حصادُها

فلما قرأ الكتاب بكي حتي بلَّ طرف ثوبه، ثم قال: صدق زر، ولو كتب إلينا بغير هذا كان أرفق

شميط بن عجلان كان يقول:
بلغنا ان الله تعالي اوحي الي داود عليه السلام:
"ياداود الا تري الي المنافق كيف يخدعني وانا اخدعه؟ يسَبِّحني ويوقر بلسانه، وقلبه مني بعيد.
ياداود قل للملأ من بني اسرائيل لايدعوني والخطايا في اضبانهم ، ليضعوها ثم ليدعوني استجب لهم.

وكان شميط بن عجلان يقول: إنسانان معذبان في الدنيا: غنيٌ أُعْطِيَ دنيا فهو بها مشغول ، وفقير زُويت عنه فهو يُتْبِعها نفسه فنفسه تَقَطَّع عليها حسرات.

وكان يقول: الناس ثلاثة: فرجل إبتكر الخير في حداثة سِنِّهِ ثم داوم عليه حتي خرج من الدنيا ، فهذا المقَرَّب ،
ورجل إبتكر عمره بالذنوب وطول الغفلة ثم راجع توبة ، فهذا صاحب يمين ،
ورجل ابتكر الشر في حداثة سِنَّه ثم لم يزل فيه حتي خرج من الدنيا فهذا صاحب شمال

قال هرم بن حيان لأُويس القرني: أوصني، قال:
توَسَّد الموت إذا نمت، واجعله نصب عينيك، وإذا قمت فادع الله أن يصلح لك قلبك ونيتك فلن تعالج شيئاً أشد عليك منهما بينا قلبك معك ونيتك إذا هو مدبر، وبينا هو مدبر إذا هو مقبل، ولاتنظر في صغر الخطيئة ولكن انظر إلي عظمة من عصيت.

أبو عبدالله الناجي قال:
زار هرم بن حيان أُويساً، فقال له هرم: يا أُويس واصلنا للزيارة، فقال أُويس: قد وصلتك بما هو أنفع لك من الزيارة واللقاء: الدعاء بظهر الغيب، لأن الزيارة واللقاء قد يعرض فيهما التزين والرياء.