Post: #1
Title: اهى ديك .
Author: shaheen shaheen
Date: 04-05-2013, 11:41 AM
1
اهى ديك البت النطت جوه جنينتك سرقت
اهى ديك .. الدخلت سطح بحيرة نفسك سبحت
اتحدت عمق البير الفيك
من شعرها مدت حبلها نزلت
اهى ديك .. القاعدة على الكرسى
الماسكة فى يدها كباية .. بتهزر وبتحكى حكاية
البت الـ لابسة أيشارب اخضر
بتمر قدامك مخصوص .. وتخلى حزن قلبك يضحك
الله بختك
الظاهر انها بتحبك !
اهى ديك البت الـ بتحبك
من خوف العالم بتدسك
الشالت من كتفك وجعك
والختت عطرها فى حجرك
الله بختك .
شاهين
|
Post: #2
Title: Re: اهى ديك .
Author: درديري كباشي
Date: 04-05-2013, 01:37 PM
Parent: #1
أهو دا شاهين البهدل حالنا
اهدو دا شاهين الشتت بالنا
المعارفين مالو ومالنا
واصل يا فنان
بالسهل الممتع والممتنع
|
Post: #3
Title: Re: اهى ديك .
Author: shaheen shaheen
Date: 04-05-2013, 04:23 PM
Parent: #2
2
تخيل اننى عاشق وفى درب الهوى سادر انا مُغرم بحبك يا مسيحية وقبطية تخيل اننى خايف من الفرقة .. ومن بكرة نجوم ليلك أهى تلالى انجيلك وقرآنى سحابات الخريف مرقت .. وبتنادى تعالى نحطم الحاجز تخيل اننى فارس وفى درب الهوى سادر حصان خشبى .. وسيفك من صفيح لامع اخوض امواج بحر هايج سلالم لـ مكان عالى سلام لـ دينك الغالى انجيلك وقرآنى تخيل اننى معشوق على ربوة غرام مجدوع صليب مصلوب على رسغ الحبيب مدقوق (مسالمية) تخيل اننى مُسلم وعاشق بت مسيحية .
شاهين
|
Post: #4
Title: Re: اهى ديك .
Author: shaheen shaheen
Date: 04-06-2013, 05:48 PM
Parent: #3
3
طوفان من خوف غرق امنى
دسينى فى حضنك دسينى
يمكن فى حصنك خوفى يخاف ما يرجع تانى يبارينى
جاييك فى نص الليل عصفور .. بجناح مكسور
عايزيين فى الليل يصطادونى
افتحى شباك حضنك ليا
شافع مهجوم من وسـخ الدنيا وغدر الليل
فى الليل يا ليل .. عايزيين فى ليل يصطادونى
بت يا فاطمة
يا طرحة على الافراح طارحة
مُحتاج لـ حضنك , كلماتك , ريحة عرقك
مُحتاج من خوفى تدسينى
اوعك تقفلى شبك حضنك
اوعك يا فاطمة تبيعينى .. اوعك يا فاطمة تسيبينى
فى ركن الشارع منتظرين .. عصفور مسكين .. عايزيين بـ نبلة ينيشونى
افتحى يا فاطمة
افتحى يا فاااااطمة ودسينى
ااااخ .. يا روح القلب اتاخرتى .. على حافة شباكين نهدك , اولاد الـكـلب اصطادونى .
شاهين
|
Post: #5
Title: Re: اهى ديك .
Author: shaheen shaheen
Date: 04-07-2013, 09:55 PM
Parent: #4
4
لورى الشمالية .. اوعك من الرملة
ما بين هذا وذاك
بين ضحكة والدمعة
محبوبتى شايقية
مروية .. نيلية
كـ الطفلة فى الروضة .. ترضع صباع ايدها
سيدى (الحسن) سيدها
تصطاد سمك فى الليل
اصطاد فساتينها .. وثمار بساتينها
وتعوم على جسمى
اغرق .. اناديها
تغسل مناديلها
واشوف قناديلها
تخجل تضاريها
افتح .. اغوص فيها
اغسل عليك شبقى
- ضيعتا لى شبطى .
- شكلك حـ تفضحنى .
- ود عمى بضبحنى .
بين لا .. كفاية .. خلاص
الليل بيسترنا
بس من عيون الناس .. يا ربى استرنا
والذنب ما ذنبى
عسلك وما بيكمل
لما الشمس تطلع .. بتمنى لو ترحل
شان ليل جديد يظهر
تصطاد سمك فى الليل .. واصطاد فساتينها .
شاهين
|
Post: #6
Title: Re: اهى ديك .
Author: shaheen shaheen
Date: 04-23-2013, 09:12 PM
Parent: #5
5
بين (لا) و (نعم)
اخترتا (لا)
مسكين خلاص
كم الف زول مشى فى طريق الـ (لا) وتاه
كم الف زول مشى فى طريق الـ (لا) رجع
اخترتا (لا) ؟
مبروك عليك , شلتا الوجع
(لا) كلمة زى موس فى اللحم
(لا) صوت كمنجة منشزة فى انغام (نعم)
لا .. لا .. لا
يا كلمة حبينى
قوينى
دفينى
خلى التحدى الفيك
يكبر يكون فينى .
شاهين
|
Post: #7
Title: Re: اهى ديك .
Author: shaheen shaheen
Date: 05-17-2013, 11:46 AM
Parent: #6
6
تباشير الخريف هلت
تباشير انكسار لاحت
هدوم العيد .. وريحة بسكويت فاحت
طباشير فى الحيط كتبت :
(حضرت اليوم ولم اجدك)
وامبارح ولم اجدك
واول اول امبارح
متين اجدك وتجدينى ؟
وخايف من مطر ليلك .. يبلل لى هدوم عيدى
مطر شكشك على راسى
صلاة العيد جوار بيتكم
اخوض فى الطين
وكيف اصلك ولا اجدك ؟
اصوم فى العيد ؟
صيام العيد حرام شرعاً
ولم اجدك
انوم احلم .. عشان القاك
- يا احلام .. يا احلام .
كوابيسك بقت اضغاث
(حضرت اليوم ولم اجدك)
تباشير انكسار لاحت
واعشاب الاسى الظهرت
على سرج الحصان رقدت وارتاحت
وعايز اغرق
وسامع النيل بنادينى
- تعال اغرق .
- تعال اركب على الامواج .
انا مجدوع على شاطىء
طحالب خضرا فى وشى
كلاب ضخمة .. بتنهش فى لحم فخدى
و دود داخل و دود طالع
صقور بدات تحوم حولى
بقيت منفوخ
(حضرت اليوم ولم اجدك)
تباشير انكسار لاحت
وريحة بسكويت فاحت
وغربان الفريق صرخت
على سلك العمود ناحت
تباشير الخريف هلت
واحلام العمر ولت
سدود قدامك اتعلت
قدود .. و الدود , جيوش بتصفى فى دمك
متين اجدك وتجدينى ؟
وخايف من مطر ليلك .. يبلل لى هدوم عيدى
(حضرت اليوم ولم اجدك)
(حضرت اليوم ولم اجدك)
(حضرت اليوم ولم اجدك)
وسامع النيل بنادينى .
شاهين
|
Post: #8
Title: Re: اهى ديك .
Author: Emad Eldeen Ali
Date: 05-17-2013, 03:54 PM
Parent: #7
عزيزي
أبل الشوق (بكسر الباء)
تمعن فى المصطلح الجميل ده يعني الشوق نار وفى النيران نار جمر دي من المسلمات, بس معروف إنو البلل سببه المويه وهي عكس النار.
والنار لمن تقيد فى الفحم ويبقى ليها لهيب بدوها بله بالمويه عشان تهدى وتستكين لكن ما عشان تنطفي.
واهو ده حالنا مع كتاباتك.
تسلم يا فنان
|
Post: #9
Title: Re: اهى ديك .
Author: shaheen shaheen
Date: 05-24-2013, 06:21 AM
Parent: #8
7
اذا كان ممكن
القى مساحات منك اكتر
واذا كان ممكن
تحبى الاحلام فيكى وتكبر
بس لو اقدر
ارسم لوحتنا بـ لون اصفر
وابدل لون شمسك اخضر
اقدر ؟
لو تقدرى .. راح اقدر
وادخل مملكتك كالقيصر
انا بتمناك
ياسمينة , قرنفلة
او نورس
نورس ابيض
اغرفى من جسدك فى جسدى
جسدى اسمر
شاطىء لـ نوارس يا نورس
انا بتمناك
ورينى حدودك فى الاطلس
شان احتلاك
وابدل لون قمرك احمر
اذا كان ممكن .
شاهين
|
Post: #10
Title: Re: اهى ديك .
Author: shaheen shaheen
Date: 05-25-2013, 10:42 AM
Parent: #9
8
سجمك
رفسك حصان حظك رماك
ركبك كـ هم نحسك اساك
وبراك ابكاك التواجد فى الوطن
وبراك ابكاك التشرد فى البعاد
(سيزيف) منو البيشيل معاك ؟
سجمك
فلا يوجد احد
وووب عليك من صخرتك
وووبين عليك من صرختك
(سيزيف) سجم امك عليك
فلا احد
(سيزيفنا) لم ينجح احد
والراحة فى ود اللحد
والصخرة قد تدخل معاك
مبروك عليك
رفسك حصان حظك رماك
شاهين
|
Post: #11
Title: Re: اهى ديك .
Author: shaheen shaheen
Date: 05-30-2013, 07:41 PM
Parent: #10
9
صباح نادى
صباح الورد يا وردة
صباحك حلبة بالقرفة
صياح الديك
ومع صوتو الصباح يبدأ
صحيت من نومى صحصحتا
متفائل
و بعطر الامل فوحتا
فتحتا الباب
وفى وش النسيم صحتا
- صباح نادى .
اكلم اى زول ماشى
انادى عليك يا بهجة
تردى وانتى مبتهجة
اشوف وشك
يزهزه ابتهاج ذاتى
صباحاتك عسل صافى
صعوبات الحياة سهلة
ينط احباطى للماضى
وامواج الفرح تعلا
صياح الديك
ومع صوتو الصباح يبدأ
صباحك حلبة بالقرفة .
شاهين
|
Post: #12
Title: Re: اهى ديك .
Author: shaheen shaheen
Date: 05-31-2013, 08:51 AM
Parent: #11
10
اهلاً وسهلاً انتا مين ؟ لما عاينتا فـى مرآية , ما عرفتك ! انتا مين يا وش حزين ؟ عاملة ايه فيك السنين ؟ مركب تودى .. الـ توديك ما بتجيب انتا مين ؟ يا زول مداقش فى دروب الهجرة فى جيوب البنطلون شايل حنين درباً بـوديك .. الـ بـوديك ما بيجيب ضيعتا وشك يا غريب ضيعتو فى زحمة رصيف وصرختا فى الوش البديل - منو انتا ؟ .. انا شايفك كتير . انتا مين ؟ يا الماشى حفيان فى الطريق شاكيك شوك درب المسير وين الجناحين شان تطير ؟ لا راحة فى الوطن الاساس لا راحة فى الوطن البديل مكتوب عليك الاندهاش مقسومة ليك سكة سفر شنطك مستفة للرحيل موعود تكون فى الغربة يا بحار غريب يا غربة فى الوطن الاساس يا غربة الوطن البديل وشك صرخ فيك - انتا مين ؟ . رديت - غريب .. داير استريح . وشك قفل باب وشو فى وشك ! وبقيت براك انسان وحيد .. مهجوم من الامطار .. حزين موعود تكون فى الغربة يا بحار هجين .
شاهين
|
Post: #13
Title: Re: اهى ديك .
Author: Hani Arabi Mohamed
Date: 05-31-2013, 09:02 AM
Parent: #3
Quote:
تخيل اننى عاشق
وفى درب الهوى سادر
انا مُغرم
بحبك يا مسيحية
وقبطية
*
تخيل اننى خايف
من الفرقة .. ومن بكرة
نجوم ليلك أهى تلالى
انجيلك وقرآنى
سحابات الخريف مرقت .. وبتنادى
تعالى نحطم الحاجز
*
تخيل اننى فارس
وفى درب الهوى سادر
حصان خشبى .. وسيفك من صفيح لامع
اخوض امواج بحر هايج
سلالم لـ مكان عالى
سلام لـ دينك الغالى
انجيلك وقرآنى
*
تخيل اننى معشوق
على ربوة غرام مجدوع
صليب مصلوب
على رسغ الحبيب مدقوق
(مسالمية)
*
تخيل اننى مُسلم
وعاشق بت مسيحية .
|
صباحاتك خير يا مبدع يا شاهين
خلال قراءتي للنَص أعلاه
وجدتني فجأة
أنطقه بلحنٍ على إيقاع
السيرة
استأذنك في
تنفيذ اللحن
:)
|
Post: #14
Title: Re: اهى ديك .
Author: shaheen shaheen
Date: 05-31-2013, 06:44 PM
Parent: #13
11
يا فاطمة فى زمن الزهايمر .. اذكرينى والناس بتنسى الناس فـ كيف تنسينى ؟ سيبانى فى طريق مهجور براى خطواتى ما تحصل سنينى فـ تذكرى الماضى اللى كان يا فاطمة ارجوك اذكرينى من لوحة التذكار ومن صورتك معاى من بسمتك .. من توبك الابيض ومن علبة سجايرك المقالات .. نشرة الاخبار غمزة عيونك مشيتك زى عسكرى شلال انوثتك .. رقتك تكشيرة الوش .. يا هزارك وشدتك يا فاطمة فى زمن الزهايمر .. والخلعة من وسـخ الزمان عبث الكتابات والكلام ضجر السياسة اليأس من هذا الزحام الهاوية .. والا مكان فطومة يا زاد الطريق فطومة يا كتف الرفيق فطومة يا قشة غريق فـ تذكرى المحروق على نار الحريق يا فاطمة فى زمن الزهايمر اذكر .. ويتعبنى التذكر والحنين فى غابة النسيان اتوه واتذكرك على صوت تذكر ذكرتك بتذكرك ريحة سجايرك .. ضحكتك الله عليك .. مشتاق كتير لـ قهوتك احضن اغازل شفتك الله عليك .
شاهين
|
Post: #15
Title: Re: اهى ديك .
Author: shaheen shaheen
Date: 06-14-2013, 04:50 AM
Parent: #14
12
ملعونة هذى الصحية مع صوت الاذان
الصيحة طالعة كما الفحيح
المُلك لله .. الرزق اصلاً شحيح
معقولة وشك زى قفاك ؟
مقلوبة
بـ الهوبة .. انعدلتا على الصراط المستقيم
يا تقول عديل
او تنخرس
هل انتا يا دكر البنات
وقت الهبوب ما بتنكسر ؟
شن مرقتك والناس نيام ؟
لـ مرقدك اعمل تمام
هذا زمانك يا مهازل
هذا زمان الانبطاح
فـ أترك نطاح الحيطة , يفتكروك عوير
لا فيك رِيالة .. لا سمعنا منك صوت ظُراط
فك تكة السروال
وتكتك
فـ القوانين فى التكية , برضو مُحتاجة لذكاء
داقش , تجد .. ولكل مُحتهدِ مصيبة .. او نصيب .. او وقعة فى البير الغريق
تمبل السلطان , ومخصى القصر , المحظية , والـقـوادة ام سِنة دهب
ديل اصدقاء
فـ اترك سلاحك عند باب القصر .. واربط حصانك , فى خشم باب العدو
ثم انصرف .. بعد الصلاة
هذا زمان الاصدقاء
كن مطمئن
اوعك تئن
اصطحب مرأتك , ومرضك , والعيال
نحو الهلاك
بعد التجشأ , والتمخط , والتبرز , والتسوك , والسعال
والبسملة
يبقى السؤال
يا لاوى بوزك مشمئز او مُنقهر
هل انتا يا دكر البنات
وقت الهبوب ما بتنكسر ؟
شاهين
|
Post: #16
Title: Re: اهى ديك .
Author: shaheen shaheen
Date: 06-27-2013, 09:22 PM
Parent: #15
13
سنة واحدة بس
والاربعين حـ يدق على ابواب مدينتك
افتح الباب الكبير
سنة واحدة بس
شمسك خلاص بدات تميل نحو المغيب
سنة واحدة بس
اكوام قزاز مكسور .. وبحثك عن بصير يجبر كسور
يا (دون كيشوت) العظيم
ضيعتا عمرك يا غبى
ضيعتا عمرك فى طواحين الهواء
- انا بعتقد , انا بفتكر .
- الم الكتابة المؤلمة , وعى الجماهير لو تعى .
امشى اتلهى
شوف ليك فكى
يمكن حجابه يرجع العمر اللى ضاع
وتبدأ صاح
وتنتهى
مثل الجميع ما بيشتهى
والاربعين جاييك جرى
ود يا غبى .
شاهين
|
Post: #17
Title: Re: اهى ديك .
Author: Awad Omer
Date: 06-28-2013, 06:21 AM
Parent: #16
| Quote: اذا كان ممكن ......ارسم لوحتنا بـ لون اصفر |
الله....الله ..يا شاهين.... لون ايامنا دائما...بابداعك.
|
Post: #18
Title: Re: اهى ديك .
Author: shaheen shaheen
Date: 07-05-2013, 09:06 PM
Parent: #17
14
اشمعنى من كل البنات اخترتا فاطمة ؟
وعلى الرصيف بتعدى الاف البنات
اشمعنى انتا على الرصيف مُستنى فاطمة ؟
خبطك زمانك فى قفاك
اشمعنى لما صرختا منه
صرختا فااااطمة ؟
وكتار خلاص الفارقوك
خلوك بدون قشة غريق
اشمعنى فى حرق الحشاء
حرقت حشاءك , ست البنات , الست فاطمة ؟
ما الحكمة من سفرك براك ؟
من غير كتب , وبدون شنط
دون زاد
ودون الست فاطمة
ما المعنى من عبث الحياة ؟
وكتار خلاص على صدرهم ياما بكيت
اشمعنى لما بتبكى هسع
اشمعنى بس .. بتحن لـ فاطمة ؟ .
شاهين
|
Post: #19
Title: Re: اهى ديك .
Author: shaheen shaheen
Date: 07-18-2013, 03:20 PM
Parent: #18
تحية حب واحترام
أ/ درديرى كباشى .
أ/ عماد الدين على .
أ/ هانى عربى محمد .
أ/ عوض عمر .
شكراً على تكبد مشقة القراءة , ومشقة التعليق بالكلمات .
كل امتنانى واعتزازى .
|
|