مشاهدات من الخرطوم .............. جيناك يابلد راجعين

مشاهدات من داخل الخرطوم


هى مجموعة من المشاهدات تصف بعض المواقف والمشاهد بعد غياب دام من البلاد لسنوات

قد يكون ظاهر بعضها مضحك ولكنها تحمل فى داخلها الكثير من الحزن والاسف

Quote: هى مجموعة من المشاهدات تصف بعض المواقف والمشاهد بعد غياب دام من البلاد لسنوات قد يكون ظاهر بعضها مضحك ولكنها تحمل فى داخلها الكثير من الحزن والاسف

فى انتظارك صديقى العزيز واثق احكى وقول ...............؟ ربك يستر بس

مطار الخرطوم

القادم الى مطار الخرطوم او العابر بجواره يلاحظ تلك المساحة الشاسعة من ارض المطار التى

تحتلها اعداد كبيرة من السيارات التابعة للامم المتحدة كما يوجد جبلونين ضخمين على تلك

المساحة تابع ايضا للامم المتحدة ............. ولا يمكن ان تمر بأحد الشوارع اذا كان فى

الخرطوم او ام درمان او بحرى بدون ان تمر بك عربة تابعة للامم المتحدة ..............

فى نفس يوم وصولى الى الخرطوم زارنى بعض الاصدقاء والجيران يحمدون سلامة العودة

بادرنى بعضهم بعد السلام والسؤال عن الاحوال لماذا رجعت ؟؟؟؟؟؟؟؟؟ كان تقعد مكانك احسن ليك !!!

اما البقية قالوا حمدلله على السلامة واحسن انك جيت عشان تضوق معانا الوجع شوية .. واهو الناس

عايشه جرب حظك هناامكن ربنا يفتحه عليك .............

صديقى العزيز النسر

سلامات عوافى واشواق من هنا لآ عندك

فى المنزل لاحظت حرص اهل المنزل على مراقبة عداد الكهرباء الحديث ( الجمرة الخبيثة) كما يطلقون عليه ........ والحرص و الترشيد فى استخدام الكهرباء حتى ان البعض يتندر بأن عند حلول ضيف على اصحاب المنزل مساءا يخيرونه بين الحاجه البارده او اضاءة النور ...........

مساء نفس اليوم ذهبنا الى مستشفى الاطباء لمباركة ابن شقيقتى الاول و السلام عليها و الاطمئنان على صحتها خرجنا بسيارة صديق لنا .......... فى المستشفى لفت نظرى عدد كبير من العمال البنغاليين ........ وفى داخل المستشفى عند الاستقبال وجدت ممرضات من شرق اسيا وهنديات ... تسألت مع شقيقى الاصغر وهو طالب فى كلية الطب عن العمال البنغاليين فى الخارج والممرضات الاجنبيات فى الداخل وقال لى ان العمال تابعين للمستشفى وهم عمال للنظافة واصبحت كل المستشفيات الخاصة تجلب العمال والممرضات من الخارج حتى تمتاز بخدمات جيدة والاهم هو ان هذه العماله ارخص كثيرا من العماله المحلية ...........

وبعد خروجنا من المستشفى عرض علينا صديقنا ان نتجول قليلا فى الاماكن التى انشئت حديثا فكانت اول زيارتنا لموقع الكبرى الجديد تحت الانشاء الرابط بين بحرى والخرطوم وشاهدنا الشركات الاجنبية وهى تعمل داخل النيل .......... كما شاهدنا من على البعد اليخت الرئاسى على ضفة النيل من جانب مدينة بحرى .......... ثم ذهبنا مباشرة الى حيث الفيلل الرئاسية التى اقيمت على شرف قمة الاتحاد الافريقى وكانت غاية فى الجمال والروعة ولا يلاحظ العابر بذلك الطريق المؤدى الى الفيلل كيف رصف ذلك الطريقة بعناية وانشئت على جانبه الحدائق المنسقه ......... وسلكنا الطريق عبر القصور الى الكبرى الجديد الرابط بين المنشية والجريف ببحرى ........... كلها كانت منشئات جديدة تعطى انطباعا جيدا من اول يوم ...........

ولكن .............

Dear El-Wathig,

Sorry for using English Language, because I am in the Country I suppose only using their local language( whichis near to Chinese one) or English. You are welcome to Sudan, you must prepare youself for many surprising and social changes, not to possitive but almost to negative habit. It is good you have the foreigner eyes to discover this incidents. If you are Sudan, you will never recongnize all these modifications.

I extend my thankfulness to open this hottest topic, I will try to reply in Arabic next time, may be you, me and others could make something possitive and profitable to our country as Sudanese lookforward for better future.

Salam to All friends

Mey

ياالواثق
حمد الله على السلامة...
وبركة رجوعك بالسلامة للأهل...
وتبقى أسباب السفر...
ونظل نهجس بالموانئ.

بنت الأسيد( مي)

صديقتى التى غابت عنى فى ديار الغربة...

مشتاقين...

الرجاء الأتصال حيث لا أملك لك عنوان...


نجاة عبد الرحمن

الاخت و الصديقه المفقوده منذ ايام جامعه الجزيره

نجاه لقد اختفيتي عن الاتصال , الاخبار و الانظار

يمطرني الشوق اليك و الي الايام الباقيه في تلاليف الذاكره التى لا تمحا
حنظله ابن ناجي العلي, ود الناصر حين يشدو
امرق يمرق جلدك النازف عرق .............


يا انسان هل حاولت تشوفك فيك جاك احساس انك ما لاقيك
.............................................

ينفجر فينا الصهيل بركان
نخش في جوهر الاشياء
نعيد ترتيب مواعيدنا

I am sorry, there is problem in computer's keyboard refuses to write in Arabic, so I will continue in English

Please send to me your email address, because I have presentation in Alaska University next Ocotber.

Dear El Wathig,
I was really want to write in Arabic, so I will keep my words till I solve the computer problem.
Thanks for your topic that let me find one of oldest friends

With all my regards

Mey, Thailand

صديقي وعزيزي الواثق

الف حمدلله علي سلامتك والحمدلله وصلت لي الاهل بالسلامة

وها تجدني احتل مكانا لسماع اجمل القصص وانت تروي

لنا ما حدث وكمان بالتفاصيل حتي نكون معك

صديقتى المفقودة, والعزيزة جدا (مى):
***
أمرقى---- يمرق جلدكـ لنازف -----عرق.
***
بلدى يا فردة جناحى التانية----- لما الناس تطير لعالمها
***

وانت تختفين كالسراب
كلما وجدت لك عنوان كان بعد رحيلك عنه...
***
كنت ب آلاسكا قبل ثلاث أسابيع بمؤتمر ما...تبعد آلاسكا عنا
13 ساعة سفر وأربع ساعات فرق زمن...
أتمنى مرورك بنا قبل أو بعد مؤتمرك هذا.
***
تحياتى ل العزيزة ميادة ولكل ناس البيت.
***
حليل الجزيرة ونظلة وناس ناصر وعبد الناصر وسيف وسهير وسرور وبقية العقد الفريد وناس الكورال.
***
نجاة بت عبد الرحمان (فى لحظة حنين وتحنان )

معزرة يا الواثق فقد إستلمت بوستك
***مي راجعى الماسنجر الداخلى

thanks

الواثق حمد الله على سلامتك
لسه حتشوف الكتير من المفارقات
حاول اشتغل بسرعة ... اكيد ح تشوف السودان جميل


اتمنى ليك اقامة مريحه

يلا الواثق أمرق لـ برة.. منتظرين.....


بنيات بلدي هبرن بالبورد....

الواثق

حمد لله علي السلامه

انشاء الله إقامه طيبه

شيل نفسك

لسه حا تشوف وتشوف

زي ما قالوا

عشنا ويا ما حانشوف

الاخ / الواثق
تحيه طيبه
لقد تابعت المكتوب بحزنه
و لكن احزننى و جود عمال و ممرضات اجانب
بقض النظر عن الذى يحكم الآيوجد قانون او نقابات او بشر
او صحافه او اى شيئ سميه يقول لا لهذا الانحطاط و يلطم هذه الشركات
حتى يجيب اجلها.
( يا اخى العماله الاجنبيه التى يقولو عنها رخيصه هى اغى من اى عماله محليه
و قد شاهدناها فى دول اخرى يكون فى الظاهر للمواطن و الدوله عقد عمل باجر
مائة دولار زائد السكن و الاكل . اما العقد الآخر فهو فى الباطن خلفه جيش من تجار البشر
و لا يقل فى حده الادنى من خمسمائة دولار الى الف دولار يوزع منها جزء الى تجار البشر شهريا

الصديق العزيز
الواثق
لك كل الأشواق

Quote: مجموعة من المشاهدات تصف بعض المواقف والمشاهد بعد غياب دام من البلاد لسنوات

متابعين للاستفادة

الصديق الواثق

كنا في تعاون الاطفال وافتقدنا حضورك البهي معنا
مشهداتك فيها تلميحات بعدم عودتنا لبلدنا فردة جناحنا التاني لما الناس تطير لعالمها لكن نحنا راجعين وما ندمانين.

كويس موضوعك طلع صديقتنا المختفية مي الاسيد التي بدأنا نفقد ملامحها يا لها من صديقة جافية.
وتحية للجميلة نجاة بت عبدالرحمن
بت الفضل

الاعزاء

مى الاسيد

نجاة عبدالرحمن

حسام يوسف

عبدالمنعم موسى ( صديقى الجديد لنج )

حاتم

ندى نور

وضاح

هنادى بت الفضل

حقيقى اسعدنى تواجدكم ومتابعتكم واتمنا المزيد من مشاركتكم فى هذا البوست

وارجوا من الاخوات مى ونجاة و الجميع عكس ما يناظر هذه المشاهدات فى الخارج

ولكم جميعا خالص حبى وتقديرى

فى اليوم الثانى لم استطع الخروج من المنزل نسبة للاتربة الكثيفة التى غطت سماء الخرطوم ......... وظللت فى المنزل طيلة اليوم

صباح اليوم الثالث بداءت اشعر بمبادىء التهاب غالبا من تغير الطغس والاتربة ولكنى نويت الخروج الى الخرطوم لمقابلة بعض الاصدقاء .... وانا امام باب المنزل شاهدت صاحب الدكان فى الحلة وهو يقف امام دكانه وينظر بأتجاه منزل جارنا فى الحى (ع) فى تلك اثناء جاء بعض الزبائن الى صاحب الدكان فذهب اليهم بخطى متثاقله وهو ينظر خلفه الى منزل (ع) وبمجرد دخوله الى داخل دكانه اذا بباب منزل (ع) يفتح واذا ب (ع) يخرج مسرعا وعند بلوغه اول شارع جانبى اسرع الخطى نحوه ... فى ذلك الوقت لم يرتبط فى زهنى بين وقفة صاحب الدكان وخروج (ع) مسرعا بمجرد انشغاله عن مراقبة منزله..... حيث اننى اقطن فى الحاره السادسة فى ثورات امدرمان خرجت الى شارع الوادى كما اخبرنى شقيقى على وجود مواصلات مباشرة الى الخرطوم من هناك ... عند وصولى الى شارع الوادى وجدت (ع) واقفا وتسالمنا واخبرنى انه شاهدنى امام المنزل ولكنه كان مسرعا وكان من الصعوبة ان يبادلنى التحية خشية من صاحب الدكان سألته بفضول هل لديك مشكله معه ... لا مافى مشكلة ولا حاجه .... اها .... بس عايز منى مية الف التقول عايز مية مليون .... اها ... مجننى بيها جن شديد انا والله بعد مرات بدخل البيت بعد ما هو يقفل وبعد مرات بدخل مسارقه شوفتا بالله الحاله البقت علينا انا والله لو عندى كان جدعتها ليهو فى وشه طوالى ..... طيب انت مدام ما عندك كلمه خلى يصبر عليك شوية ....... والله كلمته اكتر من مرة لكن بينى وبينك انا ذاتى كترتها ....... كيف ..... ليها تلاته شهور ... اها
انت يا الواثق ماشى وين فى التراب ده ....... والله عندى اصدقائى فى الخرطوم السوق العربى عايز امشى اسلم عليهم ..... كويس جدا نركب مع بعض وانزل منك فى الشهداء ... جات الحافلة فقال لى (ع) هاهى حافلة السوق العربى ... ركبنا العربة ... وبمجرد جلوسنا على المقاعد اذا ب (ع) يقول لى طبعا ح تدفع انت لانك جاى من بره ومقرش الايامات دى ومرتاح وكدا ........

نواصل ...
-

الصديق العزيز الوفي الواثق

في الزمن الذي يقل فيه الاوفياء

بالرغم من سعادتي باتخاذك موقفا شجاعا يتعلق بالعودة الطوعية للوطن

الا انني افتقدك كثيرا في عدة مواقف ,

وحتما سنلتقي قريبا قي السودان ونستكمل المشاهدات معا عبر مسارات العمل العام

سواء كان ذلك سياسيا او ثقافبا او اجتماعيا

فلك التحية والاحترام والتقدير وانت تتلالا نجما عائدا يزيد جيد امدرمان

متابعين يا واثـق.

تحياتي

الاصدقاء الاعزاء

محمد احمد

عفاف ابوكشوة

مولانا اسماعيل التاج

جميل جدا مشاركتكم و متابعتكم وجميل السودان بألاهل والاصدقاء و الاحباب

رغم يد التغيير التى طالت كل شىء حتى نفوس البشر الا اننا نهواه ونغرم بكل شبر من بلادنا

لكم جميعا محبتى

من المدهش ايضا هو ان كل شخص فى الخرطوم لديه اكثر من رقم تلفون محمول فالاغلبية لديها ثلاثة هواتف محمولة كل هاتف من شركة من شركات المحمول اريبا و موباتل وسودانى مما احدث لى ربكة الى الان

الأخ الواثق,
حمدا لله علي السلامة ..
دي مساهمة عابرة بي تلاتة مشاهد عن جريدة الصحافة ليوم الإثنين 26/6:

Quote: مجنون المعتمدية !!! مجنون وسط الطريق .. بأحجاره الخطرة وكامل الادوات للتهجم علي السيارات واصحابها واين !! امام مبني معتمدية امدرمان وعلي سطح صينية المدفع الجديدة .. المجنون شغال مرة ( مداح ) ومرة رجل مرور، والغريبة في التانية حركة المرور منسابة بصورة جيدة .. تحت التهديد والتلويح بالحجار العيب الوحيد انه قد يطلب من السيارات التوقف فجأة لان لون السيارة لا يعجبه، او لان سائقها ضحك علي الوضع الفوضوي المجنون السائد بالمكان

Quote: يحدث في مطار الخرطوم ( الدولي )!!! الزمان .. ظهيرة الجمعة الماضية . المكان صالة المغادرة بمطار الخرطوم . المشهد عشرات المسافرين والمودعين والعفش والاجواء الساخنة و( العرق) الوطني علي جباه السمر،والاجانب ( يتهببون) بالصحف والمجلات الكل يبحث عن الاكسجين النقي في اجواء الخرطوم الساخنة .. للوهلة الاولي اعتقدت ان الزحام سببه وجود رحلات عديدة .. حوالي ثلاث اواربع رحلات الي مختلف الدول، لكنني علمت بعد ان وصلت الي المكان المخصص لوزن العفش ان العمل متوقف تماما. * لماذا ؟؟ سالنا وجاءنا الرد ( الجماعة في صلاة الجمعة) هل يعقل ان يتوقف العمل تماما بالمطار لان الموظفين كلهم ذهبوا الي الصلاة ؟؟ ما الحل اذن في حال تكدست الصالات بالمسافرين ؟؟ الم يكن بالامكان ان تضع الادارة حلولا ما، وتحوطات لهكذا اوضاع !! المطار يتعامل مع انماط بشرية عديدة ووجنسيات مختلفة ولديه امنه ايضا هل يذهب هؤلاء جميعا الي صلاة الجمعة ويتركون امن المطار ام ان الامر يخضع لنظم وترتيبات !! لو ان جميع مسؤولي الامن بالمطار يذهبون الي صلاة الجمعة ويتركون امن المطار .. قولوا لنا لنعذر هؤلاء الموظفين البسطاء ونعتذر.

Quote: يحدث في بري أبو حشيش عمارة الرباط .. والروائح المزعجة !!! روائح نتنة تسيطر علي الاجواء هنا في منطقة بري جوار مبني الرباط .. مهما حاولت .. الروائح اكثر نفاذا وشكوي المواطنين لم تجد من يرد عليها .. مياه المجاري تتسلل الي الرقعة الجغرافية وهي تحمل الي السكان الامراض والروائح المزعجة، وهي روائح قال وليد ابراهيم الذي يقيم بمنزل مجاور للمبني انها قاتلة خاصة في الليل واضاف ( نعود لمنازلنا ليلا لنأخذ قسطا من الراحة لكن ماذا نفعل مع هذه الروائح) واضاف ( المياه المتراكمة حول المبني اصبحت مستنقعا يتوالد فيه البعوض ). ورأي حمدان يونس، الموظف بشركة روضة النيلين، ان التخطيط غير السليم للمبني تسبب في هذا الوضع المزعج، وقال بدر الدين عامر ( منذ تشييد هذا المبني لم ننعم بجو صحي معافي ) واضاف ( مياه الصرف الصحي خلقت وضعا بيئيا قذرا وهذا بدوره انعكس علي الحالة الصحية للمواطنين، ونحن نتوقع ان يتدهور الوضع اكثر في ظل هذه الاجواء).

العزيز الواثق تاج السر ..

حمد لله علي سلامة العودة ..

نتابع معك هذه الانطباعات الشيقة..

واصل ..

الاخ الكريم
الواثق

اتابع معك هذا التوثيق
و هذا الانطباعات الشيّقة

خالص التحايا
غادة

تحياتي لك الأخ الواثق

حمدا لله على السلامة و متأسف جداً على عدم إتصالي بك في الفترة الأخيرة كنت مشغول جدا

و على العموم جهز نفسك للمفاجآت و المخالفات و الإيصالات الكثيرة



سلامي للأهل

وائل

الواثق

حظك ياحبيب

بركة الوصلت طيب وحمد لله الف على السلامة

والثورة بالوادى كمان؟

قول لها

ياصباح يازاكى

يازاكى

العبير

وسلم

لى عليهم

عليهم

كتير

متابعة بشوق للمشاهدات

تحياتى

الاعزاء

المعز

محمدين محمد اسحق

غادة عبدالعزيز خالد

وائل

عمر ادريس

ان فرحة العودة الى الديار والى الاهل والاصدقاء لا تضاهيها فرحة وياليتكم كنتو معنا

يحتاج ما يحدث الان داخل البلاد الى الجميع لاحداث التغيير المنشود قبل بلوغ مرحلة اللاعودة

برغم التوسعة التى شملت معظم الطرق الداخلية فى الخرطوم ورصفها الا انها لا تخلو من المطبات مما يدل على ان رصف الطرق تم بصورة غير جيدة ويمكن ملاحظة ذلك بالنظر فقط الى طريق الاسفلت, كما ان هنالك طرق جديده قد انشئت وساعدت كثيرا فى تقليل زحمة المرور وتمت انارة جزء كبير من هذه الطرق بجانب واحد فقط من الطريق ولم تتم الانارة على جانبى الطريق كما هو معهود .... اخبرنى صديقى ساخرا ربما ترشيدا فى استهلاك الكهرباء من حكومة الولاية .....

موقف الشهداء ظل كعهدنا به قبل سنين لم تطاله يد التغيير بل ازداد فوضى اكثر واعتقد ان الاسفلت الذى كان موجودا امام موقف الشهداء امدرمان قد رحل عن هذا الطريق .....

نواصل ...

صديقي العزيز الواثق
..
احييك على القرار الشجــاع ... وده قرار زول ( واثق ) من نفسو ..
اتممنى أن السودان يحتضنك ويعوضك ما فقدتــو ..
والحمد لله الأسرة بخير ..

صديقى الجميل تمبس


شكرا لهذا الحضور الانيق ...

والسودان جميل بألاهل و الاصدقاء و الاحباب

الصديق الواثق
حمد لله على السلامة ومقابلة لاأهل
كدي أمشي على كسلا كدة وورينا الحاصل شنو ؟؟؟

الاخ صديق

ياحليل كسلا الوريفه .....

قرأت يوم امس خبر فى صحيفة السودانى اتحادة جزارى كسلا يهدد بالاضراب وصرح بذلك رئيس الاتحاد رشاد مصطفى ..... هل تذكر هذا الاسم

الصديق الواثق
خليك واثق

السودان دا أجمل منو مافي
رغم الحاصل........
وسوء الحال

خليك واثق إنه الناس الجميلين ما زالوا موجودين
وإنه الأيام الحلوة لسه جاية

ألف حمد الله على السلامة

الاخت العزيزة اشراقة

اجمل ما فى السودان اهله بطيبتهم وكرمهم

ان احتفالية سودانيزاونلاين التى جمعتنا بالكثير من البورداب الرائعين كانت خير شاهد, ورغم الخلافات المنبرية كانوا يتصافحون فى توادد ويعتبون على بعضهم بمرح وحريصين على لقاء بعضهم البعض ..........

ان المنافى الاجبارية او الاختيارية ........ لا تغنى عن الديار

فبلادنا مهما خيم فيها الظلام ستظل اجمل البلاد ..... وحتما سيضىء ضوء الشمس كل ربوع البلاد

ما يدعوا للتساؤل هو ذلك العدد المهول من السيارات الفارهة ( لاندكروزر) التابعة للسفارة الامريكية فبعد ان انشئت الحواجز امام السفارة الامريكية بشارع على عبداللطيف واصبح الدخول الى تلك المنطقة بسيارة يخضع لتفتيش دقيق من قبل الحرس الخاص بالسفارة ومما يستغرق الكثير من الزمن .... حتى ان السيارات التابعة للسفارة والتى كتب عليها هيئة دبلوماسية تخضع لنفس الاجراءات ..... لقد حاولت فى عدة مرات ان احصى عدد السيارات ولكنى اتوقف دائما فى العدد 25 وذلك نسبة لان هذه المنطقة اصبحت كخلية النحل فعدد السيارات الداخله والخارجة التى تتبع للسفارة كبير جدا وجميعها فى حالة حركة دائبة ..... ( ويردد النظام فى صحفه واعلامه رفضه للتدخل الاجنبى وتوعده بمحاربة امريكا)

اثناء متابعتى لعملية تفتيش الدقيقة لاحدى السيارات وقف بجانبى شخص لا اعرفه وعلق قائلا هذا كثير علينا نحن شعب بسيط جدا فصاروخ واحد يطلق من امريكا يكفينا ليحيل البلاد الى تراب ... نظرت اليه بأندهاش .... فقال ياخى تعاين لي شنو اذا كان الصاروخين بتاعت كروز الضربو مصنع الشفاء لغايت اسع الرئيس بتاعك ماعارفهم جو من ياتو ناحية .....

مشاهداتك جديرة بالقراءة حالما تنتهي منها سأحدثك عن اشياء اخري
مرحباً بك الواثق في الخرطوم ارض المعايش وحق الله بق الله

خضر

الواثق

حمد الله على السلامة

شنو با عم لأ حس و لآ خبر

و الخرطوم جاك زول

نرجو لك افامة موفقة بين الاهل

الاعزاء

خضر حسين

ننتظر مشاهداتك .......... بالتأكيد ح تكون مثيرة


شرف الدين

لك العتبى حتى ترضى ولكنها الظروف التى اسلمناها قيدنا لتفعل بنا ما تشاء

قد نسيح فى بلاد الله ........... ومحطتنا الاخيرة ستظل دوما ارض ملتقى النيلين


لكم من الود الكثير

اصبحت شرطة المرور تحظى بقوة يخافها اصحاب السيارات , يوجد شرطى مرور على كل راس شارع يكون جالسا على كرسيه تحت ضل شجرة او مظله ..... اما حملات المرور فاصبحت مصدرا اساسيا لملاء خزينة ادارة المرور يوميا .... سائقو الحافلات لديهم ايصال يومى من المرور بقيمة ثلاثين الف جنيه ( اقل قيمة ايصال ) ....

اما كبرى امدرمان الخرطوم العتيق فاصبحت تكسوه ثلاثه الوان بيجى من ناحية امدرمان وفضى من ناحية الخرطوم ولون الصداء ( حديد غير مطلى ) فى المنتصف .... وماذالت مدرعات انقلاب الثلاثين من يونيو المشؤم تقبع على جانب الكبرى من امدرمان ........

الواثق أخوى
والله شوقتنا للبلد
حمدلله على السلامة
وين أخونا وحبيبنا حسام النميرى
فتك بعافيه

الاخ الحبيب ابن مدينتنا الخضراء كسلا

حسام النميرى موجود فى الخرطوم وبلغه سؤالك وكان معنا قبل يومين الاخ محمد معتصم

وترافقوا الى عزاء الكابتن مقر ببحرى حيث كان تجمع كبير لابناء كسلا فى المأتم

وفقدت كسلا علم من اعلامها الرياضية ..............

صبح رجال الشرطة بمختلف اداراتهم يسعون الى الانضمام الى ادارة شرطة المرور وسعيد الحظ من ينقل الى ادارة المرور يطلقون عليه انه انتقل الى السعودية

السوق العربى الخرطوم اصبح فوضى لا تطاق وازدحام سيارات والناس واصبح مواقف المواصلات اصبحت اكثر فوضى وازدحاما , كما تجرى العديد من عمليات الهدم والبناء فى بعض المحلات العتيقه بالسوق , اما واحة الخرطوم اول مشاريع الانقاذ والتى بدء العمل فيها منذ عهد يوسف عبدالفتاح فما زال العمل فيها جاريا ولم تكتمل بعد ولكن ارتفع الهيكل الخرسانى وكان اخر عهدى به بروز الاعمدة الخرسانية فوق سطح الارض .......

ومن المعالم الجديدة فى الخرطوم برج الفاتح العظيم الذى يجرى العمل فيه ويبدو انه سيكون عند اكتماله مبنى انيق .... بالاضافة ايضا لمبنى بنك السودان الجديد فى المقرن من الملاحظ الاهتمام بالناحية العمرانية ومظهرها الخارجى .... فقد اجريت العديد من التجديدات على المبانى الحكومية واصبح مظهرها الخارجى جميل ....

خلال الايامات الماضية فى اول زيارة لسوق امدرمان صادفت ان زهبت مساءا ووقفت امام مبنى البوستة امدرمان بعضا من الوقت قرابة الساعة فى انتظار احد اقربائى لزيارة بعض الاهل فى حى جديد يسمى الدوحة خلف نادى المريخ , واثناء فترة انتظارى تلك كنت اقف بالقرب من احد الاكشاك الموجودة فى زلك المكان اتفحص الماريين من امامى رجالا ونساءا واطفالا , كانو جميعا يشتركون فى التعب البادى على الوجوه تشعر بأنهم يسيرون بأخر طاقة موجودة فى اجسادهم بخطى متثاقلة , حتى ان بعضهم يتعثر فى خطواته ممايجعله يصطدم ببعض المارة فلا احد من المتصادمين يكلف نفسه عناء الالتفات للزى اصطدم به نهيك عن الاعتزار او غيره .... حتى من يسيرون مع بعضهم لايتبادلون من الكلمات الا القليل ... كل الوجوه شاحبه .......... لا استطيع ان احصى عدد الماره ولكنه عدد كبير لم اجد بينهم من تكسو وجهه ابتسامه ....... كل الوجوه ...... تعب .... وشحوب

الف حمد لله علي السلامة الواثق

و بلدنا جميلة بي ناسا وأهلها الطيبين ..بس الحرامية ديل الله يزحم لينا..


قلت لي شفت اليخت الرئاسي واقف في النيل؟


عليك الله رسل لينا ليهو صورة حديثة...نشوف قروشنا المليارات القاعدة في الموية دي ..بلد الناس بتموت فيها كل يوم!!


تتحياتي

الاخ عصام

لك التحية

بكل اسف لم اكن احمل معى الكاميرا فى ذلك اليوم .... ولكن توقع الصور قريبا

اصبحت الكثافة الامنية مظهر من المظاهر المعتادة فى الخرطوم .... قبل ايام قلائل مساءا مررت بجوار مبنى البلدية بالسوق العربى الخرطوم .... شاهدت رجال الشرطة بالاسلحة الثقيلة فوق سطح المبنى على الاركان ...... مما اثار دهشتى واخذت اتسأل هل هناك حرب ما داخل الخرطوم الشرطة تستعد لخوضها !!!!!!!!!!!!!!! ام ان الوضع الامنى صار به اختلال وكثرة الجريمة !!!!!!!!!! ام انه اظهار قوة وتحسبا لاى طارىء !!!!!!!!!!!!!!

ان مظهر الكثافة الامنية يتعدد بالاضافة الى ما ذكرته فهناك عربات الشرطة التى تقف عند تقاطعات الشوارع وبجوار الجامعات و مواقف المواصلات ......... وقبل يومين من الان لم يكن رجال الشرطة وحدهم من يقفون عند التقاطعات بل معهم رجال الشرطة العسكرية ................

ما اود ذكره هنا ان المظهر الامنى الكثيف لا يعطى انطباعا جيدا فالافق يحمل شيئا ما !!!!!!!

كما يعطى احساسا بعدم الامان فهذا احساسا فيما اعتقد يراود الكثيرين من سكان العاصمة الخرطوم ........

حتى العودة

البنات .........

دخلت الى احدى الكافتيريات بجوار جامعة النيلين وكانت غاية فى الازدحام وعندما تحصلت على ما طلبت لم اجد ما اجلس عليه واثناء متابعتى للامكنه تنبهت ان كل من فى الكافتيريا هم من البنات ماعدا اثنان وشخصى من عنصر الرجال بالاضافة الى العاملين بالكافتيريا , وعندما سنحت الفرصة فى مكان شاغر .......... جلست فى حياء

الاعداد الكبيرة من الاناث صارت منتشرة فى كل انحاء العاصمة ..... ولهم جمال خاص يتميزن به من باقى النساء وكما تغنى الاستاذ مصطفى سيد احمد :

ما احلا عروس البلد التنا ........

الأستاذ الواثق تاج السر ..

ألف حمدا لله على سلامتكم ..

ارجو ارسال سلامى الكثير .. لنيل بلادنا ونخيل بلادنا .. قول سلام ..
وان مريت على بيتنا .. اللى كان بيتنا زمان .. برضه قول سلام ..
وكان مشيت فى شارع الجمهورية بالخرطوم .. قول سلام .. شارع الجامعة قول سلام ..
بحرى .. شارع الصناعات .. برضه قول سلام .. كبرى بحرى القديم قول سلام .. كبرى شمبات
قول سلام .. قاعة الصداقة قول سلام .. برضه فى زقاقات الدقداق قول سلام .. وان تعب منك جناح فى السرعة ديك قول سلام .. على حفر بلادنا .. سلام .. ومطبات بلادنا سلام .. وعجاج بلادنا .. سلام .. ..

وفى النهاية أضحكتنى نكتة صاحبك الذى لا تعرفه.. وأكررها هنا مرة أخرى:
"

Quote: اثناء متابعتى لعملية تفتيش الدقيقة لاحدى السيارات وقف بجانبى شخص لا اعرفه وعلق قائلا هذا كثير علينا نحن شعب بسيط جدا فصاروخ واحد يطلق من امريكا يكفينا ليحيل البلاد الى تراب ... نظرت اليه بأندهاش .... فقال ياخى تعاين لي شنو اذا كان الصاروخين بتاعت كروز الضربو مصنع الشفاء لغايت اسع الرئيس بتاعك ماعارفهم جو من ياتو ناحية .....

الظاهر صحبك .. ده خلاص طفش .. وكلامه ده كلام زولا قنعان من أى حاجة .. وقال خلاص مافى فايدة ..

وأخيرا .. مرة أخرى الحمد لله على سلامتك فى بلادك بين أهلك وأصحابك ..

أخوك ..
أرنست

العم العزيز ارنست

لقد اصبح الجميع غير مبالى وصار التحدث فى السياسة ومتابعتها ترف لا تشغل بال الكثيرين

واغلبهم قال ......

Quote: خلاص مافى فايدة ..

الهم الشاغل هو كيف يوفرون ما يسد رمقهم ويفى بحاجتهم


ولكنهم ..........

مازالوا يحيون بالسلام ....... كل صباح

الاخ العزيز دوما الواثق


الحمد لله على عودتك الى ارض الوطن الحبيب
حقيقة افتقدتاك هنافى القاهرة
تركت فينا فراغ كبير بقدر سماحتك
والكل فى صوت اللاجيئين بيسأل عليك
ونتمنى لك اقامة طيب مع الاهل فى امدرمان



اخوك دوما صلاح الدين موسى / صوت اللاجيئين السودانيين
القاهرة

الاخ العزيز دوما الواثق


الحمد لله على عودتك الى ارض الوطن الحبيب
حقيقة افتقدتاك هنافى القاهرة
تركت فينا فراغ كبير بقدر سماحتك
والكل فى صوت اللاجيئين بيسأل عليك
ونتمنى لك اقامة طيب مع الاهل فى امدرمان



اخوك دوما صلاح الدين موسى / صوت اللاجيئين السودانيين
القاهرة
بواسطة الاخ ابوالقاسم ابراهيم الحاج

الف حمد لله علي السلامة الواثق

your post is very sweet
i hope you continue your stories about every thing and as Ernest said
salaam for every nice place in Khartoum
the Khartoum we new and we loved before the fascist Islamic mafia ingaz gang took over
if you come near DAR al atibaa on the Nile send my regards
i used to go there have a nice cold Beera abu gamel and kawaree
i hope these days will return before we die
thanks again
please continue your stories
waiting
dr mustafa mahmoud

اخي العزيز الواثق

لك التحايا

افتقدنك كثيرا خصوصا هذه الايام

اتلفت مشرقا ومغربا علني اجدك

والجميع هنا في سؤال دائم عنك

وتلك الايام الجميلة لك كل الود

اخى الحبيب حسام

ستظل ذكرى الايام الجميلة فى القلب دائما

آملين ان تتجدد مرة اخرى , على ارض الوطن

ولك ولكل الاحباب من الود الكثير

الاخ د.مصطفى

لك كل الشكر والتقدير

ونتمنا ان نراك بيننا قريبا


بدء تركيب عدادات الدفع المقدم للمياه فى الشركات الكبرى فى العاصمة

وعلى حسب تصريحات مدير الهيئة القومية للمياه لن يتم العمل بهذه العدادات فى الاحياء

الشعبية

الاعزاء ابو القاسم وصلاح

رغم سعادة التواجد بين الاهل والا صدقاء و الاحباب

الا ان حال اخوتى فى القاهرة يؤرقنى كثيرا

كونوا فى صوت اللاجئين كما عهدتكم صادقين مدافعين مصادمين عن حقوق اخوتكم

ومتابع لاخباركم اول بأول

وتحياتى لكل صوت اللاجئين فردا فردا

ولكم من الود الكثير

اتى الخريف وبدء فيضان النيل ومازال العمل فى خور ابوعنجة جارى ولم يكتمل بعد

ولم تبدء المحليات بعد فى حفر المجارى ..............

الواثق والله ياحليلك يازول ياراقى !!

اها الكتاحات كيف معاك وصحى المطر متأخر السنة دى فى الخرطوم ؟!!

الاخت العزيزة نادية

الكتاحة طبعا موجودة باستمرار وتأتى بلا استئذان

اما الخريف الى الان يمكن ان تحسب باصابع اليد المرات التى هطلت فيها الامطار فى الخرطوم

ونسأل الله ان يجعله خريفا فاشلا فى الخرطوم وان ينجحه فى المناطق الزراعية