تفنيد خبر تكريم حميد

لمعلومية عموم أهل السودان وخاصة المتواجدين منهم خارج الوطن وما أكثرهم ومن هؤلاء المهتمين بحركة الشعر في السودان ، يا أحبابي أنا الشاعر محمد الحسن حسن سالم(حميد) ومنذ عودتي للبلاد تلك العودة المرتبطة بمشروع إستقرار نهائي بالسودان متى توفرت المقومات المقرونة بذلك ، منذ عودتي لم ألتقِ أي مسئول له علاقة مباشرة بالدولة إلا ضابط الحمارك بمطار الخرطوم أثناء دخولي للبلاد ، فيا أيها الكاتبون في القرن الأفريقي تأكدوا أولاً من المعلومة قبل أن تنشروها على الملأ ، مابالكم تصدقون وسائل إعلام الإنقاذ من جهة، وتدمغونها بالأكاذيب في العديد من طرحها، بعبارة أوضح لماذا صدقتم وسائل الإنقاذ الإعلامية عندما تعلق الأمر بحميد ، وهل يعقل أن يتم تكريم شخص ألغيت ليلته الشعرية؟! ، بصراحة أقول لكم يا ناس أنا ذاتي سمعت خبر تكريمي من التلفزيون وأنا الساعة ديك في نوري ، الحاجة العملتها ضحكت وبس ..!.. فما أكثر المضحكات في هذا الزمن فيا ناس (القرن الأقريقي ) أرجوكم بالله صححوا المعلومة وسلام على كل الطيبين في الأرض

مبروك تكريم الحكومة ليك

بنفس منطق البورد

استاذنا الكبير حميد
سلام محبه واحترام

وحمد لله علي سلامة الطله المفرحه
والجاتك من بعضنا سامحتك

وزي ما أعلام حكومة الأنقاذ فيهو المضحك
بورد الشتات فيهو المضحك
وياريت أي كاتب يتحرى الصدق وين قبل ما يورد الخبر
وأظنك تابعته كيف بالزيف قتلوا الأستاذ هاشم ميرغني وهو بينا

كل الحب أستاذنا ومزيداً من أبداع الشرف
ومواقف الشرف .. الما بتعرف تحابى

استاذنا وشاعرنا وساريتنا

محمد الحسن سالم – حميد-

حاشا للطفابيع ان يكرموك
وحاشاك ان تقبل تكريمهم
وليذهب الكاذبون الي الجحيم

لقد كرمك الشعب
وكرمك القلم
وكرمتك ذاتك الشريفة

السلام عليك يوم ولدت
ويوم خططت اول حرف
ويوم تخط اخر حرف

في زمن التلاشي ؛
وحينما ينبطح الكبار
لنا جبال نعتصم بها؛
انت احدها

كما الضو عندما حاصرته المياه
ولا نهرب
بل نعود الي الطين
ولا ننتظر منهم شيئا

شعرك يا حميد
وموقفك
علامة علي جبهة هذا الزمان
وادانة لمن جروا
وفروا
وبلعوا السنتهم
وحرفوا الكلم
وتراجعوا من غير ثبات

لك الود خالصا
ايها النذير الاخير

عادل

لك التحيه استازنا

استاذنا حميد

وهل مثلك يحتاج لتكريم من هؤلاء الأقزام؟

الله شافوا بالعين؟ ولا عرفوا بالعقل؟

اصحاب العقول فاهمييييين


لك الود



حنينة

حميد الزين ود حامد
حميد النوباوية
حميد راشد
حميد ست الدار بت أحمد جابر
حميد القضية
حميد العمال
حميد عم عبد الرحيم
حميد لقاط القطن
حميد يوسف يا يوسف
حميد عبي نارك يا محارب
ولا هات البندقية

حميد كل هؤلاء

لا ولن يركع

الرائع حميد

بعد التحية انا والله الكلام ده كلو ماداخل راسي اعني التكريم من عدمو لانو العارف عزو مستريح ....المهم في الامر انك رجعت لي اهلك واحبابك والله انا واحد من الناس حاسد الناس في السودان بالرغم من كلو شيء وذي ما قلت انت قبال كدي ايه الدنيا غير لمة ناس حنان

ربنا يحفظك يا حميد ويغطيك ان شاء الله
ودايما قدامنا وعنوانا ومثالنا
دمت يا الحبيب

هذا هو تزييف اعلام الكيزان

وسوف يكرمك الشعب يا حميد لانك صادق وامين مع قضاياه

تسلم
ويا ها نيتك ومعدنك
وللخاقدين الرماد

فى ايدنا فاس وقلم رصاص
شتلة وكمنجة ومسطرين
وطبنجة فى التماس
حراسة من كيد البكيد
ضد الرصاص والانتكاس
نبنيك هوى واشد باس

.......................................

................................................

العزيز حميد
لك التحايا ايها الصديق الوفي
نعلم تماما ان الارزقية اولاد الحرام لن يقربوا من امثالك
وهم يحلمون ان تمتد اياديهم الملطخه بدم ابناء الشعب السوداني لتصافحك ولكن هيهات
لك كل الود
خالد العبيد

الصديق العزيز حميد
ألف تحية و احترام
ما كان من المتوقع منك يا حبيب فعل ذلك
تغادر دون وداع
إعلم أن ديوان الإفتاء بمنتدي جمع الشتات السالم يرى أن عليك القضاء و الكفارة
و إن تعذر ذلك فعتق رقبة من الإنقاذ
نشتاق كثيرا يا صاحبي
هون عليك
لم تكن لتحتاج لما كتبت
إن رأيتك تفعل ذلك لكذبت عيني ثقة فيك و شكا فيهما
هذا مقال المحبة و الثقة .. أنظر له فى قول الصديق أبو بكر " إن كان قال فقد صدق "
الجميع يتمني لك هناك ما لم تنله هنا
أخاف عليك من قولي :
هكذا أدركت معني أن يصير القلب منفي
لاغتراب .. فى وطن

محمد الحسن سالم حميد

مرحب والله

واقول لكم ان تكريمكم الحقيقى فى الجموع التى اتت من كل حدب للقائكم، واتأكد انت فى قلب كل الطيبين فى بلدى

ولك خالص التقدير

استاذنا حميد

والله الواحد ماعارف يقول ليك شنو زاتو بس الله يديك العافيه ويخلك لينا يازول

الرائع حميد
تسلم يارائع فانت تسكن جوة القلب ونحن لم نصدق مثل هذة الاكاذيب لاننا نعرفك ونعرف اعلام الظلامين
وباسم الغلابة الكل مرة ممقلبين تقبل تحيانا واشواقنا فى ان نسمع صوتك كل يوم كل ساعة
يازول يارائع البذكرك تطمئن كل القلوب

الاستاذ والاب والعم والخال والوطن لك السلام بنية السرة بت عوض الكريم لقد قمت بتشكيل سلوكنا الوجدانى ونحن لم نزل فى الطور الاول من الشباب.انا شخصيا لم اصدق هذا النبا لاننى اعلم تماما ثقافة الحكومه وفهمها فى استضافة التلفزيون لك .انت وامثالك من خلف الكواليس بتصلوا للناس بالبساطه والكلمه الطيبه والنضال الصادق وليس نضال القعدات والاعلام ولانى اتخذت العبره من الضوء فى جهجهة التساب عندما كذب حاستو وصدق امير المؤمنين ولانك تمثل ثوره وقائد وختاما اقول لك
كان عندى حبوبتى بتقولى
ماتبقى مع الحكومه
وما تسرق
وماتبقى؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ى
وجيت الله الحنون الخلقنا بلا بدقون
وليك الف الف سلام والله يجمعنا بيك



عمار صالح صادق

الأستاذ وشاعرنا
ود حمد الحسن
حاشاك ان تقبل تكريمهم هؤلاء القتلة حاشاك أن تقبل من العسكر ومن معهم
الذين يكرموك هم الترابلة والعمال وليس القتلة
لك التحية

الشاعر المبدع
حميد
لك الود والاحترام
سلمت يداك هاديا للركب
فانت كجبل البركل فى صموده
فالوطن فى حدقات العيون
التحية والتجلة لك

عزيزي حميد
لسنا في حاجة الي اي نوع من التوضيح منك
فانت رمز من رموز الصمود

ها مرة اخرى سنخرج للشوارع شاهرين هتافنا
ولسوف تلاقنا الشوارع بالبسالات المضادةللعساكر والمساخر والخنوع
ها مرة اخرى سنصعد فوق هذا الاختناق
الى عناق البندقية
للاحتفاء بوجه ماريل الحبيبة
الى شاعر الذى تغنى بهموم الكادحين والغلابة ومن بتين امثالك يكرمهم عساكر الجبهة الاسلامية
انت مشتول فى دواخل الغبش وجماهير الشعب السودانى زى نخلات نورى
انت جزء من تاريخ الصراع الطبقى عبرت عنه قصائدة التى حملت بدواخلها فسلفة الصراع الطبقى
لم اجد اروع من اسم ماريل الذى سميته لانتفاضة الشعب السودانى فى قصيدة ماريل لهذا سميت طفلتى الاولى ماريل
خليهم من يوم يوم 30 يونيو بكذبوا والله يديك العافية للشعب البحبك

حميد : حمد الله على السلامة أول شيء ، وإنت مواقفك معروفة للقاصي والداني ـ وما أعتقد إنك محتاج عشان ما تأكد أو تنفي شيء .

استاذنا حميد

لو ماكنت حميد ما اظن حيكونك واحد غيرك

دعهم يكذبون .. فهم يريدون تجميل ما افسدوه بهديل مبدعينا

ونربأ بك انت تكون من عصافير الزينه




سلمت


ديك الجن

حميد0000

يا زول يا صاح زمن الغلط 0000

يا زول يا جميل زمن القبح0000

ياكا حميد البنعرفوا00000000000

يطول عمرك00ويديك العافية000000

جواى ماساتك مغروسة

ياطفلة بتفتش فى باكر

مابين نخلة وابنوسة

والعار والحالة المنحوسة

والجوع والعطش الفت واحد

والفقر الضارب زى سوسة

يابحر الحاصل لاك ناشف

ولا قلمى فى ايدى

عصا موس

الكلمات لحميد
سمعتها من مغنى شايقى قبل 5 سنوات

العزيز حميــد ،

لهــم العتبى في هــذا الزمــن المضحك المبكي..ظــني أنــهم كتبوا ذاك الــحديث فجيعــة وبمبدأ " الـله يكضــب الشــينة"، فكما عرفناك صامــد وقــوي في عــهد الانحطاط عــهد غــناء وردي في منزل وزير داخلية النازية،

في هــذا الزمــن تــــف يا دنــيا تــف،

قامة الشعر السوداني السامقة

تكريمك في صلابة كلمتك

في قوة المعنى

في تلقفنا لكتاباتك بنهم وشوق

تكريمك

في كسبك لنفسك بعدم الاتكاس

في اخلاصك لقضيتك ووقوفك الدائم في خط التماس

خليك واقف صاح

خليك دايما واقف صاح

ولا تستعجل النياشين الملوثة

فنيشانك طرزته حسناوات الوطن غنى

ونيشانك سيف يحمله شباب هذا الجيل اوسمة

صمودك يقين
وأنت من تعلمنا منه معنى اليقين بالوطن
فالسلام عليك يوم خرجت
لهذا الشعب
والسلام يوم عدت
ويوم عدت لهذا الشعب
ولا نقولك
أبقى عشرة على القصيد

يا هشاب كل الحنين ... كلما طقّاهو همْ
لا في آهة ولا أنين ... لا بيروع ريحو دمْ
من مرارات السنين .... من عصارات الألمْ
بيمرق الشوق الدفين .. بي كعنكيل العشمْ
========================================
أملي قلبك بالوطن ... بالصُّغارْ
قومة العمال دَغَش ... بالنّضارْ
المزارعية الغُبُش ..
بالجنود الوين تخش ؟؟
في سبيلك كالنهارْ
بالمداد الما بيغُش ..
بي وتر جاء من الجحيمْ
أملي قلبك بالنسيمْ
ملِّي بالطير الرطنْ
طالما العالم قديم ...
ينكسر ريح ... المحنْ
خلِّي بالِك مستقيم
دغري وإن مال الزمنْ
راحل الليل البهيم
والبصيرات ما عِمَنْ
الظروف الليلي أبن ...
روقي لا خوف لا حزنْ
باكر التِّقْيات تنورق ... وتنملي الضرعات لبنْ
أبقي زي ما هي القماري .. ما بتدور عن سكنْ
ببصاره تلد صغاره .. لا مضادات لا حقنْ
لا قياصر لا طواريء .. وعمره حسها ما انسجنْ

يا هشاب كل الحنين ... كلما طقّاهو همْ
لا في آهة ولا أنين ... لا بيروع ريحو دمْ
من مرارات السنين .... من عصارات الألمْ
بيمرق الشوق الدفين .. بي كعنكيل العشمْ

احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ !!!
والمراحات قاطي قطْ
فجأة في قلب السماء ...
غيمة
غيمتين ..
غيم ربطْ
كتمة حتى الطين عِرِقْ
والشجر قرّب يَبِقْ
إلا يا طيبة الخَلِقْ ...
من بدل تفرح تَنِقْ
الشِّكايات ...و السّخَطْ ..
لا السِّحاب داير يَصُبْ
لا الهبوب دارت تَهُبْ
نسمة نسمة آ رب نقط
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خُشّع .. حول في حول ...
ظاهر الحال ماهو مخفي .......
وفالنا فيك ما فيهو قول
يا المبرِّد والمدفِّي ..
نسمة يا رب الفصولْ
نسمة كل راس ساعة تكفي .......
نسمة واحدة لألفِ زولْ
ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ ...
الغبار من كتمة أرحمْ ...
أرحم الحر البيلحم ...
لا ده لا ده ولا فَرِقْ
طيبة تمِّي الحكوة قولي
الصّبرُ خلقوهو هولي
ده الزمن يقسى ويَرِقْ ..
وانتي يا كتمه تطولي
اليطول بال الخلق ..
طَرِّقْ الغنوات يا زولي
وتم نشيدك في الحلقْ
عدّ فات الريح شَرِقْ
من بعد جاب السِّحاب
من بعد قشّ التراب ...
مشّط القش والشجرْ
رجّع الطير للوكرْ
ها البرق شال البرق ..
الرعد ريحة الدعاش
عاش بريق القبلي عاشْ
ابشروا بالخير نقطت
أي والله المطر !!!

الاستاذ العزيز حميد
ناس شيخ تلب
وناس الكضبن و الصهينة
اربعة عشر سنة ... بيكضبوا
يكفى انهم جآؤا بالماسورة

ما جديدة عليهم

... حمدا على السلامة
ايها الوطن النازف

الفاتح الصادق

الله يديك العافية ويخليك يا حميد
أرجو المداومة على المشاركة..

والشكر الجزيل الجزيل للأخ شيبة على بثه الأغنية الرائعة الحية المحيية بصوت الحبيب مصطفى، غشته سحائب الرحمة الهتون

ويا مصطفى:
يا كمين بشر
صحي الموت سلام، ما يغشاك شر

استازنا حميد
حمد لله علي السلامه








***************************
من فيكم يجروء ان يطعن في الظهر نبيا

الأعز حميد
حاشاك أن تركع في زمن القبح و الوسواس .. و الإنبطاح الجماعي .. حاشاك أن تركع بعدما شتلاتك قبضن و حملانك كبرن بالحيل .. حاشاك أن تركع و أن أحد الجبال الشم التي نتمسك بها حتي لا يجرفنا أعصار الطاغوت.
هذه الأكذوبة لن تنقص من مكانتك في ارضك الطيبة و بين ناسك الطيبين .. فهم يعرفون من اي معدن خلقت و اي حليب ارضعتك امك .. منهم خرجت .. و بينهم ترعرت .. و اليهم تعود.
هذه الأكذوبة تكشف لك و لنا كيف ترتعد أوصال الجبناء من الشرفاء امثالك .. يطلبون ودك .. و يتذللون أمامك .. و يستجدون عطفك بمحاولتهم لتكريمك .. و لكنه عمي البصيرة و عمي البصر .. أخطأوا الإختيار .. و كم من إختيارً أخطأوا !!

حالفين يمين .. سيفنا السنين

لم نحتاج منك تفنيدا استاذ حميد فكثير من الاشاعات اطلقوها من قبل ولم تفلح
انت بيننا اينما سرنا وبك نزداد عزيمة وصمود

ليتك لم تفند..وصمة الخشم كانت أبلغ..المريخاب والهلالاب ملآوا الأستاد عشان المريخ والهلال ما عشان الدرع..وأنا أنصلبت قدام التلفزيون يومها رغم المسمارين عشان المعلق الخليجي

اخونا حميد
لك كل التحايا من ناس ابوظبي عموم
طبعا مافى واحد فى الدنيا لا يدرك معانى تكريمات الحكومة المتزلفة دوما للشخصيات الوطنية والمحبوبة وهو نوع من نفاق السلطة المعلوم او هو جزء من السخف وعدم الحياء الذى تمارسه باغراق الاخرين معها فى مستنع النجاسة لتلويث الشرفاء
كما عهدناك يا اخى انت صادق وكما عهدناهم كاذبون مخادعون لا يستحون .
ايام الشاه وكان السافاك فى قمة سطوته اذا اعترض السلطة احد الادباء او الصحفيين علي فعل من افعال الحكومة تنشر الصحف والاذاعة والتلفزيون خبر تاييده للشاه وحرمه وكافة افراد الاسرة الحاكمة ..فيستغرب الناس لفترة لهذا التحول المفاجىء ولكن النظام يكررها ببلادة عن اخرين تنكشف اللعبة ولا يثق احدا بعد ذلك فى اعلام النظام حتى ولو قال الصدق وهذا ما يحدث الان لو لا معرفتهم قيمتك الاجتماعية وتاثيرك فى الساحة الادبية لما اطلقوا هده الفرية التى لن يصدقها الاغبي
لك منى اجمل تحية نحن نعرفك ونعرف مواقفك ونعرفهم ونعرف كل شىء عنهم فلا تعبا بما يقولون وارح نفسك وكن اكثر الناس اطمئنانا فمكانك محفوظ جبل البركل لن يستطيع احد زعزعته

بـى نضارتك واجه ثانية
و ثانية عيون الشغالين
حمــيد لك التحية

الصديق حميد
قبل ساعات عدت من الكلية منهكاوحالا نمت من الضغط النفسي والسهر فبالامس كنا في حفلة خيرية حتى الساعة الرابعةفجر الاحد احياها الفنانان علي السقيد وعمر بانقا واستمتعنا جدا بادائهما الرائع لنورة التي تحولت كما يعلم الكل الى نعمةفسبحان مغير الاسماء هل نتعشم في ليلة شعرية نلقي فيها سويا لاول مرة ماريل معا؟هل ستحضر مع بقية الشاعرات والشعراء(رقية ,اشراقة,سلافة,محمدمحيي الدين,عالم عباس,يحيي فضل الله,محمد النعمان,محمدمدني,القدال,الصادق الرضي,عاطف خيري,عثمان بشرى الخ هل ستحضرن وهل ستحضرون يوم17 اغسطس في كلية اسبرينقفيلد عرضي الذي ساقدمه كواجب اكاديمي عن علاج الاضطرابات النفسية و العقلية بواسطة العلاج بالشعر ممزوجا بتقنيات العلاج بالفن و الموسيقى؟ساحاول ان اقدم بعد ذلك تلخيصا عن هذه التجربة الاستثنائية
ارقدوا عافية
المشاء

الصديق حميد

فأنت لا تحتاج أن تفند، مسألة أن يكرمك مثل هؤلاء

وآخر حديث نشرته جريدة المشاهد بعد عودتك لا يحتاج لإضافة أو تفير

Quote: مثلي ومثل أي«زول» طوّل من اهله وجاء راجعاً لهم ويمكن أقول ان الاختلاف وزيادة الخير اني اعود لأهل ولبلد بحالها والاحساس هنا وبعيداً عن الصورة الخاصة يجب ان يكون احساساً بالمسؤولية بمعني أنك اذا كنت غائباً لفترة طويلة عن أُناس يشتهونك وانت تشتهيهم بعد ان رافقتهم لفترة وانقطعت عنهم وان كانوا هم يجدونك من حين لآخر عبر الكاسيت أو بالاخبار المحمولة ولكنك لاتجد أخبارهم وانا عدت لارتبط من جديد بهؤلاء الناس واقول لكم ان معظم الناس الذين يسمعون شعري هم أصحاب اكثر من كونهم مستمعين أو معجبين وصحيح اننا خرجنا من وسط هؤلاء الناس لكنهم بقوا في دواخلنا وخرجنا من وسطهم لندخل فيه من جديد والظروف هي التي فرضت علينا الخروج فانا لست مغترباً وعندما خرجت من هنا عام 96 وكان من المفترض ان يكون الخروج قبل ذلك بعدة سنوات ايام حياة المرحوم مصطفي سيد احمد حيث كنت اريد ان اكون قريباً منه وليس من اجل ان نغني مع بعض فقط بل لأعيش معه لحظات المرض ولأستطيع ومن خلال مصطفي ان اغني الغناء الذي يمكن ان يصل للناس واقول ان مسألة الغناء هذه ليست مسألة اساسية فالشئ الاساسي هو العلاقة التي تربطني بمصطفي باعتبار اني اريد ان اتفقده وامارضه وأكون معه وبعد ذلك تأتي هذه الاشياء واقول إنه وبعد تلك المضايقات التي حدثت ابان وجودي في نوري وتواجدت هناك طوعاً واختياراً ولم يكن هناك نشاط أو ليالي شعرية بل انسان تربال وسط اهله وتخيل هذا التربال وهو يحمل الطورية ويخرج للزراعة وهو يحمل في رأسه هم انه سيلقي القبض عليه ويتم اقتياده الى اي جهة من الجهات ونحن بالرغم من وجودنا في البلد الا وانهم لم يريحونا ومنعونا من التواصل مع أهلنا واقول لكم سراً ولناس المشاهد كلهم فأنا في البلد نوري الصغيرة الضيقة التي يمكن ان ادخلها بيت بيت واتلو عليهم قصائدي بدون اي تحفظات فنحن في نوري عائلة كبيرة فيتم منعك من ان تقرأ الشعر في النادي وبخطاب رسمي هذا شئ .. والشئ الاخر انك تكون مدعواً لوجبة عشاء أو اي مناسبة في اي مكان فيأتوا لاقتيادك وكأنك كنت تجمع الناس لتحريضهم باسقاط الحكومة وانا اقول لم تكن هناك حكومة تم اسقاطها من نوري ولا أظن ان هناك حكومة سيتم اسقاطها من هناك ولكن كل ماكان يحدث في السنوات الماضية لم يتم لأسباب جديدة ولكنهم تعاملوا معنا وفقاً للفهم والاحداث القديمة وهذه «حكوى» مملة و«حكوى» سمجة عندما نجلس لنحكي عن كل ماكان يحدث منهم في حق شخص اختار طوعاً ان يستقر مع اهله ويحمل الطورية ولكن الشعر في الدواخل لا يموت وغصباً عني وهذا قدري أن اقول الشعر والغناء ولكن وكما قلت قبل ذلك عبر هذه الصحيفة فهؤلاء الناس ينظرون للقصيدة بالمفهوم والنظرة الأمنية حيث كان من المفترض أن يطلقوا النقاد على القصيدة بدلاً من ان يطلقوا الاجهزة الامنية ولا توجد قصيدة في هذه الدنيا اسقطت حكومة وغير ذلك فان أي قصيدة ومهما كان اطارها وكاتبها فانها تحمل في داخلها معني سياسي وهناك سر أقوله لأول مرّة ففي نفس اليوم الذي استلمت فيه حكومة الانقاذ مقاعد السلطة جاءني أحد الاشخاص المتابعين لشعري والمهتمين به جاءني جارياً وقال لي ياحميد الليلة جات حكومة كأنها قرأت قصائدك وجاءت تنقذ البلد.. فاذا بالأمور تسير بطريقة اخرى ويتعاملوا معنا وكأننا سياسيون .. فيا جماعة والله نحن شعراء وشعراء بسيطين ومساكين ومانعرفه هو الغناء، فلسنا معارضين فالسياسة والمعارضة لها ناسها القادرين عليها ومتفرغين ليها ، لكن في كل الدنيا وفي كل الكون دائماً وليس في السودان فحسب نجد أن المغني الشعبي تلتف الناس حوله وبالذات في ايام المحن حيث يتحول الى رمز بالنسبة لهؤلاء الناس وكان قدرنا أن نكون نغني لبلدنا ولناسنا وما واجهناه لم يواجهه السياسي وأعود وأقول أنني عندما خرجت بوصية من مصطفي سيد احمد واحلف بالله أنني لم تكن لي رغبة في الخروج لكن تعاملت مع الامر باعتبار انها «وصية ميت» بحديث أهلنا البلدي وعندما خرجت توجهت الى قطر وليس لأي مكان اخر والشئ الجيد الذي واكبته هو أنني رأيت كيف مات مصطفي وهذا حديث وملف كبير يمكن ان ينفتح لتظهر الحقيقة التي سكت عنها الناس لزمن طويل ويمكن ان ينفتح هذا الملف بشدة وهذه هي الظروف التي خرجت فيها ولا أريد ان اقول أنني خرجت مغترباً ولا أريد ان اقول انني خرجت مهاجراً.

للذين فاتهم هذا الحوار والذي تقهقر سريعا دون أن نعره إلتفاتة رغم أهميته
حوار مع محمد الحسن حميد من الخرطوم يفتح النار فى كل الاتجاهات

اها ياجماعة حميد يكرمنانحن

ويتفق مع الرائع ابوعركى على غناء رائعته الضو وجهجة التساب

وايضا هنالك خبر عن غناء الهادى ود الجبل لاغنية مصابيح السماء الثامن طشيش - فى رثاء مصطفى

وانشاء الله ماتفند الخبر دا يا استاذ

وجيدا جيت

للمعلومة فقط

فقد غنى مصطفى جزءا كبيرا من الضو وجهجهة التساب ولدى تسجيل لاكثر من نصف ساعة لها بصوت مصطفى سيد احمد

اتمنى ان انزلها لكم قريبا وقريب جدا

تسلم شيبة

ونحن فى الانتظار

التحية القلبية الحارة لحميد
وأقولها داوية حميد شرخ صامد وتليد وسيظل ذومكانة عالية عند أي زول ومعليش ياشاعرنا العملاق محمد الحسن سالم حميد وطبعاً لايمكن أن تكرم في زمن المهازل ولو كرمت نحن لانقبل تكريمك في هذا الزمن القاسي والعصيب وإنما نحب نكرمك في الزمن البنحلم فوقو بجية
النوارس ولاتشيل هم فإنت مكرم معزز ومكانتك سامقة وعالية كالجبال

ودمت ياحميد

http://www.geocities.com/alneel_s/p.htm

البحث عن ذاكرة لوطن مفقود





عَبيّت زُوادتي الرّيقة من بايت القَوَى ..

الوطن الدّشَرْ ...

غيمو الرّبَطْ

ساعة بقينا من الرّوَى ..

شبّة مطرْ ...

سافرت لِكْ بأشواقي لآخر المنافي ..

بَحّتَّ في كل المخافي ..

وكُسْتَ عَنِّك في الخُرَطْ





في التواريخ الرؤومة ..

بين نقوش نبتة ورسوما

في الطّرابيل العظيمة

وبين لُغة مروي القديمة

وخَطْ .. في خَطْ

راجعتَ بِكْ كل الاسامي... البعرِفا

كل الُّجمل .. حتى الضمائر ... وأحرُفا

صحّحتَ بِكْ زمني الغلطْ

باخَتّبِكْ قلبي الشّقِى ..

وبشرتو بي لُقْياك عَبَطْ

يا طيبة زي شارع وَسَطْ ..

يمشيبو كادِح وارزقي

وممتنعة زي قبض المياه

والمافي

والما بتلقي

غالِبني جيتك أصادفا

لا في المعابر والموانيء المُترفة

لا في المطارات الوسيمة كما الفراغ ..

لا الأرصفة

كل الدّروب التّعرفيها وبعرِفا

التألفيها وبألفا

خَشّيت دغيش سِعْن الدِّني المرفوع على سِيبات وفا

رَوّابي كان قُطّاع غني ..

وشوقاً مَفورِنْ وانكفى

قِدّام خُطى الوجد الِحفى

غابت صباحات القُرُب ...

وبَقّت ضلامات الجفا

و ضَي المصابيح الجريح ..

كِترْت علي الرّيح .... وانطفا ؟؟؟

هوي يا بِنيّة من الغُبُش ..

من حَرْ أباطهم مُترفة !!!

وين انتي شان نرقد قَفَا

وين انتي وين .. في يات دُغُشْ

ما بيننا بين غيبتك كفى

لو بَقّ حِسِّك في هشيم دبش الضياعات والسأمْ

زي أغنية شوق ..

زي نشيد ..

اندبَّى همسِك زي نغمْ

او خبّ خطوِك زي شهيد ..

رَفّتْ مسيرِتِك زي عَلَمْ

ما كان مهابات الصِّقور

(نخّت) تحت رخّة رَخَمْ

وين انتي وين ...

ما كان هجم ديش العجم ....

والدِّنيا ضَوْ

وامسن سبايا الاغنيات

العُزّل ... ألآه ... شِنْ تسوْ ؟؟؟؟

ولافي الكفوف الخاوية سيف ...

لا في الكتوف الزاوية ضَوْ !!!

دَلّجتَ درب الاربعين ..

صاقَرْ قوافل الرِّق .. سنينْ

برّاً

وبحراً

حتى جَوْ

أشريكِ قُلْتَ من الزمنْ

واعتق معاك رِقّة مشاعري ازوِّجك كل الوطنْ

كل الرِّجال الحملو ارضك بالحلال ...

وافتق سحاب العشق شَوْ

ولا بنتي في الزِّنج البَجَمْ ...

لا كنتي في العرب الأشوْ

لافي شلوخا ..

ولا الوشم ..

لا في شيوخا ولا في عَوْ

بل فيكِ غشّاني الزمن ...

ادّاني صَرْصَرْ وبعتو نَوْ

كوترني .. بي حبل الوَخَمْ

كُلْ ما انقطع توْ .. باَنْ لي .. توْ

ناقِزْ وراكْ ..

ناقِزْ وراكْ ..

ناقِزْ وراكْ ..

انترْتَعَتْ رُؤياي ..

هَكَعْ ..

ما بين أريت ... يا ام زين ... ولوْ

وبين تبقي وين ..

لاكْ في الوجود

لا في العدمْ

لا في الحقيقة ... ولا الوهمْ

لا زين

لا شين

لا البين بين ..

يا راحة الباقالو هَمْ

لا عنِّك أفتاني الزّمان ..

لا مِنّك إنقطع العشمْ

يا ريتو أغناني الكَمَانْ

آ طيبة عن صوتِك نغمْ

من أعلى ميضنة فيّي كان أعلنتَ موتِك للأُممْ

أو .. صِحْ بجيتك لى الرِّمَمْ

لكنو صمتك طال ...

وحَانْ ميعاد زفافي على الألم

قلت ارفع ايديني واقول ...

خاني الصبر ..

خان وانهزمْ ؟؟؟

زي ما انهزم كمّين نبي ...

وخانت على التاريخ ذِممْ

آ طيبة أخافك ؟؟؟ واللاّ اخاف

السُّبة واللّعنة الوبيلة ؟؟

تحل وراي كما الجفاف ؟؟

أو..... تار على اكتاف قبيلة ؟؟

معلمي اللّــــه من عتاد ..

يبرِدْ حشاها ... ولا في حيلة

بَلا تأمِّل في البُعَاد .. سنين ...سنين ..ودنين ... طويلة



وكيف ؟؟ وكمْ ؟؟

والإنأخد بالدّم غَصِبْ ...

مافي البرجِّعو إلاّ دَمْ !!!!





آ طيبة هيلة ..

سلام

عوافي

يا أصيلة .. كما المَعَانا

أو .. بديلة عن اللِّي مافي

يَمّه أدخلي على غُنانا ..

يا أمُرقي من القوافي

يا أحذرينا وما تخافي

وما بنخيّب حاشا ظنِّك ....

ينفخوها وما بتموتْ

حيّة نارِك ... حيّة يوتْ

خُتِّي قِدْرِك في الأثافي ..

يوسف الفي الُّجب بيمرُق

ضاربا ريقة اليلقى قوتْ

روقي أكنِّكْ ..

واللاّ كَنِّك ..

تاوقي في البحر الخرافي ..

يونِسِك في ياتو حوتْ

سَمّ ينده جوفو حافي ..

وهِّطينا على الأثافي....

وهِّبي نارك لا نموتْ

يا حمامة غار محمّد ..

يا خيوط العنكبوتْ

يمة كُسناك ضُمّة مافي ..

الدّروب وين غيّبنِكْ ؟؟؟

في سؤالنا الضّارِي عَنِّك ..

سَدّن ابوابِن بيوتْ !!!!

والبيوت البشبهنِّك ..

انكرننا وانكرنِّك !!!

ننكشف لا لوم عليهن ..

بس ها كيفن يسْتُرنِّك ؟؟

وفي سُكاتنا الجاري مِنِّك

رحّبنْ بينا السجون

الدرادر والمنافي

فينا مَنْ روّح فدايتك ..

وفينا من لا زال ...

وفينا

مافي من بدّل لرايتِك

وانتي في ذات السكوتْ !!!

التراب يتشهّى حِنّكْ ..

السِّحاب عابر يفوتْ

واللاّ يكمُد للعيون

بالغُبار غُمّة وسوافي

وانتي يا آخر المرافيء

يا امْ وجوداً بات خرافي

في صحاريك داخ غفاريك ..

من برِد زمنو الرِّعافي

دون كواريك ..

مات واتاريك

غبتي بي كل المدافيء

يا لساريك .. لاك موافي

لا كمان قادرين نسيبِك نمشي في الزمن المجافي

ما عهدناك عاد تخافي

كانفعالات المُراهِقْ ..

شابكة كالشّجَر الضِّفافي

خيلِكْ - الرِّيح - حين تنهّدْ

لوحة التاريخ بيشهدْ

لونا والدّم الإضافي



إلاّ يا وتري وغُناهو ..

راحة أنغامو .. وعَنَاهُو

يا نبي الثورة الغشاهو

برداً أكتر من غُتَاهو



الاّ يا بِتْ جاك زمن دارِعْ الأيام قُلُبْ !!!

الدفاتر والكتبْ

إستحمّتْ بالغُلُبْ

التلاميذ النُّجُبْ ..

طيّشا الفقُر ....

الغبينة

صنّت الأجراس وجينا

إلاّ يا .. آخ ... ما لقينا

الجوامع مستباحة ..

والمصلّين صَرْ جُنُب

الكنائس جالبا دينا !!

والمدينة تبيع عوينا !!!

لي النخاسية الغُرُبْ

لي اللُّحاسية وعُقُبْ

تشتري آفات الرُّعُبْ

والهتافات الجُرُبْ

عربدت باسم السّما ..

توّكت ريح السُّحُب

ومن ضُروعاً .. كان تكُبْ

كل أطفال الفقارى ..

وكلهُنْ في فَدْ شُخُب !!!!



في اللُّغة الجرسية .. سُبْ

في التُّقى النجسية .. سُبْ

في الوقار الفاوه ... سُبْ

في شعار ما ساوى .. سُبْ



واللاّ اريت ما كُنّا منك ..

لا في بيناتنا القُرُبْ

كُنّا اقلاّ نشوفو عادي

التردِّي الجاي وغادي

سادي في النعم الزيادي

وابن آدم بالأيادي

لى سُترة الحال يكافِت ..

غابة غابة ..

ووادي وادي

ينبح المسكين يا طيبة ..

طيبة يا راحة الفتارى

وواحة الفي الصّيْ حيارى

عورة الشُّرفاء الفقارى

سُترتها ولُب المباديء





يا بنية الأُجّر ام خير ..

أو نبية الشجر الطير ..

يا رسول البسمة للاطفال ... حبيبة نيل بلادي

يا طليقة الغيم ..... عروس طين البوادي

المناديل بانتظارِك ... والايادي

معبّا شوق ..

يا طيبة ..

طيبة ..

طيـــــــــــــــــ ...

ولا حياة لمن تنادي

بَكاك بكيتني .. سَكَتْ برايا



كنت حافي على إبر ..

بِتّ حابي على شظايا



من انكسار رمّاشْ عيونِكْ

فوق مسام سام المرايا

من كُتُر تعباً تعبتو ..

قلت ألقاك ما كَفَاية

يا تكمِّلي فيّي صمتِكْ

يا أخلِّص بيك غُنايا

دي الحنايا وراكِ يبستْ

وامست آشميق الخلايا

وبِتّ أمسِّرْ من حروفِكْ

وأفتل الأيام .. قراية

نبّقْ الغيم .. برضو إرضِكْ

ما استجابت لي سُقايا



وقُلتَ اخطِّكْ بي دمايا

يا اصابعيني ابقي ريشة

ويا شراييني الدواية

وقنِّعي الرِّيح الورايا

النّكعْ بالخيل ..

محالاً ..

يدِّي بي بَقَر الدّرَايا

انتهت كل الخفايا

وقلت اكوسلِك في الخطايا

لمّا في ذات لُقيا حَرّ ..

وزاد هواكي على هوايا

وقمتي خنتيني معايا ؟؟؟

اشتكيتِك لى القمرْ

وضُمّتْ انسام السِّحرْ

الرياحين والزهرْ



شهدوا ليّ عليك يا اخيّة

جاء القمر سوّاك بريّة

وباعتزاز بى نبرة حيّة

صاح في جمعنا يا بريّة

من يكن من غير خطيّة



؟؟؟؟؟؟؟



وقُمْ رميتِك بالتحية من اللِّي فيّ

فيا .... وفيّة

يا معاكي تغيبينا ..

يا تعالي وابقي جية

للبعيشو غَصِب عشانِك ...

والبموتو بحسن نية

حَارْ علينا بعد طراوة ...

وبين عيون احباب تقيّة

نبقى في كتمة وشقاوة

وبين أرَاذِل

وارزقيـ….....ـة



كفاك شكية !!

كفاك شكية !!

يا التّشرِّكْ لي غمامك ...

وتحتَك الانهار قوية

ما انسرق ذات ليل سنامَك ...

لو قبيل كُسْتَ الحوية

كفاك شكية !!

وما بيضيع حق لا قضية

لو في طُلاّب من وراهو

ونية بيضاء وبندقيـ……ـة



النيل احمد