محاكمة أزهري التجاني .. مهزلة جديدة!!!

علي الحاج .. شميلة .. أزهري التجاني .. هل ترون رابطاً بين الثلاثة؟ نعم هنالك أكثر من رابط، لكن أهم ثلاث روابط بينهم أنهم: 1- غرّابة. 2- كيزان. 3- متهمون بالفساد.
علي الحاج محمد خرط الرسن وقال بالفم المليان: خلوها مستورة. وهو يعني ما يقول ويعرف لماذا قال ذلك. وبقانون النسبة والتناسب المعروف: جملته هذه تعني: كان إنتو متهمنى أنا أكلت قروش طريق الإنقاذ الغربي ..ما أكلتها براي.. والرجل يفتح الموضوع ولهذا صمت الجميع.
شميلة هو أول من أتهم بالفساد في عهد الإنقاذ بأكل 20 مليون جنيه كانت قروش في وقتها. وعندما وجهوا له الإتهام قال بالفم المليان:( يلاّ على المحكمة ومحل الرهيفة التنقد). فيكم زول سمع ليهو بمحاكمة أو ملاحقة؟ الكلام راح شمار في مرقة.
الحديث عن أزهري التجاني يقودنا لسؤال: ممن تختار الإنقاذ ممثليها للوظائف الدستورية الهامشية من أبناء كردفان الكبرى؟ الناظر لشاغلي كل الوظائف الهامشية بالمركز يجد إنطباق صفات معينة عليهم. أولها: أن يكون من قبيلة كردفانية صغيرة لا حس لها، أي يكون خالي ضهر وما عنده السند القبلي القوي حتى يتمكنوا من توجيهه مثل مروحة التربيزة.
وإن كان من قبيلة كبيرة ومعروفة في كردفان ولها دور ريادي فيجب أن يكون من عيال (الفُقرا) – بفتح الفاء وبدون همزة على السطر- وهؤلاء هم من أتي أجدادهم وآباءهم كغرباء يحملون القرآن عن ظهر قلب. عاشوا وسط القبيلة وتزوجوا منها وتناسلوا وصار أولادهم وأحفادهم من صلب القبيلة وما هم بكذلك. يعني ما سكنهم من يدهم البتوجعهم. وكل المرتبطين بهم ن أبناء القبيلة الأصليين مرتبطين بهم فوق مصحلة. وهم يحاولون التودد لأولاد القبيلة الأصليين خوفاً منهم وتفادياً للمشاكل معهم. الأمثلة عندنا بالكوم.
سؤال: هل لو كان أزهري التجاني من قبيلة المسيرية كان قدروا قدموه لمحاكمة؟ تخُسّهم – دي بكلام البقارة- باقي الكلام أنا ما بفسر وأنت قارئي العزيز ما تقصر. الجميع مقتنعون أن هنالك فساد كبير وكثير في السودان. وسؤالنا التالي: كم عدد شاغلي المناصب الدستورية العليا والهامة من أبناء التضامن النيلي وكم هي نسبتهم لأبناء كردفان الذين يشملون المناصب الدستورية الهامشية؟
إذا اتفقنا أن الفساد كبير وكثير وأعضاء الحكومة في الوظائف الدستورية العليا الهامة من أبناء التضامن النيلي وتوابعهم وبطانتهم والمتلقحين فيهم والمستفيدين منهم، أكبر ممن هم من كردفان، فكيف يستقيم عقلاً أن يقدّم أثنان من أبناء كردفان بتهمة الفساد وهما يشغلان وظائف دستورية هامشية ولا يقدّم واحد من التضامن النيلي بنفس التهمة.
يكون منو العامل العمايل السوداء الباقية من الفساد، يكونوا ديل ناس وين؟ خط هيثرو .. شركة الأقطان وهلم جرّا؟
/font>
كبـّاشي الصـّـافي

(العوج راي والعديل راي)

عليك الله ياكباشي ياخوي في فساد اكتر من اخون الرئيس ، معظم الشركات التي عملت في جنوب كردفان ليهم فيها نصيب ، بعدين ازهري عندوا شنوا والله انا لاقيتوا قبل ايام حكايتوا بايظة وتعبان ومفلس ميتنوا طالع.

شكراً أخي عوض الله على المرور والتعليق. هنالك أوجه كثيرة للفساد ولا نتحدث عن الفساد الشفهي ولك نتحدث فقط عن ما ورد في تقارير المراجع العام للثلاث أعوام الماضية، ماذا فُعِل بذلك الفساد؟ لكن لقوا أزهري التجاني حيطة قصيرة وركبوا فيهو. ربنا ينصر الحق. تحياتي.


كبـّاشي الصـّـافي

(العوج راي والعديل راي)

الصورة الظاهرة لي من مسألة الاوقاف دي انو الرجل (دقسوهو) ،،، لأنو لحدي هسا مافي ما يشير الى انو شخصيا لبع حاجة ،،، والكلام كلو بشير لأنو المعاهو والتحتو (بالاسماء) لبعو كيف وكم !
ودورو هو ما كان اكتر من انو كان بيبصم على توجيهات عليا ! وده ما بيعفيهو من المسئلية طبعاً !!
على أزهري التجاني أن يكشف ورقو كلو ! (علي وعلى أعدائي) !!! أصدقاء الأمس أعداء اليوم !
-
شميلة ده منو وسرق شنو كمان؟!

Quote: شميلة ده منو وسرق شنو كمان؟!

سلام أيمن محمود وشكراً على المرور. على حسب كلامك كان أزهري التجاني زول فحل يطربقها فوق رؤوس الجميع وعليّ وعلى أعدائي يا رب.
شميلة دا موضوعه كان في بدايات الإنقاذ وهبر 20 مليون جنيه بس ولكن الموضوع غتغتوه تحت تحت ومات كما لم يولد. لكن الراجل فحل خوّف الجماعة كلهم. أظنه كان بياكل وبأكِّل الجماعة معاه. تحياتي.


كبـّاشي الصـّـافي

(العوج راي والعديل راي)

الأخ Cantona1
ول أبا الجماعة ديل قول ليهم محكمتهم ده يأجلوها ، احنا ماشين الشوقارة ، لمن نقبلوا بشوفوا ليهم مشكلتهم مع وليد التجاني ، كضابين وعيال كضابين 24 سنه من العدالة الالهية المطلقة يا أشراف ، الزول أبو وجيه محروق القسم السودان ما حاكموه ليه بحاكموا ول التجاني.

يا أخي أظن أن الرسول (ص) عندما قال اذا سرق فيهم الشريف تركوه واذا سرق فيهم ....... أقاموا عليه الحد ، الناس ديل حسب زعمهم بقولوا أشراف ونسبهم شريف وبذا ينطبق عليهم الحديث المشار اليه. منطقة من أفقر مناطق السودان ومن أكثر مناطق السودان التي شهدت هجرات داخلية ، أظن الى فطانتهم البترول ينتج في كردفان ومصفاة النفط بالجيلي ـ وخطوط ووزير النفط من الجيلي ومهندسي النفط من الجيلي ومحاسبي النفط من الجيلي و غفراء حراسة النفط من الجيلي ، وكل الوزارات الحساسة من الجيلي وأن يظلوا في وظائفهم الى الأبد ، أنظر الى التلفزيون الصلب الكبير الرقاص من ..... ، البوعار على الفاضي من ....... ، مكتب المخابرات لتفتيت الوطن من ...... ، القال جدودنا زمان وصونا على دمار الوطن من ......... ، بقولوا ليك عاوزين البقارة يمنعوا لينا التمرد من وصول الخرطوم ، كل هذا ويظنون أن السودان شعبه أبله لا يفهم السياسة ، وكان طرشق لستك في الكلاكلة يختفوا كالفئران من الشوارع ، رويدا رويدا سيدفعون ثمنا ما ليه ثمن والسلام

سلامات ول أبا الغالي..
الكلام كتير لكن التفسير بجيب حماقة... أزهري التجاني إحتمى بالتنظيم وخلّى الأهل .. توا انقطعت ليا فوق راسا.. اللعرف لتنبلا طقة. وأمثال أزهري كثيرون من أبناء كردفان... يوم الألمي يخنق ليهم القنطور بعرفوا الله واحد ما ليا شريك.. وعندها الدر بروح ليهم في ألمي.
تحياتي.


كبـّاشي الصـّـافي

(العوج راي والعديل راي)

Quote: البترول ينتج في كردفان ومصفاة النفط بالجيلي ـ وخطوط ووزير النفط من الجيلي ومهندسي النفط من الجيلي ومحاسبي النفط من الجيلي و غفراء حراسة النفط من الجيلي ، وكل الوزارات الحساسة من الجيلي

سلام صاحب البوست و ضيوفه الكرام

نعم مصفاة البترول فى الجيلى اما الوزير و المهندسين و المحاسبين ديل مو مننا
الخفراء ليسو من الجيلى لان المصفاة تحرسها قوات حكومية.
و اذا افترضنا انهم من الجيلى ماذا يمنع؟

تحياتي كباشي،
طبعاً نظام فاسد من راسه لي ساسه
كون يحاسبوا المساكين ده شئ طبيعي في نظام فاسد
بس النظرة الجهوية والقبلية دي ما بتحل مشكلة بلدنا
حاسبوا جزء من الفاسدين ده شي ما بطال
يبقي علينا السعي من أجل محاسبة كل الفاسدين
لكن نقول خلو زولنا لانو زولكم ما إتحاسب ده يخلينا في نفس الدوامة
هو أصلاً ما فيهم (زولنا)
كلهم باعو أهلهم

...................................................................
طبعاً لا يمكن محاسبتهم كلهم إلا باسقاط النظام
وده المفروض كلنا نسعي ليهو

Quote: و اذا افترضنا انهم من الجيلى ماذا يمنع؟

ما في شئ بمنع يا الجميعابي .. لكن كان البترول طلع في الجميعاب وصفوه في كاكا التجارية كنتو بتقبلوا؟ الله أعلم. وزارة البترول ومؤسسة البترول الغالبية من المستوظفين من قبيلة الشايقية بتاعت عوض الجاز وعلى عثمان ووصلت بهم أن حاولوا تعيين خفراء المحطات في كردفان من الشايقية لكن رجال المسيرية وقفوا قدام عوض الجاز وسمعوه كلام حار حتى الراجل تراجع. ودي قصة معروفة حدثت عند زيارة الرئيس البشير للفولة وكان الجاز ضمن الوفد. وقد منعه المسيرية من الحديث لأنهم يقولون أن عوض الجاز هو السبب في كل الظلم الوقع عليهم. ومعاهم حق. كل دار المسيرية منطقة البترول لا يوجد بها طريق زلط واحد. وداخل المدن الكبيرة ( الفولة – بابنوسة – المجلد – الدبب – لقاوة ) لا توجد إلا كيلومترات بسيطة لا تسمن ولا تغني من جوع.
المسيرية مظلومين لكن ما عندهم ولي في راسهم ليحارب نيابة عنهم في مركز القرار. وهم الفرسان الذين حموا حدود السودان وأوصلوا القطر لأويل وهم على ظهور الخيل. فماذا كان جزاءهم؟ كان هو جزاء سنمار. المسيرية فرسان يقودهم ثعالب. لو وجدوا قيادات من جنس فرسانهم لقلبوا البيعة كما قال الشاعر. قلبي معهم.
تحياتي.


كبـّاشي الصـّـافي

(العوج راي والعديل راي)

ما فاهم , يعني عشان هو من "أبناء كردفان" مفروض ما يتحاكم و لا كيف ؟؟؟

Quote: ما فاهم , يعني عشان هو من "أبناء كردفان" مفروض ما يتحاكم و لا كيف ؟؟؟

سلام يا ياسر مصطفى
يا ود الناس ما قلنا ما يتحاكم. قلنا ليش ما جابوا باقي الحرامية عشان يحاكموهم؟ الناس الباعو خط هيثرو. والناس بتاعين شركة الأقطان أكثر من 200 مليون دولار. وحاجات تانية كتيرة. هل فهمت ؟ تحياتي.


كبـّاشي الصـّـافي

(العوج راي والعديل راي)

كباشى
سلام

بالصورة دى يا كباشى ما حا يتحاكم فاسد لانو حسب هلمى مافى وزير من منسوبى بيت المايقوما للاطفال اللقطاء و اى وزير ليهو اهل و قبيلة سوف تحتج على محاكمته
ثم ما رايك فى قتل ضباط رمضان و اغلبهم من قبيلة الشايقية

كباشى
سلام

بالصورة دى يا كباشى ما حا يتحاكم فاسد لانو حسب هلمى مافى وزير من منسوبى بيت المايقوما للاطفال اللقطاء و اى وزير ليهو اهل و قبيلة سوف تحتج على محاكمته
ثم ما رايك فى قتل ضباط رمضان و اغلبهم من قبيلة الشايقية

مالنا
كيزان × كيزان

لا نملك إلا ان نقول:
اللهم اضرب الظالمين بي الظالمين واخرجنا منهم سالمين

Quote: ومصفاة النفط بالجيلي ـ وخطوط ووزير النفط من الجيلي ومهندسي النفط من الجيلي ومحاسبي النفط من الجيلي و غفراء حراسة النفط من الجيلي ، وكل الوزارات الحساسة من الجيلي وأن يظلوا في وظائفهم الى الأبد ،

مصفاة النفط صحيح في منطقة الجيلي،
بس المنطقة واهلها لم يستفيدوا شيئا من وجود المصفاة في منطقتهم، ياخ وزير النفط ما من الجيلي،
ولا مهندسي النفط، ولا المحاسبين، ولا الغفراء ...
تصدق المصفاة حقيقة على بعد تقريبا 20 كلم من الجيلي، وفي مداها شمال الجيلي قرى واوسي وودرملي ومنطقة قرى،
واهل هذه المنطقة مزارعون تقليديون، تعلم اولادهم ، تصدق حسب معرفتي ان لا مهندسا واحدا، ولا محاسبا واحدا ولا فنيا واحدا،
ولا طبيبا ولا شرطي ولا ضابط ، من اهلي، اهل المنطقة يعمل في المصفاة ...
ياخ الوظيفة يجيها الكوز من دارفور او كردفان او الجزيرة او دنقلا او شندي او سنار ،
الغريبة كيزان المنطقة ما قاعدين يستوعبوهم، ليش ما عارف ..
امكن عشان ما مسنودين ...
ياخ حتى المدرسة النموذجية هناك رفضوا قبول بنت اخي بها رغم تفوقها،
المدير قال الاماكن قدر اولاد الموظفين الكبار هنا ، ناس المنطقة يقروا في اي مكان،
بس هنا لا ...

الاخ كباشي

لك التحيه

انظر للامر من ناحيه فساد و ابعد عن الجهويه و الا ما بتكون عملت حاجه


الزبير

الأخ كباشي
السلام عليكم ورحمة الله
أزهري التجاني - على ما اعتقد - لا من كردفان ولا من دارفور
أظن إنه من المكابراب جنوب الدامر

خارج الموضوع وبرة الشبكة
يا خوي أنت كباشي ولا كانتونا
طالما بروفايلك يإسم كانتونا ومعاه صورة كمان
طيب اليافطة ( كباشى العوض ) التحت دي شنو ؟؟؟؟ وكمان بالخط العريض ومُشكلة كمان
يعني مع سبق الإصرار والترصُد

أرحموناااااااااااااااا الله يرحمكم !!!!!!!!

وعلى قولك ( دا برضو رأي )

الأخ باشمهندس كباشي
تحياتي
اليومين دول مالك بتصفق ( صفقة) ما عرفنا رقصتها؟
بتضرب مليان في الثورية والإنقاذ، وبتقيف مع د. أزهري التجاني بحمية جهوية!
ولعل كل عاقل لو اراد أن يدين الإنقاذ بقضية قاتلة فلن يجد أفضل من قضية الجهوية والقبلية.
وبالرغم مما تقدم فسأقول عن د. أزهري التجاني كلمة عن معرفة قديمة، حينها لم تولد الإنقاذ،
ولم (يتدكتر) د.أزهري، لعلها تكون شهادة عصر كما بالقنوات الفضائية، وبواقع إشرافي المباشر
على عمله حينها وبرئاسة د. محمد حامد البلة، أقول، د. أزهري (إن لم تتغير النفوس) فهو ليس
ممن يسرق، ورجل دقيق ومثابر، ووفي وصادق في عمله، وهمته عالية، لا يرضى إلا بقمة الأداء، علاوة
على أنه مدرب تدريبا عاليا لحفظ وتسجيل دخله وصرفه ووفوراته، وليس ممن ترهبه مناطق الشدة،
فقد عمل بشرق السودان (القضارف)، وجنوب كردفان، وكان يكفية القليل من المال، لزهده، فلماذا
يسرق وقد عف صغيرا، فكيف يفعلها كبيرا؟
إن كانت هنالك محاكمة كما زعمتم، فلننتظر الحكم، كيلا نكون رأيا عاما ربما يكون سالبا بالمحكمة
غير أن مقتنع تماما ببراءته، وإن أدين بقضية فساد وبمحاكمة عادلة، ( ليس تزكية له)، فإنما سيكون
ذلك تضحية، وتسترا منه، على آخرين، آثر ألا يفضحهم خوفا أو طمعا أو زهدا وأتمنى ألا يحدث ذلك أبدا..

Quote: د. أزهري (إن لم تتغير النفوس) فهو ليس ممن يسرق، ورجل دقيق ومثابر، ووفي وصادق في عمله، وهمته عالية، لا يرضى إلا بقمة الأداء،

في فترة ادارته لصندوق رعاية الطلاب ، لاحظت ما انجزه من مباني داخليات للطلاب في مناطق السودان المختلفة (هذا جيد) وذلك مقارنة بغيرة من الانقاذيين
الا انه من المؤكد شارك في الفساد الذي مارسته الانقاذ بطرق كثيرة (حتى لو يستفد شخصيا) !

Mohd Edris
الوزير السابق اظنو المتهم رفم 3 و في غيره و ماهو المتهم الرئيسي -حسب علمي- و بمطنقك وزير العدل من الغرب و تقدر تساله -----و شنو حكاية و لاد الغلابة دي يعني شرط للتعيين من كردفان لازم العوايل الكبيره ؟ يعني احمد الطاهر ووزير المالية والاعلام و التقانة وو.. مافي حد يقدر يسالهم لو غلطوا؟؟؟ علما بان وزير المالية و العدل و البرلمان كلهم من الغرب - المال وامانته كله وقوش الان محبوس يعني يفكوهو علشان ....
علي الحاج لو عندو شئ و داسيهو ده ذاتو فساد و تستر علي مجرمين -يا يكشف المجرمين و يا يحاكم علي جريمة التستر وممكن يواجه ولو اعلاميا لو ماقادر يحضر - ولكن اظن والله اعلم انو ماعندو شئ --- لان ماقاله حيجي يوم و يسالوه قل ماكنت تخفيه حيقدر ينكر؟؟
لو اخدنا الامور كده ليوم القيامة ما حننتهي
المطلوب محاكمة كل مفسد - الفساد لا جهة و لا قبيلة له ------- لاحظوا الوزير السابق ومن معهم متهمين فقط حتي الان فلا تتسرعوا - المتهم برئ حتي تثبت ادانته
رد · 2 · أعجبني · متابعة المنشور · تم التعديل · منذ ‏16‏ ساعة

(من الفيسبوك)

يا الجميعابي سلام
كلام الزول بتاع الفيسبوك دا ركيك جداً وأنا ما فهمت المقصود شنو؟ الله يديكم العافية.
تحياتي


كبـّاشي الصـّـافي

(العوج راي والعديل راي)

طيب اليافطة ( كباشى العوض ) التحت دي شنو ؟؟؟؟ وكمان بالخط العريض ومُشكلة كمان
يعني مع سبق الإصرار والترصُد

أرحموناااااااااااااااا الله يرحمكم !!!!!!!!




يا سيف الدين محجوب سلام
من ابجديات التعامل الراقي أن تنادي الإنسان باسمه. اسمي كباشي الصافي وليس كباشي العوض. ثانياً: كانتونا هو الاسم المسجل في المنبر. ولكن أردت أن يعرفني الناس باسمي الحقيقي .. دي فوقا حاجة؟ وكان اسمي الخاص ولا اسمي الاصلي ما عاجبك ما تتداخل معاي الله يديك العافية.
تحياتي






كبـّاشي الصـّـافي

(العوج راي والعديل راي)