Post: #1 Title: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-26-2013, 09:25 PM
حدث معي اليوم!!
الحافلة ماشة من أمدرمان للخرطوم،، الركاب و السّواق أي واحد قافلة معاه و كاره حياته أكتر من التاني،، واحد من الركاب قال للكمساري .. ياخ الباقي دا ناقص 100 جنيه (10 قرش) بالجديد،، الكمساري: و الله الراكب بجنيه و ستمية يا حاج،، عمك اعترض و سكت بس باقي الركاب ما صدقوا و فتحوا باب النقاش .. و النقاش اتحول لشكلة طويلة عريضة.. ** ياخ ما ممكن .. ياخ ما معقول .. كرهتونا زاتو ،، وووووو و السوّاق دخل في المعركة... و هاك يا شتايم و كواريك،، السوّاق و السماري بجهة و الركاب بجهة تانية و أغرب ما في المعركة إنه مافي زول سامع التاني .. أي زول في محطة براه !! الحاجّة بي قدام تشكي و تدّعي ،، و عمك بي ورى بيتكلم براه: ياخ كرهونا العيشة ،، الزيت بي كم؟!! و السكر بي كم؟!! وووووو و فجأة جات لحظة هدوء عابرة .. حمدت فيها رب العالمين و قلت أخيراً الواحد يقدر يآخد نفس..
الحافلة وقفت قدام جامعة النيلين و نزل واحد من الركاب كان عنده باقي جنيه واحد الكمساري نزل معاه و أداه فكة ( اتنين 50 قرش) الزول انفعل و قال للكمساري أنا شحاد عشان تديني خمسميتين يا عواليق يا ****** ، ما أنا البيدوني الفكة يا جعانين يا ******* و الجماعة الماصدقنا انهم راقوا قاموا اتكهربوا تاني و الكوارير اشتغلت ياخ شيل قروشك و طير ،، ياخ ما ناقصينك وووو ** استوقفني منظر محزن،، رجل في الستينات من العمر كان بيتلفظ مع الراكب العامل جوطة بألفاظ مخجلة و مؤسفة جداً جداً و لعن في الأمهات و الأباء و ما شابه (ديل كبارنا؟!!) المهم قام شاب صغير من الركاب و أدى الزول العامل جوطة جنيه عشان ينقذ الموقف قام أخونا الجوّاط جدع الجنيه في وش الولد و شتمه و قال ليه أنا ما شاحدك عشان تديني جنيه مقطع يا ****** (مع انه الجنيه سليم معافى و الله!!) السوّاق و مجموعة من الركاب نزلوا عشان يتموا المعركة مع شوية دفيّر و شتايم، عمك السوّاق أدى الراجل الجنيه بالعافية و ركب مع الجماعة و قال للكمساري اقفل الباب أخونا بتاع الجوطة وقف في وش الحافلة و قال و الله الليلة تمشي على جثتي!!! و حاول يستفز السوّاق بألفاظ نابية و فعلاً السوّاق قرّب يتحامق و يدخل في الراجل بالعربية .. بس نعل الشيطان و لف منه شمال .. الأخ جوطة حلف ما يفكّنا ،، سكّى الحافلة و شبَّ و اتشعلق في مراية الحافلة الأمامية و كان بيصرخ بشكل هستيري و شغّال شتايم بالجملة لا خلّى السوّاق و لا الكمساري و لا انحنا الركّاب المساكين!!! و أثناء شعلقته الحافلة كانت جارية و هو بيضرب بطريقة جنونية في المراية لمن كسّرها حتت و بعدها نط من العربية في الأرض!! الحمدلله ما حصل للأخ جوطة أي أذى لانه قام سريع و واصل شتايم و كوارير و سوّاقنا المسكين واصل جري بعربيته قلبما تجيهو حاجة طايرة كده و كده..
الخلاصة..
أيها الشعب السوداني الكريم ؛؛؛
مالكم؟ في شنو؟ ضاقت بيكم و كرهتو حياتكم و اتجرستو و قمتو على بعض؟!! تفتكروا لمن تتجننوا في بعض و أي واحد يتفشى في التاني حتكونوا كده حليتوا مشاكلكم؟!! لمتين الهروب من الواقع و لمن النظام يضييق عليكم عيشتكم و تنضغطوا في حق الأكل و الشراب و المواصلات تقوموا تتفشّوا في بعض بدل ما تواجهوا الظالمكم و المكرهكم حياتكم و تطالبوه بحقكم في حياة كريمة؟
لمتين حنسمع كل يوم بجرايم أشكال و ألوان،، فلان قتل علاّن في مشاجرة** واحد قتل مرتو و وحدة حرقت راجلها ** شاب يقتل فتاه رفضت الزواج منه** ده غير التمثيل بجثث المغدور بيهم و غيرها من الجرايم البشعة البتعكس مدى الغضب الكامن في قلوب الناس؟؟!!!
** و الله الطاقة البتستهلكوها في الشكَل و التفشّي في بعض و الكوارير دي لو اتوجهت في الطريق الصحيح كان أسقطوا النظام زماااااان .. بس بي حالتكم دي حتكتبوا للنظام عمر جديد و تضيّعوا عمركم سااااي...
Post: #2 Title: Re: مشهد عجيب حدث اليوم .. و الله حيّرتونا !!! Author: مجاهد محمد الهادي Date: 06-26-2013, 09:56 PM Parent: #1
لاحول ولا قوة الا بالله
"ربنا ولا تحملنا ما لاطاقة لنا به واعف عنا واغفر لنا وارحمنا أنت مولانا فانصرنا على القوم الكافرين"
اللهم فرج على بلدنا وأهلها ويسر لهم أمورهم..
Post: #3 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-26-2013, 10:22 PM Parent: #2
مجاهد محمد الهادي..
آميين يا رب العالمين : و لسه رمضان جاي و الغلا زايد و الله يستر من الراجينا !!
Post: #4 Title: Re: مشهد عجيب حدث اليوم .. و الله حيّرتونا !!! Author: cantona_1 Date: 06-26-2013, 10:37 PM Parent: #3
سلام يا رانية عمر عبد الله كلامك الكتبتيهو في سودانيزأونلاين دا وقروه 222 من قرائها حتى اللحظة بقروه كم من ركاب حافلتك وكم من ركاب حافلات الخرتوم ومدني والأبيض؟ كتابتك جميلة وسردك كذلك ما عليك إلا إرسالها للهندي عز الدين أو الطاهر ساتي لينشراها لك وهناك فرصة قراءتها من أعداد كبيرة من قراء الصحيفة أكبر. الله يهدي سركم. تحياتي.
كبـّاشي الصـّـافي
Post: #5 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-26-2013, 11:19 PM Parent: #4
كبـّاشي الصـّـافي : تسلم على كلماتك الطيّبة و مرورك الرائع المهم انه الكلمات دي قدرت تعكس الواقع الأليم البنلمسه و نعيشه كل يوم .. و إذا كان نشرها حيساعد في خلق واقع أفضل فلي عظيم الشرف بذلك.
خالص تحياتي
Post: #6 Title: Re: مشهد عجيب حدث اليوم .. و الله حيّرتونا !!! Author: nour tawir Date: 06-26-2013, 11:23 PM Parent: #5
ضاقت بيكم و كرهتو حياتكم و اتجرستو و قمتو على بعض؟!! ....
من زمآآآآآن...
Post: #8 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-26-2013, 11:36 PM Parent: #6
nour tawir
الجرسة حصلت زمان ، بس التغيير حيحصل متين؟!!!
Post: #7 Title: Re: مشهد عجيب حدث اليوم .. و الله حيّرتونا !!! Author: cantona_1 Date: 06-26-2013, 11:26 PM Parent: #5
سلام تاني رانية يعني صاحية مع اللابتوب .. عندكم كهرباء.. إن شاء الله الجو يكون كويس.. عمك خارج السودان الشقيق حتى إشعار آخر. واصلي في كتاباتك وأرسلي للهندي عز الدين فهو بكتب وبنشر أي كلام معقول وما عنده ملاوزة زي الناس التانيين. ما صاحبي ولا بعرفو لكن بقرا ليهم لمن أكون في السودان الحبيب. حياك الله. تحياتي.
كبـّاشي الصـّـافي
Post: #9 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-26-2013, 11:41 PM Parent: #7
و تاني ألف مرحب : كبـّاشي الصـّـافي : و الله جو البلد فاقد روعته بسبب غياب زينة أبنائه و بناته خلف ضباب الغربة و الشقا ،، ربنا يردكم لبلدكم سالمين غانمين ..
و تسلم كتير على مرورك الجميل و ان شاء الله تقدر حروفنا تعكس الواقع و تخلق التغيير ..
Post: #10 Title: Re: مشهد عجيب حدث اليوم .. و الله حيّرتونا !!! Author: أيمن الفاضل Date: 06-26-2013, 11:49 PM Parent: #7
تحياتي رانية أول ملاحظة عندك مقدرة علي الرصد والكتابة الحاجات الذي دي أنا شفتها كتير بس لو جيت أحكيها حا أقول :(حصلت جوطة في المواصلات) ههههه حكاية إنو الناس زهجانة من الوضع ده ما سبب يخليهم يعملوا كدا لو افترضنا إنو أي زول بيزهج الجنبو يقوم ده يمشي يستفز التاني ويجيب كثافتو حنلقي إنو في واحد صحي الصباح بدري بدون أي سبب بدا يشاكل في الناس الجو كمان ما سبب البلد الأنا قاعد فيها الناس باردين برود (يزهج) رغم إنو في حاجات كتيرة تجيب كثافة الواحد لكن ما في زول بيتهيج
Post: #11 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 00:08 AM Parent: #10
أيمن الفاضل
ألف مرحب بيك : فعلاً الغضب و الزهج ما مبرر للفوضى و التفشّي في الناس ،، نحنا لازم نكون واضحين في تعبيرنا عن غضبنا و نواجه أسباب مشاكلنا بعقل و حكمة ،، و الزهجان من الواقع المفروض يعمل على تغييره بدل يصب غضبه في ناس تعبانين زيو و يمكن أكتر منه..
تسلم كتير على مرورك الطيّب
Post: #12 Title: Re: مشهد عجيب حدث اليوم .. و الله حيّرتونا !!! Author: عبداللطيف شريف على Date: 06-27-2013, 00:30 AM Parent: #3
حليل شعبنا الذى تسامى .. نجح الجماعة فى ارهابه وتغيبه ..
حليل زمن كنا بنركب البص ولا تعرف من دفع لك تذكرك ..
حليل زمان ناس الحلة كلهم اصحاب ...
اخى رانية لك الشكر ..
ماسطرتيه يعبر عن عميق حزنك وعظيم شجبك ..
Post: #13 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 00:35 AM Parent: #12
عبداللطيف شريف : تسلم كتير للأسف مهما نذرف الدموع و مهما نطوّع الكلمات ما حنقدر نعبر عن مدى الحزن و الأسى على حال المجتمع السوداني الأليم ..
لك التحية الخالصة
Post: #14 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 10:35 AM Parent: #13
** رمضان على الأبواب ..
و ربنا يستر من ناس الجرسة و الغضب الكامن.. استرجعت مشهد قريب من الحكيته حصل في أول أيام شهر رمضان الفات،، * حالة غضب هستيري تصيب الركاب،، ثلاثة معارك ضارية بين الركاب و السوّاق و الكمساري .. و الغريب انه كل المعارك كانت بتمشي بنفس التسلسل الدرامي: شتايم و ألفاظ نابية و مخجلة ( حالتو الجماعة صايمين!!!) + ضرب و كفوف و شلاليت = الكمساري يفتح الباب و يرمى الراكب !!! ده غير المعارك الكنا بنشوفها في الشوارع أثناء سير الحافلة!
* كل البنتمناه إنه الشعب يعرف يوجّه طاقة غضبه في الاتجاه الصحيح،، و نسأل ربنا يلطف بحال أهل بلدنا و يهدّي النفوس و يعفو عن الجميع..
Post: #15 Title: Re: مشهد عجيب حدث اليوم .. و الله حيّرتونا !!! Author: عمر الفاروق عبد الله الشيخ Date: 06-27-2013, 10:44 AM Parent: #14
ده مسلسل مكسيكي طويل ليه ربع قرن من الزمان
والغريبة كلما ينتهي يعملوا منو جزء تاني ونحن قاعدين نتفرج لغاية مابقي تركي
أقفل البلف يا عوض
Post: #16 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 10:52 AM Parent: #15
عمر الفاروق عبد الله الشيخ ألف مرحب بيك : و الله ده لو مسلسل مكسيكي كان الأبطال انتحروا .. و لو تركي كان عجزوا و ماتوا و اندفنوا ،، و نحن لسه متفرجين !!!
اللهم فرّج على المتفرجين ياااااا رب العالمين
Post: #17 Title: Re: مشهد عجيب حدث اليوم .. و الله حيّرتونا !!! Author: جعفر محي الدين Date: 06-27-2013, 11:39 AM Parent: #16
السلام عليكم وربنا يهون على شعب السودان سرد رائع وتصوير جميل لواقع مرير فقط كنت انتظر أن اسمع دورك في هذا المشهد التراجيدي فيجب ألا نستهين بالكلمة ويمكن لكلمة أن تهدي الخواطر وتعيد توجيه دفة الطاقة في اتجاه سليم وهنا سيكون التغيير المنشود على العموم عكسك لهذا الواقع هنا يعتبر مساهمة برضو
Post: #19 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 12:44 PM Parent: #17
جعفر محي الدين تسلم كتير على مرورك الطيب كان من الطبيعي مني و من بعض الركاب انه نحاول تهدئة الموقف و بالذات انه الموضوع ما مستآهل انه الدنيا تقوم و ما تقعد عشان "جنيه واحد" !! المشكلة هنا إنه في حالة غضب كامن في نفوس الناس و بيتم تفريغه بشكل عشوائي مما تترتب عليه كوارث و جرايم و أفعال جنونية..
ربنا يهدي النفوس
Post: #18 Title: Re: مشهد عجيب حدث اليوم .. و الله حيّرتونا !!! Author: عبد الباقي الجيلي Date: 06-27-2013, 11:47 AM Parent: #16
صورة مزعجة يا رانيا ...
وللأسف بتحصل كتير ....
مقدرتك على الوصف الجميل جعلتها أكثر درامية ...
كما ذكرت الأستاذة نور تاور ... الكلام ده بيحصل من زمااااااااااان ...
الإنسان السوداني كأنما هو مصاب بالشيزوفرانيا ...
تقابله في بيته هاشاً باشاً كريماً حليماً ..
في المكتب كسولاً مرتشياً غير مهتم بعمله ...
في المواصلات وملاعب الكرة فاحشاً بذيئاً أخلاقو في نخرتو ...
في المنابر الإسفيرية .... ميالاً للشتم وسوء الظز في الآخرين ..
الله يكون في العون بس ...
سلمتِ
Post: #20 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 12:49 PM Parent: #18
عبد الباقي الجيلي : ألف مرحب بيك للأسف الشخصية السودانية أصبحت متماهية و غير واضحة المعالم و ممكن تلقى كذا شخصية متناقضة في انسان واحد.. و يمكن خوفنا من مواجهة الواقع و هروبنا الدايم منه هم سبب الحالة الوصلنا ليها دي..
تحياتي
Post: #21 Title: Re: مشهد عجيب حدث اليوم .. و الله حيّرتونا !!! Author: أحمد قلوب Date: 06-27-2013, 01:43 PM Parent: #18
Quote: ** و الله الطاقة البتستهلكوها في الشكَل و التفشّي في بعض و الكواريك دي لو اتوجهت في الطريق الصحيح كان أسقطوا النظام زماااااان .. بس بي حالتكم دي حتكتبوا للنظام عمر جديد و تضيّعوا عمركم سااااي...
الناس كلها بتعايين فى الفيل وبتطعن فى الضل يجب مواجهة صاحب الاذية الاساسى عشان الحاجات تبقي كويسة .....
Post: #22 Title: Re: مشهد عجيب حدث اليوم .. و الله حيّرتونا !!! Author: عمر نملة Date: 06-27-2013, 05:28 PM Parent: #21
سلام
Quote: الأخ جوطة حلف ما يفكّنا ،، سكّى الحافلة و شبَّ و اتشعلق في مراية الحافلة الأمامية و كان بيصرخ بشكل هستيري و شغّال شتايم بالجملة لا خلّى السوّاق و لا الكمساري و لا انحنا الركّاب المساكين!!!
Post: #23 Title: Re: مشهد عجيب حدث اليوم .. و الله حيّرتونا !!! Author: خالد كدودي Date: 06-27-2013, 07:42 PM Parent: #22
رانية ازيك والله العظيم انا محيرني المشاكل مع الكمساري نعم الناس زهجانه وقرفانه وتعبانه لكن المسكين ده زنبو شنو زول بيرفع منو مافي جنس افتراء التقول ما بني ادم غايتو جنس محن اقول ليك حاجه000 دايما بكون في صف الكمساري والله يستر علي لما تسخن بنزل ع طول ويارب تحفظ السودان واهل السودان 000000 عندي قصص مع مشاكل الكمساري بس بجيك بي رواقه
Post: #24 Title: Re: مشهد عجيب حدث اليوم .. و الله حيّرتونا !!! Author: Musab Osman Alhassan Date: 06-27-2013, 09:10 PM Parent: #23
رانية وضيوفا الكرام سلام وتحية
الناس بقت روحا محرقاها..ربك يكون في العون وأشارك بقصة قريتا زمان قريبة لموضوعك وتساؤلك
مدير لا يعرف كيف ينظم يومه ولا عمله ولا يعرف كيف يتعامل مع الناس ، كان يراكم الأعمال على نفسه ويحمل نفسه مالا تطيق ، نادى سكرتيره يوماً فدخل الأخير ووقف أمامه.
صرخ فيه : اتصلت بهاتف مكتبك ولم ترد
قال السكرتير: كنت في المكتب المجاور ، آسف
المدير بضجر : كل مرة آسف ... آسف ، خذ هذه الأوراق ، وأعطها لرئيس قسم الصيانة ثم عد بسرعة.
مضى السكرتير غاضباً بسبب معاملة المدير ، فألقى الأوراق على مكتب رئيس قسم الصيانة وقال : لا تؤخر العمل عليها فنحن نريد أن يكون كل شيء جاهزاً بسرعة.
تضايق رئيس القسم من أسلوب السكرتير وقال : المرة المقبلة ضع الأوراق وتكلم بشكل لائق.
قال السكرتير : مناسب ، غير مناسب .. المهم قم بإنهاء العمل بسرعة .
ارتفع الصوت بينهما ، فهذا ينتقد وذلك يرد ... حتى تدخل الموظفون من حولهما فعاد السكرتير إلى مكتبه.
مضت ساعتان فأقبل أحد الموظفين الصغار في قسم الصيانة ولم يكن يعلم شيئاً عن المشكلة فقال لرئيسه سأذهب لأخذ أولادي من المدرسة وأعود.
صرخ الرئيس : وأنت كل يوم تخرج
قال الموظف هذا حالي من عشر سنوات وهذه أول مرة تعترض
قال الرئيس غاضباً : ارجع لمكتبك
مضى الموظف لمكتبه حائراً مصدوماً من هذا الأسلوب ، وبدأ بإجراء اتصالات ليبحث عمن يوصل أولاده من المدرسة للبيت ، وبعد أن طال وقوفهم في الشمس ذهب أخوه وأعادهم.
في المساء ، عاد هذا الموظف إلى بيته غاضباً بسبب ما لاقاه اليوم من معامة ، فركض إليه ابنه الصغير ومعه دفتراً جميلاً ، فقال الطفل: أبي ، المدرس أعطاني هذه لأنني ...
ولم يكمل الطفل حتى صاح به الأب : اذهب عني ، أخبر أمك بالقصة ثم ودفعه بيده.....
مضى الطفل مكسوراً في عينيه الدموع إلى غرفته فأقبلت إليه قطته الجميلة تتمسح به كالعادة فركلها الطفل بقدمه ضربة قوية أرسلتها إلى الجدار متلوية بألمها.
السؤال : من ركل القطة ؟؟
Post: #28 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 09:34 PM Parent: #24
Quote: السؤال : من ركل القطة ؟؟
المدير طبعاً
و يمكن صياغة هذا السؤال بصورة تتناسب مع مشهد الحافلة كالآتي:
(( من ركل الشعب السوداني )) ؟؟؟!!!
* تسلم كتييير مصعب عثمان على حضورك الطيّب و القصة الأكتر من رائعة.
Post: #27 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 09:26 PM Parent: #23
Quote: والله العظيم انا محيرني المشاكل مع الكمساري نعم الناس زهجانه وقرفانه وتعبانه لكن المسكين ده زنبو شنو
زنبو إنه بيطلب قرووووش هههههه لاحظ إنه الناس ممكن تكون ظريفة معاك في أي شي الا لمن تقول أدوني قروشي!! بس ده ما بيمنع إنه في عدد كبير من الكماسره هم زاتهم روحهم محرقاهم و بيخلقوا مشاكل من مافي..
تسلم كتير على مشاركتك الجميلة خالد كدودي و في انتظار قصصك مع الكماسره ..
و ربنا يهدّي سر الشعب المتكهرب ده,,
Post: #26 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 09:17 PM Parent: #22
هههههه فيديو ممتع ,, الناس هناك يتشعلقوا عشان يهزّروا و ناسنا يتشعلقوا عشان يكسّروا ؟؟!!!
سبحان الله
* تسلم كتيييير عمرة نملة
Post: #25 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 09:12 PM Parent: #21
Quote: الناس كلها بتعايين فى الفيل وبتطعن فى الضل يجب مواجهة صاحب الاذية الاساسى عشان الحاجات تبقي كويسة .....
للأسف الناس ما قادرين يواجهوا سبب غضبهم و لا قادرين يكسروا حاجز الخوف الجواهم ,,
تسلم كتير
Post: #29 Title: Re: مشهد عجيب حدث اليوم .. و الله حيّرتونا !!! Author: عمر نملة Date: 06-27-2013, 09:37 PM Parent: #25
سلام يارانيه والله الحكايه بالاضافه الي الاحوال السيئه موجود في الجينات. في جهاز المغتربيين دفعت الرسوم وكان متبقي لي مع الموظفه 17 دولار قالت لي مافي فكه قلت ليها خير وانا كاالعاده مبتسم قالت لي طيب بتضحك ليه؟! قلت ليها انا قلت ليك خير وبضحك لانه الضحك نعمه وما في حاجه بتستاهل الزعل قالت لي لاننا متعودين كل الناس زهجانه وبتعمل معانا مشاكل. وتقريبا انت اول زول يضحك!!! صديقي يوسف كان بكتشف الناس المكشره واخلاقها في نخرينها ويقول لي اليوم اكتشفت ليك واحد روعه شغال مثلا في سودانير نقوم نمشي سودانير ونجلس بس نصور في افلامه مع الجمهور. وبعد العرض يقول ايش رايك اقول ليه باقي ليه خريفين. كله محسوب على الصحه.
Post: #30 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-27-2013, 09:52 PM Parent: #29
Quote: يارانيه والله الحكايه بالاضافه الي الاحوال السيئه موجود في الجينات.
يا ريتها بقت على الجينات يا عمر , كانت التصرفات الجنونية و المعارك دي حتكون شي طبيعي بالنسبة لينا و ما حنستغرب فيها.. يعني مثلاً الناس في الثمانينات و لحد التسعينات كانت نفوسهم هادية و متطايبة و ما كان في كم الغضب و الانفعال الحاصل في الشارع السوداني في الأيام دي,, الناس الحياة ضاقت بيهم و وصلوا لمرحلة ما قبل الانفجار,, دي بداية خروج الغضب و أكيد غضب الشعب لمن يطلع مافي قوة بتقدر عليه.
تسلم كتير
Post: #33 Title: Re: مشهد عجيب حدث اليوم .. و الله حيّرتونا !!! Author: عوض الله نواي Date: 06-27-2013, 11:17 PM Parent: #30
رنوية سلام انا اتفق مع كباشي ود اعمي ، انك تنفعي تكتبي في الصحف ، وممكن اساعدك تلفوني موجود علي صفحتي الشخصية لو حبيتي . مع تحياتي لكل الشباب .
Post: #34 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-28-2013, 12:34 PM Parent: #33
Quote: انا اتفق مع كباشي ود اعمي ، انك تنفعي تكتبي في الصحف ، وممكن اساعدك تلفوني موجود علي صفحتي الشخصية لو حبيتي . مع تحياتي لكل الشباب
عوض الله نواي
ألف مرحب بيك, الكتابة بالنسبة لي متنفس و غذاء للروح, أخرجت عن طريقه ما يقارب الأربعين قصيدة و بعض الخواطر المنشورة على صفحتي في الفيس بوك, و بعض الروايات التي بدأت في سرد أحداثها الدرامية.
تسلم كتير على تشجيعك و أكيد حاكون على اتصال بيك
Post: #31 Title: Re: مشهد عجيب حدث اليوم .. و الله حيّرتونا !!! Author: حسام عبد الرحيم Date: 06-27-2013, 10:54 PM Parent: #25
أخت رانية سلام ..
قبل كم سنة ركبت حافلة أركويت ماشين للسوق العربى المهم .. الحافلة روزا جديدة و بستاير و صوت محمود عبد العزيز طالع من مسجل الحافلة بعد محطتين كدا ركب عمك كبير شوية فى العمر. رمق الركاب بنظرة حادة و قبل ما يقعد كويس فى كرسيهو كورك فى السواق: ياخ ما تسكت الحمار دا ( يقصد طبعا محمود رحمه الله ) نط شاب فى العشرين من عمرو تقريبا من كنبة شكرا و بعاين لعمك بنظرة ازدراء: حمار منو يا حاج ؟؟؟ الحمار البغنى دا و انت البتسمعو زاتك حمار .. يا حاج أحترم نفسك .. والله حمار و البسمعو حمار كان دا حمار .. أحمد المصطفى زاتو حمار .. يا ود أنت الظاهر عليك قليل أدب و ما مربى يا عمك لكين أنت ما ما نتبز ساكت والله حماااااار و ستين حمار كمان أرخينااااا يا عمك ياخ
و انقسم الركاب ما بين معاتبا للولد و البعض الآخرمعاتبا للشيخ ..
و بعض الأحاديث الجانبية ..
ياخ أولاد الزمن دا كلللهم ما مودبين .. يا سيد ما تتكلم ساى .. أنت ما عند أولاد وللا شنو؟؟ أنا الحمد لله عندى خمسة أولاد لكين ما زى الشافع القليل الأدب دا خلاص ما تقول كللللهم ...... __________
ياخ البلد دي بقى فيها غنا .. وبعدين ياخ الزول دا فعلا ما بعرف يغنى و الله أنت الما بتعرف تسمع يا زول أنت مغفل .. أنا غنى لى فى عرسى ود البادية .. بتتكلم كيف أنت !! أها دا زاتو حمار وما بعرف بغنى .. ________
سأل أحد الشباب: أحمد المصطفى دا منو ؟؟ أجابه شاب آخر: ياخ دا البننخ داك .. ثار أحد الكبار: بننخ فى عينك يا خال ما تتضايق .. أنا ما قاعد أفهمو بقول فى شنو زاتو ياخ دا عميد الفن السودانى الأصيل
المهم لحدى ماوصلنا السوق العربى الحافلة كللللها بتتناقش حمار محمود وللا حمار أحمد المصطفى !!!! ...
و مع كامل احترامنا لكل الفنانين السودانيين .. لماذا نحن شعب لا نجيد اللباقة و احترام الآخر ؟؟؟؟؟؟؟؟
تحياتى ..
Post: #32 Title: Re: مشهد عجيب حدث اليوم .. و الله حيّرتونا !!! Author: يحي قباني Date: 06-27-2013, 11:01 PM Parent: #31
Quote: ** استوقفني منظر محزن،، رجل في الستينات من العمر كان بيتلفظ مع الراكب العامل جوطة بألفاظ مخجلة و مؤسفة جداً جداً و لعن في الأمهات و الأباء و ما شابه (ديل كبارنا؟!!)
رانية يا دفعة ...
كده ما عصرتي علي اعمامك الفي البورد ده ...
كان تقولي رجل في التسعينات ...
Post: #36 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-28-2013, 12:48 PM Parent: #32
Quote: رانية يا دفعة ...
كده ما عصرتي علي اعمامك الفي البورد ده ...
كان تقولي رجل في التسعينات ...
هههه العفو يا عمام البورد ,, انتوا كبارنا و نتمنى تكونوا دايماً قدوة حسنة لينا (^_^)
تصدّق يا يحي إنه الولد الطلّع الجنيه عشان يحل مشكلة الحافلة كان من مواليد التسعينات و عمك الكان بيسب و بيشتم و بيحرّش في السوّاق كان في الستينات؟؟!! بس برضو ده شي يخلينا نتفائل في الجيل الجديد و ان شاء الله يطلعوا أحسن مننا.
شكراً على اطلالتك الطيبة
Post: #35 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-28-2013, 12:42 PM Parent: #31
Quote: المهم لحدى ماوصلنا السوق العربى الحافلة كللللها بتتناقش حمار محمود وللا حمار أحمد المصطفى !!!!
المشكلة إنه عندنا عدم تقبّل للاختلافات البينا و أي زول بيعاين الزول المختلف عنه باحتقار و عدم احترام,, و تلقى الكبار بيغلطوا اكتر من الصغار لمن انت زاتك تتحيّر و ما تعرف تقول شنو؟!! شي مؤسف جداً..
تسلم يا حسام و ألف مرحب بيك
Post: #37 Title: Re: مشهد عجيب حدث اليوم .. و الله حيّرتونا !!! Author: يحي قباني Date: 06-28-2013, 03:19 PM Parent: #35
رانية يا جميلة ...
انتي زول مريح ... وكلامك المارق من القلب ده ... زاتو بريح الاعصاب رغم ما تحتوية الواقعة من آلام ... __________________________________________________________________ نمرقك شوية من الجدية ...
زمان لما الباص كان بي شِلِنْ ...
الناس راكبة و الباص مليان فُلْ ...
الكمساري بيبدأ عادة من ورا و يجي ماشي ...
لو زول اداهو ورقة بي طرادة او خمسين او جنيه ... بشيلهم ... ولغاية ما ( يربي ) فكة بجي راجع اديهم الباقي ...
اها بدا يمشي ... ده ريـال ... ده شلن ...لغاية ما جا زول اداهو جنية ...
طبق الجنيه علي طولو ...و مسكو بين الوسطي و السبابة ... عشان ما ينسي ...و استمر ماشي ...
بعد زولين واحد تاني اداهو طرادة ...
برضو شالها ... وما عندو ليها فكة لسة ...
اها الكمساري كمّل الباص ...
وجاي راجع يدى الناس بواقيها ...
لما وصل للزول الأداهو الطرادة ... بالغلط رجع ليهو باقي الجنيه ...
صاحبنا ( طبق ) باقي الجنيه و سكت ...
اها الكمساري وصل لصاحب الجنيه ... و قام رجع ليهو باقي طرادة ...
الزول قال ليهو يا ابن العم ...انا اديتك جنيه ...!!!
طققق ..اتذكر غلطتو كانت وين ...
قام رَجَع لسيد الطرادة محمِّر عيونو ... و قال ليهو
انت يا ابن العم ... مش اديتني طرادة ؟؟؟
قال ليهو نعم ...اديتك طرادة ...
الكمساري قال: سَمِح ..وكت اديتني طرادة ... شايل باقي الجنيه لي شنو ؟؟؟؟
سيد الطرادة عاين ليهو بإستغراب كده و قال ليهو :
وهو .. انا عارف تذكرتكم دي بي كم ؟؟؟؟ ___________________________________ مساكي خير يا رانية ... واصلي ...
Post: #44 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-28-2013, 05:26 PM Parent: #37
مساك خير و سعادة يا يحي و تسلم على الكلمات الطيّبة و القصة الجميلة دي,,
ياااا حليل زمن الناس البتغالطوا في الشلن و الطرادة,, باتذكر شفت الطرادة مع المقتنيات الأثرية بتاعه حبوبتي هههه
ألف شكرعلى المرور الكريم
Post: #38 Title: Re: مشهد عجيب حدث اليوم .. و الله حيّرتونا !!! Author: عمر عبد الله فضل المولى Date: 06-28-2013, 03:21 PM Parent: #35
ربنا يصلح الحال لك التحية الأستاذة رانية لتصوير المشهد
Post: #39 Title: Re: مشهد عجيب حدث اليوم .. و الله حيّرتونا !!! Author: Farida Mahgoub Date: 06-28-2013, 04:39 PM Parent: #38
إزيك يا رانية
بالمناسبة انا راكبة القطر وبضحك براي من قصتك وقصص ضيوفك .....وشر البلية ما يضحك!!!
في بدايات الانقاذ كنت راكبة لي حافلة الخرطوم بحري.....جنب الجامعة واحد طقطق للكمساري وقال ليهو انا نازل هنا اديني الباقي.... الكمساري هاج وماج وليه ما اتكلمت من قبيل .... وليه تتكلم في اخر لحظة والزول ساكت ساي ما اتكلم معاهو
لكن رد عليه واحد زهجان واخلاقو في نخرتو ..... يا خي مالك ....ما تديتهو قروشو....اها ما قال ليك من قبيل ...قال ليك هسي....شنو يعني خريطة العالم اتغيرت!!!!!؟
وإذا بواحد تاني يطلع كارنيه الامن و يقوم في الاخ الثائر ...انت يا زول بتتكلم كتير كدا ليه؟ قوم قوم انزل معاي
ونزلوا الاثنين ......
واقفين تحننوا وراكبين تجننوا .....
ويا هو دا السودان ....يا هو دا السودان
Post: #43 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-28-2013, 04:59 PM Parent: #39
فريدة ألف مرحب بيك و تسلمي كتير فعلاً قصة عجيبة و لو تلاحظي مرات أثناء المعارك مع الكمسارة بتظهر أطراف جديدة و تستلم الموضوع !! الغريبة أنا قبل كده عملتها لمن كنت راكبة حافلة و قاعدة في أول كرسي و الكمساري واقف قدامي ،، في وحدة ركبت و ما دفعت الباقي و بقت شغالة شكل و كواريك مع الكمساري لأكتر من نص ساعة ، و أنا بعيد عنك كنت مصدعة و زهجانة و كارهة حياتي و حاسة بكواريكهم زي المنشار في نص راسي.. المهم قمت انفعلت ليك فيهم الاتنين و أديت الكمساري الباقي حق البت (مع إني كنت مفلسة شديد *_*) و قلت ليهم ما أسمع صوتكم انتوا الاتنين نهاااااااااااائي !
نورتي كتيييير و ربنا يحفظك في سفرك و تصلي سالمة
Post: #40 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-28-2013, 04:40 PM Parent: #38
عمر عبدالله فضل المولى
ألف تحية و مرحب بيك ، دي محاولة بسيطة لتصوير الواقع بالكلمات بدلاً عن الكاميرات ..
تسلم كتير
Post: #41 Title: Re: مشهد عجيب حدث اليوم .. و الله حيّرتونا !!! Author: Farida Mahgoub Date: 06-28-2013, 04:42 PM Parent: #38
حذف للتكرار
Post: #42 Title: Re: مشهد عجيب حدث اليوم .. و الله حيّرتونا !!! Author: cantona_1 Date: 06-28-2013, 04:51 PM Parent: #41
Quote: Rania Omar · متابعة · يعمل لدى رانيـة عمـر ** شعر و خواطر الحال من بعضه،، قرينا تخصصات نادرة، سافرنا و حضّرنا على نفاقتنا الخاصة،، و هسي عطالة لينا سنين !! ربنا يصبر الشعب السوداني
يا ست رانية سلامات.. إنتِ الوداك تقري تخصص نادر شنو؟ ما تقري زينا كدا وتحفظي جدول الضرب لحد 9 في 9 ب91 أكرر 91 يا جماعة الخير. و تحفظي متن الأجرومية وتحفظي معاه متن العشماوية وألفية بن مالك. وتحفظي لحد سورة أنزلناها وفرضناها. ودا كلو بتم في 14 شهر في كلية حمد السيد للدراسات الضرورية. وتصلي الست أوقات وخلاص. في داعي لتعبك بالقراية النادرة وصعبة وبعدين ما تلقي شغل ولا مشغلة. إنتِ غلطانة أمشي عودي قرايتك تاني زي ما قلت ليك. تحياتي.
كبـّاشي الصـّـافي
Post: #45 Title: Re: مشهد عجيب حدث اليوم .. و الله حيّرتونا !!! Author: رانية عمر عبدالله Date: 06-28-2013, 05:34 PM Parent: #42
Quote: في داعي لتعبك بالقراية النادرة وصعبة وبعدين ما تلقي شغل ولا مشغلة. إنتِ غلطانة أمشي عودي قرايتك تاني زي ما قلت ليك.
تقول شنو بس؟!!! الحماسة شالتنا و قلنا نعمل حاجة كويسة لبلدنا,, كان حلمي أقدم بحث في المجال الطبي , سافرة بره و عملت بحث الماستر في تقنيات طبية جديدة لعلاج مرض الايدز.. و صدقت روحي و قلت لو رجعت السودان حاطبق الدراسة دي على أرض الواقع و النتيجة كانت ...........
