كأس العالم في كف عفريت وبلاتر فقد المنطق

كل يوم المظاهرات تزداد حشودا وصخبا في شوارع ريو دى جانيرو وحواري ساو باولو وأزقة فورتاليزا مطالبة بتحسين الأوضاع
الاقتصادية للشعب البرازيلي ومحتجة بشدة على حرق ملايين الدوررات في إستضافة كأس القارات ومونديال العالم في حين يتحرق
المواطن البرازيلي شوقا لسندوتش طعمية بالشطة أو أقلها فتة بى موية جبنة .
بلاتر قال (الشعب دا ).. أقصد في جماعة عايزين يخربوا لينا كورتنا ..
شعب يطالب بتحسين أوضاعو الاقتصادية والعجوز بلاتر يقول ديل مخربين .. فقد المنطق أب صلعة كبيرة .
يتبع .......

Quote: بلاتر قال (الشعب دا ).. أقصد في جماعة عايزين يخربوا لينا كورتنا ..

يا طنظير ..
انا حضرت حفل الافتتاح ..
والكلمة حقت بلاتر ورئيسة البرازيل .. ومن ثم حضرت الكورة .. والاستديو التحليلي المصاحب والذي عرض صور لي احداث الشغب الكانت شغالة اثناء ما مراسم الافتتاح شغاله ..
الشعب البرازئلي الدخل الكورة دي يا طلحـة ما اظنو كلو مقندل .. والشعب العامل شغب دا ما اعتقد انو ليهو علاقة بي حب الكورة اكتر من الشعب الجوه الميدان دا ..
البرازيل تعيش على الكرة .. وكاس العالم مناسبة كرويـة وحج راسو عديل .. وكمية الدخل البتجلبو مناسبة زي دي .. اعتقد انو كفيل بي تحسين الوضع ..
وزي ما قال الجماعة في الاستديو التحليلي انو الحاصل دا عبارة عن تجمعات من ناس معارضين للحكومـة زيهم وزي اي ناس معارضين للحكومة في اي مكان..
واهو الناس المعارضين للحكومة ممكن يعملو اي حاجة بس علشان انهم معارضين ..
كمية الاجراءات الامنية .. والاستعدادات البتعمل فيها البرازيل من فترة طويلة اعتقد انا كفيلة جدا بي انها تخلق من المناسبة مناسبة عظيمة جدا تعود بي كل الاشياء الجميلة للبرازيل ...

طبعا يا جماعة كدا ( عارفم أنا) بلاتر دا الحاكم الأعلي للكورة في العالم ( رئيس الاتحاد الدولي لكرة القدم ..فيفا).. وعايز أضيف
وأقول أنو عجوز وعلى وشك وعندو صلعة نازلا لى نص ضهرو .. الخ .
يتبع ..

افتتاح وين يا تامبا
الليلة القريبة القبل شوية دي طالعين بمئات الألوف في الشوارع ومعاهم كمان كسير وحرق والذي منو ..
اظن كدا الحكاية ماشة موسعة شوية شوية .

سلام يا طلحة - الحيكومة نظمت ليهم كاس العالم عشان يطلعوا ليهم بي قرشين تلاتة ( مليارين تلاتة) ،،، يقومو يعملو شغب بحجة تدهور الاقتصاد ؟!
اولاد سامبا ديل ما سمعوا بمثل الدس الكواريك في دافنة ابوبهو ؟!

يا أيمنوف
أنا ضد المظاهرات البرازيلية في الوقت دا بالذات ومع قيام كأس العالم (احتمال كبير الواحد يمش يتجدع في شواطيء ريو دي ويزيد ثقافتو
في بكيني الحسناوات البرازليات وأتمني أن لا يفهمني الحاقدين غلط ..)
لكن في نفس الوقت ضد منطق الديناصور العجوز أب صلعة بلاتر ومن وجهة نظري انو كلامو دا كلام زول مخرف وراح ليهو الدرب.
اشارة بلاتر إلى انو ديل مخربين عايزين يمسخوا لينا كورتنا اشارة مستفزة جدا وربما نفخت في النار المشتعلة وكان عليه أن يكون
أكثر دبلوماسية في التعليق على الحاصل، كأن يطلب (بشىء من التوسل) انو يؤجلوا عمل اليوم إلى الغد حتي لا تفقد البرازيل هذه
التظاهرة العالمية الكبيرة والتى حتما ستعود عليها بالكثير جدا من المنافع وربما كانت ليلة قدر بالنسبة ليها .
يا سيد بلاتر أسمح لي أقول ليك اتا خرفت وعليك بالاعتذار .
يتبع .....

البرازيل في تقديري الخاص يا طلحة بتواجه مشكلة بتشبه مشكلة السودان فيما يتعلق بصادراتها وفتح وقفل البلف ..
البرازيل المنتج الأول اللي بتعتمد عليهو في إقتصادها لضخ العملات الأجنبية هو منتج اللاعب !!!
مش نحن بنصدر قطن وصمغ وما عارف ليك بترول .. أها الجماعة ديل كانوا إلى وقت قريب بيصدروا اللاعبين ..
وكان اللعب البرازيلي عملة صعبة يباع بملايين الدولارات ..
أها ليهم زي كم سنة وررردوللوب البلف إتقفل واللاعب البرازيلي سعرو وقع في السوق وبقا قصيير التيلة ..
وتفوق اللاعب الأرجنتيني واللاعب البلجيكي واللاعب الأفريقي في سوق الإنتقالات ..
أها قووموا يا البرازيليين اعملوا زييي السودانيين وقولوا للمغتربين بتاعينكم البرازيل اتصلحت وعملنا كباري وشوارع ظلط خلاص تعالوا وح نعمل ليكم اعفاء تدخلوا عرباتكم والعفش حقكم ..
وقد كان عاد معظم اللاعبون المهاجرون أي زوول فيهم اشترى ليهو قطعة ارض ناصية عملا شقق وأجرا وتحت عمل بقالة ومحل اسكراتشات وقعد ..
فقد اللاعب البرازيلي هيبته ففقدت البرازيل هيبتها ففقد الشعب اهميته فأحس بالهوان ..
وما صارت البرازيل قبلة من لا قبلة له ..
وما عدنا ننتظرالمشجعات في المدرجات لحظة تسجيل هدف في مرمى البرازيل حتى نرى دموع الحزن ..
ولا عدنا ننتظر فرجة مشجعة برازيلية بعد تسجيل هدف فتطبع بوسة زي ما بيقولوا دمغى جريح أو تحضن من يجاورها من المشجعين وتقووم كده تقلع..

المحيير يا طلحة إنو زولنا البروف حفظه الله كان داعم بلاتر ضد يوهانسون والأغرب وقتها وجهة نظره كانت صاح رغم عن إنو شاتر رأي الإتحاد الأفريقي الداعم ليوهانسون فكسب شداد الرهان وخسرت الإتحادات ..فظفرنا بدعم الفيفا برهة غير أنها لم تدم !!

In 2012, Brazilian exports achieved the second highest value since trade balance records began, with a value of US$ 242.6 billion, second only to the figure registered in 2011 (US$ 256 billion), representing a fall of 5.3%


الأخ عمر الفاروق الإقتباس أعلاه يوضح حجم صادرات البرازيل وليس اللاعب وقيمته وتحويلاته من ضمنها. البرازيل تصدر السكر والسيارات ولها أكبر مصنع للفولكسواجن في العالم ومصنع كبير لسيارات المرسيدس ولا تنسى أن بصات ابو رجيلة تم إستيرادها من البرازيل زمان. هنالك قطع الغيار واكسسوارات السيارات لها مصانع ضخمة في البرازيل. كما أن هنالك نسبة نمو في صادرات البرازيل بنسبة 27% مقارنة بالعام 2010. هذا غيض من فيض والله أعلم


كبـّاشي الصـّـافي


(العوج راي والعديل راي)

يا الكباشي .. أنجدنا وأفزعنا ..
باقي ليك لو مثلاً ميزانية السودان طلعوها فهل ممكن تلقى تحويلات المغتربين بيعلنوها بي صورتها الواضحة ؟؟ مع إنو ممكن تكون قيمتها ما هينة أبداً ومؤثرة جداً من ضرائب وزكاة ودمغة جريح ودعم السلام ودعم الحرب و و

اها باقي لي ده نفس الحال في قصة البرازيل مع اللاعبين البقصدو ليك ..
ثم وإنو خلي بالك ما إلتقطت الفكرة بتاعتي كويس شكلك ..

السلام عليكم
يا كانتونا 1 بغض النظر عن معلوماتك الفوق دي فالمظاهرات القائمة في البرازيل دي تطالب بتحسين الأوضاع الاقتصادية ..
الكلام دا برضو للأخ نزار في الفيس بوك .. رغم انو البوست دا ما بتكلم عن الحالة الاقتصادية للبرازيل انما عن المظاهرات
وانعكاسها على كأس العالم المقبل.. وما جاء في متن البوست من أن البرازيليين تعبانين اقتصاديا ليس من تأليفي انما جاء
في الشعارات المرفوعة وهتافات المتظاهرين الذين طالبوا بتحسين الحالة الاقتصادية والاجتماعية والخدمات مستنكرين أن تهدر ملايين
الدوررات في إستضافة البطولات الكروية في حين يعاني الشعب البرازيلي ..مع الوضع في الاعتبار أنو سندوتش الطعمية بالشطة
وفتة موية الجبنة دي من عندي أنا وليس من عندهم في إشارة مني لمطالب المتظاهرين .. أما البرازيل حالة البرازيل الاقتصادية
سواء كويسة أو كعبة فهذه ليس فكرة البوست ..
عشان ناس نزار التحت ديل ما يزعلوا مننا ساي .