المهنة التى تمنيتها ولم تتحق امنيتي !!!

الطيران الحربي المهنة التى تمنيتها ولم تتحق امنيتي !!!
اثارت شجوني وقلبت على المواجع اليوم صورة عائشة فاروق أول امرأة في باكستان تقود طائرة مقاتلة
نقلاً عن موقع قناة العربية ....

هس مافي طريقة تقدم تاني

وشكرا

Quote: هس مافي طريقة تقدم تاني

هههههههههههه
شكراً ودالباوقة لرفع المعنويات وكده ..
يااااخ نحن بقينا سواقة العربية في تلتلة ده غير نضارة القراية وحبوب الضغط

امتحنت الشهادة علمي مخصوص عشان الطيران واحرزت درجات جيدة جدا في الرياضيات والانجليزي والفيزياء
لكن بسبب استشهاد زوج اختي الشهيد العقيد طيار/ محمد محمود (احد ابطال عملية جبل بوما) رفضت والدتي لها الرحمة رفضاً باتاً فكرة دراستي للطيران ....

امي الله يرحمه قلت ليها اذا ما قريت طيران ما ح اقرا اى جامعة قالت لي ما مشكلة اقعد عوس معاي الكسرة في البيت
اها اها بدل عواسة الكسرة قدمت للجيش والبوليس وتأخرت نتيجة القبول للجيش
وظهرت نتيجة القبول للبوليس والتحقت بكلية الشرطة لكن صراحة لم اندم على ذلك

كنت في الثانوي مهوس جدا بحكاية الطيران دي وكان من اسعد ايام حياتي يوم ذهبت مع زوج اختي الشهيد
الى المطار الحربي وشاهدت عن بعد امتار قليلة طائرة الانذار المبكر الاواكس :


وكان يحرسها رجال المارينز وطائرات الــ F16 :

تقول لي امدرمان اولاد قلبا
هسي فيكم زول شاف الاوياكس او ال F16
اها ديل كانو نازلين جنب بيتنا فركة كعب هههههههههههههههه

جنابو

بطل بطبطة

وحاول الحق كاودا سريع

Quote: جنابو بطل بطبطة وحاول الحق كاودا سريع

كادوا ووووين ياعمك يااااخ نحن بقينا كان فلعنا الواطة نجليها تقول لي كاودا

Quote: امتحنت الشهادة علمي مخصوص عشان الطيران واحرزت درجات جيدة جدا في الرياضيات والانجليزي والفيزياء

..

Quote: امي الله يرحمه قلت ليها اذا ما قريت طيران ما ح اقرا اى جامعة قالت لي ما مشكلة اقعد عوس معاي الكسرة في البيت

..

Quote: لكن بسبب استشهاد زوج اختي الشهيد العقيد طيار/ محمد محمود (احد ابطال عملية جبل بوما)

الشهيد عمر عثمان
لفترة قريبة جدا .. كانت الطيارة بالنسبة لي كائن خرافي جدا .. مخيفه .. مرعبـة ..
ياخ انا زمان في العيد لما يجيبو لي الطيارة البتشتغل بالحجار ديك كنت بدق جرس ..
كنت بحب المسدسات .. وبعمل مسدساتي برااااي
وبالرغم من ذلك حبيت الطيران .. وكنت لما اشوف لي طيار مقاتل بالبدلة العسكرية بتجيني نفسيات ..
البدلة بي نوعيها .. الحكليـة او اللبنية او الكاكية وهي خاصة بالميدان او شغل الورشة .. او البدلة البيضاء بدلة الضباط العظام ..
نحن اولاد العساكر ديل لو فاتنا الميري بنتمرمق في ترابو ..
والدتك الله يدخله الجنة يااارب ... لكن دائما الامهات بيقيفو بين الواحد وامانيهو وذلك لي نظرة الأم بحنية بعيدا عن الموضوعيـة ..
كان مفروض اكون واحد من الشهداء .. الرغبة الشديدة جدا في الكلية الحربية .. وتسهلت الأمور بشكل جيد ، الوالدة الله يديها العافية أول ما جيت داخل ليها .. أو قول الخبر وصل ليها بي الصدفـة ، دقت جرس الدنيا والعالمين .. وقالت بالحرف الواحد .. قروشك البتجيبه لي حرام .. عايز تبقى لي زي ابوك يعني ما كفاي كاكي واحد في البيت
طبعا اضراب عن الطعام لمدة كم يوم .. لما ما مشى الحال مشيت قعدته مع ناس عمي في الخرتوم كم يوم .. بقيت اسف صاعوط .. والله ولا هببوهو لي ..
ابوي الله يرحمو ويغفر ليهو .. بعدما جيت دخل معاي في حوار عجيب اذكر كل حرف قالو لي فوقو لانو كان في الغرفـة .. والغرفة دي يا اما تكرم او تهان .. وفي الحالتين انت مشروع رجل ناجح بي كل المقائيس .

Quote: الشهيد عمر عثمان

هههههههههههههههههههه
اقل شيء كان الواحد مرق ليهو بي شارع او مدرسة باسمو

Quote: وبالرغم من ذلك حبيت الطيران .. وكنت لما اشوف لي طيار مقاتل بالبدلة العسكرية بتجيني نفسيات .. البدلة بي نوعيها .. الحكليـة او اللبنية او الكاكية وهي خاصة بالميدان او شغل الورشة .. او البدلة البيضاء بدلة الضباط العظام ..

ياسلام ياتمبس يااااااخ
اقول ليك مووبالغة هل تصدق انو الحاجات دي كلها بتاعت زوج اختي الشهيد (1983م) قاعدة عندي لي يوم الليلة
ومعاها شنطة الطيارين ديك ........

Quote: كان مفروض اكون واحد من الشهداء

هههههههههههه
كان استشهدت كويس لكن الخوف ياتمبس تقع في الاسر انت بالذات كان منظرك ح يكون بايخ جداً
واحتمال يرفعو لينا صورتك هنا في سودانيزاونلاين (عاجل اسر الضابط تمبببببببببس)

Quote: ابوي الله يرحمو ويغفر ليهو .. بعدما جيت دخل معاي في حوار عجيب اذكر كل حرف قالو لي فوقو لانو كان في الغرفـة .. والغرفة دي يا اما تكرم او تهان .. وفي الحالتين انت مشروع رجل ناجح بي كل المقائيس .

له الرحمة ... رضاهم اهم من تحقيقات امنياتنا

وانا ضابط بوليس في مباحث المطار 1993م كررت نفس المحاولة والمرة دي قلت لي ابوي طيب امشي اقرا طيران مدني
قال لي امك الله يرحمه قالت شنو ؟ no way
اقعد في بوليسك ده بس

Quote: تقول لي امدرمان اولاد قلبا هسي فيكم زول شاف الاوياكس او ال F16 اها ديل كانو نازلين جنب بيتنا فركة كعب هههههههههههههههه

هههههههههه ..اكان اتمهلت لي كان بحكي ليك باقي الحاجات .. لكن الشفقة بتاعت اولاد الخرتوم بس
الوالد عليه رحمة الله اداني محاضرة عميقة جدا في الرجولة والعسكرية والجندية وقرب يحلق لي صلعـة ويشدني إدارة داخلية .. وللحقيقة هي اول مرة احس انو الرجل بقدم فيني للحياة كرجل مستقل بي ذاتــو .. بعديا عن كلام الأم .. لكن مع تحفظو على مسالة الجندية ..
اقترح علي وقتها الطيران الحربي .. وتحديدا بي طريقة وحسب علاقتو مع ضباط الجيش واقاربنا كان في دفعة فنيين تسليح طيران قالي لو مصر على الشغلانة دي حاول اقنع أمك براحة براحة كدا .. واهي على الاقل عكسرية ومنها تقرا وتستفيد وتتقدم ..
المهم الأمور ما ظبطت والحاجة الله يديها الصحة والعافية عنقدت ..
وحسع دي لو كان قالت خير .. والله زي ناس .. استيف وتراجي وناس جادات وابو روضـة وناس اساسي وطلحة وود البشرى وبقية الفارات ديل حسع دي كان الواحد يجي ينزل ليهم جناح الطيارة هنا دا في خشم البورد بتاع بكري دا .. ويجي نازل بي بنطلون فيهو خمسة وعشرين جيب وجناح طائر على الصدر وقطع حديدة صغيرة بها حروف وارقام وبوريــة راقد بالجمبــه في هدوء وطمأنينة .. والبعمل فهيا مجنون .. سيلي الله يترجم من مسافة قريبة جدا .. دانـة واحدة من كل جناح ..

يوم كانت الاواكس فى مطار الخرطوم نحنا كنا فى مكان عجيب

مضيفة طيران

Quote: تقول لي امدرمان اولاد قلبا هسي فيكم زول شاف الاوياكس او ال F16 اها ديل كانو نازلين جنب بيتنا فركة كعب هههههههههههههههه

.. كل اماني معظم مواليد جيل السبعينات بداياته او وسطـه .. كان العسكريـة ..
تحديدا الكلية الحربية او كلية الشرطـة وذلك عندما كانت تلك الكليات تمثل عظمة الدولة والضبط والربط والمسؤولية ، وكذا الحال الواجهة الاجتماعية ..
اما الفترة الاخيرة والمحسوبية والانتماء السياسي ، افرغوا تلك الاماني من معانيها .. ومن فترة طويلة للاسف بقت الخيارات غير ذلك حتى ولو جاتك في طبق من دهــب ..
تعرف يا جنابو .. الطيران دا كان بالنسبة لينا ممتع .. لما نشوف الشهيد نقيب طيار معاوية خميس سطيح نازل من العربية بتاعت الترحيل ولابس بدلة الميدان ويكون جاي من مهمة حسع دي ، وتشوفو قاعد في كرسي جمب البيت وبقرا في جريدة كزول عادي .. فكنا بنقارن ياربي الزول دا زاتو القاعد يطير بالطيارة دي ويضرب بيها من فوق وينزله وممكن يصطادوهو في اي لحظة بي سام سيفن يا اي مضاد للطيارات ويقدم نفسو قربان للوطـن ..
كنا بنشوف الشهيد العقيد اركانحرب اسامة خشم الموس بالبدلة البيضاء جدا ، والعلامات الحمراء والدبابير الذهبية ودوء الرجل العجيب وكنا بنشتهي انو نشوف الطيارة القاعد يسوقه الزول دا ويقاتل بيها ..
الشهيد اسامة من اخطر الضباط في مجال قيادة طايرات الميج بي كل انواعها .. الشهيد اسامة خشم الموس والشهيد معاوية خميس سطيح .. جميعهم استشهدوا في مهمات وطنية ..
معاوية استشهد بعد ان اسقطت المروحية التي كان يقودها وهي مروحية مشهورة كان فيها بعض الوزراء ورجالات الدولة والكلام دا مطلع التسعينات تقريبا . والعقيد اسامة استشهد داخل مقاتلته بعد ان حاول يهبط بها بطريقة فنية بالرغم من اصابته بمضاد ..
عارف يا جنابو زمان لما كانت اعياد مايو .. كان معاوية عليه الرحمة والمغفرة بيجي بي الهلكوبتر ويرمي لينا الحلاوة وصور نميري من الجو .. طبعا كان بقاصد بيتم ويقول ليهم ارمووو .. والحلاوة كلها بتقع لينا في الحلة وبالمرة كان بيجي يعمل لينا حركات وجلكسات بالطيارات حقات التمارين ويقلبه لينا جمب روسين البيوت .. كانو سايق ليهو عجلة ..

Quote: . كل اماني معظم مواليد جيل السبعينات بداياته او وسطـه .. كان العسكريـة .. تحديدا الكلية الحربية او كلية الشرطـة وذلك عندما كانت تلك الكليات تمثل عظمة الدولة والضبط والربط والمسؤولية ، وكذا الحال الواجهة الاجتماعية .. اما الفترة الاخيرة والمحسوبية والانتماء السياسي ، افرغوا تلك الاماني من معانيها .. ومن فترة طويلة للاسف بقت الخيارات غير ذلك حتى ولو جاتك في طبق من دهــب .. تعرف يا جنابو .. الطيران دا كان بالنسبة لينا ممتع .. لما نشوف الشهيد نقيب طيار معاوية خميس سطيح نازل من العربية بتاعت الترحيل ولابس بدلة الميدان ويكون جاي من مهمة حسع دي ، وتشوفو قاعد في كرسي جمب البيت وبقرا في جريدة كزول عادي .. فكنا بنقارن ياربي الزول دا زاتو القاعد يطير بالطيارة دي ويضرب بيها من فوق وينزله وممكن يصطادوهو في اي لحظة بي سام سيفن يا اي مضاد للطيارات ويقدم نفسو قربان للوطـن .. كنا بنشوف الشهيد العقيد اركانحرب اسامة خشم الموس بالبدلة البيضاء جدا ، والعلامات الحمراء والدبابير الذهبية ودوء الرجل العجيب وكنا بنشتهي انو نشوف الطيارة القاعد يسوقه الزول دا ويقاتل بيها .. الشهيد اسامة من اخطر الضباط في مجال قيادة طايرات الميج بي كل انواعها .. الشهيد اسامة خشم الموس والشهيد معاوية خميس سطيح .. جميعهم استشهدوا في مهمات وطنية .. معاوية استشهد بعد ان اسقطت المروحية التي كان يقودها وهي مروحية مشهورة كان فيها بعض الوزراء ورجالات الدولة والكلام دا مطلع التسعينات تقريبا . والعقيد اسامة استشهد داخل مقاتلته بعد ان حاول يهبط بها بطريقة فنية بالرغم من اصابته بمضاد ..

ياسلام عليك ياتمبس لم تنداح بتنقل للزول صور عجيبة وغريبة وذكريات لايام حلوة ما اظن تعود .......

Quote: عارف يا جنابو زمان لما كانت اعياد مايو .. كان معاوية عليه الرحمة والمغفرة بيجي بي الهلكوبتر ويرمي لينا الحلاوة وصور نميري من الجو .. طبعا كان بقاصد بيتم ويقول ليهم ارمووو .. والحلاوة كلها بتقع لينا في الحلة وبالمرة كان بيجي يعمل لينا حركات وجلكسات بالطيارات حقات التمارين ويقلبه لينا جمب روسين البيوت .. كانو سايق ليهو عجلة ..

ههههههههههههههه
بصدقكك لانو بيتنا واقع في خط المطار وكل او اغلب الهيلكوبترات بتجي مارة بيهو
وهم عارفين انو دي بيت زميلهم محمد محمود فكانوا بعملوا نفس الحركات دي ونحن
من ما نسمع صوت الهيلكوبتر جاية من بعيد بنجري ننتظره في السطوح

Quote: مضيفة طيران

بس ما سودانير او انتنوف بتلحقي الزينين

الغريبة ياعمر أنه الأمهات كانوا بيقولن للوليدات لمن يزهجو منهم قوم ( طير ) من قدامى , وفيما يبدو أنك كنت شافع هادى وعاقل وبناءا عليه لم تضطر الوالدة أن تقولا ليك حتى يستجيب الله لدعاءها ( ويطيرك) , فمسئولية عدم الطيران دى منك ىا سيادتو وترجع ليك إنت . بالمناسبة مافكرت تسوق طيارة جراد ؟

Quote: الغريبة ياعمر أنه الأمهات كانوا بيقولن للوليدات لمن يزهجو منهم قوم ( طير ) من قدامى , وفيما يبدو أنك كنت شافع هادى وعاقل وبناءا عليه لم تضطر الوالدة أن تقولا ليك حتى يستجيب الله لدعاءها ( ويطيرك) , فمسئولية عدم الطيران دى منك ىا سيادتو وترجع ليك إنت . بالمناسبة مافكرت تسوق طيارة جراد ؟

ههههههههههههههه
ياقلقو طيارة الجراد والرش دي لو بتسوق ركشة كويسة ممكن تسوقه عاااااادي

Quote: يوم كانت الاواكس فى مطار الخرطوم نحنا كنا فى مكان عجيب

ياعمار وكت انتو كنتو مفتحين ومركزين وعارفين دايرين تعملو شنو الشعب السوداني كلو كان نايم نوم أهل الكهف !!!

يا جنابو والله أمك الله يرحمها مرة حكيمة
وقرارها صواب

المفروض تشكرا حتى الممات في الأقل في موقفا دا

أسع الجماعة كانو ركبوك إنتينوف تضرب عمى
وأنت بالذات زول حنيين (بكسر الحاء وفتح النون) ما بتقدر على الزي دا

لما تشوف صور ضحياك في سودانيزأونلاين إلا تبيت في التجاني الماحي

والله الطيران الحربي ده شهانا ليهو الشهيد الرجل العجيب الرائد طيّار حسن خضر ..
ياخ ده كان زول هييية كييف..
حولاااا..
ربنا يرحمه ويتقبله قبول حسن صديقن الراحل الشهيد حسن خضر..

Quote: والله الطيران الحربي ده شهانا ليهو الشهيد الرجل العجيب الرائد طيّار حسن خضر .. ياخ ده كان زول هييية كييف.. حولاااا.. ربنا يرحمه ويتقبله قبول حسن صديقن الراحل الشهيد حسن خضر..

سلاح الطيران ياعمر من زمن ناس الكدرو وزلفو ...... ظل سلاح منكوب وقدم الكثير من الشهداء
لهم الرحمة اجمعين .............

الحبيب عمر ... سلام و شوق ..

والله العظيم يا عمر أنا ده لحدى اللحظة دى مجنون بالطيران و كانت أمنيتى دراسة هندسة الطيران و الرغبة زادت
بعد ما طلعت من البوليس و برضو الأبواب إتقفلت و ما عارف البيفتحها شنو.

Quote: الحبيب عمر ... سلام و شوق .. والله العظيم يا عمر أنا ده لحدى اللحظة دى مجنون بالطيران و كانت أمنيتى دراسة هندسة الطيران و الرغبة زادت بعد ما طلعت من البوليس و برضو الأبواب إتقفلت و ما عارف البيفتحها شنو.

سيادتو محي الدين معقولة ياسيادتك ما تمرقك لينا الا F16 عديل كده هههههههههههههه
فعلاً الطيران بجنن لانو هو ذاته فكرة مجنونة لكن ربما لحكمة ربانية لم تتحق امانينا
ياااخ كان جيت اجازة قول لينا الوووو

يا عمر عثمان الحق ولدك
ممكن تشوف فيهو المشتهيهو
:
:
:
:
:
:
:
:
مع التحيات لله الزاكيات

Quote: يا عمر عثمان الحق ولدك ممكن تشوف فيهو المشتهيهو

بحاول معاهم يامحمد ..
الكبير كان عمره 7 سنوات مرة قال لي خلاص انا عاوز ابقي طيار حربي
فرحت وقلت استوثق قلت ليهو ليه ياعبدالرحمن عاوز تبقي طيار حربي ؟
قال لي عشان اجي ارمي قنبلة في مدرستنا دي اتاريهو كان منزوق في الامتحانات

Quote: لما تشوف صور ضحياك في سودانيزأونلاين إلا تبيت في التجاني الماحي

تعرف يامحمد الامريكان او الطيار الامريكي بعد ما رمي القنبلة الذرية على هيروشيما قال :
(يا للهول ما الذي فعلناه) !!!!!!!
وعشان كده ربك قال (وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ”)
والخيرة فيما اختاره الله ،،،

Quote: قال لي عشان اجي ارمي قنبلة في مدرستنا دي اتاريهو كان منزوق في الامتحانات

يا جنابو دا بالذات اهتما بيهو زول بتاع قرارات وثورى بنفع فى الشغلانه دى
حفظه الله من كل شر وبلاااااء
:
:
:
:
:
:
:
مع التحيات لله الزاكيات

يا جنابو, ذي ما قال ليك ود الباوقة, مافي سكة تقدم تاني :)

Quote: لكن بسبب استشهاد زوج اختي الشهيد العقيد طيار/ محمد محمود (احد ابطال عملية جبل بوما)

ربنا يرحمه و يغفر ليه ان شاء الله
العقيد معاش/ خالد فرج مواعدني انو يكتب مذكراته و من ضمنها عملية جبل بوما و هو كان احد القادة الاشرفو على العملية
متى ما انتهى من كتابتها بجي انشرها هنا

سلامات يا جنابو عمر

انت عارف انا كنت متمني المهنة دي زيك كدا ..
أخوي الكبير سعادة العميد طيار أحمد أنقابو .. لما يلبس البدلة كانت بتولع فيني حريقة
لما امتحنت السهادة السودانية وقلت اقدم في الجيش حلف علي ما اقدم لا حربي لا مدني
سمعت الكلام ودخلت إعلام


البوست بتاعك دا هيج فيني الرغبة القديمة


أها يا جماعة ممكن أقدم ولا أقوم الف؟

كان نفسي ابقي مذيع ..كنت مهووسا بالجمعيات الأدبية وتقديم البرامج والإذاعة المدرسية..الان شغال Sales Specialist

Quote: كان نفسي ابقي مذيع ..كنت مهووسا بالجمعيات الأدبية وتقديم البرامج والإذاعة المدرسية

ياسلام ياسيف يااااخ ذكرتني زمن جميل بالحيل زمن المدارس كانت مدارس بالجد ...........
بالذات مدرستنا الخرطوم جنوب 1 كان عندنا اذاعة مدرسية خطيرة ومسرح وتمثيل ......

Quote: أها يا جماعة ممكن أقدم ولا أقوم الف؟

يا حافظ انقابو انا شايف موضوع اللف بيأدي نفس الغرض :)
جارنا بتاع لف تقيل, يوم لاقيتو في الشارع واقف جنب بيتو قال لي اتفضل على البيت يا عمك
قلت ليه شكرا ليك كتير عندي مشوار لحدي الخرطوم
قال لي: خرطوم شنو والله انا لافي لي صاروخ يوصلك مدني عدييييل

Quote: انت عارف انا كنت متمني المهنة دي زيك كدا .. أخوي الكبير سعادة العميد طيار أحمد أنقابو .. لما يلبس البدلة كانت بتولع فيني حريقة لما امتحنت السهادة السودانية وقلت اقدم في الجيش حلف علي ما اقدم لا حربي لا مدني سمعت الكلام ودخلت إعلام

الغريبة ياحافظ الحكاية دي متكررة عندنا في السودان اهل اى مهنة لايشجعون الاخرين او الاقربين على الالتحاق بها
ربما لانهم يعلمون عنها اكثر من البريق الذي نراه ............

Quote: العقيد معاش/ خالد فرج مواعدني انو يكتب مذكراته و من ضمنها عملية جبل بوما و هو كان احد القادة الاشرفو على العملية متى ما انتهى من كتابتها بجي انشرها هنا

تعرف ياحسبو الابطال ديل لو كانو بس مصريين كان مصر كتبت عنهم 27 كتاب وتلاتة اربعة افلام وخمسة مسلسلات
لازم تشجع سيادتو خالد يوثق للعملية دي وده شيء مفقود تماماً عندنا وبلغه تحياتي وتقديري ....

اخوك كان امنية حياتو يبقى قبطان بحري

والغريبة ما بعرف اعوم

خخخخخخخخخخخخخخ

Quote: اخوك كان امنية حياتو يبقى قبطان بحري والغريبة ما بعرف اعوم خخخخخخخخخخخخخخ

ما بتعرف تعوم ما مشكلة يا ياسر اصلو القبطان مفروض آخر زول ينزل من السفينة الغارقة
وفي الغالب بلحق الزينين ههههههههههههه

العزيز عمر و ضيوفه
تجربتي مختلفه شويه منك انت و اخونا تمبس

الوالد علية الرحمة كان لما الواحد فينا يتولد بفتح له ملف يتابعه طول حياته يحوي كل ما يخصه من شهادات دراسية لكل المراحل , صور و خلافه .
اول ورقة في الملف بتكون شهادة الميلاد و بعدها ورقة فيها خارطة طريق لحياتك كلها بتبداء بالمراحل الدراسية ودي بتشمل اسماء المدارس وتواريخ دخولها و تنتهي بتاريخ الالتحاق بالخدمة .
خارطة طريقي كانت بتنتهي بالكلية الحربية والعمل ظابطا بالجيش السوداني و دي ليها علاقة بتاريخ الميلاد واختيار الاسم (يعني لو اتولدت في نفس الشهر القامت فيه ثورة ود حبوبة
مثلا معناه اسمك حيكون عبدالقادر و حتدخل الكلية الحربية ) فاتخيل انك يفطموك بالعسكرية مع تربية اعدادية لذلك مع العلم ان الوالد لم يكن عسكريا . الحمد لله ربنا وفقنا و مشينا ذي ما رسم لينا
لكن اخوك بعد امتحان الشهادة دق جرس في قصة الكلية الحربية , كانت رغبتي دراسة الاخراج التلفزيوني (كنت شايف في نفسي مشروع فنان و كدا) حاولت اوصل الحاجة دي بشتى السبل
و ما نجحت . عمك وصى جارنا عقيد جاب لي اورنيك التقديم للكلية الحربية و الموضوع بقى محسوم , ربك رب الخير جاب ليك ود عمي (ظابط) من مناطق العمليات رأسه مفتوح على اثنين
و من ما عرف اني مقدم للكلية الحربية وقف ليك لأبوي نار حمراء وقال ليه كفاية انا واحبطه ليك بوضع الجيش في تلك الفترة (الديمقراطية الثالثة) بعدها الله يرحمه اقتنع و اخوك حمد الله

جبارتي بقت في فلقة ود عمي

تحياتي

Quote: تجربتي مختلفه شويه منك انت و اخونا تمبس الوالد علية الرحمة كان لما الواحد فينا يتولد بفتح له ملف يتابعه طول حياته يحوي كل ما يخصه من شهادات دراسية لكل المراحل , صور و خلافه .

ربنا يرحم الوالد ويغفر ليهو يا جبـرة ..
طبعا الحركة حقت الملف دي يا محمد كلنا هذا الرجل ..
عارف الملف دا برضو عامل زي دفتر الاحوال فيهو حاجاتك الكويسة والشينـة .. شهاداتنا كلها من اولى ابتدائي لحدت الجامعات المختلفـة ..
الصور .. البطاقات .. ومن الصعب جدا يا محمد انك تصل الملف دا خالص ..
تخيل لما جيت مسافر .. اول مرة اطلع من السودان .. الوالد عليه رحمة الله .. بعدما قرا قرآن كتير جدا جمب خشم الباب .. وكان ماسكني في راسي وشال فاتحة تقيلة جدا ..
دخل يدو في جيبو .. وطلع لي ورقـة مطبقـة قالي هاك دي ..
انا قلت الحاج دا بقى بتاع كواديك واللا شنـو ..؟ عايز يديني كادوك ..؟
فتحت الورقـة لقيت مكتوب فيها اسمي المقترح السماهو لي في لحظة ..
يوم الميلاد
ساعة الميلاد بالدقيقة والثانية ..
ودي كانت اجمل هدية اتلقاها في حياتي .. وما زلت محتفظ بيها لحدت الآن ..

Quote: فتحت الورقـة لقيت مكتوب فيها اسمي المقترح السماهو لي في لحظة .. يوم الميلاد ساعة الميلاد بالدقيقة والثانية ..

ربنا يرحمهم جميعا يا علاء

طبعا زادت دهشتي بقصة الفايل و الاهتمام بالتوثيق المشترك لاني كنت شفت فيديو لوالدك الله يرحمه (على ما أظن) ضارب فيه الناس نسونا
وادهشني شبه لوالدي و برضو الوالد كان موسيقي يعزف العود والقانون وذي ما والدك الله يرحمه اهداء للموسيقى السودانية المسيقار عمر منصور
والدنا اهداء المسيقار عضو البورد أزهري نورالهدى .

تعرف في قصة التوثيق بالدقيقة والثانية دي كنت بستمتع جدا بقراية نوته لابوي موثق فيها زواجة واجمل حته كانت بتاعة تم قطع الرحت في الساعة
195320 هكذا كان يدون الزمن .

لهم الرحمه .

جنابو الشهيد دا ما يجي بطيارته يردمنا

Quote: وذي ما والدك الله يرحمه اهداء للموسيقى السودانية المسيقار عمر منصور والدنا اهداء المسيقار عضو البورد أزهري نورالهدى

والله يا جبرة لكن طلعنا اهل ..
أبو الزهور الله يديهو العافية .. عارف يوم العقد حقي .. كان موجود في السودان .. جيت داخل الخيمة لقيت عمك الماذون خلاص في الزمن الضايع .. كنت عايز اسمعو بقول في شنو .. حاولت اتسحب شوية لي قدام (خمشني) ليك ابو الزهور .. قالي ووين ..؟ أول حاجة (تنقز) معاي هنا دا وبعدين تمشي تشوف شغلتك .. وكانت مزيكا الشرطة شغالة .. وطبعا بالمناسبة دي مزيكــة الشرطة كانت اهداء من جنابو عمر عثمان
يا جبرة .. ازهري وعمر منصور شباب مليانين حنية عجيبة .. ولابد كان من انهم يكونو من ضهر تلكم الرجال .. عليهم الرحمة والمغفرة ..
التوثيق العجيب دا يا جبرة ما بيعرفو ليهو إلا الناس ديل .. والله انا القدامك دا قدرما حاولته .. غلبني عديل كدا
..

Quote: أخوي الكبير سعادة العميد طيار أحمد أنقابو .. لما يلبس البدلة كانت بتولع فيني حريقة

يا انقابو .. يا حافظ اي حاجة..
والله جاتني رسالة من صديق عزيز جدا علي .. تحدث لي فيها عن سعادة العميد طيار أحمد أنقابو وقال انو من اشجع الرجال وتمت احالته للتقاعد وهو في سماء الجنوب .. اثر اختلافـه مع احد (الجماعة) .. وتم ذكره في كتاب فتحي الضو الأخير ..
لو كان بالأمكان تسليط الضوء على الكلام دا .. واستميح جنابو عمر في ذلك .. وشكرا عبركم لصديقي نزار وهو من المتابعين للبورد .. ولهذا البوست على وجه الخصوص ..

Quote: عمك وصى جارنا عقيد جاب لي اورنيك التقديم للكلية الحربية و الموضوع بقى محسوم , ربك رب الخير جاب ليك ود عمي (ظابط) من مناطق العمليات رأسه مفتوح على اثنين و من ما عرف اني مقدم للكلية الحربية وقف ليك لأبوي نار حمراء وقال ليه كفاية انا واحبطه ليك بوضع الجيش في تلك الفترة (الديمقراطية الثالثة) بعدها الله يرحمه اقتنع و اخوك حمد الله جبارتي بقت في فلقة ود عمي تحياتي

ههههههههههههه
تعرف ياجبرة مرات احداث صغيرة ممكن تغير حياة الزول 180 درجة
اها انا الغريبة الشبكني في البوليس ده ودعمي وهو نفضوهو في كشف النظر
هسي بقي مدير كبير في احد البنوك ..............

يا عمك انا ملفي اتقبل عدييييل
الحاج رحمة الله عليه كان صينية العشاء بتكون فيها القرارات الصعبة
عملت حاجاتي كلها وجيت كلمتو
بعد ما شال اللقمة ختاها تاني في الصينية وقال لي كلمتين:
ما تخليني أقول ليك ما عافي منك






هسي من البيطرة قلبناها صحافة

الأخ العزيز عمر عثمان

Quote: قال لي عشان اجي ارمي قنبلة في مدرستنا دي

ربنا يحفظ ليك أولادك ويغطيهم

بس عندي سؤال

إنتو من أصول آيرلندية؟

استمع للمقطع التالي لتعرف سبب السؤال

http://www.youtube.com/watch?v=55-q80maP1A

Quote: بس عندي سؤال إنتو من أصول آيرلندية؟ استمع للمقطع التالي لتعرف سبب السؤال

ههههههههههههههههه
مووبالغة ياحسن ............
طبعاً الجانب الايجابي في الموضوع انو ولدي بفكر زي اولاد الخواجات

بسم الله الرحمن الرحيم

سيد عمر ،
أسعد الله أوقاتك ،،

هل صحبح أن هذه الدنيا تؤخذ غلابا ، وأن المطالب لا تنال بالتمنى ،،

على العموم
لم تكن الشرطة فى حساباتى وقنعت بمقعدى فى كلية التجارة ، الفرع ،
ولا أدرى كيف قادتنى قدماى الى قمنداية بحرى وأنا من قرية مجرد رؤية شرطى فيها نذير شؤم ،،

رغبتى ومازالت هى التدريس ،،
تمنيت أن أصبح استاذ فى أى المراحل ،
قناعتى التى تكبر كل يوم أن هذه المهنة هى منبع السعادة ،،


قرأت أخيراً للمستشارة الألمانية كلاماً فخيماً ،
قالت حينما إحتج المهندسون والأطباء والقضاة على زيادة أجرتها على رواتب المدرسين ، لم تشملهم
قالت لهم ( كيف أساويكم بمن علموكم )

تحياتى
بوست خفيف وعميق ،،

Quote: على العموم لم تكن الشرطة فى حساباتى وقنعت بمقعدى فى كلية التجارة ، الفرع ، ولا أدرى كيف قادتنى قدماى الى قمنداية بحرى وأنا من قرية مجرد رؤية شرطى فيها نذير شؤم ،،

بلاشك كان هذا من حسن حظ الشرطة .........

Quote: رغبتى ومازالت هى التدريس ،، تمنيت أن أصبح استاذ فى أى المراحل ، قناعتى التى تكبر كل يوم أن هذه المهنة هى منبع السعادة ،،

سيادتو النور يوسف ومن قال انك لم تكن استاذ ....
فمن علمنا اذن وغيرنا من ضباط البوليس كيفية فتح البلاغ وكيفية مراجعة مكتب البلاغات وحراسات المنتظرين
وكيف تفتح يومية التحري وتسبر اغوار اى قضية ومن علمنا ان تكون للضابط شخصية وكلمة وموقف ....

سلامي يا جنابو،

كنت أتمنى أن أصبح سائق قطار بخار وأنا في أول رحلة لي بالقطار قبل دخول الإبتدائية..
وكنت معجبا بالأوفرول الأزرق وتحته فانله داخلية ناصعة البياض ..
السفر حول السودان مع الوالد - أمد الله في أيامه - جعل لتلك المهنة مكانة في نفسي..
كنت مغرما بالسيمافور والتابلت..
في طفولتي سمعت في ونسة الأهل بأن نيل أرمسترونج نزل على سطح القمر فتمنيت أن أصبح رائد فضاء..
والحمد لله انتهيت إلى فضاء..



واسطة العقد - أخي وصديقي ورفيقي الشهيد الرائد طيار أكرم الفاتح يوسف (أبو أكرم) أحد شهداء رمضان الميامين.

هذا الرجل الجميل ..

كان جميلا بحق

Quote: سلامي يا جنابو، كنت أتمنى أن أصبح سائق قطار بخار وأنا في أول رحلة لي بالقطار قبل دخول الإبتدائية.. وكنت معجبا بالأوفرول الأزرق وتحته فانله داخلية ناصعة البياض .. السفر حول السودان مع الوالد - أمد الله في أيامه - جعل لتلك المهنة مكانة في نفسي.. كنت مغرما بالسيمافور والتابلت.. في طفولتي سمعت في ونسة الأهل بأن نيل أرمسترونج نزل على سطح القمر فتمنيت أن أصبح رائد فضاء.. والحمد لله انتهيت إلى فضاء..

هلا مولانا ........
جدي لأمي كان ايضاً من رجال السكة حديد وسودن وظيفة احد الانجليز في اطار عملية السودنة
لذلك فينا شيء من عشق السكة حديد ، امي لها الرحمة كانت لاتضع لنا صينية الفطور الا بعد ان
تسمع صفارة السكة حديد في تمام الساعة 9 صباحاً ..........
اما عن الفضاء ونيل ارمسترونج فقد كان يصر جدي له الرحمة بأن ذلك ما هو الا فيلم من افلام الامريكان
قمر شنو الفي زول بطلعو هههههههههههههههه او كما قال الشاعر انت السماء بدت لنا واستعصمت بالبعد عنا

Quote: واسطة العقد - أخي وصديقي ورفيقي الشهيد الرائد طيار أكرم الفاتح يوسف (أبو أكرم) أحد شهداء رمضان الميامين.

الف رحمة ونور عليه وعلي صديقي الشهيد مصطفي عوض خوجلي ........

أن أكون رئيس للبلاد..

-----------------------------

لكني أحببت أن اخترط في مهنتين بشكل متجذَِر متأصِّل في الدواخل

أن أكون ضابط ذو رتبة عالية فريق مثلاً..

أن أكون سفيراً في تركيا مثلا .. كرغبة أولى ..واشنطن أو أي دولة أخرى غير عربية..

عشقت كل ما يتصل بالخارجية والعلاقات الدولية لكنها الأقدار وأحمد الله على ما تم لاحقاً..

Quote: يا عمك انا ملفي اتقبل عدييييل الحاج رحمة الله عليه كان صينية العشاء بتكون فيها القرارات الصعبة عملت حاجاتي كلها وجيت كلمتو بعد ما شال اللقمة ختاها تاني في الصينية وقال لي كلمتين: ما تخليني أقول ليك ما عافي منك

هسي باقليلك ياطارق انا كنت ركبت الطيارة وقالوا كابتن طارق جبريل يحييكم
ما بفك الحزام واقوم جاري ، تقوم تجيك مضيفة سميحة كده تناغمك تقوم تقلب بينا الطيارة هههههههههههه

Quote: هسي باقليلك ياطارق انا كنت ركبت الطيارة وقالوا كابتن طارق جبريل يحييكم ما بفك الحزام واقوم جاري ، تقوم تجيك مضيفة سميحة كده تناغمك تقوم تقلب بينا الطيارة هههههههههههه

كله وارد