تفتيت السودان إلى خمس دول!

طفت على السطح في الآونة الأخيرة نغمة من الحادبين على الوطن والشامتين على المؤتمر الوطني وهؤلاء لا يفرقون بين الحكومة والوطن، طفت نغمة تقسيم السودان لخمس دول، ولو لم تخني قراءتي لأحدى الخرائط للسودان المقسم فهي تبدو كالآتي: دولة في الشمال ودولة في دار فور ودولة في كردفان ودولة في الوسط ودولة في الشرق. وهنالك خارطة صغيرة لخرطوم أحمد. ولم أتبين أن وضع المخرطاطي هذا مديرية النيل الأزرق. من السهل القول تقسيم السودان إلى ست دول وهي ما يماثل المديريات الست التي تركها الإنجليز.
دار فور وكردفان والشمالية وكسلا والخرطوم والنيل الأزرق والتي كانت تضم: ولايات الجزيرة والنيل الأبيض والنيل الأزرق وسنار. وأعتقد أنها قسمة عادلة لينظر كل ناس مديرية في شأنهم. وتكون هنالك علاقات دولية عادية بين هذه الدول الست.
لدينا تجربة تقسيم أوروبا الشرقية. فيوغسلافيا تقسمت إلى صربيا والبوسنة والهرسك ومونتي(.........)و كرواتيا وسلوفينيا ومسادونيا ويادار ما دخلك شر. هؤلاء الخواجات يشبهون بعض وطبعائهم تشبه طبائع بعض ولونهم واحد وشعرهم وسحنتهم ولغتهم كانت واحدة وكل كان محتفظ بلغته وعندما تقسموا تنادى كل بلغته في دولته فلماذا السودان لا؟
فلنكن صريحين مع بعضنا البعض هل هنالك وجه شبه في السحنة والدم واللهجة بين شمال السودان وغربه؟ بين شرق السودان والنيل الأزرق وجبال النوبة؟ هل هنالك تمازج حقيقي بنسبة 100% بين تلك المناطق التي حولها الإستعمار ومن بعده المهدية لدولة تسمى السودان؟ الرابط بين قبائل الغرب الأقصى وحتى الغرب الأدني أقرب إلى تشاد منه إلى شرق السودان. والرابط بين شمال السودان وسكانه أقوي 100 مرة مما يربطهم بالنيل الأزرق ودار فور. وقبائل الشرق أقرب إلى نظائرهم في إريتريا وإثيوبيا من سكان الغرب أو النيل الأزرق. فلماذا لا نجرب أن نكون ست دول يوغسلافية (سودانية) متجاورة متحابة وتتعامل مع بعضها حسب الأعراف الدولية بدلاً من أن نكون دولة واحدة نحترب ونتقاتل بلا مبرر ولا فائدة واضحة لأي من الأطراف؟
سيزول الغبن من الذين يعتقدون أنهم مطهدون من قبل جهة ما. ويتخلص الذين يعتقدون أنهم يجرون ترلة منفسة من تلك الحمولة غير المبررة والكل يعيش في هناء والمساعدة تكون متوفرة لأن صلة الأرحام لن تنقطع. لا يعني هذا طرد أحد من دولة لأخرى، فليبق كل منا في الدولة التي تروق له حتى ولو لم تكن هي دولته الأصل والنفوس كان إطايبت الشبر بشيل إتنين، وكان ما مطايبة القاعد في العنقريب يقول للقاعد في الأرض كدي زح لغادي.
فما هو رأي المنابرة والبورداب في هكذا مقترح حتى نفتك من المشاكل الحالية وما تأت به الأيام التي نعلم أنها حبلى تلد كل عجيب.

كباشي الصافي

(العوج راي والعديل راي)

سلامات ياكباشي ..
كباشي قام سربا ..
كتبت :
( فلنكن صريحين مع بعضنا البعض هل هنالك وجه شبه في السحنة والدم واللهجة بين شمال السودان وغربه؟ بين شرق السودان والنيل الأزرق وجبال النوبة؟ هل هنالك تمازج حقيقي بنسبة 100% بين تلك المناطق التي حولها الإستعمار ومن بعده المهدية لدولة تسمى السودان؟ الرابط بين قبائل الغرب الأقصى وحتى الغرب الأدني أقرب إلى تشاد منه إلى شرق السودان. والرابط بين شمال السودان وسكانه أقوي 100 مرة مما يربطهم بالنيل الأزرق ودار فور. وقبائل الشرق أقرب إلى نظائرهم في إريتريا وإثيوبيا من سكان الغرب أو النيل الأزرق. فلماذا لا نجرب أن نكون ست دول يوغسلافية (سودانية) متجاورة متحابة وتتعامل مع بعضها حسب الأعراف الدولية بدلاً من أن نكون دولة واحدة نحترب ونتقاتل بلا مبرر ولا فائدة واضحة لأي من الأطراف؟ )
مالا اليومين ديل عاضه معاك ؟ ^ _ ^ ..
مع احترامي إن كان ماذكرته هو علة التفتت لست دول فهي علة ضعيفة ولا تحل المعضلة..
ولك أن تنظر ما إن كانت الفوارق التي حصرتها في السحنة والدم واللهجة ..
معدومة تماما في في اطار مديريتك كردفان أوأي مديرية من المديريات الستة.

Quote: تفتيت السودان إلى خمس دول!

أولا بالتبادي ياأخي، الله يكضب ذي الكلام الشين ده،

فهذا رأي ، وذاك أيضاً راي..

اليوم أو غداً آ خوي لا محالة هذا النظام والقائمون عليه سيذهبوا بلا رجعة وسيبقى السودان بحدوده الحالية مع جكة ناس آخرين..
بل أبعد من ذلك يا كباشي، نحن نحلم ولا شك نسعى لعودة المليون ميل ونيف في سودان واحد..

كلام التقسيم ده يا كباشي أخوي، كلام ناس محبطين ويحبطوا في الآخرين..

دحين آ خوي أنعل إبليس وخلينا ذي ده..
الدويم – أمدرمـــان – جدة
أبو جبيهة – الخرطوم – لندن
أبكرشولا – الخرطــوم – زيورخ
سنار – بورتســـــودان – مالبورن
العيد جارالنبي – مدني – كراتشي
أمبده – حاج يوســـف – كلاكلات
وهكذا..............
نزازي نزازي لامن الله يعدلها ويفرجها علينا

تحياتي كباشي..

كلام التقسيم ده يا كباشي أخوي، كلام ناس محبطين ويحبطوا في الآخرين..

الأستاذ الطيب عبد الرحيم خلف الله ... بعد السلام

بالله عليك الما بحبط شنو؟ ناس تنتج وناس تاكل.. ناس عندها طرق تقعد بالسنين وناس طرقها تتم في شهور؟ ناس ما عندهم أمل في الكهرباء وناس بيدخلوا ليهم الكهرباء في ا لمزارع؟

ناس بموتوا سمبلة ولمن تتكلموا يقولوا ليكم عنصريين؟ طيب عنصريين فضوها سيرة وأدوا كل زول حقو ومحل الرهيفة التنقد

كباشي الصافي


(العوج راي والعديل راي)

يا ود المك سلامات وشكراً . العرب قالت: حلاَ بالليد ولا حلاً بالسنون. ولكن يبدو أن حكاية السودان ماشة تتحل بالسنون فقلنا أحسن نحلها بالليد قبل ما تدخل فيها السنون

يا أخي ليه ما تعضي معانا لو نقول للناس أهلنا بموتوا وقفوا الحرب وبعدين نتفاهم يقولوا ليك كلام خارم بارم لا تفهم منه صرفاً ولا عدلاً وكأن الله فرض اسقاط نظام الخرطوم من جبال النوبة

التقارب الجغرافي يقلل من تأثير المعوقات الأخرى التي ذكرت وكذلك التواصل الإجتماعي والفوائد المشتركة بين القاطنين ومتعايشين في مديرية واحدة.

خليها على الله يا ود المك.

كباشي الصافي

(العوج راي والعديل راي)

ول أبا كباشي سلام
التقيت احد أبناء البقارة من الدلنج فقال لي البقاري
أن الأرض. لهم والكراكير حقت النوبة إها زي ده يحلوا
مشكلته كييف

يا مسلمي .. الله يسلمك

دا نحن بنقول عليهو بقاري مطموس.. ولو بحثت تحت تلقى حبوبته نوباوية ... الأرض في جبال النوبة شايلنا ومفضلة .. زراعة ورعي وغابات وبساتين والباقي كثير ما بنقدر عليهو .. لكن بعض الناس فهمهم أعوج كما الراي

معضلة الجهلة نحن قادرين عليها كدي شوفوا حكاية يوغسلافيا دي

كباشي الصافي


(العوج راي والعديل راي)

Quote: دا نحن بنقول عليهو بقاري مطموس.. ولو بحثت تحت تلقى حبوبته نوباوية ... الأرض في جبال النوبة شايلنا ومفضلة .. زراعة ورعي وغابات وبساتين والباقي كثير ما بنقدر عليهو .. لكن بعض الناس فهمهم أعوج كما الراي

ول أبا كباشي سلام تاني
قال واحد من أولادهم بي بندق كلاشنكوف قتل 15 فرد من الجبهة الثورية ودمر عربة وأستولي علي 4 غنائم سلمها للجيش وقال العين مابتعلي علي الحواجب
مشكلة التقسيم ساهل التعايش السلمي كيف مع جنس ده

كباشي سلام
مثال آخر الدول الاسكندنافية
كان يحكمهم ملك واحد هو ملك السويد وكانت المشاكل ما تديك الدرب
كل واحد أخد حقو بقت بلادهم أكتر بلاد العالم أمناً ورفاهية
دايرين شنو تاني؟

.......................................................
بالنسبة للسودان
التقسيم اسبابه في رأيي ما اثنية ولا عرقية
لانو في الاقليم الواحد في اثنيات مختلفة
الأسباب إقتصادية وسياسية

Quote: مثال آخر الدول الاسكندنافية كان يحكمهم ملك واحد هو ملك السويد وكانت المشاكل ما تديك الدرب كل واحد أخد حقو بقت بلادهم أكتر بلاد العالم أمناً ورفاهية دايرين شنو تاني؟

سلام يا أيمن الفاضل

الله يبارك فيك تميت لي الخياطة بالحرير.. ما نكون زي الفايكنق ديل .. طوال وسمحين وبلوند... وعيشة رخية.. ليش نكون نحن السودانيين القندول الشنقل الريكة

كباشي الصافي


(العوج راي والعديل راي)

أستاذ كباشي وضيوفه سلام وتقدير

نادرة هي الدول التي تقوم على عرقية أو إثنية واحدة(لدرجة أني لا أذكر واحدة منها الآن) حتى الإقليم الواحد قد يتكون من عدة قوميات فلذلك الرابط بين مواطنين أي بلد لابد أن يكون عقد إجتماعي بالتراضي يحفظ الحقوق ويحدد الواجبات بالتساوي

نادرة هي الدول التي تقوم على عرقية أو إثنية واحدة(لدرجة أني لا أذكر واحدة منها الآن)
........................................................................
الصومال
ودي أكتر دولة فاشلة
أخير نحن
المسالة ما عرقية

حبيبنا الكباشي

أنا حزين جدا

ولا أستطيع مجرد التفكير في سودان كهذا

الاخ المحترم كباش

شايف توقيع مكتوب عليه (الاعوج راي والعديل رأي)
وموضوعك دا بندرج تحت الراي الاعوج
--------
ارجع بذاكرتك 24 سنة وشوف الناس دي كانت متعايشة بصورة جيدة ومقبولة جدا
تذكر معي مقولة يا مغترب يا تاجر غرب والغرب المقصود ليس السكا ولا واشنطون بل هو غرب السودان
واتذكر جيدا كان لي ابناء عمومة شغالين في الجنوب وبالتحديد في منطقة اسمها انزارا وكانوا يحكوا بما هو جميل عن تلكم المناطق
وايضا تجد ادروب في جنوب كردفان والنيل الازرق
وابناء جبال النوبة في بورتسودان
وابناء الدينكا والنوير وبقية القبائل الجنوبية في كل مدن السودان
-------------
كانت مقومات التعايش متوافرة ولكن بدخول الاسلاميون في السلطة
الحرب كانت موجودة ولكن الحكام كان يتعاطون معها من وجهة نظر سياسية وعسكرية بحتة
ولكن بظهور كتائب الحق والدبابين وسسكران الجنة والقرود التي تحارب والغمامة التي تظل المجاهدين
وارتال الشهداء والحور العين
تيقنوا الجنوبيين ان الجنة تمر عبر اجسادهم ووقفوا لها وتمنوا الانسلاخ وسعوا له مكرهين لان التعايش اصبح صعب في ظل هؤلاء المهوسين
بعد حين ظهرت مشكلة دارفور ابيدت قرى باكملها وهنا ظهرت النزعات القبلية
وكذلك في جنوب كردفان والنيل الازرق
-----------
العامل الاساسي في هذا الغبن والتداعي للانفصال سببه الاساسي هو الاسلاميون
يعني بزوال المسبب تزول الاسباب
ودي في حدى زاتها عاوزة معجزة
----------
كامل الاحترام

سلام اخي كباشي و سلامات لضيوفك
التنوع العرقي و القبلي لا يجب ان يكون مصدراً للضعف و التفتت
بل يجب ان يكون مصدراً للقوة و الوحدة و الثراء، ودونك اقوى دولة في العالم اليوم
المشكلة ليست في اختلاف اعراقنا و سحناتنا، المشكلة تكمن في فشل كل الحكومات
المتعاقبة على حكم السودان خاصة الإنقاذ لأنها كان بيدها ملايين الدولارات من ايرادات
البترول التي وجدت طريقها بسلام لحسابات الخارج، إذ كان من الممكن جداً إحداث نهضة
و تنمية حقيقية في كل اقاليم السودان التي تشكو من الإهمال و التهميش و التخلف، و لو
حدث هذا وحده لكان ازال الغبن من اهل الهامش و نهض بهم و بأقاليمهم و لمحى احساسهم
بالدونية و الإهمال و التخلف و لكان هذا عربوناً دائماً للثقة و الوحدة و الترابط
الفيل واقف بهناك، طعنت الضل يا كباشي اخوي

Quote: الفيل واقف بهناك، طعنت الضل يا كباشي اخوي

يا الصاوي يا ولضمي كان الفيل ما قدر عليا أطعن يين؟

كباشي الصافي


(العوج راي والعديل راي)

يا ود دفع الله علي اليمين كلامك كله صاح .. لكن يبدو أن الحكومة سبب البلاوي دي الناس ما قدرت تزحزحها وعليه فلماذا لا نعمل معها بنظرية: (عجبني ليك يا المرقوت) ههههههه عندها تنحل كل المشاكل دفعة واحدة.

كباشي الصافي


(العوج راي والعديل راي)

تفتيت السودان لخمسة دول
صدقني في الوضع ده مافي احلى من كده
بس يتم سريع وبسلاسة

Quote: ول أبا كباشي سلام التقيت احد أبناء البقارة من الدلنج فقال لي البقاري أن الأرض. لهم والكراكير حقت النوبة إها زي ده يحلوا مشكلته كييف

Quote: ول أبا كباشي سلام تاني قال واحد من أولادهم بي بندق كلاشنكوف قتل 15 فرد من الجبهة الثورية ودمر عربة وأستولي علي 4 غنائم سلمها للجيش وقال العين مابتعلي علي الحواجب مشكلة التقسيم ساهل التعايش السلمي كيف مع جنس ده

محمد المسلمي والصيد في الماء العكر ....
إنت أمرق منها وجبال النوبه دي اصلو ما بتجيها عوجه ....
مدينه الدلنج الماخد منها كلام البقاري دا عندها صفحه في الفيسبوك ...ما مسمنها دلنج البقاره ولا دلنج النوبه ولا دلنج الحوازمه ..مسمنها الدلنج سودان ...
لانو السودان دا كلو فيها ... و أتحاد عام جبال النوبه ما خرج منو حزب النوبه أو حزب كادوقلي ...لكن خرج منه الحزب القومي ....
عارفين ناس حكومتكم عاوزين يعملوها حرب النوبه ضد العرب وإسلام ومسيحيه والكلام الفارغ داك ....لكن ده بعدكم ...
جبال النوبه للجميع وبالله عليكم شيلو ريح القبليه بتاعتكم دي وأمشو بيها مكان تاني ....
عمنا كباشي الصافي - مع الأختلاف الكبير مع معظم مواضيعه - برضو عمنا وجبال النوبه دي حقتو ...
وكان الله أراد وكردفان بقت دوله قائمه بذاتها ، عوجه ما بتجيه وشورتو بتنفع كردفان لي قدام.....
اللهم جنب كردفان الفتن ومثيري القبليه والفتن يا رب

تكرم يا الصادق عوض لكن العقول الزيك وين .. الله حي

كباشي الصافي


(العوج راي والعديل راي)