لماذا يرهن اكثر من ثلاثين مليون فرد أمرهم بشخص واحد عاطفي إنفعالي !!

يا أخوانا والله الكلام ده ما مظبوط ولا يقبله العقل
الزول الفوق ده ربنا ما قسم ليهو من الفهم والعقل والحكمة نصيب كافي .. ومع كل هذا اصبح وبقدرة قادر رئيسا لاكثر من اربعين مليون نسمة سابقا او قرابة الثلاثين مليون نسمة حالياً
لا نستطيع ان نقول شئ في هذا التناقض لان الله يؤتي الملك لمن يشاء وينزعه عن من يشاء (ولله في خلقه شؤون)

خطبة غريبة جداً والله العظيم .. رئيس يعلن عنصريته علنا وعلي الملئ !!
ثم يتبعها باتخاذ قرار في غاية الاهمية .. قرار قد يصعب علي البرلمان ان كانت الدولة الدولة ديمقراطية يصعب حتي علي البرلمان من تمريره بسهولة !!

انها هي طريقة خطب البشير الحماسية التي يتبعها بالرقصة و(الحت)
صاحبنا العنصري بدأ خطبته العنصرية بـ(ديل اهلي) .. وماسك في الحتة دي قوي .. ولافي حولها !!
وأكد من خلال خطبته العنصرية الحماسية معلومة مهمة جداً إنو ما عندهم زول مهمش .. ولا عندهم زول عشوائي وقالها الرئيس بعضمة لسانه!!
هذا معلوم لدينا يا بشة انو اهلك ديل ما مهمشين ولا عشوائيين .. المهمشين والعشوائيين هم اهلنا ديل .. ولذلك يا بشة ترانا نقاتل ونصارع حتي الموت !!

رئيس يخاطب جمهور معين من جماهير وطنه ويقول لهم علنا بانكم انتو ديل اهلي .. ويمتدحهم قائلاً ما فيكم زول مهمش ولا فيكم زول عشوائي .....الخ
هل هذا رئيس دولة ام رئيس قبيلة ؟؟
طيب لو انت اصلا رئيس دولة "يعني رئيس للكل" وفاهم وما عنصري لكان اعتبرت اهل السودان ديل كلهم اهلك وحينها فلا داعي للمجاهرة بها امام فئة معينة .. ولكن نسبة للمرض العنصري الذي يكمن في صدرك ولجهويتك وعصبيتك .. ترددها هناك عند اهلك ولا نسمعها لك في مكان اخر في السودان .. يعني الخطاب يختلف عندما يكون الجمهور جمهور اخر وعندما يكون المكان مكان اخر في السودان!!

ده كلو ما مهم ولا حاجة جديدة بالنسبة لينا .. العنصرية عنك واضحة واتقبضت بيها بالثابتة ولا يهمنا عنصريتك .. ولكن ما يهمنا هو القرارات الهامة التي تتخذها من المنابر بحماسة وعاطفة والتي يتأثر بها الملايين من اهلنا الضعفاء المساكين
ما هو ذنب الثلاثة مليون ديل .. ولماذا نرهن مصيرهم بقرار يتخذه انسان أهبل فقط بمجرد الحماسة والعاطفة والهاشمية ؟؟
يعني بمجرد صيحة وهتافات لناس بسطاء يقوم (تووووش) يتقخذ ليك قرار وقف تصدير النفط من المنبر دون النظر الي عواقبه .. قرار يتأثر بتبعاته اكثر من ثلاثين مليون نسمة !!

والاغرب من الخطبة الغريبة دي هو البطبطة التي تلت القرار العجيب الذي تم اتخاذه من المنبر ده

الان .. السودان يتراجع عن القرار .. والسودان يمحل الجنوب 60 يوما لوقف الدعم للجبهة او سيتم قفل (البلف)






سنعود بعد الدوام انشاء الله للمواصلة

طبعًا ثلاثين مليون يرهنون مصيرهم بخطرفات هذا الخمجان لأنو ود قبايل كلس قلبو حار ودين حجر للدين وراس حربة الفريق القومي وجدّو الرسول ودفع رباعي وله مميزات فردية يعجز الخيال عن وصفها ... ولأننا بدء الخلق كل تراثنا أنصاب طين ... نرجوه أن ينجينا من المغول على ظهور الصافنات ...

(ود الباوقة تعال اشرح لينا "الدود النتر" يعني شنو!)



... المهم ....

Quote: طبعًا ثلاثين مليون يرهنون مصيرهم بخطرفات هذا الخمجان لأنو ود قبايل كلس قلبو حار ودين حجر للدين وراس حربة الفريق القومي وجدّو الرسول ودفع رباعي وله مميزات فردية يعجز الخيال عن وصفها ... ولأننا بدء الخلق كل تراثنا أنصاب طين ... نرجوه أن ينجينا من المغول على ظهور الصافنات ... (ود الباوقة تعال اشرح لينا "الدود النتر" يعني شنو!) ... المهم ....

يا تبارك يا اخوي ميزات يعجز الخيال عنها بتاع شنو (كنت داير اقول ليك بتاع فنيلتك) ..
والله الزول ده ومع احترامنا ليهو كبشر .. بالرغم من انو هو ما بيحترمنا ذاتو في الاصل ولكن من واجبنا الاخلاقي ان نحترمه كبشر.. فوالله يا اخوي الزول ده ربنا ما اداهو ذرة من الفهم .. وبيني بينك اقول ليك الراجل ده وبعقليتو دي والله ما بيستحق من ان يكون رئيس للجنة شعبية بتاعت حي ناهيك عن رئاسة الجمهورية .. (ضحل الفكر .. سريع الانفعال .. كذاب .. حاقد .. وعنصري) .. صفات لا يمكن ان تجتمع ابداً في رئيس اي دولة في العالم ولكن والله هي كلها موفرة عند هذا الرجل !!
يا اخي ده زول غريب التصرفات .. رئيس يشتم مواطنينو ويصف اغتصاب نساء وطنه بالشرف !!
رئيس يعلن عنصريته علنا وسط الملأ ويقول لفئة محددة من شعبه (ياهم ديل اهلي البقيفو معاي في وقت الحارة) .. يعني تفسيرا كده انتو البتقيفو معاي في مقاتلة بقية الشعب !!
رئيس يتخذ قرارات حاسمة من المنابر بمجرد سماع زغروتة او هتافات جماهيرية .. وبعد ساعتين فقط اعضاء الحكومة كلهم يجتهدوا له في ايجاد المبررات والاعذار عبر القنوات التلفزيونية (الريس كان منفعل .. والجو كان جو انفعالي) !!

حاجة مقرفة بجد والله .. وزي ما شايف الزول ده وبخطبو الحماسية العنصرية الغير مسؤولة دي .. قاعد يشحن الناس ويحضر لحرب طائفية ستأتي علي ما تبقي من الاخضر واليابس .. وزي ناسك ود الباوقة ديل يشيلو في هبطرشات بشة الطائفية دي ويحوموا بيها ويساعدوا في نشر الكراهية وهم ما عارفين قاعدين يعملوا في شنو .. عموما بنقول لناس ود الباوقة وشلتو .. واصلوا في عبثكم بزرعكم للفتنة والكراهية وجهزوا انفسكم ليوم حصادها ..

طبعا اذا كان رب البيت للدف ضاربا فشيمة اهل البيت الرقص .. عشان كده ما بنلوم ناس ود الباوقة ديل .. نلتمس لهم العذر!

الغريب في الامر .. ان بشة يتحدث في خطبه الحماسية هذه عن اشياء حساسة جداً قد تعرض امن الوطن كله للخطر .. فمثلا التلميح بالحرب مباشرة من المنابر ولقد فعلها عدة مرات ويفعلها الان .. يعني كونك تتخذ قرار كبير زي ايقاف تصدير البترول من منابر المخاطبة وعلي الهواء مباشرة .. ثم تلغي الاتفاقيات الامنية البينك وبين دولة الجنوب .. حتي دون علم "السلطات التشريعية" خائبة الرجاء هذه .. او حتي دون الاجتماع بمجلس الوزراء .. ثم تلمح بالحرب علناً باعلانك لفتح المعسكرات لباب الجهاد ضد دولة مجاورة .. هذا يعني اعلاناً مباشراً للحرب بالواضح ..
فمثل هذه القرارات الحساسة يا سيدي بشة لا يتخذ علي هذا النهج .. مثل هذا الاسلوب قد يفقدك زمام المبادرة في الحرب ان كنت حقا تنوي خوضها بالفعل .. ويعرض بلدك لهجوم او ضربات استباقية قد يشل قدرتك وافكارك تماماً يا سيدي بشة ..
وقد حدث هذا من قبل عندما كنتم تروجون لاشعال حرب فباغتكم العدو واحتل اهم المناطق وهي هجليج التي تمثل عصب الحياة لديكم .. وقطع عنكم الوريد التاجي .. وشل حركتكم تماماً .. اتذكر ذاك اليوم عندما قلتم حينها ودون ادني خجل بان (العدو باغتنا) لماذا لا تتريث عندما تتخذ قرارات بهذه الاهمية .. قرارات يحدد مصير اكثر من ثلاثين مليون نسمة .. وهل سيظل يخضع هؤلاء الثلاثين ملايين نسمة تحت رحمة مزاجاتك الفردية وخطبك الحماسية العاطفية هذه طول فترة حكمك !!

والمضحك اكثر في الامر هو عندما يحاول الكيزان اخراج بشة من محنته التي يدخل فيها هو بنفسه .. بشة يردم ردم تقيل في خطاباته الحماسية عندما يسمع الزغروتة والهتافات .. ولا يترك شئ من المواضيع الحساسة الا ويعجنها ويخرمجها ويتبعها (بالحت التقيل) ويتخارج البيت ويضرب الجدادة ويدخل الاجواء الرومانسية ويترك ليك الكيزان يفرفروا ويجتهدوا في ايجاد الاعذار والمخارج بصورة قبيحة جداً ..

يجي واحد من امثال ربيع عبدالعاطي يغالط ليك بتاع الجزيرة غلاط للديش .. يقول ليك لا الريس ما قال كده كان بيقول كده وبيقصد كده .. بس انتو وضيق الافق بتاعكم زورتوا كلام سيدي الرئيس .. وهذا الهراء ومش عارف ايه ... والله يغالط ليك البنات غلاط عدييييل كده ما يلقو ليهم طريقة الا ناس الجزيرة يتفكو منو بشكراً شكراً ..

وده ما اظرط من النوعية الاخر البيجي يطلع ليك بشة زاتو مجنون عديييل كده .. اي والله يطلعوهو مجنون عديييل كده .. ويقول لبتاع التلفزيون يا اخي الريس كلامو داك كان كلام حماسي سايت في اجواء حماسية وهسع اتراجع منو .. يا جماعة رئيس يطلعو ليهو اورنيك 8 وبعد ده كلو يكون مواصل في كرسي الرئاسة .. الله غالب

وكما ذكرنا اعلاه بان ناس ود الباوقة المخمومين لم يقصروا في (اللت والعجن)

الريس معروف زول بتاع خرمجة ونطيط ولكن ناس ود الباوقة ينقصهم عامل التريث والحكمة !!
انظروا الي هبطرشات ناس ود الباوقة وجماعتو .. طبعا ديل نفس الناس (البيصرخو الله اكبر) الخطب فيهم البشير ووصفهم بقوله انو (ياهم ديل اهلي) !!

هذا رأي ود الباوقة وبقية الملة سيدي الرئيس يمكنكم فتحه على نظام ( السرسبة ).....

طبعا ناس ود الباوقة ما عارفين إنو الريس اتنازل عن كلامو ده بمجرد نزولو من المنبر !!
وبرضو ما عارفين إنو لو البلف ده اتقفل مصاريفهم هم زاتهم حتقيف .. وبعدها بيكون مافي حل تاني الا يرجعوا للكفيل .. ولكن احتمال يلقي زول تاني شغلوهو في مكانو .. واحتمال برضو يربطوهو تلتاشر ويرجعوه السودان مع ظروف كراهية السعوديين للسودانيين في اليومين ديل .. والله يا ود الباوقة لو البلف ده اتقفل حالتكم حتكون صعبة خلاص

يا ناس اليس فيكم رجل عاقل !!

طبعا تعودنا علي انو الريس عندو كلامين .. واحد هبطرش ما مسؤول ولا معتمد يتخذه في اجواء حماسية وبالهاشمية ..
واخر برضو خارم بارم ما مسؤول ولكنه معتمد يتخذه من مكتبه .. والله حاجة غريبة ..
دي برضو ذكرتني بحكاية خطابو الحماسي الكان وصف فيها اخوانا الجنوبيين بالحشرات وهلمجرا .. والدنيا كلها انتقدته انذاك .. وبعد ما قرر انو يزور الجنوب في الاشهر الفاتت عشان يفتح "البلف" اخوانا الصحفيين الجنوبيين سألوه سؤال محرج خلاص ..
فلقد دار الحوار الصحفي بين بشة واخونا الصحفي كالتالي .. هذا الحوار هو حواراً افتراضياً تصويرا للموقف المحرج!

الصحفي: يا بشة ليه قلت لينا حشرات؟؟
صاحبك بشة حك رأسوا وقال ليهو بكل استحياء (الجماعة ما شرحو ليكم)
الصحفي: الجماعة ياتم ؟
بشة : وزير الاعلام بتاعي ما شرح ليكم؟
الصحفي: لا ما شرح لينا!
بشة: ولا ربيع عبدالعاطي ما غالطكم في اي حاجة!
الصحفي: لا والله ابداً .. بس شايفنو في الجزيرة بغالط عن موضوع حلايب وبقول بتاع مصريين
بشة: والله طبعاً انا كنت في جو حماسي والنسوان زغرتوا وفي جماعة كده بالجمبه اليمين ديل هتفو قلت اديهم حاجة كده بس فكيتها فيكم
الصحفي: لكن كلامك ده ما ما كويس تصف ناس بالحشرات!
بشة: والله معليش يا اخي ما تزعلو .. كلامي الفي التلفزيون ده ما تعتمدوه .. ونحن كلنا حشرات زي بعض والسماح وتاني ما تتكرر

واكيد طبعاً بشة حيزور الجنوب في الستة اشهر القادمة بعدما وقف البلف .. اكيد تاني حيمشي يفتحو .. اي والله مش بشة حيعملها وتشوفوه باعينكم .. بس هسع في المرة دي حيقول ليهم شنو بعدما قال ليهم بترولكم دا اشربوهو واتمسحو بيهو !!

في زول مبدع فيكم يقدر يدور لينا حوار افتراضي بين بشة واخوتنا الصحفيين الجنوبيين في زيارته القادمة لجوبا
ناس الفيس برضو نقبل مشاركاتكم

الغريب والمتجدد في الامر هو اتهام الجنوب للشمال بسرقة البترول للمرة الثانية !!
الكيزان بيقولو في الاعلام خلاص قفلنا البترول .. واخوانا الجنوبيين بيقولو البترول ياهو شغال .. يعني شايفنو ماشي في الميتر !!

يا جماعة .. الكيزان ديل ما بيخافو العيب؟

اخوانا ناس اليوميات ما قصرو


الكيزان الحرامية تاركين "البلف" فاتح وبيكذبوا في الاعلام بانو خلاص هم قافلنه







والتعبان الاساسي من القرارات العشوائية دي هو المواطن المسكين الغلبان .. لا الكيزان الحرامية الذين سرقوا كل اموال الدولة .. اكيد هم وعائلاتهم لا يتأثرون باي تخيير سيطرأ مهما كانت قساوته
يوقفوا البترول حتي الموية بتقطع ..
وقف البترول يعني الفلس حتضرب كل المؤسسات .. وافلاس المؤسسات يعني رفع الدعم من كل الخدمات.
وقف البترول يعني ارتفاع سعر الدولار .. ارتفاع سعر الدولار يعني ارتفاع اسعار السلع ..
وقف البترول يعني شح الوقود .. وشح الوقود يعني انقطاع الكهرباء .. وانقطاع الكهرباء يعني انقطاع الموية ذاتها

الله يجازي الكان السبب

Quote: الغريب والمتجدد في الامر هو اتهام الجنوب للشمال بسرقة البترول للمرة الثانية !! الكيزان بيقولو في الاعلام خلاص قفلنا البترول .. واخوانا الجنوبيين بيقولو البترول ياهو شغال .. يعني شايفنو ماشي في الميتر !! يا جماعة .. الكيزان ديل ما بيخافو العيب؟

هذه سرقة حلال ، بفقه الاخوان الكيزان، يجوز لك ان تسرق غيرالكوز ،وتقرأ قليلا من القرآن لتمحوا ذنوبك
طبعا الاخوان الماسونين الكيزان، شابكننا شريعة والسرقة علي عينك يا تاجر، اموالهم حرام وشبعانين فرحانين بيها

اخوي محمود سلام

لكن ما عصرت على الشعب كتير

لا هو جابو ولا بقدر يشيلوا بالانتخابات يعني**

بعدين الشعب والله جاري ورى لقمة العيش جري

كدى ننتظر الجبهة الثورية والا اي حاجة تخلصنا من الكابوس ده

Quote: اخوي محمود سلام لكن ما عصرت على الشعب كتير لا هو جابو ولا بقدر يشيلوا بالانتخابات يعني** بعدين الشعب والله جاري ورى لقمة العيش جري كدى ننتظر الجبهة الثورية والا اي حاجة تخلصنا من الكابوس ده

مزمل حبابك ..
والله يا اخوي الشعب ديل هم العاصرين علينا عصر ما بعده عصر .. بل جايبين كثافتنا عدييل كده
يا اخي الشعب ده والله أمرو حيرنا زاتو .. نايم ما داير يصحي عشان يقول كفي للزل والاهانة بالرغم من المزلة الكبيرة الازلتهم الكيزان تجار الدين ديل
صحيح كلامك انهم ما ليهم ضلع في مجيئهم ولكن صدقني شيلهم ما صعب والله .. ولقمة العيش دي زاتها بتختفي عدييييل في يوم من الايام بوجود الناس ديل
يا اخي الكيزان عبثو بيهم ومرمطوهم مرمطة ما بعده مرمطة .. وبعد ده كلوا خايفين ما قادرين يقولوا ليهم تلت التلاتة كم .. معقولة!!
بالرغم من توافر كل الاجواء لاندلاع الانتفاضة الشعبية الا انهم رافضين يتحركوا .. يا اخي الثورة تجي الخرطوم وتطلع وما تندلع انتفاضة شعبية .. الثورة تحتل مدن علي بعد 300 كيلو من العاصمة والناس دافنة دقن ما دايرة تقاوم وتنتفض!!
يبقي اذن الشعب ده زاتو يستحق المزلة والمهانة البتواجهم دي .. والا فكيف نفهم ان العرب يقدمون الالاف من الشهداء من اجل التخيير والحرية ونحن نخاف فقط من البمبان والعصاية !
يا اخي الكيزان ديل (جـ بانيين) جبن ما بعده جبن ولو قلت ليهم اف تلقاهم قطعوا البحر .. ولكن للاسف لا يوجد من يبادر لصنع الانتفاضة والكل منتظر ربنا ينزل ليهم ملائكة من السماء عشان ينتفضو ليهم !!

اخوي مزمل .. من لا يحب صعود الجبال يعش ابد الدهر بين الحفر .. والله صحي

ودي

Quote: اكثر من ثلاثين مليون

التلاتين مليون ما راهنين امرهم

الراهنين امرهم ما بتجاوزوا الاف فقط

لكن ده زول بحكم بالجيش وبالبطش .. وبحكم غصبا عننا

هل البشير عميل لدولة تحاول تدمير السودان ؟؟؟
تحياتي
المأجورين ومعدومي الضمير فقط هم من رهنوا امرهم لهذا البشير
محاولة لدعم البوست

يا محمود على
بالله انت مع قفل البلف والله مع تراجع البشير عن التصريح بقفل البلف
لا يعجبكم العجب ولا الصيام فى رجب
ياخى البشير دا يقول والناس التحتو ديل ينفذوا بالطريقه التى تتناسب معهم
واكيد فى اجراءات فنيه وقانونيه البشير لن يتدخل فيها
سلفا هم سلف لمن قال نقفل اظن العمليه دى فنياً اخدت زمن
:
:
:
:
:
مع التحيات لله الزاكيات

Quote: هذه سرقة حلال ، بفقه الاخوان الكيزان، يجوز لك ان تسرق غيرالكوز ،وتقرأ قليلا من القرآن لتمحوا ذنوبك طبعا الاخوان الماسونين الكيزان، شابكننا شريعة والسرقة علي عينك يا تاجر، اموالهم حرام وشبعانين فرحانين بيها

الصديق معتز حسين تحياتي

صدقت يا حبيب .. هؤلاء الكيزان تجار الدين المنافقين عندهم السرقة حلال .. والقتل حلال .. والاغتصاب شرف .. والعنصرية مشروعة .. وحتي السُكر والرذيلة مباحة!!
من صدق هؤلاء الكيزان فقد كفر
انظر الي تصرفاتهم وقارنها بالدين وحينها تعلم موقعهم من الدين الحنيف!
لقد سرقوا وطناً بحاله .. فبنوا القصور الشامخات والفلل .. ودشنوا جميع انواع الشركات والاستثمارات ليس داخل الوطن بل خارجها .. ماليزيا .. دول الخليج .. وحتي في الدول الاوربية
قتلوا من الشعب الغلبان ما لا يقل عن الثلاثمائة الف في دارفور وحدها .. والالاف في كردفان .. ومثلها في الجنوب التي هي تمثل دولة بحد ذاتها اليوم .. ومجازر لا تحصي ولا تعد .. في الشرق والخرطوم نفسها .. الحاق اضراراً جسيمة بحق الشعوب .. المناصير .. ام دوم .. الجزيرة وما زال مسلسل التخريب مستمر
افسدوا العلاقات الاجتماعية بين الشعب بزرعهم للكراهية والقبلية .. كل هذا من اجل اتخاذ سياسة فرق تسد
والفضائح لا تحصي ولا تعد .. فاين الدين من هـؤلاء!!

قصف الله بهم الارض ستين مرة

Quote: التلاتين مليون ما راهنين امرهم الراهنين امرهم ما بتجاوزوا الاف فقط لكن ده زول بحكم بالجيش وبالبطش .. وبحكم غصبا عننا

حبيبنا وضاح لك التحية

صحيح كلامك يا وضاح .. النفعيين الارزقية هم قلائل ولكن لا ننسي بانهم يوظفون كل موارد البلد لتفتيت البلد! حاجة غريبة مش !!
اما اعتمادهم علي قوة الجيش لبطش الشعب فهو دليل واضح علي سوء النظام وجبروته وطغيانه .. كما يجب بالا نخاف من الجيش لان الجيش نفسه من رحم هذا الشعب .. ولذلك يجب بالا يخاف الشعب من الجيش في صنع الانتفاضة للتخلص من المنافقين تجار الدين ديل .. وصدقني لو تململ الشعب نحو اشعال الاتفاضة فسيكون هذا الجيش منضم الي صفوفه بلا شك .. لان مؤسسة الجيش نفسه لم ينجو من عنجهية وغطرست الكيزان ..
اليوم ان سالت نفسك هل المؤسسة العسكرية في افضل حالها؟ حتماً ستجد الاجابة لا ..
الكيزان دمروا كل المؤسسات وليس هناك اي مؤسسة ترغب في استمرار حكمهم الفاسد بعد اليوم .. ولكن للاسف لا يوجد من يستطيع منا من ان يأخذ زمام المبادرة لاشعال الانتفاضة التي ستقذف بهؤلاء الكيزان الي مزبلة التاريخ وباقل مجهود ..
الاحزاب الكلاسيكية للاسف مواقفهم مخزية للغاية .. منهم من اختاروا التهافت وراء المصالح فخانو الجماهير وانصهروا داخل صفوف النظام .. ومنهم من باعوا ذممهم واداروا ظهورهم للجمهور وخزلوه بالمزاوجة مع نظام الجبروت ودعمهم لها .. منظمات المجتمع المدني اُلحِقت بامات طه منذ سنين .. النسيج الاجتماعي شرخ تماما فبات الناس لا يعرفون سوي قبيلتي قبيلتك ..
إذن ما تبقي فهو واقع علي عاتق الشباب وحدهم .. والاعتماد علي الشباب لاشعال الانتفاضة هو الحل الاخير المتبقي الان .. ولذلك نتمني من الشباب بالداخل ان ينظموا صفوفهم ويقوموا بواجبهم الوطني من اجل اسقاط هذا النظام الذي يدمر الوطن ويعيث في الارض فساداً.

مودتي

Quote: يا اخي الشعب ده والله أمرو حيرنا زاتو

الشعب مبسوط من بشة انت هارد فشفاشك مالك؟

Quote: هل البشير عميل لدولة تحاول تدمير السودان ؟؟؟ تحياتي المأجورين ومعدومي الضمير فقط هم من رهنوا امرهم لهذا البشير محاولة لدعم البوست

شكراً لك يا وليد ابا شريف ..

بالفعل لقد دعمت البوست بحضورك وبجلب الرابط المهم .. والي الامام من اجل فضح المنافقين تجار الدين .. تعبنا والله من هؤلاء المنافقين ..
للاسف يا صديق لقد فشلنا من تحقيق الحلم الذي راودنا ومازال يراودنا وهو العيش بكرامة في وطن معافي ومتسامح .. الحلم الذي يراودنا منذ طفولتنا الي الان ونحن في عز شبابنا .. لقد تيقنا الان بان تحقيق هذا الحلم يبدوا شبه مستحيلا من ان نعيشه في حياتنا .. والان بدانا نتخوف ليس علي انفسنا بل علي مستقبل ابنائنا .. لا نود لابنائنا ان يعيشوا هذه الحالة التي نعيشها الان!!
الاحتراب .. الكراهية .. العنصرية .. القتل .. التشريد .. الحرائق .. كل هذه كوابيس عشناه وشهدناه في حياتنا .. لا نود ان تحصل هذه الكوابيس لابنائنا في المستقبل .. ولذلك لزم علينا جميعا فعل اي شئ لتصحيح مسار هذا الوطن حتي نضمن باننا قد هيئنا لابنائنا مناخاً يصلح للعيش الكريم.

ودي

Quote: يا محمود على بالله انت مع قفل البلف والله مع تراجع البشير عن التصريح بقفل البلف لا يعجبكم العجب ولا الصيام فى رجب ياخى البشير دا يقول والناس التحتو ديل ينفذوا بالطريقه التى تتناسب معهم واكيد فى اجراءات فنيه وقانونيه البشير لن يتدخل فيها سلفا هم سلف لمن قال نقفل اظن العمليه دى فنياً اخدت زمن : : : : : مع التحيات لله الزاكيات

الصاحب المشاغب محمد حمزة اهلاً بيك

والله انا لست مع اي من الخيارين الاوردتهم ديل .. ولو عندك خيارات اخري بتكون ما قصرت معاي
ولا اقول ليك .. انا مع ترك البلف يرش دون لولوة او بطبطة .. يعني شنو نقفل البلف فقط بمجرد زغروتة ونرجعو بمناقشات وحوارات مطولة تستنزف البلد اموال ووقت
يا اخي ما ممكن الزول الواحد ده .. هو الريس وهو البرلمان وهو القاضي وهو وزير كل شئ !
ليه اصلو .. قرارات زي دي من المفروض ترد من مجلس الوزراء بموافقة السلطات التشريعية (البرلمان) مع الاحتفاظ بحق قرار الريس الدستوري في كيفية التنفيذ.
يا اخي الزول ده اتجاوز حتي الاجرائات الفنية .. الفنيين الجنوبيين فهمونا انو حتي لو دولة السودان رفضت تصدير البترول عبر اراضيه فيجب ان يكون هناك فترة لا تقل عن الشهرين لاتمام عملية (الشت داون) .. ولكن الريس قال من المنبر وبكل اختصار يا (عوض اقفل)
والله يا عوض اقفل دي ضحكتني جينس ضحك !!

Quote: الشعب مبسوط من بشة انت هارد فشفاشك مالك؟

يا حبيب الكل مالك زعلان .. الزول ده قريبك ولا شنو ؟
يا راجل مالك مصر انك تمرقنا من طورنا!!


المهم .. هل عندك اي دليل يسند زعمك ده .. عشان اعتذر انا واسحب البوست واتوقف عن النقد نهائياً؟

Quote: السودان تستورد مليون برميل شهريا من المواد البترولية لسد حاجياته قال وزير الاستثمار السوداني إن العراق وافق على تزويد السودان بالنفط مع تأجيل سداد مستحقاته، وجاء تصريح المسؤول السوداني عقب زيارة من يومين قام بها لبغداد، ولم يكشف عن كمية النفط التي سيبيعها العراق للسودان. وأضاف مصطفى عثمان إسماعيل أن فريقاً فنياً من وزارة النفط يزور العراق اليوم وغدا لإنهاء تفاصيل الاتفاق. وينتج العراق العضو بمنظمة الدول المصدرة للنفط (أوبك) نحو 3.5 ملايين برميل نفط يومياً. وكان السودان قد فقد أغلب إنتاجه النفطي وما يدره من إيرادات عقب انفصال دولة الجنوب صيف عام 2011. وكان الأمين العام لوزارة النفط عوض عبد الفتاح قال في أبريل/نيسان الماضي إن بلاده تنتج 130 ألف برميل يوميا بعدما كان الإنتاج بحدود 470 ألفا قبل انفصال الجنوب، مشيرا إلى أن الخرطوم تستورد نحو مليون برميل شهرياً من الديزل ومنتجات أخرى لتلبية الاحتياجات

المصدر

سبحان الله .. السودان الذي كان يصدر البترول ويجني من عائداتها الملايين من الدولارات يتسول اليوم من اجل سداد حاجته الاستهلاكية !!

Quote: العراق توافق علي تزويد السودان بالنفط مع تأجيل سداد مستحقاته !!

هل فهمتو حاجة من الجزئية دي يا جماعة!!

يعني الكيزان قفلو بلف بترول الجنوب الهم شريك فيها وماشين يستلفو ويشتروا البترول بالديون من العراق
هذا يعني بانهم قرروا بان يزيدو ويضاعفو الديون علي السودان بالاضافة للديون الخيالية المتراكمة اصلاً !
طبعا هم ما بيهمهم انو الديون دي تتضاعف ولا انشاء الله تصل لارقام فلكية .. كل اليهمهم هو ان يستخدموا كل ما هو ممكن من اجل تثبيت حكمهم الفاسد حتي ان كان ذلك يضر بمستقبل البلد ولا يهمهم ما سيحصل من بعدهم انشاء الله تقوم الحريقة .. يعني استنزاف البلد بالكامل ..
ولو تحدثنا وصرخنا من اجل نجدة الوطن وصفونا بالارتزاق والخيانة .. عليكم بالله قولو لي من هو الخائن لوطنه .. هؤلاء الذين ينهكون كاهل الوطن بالديون الخيالية بعد ان دمروه وعبثوا بثرواته وانسانه ام نحن الذين نصرخ لنجدته !!

يحيرني جداً امر هؤلاء الرجال البلهاء !!
بالامس القريب كانت كل هذه الثروة البترولية الضخمة بأيديهم يفعلون بها ما يشائون .. يصدرونه ويجنون منها الدولارات التي ينفقونه في متعة الحياة والعيش الراقي من بناء للقصور الشامخات والفلل ذات المواصفات المعاصرة وكل ما لذ وطاب في الدنيا .. وفجأة نراهم يتسولون من اجل كمية ضئيلة فقط ليسدون بها حاجتهم المحلية!

ولو لا السياسات الحمقاء والغطرسة وضيق الافق لكان السودان اليوم من ضمن اكبر الدول انتاجاً للبترول وحينها لم نحتاج لهذه العيوب والفضائح (تسول البترول) .. ولكن نسبة للسياسات الهمجية وضيق الافق والعنصرية وعدم قبولهم للاخر فلقد فقد الوطن اكبر ثروة اقتصادية كان سينعم بها جميع الشعب .. عنصريتهم الغبية ونبذهم للاخر جعل اخوتنا الجنوبيين ينفصلون حاملين معهم كل الثروة التي كانت تحت متناول يد جميع اهل السودان .. يا له من امر مؤسف ومؤلم.
هل سالنا انفسنا يوما .. ما زنبنا نحن الذين فقدنا نصيبنا من هذه الثروة التي كانت ملك لنا جميعاً؟
هل شاركنا نحن في اي قرار ادي بموجبه ضياع ثروة السودان الضخمة من البترول التي هي الان ملك لدولة اخري؟؟
حتماً الاجابة لا .. لم نكن طرفاً في فقدان هذه الثروة.

اذن فان امرنا نحن كشعب سوداني هو ليس بيدنا بل انه بيد هذا الجنرال الرقاص الذي يتخذ القرارات بمزاجاته العنصرية الفوضوية ..
انا لم اشارك في اي قرار (استفتاء او ما شابهه) في ضياع ثروة السودان ومثلي هم الملايين من الشعب لم يشاركوا ولم يكونوا راضيين لهذا القرار العبثي الذي افقدنا ثروتنا الطبيعية التي منحنا اياها الله .. فما ذنبنا؟؟
وبنفس النمط ها هو الان يتخذ القرارات الهمجية بقطع العلاقات وقفل البلف (فقط بقولة يا عوض اقفل) ولا احد فينا يوافقه سوي زمرته النفعيين العملاء


لك الله ايها السودان

Quote: المهم .. هل عندك اي دليل يسند زعمك ده .

حيرتك من الشعب دي براها ما دليل هههههههه
مع خالص الاحترام

يا حبيب الكل حبابك

كويس إنك المرة دي شربت القهوة قبل ما ترد ..
يا زول عليك الله كتر من القهوة دي في المستقبل

Quote: حيرتك من الشعب دي براها ما دليل هههههههه

الحيرة موجودة والله ما نكضب
يا اخي ناس دايسين عليهم في رأسهم .. ينقنقو بالصوت الخافض .. السكر غلي .. واللحمة إتعدمت .. والكهرباء قطعت .. والدواء معدوم .. والاسعار ارتفعت وووووو
وما دايرين يضحوا من اجل التغيير .. تضحية شنو يا زول ديل ما دايرين أُضفرهم دي تدخدش !
يا اخي معقولة الناس تخاف من العصاية والبمبان في حين ان الاخرين يواجهون المدافع والطيران وصواريخ الاسكود من اجل التغيير !! والله دي المحيراني

ودي

Quote: طيب لو انت اصلا رئيس دولة "يعني رئيس للكل" وفاهم وما عنصري لكان اعتبرت اهل السودان ديل كلهم اهلك وحينها فلا داعي للمجاهرة بها امام فئة معينة .. ولكن نسبة للمرض العنصري الذي يكمن في صدرك ولجهويتك وعصبيتك .. ترددها هناك عند اهلك ولا نسمعها لك في مكان اخر في السودان .. يعني الخطاب يختلف عندما يكون الجمهور جمهور اخر وعندما يكون المكان مكان اخر في السودان!!

شكراً لمرورك المعبر يا حيدر قاسم

الجزئية التي اقتبستها يا حيدر يكمن فيها بيت القصيد .. وهل تصدق ان قلت لك بانها هي التي دفعتني الي فتح هذا النقاش ..
هذه الجزئية يطرح سؤلاً هاما عن مفهوم الراعي علي الرعية .. كما انها تعيدنا الي نظرة مفهوم الدولة نفسها

Quote: حكومة البشير توافق على تسوية أمبيكي لإنهاء الأزمة مع الجنوب آخر تحديث:الاثنين ,17/06/2013 الخرطوم - عماد حسن: وافقت الحكومة السودانية رسمياً على مقترحات الوساطة الإفريقية للخروج من الوضع الراهن مع دولة جنوب السودان . وأعلنت وزارة الخارجية السودانية موافقتها على المقترحات التي تقدم بها رئيس الآلية الإفريقية رفيعة المستوى تامبو أمبيكي للخروج من التوتر الراهن في العلاقات بين السودان وجنوب السودان . وقال السفير أبوبكر الصديق محمد الأمين الناطق الرسمي باسم وزارة الخارجية إنه تم ابلاغ الآلية الإفريقية بذلك رسمياً، وتضمنت المقترحات تكليف برنامج الاتحاد الإفريقي للحدود بتكوين فريق استشاري لتحديد خط الأساس للمنطقة الأمنية منزوعة السلاح، وأن يشارك في ذلك ممثلون للبعثة المشتركة للمراقبة والتحقق الخاصة بالحدود على أن تبدأ هذه العملية يوم 18 يونيو الجاري وتستمر لمدة ستة أسابيع، ويكون على الطرفين خلال هذه الفترة، عمل كل ما يمكنهما لتنفيذ الاتفاقات الخاصة بالمنطقة الآمنة منزوعة السلاح . كما تضمنت المقترحات تكليف مفوضية الاتحاد الإفريقي ورئيس الإيقاد (رئيس وزراء إثيوبيا) باتخاذ الخطوات اللازمة للتأكد من حقيقة مزاعم الدعم والإيواء من قبل أي طرف للمتمردين المسلحين للطرف الآخر على أن تقدم كل حكومة كافة معلوماتها بتاريخ أقصاه 20 يونيو الجاري على أن تقوم المفوضية باطلاع مجلس السلم والأمن الإفريقي ومجلس الأمن الدولي على النتائج التي توصلت إليها . وطالبت الآلية الإفريقية الدولتين بالعمل سوياً لنبذ وإنهاء التمرد المسلح، كما طالبتهما بتنفيذ الاتفاقية الأمنية الموقعة في سبتمبر2012م بطريقة كاملة ومخلصة خاصة في ما يلي منع دعم وإيواء حركات التمرد من أي من البلدين وعدم التعاون مع أي بلد إفريقي أو غير إفريقي يدعم حركات التمرد والسعي لتغيير أي من الحكومتين في البلدين . وأوضحت وزارة الخارجية أن مقترحات الآلية الإفريقية في خصوص المنطقة منزوعة السلاح من شأنها تأمين انسحاب قوات جنوب السودان من المناطق السودانية التي مازالت تحتلها كما أن المواقيت المحددة في المقترحات تقع في نطاق فترة ال60 يوماً المحددة لوقف مرور بترول جنوب السودان عبر الأراضي السودانية . في السياق، قالت مصادر دبلوماسية، إن الوزارة ليس لديها إخطار رسمي بزيارة نائب رئيس جنوب السودان رياك مشار، ولاعلم لها بهذه الزيارة . لكنها عبرت عن ترحيبها بزيارة نائب الرئيس الجنوب سوداني، مشيرة في الوقت ذاته إلى أن الزيارة لن تكون ذات تأثير في قرار الخرطوم بقفل أنبوب النفط إذا لم تتحرك جوبا باتجاه وقف كافة أنواع الدعم لحركات التمرد التي تقاتل الحكومة في ولايات دارفور والنيل الأزرق وجنوب كردفان . وكان نافع علي نافع، القيادي في حزب البشير أكد قدرة القوات الحكومية على القتال في كافة الجبهات في مواجهة ما اسماه قوى الباطل والتربص الامبريالي والصهيوني . من جهته، أعلن الوزير برئاسة الجمهورية أمين حسن عمر، رفض الحزب الحاكم شروط الجبهة الثورية بإلغاء شرعيته وانشاء حكومة انتقالية تمهد لانتخابات جديدة في البلاد، مشيراً إلى أن الحكومة يمكن أن تفاوض أحزاب المعارضة حول دستور جديد للسودان .

المصدر


يا عوض افتح !!

وهذا موقف يجب الا ننساه ابداً ولا يمكن ان يمر مرور الكرام
عندما يصف رئيس جمهورية إغتصاب المرأة في وطنه بالشرف يكون الامر غير طبيعي !!


ولي عودة لمتابة هذا الخيط

Quote: يا اخي معقولة الناس تخاف من العصاية والبمبان في حين ان الاخرين يواجهون المدافع والطيران وصواريخ الاسكود من اجل التغيير !! والله دي المحيراني

الاخ محمود
افتراض ان الشعب يخاف من البمبان او قل حتي الرصاص
غير صحيح تماما و الدليل قبل ان تسأل عنه اورده لك
اعتصم المناصير لاكثر من شهر امام حكومة الولاية عندما ارادوا ذلك
فتح اهل الجريف صدورهم للرصاص عندما دافعوا عن ارضهم وكذلك الحال لاهل كجبار
ومن قبلهم اقتحم سكان سوبا قسم الشرطة وحدثت معركة راح ضحيتها اكثر من 15 شخص من المواطنين وافراد الشرطة
وعندم يريد الشعب ان يثبت علي موقف ويدافع عن قضية اثبتت التجارب السابقة ان لا شي يخيفه
اذا عليك بالبحث عن سبب اخر لتزيح حيرتك من الشعب او تصل معي لنتيجة ان الشعب لايريد التغير
مع خالص الاحترام

Quote: الاخ محمود افتراض ان الشعب يخاف من البمبان او قل حتي الرصاص غير صحيح تماما و الدليل قبل ان تسأل عنه اورده لك اعتصم المناصير لاكثر من شهر امام حكومة الولاية عندما ارادوا ذلك فتح اهل الجريف صدورهم للرصاص عندما دافعوا عن ارضهم وكذلك الحال لاهل كجبار ومن قبلهم اقتحم سكان سوبا قسم الشرطة وحدثت معركة راح ضحيتها اكثر من 15 شخص من المواطنين وافراد الشرطة وعندم يريد الشعب ان يثبت علي موقف ويدافع عن قضية اثبتت التجارب السابقة ان لا شي يخيفه اذا عليك بالبحث عن سبب اخر لتزيح حيرتك من الشعب او تصل معي لنتيجة ان الشعب لايريد التغير

اهلاً بيك يا حبيبنا حبيب الكل

كلامك صح وكل ما ذكرته يعتبر حقائق الا مسألة عدم ارادة الشعب للتغيير دي
والله يا حبيب الكل الشعب يريد التغيير وهذا لا يحتاج الي تشكيك لكن للاسف كل هذه الاحتجاجات الشعبيبة التي ذكرتها كانت للاسف غير منظمة ولذلك ضاع المجهود في الفاضي بل كان الناتج اسوء لانه تسبب في تعظيم صورة النظام الذين تظاهروا للشعب كانهم اقوياء ومتمكنين من احباط اي عملية احتجاجية .. عملا بالمثل البيقول (الما بيقتلك بقويك) النظام استفاد بشكل كبير من اخطاء المحتجين
الاحتجاجات التي ذكرتها كلها كانت عفوية وغير منظمة ولا مبرمجة .. الجهة الوحيدة التي كانت ستنظم هذه الاحتجاجات لتصل لدرجة الانتفاضة الشعبية هي الاحزاب السياسية ولكن للاسف نسبة لاخفافق الاحزاب ولعبها للادوار المخزية فلقد هبطت كل تلك المجهودات
ولكن لا يمكن ابدأ ان نشكك في ان الشعب يريد التغيير بل يريد اسقاط هذا النظام الفاسد المستبد .. يا اخي معقولة الناس من شدة ما أُذلو وأُفقرو لدرجة جعلتهم يأكلوا في لحوم الكلاب والحمير وتقول الشعب ما داير تغيير .. معقولة !!
دعني اعود لك لاحقا واذكر لك يا حبيب الكل بعض المعوقات التي تقف في طريق الثورة
لي عودة ومواصلة للتحليل عن ما يتعلق بمداخلتك الهامة دي .. هذه جزئية مهمة جداً

وافر الشكر

عزام فرح .. للاسف نحن لا نرد علي اقاويلك يا شيخنا

انت معزور لك الحق في ان تقول ما يحلو لك .. لقد تركنا امرك لله
والي ان تخرج من عبائة العنصرية التي انت فيها تجدنا للاسف مضطرين لتجاهل اقاويلك الخير اخلاقية ولا منضبطة دي

الله يهديك يا اخي

**UP**