أبكرشولا ... الدرويشة... الراكوبة و بالعكس !!

في لحظة يأس ما، قال أمل :
لم يبق من شئٍ يقال
يا أرضُ، هل يلد الرجال ؟!

الذي لا جدال حوله - بالنسبة لي على الأقل - أن الرجال قد وَلِدْو في بلادنا :
فالذي دخل أبكرشولا و قتل الناس ليحررهم من الانقاذ سوداني، و الذي كان و ما زال يقتل الناس لاكثر من عشرين سنة ليظل حاكما سوداني، و الذي لبس ملابس الدرويشة ليسئ للناس من وراء حجاب سوداني، و الذي زور صور القتلى سوداني !!
كل هذا الانحطاط يتم بايدٍ سودانية، بصبر و دأب و عزيمة لا تفتر !
فهل نحن أمة من المنحطين ؟!!
اللهم لا ... و لكن ... طال ليل الظالمين !!!

يتفق الناس و يختلفون في كل شئ : الأراء، الأفكار، الطريق لجنة الخلد ، لون السماء اليوم، لكنهم يتوحدون تحت شئ ما، شئ ما يسمى الوطن، إلا في السودان الشقيق فلا شئ يوحد الناس لا شئ :
ترى، هل اغتالت الانقاذ الوطن فينا، أم أنه ولد ميتا ؟!!

نعم يا امين كل البلدان والشعوب لديها ثوابت وفصل بين الخيانة والعمالة والوطنية الا عندنا فمن اجل اي شئ مهما كان ########ا في مستوي كرسي حكم يجعل صاحبه يسأل يوم القيامة قبل الاخرين يجعلنا نلعن سلسفيل الوطن بل ما اسهل بيعه والاساءة اليه من اجل مغنم مادي او صفحة في دفتر لجؤ

Quote: اغتالت الانقاذ الوطن فينا، أم أنه ولد ميتا ؟!!

لو كان ولد حياٍ لكان قد فرفر
كيفك يامين ـ ذكرتني المنبر ايام شبابو.

بالله يا امين هو في تاني حاجة يستغربوا ليها بعد انه ما تلقي ليك حمام فيه موية والصرف الصحي شغال في البوابة الوحيدة في البلد مطار الخرطوم والناس كلها متسامحة مع الموضوع دة ، ناس بيونيفورم وناس بحجاب وناس بكرفتات ، بالله الكرفته لازمتها شنو في ظروف زى دى ، بعدين يا امين عندك أربعة وعشرين سنه تراجعت فيها كل المعينات البتغرس القيم والأخلاق ، التعليم الأساسي والعالي أيدك والواطة منهم ، الأولاد والبنات قالوا بتحننوا للتخريج ، غياب المودل البيغتدوا بيه الشعب ، زي الوزير العفيف والرئيس الزاهد ورجل الدين الصادق، غياب العم والخال وأولاد الجيران الكبار والاخو الكبير في الشتات والمنافي تاني المافي شنو ما يخلي الانحطاط يكون نتيجة حتمية

سلام يا العوض

Quote: نعم يا امين كل البلدان والشعوب لديها ثوابت وفصل بين الخيانة والعمالة والوطنية الا عندنا فمن اجل اي شئ مهما كان ########ا في مستوي كرسي حكم يجعل صاحبه يسأل يوم القيامة قبل الاخرين يجعلنا نلعن سلسفيل الوطن بل ما اسهل بيعه والاساءة اليه من اجل مغنم مادي او صفحة في دفتر لجؤ

كلامك سليم يا العوض، لكنو من طرف واحد : الحكومة كتلت الناس و شردتهم تبقى هي المسؤلة الأولى عما يحدث !
كتير جدا بتخيل إنو لو الحصل في الجنوب و في دارفور ده لو كان حصل في أمدرمان، هل كانت رؤيتي للاشياء ح تتغير ؟! دائما بقنع نفسي بانو ما كانت ح تتغير، لكني أعلم يقينا اني بغش على روحي !!
يبقى نحن محتاجين نعيد تعريفات الوطنية و العمالة و الخيانة بعداك ننزلها على الواقع و نشوف منو الخائن و الوطني و العميل، و بدون إتفاق على حاجة معينة نستظل بظلها و نتفق عليها كلنا كسودانيين ما عندنا سكة، الحاصل الان إنو هذه البلاد تمشى بخطوات ثابتة نحو الفجيعة و بايدينا جميعا !!

فاضلابي يا حبيبنا، لعلك بخير ياخي

Quote: لو كان ولد حياٍ لكان قد فرفر كيفك يامين ـ ذكرتني المنبر ايام شبابو.

أنا باقي لي إنو الوطن ده ولد حيا و بفرفر لكنو كان عيان و جات الانقاذ أجهزت عليه، يعني بالعربي كده هسي نحن قاعدين بلا وطن !!
بداية حل مشاكل البلد بتبتدئ بذهاب الانقاذ، لكن البفتكر إنو مشاكل البلد دي بتتحل بذهاب الانقاذ يبقى واهم لانو كل أمراض الكيزان بتجري في دماء الشعب السوداني الشقيق بدون إستثناء !!!
محتاجين نعمل على إزالة الانقاذ بيد و باليد التانية نعالج رقبتنا otherwise ح نعيد إنتاج المأساة الحاصلة دي لحدي ما يجي السيد المسيح يستلم الفلم ده .
بالنسبة للمنبر، المنبر زيو و زي الوطن مات زمان، هسي نحن قاعدين نتونس في بيت البكاء !!

ربما لم يوجد أصلاً

تيجا الأصلع، سلام يا رجل و لعلك بخير

Quote: بالله يا امين هو في تاني حاجة يستغربوا ليها بعد انه ما تلقي ليك حمام فيه موية والصرف الصحي شغال في البوابة الوحيدة في البلد مطار الخرطوم والناس كلها متسامحة مع الموضوع دة ، ناس بيونيفورم وناس بحجاب وناس بكرفتات ، بالله الكرفته لازمتها شنو في ظروف زى دى ، بعدين يا امين عندك أربعة وعشرين سنه تراجعت فيها كل المعينات البتغرس القيم والأخلاق ، التعليم الأساسي والعالي أيدك والواطة منهم ، الأولاد والبنات قالوا بتحننوا للتخريج ، غياب المودل البيغتدوا بيه الشعب ، زي الوزير العفيف والرئيس الزاهد ورجل الدين الصادق، غياب العم والخال وأولاد الجيران الكبار والاخو الكبير في الشتات والمنافي تاني المافي شنو ما يخلي الانحطاط يكون نتيجة حتمية

يا زول الجاب الاستغراب منو ؟!
فعل ( السغربة ) ده مزقنا فاتورتو زماااان و قلنا مافي حاجة في السودان الشقيق أو في المنبر ممكن تخلي الزول يستغرب، القصة دي مهمة جدا عشان الزول يقدر يواصل .
يا تيجا ياخي الانقاذ دي عبارة عن التجلي الكامل لفشلنا كشعب، لكن أصل المشكلة مافي الانقاذ، المشكلة فينا نحن :
يبقى كلامك ده كلو - رغم إتفاقي الكامل معاك - ماهو سبب المشكلة لكنو الأعراض حقت المشكلة :
المشكلة - حسب شوفي ليها - اننا كافراد من أحسن خلق الله سلوكا، لكننا كشعب لا نستطيع العمل كجماعة، و مهما إتفقنا على حد أدني سرعان ما نجد طريقة للاختلاف و بالتالي لا ننجز أي شئ، المسألة دي لو ما اتغيرت :القيامة ح تقوم و نحن في سجمنا و رمادنا ده، لانو الأمم بتبنى بالعمل الجماعي ما بشغل الأفراد

يا امين يا حبيبنا الانا متاكد منه انه الحصل ده لو حصل في الخرطوم كنا سنكون في موقف محمد سليمان وعبد المجيد صالح الشافوا اهلهم بموتوا بالرصاص قدام عيونهم ..
لكن بنفس الفهم الناس الهسي بجعر ديل وشابكننا الحرية والديمقراطية حيكونوا زيهم وزي الانقاذ بلا اي زيادة او نقصان ..
ورغم ده كله انا متفق معاك تماما انه الانقاذ هي من تستحق الادانة وتحمل مسئولية ما آل اليه السودان الان وما سيظل مستمرا بعد ذهاب الانقاذ ...
يلا عايزين نشوف طرحك للوطنية كيف وفهمك للموضوع ده شنو ؟

يا سلام يا أمين على الكلام الرايق في أيام عكة أبكرشولا ومعاركا الأسفيرية والدايرة على أرض الواقع
غياب القدوة
تقديم نموذج حاكم بأسم الدين طال لعقدين وزاد ولا يزال يستمر في ابتكار المفسدات
كسبان رهانو بانشغال المواطن بي معايشو
غياب الحاجة الأسمها وطنية
السماسرة يسمسروا
والجوكية يموسروا
ومعارضة بتقدم في نموذج حكم هم في قرارة ذاتهم رافضنوا ناهيك عن المواطن المنتظرنوا يقيف معاهم
أنجح تجارة في السودان حالياً شغل وكالات السفر
ما عارفين بعد شوية الناس ديل حيكموا منو
بوست رايق ورائع شكرا ليك

Quote: ربما لم يوجد أصلاً

أبداً يا هاني، كان موجود لكنو اتولد عيان زي ما قلنا و جات الانقاذ - حيث لا إنقاذ هناك - خلصت المتش زي ما بقولو المصريين !!

Quote: يا امين يا حبيبنا الانا متاكد منه انه الحصل ده لو حصل في الخرطوم كنا سنكون في موقف محمد سليمان وعبد المجيد صالح الشافوا اهلهم بموتوا بالرصاص قدام عيونهم .. لكن بنفس الفهم الناس الهسي بجعر ديل وشابكننا الحرية والديمقراطية حيكونوا زيهم وزي الانقاذ بلا اي زيادة او نقصان .. ورغم ده كله انا متفق معاك تماما انه الانقاذ هي من تستحق الادانة وتحمل مسئولية ما آل اليه السودان الان وما سيظل مستمرا بعد ذهاب الانقاذ ...

عليك نووور يا العوض، كده نحن في نفس الصفحة زي ما بقولو الفرنجة !!
في بوست فيهو فيديو لمالك عقار بحرق في علم السودان و قبل فترة في واحد من الأخوان هنا - ما متذكرو منو تحديدا - حرق العلم somewhere في الشقيقة أمريكا، أول لحظات شوفتي للمناظر دي كان في إستياء شديد جدا، لكن لو ختيت نفسك في محل الناس دي ممكن تلقى ليها مليون عذر!
ما ممكن نقعد تنظر لزول عن الوطن و هو ما شاف منو غير التهميش بل الموت عديل كده !!

Quote: يلا عايزين نشوف طرحك للوطنية كيف وفهمك للموضوع ده شنو ؟

طرحي كالاتي :
البلد دي ما عندها سكة تمشي لقدام - بالاحرى تبعث من جديد - إلا بذهاب الانقاذ، و الانقاذ دي ما بتمشي بالسلاح و إن مشت بالسلاح ما ح يفضل ناس ذاتو خليه وطن، غير كده الناس الشالو السلاح لذهاب الانقاذ ح يبقو انقاذ جديد و قصة اسقط النظم عسكريا ما ح تنتهي أصلا . الناس البتشحذ في الهمم لاسقاط النظام عسكريا يبذلو مجهودهم ده لاسقاطو سلميا و يتفرق دمو بين الناس !!
الناس تجتمع لعمل دستور جديد يتساوى فيه السودانيين كاسنان المشط، تبادل سلمي للسلطة و توزيع عادل للثورة و إنتخابات و تعددية حزبية لا علاقة للجيش بالسياسة أو بالساسة . البلاد تكون دولة قوانين و مؤسسات و يحاسب كل من أجرم في حق هذا الوطن.
الكلام ده رغم إيغالو في الرومانسية لكنو ممكن يتعمل لو خلصت النوايا و لو بالجد لسه الناس عندها رغبة لمواصلة عناء الانتماء لهذا الوطن !!

Quote: الناس البتشحذ في الهمم لاسقاط النظام عسكريا يبذلو مجهودهم ده لاسقاطو سلميا و يتفرق دمو بين الناس !!

يا بروف اريتها لو بالبساطة دي, سلميا دي النظام بقابلها بالعنف و القمع و القاء الجثث في الترع, سلميا دي لو كنا على قلب رجل واحد, قبيل قريت في بوست لمحمد سليمان هدفه برضو اسقاط النظام هاج كيف يجيبوا ليه فيديو لمعارضين واحداث كلهم من الشمال - مثلث حمدي - عدا الخمسطاشر ثانية الأخيرة
للأسف اشعال الحرب اسهل على الجميع واهون من الـخيارات السلمية

Quote: البلد دي ما عندها سكة تمشي لقدام - بالاحرى تبعث من جديد - إلا بذهاب الانقاذ، و الانقاذ دي ما بتمشي بالسلاح و إن مشت بالسلاح ما ح يفضل ناس ذاتو خليه وطن، غير كده الناس الشالو السلاح لذهاب الانقاذ ح يبقو انقاذ جديد و قصة اسقط النظم عسكريا ما ح تنتهي أصلا . الناس البتشحذ في الهمم لاسقاط النظام عسكريا يبذلو مجهودهم ده لاسقاطو سلميا و يتفرق دمو بين الناس !!

يا سلام عليك يا بروف دا الكلام الكُــنتا عايز اقولوا لكن لقيتك فى الموعد
تسلم
:
:
:
:
مع التحيات لله الزاكيات

Quote: أبداً يا هاني، كان موجود لكنو اتولد عيان زي ما قلنا و جات الانقاذ - حيث لا إنقاذ هناك - خلصت المتش زي ما بقولو المصريين !!

ولماذا لم نر له أثراً ولا ورثة ؟

سلام للجميع و عذرا لتاخر الردود .
إتمكنت بنزلة في الحر ده الشغل ما مشيت، كان الله سهل بجي بالمساء لمواصلة الردود .

أخونا تبلدي، سلام يا رجل و لعلك بخير ياخي

Quote: يا سلام يا أمين على الكلام الرايق في أيام عكة أبكرشولا ومعاركا الأسفيرية والدايرة على أرض الواقع غياب القدوة تقديم نموذج حاكم بأسم الدين طال لعقدين وزاد ولا يزال يستمر في ابتكار المفسدات كسبان رهانو بانشغال المواطن بي معايشو غياب الحاجة الأسمها وطنية السماسرة يسمسروا والجوكية يموسروا ومعارضة بتقدم في نموذج حكم هم في قرارة ذاتهم رافضنوا ناهيك عن المواطن المنتظرنوا يقيف معاهم أنجح تجارة في السودان حالياً شغل وكالات السفر ما عارفين بعد شوية الناس ديل حيكموا منو بوست رايق ورائع شكرا ليك

الكيزان يا تبلدي عزفو على نغمة الدين حتى مل الناس سماعها، المسألة كلها عبارة عن بقاء في الحكم بالواضح الما فاضح، يعني لو الناس دي عرفت إنهم لو حكمو بالشريعة اليهودية بقعدو، الصباح بلبسو بدل اليهود و يبرمو شعرهم !!
الناس يئست مش من الحكومة و اصلاحها، الناس يئست من الساسة السودانيين عن بكرة أبيهم لانو ما ممكن يكونو محكموين بالنظام ده و في نفس الوقت بشوفو أكبر حزبين سياسيين في آخر ديمقراطية بدعمو في النظام سرا و علانية و بشوفو الترابي مسيح المعارضة المنتظر و يعلمو أن معظم منتسبي الحركات المسلحة كانو دبابين و بعضهم تقاسم مع نفس هذه الحكومة دماء الشعب السوداني، و يبشرو في الناس بالقتال و الموت لتحرير البلاد من الانقاذ .
المشهد السوداني قبيح ... و اليأس و الاحباط مسيطرين على الناس لدرجة فقدان الرغبة لاسقاط النظام .

البشرى يا مندس سلام ياخي

Quote: يا بروف اريتها لو بالبساطة دي, سلميا دي النظام بقابلها بالعنف و القمع و القاء الجثث في الترع, سلميا دي لو كنا على قلب رجل واحد, قبيل قريت في بوست لمحمد سليمان هدفه برضو اسقاط النظام هاج كيف يجيبوا ليه فيديو لمعارضين واحداث كلهم من الشمال - مثلث حمدي - عدا الخمسطاشر ثانية الأخيرة للأسف اشعال الحرب اسهل على الجميع واهون من الـخيارات السلمي

منو القال إسقاط النظام سلميا بتم ببساطة، بالعكس و تماما زي ما قلت في نهاية كلامك إنو الحل العسكري أسهل الحلول لانو القائمين على أمرو أغلب الأحيان في مأمن من شرور الحرب و بتديهم كروت ضغط لاقتسام السلطة مع النظام لمن المجتمع الدولي يجي بعصايتو يجبر الناس على الاتفاق، و المسالة كلها سلطة في سلطة و بحث عن السلطة حتي و لو مات نص الشعب الفضل !!
بالنسبة لمحمد سليمان و بعض أبناء دارفور في المنبر، فالناس دي عندها قضية و قضية حقيقية لكن التفسير العنصري لكل شئ بيؤدي لضبابية المشهد و بالتالي الوصول لنتائج و مسلمات غير حقيقية بنتج عنو زي كلام محمد سليمان ده.

Quote: سلام للجميع و عذرا لتاخر الردود . إتمكنت بنزلة في الحر ده الشغل ما مشيت، كان الله سهل بجي بالمساء لمواصلة الردود .

متابعه لصيقه
وسلامتك ألف سلامه يا بروف

الأخوان محمد حمزة و عثمان حسن، سلام و تحيات طيبات و شكرا على المتابعة و الأمنيات الطيبة .
--------------

Quote: ولماذا لم نر له أثراً ولا ورثة ؟

يا عم هاني ياخي، دولتنا دي ولدت مريضة و ما لقت مننا رعاية لا حكام لا محكومين و ما يحدث الان هو تراكم أخطاء لا حصر لها من سنة 56 حتى يوم الناس هذا و جات الانقاذ و أجهزت على البلد الأصلا مريض.
و إذا كان الناس بتتكلم عن أخطاء الساسة السودانيين جيلا بعد جيل، مافي زول بتكلم عن اخطائنا نحن كشعب ما عندو مقدرة على العمل الجماعي و لا الاتفاق على حد أدنى من الأهداف و العمل على تحقيقها، و إلا اديني منجز واحد لينا كدولة و كشعب منذ استقلالنا، ياخي في ناس حتى يوم الناس هذا لسه برمو فشلنا على المستعمر رغم إنو مرق من البلد قبل قرابة الستين سنة !!
يبقى نحن - كافراد و كمجموع - ما عملنا حاجة تودي البلد دي لقدام و نجي نعيب البلد كانو الشوارع و الحيطان هي الح تصلح البلد، عشان كده إنت ما شفت و لا ح تشوف آثر ولا ورثة لبلد ليها ستين سنة ماشة لوراء !!