ادبيات الحوار و النقاش على الجميع الدخول لانو الفيكم اتعرفت

ادبيات الحوار
1- لكل مقام مقال

بتلقى كتييرين بيتعاملوا مع الناس بأسلوب واحد بدون مراعاة للفروق العلمية و المعرفية و العمرية
ولانو ما كل الناس و احد فما كل الناس فهمهم و تقبلهم للكلام بنفس الطريقة و بنفس القدر


- 2- تكلم تُعرف


كانت العرب بتحترم الرجل طول ما هو ساكت لانها لا تستطيع ان تعرف قدره و مكانته
وبقولوا تكلم تُعرف فالكلام بيدل على الانسان فهمه,تربيته,ثقافته,بيئته,اخلاقه,مستواه العلمي,مقدراته العقلية,درجة الذكاء
لذا وجب انو الناس تراعي لكلامها الكتيرين مننا ما بنعرف بعض الا عن طريق كتاباتنا و بتتشكل عندنا صورة عن كل عضو
من كلامه و كتاباته ففيها شنو لو كل واحد حسن اسلوبه و خطابه عشان يعكس صورة كويسة عنه للناس و ما تنسوا انو المنبر ده مقروء
من فئة كبيرة من الناس لكن للاسف لو دخلت اي بوست تكاد لا تجده يخلو من استفزاز للاخرين و سب و شتم واتهام للاعراض و كذب
وتزوير و تدليس فمهما كان الطرف التاني سيئ مفروض كلامك معاه يكون في حدود الادب و الاحترام
شوفوا فرعون رغم كل ما اقترفه ربنا سبحانه و تعالى لما ارسل موسى و هارون ليه اوصاهم و قال ليهم
( فَقُولَا لَهُ قَوْلًا لَيِّنًا لَعَلَّهُ يَتَذَكَّرُ أَوْ يَخْشَى ) فهل فينا من هو اسواء من فرعون حتى نخاطبه باسواء ما يكون من الالفاظ و الشتائم
لمجرد انو بيختلف معانا في الرأي؟!

3- تقبل حديث و رأي الطرف الاخر

اهلنا بقولوا العديل رأي و الاعوج برضو رأي لو فهمنا المقولة دي كويس
حانفهم انو من حق اي انسان يقول رأيه صح كان او خطأ و من حقنا نتحاور و نتناقش معاه لايصال وجهة نظرنا بدونا ما نفرض عليه حاجة
لانو من المعروف اذا وقع الاختلاف ارتفع الانكار وفي المنبر من اختلاف الرأي ما يجعلنا لا ننكر على احد رأيه الا في اشياء معينة
فخلونا نتقبل اراء الناس و نطرح اراءنا بدون ما نسيئ لاحد او نجرحه او نتهمه في عقله وفي ذكائه و في قدراته العقلية
فاختلاف الاراء لا يفسد للود قضية

4- الرجوع للحق فضيلة و مراجعة الحق خير من التمادي في الباطل

قال عمر بن الخطاب رضي الله عنه في خطابه لابي موسى الاشعري ( ولا يمنعك قضاء قضيته اليوم و راجعت فيه عقلك و هديت
فيه الى رشدك ان ترجع الى الحق فالحق قديم و مراجعة الحق خير من التمادي في الباطل)
لكن للاسف الفهم ده ما عندنا فالكثيرون تأخذهم العزة بالأثم ولا يعترف و لايعتذر بل يبحث عن مبررات و يرواغ وهو لا يدري
ان الذكي من يعتذر بينما الغبي هو من يبحث عن المبررات
تلقى كتيريين مقتنعين بأنهم على خطاء ولكنهم يرفضوا يعترفوا و يتهربوا وبالتدريج صورتهم بتتشوه واصبحت الصفة دي مميزة للكتيريين من الاعضاء
و قللت احترام الناس ليهم

5- عدم التشتيت الكرة

تلقى الموضوع عن تزوير يجيك واحد يشبك ليك الناس المعارضة ,الرماديين ,السجم,الاخلاق,الناس ماتت,ابوكرشولا اتحررت,وداد طلقوها
ويتناسى الموضوع اصلا هو شنو و بيتحدث عن شنو

6- الابتعاد عن فاحش القول و الانفعال

مع انو ده منبر الكتروني يعني ماف زول شايف او سامع التاني لكن الواحد تلقاه نافخ عضلاته و بيصرخ و يرغي و يزبد
ولا جون سينا ذاتو وعامل فيها هو سيد الشيء و مقطعه ولغته فظة و الفاظه غليظة تخلو من الاحترام ولا اثر للعقل او المنطق فيها
فيها شنو لو الواحد وصل فهمه بلغة محترمة بدون انفعال و رجالة الكترونية لن تعدو قدرها ولن تؤثر الا في صورة صاحبها؟!

7- عدم التعالي على خلق الله

في كتيرين بيتعاملوا بتعالي مع الاعضاء بدون ما يكون عارف هو بتكلم مع منو في حين انو بتلقى كتيرين من الناس البتعالى عليهم ارفع منه قدرا و مكانة و علما و خلقاً
ولكن حب الظهور و الاعجاب بالنفس بيظهر الواحد كالديك العاجبو ريشه وبيرفع في ذيله في حين انو ما عنده حاجة يتكبر عشانها اصلا ولا ليه اثر في حياة الناس

8- التريث قبل اطلاق الاحكام

كتيرين بردوا ليك من العنوان و البجامل بيقرأ السطر الاول و يرد بناء على خلفية مسبقة
فيها شنو لو الواحد بيتفكر في كلامه و يراجعه قبل يضغط ارسال و يجي بعدين ينكر كلامه و يفتش ليه في المبررات او يحذفه و ينكر انو كتبه و يحلف بالله كاذب انو ما كتبه
في حين انو لو قعد مع نفسه دقيقة بس كان جنب نفسه كل المشاكل دي

9- ضبط النفس و عدم الاستسلام للغضب

في النهاية ذي ما قلت ده منبر الكتروني ما بحتاج الواحد يصرخ في صفحاته او يشيل ليه سوط للناس و يجلدهم بلسانه
لانو لو هو على حق و بيعرف يتكلم حايقدر يوصل فهمه من غير اي انفعال او غضب
ولانو البراميل الفارغة اكثر ضجيجا وكلما قلت حجة الانسان ارتفع صوته ليغطي على النقص في حجته و منطقه

شكرا يا محمد
ربنا يعينّا على الالتزام بالنقاط المذكورة

ههههههههههههههههههههه@ محمد صديق!
ياخ إنت جادي ..
دس إز سودانيز أو لايين!!




هسي واحد يجي يقول ليكـ المصدر!
ونقعد في مصدر صحيح ولّ مزور!
واحتمال نعرّج لـ دا محمد صديق ولّ لا؟


وهكذا دوليكـ!



النجيضة: كل واحد يحترم نفسو وكفانا الله شرّ الشتايم!!

Quote: شكرا يا محمد ربنا يعينّا على الالتزام بالنقاط المذكورة

العفو حبيبا محمد البشرى
كلنا محتاجين نراعي لكلامنا و اسلوبنا عشانا نحن في الاول قبل ما يكون عشان بقية الناس
لانو بيعكس شخصياتنا الناس ما بتعرفنا الا من كتاباتنا فعلى الاقل نقدم صورة كويسة عننا
تخلي الناس تحترمنا

Quote: ههههههههههههههههههههه@ محمد صديق! ياخ إنت جادي .. دس إز سودانيز أو لايين!! هسي واحد يجي يقول ليكـ المصدر! ونقعد في مصدر صحيح ولّ مزور! واحتمال نعرّج لـ دا محمد صديق ولّ لا؟ وهكذا دوليكـ! النجيضة: كل واحد يحترم نفسو وكفانا الله شرّ الشتايم!!

حبيبنا ود الصائم لانو ده سودانيز قلنا كده

ما صح الواحد يكون بيكتب في منبر محترم و مقروء و يقدم صورة سيئة عن نفسه ترسخ في اذهان الناس
وذي ما قلت لو الناس حافظت على دائرة الاحترام ما كنا وصلنا للدرك ده

سؤال للجميع لو الواحد ما بقدر يتحكم في نفسه وفي كلامه في منتدى يا ترى كيف حايكون حاله في الطبيعة؟!

اما ناس المصدر و تشتيت الكورة ديل كان ختيناهم ما بتجينا عوجة تاني

العزيز / امحمد ودالصديق مشكور على الكلام السمح هيل الصلح ده

وبيني وبينك لو الناس مسكت فوق بنعمل (اليوتوبيا) بتاعت خليفة سقراط ديك

وبصفتي مواطن سوداني زول خلاء (ساهي وليس ساكت)

بستمتع بتكشف الزيف والهالة المختوتة للبعض هنا
يعني مرات بتكون خاتي الزول ده عالم ودي ماعارفة بتعادل كم بالسوداني
اول لفة خلاف مع اي زول تلقاهو قاعد امفكو

ياخ اشتغلت في الورش وما ادراك ما السوق اربعة سنوات بالتمام والكمال
لم اسمع ماسمعت هنا فدي من بركات التكنولجيا ودليل تأخر شعوب السودان ....

كل (مستنير) عنوان وهادي لجيل كامل فلو كان كل حديثه من اسفل سيكون الناتج القومي والمحلي بتاعو
نسميه حسبنا الله ونعم الوكيل بس

بعدين لاحظت المساككة والمزازاة الحاصلة يعني تكريس وماتسالني من تكريس دي شنو لانها جات ضمن الرصة العامة
للكراهية والعداوة المجانية والبي قروش ...

اخيراً
لست في مقام يوهلني لانصح احد سوى نفسي ولكني كلي عشم انو الناس تخت الكورة واطة
عشان نستمتع بكتابات بشرى الفاضل وسلمى سلامة والروح السمحة للناس الطيبة ديل
ناس ود الصائم وقيقراوي بالقديم فتح الرحمن بالجديد وكل الزملاء القلبهم ابيض
وعشان تجي بمزاج تقعد في بوست ود المشرف اقلاها بتطلع ليك بكلمة جديدة في اللغة شفت كيف
يعني النقة والمحاحاة دي حارمانا من نعم كبيرة والله

(لاكن) المكتولة ما بتسمع الصائحة

الله يلزمنا الصرف


......................

تحياتي


......
شوية تعديل

الجنيد حمد تسلم كتيير يا حبيب قلت كلام كتير كان نفسي اقول
الواحد بفتح المنبر عشان يستفيد و يستمتع و يتعلم
بس من الباب يلقى العجاجة رابطة لدرجة انو المنبر اصبح ذي افلام الكرتون كل واحد راصد للتاني و يتصيد في اخطائه
عشان يجي يحقق بيها انتصار وهمي لاهو بستفيد منو لا القارئ بهمو في شيء

Quote: الانصرافيه و عدم الموضوع فى المنبر العام بقت مبالغ فيها ليس بالمعقول أن يكون منبر كالمنبر العام مفتوح الهجوم والدفاع والسب, الواحد بقى يمل الدخول للمنبر وذلك المستوى الوصل ليه من عدم الموضوعيه

مداخلة قيمة لاخونا جلال يوسف