دكاترة وهم...

سؤال : يعنى شنو الواحد تلقاو قدام اسمو شاحط د/ فلان الفلانى او فى البروفايل د/ علان العلانى لى يعنى هل للموضوع نوع من الفنتظة الماعندها معنى ولا كلمة دكتور دى بتغير الشخصيةمن ارجوز الى انسان محترم ؟؟ ولا انو الموضوع اكتر من (كارير ) شغلانة مثل باقى المهن يعنى المحاسب لى ما بكتب قبل اسمو المحاسب /علان الفرتكانى ولا الشغلة شنو يا اخوانا نرجو الايضاح حتى من دكاترة (النحو)

حكي البروفيسور (الجدجد) عبد الله الطيب عليه رحمة الله في إحدي تجلياته أنه كان مسافراً ذات يوم بالبنطون وأن أحد الأعراب قد دهمته نوبة مرض مفاجئ فقال أحدهم مشيراً إلي البروف : ودوهو للدكتور داك سريع ،
وعاني عبد الله الطيب حتي أفهمهم أنه دكتور في الآداب وليس طبيباً ، ولما يأس الأعراب رمقه أحدهم بأسي وقال له : يعـــني دكتور ســــــــــــــــاكت ؟!! فضحك وقال وهو من هو : أيوة دكتور ساي !! وقال أنه كره بعدها أن يقال له دكتور.
عزيزي أيمن ..تري كم عندنا من .. الدكاترة ساكت؟!!!!

Quote: عزيزي أيمن ..تري كم عندنا من .. الدكاترة ساكت؟!!!!

أصبت في مقتل يعنى ....مرة وانا فى احد السفريات والدنيا ليل توقفنا فى احدى المطارات لتغير الطائرة .. قعد جنبى واحد ومن غير مقدمات سلم وقالى معاك دكتور فلان ...فيها شنو لو قال لى انا فلان الفلانى ذى اى سودانين لحدى ما نلقى زول بنعرفو سوا او منطقة او اى ماخور فى هذا البلد المترامى ..

يا ايمن
طيب انت ما تكتب قدام اسمك م . ايمن خليفة
المشكلة وين ؟
تحياتى يا هندسة .. وبعدين المسألة عادية مافوكا شى !

غايتو يا ايمن حكايتك حكاية مع مامون حميده وزملاء المهنة.
ياخ الناس بيشروا شهادات عشان يطلقوا عليهم القاب زى دى .
فما بالك فى زول استحق اللقب عن جدارة .

عندنا واحد جارنا كان شقال ممرض وهو زول شاطر وبتاع سيجاره .
شدة ما اتقن المهنة بقى لما يجى يدى الزول حقنة بقيف على بعد متر كدة ويجدع ليك الحقنه تركب فى مكانه مزبوط.
بعد مرات لما يكون مزاجو رايق بيقوم يمسك ليك الحقنه زى ضراب البلى ويعمل ليك نظر ويفكها تركب فى مكانه بالملى.
الزول ده بعد شوية بقى فحيص عديل كده.
ناس الحى تقديرا لمجهوداتو وحبو للمهنة سموهو الدكتور.
اها الدكتور كبرت فى دماغو وبقى اى زول ما بيقول ليهو يادكتور بيقاطعو.
واحد جاء سكن جديد فى الحى سأل الجيران انتو الزول ده دكتور فى شنو قال ليهو دكتور سااااى.

بدر الدين الرائع

زمان ايام الكهول ناس بريمة كان الواحد يذيعو فى الرادى انو قبلو فى الطب الحلة كلها تناديو يا دكتور كنوع من التشجيع لمواصلة الدرب الصعب والطويل وكانت كلية الطب احلام كل الطلبة اما الان ممكن 150 جامعة بقروشك مش مجهودك ودى واحدة من الاسباب البتخلى الواحد يقول لى ست الشاى انا دكتور هناى ادينى شاى عليك الله

ده سؤال تعسفي طرحه لا يقود إلى أي نتيجة، و هو بالضبط كما لو سأل أحدهم لماذا يصافح الناس بعضهم عند اللقاء أو لماذا ترفع الدول أعلاما
ترمز إلى سيادتها و لماذا تطول النساء شعورهن غالبا و لماذا يقصرها الرجال و غير ذلك من ملايين الأسئلة البديهية عن أشياء يمارسها الناس
في جميع أنحاء العالم هكذا على سبيل الاعتياد و التوافق الضمني. في كل مكان من هذا العالم ينادي الناس الطبيب باسمه مسبوقا بلقب
دكتور و في كل مكان من هذا العالم يمنح الناس بمحبة من نال درجة الدكتوراه هذا اللقب و يحرصون على منادته به. ثم أن الدكتور عندما يتنازل
طواعية عن حقه التاريخي الذي رسخته الممارسة الاجتماعية عبر القرون لا يكون بالضرورة معبرا عن تواضع أو متنازلا عن مكانة متوهمة و لكنه
في غالب الأمر يكون زاهدا في ما يترتب على هذا اللقب من التزامات أو متهربا من المسؤوليات التي تأتي معه فلا شئ بالمجان كما تعلم.
الخلاصة الحاجة دي عادية جداً و هي مما تعارف عليه الناس في جميع أرجاء العالم مع اختلاف المشارب و الثقافات بحيث يصبح السؤال عنها
داخلا في باب لزوم ما لا يلزم.

يا هندسة ....

اترك العناوين ....... خليك في المضامين ....

وزي دا بيلاقيك في أي ملف .... وكتير جدا زي العيش في القضارف

ولو لم يتقبل غير كلمة دكتور .. ومالو ... نديها ليهو ... ما فرقت

وبس ..

و برضك من حق الدكتور كتابة ( لقبه العلمي قبل اسمه )..

كمان في حالات بالعكس ..

في رحلة بين عدة مطارات ...تعرفت على انسان متواضع يسمع اكثر مما يتكلم ...عرفته بنفسي كما عرفني بنفسه..فلان الفلاني ..فلان الفلاني..
وبينما كنا نجلس في احد المقاهي ..دخل علينا شخص وسلم عليه وناداه بلقب (بروف)..

بعدها عرفت انه بروفسير ومحاضر في احد الجامعات العربية الكبرى...

شفت كيف؟؟

Quote: سؤال : يعنى شنو الواحد تلقاو قدام اسمو شاحط د/ فلان الفلانى او فى البروفايل د/ علان العلانى

الأخ أيمن
لك الود والتحايا الطيبات
فعلاً يكون الأمر ممجوجاً عندما يقول صاحب اللقب دكتور أو أستاذ
أو .. أو .. لأنه يتحدث بالـ "أنا" وهي غير مقبولة .. أما عند المخاطبة
فلا أقول لك أنه ليس فيها شئ .. بل هي ضرورية لمناداة من هو طبيب
بلقب دكتور ومن هو مهندس بلقب باشمهندس .. الخ .. تداخلت في بوست
د. شهاب الفاتح عثمان عن أغنية سيد خليفة بلسان الحبش وخاطبته في
المرة الأولى بالأخ شهاب .. ثم جاء من بعدي من خاطبوه بلقب دكتور ..
حقيقة شعرت بحرج لأنني لم أكن لبقاً في مخاطبته .. كنت أكثر راحة عندما
خاطبته المرة الثانية وأضفت إليه لقب دكتور شهاب .. أعتقد أن هذا مايجب
أن يكون .... ودي وتقديري أيمن ....