Post: #1
Title: يا ضابط السجن
Author: محمد حامد جمعه
Date: 05-29-2013, 10:19 AM
صبر ك لحظه واحده ياضابط السجن الزود بنظرة وارجع انسجن
|
Post: #2
Title: Re: يا ضابط السجن
Author: محمد حامد جمعه
Date: 05-29-2013, 10:23 AM
Parent: #1
الاغنية الاشهر للاستاذ محمد حامد ادم ، الشاعر المعروف وابن شمال كردفان ، كلما اسمعها كنت اتساءل من هو ضابط السجن الذى ترجاه الشاعر ...بنظرة ويرجع ينسجن
|
Post: #3
Title: Re: يا ضابط السجن
Author: محمد حامد جمعه
Date: 05-29-2013, 10:25 AM
Parent: #2
Quote: صبر ك لحظه واحده ياضابط السجن الزود بنظرة وارجع انسجن
خمسه سنين طويله مرت ليله ليله ودمع الشوق الهميله ورى الدمعه الهميله تسرح
شايله حالى وتكتب فى مثيله قصة ورده جفت من فرق الخميله
يشلع نور بسيمه و ده ينير الوجن ما يحلي دوام فريحه وده المافيه ظن بتحكي حنين مغريد ده بلبل ساب عشيشو
وراح ولهان يردد شوق الطير لى ريشو وشوق لي النادي خدو لي البجرح رميشو لجاهلا بعذب صدو ويحظى طيفو
طيب نفسو طيبه حبيب كلو طيبه فرحان بي شبابو ما كامل حسنو هيبه والانظار تهابو دة
لين ني صغير زى الزهرة دابو وبي بلور اصابو بصفح كتابو ما تسمح لي اشوفو اشوفو يا ضابط السجن يا ضابط السجن والله انتظر يخالف والحرمان علم |
|
Post: #4
Title: Re: يا ضابط السجن
Author: عباس محمود
Date: 05-29-2013, 10:39 AM
Parent: #3
التحية والسلام
رحم الله الشاعر عبد الله الكاظم
ولا ده ما الموضوع
|
Post: #5
Title: Re: يا ضابط السجن
Author: محمد حامد جمعه
Date: 05-29-2013, 10:41 AM
Parent: #3
اليوم رايت ضابط السجن ..
|
Post: #6
Title: Re: يا ضابط السجن
Author: محمد حامد جمعه
Date: 05-29-2013, 10:45 AM
Parent: #5
الضابط هو المقدم (م) يحى ساتى المهدى
والذى كان جزء من قصة اغنية ، صدفة ربما ، قدرا ، حظا ربما وكان ذلك فى بدايات السعبينيات والضابط حينها ضابط السجون (يحى ساتى) برتبة الملازم قادما من كلية السجون التى دخلها فى العام 1969 وحط بمدينة الابيض وسجنها الذى ضم مجموعة من المعتقلين السياسيين فى 19 نوفمبر 1971 وتلك الايام
|
Post: #7
Title: Re: يا ضابط السجن
Author: محمد حامد جمعه
Date: 05-29-2013, 10:58 AM
Parent: #6
يقول ساتى انه وبعد حضور بعد المسئولين الامنيين للسجن وذهابهم حضرت للسجن فتاة وطلبت مقابلة السجين - المعتقل - محمد حامد ادم ، فاعتذر لها ساتى بلطف بقوله ان مسئول الامن الذى يمكن ان يسمح بذلك قد ذهب وانه لا يملك صلاحية منحها اذن لمقابلة محمد حامد فانصرفت متاثرة الى حال سبيلها
|
Post: #8
Title: Re: يا ضابط السجن
Author: محمد حامد جمعه
Date: 05-29-2013, 11:03 AM
Parent: #7
بعد ثلاث ايام واثناء مرور الضابط ساتى على المساجين التقى بمحمد حامد الذى عاتبه بالقول انه منع عنه زيارة ما ، وذكره بزيارة الفتاة ، فاوضح له ضابط السجن ببساطة انه لم يمنع الزيارة وسرد له ما دار من اسباب فقال محمد حامد حسنا لا باس ولكن - مخاطبا الضابط - لقد تاثرت يا جنابو بمنع الزيارة واثرت فى نفسى وكتبت قصيدة فى الامر
|
Post: #9
Title: Re: يا ضابط السجن
Author: محمد حامد جمعه
Date: 05-29-2013, 11:08 AM
Parent: #8
يضحك الضابط ساتى وهو يقول انه وبعد اربعة ايام من الحديث مع السجين المعتقل محمد حامد سمع عبدالرحمن عبدالله (ود بارا) يغنى (يا ضابط السجن ) ويقول كيف تسربت القصيدة الى الفنان عبدالرحمن عبدالله لا اعرف !
|
Post: #10
Title: Re: يا ضابط السجن
Author: عباس محمود
Date: 05-29-2013, 11:16 AM
Parent: #9
شكرا ليك
استمتع بهذه الاغنية وحتي كتابة تعليقي الفوق كنت احسبها من تأليف الشاعر المجيد عبد الله الكاظم
|
Post: #11
Title: Re: يا ضابط السجن
Author: امجد محمد الأمين
Date: 05-29-2013, 11:51 AM
Parent: #10
يا جنابو انت لمن تكتب من اجل الكتابة بتبقي ممتع ..
قرط على كدا ..
تحياتي ..
|
Post: #12
Title: Re: يا ضابط السجن
Author: أحمد التجاني ماهل
Date: 05-29-2013, 12:10 PM
Parent: #11
الأخ محمد
كتر خيرك ياخ على تناول موضوع أغنية يا ضابط السجن للشاعر الإذاعي محمد حامد آدم وهو يا محمد من قرية نبق جوار الحمادي صعيد الأبيض وهي مناطق القوز ومتاخمة لجنوب كردفان فله التحية وكذلك مثلها للمرحوم عبدالله الكاظم وناصر بريمة ومحمد عبد الله أبكر ومحد عبد الرحيم الأحدب ومحمد مريخة والتجاني مساعد والمرحوم عثمان خالد وشقيقه الدسوقي خالد والفذ الدكتور الأديب فضيلي جماع ومحمد المكي إبراهيم وجعفر عبد الرحيم والدكتور عبد الله اسماعيل وكل من تغنى لكردفان بأغنية أو حرف. والشكر موصول كذلك لعمالقة اللحن المرحوم أمبراطور الأغنية الكردفانية إبراهيم موسى أبا والمرحوم خليل اسماعيل والأستاذ عبد الله الكردفاني وصديق عباس وعباس عبدو وعباس النيل والدكتور عبد القادر سالم وعبد الرحمن عبد الله وشرحبيل أحمد ومحفوظ عليش ومالك بارا وعاطف أبو جبيهة وإبراهيم عبد السلام وعدلي والرائعة أم بلينة السنوسي والمرحومة حنية أحمد خميس ونميري حسين وشريف الفحيل وعلى أحمد معلا وعبد العزيز حامد التوم الشهير بحركة ومحمد بريمة وكل أبدع وغرد لكردفان خاصة والسودان عامة.
أحمد
|
Post: #13
Title: Re: يا ضابط السجن
Author: محمد حامد جمعه
Date: 05-29-2013, 01:33 PM
Parent: #12
ليت احدكم يكتب عن هذه القامة
|
Post: #14
Title: Re: يا ضابط السجن
Author: عبد اللطيف بكري أحمد
Date: 05-29-2013, 01:39 PM
Parent: #13
Quote: الأخ محمد
كتر خيرك ياخ على تناول موضوع أغنية يا ضابط السجن للشاعر الإذاعي محمد حامد آدم وهو يا محمد من قرية نبق جوار الحمادي صعيد الأبيض وهي مناطق القوز ومتاخمة لجنوب كردفان فله التحية وكذلك مثلها للمرحوم عبد الكاظم وناصر بريمة ومحمد عبد الله أبكر ومحد عبد الرحيم الأحدب ومحمد مريخة والتجاني مساعد والمرحوم عثمان والدسوقي خالد والفذ الدكتور الأديب فضيلي جماع ومحمد المكي إبراهيم وجعفر عبد الرحيم والدكتور عبد الله اسماعيل وكل من تغنى لكردفان بأغنية أو حرف. والشكر موصول كذلك لعمالقة اللحن المرحوم أمبراطور الأغنية الكردفانية إبراهيم موسى أبا والمرحوم خليل اسماعيل والأستاذ عبد الله الكردفاني وصديق عباس وعباس عبدو وعباس النيل والدكتور عبد القادر سالم وعبد الرحمن عبد الله وشرحبيل أحمد ومحفوظ عليش ومالك بارا وعاطف أبو جبيهة وإبراهيم عبد السلام وعدلي والرائعة أم بلينة السنوسي والمرحومة حنية أحمد خميس ونميري حسين وشريف الفحيل وعلى أحمد معلا وعبد العزيز حامد التوم الشهير بحركة ومحمد بريمة وكل أبدع وغرد لكردفان خاصة والسودان عامة.
|
حبيبنا ود التجاني ،، سلام يارايق،،
وين نسيت الباقين ديل :
عبد الفتاح عباس
حيدر
صلاح محمد الحسن
عمر بانقا
(محمود عبد العزيز) بدايته الفعلية كانت هناك
عمر الفحيل
محمد خير وأخوه اسماعيل
عامر (مندلين)
وعييييييييييك
تصدق الأبيض دا دولة براها ،،
محمد حامد جمعة : ركززو لينا على الحياة ، الموت دا كفانا منو بالله
|
Post: #17
Title: Re: يا ضابط السجن
Author: أحمد التجاني ماهل
Date: 05-29-2013, 01:49 PM
Parent: #14
العزيز عبد اللطيف
تسلم يا حبيب وأشكرك على هذه القامات ياخي هنالك أسر بكاملها فنانيين مثلا عيال عمنا الأستاذ الجليل مكي الفحيل (الدكتور أبوبكر أروعهم صوتا والدكتور اسماعيل وعمر وخالد). ياخ كردفان دي كلها ابداع والتراث دا كمان خليه ساكت وإن شاء الله سأفرد بوستا خاصاً للغناء بكردفان ونتمنى من الأخوان الدكتور الأديب فضيلي جماع والدكتور القرشي والسفير فخر الدين كرار والأستاذ عبيد الطيب وكل من يطيب له أن يساهم في ذلك المشاركة.
أحمد
|
Post: #15
Title: Re: يا ضابط السجن
Author: باسط المكي
Date: 05-29-2013, 01:40 PM
Parent: #13
سلاما ت ياخي
انت جميل لماتكتب تكتب صح
انت اكبر من ورجقة وهتيفة مرو من هنا
الناس محتاجة لحاجاتك الرائعة دي غوص
في اعماااقك الجميلة واكتب ياخ
اتمني انت تقرط علي كداااااااااااااااا
تداعي ايها القلم الجميل
واكتب تقبل تحياتي
|
Post: #16
Title: Re: يا ضابط السجن
Author: طلحة عبدالله
Date: 05-29-2013, 01:49 PM
Parent: #13
يا محمد حامد السلام عليك
ياخ الشاعر قال (الزود) واللا (أتزود ) عشان بتفرق ..
وفي السياق عايز أقول ليك إذا كانت كلمات الأغنية رائعة فالزول اللحنا وغناها أروع بالتأكيد
التحية للقامة الغنائية بلبل الغرب الفنان عبد الرحمن عبدالله.
|
Post: #18
Title: Re: يا ضابط السجن
Author: محمد حامد جمعه
Date: 05-29-2013, 01:50 PM
Parent: #16
ازود ( دا حسب السمع والقياس ) طبعا بفرق من الكتابة والله اعلم يا طلحة
|
Post: #19
Title: Re: يا ضابط السجن
Author: محمد حامد جمعه
Date: 06-02-2013, 12:22 PM
Parent: #18
.
|
|