عيونك علّمَن عيني بُكا الخنساء .. أيُرضيكِ؟

Post: #1
Title: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 06:25 PM
Parent: #0

أحمد إبراهيم فلاح ...

كتب قصيدة ( جمر الحُب ) ...

وقال من ضمن ما قال ...

عيونك علمن عيني بكا الخنساء ... أيرضيكِ؟
عيونك فيها مايمنع عيوني من الغزل فيكِ
خدودك فيها مايضاعف هُيام قلبي المصافيكِ

فأتي الكروان ...

وصدح فقال ..

Post: #2
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 06:26 PM
Parent: #1

بُكا الخنساء ...

Post: #3
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 06:28 PM
Parent: #2

و لعمري ...

ما بكا احد كما بكت الخنساء علي أخويها ...

و لعمري لم أجد ما قيل عن ( سحر ) العيون ...

كما قيل في جمر الحب ...

Post: #4
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 06:34 PM
Parent: #3

كتب ود الرضي

عطفكم يا من الموني ...

كالأشعة الاسهم رموني ...

هنا قتلت العيون ود الرضي ...

فبكي و ناح فقال ...

الشجون بالليل نادموني

الانين والنوح علموني

ولكن احمد فلاح ... لم يخفي حاله ...

ووصف حالته البكائية ... و من فرط ( البهدلة ) من سحر العيون ...

قال لسلمي ...( أيرضيكي !!!!)
_____________________________________________
بكاء لم يسبقه بكاء ...

Post: #5
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 06:42 PM
Parent: #4

اما عمنا عبيد عبد الرحمن فقال ...

أخاف من لحظك القاتل
يشوفنى ويمضى تأثيره
تسيبنى وتمشى متاقل

بكاء علي طريقة مختلفة ...

يعني ... تعاين لي ... اتعلق بيك ...

و تهملني ... وبي وراك اتبهدل ... كده بكا عمنا عبيد ...

و خاف من المذلة بعد ما سحرته العيون و أثرته ...

لكن ود فلاح ... تانا جانا عديييل و قال ...

انا التذليل موالينى وانت العز مواليك
جمر الحب محلينى وفن الصيد محليك
حويتى الرقة والعفة بها زادت معاليك
فاصبح كسبك العظمة وكسبى الاشتياق ليك
_____________________________
تاني في شنو ؟

Post: #6
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 06:45 PM
Parent: #5

اعترف بان الاستاذ عبد الله النجيب هو شاعر العيون ...

ولكني اقر بان احمد ابراهيم فلاح ( تخصص ) في البكاء من العيون ...

الا يكفيه ما غناه له ابراهيم الكاشف ...

عيوني وعيونك
اسباب لوعتي
اسباب تشوقي نظرتك
واسباب نفورك نظرتي
_________________________
نعمل شنو في جنس الكلام ده !!!

Post: #7
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 06:48 PM
Parent: #6

عيونك علمن عينى بكى الخنساء ايرضيك؟
عيونك فيها مايمنع عيونى عن الغزل فيك
خدودك فيها ما يضاعف هيام قلبي المصافيك
وقد خطفت مياه بصرى بلمعان در عقيد فيك
فهذا كله حاصل الا يا سلمى يرضيك

انا التذليل موالينى وانت العز مواليك
جمر الحب محلينى وفن الصيد محليك
حويتى الرقة والعفة بها زادت معاليك
فاصبح كسبك العظمة وكسبى الاشتياق ليك

ليتنى كنت مملوك واقف بين يديك
لترعينى وارعاك واتغزل فى خديك
الهى يفنى عزالى ويسكنى فى واديك
الهى يفنى كل واشى على سلوانى يهديك

مهما كنت اهواك واخوض بحر الهيام بيك
وانتظر النداء منك لاتسرع بلبيك
وافعل ما تريديه بأحوالى سانبيك
وانظر فيك هلالين الا وهما حواجبيك

كنت احب اقول وصفك واقول هذى اغانيك
لكن ضاعت امالى وعلى عزت معانيك
اتسمحى مرة نتلاقى لتدنيني وادنيك
وعلى ما نلت من عظمة بروح الحب اهنيك

Post: #8
Title: Re: عيونك علّمَن عيني بُكا الخنساء .. أيُرضيكِ؟
Author: ناذر محمد الخليفة
Date: 05-26-2013, 07:48 PM
Parent: #7

فنان كسلا الرائع الذي لم يسمع به الا أهل كسلا ونواحيها .. الفنان عادل النوش ..!

تغنى بهذه الأغنية واداها أداء عفويا أسطوريا ..

اصر علي أحد أصدقائي على رحلة تمتد لثلاثة أيام لكسلا فقط من اجل أن يسمعني هذا الصوت ..

تركت ما بيدي وذهبت وعندما استمعت له في احدى سواقي كسلا لم أستخسر المشوار ...

شاهد الفيديو :

كنت داير أجيب ليك رابط من الارشيف يا يحي حول الأغنية دي والنقاش الدار حواليها لكن عارفك ما بتحب الحركة دي فأكتفيت بالفيديو بس ..!!
أتمنى أن ينال اعجابكم ..!!

Post: #9
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-26-2013, 08:41 PM
Parent: #8

Quote: كنت داير أجيب ليك رابط من الارشيف يا يحي حول الأغنية دي والنقاش الدار حواليها لكن عارفك ما بتحب الحركة دي فأكتفيت بالفيديو بس ..!!
أتمنى أن ينال اعجابكم ..!!

الجميل ناذر الخليفة ...

ياخي انت ما زلت مُصّر اني ( ما حبيت ) الحركة دي ...

انا فقط ارفض فكرة ( قمع) البوستات ( القديمة ) التي تفتح من ( جديد ) بواسطة اعضاء ( جُدُد ) ...

انا يا يا ناذر دائما و ابدا اصر ان النقاش حول الابداع لا ينتهي بنهاية بوست قديم او ربع مارشف او غيره ...

ناس جديدة ...تضيف اراء جديدة ...

مش كده وبس يا صديقي ...

انت تعلم اني ادير مكتبة الأغنية السودانية
http://www.sudanesesongs.net/index.php

تعرف يا ناذر .... مرارا و تكرارا ... نعتقد انو بالكم الهائل العندنا من المواد ... انه من المستحيل ان ياتينا شي جديد ...

و في كل مرة نخطئ ...!! و يأتينا اعضاء بمواد قديمة جدا لم نوثقها بعد ...

حتي ( بكا الخنساء ) سآتيك بتسجيل نادر جدا ... اتانا من فترة قريبة ...
___________________________________________
سأعود لفنان كسلا و هذا الادء المميز ...

و ياخي والله سعيد بمجيئك هنا ... الإبداع ما بجيب الا اهله ...

Post: #10
Title: Re: عيونك علّمَن عيني بُكا الخنساء .. أيُرضيكِ؟
Author: الجنيد حمد
Date: 05-26-2013, 08:44 PM
Parent: #8

Quote:
انا التذليل موالينى وانت العز مواليك
جمر الحب محلينى وفن الصيد محليك
حويتى الرقة والعفة بها زادت معاليك
فاصبح كسبك العظمة وكسبى الاشتياق ليك

عليك النبي شوف النضمي ده

بتور النفس ويبردوا شح شح

الله يديك العافية يا يحيى قباني

Post: #11
Title: Re: عيونك علّمَن عيني بُكا الخنساء .. أيُرضيكِ؟
Author: خالد علي محجوب المنسي
Date: 05-26-2013, 08:44 PM
Parent: #8

عيونك علمن عيني بكا الخنساء ... أيرضيكِ؟
عيونك فيها مايمنع عيوني من الغزل فيكِ
خدودك فيها مايضاعف هُيام قلبي المصافيكِ

يا سلاااام يا قباني وحديثك الذي يطرب المشاعر وتنداح له طربا
ما ما تخلينا في الواطا دي
وانت عارف جنس النضمي دا بخلي الزول معلق لا هو فوق ولا هو تحت
وعلمن عيني بكاء الخنساء
وتبكي خُناس على صخر
قد رابها الدهر
أن الدهر ضرارُ
والعجب العجاب في ثقافة هولاء العالية ..

عيونك فيها مايمنع عيوني من الغزل فيكِ
قمة العفاف العفيف

خدودك فيها مايضاعف هُيام قلبي المصافيكِ
لو قرأت هذا البيت لو اول مرة ...أبداً لا تتوقع ان تكون الكلمة أن تكون ( قلبي المصافيك )
لذا بها كان جمال تمكن الشاعر وشاعريته العالية
وكان كان الشعر كدا مفروض ما يسمى شعر
وليس كل منظوم شعر

المودة الشديد لك يا رائع

Post: #12
Title: Re: عيونك علّمَن عيني بُكا الخنساء .. أيُرضيكِ؟
Author: محمد المرتضى حامد
Date: 05-26-2013, 09:54 PM
Parent: #11

سلامات يا قباني..
هنالك أغنيات (صنعت) خصيصا لحناجر بعينها..
بادي وبكا الخنساء مثال ناصع ..
عموما الموضوع دا جاييهو بي مهله.

-

البوست دا ما يشوفو ودالقرشي ..

Post: #13
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 01:20 AM
Parent: #12

Quote: عليك النبي شوف النضمي ده

بتور النفس ويبردوا شح شح

الله يديك العافية يا يحيى قباني

الجنيد حمد ...

عمنا أحمد فلاح قال ...

انا التذليل موالينى وانت العز مواليك

كان ممكن يقول

أنا الذُل مواليني ...

لكن هنا ما المقصود ( الذل و الهوان ) ...

اي نعم هو باكي ... و سحر عيونها أسره ... و إنذل و ( انتهي ) ...

و كان ممكن يمشي بيتهم ...!!!

لكن التذليل هنا ... التأكيد علي الإنقياد و الإنصياع التام ...

و كل يوم اعاين ليهن ... ويمنعوني الكلام ... و اتذلل ... و ابكي بُكا الخنساء

دى بيرضي منو ؟؟؟؟
_________________________________________
يعني عمنا أحمد فلاح جاب آخره هنا ...

كلام عجيب خلاص ...!!!

Post: #14
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 01:25 AM

بالله اسمعو التسجيل القديم ده ...

وخصوصا من الدقيقة 2:30 ... ولما الكروان يقول :

الهى يفنى عزالى ويسكنى فى واديك
الهى يفنى كل واشى على سلوانى يهديك

انا لله ...

عشان كده يا ناذر يا جميل ... لا ضير من ( إعادة ) او استرجاع بوستات الابداع ...

Post: #16
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 01:48 AM
Parent: #14

Quote: يا سلاااام يا قباني وحديثك الذي يطرب المشاعر وتنداح له طربا
ما ما تخلينا في الواطا دي
وانت عارف جنس النضمي دا بخلي الزول معلق لا هو فوق ولا هو تحت
وعلمن عيني بكاء الخنساء
وتبكي خُناس على صخر
قد رابها الدهر
أن الدهر ضرارُ
والعجب العجاب في ثقافة هولاء العالية ..

عيونك فيها مايمنع عيوني من الغزل فيكِ
قمة العفاف العفيف

خدودك فيها مايضاعف هُيام قلبي المصافيكِ
لو قرأت هذا البيت لو اول مرة ...أبداً لا تتوقع ان تكون الكلمة أن تكون ( قلبي المصافيك )
لذا بها كان جمال تمكن الشاعر وشاعريته العالية
وكان كان الشعر كدا مفروض ما يسمى شعر
وليس كل منظوم شعر

المودة الشديد لك يا رائع

منسي يا بديع ...

انا في حاجتين اتعلمتهم في الدنيا دي بعد تجارب قاسية ...

وهما ... عدم الاكل بعد الساعة 7 في الليل ...

وعدم سماع بادى محمد الطيب و الدنيا ليل ...

الاتنين بيودرو بي ..!!!
___________________________
شوف عمك فلاح قال شنو ...

خدودك فيها ما يضاعف هيام قلبي المصافيك
وقد خطفت مياه بصرى بلمعان در عقيد فيك
فهذا كله حاصل الا يا سلمى يرضيك

و ملاحظ انو فى اخر القصيدة جا قال ...

اتسمحى مرة نتلاقى لتدنيني وادنيك
وعلى ما نلت من عظمة بروح الحب اهنيك

يعني البكا و التذليل ده كلو ... البكا من الخدود الضاعفت هيامه ...

ووصيف السنون المرصوصة كالبنيان و تلمع دى ( در عقيد فيكي ) ...

والنشفت موية عيونو ... وبهدلته دي ...

كل ده ... والحكاية شوف من بعيد لبعيد ..

و لسة بتذلل ... ودايرها تسمح ( مرة ) واحدة بس يتلاقوا ...!!!
____________________________________________________________________
ده بيرضي منو يا المنسي ...؟؟

Post: #15
Title: Re: عيونك علّمَن عيني بُكا الخنساء .. أيُرضيكِ؟
Author: Elmosley
Date: 05-27-2013, 01:44 AM

Quote: انا التذليل موالينى وانت العز مواليك

كان ممكن يقول

أنا الذُل مواليني

يحى شايف مزاجك عالي اليوم
مع انو استاذنا يقصد الذل هنا ولكنها لغويا تتبع
ذلل
يذلل تذليلا مثل كرم يكرم تكريما

ولكنها اللزوميات وخلط الدارجة مع الفصحي
ويبدو ان البيت سيصاب بالاعوجاج ان قال آنا الذل مواليني
وكان ممكن تكون
انا الذل هو المواليني
على آن تنطق هو دارجة وسريعة بالادغام
ياخي لخبطونا هي آغنيه حلوه
كيفما كانت

Post: #17
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 01:58 AM
Parent: #15

Quote: يحى شايف مزاجك عالي اليوم
مع انو استاذنا يقصد الذل هنا ولكنها لغويا تتبع
ذلل
يذلل تذليلا مثل كرم يكرم تكريما

سلام يا موسيقار ...

انا كنت اقصد استخدامه لكلمة تذليل ...بدلاً عن ذل ...

للتشديد علي انه من شدة الذل صار تذليلا و انصياعا و طاعة ...

يعني استلمتو ...

و الاصل : ذّلّاً .. و ذِلَّة

فهو ذَليلْ

لم اشكك في المعني ... و لكن اعجبني اختيار ( تذليل ) اكثر ...

تحياتي يا حبيب ...

Post: #18
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 02:05 AM
Parent: #17

Quote: سلامات يا قباني..
هنالك أغنيات (صنعت) خصيصا لحناجر بعينها..
بادي وبكا الخنساء مثال ناصع ..
عموما الموضوع دا جاييهو بي مهله.

_
البوست دا ما يشوفو ودالقرشي ..

سعادة المستشار يا صديق ...

مثال لا لبس فيه ...

و انحنا ( مهلتك ) بنريدها ....

وود القرشي برضو بنريدو ...

Post: #19
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 02:13 AM
Parent: #18

مكرر ...

Post: #20
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 02:15 AM
Parent: #18

يا منسي قلت لي والعجب العجاب في ثقافة هولاء العالية ..

سمح عاين الكلام ده :!!..

Quote: وانتظر النداء منك لاتسرع بلبيك
وافعل ما تريديه بأحوالى سانبيك

هنا اتجه الي كلام الدين ... و ربنا و الرسول ... و اقتبس ما اقتبس ...

النداء ... و التلبية ...

وفوق لي ده قال ليها بأحوالي ( سأنبيك ) ...

مفردات معروف وين مصدرها ...!!!

لم تستخدم صدفة ... و لكن ( جلال ) و ( عظمة ) الموقف ... استوجبت استخدامها ...
______________________________________________________
كلام يخوِّف ...!!!

كويس الما منعوها ... او مسحوها !!!

Post: #21
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 03:15 AM
Parent: #20

دى عثمان موسي فتح ليها بوست بكائي منفصل

غايتو انا استلفتها منو ... حتي يستقيم معني ما يقال ( هنا ) عن سحر العيون !!!

بالله بس تتذكر علي الفور و التو ... كلام محمد سعيد دفع الله

من حور العيون احتار غزال الوادي
الخــد كا لزهــور تلــقاه دايـــما نـــادي

ولا شنو ؟

Post: #22
Title: Re: عيونك علّمَن عيني بُكا الخنساء .. أيُرضيكِ؟
Author: عبيد الطيب
Date: 05-27-2013, 04:53 AM
Parent: #21

Quote: كنت احب اقول وصفك واقول هذى اغانيك
لكن ضاعت امالى وعلى عزت معانيك
اتسمحى مرة نتلاقى لتدنيني وادنيك
وعلى ما نلت من عظمة بروح الحب اهنيك

شكرا استاذنا قباني دائما بوستاتك رائعة وقيمة

"ضاعت آمالي وعلي عزّت معانيك.......................!
علي عزّت معانيك دي مذهلة

اها الرائع بادي الإستماع ليهو بالليل بقصر العمير........

محبتي واصل ونحنا جالسين

Post: #23
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 05:34 AM
Parent: #22

Quote: لكن ضاعت امالى وعلى عزت معانيك

استاذنا الجميل عبيد الطيب

انت ملاحظ ... دي الحاله !!!

بعد البُكا ... و ( التوصيف ) ده كلو ...

قال الكلام راح منو ... وغلبو ( الوصف ) ...!!!
_______________________________
شرفتنا بالمرور يا بديع ...

و مواصلين ...

Post: #25
Title: Re: عيونك علّمَن عيني بُكا الخنساء .. أيُرضيكِ؟
Author: ياسر السر
Date: 05-27-2013, 06:04 AM
Parent: #23

استاذنا يحيى قباني هذا ابداع ما بعده ابداع والاغنية تكاد تكون من اجمل الاغاني السودانية وفيها من الشجن والحب ما فيها وفيها من الوصف الجميل ما فيها وكمان عمنا بادي محمد الطيب طيب الله ثراه ما قصر في اداءها بنوع من الغرق الصوفي في معانيها ولحنها الجميل ,,
متعك الله بالصحة والعافية كما امتعتنا جميعا في هذا المنبر العام ..
بس شوية شيوة علينا نحن الجرعات الزائدة دي ما بتقدر نتحملها ,, ونحن في غربة والظروف صعبة وربنا يهون ...

تحياتي : ياسر العيلفون

Post: #24
Title: Re: عيونك علّمَن عيني بُكا الخنساء .. أيُرضيكِ؟
Author: سليمان القرشي
Date: 05-27-2013, 05:56 AM
Parent: #22

اخي قباني اسعد الله صباحك
في هذه الاجواء الخريفية الرائعة ورائحة الدعاش
تلطف وتجمل اجواء الخرطوم القاسية
اتيت ووجدت امطار ودعاش من نوع اخر هنا
كتابات جميلة ورائعة ربنا يديك الصحة والعافية
وتتحفنا كمان وكمان
تسلم

Post: #26
Title: Re: عيونك علّمَن عيني بُكا الخنساء .. أيُرضيكِ؟
Author: محمد أبوالعزائم أبوالريش
Date: 05-27-2013, 06:07 AM
Parent: #24

قباني يا دفعة ...... الله يرضى عليك دنيا وآخرة ياخ.

الأغنية دي بفتش عليها لي سنوات بصوت الكروان بادي.

خليني أرجع البيت بي مزاج، عشان اليوتيوب في المكتب عاملين ليهو (أحرموني ولا تحرموني)

Post: #27
Title: Re: عيونك علّمَن عيني بُكا الخنساء .. أيُرضيكِ؟
Author: ناذر محمد الخليفة
Date: 05-27-2013, 12:22 PM
Parent: #26

سلام يحي ..

Quote: انا فقط ارفض فكرة ( قمع) البوستات ( القديمة ) التي تفتح من ( جديد ) بواسطة اعضاء ( جُدُد ) ...

وانا معاك في كدة .. بل العكس تماما أنا بنادي بي تعدد بوستات الأبداع لانها بتؤدي لي تجميع معلومات وأفكار جديدة .. هسي البوست دا أنا لأول مرة أسمع فيها بادي بيغني الاغنية دي باأورغن (وصراحة ما استلطفتها لأنو الأورغن دا زي القيد بادي ومنعوا من الاندياح زي ما سمعنا في تسجيلات تانية) ..

ودليلي على تعدد البوستات الفنية أنو أنا نفسي كنت معجب بي أغنية (على كيفي) لهمزة سليمان فتحت بيها بوست قبل كم سنة وبعد سنة تقريبا فتحت بوست تاني بي نفس الأغنية وبعد سنة تاني فتحت بوست بالأغنية ..!! وفي كل مرة بخت رابط البوست القديم .. والنتيجة تجمعت عندي مداخلات ومعلومات ثرة عن الأغنية لأنو مرات في ناس بتكون بعيدة عن النيت وما بتشوف البوست الأول ويصدف تشوف التاني وتشارك فيهو ..

عشان كدة أنا دايما بضع روابط في البوستات المكررة من اجل تجميع المعلومات ولإثراء البوست ..

تسلم استاذنا يحي ..

Post: #28
Title: Re: عيونك علّمَن عيني بُكا الخنساء .. أيُرضيكِ؟
Author: امينة عيسى
Date: 05-27-2013, 03:20 PM
Parent: #27

صاحب البوست وضيوفه الكرام تحية طيبة

شكرا لاشراكنا هذا الجمال وهذه المتعة

جمال حد الترف شكرا تانى

Post: #35
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-28-2013, 05:05 AM
Parent: #28

Quote: تسلم استاذنا يحي ..

لك الود يا ناذر يا جميل ...

Quote: صاحب البوست وضيوفه الكرام تحية طيبة

شكرا لاشراكنا هذا الجمال وهذه المتعة

جمال حد الترف شكرا تانى

احترامي ... اختي امينة عيسي ...

سعيد بالمرور ...

Post: #29
Title: Re: عيونك علّمَن عيني بُكا الخنساء .. أيُرضيكِ؟
Author: خالد علي محجوب المنسي
Date: 05-27-2013, 04:01 PM
Parent: #26

Quote: منسي يا بديع ...

انا في حاجتين اتعلمتهم في الدنيا دي بعد تجارب قاسية ...

وهما ... عدم الاكل بعد الساعة 7 في الليل ...

وعدم سماع بادى محمد الطيب و الدنيا ليل ...

الاتنين بيودرو بي ..!!!

بادي أنا أعتبره أحسن من أجاد اداء غناء الحقيبة وهذا رأي خاص ( بحب بادي لدرجة العشق 9 وبادي موسوعة في شعر وأغاني الحقيبة
وأغاني التراث .. جلست مرة وحضرت به حديث حي مباشرة في حضرة الخال هاشم حبيب الله كان مستضيفه في بيته .. وكنا نسرق السمع بحجة أن نجيب الشاي الموية وباقي الضيافة بس نسمع لينا كلمتين
فعلاً معك حق
الأكل بعد السابعة يؤذي البطن والهضم
وسمع بادي بعد في الليل ( وين تاني نوم مع صرخات الإنجذاب الولهي في الغناء .. بعدها ياهو سهر الجداد )

Quote: شوف عمك فلاح قال شنو ...

خدودك فيها ما يضاعف هيام قلبي المصافيك
وقد خطفت مياه بصرى بلمعان در عقيد فيك
فهذا كله حاصل الا يا سلمى يرضيك

و ملاحظ انو فى اخر القصيدة جا قال ...

اتسمحى مرة نتلاقى لتدنيني وادنيك
وعلى ما نلت من عظمة بروح الحب اهنيك

يعني البكا و التذليل ده كلو ... البكا من الخدود الضاعفت هيامه ...

ووصيف السنون المرصوصة كالبنيان و تلمع دى ( در عقيد فيكي ) ...

والنشفت موية عيونو ... وبهدلته دي ...

كل ده ... والحكاية شوف من بعيد لبعيد ..

و لسة بتذلل ... ودايرها تسمح ( مرة ) واحدة بس يتلاقوا ...!!!

في الحب يتنافى الزل
الحبيب يسعى ليرضي الحبيب بكل الطرق ولو كان في التودد زل ونفور من الحبيب
في الحب التذلل مشروع
بل التذلل عزة من أجل أجمل ما يملك او يحب يمتلك ( قلـــب الحبيب )
ومعللتي .. وحبي .. وحناني لها كل المقامات إلا الإنحاء والركوع والسجود والعبادة
وتسمح مرة نتلاقى لتدنيني وأدنيكَّ
وفي القرب حنان وتبادل مشاعر ( أنتقال كهرومغناطسي ) ويا سلاااام وفي وجع وألالم بجور الحبيب لذة
تعرف يا قباني رصة السنون البضاء ومع فرة بسيم يبرق دي بجيب الزول في الواطا رب وما يسمي
ويبقى زي فاقدن مزوزو
يجرجر في التراب
ويودر حِجابو

ولك المودة والحب لهذا الزخم الهائل في الإبداع الذي يزيده اسلوبك جمال

Post: #30
Title: Re: عيونك علّمَن عيني بُكا الخنساء .. أيُرضيكِ؟
Author: Muna Khugali
Date: 05-27-2013, 09:45 PM
Parent: #29

مساء الخير والجمال..

Post: #31
Title: Re: عيونك علّمَن عيني بُكا الخنساء .. أيُرضيكِ؟
Author: محمد عوض السيد
Date: 05-27-2013, 10:09 PM
Parent: #30

..
سلامات عوافي

زي ماقال الموسيقار الموصلي مزاجك عالي اليوم وياريت طوالي عشان تنكت لينا الحاجات الجميلة وتديها شوية من احساسك بيها

والاغنية محببة الي نفسي بصوت بادي محمد الطيب الذي احبه حد الثمالة بحق ..

مع ودي
واحترامي

Post: #32
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 11:01 PM
Parent: #31

Quote: استاذنا يحيى قباني هذا ابداع ما بعده ابداع والاغنية تكاد تكون من اجمل الاغاني السودانية وفيها من الشجن والحب ما فيها وفيها من الوصف الجميل ما فيها وكمان عمنا بادي محمد الطيب طيب الله ثراه ما قصر في اداءها بنوع من الغرق الصوفي في معانيها ولحنها الجميل ,,
متعك الله بالصحة والعافية كما امتعتنا جميعا في هذا المنبر العام ..
بس شوية شيوة علينا نحن الجرعات الزائدة دي ما بتقدر نتحملها ,, ونحن في غربة والظروف صعبة وربنا يهون ...

تحياتي : ياسر العيلفون

ياسر العيلفون يا فنان ...

بُكا الخنساء دي وصفة ( بلدية ) تداوي كل الجروح ...

جرعة واحدة بس ... شافية و كافية ...

تكتر منها ... بيصيبك سقام ...

و بكا الخنساء زاتو ما بيحلك بعد ده !!!
_______________________________
مرورك بلسم يا جميل ...

Post: #33
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-27-2013, 11:40 PM
Parent: #30

Quote: اخي قباني اسعد الله صباحك
في هذه الاجواء الخريفية الرائعة ورائحة الدعاش
تلطف وتجمل اجواء الخرطوم القاسية
اتيت ووجدت امطار ودعاش من نوع اخر هنا
كتابات جميلة ورائعة ربنا يديك الصحة والعافية
وتتحفنا كمان وكمان
تسلم

سليمان يا قرشي ...

قساوة البُعد من الوطن ... ما بيداويها الا دعاش و طيب اعمامنا ديل ...

بادى الله يرحمه ... مدرسة لا قبلها و لا بعدها ...

و بكا الخنساء بيهرب من اداءها فنانين بي ( شنبات ) ...

خوفا من ( آهات ) بادى المافي مثيلها ...
____________________________
لك من الود اقصاه ...

Post: #34
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-28-2013, 05:03 AM
Parent: #33

Quote: قباني يا دفعة ...... الله يرضى عليك دنيا وآخرة ياخ.

الأغنية دي بفتش عليها لي سنوات بصوت الكروان بادي.

خليني أرجع البيت بي مزاج، عشان اليوتيوب في المكتب عاملين ليهو (أحرموني ولا تحرموني)

الله خليك يا صديقي ...

بعاين للابيات دى

كنت احب اقول وصفك واقول هذى اغانيك
لكن ضاعت امالى وعلى عزت معانيك
اتسمحى مرة نتلاقى لتدنيني وادنيك
وعلى ما نلت من عظمة بروح الحب اهنيك

و اتذكر بس كلام صاحبي هاشم لما قال :

هى عيون شنو؟

دى المافى زول شافها وسِلِم

حتى الزمان عِشق الوَصِف

فيهن سَرَح غَلَبُو النَّضِم
____________________________
عمك احمد فلاح ... ما خلي شي يابو العزايم

Post: #36
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-28-2013, 05:10 AM
Parent: #29

Quote: وفي القرب حنان وتبادل مشاعر ( أنتقال كهرومغناطسي ) ويا سلاااام وفي وجع وألالم بجور الحبيب لذة
تعرف يا قباني رصة السنون البضاء ومع فرة بسيم يبرق دي بجيب الزول في الواطا رب وما يسمي
ويبقى زي فاقدن مزوزو
يجرجر في التراب
ويودر حِجابو

ولك المودة والحب لهذا الزخم الهائل في الإبداع الذي يزيده اسلوبك جمال

روعة يا منسي ...

لك مني كل الود و الإعزاز لهذا الجمال الدافق ...
____________________________________
تخريمة : خالك ( هاشم حبيب الله ) ده انا عندي ليهو غنا لا ليهو اول لا ليهو آخر ...

شي براهو ... وشي مع عبدالرحيم سلمان ... وشي مع تلودي و شي مع حمد الريح ...

كلام كبيييير يا منسي ...

Post: #37
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-28-2013, 05:12 AM
Parent: #36

Quote: مساء الخير والجمال..

بت خوجلي ...

وينك يا أعز الناس ...

Post: #38
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-28-2013, 05:28 AM
Parent: #37

Quote: ي ماقال الموسيقار الموصلي مزاجك عالي اليوم وياريت طوالي عشان تنكت لينا الحاجات الجميلة وتديها شوية من احساسك بيها

مولانا ...

ما كتيرين بعرفوا الحالة دي

الحاله القال فيها :

ليتنى كنت مملوك واقف بين يديك
لترعينى وارعاك واتغزل فى خديك

تعرف يا محمد ... لي زمن بقيف في البيتين ديل

قلت عمنا فلاح ده ... ليه قرر انو يكون ( مملوك ) ؟

المملوك في التاريخ هو من تم شراؤه بالمال ... ليصبح ملك خاص ... و خادم مطيع ...

وهنا هو قصد انو يكون ملكها الخاص ( تعمل فيهو الدايراهو )

و ايضا و تاريخيا معروف انو المماليك فرسان ... لو نسبنا مملوك للماليك في التاريخ ايام الدولة العباسية و الايوبية ...

لذلك قال ليها :

لترعيني ( ما هو من ضِمن الرعية ) ... و أرعاكِ ...( لأنو فارس ... و خادم مطيع ) ...

ولانو من ( خُدّامها ) ..اذا فهو قريب ( فعلياً ) بالمعني التقريري ...

و سيجد الفرصة ليتغزل في الخدود القبيييل قال فيها

خدودك فيها ما يضاعف هيام قلبي المصافيكِ

يعني ... كلام ما صدفة ... ولا ( لوي قوافي بالعافية ) ليصبح شعراً ...

Post: #39
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-28-2013, 05:32 AM
Parent: #38

Quote: ياخي طلب لو تتحفنا بي خيط عن خضر بشير واغنياته.. اكون ممنون و من الشاكرين

عُلِم و ينفذ يا جميل ...

وحياتك نبداهو من زمن كان ( الفنان ذو اللحية ) ...

Post: #40
Title: Re: عيونك علّمَن عيني بُكا الخنساء .. أيُرضيكِ؟
Author: محمد أبوالعزائم أبوالريش
Date: 05-28-2013, 09:28 AM
Parent: #39

جيتك تاني ...
سمعت التسجيلات .... بس التسجيل (أبو أورغن) ده برجّعو ليك وخلّي عندي القديم.

عارف يا قبّاني .. الأغنية دي مرتبطة عندي بذكريات.
تحديداً ... ذكريات مع الوالدة (رحمة الله عليها) ... كانت تندمج في أغنيات بادي ... أما عند بكاء الخنساء ... فكانت تغمض عينيها ويتأرجح رأسها ذات اليمين وذات اليسار عندما يصدح بادي بتلك الآهات بالتطريب العالي.

رحم الله الوالدة .. ورحم بادي

أما إنت ....... الله يديك الفي مرادك ياخ.

Post: #41
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-28-2013, 03:04 PM
Parent: #40

Quote: جيتك تاني ...
سمعت التسجيلات .... بس التسجيل (أبو أورغن) ده برجّعو ليك وخلّي عندي القديم.

عارف يا قبّاني .. الأغنية دي مرتبطة عندي بذكريات.
تحديداً ... ذكريات مع الوالدة (رحمة الله عليها) ... كانت تندمج في أغنيات بادي ... أما عند بكاء الخنساء ... فكانت تغمض عينيها ويتأرجح رأسها ذات اليمين وذات اليسار عندما يصدح بادي بتلك الآهات بالتطريب العالي.

رحم الله الوالدة .. ورحم بادي

أما إنت ....... الله يديك الفي مرادك ياخ.

ابو الريش ...
رحم الله الوالدة رحمة واسعة ...

كانو محظوظين انهم عاشو في زمن ما بيسمعوا الا المَغْنَي ( النضيف ) ...

اما تسجيل الاورغن ... فتمسكي بيهو نابع من حاجتين

الاولي ... تسجيلات جديدة و نضيفة جدا ...

والتانية الاهم ... بتجذب شياب اليومين ديل

ابواللمين مش قال في مقابلة مع الطيب عبد الماجد لما كانو هو وردي رحمه الله سوا

وكانو بيتكلموا عن لجنة اعتماد الاصوات في الاذاعة ( زمان ) ... وكيف كانت الحكاية صعبة ...

فقال اما الان ...فاي واحد عنده صاحبه بيعزف اورغ ... رسل لي اخوهو او قريبوا

جاب اورغن من السعودية ... ( ودوّرُوا ) ...!!!

اها غُنا الاورغ حق بادي ده بنحاول نتصيد بيهو الشباب ... عسي و لعلّ ...

Post: #42
Title: Re: عيونك علّمَن عيني بُكا الخنساء .. أيُرضيكِ؟
Author: خالد علي محجوب المنسي
Date: 05-28-2013, 03:40 PM
Parent: #41

Quote: يا منسي قلت لي والعجب العجاب في ثقافة هولاء العالية ..

سمح عاين الكلام ده :!!..

Quote: وانتظر النداء منك لاتسرع بلبيك
وافعل ما تريديه بأحوالى سانبيك

هنا اتجه الي كلام الدين ... و ربنا و الرسول ... و اقتبس ما اقتبس ...

النداء ... و التلبية ...

وفوق لي ده قال ليها بأحوالي ( سأنبيك ) ...

مفردات معروف وين مصدرها ...!!!

لم تستخدم صدفة ... و لكن ( جلال ) و ( عظمة ) الموقف ... استوجبت استخدامها ...
______________________________________________________
كلام يخوِّف ...!!!

كويس الما منعوها ... او مسحوها !!!

وهذا هو بكاء الكرام على الحبيب ( دموع الرجال وجع وزفرة تخرج كلمة نثر أو شعرا )
وليست كدموع النساء التي من طبعها الضعف في هذه المواقف وتبكي بدمعة سائلة
لكن بكاء الرجال وان اطلق الدموع كلمة ومفرد وفهي استخدام مجازي ويعني الألم والحزن الذي يجيش بداخل مشاعره
واما المعرفة في الدين وشرع الله
ياقباني الناس ديل كلهم ناس خلاوي وعلم الخلاوي في الدين ارسخ من كنب المدارس
احرموني ولا تحرموني سنة الإسلام السلام
بل تعدت الثقافات ووصلت لعلم الفلك
لا يحضرني بيت الشعر في الحقيبة التي تحدث فيه الشاعر
عن ظاهرة فضائية ( من علم الفلك ) لكن سوف انحت الراس او استعين بصديق لكي اتيك به يا جميل

قبل مدة كنت اخوض نقاش مع صديق عزيز
قال لي
هذا الكلام ما جميل من شاعر قال
حبيبي خلقوني أحبك
وخلقوك علشان تهواني
ودام على حبي
وسأل عن قلبي
وما تفكر تنساني

الشاعر أحساس مرهف شفيف وقد يقتبس وقد يضمن وقد يطلق حديثه علنا
لكن
لما نحمل قول الشاعر من الظاهر من معاني المفردة
حبيبي خلقوني احبك
ما قصد ابداً الشاعر السر دوليب أن الحكمة من خلق الله له ان يحب فقط الحبيب
لكن المقصد كان
ان الله خلقه واعطاه الحياة لكي يحب هذا الشخص فقط ( غرام في الدنيا فطرة كل البشر .. كل زول مفتون بي زولو )
يعني علي السليقة كدي يا قباني انت لي وانا ليك ولا خيار ثالث

الشعر يقرأ معاني ما تحت السطور
نعم هناك اشياء لا تقبل التأويل
العبادة لله وحده
فلا تقبل من شاعر قال :
البعبدا
لكن نقبل قول الشاعر
يا حبيبة
لولا ربي وجهنم
لعبدتك وسجدت بين إيديك
وهنا صرح انه لا يعبدها لأن هذا حرام ولن يفعله خوفاً من الله وخشية
وقد انشد حسان بن ثابت قصيدته المشهورة
بانت سُعاد ( في مدح النبي صلى الله عليه وسلم في المسجد )
وفيها قال :
هيفا مقبلة
عجزاء مدبرة
لا يُشتكى منها
قِصر ولا طولُ
لاحظ في المسجد ... لم يهدر دمه .. لانه ما قال ما يكون كفر بالله
الشعر يتبعهم ....... ألخ الأية الكريمة

Post: #43
Title: Re: عيونك علّمَن عيني بُكا الخنساء .. أيُرضيكِ؟
Author: عبد المنعم سيد احمد
Date: 05-28-2013, 04:33 PM
Parent: #42

الرائع يحى قبانى
اتينا للتحية
والاستماع لكروان الحقيبة بادى
بحوزتى حوالى 100 شريط
تحتوى على روائع
الى ان نلتقى

Post: #44
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-29-2013, 03:46 PM
Parent: #43

Quote: وهذا هو بكاء الكرام على الحبيب ( دموع الرجال وجع وزفرة تخرج كلمة نثر أو شعرا )
وليست كدموع النساء التي من طبعها الضعف في هذه المواقف وتبكي بدمعة سائلة

سلام عليك يا منسي ...

جاييك بي مهل ...

Post: #45
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-29-2013, 03:48 PM
Parent: #44

Quote: الرائع يحى قبانى
اتينا للتحية
والاستماع لكروان الحقيبة بادى
بحوزتى حوالى 100 شريط
تحتوى على روائع
الى ان نلتقى

عبدالمنعم يا زول يا فنان ...

سعيد جدا بي بمرورك ... وأسعد بمقابلتنا في ندوة الموصلي ...

سنكون علي اتصال ( اكيد ) انشاء الله

الثروة الغنائية العندك ما شاء الله ... بنتكلم في الموضوع ده بالتلفون يا منعم ...

تحياتي ...

Post: #46
Title: Re: عيونك علّمَن عيني بُكا الخنساء .. أيُرضيكِ؟
Author: Ahmed al Qurashi
Date: 05-29-2013, 04:51 PM
Parent: #45

يا سلام يا يحيي على هذا الإبداع

رحم الله فنانا الكبير شيخ طه

فلقد كان مبدعا وخزانة لغناء الحقيبة

هذه الاغنية عزيزي يحيي من ألحان الفنان التجاني السيوفي

ولكن شيخ طه غير في اللحن كثيرا

وأضاف المقوقاة في بداية كل مقطع مما أعطى الأغنية طعما ولونا خاصا

وترك بصمة الفنان بادي عليه الرحمة على الاغنية وابعدها تمام عن لحن التجاني السيوفي

ولقد غير بادي كثيرا في الحان بعض الاغاني مثل أغنية ما بخاف من شئ والتي كانت من اغاني المجاراة

فوافقه الشاعر محمد عبدالله الأمي على اللحن الجدي وقال له لقد جعلت لها طعمت ونكهة

وكذلك اغنية الكواكب احتفلوا بالقمر فلقد اعطاها بادي لحنا خاصا به عندما لم يستمع الى لحنها الأاصلي وعرف انها من اغاني المجاراة

ولكنه عاد وغناها بلحنها القديم ولكن لحن بادي كان الاجمل كما قال الفنان الفرجوني في احدى حلقات برنامج حقيبة الفن ، فأشتهرت الأغنية بلح بادي

ويمكن للجميع سماعها بلحن المجاراة في تسجيل بالموسيقى للفنان مبارك حسن بركات

شكرا عزيزي يحيي قباني

ولك كل الود والتقدير

Post: #47
Title: Re: عيونك علّمَن عيني بُكا الخنساء .. أيُرضيكِ؟
Author: خالد علي محجوب المنسي
Date: 05-29-2013, 06:26 PM
Parent: #46

Quote: أخاف من لحظك القاتل
يشوفنى ويمضى تأثيره
تسيبنى وتمشى متاقل

فعلاً للعيون الأثر الفعال الفاتك فعل الماكسيم
والعيون
تصرع ذا اللُب .. حتى لا حِراك له
وهنَّ اضعف خلق الله إنسانا

رماني بس نبالو
ولا سأل في حالي
ولا خطر بي بالو

عيون الصيد
الناعسات عَيونّي

وما قيل في العيون كثير ومثير وجميل
وقال الجمال في العيون عكير الدامر وابدع

قال عكير
شعرك منتظم زي السلاسل فتلّو
عينيك تكسر الحجر إن بقت شافتلّو
الطاؤوسة قاصدة مشيك ماعرفتلّو
وأعصاب من رائك إتكهربت تلفتلّو

وهاك من جمال بادي عليه رحمة الله
مدني
داير ازرو ابويا ود مدني
أشكليهو الحضري والمدني

Post: #48
Title: Re: عيونك علّمَن عيني بُكا الخنساء .. أيُرضيكِ؟
Author: خالد علي محجوب المنسي
Date: 05-29-2013, 06:37 PM
Parent: #47

ليس كان الحق أن اطلق علي بادي فنان
الفنان مبدع
وأنظر اخي يحى لابداع بادي في هذه الأغنية
كل مفردة ملحنة لحالها وكل مفردة وحد موسيقية

عليك الرحمة بادي محمد الطيب

Post: #49
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-29-2013, 10:59 PM
Parent: #48

Quote: يا سلام يا يحيي على هذا الإبداع

رحم الله فنانا الكبير شيخ طه

فلقد كان مبدعا وخزانة لغناء الحقيبة

هذه الاغنية عزيزي يحيي من ألحان الفنان التجاني السيوفي

ولكن شيخ طه غير في اللحن كثيرا

وأضاف المقوقاة في بداية كل مقطع مما أعطى الأغنية طعما ولونا خاصا

واذا اتي ود القرشي ... يطيب الجلوس ...
لأنك محنك ... عميق الدروس ...

يا دكتور ... المقوقاة دي هي الغلبت الكبار و القدرو ...

امس سمعتها بصوت جمال النحاس ... و انا احترمه كثيرا ...

اداها بصورة ممتازة .. ولكن المقوقاة لم يفلح في اكمالها كما يصدح بها عمنا بادي ...

لكن الود يا جميل و انت تتحفنا بغزير علمك ... فوالله انت العارف بخبايا الحقيبة و ابداعاتها.

Post: #50
Title: Re: عيونك علّمَن عيني بُكا الخنساء .. أيُرضيكِ؟
Author: يحي قباني
Date: 05-31-2013, 05:45 AM
Parent: #49

Quote: ليس كان الحق أن اطلق علي بادي فنان
الفنان مبدع
وأنظر اخي يحى لابداع بادي في هذه الأغنية
كل مفردة ملحنة لحالها وكل مفردة وحد موسيقية

عليك الرحمة بادي محمد الطيب

ود المنسي ...

دار ابوي ... ومتعتي .. و عجني

مالك علينا بالخليل .. وود مدني ... وشيخه مدني السني ...

ده باب تاني ... هواهو عليل ... ودخوله ما زى مروقه ...

الله يستر ....

Post: #51
Title: Re: عيونك علّمَن عيني بُكا الخنساء .. أيُرضيكِ؟
Author: مازن فيصل هلال
Date: 05-31-2013, 04:53 PM
Parent: #50

متعة و الله بوستيك دا يا ود هباني... خاصة و انه مرصع بغناء المرحوم بادي و الاغنية البديعة بكاء الخنساء( بالمناسبة دي دا اسمها و لا عندها اسم تاني) .....و الله بس ناقص د. احمد القرشي ,,, الله يفتحها عليك دنيا و اخرة زي ما بقولو ,,, و ابوكرشولا زاااتو ((::