الخميس 30 / 5 تخليد ذكري الراحل حميد بالنادي السوداني أبوظبي

اللجنة القومية لتخليد ذكرى الراحل (حميد)





الخميس 30 / مايو / 2013

النادي السوداني أبوظبي

المشاركين

1/

الشاعر محمد بادي
والفنان بهاء الدين
من المقيمين بدولة الامارات

2 /
من السودان

الشاعر السر عثمان الطيب

والفنان أبوبكر سيداحمد



عبدالرحمن الماحي

عن اللجنه المنظمه


http:// سلام حميد .. الشتلات اللاتك قبضن

ادخال صوره

التحية لكم

وانتم تضعون هذا الانسان المبدع فى قلوبكم ووجدانكم وذااكرتكم

انسان اضاء دنيانا ودواخلنا مثل الشهاب واختفى وخلف فينا ما لن نضل ببعده ذلك الشعر الملتزم ناحية الوطن وكادحيه

ليتنا نستطيع ان نحضر معكم  

جرح الوطن ختالنا خط
مامنو نط
وحميد ختالنا خط مامنو نط
الليلي ياموت يا حيا
خاتي البختار الوسط خاتي البختار الوسط

يافطون
فطن حميد فطمنا غنانا
لاطاطينا لاسبنا الخيول تاطانا
قدمناه امام لاضلا لا ضلانا
ماهاب السجون مافزه من سيطانا
وكت الكور حما ثابت ركز لبطانا
لكن البلاد باعت ايادى بطانا
عالجه بالرحيل مدت وراه لسانا
جربه بالعويل قلبت حديثه رطانا
حنسه بالهديل رخت الحبيبه اضانا
ذى كل الطيور دايما تحن لوطانا
ماضاق الوطن بس كبرت الزنزانا

( أزهري محمد علي )

wadalzain

سلااااااااام مطبوق


موجوعه القلوب تبكي الحضر والبيد
وشن طعم الدروس والليلة ايه بتفيد
يبكيك النخيل بي حرقه مادي الايد
وين شادي الشمال وين بلبلو الغريد
وكتين الهموم تكتر علينا تزيد
نلقاهو الملاذ في قافية الحميد
كلنا في القيود كيفن كسرت القيد
ومالك ما رجع تنظم قصيد وقصيد
في عالي الجنان حولك حسانا غيد
رافل في نعيم الجنة وانت شهيدا

( أحمد سيداحمد رحمه )

,

الخازوق ..
بعيش .. إن وقعت طياره
و الماروق..
بموت ..إن عِترَت حُماره
الما دايرنو نحن ..أبداً ما بموت
و الفينا بشوف .. في ثانيه بفوت
في حلقك يا وطن .. كم شوكة حوت؟
و في خشم البلد .. كم بوت !؟
.....................
عصراً هالك..
تَـبَن الموت في العتمه مسالِك..
فرّنب خاتر الفِجّه يفتِّش
زولاً ضو في جوفو ممالِك
زول متجلبِب أبيض نِيتو
خاترو الطيب و قلبو كذلك
في وش الجُور حَدّر طاقيتو
كال بالفال فازقيتو
دارت غنواتو و ساقيتو
أناقي عوافي تجيب المافي
هردها لِهاتو بالغنوات
يساسق فوق إبر حافي
يبرِّد في حشا الأمات
يبُق نور الهوي الطافي
مِسقّد ليلو فوق خيلو
لاهو الساهي لا الغافي
ما بَتّ الحِمِل حيلو
و لا عَوَج الجبل سيلو
مِتَسّب قولو زي نيلو
مصالح شوفنا قنديلو
يجيب العافيه من مافي
أيا الولد الجلد
أيا ولد البلد
بصيره يمامه.. أعتي جَلَد
سمِح عرّاف .. نضيف اليد
فيك إتجلّي رسّامك
أصلك إنت زول آخره
ما همّاكَ رزق اليوم
و لا الشِقق التوِّج فاخره
ما أغراك نعيم ما بدوم
بريق الدنيا ما سَامك
لا العمارات السوامق
لا تَفاهَات الحضاره
كل المالكو إنسانَك
سماحة قلبَك إحسانك
و شال فوق كتفك النيلين
حرف من حق و نَضّاره
و في قَهَبُونَة الأيام
تحاحي علينا نسَامك
و في قارص البرود دافي
مستور الحال ما كان بطال
بالعفه يقينو هو مالك
ما أنفزَرَت شِعبة إيمانو
ماعُونو الماهِل كوريتو
ما فرزع خاتِل كيمانو
ما أنجدعت رغبة طوريتو
واسوقو يكتِّح لا باكر
في عين الليل الحالِك
يا نخله سبيطِك ما زال
دِفيق الفُقُرا البِتجَاكِر
في الزمن العَاق الزلزال
الزمن الطيش الما بذاكر
الزمن الضارِب و عُـزّال
يا زول حبوب لو فاكر
ما توّر نفسك أرزال
بتنورِق فيها تَقاويها
آفاتاً عاوله مساويها
بتبوِّق بلدك تديها
غنوات بالفِطره نبيهه
البلد السمحه وجيهه
إياك غنَّايا و حاريها
إن باعت برضك شاريها
ما بقطع قولك طاريها
الدمعه السالت تاريها
الوجع الأشتر باريها
الروح القصَدَت باريها
ما وَهدَب رِيحك صاريها
البلد الديمه مضاريها
المُدن الغادي.. حَوَاريها
إياك قِبليها ..سَوَاريها
بتلولي همومه من يومه
وحيِّدك كنت غفاريها
إنفَقَهَت بلدك بالفيها
يالبايع دومك و كاريها
...................
إنفَكّ جبارك يا نورا
صوّح شِدرك و إتكّا
كم صحرا مرقت من طورا
قَلَدت للنيل تتبكّا
كم نخله إتيتّم بابورا
من عَطَشَك نايحه بتتشكّا
ما انفكّ و حَاتَك ساجُورا
البلد الحائط مَبكا
السُوس القابِض في جذورا
السهم اللوّح و إنشكّا
في كبد الفقرا المغدوره
الدمع الدافِق ما اتوكّا
ما حدّ بصيرتَك طول سُورا
البلد الوقعت فَد نَكّا
ما عَكّم نيلَك في بورا
و الحَبِل الوَشَره و إنفكّا
الحزن القابض في زَورا
و الصبر إتطّين و إتلكّا
كيف عادك فايت يا أبشورا
لِسّاتك طيرك ما ركّا
فوق حِيَط الذمم المأجورا
و القصر الما هو مَزكّا
يا شِعبة بلداً مستوره
عميانه عليكَ بتتوكّا
حميد آخوي فوت جورا
بي مهله إن كان أو جَكّا
مليون آ خالد هي الفوره
و الظلم وحاتك بندكّا
يا سابِر بِيرا و جُب غورا
درويشاً بحلم بي مكه
ماعُونك ماهِل مو كَوره
صبّار في أي مَحَكّه
فقّاد الفُقَرا الفي حورا
يا خيراً ما هو مَوَكّا
يا سِيد القافيه البِندُورا
عدّال الفينا متكّا
البلد الخِرفت آحميد
الـزَ لَق الكَسَر المَخَروقه
الخبر إندافَق للبِيِد
إتوسّد روحنا المَحَروقه
بسم الله الحاصل يا سِيِد
يا دنيا خبارك مشروقه؟!
في كفك غارِز ها القيد
و الفرحه المِنك مسروقه
الخطوه الصَادا اللِبيد
الخبر الفرتّق لي عروقه
حميد الطاعم حميد
الزول الكان لك تبروقه
يا عين البلد الغِميد
يا بلداً ميت بي شوقه
يا جرحاً ما بي الضميد
يا وجعه تلاوِح مُر طوقه
ما طيَّب جرحك كِمّيد
لا شِبعَت بلدَك في الروقه
طوريه تناقر واسوق
بِتنَاتِل بلدك لي مروقه
البرق الحَرقَص من فوق
و الجرف الراجي للبُوقه
الغبش الشَعبَك بالروق
و الدمعه الفوقَك مدفوقه
يا عالَم تالِت و بالشوق
ممحون آنورا في العوقه
إنعاقوا غلابه و ماروق
للأرض البعدَك ممحوقه
الناشفه لِهاتُن كَروق
مديونه وحاتَك من سُوقه
يا فُقَرا بتلفو المَـعَرُوق
ما دَرّت أرضَك در نوقه
الحَلفَا الدِيسَه العَمَيوق
ما انجَرّ وحاتَك واسوقه
....................
أرضا وطن كامل
عرضا بماثل الطول
فرضا علي العامل
علي الصانع ..علي أي زول
حميد يا آمه زوامل
حميد ما فيكَ أبداَ قول
أرضاً صباح ..و الليل بطول
عمداً جراح ..ما تمّ حول
مُطلق صراح ..حميد رسول
أرضاً حصاد ..حميده زاد
كل العباد ..حميد بلاد
حميد وطن
حميداً فات و في جوفو
سبعه وجعات
حميداً فات و في شوفو
سبعه نسمات
حميداً فات و في قلبو
سبعه طعنات
حميداً فات و في حلقو
سبعه عبرات
حميداً فات و في دربو
أجمل غنوات
حميداً حي في بلدو
حميد ما مات
أبحرفاً حي زي ولدو
للدنيا ثبات
سلام حميد سلام
طايل دوام معناك
سلام حميد سلام
طاعم أكيد مغناك
سلام حميد سلام
الموت لما إصطفاك
سلام حميد سلام
مبهرج تماماً صفاك
سلام حميد سلام
رًح تقابل مصطفاك
سلام حميد سلام
مليون سلام ..عليك سلام
و علي
الوطن
السلام
و صحّي الموت سلام
ما يغشاك شر


(فاروق أبوحوه )

ولاكنو كان الموت قديم قدم التراب
ولا كنو كان النيل قديم من وين لي وين
حزنا متكن بالقباب
ولا كنو كان ما بينا بين الاخرة باب
ولا كنو قابيل فوق قبر ما كان ستر حالو الغراب
ساعة الحزن غيم مطر وكبن سباليق القلوب
اندافقن شو في الدروب
دفق تساب عينة الفواصل دم مقاصل
وجقلبات ووبين وحي حيين ووب
عينة المناحات يا الهبوب الريح نكت شعر النخيل عز التساب
والبوم رحل قبل الصباح ممعوط جناح
كبس الضرائح والقبب
واتكاتح الصيف الرماد لا ارض عاد
البوم دخل كبد الرباب
وانصايح الجن في الودي المسكونة لا اخر العقاب
يا وادي عبقر وجعتين
الوجعة يا ارنيق غناك
والآهة يا فوت الشباب
يا حليلو حميد للبلد الكان كبير حلة جرير
في عينو احيا ناس لبيد والاعشي
حسان في الابد قبل القراب
آه يا عريس الواديين
النيل و عبقر يا دواوين الغياب
يا حليلو حميد للبلد يا حليلو حميد للخريف
يا حليلو حميد للغبش يا حليلو حميد للصريف
كل المزارعيه الدغش
كل الرجال كل الحريم
الضو وعم عبد الرحيم
عيوشة وبت عوض الكريم
آ أستغفر الله العظيم
بعدك منو البعلف خيول الامة لي جدك صبير
كلما الترك نزلو الحفير
والبدي موال الجبال لاختك مهيرة حرف اخير
قبال تغير تنضاري في جوف الهضاب
وصفية طاشي من العصير
والباشا بينات الحراب
خوفا من البت الاسير والدنيا كلها ديش عقاب
يشتاقك آ حمدي النخيل كل ما يشيل
عن حشو للولد البكيل
وكل ما الدروب مدن عديل
تالا مراتعنا القبيل
وفرح البطان بي قولبت بالقمرة بي لمت شليل
ووحلت وقويديس ويا غراب
وأتردد الصدى للبعيد
جياتك المن غادي جاي
لوحك مسبغ بالعمار
تنضح كراريسك نشيد
من فد مدار
ضحكاتك التملا المقيل
عيديه في أيد البطان
من وقفة العيد للصعيد وفرح زمان
طوالي في ساحة صباك كلك شباب
نفس الوليد
تمرق براءتو مع السلام من قبل ما تتمد ايد
نتصابح العالم سعيد نتماسي والعالم سعيد
ما بين سلامك ومرحباب
فعل فعل يا ها الزمان الما بتريد شي بلا الوهج
أي الوهج
قطعت اكباد الخلوق باللندهج
دهج القوافي عرق عرق
صرخة حروفا من الحلوق
مرة حناضلا في الحلق
وا مر حناضلا في العروق
فعل .. فعل .. يا ها الزمان
فيك ما سلم ضهر العوج
الكان بباطنو بسوط عنج
آ ألما قدر تفديه من طعن السريح
وبلا حرج
كت وين توديه الوهج
وانت المنكر في ضريح
شل ود عيونا من البروق
كحلتهن تشة مراويد الاسف غبش الشروق
قبل المروق الحش في الجوف الحشا
وقطع شرايين الرباب
وانا والعشيات والدروب—وبنات نعش – والنترة والليل الاسيف
جيت ايد تصابق وايد وراي
عيني علي التقي في الجريف
قمحك متكيها الرقاب
شتلك مكفن عنكبوت
خلن البيوت من بسمة من قولة حباب
في أي ريف حفاني امات القصيد
من اسم عيد
من تدي لا تدي الكتاب
والعنقريب السيدو غاب
وبين النهارات المقيل من عش غراب لا عش غراب
والدنيا بوم ومناحه والكون انتحاب
الضفة كلها توب زراق صنة يتامي ونوح فراق
وسيول دموع حد الركاب
مع انو عجلان الزمن لا من ملكد خطوتك
وين من وهاطك فينا وين من مهلتك
من غنوتك
لا من يضم الباشي حوش
والدنيا تفرش في ضليل الفرحة اصناف البروش
وين ما تقبل بسمتك
وين ما تعاين حلتك
عمماً سماحتا والعقاب
وانت الصباحات والقمر والمزنه للارض اليباب
يوت ود عيونا الزاغ يقصقص في الرمال
فوق المدوقات الأصيل
يلقي الاتر بين طلعتك وبين نزلتك
زى ما التساب ما اخلف مواعيد للجرف
ينتح اتر كعبك حرف
وتري اللصابع بالمطالع
نمه من بحر الخليل
ما استوقفت لهفة شواطينا السؤال
ضيق الرحيل ألما أدي لي أيد الأماني عمر تشيل
خمشة تراب من الدريب تنصر من اتر الاتر
علي أي دكيقا قريب
في بيت حبيب
فالا البودي غصب يجيب
قصر وصيتك والوداع
بين تسكن العبرة النخاع
وبين يسكن الروح العذاب
تجئ زى عناوين الغياب
تدخل سمانا نجم فرح
تدخل غنانا كقوس قزح
قبال تقيف ما بين نواطير الترك في الهدمة
ما النيل أنجرح
تضرع من العالي الطرح
من وين ما مد الطير جناح
لا أيامك ايامو الصدح
لا داره عمرتا الطرح
والساقي دوبايا استجاب
حتما إذا اتلمت تحت ضل السيوف
كل الرقاب
والموت رخي الليد في الخراب
بحيي القصيد
ينضاري في كيم الفراغات ذكريات
أو أمنيات
أو طفلة من دمعة نشيد
أحضانا عيد
وفي وقفة العيد تستعيد
ضحكة زمانه عشق أكيد
ولا كنو كان ما بينا بين الآخرة باب
حسبك مجرتق يا شهيد
في الجنة بين كل الصحاب
كونك رحلت بألف خير
والدنيا عندك ما أسوي من لمه حزن
ويا لمه خير
رشيت رزازك للجروف
تكنت كل الكون حروف
من عزة من نور من أمل
خرباني يا فجر الأهل
وبعدك وساوسنا احتساب
وان كان بيتمد العمر
نديك عمرنا بلا حساب
لكن لكل اجل كتاب
لكن لكل اجل كتاب

(كمال حسن محمد )

شوك الشوق لى الشوف آ خَىْ

ضارب فِطن النسج الحى

يا منقاش أحزانى إنشرت

وادى الفرح إتمدد صَى



يا راحلين ــ عِـنْ ــ دُغُش الليل

ما لاقيتو جناياً زى ..

تكية نخل الفجُر الجاسِر

فوق فى المتَرَة .. عَرَاجِنْ ضَى



آ رعاوة .. العرب الرُّحّل

ما لاقاكُنْ فى المطرانى ؟

فى كاويقْ الجرف الأمحل

بين أسراب الرهو الراحِل

ساند أكتاف الليل الميّل

عِنْ ساساق الغيمة عليكُن

بين رقراق الخيمة معاكُن

ما أديتوهو شِوَىْ ... بى حرجل؟



آ رطّانة الليلُن ليّل

ما لاقاكُن فى ونساتكُن؟

بين الشادِى وبين كاساتكُن

فى صلواتكن .. عِنْ دعواتكن

أو .. دقساتكُن عِز خلواتكُن

.. زول .. زول الله

إن مِحِن .. آ .. بِسأل



الهبّاد لى غُلبْ أخواتو

الفرّاح عوّان الحلّىِ

الفدّاع لى الليل ظُلماتو

آ نجمات .. شقيش قولن لى

ما لاقاك طالِع .. متدلّى ؟



المطيوب من طيبة أُمّاتو

كالفجّاج .. الندّ نباتو

موج البحر اللّحَمَر هوجتو

وعِرق العِرِق .. اللاّوى ثباتو

جانا الشَدر الأخَدَر منو

ونار الشدر الأخَدَر جاتو

فات شِقيش ...

أب قولاً واحِد ..

وليش ما يرجع من غُرباتو

طوّل طُول .. ما طلّ علينا

وقاطِع مِننا جواباتو

الغابات جات تنشِد منو

والعربان راجين جياتو

أديناهم عرقو .. وعَلَقو

صورتو يقلِّب فى كِتْباتو

ضُل رشاشو .. ركيزة زولو

ساعة سِلمو .. ويوم حوباتو

سِن طوريتو ولون أبرولو

حِس طنبورو البى نغماتو

لهْلَب عِشق الناس الفقرا

وبرّد جوفُن .. بى غنواتو

... ويا غنواتو

الدخلت فينا

تمرق .. جينا على جِلاّتو

وجِيداً جينا .. طلقنا وشينا

وش الدنيا الليلة حلاتو

وش أطفالنا الليلة حلاتو

وغنى معانا غنانا هويتو

غنِّى العالم

غنى حياتو

لا ساومنا عليها قضيتو

ولا فكينا من إيدنا .. وَصَاتُو

ألف شليل يا نورة يفوتو

عشان ما يجيك شليلك زاتو

جاي ليكand#65279; يانوره اه اه

لما نبكي الراحو زيـّك
مابنبكي الأغنيات
لا القميره بتبكى نورا
وضيّها الخلانا فاات
لاابنبكى الدنيا بعدك
لاحنين الذكريات
لا للطنابير التمنّح
لا انين الأمسيات
نبكى يااحميد بلدنا
نبكى أحلام الفقاره
المساكين الحيارى
الوطن والأمنيات
***
نبكى لامن نوره تمرُق
من قلوب الساسة آهه
ومن عرق تربال بـيحلم
بالتراب شربت براها
ومن دموع عيوّشا لمّا
المُدُن لاكت غناها
***
إنتى ياابيوضه زيك
وزى شمس بلعت ضُحاها
ايي زيك
طيره فى دهشة غنانا
قاعدي تاكل فى جناها
إنتى زيك زى حيطنا
لما تتمطى وتفلّع فى قفا الزول البناها
***
موكبك يانورينا عيونا
ياابصيرتنا المثال
عدَ فوق الدنيا شايل
من وهج فجرك جمال
يابلد جواكا ساكن
وراسخة فى قلبك جبال
يجري بين عينيك نيلنا
بى حفيف نخلو الطوال
فيك يااحميد كِِتِلنا
وفيك اتكتلت رجال
***
يوم رحيلك يالمسافر
فى دروب وطنى النضال
اندلق فرح العذارى
واتكسر فينا احتمال
اتقلع قلب البريدك ...
واتكشح في راس وطنا
هينك القابض الرمال
كلنا وفي البير نزلنا
وانت طوطوت الحبال
***
داير اناديك ياسمحنا
يااقمحنا الناقصا شربه
يابريسيمنا المنَور
وجاهو قدر الموت وقبَا
كركداية الله انت حُلَووو
يامطر خير في بلدنا
لما لاجو الساسة صبَا
ويالسان حال التعابا
وضلنا الفي الواطه كبَا
ياوليد نوري المكندك
بالتواريخ والمحبة
الحرف من حلقي مااارق
وجوووه عبراتي استخبأ
***
لا لأ ما بنبكيكا هسه
نبكي يوم نحتاج نشيدك
في عرس وطني الكبيير
وانت والشهداء وبعانخي
جيتو عابرين بالحفير
العُمد والضو يغني
والبلد لابسي الحرير
والسلام في أي حتي
والكلام في الحب كبيير
والعطش كان قاااسي جانا
نلقى روحك ياضرانا
في سموم بيوضا زيير
ساعتا النبكيك ونبكي
الوطن يوم كان كبييير
ونبكي لامن روحنا تمرق
الحلم يوم ضاع كبيير
ونبكي زولا من بلدنا
عاش كبيرنا ومات كبيير


( خالد الباشا )

فى الجنه رب العالمين يديكا .. يا ...
وطن المداين الفاضـــــــــــــله
سكانو انبياء
ومامت يا الموتك حياه
لقمت عمرك للوطن
وآخر شئ لقمتو الحياه
أديته روحك للسحاب
يسقى الأراضى الميته
من قل المياه
وجسدك صبح جوزين حمام
يا تركة الصالحين والأولياء
.......................................
يا حسرة يا أحزان مدد
حميد عضم ضهر البلد
يا كلنا ويا أى زول يا زول بلد


والله يوم فقدك تقول
من أى بيت مفقود .. ولد
بيوضة الأحزان وراك
برسيمه فى جوفنا إتفرض
ضو الفريق ... البقضى للناس الغرض
البفتش للعلاج .. قبال نئن من المرض
ويوم بوشنا قبال ما نهوش
نلقاهو أول زول عرض
يا كبير ال الله ما اداهم كبير
أبو اليتامى وأبو البلد
قابض على جمر الوطن
أحد ... أحد
ما حدت عن هذا الطريق
لمن قبض ودّ اللحد
............................................
بسم الذين تحبهم
والفيكا مكتولين كمد
صابرين وأبدا ماب نقول
حميد رقد


منو العوض وليهو العوض
حميد رقد
ونضرب يدينا على بعض
حميد رقد
ما الخير بيمكث فى الأرض
ويطفح على السطح الزبد
لو غيّب الموت الجسد
جوانا عايش للأبد
...........................
يا امبراطور يارئيس كل الغلابه ويا زعيم
سوينا من إسمك حرز
لى عازتك من كل شيطان رجيم
مطموره المنى والامانى
يا خشم باب النسيم
نلقاكا وين نقعد معاك فوق عنقريب
تحت الضــــليل الرامى نيم
ورحــــــلت ودعت المنافى
رقـــــدت عــــافى
بين حنايا الارض والوطن الرحيم


وخليت أثر دربك ضياك
ذى الصراط المستقيم
وكل الرجال عبد الرحيم
كل الحريم السرة بت عوض الكريم
فاليبقى سفرك يا صميم
الرجعة للبيت القديم
خبرك تصيحبو الهبوب
ريح الشمال ريح الجنوب
وين الله ما رفع ـ القدم
حين ترفع الفاتحه القلوب
يملأ الدمع حتى الجيوب
رب العباد مولانا
أرحم من رحم
بنات نعش نجم الثريا
إتحت فى صيوان عزاك
ذى البرم
القرشى والماظ الهمام
واى فارس
عنوة فى التاريخ بصم


الكل حضور للهدهد الجاب النبأ
و لى حمامات ... الحرم
ترهاقا حالف باليمين
قدر مقامك يا علم
ليك يبنى فى نورى الجريف
ريقان طرابيل جم ... جم
شاويش معاهو المك صبير
لا حسرة فوقن .... لا ندم
ومهيره واقفى تعزى فيك
دوباى غناويك حافظه صم
كانت تنهّر فى حريم
كوم الرماد خمنّو .. خم
وكرجت سنونه على رجال
لطمو الخدود
والدمعه دم
ونقرت بشيشى على شتم
ويديها مليانات ... ختم
والموج يصفق والنخيل
بى عزه ماد ليك وإنقسم


حميدنا يا الحجر الأصم
غناك حاحايه ... الصقور
ما ركا .. فوق حيطك .. رخم
يا عشا الضيفان
و رواب العشـــــــم
البركل الشامخ يشابى
القومه ليك يا محترم
فكيت كتير ريقة الوطن
ودرت كم قرمه وخرم
يا حبلنا السرى الببخ
فى الجوف .......... نغم
حب الأرض عشق الأرض
يشفى يداوى من أى هم
................................................
يا حبنا ... ويا طبنا
يا دوح قلوبنا وبلسما
زرقاء يمامتنا التعاين
من بعيد حين أصاب
شوقنا ...... العمى


جبار خواطرنا ومشاعرنا
المجرحه .. ديمه
إياك برها
ياتو بحرا عرقو ... حامى
جزيرتو ما جيت حازمه
تربال زرعت قلوبنا حب
شتلك قبض والضل رمى
حميدنا يا حميدنا سى
وريتنا معنى الإنتمى
يغسلك الله من اى سئ
يا البيك قلوبنا متيمه
وطنا يكون ما زيو ذي
فى سبيلو روحك سايمه
يعرض صبيهو مع النقى
بدل الكلاش والراجمه
الضبعة سارحه مع الجدى
يرون صحارى بعد ظما
فرخ ا لقمارى مع الحدى
وفيض الأمانى الحالمه


العبره شقت عازة طق
أطرح وشيكا وناغمه
الابيض الازرق دموع
حرقت خدود العاصمة
يا غفيرا وكت تنوم
من أى هم ما ينهما
ما همت غير بى ها الوطن
حبك يفوق أرضو وسما
ورحلت قبال الأوان
يا دوبو عرق الحب نما
وقفت على طولا الارض
وأداكا تعظيم السما
وحبك صبح للناس فرض
والنيل فى حضنك ارتمى
................................
يا العشتا بينا ونحن فى
وما كنا فى
يوم قلت حى على الكفاح
شلال دماكا على الارض
باكر يفرهد ونحنا فى
ولسع نصاح
وافكارك أنت بلد .. بلد
مختوته فوق كتف الرياح
تجى طالع انت مع البذور
كون من سماح
توزن كمنجات الطيور
تعزفك غناك بى إرتياح
تفوح أريحيتك زهور
مودة ريد وحنان وحب
يشفى الجراح
وتظل حضور عزّ الغياب
شمسا تطل
فى كل صباح
إراده لى كل الشعوب
تهب متل
ريح الصلاح
ويهدل حمامك فى أمان
والكل يقول
... أرضا ســــــــلاح ... أرضا ســــلاح


(خليفه عثمان خليفه)

Quote: يا هدى الناس الحيارى يا ندى الفجر الببلل نور عوينات الفقارى جاي ليك يانورة آفة للدود البنتر فوق عشيماً داخرو فيك أصلي لمان أدور اجيك بجيك لا بتعجزني المسافة لا بقيف بيناتنا عارض لا الظروف تمسك بإيدي ولا من الأيام مخافة

نبكي حالنا من بعدك ياحميد

فانت حي رغم الموت


.....................................................

شكراً سيداحمد ولك التحية

جايين تب

*** شكــرا مقدر شـامي .

*** شوف لينا أبحوا قاتس وين حتى لا نفقد ما تبقى من النصف الحلو .

جنابو

تلفون صاحبك ما عندي

سمعت أنو عريس ان شاء الله يكون رجع

Quote: شكراً سيداحمد ولك التحية جايين تب

الجنيد
شكرا لانك حضور في حضرة الوطن حميد
الله يبعد العارضي تجينا

محمد الحسن سالم حميد
لو رجعت وايدني فاضي


لو رجعت وايدني فاضي
يابا ما راح تبقي راضي
والبلد ما بتبقي راضي
ونفسي ماراح تبقي راضي
والنخيل الكان بشابي
يهش ينادي يصد يقبل مني غادي
والدروب الكان بتفتح ضفتين
احضانها نادي
عليها اه تسب خطايا
تكب ترابها علي قفايا
تقوم تعتر لي جوادي
والقلوب الكان بتفرح
تكشح الشوق في الايادي
جيتي ليها بلا ابتسامة
تبقي زي جيت الغمامة
للاراضي الغبشة فاضي
با نخل ياطين سلام
يا غلب في المغربية
لما تتزمر صبية والا حبوبةً قبيلك
باركة لي امي الشهادي
في التراب الراجي لي
تنقلب بي شد علي
وتنكسر قدر الولادي
يا غلب لو عدت فاضي
للغمت في ايدي موادع
او عصر حق الزوادي
يا بحر مابي الزيادي
يانخل ياطين سلام
ياضراع في التقله يكدح
يامدارس ياحدادي
ياغبش صر ياغلابة
يامقاطيعاً في وادي
وضالتن ضلت في وادي
وداي كفرن فيني شعوت
خيل قراطيسي ومدادي
من مداين غيمة دافق
نيل سلام يروي البوادي
او يبل ريق امي يمة
شوقي جاي اشواقي غادي
مشتهيكن نشتهيكن
في صهاري ايامي يلمع
في ضلاما يبق وشيكم
وفي خطاوي الناس بفتش
لو اصادف يوم مشيكم
وحد ما اعاين في عيونن
ما الاقي متل عيونكم
وغربل الالوان وحاتكم
ما لقيت يا يمة لونكم
ما انتو لونكم لون بلدنا
لون جناينا لون سماها
لون ترابا و لون نخيلا
لون قماريها وهديلا
وضفتينا الماسكا نيلا
وبينا هادر زي مسيره
انتو صوتكم صوت بلدنا
صوت تواريخا وضميرا
وصرختو الدواية العزيرة
وباقي زي نار الهجاير في حطب
غابة الظهيرة

يا ابرزقاً موكر في عميق الأرض
في جوف البحار
فوق صناقير الجبال الحين يبيضن
مابيبيضن غير حجار
قط ما في الأرض من رونق نضار
غطي وديانك هجير
صاد مراعيك المحل
صد سيفك في الجفير وأنت تارك ما اندمل
الوطن جواك أسير وأنت هارب ما العمل
البحر حين جاك دمير
ختَ فوق قيفك وحل
مابي جرفك غير رماد حتى عصفورك رحل
طبَ في سأبك جراد قب روسيين النخل
ما جنيت من كد نهارك غير بوار
لا لقيت في يد بحارك غير محار
ما فِضل في كل خدارك ود غصن
لا في دارك من ركن
تضوي نارك تتكل تالاهو بن
دون عمل ؟..!
الما الفايدة منك معني حنك
و الا أنك ود قبائل وليك اصل
نار خلاوي ونور أهل
نظم أفاتوا الدجل
وأنت في فوضي الدجل
خل خروج الغيمة من نفخة بخار
لي دخول الأرض المطر أم بزار
مافي غير تجلب ضراعك في المدن
والمدن ما فيها غير حفنة تجار
وسوقها واحد يا غبن
وأنت أشباهك كتار
جيت تنادي ولا أُذن
طال صراعك للحزن و التصاليت والدوار
كلما فجيت حصار تلقي لجيت في حصار
وكلما ليها المدينة تابي غربانك حقاره
تاذي أعوانك عوينها
تدفرك تالاي الغبينة وحافة اطرافها المهينة
تاخد افراحك رهينة
قسمتك كيف الدبارة
كافة أعيادك حزينة
و البجيلك من يسارها تاخدوا منك بي يمينه
اه لو كان بالضكاره أو نفس طيبة أمينة
غنيتك ما طال إثارها وعاني موالك رهينة
دنيتك كانت بحارها تحتفيبك مينا مينا
ليل فرح قاد في صحاري
لا كهارب لا في زينة
ضيوا كشافة الفقاري قمرا حتى ولو رتينة
إلا يا تارك مسورك للمحل عز المزار
أرض الميري ومتورك و الأهل عارض جدار
بينها بينك وين قمورك في السهل
ما بقوا نار
مافي يا الكانت ديارك
قاجي ليلها علي النهار
في المدينة من استجارك غير ضواحيك ها الحجار
راح زمن حردك تجارك في الضواحي وبالأيجار
غصب عنك وحار و حار
ترضي شان أم الصغار و الصغار شان أم الصغار
والبطون البنتظارك وأنت جاي أخر نهارك
الرغيفات في يسارك وفي يمنيك كيس خدار
عمروا ما أتمنوا المقصتر ذات يوم
عمروا ما استنوا الفواكه إلا دوم
لا في عيد داروا الجديد لا مراجيح لا لعب
لا زيارات للحدائق فنه في الزمن الصعب
مافي شكوي ومافي لوم و بي تواضح وبي أدب
يسألوك أحسن بحرنا والا بترول العرب
الشي مالا في ناس تريدن وناس تزيدن بالكرب
أمهم داخل تصيدن يا ولاد النوم وجب
ويدوا وشهم الفراغ وتدي وشك للترب
آه لو تأذن يا رب آه لو تقبل يا قلب
ثانية بملاهم لُعب عيد بلا عيد الجديد
يجروا في كل الحدائق يقروا بالم هادي رايق
لا متاعب لا هموم في المصاريف و الرسوم
متخمين بالنشوة و الحلوى و الفواكه
بالحقائق والحكاوي الخالي خوفها
حرمان مزله إلا آه ياوضع شائه
منحلج قانون تائه
ومافي تايه غيروا دله
حلمهم مع إنو ######## إلا لكن بالتالله
إلا لكن بالتعب وبالتعب كم مرة جلا
جد زمانن جد صعب إلا آه يا رمل الشوارع
كم حرمناك من غضب
و يا رجوع عرق المصانع مافي بقاقة لهب
الكعب طول ماهو طالع مابينزل غير كعب
وأنت يا أبعرقاً موكر في عميق الرفض
في جوف الصراع في انتظار
الجاي من براك بريه
منوا نفسك أوف خداع
فجر كاذب خدرية
انتبه حتى النخاع
أيدلوجيا الكسر من بيع القضية
في عكاظ الغرب في سوق الرعاع
واجتماع الانفضاض وانفضاض الاجتماع
بين لندن و الرياض كان إلي حين المتاع
انتبه حتى النخاع
انتبه حتى النخاع
ما بيجيبوها الدموع لا الدعي لا الامتعاض
و الا راكض فوق خنوع مابيفرخ انتفاض
انتبه حتى النخاع
ابتزاز الشعب بالمثلي الابيه
لاحتكار الدنيا كان الدين قناع

الصكوك الكنسية في همركوشيب تباع
جنة اوهاج الاسية وجنة الحاج الضياع
وي كأن الله آهٍ يا نبيا
آه يحتاج حماةً ورماةً وتباع
انتبه حتى النخاع
لا متطاء الجيش يا حظ المطية
من تقل ما فوقا من شاذي الطباع
انتبه حتى النخاع
لا امتلاك الارزقية البندقية
وانطلاق الرعب من حتى اليراع
انتبه حتى النخاع
فامتهان الكذب قدام الرعية
وانتشار الأمن في شتي البقاع
لا يخلي الريح يطلوح بي مراكبك
تالا لجات الضياع
اخير دوام الدفي قلبك وفر بصيراتك شراع
مدرتك طول بالك انت و المقاديف الضراع
مافي غيرك من يجيرك ادري بي جوع الجياع
وا وطن يطلع نفيرك
ما مطر ينزل مشاع
الضلام العاد مسيرك يضوي بي اذن الشعاع
في الصحاري يبق خديرك ترعى خالفلك كراع
فوق كراع لا قط بيرك لاغشى تالتك ضباع
ياولد كل القبيلة وليها ماديلا الضراع
ما بتبيت شاه عليلة ديمه نجداتك سراع
البلد تحتك كتيله ليش تأجل للصراع

حميد

هــــيْ .. أقــيـفِـنْ ..
نــــورا فِــيـكِـنْ .
نـورا ... نـقّاحة الجِّروفْ ..
نـورا ... حَـلاّبة الـلِّبيني ..
لـلـصـغيرين والـضِّـيوفْ
نـورا سـاعة الـحَرْ يـولِّعْ ..
تـنـقلِبْ نـسـمة وتـطـوفْ
تَـــدِّي لـلـجيعان لـقـيمة
وتَــدِّي لـلـعطشان جـغيمة
والـمَخَلِّي الـحال مَـصَنقِرْ ..
فــي تَـقَاة الـلّيل تَـندْقِرْ ..
تــدِّي لــي بـاكر بـسيمة
تَـكْـسي لـلـماشين عَـرَايـا
وفـوقـا يـنـقطّعْ هـديـمه
ما عِرفتِنْ ... نورا إنْتِنْ ..
قـولِنْ إنـتن شِـنْ عِرفْتِنْ
نـــورا بِـــتْ الـواطـة
أخــــيــــتـــي ..
نــورا اخُـتْ كُـلّ الـغلابة
نــورا حـاحاية الـشّقاوة ..
نــورا هَـدّايـة الـضّـهابة
الأراضــي الـيَـاما أدّتْ ..
نـورا ... بـقّتْ مـن تُـرابه
ومـاشي فـي الأعـماق سحابه
مـشـتـهنِّها .. والله جـابـه
الله جــابـه ... الله جـابـه
لـلـجنوب طـبلاً يَـهَدْهِدْ ..
لـيـل مـشاعر نـاس تـعابة
ولـلشّمال طـنبور يَـسَكِّتْ ..
دمــعـة الـمـيتين كـآبـة
مـا عِـرِفْتِنْ نورا إنتِنْ ..
قـولِنْ إنـتن شِـنْ عِرِفْتِنْ
نـــــــــــورا ....
عـايـز تـقـرأ .... قـالـتْ
فـوقـا حـيطة الـدِّنيا مَـالتْ
خَـتّـتْ الـكـرّاس وشَـالتْ
مـنجلاً .... صَـالَتْ بو جَالَتْ
لامِـنْ إنـجرحت بـو شـالَتْ
لـي الـتراب فـوق إيده كَالَتْ
ومَـرّة يـوم في الدُّونْكَا لِدْغَتْ
جـاء الـفقير بـالليل حَـوَاهَا
ويـوم مـلاها الـهم قطايع ..
جـاء الـبصير بـالنّار كَـوَاهَا
ونـورا ... مـا قِدْرَتْ تمانع ..
تـقـنـع الـنّـاس الـمـعاها
مـرة شـافت فـي رؤاهـا ...

طـيرة ... تـاكل فـي جـناها
حـيـطة تِـتـمغّى وتـفلّعْ ..
فــي قَـفَـا الـزّول الـبناها
فـي جـنينة سـيدي سِمْعَتْ ..
شـتلة تـصقع لـي الـوَرَاها
الأرض ..
لابُــــــــــــــدَّ
تــــــرجـــــع ...
لـلـتِّعِب فـوقا ورعـاها ...
غـيمة ... والـنِّيل موجو لاها
والـعـطش شـقّـقْ شـفـاها
الـشّـمس طَـبَـقت ضُـحَاهَا
الـخـلـيقة لـقـت إلاهــا
نــــــــــــار ....
عـقـاب إنـسـان مـكسّر ..
فـــوق تَـلَـكِّيات مـتـاهة
وضَـوْ من الله .. رهاب مكتّفْ
فــي وتـيـد الـلّيل مـعاها
بـين ربـوع حَـضَره وخلاها
فَـسّرَتْ لـي الـنّاس رُؤاهـا
وقالوا .... جَنّت .... ومو براها
ونــورا زادت فـوق شـقاها
و صَـدّتْ الأيـام .... تـحُشْ
تـبني لـي عـصفورة عُـشْ
فـي الـسّواقي تـشوف عزاها
لـما شـوقه يسوِّي .. أُشْ !!!
تـــمــلا ... تــــزرعْ
تــرعــى .. تــقــرع
لـلـنهار فـي الـليل تـخُشْ
عِـرْفَـتْ الـشّـقَا والـشّقَاوة
إلاّ ....
مــا عـرفـت تـغُـشْ !!!
شـايلة طـولة البال من الله ..
ومــن أراضـيـنا الإثــارة
ومـاشي تـكدح طـول نـهاره
وتـرجى لـما الـليل يَـفلِّلْ ..
تـسرِق ألـمي عـشان خداره
عــشــان صــغـاره ..
عـــشــان خـــــداره
عــشــان صــغـاره ..
ولـمـا تـرجـع لـي ديـاره
تـنـزف أحــلام الـفـقارى
مــن عـويـناته الـحـيارى
لــي غُـبـار الـحال تـقُشْ
فـوقـو لـي الآمـال تـرُشْ
نـــــــــــورا ....
تـــــقـــــعــــد
صــاحـيـي تــحـلـم ..
بـي بـيوت بـي نـور ودُشْ
وبـالـمحبة تـشُق دروبـه ..
ولــي قـلوب الـكل تـخُشْ
نــــــــــــورا ...
تـحـلـم بـــي وجـــود
مــا مـشـت بـينو الـقيود
أفـضل أفـضل بـي الكتير ..
بـي وطـن مـن غـير حدود
نــورا تـحـلم بـي عـوالم
زي رؤى الأطـفـال حـوالـم
لا درادر ..
لا عــــســـاكـــر ..
لا مـــظـــالـــيــم
لا مــــظــــالــــم
نـــــورا تــحـلـم ..
ولـما تـحلم ..... نورا ترجِفْ
ولـما ترجف .... نورا تحلم ..
ولـما ريـح الـواقع الـمُرْ ..
لـي عـشيش أحـلاما يـنسِفْ
نــــورا ..... تــنـزِفْ
وفـي الوجود .. وجدانه يهتفْ
حــالــة .. تــقـرِفْ ..
حـــالــة تــكـسِـفْ ..
حـــالــة تــكـسِـفْ ..
حـــالــة تــقــرِفْ ..
وتــبــدا تــقـضِـفْ ..
ولـــمــا تــقــضِـفْ
بـــــالا يــهـتِـفْ ..
وتـملا بـاله أحـلام بـتلصِفْ
يـــوم حـــا تـنـصِـف
يـــوم حـــا تـنـصِـفْ
نــــــــــــورا ..
لـــسّــه بــعــيـد ..
هــــــنــــــاكَ ..
وتـــبــدأ تــحـلـم ..
ولـمـا تـحلم نـورا تـرجِفْ
ولـمـا تـرجف نـورا تـحلم
صــاحـيـي تــحـلـم..
وصَـــــاحْ بـتـحـلَـمْ
صـــــاح بــتـحـلَـمْ
بــتـحـلـم صــــاحْ ..