اصوات الحيوانات هل هي لغة مفهومة لدى بعضها البعض؟

النملة قالت:
يا ايها النمل ادخلوا مساكنكم لا يحطمنكم سليمان وجنوده وهم لا يشعرون.

هل كلام النملة دي في باقي الاوقات كلو كان ليهو معاني زي دا ؟
وربنا موش قال على لسان سيدنا سليمان:
يا ايها الناس عُلمنا منطق الطير


اذا اصلا كلام الطير ما ليهو معاني.... ما الاعجاز في تعليم سيدنا سليمان اياه؟

طيب مرات برضو بتشوف كمية كلاب او كدايس بجوطو متشاكلين
هل الجوطه دي كلمات مفهومة لبعضهم البعض؟
وهل يفهم الكلاب لغة الكدايس والغنم لغة الحمير وهكذا؟
ولا كل نوع بفهم لغة بني جنسو فقط؟
وهل تختلف لغة ذباب السودان مثلا عن لغة الذباب الموجود في امريكا؟

ومخ الحيوانات دا كوم لحم ساي ما فيهو السوفت وير بتاع التفكير زي حق البشر؟

مرة اتأملت في بيتنا الكديسة
كانت دايره تنط في حيطة جيرانا
لاحظت انها بتقيف لحظه كدا تتأمل
تقريبا بتحسب الارتفاع وتشوف انسب طريقه للنط وكدا
اي نعم مرات بتخطيء التقدير وتنزلق لكن دا نادر وفي اغلب الحالات بتكون تقديراتها صائبة شديد
اها دا موش شغل تفكير عديل هسي؟

قبل شويه كنت بتكلم مع صديق فاضل واتشعب الكلام للحتة دي ذاتها...فحكى لي قصة عجيبة وحدثت حقيقة ورواتها موجودين...
بيقول انو الزول من جهة القلابات ماشي يبيع ليهو تور في سوق القضارف والدنيا بقت ليل وفي الخلا بتلقى مجهزة حتات للمبيت في الحالات الزي دي
فلقى شجرة مزوبه بشوك كثيف في شكل دائرة قطرة 10 متر او 15 تقريبا...المهم ربط التور وهو طلع فوق الشجرة وكان فيها حتة ممهدة للرقاد
فقبل ينوم سمع اصوات ذئاب (مرافعين) اتلمت حول الشجرة وبقت تكورك وتعوي وما لاقيه طريقة تدخل للتور...وقال هو كان ملاحظ انو التور هادي شديد وما شغال بيهم اصلا
لغاية ما بعد مسافة سمع صوت مرفعين بيعوي من بعيد...شكلو زي زعيم الفصيلة دي...فصاحب التور مراقب من اعلى الشجرة وقال انو لاحظ انو التور دا هاج وكل شعرة في جلدو قامت وبقى ينفخ ويثير الغبار
لغاية ما جا المرفعين الزعيم دا وقال لاحظ المرافعين فجت ليهو الدرب...فقام رجع كم خطوة ونط الشوك ولسوء حظو انو التور كان قوي شديد ومع نطتو وقع جنب قرن التور...فطوالي التور نفضو بره الزريبه
ومنها بقى يكورك المرفعين دا وجرى وجرت وراءه جمع المرافعين الاخرى.

فلماذا اتوتر التور دا لمن سمع صوت المرفعين داك بالذات ورغم بعدو وكان هادي وحوالينو كمية مرافعين بتعوي؟

تاني صديقي دا حكى لي انو شاف بنفسو رواعية في منطقتهم (دوكا) قال مسمين بقرهم باسماء عديل...ولمن يكونو عايزين يحلبوها او عايزنها ترضع صغيرها بنادوها بالاسم دا وبتجي من نص البقر وتنفذ التعليمات

وقال انو شاف برضو شوف عين رواعية قبيلة البني عامر بنادوا التور موش كمان باسم معين..لا بل بنداء بصوت معين...وقال التور بفهم انو في بقرة مفروض يجي يعشرها (عدم المؤاخذة يعني) مع العلم ان النداء بكون على بعد 2 كيلومتر تقريبا

بل من التور يسمع النداء دا بكون تمت الاثارة وبجي جاهز

حكى لي نفس الصديق دا انو هم ذات نفسهم كان عندهم كمية من البقر وفي بعض الانواع منها متوحشه شويه...فقال المتوحشه دي لمن تكون بقت للولادة قال بتمشي تولد على بعد 20 كيلو من القرية وما بتجي الا مرة مرة تشرب مويه وترجع
ولو حاول زول يتابعها عشان يشوفها وضعت الجنى وين بتحاول تتوه المتابعة دا عن مكان الجنى موجود وربما لفت بيك لمن تتعب وتقنع وبعداك هي بتعرف كيف تصل لمحل جناها دا رغم انو ممكن تكون بعدت منو مسافة
فكيف بتعرف طريق الرجعة؟

صديق اخر حكى لي انو اشتغل في فرن على جهة ابو ادم...ومفروض يوزع العيش بكارو حمار لمجموعة من الدكاكين تمتد من ابوادم الى الكلاكلة شرق..
فهو جديد لسه وما بعرف مواقع الدكاكين دي...قال صاحب الفرن اداهو كراس فيهو حسابات كل دكان واسم كل صاحب دكان في صفحة وقاليهو ما عليك الا تركب الكارو دي والحمار براهو بوقفك في كل دكان
وفعلا قال الحمار بقى يوقفو في كل دكان وهو ينزل بالكراس يقوليهو انت فلان يقول نعم يديهو كمية عيشو ويمشي للبعدو...لغاية ما وصل اخر دكان ورجع الى الفرن وقال في طريق الرجعة بقى هو راقد في الكارو والحمار براهو ماشي لغاية ما وصلو الفرن


صديق اخر من احدى الجزر في منطقة المحس قال احد الاهالي كلفو انو يضع كيس الدقيق على ظهر الحمار بتاعو الكان مربوط جنب شاطيء القرية...وقليهو بس ختليهو الدقيق فوق ضهرو وفكليهو الحبل وبعداك انساك منو براهو بمشي البيت...وفعلا الحمار وصل الدقيق الى باب البيت

البوست اضافة للغة الحيوانات ببحث برضو بعض الامور التى ربما تشير الى فهم هذه الحيوانات واستيعابها لكثير من الاشياء

مثلا عندك بناء اعشاش الطيور ينم عن فهم هندسي ومراعاة لجانب الخطر...فبتلقى بعض الاعشاش لها بابين..التاني ممكن يكون بتاع طواريء
وحتى تصميم العش بكون بطريقة محكمة جدا...اتذكر قبل كم شهر بنقعد تحت عمود في الحلة وفيهو لمبة معمول ليها شبك بالاكسبيندر في شكل علبة لها غطاء مقفول بطبلة..وسبحان الله بعد كدا طيرة جات بنت عشها جوه غطاء اللمبة دا...دخلت كيف الله اعلم

وتاني في اعشاش بتلقى في تصميمو في لفة او منفلة كدا..والصغار بكونو على مسافة من المدخل عشان في حالة الخطر يكون في فترة زمنية تقدر الام فيها تنقذ صغارها

وحتى المواد البتسخدمها الطيور لبناء اعشاشها بتلقاها متينة ومرصوصة بطريقة هندسية بديعة وقوية

ولو لاحظت لمسكن ابو الزنان ونوع الطين البستخدمو في البناء بتلقى متين برضو...ومتين ببل الطين دا ومتين ببنى انت ما بتشوفو وبيلقى المويه الببل بيها الطين وين؟

كذلك القنطور بتاع الارضة بتلقاهو واقف شامخ في الخلا ولا تؤثر عليه عوامل التعرية...فهل اختيار نوع الطين المصنوع منو القنطور دا لا يدل على تفكير هندسي ؟

سبحان الخالق

اخيرا دي حلقة عجيبة جدا من حلقات برنامج العلم والايمان للراحل الدكتور مصطفى محمود طيب الله ثراه...حول مملكة النمل...وفي الدقيقة 32 و34 ثانية بحكي عن سيدة برازيلية بتتكلم مع النمل عديل وبفهمها

تابعو الحلقة فهي قمة المتعة

تحياتي أخي أحمد

Quote: وَبِهِ ثنا سُفْيَانُ، عَنْ أَبِي الزِّنَادِ، عَنِ الْأَعْرَجِ، عَنْ أَبِي سَلَمَةَ , عَنْ أَبِي هُرَيْرَةَ قَالَ: صَلَّى بِنَا رَسُولُ اللَّهِ صَلَّى اللَّهُ عَلَيْهِ وَسَلَّمَ , صَلَاةً، ثُمَّ أَقْبَلَ عَلَيْنَا بِوَجْهِهِ فَقَالَ: " بَيْنَا رَجُلٌ يَسُوقُ بَقَرَةً، فَرَكِبَهَا، فَقَالَتْ: إِنَّا لَمْ نُخْلَقْ لِهَذَا، إِنَّمَا خُلِقْنَا لِلْحَرْثِ " فَقَالَ النَّاسُ: سُبْحَانَ اللَّهِ بَقَرَةٌ تَتَكَلَّمُ؟ فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ ,: «فَإِنِّي أُومِنُ بِهَذَا أَنَا وَأَبُوبَكْرٍ وَعُمَرُ» . وَمَا هُمَا ثَمَّ. قَالَ: " وَبَيْنَا رَجُلٌ فِي غَنَمِهِ، إِذْ عَدَا عَلَيْهِ الذِّئْبُ، فَأَخَذَ شَاةً مِنْهَا، فَأَدْرَكَهُ فَاسْتَنْقَذَهَا مِنْهُ، فَقَالَ: هَذَا اسْتَنْقَذْتَهَا مِنِّي، فَمَنْ لَهَا يَوْمَ السَّبُعِ، يَوْمَ لَا رَاعِيَ لَهَا غَيْرِي؟ ". فَقَالَ النَّاسُ: سُبْحَانَ اللَّهِ ذِئْبٌ يَتَكَلَّمُ؟ فَقَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ ,: «فَإِنِّي أُومِنُ بِهَذَا أَنَا وَأَبُوبَكْرٍ وَعُمَرُ» وَمَا هُمَا ثَمَّ "

مرحبا اخي الكريم نصر الدين

والحديث عجيب سبحان الله ولكن هنا اللغة كانت عربية بشرية عديل كدا زما لغة حيوان...ولا ما كدا؟

وهل تفتكر انو الموضوع فيهو شيء من معجزات النبوة؟

وسعدت بمداخلتك القيمة

في الأية الكريمة ..." علمنا منطق الطير"

إذن هنالك لغة .... ولكن تحتاج لمتبحرين متفرغين ....


شكرا بوحميد





عبد العزيز الشغيل

الاخ احمد سيد احمد
لك التحية


http://im40.gulfup.com/JpdKq.jpg
بالله لو لقيت ليك مترجم خليه يترجم الفي الصورة دي بتقول في شنو - الغريبة بيقولو ما عندها صوت - بوستيك لو مرة بيهو بدر الدين احمد موسى ح ينتعش انتعاشة شديدة

معليش لو الصورة فتلت البوست ح اقوم بحذفها !!!

تم التعديل بناء على طلب الاخ نصر الدين عثمان- تقبل تحياتي

الاخ عبد العزيز سلامات

وننتظر معاك لفك شفرات هذا المنطق


الاخ قسم الفضيل تحياتي

والصورة ما مشكلة يازول البوست بوستك افتل زي ما داير

وبكري كان يعملينا مينشين زي بتاع الفيسبوك لمن تكون داير زول يقرا تعليق معين او تاق لو دايرو يشوف صورة معينة

فيابكري شوف طريقة للمينشن دا..الزول يمشي ليهو اشعار في مسنجرو انو فلان عمليك مينشن في البوست الفلاني

تحياتي
لعلك لم تسمع بوجود مهنة المتكلمين مع الحيوانات: animal communicator أو ما يعرف أحيانا بالـ pet psychic وهم أناس يدعون أن لديهم قدرة التكلم تخاطريا مع الحيوانات، وبعضهم يتوصل لمعلومات صحيحة عن الحيوان تثير الدهشة، هنا مثلا واحدة منهم تتكلم مع أصلة وتكلمها الأصلة عن مرض سابق أصيبت به:

السلام عليكم اخي الكريم
أنا شاهدت أناس يتحدثون مع الحيوانات وخاصة الك لا ب وتجد الك لب مطيع ويفهم مايريده صاحبه وهنالك من يحضر الدواء لصاحبه من الثلاجة حكي لي صديق سوداني متزوج اوربيه ان والد زوجته وحيد مع ######ه فى المنزل وعندما يحتاج للدواء من الثلاجة يرسله لاحضاره
لكن الحشرات تفرز فرومونات للتخاطب والنحل يفرز الفيرمونات بلاضافة يرقص في الهواء رقصات في شكل اس ويتخذ من اتجاه الشمس محور ارتكاز لتوجيه العاملات لمكان الغذاء والذكور تحرس الخلية وتمنع الغرباء من الدخول وكلمة السر هي افراز فيرمون محدد الرائحة ولو حللت هذه الفيرمونات لوجدتها تتكون من مواد كيميائية وزمر
ولله فى خلقه شئون

Quote: عليش لو الصورة فتلت البوست ح اقوم بحذفها !!!

تحياتي أخي قسم الفضيل،،

فعلاً حجم الصورة كبير..

آمل إذا كان من المملكن استبدالها بتلك الصورة المصغرة

ولك الشكر والتقدير

يا هلا اخونا محمد عثمان...والله فعلا لم اسمع بالمهنة دي...سبحان الله حكاية عجيبة والله...لكن ياربي يكون فيها نوع من السحر او التواصل مع عالم الجن؟ لانو قالو كتير من الهوام والثعابين دي في اصلها جن

وحاولت احضر الفيديو بس صراحة السماع بتاع الانجليزي ما كويس عندي يعني لو مكتوب كتابة ممكن اتلاجمو بس المسموع ما بقدر افرز منو كتير...لكن بحاول مرة ومرتين واشوف قالت شنو الزوله دي

وشكرا كتير لفتح هذه النافذة الجيدة في موضوعنا

وعليكم السلام اخونا شمس الدين

والله الــ ك ل ب البجيب الدوا دا عجيب عديل...وكمان يمكن يكون التلاجه فيها كم نوع دوا...سبحان الله حكاية عجيبة غايتو

وفعلا قصة التخاطب عبر الروائح والرقص دي سمعتها في حلقة د.مصطفى محمود لكنو قال برضو ليها لغات غير الروائح

شكرا كتير للاثراء يا شمس وخليك معانا قريب

Quote: موضوع شيق جداً .. وأنا برضه أحكي موقف طريف في مسألة تسمية الحيوانات ومعرفتها باسماءها حكاه لي أحد الأصدقاء عن قضية في محكمة بدارفور باشرها بنفسه وكان موضوع النزاع فيها بقره تنازع عليها رجل من قبيلة ضد مرة من قبيلة أخري وكل واحد بيدعي أنها حقته وقام القاضي استعان بالشرتاي أو العمده فحدد زمن جمع فيه الخصمين وبعض الشهود وسأل الرجل الخصم الأول : إنت مسمي البقرة شنو؟ فقال ليهو مسميها رشاد قال ليهو ناديها فناداها كم مرة باسم رشاد البقرة ما حركت أي ساكن كأنه صبت فيها مطرة ، فقام العمدة سأل المرة وإنتي مسمياها شنو ؟ المرة قالت مسمياها سدلي ونادتها سدلي سدلي البقرة كأنها مخلوعة انتفضت وجاءت جارية علي المرة قام الشرتاي قاليها خلاص سوقيها بوشك .. وقصة أخري عن جيراننا كان عندهم كديسة معذباهم عذاب شديد في البيت فكلفوا أحد الجيران وكان عنده بوكس بيمشي بيهو مشاوير بعيده ووضعوا الكديسة في شوال وطلبوا منه أن يرميها في أبعد مكان يصل ليهو ..وحكي لي الرجل قال أنه ألقي الكديسة من الشوال علي بعد حوالي 40 كيلو متر لكن للدهشه الكديسة رجعت بيت الجيران قبل ما صاحبنا يجي راجع من شغله ..ياأخي ليس لناإلا أن نقول سبحان الله

((وما من دابة في الارض ولا طائر يطير بجناحيه الا أمم أمثالكم ))

الأخ احمد سيداحمد
لك الود والتحايا الطيبات
سائر الحيوانات تتكلم بلغة مفهومة كما هو واضح من الآية الكريمة التي ذكرتها
والتي جاءت على لسان نبي الله سليمان .. أيضاً الحوار الذى تم بين سليمان عليه
السلام والهدهد .. وقد سبق لي أن رأيت فيديو للدكتور مصطفى محمود وقد قام
فيه بعرض رجل أفريقي يتكلم مع طائر ويخاطبه متسائلاً ويرد الطائر عليه واللغة
عبارة عن صوت الطائر تستطيع أن تميز فيه بعض الحروف التي ننطقها وقد كان
الحوار كالتالي:
الرجل: هل تعرف مكان خلية النحل؟
الطائر: نعم أعرفها ..
الرجل: هل يمكن أن تعلرفني على مكانها؟
الطائر: ماذا تعطيني إن فعلت..
الرجل: سأستخرج العسل وأعطيك وجبة منه
الطائر: حسناً سأطير من شجرة لأخرى فاتبعني
وفعلاً أخذ الطائر يطير من شجرة لأخرى فينتظر الرجل وعندما يصله ينتقل لشجرة
أخرى إلى أن أوصله إلى خلية نحل في طرف الجبل .. فأشعل الرجل الدخان واستخرج
الخلية وأخذ عوداً صغيراً وأدخله في العسل ثم وضعه على الشجرة وقال للطائر: هذا
نصيبك .. فرك عليه الطائر وشرع في الأكل .... حاولت البحث عن هذا الفيديو في
اليوتيوب ولكني لم أفلح في العثور عليه.
أما في شرق السودان فمسألة أكثر من عادية أن تحمل كل بقرة إسماً وعندما يأخذها الراعي
إلى المرعى وتستتب الأمور .. يعد قهوته ويشربها بطقوسها وبعد الفراغ منها يبدأ في
مناداة أبقاره الواحدة تلو الأخرى وبإسمها فتأتيه البقرة وتقف بجواره فيأمرها برفع رجلها ..
ويفتش أماكن الضرع بحثاً عن الهوام ى.. فيزيل كل هامة قد تعلقت بها .. وعند الفراغ من ذلك
فإنه يضربها في صلبها بكفة يده ضربة خفيفة فتعود إلى مرعاها .. لينادي أختها .. هذا طبيعي
جداً .... رحم الله جدتي .. كنت أذهب إليها في إجازة الدراسة وهي تسكن في منطقة خلوية ..
فبمجرد أن أصل ترسل لإبنها في الخلاء وتقول له "أرسل (تئيلا) وهذا إسم بقرة ويعني (البيضاء)
فتصل البقرة للبيت فيعلم الرعاة من إستدعاء البقرة أنني جئت من البندر .. كانت تئيلا تكرمني
بعطاء وفير من اللبن .......
للموضوع بقية .... سأعود إن شاء الله .... ودي وتقديري ....

الببغاء الذي أثبت أنه يفهم فعلا اللغة التي يتكلم بها وليس مجرد حفظ، المرحوم ألكس:

سلام عليكم يا اخونا بابكر
وماشاء الله مداخلتك ثرة جدا والله واضافت تجربة شخصية مثيرة
وربنا يرحم جدتك ويسكنها فسيح جناته
فتشت برضو بعد كلامك حلقة دكتور مصطفى محمود لكن ما لقيت شي وبحاول افتش تاني
وانت كمان اجتهد لينا في الحلقة دي بالله ومنتظرين عودتك تاني
والله يديك الف عافية

اخونا سيف اليزل شكرا على القصة المقتبسة وفعلا القاضي طلع زول ذكي جدا وقدر يقيم الحجة على المدعي بطريقة قاطعة شديد

شكرا كتير على اثراء الخيط وابقى قريب


اخونا محمد عثمان تاني شكرا ليك كتير على حلقة الببغاء والله يديك العافية وتاني مدنا بالمزيد شكلك متبحر في الموضوع

سلام ...
رأيكم شنووو؟؟؟؟؟؟؟؟؟؟
ببغاء في الامارات يقرأ القران الكريم ويدعو للمؤمنين ...

*

سبحان الله لم ارى هذه الحلقة من برنامج العلم والايمان عند كتابة هذا البوست

وبدا الدكتور بنفس اية النملة

تقريبا دي الحلقة الانت قصدتها يا اخ بابكر قدور

أخي احمد سيداحمد
لك الود والتحايا الطيبات
هي نفس الحلقة التي وصفتها لك .... لك شكري الجزل
على الإخطار .... سأحتفظ بصورة منه للأهمية ولي
عودة أخرى لمزيد من التعليق .. تحياتي ومحبتي ....

سلامات اخونا بابكر
امس بالصدفة رجعت فتشت اليوتيوب وقلبت عبارات البحث لغاية ما لقيت الحلقة والبركة فيك انت اولا واخيرا لانك الوريتنا انو في حلقة اساسا عن الموضوع دا

لكن تعرف حتى د.مصطفى بردد كتير خلال الحلقة انو العلماء فقط قدروا يستنتجوا اصوات الحيوانات لمن يكون دعوة للجنس او الحب او لمن يقول الحيوان هذا عشي او مسكني

ويمكن اكتر حتة واضحة في الحلقة هي حتة الطائر الذى دل الرجل الافريقي على مكان الخلية

وحتة القرود لمن يشوفوا ثعبان فبيصدروا صوت معين ومتفرد

غير كدا باقي الحلقة كلو استنتاجات قد تصيب وقد تخطيء

لكن في النهاية اجتهدوا الخواجات وما قصروا ابدا

ولك كامل الود وننتظر عودتك القادمة

Quote: قوله تعالى : { علمنا منطق الطير } : فيها مسألتان : المسألة الأولى : القول في منطق الطير ، وهو صوت تتفاهم به في معانيها على صيغة واحدة ، بخلاف منطقنا ، فإنه على صيغ مختلفة ، نفهم به معانيها . قال علماؤنا : وفي المواضعات غرائب ; ألا ترى أن صوت البوق تفهم منه أفعال مختلفة من حل وترحال ، ونزول وانتقال ، وبسط وربط ، وتفريق وجمع ، وإقبال وإدبار ، بحسب المواضعة والاصطلاح . وقد كان صاحبنا مموس الدريدي يقرأ معنا ببغداد ، وكان من قوم كلامهم حروف الشفتين ، ليس لحروف الحلق عندهم أصل . فجعل الله لسليمان معجزة فهم كلام الطير والبهائم والحشرات ; وإنما خص الطير لأجل سوق قصة الهدهد بعدها . ألا تراه كيف ذكر قصة النمل معها ، وليست من الطير . ولا خلاف عند العلماء في أن الحيوانات كلها لها أفهام وعقول . وقد قال الشافعي : الحمام أعقل الطير . وقد قال علماء الأصوليين : انظروا إلى النملة كيف تقسم كل حبة تدخرها نصفين لئلا ينبت الحب ، إلا حب الكزبرة فإنها تقسم الحبة منه على أربع ; لأنها إذا قسمت بنصفين تنبت ، وإذا قسمت بأربعة أنصاف لم تنبت . وهذه من غوامض العلوم عندنا ، وأدركتها النمل بخلق الله ذلك لها . وقال الأستاذ أبو المظفر شاه نور الإسفراييني : ولا يبعد أن تدرك البهائم حدوث [ ص: 473 ] العالم ، وخلق المخلوقات ، ووحدانية الإله ، ولكنا لا نفهم عنهم ، ولا تفهم عنا ، أما أنا نطلبها وهي تفر منا فبحكم الجنسية . ________________ عن "احكام القران لابن العربي المالكي