Post: #1
Title: عزيزي هشام هباني.. مع التحية والاحترام
Author: اميرة السيد
Date: 05-17-2013, 03:03 PM
Parent: #0
عزيزي هشام هباني
تحية طيبة وبعد
قبل ان اكون عضوة في هذا المنبر الأسفيري كنت انت من اوائل الكتاب الذين اقرأ لهم بطريقة مستديمة وكنت معجبة جدا بصراحتك التي تثير فعلا الاعجاب والتقدير.. واتذكر عندما هاتفت سيد الحوش الباشمهندس بكري بالتلفون في اول يوم عضويتي وشرحت له اسباب طلبي العضوية بأنني اشرت ان هناك ناس جيدين في المنبر مثل هشام هباني.. وكان مصدر اعجابي بصراحتك انك كنت تقول انك شغال سواق تاكسي لأن هناك ناس يخجلون من الاشارة إلى وظائفهم اذا كانت وظائف هامشية حتى ولو كانوا في الحقيقة مهندسين واطباء ومعلمين ومحامين وأدباء واضطرتهم ظروفهم القاسية في بلدان الغربة العمل في هذه الأعمال الهامشية التي لا تناسب مقدراتهم العلمية والعملية بسبب السياسات الخرقاء التي تنتهجها الطغمة العسكرية في الخرطوم..
لقد كنت اؤيدك في كل ما تكتبه ضد الطغمة الحاكمة في الخرطوم لأنهم هم الذين قاموا بتشريد هؤلاء الأكفاء من وظائفهم في ظل عملية تطهير عرقي ممنهج لأنهم فقط لا ينتمون إلى تنظيم الأخوان المسلمين وذلك في اطار (أخونة) الوظائف القيادية وغير القيادية .. حتى انهم رفدوا فراشين في مدارس لأنهم ما اخوان مسلمين.. ( تصور).. واجد لك العذر كل العذر. كما اجد العذر لكل المعارضين في هجومهم الشرس ضد الحكومة العسكرية التي تستخدم الدين لخدمة السياسة التي تنتهجها من اجل السلطان والمال والجاه..
ولكن اختلافي معك يا عزيزي هشام هباني يأتي من عدم تقبلك للرأي الآخر وانك دائما تقوم بشخصنة الأمور وتجعل الاختلاف في الرأي والفكر أمر شخصي بحت .. واكتب لك اليوم لأني فقط اضعك من ضمن اركان كتاب هذا المنبر الجيدين .. اكتب لك تعليقا عل البوست الذي كتبته بعنوان:" رضا . رضا ..رضا:: وذلك بوصفه انه يؤيد نظام الانقاذ القمئ.. واختلافي معك يحده شيئان أولهما( وطبعا هنا بحاول استخدم اسلوب السيد الصادق المهدي ، رئيس الوزراء الشرعي للسودان، الذي دائما يرتب كلامه بأولا .. وثانيا .. وثالثا) ( وجه ضاحك)..
أولا: ان رضا كتاباته دائما متوازنة جدا ولا يستخدم اي اسلوب جارح ضد اي عضو آخر.. ولاحظت انه انما فقط ينقل الخبر.(. وناقل الكفر ليس بكافر) واسلوبه في الكتابة يتسم بالأدب الجم والراقي ولم نر منه من قبل اسلوب منكر او جارح.. وهو من الكتاب الذين نستفيد منهم في مجالات اخر عديدة..
ثانيا: يجب ان نعطي دائما الفرصة للرأي الآخر كي يعبر عن رأيه وفكره ونحاوره بالمنطق وليس بالأسلوب الجارح الذي سيجعله يبتعد عن المنبر.. واذا كان كل كتاب المنبر العام من اتجاه واحد فقط لأصبح المنبر مسيخا .. لأن الرأي الآخر هو الذي يثري المناقشات والحوار..
ثالثا: اتمنى ان تقوم بتوجيه اعتذار لطيف لرضا وتقول ليه:" معليش يا رضا .. انا سخنت معاك شويتين عشان انا بكره الجماعة ديل كراهية عمى .. ولكن منذ الآن سأحاورك بمنطقك وابين لك مساوئ هذا النظام الذي يقود السودان لهاوية لا يعلم مداها إلا الله"..
عزيزي هشام هباني .. عشمنا فيك كبير وخاصة وانك من اسرة الهبانية المشهورين بالكرم والشهامة..
والله يديك العافية والصحة..
التعديل لخطأ مطبعي
|
Post: #2
Title: Re: عزيزي هشام هباني.. مع التحية والاحترام
Author: هشام هباني
Date: 05-17-2013, 03:36 PM
Parent: #1
الاخت الفاضلة اميرة السيد
تحياتي واحترامي
وحبابك الف ولك ايضا كل المعزة والاحترام بسبب مواقفك المبدئية الواضحة تجاه الطغمة الحاكمة باسم الدين في الخرطوم وجيد انك طرقت هذا الموضوع المتعلق باخينا Ridaa وهو موضوع لللاسف قام بسحبه صاحب الحوش حيث لا اري سببا وجيها بسحبه فهو موضوع عادي ومشروع ينتقد الموقف المستجد لصاحبناRidaa والذي انتقل هذه المرة نقلة نوعية فجائية في مواقفه حيث انتقل من سلبية الضبابية الي التأييد الواضح والمستفز لهذه الطغمة المجرمة عدوة شعبنا وبالطبع دورنا في هذا المنبر ان نتحاور مع الراي الاخر وهكذا جاء الخيط باسم اخينا Ridaaلجره الي هذا الحوار المشروع جدا حول هذا الموقف المستجد في سيرته لنسمع منه .. ويشهد كل من تداخل في الخيط انه موضوع عادي ومن غير اي اساءات او هتر او شخصنة لطالما يتطرق الي موقف عام وليس الي سيرة صاحبنا الشخصية ولكن يبدو ان صاحبنا ازعجه انني تصديت له بالاسم وهو ما اعتبره شخصنة بل دعوة مباشرة للحوار واتمني من الاخRidaa ان يتقبل الراي الاخر لطالما تبني اليوم موقفا واضحا في دعم الطغيان في بلادنا وعليه ان يتحمل وزر خياره الداعم لطغمة الاجرام والفساد وهو امر ليس شخصيا بل عاما يتضرر منه شعبي وانا جزء من هذا الشعب...مع خالص مودتي واحترامي
|
Post: #4
Title: Re: عزيزي هشام هباني.. مع التحية والاحترام
Author: هشام هباني
Date: 05-17-2013, 03:56 PM
Parent: #3
الاخت العزيزة اميرة
يبدو ان ما ازعج اخانا هو طلبي المشروع منه بنزع القناع عن نفسه وليكتب باسمه الحقيقي ويعرفنا بنفسه حتي نواجه انسانا صاحب موقف وليس شبحا
وهو طلب مشروع تقتضيه الشفافية واخلاق الحوار لان الاختباء خلف( لقب) من غير التعرف علي سيرة صاحبه سوف يجعل من موقفه العام منقوص
الصدقية لان السيرة الذاتية للمحاور مهمة وهي تؤكد ثقته بنفسه وما يحمله من مباديء عامة وايضا ستعرف الناس به لطالما قرر الخوض في امور عامة
ليتحمل المسئولية الاخلاقية كاملة في الزود عن مواقفه.
|
Post: #5
Title: Re: عزيزي هشام هباني.. مع التحية والاحترام
Author: اميرة السيد
Date: 05-17-2013, 04:47 PM
Parent: #4
عزيزي هشام هباني
لقد قرأت مواضيع الأخ رضا .. والأخبار التي اوردها هي مكتوبة في الصحف . وارى انه لم يمجد الحكومة ولا يغني لها يعني كما يفعل ناس ود الباوقة ولكني فقط اود ان اقول ان من الواجب احترام رأي كل شخص ومواقفه العامة تجاه المسائل العامة.. وقديما قال الفيلسوف الكبير: "قد اختلف معك في الرأي ولكني سأدافع عنك حتى الموت كي تقول رأيك."..
وحأديك مثال بسيط واقعي.. زميلتي في الدراسة صديقة عزيزة جدا وهي اقرب صديقاتي على الرغم من انها اخت مسلمة ( يعين كوزة) ولا تخفي تأييدها لنظام الأخوان المسلمين وتتكلم كثيرا عن المشروع الحضاري لنظام الانقاذ وانا احاورها كثيرا في هذ المسألة لأن عندي خلفية دينية بوصف اني نشأت في بيت صوفي ومتأثرة بعض الشئ بالتعاليم الصوفية.. واهاجمها بشدة في مواقفها المؤيدة للفساد الحاصل في البلد .. ولكن كل ذلك لم يمنع ابدا من ان نكون صديقات نتحاور بشئ من الألفة والمودة... وهي تنتقدني باني لست محجبة.. واقول لها بان زعيمكم الترابي هو الذي فند مسالة الحجاب وقال ان الحجاب ليس اصل في الاسلام.. وتقول لي ان الترابي خرف .. واقول لها .. لا.. ان الترابي لم يخرف لكنه مطعون من الخلف من تلاميذه الذين رباهم هو .. وفي اول لفة مصالح شخصية وجري وراء الجاه والسلطان باعوه للشيطان... وهكذا الحوار بيننا لم يفسد صداقتنا ابدا....( وبعدين يعني خفف من زعلك شوية .. وقول لصاحبك رضا معليش..، وانت سيد الفهم والرأي..و عشان كمان سيد الحوش ما يزعل مننا ويقوم يسحب البوست ده قبل ما يؤدي غرضه..
والله يديك العافية
|
Post: #6
Title: Re: عزيزي هشام هباني.. مع التحية والاحترام
Author: ترهاقا
Date: 05-17-2013, 05:23 PM
Parent: #5
الحبيب هباني
| Quote: الاخت الفاضلة اميرة السيد |
ابنتنا أميرة كبيرة في فهمها وكتاباتها لكن هي من مواليد الجيل الجديد
ا
يلا نخليكم تواصلوا النقاش
|
Post: #7
Title: Re: عزيزي هشام هباني.. مع التحية والاحترام
Author: سامى عتبانى
Date: 05-17-2013, 05:36 PM
Parent: #5
Quote: ( وبعدين يعني خفف من زعلك شوية .. وقول لصاحبك رضا معليش..، وانت سيد الفهم والرأي..و عشان كمان سيد الحوش ما يزعل مننا ويقوم يسحب البوست ده قبل ما يؤدي غرضه..
والله يديك العافية |
كبيره يا اختي اميره
ربي يديك الصحه والعافيه
|
Post: #8
Title: Re: عزيزي هشام هباني.. مع التحية والاحترام
Author: اميرة السيد
Date: 05-17-2013, 07:19 PM
Parent: #7
Quote: [لكن هي من مواليد الجيل الجديد [
>>>>>>>>>>>>>>>>>>>>>>>>>
عزيزي ترهاقا( وبالمناسبة لقبك يذكرنا بالعهد المجيد والمجد الذي كان يعيش فيه السودان في عهود ترهاقا وبعنخي)..
قد اكون من الجيل الجديد ولكني بصراحة انتقد في جيلي الجديد الكثير من السلبيات واذا رجعت لبوست الشاعر المرهف ادريس والمعنون:" الموصلي ده كمان منو؟؟ سوف تعرف بعضا من جوانب هذه السلبيات.. والجيل الجديد المابيعرف الفنان القامة الموصلي ممكن كمان بيجهل بعنخي وترهاقا وبيجهل اعضاء مؤتمر الخريجين الجابو لينا استقلال السودان..
والحمد لله انا بعرف الموصلي معرفة جيدة... وهو جدير ان يوضع اسمه في قائمة" اسماء في السودان" ( بحث يخصني).. ( اها يا ترهاقا بعد ما سمعت كلامك بقيت اشكر في نفسي.. وشكار نفسه ابليس..
مع قواسيب من الود والإمتنان لحسن الظن..
والله يديك العافية
|
Post: #9
Title: Re: عزيزي هشام هباني.. مع التحية والاحترام
Author: اميرة السيد
Date: 05-17-2013, 07:38 PM
Parent: #8
[]كبيره يا اختي اميره [/
.................................
عزيزي سامي العتباني
والله ما كبيرة( انا يا دوب عمري 20 سنة..( وجه ضاحك)...
ليك الشكر والامتنان لهذا الاطراء الذي اشعر باني لا استحقه .. وانما محاولات من جانبي لتطبيب الخواطر وتخفيف زعل هشام هباني...
ويا ود العتبانية اذ ا عملت لي واسطة وشغلتني صحفية في جريدتكم " السودان الجديد" هسع برجع السودان..." وان شاء ما اكون غلطت في اسم الجريدة ولكني بعرف ان اسماعيل العتباني صاحب الجريدة..
شفت نحن بنستفيد من المنبر العام كيف...؟؟؟
والله يديك العافية والصحة
|
Post: #10
Title: Re: عزيزي هشام هباني.. مع التحية والاحترام
Author: حافظ انقابو
Date: 05-17-2013, 10:04 PM
Parent: #9
الله ينور عليك يا أميرة .. بالفعل أميرة
يرجى منك كثيراً يا صديقة ..
لك وللخال هباني تحية واحترام
|
Post: #11
Title: Re: عزيزي هشام هباني.. مع التحية والاحترام
Author: هشام هباني
Date: 05-18-2013, 05:52 AM
Parent: #10
الاخت الفاضلة اميرة
لا اعتقد يا اختي ان هنالك ما يستوجب الاعتذار للاخ Ridaa لانه لم تصدر من جانبي اية إساءة في حقه بل كانت مجرد تساؤلات استنكارية مشروعة لموقفه الداعم للطغمة وهو يروج لنصرتها ودعمها في حربها الظالمة ضد ضحاياها من اهلنا في دارفور وكردفان ولذا بالمنطق والاخلاق هذا الشخص هو وليس أنا مطالب ان يعتذر لشعب السودان عن مؤازرته المكشوفة لأعدائه اي هذه الطغمة المجرمة وقد عبر عن هذا الموقف بتلكم الخيوطً المخجلة والداعمة للطغاة والطغيان .
|
Post: #12
Title: Re: عزيزي هشام هباني.. مع التحية والاحترام
Author: الزبير بشير
Date: 05-18-2013, 06:31 AM
Parent: #11
الابنه اميره
ليكي التحيه العطره
اخذت ليكي طريقه صوفيه و له لسع ما اقتنعتي بالطرق الصوفيه
ود هباني ده نحن رامين طوبته ربنا اهديه
الواحد اسوق تكسي ما عيب لكن اكون عيب جدا ان الواحد سب الاكبر منه سنا مثلا ذي السيد محمد عثمان الميرغني
الزبير الختمي
|
Post: #13
Title: Re: عزيزي هشام هباني.. مع التحية والاحترام
Author: Hisham Osman
Date: 05-18-2013, 07:18 AM
Parent: #12
Quote: الواحد اسوق تكسي ما عيب لكن اكون عيب جدا ان الواحد سب الاكبر منه سنا مثلا ذي السيد محمد عثمان الميرغني
|
كفاية مسبة لمحمد عثمان الميرغني, انك مالقيت ليه فضيلة تقيه السب
سوي كبر السن...
|
Post: #14
Title: Re: عزيزي هشام هباني.. مع التحية والاحترام
Author: طه جعفر
Date: 05-18-2013, 12:45 PM
Parent: #13
الاخت الفاضلة اميرة السيد
دعينا نختلف.
ما يكتبه هشام هباي في المنبر هو اثبات وتوضيح للرأي الآخر المعارض في ظل ظرف سياسي محدد
النظام الحالي معروف لدي الجميع و ممارساته معروفة جدا في مصادرة جميع حقوق الانسان و انتهاكها.
السؤال الذي يطرح نفسه لماذا يختار العضو رضا من الغثاء المنشور في صحف الخرطوم هذه العناوين ألا يدل ذلك علي موقف سياسي جديد
و انا عليم جدا بمواقف العضو رضا و غيره من جماعة عصا نايمة و عصا قايمة
ما فعله هشام هباني هو وضع النقاط علي الحروف
و ليفعل رضا كما فعل غيره من اصحاب المواقف الغبشاء و ليقل للناس انا ما كوز !!!!!!!
حتي نضحك عليه لان من يقول ذلك هو في الحقيقة لا يعلم انه بجهله و سوء تفكيره يساند نظاما مجرما باتخاذ موقف غير واضح
لو كنا جميعا واضحين في مواقفنا لما حكمنا النظام الفاسد المتجبر لكل هذه الفترة
لقد ساند معظم السودانيون هذا النظام الفاسد المجرم الذي اذاقهم الذل و الهوان مساندة كبيرة بالصمت و السكات و المساندة المجانية بالكلام المغطي و فاضي و خمج
ولقد انخدعوا لدعايته الدينية الزائفة و ما زالوا ينخدعون
أليس هذا عبثيا و مضحكاً
طه جعفر
|
Post: #15
Title: Re: عزيزي هشام هباني.. مع التحية والاحترام
Author: الصادق الزين
Date: 05-18-2013, 12:57 PM
Parent: #13
| Quote: قاموا بتشريد هؤلاء الأكفاء من وظائفهم في ظل عملية تطهير عرقي ممنهج لأنهم فقط لا ينتمون إلى تنظيم الأخوان المسلمين |
يا ترى هل حقيقة التطهير العرقى فى السودان من قبل الحكومة سببه عدم إنتماء المطهرون إلى تنظيم الأخوان المسلمون؟
أم الإنتماء إلى مجموعات عرقية مخالفة!!
يا جماعة النقد الناعم دا مرجعيته شنو؟
______________________________
يا أميرة لسه فى الأمم المتحدة و لا نقلوك منها؟ أخونا نادر ضرار بسأل منك.
|
Post: #16
Title: Re: عزيزي هشام هباني.. مع التحية والاحترام
Author: اميرة السيد
Date: 05-18-2013, 04:22 PM
Parent: #15
Quote: أم الإنتماء إلى مجموعات عرقية مخالفة!!
يا جماعة النقد الناعم دا مرجعيته شنو؟
. |
<<<<<<<<<<<<
عزيزي الصادق الزين
اولا يا عزيزي الفاضل اذا انت قاصد بكلامك ان ناس الانقاذ بيرفدوا ناس بينتموا لقبيلة معينة واذا انت مفتكر ان حكومة السجم والرماد دي بيسيطر عليها قبيلتين وهما الجعليين والشايقية ، فأكيد انت غلطان وذلك لسبب بسيط جدا وهو ان اكثر الناس الرفدوهم هم من القبيلتين ديل .. وبعدين في علمك ان تنظيم الأخوان المسلمين لا يعترف بالقبائل ولا بالجهوية وبيعترف فقط انك تكون منضم في التنظيم بصرف النظر عن قبيلتك او الجهة الجاي منها .. وانت اتلفت حولك براك وشوف الناس المسيطرين على مفاصل الاقتصاد السوداني والمسيطرين على المراكز الخدمية وقيادات القوات المسلحة من وين؟؟؟؟ عشان تعرف الحقيقة..
وبعدين النقد الناعم ده ... عشان نحن نواعم....( وجه ضاحك)..
والنقد لازم يكون ناعم يا الصادق .. لأن النقد الصوت عالي وبدون فائدة ما بيأدي لنتيجة .. وانت براك شايف ناس المعارضة البصرخوا وحتى بيستخدموا العنف المسلح ما قدروا يحركوا شعرة من جذور النظام العسكري الحاكم .. واذا استمر الحال كده والمعارضة بقت كواريك وتهديد باستخدام القوة .. فإن ناس الانقاذ حيكونوا حاكمين البلد لأبد الآبدين...
وفي مصر وفي تونس وفي ليبيا بدأ الشعب في زعزعة النظم الحاكمة اولا بكلام ناعم عبر الانترنت حول ضرورة اقتلاع النظم الدكتاتورية ولكن كان نهجهم مركز وبشئ من المنطق وتشجيع المواطنين للخروج للتعبير عن رأيهم والمطالبة بحقوقهم ( وارجع للمواقع الإلكترونية ، وخاصة موقع ذلك الشاب المصري الذي فجر الثورة المصرية) وشوف الأسلوب الكان بيكتب بيه...
وهسع انتو عندكم فرصة كبيرة وعندكم موقع الكتروني مشهور يقرأه الآلاف يوميا ( وهو سودانيز اون لاين ) وكانت المعارضة ممكن تستفيد من الفرصة دي وتكتب الكلا المنطقي البقبله العقل والبيقبله المواطن السوداني البسيط العائش هناك في السودان ويكتوي يوميا بنيران الطغمة الحاكمة التي تسرق امواله وحقوقه جهارا نهارا وبدون حسيب او رقيب... ..
وراجعة ليك تاني اكمل الكلام...
والله يديك العافية
|
Post: #17
Title: Re: عزيزي هشام هباني.. مع التحية والاحترام
Author: اميرة السيد
Date: 05-18-2013, 05:01 PM
Parent: #16
عزيزي طه جعفر
نحن شايلين جردل الموية وبنطفئ في النيران وانت شايل جالون البنزين وبترش في النيران عاوز تأججها زيادة( وجه ضاحك)..
يا جعفر الكلام المنطقي والكلام البيقبله رجل الشارع السوداني البسيط هو الذي ليه تأثير قوي... وجيل اكتوبر 64 وجيل 83 ما كانوا ساكتين ساكت .. وزمان طلاب جامعة الخرطوم كان عندهم المنطق
المقبول ده واقنعوا الشارع بالخروج للمطالبة بحقوقهم واقنعوا المحامين والقضاة والدكاترة الذين كانوا راس الرمح في الثورتين... ولكن هسع الوضع يختلف .. الجيل الحاضر في السودان اهتماماتهم بقت حاجات ثانية . حامياني .. كما يقول دكتور البوني..
وكمان اقرأ ردي للصادق ثاني
والله يديك العافية
|
Post: #18
Title: Re: عزيزي هشام هباني.. مع التحية والاحترام
Author: هشام كمال عبادي
Date: 05-18-2013, 07:11 PM
Parent: #17
اختنا أميرة السيد ..
انتي بتنفخي في قربة مقدودة مع الأسف ..
ودي مشكلة بيعاني منها الكثيرين هنا وبتاخذهم العزة بالاثم ..
والمطبلاتية بتاعين الجماعة ديل بيساعدوهم في عدم الاعتراف والاعتذار ..
تفتكري العلاج شنو ؟
|
Post: #19
Title: Re: عزيزي هشام هباني.. مع التحية والاحترام
Author: aydaroos
Date: 05-18-2013, 08:39 PM
Parent: #18
ما أتفق فيه مع الزميلة أميرة هو (عدم شخصنة الحوار)
فليكن زميلنا فلان هو الداعم الأول للإنقاذ في البورد ... دا بي يخليني أحاول أعمل حاجتين:
1- أعري أفكاره ... أفكاره وليس شخصه.
2- بالحجة أحاول أن إستميله لمعسكر الرافضين للنظام.
عارف إنو نحنا بشر .. وفي ناس مستفزين في مواقفهم ، لكن العاوز التغيير بي يصبر عليهو.
ومواجهة الزملاء بإستفزاز لن تغير آراءهم .. إن لم تجعلهم يغالون في الخصومة ..ودا ما من مصلحة الحوار
خصومتنا مع السلطة وليس مع من تم تضليلهم بدعايتها
سلام ليكم جميعاً
|
Post: #20
Title: Re: عزيزي هشام هباني.. مع التحية والاحترام
Author: اميرة السيد
Date: 05-19-2013, 00:31 AM
Parent: #19
Quote: عارف إنو نحنا بشر .. وفي ناس مستفزين في مواقفهم ، لكن العاوز التغيير بي يصبر عليهو.
ومواجهة الزملاء بإستفزاز لن تغير آراءهم .. إن لم تجعلهم يغالون في الخصومة ..ودا ما من مصلحة الحوار
خصومتنا مع السلطة وليس مع من تم تضليلهم بدعايتها
سلام ليكم جميعاً |
>>>>>>>>>>>>>
عزيزي عيدروس
تراك جبت النجيضة من النهاية
والله يديك العافية
|
Post: #21
Title: Re: عزيزي هشام هباني.. مع التحية والاحترام
Author: Elmosley
Date: 05-19-2013, 00:53 AM
Parent: #20
يا أميره شكرا لك وحقو ننصبك أميرة للعقلانيه
الصديق هباني انا بعزو وبحترموا جدا
لكن انا بعتقد ان سبب استمرار الانقاذ هو أن معارضتنا لها
لم تكن بالصوت العالي المتزن ولكنها اختطت طريق الصراخ
هنالك طرفين في هذا الصراع.
الحكومة ونحن وقد ظلت الحكومة تستغل
اشياء كثيرة من صراخنا وتزييف مفهومها ثم ترضعها لشعبنا الغلبان في قالب كثيف الخبث
وقد كان هذا ليس ديدن العزيز قباني فقط بل ديدن الكثيرين منا
خلاصة الامر إن اردنا الانتصار للحرية فعلينا إعمال العقل
وحينها سيفهم الشعب مقصدنا النبيل وحتما ستسقط الانقاذ
تحياتي لكليكما
|
Post: #22
Title: Re: عزيزي هشام هباني.. مع التحية والاحترام
Author: اميرة السيد
Date: 05-19-2013, 01:48 PM
Parent: #21
عزيزي الاستاذ الفنان الموصلي
هلت الأنوار والله .. واطراءك تاج على رأسي..
والكلام القلته ده بالضبط ما كنت اود ان اعبر عنه...
وانت والاستاذ السني قمران يضيئان في هذا المنتدى
والله يديك العافية
|
Post: #23
Title: Re: عزيزي هشام هباني.. مع التحية والاحترام
Author: عواطف ادريس اسماعيل
Date: 05-21-2013, 07:25 AM
Parent: #22
Quote: والله ما كبيرة( انا يا دوب عمري 20 سنة..( وجه ضاحك)...
ليك الشكر والامتنان لهذا الاطراء الذي اشعر باني لا استحقه .. وانما محاولات من جانبي لتطبيب الخواطر وتخفيف زعل هشام هباني...
ويا ود العتبانية اذ ا عملت لي واسطة وشغلتني صحفية في جريدتكم " السودان الجديد" هسع برجع السودان..." وان شاء ما اكون غلطت في اسم الجريدة ولكني بعرف ان اسماعيل العتباني صاحب الجريدة..
شفت نحن بنستفيد من المنبر العام كيف...؟؟؟ |
عمر الزهور والورود والهنا ...
الغالية أميرة طول عمرك عاقلة ورزينة يا بعد عمري
يديك العافية
|
Post: #24
Title: Re: عزيزي هشام هباني.. مع التحية والاحترام
Author: garjah
Date: 05-21-2013, 08:55 AM
Parent: #23
اميرة السيد
رئيسة لجنة حكماء المنبر
حنكك سنين
وان شاء الله يطمر في حبيبنا هشومة عدو الحيكومة ده
المشكلة أننا لا نعطي الاخر الحق في التعبير عن رايه
وديدن الجميع هنا هو شخصنة العداء
ونتج عن ذلك قاموس جديد من الالفاظ لم نعهده من قبل
ويا هشام
بالاضافة لكلام زميلتنا اميرة السيد انت قبل كده كتبت كلام لا يليق ابدا بزميلنا وود حلتنا عبد الوهاب علي الحاج ( وهبة ) وهو ايضا يطلبك اعتذار
وانا اعرف ان شجاعتك تؤهلك لمثل هذا الاعتذار لوهبة الجميل
|
Post: #25
Title: Re: عزيزي هشام هباني.. مع التحية والاحترام
Author: اميرة السيد
Date: 05-21-2013, 01:18 PM
Parent: #24
عزيزي قرجة
ده كله من ذوقك الرفيع يا غالي..
وبعدين ما تشكرني كثير كده نقوم نصدق كمان بالجد باننا بقينا حكماء.. وكلامك كله منطقي ، وكيف ما يكون منطقي وانت شايل لقب فارس من فرسان السودان شهدت له ميادين المعارك من اجل السودان جولات وصولات.. ( ابوقرجة)..
والله يديك العافية.. وما عدمناك..
|
Post: #26
Title: Re: عزيزي هشام هباني.. مع التحية والاحترام
Author: اميرة السيد
Date: 05-21-2013, 01:23 PM
Parent: #25
الحبيبة عطوفة
اشرقت الأنوار ومراحب وسعيدة جدا بمرورك في بيتنا.. وفتشت اغنية جميلة جدا انزلها ليك هنا وما لقيتها ( العنبة الرامية فوق بيتنا) وبتخيل لي للشاعر اسحق الحلنقي..
والله يديك العافية
|
|
|