Post: #1
Title: اجي يا مدني
Author: عباس الدسيس
Date: 05-11-2013, 12:24 PM
Parent: #0
زول صاحبنا بتاع كورة بلعب باك يمين كلامو كلو كورة غيرا ما بعرف ونسة علاقة مع جكس مافي نهائي شغلتو كلها من تصبح الواطه افتش الرماد وين عشان اخطط الميدان وانفخ الكفر اغسل الشراب واكوي الفنالة إلمع الكدارة الترفيه حقو السينما دور تاني ولازم الفلم هندي والبطل ابو طويلة (( اميتاب باتشان)).
كان ظهرت موضة حب في تلك الفترة اي زول اكون عندو حبيبه اقشر بيها انشاءالله وهمية حتي لو كتبت خطابات لي شخصك باسم بت والاخصائين في الحاجات دي بقولو ليك اكتبو بي يدك الشمال عشان اقولو خط بت.
زولنا بتاع الكورة عندو حظ اليهود مع إنو ماليهو شغله في الحب لاقتو واحده بتحب الكوره شبكت فيهو وهاك يا حب قبل ما انشبك كان التمرين اكون شغال صفارة النهاية مع صلاة المغرب الناس تمشي تصلي وزولنا اضقل بي الكورة لي صلاة العشاء بعد شبكة الحب من ما اقول الله اكبر الراجل جري علي الجامع يعني الولد خلاس دخل الاسلام اتوضي واغسل راسو ورقبتو وبطنو وأباطو من العرق والناس في الصلاة إقد بي الباب التاني للحبيبه.
الحبيبه قعدت معاهو اسبوعين شاكلتو وقالت ليهو تاني ما اشوف وشك المعوج ده وكرعيك الملانات عوار يا شين يا ما بتعرف تحب!!!!!!
بعد ما إتفارقو وصلت الاخبار الراجل قالو ونستو معاها كلها بالكوره ..... والله قشيت ليك فلان داك قشة رقد لي نهاية التمرين ما اقدر اقوم وأنا بالله زي الكديس اتنفضت من التراب وباقي الرماد بتاع الخط وقفت علي حيلي. ........ردمت ليك فلان داك ردمة وقت رفعوهو من الواطه لقهو طارش ملوة بصل امو كانت عامله ملاح قاورما.
اخر الاخبار ومنها طشت منو قالو قاعد معاها في الكبري ونسة الكورة كملت فجأة قال ليها :
سمعتي حاجة ؟؟؟؟؟
قالت ليهو لا....
قال ليها : و ل شميتي............ من ديك وعيييييييييييييك
حكاية ..... اجي يا مدني كنت سامع الزميلات في المكتب طوالي معاهم عبارة ((اجي يا مدني)) مستغرب في العبارة ومعناها لمت فيني واحدة من عينة القاهرات قعدت لي الكلام.......
نشوف التلفون ولنا عودة
|
Post: #2
Title: Re: اجي يا مدني
Author: عباس الدسيس
Date: 05-11-2013, 12:49 PM
Parent: #1
اجي يا مدني...
موقف سنار محل بتقيف الحافلات والبصات لي سنجة وكوستي ومدني والخرطوم والدمازين ...الخ مرأة بتفتش لي بصات مدني تعبت من اللف قدر ما اوصوفو ليها الكمسنجيه تغلط في الوصول لفت الموقف كلو لا خلت حافلات سنجة لا بصات ربك في النهاية بعد مجهود شديد وصلت موقف بصات مدني وهي رافعه كراعا وماسكه بي يدها في باب البص عشان تتاكد سألت واحده قالت ليها:
الرسول فيك يا بت امي دي ما بصات مدني ؟؟؟
التانية قالت ليها : بالحيل يا بت امي اركبي ساكت وصلتي
اها الزوله من شفقتا شالت حيلا لي فوق عشان تركب البص ورفعت كراعا ...... وفي هذه اللحظة العصيبه طلعت غازات من بطنها.......
قالت ليها التانية: اجي يا مدني ......
يا حليل زمن ناس مدني التريانيين والشحمانيين......
كانت هنالك مدينة اسمها مدني !!!!!!!!!!!!!!!!!!!!!!!!!!!!!!!!
|
Post: #3
Title: Re: اجي يا مدني
Author: خالد حاكم
Date: 05-11-2013, 12:51 PM
Parent: #1
الدسيس شخصيا في سودانيزاولاين ؟
مشتاقين والله ومنور سودانيز اونلاين
اخبارك واخبار الاغتراب معاك ؟
قبل 4 سنوات قابلت مختار قريبى في السودان وادانى اخبارك
قصتك دى ما عارف ذكرتنى بواحد ( مافى داعى لذكر الاسم ) في الادرة الاقليمية معاكم في اواخر التسعينات .
|
Post: #4
Title: Re: اجي يا مدني
Author: سامى عبد المطلب
Date: 05-11-2013, 01:56 PM
Parent: #3
| Quote: والاخصائين في الحاجات دي بقولو ليك اكتبو بي يدك الشمال عشان اقولو خط بت. |
يا سلااااام عليك يا الدسيس ربنا يديك العافيه ....
|
Post: #5
Title: Re: اجي يا مدني
Author: عباس الدسيس
Date: 05-11-2013, 03:02 PM
Quote: الدسيس شخصيا في سودانيزاولاين ؟
مشتاقين والله ومنور سودانيز اونلاين
اخبارك واخبار الاغتراب معاك ؟
قبل 4 سنوات قابلت مختار قريبى في السودان وادانى اخبارك
قصتك دى ما عارف ذكرتنى بواحد ( مافى داعى لذكر الاسم ) في الادرة الاقليمية معاكم في اواخر التسعينات . |
ياسلاااااااااااااااااام خالد حاكم
سلام يا وجيه
والله شوقنا بحر
فتشته دربك يعلم الله القدر فرقنا اخبارك يا حبيبنا والاسرة الكريمة
يا حليل الايام الجميلة يا خالد
تحياتي وتقديري
|
Post: #6
Title: Re: اجي يا مدني
Author: عباس الدسيس
Date: 05-12-2013, 07:36 AM
Parent: #5
| Quote: يا سلااااام عليك يا الدسيس ربنا يديك العافيه .... |
سامي حبيبنا
اخبارك وصحتك
شاكر وممنون للمتابعة والمساهمة
تحياتي وتقديري
|
Post: #7
Title: Re: اجي يا مدني
Author: سيف اليزل سعد عمر
Date: 05-12-2013, 08:22 AM
Parent: #1
اخونا عباس الدسيس
ياخى لو انت من مدنى وكتبت الكلام ده انت زول رائع
ولو انت ما من مدنى وكتبت الكلام ده برضوا انت زول رائع
قلتا لى صاحبك مما تصبح الواطا يفتش الرماد وين؟؟ ههههه
والترفيه هندي الدور التانى
أكيد برضو بمشي السينما كداري
ياخى زكرتنا مدنى وتراب ورماد مدنى زاتو،،،،،،
اجى يا مدنى
مع خالص التحايا
|
Post: #8
Title: Re: اجي يا مدني
Author: ناصر حسين محمد
Date: 05-12-2013, 08:56 AM
Parent: #7
الله يجازي محنك ياعبس
تسوق الواحد سواقة للنهاية
يأأخ والله أدمنت " كلامك " البتكتبو هنا ده
|
Post: #9
Title: Re: اجي يا مدني
Author: عباس الدسيس
Date: 05-12-2013, 12:50 PM
Parent: #8
| Quote: قلتا لى صاحبك مما تصبح الواطا يفتش الرماد وين؟؟ ههههه |
سيف اليزل يا حبيبنا
سلام وتحية
زولك بحب الكورة زي ناس ذا البوب
ياخ انا سعيد والله اذكرك ناس مدني ومجدي مهدي والقائمة تطول
سعيد بتواجدك هنا
شاكر ومقدر للمتابعة
|
Post: #10
Title: Re: اجي يا مدني
Author: عباس الدسيس
Date: 05-12-2013, 02:41 PM
Parent: #9
Quote: الله يجازي محنك ياعبس
تسوق الواحد سواقة للنهاية
يأأخ والله أدمنت " كلامك " البتكتبو هنا ده |
ناصر اخبارك والاسرة الكريمة
بالغت والله .... اظهر وبان انشاءالله نهاية الاسبوع نسق مع منتصر وراق بقول ليك
مشتاقين ليك والله وفي انتظارك.
تحياتي وتقديري
|
|