Post: #1 Title: شوفي النسوان كيف !!!!! Author: عواطف ادريس اسماعيل Date: 05-07-2013, 04:10 AM Parent: #0
أحد الأزواج في إمارة من دولة الإمارات العربية المتحدة لا داعي لذكرها قرر الخروج بلا عودة مع معشوقته حتى يريح ويستريح
ولكي يبرر فعلته الشنيعة ترك صورة معشوقته الجميلة ذات القوام الفارع ، والشعر الأسود الفاحم ، والابتسامة الهوليودية
على التسريحة و على خلف الصورة كتب هذا التعليق (شوفي النسوان كيف) !
تجرعت الزوجة المكلومة كؤوس العلقم .. رقرقرت عيناها بالدموع .. نظرت إلى وجهها الحزين في المرآة فاشرأبت خيوط الزمن ، ولمع
الشيب على خصلات شعرها .. تفحصت قوامها الممتليء بفعل الحمل والولادة .. ضحكت كالطير المذبوح من الألم .. ثم شقهت بالبكاء
هذه قصة حقيقية ربما عاشتها زوجات أخريات بلا صورة أو تعليق .. فهل يا ترى ترتبط مشاعر الزوج عادة بالشكل الخارجي فقط ؟
ولماذا تتبدل مشاعر بعض الأزواج حينما يرسم الزمن خطوطه الدقيقة والعريضة على وجه الزوجة ، وقوامها، فيما تظل هي وفية
لعهدها مهما حدث للزوج من تغيير .. أو أصيب بأمراض مزمنة ، وعاهات مستديمة من بينها الزهايمر وهو أحد أمراض العصر ؟
أريد إجابة لهذه الأسئلة حتى أشفي غليلي، وأسبر أغوار حزن الزوجة المكلومة؟
أخيرا جيناكم يا حبايبنا بعد غربة وشوق نغالب فيه ويغالبنا .. تحية ومحبة للجميع بدون قرز من اتفق معي سابقا أو لم
ومن يتفق معي متسقبلا أو لن فاختلاف الرأي لا يفسد للود قضية وفتكم بعافية....
Post: #2 Title: Re: شوفي النسوان كيف !!!!! Author: elhilayla Date: 05-07-2013, 04:11 AM Parent: #1
مرحبا وأهلا وسهلا ____ الحليلة
Post: #3 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 04:16 AM Parent: #2
صباح الفل والياسمين ..
مع كل الحب أرجو إثراء البوست بآرائكم الثرة
Post: #4 Title: Re: شوفي النسوان كيف !!!!! Author: محمد الأمين موسى Date: 05-07-2013, 04:50 AM Parent: #3
طال عمرك، هادا ريال خايس.
Post: #5 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 04:54 AM Parent: #4
حمودي !!
يسعد صباحك ..
هاها والله u make my day
شكرا على الطلة الظريفة ...
Post: #6 Title: Re: شوفي النسوان كيف !!!!! Author: Nader Abu Kadouk Date: 05-07-2013, 04:56 AM Parent: #5
هلا بست البنات..........
وينك والله المنبر نور...................
Post: #8 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 05:03 AM Parent: #6
ندوري
باااااااااااااااااه والله زمان
شكرا على المرور الراقي .. بس رأيك يهمني
Post: #7 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 04:59 AM Parent: #5
يارجالة الكورة في ملعبكم أرجو أن تكون الردود شفافة وموضوعية مهما كان وقعها على الستات وتوقعوا منهن الرد الشافي
Post: #9 Title: Re: شوفي النسوان كيف !!!!! Author: ABUHUSSEIN Date: 05-07-2013, 05:29 AM Parent: #7
عوداً حميداً مستطاب
Post: #10 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 05:40 AM Parent: #9
أبو حسين
صباح الفل
شكرا على شعورك النبيل
Post: #12 Title: Re: شوفي النسوان كيف !!!!! Author: يحي قباني Date: 05-07-2013, 05:49 AM Parent: #10
اختنا عواطف ...
تحية و احترام ...
لا نضع كل الزوجات في خانة المظلوم ...
كدى وريني دي سببها شنو ؟
Post: #14 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 06:05 AM Parent: #12
العزيز قباني
تحياتي
بالعفل ليست كل النساء ملاك ولا كل الرجال خونة ولكن من الظلم بمكان أن نقارن الزوجة السودانية بزوجيات أخريات لهن ثقافة وأتيتيود مختلف
فالمرأة السودانية أكثر أخلاصا في علاقاتها وأكثر تحملا وصبرا على الشدائد والملمات .. أليس كذلك ؟ عموما يسعد صباحك أما إيلي تكتوك فليستخلف
الله قلبي معه
Post: #13 Title: Re: شوفي النسوان كيف !!!!! Author: أيمن دياب Date: 05-07-2013, 05:53 AM Parent: #10
أول حاجة حمداً لله على السلامة.. للرجال بعض الأنانية في تعاملهم مع النساء.. منهم من لا يقدر العشرة والتضحيات ومشوار الأيام الصعبة.. لمن تجري القروش في يدو.. على طول يفكر في التانية.. وربما الثالثة.. منهم من يتذرع (بإنو عايز يملأ الواطة عيال.. ويكبر بيهم أمة محمد صلى الله عليه وسلم).. ومنهم من ينظر للمرأة كـ(جسد) فقط.. وتفريغ شهواته ونزواته..
Post: #15 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 06:07 AM Parent: #13
بصراحة بعض الرجال عينهم زايغة فإذا لم تسمح له الظروف بالخيانة التطبيقية فيمارسها نظريا على عينك ياتاجر دون مراعاة لشعور الزوجة
شكرا على مرورك الجميل
لنا لقاء آخر بإذن الله
Post: #11 Title: Re: شوفي النسوان كيف !!!!! Author: دينا خالد Date: 05-07-2013, 05:49 AM Parent: #7
ياااا عطوف
Quote: تفحصت قوامها الممتليء بفعل الحمل والولادة
مكنتكن دى خلاص بقت ضاربة ... دازنت وورك !! يااا معشر المتزوجات بطلن تبريرات فى ناس ولدوا عشرة قاعدين ذى ما الله خلقن .... وخلن بالكن من صحتكن اولا الجمال ملحوق .... بطلن البهدله وشيلن الكروش دى وما تعتمدن على التبريرات .. هسه يجيك وليد يقول ليك :. هو راجل ما داير معاك تانى البقعدك معاه شنو ؟؟؟
ــــــــــــــــــــــــــــــــــــــــ النسوان لازم يكون شعارن الباب يفوت جمل .... والواحده تحافظ على شكلها وقوامها عشان تقدر تنافس تانى وتجيب ليها واحد يكمل معاها الرحلة ال اتبوجنت دى .. وذى ما قال ترباس لو مكتوب على احب ... يكون انسان كمان تااانى ... المافى شنو !!!
Post: #16 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 06:13 AM Parent: #11
عزيزتي سابقا دينا ... لزوم الغشمرة طبعا ..
والله نصيحة غالية ورائعة ياريت تتسمع مش علشان خاطر الزوج ولكن للثقة بالنفس وللبرستسيج ولكن هذا لا يمنع من إدانة بعض الأزواج
المشكلة يا دينا أن المرأة السودانية على وجه الخصوص تترك الحبل على الغارب بمجرد ما اتزوجت وولدت وبتنسى أن للزوج أعين
وبالرغم من ذلك لا يجوز أن يتخلى عنها بهذه البساطة عليه أن يبدي ملاحظاته بصورة جادة وأن يساعدها على التخلص من الترهلات
والكرش وغيره بالاشتراك في الأندية الرياضية ، ولكن ما ألاحظه أنه لا يبدي أهتماما بل يفضل الهروب من الواقع ..
شكرا على الطلة البهية...
Post: #17 Title: Re: شوفي النسوان كيف !!!!! Author: أيمن الطيب Date: 05-07-2013, 06:14 AM Parent: #11
سلامات يا عواطف إسماعيل,, عاش من سمع منك وعنك,, أوووووووووه زمن ياخ,,
القول ما قالته دينا خالد,,
Quote: النسوان لازم يكون شعارن الباب يفوت جمل ....
أيوه,,,وفيل كمان كان ما عجبو!! بس خلو بالكم من الصحة والوزن وبطلو النقة الكتيرة,,
تحياتى,,
Post: #18 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 06:18 AM Parent: #17
أيموننننننننني
سلامات ياخ ومشتاقين ..
والله كلام دينا صاح الباب ممكن يفوت جملين كمان ولكن تظل الحسرة والألم في القلب على ضياع سنوات العمر الجميلة وتلقى نفسك بتحب ليك زول ما بحب !
تحياتي وما تنقطع
Post: #19 Title: Re: شوفي النسوان كيف !!!!! Author: د.نجاة محمود Date: 05-07-2013, 06:21 AM Parent: #11
بركة بالشوفة تعرفي الموضوع ما موضوع شكل لانه قبل كدا عندنا صديق رد في معرض حديث شخص آخر عن مهر خرافي دفعه قريبه قال والله نحنا في حلتنا مرة الخمسين جنيه الحمار ما بشيلها يعني يا دينا بحيبوها بحم جامبو من اهلها الرجل حينما تمر به ذات سنون المرأة ويكبر ويشيب ويصلع المرأة ما بتخليه لكن الرجل يوجد تبريرات لتركه لاسرته في مراهقته الثانية وركضه خلف نزواته . ولانه .ايضا صار يحس بالضعف بدلا من يحلل السبب على انه من اكل الكسرى ما شوية طوالي يرميه في زوجته وشكلها ظنا انه لو لقى بت صغيرة بحصل ليه ريجارج لضعفه. والزول المذكور في القصة اعلاه رجل منحط لا غير واتمنى ان تخونه الحسناء المعرساه عشان قروشو مع شاب يشبه مهند ويجيه ايدز يسكنو الترب قادر يارب ومرحب برجعتك اتمنى ما تغيبي تاني
Post: #21 Title: Re: شوفي النسوان كيف !!!!! Author: يحي قباني Date: 05-07-2013, 06:26 AM Parent: #19
Quote: والزول المذكور في القصة اعلاه رجل منحط لا غير واتمنى ان تخونه الحسناء المعرساه عشان قروشو مع شاب يشبه مهند ويجيه ايدز يسكنو الترب قادر يارب
د.نجاة ...وكت خانتو و اتمقلب ...
مالك جايباليهو الايدز وكمان كاتلاهو ؟؟؟ ______________________________________________ ذكرتيني زمان واحد هلالابي ... حاقد علي المريخ
و المريخ كان عنده كوره في المغرب ...
قال انشالله المريخ انغلب 10 صفر ...
واللعيبه تتكسر كرعينهم واحد واحد ...
و الطيارة الجايباهم تقع تكتلهم كلهم !!! ___________________________ قلت ليهو وكت واقعين بالطيارة و ميتين ... مكسر كرعينهم مالك ؟؟؟
Post: #22 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 06:29 AM Parent: #19
العزيزة بيان ...
كل الحب والشوق
بتصدقي واحد قريبنا قال المرة كان ما بقت مرتبة (بفتح الميم) طبعا فايدة شنو ؟؟
ونحن في هذا العصر المليء بالتناقضات ألاحظ أن أزواجا سودانيين وللأسف تركوا زوجاتهم
وأبناءهم ليرتموا في أحضان فتيات في عمر الزهور لزوم تجديد الشباب كما يدعون ...
ناسين أو متناسين أن هذه الشابة اليانعة سوف تكره اللي خلفهم عندما تعيد النظر في
نعيرني بالشيب وهو وقار ... ليتها عيرتني بما هو عار !!
Post: #20 Title: Re: شوفي النسوان كيف !!!!! Author: الزبير بشير Date: 05-07-2013, 06:24 AM Parent: #11
الاستاذه عواطف لينا شرف المداخله معك
اتحدث عن نفسي لا افكر قطعا في الزواج من اخري لجمال شكلها او لاي سبب اخر و ذلك حفظا لجميل لزوجتي في صبرها علي ايام ( علي قول الامام الصادق المهدي ) قلما توصف انها ايام صعبه . الحاله كانت شلش ومع ذلك تزوجتني ، اليوم تغيرشكلها لعامل الطبيعه القاسيه ، و ايضا تغير حالي الاقتصادي بفعل الاغتراب ، و الله و الله و الله افر من التفكير في الزواج من ثانيه فرار ال######## من الاسد ، حفظا رد جميل لصبرها . وانا صادق و ما ليكم علي يمين
الدكتوره دينا خالد مشتاقين و ليك و حشه قلتي لي ما قادرين نعرف الفرق اصبري بعد الاقيك
الزبير بشير
Post: #23 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 06:32 AM Parent: #20
أخي العزيز الزبير
كل الحب
أرفع لك القبعة إجلالا وتقديرا ..
لزوجتك التقدير والاحترام ..
أتمنى أن أجد 5 % من أمثالك في هذا الزمن الأغبر ، زمن النكران والجحود ، والمبررات غير المنطقية
مودتي
Post: #24 Title: Re: شوفي النسوان كيف !!!!! Author: عمر الفاروق Date: 05-07-2013, 06:41 AM Parent: #23
خلووونا من الكرش والترهل .. أسة جنس تمبوشي وفرفوري وعدووولي وبشبووشي دي ما بتخلي الزول يخت صورة ؟
Post: #27 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 06:56 AM Parent: #24
الفاروق
يبدو إنك حكمت فعدلت فنمت !!!
خت صورتين بدل واحدة .. وانتظر الرد المناسب في الوقت المناسب (طبعا الكلام بتقال كلما إسرائيل تعربد في سماء الخرطوم) ومافيش أي رد
مناسب أو غير مناسب ..
شكرا على المرور البهي
Post: #28 Title: Re: شوفي النسوان كيف !!!!! Author: الزبير بشير Date: 05-07-2013, 06:56 AM Parent: #24
الغاليه عواطف لا اريد ان اغير مسار البوست لغير ما استهدف له ولكن اكثر ما يحير الانسان و احيانا يتحدث اليك اقرب الناس اليك صداقه و رحما ، وهو يري انه يسدي اليك النصيحه ، بالزوجه الثانيه ، احيانا تتجنب الرد القاسي حفظا للعلائق ، و لكن ردي اللطيف لماذا هل بعد ان امتلئت اليد من المال ، طيب اولي بالزواج من الثانيه ايام الفقر ، علي الاقل امتثال للسنه المحمديه ، اما الزواج من الثانيه في حال الغني فهو الجبن ، و نكران الجميل . اين الاهل الاصدقاء ايام العوز . رأي و الشخصي جدا ، ان الحياه قصيره ، و علي قصرها يجب السير لاخرها مع من ارتضتك في اول السير بكل عللك .
بالمناسبه طبعا الكلام ده لي الزينا جاي بداو الحياه مقشطين لاخر تعريفه في الجيب و اليوم الحمد لله امتلكنا الدولار و العقار ، و نظل نحن نحن مع من شاركتنا الحياه خطوه بخطوه ، اما الناس البدينين من يومهم احتمال اكون ليهم راي تاني ، بدون اطاله ان اصبحت اليوم بكرش فبالامس كانت مهره يتغني لها .
الكتوره دينا خالد و الله مشتاقين قلت ما قادرين نعرف السبب اصبري بعد اقابلك
الزبير بشير
Post: #29 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 07:01 AM Parent: #28
الزبير ..
يا بعد عمري ضيق ذات اليد ليس عيبا .. ومن تقبلك بعلاتك حتما هي زوجة الآخرة كما يقولون
إضافة إلى ذلك فإبن الأصول أصول ولو ياكل كل يوم طبق فول ...
وإذا كانت هناك إرادة فالكرش بتروح وترجع بنت 19 سنة عمر الزهور والهنا بس همتك معاها ...
عشان كلنا نغني ليها عريسك غلبو الثبات
Post: #25 Title: Re: شوفي النسوان كيف !!!!! Author: يحي قباني Date: 05-07-2013, 06:43 AM Parent: #23
Quote: الحاله كانت شلش ومع ذلك تزوجتني ، اليوم تغيرشكلها لعامل الطبيعه القاسيه ، و ايضا تغير حالي الاقتصادي بفعل الاغتراب ، و الله و الله و الله افر من التفكير في الزواج من ثانيه فرار ال######## من الاسد ، حفظا رد جميل لصبرها . وانا صادق و ما ليكم علي يمين
كلامك مجهجه يا الزبير ياخوي ...
شكلها النِفَيسه فيها و القليب ما بيها ...
العن ابليس يا زول ...
Post: #26 Title: Re: شوفي النسوان كيف !!!!! Author: عمر الفاروق Date: 05-07-2013, 06:50 AM Parent: #25
كما فاتني أن أرحب بي الأخ العزيز زبوووري ..
Post: #30 Title: Re: شوفي النسوان كيف !!!!! Author: دينا خالد Date: 05-07-2013, 07:08 AM Parent: #26
Quote: الدكتوره دينا خالد
الخبر دا اتسرب متين ؟؟؟ لقيتكم خطرين والله !!
ـــــــــــــــــــــــــــــــ لما جات لى عموررى بقى الفاروق ؟؟ سمح يا عطوف ! تانى عاد يحلك الحلا بله من القيد والمذلة ....
Post: #31 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 07:14 AM Parent: #30
دندون
مبروك الدكتوراة ياخ ...
عموري عايز يخت صورة ومعاها تعليق فلازم نقول ليه كلام فيه إن ولا شنو رايك .. عشان المدام ما تفتكر بنشجعه على الإثم والعدوان
محبتي
Post: #32 Title: Re: شوفي النسوان كيف !!!!! Author: Abdlaziz Eisa Date: 05-07-2013, 07:23 AM Parent: #30
Quote: أخيرا جيناكم يا حبايبنا بعد غربة وشوق نغالب فيه ويغالبنا .. تحية ومحبة للجميع بدون قرز من اتفق معي سابقا أو لم
ومن يتفق معي متسقبلا أو لن فاختلاف الرأي لا يفسد للود قضية وفتكم بعافية....
سلامات العزيزة عواطف
هلا ومرحبا وعودا حميدا مستطاب
هسي البوست ده فيه البيحرق شوية شوية بس نار الترحاب وبخور العودة أقوى ووردنا طبيعي رويان بزاد الحبان وانا شاء الله يستمر التواجد هذه المرة
...... يعني واحد لقى شئ بالوصف المكتوب والصورة معقولة يتذكر الحنك ..عشرة وعيشة و و و!! الله معاها
Post: #35 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 08:01 AM Parent: #32
عزو
سلامات
أمانة ما تلومت ... كس الهواء طوالي وبالسرعة دي ؟ صحيح يا مأمن الرجال يامأمن الموية في الغربال ... لكن بيني وبينك الزوجات بقن يكسرن
وراكم قلة وبالطقاق زي ما بقولوا ناس الخليج .. عموما شكرا على الترحيب
Post: #34 Title: Re: شوفي النسوان كيف !!!!! Author: خضر صيام Date: 05-07-2013, 08:00 AM Parent: #30
شوفي النسودان كيف عبارة توحي بهوي النفس والانقياد المستمر والمتجدد لها
لكن الزواج مربوط بروابط كثيرة تلجم من هو عاقل فقط
Post: #36 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 08:05 AM Parent: #34
أخي العزيز خضر
سعيدة بطلتك
ما قل ودل ..
تشكر على هذا الكلام وهو فعلا كلام عقل
Post: #38 Title: Re: شوفي النسوان كيف !!!!! Author: baha eassa Date: 05-07-2013, 08:12 AM Parent: #30
العزيزة عواطف .. .. عودة انيقة ومنتظرة .. ..
Post: #40 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 08:17 AM Parent: #38
صديقي سابقا بهاء
شكرا مع أطيب الأماني بدوام الصحة والعافية
وحشتووووووووووووووني .... وحشتووووووووووووني
Post: #41 Title: Re: شوفي النسوان كيف !!!!! Author: baha eassa Date: 05-07-2013, 08:28 AM Parent: #40
Quote: سابقا
وحاليا وللابد ان شاء الله
Post: #51 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 10:21 AM Parent: #41
طبعا يا بهاء ومؤكد جدا
تحياتي ومعزتي للجميع
Post: #58 Title: Re: شوفي النسوان كيف !!!!! Author: الطيب شيقوق Date: 05-07-2013, 11:01 AM Parent: #30
طوفييييييييييييييييييييييييييييييييييييييييي
عاد للمنبر بعض من نبضه
Post: #59 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 11:08 AM Parent: #58
شيييييييييييقا !!
سلامات يارجل
مشتاقين ...
شكرا على الكلمات الرائعات
Post: #64 Title: Re: شوفي النسوان كيف !!!!! Author: AMNA MUKHTAR Date: 05-07-2013, 11:28 AM Parent: #30
مشتاقين يا عطوف والله .
دا حالتو المراة السودانية أهم حاجة عندها الجيهة والدخان والدلكة والجبجبة بالريحة .
بس نصيحة للنسوان : أوعي تتوهضي ، خليكى قاعدة نص نص .. تحسبا لأى مفاجآت غير سارة .
كيفك يا ست البنات يا متعة للعين والنظر .. والروح والقلب
والله كلامك طلع حسب التجربة صح في نسوان أخدن شاكوش رغن الجيهة والدخان والحنة
عموما المفروض الواحدة تنام وعين فاتحة والتانية مغمضة ...
شكرا على طلتك الرائعة
محبتي
Post: #110 Title: Re: شوفي النسوان كيف !!!!! Author: داليا حافظ Date: 05-09-2013, 01:21 AM Parent: #30
سلامات يا طوفة و حمد الله الف على السلامة .. تعرفي زي ده تكسر وراهو الف قلة ..
ما عشان سابا ومشى مع "مُزة" لكن لانو لغتو الغادر بيها زفت ..ولأنو مؤذي وجارح ..يعني ما كفاية عليها الهجران .كمان يقلل من انسانيتها ..
ما اتذكر ليها ولا يوم حلو عشان يختصر كل البينهم في الجسد الفاني ده .. راجل سطحي ..
Post: #115 Title: Re: شوفي النسوان كيف !!!!! Author: عواطف ادريس اسماعيل Date: 05-09-2013, 04:27 AM Parent: #110
الرائعة دائما وأبدا داليا
والله أنا سعيدة جدا جدا بحضورك الزاهي الجميل
عارفة ياداليا بعض الأزواج والزوجات كمان بتهون عليهم
العشرة عشان الواحد يسب التاني في أقرب منعطف وبيني
وبينك أنا بأيد حكاية القلل دي إذا هانت العشرة عشان
كدة عايزاك تجهزي لينا شوية قلل نختهم في المنبر
الظروف ما معروف يااختي...
تحياتي
Post: #33 Title: Re: شوفي النسوان كيف !!!!! Author: walid taha Date: 05-07-2013, 07:41 AM Parent: #1
ويلكم باك :)
Post: #37 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 08:07 AM Parent: #33
ولو !!!
سلامات
ثانكيو فيري ماتش
Post: #39 Title: Re: شوفي النسوان كيف !!!!! Author: عمر الفاروق Date: 05-07-2013, 08:15 AM Parent: #33
الأستاذة عواطف مع إني مقتنع تماما بإلتقاطك للمسج من مداخلتي لكن لا بأس ( يا قول ملاسي) بشرحها عشان يبدو إنو تشابه عليك البقر..
إن جينيرال كده الزواج من التانية ما عشان شكل وخلقة الزوجة الأولى ( أعتقد ده كلام مكرر) ..وفكرتك بتاعت البوست كانت فكرة مختزلة وبكل بساااطة في إنو الراجل قام من نومو (لقا كومو وبدووون ما تحكي للناس الحصل في هذه الإمارة الماف داعي لذكرها وما كان يحدث في هذا البيت المغلق والغرف المغلقة ..أوحيتي للقارئ إنو بس كده بدووون إحم ولااا دستور المرا صحت الصباح لقت راجلها كما المسلسلات والأفلام ترك ليها صورة مع توقيع ديل النسوان ولا بلاش فما كان منها إلا أن نظرت في المراية في مشهد درامي مثر ثم جرت جضوومها فوجدتها كلها لحم ..ثم جررت شعرها فتساااقط لأنها لا تستخدم كريم بانتيين أو خلطة جوز الهند ولمن عاااينت لي وشها لقت كم حبة كده فأندهشت لأنها لم تستخدم الفير اند لوفلي من قبل سبعة سنوات ..
تعمدت ذكر اسامي الدلع دي لأنو صدقيني الرجال مااا بي السذاجة دي عشان يقرروا الزواج لمجرد الشكل ..وأسسة أسسسة لو سألتي معظم الرجال المتداخلين ديل هل يطلق المراة لمجرد شكلها ولّا ممكن يطلقها لأنو مثلا لقاها بتدلع الرجال الأغراب بي اسامي من شاكلة عطووفي ومجووودي وحمووودي فصدقيني وبنسبة 100% ح يقولوا ليك السبب التاني.. عشان كده انا شاغلتك بي إنو ممكن بي طريقتك بتاعت حمووودي وأيموووني وفروقوووري دي ممكن عااادي جداً يوم نسوان يلقوا ليهم صورتيين بدل صورة واحدة رجالم ختوها ليهم.
تخريمة : الدكتورة دينا بت خالد .. النبي فيك تشوفي لي مشكلتي بتاعت ال SHL دي طالما بقيتي كتورة :)
Post: #42 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 08:33 AM Parent: #39
الأخ عمر
كل التقدير لما كتبته ولأننا لسنا في مدن فاضلة لا أقول لك أن الراجل قام من نومه ولقى كومه أو هي لم تستعمل فير أندلافلي فتفاجأت بالحبوب
مالية وشها ،، أكيد للمشكلة أسباب وتداعيات كثيرة قد تكون حقيقية أو مفتعلة والبفتش للسبب بلقاه ، المهم النتائج، والتداعيات وليس السبب فقط
، أما ما ذكرته من تدليع الرجال الأغراب فهؤلاء إذا كانوا في نظر الآخرين أغراب فهذه وجهة نظر تخص من يعتقد ذلك ولكن بالنسبة لي فهم أخوة أعزاء
ليس إلا طالما جمعتني بهم محبة في الله بالرغم من عدم معرفتي بهم شخصيا ، وتكفيني أسماءهم فقط ليكونوا إخوتي في الله فضلا عن ذلك فالعلاقة إسفيرية
يا الفاروق وكل ما يكتب هنا على سبيل المزاح ليس إلا ومن يرى غير ذلك فهذه مشكلته ويمكن يخت تلاتة صور بدل واحدة عشان يكمل أربعة كمانعموما
أحترم وجهة نظرك وإن اختلفت مع جزء منها
Post: #43 Title: Re: شوفي النسوان كيف !!!!! Author: أسامة البلال Date: 05-07-2013, 08:54 AM Parent: #42
الحمد لله علي سلامة العودة وبداية موفقة كالعادة يا عواطف
المواضيع الاجتماعية والعلاقات الإنسانية لا تخضع لقوانين الطبيعة ولذلك النقاش حولها ذو شجون عودة للموضوع إن شاء الله
Post: #44 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 09:04 AM Parent: #43
أخي العزيز أسامة
كل الود
فعلا المواضيع الاجتماعية تحمل في طياتها الكثير من المشاعر الإنسانية سلبية كانت أم إيجابية خصوصا كما أنها كما تفضلا لا تخضع لأي نواميس أو
معايير وبالرغم من ذلك لابد من طرحها فعسى ولعل ننجح في إصابة الهدف وإن كان بعيدا في الثرى
تحياتي
Post: #45 Title: Re: شوفي النسوان كيف !!!!! Author: عمر الفاروق Date: 05-07-2013, 09:30 AM Parent: #44
الأستاذة عواطف .. تاني برجع اقول ليك انا ما قصدتك في شخصك وأكيييد فاهم إنك بتتعاملي مع الجماعة ديل على إنهم اخوانك صغار كانوا أم كبار ..لكن وبما إنك قررتي تغوصي في اعماق الرجل فانا بوريك كيف نحن بنفكر وبدييك ليها على بلاطة ..الشكل يدخل ضمن أولوياتنا لكن ما هو رقم واحد ..ولو خييرت بين للتدبيل لي أسباب مرتي شينة ولا عشان بتدلع ناس اغراب فصدقيني ح تلاقي السبب التاني هو المنطقي والمقبول للتدبيل..إنتي إختزلتي وبكرر إختزلتي الفكرة في الشكل .. بعدين انتي قايلة النسوان ديل ما قاعدين يجرحوا رجالهم ؟؟ وبدل الصورة بيرموها ليييهو ببب كده وفييي وشو ..لكن طبعاً ده إنتو ما بتحسبوهو .. يعني المرا لمن تقول لي راجلا إنت مااا شوفت الرجال بيجيبو لي نسوانهم شنو؟؟؟ إنت مااا شوفت فلانة ديك راجلا إشترى ليها شنو؟؟؟ إنت ماااا شوفت فلانة ديك راجلا بيدلعا كيف..؟؟
أها دي فرقها شنو من شوفي النسوان كييف ؟؟ حيي الله ده إحترمها وما قالا ليها في وشها .. مبدئياً كده النسوان لولا التحجيم الديني الما بيخليهم يتزوجو اكتر من راجل طالما على الذمة فصدقيني كانت الواحدة منهن بتصحي الراجل عديييل وتقول ليهو هاااك شوف الراجل ده عامل كيف تقول ..إنت إتخمد نوم نومتك دي انا مارقة عليهو ...
Post: #49 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 09:48 AM Parent: #45
عموري ...
إن شاء الله ما يكون سبب أساسي في التدبيل ...
أنا معاك قلبا وقالبا إنه للزوجات أخطاء كثيرة وبعضها جارح جدا وكمان أحيانا بيكون قاتل .. ولأتفه الأسباب ممكن تقول للزوج مع ألف سلامة
أما حكاية شوف الرجال بدلعوا نسوانهم كيف فدي برضه لا تحصى ولا تعد .. وكمان أؤيدك في حكاية إنه الشكل ليس السبب الرئيس في الزواج الثاني
فقد تكون هناك أسباب أخرى لا يعلمها سوى الزوجين أما فيما يتعلق باختزالي للموضوع في الشكل فقط فلست من فعل ذلك ولكن ترك الزوج لصورة
معشوقته الجميلة تدل على اختزاله للعلاقة في الشكل وبعدين مافيش أي واحدة بتدلع ناس أغراب عمال على بطال يعني لم
أر ذلك سوى في عالمنا الأسفيري حيث تربطنا علاقة أخوية وفكرية تسقط بعض الحواجز وليست كلها طبعاعموما معك ألف حق
في كل ما ذكرته وهي في اعتقادي ملاحظات مفيدة بالنسبة لكل الزوجات ، ولا استثني نفسي من هذه الملاحظة ففي بعض الأحيان
أمارس نفس السلوك بدون قصد وأشعر بعد ذلك بالندم فأقرر عدم العودة إلى أي مقارنات فليس هناك زوج مكمل ، أو زوجة
سوبر .. ومنكم نستفيد ...
شكرا لإثرائك الموضوع أتمنى المزيد من الملاحظات من بقية الأخوة الأعزاء
Post: #46 Title: Re: شوفي النسوان كيف !!!!! Author: الزبير بشير Date: 05-07-2013, 09:38 AM Parent: #44
الاخت عواطف
اسحبي معرفه اسفريه
تظل المعرفه معرفه و هي علاقه انسانيه يمكن ان يكتب لبعضها البقاء ما بقينا علي وجه الغبراء بين كل الانواع و الاجناس و الاطياف لا فرق عندي بين معرفه المدرسه و معرفه العمل و معرفه الاسافير فهي معرفه ان كان صاحبها يستحق ان يكون اخوك ايا كان ذكر ام انثي من يقف معك عند الشدايد فهي المعرفه الحقه اما خوة قرقر ما نافعه اسفريا او غير ذلك و اخير منها عدم المعرفه من اساسو عرفنا ناس من الجنسين ذكر و انثي في الجامعه و العمل و ما زالت العلاقه قائمه حتي يومنا هذا بين الاسر
فلتكن معرفه صادقه اسفريا او غيرها
الدكتوره دينا خالد ازيك مشتاقين اه شفتي الفرق
الزبير بشير
Post: #52 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 10:24 AM Parent: #46
والله إنت زول أصيل ونادر المعدن ولم أقصد شيء من كلمة إسفيرية يعني ليس تقليلا من شأن العلاقة ولكن تأكيد لحسن النوايا
عموما معاك ألف حق ولك العتبر حتى ترضى .. مع خالص الإعزاز ولنا عظيم الشرف بمعرفتكم جميع وبلا استثناء فأنتم إضافة
هامة في حياتنا... وفي أحساسينا ومشاعرنا فشكرا لكم ..
Post: #48 Title: Re: شوفي النسوان كيف !!!!! Author: الزبير بشير Date: 05-07-2013, 09:44 AM Parent: #44
حذف للتكرار
Post: #47 Title: Re: شوفي النسوان كيف !!!!! Author: رانيه محمد الشيخ Date: 05-07-2013, 09:40 AM Parent: #1
اختى عواطف حيقولوا ليكى نحنا شباب ليسه وعايزين نعيش ونستمتع يا حيقولوا ليكى امراه واحده لا تكفى يا حيقولوا ليكى هى الاهملت روحها وتسببت فى ضياع مشاعرنا ليها من جانب ليهم حق ومن جانب عليهم حق الزوجه ما مفروض تهمل نضارتها ورشاقتها الحمل والولاده ما بيتسببوا فى بشتنت الوحده بالعكس العايزه تبقى فى ابهج محاسنها بتقدر لو هى عايزه الراجل ارضائه ما صعب والفهم بتاع اغلب النسوان خطىء ما عيب نتجمل ونحافظ على رونقنا حتى لو بقى عمرنا 60 ولا 70 ان الله جميل يجب الجمال ما عيب اننا نجتهد عشان كل ما يشوقنا تسر عيناه ما نتحجج بالزمن والكبر والحمل والولاده نعمل العلينا وبعد دا كان عينه زاغت يبقى هو اصلا ما بيستاهل لكن مش نديهم الاسباب انهم ينطحونا ونزعل انهم نطحونا غايتو دا رائى الشخصى
Post: #50 Title: Re: شوفي النسوان كيف !!!!! Author: رانيه محمد الشيخ Date: 05-07-2013, 10:01 AM Parent: #47
فكرنى الموضوع بكلام قالوا لى ود اهلى من ايام فاتت عشان يحلل فكرة الزواج باربعه ان قلب الرجل مقسوم لاربعه من مال وحب ووحاجتين كده ما متزكراهم وكل ما يتزوج وحده بينفتح له الجزء المحدد وينوله يعنى مسكين لمن يتزوج وحده بيكون حرم نفسه من باقى الحاجات الضروريه لحياه :))))))))))))))))))))))))))))))))) غايتو اموت واعرف جاب الفهم دا من ياتو كتاب وعقيده وشريعه برغم ربنا سبحانه وتعالى قال فى كتابه الكريم ولن تعدلوا واصلا الحاصل فى الزمن دا ابعد ما يكون من الزواج القائم على العدل الزول يعرس فى الدس حيعدل بياتو طريقه فى زمنه وحق كل وحده فيهم اخير الفكر ونفذ اقلها يعمل بكلام ربنا مش يظلم كل وحده فيهم ظلم الحسن والحسين عشان بس مصلحته الشخصيه وفاكر كده انجز ولمن يتوفى يتفاجئوا بالزوجه الثانيه وعيالها فى الباب وحصلت كتير وشوفتها شخصيااااااااااااااااااااا ليه بالبساطه دى ما بنراعى مشاعر اقرب الناس لينا فعلا لمن اب سئل حكيم وقال له ازوج ابنتى لمن قال لمن يتقى الله فإذا احبها اكرمها وإذا كرها لمن يظلمها الفكره ما وجع وجرح الفكره ظلم وقهر هو سعى لحقه يبقى المفروض يدى غيره حقه زى ماهو حريص على حقه ويتقى الله دى ما ناس الدقون والسبح والمساجد والناس البتفتى فى الدين لان الزمن داااااااااااااااا بقيت الحكايه مظاهر سطحيه ما سلوكيات فعليه فى الاتقاء
Post: #54 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 10:36 AM Parent: #50
عارفة يا رانيا أغلب الرجال بياخدو من الدين ما يتوافق مع مزاجهم الشخصي ويتركوا الباقي ..
وزي قريبك دة بكون عمل النظرية دي عشان يحلل زواج الأربعة .. أما حكاية ولن تعدلوا دي
فما فيش حد بديها أي اعتبار .. المهم الزواج وبع ما يقع الفاس في الراس تروح السكرة
وتجي الفكرة وياريت اللي جرى ما كان ، ومع ذلك لا يمكن إعفاء بعض الزوجات من دفع الزوج
دفعا رباعيا نحو الزواج الثاني أو أسوأ الفروض الخيانة..
محبتي و ماتنقطعي عليك الله
Post: #53 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 10:30 AM Parent: #47
رنو ..
من كمال عقلك الرجال جنو .. والبنات حنو ..
كلامك صح ألف في المائة ولكن أنا ضد هجر الزوجة مهما كان السبب .. إذا كان فعلا شاريها ممكن يلفت نظرها قبل أن تستفحل الأمور
وإنت عارفة الزوجة بتخت رأي زوجها في الاعتبار إلا إذا كانت ما فارقة معاها .. من هنا نوجه اللوم إلى كل من لا تحافظ على نضارتها
ورشاقتها، وحلاوتها حتى إلى ما بعد التسعين .. ولكن ما رأيك فيمن يجد زوجة بجميع المواصفات المذكورة ويذهب إلى أخرى أقل جمالا
وعلما ، وخفة ظل .. ؟؟؟؟
Post: #55 Title: Re: شوفي النسوان كيف !!!!! Author: الامين محمد علي Date: 05-07-2013, 10:45 AM
تحيه يا استاذه عواطف..
الموضوع دسم وحيوي وملتبس فعلا..
انا شخصياً متفق مع كلام د. نجاة:::
Quote: ولانه .ايضا صار يحس بالضعف بدلا من يحلل السبب على انه من اكل الكسرى ما شوية طوالي يرميه في زوجته وشكلها ظنا انه لو لقى بت صغيرة بحصل ليه ريجارج لضعفه
نمط حياة اليوم بمشاكله وضغوطه وغذائه المفخخ!!! يجعل الرجل يتحسس كرامته الف مره قبل ان يفكر ( مجرد تفكير) في الارتباط بانثى تصغره بعدد من السنوات...
خريف الرجل صار يداهم باكراً ..وان فعل واصر ان يقحم الخريف في الربيع فسبيكي دم..
ايها الرجل :: عضوا على نسائكم بالنواجذ فهنً لكم ستراً وبعض عزاء ساعة يباغتكم الخريف من حيث لا تحتسبوا!!!
Post: #56 Title: Re: شوفي النسوان كيف !!!!! Author: طارق جبريل Date: 05-07-2013, 10:50 AM Parent: #55
ازيك ياخ وحمد لله على السلامة
Post: #57 Title: Re: شوفي النسوان كيف !!!!! Author: عبد العزيز محمد عمر Date: 05-07-2013, 10:55 AM Parent: #56
صاحبة الخيط وضيوفها ... تحياتي
كتبت دكتورة نجاة
Quote: واتمنى ان تخونه الحسناء المعرساه عشان قروشو مع شاب يشبه مهند
ما ليك حق والله .....
فارق السن ... ليس مدعاة للخيانة احتراماتي
عبد العزيز
Post: #62 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 11:16 AM Parent: #57
عبدالعزيز
سلامات يا عزو
صاحبة الخيط بتسلم عليك وفي انتظار رد د. نجاة
شكرا على مرورك
Post: #61 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 11:12 AM Parent: #56
طارررررررررررق !!!
يا رفيق الزمن الجميل
شكرا يا بعد عمري
Post: #60 Title: Re: شوفي النسوان كيف !!!!! Author: عواطف ادريس اسماعيل Date: 05-07-2013, 11:10 AM Parent: #55
موني
والله كلام عقل وطلتك بالدنيا ..
أتمنى أن يقرأ هذا التعليق بتأن
لك مني كل الشكر والتقدير ومن جميع بنات حواء
أما مداهمة الخريف للعمر فلم تثتثن أحدا إلا من رحم ربي
Post: #63 Title: Re: شوفي النسوان كيف !!!!! Author: ياسر منصور عثمان Date: 05-07-2013, 11:19 AM Parent: #60
Quote: ولكي يبرر فعلته الشنيعة ترك صورة معشوقته الجميلة ذات القوام الفارع ، والشعر الأسود الفاحم ، والابتسامة الهوليودية
على التسريحة و على خلف الصورة كتب هذا التعليق (شوفي النسوان كيف) !
عندي سؤال:
طيب الزول المتزوج واحدة من اجمل الجميلات وبعد ده بلعب بي ديلو؟؟
ما عارف انا داخل صاح والا غلط؟؟
Post: #65 Title: Re: شوفي النسوان كيف !!!!! Author: محمود بكر Date: 05-07-2013, 11:42 AM Parent: #63
ترحيب بالاخت عواضف وعودا حميدا
كتب الريس بكري بوستا بذات المدلول
وان اختلف العنوان وكان بسؤال هل تؤيد التعدد كانت مداخلتي بتغيرالسؤال لماذا لا اؤيد التعدد رغم الالتزام الديني الا اني لا اؤيد الزواج الثاني لماذا 1/ هذه السيدة اخترتها بمحض ارادتي دون ضغط او املاء بل بعد جري ومساككة 2/ كانت جميلة (تكوي في الفكك) ورشيقة 3/ طيلة فترة الزواج لم تشتك مني ولم اشتك منها 4/ عبرها انعم الله علينا بالعيال 5/ رافقتني في الضراء (ايام الفلس) صبرت ولم تتضجر او تشكو بل كانت تسلخ النملة 6/ تحملت طيش الشباب ونزقه حتى تبخر السفينة في سلام 7/ الان هي كبرت نعم لكن انا برضه كبرت . 8/ اهه بعد ده كله يكون الجزاء جزاء سنمار اقول لكم صادق ابدا يا دفنتي او دفنتها واتمنى صادق ان ادفن قبلها
Post: #66 Title: Re: شوفي النسوان كيف !!!!! Author: طارق ميرغني Date: 05-07-2013, 11:50 AM Parent: #65
وان اختلف العنوان وكان بسؤال هل تؤيد التعدد كانت مداخلتي بتغيرالسؤال لماذا لا اؤيد التعدد رغم الالتزام الديني الا اني لا اؤيد الزواج الثاني لماذا 1/ هذه السيدة اخترتها بمحض ارادتي دون ضغط او املاء بل بعد جري ومساككة 2/ كانت جميلة (تكوي في الفكك) ورشيقة 3/ طيلة فترة الزواج لم تشتك مني ولم اشتك منها 4/ عبرها انعم الله علينا بالعيال 5/ رافقتني في الضراء (ايام الفلس) صبرت ولم تتضجر او تشكو بل كانت تسلخ النملة 6/ تحملت طيش الشباب ونزقه حتى تبخر السفينة في سلام 7/ الان هي كبرت نعم لكن انا برضه كبرت . 8/ اهه بعد ده كله يكون الجزاء جزاء سنمار اقول لكم صادق ابدا يا دفنتي او دفنتها واتمنى صادق ان ادفن قبلها
أخي محمود لك التجلة والاحترام مداخلة لها وقع خاص لما تضمنته من موضعية طول العمر ليك ولزوجتك العزيزة وربنا يكثر من أمثالك ... والله بعض الأزواج يستنكرون تقدم عمر المرأة ولا يرون في هذه المرحلة سوى السلبيات .. أشكرك على هذه المداخلة الطيبة خليك قريب رأيك يهمنا
Post: #106 Title: Re: شوفي النسوان كيف !!!!! Author: احمد سيد احمد Date: 05-08-2013, 02:41 PM Parent: #65
الاخ الاكرم محمود بكر سلامات كلامك سمح شديد وفيه وفاء عظيم بس في حالات ماثلة امامنا والزول بشوفها شينه انو زول بلغ ال60 او ال70 ولسه يتلفت ويعاين للنسوان هو انسان محترم وكل شي بس زوجتو اصبحت لا تثيره او لا رغبة لها في هذه المواضيع وهو لازال به قوة وحوجة لتلك البرامج وفي حالة بعرفها الرجل في عنفوان شباب رغم مقاربته لل50 لكن بصحة جيدة وبنية قوية والزوجة مرضت وهو محروم فترة طويلة فماذا يفعل وهو انسان محترم جدا ...هل يذهب ليبحث عن الحرام بعد ان بلغ ابناءه سن الزواج او يتزوج اخرى بالحلال ؟ والله في ناس كتيرة دايره العرس التاني وما نعها الخجل وكلام الناس او زعل الزوجة الاولى والاولاد
والله زي ما قلت في ناس عينهم ما يملاها إلا التراب وفي الوقت نفسه في نسوان سماحة جمل الطين يعني من برة هالهلة ومن جوة يعلم الله ..
عموما تحياتي لك وشكرا على مرورك الزاهي
Post: #67 Title: Re: شوفي النسوان كيف !!!!! Author: رانيه محمد الشيخ Date: 05-07-2013, 12:23 PM
دا زاتووووووووووووو يا عسل البيزعل بوبى انها ما تكون اقل جمال منها واناقه وهنا بيجوا يقولوا اكيييييييييييييييييييد معمول له عمل وما عرفت هل دا فعلا البيحصل ولا دا عذر ساى فعليا صادفت حالات كتيره عن موضوع العمل دا ولمعارف لينا اتزوجوا راجل مره والمره الاولى بديت تشتغل له فى الازرق وفى نهايه طلق المره التانيه وبعد فتره اتقابل معاها وقال ليها كنت بشوفك زى العفريت لمن اجى داخل البيت وانه كان بيحس انه مخنوق برغم انه مطلق المره الاولى 3 طلقات يعنى محرمه عليه وبرضو عملت له العمايل دى عشان ما يجيب عيال تانى وصرفه بس يكون على عيالها هى وغيرها وغيرها وغيره وغيره هل فعلا الشى دا حاصل وهل فعلا فى رجال بتتزوج من غير وعى بسبب الاعمال وهل فعلا بطلق برضو بدون وعى حاجات كتيره بتكون ما مفهومه خصوصا لمن الزوجه تكون قايمه بواجبها وزياده هنا التسائل بيبقى مضاعف والاجابه بتبقى اصعب
Post: #68 Title: Re: شوفي النسوان كيف !!!!! Author: د.نجاة محمود Date: 05-07-2013, 12:57 PM Parent: #67
الاخ عبدالعزيز سلامات انا بهظر ساي في الكلام الاخير لكن حقيقة فارق السن الكبير من الاسباب الاساسية للخيانة الزوجية السن تضاحك نديدها
Quote: أمانة ما تلومت ... كس الهواء طوالي وبالسرعة دي ؟ صحيح يا مأمن الرجال يامأمن الموية في الغربال ... لكن بيني وبينك الزوجات بقن يكسرن
وراكم قلة وبالطقاق زي ما بقولوا ناس الخليج .. عموما شكرا على الترحيب
توفي يا قريبة
غالبية السودانيات يجتهدن العمر كله للظفر بشريك الحياة لكن من يوم دخولها بيت الزوجية وخاصة لو ولدت بتنسى نفسها هاك ترهل.. وهاك يا شحم وزحمة..
يعني الواحدة لو بتهتم بنفسها ستجد الاهتمام من زوجها!! أي رجل يمشي من زوجته تكون هي المسؤولة اولا عن ذلك!!
لكن يا توفي... نحن لسة في الترحاب والترحيب
مودتي
Post: #72 Title: Re: شوفي النسوان كيف !!!!! Author: اميرة السيد Date: 05-07-2013, 02:50 PM Parent: #69
الحبيبة عواطف وينك ووين اراضيك .. غبتي غيبة طويلة ولكن رجعتي لينا بالماس والدرر.. وموضوعك موضوع جميل جدا وهادف جدا وواقعي جدا لأنه يحصل كثيرا في مختلف بلدان العالم ، سواء كان من العالم المتقدم او العالم المتخلف.. فالوفاء نادر جدا في عصرنا هذا ... عجبني كلام محمود بكر... وانا عاوزة لي عريس زي محمود.. يا ربي في اثنين زيه؟؟ والله يديك العافية
Post: #73 Title: Re: شوفي النسوان كيف !!!!! Author: عمر الفاروق Date: 05-07-2013, 03:23 PM Parent: #72
Quote: عجبني كلام محمود بكر... وانا عاوزة لي عريس زي محمود..
والله انا خايفو بعد يقرا كلامك ده يقوم يتقدم ليك .. وحييينها ستنهااار كل القيّم المكتوبة ..
تخريمة: بستغرب شديييد للإنفعال مع ما يكتب أحاسيس بوردية ؟؟؟ وبستغرب أششد لما أفكر إنو كيف الزول بيطاوعو كيبوردو ويكتب عن مكنونات أحاسيسيية شخصييية مييية الميية مفادها السواي ما حداس .. هذا مع العلم إني ما بقصد زول محدد بي اتخريمة دي..ده كلام عااام كده
Post: #74 Title: Re: شوفي النسوان كيف !!!!! Author: خالد علي محجوب المنسي Date: 05-07-2013, 03:44 PM Parent: #73
العزيزة الفاضلة عواطف ادريس الصفحة الأولى ابت وحلفت ما تفتح معاي التقول سوكرتيها بي طبلة في التبادي ألف حمدا على سلامتك عودة وإستطابة لمواضيعك الاجتماعية التي تناقشيها بطعم حدثيك الخاص بك ( عواطف حديث ) هو الراجل مالو ( اكبر منها )؟ وتاني خلّا ليها الصورة عشان تشوف حبيبتو؟ ماتبقي لي زي ابوي اجي في الحلقة 15 من المسلسل زمان اقعد جنبو ( وهو بمص المسلسلات مص ) اسأل اختي هو دا منو ودي منو يقول أنت مغفل عاوز تفهمها هسي كلها ويطردني من الغرفة هسي ما تطرديني من الغرفة ( الصفحة الأولى ابت تفتح ) بس فهمت بعض الشئ لانو انا ما غبي كتير شديد ( شوية كدي عرفت الحاصل شنو ) المهم يا ستي لو فتحت معاي بوريك راينا شنو
كدي هسي اعقب على حديث دكتورة نجاة محمود
Quote: الاخ عبدالعزيز سلامات انا بهظر ساي في الكلام الاخير لكن حقيقة فارق السن الكبير من الاسباب الاساسية للخيانة الزوجية السن تضاحك نديدها
والله يا دكتورة الزول لو ربيان من سغير كويس السن تضاحك ضرس العقل حتى البقوم اخر شئ داك الخيانة طبع وما تطبع الخاين خاين ولو بقى اصغر من الزوجة بي عشرة سنين او قدرها العين الخيانة التراب ما بملاها .ز والعين التانية ( الما خاينة ما بملاها إلا التراب ) تحياتي دمتورة نجاة ومشتاقين
Post: #75 Title: Re: شوفي النسوان كيف !!!!! Author: الزبير صالح الزبير Date: 05-07-2013, 03:59 PM Parent: #74
يا جماعه انا بعتقد انو المراة ( الزوجة ) كائن مستهلك يعني بتقل جودتها في كل شي بمرور الزمن وعلية لا تثريب علي الرجل انو يشوف ليهو حاجه جديدة بعد تلاتين او اربعين سنه زواج مع الاحتفاظ للزوجة الاولي بكل حاجاتها ومتطلباتها
ربنا يسترنا غايتو من الكلاشنكوفات الحانتردم بيها مافي زول يرد او يعلق علي كلامي دا عشان انا تاني بجاي ما جاي
أحيانا الزوج بيلعب دور في الموضوع من ناحية عدم اهتمامه بزوجته وفي أغلب الأحيان يكون فارق التعليم سبب أساسي في هذه المشكلة خصوصا لما تكون الزوجة في وادي والزوج في واد آخر
يا عواطف وين انتي ياخ والله طولت الغيبة شديد خلاص علينا
لا اعتقد ان السبب هو الشكل الخارجي بل اجزم ان السبب الأساسي هو لسانها وطلباتها التي لا تنتهي لأنه لو وجد الراحة النفسية والسكون في بيتها لما بدلها حتى لو كانت عشيقته حولينا جونز
انا اعتقد القصة لها بعدين قابلين للنقاش بمحاور مختلفة .. الشق اولال بزواج الرجل المسن بالبنت الشابه الجميلة الصغيرة السن كزوجة ثانية
هذا محور لوحده ونوقش كثيرا ..
والشق الثاني في هجره للاولى بتلك الطريقة المذلة المهينة القاسية ... الانسان لو كان موظف في شركة ووجد وظيفة بوضع افضل في شركة ثانية لايستطيع ان يهجر وظيفته الاولى بهذه السهولة والا القانون سيزج به في السجن تحت اي تهمه ممكن يختارها صاحب العمل .. لكن لان هذا الجبـــان لانه يعرف الا يوجد قانون يحمي تلك المسكينة ..
والشئ الثاني انا اعتقد ان الحادثة ليست وليدة اللحظة او النزوة لكن غالبا هي تراكمات لشخص طائش خلف نزواته
تم تزويجه لها في الاول عبر عدة تنازلات وتغاضي عن سلوكه..
وهي لا تستحق الشماتة بقول ( اها خمي وصري يا هو دا الفلان الاصريتو عليه) يكفيها ما فيها .
Post: #79 Title: Re: شوفي النسوان كيف !!!!! Author: عادل الباهي عبدالرازق Date: 05-07-2013, 05:42 PM Parent: #78
العزيزة عواطف طابت أوقاتك بكل خير وعودا حميدا مستطاب
غايتو النجيضة أي رجل يتزوج علي زوجتة بمجرد تغير شكلها بعامل السن وظروف الحياة إنسان ندل لكن عشان ما نعصر كمان علي الرجل مرات البيوت دي بتكون ساترة بلاوي متلتلة من المشاكل بين الازواج . أصلا مالاقاني رجل تزوج في زوجتة قال السبب منو وبرضو في حالات الطلاق المراءة كل مايسألها شخص تردم الرجل والرجل يردم المراءة مافي إنسان بتكون عندو شجاعة ويعترف بأنة الغلطان و السبب الرئيسي لانهيار عش الزوجية .
Post: #80 Title: Re: شوفي النسوان كيف !!!!! Author: سامى عبد المطلب Date: 05-07-2013, 06:01 PM Parent: #79
سلام استاذه عواطف انا بعتقد انو موضوع الشكل ده اصلاً ما اساس المشكله لانو بنعرف ناس كتار اتزوجوا نسوان اشنا من نسوانهم لكن تلقيهم مبسوطين 24 قيراط وشايفا قمر 14 الموضوع موضوع اهتمام اغلب النسوان السودانيات بعتقدن انو الواحده اول ما اولادها يكبروا شويه خلاص مفروض تبقى ام بس وتبدأ تهمل فى نفسها وفى راجلا والحياه بتبقى جافه ويبدأ الرجل فى البحث عن السعاده المفقوده وعن من يهتم به ويجعله محور اهتمامه ، هنالك من يتمكن من تحقيقها وهنالك من تكبحه ظروفه او سطوه الزوجه الاولى والضغط عليه باستقرار ابنائه فيضحى من اجلهم ولكنه يكون جسد بلا روح لان الموده والرحمه تم طردها من البيت بواسطه الزوجه ...
Post: #84 Title: Re: شوفي النسوان كيف !!!!! Author: خالد علي محجوب المنسي Date: 05-07-2013, 08:02 PM Parent: #80
يا جماعه انا بعتقد انو المراة ( الزوجة ) كائن مستهلك يعني بتقل جودتها في كل شي بمرور الزمن وعلية لا تثريب علي الرجل انو يشوف ليهو حاجه جديدة بعد تلاتين او اربعين سنه زواج مع الاحتفاظ للزوجة الاولي بكل حاجاتها ومتطلباتها ===================================================================================== والزوج ( الرجل بكون مقرّش في جراج ) ؟؟؟ الموضوع لو نظرنا له من ناحية شرع .. ما عندنا في كلام من حق الرجل التعدد لكن السؤال حق التعدد الذي كان شرط في نهاية أعطاء هذا الحق من المولى قال وإن خِفتم أن لا تعدلوا فواحدة من يستطيع العدل في هذا الزمان كضاب البقول وان عدل في المعيشة الكلام العدل في الفراش .. المودة .. الحنان .. الحب .. الرومانسية والمشاركة في كل صغيرة كبيرة اكيد بقع في المحظور غايتو نحن معشر الرجال ما ننكر بس بنفكر في التعدد لما نلقى لينا قريشات زيادة وننسى باقي العدل ونفتكر دا هو العدل ( مفروض نعترف بهذا ) عندي صديقي عنده زوجتين والآ فات مثنى جاب ثلاث ورباع .. كان يحاول العدل لكن في واحدة بتعجبو اكتر لما اليوم ما يكون عليها بزوغ من المكتب بمشي ليها بالنهار ( بقول لي سارق خط ) هسي مع الأربعة ديل بكون ماشي علي ركبي
رجل بعدما اولاده كبرو نسى العشرة ( خمسة وعشرون سنة أتفق لي مع موظفة عاوز يتزوجها في نفس المصلحة التي يعمل بها ) اولادوا سمعوا بالخبر .. تحدثوا معه ان يترك هذا الموضوع ردا لهم دا حق يا اولاد اداني لي ربي والحمد الله ممكن اتزوج المهم الأولاد مشوا لعمهم واخبروه العم جا اتكلم مع اخو قال لي : المرة دي قصرت معاك في شنو تعبت معاك ايام مكعكع ومفلس وربت وجاهدت دا اخر جزاها مالا ؟ عيبها شنو ؟ قال الراجل ما بتعرف تطبخ والله تجيب ليك الملاح البصلة ما بتكتلا ( البصلة تطرشق في خشمك ) قال له عم الاولاد والله انت تتحايل عايش ليك 25 سنة البصلة مطرشقة في خشمك الجاك الليلة شنو ؟
Post: #86 Title: Re: شوفي النسوان كيف !!!!! Author: خالد علي محجوب المنسي Date: 05-07-2013, 08:39 PM Parent: #84
مسكينة المرأة
Post: #94 Title: Re: شوفي النسوان كيف !!!!! Author: اسامة محمد ابوبكر Date: 05-07-2013, 09:23 PM Parent: #86
استاذة عواطف حمدا لله علي السلامة و الجابك يجيب عقابك
Quote: : ولكي يبرر فعلته الشنيعة ترك صورة معشوقته الجميلة ذات القوام الفارع ، والشعر الأسود الفاحم ، والابتسامة الهوليودية على التسريحة و على خلف الصورة كتب هذا التعليق (شوفي النسوان كيف) !
فعلا بعض الزوجات بطفشن بلد لكن هذه الزوجة حسب علمي ظلمها الزمن والزوج
شكرا مرورك اسعدني
Post: #96 Title: Re: شوفي النسوان كيف !!!!! Author: تبارك شيخ الدين جبريل Date: 05-07-2013, 09:50 PM Parent: #92
غايتو انا فهمت من القصة ... انو الزوجة قالت ليهو:
"شوف الرجال كيف" !!!
بما يكفي ... للوصول لهذا المصير الكوميدي ...
وقد أضيف: تاني تجي المولد؟
(غايتو بى مفاهيمنا الزوجية دي ... ربنا يغتي على اطفالنا!)
... المهم ....
Post: #100 Title: Re: شوفي النسوان كيف !!!!! Author: عواطف ادريس اسماعيل Date: 05-08-2013, 04:23 AM Parent: #96
ود شيخ الدين
أسعدت مساء طبعا الدنيا عندكم ليل
والله ضحكت من الأعماق عارف ليه لأنه دايما عندك رؤية تختلف عن رؤية الآخرين
عارف حكاية شوف الرجال يمكن في بعض الرجال بسمعوها عشرة مرات في اليوم
ولكن هم عارفين النسوان بتكلمن وما بنفذن زي صاحبنا اللي لملم عزاله وكسح
المهم
شكرا للطلة البهية
Post: #101 Title: Re: شوفي النسوان كيف !!!!! Author: محمود بكر Date: 05-08-2013, 11:47 AM Parent: #100
والله انا خايفو بعد يقرا كلامك ده يقوم يتقدم ليك .. وحييينها ستنهااار كل القيّم المكتوبة ..
الحبيب/ عمر الفاروق
انت عارف الكلام ده قناعتي الشخصية وهذا منذ فترة طويلة وكان مسار نقاش مع اصدقائي وزملاء العمل خاصة الزميلات. صدقني انا صادق في ما كتبت وهي ليست قيم مكتوبة فقط بل مغروزة في النفس والوجدان اسال الله لك الثبات
Post: #102 Title: Re: شوفي النسوان كيف !!!!! Author: احمد خليل Date: 05-08-2013, 01:20 PM Parent: #101
تحياتى وبعضهن كلما تقادم عليهن الزمن تألقن وعرفن نظريات ( الآحلال) و(التعويص ) فصرن اكثر انوثة !!احساس بالمسئولية فيشقين بالاكل حسب السعرات الحرارية وتنظيم النوم والاهتمام بالمشى والنظامة والتانق وبعضهن يستسلمن (حيعمل شنو يعنى) والاولاد والاهل وهكذا (مكبلات) وتتمدد بلا حدود وتمارس هواية الأكل المفرد والجماعى والنوم بلا حدود واللسان بلا سقف !!! الحكاية نسبية ,,ووعى
Post: #103 Title: Re: شوفي النسوان كيف !!!!! Author: عمر الفاروق Date: 05-08-2013, 01:43 PM Parent: #102
عارف يا ود بكر انا مصدقك ومتفهمك لكن انا عندي قناعات غريبة شوية في القصص اللي زي دي .. بحس إنو البيان بالعمل أبلغ من التعبير عنه كتابة أو البوح بيهو .. تعرف في نوعية رجال كده تحس بيهو قاهريين وعنيفييين في سلوكياتهم مع نسوانهم ظاهرياً لكن لو دققت في تصرفات ومواقف كده معيينة وصغمبرووتييية ح تكتشف إنو نوع الرجال ديل أكتر حباً وحفاظاً على العهد مع نسوانهم من نوعية تانية من الرجال ظاهرياً تشوفهم مقطعييين الرومانسية والوفاء ولكن في المواقف الحقيقية تنهار القييم وتتكشف الاقنعة.. تعرف أبهاتنا وجدودنا زمان تحسهم بعيديين جداً عن لارومانسية بل للدرجة البتخليك تفكر إنو أعمامك وخيلانك ديل جو عن طريق التكاثر الخضري لأنو بالغلط ساااي ما بتكون شوفت جدك ده قاعد جمب حبوبتك لكن رغما عن كده الواحد شهد ليهم مواقف كده والله تحسسك إنو ديل روميو وجولييت.. الزمن ده ورجال الزمن ده الواحد فيهم تلقاهو ملصق في مرتو ال24 ساعة لمممن يشهييك في العرس ..لكن في أول موقف حقيقي تكتشف هشاشة العلاقة وسطحيتها..
انت عارف عندي جدي اسمو الامام الجاك - رجل تقوى ومتصوف حتى النخاع - عندما يقرأ القرآن الكريم تسمع صوته حتى ولو كنت جاره الأربعين في صلاة المغرب تحديداً والعشاء
مرة كان عندنا مناسبة في بيتنا وبالليل خلاص والناس ماشين وقف جدي الامام الجاك في الباب وكورك (يابت نادي لي طيبة حبيبتي دي) كانت كلمة كبيرة منه وكانت صدمة لكل النساء الموجودات في المناسبة لأن طيبة التي يتحدث عنها وحبيبته هذه عمرها ناهذ على السبعين وأم وحبوبة كمان ولأنهن لم يتوقعن أن تكون طبيعة العلاقة بين الامام وطيبة - طيبة إلى هذا الحد و جميلة إلى هذا الحد. و
والله يا بت ادريس حمداً لله على سلامتك - مشتاقين تاني والله وتالت ورابع كمان
Post: #112 Title: Re: شوفي النسوان كيف !!!!! Author: عواطف ادريس اسماعيل Date: 05-09-2013, 04:08 AM Parent: #102
عارف أنا البحزني شنو لما أشوف زوجة في عمر الزهور لكنها زي البلدوز أقول ياربي
ذنب السرير شنو ؟
شكرا على الطلة الأنيقة
Post: #104 Title: Re: شوفي النسوان كيف !!!!! Author: احمد خليل Date: 05-08-2013, 01:56 PM Parent: #101
تحياتى وبعضهن كلما تقادم عليهن الزمن تألقن وعرفن نظريات ( الآحلال) و(التعويص ) فصرن اكثر انوثة !!احساس بالمسئولية فيشقين بالاكل حسب السعرات الحرارية وتنظيم النوم والاهتمام بالمشى والنظامة والتانق وبعضهن يستسلمن (حيعمل شنو يعنى) والاولاد والاهل وهكذا (مكبلات) وتتمدد بلا حدود وتمارس هواية الأكل المفرد والجماعى والنوم بلا حدود واللسان بلا سقف !!! الحكاية نسبية ,,ووعى
Post: #107 Title: Re: شوفي النسوان كيف !!!!! Author: اميرة السيد Date: 05-08-2013, 03:01 PM Parent: #104
Quote: انو الزوجة قالت ليهو:
"شوف الرجال كيف" !!!
بما يكفي ... للوصول لهذا المصير الكوميدي ...
>>>>>>>>>>>>>>>>>>>>>>>>>>>
عزيزي تبارك شيخ الدين
اذا كلامك ده صحي ، فأنا ما بلوم الراجل ده ابدا .. وكان ممكن يعمل اكثر من كده .. لأن الرجولة عند الرجل شرف واي شرف .. وممارسة لبيت الشعر المشهور : لن يسلم الشرف الرفيع من الأذى .. إلا وتراق على جوانبه الدم ده اذا كان انا كتبت بيت الشعر صاح.. والتاريخ يروي لنا ان رجال طعنتهم زوجاتهم في رجولتهم ارتكبوا افظع الجرائم حتى وصل الأمر لتقطيع الزوجة وشوي اجزاء من جسدها واكلها انتقاما..وأعوذ بالله من شر الانتقام.. وفي الحالة دي تصرف هذا الزوج ممكن نعتبره تصرف حضاري لأنه ما لجأ للإنتقام البشع ولكنه لجأ لانتقام المكايدة.
ولكن الاستاذة عواطف يتقول ليك القصة دي حقيقية وان الزوجة مظلومة.. والله يديك العافية
المهم...
Post: #108 Title: Re: شوفي النسوان كيف !!!!! Author: احمد سيد احمد Date: 05-08-2013, 03:25 PM Parent: #107
هذه مقتطفات من مقال للدكتور ابراهيم القرشي عثمان بعنوان " كلام حبوبات" ورد في كتابه القيم من المفكرة:
Quote: ولعل علماء النفس والاجتماع والتربية يقيمون وزنا كبيرا لكلام الحبوبات واثره في التنشئة بزرع القيم والمثل وتوسيع الافاق والمدارك وتقوية اواصر اللُحمة العائلية.ولكن قبل الخوض في هذا لماذا يريد الرجل من المراة ان تكون شابة على الدوام ويجعلها ويجعل كلامها من سقط المتاع اذا تقدمت بها السن؟لعل من فادح ظلمنا للمراة اننا نهيم بالتغزل بها والتقرب اليها حين تكون غصنا يانعا وننصرف عنها حين تحمل الثمر.أليست لدى المراة متعة للرجل سوى تلك المتعة؟أليس في عقل المراة وفكرها متعة وفائدة ام اننا نسير على هدى سخرية الجاحظ الذي لا يعتد بشهادة المراة ومعلم الصبيان؟ نعم الشباب ربيع العمر ولكنه ربيع جسدي لا يخلو من طيش.فما اكثر ما يقضي الزوجان الشابان حياتهما خناقا وعراكا فيما يستحق وما لا يستحق فاذا تجاوزا هذه الفوره وتقدما في السن قليلا استقرت الحياة وصار كل شي هادئا هانئا.لذلك قالوا: (إن العوان لا تعلم الخمرة) يريدون بذلك المراة التي اكتسبت خبرة في خاص الحياة وعامها. وللانسان قيمة في كل مرحلة من مراحل حياته فالمراة حين تكون طفلة فهي كالريحانة تُشم وتُضم فاذا نضجت صارت ثمرة وبعض الثمار يزداد طيبا كلما ازداد نضجا,بل بعضها يزداد طيبا حين يجف.وصناع المُدام يرون ان النبيذ كلما تقادم عهده تعتّق وازداد طيبا.لذا فمن القسوة ان يقول احدهم في مواصفات الزوجة:
فإن اتوك وقالوا انها نِصَفٌ فإن احسن نصفيها الذي ذهبا والنَصَف هي (نص عمر ) .قيل لبعض الخبثاء سمعنا انك تزوجت ان شاء الله تكون صغيره.فقال : والله ما صغيرة لكن استعمال مغترب (أهي سيارة يا بعيد؟)؟ هذا لمن اراد ان يؤسس حياة جديدة وهي نظرة جسدية فانيه لان نصف المراة الاول اذا كانت فيه المتعة التي تتولد منها الثمرة التي تحفظ جنس البشر فان النصف الباقي هو الخبرة التي تغذي الثمرة وهذا اشبه بشاة عائشة رضي الله عنها حين قالت للنبي ص : لم يبق الا كتفها فقال بل بقيت كلها الا كتفها.فالذاهب من عمر المراة غير ماسوف عليه عند العقلاء قياسا بالباقي النافع من عمرها. ولم اجد من كتابنا و شعرائنا من مجّد المراة بعد سن الشباب الا بعض ابيات يغنيها الاستاذ مبارك حسن بركات لم اقف على شاعرها يقول في بعضها مثمنا خبرتها في حسن ادارة دفة البيت: حاويه من الانوثة معاني ومهما ابقى مُر بالعاني وهي بعيدة عن النكد تساعد زوجها على الصلاح والاستقامة: منها قط خلاف ما حصل لي بس ازعاجا لي قوم صلي وقد عبر ببلاغة عن خلو اسلوبها في الحياة من الازعاج مطلقا . بل فيها خصال هي راسمال الحياة المستقرة السعيدة وضمان استمرارها: مي العزايه دائما سادّه مي اللهفانه بي ورا المادة مي الغبشه المبره حادّه دي اللي شبابها دايما مواده
اما عقول النساء فالمشهور انها تتجلى وتبدع في الحيلة الدهاء والمكر والتراث قديمه وحديثه ينضح بذلك.اما في الحكمة والراي والمشورة فالغالب عندنا تسفيه راى المراة حتى قالو في الشورى الضعيفة (شورة مرا) اي لا قيمة لها ولا تعويل عليها.ولكن تراثنا السوداني والتراث القديم يثبتان للمراة نصيبا من الحكمة ورجاحة العقل.فقد ذكر القرطبي في تفسيره ان ان النبي ص امر المعتمرين يوم الحديبيه حين حبسهم الكفار ان ينحروا ويحلو,ففقعلوا بعد توقف كان منهم اغضب الرسول فقالت له ام المؤمنين ام سلمة لو نحرت يا رسول الله لنحروا فنحر رسول الله ص هديه ونحروا بنحره.
وكان المحلّق احد المغمورين في الجاهلية وكان بائسا وله ثلاث اخوات عوانس,ولايملك الا ناقة يعيش بلبنها ,وبردين نفيسين ورثهما عن ابيه.فمر بهم الاعشي الشاعر في زممان كان فيه بيت واحد من الشعر يرفع قبيلة ويحط اخرى فجاءته عمته واشارت عليه بان يستدين زق خمر من احد التجار ويدفعه مع الناقه والبردين الى الشاعر فعساه اذا اعتلج (اشتغل ) الخمر والكبد والسنام في جوفه ان يمدحه بابيات تغير مجرى حياته.ففعل بعد تردد ولما وصلت الهدية الى الاعشى قال لرسوله لئن اعتلج الخمر والكبد والسنام في جوفي لاقولن فيه شعرا لم اقله في غيره قط(وما اظن الكبد والسنام الا( نيّه) على طريقتنا السودانيه)وبالفعل مدحه بابيات جاء فيها: تُشّبَّ لمقرورين يصطليانها وبات على النار الندى والمحلّق فلم تمضى ايام حتى زوّج اخواته الثلاث واقتنى ثروة جعلته بين من يشار اليهم بالبنان. بل ان الاعشى نفسه نجا من الموت بسبب نصيحة عجوز اخرى,فقد ذكروا انه هجا علقمة بن علاثة سيد بنى عامر وزعيمهم بقوله: علقم ما انت الى عامر الناقص الاوتار والواتر بل هجا القبيلة كلها بقوله: تبيتون فى المشتى ملاءً بطونكم وجاراتكم غرثى بيتن خمائصا اي جائعات البطون.فغضب علقمه واهدر دم الاعشى الذي ساقته الاقدار في واحده من سفراته حين اخطا دليله وقائده فنزل به في حي بنى عامر فأوثقوه وسلموه لعلقمه فدخل على امه وقال : لقد امكنني الله من هذا الاعمى وسأقتله شر قتلة,فقالت له : يابني ,لقد كنت ارجوك لقومك عامة.....(يعنى خاتاك لاكبر من دي) انما الراي ان تكسوه وتمنحه وتسيّره الى بلاده,فانه لا يمحو عنك ما قال الا هذا.فنزل على راى امه واكرمه واطلقه فمدحه الاعشى بابيات غسلت الهجاء زسارت بين العرب نها قوله: علقم يا خير بنى عامر للضيف والصاحب والزائر الضاجك السن على همه والغافر العثرة للعاثر
وفي التراث السوداني ايضا عظيمات صاحبات راى.فقد ذكروا ان المك نمر لمل انحاز من وجه الاتراك توجها الى الحبشه اعترضته بعض القبائل فقاتله بعضها وترك له الطريق اخرون فلما مر بدار العطيش بلد غالب ود بشر الغول الحمدي اراد ان يمنعه,فقالت له عمته:إحذر ان تعترض طريقه بل عليك اكرامه فالملوك اخوان الملوك.فرجع عنرايهواخلى حلته وانزل بها المك نمر وجماعته وذبح لهم امام كل بيت ناقة حتى شبعت الكلاب من اكباد الابل فحفظها له المك نمروالجعليون وحفظ دماء قبيلته.هذا وقد كانت لنا عمّة هي بمثابة (الحبوبه) للاسرة كلها,وكانت حكيمة عاقلة محبوبة,زهي زوجة الوالد وكنا ابناء علات (ضرائر) ولكن ما احسسنا يوما انها ضرة لامهاتنا.شاركت في تربيتنا مشاركة حقيقية,نقضى من اوقات الانس معها اكثر مما نقضيه مع امهاتنا.وكانت خبيرة الاسرة وحكيمتها رحمها الله.فكان الطفل اذا بكى تقول (خلوهو بوسِّع) ,وكنا نعجب لصبرها.فوجدت بن قتيبة يذكر خبرا يؤيد ما ذهبت اليه عمتنا,قال أُتي عبد الملك بن مروان برجل من الخوارج ليُقتل امامه فأُدخِِل علي عبد الملك ابن له صغير وهو يبكى,فقال الخارجي:دعه يا عبد الملك فان ذلك ارحب لشدقيه واصح لدماغه وابعد لصوته واحرى الا تأبى عليه عينه اذا حفزته طاعة الله فاستدعى عبرتها.فأُعجب عبد الملك بكلام الخارجي وقال له متعجبا:اما يشغلك ما انت فيه عن هذا؟فقال الخارجي:ما ينبغى ان يشغل المؤمن عن قول الحق شيء.فأمر عبد الملك بحبسه وصفح عن قتله.فانظر ثبات هذا الخارجي وشجاعته وعقله رغم السيف المصلت على عنقه,وانظر الى ادب الخليفة زتقديره للعقل والمعرفة والشجاعة,وتأمل خبرة عمتنا رحمها الله فان قولها (خلوهو بوسِّع) قاعدة في التنشئة صدّقها كلام هذا الخارجي الذي زعم ان البكاء يوسع الاشداق ويوسع مدى الصوت ويصحح الدماغ وينفى القسوة واللظة.ويبقى راى الطب بفروعه في المسالة. اخيرا ليس كلام الحبوبات كله تخريفا.والحكمة ضالة المؤمن اينما وجدها اخذها.
Post: #109 Title: Re: شوفي النسوان كيف !!!!! Author: Muna Khugali Date: 05-09-2013, 00:03 AM Parent: #108
مرحب برجوعك يا طوفي..
Post: #111 Title: Re: شوفي النسوان كيف !!!!! Author: تبارك شيخ الدين جبريل Date: 05-09-2013, 04:05 AM Parent: #109
Quote: ولكن الاستاذة عواطف يتقول ليك القصة دي حقيقية وان الزوجة مظلومة.. والله يديك العافية
والزوجة مظلومة من وجهة نظر الزوجة أم من وجهة نظر الزوج؟
(طبعًا نحن قنعانين من وجهة نظر الأستاذة عواطف!)
... المهم ....
Post: #114 Title: Re: شوفي النسوان كيف !!!!! Author: عواطف ادريس اسماعيل Date: 05-09-2013, 04:18 AM Parent: #109
موني ...
أسعدني صباحك الجميل كجمال روحك
حاولت كثيرا الاتصال بك ففشلت
عموما حمد لله عالسلامة وما تشوفين شر
Post: #113 Title: Re: شوفي النسوان كيف !!!!! Author: عواطف ادريس اسماعيل Date: 05-09-2013, 04:16 AM Parent: #108
ود سيد أحمد
صباح أحلى من السكر
والله مداخلتك رائعة وقيمة ولكن يا بعد عمري الزمن اختلف والمفاهيم تغيرت
ولابد من مواكبة العصر وهذا ليس بالأمر الصعب وفي الوقت نفسه يتوجب على
الزوجين مراعاة فروق الوقت ، فالزوجة ليست وحدها التي يتقد بها العمر
ويظل الزوج شابا بهي الطلعة ولكن المطلوب منها بذل قليل من الجهود حتى
تحقق مقولة إذا نظر إليها أسرته، أما الزوج فيتوجب عليه أن يراعي العشرة
والذكريات الجميلة .. وأن يحفظ للزوجة مكانتها لما قامت به من تضحيات
لا تحصى ولا تعد وأعتقد أن هذه المعادلة ليست صعبة على الطرفين
عموما شكرا على هذا الإثراء
معزتي
Post: #116 Title: Re: شوفي النسوان كيف !!!!! Author: تبارك شيخ الدين جبريل Date: 05-09-2013, 04:59 AM Parent: #113
Quote: أما الزوج فيتوجب عليه أن يراعي العشرة
والذكريات الجميلة .. وأن يحفظ للزوجة مكانتها لما قامت به من تضحيات
لا تحصى ولا تعد
بس؟ ... "أرديحي" يا كافي البلا؟
طيب ما يعمل للزوجة نصب تذكاري ويتخارج ...
(ويكون بديع لو كتب فيهو "شوفي النسوان كيف"!!!)
... المهم ....
Post: #117 Title: Re: شوفي النسوان كيف !!!!! Author: عواطف ادريس اسماعيل Date: 05-09-2013, 05:11 AM Parent: #116
عارف يا توتو والله قعدت أضحك براي زي المجنونة
حتى الناس في المكتب قالو بسم الله الرحكن الرحيم ...
عموما تحياتي ويسعد مساك الجميل ..
ويابخت من تتزوجك حتفطس من الضحك ...
Post: #118 Title: Re: شوفي النسوان كيف !!!!! Author: تبارك شيخ الدين جبريل Date: 05-09-2013, 05:43 AM Parent: #117
Post: #119 Title: Re: شوفي النسوان كيف !!!!! Author: عواطف ادريس اسماعيل Date: 05-09-2013, 06:10 AM Parent: #118
حيلها بس ؟
والله أنا قربت أقع من طولي ..
المهم إنك بصحة وعافية وتسلم
Post: #120 Title: Re: شوفي النسوان كيف !!!!! Author: الأمين كامل الأمين Date: 05-09-2013, 06:49 AM Parent: #119
الاخت عواطف
موضوع مليان شديد والله ،، سؤال لذلك الزوج المراهق هل جسمه ووزنه هو نفس الجسم والوزن عندما تزوج تلك المسكينه ؟؟؟ ولا عمل ليهو كرش وصلعه الخ .. ثم كيف يضمن ان يستمر قوام الزوجه الجديد ولا يتغير ؟ سبحان الله ،، بكل آسف دا زول تفكيرو فى الزوجه محدود فى جسمها فقط وهذا مفروض تفرح انك اتفكت منو
Post: #121 Title: Re: شوفي النسوان كيف !!!!! Author: عواطف ادريس اسماعيل Date: 05-10-2013, 07:06 AM Parent: #120
أخي العزيز أمين
كل الود
عارف أمثالنا كلها من صميم الواقع مش بقولوا الجمل ما بشوف عوجة رقبتو ؟ صاحبنا مكرش وأصلع ... وشعره رمادي
لقيته كيف ؟؟؟؟
شكرا على مرورك الزاهي
Post: #122 Title: Re: شوفي النسوان كيف !!!!! Author: بكرى ابوبكر Date: 05-10-2013, 07:34 AM Parent: #121
الحبيبة عواطف مرحب بيك بعد غيبة طويلة و تانى ما تنقطى وشوفى المعجبين المكسرين فى بوستك ديل بنقطعوا منهم يوم ديل ناس حارة صدقنى لى قدام تركت بعافية
Post: #123 Title: Re: شوفي النسوان كيف !!!!! Author: عواطف ادريس اسماعيل Date: 05-10-2013, 07:43 AM Parent: #122
سيد الحوش ...
والبوش ...
والكرم الأصيل الماهو فشوش
شكرا على الطلة وخطوة عزيزة ..
والله ما قطعني منكم إلا الشديد القوي وهو وفاة ناس عزيزين على قلبي
وعد مني ليكم سأكون معكم إلا الأبد
معزتي
Post: #124 Title: Re: شوفي النسوان كيف !!!!! Author: معتز يوسف نجم Date: 05-10-2013, 11:03 AM Parent: #123
موضوع روعة كروعة بلادي
بس نسوان الزمن دا بقن ما بنقدرن وكذلك الرجال
بس طبيعة الظروف التي تدفع الرجل في التفكير في الزواج من اخري تختلف من زول لي اخر
اهمال المراة لنفسها وترك الاهتمام بالزوج والجري وراء السمنة الزائدة واحدة من الاسباب الي تؤدي
الي التفكير في الزواج من أخري
وكذلك من أسباب الزواج بالاخري ان تكون المراة بلغت من العمر عتيا وفي المقابل مازال الراجل له المقدرة
علي الزواج والانجاب أيش البيمنع من الزواج !!!
المهم
علي قول تبارك
نسيت نسلم عليكي أستاذة عواطف
حتما راجعين للبوست
Post: #126 Title: Re: شوفي النسوان كيف !!!!! Author: عواطف ادريس اسماعيل Date: 05-11-2013, 07:23 AM Parent: #124
هههههههههه
ضحكتني يا معنز ... صباحك سعيد
عموما المرأة السودانية تعتبر اقل اهتماما بهذه الجوانب مقارنة بالنساء الأخريات ومش كلهن بعضهن .. كما تعتبر المرأة اللبنانية الأكثر إنفاقا على تجميل نفسها ومظهرها
ولكن يمكن لزوج بدلا من الزواج بأخرى أن يدفع زجته إلى المحافظة على المظهر والجوهر بالاطلاع والثقافة التي تهذب الداخل والخارج المشكلة إنو النسوان ما بقرن حتى الجريدة
في مرة من المرات كنا في جلسة حريمية قامت واحدة من الحاضرات قالت أنا بقرا الجردة 6 صباحا مع الشاي ... نطت واحدة قالت ليها تقري ليه انت راجل ؟؟؟؟]
Post: #125 Title: Re: شوفي النسوان كيف !!!!! Author: الأمين كامل الأمين Date: 05-10-2013, 11:13 AM Parent: #121
بالظبط زى ما اتوقعتو هههههههههههههه بس زيدى عليها انه مخو فاضى
Post: #127 Title: Re: شوفي النسوان كيف !!!!! Author: عواطف ادريس اسماعيل Date: 05-11-2013, 07:31 AM Parent: #125
العزيز أمين
يسعد صباحك
أفرغ من فؤاد أم موسى !!!
Post: #128 Title: Re: شوفي النسوان كيف !!!!! Author: عواطف ادريس اسماعيل Date: 05-12-2013, 04:38 AM Parent: #127
شكرا لكل المتداخلين عبر الفيس ...
شكرا على أفكاركم البناءة .. وإطرائكم على الموضوع
أنتم في القلب والخاطر حتى ولو كنتم في الفيس بوك
أحبكم جميعا ... أحترم آراءكم وأقدرها
Post: #129 Title: Re: شوفي النسوان كيف !!!!! Author: نجوان Date: 05-12-2013, 07:00 AM Parent: #128
Quote: حبيبتى عشة طيور
يا سلام يا تبارك، شكرا على الرابط .. صدفة جميلة الخلتني أمر بى جاي، جميلة جدا.
____ سلامات يا عواطف
Post: #130 Title: Re: شوفي النسوان كيف !!!!! Author: عواطف ادريس اسماعيل Date: 05-12-2013, 08:57 AM Parent: #129
