تعليم بلا حدود .... أضرب وأهرب ( بوادي شعير..بالجزيرة)

بقلم /Sheema Bonbon

اهلنا بوادي شعير وعن تفاعلهم مع اضرب واهرب ..
رؤية اولى ...
الكرم و الضيافة ما غريب عليهم فهم اهل قرآن و ناس قلوبها نظيفة عامرة بالود و المحبة لكل زول وصل ديارهم و بقومو معاه بالواجب و زيادة ..
و الله لو قعدت أشكر فيهم ليوم الدين ما يكفى ... بس برضو اقبلوها مننا .. الف شكر ليكم على الضايفة و الكرم و الحب الغمرتونا بيه ..
عندى كلام كتير عن المهمة و السفرية المشيناها دى لى اهلنا هناك ما حاكتبه هنا كله بل كل فترة حانزل بوست عنها ...
دخلنا المدرسة الصباح الساعة 9 صباحا ... و ابتدا الشغل على بركة الله ... وطوالى على فرشتى و جردلى بتاع الطلية مسكت ليك 3 فصول الحيط
منتهية مبهدلةمشخبط فيها بالبوهية و الاقلام السوداء ، لميت شباب الحى الكانو معانا فى المدرسة فى الفصول تعالو شيلو الطلية و الجبص قفلو الحفر
و اضربو .. اها كان فى فصل معذبنى عذاب شديد اصلو ما رضيت عنه ضربناه طلية ما نفع ، قفلنا الحفر بالجبص ما نفع الشباب ضربو بوماستك
ما نفع بس قبضت ليك محبوب يا محبوب الفصل دا بالجد ما ينفع نخسر بوماستيك كدا و الشغلانة ما جايبة حقها نعمل شنو نعمل شنو ؟ بس اسمع يا
محبوب نضرب طلية و يا شباب الحى و اتكلمت معاهم و قسمتهم في الفصول كلها و فى الفصل
العندى دا جيبو امشو اكلو الجرادل دى كلها طلية بدل البوماستيك و تعالو الشباب هواء تفاعل شديد مبسوطين يلا حى على الفرش و الطلية و ناس
طلعو فوق و ناس امسكو الجهة دى ما تتحركو منها كل ما تنشف اضربو تانى و انا معاهم نشيل ونضرب ينشف تااااااااااااااااانى نعيد ليك الضرب
الفصل دا براه يمكن اكتر من 50 مرة اتضرب طلية عشان الشخبطة بالاسود بطااااااااالة الفصل كله منتهى مبالغة ويلا ضربنا لمن كتوفنا وجعتنا و
اخييييييييييرا اختفى اتدس و انا قربت ازغرت و يلا على الصنفرة و خليتهم مشيت الفطور جيت راجعة بعد مدى من
الزمن لقيتهم كملو الصنفرة و ضربو الفصل بوماستك اصفر
و الفصل العذبنا دا اكتر من من باقى الفصلين يطلع زى الجديد و كأنه اتبنى حسي
و انا خشمى بالفرحة قرب يتشرط و الله الفرحة و الضحكة ما سايعانى قلبى برقص رقيص و الشباب فرحانين اها يا استاذة خلصنا رايك شنو ؟
قلت ليهم انتو خليتو فيها رأى ماشاء الله تبارك الله علينى عليكم باردة .. دا التفاعل النحن بنتكلم عنه دا التفاعل النحن بننشده ... و بكدا انا حسيت
انه فعلا انجزنا فى وادى شعير و لله الحمد كثيرا .. انا متأكدة مليون المية رسالتنا وصلت فى وادى شعير زى ما نحن عايزين ... الناس دى كانت
فرحانة بينا فرح ما عادى ...
تقريبا كدا المدرسة ما فضل فيها شئ انجزنا بالجد و الحمدلله ...
المواقف الحصلت كتيرة و كل فترة حاحكى فى بوست منفصل ...
الشكر كل الشكر و الحب و التقدير لأى زول كان معانا فى الحملة دى ، لأى زول ساهم بأى شئ حتى لو بالدعاء فقط ، الشكر لكل الاهل فردا
فردا فى وادى شعير .. الشكر لكل الجنود الجبارين البذلو جهد خرافى المتطوعين الغاليين و جنود وادى شعير شباب و شابات ...
رينا يوفقكم دائما و ابدا ...
ودائما إيدينا للبلد نبنى و نعمر و نعلم طفل و هو الامل بتاع بكرة ..
تعليماب و الله العظيم احبكم احبكم احبكم فى الله ....