الكسر ظاهر فى الاشاعة لكن الدكتور قال مافى كسر!!

مجموعة متحلقة حول مواطن
والمواطن فى يده فلم أشعة اكس

أها قال ليهم:
اتحداكم لو الزول دا مشى على رجليه..

الناس ما انتظروا يشوفوا الزول ومشيه
لكن واحدين تخيلوه فى الخرطوم
وتانين قالوا فى ودحامد
وتالتين قالوا شافوه ماشى ومدمم وشاكين فى الدم
هل النزيف جايى من هدومو ول من جسمو.

المهم تبارك قاعد فى المنبر
وفتحى عندو مواجبة فى صيوان فرح
والفرح مبنى على رؤية فكى جاب بيضة مسلوقة وقشرها
ونادى شافع لم يبلغ الحلم
والشافع شاف ناس الهامش بزغردوا

نفس الفكى أمس كان فى وزارة الدفاع
وشايل بيضة تانية لسانا طويل وعريض
برضو قشرها
وجاب نفس الشافع
والشافع ماشاف غير غزلان عطشانة واردة فى نهر من اللعاب المنقى
وناس لابسين كاكى وساكين الغزالة

وناس تانية تكاكى

وأخيرا اتضح أن الجماعة حاولوا ونجحوا على الأرض
والجماعة التانين حاولوا ونجحوا يمسحوا نجاح ديلاك برفع فلم الاشاعة
وديلاك انشغلوا فى الاشاعة
والزول المامكسور مشى على رجلينو وصدق الدكتور
وكذب البصاصون وإن صدقوا!!

المافى شنو؟
قيقراوى قاعد وإن أصبح فتح الرحمن المستند على الحرم..

والسودانى رفع راسنا
أصلا هو من الجزيرة جمب المدينة عرب
وكان بعوم فى الترعة
وقرا فى حنتوب
جمب النيل اللزرق

وتكلم مع قناة الجزيرة فى تلفزيون العربية

ويابخت الهنود
والسعوديين يغردوا..

والرش جايى
الفكى اسحق قال الرش يا بالمحاية يا بالماء الطهور
ووهبة زاتو طهار

وابو حسين راجى الرش
والختمية وناس الاتحادى راجين الرشوشة
أصلها الفتة نشفت
وود سيدى عايز ينشر الوعى فى ام دوم
أصلهم مابعرفوا المستثمر
والمابعرفك يجهلك

ومريم الصادق قالوا ناقصة طفولة
وأى حزب أمة أو اتحادى أحلامو مسقوفة
والكيبل بتاعو عايز كوبس
والحكومة ماسكة الأمية
والآوت لت مافيهو كهربا
أها يعنى عبد الرحمن أو بشرى أو ود العمدة يعملوا شنو؟

أهم حاجة فينا نحنا ياسودان كلنا بنعرف نقرا الاشاعة
أها أخصائى الأشعة لزومو شنو غير تبذير قروش
ماكفانا فنى الأشعة يصور
وينزل الأكس ريى فى سودانيزاونلاين
والبصحى بدرى يقراها
ويدينا النجيضة
دا لو ودالصايم الماتوربيد نايم.

والله البوست دا شكيت فيه
لكن ماعندى حزام

أهم حاجة تكون السستة ماحالجة

لا ادري بماذا اصف ما يثير استغرابك واستغرابي ايضا .. حقا انه ما يدفعنا للجنون .. ما هذا الصخب ؟ ما هذا الغبار ؟
انها حالة غريبة من حالات الحركة نقيض السكون بحيث يمكنك سماع اي جملة مما أتيت به ، بعدة لغات في آن واحد ..
حكاوى وروايات ولغات كفيلة حتى بإخراج "خوزيه اركاديو بوينديا " من عزلته الجنونية و تعليق صك سلامته العقلية على شجرة الكستناء ..

...Its an unprecedented state of infinite anarchy where nobody knows what he says, yet he claims , unlike the others , to know, master and interpret everything
It looks like our real work .. or may be it definitely is ..

اوووووووك ما في زول يرشنا بي موية ؟

تحياتي د. بلة

دا كلو ولسة في كيزان في الكنب قاعدين يسخنوا ...

وابو العفين معزوم عشا في البيت الابيض ...

والرئيس قال البنوك الإسلامية لا إسلامية لا حاجة ...

ومحسن خالد اعلن الجهاد على انجلينا جولي ...

وعمك حسبو جلطها في الفريق القومي الحريمي ...

والمفاوضات مع الحركة حا تستمر عادي ...

وناس الأمن ما عارفين يقبضوا منو ويخلوا منو ...

وغدًا أول فنانة تغني في أستراليا ...

والمصري كتل الدكتورة وضرب قروشها وشال حسها ...

وانا غلبااااااااااان ...





... المهم ....

Quote: وانا غلبااااااااااان ...

وش اخضر جدا ..

عليك الله يا تبارك شوف بس حكاية عزومة نافع في البيت الابيض و حكاية البشير والبنوك الاسلامية .. اخبار غريبة جدا زي احلام الزول العندو لوز ..
أ و اسأل اهلك الامريكان ديل ياخ يمكن فاهمين حاجة .. سئمنا والله ..

وجيرارد بيكي وبلة جابر بقو في سرج واحد صحي العالم قرية صغيرة !!!

وتوقعات سيدي جعفر الميرغني صدقت في شمال كردفان الله يستر على النيل الأبيض !!!

وحسب الله قال السبب الكورة !!! كان كده الله يسترنا من السباحة !!!

والمنبر لسانو إتبدل زينوغلوسيا وبقي يترجم .. طلباتكم يا ولاد ماما

الغداء لحم غزلان والناس في إنتظار (الحلو) رز بي كستر

سلام يا الحبان
بختكم وهبة بتاع سودانيزاونلاين شخصوه
قالوا لما كان فى المدرسة ماعندو ناظر
عشان كدا لسانو زفر

نحنا نحمد الله قرينا فى مدرسة فيها ناظر
لكن مابحب البهارات
والبهارات بتشيل الزفارة
عشان كدا أى زفارة عندنا فى الخارج بتندس من مواطنيها
عشان الخارجية ماتشمها..

قالوا حسب الله داقى مزيكتو فى المجلس الوطنى
حسب الله قبل مايبقى بتاع قرب كان شمام

يوم داك لما قابل وزير الدفاع
عرف ليه وزير الدفاع معفن
قال عرفو من لسانو الاغلف

والدكاترة الفى البرلمان قالوا كمان بتمتم لما يكون مزنوق
عشان كدا ناس الحلة قرروا يخنقوه بمصران الضحية
أصلو اللجنة واللدغة والتمتمة علاجن واحد
والضحية هم الذين كفروا بالحكومة
وناس الهيعة جنهم وجن الناس البضحكو مع أوباما البضحك مع المواطنين
ومحسن خالد طلق انجلينا
اصلو كان متزوجا قلبيا

أمريكا لقت لينا حل
عايزين سوريا تفضى ويرحلونا هناك
عشان الجو البارد والعنب بقلبوا اللون وببقوا الزول أبيض
وبى كدا نمزق فاتورة الكريمات

الحمد لله نحنا فى حالة هبوط دائم
ورابطين الحزام على طول
الكابتن الوحيد الما بيربط حزامو
مافى زول عارف السبب
لكن انا بقول كلو من أمريكا والاتحاد الاوروبى
قال عايز بيرة قال!!
هو المضيفات قادرات يمشن فى الطيارة
عشان يجيبن أكل وموية
وانت عايز بيرة ياكلونى؟

عندى احساس نحنا مافى طيارة
نحنا فى سيميوليتا
كدى امرق راسك من الشباك
لو مافى هوى
أكيد حنتحرك بدون مانهوى
أصلو الهوى بجيب البمبان
والله ليكم من البمبان الاسلامى
ماركة (مارميت اذ رميت)!!!

البوست داقى سستم النرفعو شوية!

Quote: وجيرارد بيكي وبلة جابر بقو في سرج واحد صحي العالم قرية صغيرة !!!

Quote: سلام يا الحبان بختكم وهبة بتاع سودانيزاونلاين شخصوه قالوا لما كان فى المدرسة ماعندو ناظر عشان كدا لسانو زفر

هههههههههههههههههههههههه
سمح مالك ما دخلت باركت لي الدكتوراة بتاعتي
دكتوراة في الـ DHL واحتمال كبير آخد واحدة تانية في الـ DVD
الإنقاذ سهلت قصة الدكتوراة دي شديد وبقت الحامعات على قفا من يشيل
اي أوضة وبرندة فاضين ممكن جدا تلقى فيهم فرع جامعة
المشكلة هسي بقت ما في "الزكاء" يعني لو بقيت ما "زكي" ذاتو ممكن تحصل على الشهادة
اهم حاجة تبعد من الزفارة
خخخخخخخخخخخخخخخ

___________
مشتاقين يا عمك