لينا مية سنة لا شلنا لينا كأس وللا حتى (علبة صلصة)

نقول شنو؟ الفاتح جبرا

ينفع أبدأ المقال بعبارة (والله الواحد ما عارف يقول شنو؟) .. لأنو والله العظيم الواحد فعلاً ما عارف يقول شنو؟ الموضوع وما فيهو الفساد البقى عيني عينك عديييل كده .. الفساد المغتغت خليناهو .. والفساد القالو ودوهو النائب العام منتظرنو .. طيب الفساد الجديد لنج والواضح وسكوت الحكومة عنو ده يقولو عليهو شنو؟ خلاس الناس بقت تفسد بالمفتشر .. خلاس الناس بقت عينا قوية للدرجة دي؟
شنو لمن الحكومة تخصص ليها مساحة من ساحة مسجد الناس قاعدة تصلي فيها في الأعياد وتستخدمها في المناسبات عشان يبني فيها زول مدرسة خاصة الطالب بي كم مليون في السنة؟ هسه أنا الفاتح جبرا ده ولا أي مواطن ممكن يدونا الواطة دي؟ طبعن لا .. ده شغل التكتكة واللف والدوران .. المصلين رفعوا مذكرة للجهات المسئولة ؟ لكن يبدو إنو الجهات المسئولة شايفة إنو الموضوع ده موضوع عاااادي وما فيهو حاجة .. وما فيهو أي شبهة فساد .. زول قال عاوز يشتري ساحة مسجد .. قالوا ليهو جداً ياخ .. قامو (مسحوها) وعملو ليها الكروكي وأدوها ليهو .. قام عمل (الخرط) وقعد يبني !!
.. طبعا الكلام ده حصل قبل حوالي شهرين في مربع 69 بالمعمورة .. وطبعن حصل قبل كده في مواقع وأماكن كتيرة .. ميادين كرة (إنقلبت) بين عشية وضحاها قطع سكنية .. المدينة الرياضية إتوزعت (سكن) ومحلات تجارية و(جمعيات وهمية) وبقت (كمونية).. لم تسلم (ساحة) أو (مساحة) من هذه الهجمة (المغولية) ولكن أن تصل المسالة حد (بيع ساحات المساجد) فدي بتخلي الزول فعلاً ما عارف يقول شنو؟
بقي أن نعلم أن المدرسة المراد تشييدها هي فرع من مدارس كامبردج والتي يقال أنها ملك للوزير أمين حسن عمر إلا أنه نفي ذلك وقال أنه فقط رئيس لمجلس الإدارة وأن المدارس (بتاعت خالو) !
بمناسبة التغول على ميادين الكرة والساحات داخل الأحياء العبد لله يري أنها واحدة من أسباب تدهور الكرة السودانية .. فقد كانت هذه الميادين والساحات (السهلات) يمارس فيها صغار ولشباب الحي (الدافوري) وكرة (الشراب) وما أدراك ما كرة الشراب تلك الكرة التي لو تمكنت من السيطرة والتحكم بها لصار لك (الكفر) حاجة أسهل ما يكون ولكانت دقتك في التصويب و(الباصات) بالسنتي .. لذلك شئ عادي الآن أن تكون باصات اللاعب لخصمة في المباراة أكثر من باصاته لزميله وتصويباته نحو (الكشافة) أكثر من تصويباته نحو المرمي .. وده الخلانا لينا مية سنة لا شلنا لينا كأس وللا حتى (علبة صلصة) .
كسرة :
بالله بعد ما إنتهيتو لينا من(الميادين) ما تقبلو لينا على (المساجد) عشان المساجد دي هي لله وكده
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)؟


[email protected]