كيف تتصرفون مع اطفال ضيوفكم حال اتلفوا بعض ممتلكاتكم؟

السلام عليكم

مرات يجوكم ضيوف اهل او اصدقاء ويكون معاهم اطفال مزعجين جدا

وللاسف في بعض الناس باردين شديد تجاه تصرفات اطفالهم المزعجة في بيوت الاخرين

يعني الطفل يقلب البيت فوق تحت ابوهو ولا امو ما بيتكلم معاهو يقوليهو عيب

تحف قيمة تكونوا لميتوها من سنين يجي طفل الضيف يحطمها

كتب مجلات اثاث ...الخ


وانت سيد البيت بتكون بتعاين

والغضب وصل منك مراحل فظيعه

لكن المجامله مانعاك من التدخل

يعني تشوف الخراب قدامك وما تقدر تقول ولا كلمه خوفا من اللوم

مره قريت للاستاذ سعد الدين ابراهيم كلام في الموضوع دا ذاتو

قال مره هو بشوف قدام عينو ولد الضيف ركب في عجلة حقت طفل سيد البيت

والعجلة اصغر منو وهو مصر يركب فيها الى ان جعلها حطام

ووالده لم ينطق بكلمة عتاب والمضيف يعاين والحسرة كاتلاهو

باختصار كيف التصرف في هكذا مواقف؟

أحمد أخوي

الحركات دي بس عندنا نحن السودانيين

قلة أدب العيال مسموح بيها في بيتهم وهم ضيوف عند الاخرين

لكن خليهم يمشو قريب من مروحة استاند او مفتاح كهربا طوالي الوالدين ينتبهوا ويبدأوا الصراخ

يا ولد لا ...يا حبيبي لا ..يا روح أمك أقعد ساي

أي خراب تاني لا يعنيهم

سلام يا احمد
عادي ممكن تتكلم معاهم لو شفت اهلهم ما مهتمين
بالراحة و بطريقة ظريفة وغير مباشرة تتكلم معاهم و تنبههم
افضل من تفضل ساكت على الاقل اذا هم ما اشتغلوا بكلامك اهلهم حا يخجلوا شوية و يتكلموا معاهم

سلام يا صاحب البوست

غايتو قصة العجلة بتاعت الولد الصغير بيركب فيها واحد عمره عشرة سنين

ويكسرها دي مغصوني بيها وما قدرت أقول أي حاجة

ومرجيحة برضو بتاعت أطفال صغار قعدوا فيها ناس أوزانهم فوق الخمسين وكسروها

وطلوع السراير بالجزم


غايتو الواحد فينا بقى علاقاته خارج المنازل

عشان نريح ونرتاح

مرحبا اخوي قرجا
كلام صح انو اهل الطفل بخافو عليهو من الكهربا والمرواح
طيب مفروض برضو يحسوا بحجم الخسارة والدمار الـ ممكن يتسبب فيهم الولد لممتلكات الاخرين
يعني ما يهمهم فقط سلامة ابنهم وينسوا ممتلكات الناس وفي كلام بنزلو بعد شويه فيهو اشارة للحتة دي
وتسلم على الاضافة والمرور


اخونا محمد صديق سلامات
انت اكيد لمن يفيض الكيل ما بتسكت..بس اها في ناس ما بحسوا بما يفعله اباءهم من خراب
ولو اتكلك مع ولدو بكون كلمة كلمتين بدون اي فعل حقيقي
ياولد لا
ياولد اقعد ساي
لكن ردع حقيقي مافي


الاخ عاصم فقيري سلامات
ههههههههه شكلك ملدوغ كتير
الله يعظم اجرك
وفكرة كويسه اللقاءات خارج البيت دي
لكن اظنها في السودان صعبة شويه
هنا في السعودية الاسر ممكن تتلم اخر الاسبوع في حديقة عامة او مطعم كبير
لكن السودان الحاجة دي ما كتيرة شديد

Quote: كنت يوما أستقبل في بيتي جماعة من الأصدقاء ، فجاء أحد أصحابنا و جاء معه بولد صغير ( و أنا لا أكره شيئا كما أكره من يزورني و يأتيني بولده معه) ، و لكني تجلدت و قلت لنفسي : إنه ضيف ، و لابد من الاحتمال . فما كاد يستقر في المجلس حتى شرع يتحدث عن ولده وذكائه و نوادره و كماله ، و الحاضرون يبتسمون -مجاملة- و يتمنّون أن يحس فيختصر هذا الحديث الثقيل ، وهو يفيض فيه . ثم قال لولده : بابا قم اخطب لهم خطبة . فتدلل الولد و تمنّع ، و قال : ما بدّي . قال : قم ، عيب! و ما زال معه شد و دفع حتى استجاب و قام ، فخطب خطبة أزعج لسامعيها من شربة خروع لشاربه ، و لكن اضطروا أن يكشّروا و يقولوا مجاملة : ما شاء الله. و حسبوا أن المحنة انتهت ، و لكن الرجل عاد فقال : و هو حافظ غيرها كمان . و انتظر أن يستبشروا بهذا الخبر و يطيروا سروراً بهذه البشارة ، فلما رآهم سكتوا و أحجموا لم يسكت هو و لم يحجم ، و قال للولد: اخطب - بابا - الخطبة الثانية . و من خطبة إلى خطبة ، حتى خطب عشر خطب ، شعر الحاضرون كأنها عشر مطارق تنزل على رؤوسهم و طلعت منها أرواحهم ، و هو يضحك مسروراً كأنه جاء بمعجزة . ثم قال : و هو يغني كمان . غنّ - بابا- أغنية . قلت في نفسي : أعوذ بالله ، خرجنا من الخطب فجاءت الأغاني . و غنى أغنية ، ثم أتبعها بأخرى ، فقلت : يكفي ؛ إنه قد تعب . قال : لا ( و مطّها ...) إنه لا يتعب ، الله يسلمه و يرضى عليه . من حق تعبت يا بابا ؟ قال : لا. ووثب ينط في الغرفة . قال : أبوه بيعرف يلعب كمان . و خرّب في لعبه كثيراً مما كان في الغرفة من التحف . ثم جاء الشاي ، فمد يده ليأخذ الفنجان ، فقلت : إنه حار . قال : لا . و رفع رجله بحذائه الملوث فوضعها فوق المقعد ، و أخذ الفنجان و قربه من فمه ، فأحس حرارته ، فأفلته فانكب على المقعد الجديد . و توقعت أن يعتذر أبوه عن إفساده وجه المقعد ، و إذا به لا يهتم بوجهه و لا قفاه ، لقد اهتم بولده و قال له لا ترتعب ما صار شيء ، هل احترقت يدك ؟ و نظر فيها ، و ابتسم و قال : سليمة و الحمدلله . و انتقل هو و ابنه إلى مقعد آخر . ثم قام الولد و وقف بحذائه على المقعد الثاني و أخذ يكلمه في أذنه ، فقال الأب : كأس ماء من فضلك ، الولد عطشان . فقمت و أتيته بها ، فشرب و أراق الماء على المقعد الثاني. وبعد لحظة قال أبوه : ممكن - من فضلك - يخرج للخلاء ؟ قلت : قم . و أخذته بيده فصرخ صرخة أرعبتني ، و حسبت أن قد قرصه ((دبّور)) و سألت : ما له؟ قال أبوه : إنه لا يخرج إلا معي . فقلنا : خذوا طريقا و هاتوا طريقا [تعبير متدوال في الشام يستعملونه إذا كان البيت رجل أجنبي عن المرأة لا يجوز لها أن تظهر أمامه، و معناه أن تستر أو تغلق على نفسها باب غرفتها حتى يمر هذا الرجل فلا يراها (مجاهد)] ، و وقفنا حتى وصل الموكب الهمايوني إلى بيت الخلاء ! و لا أريد أن أصف لكم بقية المشهد ، فتصورا آخره من معرفة أوله _______________ نقلا عن ذكريات الطنطاوي

زيارتهم اهم شئ عندي

والأطفال يظلوا أطفال مهما حصل.

السلام عليكم ورحمة الله ..

فعلاً موضوع في غاية الأهمية .. وأكتر حاجة بتغيظ الزول برود الوالدين ، والعذر شنو ؟؟ الاولاد ديل مقفولين في الشقق -الكلام دا عند ناس السعودية -عشان كدا لازم تخليهم يخربو بيتك وتقطعا في حشاك، وكمان لو اتكلمت يقولو عليك ما بتدور الناس يجوك !!!!! شخصياً ما بسكت ليهم وخليهم يقولو




ـــــــــــــــــــــــــــــــــــــــــــــــــــــ
قبل كم في المسجد طفل باكستاني مع ابوه ، قام على برادة الموية داخل المسجد شرب شوية وقعد يعلب .. جا واحد شرب ورفع الكباية فوق ، الشافع ناص عاين للأبو ، طواااااالي الابو نزل ليهو الكباية !!!!!وملاه موية لمن دفقت ، انا بعد دا ما قدرت اتحمل ، قمت رفعت منو الكباية واديتو نهرة .. وقلت في نفسي يعني ما شفعنا براهم ... تحياتي للجميع

الحكاية بتعتمد على حسب علاقتك مع الضيف .. لو الحالة واحدة بتنهر وتوجه طوالي

لو الزول غريب شوية .... شيل الصبر بس ... مع ملاحظة إبعاد الأشياء القابلة للتلف

طبعا أعصابك ضمن الأشياء القابلة للتلف.. لكن ما حا تقدر تشيلها بعيد..

اطفال السعودية حاجة تجنن وبرودة الاباء حاجة تحير بس تموت مكهور

الطفل هو الطفل والكبير كبير
لا ضير ان تنبهه بلطف واذا اصر وعاود ولم يكترث والداه فالتنهره
لافرق بين اطفال السعودية او غيرها
فالتربية هي هي
تحياتي

وين الأمهات ما في واحدة ظهرت هنا؟
أنا شخصيا بتعامل مع أولاد الضيوف ذي أولادي بالضبط.
و علي حسب عمر الطفل. لو صغير جداً بشاغله و ابعد عنه أي شيء ممكن ينكسر. لو كبير شوية بقول ليه أنا: "انزل من كورسي البيبي لانه ممكن ينكسر". "صوت التلفزيون ده عالي شديد، أرخوه." و ما بستني الأهل يتكلموا. و حقيقي ما لاقوني نوع الأهل اللي أنتو اتكلمتوا عنهم ديل. بالعكس اغلب الأهل بيبالغوا في مطالبهم من أطفالهم في بيوت الناس. بيكونوا عاوزين أطفالهم يتصرفوا ذي الناس الكبار.
في اهل لو أولادهم و أولادي طلعوا كل الألعاب و جاطوا الدنيا، الأهل ما بيمرقوا من بيتنا لحدي ما يساعدوا أطفالهم و أطفالي في لم اللعب و ترتيب البيت.
في حاجة أنا بعملها و بعض الناس بتشوفها حركة غريبة. لو طلب مني طفل حلاوة او ايس كريم بسال الأم في الأول إذا ممكن إدي طفلها حلاوة او ايس كريم.السبب ما بخل مني^_^. السبب انه الزمن ده في أطفال عندهم أنواع عجيبة من الحساسيات. في أهل بيرفضوا إدي أطفالهم حلاوة بس لأني سالتا. :(
في فترة احد أطفالي ممكن ممنوع ( بامر الطبيب) من أكل أي شيء فيه قمح، بيض، او لبن. عشان كده بسال في الأول.

الاخوة والاخوات الكرام السلام عليكم جميعا

وسعيد بمشاركتكم معاي في الموضوع وفعلا استفدت كتير من كلماتكم القيمة وبرجع تاني اكيد...والبوست اعتبروه حقكم وانداحوا اكتر

الأخ / أحمد

مع التحية والتقدير ، أشكركم على مواضعيكم الهادفة ودعني أشارك بخبرتي وتجاربي الشخصية مع أطفالي وأطفال الضيوف .

أولا من واجبي كأب أن أرشد أطفالي وأنصحهم بما يفعلوا لو قمنا بزيارة أحد ، الجلوس بأدب أمام الكبار واللعب مع أطفالهم دون إزعاج ملفت لأهل البيت ، عدم لمس الأشياء الخاصة بمنزل الضيف ، وأن تم تقديم حلوى أو شئ للضيافة أن لا يتهاتفوا ويأخذوا قطعة واحد فقط ، وأن جاع أحدهم لا يصرح بصوت مسموع بل يتوجه لوالدته ويقول ذلك في أذنها ، نقوم بهذه الارشادات دون تشدد أو تهاون .
أما بالنسبة لأطفال الضيوف فنراهم مثل أطفالي ، ولكن مع الخبرة تدرك أحوال الأسر والأصدقاء فإن كان أطفال الضيوف من نوع المزعج جداً ، فنقوم بإبعاد الأشياء القابلة للكسر أو التلف التي تكون سهلة لوصولهم ، ونضعها في غرفة بعيدة وفي نفس اللحظة نترك بعض الألعاب التي تتناسب مع سن أطفال الضيوف .
المهم هناك أناس أبرد ما يكونوا حينما يجدوا أطفالهم يزعجون ويحطمون أشياء مضيفهم ولا يتحركوا ولا يتفوهوا بكلمة لأطفالهم ، وهناك من يحرص على توجيه طفله مباشرة في لحظة وقوع الخطأ .
وهناك أطفال يفوتون حد الازعاج ويتحولون لطفل (مؤذي) حينما يقوم بضرب إبن مضيفهم كآلة حادة أو تجده يسحب أي جهاز مما يؤدي إلى تحطيمه ( كشاشات التلفزيون) أو الحاسبات .
ختاماً يجب على الأباء إرشاد إبناءهم وتوجيهم عند زيارة الأهل والأصدقاء .
وشكراً .