راجل الدكتوره

مصطفي جارنا في العماره الثانيه متزوج صديقة المدام مثال للشخصيه السمجه التي تفرض نفسها بالقوه أتهرب دائما من مقابلته والجلوس معه ما لم اكون مضطرا كما لا تربطني بيهو علاقه عشان إكون صديقي العلاقه كلها علاقة نسوان....
متزوج من أنسانه رائعه .. طيبه .. حساسه .. كريمه.. بت ناس.
مصطفي إفرض نفسو عليك في اي وقت عايز تنوم ادق جرس الباب مع زوجتو ادخل البيت ما تتفكي منو لو هنق حمار الوادي زول شبكة ولايوق ما احلك منو بله.
ونستو بايخه جدا اخير منو تفتح قناة السودان عامل فيها ظريف وبتاع نكت عندو نوعية نكت تتضحك النسوان تشوفو مع زوجتو وصاحباتها تلقاهم عايشين في جو غريب من الضحك المتواصل وتقشقش الدموع من النكات السمعتها منو:
مسطول مشي المحكمة القاضى بسأل فيهو:
انت متزوج منو؟
قاليهو:متزوج مرأة
القاضى قاليهو انت بتهزر؟
في واحد بتزوج راجل؟
قاليهو:ايوه اختى .
والنسوان اضحكن ... اخونا مستمر في النكات البايخه ......
واحد بشاغل في لبنانية قالت ليهو لك حل عني .
قال ليها وين الاسئلة يا روحي.
الراجل بدعم النكته او الطرفه بي ضحكه مجلجله ما مهم تضحك معاهو ...ياخ في ناس غايتو خليها علي الله تكون قاعد معاهو زي صاحب الساوند سيستم في الحفلة لو انت سعيد تلقي ليك مجلة تخارجك منو !!!!!!
يوم بعد ما قدم الفاصل بتاعو واتوكل علي الله ومشي مع زوجتو حصل خلاف بيني وبين المدام عن الطريقة البعامل بيها راجل الدكتورة .
مصطفي ده راجل ظريف وطيب علي نياتو زول بسيط لو ما زول بسيط حسي بكون متوافق مع الدكتوره كيف شغلها الكثير كل مره في المستشفي وهو ماسك الشفع وكمان حتي البيت بنضفو الزمن العلينا مافي زوج بي المواصفات دي .
يستمر الخلاف ،،،
يا زوله ما تفرضي علي علاقاتك انتي عشان الدكتوره صاحبتك انا اصاحب الزول السمج اللايوق الانتهازي ده أحمدي الله انا البجاملكم الزول ده ما بدورو لي الله مكجنو.....
الدكتوره في العمر تكون قدر مصطفي او اكبر منو بي كم سنة مستوي الجمال عندها وسط يعني مقبوله... الطيبه والخلق الحسن مغطي علي الباقي.... عندهم بت ولد صغير شقي بتاع مشاكل .... من الحاجات الثقيله البداوم عليها وتكرهك فيهو نهاية الاسبوع وقت للخروج وكسر الروتين خارج المنزل اجيك في لحظة عايز تقفل باب الشقه اها يا جماعه جاينكم نمشي معاكم الحديقه و ل وين ؟؟ انتو نازلين تحت ؟؟ بدون مقدمات طوالي إمشي لي عربيتك اقول ليك اسمع احنا بنركب معاكم العربيه بتاعتكم كبيره ومريحه لا بنتظر رد لا موافقة امسك يد الباب بعدين بجي جاهز اول ما ركبتو العربيه اطلع من جيبو فلاش ميموري أو سيدي يا ابو الشباب ممكن تركب ده يقعد اجتر في الزكريات مع زوجتو تزكري الاغنيه دي لما كنا وين ما عارف يا روح قلبي...... والاغنيه الثانيه دي لما اتصلت عليك يا عيوني والله يا حبيبتي زكريات... بعد ما تصل المحل الماشي ليهو كان في دفع قروش تلقي اتاخر شويه أو ياخذ ليهو زوغه بطريقة اكلمك في اضانك يعني انتو رجال سوا بتعرفو خصوصيات بعض ((ماشي الحمامات اخوك عايز اعمل بولندا)).
بعد ما تنتهي اجي اقيف جمبك اعمل فيها ظريف شنو يا ابو الشباب خلاص ولا عايزين حاجه كمان عندو حركات كثيره بزوق بيها إختلق ليهوا حاجه مع ولدو إعمل فيها بصلح ليهوا في البنطلون والجزمه بمجرد انت ما خلصته دفع القروش اكون هو خلص....
زوجتوا حساسه مره تخطف رجلها بسرعه تدفع قدامك بس لو كانت المصادفه سواء في شباك الدفع...
تنتهي الرحله نرجع انا والمدام للنقاش الدائم.. هو ثقيل .. مرتو طيبه هو ثقيل .. مرتو طيبه .. دوامه.
مرة سألتني انت مصطفي بقول ليك شنو في اضانك وبمشي ؟؟؟؟
قلت ليها :الراجل لما تكون لحظة دفع القروش بتقوم عليهو البروستات والسكري برتفع بكابس الحمامات.
يوم المدام قالت ماشه لي زوجة مصطفي عشان مسافره السودان سته شهور ولدها السنه الجايه بخش المدرسه ما عايزه سنتين ما تسافر.....
قلت ليها الحمد لله نتحل سته شهور من الراجل الكفوه الثقيل المشكله كان الله احيانا السنتين الجايات ديلاك كيف كان قعدنا في البلد دي..... المدام قالت لي حسي عليك الله الكعب فيكم منو انت بي مساختك دي ولا هو الظريف مع زوجتو يوم واحد ماشفتو قال ليها بي اسمها كلامو كلو معاها يا حبيبتي – ياروحي – يا قلبي – يا نور عيوني.
سافرت زوجتو وارتحنا...
كل ما تجي الذكري تقول لي عليك الله ما تعزم مصطفي ده غذاء انت ما عندك زوق كده مالك....
وكل ما اشوف مصطفي ازوق منو اعمل ما شايفو...
لو سألوني منو شوفتو و ل لا أعمل حليب انكور.
اخيرا كنا ماشين مشوار شوفنا الراجل قلنا نقوم بالواجب نتوكل علي الله ونعزمو..
يا مصطفي يا مصطفي ... زولنا ما جاب لينا خبر سامعنا ابا اتلفت ... قلته رضينا بالهم الهم ابي ارضا بينا....
انتهت السته اشهر في تلك الفترة نسيت مصطفي وحرمه المصون ودخلته برامج تانية....
وفي يوم من الايام جاي من المكتب داخل علي البيت سامع صوت ونسة حريم رجعت وراء دقيت الجرس ودخلته جاتني المدام قلته ليها معاكم منو!!!!
تذكر مصطفي ...
مصطفي منو ؟؟؟؟
راجل الدكتوره البتكرهو انتا داك القلته ثقيل...
قلته ليها ااااااااااااه زوجتو جات من السودان وتاني نبدأ البنرامج الممل سبحانه الله السته شهور دي زي السته يوم انتهت....
لا لا لا لا والله ليك حق تكرهو فعلا ثقيل وسمج وانتهازي زي ما بتقول... هي يا بنات امي «يا ضامن المويه في الغربال ما تضمن الرجال » ما لقتو عرس فيها ...يعني النسوان ديل تاني الواحده ما تعمل خروج وعوده سته شهور ولا شنو يا بنات امي!!!

Quote: تاني الواحده ما تعمل خروج وعوده سته شهور ولا شنو يا بنات امي!!!

بالجد ؟؟؟؟؟


شكرا للامتاع بعد قربت اتعاطف معاه واقول انت "سقيل"
زعلت منه قلت بستاهل كلامك عنه

أعيد كتابة مداخلة لي كتبتها العام الماضي في بوست مؤرشف:

Quote: Quote: 27-05-2012, 08:04 AM Hani Arabi Mohamed تاريخ التسجيل: 25-06-2005 مجموع المشاركات: 2196 Re: ( نصيحة ) لا تتزوج طبيبة لأنها .... (Re: حبيب نورة) الانسان ابن مهنته ... كل إنسان يؤثر في مهنته ويتأثر بها .... ارتبطت مهنة الطب بالقراءة ... يمضي الطالب حياته مدفوناً بين الكتب لساعات وساعات وساعات وأيام وأسابيع وشهور وسنين. ينفصل طالب الطب شيئاً فشيئاً عن المجتمع من حوله ويبدأ في بناء عالمه الخاص. القراءة الكثيرة تفتح طاقات كبيرة للمخ البشري وتفتح مسارات - غير مستخدمة عند أغلب الناس - لذا تجد تفكير الأطباء مختلف - وإبداعهم مختلف - وفهمهم للعالم من حولهم أيضاً مختلف. ويسجل دخول المشرحة تجربة تغيّر مفاهيم الطبيبة للعالم من حولها بشكل كبير .... وينمو فيها برود عجيب .... مستمد من برودة ثلاجات الموتى ... يجد الطالب نفسه محاطاً بالتبجيل والاحترام اينما ذهب - فتبدأ "الأنا" العليا في النمو والازدهار كاغصان شجر الدمس أمام بيت خرطومي مترف. تحتل القراءة والعمل المكانة العليا في ترتيب أولويات طالب الطب. بعد التخرج يتواصل عذاب السهر والعمل المتواصل ويجد الطبيب نفسه في مواجهة أعتى القرارات ... قرارات تتعلق بالموت .... مما يكسبه أو يكسبها قدرة على التعامل الحاسم والقاطع مع أي شيء. ..... جزئية الموت هذه مهمة جداً في تكوين شخصية الطبيب .... وهي التي تفقد العديد من الطبيبات أنوثتهن ويجعلهن يتعاملن "برجولة" في كثير من نواحي الحياة. عندما تجتمع كل العوامل السابقة مع عوامل اخرى غير مذكورة تتشكل شخصية الطبيبة النهائية والتي لا تناسب معظم ما يبحث عنه الرجال في "شريكة حياة" .... نعم ببساطة ...... دون زخرفية لفظية أو زركشة قولية ..... من كان يبحث عن زواج تقليدي بين رجل وامرأة وأراد من زوجته أن تقدم له ما كان يرى أمه تفعله في المنزل وما رأى نساء العالمين يفعلنه منذ طفولته .... فليست الطبيبة خياره .... وهي مسكينة لا ذنب لها في ذلك .... قمغ سنوات القراءة والعمل تحور اهتمامها وتغيرت أولوياتها واختلفت طريقة تفكيرها. هي أنثى .... لكن الأنثى في داخلها مدفونة .... وحتى ان اجتهدت هي في إخراجها .... خرجت مشوهة .... من يختار أن يتزوج طبيبة عليه أن يذهب إلى أقرب صيدلية ليصرف "صبر أيوب 500 مليجرام" ويتناوله ستة مرات في اليوم على أقل تقدير. إذا كنت "ماسوشيا" تحب الأذى وجلد الذات .... الطبيبة هي افضل خيار لك لتتزوجه. إذا كنت تبحث عن زوجة "Some Times" ولا تريدها أن تكون في حياتك طوال الوقت .... فالطبيبة هي افضل اختيار ... إذا كنت تتزوج وتظل مستمتعاً بطقوس العزوبية المجيدة .... فلن تجد أفضل من الطبيبة ... . أما قوة الراس فهذه باب آخر .... مواجهة الموت الذي ذكرتها أعلاه تصنع من الطبيبة إنسانة ذات شخصية قوية جداً وذات قرارات لا تقبل التراجع ولا التنازل ، وهنا تبدأ المشكلة في البيت الزوجي الذي يتطلب فيه الأمر وجود طرف لين ووجود طرف قوي \ أو هكذا اعتاد الناس. قرار زواج طرفه طبيبة ... هو قرار وجود رجلين في المنزل

يا عباس
شكرا ياخي سرد ممتع

ويا هاني

يعني المرة الخطفت الزول دا ما خطفت راجل مرة ولا شنو !

نزلتا المداخلة في نهاية البوست

Quote: اجتر في الزكريات مع زوجتو تزكري الاغنيه دي لما كنا وين ما عارف يا روح قلبي...... والاغنيه الثانيه دي لما اتصلت عليك يا عيوني والله يا حبيبتي زكريات...

انت متاكد انو دة سوداني ابا عن جد؟
يا زول اتاكد اول ؟
ولو اتأكدت يبقي في حاجه غلط بالتأكيد

متعه والله ..
دايما بحس في كتاباتك انهازي اسلوب اجاثا كريستي ..
يعني ما بتعرف مضمون القصة الا في النهايه ..

شكرا ليك اخي عباس الدسيس فكما قلت مسبقا انت احد كتابي المفضلين ..

شكرا ليك كتير ..

Quote: عامل فيها ظريف وبتاع نكت عندو نوعية نكت تتضحك النسوان تشوفو مع زوجتو وصاحباتها تلقاهم عايشين في جو غريب من الضحك المتواصل وتقشقش الدموع من النكات

ههههههههههههههه
فكيت آخرك يادسيس ،

أسه كان لقيت تضحك الجكس زي ماهو بضحكو ما بتنبسط ..؟

لكن بيني وبينك في السعودية بالتحديد في عينات كتيرة منو بكل التفاصيل
راجل دكتورة ،،،
وغالبا مايكون سايق كورلا ...
ولونو ضارب راحات ,,,
وظريف
أو بتظارف

*** أوسكار

يعني الشرايط والغنا ويا حبيبتي...داك كلو كان تدقيس...؟؟

دا زول خطير...لو كان في الواقع.....

والله يالدسيس ورغم مساختك الظاهرة .... الا انى واحد من معجبينك الكتار ,,,


تشكر .. مع تحياتى

إسلوب جميل جداً .. وحقيقي الكلام دا بنطبق على ناس كتاااااااااااااار...و ما شرط يكون راجل دكتورة ... وزي ما بقولو : الوجع راااااااااااااااااااقد



تحياتي

مرحبا بعباس..................

Quote: لا لا لا لا والله ليك حق تكرهو فعلا ثقيل وثمج وانتهازي زي ما بتقول... هي يا بنات امي «يا ضامن المويه في الغربال ما تضمن الرجال » ما لقتو عرس فيها يعني النسوان ديل تاني الواحده ما تعمل خروج وعوده سته شهور ولا شنو يا بنات امي!!!

فعلاً سمج.........

Quote: بالجد ؟؟؟؟؟ شكرا للامتاع بعد قربت اتعاطف معاه واقول انت "سقيل" زعلت منه قلت بستاهل كلامك عنه

سلام يا دكتوره
ممنون وشاكر جدا للمتابعه المتواصله
يسعدني دائما تواجد قلمك وهو مؤشر نقدي وضؤ اخضر لنجاح الحكي والدرما
اول اتعاطفي وقت وصلتي منطقة الخطر عملتي ((يو تيرن))
تحياتي وتقديري

Quote: أعيد كتابة مداخلة لي كتبتها العام الماضي في بوست مؤرشف:

Hani Arabi Mohamed يا حبيبنا سلام وتحية
المداخله تناقش الموضوع بطريقة جادة وعلمية
ممكن تضيف ليها شرائح مهنية تانية مثلا بت شغالة في بنك
عموما المهن المقيدة بالزمن متعبة للطرفيين
تحياتي وتقديري

Quote: بالجد ؟؟؟؟؟ شكرا للامتاع بعد قربت اتعاطف معاه واقول انت "سقيل" زعلت منه قلت بستاهل كلامك عنه

تلقاك يادكتورة مجرد ما قريتي العنوان جهزتي المفراكة لي ود الزين

لكن غايتو دي مرق منها

ود الدسيس يا رهيب
اموووووووت انا في الحصاحيصا

Quote: يا عباس شكرا ياخي سرد ممتع ويا هاني يعني المرة الخطفت الزول دا ما خطفت راجل مرة ولا شنو !

عاصم فقيري يا وجيه اخبارك يا حبيبنا
زولنا الظاهر عليهو ملكلك ما صدق لقي البتخطف طوالي شب معاها
سلامي وتقديري

Quote: انت متاكد انو دة سوداني ابا عن جد؟ يا زول اتاكد اول ؟ ولو اتأكدت يبقي في حاجه غلط بالتأكيد

الزبير صالح سلام يا حبيبنا
ياخ والله انت مثالي بشكل خيالي
يا حليل زمن السوداني التكتو تربط البقرة وعصايتو ترمي الشجرة
يا حليل السوداني السفتو دقار لوري كان حمر ليك تقوم جاري
يا حليل السوداني الما بعرف شراب الببسي والضحك مع الجكسي
تحياتي وتقديري

Quote: متعه والله .. دايما بحس في كتاباتك انهازي اسلوب اجاثا كريستي .. يعني ما بتعرف مضمون القصة الا في النهايه .. شكرا ليك اخي عباس الدسيس فكما قلت مسبقا انت احد كتابي المفضلين .. شكرا ليك كتير ..

الوجيه هشام كمال عبادي
يعلم ربك الكون احبك في الله
ومما يسعدني رؤية مساهمتك في المفترع
وفخور جدا بان تتابع كتاباتي
شكرا ليك كتير يا هشام علي الكلمات الجميلة واتمني ان اكون دائما عند حسن ظنك
مني فائق التقدير والاحترام

Quote: مصطفي ده راجل ظريف وطيب علي نياتو زول بسيط لو ما زول بسيط حسي بكون متوافق مع الدكتوره كيف شغلها الكثير كل مره في المستشفي وهو ماسك الشفع وكمان حتي البيت بنضفو الزمن العلينا مافي زوج بي المواصفات دي .

ظلمت الراجل ...حرام عليك يا الدسيس

Quote: مسطول مشي المحكمة القاضى بسأل فيهو: انت متزوج منو؟ قاليهو:متزوج مرأة القاضى قاليهو انت بتهزر؟ في واحد بتزوج راجل؟ قاليهو:ايوه اختى . والنسوان اضحكن ... اخونا مستمر في النكات البايخه ...... واحد بشاغل في لبنانية قالت ليهو لك حل عني . قال ليها وين الاسئلة يا روحي.

آخر حلاوة ههههههها ها

يا سلام عليك يا الدسيس ربنا يديك العافيه ولا تحرمنا من نضمك السمح ده .....

Quote: تذكر مصطفي ... مصطفي منو ؟؟؟؟ راجل الدكتوره البتكرهو انتا داك القلته ثقيل... قلته ليها ااااااااااااه زوجتو جات من السودان وتاني نبدأ البنرامج الممل سبحانه الله السته شهور دي زي السته يوم انتهت.... لا لا لا لا والله ليك حق تكرهو فعلا ثقيل وسمج وانتهازي زي ما بتقول... هي يا بنات امي «يا ضامن المويه في الغربال ما تضمن الرجال » ما لقتو عرس فيها ...يعني النسوان ديل تاني الواحده ما تعمل خروج وعوده سته شهور ولا شنو يا بنات امي!!!

هنا غيرت رايي

أردمو

غايتو يا الدسيس عليك جنس محن

إنت زاتك البخليك تسكن جنب الزول دا شنو ؟؟ . تستاهل

..

أسمع .. قول لى المدام أنا الزول دا ظلمتوا .. ومشتاق ليهو عاوز أعزمو فى البيت ...

Quote: ههههههههههههههه فكيت آخرك يادسيس ، أسه كان لقيت تضحك الجكس زي ماهو بضحكو ما بتنبسط ..؟ لكن بيني وبينك في السعودية بالتحديد في عينات كتيرة منو بكل التفاصيل راجل دكتورة ،،، وغالبا مايكون سايق كورلا ... ولونو ضارب راحات ,,, وظريف أو بتظارف

ناصر يا صديق اخبارك والاسرة الكريمة
بالغت كنا في سيرتك قبل فترة
جكس وين تاني يا ناصر احكي ليك:
ايام البنك ونقلوني الادارة كان هناك بعض العمل الميداني بطلع مع مدير الادارة وهو راجل صديق لبعض الاجتماعات والعمل الميداني وإحنا ماشين بالعربية والراجل اتونس معاي من اشوف لي بت اطنش ونستو واباريها بي نظري لما العربية تفوت لما اتكررت كثير مني الراجل زهج قال لي:
اسمع يا عباس .... شوفتا البنات البتشوفم في الشارع ماشات سمحات اتبخترن وتعوج رقبتك معاهم......كدي عرس وادخل بيت الزوجيه تشوفن كلهن شينات.
تحياتي وتقديري

Quote: *** أوسكار

الطيب يا حبيبنا سلام وتحية
شاكر ومقدر للمتابعة
كلمة صفيرة دافعها المعنوي كبير ((اوسكار)) مساهمتك في المفترع مهرجان فرح يا الحبيب
تحياتي وتقديري

Quote: يعني الشرايط والغنا ويا حبيبتي...داك كلو كان تدقيس...؟؟ دا زول خطير...لو كان في الواقع.....

نزار يا حبيب سلام
انت شوفتا حاجة ياما الواقع بقت فيهو عجائب
تحياتي وتقديري

Quote: والله يالدسيس ورغم مساختك الظاهرة .... الا انى واحد من معجبينك الكتار ,,, تشكر .. مع تحياتى

نور الدين سلام يا حبيبنا اخبارك
لي الشرف باعجباك يا الحبيب
وسعيد جدا بتواجدك معي والمتابعة
مني فائق الاحترام والتقدير

Quote: فعلاً سمج.........

يا سلاااااااااااااااااام
اسماعيل الزول الراقي
تحياتي ليك والاسرة الكريمة
مع خالص التقدير للمتابعة

Quote: إسلوب جميل جداً .. وحقيقي الكلام دا بنطبق على ناس كتاااااااااااااار...و ما شرط يكون راجل دكتورة ... وزي ما بقولو : الوجع راااااااااااااااااااقد تحياتي

عمر السلمة ازيك يا حبيب
ياخ انت الظاهر ممكون مكنه
الله افك كربتك
تحياتي وتقديري

Quote: تلقاك يادكتورة مجرد ما قريتي العنوان جهزتي المفراكة لي ود الزين لكن غايتو دي مرق منها

محمد الشيخ سلام
ظلمته الدكتورة انسانه زوقا عالي
وظنونا دائما حسنه في التواصل
تحياتي يا الحبيب

Quote: ود الدسيس يا رهيب اموووووووت انا في الحصاحيصا

حمزاوي الرجل الطيب مشتاقون والله
الظاهر انت شغال بي نظرية مدني الكاملين ما دانم بتموت في الحصاحيصا ...يا حليلك يا النميري
وقفت عن الكتابة في المفترع حدادا والله يا حمزاوي ياهو حال الدنيا الرحمة والمغفرة للبحيراوي

Quote: ظلمت الراجل ...حرام عليك يا الدسيس

Quote: آخر حلاوة ههههههها ها

Quote: هنا غيرت رايي أردمو

قرجة سلام يا حبيبنا اخبارك
جهجهتا باكاتي ورغم صفوتي خليتني زي بلة جابر
شاكر ومقدر للمتابعة والمساهمة
لك مني الشكر اجزله

Quote: يا سلام عليك يا الدسيس ربنا يديك العافيه ولا تحرمنا من نضمك السمح ده .....

الوجيه سامي
سلام وتحية
شاكر ومقدر للدعم المعنوي ...
((والفني))

Quote: غايتو يا الدسيس عليك جنس محن إنت زاتك البخليك تسكن جنب الزول دا شنو ؟؟ . تستاهل .. أسمع .. قول لى المدام أنا الزول دا ظلمتوا .. ومشتاق ليهو عاوز أعزمو فى البيت ...

سعادتو اسامة اخبارك يا حبيبنا
السكن بنختارو احنا يا حليل ايام عذابة
تعرف يا الحبيب اي راجل متزوج اتنين بكون مكروه من النسوان الحوالينو الغريبه الكراهية دي بتخليهو ارمي لي قدام بعد فترة بكون بي ثلالثة شرائط
ياخ ده تاني ما اشوف البيت لو بقي سباك
سلامي وتقديري

والله يا ديسيس (بكسر الدال) - أكيد الكلمة دي إلا ناس مدني البعرفوها يا دسيس - بفتح الدال

متعة ياخ والله
والله زراع (رحمه الله) ما بحكيها زيك كدا

حكي جميل لا يُمل ، شكرًا لأنك رسمت بالكلمات أحسن اللوحات .

عباس الدسيس ازيك يا رايق
وشكراً ياخ
على الاستراحة المرتاحة
وتحييييييييييييييييييية

سردك قمة في المتعة ,,,اصلا استفزنى العنوان ,,,انا طبيبة وحبيت اشوف راجل الدكتورة دا مالو ,,, لكن الدكتورة طلع ماعندها ذنب في العنوان الراجل سقيل ومعل وما في اى معنى انك تصاحبو لمجرد انو زوجتو وزوجتك صديقات,, انا النوع دا من العلاقات ما بحبو ابدا ,,, الصداقة دى عبارة عن ارتياح من الطرفين,,, تقطعو معاهو طوالى,,,, شكرا لسردك المتسلسل الجميل.


د. سلافا العاقب

هههههه
انا كمان زى ما قالت د. سلافه
اقطعو معاهو ناشف .. عشان انا اصلاً عندى واحد بى جاى ، بس نفس قصة صاحبك ده
الا عاوز اقول ليك
شنو حكاية الحصاحيصا دى

Hani Arabi Mohamed

تاريخ التسجيل: 25-06-2005
مجموع المشاركات: 2196
Re: ( نصيحة ) لا تتزوج طبيبة لأنها .... (Re: حبيب نورة)

(الانسان ابن مهنته ...

كل إنسان يؤثر في مهنته ويتأثر بها ....


ارتبطت مهنة الطب بالقراءة ... يمضي الطالب حياته مدفوناً بين الكتب لساعات وساعات وساعات وأيام وأسابيع وشهور وسنين.

ينفصل طالب الطب شيئاً فشيئاً عن المجتمع من حوله ويبدأ في بناء عالمه الخاص.

القراءة الكثيرة تفتح طاقات كبيرة للمخ البشري وتفتح مسارات - غير مستخدمة عند أغلب الناس -

لذا تجد تفكير الأطباء مختلف - وإبداعهم مختلف - وفهمهم للعالم من حولهم أيضاً مختلف.

ويسجل دخول المشرحة تجربة تغيّر مفاهيم الطبيبة للعالم من حولها بشكل كبير ....

وينمو فيها برود عجيب .... مستمد من برودة ثلاجات الموتى ...

يجد الطالب نفسه محاطاً بالتبجيل والاحترام اينما ذهب - فتبدأ "الأنا" العليا في النمو والازدهار كاغصان شجر الدمس أمام بيت خرطومي مترف.

تحتل القراءة والعمل المكانة العليا في ترتيب أولويات طالب الطب.

بعد التخرج يتواصل عذاب السهر والعمل المتواصل

ويجد الطبيب نفسه في مواجهة أعتى القرارات ... قرارات تتعلق بالموت .... مما يكسبه أو يكسبها قدرة على التعامل الحاسم والقاطع مع أي شيء. .....

جزئية الموت هذه مهمة جداً في تكوين شخصية الطبيب .... وهي التي تفقد العديد من الطبيبات أنوثتهن ويجعلهن يتعاملن "برجولة" في كثير من نواحي الحياة.

عندما تجتمع كل العوامل السابقة مع عوامل اخرى غير مذكورة

تتشكل شخصية الطبيبة النهائية والتي لا تناسب معظم ما يبحث عنه الرجال في "شريكة حياة" ....


نعم ببساطة ...... دون زخرفية لفظية أو زركشة قولية ..... من كان يبحث عن زواج تقليدي بين رجل وامرأة وأراد من زوجته أن تقدم له ما كان يرى أمه تفعله في المنزل وما رأى نساء العالمين يفعلنه منذ طفولته ....

فليست الطبيبة خياره .... وهي مسكينة لا ذنب لها في ذلك .... قمغ سنوات القراءة والعمل تحور اهتمامها وتغيرت أولوياتها واختلفت طريقة تفكيرها.

هي أنثى .... لكن الأنثى في داخلها مدفونة .... وحتى ان اجتهدت هي في إخراجها .... خرجت مشوهة ....


من يختار أن يتزوج طبيبة عليه أن يذهب إلى أقرب صيدلية ليصرف "صبر أيوب 500 مليجرام" ويتناوله ستة مرات في اليوم على أقل تقدير.


إذا كنت "ماسوشيا" تحب الأذى وجلد الذات .... الطبيبة هي افضل خيار لك لتتزوجه.

إذا كنت تبحث عن زوجة "Some Times" ولا تريدها أن تكون في حياتك طوال الوقت .... فالطبيبة هي افضل اختيار ...

إذا كنت تتزوج وتظل مستمتعاً بطقوس العزوبية المجيدة .... فلن تجد أفضل من الطبيبة ... .



أما قوة الراس فهذه باب آخر .... مواجهة الموت الذي ذكرتها أعلاه تصنع من الطبيبة إنسانة ذات شخصية قوية جداً وذات قرارات لا تقبل التراجع ولا التنازل ، وهنا تبدأ المشكلة في البيت الزوجي الذي يتطلب فيه الأمر وجود طرف لين ووجود طرف قوي \ أو هكذا اعتاد الناس.


قرار زواج طرفه طبيبة ... هو قرار وجود رجلين في المنزل )


ياهانى عربي انا موضوعك دا ما شفتو ليه قبل كدا لكن اتمنى يكونن طبيبات البورد دخلن وورنك الحقيقة.
كيف يعني رجلين في المنزل !!!! اجى يعنى انتا قايل الطبيبة دي لا بتتحنن ولا بتدخن ولا بتقشر وتمشي مناسبات ولا بتقعد في البيت وتكون ريحتا بصل وطبيخ ولا بتعمل شاي بعد الغدا بمزااااج وتتابع ليها مسلسل تركي,,, ولا انتا قايلا ما بتسمع شورة زوجها وتمشي ليهو كلمتو !!! انا اشكر ليك وجهة نظرك في انو تفكير الاطباء مختلف وابداعهم مختلف ونظرتهم للعالم مختلفة ,,,لكن ايجابا ماسلبا,,,, بالمناسبة ما في طبيبة بتفضل في مرحلة الامتياز حيث ضغط العمل والانقطاع عن المجتمع (دا في السودان طبعا),,, وما اى تخصص فيهو نبطشيات وشغل ليل وطواري ,,, ايوة القراية لاي تخصص هي القراية لكن الجلدية ما زى جراحة المخ والاعصاب وطب المجتمع ما زى العظام والاصابات وطب الاسرة ما زى جراحة القلب!!! والتدريس في الجامعة مازى الشغل في تخصص النساء والتوليد في مستشفي الدايات ! تعامل الطبيب مع الموت نوع من التقبل المهنى ليس الا ولا برودة في الموضوع,,, فانا عن نفسي ( وكثيرات من زميلاتى مثلي) ظليت طوال فترة الامتياز ابكي مع اهل كل مريض لي افقده بالموت ولا زالت تحضرني حالات كثيرة حتى الان اتذكر لحظات فقدهم,,,لكن لان الله اراد لى ان يكون الموت جزء لا يتجزأ من عملى فغصبا عنى لابد لى من تجاوز هذه النقطة حتى استطيع الاستمرار. نقطة اخيرة عزيزى هانى,,, عقدة الانا لاتحتاج ان تكون طبيبا او عامل بوفيه( دون تحقير للمهنة الشريفة),,بل هي تكوين شخصي بحت لاتدخل المهنة او نوع الدراسة في تشكيله. ارجو الا اكون قد تحاملت عليك,,, لكن انتا عاد ما اااا قصرتا معانا الله يديك العافية وما تحتاج لطبيبة تعالجك.
ملحوظة: انا يا هانى عن وضعى الشخصي احمل ماجستير صحة عامة وصحة مناطق حارة وشغالة ست بييييييييييييييييييت,, شفتا كيف بربي لي في ولدين عفريتين الكبير عمرو 4سنوات والصغير عمرو سنة,,, وعلى قول عادل امام (انا لا اثق) في ايييي حضانة ولا احس بالامان لطفلي بعيد عنى ووالدتى متوفية يعنى مافي زول يمسك لى عيالى فبالتالى اخدت قراري بدون اى تدخل من سيدنا السيد ,,, وقعدتا في البيت حتى اشعار اخر,,, يعني حيفوتنى شنو
د.سلافا العاقب احمد

الدسيس انت كما تركناك منذ 15 سنه
رجعتنا لي الايام الجميله مدني وجامعه الجزيره الاشلاق ومايو
عصمت الدسيس وبشري محمد حامدودامبا وغيرهم من الشباب
رغم انو الواحد عزف عن المشاركه في المنبر لزمن طويل لكن
سردك الجميل وتجسيدك الرائع للمشاكل الاجتماعيه اجبرني علي
التداخل
نسيت اسلم عليك وتحياتنا للمدام والوليدات
وسنكون من المتابعين فواصل يا مبدع

سرد ممتع والله نحن رأس السوط لحقنا بالله ادينا عنوان بيتكم عشان الواحد يختى منطقتكم دى نوهائ ما ناقصين شيل حال ياخى وبالمره ادينا اسم المدام بالكامك وكل حساباتا الانترنيتيه عشان لو مالقينا ايجار الا جنبكم مدامنا تحزر مدامكم من فيسبكها وتويترها ويا دار ما دخلك شر

شياليين حال يا ود الدسيس

Quote: والله يا ديسيس (بكسر الدال) - أكيد الكلمة دي إلا ناس مدني البعرفوها يا دسيس - بفتح الدال متعة ياخ والله والله زراع (رحمه الله) ما بحكيها زيك كدا

الصادق يا وجيه سلام وتحية يا حبيبنا
زراع الله ارحمو النكته كان بلصق ليها انتقاد لازع القصة بتاعتو مع الضابط الاداري المقندف وعامل فيها يا دنيا ما فيك الي انا مثال حي:
قالو زمن جوالات السكر بالتصديق من البلدية زراع قدم طلب للتصديق لجوال سكر الضابط اتعامل معاهو بي تعالي حتي السلام ما رداهو ليهو شال الورقه رماها بالجنبه في التربيزة الحكاية زعلت زراع.......
يوم من الايام في استاد مدني جاء اخونا الضابط الاداري اتمختر علي المقصورة واتجدع ماشي في الناس وفارد كتفو ورافع راسو زي الطاؤوس واتجدع بمركوب النمر....
زراع بصوت عالي وقف علي حيلو عشان الفت الناس كورك هوي هوي هوي ..... والله النمر سيد الجلد ذاتو ما بمشي كده.
له الرحمة والمغفرة

والله العنوان جذبني
واتعاطفت معالراجل

بمسك الشفع
بنطف البيت

وبيضحك المدام

وكما بيقول ليها حبيبتي وجماعتنا هنا مبكمبن لا بصدو ولا بردو
رفعت راسي وحمرت لي ابوراشد
قال لي مالك بتقري في شنو كدا زعلك --كنت وصلت النهايه المهببه
قلت ليهو ولا حاجه كنت بقرا في اخبار ابو كرشولا
شكرا ليك يا عباس

Quote: حكي جميل لا يُمل ، شكرًا لأنك رسمت بالكلمات أحسن اللوحات .

حبيبنا فضل الصادق سلام وتحية
شكرا علي تواجدك والمتابعة
مع فائق التقدير والتحية

مبروك كملت الالفيه
كنا بنفتش للجوال لقيناك سحبته


اللقب: عباس الدسيس
: .

عدد البوستات: 1000
تاريخ التسجيل: 11-10-2012




اخوك الزبير

Quote: سردك قمة في المتعة ,,,اصلا استفزنى العنوان ,,,انا طبيبة وحبيت اشوف راجل الدكتورة دا مالو ,,, لكن الدكتورة طلع ماعندها ذنب في العنوان الراجل سقيل ومعل وما في اى معنى انك تصاحبو لمجرد انو زوجتو وزوجتك صديقات,, انا النوع دا من العلاقات ما بحبو ابدا ,,, الصداقة دى عبارة عن ارتياح من الطرفين,,, تقطعو معاهو طوالى,,,, شكرا لسردك المتسلسل الجميل. د. سلافا العاقب

Solafa Alagib سلام يا دكتورة
شاكر ومقدر المتابعة والمساهمة
احيانا الظروف تفرض علينا مواقف ولحظات رغم عن ارادتنا
واحيانا القدر افكنا منها والحياة ماشة
ممنون وشاكر كثير لتواجداك

Quote: شنو حكاية الحصاحيصا دى

حبيبنا مبارك محمد عثمان
سلام وتحية
حكاية الحصاحيصا طلعت من المخضرم حمزاوي وتقريب للمسافات ما بين الكاملين ومدني وحكاية فاطنة عبدالمحمود مع نميري
وناس الحصاحيصا جميلين
تحياتي يا الحبيب

Quote: الدسيس انت كما تركناك منذ 15 سنه رجعتنا لي الايام الجميله مدني وجامعه الجزيره الاشلاق ومايو عصمت الدسيس وبشري محمد حامدودامبا وغيرهم من الشباب رغم انو الواحد عزف عن المشاركه في المنبر لزمن طويل لكن سردك الجميل وتجسيدك الرائع للمشاكل الاجتماعيه اجبرني علي التداخل نسيت اسلم عليك وتحياتنا للمدام والوليدات وسنكون من المتابعين فواصل يا مبدع

فالكاو
ما بصدق ...بجد والله
الحي بيك .. وينك يا الحبيب الدنيا احيانا تفرقك من ناس جميلين ....شوقنا محيطات
اخبارك والاسرة الكريمة.
ياخ والله لو كل الكلام ممكن اتقال كان رشيتك بي حكاية من حكايات صاحبك عصمت أو بشري.
الحمد لله هترشاتنا طلعتك نسلم عليك ونقالدك يا حبيبنا فالكو
المدام طويلة العمر بخير هي والاولاد يبلغونك تحياتهم
عليك الله ما تبخل علينا بي طلة جميلة من طلاتك في هترشاتنا
تحياتي وتقديري

غايتو يا عباس لو ما بعرفك كويس كنت قلت الزول ده بتاع سجارة عديييييييييييل كده هههههههههههههههههه

حبيبنا عبس مشتاااقون ياخ وطبعا كل مرة بتخيل في شكلك وشكل راجل الدكتورة معاك بموت من الضحك ,,, اها راجل الدكتوره ده غير زولك داك ال........ الباقي تمو خيال ..
انا مع احترامي لمهنة الطب وممتهنيها لكن انا اتعاطف مع راي اخونا هاني عربي مع الاعتذار للدكتورة صاحبت الرد في هذا البوست ..

سرد جميل يا عبس وده فعلا واقع معاش بيننا لعدد من الزيجات الغير متوافقه في مجتمعنا .. لكن زولك ده عفيت منو لمن دبل لانو الانسان بيعيش عمرو مرة واحده ولا رايك شنو ؟؟


سلامي ليك وللاسرة الكريمه ,,

تحياتي : ياسر العيلفون

Quote: سرد ممتع والله نحن رأس السوط لحقنا بالله ادينا عنوان بيتكم عشان الواحد يختى منطقتكم دى نوهائ ما ناقصين شيل حال ياخى وبالمره ادينا اسم المدام بالكامك وكل حساباتا الانترنيتيه عشان لو مالقينا ايجار الا جنبكم مدامنا تحزر مدامكم من فيسبكها وتويترها ويا دار ما دخلك شر

WAD ELGAALI#4 سلام يا الحبيب
ياخ والله انت زول لذيذ
لو عايز تختي منطقتنا ياك الساكن في اطراف الرياض اليافته البتقابلك الي وسط الرياض باي اتجاه تلقاها اها احنا ناس وسط الرياض
اما عن عناوين المدام الانترنتيه بالغته فيها تسألني انا و ل تسأل المدام تصدق بالله وتأمن مرة قلته العب وادردش وافك عن نفسي عملته لي حسابات وهمية في تويتر والفيس ياخي حتي الرسائل الداخليه بتاعتي لقيت المدام عرفتها دخلني شكك انو في جن بساعد المدام أي والله برضو تقول لي.
تحياتي وتقديري

Quote: شياليين حال يا ود الدسيس

وضاحة سلام وتحية
بديت اشك بعرفك من حكاية ((ود الدسيس)) ماركة للاصدقاء والاهل
مسئولة من الخير بق بق مالو اختفي حمل الاعتذارات بقي عليهو كثير
تحياتي وتقديري يا دكتورة

Quote: ((ماشي الحمامات اخوك عايز اعمل بولندا)).

العزيز / عباس الدسيس
سرد رائع
بس عجبتني بولندا

Quote: والله العنوان جذبني واتعاطفت معالراجل بمسك الشفع بنطف البيت وبيضحك المدام وكما بيقول ليها حبيبتي وجماعتنا هنا مبكمبن لا بصدو ولا بردو رفعت راسي وحمرت لي ابوراشد قال لي مالك بتقري في شنو كدا زعلك --كنت وصلت النهايه المهببه قلت ليهو ولا حاجه كنت بقرا في اخبار ابو كرشولا شكرا ليك يا عباس

الاخت العزيزة احسان
قدمتي فاصل احلي من فاصل المفترع الاساسي
بتلخيص جزء من مضمون الفكرة في مداخلة بسيطة ومعناها كبير
سعيد بتواجدك
مع خالص تقديري

Quote: مبروك كملت الالفيه كنا بنفتش للجوال لقيناك سحبته اللقب: عباس الدسيس : . عدد البوستات: 1000 تاريخ التسجيل: 11-10-2012 اخوك الزبير

حبيبنا الوجيه الزبير
اخبارك والاسرة الكريمة
يا خوي الجوال جاك تاني ما تقوم تنسي انت وتمسحو

Quote: غايتو يا عباس لو ما بعرفك كويس كنت قلت الزول ده بتاع سجارة عديييييييييييل كده هههههههههههههههههه حبيبنا عبس مشتاااقون ياخ وطبعا كل مرة بتخيل في شكلك وشكل راجل الدكتورة معاك بموت من الضحك ,,, اها راجل الدكتوره ده غير زولك داك ال........ الباقي تمو خيال .. انا مع احترامي لمهنة الطب وممتهنيها لكن انا اتعاطف مع راي اخونا هاني عربي مع الاعتذار للدكتورة صاحبت الرد في هذا البوست .. سرد جميل يا عبس وده فعلا واقع معاش بيننا لعدد من الزيجات الغير متوافقه في مجتمعنا .. لكن زولك ده عفيت منو لمن دبل لانو الانسان بيعيش عمرو مرة واحده ولا رايك شنو ؟؟ سلامي ليك وللاسرة الكريمه ,, تحياتي : ياسر العيلفون

ياسر يا فنان اخبارك يا وجيه والاسرة الكريمة
الشوق بحر وعايزين نقابلكم قريب يا صديق...
الزول يا هو الزول ...بالله ما حافظا تقولا لينا في اول لقاء
شكلك بوحي لي من المداخله وحكاية العمر مرة واحده عندك رأي الله استرنا منك يا الحبيب
تحياتي وتقديري

Quote: العزيز / عباس الدسيس سرد رائع بس عجبتني بولندا

حامد اخبارك يا حبيبنا
وحليب انكر كيف معاك ((مصطلح للزول البنكر الكلام))
سعيد بتواجد قلمك مع تحياتي