بنستفاد شنو ...؟!؟

تداول واعادة ارسال صور وفيديوهات لاشخاص لا نعلم هوياتهم او موافقتهم لنشر خصوصياتهم
منذ ايام وصلنى فى الواتساب فيديو رقيص لاحظته انه شديد الخصوصه يعنى مستحيل تكون صاحبته موافقه على اذاعته ونشره
والغريبه انه وصلنى من عدة اشخاص من خارج الوطن
وبالجد اثار حزنى لان ببساطه وبجهل بنساعد فى فضح هذه الانسانه على الملأ
بنستفاد شنو من تداول هذه الاشياء
وشنو المتعه فى الفرجه على اعراض غيرنا وهى بتنتهك
وهل فكرنا ان ممكن يكون دا عرضنا ونستره بدل نزيد فضحه
تفهم الاشخاص الرسلوا لى الفيديو بعد ردى وانطباعى فى خطىء الارسال للاشياء دى
حفزنى اكتب الموضوع واتسائل
وين المتعه فى فضح غيرنا عمدا او غير عمدا
هل بنفتكر ان ربنا سبحانه وتعالى ما حيحاسبنا
نحنا ممكن ما نشرب الخمر لكن مجرد مساعدتنا فى حتى وصف لمكانه بيشيلنا أثم
فى اشياء كتيره ممكن نتجنبها ونكون فى غنى عنها فى حياتنا وما تزيد من ثقلنا الحنتحاسب عليه يوم اللقاء بالخالقنا
اشياء هامشيه لا جدوى من نشرها
قال رسول الله صلى الله عليه وسلم
من ستر مؤمن ستره الله فى الدنيا والاخر
لنفعل ذلك لانفسنا وليس لغيرنا
فالحياه سدايه رضايه واى تصرف عائد عليك عاجلا او اجلا
وما تفتكر انك احسن من البتداول صورهم وفيديوهاتهم وانهم دقسوا اصلا ومستحيل انا ادقس
كان انت ما دقست لحمك ودمك حيدقس وحتلقى نفسك فى نفس المكان وتتمنى لو غيرك ما عمل زيك وفضح ونشر بالبساطه دى العروض

الاخت / رانبا

فليكن هذا ديدن الجميع في التعامل مع مثل هذه الاشياء









القوية

كيف تتسرب هذه الفيديوهات

لولا تفريط اصحابها

والثقة الزائدة عن اللزوم في بعض الاصحاب

واجهزة الجوال التي تعودنا بيعها عند اول زنقة مالية دون التاكد من ازالة محتوياتها

سلمتي

اخى garjah
بعض النظر عن تسربها
حتى لو بافتراض صاحبها نشرها
هل نشرنا ليها صواب
اننا بنساعد فى الرزيله والسوء
هل معنى انسان عمل شى غلط
انى انا طبيعى اقول دا عمل كده واذيعها له زياده
دينا ما اظن بيناشدنا نكون كده
وانا لمن بصون تصرفاتى بصونها كرمان نفسى ما بس كرمان غيرى

شكرا ليك يارانيه كلام ينضح بالعقلانية
-----
علي جمب كده
ليه
بنستفاد المصريه
وما
بنستفيد السودانيه
ولا قلتي اخير نعملها مصريه سودانيه بقولك
بستفاد شنو
بدلا عن مصريه بنستفاد ايه
آو سودانيه بنستفيد شنو
تحياتي

تسلم اخى الموصلى
فكرتنى لمن كنت راكبه الحافله ايام الجامعه
ودايره اوقفهم عشان انزل
قولت له اقيف هووون
قال لى اقيف وفهمناها هون دى شنو كمان
هون طبعا بالخليجى يعنى هنا دا :)))))))
غايتو لغتى دى يصلحها الله من عنده بين يوم وليله
غير كده ياها البشتنه الفيها ما حتخلص
:(((((

الغريبة يارانيه هون دي كتيرة عند الشوام
يبدو تحليليا انك ابنة لشخصية عملت في عدة بلاد
وكان ذاك الهجين
كل الود

صح والله هون شاميه يا الموصلى
غايتو فى مصطلحات كتيره ما عارفه بتنتمى لياتو بلد
العماره العشنا فيها واتربينا فيها جيرانا كانوا خليط
سوريين وفلسطينيين ومصريين ولبنانيين
فشنو لقطنا لقيط عشوائى
غير مدرساتنا الفى الروضه و المدرسه
جنسيات كتيره
يعنى ما عشان انتقلت كتير لكن المحيط الكنت فيه كان بيحوى جنسيات كتيره

أعجبني جدا .. ثِمب آب!

اخت رانية تحياتي

تسرب الخصوصيات أصبح الأصل .... في كل شيء ...
وما حكّ جلدك مثل ظفرك ....
الجوال.. الللابتوب... حتى الإيميل ... كلها معرضة للسرقة والإختراق ....
الحيطة والحذر واجبة عند التصوير ... ويجب مراعاة الحفظ الأمين ..

ومن يجد في يده مثل هذا .... فلينسها ... ويمسحها ....

اخى عبد العزيز
عدم الثقه وعدم الامانه وعدم الاحترام بقى عادى جدا
ولو حنتعامل بالسياسه دى ما حنعممممممممممممل اى شى فى حياتنا خوفا من الاختراق
ودايما بقى فى تطور فى مجال التجسس دا
وبتلقى اقرب الاقربين ليك البيطعنك وبيفضحك
:((((
البيدنا زى ما قولت
لمن تصلنا نمسحها مباشرتا وننبه الرسلها بخطئه عسى ولعلى نحد من المشكله

اخى محمد
اليوتيووووووووووب مليىء بالامور دى وبطريقه بشعه
هل دى اخلاقنا اننا نتفرج عليها ونضحك ونتبادلها
كتير بقيت اشوفها عاديه جداااااااااا
والناس نسيت ان دى اعراض تنتهك بالسهوله دى
ولا حنعمل زى المصريين لمن الشباب اتحرشوا بالبنات فى فترة من الفترات وقالوا ملابسهم هى السبب وبيستاهلوا
ياتو دين وياتو حق بيسمح لينا ننتهك غيرنا عشان هو لابس كده
وحتى لو غلط مع غيرنا ما معناه مجبور يغلط مع الكل ويبقى متاح للكل
المفروض اننا نصلح بعض ونهدى بعض ونستر بعض

Quote: فالحياه سدايه رضايه واى تصرف عائد عليك عاجلا او اجلا

كيفك ياقلب فعلا سدايه ورضايه
ربنا يوفقك ويستر عليك

الغالى حامد
ربنا يستر على جميع عباده ويهدينا لدربه ويغفر لينا ويرضى عنا

اختى رانية

تحياتى وتقديرى ..

Quote: منذ ايام وصلنى فى الواتساب فيديو رقيص لاحظته انه شديد الخصوصه يعنى مستحيل تكون صاحبته موافقه على اذاعته ونشره

لا ياتى الطيب الا طيب ..

مشكورة على ما بينتى من واجب الستر وخاصة (من ستر مؤمنا سترة الله يوم القيامة )

ويقول المثل :دقة بى دقة ولو زدنا زاد السقا .

اتفق معك وازيد على ان يحرص الجميع على عدم الوقوع فى المحظور , وان نتجنب التصوير بلا داعى مهما كانت الاسباب .

خاصة ونحن فى زمن لا نعلم فية صليحنا من عدونا .

واتمنى ان يرتقى الجميع بفهم السترة ..!



وتقبلى تقديرى ومرورى .

اخى عبد اللطيف
التصوير ماهو العيب عشان نتحرم منو
كتير لمن نتفرج على ذكريات صورناها بنحس بمتعه فى استرجاعها
حاجات كتيره بديت تنقرض مش لانها غلط
لان بتم الاسائه بيها
ودا ما علاج
لاننا بنسيب الساحه للاسوء يتسع
دا هروب منو ما مواجهه له

Quote: التصوير ماهو العيب عشان نتحرم منو كتير لمن نتفرج على ذكريات صورناها بنحس بمتعه فى استرجاعها حاجات كتيره بديت تنقرض مش لانها غلط لان بتم الاسائه بيها ودا ما علاج لاننا بنسيب الساحه للاسوء يتسع دا هروب منو ما مواجهه له

الابنة رانية ...

انا لم اقل التصوير عيب .....؟؟
ولم احرمه ..
انا اعنى لالزوم لما لا يلزم .....!!

فى شبابى كنت هاوى وغاوى تصوير وتحميض (خاص لى ولاهلى )...
وامتلك اليوم البومات هائلة من الذكريات والمواقف ...
وكلما اسآم وامل النت والقراءة افتح تلكم الصور واسرح فيها ......
دنيا تخصنى وحدى اشارك فيها من شاركها ولا اسمح للمطتفلين بالولوج لعالمى هذا ..

وكم من صديق وقريب اهديته منها فكان فرحا جزيلا لى ...
دعوتك لتسوير خصوصيتنا وليس تحريم او تعيب التصوير ....!!!


يحتمل تعبيرى لم يصب كبد ما اعنى ....
تقبلى مرورى الاخر هذا ...!

تسلم اخى عبد اللطيف
كفيت ووفيت فى توضيح ما احببت سماعه
مافى اجمل من الذكريات دى
خصوصا فى لحظات عطشنا لشى يفرح دواخلنا ويخلق فينا ابتسامه بلا اراده ووعى
زمن جميل ولحظه جميله وملامح مختلفه
بنحس اننا بنعيشها تانى بحزافيرها وبجمال شعورها
خساره ان الزمن دا بقى يشوه اى شى جميله بنحاول نمتلكه ويحوله لكاااااااااااااااارثه مدمره تندمك على ذكراه
بالجد الماعندهم ضميرواخلاق مسخوا حياتنا واخلاقنا
يديك العافيه

Quote: شكرا ليك يارانيه كلام ينضح بالعقلانية ----- علي جمب كده ليه بنستفاد المصريه وما بنستفيد السودانيه ولا قلتي اخير نعملها مصريه سودانيه بقولك بستفاد شنو بدلا عن مصريه بنستفاد ايه آو سودانيه بنستفيد شنو تحياتي

حبيبة سودانية
متابعة لصيقة
يا أخ إنت من سنة 2001 لسع ما أتعلمتي العربي السوداني؟
شكرا يا موصلي
طبعا حبيبة سودانية - أسم الدلع بتاعا
رانية محمد الشيخ-
معانا في سودان نت من سنة دو
ولسع لسانا مكعوج
لمن جاتنا جديدة قلنا ليها يا زولة نديك الستة شهور الأولي وبعد داك
كان ما نزلتي الخط الله قال بي قولك
وأهو حداشر سنة ولسع
أب زيد لا غزا لا شاف الغزو
والدليل:
بنستفاد شنو؟؟؟


شكرا يا حبيبة
السنة دي أنا آخر رمضان معاكم في لمة
ما تسوهوا لينا قندهار وحاجات كدا ما بنعرفا
عصيدة وتقلية وحاجات بالشكل دا ...
عندي مزاج نفتح ليك الملفات بتاعة
رقصوني علي واحدة ونص
بإعتباري
شاهد علي العصر
غايتو أتجدع في الملف دا جنس تجدع

ذا بوتوم لاين

موضوع في الصميم
بجيك بي رواقة
_____
الحليلة

عداك العيب يا بنتى
من ستر على مسلم فى الدنيا ستره الله يوم القيامة

شكرا يارانية

اخى عبد الله
العفو
:)

تسلم بابا صلاح
وربنا يقدرنا دايما ونتعداه ونتخطاه ونكون اقوى منو

سيحت لى تسيح يا الحليله
حسى اقبل وين
غايتو ديك كان ايام الخرف
:))))))))
حسى نجضته ,,, قصدى نضجته
فشنووووووووووووو
بقيت كفتونى على وحده ونص
:)))))))))))))))))))
قولت لى لمة رمضان
غايتو كانى ما سمعتك ولا شوفتنى
يا زول انا رويحتى بتتسلخ لمن البرنامج دا ينتهى وحاليا اعصابى بقيت ما بتتحمل
فشنو
عامله نايمه وبشخر كمان
الا تعزمونى براكم واجى ضيفه
لكن اصلاااااااااااا ما بتهور اقود الحمله
:((
حسى نستناك فى البوتوم لاين
ما تطول الطشه
:))))

لايك


نحتاج لاعادة صياغة الانسان

رانيه أختي ...

كيفنك ياخ ....

كما تفضلت فليس هناك أي فائدة في تداول خصوصيات الآخرين .... لكنه وللأسف في هذا الزمن بعض الناس لا يصدق أن يجد مثل تلك الفيديوهات فينشرها على (قفا من يشيل) ...

إنت عملت بأصلك يا رانيه ....

ولكن كل إناء بما فيه ينضح ....


مع خالص ودي وتقديري الذي تعرفين يا خاله ...ههههه ....

ابى ادريس
يديك العافيه
ونتمنى مجرد امنيه عسى ولعلى يكون ليها فائده فى توضيح خطىء هذا التصرف
لان فى اشخاص ما بتقصده وبتقع فيه

واحياء الضمير
تسلم دكتور محمد

Quote: أعجبني جدا .. ثِمب آب!

ثَمب يا أيو الشباب ثَمب بالفتحة ما تفضحنا مع المشاهدين ياخ

وقت اصلو غالبك الفلهمة شنو

كان بالفتحه ولا بالكسر
غايتو غلبتنى عدييييييييييييييييييييييييل اقراها

الاخت رانيه

لو تذكر هذا المريض إن الدنيا سدايه ورضايه وكما تدين تدان لما فعل ما فعل ولكنه غافل

نسال الله الستر فى الدارين

أختنا الكريمه رانيه

سلام الله عليك

Quote: وشنو المتعه فى الفرجه على اعراض غيرنا وهى بتنتهك وهل فكرنا ان ممكن يكون دا عرضنا ونستره بدل نزيد فضحه

الكثيرون يعانون من هذه الامراض نسأل الله تعلى أن يشفيهم.

اللهم أستر ولايانا وولايا المسلمين.

مشكوره على إثارة الأمر....ولي عوده إن شاء الله.

تحياتي وتقديري

اخى الشيخ
فى انتظار عودتك لمزيد من الفائده
فنحن فى حوجه للفت نظر فى ابسط تصرفاتنا

الاخ امين
نسئل الله الهدايه والمغفره لنا جميعا

الحقائق تقول ان هذه الفئات التي تهتم بأعراض الناس متواجده في المجتمع السوداني منذ أمد...تلك الجماعات كانت تصوب سهامها نحو الفئات التي تتفق معها سلوكيآ...بمعنى أنه لم يكن هناك تجاوز وتعدي على فئات تتلبسها القيم الفاضله للمجتمع السوداني الذي إستقى أعرافه من الدين الحنيف.
التركيز كان في مجمله ينصب على الفئه التي لا تجد غضاضه أو إستنكار للأفعال المشينه.

السؤال "رانيه" هو ما الذي حدث؟؟ لماذا لم يعد هناك أطر لهذه السلوكيات كما السابق؟؟ المجتمع السوداني هو نفسه!! من أين أتت الجرأة لهذه الفئات والتي اصبحت سهامها تصيب حتى المحصنات؟؟ ما الذي تغير؟؟..القيم الفاضله التي نشأ عليها السوداني ظلت ملازمه له.

الأسئله كثيره...ولنا عوده بإذن الله.

تحياتي أختنا "رانيه"

اخى الشيخ
كتير بحس ان اى مشكله بنعانى منها سببها وااااااااااااااااااااااااحد
ياهو الاخلاق والضمائر الانعدمت
المشكله اننا بدينا نتعود على الانعدام دا
بدينا نموت ونحنا احياء ونضحك على المساخر والمعاصى ونشجعها بلا اى وعى منا
بدينا نعتاد الاثم والمعصيه والخطىء
وننسى حلاوة الصح والحلال والضمير
كل الاستغاثات دى بتعكس احتضار ارواحنا ويأسها من التغيير
لانه صعب
بكل المقاااااااااااااايس صعب

نسال الله الستر فى الدارين
,.,
امين يا رب