Post: #1
Title: دار المِحنـــــــّة ....
Author: الجنيد حمد
Date: 04-13-2013, 06:51 AM
ناس الضهاري الما انكبوا في الخرتوم
زقاقات ونفاجات
كتاحة العصي الهبوبية
ريحة الزبالة
صوت المقاشيش
باب الزنكي
اللستك الجمب اللفة
الجلابيب مهرودة من كترة قعاد الضللة
الحروم مارقات الفزع
الناس جارية وما لاحقة
عووووووووك عوواااافي
الجزارة
الدكان
كومين طماطم وليس هناك من يشتري
تلاتة عجورات احتضن بعض خوف الكتاحة
الخدرة نامت من الملل
.
.
.
ملامح دار محنتنا الفي حلتنا
|
Post: #2
Title: Re: دار المِحنـــــــّة ....
Author: زول ساكت
Date: 04-13-2013, 06:57 AM
Parent: #1
الكلام دا وين
نحنا ناس ضهرة تب
لكن نحمد الله عايشين ومابتاعين ضللة
بنتمها بي موية بي شطة وملح لكن مابنمد يدنا
|
Post: #3
Title: Re: دار المِحنـــــــّة ....
Author: الجنيد حمد
Date: 04-13-2013, 07:16 AM
Parent: #2
Quote:
الكلام دا وين
نحنا ناس ضهرة تب
لكن نحمد الله عايشين ومابتاعين ضللة
بنتمها بي موية بي شطة وملح لكن مابنمد يدنا |
هي نان لوك الصبر
الشغلة تب مي نبيذ ولا نبيشة حال
علي الجزيمة جاي ابشر بالقروية من هذا المنبر
واديك النجيضة
الضللة اتفنا فيها لامن كرعينا اتزلطن
ودي بسموها ناس البندر استراحة مزارع
زي الايامات دي لا مسور ولا بابور
قدح هيل عصيدة
جبنة في ضل نيمة
عشرة في صالون
دافوري في الميدان
دلوكة فوق القيف
..........................................
الزول الساكتلو فوق راي
اديني اضانك عشان البندراب ديل ما يسمعونا
وسط الحلة .. الدكة ... اللامة هيلتكم بتسموها متلنا دار محنة ولا الاسم ده هيلنا برانا
...................................
العزيز / زول ساكت سعيد بمرورك
والبوست بوستك
اقدل فوقوا زي ما داير
|
Post: #4
Title: Re: دار المِحنـــــــّة ....
Author: حيدر حسن ميرغني
Date: 04-13-2013, 07:26 AM
Parent: #3
ياسلام ياخ
دي ترقص الجن زاتو
ياخي القيف ده سرو عجيب ياجنيد
قيف الاتبراوي اب دميرة هادرة
كنا نقعد نغني ونتسامر للمغيب ونشيل هديماتنا فوق كتفنا ونقدل للحلة
ياخي طريتنا زمن لن يعود ولا عاد القيف هو القيف العرفناه زمان
ااه يازمن
|
Post: #5
Title: Re: دار المِحنـــــــّة ....
Author: زول ساكت
Date: 04-13-2013, 07:26 AM
Parent: #3
حباب الجنيد
سيد الدار
والله ما اكضب عليك الجملة دي وجعتني شديد
عشان جات ساكت كدا وسط الكلام
بدون توضيح
الضل كان مكان للمقيل حيث لانور ولاموتور
وهي استراحة على عجل حيث لها مابعدها
ولم تكن يوماً تبطلاً
دائماً نجد مايشغلنا حتى في غب المسور
فهنالك استقبال البقرات والغنيمات
واكيد جدع القصب او كب السفير
ومن ثم الحليب وتوابعه
وكان لقينا فرقة فالعاب الليل تنتظر
والتي تكون حسب حال القمر
ارح انهر نحنا في وراك
|
Post: #6
Title: Re: دار المِحنـــــــّة ....
Author: الجنيد حمد
Date: 04-13-2013, 07:33 AM
Parent: #5
الزول الجميل / حيدر حسن ميرغني
عشرة ارادب مرحب
ونورت الفجة بي جيتك
الحلال بقت ماها الحلال
والعرجى لي مراحا
حبابك والبوست هيلك تب
|
Post: #7
Title: Re: دار المِحنـــــــّة ....
Author: الجنيد حمد
Date: 04-13-2013, 10:28 AM
Parent: #6
دكان ابدرباً زلق
الشياب والمنقلة
ثرثرات جانبية
المفتش قال بغرم اي زول الموية تطلع من حواشتو
يازول المفتش ده بتاع ناسات
على اليمين حواشة الصمد مليانة دنكوج ونجيل وما سعلو
يازول المفتش كلامو صاح البعوض نجضنا
على الطلاق كلامو ما صاح يازول نمشي بركات ونشيلو هو قايل البلد سايبة ولا سايبة
هوووي يالانصاري هو شنو داك وداك وداك انت قوليه كدي وكدي وكدي ؟؟؟؟؟؟؟
ضحكات جماعية من الحديث الغير مفهوم وحاسم من ود المرضى
........
ياجماعة الليلة ماف قدح مارق ؟؟؟؟
يازول والله الحلة دي من ما بقت مافيها صدقة المطر ما نزل
هي كمان المطر بدورلو كروة يازول كلامك ده شرك عديل
اناس بطلو كلام الدين ده والله يلم فيك الوليد المفعوص داك يطلعكم كفار عديل ونقعد في المحاجزة
الحاج الحاااااااااااج تعال ادينا رطل سكر
الظاهر جوهم ضيوف علي الحلف الحلة دي كلها مافيها زول بشيلو رطل سكر
بقري بقري بقري سمين سمين سمين
اختا المجوك
عمنا عثمان هو الجزار الوحيد ورغم ذلك ينادي خشية المنافسة ........؟؟؟؟؟؟؟
يازول والله لحمك ده الا تتمرعف بيهو براك
هي يالمغير اللحم ات شن بتعرفلو ولا الحلة دي زاتا عندها علاقة بالاكل ناس كاتلاكم الانيمبا والله زي ماقال الحكيم
يازول والله نعالي دي انفتقت بي عرش وانا بحاحي للعجول النقلتي ده ما بجي الليلة ..؟؟؟؟؟؟؟
هسي نعالك الداير رقعة ولا انت في روحك بتدورا
الحاج الحاااااااااااج تعال ادينا شعيرية
هي يالمبروكة جوكم ضيوف ولا شنو ..
اي
.................................................................................................
الرادي
نشرة التاسعة
اخبار العاصمة
هنا لندن .....................................؟؟؟
|
Post: #8
Title: Re: دار المِحنـــــــّة ....
Author: الجنيد حمد
Date: 04-16-2013, 11:55 AM
Parent: #7
متاوقة
ياخوي الرادي قال شنو
والله قالولك الهنايين ضربوا الهنايين والهنايين ديل نجوس والله
يازول هنايين شنو قول لينا كلام مفهوم عامل طاقيتك ال و س خ ا نة دي
يازول وحات الله طاقيتي دي حيرتني عديل كان غسلتها تنكمش وكان خليتا تنزل فوق اضني
اخير تعرسلك مرة تسترك في باقي عميرك ده
هي كان عرستها اقولها شنو والله اعديها جيتك ساي.....
زغاريد تصفيق ....؟؟ الحاصل شنو ياجنى
الليلة الليلة النتائج
اها جيت الكم ات يالسمح
انا جيت الطيش مشترك
والله نجيض قفلت الفصل نان معديها لي شريك وبلي بتدور تنجح
الحق ابوك وباري غنامكم ديل اصلك شبهن
تييييت تيييييييييت
دحين ده ما المفتش ؟؟؟
اي والله ياهو زاتو ابكريشة
كدي ارح عليهو نتبلبصلو ونشوف العندو
والله ياسعادتك التيراب السنة دي لقينا فرقو (شادع) خلاس
الا المبيدات الحشرية دي لو اخرتوها لحدي ما نشتت الملح بكون (ايضاً)
.
.
.
........................................................
بتاع الرادي جاء يالحاج ؟؟
ااااي قاعد هداكلو...
سمح اديهو راديني ده وقوليهو ماقاعد يجيب خلف الله حمد من عمنول ...
.
.
.دار المحنة عامرة تتجدد رغم تشابه الايام والاشياء
مجموعة من الاحاديث والحوارات اسمعها الان
............................................
كدي قبل مانتم ونسة حلتنا دي
البلد دي جابتلها هزة ارضية والبيت بكركب النقوم نتخارج قبل ما يقع فوقنا سقف
ياجماعة في زلزال ضرب ايران الليلة ولا الشغلة دي هنا بس
|
Post: #9
Title: Re: دار المِحنـــــــّة ....
Author: الجنيد حمد
Date: 04-20-2013, 09:17 AM
Parent: #8
الناس كيمان
(الخدار كيمان)
الهمهمات والطلاقات والونسات الغير برئية احياناً
والله امس ياخوي شنقت طاقيتي بعد ما انتهيت من الحليب جيت فوق المقابر لقيتكم بتدفنوا في الفكي الله يرحموا
اها بعد ما سترناهو شاققت بالحواشة لامن دخلت عن ناس عازة وقلت اشرب لي جغيمة اعوض بيها النهزي بتاع القبر
ولقيتلك حسين غرقان تب اها قلت الزول ده قريب الفكي النديهو الخبر
قال لي كان مات فكي زي الماحصل شي وكان مات درويش ابره في دفيس الا إن مات مراسي فراقو علينا قاسي .اشرب واتوهط
غايتو الزول مرق من الملة عمنول قلت ليه جارتنا البنسكر عندها زمان قالو ماتت قالي بركة الماتت عشان بتسوي المريسة رقيقة
الزول ده يوم العرقي بشقو تب
اى والله
...
يالحاج عليك النبي شوفلي الجرورة الليلتي دي وصلت كم
والله حسابكم كتير خلاس تقريباً خمسين جنيه
هي يالمغير انا كان جيت ماشي فوق ابستة بتقيد فوقي الشغلة حساب ولا كوار
يازول حرم
طلق
والله
.............
هوي ياجنى تعال تجيك الطاوية حبالها
امشي النمرة القدامية وشوف الحواشة لو قفلت سد ابستة بلبقة وتعال
يايابا لو قفلت بقفل براهو
ات ياجنى مجنون هي شغال براها (توتاميكي )
يازول انا ماقلت ليك الجنى ما توديه يقراء مع ناس خالتو اها خم وصر
علي الايمان القراية خربتو تب
هي نان نعمل
والله ...
.............
الجنني جمايكا
ياخي تحرمني جمايكا
.ابرة الكلوشي جمايكا
نظره من قرشي وفايتا
ترم ترم ترم
ياولد دي شنو البتزنبع بيها دي ومالك مغبش كده دهن ساي يجلبطوك بي ماف ياكافي البلاء
دي غنوها الفنانين امس في الحفلة حقت ناس قدام
وات تبارك الله حفظتها وفي المدرسة قاعد ميطنق
ولادة الندم.
........................
يالحاج الدلالي ده بجي الليلة قلت النجي دار المحنة اسأل منو
اي
خلاص رسل اي شافع لامن يجي انا ماشة الجبنة وعندي خدرة ماشة اورقها
الليلة خدرة ياسلام ابقصوا لي حقي بجي اتعشى بيهو باقى غداكم انتو بتأخر
سمح
.....................................
زلابيه زلابية
ياولد زلابية مع ساعة الفطور البشتريها منك منو
كدي جيبا جاي النخارجة ليك
هي مالا عاملة كده امك دي منجضاها بالشميش
هو انت زاتك ما قاعد تشتري
عليك النبي شوف الشافع اللميض ده
لا ما تخبتوا
ياولد اقيف اقيف التطلق امك
اها هسي براك بتقابض في الجهلة وتمشي تتشكى
وقت ما بتدور تشتري بتشنف للجنى في حاجاتو مالك والله الكلام ده حرام
اها قمنا حرام وحلال فايتك زاتي الحلة دي بعد كم بتدخلوها النار وانتوا براكم تنوموا بالجنة
اي
لا
بس
هو
والله
...................................................
تنويه ساي
دار المحنة (تقراء بكسر الميم )
|
Post: #10
Title: Re: دار المِحنـــــــّة ....
Author: Nazik Eltayeb
Date: 04-20-2013, 09:39 AM
Parent: #9
صور توثيقية لحياة كاملة بواقعها و احلامها و كفاحها و صراعها ، مأخوذة بكاميرا عالية الدقة ....يبدو ان الكثيرين سيبكون على هكذا ماضي.
----------------
دمت
وارجو ان تستمر لاننا هنا قاعدون
|
Post: #11
Title: Re: دار المِحنـــــــّة ....
Author: عبيد الطيب
Date: 04-21-2013, 04:28 AM
Parent: #10
الأخ الجنيد شكرا للحكي الطاعم
الجزء الأخير "الناس كيمان والخدار كيمان..............الخ
يا سلاااااااااااام سرد رائع وتفاصيل صغيرة حبكتها بعناية
واصل كتابتك الرائعة والراقية و"الرايقة"
محبتي
|
Post: #12
Title: Re: دار المِحنـــــــّة ....
Author: الجنيد حمد
Date: 04-21-2013, 07:56 PM
Parent: #11
.
الاستاذة /Nazik Eltayeb احترامي وتقديري لك
سعيد بمرورك
احاول نقل صورة تلك الاماكن فهي سكني وسكينتي وملاذي الاخير
لك التحية والتقدير مرة اخرى
دمتي سالمة
|
Post: #13
Title: Re: دار المِحنـــــــّة ....
Author: الجنيد حمد
Date: 04-21-2013, 07:59 PM
Parent: #12
العزيز / عبيد الطيب تحياتي واحترامي لك
مشكور على المرور الانيق
سلمت ودمت بالف خير
|
Post: #14
Title: Re: دار المِحنـــــــّة ....
Author: معاوية عبيد الصائم
Date: 04-21-2013, 08:55 PM
Parent: #13
Quote: كومين طماطم وليس هناك من يشتري
|
برجع ليك تب ورجعة مهمة
الحمد الجنيد سلامات
|
Post: #15
Title: Re: دار المِحنـــــــّة ....
Author: الجنيد حمد
Date: 04-26-2013, 03:12 PM
Parent: #14
الحال نفس الحال
والزمن ياهو الزمن
بس اتغيرت النفوس الكانت عامرة بالطيبة والحنية
الله يقطع الديجتال وسنينو
في بلد العقالات
الليلة جاتنا مطيرة حكمة الله المطر بقى ما زي زمان
زمان ليها شنة ورنة وزيفة وكرع رع كرع لامن القلب يرجف
وخمجي واح جرحتني قزازة يازول ده عضم انت جيت جمب الجزارة
كدي جيب الابرة النفتحة اها لاها قزازة ولاها عضم هديليها شوكة لعوتة
واللعوت مظلوم لما قالوا جافي
قرابة اللعوت تتلاقى وقت الموت ..,,
الله يدينا حسن الخاتمة ما المؤسسة ..؟؟
..................................
اها
يابا يابا الكوريق وين
بتدوربو شنو ياجنى والدنيا ماشي على السهراجة
حبوبتي قالت الليلة في مطرة بدور اردم الحوش الوراني
خلاس اطلع فوق راس الاوضة ونضف السبلوقة
ولا اقوليك سوق الكارو وجيبلك دورين تراب
يابا التراب في جمب الحوش
ات مطموس تراب الحلة سفاية مابردم
امشي الترعة سمح
سمح
...........
هو ها ات نائم كدي وارث ؟؟؟؟
قوم اردم البيت الحلة جت تصلح فوق سابليقا
ياخ نجيهتكم دي ياها الوقفت المطر اصبروا هسي وين السحابة
اليجي ابوك واكلمو ليك ..مخير الله
....
ياجماعة يدكم معانا
عندنا بقرة واقعة تعالوا نرفعا
والله تحلب السنة جت وما بتعلق ليهن الله يجازيك
يازول والله البقرة البرقاء دي سحروها ساي
طلق ليها الكرعين
دخل العود اسمع اسمع امسك الضنب لا ماتجي جمب الراس
هوووووووبا هوووووبا
عليك النبي شوف المسنوحة دي شديدة بتستهبل ساي
يلا يازول ودعناك الله
وين ياناس حرم القطور جاهز
الحاجة الليلة كاربة ليها روب سمح
كان كدي خلاس دقيقة النجيب فطورنا
ياجماعة الاكل في وكتير
لا حرم يانجيب فطورنا يامانفطر
ياولد اجر البيت جيب الفطور
ياولد اغشى بيتنا جيب الفطور وخش لي ناس هناي ديل اتناول فطورم معاك
اللمة
عصيدة .. ويكة .. روب ..عصيدة ... ويكة ...روب... جبنة
جيب الكيس
اشتري ليك كيس السنة كلها مشاركني
يازول ماني دايرو كيسك الكلو جرة ده
حرم
طلق
الله
..........................................................
تعريف مهم
دور التراب ماهو باللوري
عبارة عن صندوق حديدي مربع سعة خمسين الى ستين كوريك
.........................................
الحبيب / معاوية عبيد تحياتي
ونورت الفجة بطلتك
دمت سالماً
|
|