Post: #1 Title: سؤال جادي: ( ول أبا ) يعني شنو؟ Author: محمد جلال عبدالله Date: 04-07-2013, 06:58 AM
السلام عليكم
لاحظت كثيرا في هذا المنبر استخدام تحية ( ول أبا ) والذي فهمته أنها تحية خاصة بإخواننا في كردفان وربما دارفور، فما معنى هذه التحية وبأي لهجة هي؟ وهل هي خاصة بالرجال فقط أم يمكن أن يخاطب بها النساء أيضا؟
بالجنبة كده: زمان لمن كنا صغار كان في غنية بتتكرر فيها كلمة (أبّا) كتير .. هل هي نفس الكلمة؟ بالمناسبة قلت لمن كنت صغار يعني عشان ما يجيني زول يقول لي يا مطوع ^_^.
الهدف من السؤال التعرف على ثقافة جزء من وطننا الحبيب.
Post: #2 Title: Re: سؤال جادي: ( ول أبا ) يعني شنو؟ Author: وليد محمد المبارك Date: 04-07-2013, 07:03 AM Parent: #1
اعتقد انها تعني أخي
اعتقد ول ابى = أبن ابي
Post: #3 Title: Re: سؤال جادي: ( ول أبا ) يعني شنو؟ Author: نادر النور آدم Date: 04-07-2013, 07:05 AM Parent: #2
حسب علمي يعني ود أبوي عندنا في الجزيرة بنقول لأبناء العمومة أولاد ابوي وهي عموما نداء محبب ويدل على محبتك لمن تناديه به
Post: #4 Title: Re: سؤال جادي: ( ول أبا ) يعني شنو؟ Author: Mohamed alhabib Date: 04-07-2013, 07:08 AM Parent: #3
Quote: حسب علمي يعني ود أبوي عندنا في الجزيرة بنقول لأبناء العمومة أولاد ابوي وهي عموما نداء محبب ويدل على محبتك لمن تناديه به
Post: #5 Title: Re: سؤال جادي: ( ول أبا ) يعني شنو؟ Author: محمد جلال عبدالله Date: 04-07-2013, 07:09 AM Parent: #3
الشفت ونادر .. شكرا على المرور والتوضيح فعلا هي كلمة ودودة وتشعر بالراحة والمودة عندما تقرأها سبحان الله! وهذا من عجائب المفردات في مختلف اللغات
ننتظر المزيد من أهل الإقليم .. حد يصحي بريمة :)
Post: #6 Title: Re: سؤال جادي: ( ول أبا ) يعني شنو؟ Author: رحمه فضل المولى عجك Date: 04-07-2013, 07:25 AM Parent: #5
يا سيدى ول ابا مفرده مستعمله فقط فى بدو كردفان ودارفور والبقاره على وجه التحديد ولا يشاركهم فيها احد من اخوانهم ابالة كردفان وتعنى ولد ابى و تستعمل للمراة تقال بت ابا اى بنت ابى وفى هذه الحاله ابا بمعنى العم انا انصحك بالتعرف على ثقافة هولاء القوم هى اقرب للفصحى وفيها مفردات نادره وجميله
Post: #7 Title: Re: سؤال جادي: ( ول أبا ) يعني شنو؟ Author: رحمه فضل المولى عجك Date: 04-07-2013, 07:48 AM Parent: #6
يا اخى اذا ذهبت الى هذه الباديه اليوم تسمع الرسن واللبب والزمام والركاب والسرج والعرف والحرف والبنيقه و وغيرها وكلها مفردات معجميه
Post: #8 Title: Re: سؤال جادي: ( ول أبا ) يعني شنو؟ Author: محمد جلال عبدالله Date: 04-07-2013, 08:13 AM Parent: #7
شكرا محمد الحبيب ورحمة فضل المولى على المرور والتوضيح
Post: #9 Title: Re: سؤال جادي: ( ول أبا ) يعني شنو؟ Author: رحمه فضل المولى عجك Date: 04-07-2013, 08:27 AM Parent: #8
ولا يهمك اخى محمد وسوف استدعى لك هولاء البدو فى بوست لاحق لمدنا بكل المفردات التى شارفت على الانقراض
Post: #10 Title: Re: سؤال جادي: ( ول أبا ) يعني شنو؟ Author: Dawalbait Hamid Date: 04-07-2013, 11:04 AM Parent: #8
سلامات أخ محمد
فعلا ول أبا تعني ولدأبوي
فقط المسيرية ( البقارة ) هم من يستخدمونها:
بعضهم يحذف الدال من ولد فتصبح ول أبا بعضهم ينطقها بالدال ولد أبا والشايع ول أبا
ول أبا تستخدم للآقربين من نفس القبيلة أو للعلاقة الحميمة
حبوبتي : أمامتي
تشاجر أحد البقارة مع واحد من غير البقارة وعنما هرب الأخير صار البقاري يركض خلفه ويقول ( أباني يا أبا أباني يا أبا )
دي بقى نخليها لبرعم أو كبر بعرفوها تماما
ضوالبيت
Post: #11 Title: Re: سؤال جادي: ( ول أبا ) يعني شنو؟ Author: احمد حمودى Date: 04-07-2013, 11:19 AM Parent: #10
الحريم بقولن ولد امى والرجال ولد ابا يعنى ود ابوى وهى لغة البقارة من جميع مكوناتهم وتحياتى اخ محمد جلال
Post: #12 Title: Re: سؤال جادي: ( ول أبا ) يعني شنو؟ Author: عبد الباقي الجيلي Date: 04-07-2013, 11:41 AM Parent: #11
أخي محمد جلال وضيوفك الكرام
رغم وضوح المصطلح لكنني أظنك وددت مزيداً من التوضيح ...
كما ذكر الأخوة فهذا من الحديث الحنين والودود لأهلنا البقارة في بوادي كردفان ودارفور ...
وينطق حرف اللام بالتفخيم ...
ويقال أيضاً ولض أمي .. بفتح اللام وتفخيمها وسكون الضاد وفتح الهمزة في أمي ...
محبتي
Post: #13 Title: Re: سؤال جادي: ( ول أبا ) يعني شنو؟ Author: نادر النور آدم Date: 04-07-2013, 01:58 PM Parent: #12
رسالة على الإيميل من الأخ الكريم: الفاضل حسين
Quote: الأخ الفاضل/ نادر النور آدم المحترم السلام عليكم ورحمة الله وبركاته،،
كلمة "ول" هي اختصار لكلمة "ولد" أو "أبن" وكلمة "أبّا" تعنى "أبى" والمقصود بعبارة "أبن أبى" هو "ابن عمى" أو "ود عمي" كما نقول في دارجية أهلنا بوسط السودان.
اجابة الأخ رحمة فضل المولى صحيحة: "مفرده مستعمله فقط فى بدو كردفان ودارفور والبقاره على وجه التحديد ولا يشاركهم فيها احد من اخوانهم ابالة كردفان وتعنى ولد ابى و تستعمل للمراة تقال بت ابا اى بنت ابى وفى هذه الحاله ابا بمعنى العم".
أود أن أضيف لإجابة الأخ رحمة أن هذا التعبير عربي فصيح وقد ورد في القران على لسان سيدنا ابراهيم عليه السلام، وأستدل به الشيخ الشعراوي رحمه الله على أن والد سيدنا ابراهيم لم يكن كافرا، اذ المقصود بكلمة "أبيه" في النص القرآني (وإذ قال إبراهيم لأبيه آزر أتتخذ أصناما آلهة إني أراك وقومك في ضلال مبين)هو العم وليس الوالد كما يتبادر الى الذهن (كذلك أستدل العلماء بأن سيدنا ابراهيم سمى أبيه "أزر" مما يفيد تعدد الاباء افي النص والأب دائما مفرد كما في قوله تعالى (اذ قال يوسف لابيه) ولكن يتعدد الأعمام). علاوة على ما سبق، ليس بين الناس اختلاف في أن اسم والد إبراهيم هو "تارح" وليس "أزر". وفى نص قرآني آخر نجد أن سيدنا هارون قال لسيدنا موسى عليهما السلام: (قَالَ يَا ابْنَ أُمَّ لَا تَأْخُذْ بِلِحْيَتِي وَلَا بِرَأْسِي إِنِّي خَشِيتُ أَنْ تَقُولَ فَرَّقْتَ بَيْنَ بَنِي إِسْرَائِيلَ وَلَمْ تَرْقُبْ قَوْلِي (94) سورة طه ) ولم يقل "يا أبن أبى" وحسب أقوال بعض المفسرين قالها لأن سيدنا موسى هو أخ شقيق له وعبارة "أبن أمى" أي "ود أمي" أحن وأرق ........ و هي ايضا عبارة شائعة عند أهلنا البقارة وهم يقلبون حرف الدال الى ضاد في نطقها "ولض أمى"....والله أعلم.
ولكم منى التحية والتقدير، الفاضل
Post: #14 Title: Re: سؤال جادي: ( ول أبا ) يعني شنو؟ Author: علي عبدالوهاب عثمان Date: 04-07-2013, 02:16 PM Parent: #13
بوست جميل .. واحس أن هناك رابط بيننا في السودان .. ابا .. في دنقلاوية في النوبية الاب ويستخدم عندما تريد ان تعطي قيمة اضافية لوالدك .. تقول ( ابا ) حتى اذا كان بعيداً عنك تناديه ( ابا .. ابا ) وهي واحدة من احب النداءات للوالد .. التحية لصاحب البوست .. حاولت ان اضيف شيئاً
Post: #15 Title: Re: سؤال جادي: ( ول أبا ) يعني شنو؟ Author: عبد الباقي الجيلي Date: 04-07-2013, 02:39 PM Parent: #12
رغم وضوح المصطلح لكنني أظنك وددت مزيداً من التوضيح ...
كما ذكر الأخوة فهذا من الحديث الحنين والودود لأهلنا البقارة في بوادي كردفان ودارفور ...
وينطق حرف اللام بالتفخيم ...
ويقال أيضاً ولض أمي .. بسكون اللام وتفخيمها وسكون الضاد وفتح الهمزة في أمي ...
محبتي
التعديل تم لخطأ في تشكيل كلمة ولض أمي
Post: #16 Title: Re: سؤال جادي: ( ول أبا ) يعني شنو؟ Author: محمد جلال عبدالله Date: 04-07-2013, 05:10 PM Parent: #15
الأفاضل الكرام: Dawalbait Hamid احمد حمودى عبد الباقي الجيلي علي عبدالوهاب عثمان Adam Alamar (من الفيس بوك)
شاكر ومقدر لمروركم الجميل الذي أسعدني كثيرا وقد وضحت الكلمة تماما .. والحمد لله اليوم عرفنا شيء جديد وربنا يؤلف بين قلوب جميع أهل السودان ويصلح ذات بينهم ويجمعهم على كلمة سواء وربنا يحل الأمن والسلام في ربوع الوطن الحبيب حتى نزور جميع أرجائه
Post: #17 Title: Re: سؤال جادي: ( ول أبا ) يعني شنو؟ Author: هاشم نوريت Date: 04-07-2013, 05:15 PM Parent: #16
Quote: الهدف من السؤال التعرف على ثقافة جزء من وطننا الحبيب.
جميل ياخوى نتعرف على ثقافة جزء من وطنا لكن حصل اعرف سريع مامعروف وطنا دا صاحب الحدود المؤقتة بكرة يمكن الجزء الداير تعرف ثقافتة يكون خارج الحدود الله فرجينى
Post: #18 Title: Re: سؤال جادي: ( ول أبا ) يعني شنو؟ Author: Kabar Date: 04-08-2013, 04:12 AM Parent: #17
ولد ابا محمد جلال..حبابك يا صديق و حباب ضيوفك ، عيال ابا جملة..و بعد
كتر خيرك على السؤال ، و اهلك البقارة بيقولوا (البيسأل ، ما ضهب ، بكسر الضاد) ، و دي بتساوي في كلام ناس البندر ، بداية غنية بنات ابا البلابل (البيسأل ما بتوه)..
ول ابا ، زي ما قال صديقنا عبد الباقي ، هي مفردة تخاطب حنونة..و عند البقارة (ياهو المعني التكرموا الشباب بشرحوا هنا) بتكون في شكل نداء بين السجالي ، و السجالى مفردها سجيل ، و تعني النديد ، و السجالي تعني الأنداد..! اول مرة ادخلت استخدامها في هذا المنتدى سنة 2002 ، و استخدمتها كمخاطبة لأخونا المهندس كباشي الصافي (كانتونا ون)..و قلت ليهو..( ولد ابا ، الدابي اب سمين الغــــلّـب الحــوّاي)..و تاني مرة استخدمتها مع اخونا الدكتور ابكر ادم اسماعيل ، و قلت ليهو (ولد ابا ، ازرق كحل الشيخات)..و كحل الشيخات هو حجر الكحل الواحد..و في اساطير البقارة انو من الأحجار الكريمة..و لو ملاحظ في النموذجين ، انو بعد النداء بيكون هناك وصف لشخص المنادى..و العملية دي قد تستغرب من اسمها عند البقارة..و يسمونها (المنابـــذة)..يعني لمن زول يقول ليك فلاني نبـــّذني أو نبـــّـذت فلان.. يعني شكرتو..و اظهرت محاسنو..أما مفهوم (النبــذ) الشايع في البندر.. فعند البقارة يسمى (المـُعيار)..فيقول ليك فلاني عيــّرني..و ده معناتو بعدو طوالي يا طعنة سكين.. أو حربة.. أو فلقة عصاية.. يازول اهلك ديل صعبين خلاص..!!!!
وبرضك بيقولوا على وصف تبادل الشتيمة (المعايرة)..يعني يقول ليك عايرت فلان أو فلان عايرني (خت في بالك البقارة ما قاعدين يعايروا النساء ، باستثناء ناس المنبر هنا ، و منهم شخصي ، لأننا ناس ديم ساكت و مرات بندقس و بننسى قوانين الذوق الأصلية و الأتكيت بتاعة البقارة.. ياخي دي لو اشتغلنا بيها الواحد يبين فيهو نور صلاح عدييل..!!!)..و هل تصدق يا محمد ، مفردات الشتيمة في قاموس البقارة كلو ماها لاحقة عشرة كلمات..!!!!
و مقابل (ول ابا).. هي بت أبا ، و اول مرة استخدمتها في مخاطبة لصديقتنا الأستاذة نور تاور.. ثم ثاني مرة لمخاطبة صديقتنا دكتورة نجاة..ثم صديقتنا الغائبة الحاضرة زينب الفحل (دومه)..ثم صارت شائعة فيما بعد..و حتى اليوم في المدينة التي اقيم فيها ، هناك بعض من اصدقائي يقولون لي (ود أبا).. لأنهم ناس بحر ابيض و كده..!!!
بالنسبة لأخونا احمودي..البقارة ما عندهم مفردة (الحريم)..و بدلا عنها بيقولوا (العوين أو العيين ، الأخيرة دي مشهورين بيها ناس فارس موسى و ضو البيت حامد )..و فعلا هناك عبارة (ولد امي/ ولض أمي)..و يكثر استخدامها في حالة الإستغراب الحنون ، كقولهم (مالك علي يا ولض امي؟).. او في حالة الإستقبال (جيتا جيت يا ولض امي)..أو (كيف حالك يا ولض امي)....و يقابل عبارة (ولضمي ) قولهن (بت امي /بط امي )..و تشيع بين النساء كثيرا..و هكذا..
طريقة سؤال ولد ابا ضو البيت ، ادرع نمر البار.. عند اهل البندر تسمى الفزورة..و عند البقارة تسمى (الرُباط)..يعني كبر لو داير يشرح ضو البيت عمل شنو ح يقول ليك ضوالبيت ربطني..و العبارة (اباني يا ابا)..من يقول بها بيكون بيعمل حاجة اسمها (التنبر ، بكسر التاء).. و هي اظهار الشجاعة و الفخر..و العبارة هنا تعني هرب مني جبـــنأ..يعني زي غنية مبارك حسن بركات (سمعنالنا خبر من الهلالية ، خمسطاشر جواد سكن سبعمية )..!
من عبارات التنبر الشائعة.. كقولهم ( أنا الشافو خلو).. (أنا اخوك يا ام قرون زرقا)..(يسمعن بنات عمي)..(يسمعن الحكامات)..
اها يا ولد ابا ضوالبيت.. قريبتك قالت (ولد ابـــّـأ ، الفي الـدبّا بتدبــّأ)..و قريبك قال (بت أبــــّـأ ام شعرا مـــلْبـــّا)...و لمن تلحقوا الهضليم باحش القيزان ، عيــــّــط لي ، يا ولد ابا ..!!!
و دمتم.. كبر
Post: #19 Title: Re: سؤال جادي: ( ول أبا ) يعني شنو؟ Author: Kabar Date: 04-08-2013, 04:27 AM Parent: #18
بعد اذن الجميع نضيف هذه المادة من اليوتوب..و الغرض منها حاجتين: اول بالتبادي .. كيفية نطق كلمة (أبا)..بالتشديد طبعا.. ثاني التبادي : توضيح فكرة (التنــــبر) بكسر التاء ، و تعني الفخر.. و المغنى هو ولد ابا ، اخونا الفنان ، ادم حمودة..و الناست العاشت في الأبيض .. اسم الشهرة (ادم نيالآ)..
كبر
Post: #20 Title: Re: سؤال جادي: ( ول أبا ) يعني شنو؟ Author: محمد جلال عبدالله Date: 04-08-2013, 05:02 AM Parent: #19
ولد أبا كبر .. مرحبتين وشكرا كتير على المداخلة الدسمة والضافية والتي أوضحت الأمر بجلاء وأضافت إلي الكثير (وعلى ذلك فولد أبا ماركة مسجلة لك في عالم الأسافير) ما دفعني للسؤال حقيقة أن الكلمة ملفتة وأنها لذيذة وطاعمة وفعلا تشعر بالحنان والمودة تتدفق منها تحياتي لك
Post: #21 Title: Re: سؤال جادي: ( ول أبا ) يعني شنو؟ Author: محمد جلال عبدالله Date: 04-08-2013, 05:04 AM Parent: #20
الشكر الجزيل كذلك لأخينا/ الفاضل حسين المتداخل عبر الإيميل وقد نسيت أن أذكره سابقا فله العتبى كما أشكر أخي هاشم نوريت على المرور وكل القراء والمتداخلين
Post: #22 Title: Re: سؤال جادي: ( ول أبا ) يعني شنو؟ Author: الطيب رحمه قريمان Date: 04-08-2013, 06:39 AM Parent: #21
التحية الطيبة و التقدير لك ول ابا محمد جلال
و الاسناذ كبر كفانا القول و لا نزيد عليه حرفا ... !!
Post: #23 Title: Re: سؤال جادي: ( ول أبا ) يعني شنو؟ Author: علي عبدالوهاب عثمان Date: 04-08-2013, 11:41 AM Parent: #22
استميحك عذراً اخي محمد جلال .. من خلال بوستك الرائع ان أزجي الشكر والتقدير للاستاذ كبر .. يا سلام هو ده الكلام .. يا اخي في حاجات كثيرة غايبة عننا وخاصة نحن في اقصى الشمال .. شكراً محمد جلال ومن خلالك الشكر للاستاذ كير .. هذه واحدة من اهم فوائد هذا الحوش .. استاذنا محمد جلال يا ريت كبر لو يواصل عشان نعرف اكثر .. يا هو ده السودان ..
Post: #24 Title: Re: سؤال جادي: ( ول أبا ) يعني شنو؟ Author: Dawalbait Hamid Date: 04-09-2013, 05:05 AM Parent: #19
Quote: بعد اذن الجميع نضيف هذه المادة من اليوتوب..و الغرض منها حاجتين: اول بالتبادي .. كيفية نطق كلمة (أبا)..بالتشديد طبعا.. ثاني التبادي : توضيح فكرة (التنــــبر) بكسر التاء ، و تعني الفخر..
ول أبا كبــر حرير الطواقي وليمون الزواقي عفيت منك
الناس دول توه حتى كلامك حلي ليهم وول أبا آدم حمودة دسه سكينة في العنصرية يا العود وقال ( علي دينار أبونا )
بس الكليب نطق للجماعة كلمة ول أبا، لابدين ( لكن ) بدوروا منك شرح مفردات التنبر :
مخاريق الرجال بقت مقيل للطير
الفازرن ألضامرن البطال جضول الخيل الغردة
وصاحب البوست براوة عليه له كل الشكر وجاته الإجابة من جميع الجهات لا معيار ولا الكلام ده نادوا شنو
وصاتي ليك كل ما لقيت فرصة ما تقصر لغاية ما يعرفو ( دول جكوا الريشة بتن ما جوا )
يعليك في المابيك ضوالبيت
Post: #25 Title: Re: سؤال جادي: ( ول أبا ) يعني شنو؟ Author: محمد قرشي عباس Date: 04-09-2013, 07:16 AM Parent: #24
بوست رائع و مفيد الشكر موصول لصاحب البوست و كل المتداخلين
Post: #26 Title: Re: سؤال جادي: ( ول أبا ) يعني شنو؟ Author: عبد الباقي الجيلي Date: 04-09-2013, 01:01 PM Parent: #25
تسلم أخونا كبر على هذا الشرح الوافي ..
وأسمح لي بالتغول على صلاحياتك ...
فقد أعجبتني مقولة : مخاريق الرجال بقت مقيل للطير
وأظنها واضحة ... فقد أصبحت جيف الرجال مقيلاً للطير بعد نهاية المعركة
ولها مترادفات كثيرة في ثقافة أولاد البحر كذلك وأشعارهم .
Post: #27 Title: Re: سؤال جادي: ( ول أبا ) يعني شنو؟ Author: Kabar Date: 04-10-2013, 05:59 AM Parent: #26
ولد ابــّأ محمد ..حبابك اعفى لينا يا قريبي.. شكل ح نكتر الطلة.. مع انها مرات بتمسخ خلق الله..!!! تحية ليك و للشباب و الشابات هنا.. كبر
Post: #28 Title: Re: سؤال جادي: ( ول أبا ) يعني شنو؟ Author: Kabar Date: 04-10-2013, 06:03 AM Parent: #27
ولد ابا على عبد الوهاب عثمان..حبابك يا صديق كتر خيرك على المطايبة..و بالمناسبة انا من الناس القاعدة تقرأ ليك بصمت و تتكيف و تعمل نايمة كمان..!! و كتر خير اخونا محمد الذي فتح لنا هذه الكوة الوريفة.. بس خايفين كمان نزحم القصة ساكت.. مع انو الونسة التلقائية.. مرات فيها انسيابية الثقافات بصورة حميمة و ممكن الناس تعرف بعضها البعض..و لو كل زول جاب ليهو فكرة من قرية ولا فريق.. البوست ده ح يطلع بوست الموسم..و الناس ح تعرف بعض اكتر.. ياخي البيسمع حكاية (اقصى الشمال) يقول الزول ده بغادي لبحر الأسكندرية..! نفس الحاجات يا علي.. مثلا..
الريف ياهو الريف..و الصورة دي بتطلع عينا نحن ذاتنا ياخي..لكن المدهش.. حكاية الموية البيشلوها في الراس..نفس الصورة الخالق الناطق..ممكن تلاقيها في فرقان اهلك البقارة ناس الخلا البعيد..و بتدفق و بتبلل تلك التضاريس..ياخي حاجة لو شافوها ملوك الموضة العالمية.. يمين العالم كلها تبلبل زي الما حاصل شي..!
ايام الشهادة السودانية يا علي ، و كنا وقتها دوبك سنة اولى ديموقراطية..و كانت عندنا رابطة ثقافية في الدلنج..و كانت بتعمل مناشط..و كنت احب المسرح..لكن الأيام ديك ظهرت قصيدة زولك الحاردلو (تقولي لي منو ، تقولي شنو)..و حفظتها صم ..و بقيت اندرع لي في عراقي و سروال...واشارك بيها في حفلات الرابطة...و مشينا حمنا مدن كتيرة في جنوب كردفان..وكان الناس بتتجاوب معاها..مش طريقة الألقاء..و لكن المفردات القريبة من الناس..و مرة سألتني واحدة صديقة: قالت انتو شعر المنتديات ليه ما زي شعر الحردلو ده؟..
في مناطقنا يا علي.. نفس الفكرة.. الصبيان (الأولاد) و البنات.. خصوصا لمن تكون القمرة ضاوية شديد.. بيمرقوا و بيلعبوا مع بعض.. طبعا اهلك البقارة ما قاعدين يقول رقيص المردوم أو النقارة..و انما بيقولوا لعب المردوم أو لعب النقارة..و برضك عندنا المصارعة (اخونا بريمة حاز درجة فارس..).. لكنها عند الحوازمة اكتر..
اما حكاية السكين في الضراع..ياخي دي عندها طقوس عجيبة خلاص..يعني عندنا هناك أول ما الشافع يطهروهو طوالي بيدوهو سكين هدية..و انا ..بالرغم من انني كنت في مدينة الدويم.. لكن سعوا لي سكين و انا في سنة رابعة ابتدائي..و كلما نمشي الإجازات بتقوم تندرع ليك في عراقي و تلبس سكينك في ضراعك..و لغاية زمن الجامعة كنت قاعد اشيل سكين (لكن اطورنا و بقينا نربطها في الساق).. اما القرعة.. فكنت ناوي ..منذ سنوات.. اكتب اثنوغرافيا عنها و عن استخدامتها في ثقافات السودان..لكن نقول شنو .. المزاج غالب يا صديقي..و الظاهرة موجودة عندكم في الشمال..و في كردفان..وفي درافور..لغاية مجتمعات غرب افريقيا..مالي.. النيجر.. موريتانيا ..نيجيريا..الخ..
غايتو نحن السودانيين ديل كن الله هدانا شوية..و كل زول قعد يكتب عن ثقافة معينة.. ثقافة الناس العادية..ح نلقى روحنا كلنا حاجة واحدة ..! كتر خيرك..و نشوفك طوالي..
كبر ـــــــــــــــــــــــ
* مقتبس من نص اغنية نوبية ، استشهد بها الصديق على عبد الوهاب في واحدة من المقاربات الجمالية التي انجزها.. النص موجود..و جدير بالقراءة..
Post: #29 Title: Re: سؤال جادي: ( ول أبا ) يعني شنو؟ Author: Kabar Date: 04-10-2013, 06:07 AM Parent: #28
ول ابا عبد الباقي..حبابك يا صديق
ابدا يا صديقي مافي تغول تب.. و المعنى الذي ذكرته هو نفس المعنى.. يعني حكاية اطلق الجزء و اراد الكل..و المفردة هي وصف لجزء من جسم الإنسان..فالمخاريق جمع ، و مفردها (مخروقة)..فهو وصف لجزء صغير من جسم الإنسان.. يعني الجزء من الركبة لغاية الخصر هو الفخذ..و المخروقة هي نهاية الفخذ من خلف و بداية (الإليــّة) ..
بلاغة العبارة تتجلي في مفردة المخروقة و مقيل الطير..و الطير المعني هو النسر/النسور..و من مشاهدتي لهذه النوعية من الطير .. يلاحظ انها تأكل اللحم البشري و في نفس الوكت اصلا ما بتلقاها بتاكل بالليل.. طبعا باستثناء البعض..من الأسماء المحلية للنسور عند البقارة: العقاب (عقــّب)..بولي (طير البحر/يأكل السمك).. جقاوة..ام قدمين..
العبارة ايضا عندها معنى عجيب.. ففي مخيلة البقاري العادي.. النسر من الكائنات العظيمة ذات الإباء و الأنفة (لا ادري هل تذكر قصيدة النسر في منهج الشهادة السودانية أم لأ)..و الفكرة انو الكائن النادر ده الناس ممكن تكرموا لغاية ما يشبع..لاحظ أنو النسور نادرة الوجود في مناطق البقارة..و تأتي موسميا..لكن هناك ظاهرة تشاؤوم عجيبة.. يعني في منتصف الصيف.. لمن تجي النسور (بتكون حايمة في الجو في شكل دوران اشبه بموجة دوامة في بحر)..الناس طوالي بتقول ليك ح تحصل حرب و ح يحصل موت كتير..!
فكرة مخاريق الرجال.. لو قمت طبقت عليها فكرة بنية الوعي التناسلي ح تلقى فيها تعريض عجيب خلاص..!
الخصر ، من الخلف..خصوصا اخر اربعة عظمات في السلسة الفقرية.. البقارة قاعدين يقولوا عليهو (الخوران)...و الخصر نفسو قاعدين يقولوا عليهو (مرج الحقو)..و الحقو ياهو القاش (الحزام) الواحد ده..!! اخرعظمة في السلسلة الفقرية اسفل تسمى (العـُران/ العوران)..و دي بتختلف شوية من فكرة اهلنا ناس الجزيرة..خصوصا منطقة سنار و بحر ازرق.. فسمعت مقولة عن الشيخ فرح و تكتوك..جاتو بتو شاكية باكية من زوجها..و لحق بيها الزوج عشان يرجعها.. و شرحت لأبوها الشيخ مشكلتها شنو بالضبط.. فقال الشيخ يوصى الزوج ..و قال ليهو:
املأ ليها مصرانا.. و حك ليها عــُرانا.. و شوفها كن تطرانا..
و طبعا كلام الشيخ حكمة..و لو بحثنا عن مقابل ليهو في لغة العلم اليوم ياهو قولهم.. Satisfying all human needs:Food, Shelter, and Love
و نعتذر لأخونا محمد و ضيوفه عن التخريمات (نظام سوينا للدرب كليوات)..!!!
و دمتم... كبر
Post: #31 Title: Re: سؤال جادي: ( ول أبا ) يعني شنو؟ Author: Kabar Date: 04-10-2013, 06:33 AM Parent: #29
كتب ضو البيت:
Quote: دول جكوا الريشة بتن ما جوا
ولد ابا ، ادرع نمر البار ، مالك علي يا ولضمي؟.. ياااخ.. اخوك في صنقور التراب.. حابسين الدمعة بالصنــــقاع..!!!!
الصديقات و الأصدقاء.. من يتابع هذا الخيط.. عبارة اخونا ضو البيت.. وردت في اغنية شايعة.. يتخيل لي ناس كتيرة في السودان بتكون سمعت بيها..و هي غنية (العجكو)..و كتبنا عنها من قبل في هذا المنتدي.. الأغنية تم اداؤها بكم زاوية شوف..و اخترنا هنا نموذج ثناء النغم.. لحاجتين اتنين: اول بالتبادي.. ثنائي النغم.. ده كانن تلاتة..الظاهرة في الفيديو (الأستاذة زينب خليفة /الطويلة ، و الأستاذة خديجة عمر /القصيرة.. ان لم تخني الذاكرة).. اها التالتة كانت الأستاذة امبلينا السنوسي..و الناس السمعت الملحمة بتاعة هاشم صديق القام غناها الباشكاتب.. دي الزولة البتقول (و كان القرشي شهيدنا الأول).. ياخي صوت سماوي بي شكل..و لغاية الليلة امبلينا صوتها ما اتغير.. زيها و زي ثنائي النغم..
تاني التبادي.. الغنية هي غنية ساوريت ..و هو المردوم الذي نعرفه اليوم..و غناها الفنان ابراهيم موسى ابا..و برضك في الألفية التالتة قامن بادائها ثنائي شباب (غايتو كل المتذكرو ان ابوهم على مهدي)..و بنات على مهدي ادن الفيرشن القريب للفيرشن الأصلي..و فيهو تقارب مع فيرشن ابراهيم موسى ابا.. (طبعا بنات ابا ثنائي النغم.. قامن ادخلنا التمدين في الغنية)..
من المفارقات يا ضو البيت.. اهلك المسيرية.. لمن تقول ليهم : عندي الجهال ، ديل ماسكين قلم ، ديل راكبين طيار..! طوالي بيقولوا ليك الماسكين قلم دي قاصدين بيها فضل الله برمه ( أي و اله الواحد ده) ، و الراكبين طيار قاصدينا بيهو (اللواء فضل الله حماد ، نائب حاكم اقليم كردفان زمان..)..!!!
(جكوا الريشة بتن ما جوا).. يا شباب ، الفكرة قاصدين بيها الجندية.. لمن كانت في حاجة اسمها (قوات الشعب المسلحة).. و كن لقينا فرقة بنجي راجعين..لكن الإ اخونا محمد صاحب البوست يدينا الإذن..!
و دمتم.. كبر
Post: #33 Title: Re: سؤال جادي: ( ول أبا ) يعني شنو؟ Author: علي عبدالوهاب عثمان Date: 04-10-2013, 07:34 AM Parent: #31
شكراً للرجل الجميل صاحب البوست محمد جلال حقيقة إثراء للوجدان السوداني
تعظيم سلام للرائع كبر .. حرام ايها الرائع ان تسكب مدادك هنا وهناك .. ما هذا الجمال .. ما هذا السرد الرائع .. لم أكن اتوقع أنك ان تهتم بما نكتب .. لقد اتيت بتلك الكلمات لشاعر محلي يمجد واحدة اسمها ( ليلى) فتاة ناهدة ترمز للخير والنماء وليس للغزل الحسي والتهتك .. هكذا استاذي كبر قيمنا في الهوامش البعيدة .. لأن الدولة سلطتها محدودة في المدن وقوانينها قاصرة على التجمعات المدينية .. فلأن الطبيعة تكره الفراغ فقد تمددت الانسانية والموروث الاخلاقي والشجاعة والقيم لتحل محل القوانين الوضعية وتصنع مجتمعات تعرف العيب ولها وما عليها في حدود منظومات قبيلة ووعي تناسلي طبيعي .. يا سلام يا كبر .. كنا نجهل كل هذا الجمال اللغوي والانساني وكل هذه المفردات الحميمية والمحفزة للرجولة والشجاعة والكرم .. الصورة المعروفة عن أهلنا الشمال عن البقارة أنهم فرسان صعبي المراس ولديهم العزة ومنعة وفخر الانتماء .. وقد تجلى ذلك من خلال الثورة المهدية وقادة المهدية .. ولكن اخي كبر بعض مفردات اللغة هي التي وقفت دون التعمق في الغور الثقافي والاجتماعي والبحث .. وكانت مبادرة اهل كردفان في غزو السودان بالقفاز الناعم مستفيدين من تجربة اخواننا الشوايقة .. فكانت لهم هجمة ناعمة سلاحها الاصوات الناعمة والجميلة والكلمات التي لها صدى وعمق غائر خاصة الفنان ابراهيم موسى أبا .. وعبدالرحمن عبدالله وعبدالقادر سالم .. الخ فكنا في السبيعنيات نحي حفلاتنا وليالينا بتلك الالحان ونتغنى للحبيبة بمفردات كردفانية ( تأثير الفن والتراث اثره لا ينضب ولا ينفي ) ليت الناس وضعوا السلاح ولجأوا الى القفاز الناعم ... كردفان في القلب لأن ما أرساه هؤلاء في القلوب من الحب والجمال سرى على كل الغرب وليس على كردفان وحده .. ثم جاءت موجة كسلا مع مجموعة التاج مكي .. استاذي كبر في حضرتك أتردد كثيراًُ في الكتابة وربما اصابني نوع من الارتباك .. واصل في هذا المشوار لنعرف المزيد عن أهلنا هناك ..
والشكر الاكبر لصاحب البوست ..
Post: #30 Title: Re: سؤال جادي: ( ول أبا ) يعني شنو؟ Author: جابر برمه Date: 04-10-2013, 06:18 AM Parent: #28
ول أبا كبر حبابك كنت عايز أفزع ( بتن زول بقطع دربك درندل في هذا الموضوع مافي ) وتسلم و الله و الشكر موصول لصاحب البوست
Post: #32 Title: Re: سؤال جادي: ( ول أبا ) يعني شنو؟ Author: رحمه فضل المولى عجك Date: 04-10-2013, 07:10 AM Parent: #30
ولد ابوك كبار الرجل الموسوعه الله يطول عمرك والله انت كما يقولون اهلنا دا مشابنا النضوى به وقد منخرنا اللننفس به يا ولد ابوك بماذا نفسر لفظ وليد عند دار حمر والمعاليه الذين يشتركون مع البقاره فى عدم اظهار حرف الدال وشكرا
Post: #34 Title: Re: سؤال جادي: ( ول أبا ) يعني شنو؟ Author: علي عبدالوهاب عثمان Date: 04-10-2013, 07:56 AM Parent: #32
شكراً للرجل الجميل صاحب البوست محمد جلال حقيقة إثراء للوجدان السوداني
تعظيم سلام للرائع كبر .. حرام ايها الرائع ان تسكب مدادك هنا وهناك .. ما هذا الجمال .. ما هذا السرد الرائع .. لم أكن اتوقع أنك ان تهتم بما نكتب .. لقد اتيت بتلك الكلمات لشاعر محلي يمجد واحدة اسمها ( ليلى) فتاة ناهدة ترمز للخير والنماء وليس للغزل الحسي والتهتك .. هكذا استاذي كبر قيمنا في الهوامش البعيدة .. لأن الدولة سلطتها محدودة في المدن وقوانينها قاصرة على التجمعات المدينية .. فلأن الطبيعة تكره الفراغ فقد تمددت الانسانية والموروث الاخلاقي والشجاعة والقيم لتحل محل القوانين الوضعية وتصنع مجتمعات تعرف العيب ولها وما عليها في حدود منظومات قبيلة ووعي تناسلي طبيعي .. يا سلام يا كبر .. كنا نجهل كل هذا الجمال اللغوي والانساني وكل هذه المفردات الحميمية والمحفزة للرجولة والشجاعة والكرم .. الصورة المعروفة عن أهلنا الشمال عن البقارة أنهم فرسان صعبي المراس ولديهم العزة ومنعة وفخر الانتماء .. وقد تجلى ذلك من خلال الثورة المهدية وقادة المهدية .. ولكن اخي كبر بعض مفردات اللغة هي التي وقفت دون التعمق في الغور الثقافي والاجتماعي والبحث .. وكانت مبادرة اهل كردفان في غزو السودان بالقفاز الناعم مستفيدين من تجربة اخواننا الشوايقة .. فكانت لهم هجمة ناعمة سلاحها الاصوات الناعمة والجميلة والكلمات التي لها صدى وعمق غائر خاصة الفنان ابراهيم موسى أبا .. وعبدالرحمن عبدالله وعبدالقادر سالم .. الخ فكنا في السبيعنيات نحي حفلاتنا وليالينا بتلك الالحان ونتغنى للحبيبة بمفردات كردفانية ( تأثير الفن والتراث اثره لا ينضب ولا ينفي ) ليت الناس وضعوا السلاح ولجأوا الى القفاز الناعم ... كردفان في القلب لأن ما أرساه هؤلاء في القلوب من الحب والجمال سرى على كل الغرب وليس على كردفان وحده .. ثم جاءت موجة كسلا مع مجموعة التاج مكي .. استاذي كبر في حضرتك أتردد كثيراًُ في الكتابة وربما اصابني نوع من الارتباك .. واصل في هذا المشوار لنعرف المزيد عن أهلنا هناك ..
والشكر الاكبر لصاحب البوست ..
Post: #35 Title: Re: سؤال جادي: ( ول أبا ) يعني شنو؟ Author: Kabar Date: 04-10-2013, 07:59 AM Parent: #32
يارحمة.. و الله ..سارح لي في حاجات اسكت ساكت خليها... و كنت ما ناوي ارجع هنا ، الإ بعد ما نسمع رأي اخونا محمد صاحب البوست...و قام اخونا على عبد الوهاب مرقنا في ام طرقا عراض..و كذا جابر بمة... !! المهم يا رحمة.. تصدق أو لا تصدق.. لمن امتحنت الشهادة السودانية ( 1986 أوى1987 ..ياخي و الله نسيت عدييل..!) كان في حاجة اسمها (التصغير)... في مقرر النحو..و كنت التصغير ده قاعدعد افهمو عن طريقة لهجة البقارة في الخلا.. ياخي ديل صغروا.. ليك كلمة (زويل)..زي الترتيب..!! و هي واحدة من الحاجات الكنت ناوي الفت ليها نظر الناس هنا... حكاية التصغير في ثقافة البقارة... و هسع ده أي زول ممتحن في التصغير.. ممكن اقول ليهو بكل ثقة.. امشي اقعد في مجتمعات البقارة .. سبعة ايام.. و ح تفهم التصغير ده زي ما هو.. ما تقول لي على الجارم..و منو كده ما عارف...!!!!
و للفائدة العامة.. الثقافات السودانية .. هي الوحيدة التي نسبت الى اسم الجلالة (الله).. لامن حيرت ليك مواهيم عرب الجزيرة... و طريقة النسب هي ( عبد اللاب..)..!!! المهم... سنعود ، لكن بعد اذن اخونا صاحب البوست...!!! خارج النص.. صديقنا محمد قرشي عباس: الفيك انعرفت يا قريبي... لكن كل ما نستطيع ان نقوله لك ، طبعا رغم انف النخبة السودانية الوهم ، كنا متمنين نلاقيك..و نحدد حكاية (ترسوا البحر خرسان).. و منها نعبر البحر لي جزيرة توتي... لكن الحصل يا محمد.. لم نلتقك.. لكن الزمان خلق لينا كبري..و قطعنا البحر لغاية توتي... شربنا لينا قهوة هناك..و لمن صاحبك ود البتولا قام ركب جن كده ما عارف قاطعو من وين.. قلنا ليهو مشينا توتي .. بعد ما تنبأ بها البعض في حقنا قبال عشرة سنين...!!!! و دمتم.. كبر
Post: #36 Title: Re: سؤال جادي: ( ول أبا ) يعني شنو؟ Author: رحمه فضل المولى عجك Date: 04-10-2013, 08:15 AM Parent: #35
شكرا ولد ابوك كبار انت بتغرف من بحر . ولكن بمناسبة التصغير دى الصابونه عند البقاره تصغيرها برواى وقول لهم هذا ما سمع شاذا كما امراة تجمع على نساء بتا شنو . انا ممنونك يا ولد ابوك