Post: #1 Title: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:32 PM
وجّه خادم الحرمين الشريفين الملك عبدالله بن عبدالعزيز، وزارتي العمل والداخلية بمنح المخالفين لقوانين العمل مهلة ثلاثة أشهر لتصحيح أوضاعهم في البلاد على أن يُطبّق النظام بحق المخالفين بعد المهلة المقرّرة.
Post: #2 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:34 PM Parent: #1
صاحب التوجيه عدة تعديلات على قوانين العمل .. أبرزها منح الوافد فرصة نقل كفالته في أي وقت بعد أن كان محددا بعامين من تاريخ دخوله المملكة!
Post: #3 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:36 PM Parent: #2
رُبما تكون هذه المهلة هي الأخيرة للمخالفين من أجل تصحيح أوضاعهم وبعدها ستكون الحملات كما كان في الأيام السابقة .. لا تفاهم .. أقطع أرفع سفّر
النجيضة: أي واحد يخلص أمورو .. القصة جاطت جد!
Post: #4 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:37 PM Parent: #3
كما نرحّب بجميع طالبي الإقامة الحرّة من السودان الشقيق
Post: #7 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:43 PM Parent: #5
ود الباوقة يا حبيب .. غايتو مع سيدكـ الرئيس .. تلاتة قرون ما أظن!!
Post: #6 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد إبراهيم علي Date: 04-06-2013, 05:41 PM Parent: #4
بركة في الامر الملكي المرقك ده :)
اخبار اللوتري شنو الواحد مع انو وضعو نظامي لكن الناس دي مرات ما بتفرز وبصراحة توقيف الشميسي ما بنقدر عليهو
Post: #9 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:44 PM Parent: #6
يا هندسة .. أخوكـ كان مزنوووووووووووق .. ومخالف في حالتين صريحتين يوميا!! الأظرف قزاز العربية فيهو ستيكرين لجهتي عمل مختلفة .. والإقامة في طرف تالت!!
Post: #16 Title: Re: أمر ملكي سعودي بمنح المقيمين 3 أشهر لتصحيح الأوضاع Author: اسامة عثمان السيد Date: 04-06-2013, 05:54 PM Parent: #9
Quote: الأظرف قزاز العربية فيهو ستيكرين لجهتي عمل مختلفة .. والإقامة في طرف تالت!!
هههههههههههههههه والله ضحكتني
Post: #34 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 09:23 PM Parent: #16
إن شاء الله دايم يا أسامة .. المشكلة بعد التلاتة شهور دي نحن ح نبكي عدييييل!!
Post: #110 Title: Re: أمر ملكي سعودي بمنح المقيمين 3 أشهر لتصحيح الأوضاع Author: نافع الكوماوي Date: 04-08-2013, 09:03 AM Parent: #9
Quote: الأظرف قزاز العربية فيهو ستيكرين لجهتي عمل مختلفة .. والإقامة في طرف تالت!!
ياخي انت كلك مخالفات ههههه
للوقت داك الله كريم
Post: #10 Title: Re: أمر ملكي سعودي بمنح المقيمين 3 أشهر لتصحيح الأوضاع Author: osman righeem Date: 04-06-2013, 05:44 PM Parent: #6
حمودي يا عسل المعم انت وضعك كيف؟؟
Post: #11 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:45 PM Parent: #10
أبو رغيم يا أعسل .. أخوكـ مخالف تااااب .. 2*1 كمان!!
Post: #8 Title: Re: أمر ملكي سعودي بمنح المقيمين 3 أشهر لتصحيح الأوضاع Author: Dr. Ahmed Amin Date: 04-06-2013, 05:43 PM Parent: #3
ما غريبة على (ابو متعب) .. امد الله في عمره ..
شكرا ود الصايم .. وربنا ييسر امور الكل ...
Post: #12 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:46 PM Parent: #8
تحياتي د. أحمد .. ويا ريت الناس تستغل الفرصة دي .. وأنا أول واحد!!
Post: #13 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-06-2013, 05:48 PM Parent: #12
وبالمناسبة دي الواحد يكلم بورضاب الخرتوم من حسي .. أبقوا جاهزين للاستقبال وبالمرّة كمان شوفو لينا شغل يكون خفيييييييف ومرتبو ماااااااااكن!! أيوا ياخ .. معقولة بعد عشرين سنة غربة تاني نجي نبقى في جرجرة!!
مفروض يدوكـ عليهو أربعين جلدة نافذة!! ياخ واحد عندو إمكانية يمشي قطر يقوم يجي الرياظ!!
Post: #20 Title: Re: أمر ملكي سعودي بمنح المقيمين 3 أشهر لتصحيح الأوضاع Author: أيمن التوم حسن Date: 04-06-2013, 06:06 PM Parent: #15
Quote: لأظرف قزاز العربية فيهو ستيكرين لجهتي عمل مختلفة .. والإقامة في طرف تالت!!
مخالف وعينك قويه كمان ؟؟ الله شافك ساكت مع البوابات الكتيره دى
Post: #39 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 05:47 AM Parent: #20
Quote: مخالف وعينك قويه كمان ؟؟ الله شافك ساكت مع البوابات الكتيره دى
أيمن يا هندسة .. أب سن بضحكـ على أب سنين!! هسي بتكون لابد من الاستيكر بتاع الهيئة أها لمن يخلصوا البوابة الإلكترونية .. إلا تطير!!
Post: #19 Title: Re: أمر ملكي سعودي بمنح المقيمين 3 أشهر لتصحيح الأوضاع Author: عمر نملة Date: 04-06-2013, 05:59 PM Parent: #14
سلام
Quote: وبالمناسبة دي الواحد يكلم بورضاب الخرتوم من حسي .. أبقوا جاهزين للاستقبال
ود الصائم حبيب الملايين. والله عجبني موقفك في بوست مريض مدني الله يرحمه. وكنت مصر للنهايه انك تقدم الخير. والخرطوم بلدنا بس الوضع اصعب وامر. انت مكانك معانا هنا(أوربا) وقول خير وانشاء الله تكون معانا.
Post: #22 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد إبراهيم علي Date: 04-06-2013, 06:22 PM Parent: #19
Quote: خشمكن زيزفوني
زيزفوني شنو الله يهديك يا وضاحة ود الصايم ده باني عمارتين في الخرطوم وسايق ليهو كاديلاك اسكاليد 2012 لكن تقولي شنو طمع دنيا شوفي طريقة لاخوك وما عندي ليك ولا 25 ريال :)
غايتو ناس ابومتعب ديل الله مرقنا منهم قبل 9 سنين .. الله لا عادها ايام .. غايتو الله يمرقك منهم بى ال 2*1 بتاعتك دى لانو لو لمو فيك ضحكتك دى بتفارقا فراق الطريفى لى جملو معانا بى هنا ... لانو وظيفتك الدايرا دى لا يمكن الوصول اليها حالياً ..
اتوكل ودز لى وضاحة قبل يبقى ليك بمبى
ارتيقا
Post: #40 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 05:58 AM Parent: #25
Quote: انت مكانك معانا هنا(أوربا) وقول خير وانشاء الله تكون معانا
أنجض عبارة مرّت على البورض من سنوات طويلة!!
_ بالنسبة لمريض مدني ـ رحمه الله غايتو دي مأساة واختبار لإنسانيتنا .. يمكن نكون جبنا فيهو تقدير (جيّد) لكن في ناس سقطت فيهو عديل! جاني إحباط بالجد من قصة التعقيدات الخشت في الموضوع دا!!
التحية للجميع كان هنالك اخبار وشائعات كثيرة تداولتها الجاليات المقيمة في السعودية من جراء تطبيق الاجراءات الاخيرة التي اربكت سوق العمل والعمال وبعث الهلع في نفوس كثير من المقيمين منها ما قيل ان ارتكاب جرائم قتل وخلافه وليست هنالك جهة اكدت أونفت صحة ما يقال من شائعات منها ما تم نشره في صحف ودوريات ومواقع خارج المملكة ..
Post: #41 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:02 AM Parent: #25
Quote: ود الصايم ده باني عمارتين في الخرطوم وسايق ليهو كاديلاك اسكاليد 2012
يا هندسة .. العمارتين خلّهن .. الاسكاليد دي شنو؟
تعرف يا معلم .. يمكن نحن الاتنين متفقين في قصة السودان قرّب! أها أنا واحد من الناس بكون قافل عديييل على أي قرار يرجع الناس دي فجأة كـدا ونبقى زي مغتربين الكويت الزمان .. عشان تقطع الأمل نهائي!!
ياخ لمتين يا هندسة! 20 سنة بالتمام والكمال غربة وكل سنة نمطّق نفسنا بأسبوع أسبوعين وسط أهلنا الحلوين؟!
النجيضة: أخلّص ديوني وأعمل مصدر دخل ثابت! بمش براااي لمكتب العمل وأديهم إقامتي
Post: #56 Title: Re: أمر ملكي سعودي بمنح المقيمين 3 أشهر لتصحيح الأوضاع Author: فتح العليم محمد أبوالقاسم Date: 04-07-2013, 06:36 AM Parent: #41
سلام ودالصايم والله فعلا لمتين ، احنا قلنا الروب غربة طالت سنين وسنين . وتانى وضاحة عاوز ناس السعودية يبداء صفحة جديد في الاغتراب ، قليها كفايةومليون كفاية على البشر دي . والان نشوف ود الباوقة حا اعمل شنو في المرحلة القادمة .
Post: #65 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:09 AM Parent: #56
فتح العليم يا عمكـ .. شايفكـ استثمرت فترة تصحيح الأوضاع دي وجيت متلّب في نص البوست!!
السرا يا معلم .. صف سرااا
Quote: والان نشوف ود الباوقة حا اعمل شنو في المرحلة القادمة
لا معلم .. كـدا بتدقس ود الباوقة بي عمارتو أم مكيفات سبلت ومرزعة بتري .. وتوكيل الدرداقات!! ويحمد سيدو ويشكر في رئيسو .. إت قايلو هيّن!!
Post: #66 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد جلال عبدالله Date: 04-07-2013, 07:13 AM Parent: #41
Quote: وجّه خادم الحرمين الشريفين الملك عبدالله بن عبدالعزيز، وزارتي العمل والداخلية بمنح المخالفين لقوانين العمل مهلة ثلاثة أشهر لتصحيح أوضاعهم في البلاد على أن يُطبّق النظام بحق المخالفين بعد المهلة المقرّرة.
أخيرا عرفنا سر الضحكة الكبيرة دي :)
Post: #85 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 08:39 AM Parent: #66
Quote: أخيرا عرفنا سر الضحكة الكبيرة دي :)
دي اسمها الضحكـ شــرطنا يا مطوع!!
Post: #78 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد ابو شيبة Date: 04-07-2013, 07:49 AM Parent: #41
Quote: تحياتي د. أحمد .. ويا ريت الناس تستغل الفرصة دي .. وأنا أول واحد!!
انقل انقل يا ود الصايم ... ان شاء الله علي كفيلة
Post: #86 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 08:39 AM Parent: #78
Quote: انقل انقل يا ود الصايم ... ان شاء الله علي كفيلة
هيااا أب شيبة .. نبقى في (كفيلة) بره البيت (وكفيلة) جوه البيت! ياخ دي حالة أخير منها العرس!!
Post: #95 Title: Re: أمر ملكي سعودي بمنح المقيمين 3 أشهر لتصحيح الأوضاع Author: علاء الدين حيموره Date: 04-07-2013, 10:57 AM Parent: #41
انتو قاعدين 3 شهور ؟؟؟ تعالو ياخ
Post: #96 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 11:14 AM Parent: #95
هيااا علاء .. مالكـ منزغم في نص الصف!!
Quote: انتو قاعدين 3 شهور ؟؟؟ تعالو ياخ
هع هع هع هع هع تلاتة شهور بس .. يا معلم ما سمعت قصة قريبا قالوا ليهو ليـ 40 سنة هنا قاعد لمتين؟ قال ليهم لحدي الملكـ يقول دا آآخر ريـال عندي نقسم معاهو النص بالنص ونبقى راجعين!!
Post: #109 Title: Re: أمر ملكي سعودي بمنح المقيمين 3 أشهر لتصحيح الأوضاع Author: abuguta Date: 04-08-2013, 08:46 AM Parent: #41
Quote: تعرف يا معلم .. يمكن نحن الاتنين متفقين في قصة السودان قرّب! أها أنا واحد من الناس بكون قافل عديييل على أي قرار يرجع الناس دي فجأة كـدا ونبقى زي مغتربين الكويت الزمان .. عشان تقطع الأمل نهائي!!
اود الصائم انت براك المزنوق ,,وزير العمل برضو كان زيك منتظر قرار زى دا
خلاص ود الباوقة قال ليك بعمل ليك واسطة بهناك زميلى فى التصالات,,اعمامو والبكونو خلف البشير فى نفاشا واى مفاوضات خارجية ,,الولد كان مروق,مرة (مودا) ومرة( موفا) يعنى عريتو فيها استكرين زيك كدا,,مهندس مشاريع,, جاءت امو زيارة,,قالت ليه اعمامك يتوسطو للغرباء الماعندهم زول فى الحكومة وانت قاعد فى الغربة دى,,مشى اشتغل مع ناس الجهاد الاكترونى,,اها المظاهرات ذاتها وقفت,,,اها زولنا دا بقى لافى ساى,,شغال شغلة مو مقتنع بيها دحين شوف ليك واسطة زى دى,,حتى لو كانن النسوان المكان الكانن فى نيفاشا بنقلن الملفات,,ارجع ارشيف سجيمان
Post: #113 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:08 AM Parent: #109
هههههههههه@ أبقوتة! في حسن من كـدا ياخ .. اشتغل أي حاجة المهم يكون فيها قروش ماكنة! ثم .. مالو ياخ .. نمشي مع الوحد دا ونجي مع دا ونتفاوض مع دا بدون ما نعرف بنتفاوض في شنو ولشنو وعلى حساب منو زاتو!!
هوي .. كلّم زولكـ دا يشوف لينا طريقة!!
Post: #42 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:05 AM Parent: #25
Quote: غايتو ناس ابومتعب ديل الله مرقنا منهم قبل 9 سنين .. الله لا عادها ايام ..
أهنيكـ والله يا أرتيقا .. أهني سيدي الرئيس زاتو!!
يمكن إنت قدرت تتخارج سريع .. قبل ما تولف على البلد! لكن نحن نقول شنو القاعدين هنا أكتر مما قعدنا في بلدنا بسنوات؟ ياخ بأبسط الحسابات .. لو كل سنة بتمشي شهر معناها في عشرين سنة بتكون قعدت أقـل من سنتين في بلدكـ ..!!
واخيرا الجماعة جايين والله شوية كدة محل تخط رجلك ما تلقى
والدولار راح فى ستين داهية
حاول تتخلص من الدولارات المعاك وبطل تشاؤم
Post: #26 Title: Re: أمر ملكي سعودي بمنح المقيمين 3 أشهر لتصحيح الأوضاع Author: عبداللطيف شريف على Date: 04-06-2013, 06:55 PM Parent: #23
ود الصائم تحياتى وتقديرى
يشكر خادم الحرمين على مكرمته ...
وطويل العمر لو سمح لينا بالتجنس اكان كمل الناقصة ...
الجماعة فى 23 وعشرين سنة كسروا كل جميل وفى الثلاثة شهور سوف يحرقوا ما تبقى من وطن ...
يا اخى ديل عندهم تفاؤل غريب من وين بيجيبوا الكلام الفارغ دة ...
الواحد عامل فيها قيادى وما اكل السمكة ومقطع ذيلها , وكأن السودان حق ابوهم وحدهم ...
ملعون ابوك بلدى يقدل فيها ورل ..!
Post: #44 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:09 AM Parent: #26
Quote: الهجمة الاستثمارية من كل انحاء العالم واخيرا الجماعة جايين والله شوية كدة محل تخط رجلك ما تلقى
عمنا السماني .. الصحة والأخبار ياخ! ثم .. إت قايلني من بورضاب كـندا؟ ياخ الخرتوم دي لو بالغت منها بيكون ستة شهور! لكن فعلا كل مرّة الواحد بتهجم ويتقهّم .. ويعمل خروج ويتوكل!!
اللهم فرّج علينا!!
Post: #45 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:11 AM Parent: #26
Quote: وطويل العمر لو سمح لينا بالتجنس اكان كمل الناقصة ...
هههههههههههههههههههههه@ عبداللطيف! يا زول ما تبالغ كمان .. جنسية عديل كـدا!!
قبل فترة بسمع في الرادي واحد محامي عامل غاغة! قال الأجنبي لو كمّل 20 سنة من حقوا يحصل على إقامة دائمة!!
أها المذيع قال ليهو كيف الإجراء؟ قد يشرح وتمشي المحكمة الابتدائية وما عارف هيئة التحقيق والادعاء .. وشوية خرّم على الجوازات!
طوالي اتذكرت قصة السكران الوصفوا ليهو محل المواصلات!! عارفا؟
Post: #24 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عوض السيد Date: 04-06-2013, 06:31 PM Parent: #19
.. سلامات عوافي
خبر جيد لتوفيق الاوضاع للمخالفين
Quote: الأظرف قزاز العربية فيهو ستيكرين لجهتي عمل مختلفة .. والإقامة في طرف تالت!!
بس مرقت كيف ياودالصائم من الناس ديل
مع ودي واحترامي
Post: #27 Title: Re: أمر ملكي سعودي بمنح المقيمين 3 أشهر لتصحيح الأوضاع Author: حمد عبد الغفار عمر Date: 04-06-2013, 07:00 PM Parent: #24
أحب أبو متعب وآل سعود من طرف
ياخ الواحد يتزاوغ زي السارق ليهو صراف بنك مع إني نظامي 70 %
بس أصفر أحمر أخضر زي شفق المغارب دي مجهجهة باكاتنا في التجديد
Post: #47 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:14 AM Parent: #27
Quote: بس مرقت كيف ياودالصائم من الناس ديل
غايتو استخدمنا كلّ المراقات الممكنة!!
تعرف يا أبو حميد .. السعودية فيها سر عجيب اسمو (المرأة)! عندكـ أي مشكلة في الإقامة أو مخالفة في العربية خت المرة على اليمين وانطلق!!
لو المرة قعدت تخرخر من المشاوير سوق الشفّع .. منها فسحة ومنها زوغـة!!
Post: #48 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:15 AM Parent: #27
Quote: ياخ الواحد يتزاوغ زي السارق ليهو صراف بنك مع إني نظامي 70 %
ههههههههههه@ حمد!! قلت لي نظامي 70 % .. كلامكـ دا قولو لزول ما عندو مقص!!
أجري يا معلم .. أجرررررررررىىىىىي ديل بقطعوا بعدين يشوفو نظاميتكـ!!
اين الحل لوانت شغال في مؤسسة مصنفة بالاحمر وما على كفالتها ماذا تفعل! لا يمكنك نقل كفالتك عليها ويجب ان تترك وظيفتك للبحث عن عمل لدى كفيل مصنف بالاخضر الحل هو العاء النطاقت طالما يتم تحصيل مبلغ 2400 ريال سنويا عن العمالة الاجنبية مهلة 3 اشهر هى وورطة لسبب بسيط مشكلة مستعصية لعدة سنوات لا يمكن حلها في ثلاث اشهر حسب قانون العرض والطلب وعنصر الوقت الضاغط ستكون المرتبات ضعيفة بسبب قلة الوظائف في المؤسسات المصنفة بالاخضر وهى قليلة مقارنة بالتى هى مصنفة بالاحمر همذا يقول المنطق جنى
حياك الله ود الصايم الامر الملكي كان متوقعاً لمحو الآثار السالبة لقرار وزير العمل الذي اساء لسمعة المملكة على صعيد حقوق الانسان واساء لعلاقات جوار مع دول الروابط معها مهمة
Post: #50 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:22 AM Parent: #31
Quote: دة شرك عديل هههههههههههههه
حيّا الله ريّسنا بنواحي المدينة المنورة!! شركـ ساي .. يمين مشرّكـ وبتكشم عديل كـدا!!
لقد هرمنا ياخ ونحن بنقول للعالم دي أبعدوا من السعودية!!
Post: #51 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:26 AM Parent: #31
Quote: هكذا يقول المنطق
تعرف يا جني .. قصة (المنطق) دي الوحيدة الماف في البلد دي كلو كلو!! كـدي أديني حاجة واحدة منطقية في الإجراءات المتلتلة ضد الأجانب؟!
غايتو أنا شايف الحل يلغو ووزارة العمل
النجيضة .. طالما القصة جابت ليها تصحيح أوضاع .. المفترض التصحيح يبدأ من الصفر عديل .. أول حاجة أقفل باب الاستقدام شوف التخصصات المحتاجة ليها البلد فعليا .. ألغي نظام الكفالة وخلّي الدولة هي الأساس كما الحال في الإمارات أو غيرها ثم بعدين تعال شوف المخالف منو والنظامي منو!!!
لكن وينو المنطق؟
Post: #54 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:28 AM Parent: #31
Quote: الامر الملكي كان متوقعاً لمحو الآثار السالبة لقرار وزير العمل الذي اساء لسمعة المملكة على صعيد حقوق الانسان واساء لعلاقات جوار مع دول الروابط معها مهمة
حبيبنا الشامي .. غايتو بقت علينا من جاه (الضغوط) نلوكـ!!! معقولة ياخ كلّ مرة الواحد يكون تحت رحمة قرار ارتجالي!!
اللهم خارجنا
Post: #32 Title: Re: أمر ملكي سعودي بمنح المقيمين 3 أشهر لتصحيح الأوضاع Author: احمد عمر محمد Date: 04-06-2013, 08:56 PM Parent: #29
للاسف القرار سوف لا يخدم من يريد ان يحسن موقفه او وضعه لان في هذه الفترة سيقوم الكفلاء باستغلال العمالة النادرة والخبرة الممتازة بابخس الاثمان خاصة في المجالات العملية الطبية والهندسية فمن يطلب اجر بقيمة 10 الف ريال يسعرض عليه فقط 3 الف ريال
الاخت وضاحة بالغتي لمن حسبتيها بالراس فالراس للقطيع من البهائم بينما البشر بالافراد والاشخاص
Post: #33 Title: Re: أمر ملكي سعودي بمنح المقيمين 3 أشهر لتصحيح الأوضاع Author: أنور سيد ابراهيم Date: 04-06-2013, 09:12 PM Parent: #32
يــا عــمــك ..
ازييييييك يا ود الصايم ..
وينك مطول الغيبة
مشتاقين عدييييييل
بعدين الراجل قال شهرين
والزول التانى داك قال .. السعودى لو شغّلوهو بـ 1500 ر يقبل الشغل .. لاننا بنشيل الـ 2500 ريال
Post: #57 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:42 AM Parent: #33
Quote: للاسف القرار سوف لا يخدم من يريد ان يحسن موقفه او وضعه لان في هذه الفترة سيقوم الكفلاء باستغلال العمالة النادرة والخبرة الممتازة بابخس الاثمان خاصة في المجالات العملية الطبية والهندسية فمن يطلب اجر بقيمة 10 الف ريال يسعرض عليه فقط 3 الف ريال
كلام نجيض يا أحمد .. والأنجض منها إنو الكفلا زاتم بقو خايفين على أوضاعهم وما عارفين القرارات الممكن تصدر لقدام ح تكون شنو!!
(أغلب) المغتربين حاليا لا يعملون لدى الكفلاء وديل بشيلوا عن الكفيل أغلب المصروفات المالية .. خاصة الـ 2600 ريأل! أها كل الالتزامات دي مفروض تتحول للكفيل لما تبقى معاهو رسمي! عاد السعودي دايرنو يقبل بالخسارة كيفن!!
Post: #58 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:48 AM Parent: #33
Quote: والزول التانى داك قال .. السعودى لو شغّلوهو بـ 1500 ر يقبل الشغل .. لاننا بنشيل الـ 2500 ريال من ( الاجنبى ) وبندّيها ليهو
القول ما قاله الحكيم ذات مرة: ليس لها حلّ إلا الرحيل!!
أبو النور يا حبيبنا .. العصــرة حاصلة والله .. والأشـواق بالأكتر والله! أما فيما يختص بالعريفي .. فمالو هو كمان؟
كلامو نجيض والله!!
Post: #35 Title: Re: أمر ملكي سعودي بمنح المقيمين 3 أشهر لتصحيح الأوضاع Author: Mohammed Abuzaid Date: 04-06-2013, 09:25 PM Parent: #29
Quote: مشكلة مستعصية لعدة سنوات لا يمكن حلها في ثلاث اشهر
تسلم يا جني
الإصرار على نظام الكفيل هو المشكلة السعودية قادرة على إلغاء نظام الكفيل . . . وإدارة دفة العمل والعمالة بصورة تصحح هذا الهرج والمرج الحاصل من الكفلاء عموما. والعامل هو من يدفع التمن في النهاية
كل دولة تحرص على مصلحة مواطنيها . . . إلّانا
تحياتي للجميع
Post: #36 Title: Re: أمر ملكي سعودي بمنح المقيمين 3 أشهر لتصحيح الأوضاع Author: Dr. Ahmed Amin Date: 04-06-2013, 09:31 PM Parent: #35
شوف يا ود الصايم ماذا قال طيب الذكر الشيخ زايد بن سلطان آل نهيان
الف رحمة ونور تنزل عليك ايها الرجل الصالح ..
Post: #43 Title: Re: أمر ملكي سعودي بمنح المقيمين 3 أشهر لتصحيح الأوضاع Author: زول ساكت Date: 04-07-2013, 06:05 AM Parent: #36
قرار متوقع مع الربكة الكبيرة الحصلت مع الحملات لكن من يستطيع الاستفادة منه ستكون اعداد قليلة نظراً لوجود قوانين اخرى تصعب نقل الكفالة مثل نسبة السعودة والنطاقات وتعديل المهن الحمد لله نحنا نظاميين لكن اكتشفنا كمية من المعارف مهولة وصلهم رأس السوط وياريت يكون الجميع جادين في الاستفادة من هذه الفرصة وبعدها لن يكون هنالك عذر
Post: #46 Title: Re: أمر ملكي سعودي بمنح المقيمين 3 أشهر لتصحيح الأوضاع Author: الحاج حمد الحاج Date: 04-07-2013, 06:13 AM Parent: #43
السماني عمارة
Quote: والدولار راح فى ستين داهية حاول تتخلص من الدولارات المعاك وبطل تشاؤم
Post: #53 Title: Re: أمر ملكي سعودي بمنح المقيمين 3 أشهر لتصحيح الأوضاع Author: راشد فضل Date: 04-07-2013, 06:28 AM Parent: #46
Quote: الأظرف قزاز العربية فيهو ستيكرين لجهتي عمل مختلفة .. والإقامة في طرف تالت!!
الحق يا مصطفى يوسف كفيلي طلع مخالف مرتين .. يا ود الصائم نحن كلمنا الجماعة ينقلوا عليك تطلع مخالف؟
والله ما عارفين دي من حسنات الكشات أم سيئاتها؟
سلام ومع المخالفة برضو تقدير
Post: #59 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:54 AM Parent: #53
Quote: كل دولة تحرص على مصلحة مواطنيها . . . إلّانا
أبو زيد .. دي النجيضة ياخ!!
Post: #60 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:56 AM Parent: #53
Quote: شوف يا ود الصايم ماذا قال طيب الذكر الشيخ زايد بن سلطان آل نهيان
يا سلام يا دكتور ياخ! كلام من درر والله .. لكن من يسمع!!
أهـو الإمارات هسي وين والسعودية وين!!!
Post: #61 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:58 AM Parent: #53
Quote: وياريت يكون الجميع جادين في الاستفادة من هذه الفرصة وبعدها لن يكون هنالك عذر
عباس يا ساكت .. حبابكـ ياخ! زي ما قلت القصة جاطت والله .. الناس لا ح تعرف تصحح أوضاعها في الوكت دا .. ولا كمان تتخارج!!
ماف طريقة إلا نتابع مع الصادق إسماعيل!!
Post: #62 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:59 AM Parent: #53
حبيبنا الحاج .. أقرا وأدي ربكـ العجب!!!
Post: #64 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:04 AM Parent: #53
Quote: الحق يا مصطفى يوسف كفيلي طلع مخالف مرتين
هههههههههههههههههههه@ راشد! يا زول أنا هيّن .. أها دكتور مصطفى دا يودي العيادات بتاعتو دي وين!! غايتو إلا يفتح عيادة خاصة في البيت ويجيب المرضى لحدي عندو غير كـدا عمكـ بضيع
أها النضحككـ زيادة .. قبل كم يوم كلمني واحد دايـر ليهو محرر وصفيف يشتغلوا في خدمات طالب! يعني في الواجهة .. وبدون نقل كفالة!!
طبعا ما قدرت أرد عليهو .. لو رديت كان لحدي الليلة قافل نخرتو من الألفاظ!!!
أها بعد التلاتة شهور دي إلا نلبد في السفارات دي بس!! ما عندكم طريقة يا معلم؟
Post: #49 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 06:16 AM Parent: #28
.. تم وضع المداخلة في تسلسل مناسب!! أيوا .. مش القصة تصحيح أوضاع!!
Post: #52 Title: Re: أمر ملكي سعودي بمنح المقيمين 3 أشهر لتصحيح الأوضاع Author: عبدالله كع Date: 04-07-2013, 06:27 AM Parent: #49
Quote: غايتو استخدمنا كلّ المراقات الممكنة!! تعرف يا أبو حميد .. السعودية فيها سر عجيب اسمو (المرأة)! عندكـ أي مشكلة في الإقامة أو مخالفة في العربية خت المرة على اليمين وانطلق!! لو المرة قعدت تخرخر من المشاوير سوق الشفّع .. منها فسحة ومنها زوغـة!!
يا صايم الله يفضحك ياخي ,,, فضحته الامة العربيه ... وافشيت سرهم ههههههههههههههههه
الله معاك يا زعيم .. ونتقابل في ارض الطيبين بعد 3 شهور حسب كلام المعلم الكبير جني ,,, !
Post: #67 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:14 AM Parent: #52
Quote: يا صايم الله يفضحك ياخي ,,, فضحته الامة العربيه ... وافشيت سرهم
غايتو يا كع .. كل ما يعصرو علينا بنمرق الحاجات الدرر دي!! ياخ عندنا قريبنا استمارة عربيتو مطوّفة أكتر من ستة سنين .. وشغال توصيل طلاب .. تسألوا بتتصرف كيف؟ يقول ليكـ استمارتي هدي: طبعا المرة!!
Post: #55 Title: Re: أمر ملكي سعودي بمنح المقيمين 3 أشهر لتصحيح الأوضاع Author: saidahmed shami Date: 04-07-2013, 06:32 AM Parent: #49
حمادات
قلوبنا معاكم
انت عارف كنت في السودان قبل 20 يوم الكل بفتش للمخارجة من البلد
و 90 % منهم مسافرين للسعوديه وتخيل الاقامه الحرة وصلت 11 ألف ريال
Post: #63 Title: Re: أمر ملكي سعودي بمنح المقيمين 3 أشهر لتصحيح الأوضاع Author: جعفر محي الدين Date: 04-07-2013, 07:02 AM Parent: #55
ود الصايم يا حبيب اليومين الفاتو الشوارع في جدة خفيفة وأغلب الناس لابدة في بيوتها ياخي كنت بصل المكتب في 25 دقيقة بقت 12 دقيقة بس سأكون أول المبادرين لتصحيح الأوضاع والمملكة عايزه تمسك العصا من النص عايزا ترضي مواطنيها وفي نفس الوقت تحسن اقتصادها المسؤولين عارفين كل الحاصل ولكنهم يدفنون رؤوسهم في الرمال نظام الكفالة معطل رئيسي للتنمية
Post: #68 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:17 AM Parent: #63
Quote: 90و % منهم مسافرين للسعوديه وتخيل الاقامه الحرة وصلت 11 ألف ريال
سيد أحمد يا شامي .. ياخ تجار الإقامات بقى ما عندهم رحمة زاتو! يدوكـ الماسورة ويتكشّموا ويقولو ليكـ مبروكـ كمان!!
لكن المشكلة ما فيهم .. المشكلة في البشتري همسلف! ياخ اتخارج بالطريقة الصحيحة يا كمان أبقى قاعد مع أخوانكـ!!
_ التعديل لإضافة رقم الإقامة:)
Post: #70 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد جلال عبدالله Date: 04-07-2013, 07:19 AM Parent: #68
Quote: غايتو استخدمنا كلّ المراقات الممكنة!! تعرف يا أبو حميد .. السعودية فيها سر عجيب اسمو (المرأة)! عندكـ أي مشكلة في الإقامة أو مخالفة في العربية خت المرة على اليمين وانطلق!! لو المرة قعدت تخرخر من المشاوير سوق الشفّع .. منها فسحة ومنها زوغـة!!
وهذا دليل على أن المرأة في السعودية - أيا كانت - تحظى باحترام خاص!
بالمناسبة لا أدافع عن النظام السعودي بقدرما أردت الإشادة بهذه النقطة!
Post: #71 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:28 AM Parent: #70
Quote: وهذا دليل على أن المرأة في السعودية - أيا كانت - تحظى باحترام خاص!
ههههههههههههههههههه يا مطوع!
وليه ما نقول هذا دليل على إنو عسكري الدورية ما يقدر يقبض عليها!! لأنو خايف يسوقا في الدورية براهو .. يقومو يقبضوا عليهو ناس الهيئة!!
آممممممال إيه!!!!
أشيد يا محمد .. أشيد ياخ! أشيد وأشجب وأدين وأعمل الدايرو .. المهم تكون إقامتكـ نظامية!
Post: #69 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:19 AM Parent: #63
Quote: اليومين الفاتو الشوارع في جدة خفيفة وأغلب الناس لابدة في بيوتها ياخي كنت بصل المكتب في 25 دقيقة بقت 12 دقيقة بس
حبيبنا جعفر .. دا كان حال أغلب المدن في السعودية! في الرياض هنا .. وخاصة فترة الصباح بتلاقي تلاترباع المحلات مقفلة! حتى الشركات قافلة الأبواب وشغالين جوه المكاتب .. حتى النظاميين!!
ربنا يسهل أموركـ يا حبيب .. وأمورنا كلها!
Post: #72 Title: Re: أمر ملكي سعودي بمنح المقيمين 3 أشهر لتصحيح الأوضاع Author: حامد بدري Date: 04-07-2013, 07:31 AM Parent: #69
مسكاقمي يامشووطن تلاتة شهور يامات الكفيل ياوزير العمل يانحنا ظاتنا والملك الله يطوِّل عمرو شديد لووووول ويغتيهو ويستر عليو من اولاد اللذينا كاااااك
Post: #74 Title: Re: أمر ملكي سعودي بمنح المقيمين 3 أشهر لتصحيح الأوضاع Author: جعفر محي الدين Date: 04-07-2013, 07:35 AM Parent: #72
Post: #81 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 08:19 AM Parent: #74
Quote: تلاتة شهور يامات الكفيل ياوزير العمل يانحنا ظاتنا
يا عمكـ .. التلاتة شهور بالجديد بقت أسبوعين بس!! أنجز .. أنجز يا كمان جهّز مرّاقاتكـ!!
أمتنع عن الرد على الجزء التاني من المداخلة!! يا وهم!!
Post: #82 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 08:23 AM Parent: #74
Quote: والله بس في سعوديين يكيفوك زي سمية جبرتي دي
والله يا حبيبنا جعفر .. كتار الزي ديل .. لكن البسمع منو!
عندنا زميلنا صحفي وشغال في وزارة العمل .. في مكان قريب من الوزير هم سلف .. بقول كلام عسل عديل! وفي نفس اللحظة يقول ليكـ الوزير بطبّق تعليمات!
ما تعرف الحاصل شنو زاتو!!
Post: #73 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:32 AM Parent: #69
Quote: قطر شنووووووو كمان الزول لو فات خير السعودية اخير ليهو عجاجة بلدو قال قطر قال دي حدها بالكثير ثلاث سنوات وايران تبلعه
محمد طاهر من نواحي الفيسبوكـ! حبابكـ ياخ .. وربنا يمتّعكـ بخير السعودية ولا يوريكـ الجرجرة الجد لو دقست فيها!!
غايتو نحن لو لقينا طريقة لقطر بنمش طووووالي!!!
Post: #75 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:37 AM Parent: #73
Quote: قوانين العمل السعودية تؤدي الى تحيز كثير ضد (الوافدين)، والعمال حقوقهم مهضومة في أحايين غالبة، هل تسمى قوانين الهيمنة والتسلط قوانين؟ أي حياة هذه التي يتوجس فيها الانسان قلقاً من غرابة الأشياء في ما حوله من قوانين تم تفصيلها خصيصاً للسيطرة والاستغلال؟
ناجي يا حسنين .. حبابكـ ياخ! ونحن ليه نلوم دولة تُحاول توفير فرص العيش الكريمة لمواطنيها؟ إذا كان حكومة بلدنا ما قادرة تلمنا فدا ما خطأ الدول التانية يا حبيب!!
ياخ خليكـ من إنها تلمنا! على الأقــل تنصفنا بعد عشرين سنة اغتراب! ولو بتصديق عربية بدون جماركـ!!
Post: #77 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 07:41 AM Parent: #75
Quote: ماعرفنا النجيضه ناس يقولون تلاته شهور وناس تقول شهرين وناس تقول سنه . دى برضو جهجه كدى
الجهجهة الجد يا معتصم مكاوي إنكـ تضيّع الشهرين والتلاتة ديل! لأنو بعد كـدا الحرب ح تكون ضروس عديل كـدا!!
يا زول الله يهنيكـ بكفيلكـ ويغتي عليكـ من (القطاعين)!!
Post: #80 Title: Re: أمر ملكي سعودي بمنح المقيمين 3 أشهر لتصحيح الأوضاع Author: احمد التجانى احمد Date: 04-07-2013, 07:52 AM Parent: #73
يا بركة , الثلاث شهور ما بتعمل اى حاجة فالناس تستغلها فى جعل المغادرة مرتبه يعنى تلقى ليك وقت عشان اولادك يكملوا العام الدراسى , تحصيل الديون (الما هالكة) بيع ما يمكن بيعه ترتيب الوجهة الجديدة البيحاول يعمل حاجة لتصحيح الاوضاع هنا بيكون بيضيع فى زمنه بس
* السيكويا انا بشتريها (راسمالها - الاستهلاك) بس تشيل استيكراتك من القزاز * بعد تمشوا بهناك اتعهد ليك بجردل كنتاكى كل اسبوع بطيارة ناس , تسليم المطار لحد ما الاولاد يتاقلموا على الاقاشى والقراصة
Post: #84 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 08:31 AM Parent: #80
Quote: * السيكويا انا بشتريها (راسمالها - الاستهلاك) بس تشيل استيكراتك من القزاز * بعد تمشوا بهناك اتعهد ليك بجردل كنتاكى كل اسبوع بطيارة ناس , تسليم المطار لحد ما الاولاد يتاقلموا على الاقاشى والقراصة
ههههههههههههههههههههه@ أحمد التجاني! غايتو مصائب قوم عند قوم فوائد!!
أها أديكـ النجيضة .. أمس لقيت لي بوست مكتوب فيهو أسعار الجمارك للعربات .. تصدّق وتآمن السيكويا ما مكتوبة كلو كلو! يعني لو مشيت يا طخوكـ بمليار .. يا قالوا الداهي دي شنو!!
بعدين أعلى محرّكـ مذكور في الكتيب 4400Cc! ياخ قول ليهم الـ 5.7 دي نقع بيها وين؟!
أما فيما يختص بـ كنتاكي .. فالدنيا اتطورت بهناكـ ياخ! بقى عندهم (ماكدولار) .. فممكن أنا زاتي أمش أعمل (حنكاكي)!!
Post: #87 Title: Re: أمر ملكي سعودي بمنح المقيمين 3 أشهر لتصحيح الأوضاع Author: فتح العليم محمد أبوالقاسم Date: 04-07-2013, 08:40 AM Parent: #14
يا وضاحة انت ما عندك موضوع قطر شنو وكتمة شنو وقناة الجزيرة شنو وكذب شنو احنا نسيب البلد الواسعة الفيها مكة والمدينة والشوارع الواسعة والبنزين الرخيص والايجار الرخيص واهلها الطيبين عشان نجى نندفن . بالله شوفي ليك شغلة ولو عاوزة تجينا هنا مرحب بيك ومستعدين نساعدك من غير فلوس .
Post: #101 Title: Re: أمر ملكي سعودي بمنح المقيمين 3 أشهر لتصحيح الأوضاع Author: مجاهد محمد الهادي Date: 04-07-2013, 03:03 PM Parent: #14
Quote: مرحب بالوافدين المطرودين من الثعودية فى قطر الخير
يا محمد انت وضعك كيف ؟
تعال نعمل بزنس والله صحى
انت دز لى وانا بكفلن بس الاقامة بى 25 الف ريال قطرى على كل راس
رايك شنو
محمد دا خالي في الحسبة وقرابة شديدة لصيقة ف يا وضاحة خستمك بالنبي العربي تخليني في بالك برضك
بحب ا لبزنس أنا
محمد يا خال - أنا بنلعب في كل الاتجاهات وبنأسس ليكم اتا ووضاحة بزنس بالجد تمام وجااااادي
راس دي عجبتني - من دي واضح انك حقة بزنس واصل
_________________________
من توكل الله فهو حسبه الله وكيلنا ووكيل الكل
Post: #114 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:16 AM Parent: #101
Quote: محمد دا خالي في الحسبة وقرابة شديدة لصيقة ف يا وضاحة خستمك بالنبي العربي تخليني في بالك برضك
تلصّق من النوع الممتاز .. صباع أمير .. سوبر قلو!!
يا معلم .. أدينا نفس نشوف قصة البزنس دي بعدين نتفاهم في القرابة الشديدة دي!!
Post: #76 Title: Re: أمر ملكي سعودي بمنح المقيمين 3 أشهر لتصحيح الأوضاع Author: فتح العليم محمد أبوالقاسم Date: 04-07-2013, 07:37 AM Parent: #1
الرائع ودالصايم الان الدور دورك لتكوين لجنة تشمل كافة التخصصات المطلوبة لمساعدات اخواننا السودانين ، لجنة في الرياض ، جدة ، الشرقية وغيرهما. اننا شعب يعمل بجهده ولاينتظر خيرا من الحكومة ولا من السفارة وواجبنا يحتم علينا نشل اخواننا السودانيين الغير نظاميين والمساعدة على توظيفهم في المدة المحددة نظاماً . أمل ان يجد اقتراحى قبولك وان تقوم بتكوين اللجان المتخصصة لمتابعة الموضوع . وعن نفسى تجدنى رهن المساعدة في اى وقت . وكلى ثقة في تصدرك لهذا الموضوع وسجلك حافل بالمبادرات الطيبة . مع احترامي
Post: #79 Title: Re: أمر ملكي سعودي بمنح المقيمين 3 أشهر لتصحيح الأوضاع Author: Mubarak kunna Date: 04-07-2013, 07:51 AM Parent: #76
ود الصائم
ماتضيع وقتك بلا قطر بلا عرب وهم
بلا ابو متعب تعال بى هنا لى أسيادهم
لا أقامه ولا كفيل ولا سجم الحمد لله اتخارجنا
من العرب الوهم ديل 1999
عندك مشكله بتاعت مرور تشتكي البوليس و تطلعوا غلطان
ياعمك تعال لي زياره و تعال شوف العرب الوهم ديل زي البسس
Post: #83 Title: Re: أمر ملكي سعودي بمنح المقيمين 3 أشهر لتصحيح الأوضاع Author: فتح العليم محمد أبوالقاسم Date: 04-07-2013, 08:31 AM Parent: #79
يامبارك كونا انت ما عندكم قروش قاعدين على الاعانات واحنا عاوزين قروش احسن لينا الخليج مع ظروفه .
Post: #88 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 08:48 AM Parent: #83
فتح العليم يا حبيب .. خليكـ جادي ياخ! مش قالوا فاقد الشيء لا يُعطيه .. وتيب؟
غايتو لو الناس اتفقت على كلامكـ دا أنا معاكم لكن النجيضة فيهو شنو؟ القصة كلها إجراءات عقيمة يا الله تخارج نفسكـ!! أما قصة التوظيف دي فبقت قضية عديل كـدا! نحن طبعا عندنا نظام جمعيات أبناء المناطق .. يعني نظام دار للسكن والميز وكـدا .. والله تمشي تتحسر على الشباب القاعدين بدون عمل .. ويا هو كلهم فيزا حرة فيزا حرة وجو مارقين على السعودية!!
ياخ أشكركـ كتير على الثقة وكلامكـ الطيب .. لكن كمان ما عندي تصوّر معين للحاجة دي .. ومستعد للتعاون مع أي لجنة أو جهة تساعد في إنهاء المشكلة دي!
Post: #89 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 08:51 AM Parent: #83
Quote: ماتضيع وقتك بلا قطر بلا عرب وهم بلا ابو متعب تعال بى هنا لى أسيادهم
هههههههههه@ مدثر كنّه!! لكن يا معلم المخارجة دي كيفن زاتا! كان لوتري الجن دا أبا يضرب كلو كلو!!
رسل الزيارة ياخ! يا كمان الاستيتمنت وأنا بتصرّف!ّ!
Post: #90 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 09:30 AM Parent: #89
الفاتح جبرا يؤذّن في مالطا!!
Quote: برضو الرحمة حلوة الفاتح جبرا الكافل هو العائل، كفله يكفله وكفله إياه وفي التنزيل العزيز: (وكفلها زكريا) كما أن الكفل يا أحبتي هو العجز، يقولون (وإنها لعجزاء الكفل) وقد برع شعراء الحقيبة عندنا في توصيف (الكفل) هذا أيما براعة فها هو شاعرنا الكبير ابراهيم العبادي يذكره في قصيدته (يا موفورة النفل) قائلاً: ياموفورة النفل بالهيبة الكست الحفل أتمايح غصنك رفل ميل سنده الكفل والكافل يأتي أيضاً بمعني (الكفيل) والجمع أكفال، ولا يشتق منه فعل ولا صفة. ونظام الكفيل هو نظام مستمر منذ عقود بدول الخليج العربي يخضع له حوالى 20 مليون انسان، نسبة كبيرة منهم من دول عربية حيث يصبح العامل أو الموظف بموجب هذا النظام تحت امرة كفيله، لا يملك قراره في الحركة والتنقل دون موافقته، وربما يتحول الى شبه سجين اذا اختلف مع هذا الكفيل لأي سبب من الاسباب وهنالك قصص واقعية تحكي حول هذا الأمر. سبب كتابة هذا المقال رسائل عدة تلقيتها عبر بريدي الإلكتروني ومهاتفات كثيرة تشكو سوء المعاملة التي يجدها الرعايا السودانيين بالشقيقة (السعودية) بعد أن تم إصدار قرار بترحيل كل مقيم لا يعمل تحت مظلة كفيله . إذا نظرنا إلى الموضوع من (أساسو) فالعبدلله يري أن المتسبب فيه هي السلطات (السعودية) التي تمنح كل من لديه (سجل تجاري) أو رخصة تجارية ما شاء من (فيزات) تعلم تماما انه يقوم ببيعها في (سوق الله أكبر) عبر السماسرة الذين ينتشرون في كافة العواصم العربية والأجنبية، وقد حكي لي من لا اشك في صدق حديثه أن أحد الأفراد (السعوديين) في كفالته أكثر من ألف شخص !
كان على السلطات (السعودية) أن تلزم من يطلبون هذه (الفيز) من مواطنيها تخديم من يستقدمونهم في مؤسساتهم؟ وفرض عقوبات على من يستخدم هذه الفيز كتجار؟
أقول قولي هذا لأنني أعتقد أن هؤلاء الذين تقوم السلطات (السعودية) بترحيلهم (دون إعطائهم فرصة حتى لحمل أغراضهم) قد دخلوا إلى البلاد بصورة شرعية وأن عدم شرعية عملهم مع جهة غير التي استقدمتهم هو شيء داخلي تساءل عنه تلك الجهات التي قبضت ثمن الاستقدام بآلاف الريالات (وفكت) المستقدم – بفتح الدال - عكس الهواء! نحن هنا لسنا بصدد تقديم النصح للإخوة المسؤولين بالمملكة فالطبع لكل دولة الحق في إصدار وتنفيذ أي قرارات من أجل ضبط أمن بلادها وإستقرارها، لكننا فقط نرجو ونلتمس من إخواننا أن يقوموا بتنفيذ هذا القرار بصورة مرنه تعطي الشخص الوقت الكافي لتصفية حساباته مع من كان يعمل عنده فكثير من الاشخاص لديهم حقوقا لدي مخدميهم تركوها كما تركوا حتي أثاث منازلهم وسياراتهم ومعظم مقتنياتهم وهذا لعمري ظلم ما بعده ظلم ! العبد لله يري أن نظام (الكفيل) يجب أن يلغى وان يستبدل بنظام اكثر عدالة يقوم بحفظ حقوق العامل الاجنبي أيا كانت جنسيته، ويحقق له الاستقرار النفسي والعملي ويزيح عنه هاجس (الترحيل) وما أدراك ما الترحيل! .. أن نبينا عليه أفضل الصلاة والسلام يدعونا إلى الترفق واللين وأن يحب المرء لأخيه ما يحب لنفسه بل يمضي رسولنا الكريم إلى أكثر من ذلك إذ يقول ان الدين المعاملة ... وبرضو يا أخوانا (في الدين) الرحمة حلوة .. وللا مش كده ؟
كسرة: بينما كان يسير في السوق .. سأله الشرطي عن (هويته) ولأن صاحبنا لم تكن لديه (إقامة) فقد تم وضعه بالسجن ثم ترحيله للبلاد .. بينما كان يسير بشارع الجمهورية لمح في نهاية إحدى البرندات (العقال) الما بغباهو فجري نحوه مسرعاً وأمسك بتلابيبه قائلا: - هويتك .. هويتك الهوا اليشقك !
كسرة ثابتة (قديمة) : - أخبار ملف خط هيثرو العند النائب العام شنو(وووو وووو وووو وووو)+(و)
كسرة ثابتة (جديدة) : - أخبار تنفيذ توجيهات السيد الرئيس بخصوص ملف خط هيثرو شنو(و)؟
Post: #92 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 09:36 AM Parent: #90
Quote: ود الصائم استيكرين على القزاز مشكلة كبيرة خليك زي وقف بره، وركز على العيادة المنزلية بتريحك
كلام حِكم والله يا أبو حمد .. لكن ميييين يسمع!! غايتو وقاف برّه دا ما بنقدر عليهو .. ممكن نضحي باستيكر بالليل!!
أما فيما يختص بالعيادة المنزلية فـ يدكـ معانا في حاجة عليها القيمة كـدا!!
Post: #93 Title: Re: أمر ملكي سعودي بمنح المقيمين 3 أشهر لتصحيح الأوضاع Author: tmbis Date: 04-07-2013, 09:46 AM Parent: #90
Quote: غايتو نحن لو لقينا طريقة لقطر بنمش طووووالي!!!
قرقرقر وين يا معلم ماشي مخلي اخووووك ..؟ عفانة منك بس .. ياخ انا المعسل الفي قاسمو معاك .. الشية الفي ضاربنها مع بعض .. الكوارع الفي مجلعنها مع بعض .. تمشي تخليني ..؟ كلامك دا قولو لي زول ما عندو حديدة .. .. التلج يا معلم .. بعد كدا اقع التلج .. لانو لو مشيت قكر دي غالبـا ناس كيكي وخليل .. وهارون .. ونادوس .. يكفلوك .. وكفالة السوداني للسوداني .. اخير منها الشرا في القندول .. .. اقعاكه التلج يا معلم .. على الاقل تمشي لي ناس عبد الماجد مرتين .. يفكها فيك ذات ليلة شتوية .. يحننك لي الكفيل وايام الكفيل والكبسة والمندي .. .. غايتو شريكك يا معلم .. يا نمشي الرج سوا .. يا نمشي التلج سوا اصلا اصلـن ما عندي ليك حل غير كدا
Post: #112 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 09:36 AM Parent: #93
Quote: ياخ انا المعسل الفي قاسمو معاك .. الشية الفي ضاربنها مع بعض .. الكوارع الفي مجلعنها مع بعض .. تمشي تخليني ..؟
إنا لله يا تامبا .. هبشت جميع السلوكـ العريانة عديل!! الواحد بقى يغني ظلمو .. وحليل زمن الصبا حليلو هسي يا معلم .. تشوف حلّة الكوارع ساي تجيكـ حموضة!! أما المعسّـل فتلكـ حكاية أخرى تجمع بين الحزن وطريق القصيم ذات مسارات ما معروفة كيف كيف!! ياخ الواحد مشتهي يضرب يقيف قنديلة ويحبس بي حجر + كباية شاي قاطعة داش من برّادو!!
إيييييه .. دُنيا
ثم .. الدوحة مالا ياخ .. عيّبا لي بالله! أهو كيكي جضومو كبرن وبقن نايرات .. وخليل قلب غُنا .. أحسن زاتو لأنو كل ما يحلل الهلال بطير وهارون يكفلني كيف بالله .. ياخ أبقى تحت رحمة صيهيوني! دا تطبيع غير مقبول بتاتا البتّة!!
نادوس ع العين والراس والله!
ثم .. شايفكـ قاعد تحسب في الناس ديل وجلّيت وضاحة!
Post: #91 Title: Re: أمر ملكي سعودي بمنح المقيمين 3 أشهر لتصحيح الأوضاع Author: عكود عبد القادر عكود Date: 04-07-2013, 09:35 AM Parent: #89
ود الصايم والمتداخلون سلام
نجيض الكلام ما قلّ ودلّ :
يجب على حكومة السودان منح المغتربين العائدين من السعودية
عودة جبرية قهرية قسرية نهائيةإعفاء جمركي على سياراتهم دون
نحديد للموديل وأثاثاتهم غض النظر عن جديدها من المستعمل وهذا
قليل القليل من إستحقاقتهم لما قدموه للوطن على مر عجاف سنين
غربتهم ،،،،،،
فهل تراني هل أسمعت إذ نادبت؟؟؟؟؟؟؟؟؟؟؟؟؟؟
Post: #94 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-07-2013, 09:56 AM Parent: #91
مره ( دقو ) إعلان في الغابة أنهم حيقبضو أي ( دب ) حايم ...
( الثعلب ) قام فاكي البيرق ...
سالوهوا مالك جاري يا زول الإعلان بيقول أي ( دب ) ...
قال ليهم ديل ( طرش )
علي بال ما يتأكدوا انا ( ثعلب ) و لا ( دب )
أكون رحت في ( أبو نكله ) ... _____________________ لذا لزم التنويه ...
Post: #115 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:29 AM Parent: #102
Quote: مش قاعدين تدفعوا من زمن كنانة والرهد
كنانة والرهد القريبة دي يا خالد العطا!! ياخ نحن بندفع من زمن ماف إيصالات زاتو!!
أها أديكـ النجيضة عمكـ الشهيد دا نحن دفعنا ليهو من الولادة لحدي ما استشهد في أمانة الله! عمكـ الجريح .. مما بدا مراحل الدراسة الأولى لحدي ما طاب واغترب ساب البلد!!
ياخ شريان الشمال دا الدفعنا فيهو كان عمل لينا قسطرة عديل!!
Post: #116 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:30 AM Parent: #102
Quote: بس عشان فكرنا فيها . والله يا أخوي الحال هنا زأتو ما هو بزين .
عمكـ يا عثمان .. ياخ إنتو ح تجو بجوازاتكم الأجنبية وعماراتكم السوامق الجنسيات الغربية هنا عندها تعامل خاص يا معلم! يعني مستحيل العسكري يلاقي مكتوب الجنسية (أمريكي) ويطلّع المقص!!!
يا زول تعال .. الرزق ع الله!
Post: #117 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:32 AM Parent: #102
Quote: بس ظبط الإقامة وكرت العمل والحوامة
جمال يا مصطفى .. والله كلو جاهز! إقامة وكرت عمل وتأمين طبي وتأمين عربية .. وتامين ولامين زاتو!!
لكن أعماكـ ديل بقطعوا بعدين بعدّو
Post: #118 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:34 AM Parent: #102
بشير يا حبيب .. والله إنتو اللاقينها .. كان بالحلوة كان بالمرّة! موضوع التهامي دا جانبي .. ولا هو رفع ولا شحـدة دا حاجات أقـل مما يستحق المغترب بعد السنين دي كووولها!
يعني معقولة زول ليهو 20 سنة بدفع يعاينو ليهو ساي؟
Post: #119 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:35 AM Parent: #102
هههههههههههههه@ عمكـ يحيي قباني! تصدق وتآمن .. دا ياهو الحاصل بالضبط! لحدي ما يعرفوا الحاصل شنو بتكون وصلت مطار الخرتوم في أمانة الله!!
ربكـ يعين يا حبيب!!
Post: #103 Title: Re: أمر ملكي سعودي بمنح المقيمين 3 أشهر لتصحيح الأوضاع Author: أنور سيد ابراهيم Date: 04-07-2013, 03:06 PM Parent: #100
اخونا شيخ ود الصايم
شكرا كتير كتير جدا .. على الفديو ................................................
والله الشيخ الدكتور / العريفى
كلامو نجييييييض
جزاهو الله خير
................................................
ويا عمك خلينا نشوفك .. عاوزين لينا لمة والله نتشاوف فيها
كامل الود
Post: #104 Title: Re: أمر ملكي سعودي بمنح المقيمين 3 أشهر لتصحيح الأوضاع Author: علاء الدين حيموره Date: 04-07-2013, 03:27 PM Parent: #103
مصرى ترجم كفيل الى الانجليزية Like elephant ك فيل الكاف حرف تشبيه والبلمها سوسيو يطاها فيل ما مشى بعيد المصرى جنى
Post: #106 Title: Re: أمر ملكي سعودي بمنح المقيمين 3 أشهر لتصحيح الأوضاع Author: يحي قباني Date: 04-08-2013, 02:53 AM Parent: #105
القصة وصلت الجرايد
Post: #107 Title: Re: أمر ملكي سعودي بمنح المقيمين 3 أشهر لتصحيح الأوضاع Author: د. ياسر عبد القادر Date: 04-08-2013, 06:11 AM Parent: #106
سلامات ود الصايم
الحاصل شنو ياخ....قبل إسبوعين خلينا البلد ماكان في حاجة....الجديد شنو بالله؟؟
طمنا بالله.....
عثمان موسي : أحمد ربك ياخ...في زول سألك من إقامة ولا كفيل هنا ياخ.....ماتستعجل الغني كلو ملحوق...بعدين 100 دولار البتصرفها في لحظة في سفن إلفن كان رسلتها بتكفي ناس الزيداب شهر
Post: #108 Title: Re: أمر ملكي سعودي بمنح المقيمين 3 أشهر لتصحيح الأوضاع Author: إدريس محمد إبراهيم Date: 04-08-2013, 08:40 AM Parent: #107
دي ملطوشه من الفيسبوك يا حبه :
بمناسبة المطاردات والحملات الشاناها الحكومه السعوديه الايام دي ضد الاجانب ده واحد سوداني خايف من الوضع قال :
اللهم ارجعنا الى عزبنا سالمين غانمين ومن المطاردة غـير معضلين وبالاقامة مهنجمين اللهم جـنبنا المداهمات والمطاردات وقـص الإقـامات
وارزقنـا اللهم وقت الـضرورة دفـع ربـاعي وسـرعة الفراري ومراوغة الميسي
وأجـعل أقدامنا فرفيره من البطحاء إلى الديره ومن منفوحة إلى غبيرة ومطآردتهم يـسيره كالشاربين للبيره تـخـليهم في حـيره
اللهم أجـعل لنا في كل غـارة ركـب وساقين طيارة نتوهـم من حارة إلى حـاره
ونعوذ بـك اللهم من كـرش لا يـهتز وقـدم لا تفتز
ولا تـكلنا ياإلهي إلى عـسكري يطاردنا أو مجـهول يشمت فـينا أو بنغالي يـدلع لسانه علينا
اللهم جـمد الـكبسة في كـروشـهم والـشطة في عـروقهم وثـبط إلى الارض أقـدامهم.
اللهم ردنا إلى أعمالنا رداً جمـيلا ولا تجعل الكـفيل أكبر همـنا ولا إلى التـرحيل مـصيرنا
اللهم حوالينا ولا عـلينا على البنغال والهنود والباكستان. يا حـنان ..يا منان. أصلح الـشآن ...كفانا ذل وهـوان
Post: #111 Title: Re: أمر ملكي سعودي بمنح المقيمين 3 أشهر لتصحيح الأوضاع Author: نافع الكوماوي Date: 04-08-2013, 09:11 AM Parent: #108
Quote: معقولة بعد عشرين سنة غربة تاني نجي نبقى في جرجرة!!
والله حارة خلاااااااااااااص بس قول يالطيف
Post: #120 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:55 AM Parent: #111
Quote: ويا عمك خلينا نشوفك .. عاوزين لينا لمة والله نتشاوف فيها
ومن يسمع يا أبو النور .. نحن زاتنا دايرين لينا لمّة نفرّق فيها شوية والله! الواحد صبحان بي هم .. المسا بي هم! الكفيل أمامكم والجوازات خلفكم!!
Post: #121 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:56 AM Parent: #111
Quote: طبعا ود الصايم دا حضر ولادة الملك فهد وموتو ...
موتو حاضرو تب .. ولادتو دي حكيتوها لينا إنتو!!
Post: #122 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:57 AM Parent: #111
Quote: الكاف حرف تشبيه والبلمها سوسيو يطاها فيل ما مشى بعيد المصرى
فعلا يا جني .. نجيضة عديل!!
Post: #123 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 10:58 AM Parent: #111
Quote: القصة وصلت الجرايد
يا عمكـ قباني .. كويس دي صورة الضحكـ .. خليهم بعدين يجبو صورنا لمن الضحكـ يشرطنا!!
ثم .. إنت في الجرايد ولّ الكراع المخلوفة دي!!
Post: #124 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 11:02 AM Parent: #111
Quote: الحاصل شنو ياخ....قبل إسبوعين خلينا البلد ماكان في حاجة....الجديد شنو بالله؟؟
يا دكتور .. بالله تسيبنا معلّقين كـدا وتتخارج؟
أها أديكـ النجيضة: قبل تلاتة أسابيع قرّر مجلس الوزراء الموافقة على بعض التعديلات في قوانين وزارة العمل وفتح المجال للوزارة والجوازات لتطبيق القوانين المباشرة بالنسبة للأجانب والكفالات!!
أها قووووموا الجماعة ديل عملوا عملات تش! أقبض .. قصّ الإقامة .. رحــل!! أيوا .. وبنظام أقطع بعدين شوف نظاميتو شنو أها العالم دي كووولها لبدت .. والشوارع بقت خفييفة! والطيارات بقت تتطاقش شايلة المبعدين .. لحدي ما وصلت مرحلة مخيفة عديل! بعدها حصلت تدخلات قوية من الدول والمنظمات الحقوقية .. ثم تدخّل الملكـ وقرر منح الجميع فرصة تلاتة أشهر لتعديل الأوضاع!!
يعني بعد تلاتة شهور .. ودي طبعا مقصودة بأنها تكون في الصيفية يا تزبط أوضاعكـ يا تسوق أولاكـ وتبقى مارق!!
Post: #125 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 11:03 AM Parent: #111
Quote: دي ملطوشه من الفيسبوك يا حبه :
هيااا درسو .. دا وكت سرقة .. أعمل حسابكـ لو قابلوكـ بقصّوا بعدين يشوفوكـ لاطش المداخلة من وين!!
Post: #126 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 11:03 AM Parent: #111
Quote: والله حارة خلاااااااااااااص بس قول يالطيف
حبابكـ يا نافع .. وربّكـ يسهل أمورنا جميعا!!
Post: #127 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 11:10 AM Parent: #126
Quote: يا جماعة ورونا النجيضة القرار دة بيشمل المهن الفردية والكاوبويات ولا برضوا هنحتاج لي قرار تاني؟
حبابكـ يا كمال حسين .. القرار يشمل الجميع بلا استثناء لازم تكون شغال مع كفيلكـ .. وفي نفس المهنة! غير كـدا: أقبض .. أقطع .. رحّـل!!
Post: #128 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 11:14 AM Parent: #127
Quote: البشوف ضحكتك دي يقول عندك تابعية 20 سنة مخالف × 3 شهور عاوز تصحح وضع
حبابكـ يا محمد منصور يا البدري! ومالو ياخ .. الماف شنو!! وكان لقينا التابعية كمان تكون مشت معانا دفّار طحنية!!
Post: #129 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 11:17 AM Parent: #128
Quote: ود الصايم اهن توب هي مسوب .. ياخ كتلتني بالضحك انت من هنا بديت تكاكي تقول لي لمن تمشي هناك حتكاكي .. لكن ان شاء الله .. ان شاء الله . ربنا بيجبر بخاطركم ياخ بحق جاه النبي ربنا بيكرم بنياتك الحلوات ديل وامهم .. لخير ..
هههههههههههههههههههههههههه أضحكـ الله سنّكـ يا أم مؤيد ياخ!!
أهن توب دي ذكرتيني أمي والله .. ربنا يرجعا بالسلامة!!
يا زولة ربنا يكتب الخير للجميع وخليكـ قريبة ياخ!!
Post: #130 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-08-2013, 11:21 AM Parent: #129
تحياتي حنان وناجي .. وشكرا ع النقاش!
بالمناسبة يا ناجي قصة القوانين والحاجات دي عاملة زي شركات الاتصالات بتمش تاخد منهم شريحة ولا تقرا العقد ولا الواجبات والالتزامات! أها بتشتري الإقامة وتجي السعودية بدون ما تعرف القوانين شنو والحاصل شنو بالضبط .. ودا لا يمنع إنو في خلل واضح جدا هنا!!
أها في النهاية دي بلدهم ودايرين ينظموها! يبقى يا نحن نبقى نظاميين .. يا نتخارج!!
ياخ ع الأقل عندهم حكومة دايرة تنظم ليهم وتطلع للشباب الوظائف! نحن يا كافي البلا لا لاقين البلد ولا الحكومة .. ولا الوظايف زاتو!!
التحية للجميع كان هنالك اخبار وشائعات كثيرة تداولتها الجاليات المقيمة في السعودية من جراء تطبيق الاجراءات الاخيرة التي اربكت سوق العمل والعمال وبعث الهلع في نفوس كثير من المقيمين منها ما قيل ان ارتكاب جرائم قتل وخلافه وليست هنالك جهة اكدت أونفت صحة ما يقال من شائعات منها ما تم نشره في صحف ودوريات ومواقع خارج المملكة ..
Post: #137 Title: Re: أمر ملكي سعودي بمنح المقيمين 3 أشهر لتصحيح الأوضاع Author: د. ياسر عبد القادر Date: 04-08-2013, 11:44 PM Parent: #136
سلامات يا بوحميد
كتر خيرك علي المعلومات ....تعرف يا محمد ..عندي ولدي مولود في السعودية....بيدرس هنا في أمريكا في أمانة الله...أبي كلو كلو وقال إلا يرجع يقرا في السعودية....لا و كمان قال بيشجع الاتحاد.......(-:
غايتو لو في إيجابية واحدة ...قصة الشوارع الفاضية دي...ياخ الواحد الصباح كان بيجيهو إكتئاب من الزحمة (-:
قلبا و قالبا معكم.......اللهم أحفظ يا الله
Post: #138 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 07:15 AM Parent: #137
Quote: كان هنالك اخبار وشائعات كثيرة تداولتها الجاليات المقيمة في السعودية من جراء تطبيق الاجراءات الاخيرة التي اربكت سوق العمل والعمال وبعث الهلع في نفوس كثير من المقيمين
تحياتي يا ولياب وفعلا أيام الحملة كل يوم تسمع أخبار شكِل .. ودخلوا الحتة الفلانية .. وكسّروا باب شركة شنو ما تعرف!!
على ما أعتقد أشهر قصة بتاعت قتل سوداني عشان ضرب العسكري! ولحدي الليلة ماف زول أكد أو نفى الموضوع دا!!
ربنا يعين!!
Post: #144 Title: Re: أمر ملكي سعودي بمنح المقيمين 3 أشهر لتصحيح الأوضاع Author: Jamal Mustafa Date: 04-09-2013, 07:28 AM Parent: #138
ياود الصائم ( عينة باردة ) كشحته علم فى أدب الردود فى البوست ده أفترض أكون مرجع للتعلم وكيفيةالردعلى البوستات بالذاـ لمتسكعى (منابر الحوارالعرب ) كما تسميهم الناشطة تراجى مصطفى
يازوول الله أخضر ضراعك
Post: #147 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 08:25 AM Parent: #144
حبابكـ يا جمال .. وتسلم ياخ!
Post: #139 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 07:19 AM Parent: #137
Quote: انت يا حمودي فكيت البرادو ! ياخي بالغت السيكويا دي جقّة خلاص مالك بيها :)
مزيدا من التوهّط يا ود البشرى!! ياخ فرق الليل والنهار.. فرق شنو .. الواحد ممكن يقول ليكـ: برادو بتاع فنيلتكـ!! أصلوا ما مضيّعنا إلا التفكير السوداني دا!!
Post: #140 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 07:22 AM Parent: #137
Quote: شرطي الوحيد توريني (وليد الخير دا منو؟)
هههههههههههههه@ الصادق المتابع!! طب عيني في عينكـ كـــدا!!
Post: #141 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 07:23 AM Parent: #137
تحياتي يا أمير .. وعمكـ اللمبي جاب النجيضة!!
Post: #142 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 07:24 AM Parent: #137
ههههههههههههههه@ محمد الحبيب! الصورة دي عمكـ ضربت السوق كلو .. كل ما موقع يلقى ليهو خبر محتار فيهو تااااخ يلصق الصــورة!!!
قالوا الشهرة متاعب ياخ!!
Post: #143 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 07:26 AM Parent: #137
Quote: غايتو لو في إيجابية واحدة ...قصة الشوارع الفاضية دي...
تحياتي يا دكتور ياسر غايتو بعد الأمر الملكي دا الأمور شبه بدت ترجع لقديمها! حتى سواق المدرسة رجع بعد تلتلة أسبوع وصحيان ستة صباحا! والأنيل من كـدا المرقة الساعة 12 عشان ترجع البنات من المدرسة!!
أهــو ننتظر بعد تلاتة شهور ح يكون شنو! بتخيل لي زبطوها مع الصيفية عشان كل واحد يتخارج بي قبلو!!
Post: #145 Title: Re: أمر ملكي سعودي بمنح المقيمين 3 أشهر لتصحيح الأوضاع Author: فتح العليم محمد أبوالقاسم Date: 04-09-2013, 08:03 AM Parent: #143
يا ود الصايم المهلة تنتهى ورمضان داخل على الناس وانت عارف في رمضان يتغير حال الدوام من صباح إلى مساء وبالنهار الشوارع تكون فاضية والناس نايمة . هل تتوقع ان تكون الحملة في رمضان أوبعد رمضان . من جانب اخر هل توافقنى الراي على ان هنالك سلبيات من انتشار العمالة السائبة ؟ ودي
Post: #146 Title: Re: أمر ملكي سعودي بمنح المقيمين 3 أشهر لتصحيح الأوضاع Author: فتح العليم محمد أبوالقاسم Date: 04-09-2013, 08:14 AM Parent: #145
وبعيدا يا ودالصايم بحكم مشيحتك في الرياض والمنبر ان تقوم بدعوة المستثمرين السودانين الشرفاء لانشاء مشاريع استثمارية في المملكةوبالطريقة دي اكفلوا ليهم عدد كبير من السودانيين والخير يعم جوة وبرة ومن الناحية القانونية ممكن نساعدهم مجاناً .
Post: #148 Title: Re: أمر ملكي سعودي بمنح المقيمين 3 أشهر لتصحيح الأوضاع Author: فتح العليم محمد أبوالقاسم Date: 04-09-2013, 08:31 AM Parent: #146
Post: #151 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد هاشم ابوزيد Date: 04-09-2013, 08:49 AM Parent: #148
التحيه ليك ود الصايم ظهرت اثار سالبه علي الاقتصاد جراء الخطوه التي قامت بها السلطات ربما تكون بشري ساره لتهدئه الاوضاع بعد المهله المحدده
اغلاق كثير من المدارس ابوابها .
ارتفاع كبير في اسعار بعض السلع المرتبطه مباشره بالعماله المحليه.
سعر الطبق 16.5 ريال في بنده يوم امس. مقابل 12 ريال قبل
وزياده متوقعه في السلع الاخري حسب تصريح المنتجين
فتح العليم
Quote: اكفلوا ليهم عدد كبير من السودانيين والخير يعم جوة وبرة
ياخي انت صاحب فكر عالي جدا" ، احيًك
ربنا يحفظ الجميع من كل شر
ودالصايم ، خليك عين نايمه وعين قايمه
Post: #155 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 09:01 AM Parent: #151
Quote: ارتفاع كبير في اسعار بعض السلع المرتبطه مباشره بالعماله المحليه
تحياتي يا محمد هاشم .. وحبابكـ! تعرف المشكلة في شنو؟ إنو القصة دي قرارات وتنفيذ بدون تفكير!! يعني حسي لما تخش شركة وتقبض النجار ولّ فني التبريد أو المهن العمالية دي ح تجيب بديل من وين؟ من العمالة المالية الشارع؟ طيب ما تقبض ناس الشارع!!
ياخ خليكـ من بندة! ميناء جدة وصل مرحلة شبه توقف .. خسائر بالجملة للتجار لعدم وجود العمالة سواء في الشحن والتفريغ أو الساحة .. الناس هجّت!!
غايتو لو وقفت على البيض تكون هينة!!
Post: #149 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 08:36 AM Parent: #146
Quote: هل تتوقع ان تكون الحملة في رمضان أوبعد رمضان
تحياتي سعادة المستشار فتح العليم غايتو ما عارف .. لكن أتوقع مع بداية العام الجديد زي ما قلت المهلة بتنتهي مع الصيفية وأصلا البلد بتكون فاضية ثم رمضان .. وبعدها يبدأ العام الدراسي .. والدرش ح يكون للركب!!
Quote: من جانب اخر هل توافقنى الراي على ان هنالك سلبيات من انتشار العمالة السائبة؟
نعم .. مع بعض التحفظات على المسمى!
فإذا كان المقصود العمالة التي لا تلتزم بالعمل مع الكفيل فما أظن نصل مرحلة السلبية، لأن بعض الوظائف تتطلب عديل كـدا إنكـ تكون (متسيب) .. مثلا العمل في الدوائر الحكومية بعد إيقاف التعاقد المباشر إلا بصعوبة .. لازم تكون عن طريق Outsource أو مشاهرة!! أها في الحالة دي تتصرّف كيف؟ أو هل يمكن اعتبارا سلبية؟
ممكن نقول عليها سلبية في حالة العمالة الزائدة .. زي ناس المقاولات! لو طلعت أي شارع في الأحياء الشعبية ح تلاقي في الطرف زي دشليون عامل منتظرين عربية تقيف عشان يعملوا حصار ويطلعوا بشغلانة تطلع حبة قريشات لا نلوم العمالة على البحث عن العمل .. لكن اللوم على من قام باستقدامهم وبعدد ضخم يفيض ويزيد عن الحاجة الرسمية .. ودا معناه مكمن الخلل أساسا من فتح باب الاستقدام بدون حسيب أو رقيب!! يبقى نرجع لنقطة الأصل .. القصة من البداية جايطة والتصحيح ما أظن يكون بالحملات الزي دي أو أي طريقة تانية البداية من إغلاق باب الاستقدام الخارجي مؤقتا إنهاء نظام الكفيل (فرد أو مؤسسة أو شركة) والاتجاه لكفالة الدولة! تصحيح أوضاع العمالة المطلوبة حتى تكون الإحصائيات دقيقة بعد كـدا يشوفوا محتاجين شنو وما محتاجين منو!
حالياً .. حلول مؤقتة زي البندول للصداع!!
Post: #150 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 08:42 AM Parent: #149
بالنسبة للاستثمار فالقصة ما بالسهولة دي المملكة بدأت الآن إعادة دراسة قوانين الاستثمار الأجنبي وبلجنة تجمع الهيئة العامة للاستثمار ووزارتي التخطيط والمالية وبعض الجهات الأخرى آخر إحصائية سمعتها نحو 60 % من المشاريع الأجنبية ليست بالطريقة المطلوبة أو المبالغ المأمول في استثمارها .. رغم حصول المستثمر الأجنبي على تسهيلات كبيرة منها الإعفاء من الضرائب لفترة طويلة!!
Post: #152 Title: Re: أمر ملكي سعودي بمنح المقيمين 3 أشهر لتصحيح الأوضاع Author: لؤى Date: 04-09-2013, 08:51 AM Parent: #1
يا صايـمكو سلامات وأشواق
يوم مزحة واحد أبريـل عندنا صاحبنا رائد جوازات جانا بعربيّة الـجّوازات الشّغل وعينك ما تشوف إلاّ العجاجة
تـحاياي
Post: #153 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 08:55 AM Parent: #152
لا يا حبيب أنا أموري كُلّـها تـمام لكن الـ 800 مسكيـن الـهنا ديل فـي لـحظة مرّت كالظّلال لقيتـهم ليك كُلّـهـم ما فـي اللذيذة ، الـمدام الـمهندسة شغّلتـها معانا هنا قبل كـم شهر شافت ليك النّاس بتتدسدس جاتنـي جارية فـي مكتبـي قعدت وقالت لـي : أنا كان سألونـي بقول جيت معاك من البيـت عندنا مشوار مستشفـى ولاّ حاجة
تـحاياي
Post: #157 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-09-2013, 09:16 AM Parent: #156
Quote: بقول جيت معاك من البيـت عندنا مشوار مستشفـى ولاّ حاجة
Post: #154 Title: Re: أمر ملكي سعودي بمنح المقيمين 3 أشهر لتصحيح الأوضاع Author: garjah Date: 04-09-2013, 08:59 AM Parent: #152
السلام على صاحب الخيط والشباب
أسد عرف انو جايي السعودية
فرح فرح شديد وقال يا الكبسة والطيبات جاك سيدك
بعد وصل حديقة الحيوان
اول يوم أدوهو في الفطور موز
كمان في العشاء برضو موز
وتاني يوم موز
قام نادى المسعول وقال ليهو انا شنو ؟
رد عليهو انت أسد طبعا
والاسد بياكل شنو ؟
اللحم طبعا
طب ليه شابكني موز موز من جيت
بس لأنك جايي بتأشيرة قرديا معلم
وعرف الاسد ان عليه تغيير مهنته في الجواز وبعد كدة في الاقامة
وعيييك اجراءات طويلة
والأسد الان حايم في غليل عايز يرجع غابات افريقيا تاني
ويقول بلا سعودية بلا لمة
Post: #158 Title: Re: أمر ملكي سعودي بمنح المقيمين 3 أشهر لتصحيح الأوضاع Author: محمد عبد الماجد الصايم Date: 04-10-2013, 10:56 AM Parent: #154
أب قرجة دخل القيقرا .. وأنا ماسكـ السكة بي وراا
يا زول عمكـ الأسد دا وضعو كويس .. شغال مع كفيلو بمهنة مختلفة بس!!
