عطية والعنز البعامية

عطية هو اسم الدلع للفقر
يعني لو اتلحك كان زرعت المنقة تلد مكادة
العنز البعامية هي انثى الماعز التي ليست لها قرون
تاني بعد كدا مافي زول اسعلني رش محلي موغل في الفرنغيتة
ويمكنكم الاستعانة بالاصدقاء كل حسب منطقته
.
.
ود عِشَي عطية ماسكو السنين كلها قال اتخارج منو بالسفر واقطع المالح
وغنى جد ووقتها كانت الدنيا بخيرها عمرة وزوغة وتودع عطية للابد
ود عشي اساكك في العمرة تسعة سنين وفي العاشرة حظو ضرب
طلع جوازو مؤشر طوالي أشر بعلامة الوداع لعطية
وركب اللوري ابيض ضميرو مكتوب عليه يا عظيم
علي البلد عدل ابشر العيال بالغنى ووداع عطية للابد
وعصريا بدري دخل البيت فتران فتر السوسيو
المرة قامت باللازم وطلعت ليهو العنقريب والبرش
ومشت تعوس ليهو طرقات كسرة خت جوازو تحت المخدة واخد ليهو غفوة
واتي يا العنز البعامية وبايحاء من عطية اخليك تشوفي الجواز اللخدر
وكأنه صفقة شدرة منقة وبراحة تسلي الجواز من تحت المخدة
وطعم الملح الناتج من عرق المساسكة والختتان تحت اللباط زاده استساغاتة وحلاوة وطلاوة وترنما
وايضا بايحاء من عطية والعنز يمكنها اكل البلاستيك خليهو الجواز اللذيذ دا
حمالتك علي قرضتو كلو وبقت تلفض في الدبابيس دبوسة دبوسة
فطارت بعض الدبابيس واتعنكشت في عين ود عشي وايضا بايحاء من عطية
كيتا عليهو ليزيده من فقره فقام ود عشي مذعورا قايلها
ضبانة حمير وكف رفع البرش عشان اطمئن على جوازه
واوريهو زوجته الصابرة صبر تسعة سنين علي عطية
فلم يجد الجواز والعنز البعامية ما زلت امامه تلفض في باقي دبابيس الجواز
وتلولح في ضنبا وتظرط وبرضو بايحاء من عطية حتى عرف ود عشي الفاجعة
وتأكد من جوازه وبي تاشيرة في بطن العنز البعامية
ولم يجد بدا الا وان يغير اتجاه شكل يديه اللتين ودع بهما عطية
ان يجعل يديه في شكل السبعة ويخت حنكو في نصهن علامة الحيرة التي اصلا ما بتنفك كلو كلو
وجات الزوجة الصابرة شايلة طرقات الكسرة لراجلها التي تحسب انه ح يموت من الجوع
ود عشي قوم للغداء فرد عليها ود عشي تاني اسب دين بس مالك يا كافر اتا ماش لبيت الله
يامرة هوي شفتي العنز البعامية الواقفة دي اكلت الجواز مأشر وهدا الدبوس لفضتو قدامي
بردلاب الصينية وطرقاتها وقعت لقمة هنية قدام العنز البعامية
المرة عاينت لها شذرا وقالت للعنز البعامية
خلاس سافري اتي

روعه يا ود البوش ، يسعد ايامك

يسعد ايامك يا أمير
ومرورك دائما هو الاروع
تحياتي

يا زميل

ابداع قات الحدود

تحياتى

اووو زميل الزمن الجميل
حنتوب والبويضاء
الأمين كامل الأمين
ياخي مشتاقين
ومرحبا بك في المنبر
بقي انا بجي خفسة خفسة
شكرا يا زميل يا جميل وتحياتي

سلامات ود البوش ......
ناس قلمونيا (44) حكيهم جميل وواقعي
ومنهم ماتقدر تشبع ..
أنت ممتع يا عبدالله

سامي السامي يا سيد شباب المهندسين
سلام وشوق وان شاء الله امورك زبطت كما هي نيتك
ياخي اصلو ما ممكن تدخل وتسلم وتختصر وتمرق
ياخي ناس المعيلق ديل بكون عندهم مع عطية مساجلات ممتعة
فدحين تعال صاد لازمن وما انفك ايضا كذلك
انتظر عودتك يا جميل
شكرا جزيلا

يا مغتربين السعودية عطية راجيكم في الكريبة

السلام عليكم

غايتو عطية دا كان إتشبعط فيك طريقة تنزلو باخوي واخوك مافي ...
*
*
*
خارج النص : -
من خلال بعض القصص زي العرفت انك من العتامنة ...(طبعاً ما كانت متابع المنبر بإنتظام) .. وكل ما تجي سيرة العتامنة دي طوااااااالي بتذكر طريق الفوار ام بوشة الريداب العتامنة 44 ..الى الهدى وود المنسي ..والذكريات والمواقف ... تحياتي

Quote: وكل ما تجي سيرة العتامنة دي طوااااااالي بتذكر طريق الفوار ام بوشة الريداب العتامنة 44 ..الى الهدى وود المنسي ..والذكريات والمواقف

لا حولاااااااااا يا عمر ولا قولاااااااا
اذن انك بتعرف
دبل دق دبل دق دبل دق دبل دق ( دا صوت حركة الكرعين اثناء العوم )
لقطع كنار وادي النيل أو ودع امك بين ام بوشة والريداب
الجاي من اربعة واربعين ولحدي الري عبدالماجد
فهذا الكنار يبدو انك ( انك دا اسم مساعد لوري لوري عندنا )
يبدو انك قطعت هذه المسافة بالاسكيف ميات المرات ولك فيها ذكريات
فهلا حكيتها من وقت لاخر
خاصة لو كان عندكم لوري ب ح
او برينسة مكتوب عليها
شطة بس منقة مص ههههههههه
فعلا انا من العتامنة يا عمر
فرمحبا بك في العتامنة وفي المنبر
جزيل الشكر مع تحياتي

الاخ عبد الله ود البوش

متعة ما بعدها متعة - متعك الله بالصحة والعافية وان شاء الله عطية ما يلم فيك لا في الدنيا ولا في الاخرة

اختبارك الباب المتركش شنو ؟؟؟؟ (: ما في اعادة للمسلسل داك ؟؟؟؟

الاخ قسم الفضيل
سلام وعوافي
غايتو انا الزول البعجبو كلامي دا طوالي بقول زول باجور
حتى كان ولادنو في بطن اللذاعة هههههههه
حباك يا قسم حبابك
قت ليك يا قسم اذكرت ليك قصة داير تدخلا مع الباب المتركش ؟
الباب المتركش انقفل مع ربع كيلو اللحم الفات
شكرا جزيلا ياخي

ودا البوش...طبعاً حكاويك.ما عبر الأسافير .نحن محظوظين بيك...بث مباشر.

Quote: خلاس سافري اتي

وتعملوا ليها حفلة وداع كمان........

______________________________________________________________________

سلام وتحية للجميع...

اسماعيل عباس يا جميل
ياخي هي لحظات قليلة نلتقي فيها في دنيا صار وقعها اسرع وقاسي
ان لم تكن لحظات مرح وتصافي وضحكة صادقة ينبض لها القلب فرحا
قبل ان يستجيب لها الوجه تبسما يكون يا دنيا عليك السلام
.
.
تحياتي واحترامي والود الذي لاتعلمه كله

Quote: بيقولوا فيتامين الزنك يسمي فيتامين المحبه والعندو نقص في الزنك بيكون مكروه ياخي انت كلك زنك

الاخ او الابن العزيز بابكر دفع الله
محبة الناس اكبر كنز يجب علينا الحفاظ عليهو
ياخي دي تدخل الجنة عديل كدي
الله اجبر بخاطرك يا بابكر
وعشان كلامك السمح دا كان اطعم ليك خشمك بقصة بمناسبة الزنك دي
حبيب الله ود الجار عودي عطية متلحو العمر كلو
اها قنع من الدنيا بقى زول اخرة ساهي
يوم بتكلم مع ناس الجزارة بعدما ما اشترى حتة فشفاش وحتة كرشة وضلف هوادة
قاليهم يا ناس هوي انا سمعت عالم قال أئ زول حوشو فيهو باب زنك يوم القيامة
اقولو ليهو من اين لك هذا
لو من حرام طوالي اختو باب الزنكي في نار جنهم بعد ابقى احمااااااار وتششششش
في ضهرو
الجماعة قالو ليهو واتو ما بسعولك يا حبيب الله
فرد حبيب الله وقال اقدروا اسعلوني أنا أها اللسعلو
عندك شنو يا حبيب الله
فت عنز وبعامية
من اين لك هذه
مَوَلَدة

Quote: يا مغتربين السعودية عطية راجيكم في الكريبة

والله ياود البوش (وما طالبنى حليفه) عطيه ده مبارينا فى كل زقاق ومرات بنخلى ليهو الدرب ومرات بنصارعو والحمد لله ربنا مقدرنا عليه لكن تب غلبنا نكتلو(على قول سيدنا عمر لو كان الفقر رجلا لقتلته)
وحكومتنا الرشيدة مربيه لينا العنز تاكل الاخصر واليابس (كان سلم الجواز مابتسلم الريالات)

سلام يا عماد قريش
اسمك فيهو سماحة اسم عائلة وامورك كلها تزبط
وتبقى عطية للحديد
.
.
قال رشيدة قال هههههههه
شكرا جزيلا يا عمدة وتحياتي

الحبيب ود البوش عساك طيب كدى اول تبادى الحق عدل مشاركتك الفوق ديك ظنيتك افتكرت اخونا سامى عبد الله ده انا وكلنا فى البرالمه شرق

تانيا كلامك سمح زى نيتك ويعلم الله تدخل القلب لا احم لا دستور وما محبه الناس ليك هنا الا دليل لذلك

اهلنا العرب بقولو الدنيا مره وبتفتش لى وليداتا علا عيونا فوق فى صنقورا اها بتكون لافه البتلم فيهو كلو بترفعوا فوووق عشان تشوفو ياهو وليدا ولا مو ياهو
اها فى رفعتو دى زولك يغنى غنا جد ..... ان بقى من وليداتا ياهو الفارق عطيه وياها الشايلاهو فى صفحتا وماشه تكوس على باقى اخوانوا
اما ان بقى مو من وليداتا ياها المدلياهو وديل ياهن البغنو فجأه وبفلسوا بسرعه ....

اولك يا بادي شكرا جزيلا يا سامي على التنبيه
يا ولدي الدنيا دي ما فيها دائم الا وجهه الدائم
مابتستاهل غير لمة ناس في لحظات جميلة
الله ادينا غفلتا
.
.
قلت لي مصنقعة لفوق ترفع وترفس
النصيحة الوقعة حارة خاصة لو كانت فوق وطا دلجة
.
.
.
تحياتي يا حبيب ولقيت ليك رد هوادة ساهي في صمة خشمك ههههههه

Quote: ناس قلمونيا (44) حكيهم جميل وواقعي

الاخ سامي عبدالله
تحياتي
الحياة القاسية يا سامي بتخلق مفارقات
يحلو حكيها وتكون ممتعة جدا
شكرا ياسامي والمعذرة في اللبس الذي حصل مع اسم حبيبنا سامي عبدالمطلب
وكلكم عندي واحد احبة واخوة وابناء اكن لكم كل الاحترام والود
وشكرا جزيلا

حضوووووووووووور بي مهله
وعطيه ده لازم اسافر
بكره امشي ابيع البعاميه في العزازي وامشي المناقل اطلع بدل فاقد
قبل ما نفقدو
والمره دي عقد عدييييييل اقامه حره ما علي كفيل
علي حسابي انا
ما تنسي قول ليهو سوق العزازي يوم التلاته والسبت
نتلاقي هناك

Quote: حضوووووووووووور بي مهله

الحبيب القريب المبارك ود النعمة
ياخي حضورك شرف وما تحضر ليك شينة يا الكلس

Quote: بكره امشي ابيع البعاميه في العزازي وامشي المناقل اطلع بدل فاقد

يا حليلك يا المبارك الزمن داك ما كان في كمبيوتر
وتاشيرة العمرة مصدرها الوحيد ومرجعها هو الجواز
والجواز في بطن البعامية
اياهو الحل القالتو بت السيمت
سافري اتي
شوف فراسة الناس ديل واختصارهم للمواضيع
زمان يا المبارك عبدالمعطي اخوي قال لي رسل لي شيك عمرة
حسبت يمين يسار وقلت ياخي اشتري اقامة احسن
وزمان مافي وسيلة غير البريد ولا باليد
رسلتها بالبريد وفتح الجواب قايلو شيك عمرة لقاهو تاشيرة
فقال قولته المشهورة
عديل ود قنديل شرك للجغجاغة قبضلو فيل

Quote: ما تنسي قول ليهو سوق العزازي يوم التلاته والسبت

هو في حيا ما بعرف سوق العزازي يوم السبت والتلاتاء
سلم على ناس القصير
وكان بقينا حيين بتلاقى يا المبارك في سوق عزازيك دا
عزازي ربك مريسة وتبنك
هيييييييييييييييييع
انا هردام مطر قوز الرهيد البرمي الحيطة من النترة

Quote: حمد لله على السلامة ودالبوش مالك طولت الغيبة؟ ان شاء الله خير والله خرمانين ومتقريفين لينا زمن كان ما الدرديري وليد الكباشي كنا ضربنا الووب الله يديكم العافية اجمعين ويبعد عنكم عطية ووليداتو

شمس خليفة
سلام وتحية
ياخي المعايش جبارة وزنقة ترزي يوم التيسوعة حاصلة
والغريبة انا ايامي كلها تيسوعة والله جد
مخلوق شقاوة والله كريم
شكرا جزيلا ياخي والله اجبر بخاطرك الطيب

Quote: ياعبدالله الله يجزيك خير لكن صورتي دي من سنة 77 والان انا جد وحبوبه كمان

هههههههههههههههههه
طبعا من استوديو ابوكابورة بالمناقل
او استوديو علي بابا مش اسمو كدي الزمن طال الفي عمارة اراك ياخي
.
.
شكرا يا عمو بابكر ههههههههه

Quote: (عدل بواسطة مبارك النعمه النعيم on 07-04-2013, 03:28 PM) (عدل بواسطة مبارك النعمه النعيم on 08-04-2013, 00:21 AM)

يا المبارك انا ما وصيتك قلت ليك ما تعلم كيبوردك الهوبان
ألفخ بس وزي ما تجي تجي
اصلو شنو هو عرس ولا عيد ههههههههههههههه

يا حاج نعلك اصبحتا طيب
زمان كانت عندنا تقرة بعامية ماصعة خلاس
والله سرعتها لي الليلة ما شفتها في بهيمة
اها الزمن داك يومي جت تلقاني ماسك في ضنبها وهي مفحطة بي الفريق من ملف لي ملف
لحد ما بقت مرة كبيرة وعاقلة وبقى عندها اولاد بعد داك عتقتها
اها وطووووول يا زمن وكبرنا و(كترت احزاننا )
واكرمنا الله بالوليدات
أها الاجازة الفاتت دي كنا في الحلة
همسة بتي شافت ليها عنز جاية ماشة عليها
عليك امان الله فد سرخة جاااااااااااااااااااااااااك وجارية من قدام العنز
لمن انقرضت جووووووة المطبخ وخشت في حضن حبوبتها واتلفلفت بي توبها حتى هدت شوية وسكتت
استحضرت زمني الكنت قدرها.. وتقرتي البعامية ديك والرحلات المكوكية في الفريق ..
قلت ليها والله يا بتي زمنكم مسيخ مرة واحدة وما معروف الجاي فيهو شنو
وحكمة ربك العنز ولا كانت شغالة بيها الشغلة ماشة في حالا ساي عابرة الحوش
انت طبعا عارف المعاز مسالمات ما عندهن مشاكل
دا باقي لك يقولو فيهو شنو ساي

نادر النادر
عوافي يا زول عوافي

Quote: تقرة بعامية ماصعة خلاس

آمنت بالله العلي العطيم
ياخي ليك حق تضاربني عديل كدي لو كتبت بص بدل باظ لكن احمد ربي جات سليمة
والله يا نادر اتخيلت شكلك وانت تتلب مع التقرة البعامية الزرقة دي
والتقرة تزرط ( ماكماسك ضنبا عاد ) وتبعر واتا تنطط معاها نصت نهار سكة عمي
وعراقيك الدمورية ( ولا ود راهات ؟) يا زول على ضمان السواجير مافيها راهات
اياهو لوريكم المكتوب عليهو ياتور البرزن ... غايتو ما بطال اخير مننا
.
.
قت لي همسة صرخت جاك من عنز ناس ود اللحيمر
البنية قربت تدخل في صدمة نفسية ياخي حرام عليكم
تلدو إيال حلوين زي دا وتجيبو سواجير ؟
ياخي اسما همسة تقوم تجيبا السواجير الكلامن كلو عوووووك ورورووووووك
والبنية اسما همسة علي الليمان اكون جاها عضروف في عضم اضانا هههههههه
ربنا اخليها واحفظها لكن شقاوتا شقاوة مع معوزنا
ياخي احمد اخوي عندو ولد مسميهو اللشقر تيمنا بخروفه الاشقر فحل المراح والله جد
.
.
اولادي مشوا الاجازة ونايمين في نص الحوش البدون باب وبالكتير متكول ببرميل
تقومي يا واحدة من نعاج احمد احمد تقيف جنب اريج بتي
واتا يا حمودي تصحا مخلوع وتصحي اريج
اريج اريج اعملي حسابك اتخيلي الكـلـب الكبير يبي ياكلك ههههههه
وبكرة من الصباح قال انا تاني ما بنوم في البر ههههههه
قال تقرة بعامية قال
.
.
ابدااااااااااااع يا نادر ابداع
شكرا يا حاج

ود البوش الجميل
اللذيذ ورايق
سلام
قال ليك في واحد عطية ماسكو مسكة شديدة وموقع معاهو عقد طويل الامد .. وعندو جارو طوالي امورو ماشة وفاتحة معاهو من اوسع ابوابه .. وجمبهم جبل قالوا ساكنه فيهو حظوظ الناس .. المهم صاحبنا الغني طلب من جارو عطية يطلع الجبل يشوف ليهو حظو .. عطية بداء المساومة في السعر الغني قال 750 العطية قال الا الف .. ما اتفقو ..
عطية دور ولف ما لقى حاجة جاء للغني وقال ليهو خلاص جيب ال 750 الغني قال ليهو لا 500 بس .. زولك ما عطية ماسكو قال لا ..
وتاني مشى لف ودار ما لقى حاجة جاء راجع الغني قال ليهو 100 بس برضو رفض ..
اخر حاجة جاء للغني الغني قال ليهو 10 جنية بس لو عاجبك اطلع شوف لي حظي ..
عطية وافق وطلع الجبل نادى على حظ الغني جاهو راجل مهندم ومرتب ونظيف وسمين قال ليهو انا حظ فلان وقول ليهو اطمن امورك باسطة وماشة تمام التمام ..
عطية بعد بداء ينزل من الجبل اتذكر نفسو قال خليني ارجع اسال من حظي رجع سال على حظو جاهو راجل مكلفت ومبهدل و######ان وجلابيتو مقدودة وشايل ليهو ربابة يصلح فيها .. عطية بي استنكار سالو انت منو قال ليهو انا حظك يا التعيس انا عطية الماسكك وما بفكك وعلي الحلف العشرة جنيه اللقيته من الغني كان ما الربابة دي انقطعت وانشغلت عنك بي تصليحة العشرة جنية ذاته ما كنت لقيته ..

اها يا اخوي الراجل دا ربنا يكفينا شرو ويبعدو عننا وعنكم وعن كل الاحباب

زمان يا ود البوش عندنا عنز بعامية خمسة شكنل (العينة البتلد تلاتة تلاتة ) .. غايتو العنز دي عندها اجهزة انذار مبكرة في غاية التطور ..ما عارف منو البقول ليها تكل ناس فلانة داك فاتح امشي عليهو ..وبعد شوية تجيك فلانة دي تبكي عنزكم اكلت كسرتي كلها ...ولو الحلة فيها عرس من الراعي طواااااااااالي على محل غسيل العدة وباقي الكسرة ...




خارج النص : -
من الطرايف ..كل ما نجي بمنطقة ونحن في طريقنا للهدى او ود المنسي عندنا ناس عندهم قصص محفوظة يعني لو في السنة جينا خمسة مرات تتكرر القصة خمسة مرات ..بلولة ود عطا المنان عندو أهلو في الريداب طوااااااالي يذكرهم ..وهكذا .. في إجازتي الفاتت دي في الطريق لود المنسي وجينا في الهميج وقبة النعمة الطاهر .. وبي ضحك حاكيت ودعمتي ابراهيم العيش لما يجي فايت جنب القبة .. ضحك أخوي وقال والله قبل اسبوع جينا سوا برضو قال نفس العبارة ...
تحياتي

عرب الجزيرة بي جاي
وزكريات الزمن الجميل
....

عاد نحن نفتح شُفع
لا بدخلونا روضة ولا بدونا الملاهي
ولا بعلمونا ون / تو / ثري !
بعد نتعلم الشيطنة والكلام
لازم نعرف نقول للغنماية _ تك _ وللحمار _ عر _ ولل###### _ جر
أول يوم عمل نباري الأخت الكبيرة للساروحة
عشان ح نمسك منها المهمة أول ما تدخل المدرسة
وفرحة ما بعدها فرحة وشايلها المُطرق ... لزوم تك ..تك
التجمع المثير للغنم منظر ولا في اسبيس تون
وفي الرجعة من قِديم الغنم نغشي ست اللقيمات متعة ما بعدها متعة
...
لقيت في بيتنا وأنا شافعة 3 غنمايات
لم يكنّ قد فزنا بأسماء لهن
عدا واحدة كان لها شرف التسمية
كنا نسمع هذا الأسم فيحدث صدى في مسامعنا البريئة كمن يسمع نانسي أو شذى
أمي تنادي .. العنز البعامية دي سادرة وقادرة قطعت الحبل
البعامية في كل البيوت مشكلة
شاهدتها بأم عيني ذات صباح وأنا اذهب لراكوبة الجيران
أهل سعية ما شاء الله بقر .. ونعاج .. وغنم . واللبن تلاتة جرادل واحرص أنا على أن احضر هز الروب
واذهب للراكوبة لأستمتع بالطوطحانية
بت الجيران فتاة البيت الكبيرة كانت في حالة انسداح في عنقريب سغيير وماخده نومة ضحى
وكانت صرختي .. البعامية تتلذ بــ مسيرة البت النايمة
صحت أختنا الجارة لتجد المسيرة ذات الأمواج قد اتلاشت في فم تلك التي تسمى البعامية
والله يا ود البوش .. البت بتساكك فيها بي عكاز عشان تنتقم منها وهي مازلت بتلوك في الشعرة
المهم انتقمت منها واتمكنت منها ومسكتها وأنا اشاهد هذه الدراما النادرة
( بركت جارتنا علي كرعينها ومسكت اضان البعامية ( صاحبة الأضنين السغار وعضتها لمن كوركت )
وأنا بالخُلعة شلت نعلاتي في ايدي وجري بيتنا .... الغنماية الغنماية أكلت مسيرة ..............)
ولم تنتبه لي أمي أطال الله في عمرها والسبب ..
لقيتها بتجابد وتعاتل وتناتل زي الفي حلبة مصارعة
البعامية حقتنا ... غرزت راسها في صفيحة الدقيق
ولم تفلح أمي في الأنتصار عليها إلا بي عضة قوية .. لتخرج وشها من الصفيحة زي المصارع الكان بدبغ وشو بالابيض جير كان او بوهية

شكيتها علي الله البعامية اتطورت من أكل مساير البنات والدقيق ... لي أكل الهويات .. وات جاي البلد يا عبدالله ابقى عشرة علي هويتك .

ودالبوش حبابك يازول ياوريف
وكيف عقبك جت عليهم
انا اصلا كنت سارب وجاي راجع
راكب العشاري اتاريهو مجفر
مشيهو ميت المهم وصلت ونزلت
المخلوفة وجبت العقال عقلت
الاصهب ومشيت علقت للعنقان
وفرزت الربوب من العنقرة
وكان عندي بهم دغور رضعتو
وحلبت لي لبن اتجلطتا بيهو
ومشيت علي السعن ضربت ليك
كورة حقت قارص بي مزااااج
وطوالي قمت خلفت ليك رجل في رجل
وفتحت سودانيز ولقيت بوستيك
الطاعم دا ورتعت ليك فيهو رتعة عتوت
في بطانة وابوالملود راكب في ضهرو
ياخي تسلم وتسلم البطن الجابتك

ودالبوش
تحياتي

سرد جميل ورايع .

عطية ذكرني واحد خالنا رجل نكته وكان عطيه مكتفه ولاف جنزير
حول رقبتو حتي فتح الله عليهو باقامة في السعودية وقال الحمدلله بمشي بطوف بالكعبة
وبفارقك فراق الطريفي لجملو , وجاء السعودية وقعد خمس سنوات وعطيه زي ضلو ابي يفارقه
تب وقرر يرجع السودان عشان عطية ذاتو يمكسوا عطيه سوداني وبعد مارجع البلد كلنو الجماعة
بسعلوه جبيت شنو يافلان يضرب ليهم رقبتو يقول ليهم جيت بدي لانو الوحيده عطيه ما قدر عليها .

ود البوش يا جميل .. لم أقرأ منذ مدة قصة قصيرة مشبعة كتلك ..
موعودون بقصص قصيرة جميلة مثل عطية وعنزته البعامية ...
لك الحب والشكر كيمان .. كيمان
فرحات

ود البوش يا جميل .. لم أقرأ منذ مدة قصة قصيرة مشبعة كتلك ..
موعودون بقصص قصيرة جميلة مثل عطية وعنزته البعامية ...
لك الحب والشكر كيمان .. كيمان
فرحات

Quote: لم أقرأ منذ مدة قصة قصيرة مشبعة كتلك ..

فرحات يا مُفَرِح
دي محبة منك ساهي يا فرحات
عولقي دا ما وصل مرحلة انو اكون قصة
وكمان مشبعة يا فرحات
ياخي اتا دايرني اكسر رقبتي ولا شنو ؟
بقيت اتلفت عشان امكن برضو في زول قاعد جنبي
.
.
فرحات شكرا جزيلا ياخي والله اجبر بخاطرك
ممتن جدا لك اخي فرحات
تحياتي

الريس يوسف السماني
سلام واحترام
مرورك هو الارواع ياخي

Quote: بسعلوه جبيت شنو يافلان يضرب ليهم رقبتو يقول ليهم جيت بدي لانو الوحيده عطيه ما قدر عليها .

برضو عطيتو ما قصر معاهو
في ناس اضايقهم في تولا ذاتا

سليمان القرشي يا جميل حبابك وحباب جيتك الرايقة

Quote: وكيف عقبك جت عليهم

طيبين وجرهن ملان عجين
ما سعلت منك شينة

Quote: راكب العشاري اتاريهو مجفر مشيهو ميت المهم وصلت ونزلت المخلوفة وجبت العقال عقلت

أبقى داخل يا الكلس

Quote: وفرزت الربوب من العنقرة وكان عندي بهم دغور رضعتو وحلبت لي لبن اتجلطتا بيهو ومشيت علي السعن ضربت ليك كورة حقت قارص بي مزااااج

لوحة لا يتبين روعتها الا أهل السعية

Quote: وفتحت سودانيز ولقيت بوستيك الطاعم دا ورتعت ليك فيهو رتعة عتوت في بطانة وابوالملود راكب في ضهرو ياخي تسلم وتسلم البطن الجابتك

تسلم يا الحبيب ولامثالك اكتب واستمتع بلقاكم
شكرا جزيلا سليمان القرشي
تحياتي وودي الذي تعلم

يا سلاااااااااااام العزيزة رشا بابكر عديل كدي
دي ترحبية وضربة راراي وحكايتك دي دايرة ليها تفينة في الواطا دي
في ضل ضحى في انتظار راعي الموز أدفر
انشرب الشاهي دا واجيك

حبابك تاني رشا بت عمي بابكر
وحباب ود راوة والحصحاص حلاوة

Quote: عاد نحن نفتح شُفع لا بدخلونا روضة ولا بدونا الملاهي ولا بعلمونا ون / تو / ثري ! بعد نتعلم الشيطنة والكلام لازم نعرف نقول للغنماية _ تك _ وللحمار _ عر _ ولكـلـب _ جر

ما اياهو دا الخلاكم تتفوقو علي ناس البندر اتي قايلة شنو
تجوهم في الجامعة بمخ نضيف اسوي كحا بو وتلقوهم اتعولقو بالعولق الفوق ديك
ناس روضة وناس ملاهي ومبنبرز هههههه والله صحي

Quote: أول يوم عمل نباري الأخت الكبيرة للساروحة عشان ح نمسك منها المهمة أول ما تدخل المدرسة وفرحة ما بعدها فرحة وشايلها المُطرق ... لزوم تك ..تك التجمع المثير للغنم منظر ولا في اسبيس تون وفي الرجعة من قِديم الغنم نغشي ست اللقيمات متعة ما بعدها متعة ...

لا اله الا الله
علي الطلاق اجعص مخرج في هليود مهما وسع خياله مستحيل يستدرك
الصورة اعلاه ... دي الا المغولين في الفرنغينة والبرجوبة

Quote: عدا واحدة كان لها شرف التسمية

نسيتي اسما يا رشا
وقسما كان تكون دي برواة البوست ومراح الراعي كلو والله جد
حاولي اتذكريهو اخخخخخخ من المدنية قد عولقتنا

Quote: واذهب للراكوبة لأستمتع بالطوطحانية

اتخيلت شكلك يا رشا وسفنجتك الخدرا وفردة منها طارت هناك جنب اللداية

Quote: بت الجيران فتاة البيت الكبيرة كانت في حالة انسداح في عنقريب سغيير وماخده نومة ضحى

سترك يا رب
بدورك يا الحبيب بدورك لي قريب بدورك في الهنبريب ويكون الجو رهيب

Quote: وكانت صرختي .. البعامية تتلذ بــ مسيرة البت النايمة صحت أختنا الجارة لتجد المسيرة ذات الأمواج قد اتلاشت في فم تلك التي تسمى البعامية

Quote: والله يا ود البوش

والله شدة ما مصدقك يا رشا انا ذاتي حكايتك دي أحلف عليهابالتكسر رقبتي
اتقول حاضرا بالله اتقول متفن في الواطا جنب البت الكبيرة النائمة في ضل الضحى
كنت اسع حميت العنز العميكة دي تاكل مسيرتها وقدمتها للراعي وجيت صاد تاني اشوفا
حست ولا لاسع نائمة واحاحي منها ضبانة الحمير وغلا اطرشا بحية زيتة مُرَة

Quote: وأنا بالخُلعة شلت نعلاتي في ايدي وجري بيتنا .... الغنماية الغنماية أكلت مسيرة ..............)

فردة السفنجة الخدرا اطارت جنب اللداية شلتيها ولا طفرتي بفردة واحدة ؟

Quote: لتخرج وشها من الصفيحة زي المصارع الكان بدبغ وشو بالابيض جير كان او بوهية

أئ تعليق سيفسد روعة بيان التشبيه اعلاه
.
.
رشا بت عمي بابكر
الله اديك الصحة والعافية
شكرا على هذا الابداع

Quote: عنز بعامية خمسة شكنل (العينة البتلد تلاتة تلاتة )

عمر السلمة يا حبيب
حبابك والله حبابك في حوش السعية

العنز الولادة تستاهل وكمان تلاتة تلاتة دي مبطرة
.
.
الهدى _ ود المنسي _ الهميج من اعز المناطق عندي وفي فيها ذكريات جميلة
ياسلاااااااااااام يا عمر ومليون سلام
والجزيرة سلام
حلولنا وكنابينا سلام
والسلمة سلام
شكرا عمر السلمة

الرائع علي محمد الفكي
تحياتي

Quote: وعلي الحلف العشرة جنيه اللقيته من الغني كان ما الربابة دي انقطعت وانشغلت عنك بي تصليحة العشرة جنية ذاته ما كنت لقيته ..

هههههههههههههههههههه
مباااااااااااااااالغة يا علي مبالغة
حكاية هو الواقع بعينه في شكل شخوص خيالية
شكرا يا علي ياخ والله اديك العافية

ود البوش سلام وصباحك خير

حليل الغنم وحليل السعية ، نحن سعيتنا سعية مدن ساي

غنمنا مربطات في الحوش ونشتري ليهن القش من القشاشة .

العَز ( هكذا ننطقها بحذف النون ) نسميها الداقرون أي عديم القرون والكلمة دي بالمناسبة تركيبة انجليزي+ عربي dehorn

غنمنا كان معذباتنا بدخول التكل وأكل الكسرة وشرب باقي العجين . وكان لمن ليهن في كراس ول نوتة مكرفة بياكلنها طوالي.

بمناسبة عطية :

جارنا الاستاذ أمين عجبين رحل إلى الحي جديد ، وبني بيتو جالوص لكن على مستوى راقي ، جاره سعيد كان عطية ملازمة

وشغلوا كلو يوميات رزق اليوم باليوم ، وهو زول طرفة ،
أستاذ أمين لاقى سعيد في الشارع وقال ليه يا سيعد تعالوا ( كرِكو لي بيتي ) أي أجلطوا لي لي بيتي دا بالزبالة ( لقرب موسم المطر )
سعيد رد عليه هلا هلا ، انت عجبين ونحن عجب واحد ما لاقينو .
تحياتي :

جاهزين للترجمة : لترجمة كرك ، والزبالة

تحياتي

يا جلال عيسى الفيسبكي
يا اخوي عطية دا زي السكري
ما تلاويهو تكون ليهو صديق وتتصالح معاهو ومع نفسك

Quote: ودالبوش يا جميل التحية ليك والتقدير حبوبتا لينا تشكي واحد من احفادها عندما يكاوش غداهو وغداء اخوانو . "شكيتك علي الله آلمكوفر عااارفااك من تخش التكل دا كان العنز البعامية" غايتو كامل تضامني مع العنز البعامية في محنتها طبعا قريت العنوان وقبل ما اشوف كاتبه ايقنت انه عبدالله ودالبوش .

الحبيب الفيسبكي علي شاطر

عندنا مقولة تقول ليك ما تبقى عليك حكاية العنز تاكل بعد تنشرط
اتا عارف العنز لمن تلقى فرصة في اكلة مستساغة وقيمة زي الدقيق ولا العيش
جب جب جب جب بتحاول قبل ما اجي بني ادم اضرها تخم اكبر كمية ممكنة
وتمشي الضل تفقع الجرة ولو كانت الكمية كبيرة تفور في بطنا وتشقها كرررررررر
.
.
شكرا يا علي للمتابعة المستمرة
وتحياتي

يالغت العنزة بالله دى عملها تعملى
كلامك طاعم زيك يا ود البوش
وانا اكتر زول بستفيد من بوستاتك دى
غايتوا شى افهموا وشى ما بفهموا الما بفهموا بكون لى هوم ويرك بمشى اسال منوا وعملت لى دفتر

مرورك يا الملكة وضاحة يخلي عطيتنا يطَفِر بالطاقة
شكرا صاحبة الايادي البيضاء حربا ضروسا ضد عطية
.
.
.
آيفوني وينو ؟

حسين ديقول صديقي الجميل
الزول الكايس ليهو لمة ولما ما لقا اللما سكت ساهي
تحياتي يا كلس
عاين جاي

Quote: العَز

عزي
العنز عنزي
الناس المستعجلين بقولو العز والممهولين بقولو العنز

Quote: الداقرون

هذا الاسم غير موجود مطلقا في منطقتنا بالجزيرة
يظهر انه في الشمالية فقط

Quote: وكان لمن ليهن في كراس ول نوتة مكرفة بياكلنها طوالي

اها دا شغل المضرة

Quote: كرِكو لي بيتي

الجار عودو عطية ملازمو زيو ضلو
جاحة بت ود النيل قالت لي تعال لَيِس (كرك ) لي حوش الغنم دا
عمك الجار عودو بَل الزبالة الليلة وبكرة جا فتحا مو فقران وشفقان
الحاجة جات شمت الزبالة ولقيتا لسع ما عفنت
طبعا مفروض عشان تعفن اصبر عليها تلاتة يوم ولكن كيف مع عطية وفقرو
اها الحاجة شمت الزبالة وقالت للجار عودو
هييييي يا الجار عودو لشنو فتحتها قبل ما تعفن
فقال لها الجار عودو
أنَخَرَا ليك فوقا يا بت ودالنيل أنَخَرَا ليك فوقا

عـبـدالله ود الـبـوش ،،،


بـوسـتـاتـك حِـلـوة و طـاعـمـة ،
زي الـحـلـوي الـعـمـانـيـة ،
ربـنـا يـخـضـر ضُـراعـك ،
يـا رونـق الجـمـال ،
،،،







عزالدين عباس الفحل
ابوظبي

عزالدين الفحل
الناس الاصلو عطية ولا لاقاهن كلو كلو
ربنا ازيد وابارك
وشكرا على كلامك الجميل ياخي
تحياتي

ود البوش ، سلامات يا زول يا جميل ...
امي لها غنم ، ماشاء الله ، طول وعرض ولبن ، حتى ان عبدالوهاب اخوي قال ذات مرة:
ان غنم امي ديل احسن غنم في الحلة ...
سلوك كهرباء بيت عبدالوهاب تمر بزريبة الغنم اولا ... قبل الوصول لبيته ،
وهي بالمناسبة سلوك تعبانة ، من النوع المربط كلو بي اكياس النايلون ،
قوم يالسلك انقطع ، والكهرباء تضرب الغنماية العمدة في غنم امي ...
الغنماية تفرفر من الكهرباء ، امي شافتها طويلا ، ورجعت انبطحت وهي زعلانة جدا ...ومقلقة على غنمايتها المحبوبة ،
التي بين الحياة والموت ...
عشة وبخيتة اخواتي يغرغرن في الغنماية المكهربة بالليمون ، وموية الملح ،
وعبدالوهاب يَشَلوِط بين الغنماية التي تُعالج ، وصاحبتها الزعلانة ....
والغنماية ترجف من الكهرباء ، ظنها عبدالوهاب بردانة ، وجاء لامي التي تعتقد انه السبب في ضربة الغنماية ، عامل سلوكه الكحيانة دي ...
جاء للوالدة وقال : يا حاجة ما عندك بطانية نغتي بيها الغنماية دي ، شايفا بردانة شديد ،
ردت امي : يا جنا انا البطانية ما لقيتا لي رقبتي ، الغنماية بين ابريا والتريا ...
،،،،،،،،،،،،،،،،،،،،،،،،،،،،،،،،،،،،،،،،
الغنماية بقت كويسة ، واتحفتنا بلذيذ من اللبن ، والعِتَّان ...

شكرا حسين ديقول للدعم الفني بالصورة العجيبة
وكريت ما غريب عليها تسوي اكتر من كدا

عبدالمنعم الطيب يا مبدع
سلام وشوق
ياخي دي اسما كتابة بالكاميرا تنقل صور متحركة

Quote: عبدالوهاب اخوي قال ذات مرة: ان غنم امي ديل احسن غنم في الحلة ...

هرشو وياكل لحم كرشو عبدالوهاب اخوك
.
بس دي فلحاتو اتفكر في غنم امنا
ما اسوي ليهو سلك زي الناس

Quote: وهي بالمناسبة سلوك تعبانة ، من النوع المربط كلو بي اكياس النايلون ،

ادناه صورة حية بثلاثة ابعاد بالله شوف

Quote: الغنماية تفرفر من الكهرباء ، امي شافتها طويلا ، ورجعت انبطحت وهي زعلانة جدا ...ومقلقة على غنمايتها المحبوبة ، التي بين الحياة والموت ...

وهنا اضاف للصورة صوت عديل يا لطيف يا لطيف تلطف بعنز امي
(عشة وبخيتة اخواتي يغرغرن في الغنماية المكهربة بالليمون ، وموية الملح ،
)
.
.
شكرا جزيلا ياخي والله اديك العافية

ود البوش سلام


شفت جنس دا

نخش ونطلع زي الضل

بس : داخلين ضاحكين

مارقين ضاحكين

ونقول: ( فتحوك يا بنية كتاب

لي عين العالم

شان يقرا ويتعلمْ

لكين العالم كضاب

بقرا وبتهكم

-جورج)

ملحوظة: لي أسي ما لقيت لي بيت، قول يا الله.

الريس جورج بنيوتي
سلام وتحية واحترام

Quote: بس : داخلين ضاحكين مارقين ضاحكين

دائم عليك الضحك والابتسام

Quote: ملحوظة: لي أسي ما لقيت لي بيت، قول يا الله.

يا الله يا كريم ترخس البيوت
.
.
طلبك قاسي يا زعيم ما بترضو بينا
مرورك اسعدني بالجد مع الشكر والتقدير