حكمة فأر

علاء الدين ولد فقير بن فقير بن ستين فقير .. والده كان يعمل في مهنة فتل الحبال اي صناعتها . .. وتعلم علاء الدين المهنة من والده .. لم يحظى بالتعليم الا بالاولى منه فقط بحيث اجاد القراءه والكتابة .. ثم تفرغ لمساعدة والده في صناعة الحبال وبيعها .. وبالطبع زبائنهم كانوا من صانعي السراير ( العناقريب) والمراكب والمزارعين وكل من يحتاج الى الحبل في حياته اليومية .. عندما كان الحبل واحد من اساسيات الحياة ..
توفى والدي علاء الدين وتيتم وهو شاب لم يورث منهما سوى الكوخ البالي الذي يؤويه وبعض ادوات صناعة الحبال ..
تطورت الحياة وبدا الانسان يستغنى عن الحبال المصنوعة من سعف النخيل والدوم الا قليل .. تعب علاء في كسب عيشه وهو يحمل ربطة الحبال في كتفه ويجوب بها الاحياء من حارة لحارة ومن زقاق لآخر .... قليل من يشتري منه بعد ان يبح صوته بالنداء .....ومعظم المشتريات من اجل التعاطف ققط او مجاملة ..

في يوم من الايام بينما علاء الدين يدور في جولته اليومية اليائسة والبائسة باحثا عن مشتري لحبل ولو ما يكفي لقمة يوم سد بها رمقه .. لاحظ في احد البيوت الخربة المهجوة شئ يلمع لفت نظره .. وعندما وصل علاء الدين ناحية الشئ وجده مصباح قديم ( فانوس) حتى غطاء فتحة الجاز مفقود .. فرح علاء الدين وشعر بان الفرج قد اتى وخطر بباله قصة علاء الدين والمصباح السحري القديمة ..

خبا علاء الدين المصباح في مخلاية الحبال وتوجه به الى كوخه فورا .. ليبدا في تغيير حياته .. دخل علاء الدين كوخه مسرعا وقفل الباب خلفه .. انزل مخلاية الحبال واستخرج الفانوس اي المصباح .. وبدا يدعك فيه.. وهو يفكر في الطلبات التي سيذكرها للمارد خادم المصباح الذي سيخرج بعد قليل ..

بينما هو يدعك في المصباح سمع صوت كركبة داخل المصباح فرح وتهللت اساريره ولكن من فتحة صب الجاز خرج له فارا صغيرا واضعا يديه في اذنيه ممتعضا ومتكلما .
الفار: ياخي انت مزعج بشكل ياخي ( ماضرستنا) تكرش في ظهر البيت عملت لينا ازعاج ..
علاء الدين مستاءا ومحبطا : شنو ياخي وانت الجابك هنا شنو .؟؟
الفار: انا الجابني شنو انت تشيل بيتي وتكرش في ظهره وتسال بعد كدا .
علاء الدين : ياخي انت احبطتني ونزلتني من قمة الاحلام انا منتظر يخرج لي مارد من المصباح ويلبي لي كل طلباتي يطلع لي فار ؟؟
الفار: هو انتو يا بني البشر عندكم حاجات عجيبة يعني اي شخص يدعك مصباح قديم لازم يطلع له مارد يلبي طلباته هو انتو ما عاوزين تعملوا حاجة بمجهودكم .

علاء الدين : هوي يا فار انت شنو ما بنعمل مجهود انا افتل في الحبال من صلاة الصبح والف بيها بعد العصر ابيعها وفي النهاية ما اطلع بحق لقمة العيش تجي تقول ما بنبذل مجهود .. عرفك شنو انت للمجهود ما انت كمان مازي الفيران بتبذل مجهود تحفر بيتها وجحرها انت لقيت فانوس قديم ورحت ساكن فيه لابتدفع ايجار ولا بنيته بنفسك ..
الفار : اسمع هنا يا انسان .. اسم الكريم ايه لو سمحت .؟؟
علاء الدين : محسوبك علاء الدين .
الفار : الا برضو ؟؟
علاء الدين تقصد شنو ببرضو دي ..
الفار: يعني اسمك علاء الدين ولقيت مصباح قديم فقلت خلاص حبكت زي قصة علاء الدين الاصلية .
علاء الدين : بالظبط هذا ما حدث .. عشان كدا انت بقيت سبب احباطي ..
الفار: طيب ما ملاحظ حاجة يا علاء الدين ؟؟
علاء الدين : حاجة زي شنو ؟؟

سلامات درديري
تعرف ياكباشي في ناس
ممكن يكون عندها موهبة كتابة
القصة لكن انو نجد كاتب يمزج
القصة بمواد تعليمية دا الاجمل
يعني انت كمثال اي قصة حقتك
ممكن نحن ناخذ منها درس معين
كقصة الفار انت ماتميتها لكن حسب
تخيلي ممكن الفار يدي علاء الدين
درس في الاعتماد علي النفس
والسعي بدل ان يركن للمارد
وهي تخيلات كل انسان عاجز
في هذه الحياة بصورة عامة ممكن
ان يكون مثل علاء الدين يبحث عن
الجاهز بدل ان يشقي ويكد ويجتهد
الف شكر اخي درديري وربنا يديك
الصحة والعافية ولاعدمناك
تسلم

سلام يقرشي
كثر خيرك
كن قريب وبخير

الفار: ياخي انت من شدة ما عايش في الوهم ما لاحظت انه انا فار وبتحدث لغتك بفصاحة قابلك فار قبل كدا بيتكلم مثلي ؟؟
علاء الدين : الحقيقة صحي انا ما لاحظت فعلا انا عشت في الوهم وانت ما فار عادي يمكن تكون كمان جني صلاحيته منتهية ..
الفار: شنو هو جني صلاحيته منتهية اصلو حجر بطارية هو .. شوف هنا ياعلاء .. انت انسان وحيد ومعزول وانا فار وحيد ومعزول ممكن نتعايش مع بعض ونونس بعض وممكن نتبادل الافكار ..
علاء الدين : وفكرة ما بطالة وهات يدك وما قلت لي اسم الكريم منو يا فار افندي؟؟.
الفار: محسوبك سيسو ؟.
علاء الدين : تشرفنا يا سيد سيسو .. انت من اليوم دا حتكون صديقي الوحيد المؤنس وحدتي ..
سيكو: يعني لو اتزوجت ما راح تتخلي عني ؟؟
علاء الدين : وانا لو اتزوجت انت كمان نشوف ليك فارة كدا تليق بالمقام وتصبح عايلتكم عايلة صديقة ..

وبعد ما تصادق الاثنان تحدث سيسو قائلا :
سيسو : اها بمناسبة الصداقة دي ما عندك حاجة ناكلها ..
علاء الدين : وانت كمان طلعت مقلب وفقري من وين اجيب لك اكل ماشايفني لافي من العصر ما بعت ولا حبل وانا ميت من الجوع.
سيسو : يعني انا حا اكلفك خروف ما حتة رغيفة تمشي الامور معاي .
علاء الدين : ما تشمشم براك لو تلاقي حاجة تاكلها او كمان تكون فار ضارب وما بتعرف تشمشم زي باقي الفيران .. ولا اقول ليك هاك اكل الحبال دي مادام هي ما جايبه همها تكون عملت فايدة وعشتك على الاقل ..
سيسو: ياااااع انا اكل حبال ؟؟ ..
علاء الدين : اها تاكل شنو انت يانجم استار اكاديمي .. الفيران البنعرفها سلوك الكهربا اكلتها ..
سيسو: الفيران لمن تاكل اشياء قوية ما غذاء ولا وجبة هي تاكلها حتى تمنع اسنانها من النمو المفرط .. والا ستصبح اسنان الفار ضعف حجمه وتمنعه من المشي .. لذلك هو بياكل الاشياء الصلبه حتى يبراها اي اسنانه ..
علاء الدين : اقسم ما في شئ يبرى الراس غيرك انت .. كمان ناقصنا محاضرة عن عالم الفيران .... تعال نطلع نمشي السوق قرب المطاعم يمكن نلاقي حاجة ناكلها ...

سيسو : وانا حا امشي معاك كيف في فرق شاسع بيننا في الخطوات ..
سيسو : انت ما تمشي انت تركب هنا تقعد في الجيب .. احسن في جيب القميص فوق عشان ما ندهسك كمان ..
وفعلا يتسلق سيسو جسم علاء الدين ويستقر في جيب القميص ..
وهم ذاهبون ناحية السوق يستمر الحوار بينهما وبعد مرات ضحكة فاقعة من علاء الدين جعلت المارة في الشارع يصفقون يديهم ويهزون رؤسهم في حسرة على علاء الدين والذي بدا لهم كانه فقد عقله وهو يكلم نفسه ويضحك بعض المرات .
علاء الدين : ياخي انت هبلتني تعرف الناس يعاينو لي باستغراب وانا اتحدث معاك فاكرني جنيت .. من فضلك اسكت ياخي ..
سيسو: اسكت وين ياخي وانا ما صدقت لقيت حد اتحدث معه ..
علاء الدين : ياخي واصل في الكلام هو انا كنت لاقي حد يحدثني ..
احكي لي عن حياتك وانت من وين جيت وسكنت في المصباح وكنت ساكن وين قبلها ..
سيسو: اخذ نفس طوييييل وقال لعلاء الدين دي حكاية طويلة انا هسع جعان ما بقدر احكيها ليك ..
علاء الدين : يا راجل اقصد يا فار سيبك من امور الابتزاز دي احكي بس .

سيسو : ابتذاذ شنو يا اخوي هو انت حيلتك حاجة عشان تدفعها .. الا تقسط حبل ولا تاجرو ايجار ينتهي بالتمليك .. انا قصدي انا تعبان من الجوع ةالقصة طويلة ما راح اقدر احكيها ..
علاء الدين : هو انت سكت من طلعنا من البيت خشمك دا ما انقفل ..
على كل حال خلينا نواصل قربنا من المطعم ..
وقبل ما يصلوا يسمع علا الدين انه احد الماره يناديه ..
الرجل : يا شاب لو سمحت ممكن توصل معاي الكرتونة دي لحدي موقف المواصلات ..
علاء الدين طبعا كان ناوي يرفض وشعر بالاهانة لو لا عضة من سيسو في صدره فوقته حتى صرخ ..
علاء الدين : شنو يا سيسو عاضني مالك ؟؟
سيسو : عاوز ترفض وانت ما عندك جنيه تاكل به رغيفة واحدة ..
علاء الدين لكن دي ما مهنتي ؟؟
سيسو : شنو مهنتي وما مهنتي هل في انسان اتولد حمال او صانع حبال .. اساسا هذا هو سبب فقرك .. لانك منتظر الناس تحتاج للحبال من جديد بعد ما تطوروا وتخطوا مرحلة الحبال .. ,جلست تنتظر وتبذل مجهود على الفاضي بدلا ما تقدم للناس خدمة ثانية هم محتاجين لها ..
وفعلا علا الدين عقل فكرة الفار وتوجه ناحية الرجل وحمل الكرتونة وتبع الرجل حتى موقف المواصلات .. ليمنحه الرجل مبلغا من المال لن يحصل عليه لو باع كل انتاجه من الحبال في اسبوع ..
اخذ علاء الدين المبلغ وهو فرح متجها ناحية المطعم وقال مخاطبا سيسو : الظاهر عليك انت عفريت معدل في شكل فار .. ولا تكون عفاريت الجن غيرت استراتيجيتها .. على كل حال انا كنت ناوي اباصر ليك عشا فول لكن شكلها قلبت لحمة عدييل كدا يا احلى سيسو في الدنيا ..

سيسو : لا لا لا ياخي خلينا في الفول وخلي باقي لبكرة لانه الحكاية غير مضمونة .. وبعدين انت ما راح تستطيع تغير حياتك لو ما وفرت من دخلك اليومي .. خلينا في الفول احسن ..



تعشى الصديقان..
طبعا ما كان سيسو ممكن ينزل على الطاولة ويتناول وجبته مع علاء الدين والا كان انهالت عليه الشباشب والاحذية من كل النواحي وخاصة من الجرسونات ( الشليقين .. اي الملقوفين ) .. لذلك كان علاء الدين يتناول لقمة مرة مرة ويدخلها في جيبه تحت استياء بعض زبائن المطعم من هذه الحركة .. وخاصة بعد ما بدا زيت الفول يبين على جيبه . وكذلك بعد ما لاحظوا ان علاء الدين يميل ناحية جيبه ويهمس فظنوا به مس من الجن .. وان كان علاء نفسه لم يستبعد هذا الخاطر او هذا التشبيه.. انما مسه هو مسا خارجيا فقط مثل الذاكره الخارجية للكمبيوتر .. اي سيسو نفسه.

بعد ما عاد الصديقان الى البيت للنوم بعد تناول وجبة العشاء واسكات جوعهما وبقاء مبلغا محترما من العملية التي قام بها علاء ..عادوا للنوم ... وعلاء الدين اختار صندوق من الورق وفرشه بقطعة بشكير حتى يصبح سريرا وسيرا لسيسو .. ورقد سيسو في فرشه الجديد مرتاحا ومستمتعا بالنوم .. ولكن قبل ما ينوم وبنصف عين مفتحة ,, لاحظ ان علاء الدين تناول المصباح من جديد وشرع يدلك فيه ..
سيسو : يا علاء انت لازلت عشمان يطلع لك عفريت من الفانوس ؟؟
علاء : هو انت صاحي ... لا انا بس كان قصدي المعه شوية .