قررت أن تُنجب وحدها ..!

قررت أن تُنجب وحدها ..

- فأتجهت لبنك يوفر السائل المنوي .... وطلبت سائل منوي لشخص مجهول الهويه .
- البنك يوفر تفاصيل كامله عن المتبرع ( مثل صورته عندما كان طفلآ ، وملامحه عند كبره وشكل الذقن والانف وغيره ، ومستوي تحصيله الاكاديمي ! ) ..
- لا يُقبل من المتبرع الا اذا كان حاصلآ علي شهاده جامعيه او بدرس بالجامعه ..... وكثير من الطلاب باعوا سائلهم المنوي اثناء دراستهم مقابل بضع وسبعون دولارآ .!!
ـــــــــــــــــــــ
احد اطفال التلقيح تحدث عن انزعاجه عندما يسأله زملاءه عن أبيه !! فيقول : ليس لدي أب !! - فيعجز زملاءه عن استيعاب الأمر ، ليسئلونه مجددآ ، ولكن كيف ليس لديك أب ؟؟؟!!!! .

* هذا بأميركا ... في فرنسا يمنع القانون المرأة العازبه عن القيام بتلقيح إصطناعي .

* ريبورتاج حضرته قبل قليل بفرانس بون كاتر .

صباح الدهشة..
ربما يحتاج الامر الى اضافات اكتر..
يرفع لمزيد من الاندهاش..





....
يبدوا ان السنوات القادمات ستكون حبلى بما لا يمكن تخيله

مرحبا الاخ عمر ..

الموضوع أصبح حقيقه وواقع .... يعني مقبل السنوات بإذن الله سيكون معترف به وكذلك مسلم به ... مثلأ اتخيل ان تكون بعض الكوبونات او الاستمارات فيها السؤال الآتي .....ألديك أب ؟؟؟!!!

إحدى ظريفات المدينة
سمع أضاني قالت لأترابها والصيف يحتضر
هوي يا بنات الخريف دا عرست .. عرست
ما عرست بحمل لي بي وليد ينفعني في كبري
أو كما قالت .

غايتو الرجال هم السبب
ولو ما دينا كان لقيتوا الوطن العربى مليان بيهم
:)))))))))))

سلام
قبل سنتين قالت لي زميله في العمل ان بنتها لديها فكره وسوف
تنفذها الصيف المقبل وهي ان تتلقح بسائل منوي من بنك الحيوانات المنويه
وقد تشاور افراد الاسره كثيرا ليس في اقناعها عن الفكره وانما في اختيار
مواصفات الاب وقد وقع اختيارهم على اب لاتيني من امريكا الجنوبيه.
ويشترط البنك انه لايعطي اي معلومات عن الاب وانما تعطى مواصفاته.
رانيه قلت مين السبب؟ مساكين الرجال ماعندهم حق القفه ويقولوا هم السبب.!
السبب معروف بس مين يقنع الديك !

يا عمر
حق القفه ماياها المشكله
على الوجه الشخصى لو ما كان دينا محرم الشى دا كان الزول سعى فقط لانجاب طفل يكون هو حياته ومغزاها ومعناها وفحواها
لكن ما بقى فى راجل فى الاغلبيه المهترشه دى بيحفز الوحده تتزوجوا
اغلب البنات حسى وبعرف منهم عرسوا عشان الانجاب وعصروا على رويحتهم ليمونه
ما كل الزيجات بالفهم دا وديل اقليه
الاغلبيه بقيت صابره وكامنه
يبقى الخلاصه الانجاب وبنك البابو دا فكره سمحه شديد بتجنب الزول انه يقتله بعد سنه يعنى حفاظا على حياتهم اخير البنك
:))))))))

سلام
كيف حق القفه مامشكله دا جزء كبير منها. صدق من قال :( لو كان الفقر رجلا لقتلته).
وشايف هنا نسبة الابناء البدون اباء كبيرهتصل 75% بغض النظر عن الاسباب
( طلاق، اولاد بنوك، او غيره.) وما جميل الطفل ينشأ وهو فاقد لاحد الابويين.
ومساله من انفسكم ازواجا لتسكنوا اليها بتمتد للاطفال ودي سنة الحياه. والمفروض تتتغير
الطريقه المعقده للارتباط( خاصه السودان والدول الاسلاميه) وشايف الان في لبنان تم اول
زواج مدني يعني الاثنين يمشوا البلديه ويسجلوا زواجهم. وكل انسان حر نفسه مادام بلغ السن
القانونيه.
وحكايه الليمونه المعصوره دي مشاكلها كبيره والحياة مفروض ما تقيف عند فشل تجربه
والناس تستفيد من تجاربها وهو العمر دا كم مره ؟ وطالما الانسان مقيد نفسه قبل قيود المجتمع
اكيد بدفع الثمن اهدار عيش حياته وبعدين العمر مابرجع.
وهي دي القررت ان تنجب وحدها ما عندها مانع في مسيرة حياتها يكون هناك رجل بصوره شبه دائمه
في حياتها. وعندينا طبعا موضوع الانجاب من البنك اويكون هناك رجل خارج اطار الزوجيه معناه الموت
الاحمر سواء من اهلها او الدوله.
والحل للبتقرر من عندينا انا تهج من بلاد العم حرام الي بلاد العم سام.

تهج دى ما حل
قولت ليك لوما دينا محرم الشى دا كان بتكون الفكره ظريفه
يعنى ما خوف من تقاليد وبشر وناس
غايتو يا عمر القفه بالجد ما المشكله
المشكله فى الكينونه ذاتهاااااااااااااااااااااا

يديك العافية ...
يارانية الكينونة ......لك الود..

سلام

Quote: في فرنسا يمنع القانون المرأة العازبه عن القيام بتلقيح إصطناعي

قاصد قبل السن القانوني ولا ايه قاصد عازب؟
الكينونه صعب شديد في بلد تكبل فيه العادات والقوانين( النظام العام والخاص) اضرب اقرب مثل
البنت التي تم جلدها وصاحبة البنطال الاثنين خير دليل على عدم امكانية تحقيق الكينونه.
ليش جلدوا البنت؟ وجلدوا الكثير وليه المداهمات لبيوت الناس؟ وعشان مااحمل الانقاذ وحدها المجتمع راضي
وعادي بتسمع خلي يجلدوهم ديل صعاليك! او عايزين يعملوا كينونه. مافي حريه مافي كينونه؟
مش يارانيه انت ولا غيرك فتح بوست نفسك تعمل حاجات وماقادر تعملها؟ ليش ماقادر تعملها لو فرضنا انها حاجات ممكنه
نفسي البلد يكون فيها حريه واسمع عند نقاش الناس مع بعضها كلمة انا من وجهة نظري وانا بشوف( مش مفروض) عشان
كدا بكل جبن هجينا مش من حكومه بس بل من مجتمع يرفض ان تجدد كل شئ. وكل مجموعه عايزه تفرض رايها فرض.
ماعايز النقاش يمشي بعيد من موضوع البوست. بس القررت ان تنجب وحدها اكيد قرارها جاء من ارضيه
ثابته بتقيف عليها. يعني اي واحده في الموضوع مجرد تفكير بتنضرب وتتشتم من اقرب اهلها لان ارضيتها
هشه دا لو اصلا عندها ارضيه. ياما شفنا وقارننا بين هنا وهناك.
مثلا اتنين بحبوا بعض وكل واحد متاكد انه بيكمل الاخر بس لظروف( القفه، من قبيله اخرى، ديانه اخري
وكل الاسباب التي تصنف انها عنصريه) تلقى القصه انتهت ببساطه واتزوجت او اتزوج من غير سواء متيسر حاله
او من قبيله اخرى او او او.
في زيارة ام صديقي شافت واحد حالك السواد ماشي مع اوربيه ناصعة البياض قالت دا شنو؟! قلنا ليها زوجته قالت خسارة البنيه!!!!!!
شفت النظره المختلفه . اكيد ام صديقي بتمثل شريحه كبيره من ناس بلدي اما الاوربيه اكيد الارضيه الواقفه عليها
خلتها تنظر للاشياء بدون تعقيد وليها احترامي. ما معقول تقيم البني آدم من شكله او اصله.
الموضوع اكبر بكتير من قرارها.

لااستطيع ان اتخيل كيف يمكن ان اعيش من غير ابي ....الاب يزرع الامان والثقة في نفس الطفل .....الام نفسها تحتاج من يعطيها هذا الامان وفاقد الشئ لايعطية .....
لكل قاعدة استثناء ولكن الاب ركن اساسي في الاسرة .............لاينبغي ان يكون قرار الانجاب فرديا ....والحرية لاتعني الفوضي ....

سعدت لإثرائكم النقاش ....
الموضوع يحتاج للكثير من النقاش وتسليط الضوء .... نعايشه - بالسودان - ولكن بصوره مختلفه لكن الحالات متوفره ( الانجاب الفردي ، مجهولي الأبوين ، فاقدي الابوه وكثيرين اليوم مشردين او بالمدارس لكنهم لا يعرفون آباءهم ) نعم هذا موجود فعلآ .


مجددآ سعدت بتوقفكم هنا ... ويتواصل .............

ياااااااا رانيه ، عجبتيني مساااااااااااااااحه ^_^

سلام يا أيمن

Quote: ألديك أب ؟؟؟!!!

أظن السؤال سيكون من هو والدك البيولوجي؟

برضو حتكلم من وجهة نظرى والشيفاه حاليا
الفكره ما زواج وعيال وخلاص
ومسميات اب وام
فى اولياء امور غير مؤهلين للوظيفه دى
يبقى على شنو اجيب عيال من اب يطلع زييييييييييييييييييييتهم وما يعرف يربيهم صح
انا واثقه من روحى ومقدرتى انى اربى طفل صح لكن اضمن من وين اب ما قادر حتى يشيل مسئوليه عرس يجى يشيل مسئوليه ابوه
لقانى زول عايش فى دوله اجنبيه وبدون دخول فى تفاصيل محدد
لفت نظرى انه ماله اى علاقه بالدين كدين برغم انه مسلم
وعندو طفله من زوجه اجنبيه لمن سئلتوا ديانتها شنو قال هى حره تختار الدين العيزاه
قولت له انا ما حتمنى اطفال يعيشوا بفهم زى دا
قال لى انتى حره فى تربية الاطفال ربيهم زى ما عايزه
التربيه ما شى فردى لو الزوج موجود
دوره باهمية الام
واذا فى الاساس حربى براى عيالى يبقى اخير الفكره دى لانها حتؤدى نفس الغرض
ياما امهات اترملوا ربوا اجيااااااااااااااال تشرف براهم
يعنى التربيه ما ساهله والفتاه ممكن تربى براها لدرجه ان ممكن فتاه وصلت الثلاثين سنه تتبنى طفل من المايقوما
لكن ما مسموح لرجل يتبنى لو ما متزوج
ولو دل
فإنه يدل
على اننا
ممكن
نجيب بابو
بدووووووووووووووووووووووووووونكم
المعضله كلها فى الدين لا يسمح
:))))))))))))))))))))))))))))))))))))))
طبعا دا لا ينفى ان الاب لو فعلا كان اب صالح كان حيكون الطفل متشبع بأسس اقوى اكيد
لكن قالوا الضروريات تبيح المحظورات
يا الرجال ترجع تفوووووووووووووووووووق وتوعى لمعنى الرجوله والابوه صح ويتقوا الله فى رعياهم
يا جاك بلاااااااااااااااااااا يا التلقيح

مرحبا داليا ...

ا اعتقد أن السؤال سيكون بالطريقه التي ذهبتي اليها ، لسبب بسيط وهو أنه لا تعطي معلومات ( شخصي او عناوين ) المتبرعين ..

وشئ ثانِ لما يكون السؤال ، ألديك أب بيولوجي ربما يكون فيه شئ من التمييز .... لكن ربما من الافضل السؤال ألديك أب ؟؟؟ عندها تكون الاجابه نعم / لا / نعم لدي بيلوجي ، كدا بيكون لم يمس احد بشئ او يميزه

مساحه دى منو
:)))
عليكم كلام محتاج معجم لتفسير المعنى المقصود

Quote: مساحه دى منو :))) عليكم كلام محتاج معجم لتفسير المعنى المقصود

علي قدر المساحه البينا وبين بنك البابو دا ^_^

* أمس الأول إحدي صديقاتي - من مشاهير جمهورية السودان - انتقدت المطربه أليسا لتعليقها علي موضوع الانجاب من غير زوج !!! وتنازلت عن الاعجاب بفنها !!! تأملوا شخصيه ذي دي ممكن تأثر في المجتمع الإيجاب ؟؟!

ويعافيك يا عادل
:)))

Quote: قولت ليك لوما دينا محرم الشى دا كان بتكون الفكره ظريفه يعنى ما خوف من تقاليد وبشر وناس

سلام ... شايفك قطعتي انو دينيا محرم يا رانيه
فمن أين لكي بهذا اليقين ..
وبالجد دخلته البوست دا عشان أسأل هل دينياً محرم الانجاب من غير زوج؟
أتمنى أجد اجابه شافية من أهل الاختصاص..

تحياتي

Quote: سلام ... شايفك قطعتي انو دينيا محرم يا رانيه فمن أين لكي بهذا اليقين .. وبالجد دخلته البوست دا عشان أسأل هل دينياً محرم الانجاب من غير زوج؟ أتمنى أجد اجابه شافية من أهل الاختصاص.. تحياتي

هذا جوهر الموصوع وبعداك العامل الاخلاقى
ثم الحق فى الامومة
يمعنى
هل يحق للمرأة ان تصبح اما دون زواج ودون شيهة زنا وحرام