أنا و د. نجاة والصمغ العربي .. تجربتي الشخصية التي حيرت الأطباء في قطر

أولا أتمنى ممن يزور هذا البوست التحلي بالصبر ومتابعة البوست
إن شاء الله ح تستفيدوا وتفيدوا من حولكم
هذا البوست تجربة شخصية وليست علمية
كل ما ساذكره هنا هو ما حدث معي أنا وليس بالضرورة
أن يحدث مع غيري ..
أكرر المواضيع الصحية ليس فيها مزح ومسؤوليتها كبيرة
لذلك ساحاول أن أتحرى الدقة فيما اذكره من وقائع
نسال الله ان ينفعنا بما علمنا وأن يعلمنا ما ينفعنا

تجربتي الشخصية في استعمال الصمغ العربي للعلاج (السكري .. الضغط .. الكوليسترول ...إلخ)
أصبت بداء السكري قبل اربعة أعوام تقريبا
ثم ثنيته بالضغط قبل سنتين تقريبا

قبل سنة تقريبا كنت في مكالمة هاتفية مع الدكتورة نجاة محمود
وبعد السلام والتحايا سالتني عن صحتي
فقلت لها : والله السكري والضغط تاعبني وكمان ظهر لي
بروتين
كوليسترول
زلالي
دهون ثلاثية
والدكتور قال لي لو جيت المرة الجاية بنفس نتيجة التحاليل دي
بحولك مستشفى حمد لغسيل الكلى ..

فقالت لي هل جربّت الصمغ العربي
قلت ليها : لا
قالت لي معانا واحد هنا كان عندو كوليسترول عالي جدا
نصحوه باستعمال الصمغ العربي
وبعد اسبوعين أو قالت شهر لا اذكر
رجع الزول للدكتور وبعد الفحوصات
اتضح إنو الراجل ما عندو كوليسترول نهائي
وتحير الطبيب وسأله الدكتور ماذا فعل للتخلص من الكوليسترول
هذا ما اذكره من القصة .. ارجو من الدكتور لو متذكرة الباقي تتمو لينا

في التحاليل الذكرتها فوق دي الدكتور قال لي البروتين عندك 300
300 دي شنو ما عارفا
والباقين كلهم عالين والسكري عالي (التراكمي)
وشدد علي في الأكل خصوصا البروتينات
حدد لي 100 جرام فقط من البروتين يوميا
لو أكلت بروتين نباتي ما آكل حيواني
المهم ال 100 جرام دي نوع واحد بس في اليوم

الموضوع دا صعب علي شديد
نحنا هنا في قطر أغلبية الفطور عندنا بيض
بحب الكِبد بجميع أنواعها (كبدة جمل/ضان/بقر)
بحب اللحم وأخوي جنو يعزمنا شية جمر وكبدة إبل لمن جاهو قاوت
بموت في السمك مش ود بحر ابيض
والطعمية والفول المصلح والعجب العدس

يعني موضوعي بايظ بكل النواحي ..

لذلك قررت الاستسلام لوصفة الدكتورة نجاة
ومشيت اشتريت لي كيس صمغ عربي مسحون
وبديت استعملو تقريبا قبل 9-10 شهور سابقة

المهم كمان من يوم كلام الدكتور عن غسيل الكلى
بقيت أحس بوجع في الكلى والبول حاسي بيهو شوية
ما بعرف كان صحي ولا كان خوف ولا نفسيات ساي

أنا أصلا كنت بستعمل الكركديه البارد الصباح عشان قالو بخفف الضغط
وبرضو باخد حبوب الضغط وحبوب السكري وحبة اسبرين وحبة للدهون
حبة الدهون دي قالوا لي تاخدا بالليل أها مرات أنساها ومرات ىخدا
ومرات تلاتة اربعة يوم ما اتذكرا

بقيت مواصل في المصغ العربي مع الكركديه (كباية كبيرة الصباح على الريق)
بعمل الآتي
طبعا هنا بنصحى بدري قبل صلاة الفجر عشان المدارس والشغل
أها بعد صلاة الصبح بملا الكباية كركديه وبكب فيها 3 معالق بتاعة صمغ
وبدوبها تمام وكمان بعمل ليها معلقة سكر سغييرة عشان الطعم شوية يخف
بالمناسبة الصمغ ما عندو طعم لكن الكركدية حامض .
بطلع اوصل الأولاد المدارس وبمشي على الشغل

بس وصلتي الشغل يا دوب افتح الكمبيوتر والبوي يجيب لي كباية الشاي
اشرب لي منها جغمة واحدة والتانية على عجل ويا الحمام جاك بلا
لمن اصل الحما بكون خلاص في الرمق الأخير
بس عينك ما تشوف إلا النور ـ كمبريسر بتاع بنشري ينفخ القديم والجديد
واللون أسود زي زيت الرجوع وكميات ذاتها ما بعرفا جات من وين

ما تقولوا لي قرّفتنا ياهو كدي العلاج

نسأل الله الشفاء
والله ده معلومات جميلة
وآصل
يآمعتز

Quote: نسأل الله الشفاء والله ده معلومات جميلة وآصل يآمعتز

الله يعافيك يا الغبشاوي
وربنا يشفينا ويشفي جميع مرضى المسلمين

ويشفي دينق كمان بس بحكم الزمالة

متابعين بمغص شديد

Quote: متابعين بمغص شديد

العلاج حار يا ولدي

معتز وااااااااااااااااصل بوستيك دا بهمني شديييييييييييد بالحيل والله
بس عندي رجاء ما تطول الغيبة تعال بي سرعة
ولا اقول ليك بي سرعة شديد
وما تظهر لينا بي غيب وتعال دي
ثمح

Quote: معتز وااااااااااااااااصل بوستيك دا بهمني شديييييييييييد بالحيل والله

خلاس خليك قريييييب
والله كان كدي اشحتفك شحتفة

اهم حاجة ترسل البياض $$$$$$$$$$$$$$
وكذلك كل م يمر من فنا ويستفيد من الوصفة السحرية

والله حمداللهعلى سلاماتك ووربنا يتمم الشفاء انت وليد من متين لامن تمرض قدر دا

بعد اسبوعين تقريبا حسيت إني أحسن
الوجع في الجنبات خفّ
البول رجع زيادة من أول بكتير
لونو إتغير من أصفر شديد لأبيض
بس التقول جلابية بيضا مكوية
حسيت إنو جسمي خف يعني الوزن زي الماشي في النازل
لكن خفت من قصة الوزن دي مع اللون الأسود للبراز
قمت استعنت بعمي قوقل رضي الله عنه
لقيت إنو اللون الأسود دا عندو سببين
1- نزيف معوي
2- نوعية الأكل

بيني وبينكم نوعية الأكل دي ما فكرت فيها لأني ما غيرت أكلي
قلت خلاص بدل الفشل الكلوي جاني نزيف معوي

قمت وقفت الصمغ زي تلاتة اربعة يوم كدا
لقيت البراز رجع لي لونو الطبيعي

عرفت إنو التغيير دا من الصمغ وبراي اقنعت نفسي إنو الصمغ دا قاعد يطلع في البلاوي القديمة المركّنة

المهم واصلت في الصمغ مع الكركديه وبقيت اي زول جاي من السودان اقو ليهو جيب لي صمغ وكرديه

استمر موضوع البراز الأسود دا حوالي تلاتة شهور أربعة شهور بعديها بقيت احس بالحاجة للحمام في نفس التوقيت
لكن اللون بدا يتغير وماشي على اللون الطبيعي .
وبالتدريج رجع اللون الطبيعي للبراز

وبديت أحس إني اخف حتى الكرش بدت تنزل
الله يلعن ابو الكرش كرهتني حياتي ما عرفت ليها دواء

Quote: اهم حاجة ترسل البياض $$$$$$$$$$$$$$ وكذلك كل م يمر من فنا ويستفيد من الوصفة السحرية والله حمداللهعلى سلاماتك ووربنا يتمم الشفاء انت وليد من متين لامن تمرض قدر دا

بياض شنو يا دكتورة هههههه
والله يا دكتورة تستاهلي الضبيحة عديييل كدا

لسة الكتير المثير جاي وراء ودهشة الأطباء دي براها كوم
خايفك بعدين تطلبي البياض من الهيئة العالمية للصحة

عارفكم يا الكيزان جنكم قروش

اهاااااااا

Quote: اهاااااااا

لوك الصبر جاييك كلو في وقتو ههههه

Quote: وبقيت اي زول جاي من السودان اقو ليهو جيب لي صمغ وكرديه

يالحبيب ولا بنكلف زول بنمش برااانا ونجيبو
بس كمل.
سلام واحترام يا معتز

Quote: يالحبيب ولا بنكلف زول بنمش برااانا ونجيبو بس كمل. سلام واحترام يا معتز

والله يا عوض يستاهل تمشي ليهو مخصوص
إن شاء الله ح أواصل لغاية نهار اليوم دا

وتحيات واحترامات تكعيب يا حبيب

Quote: وبديت أحس إني اخف حتى الكرش بدت تنزل الله يلعن ابو الكرش كرهتني حياتي ما عرفت ليها دواء

اقع الرياضة ياعمك وحاتشيلها ليك ذي الترتيب

سرد رائع ومتابعين بقوووه

مع اللون الأسود للبراز
قمت استعنت بعمي قوقل
صراحة تجربة مثيرة
وتستحق الدراسة ومشكور على الفائدة
حقيقة صورتك يا معتز بالبدلة بعد ما كرشك راحت
اتكيفت منها جدا ـ اريتو حالي واريتها كرشتي

بالتنسبة للمون البتاع الفوق دا
د. نجاة بادبها الجم وهي انسانة حساسة جدا
ما قدرت تقول ليك ان اللون الاسود دا ماعنده علاقة بالصمغ
ولا بالكركديه ولا بالحرجل
دا علاقتو فقط بى لون البنى آدم نفسه
يعني ما حصل خواجة في الدنيا دي طلع منه شىء اسود

شكراً جزيلاً معتز .... البوست مهم جداً ... وخصوصاً بعد انتشار أمراض الكلى في السودان بشكل غريب ...

ربنا يشفي كل مريض.

Quote: شكراً جزيلاً معتز .... البوست مهم جداً ... وخصوصاً بعد انتشار أمراض الكلى في السودان بشكل غريب ... ربنا يشفي كل مريض.

تسلم والله يا هاني وشكرا على المرور
ودا فعلا قصدي من البوست أنا كنت في السودان
وشفت أطفال في عمر الزهور بغسلوا كلى
عشان كدا بدعو الأطباء والصيادلة المعانا هنا
يهتمو بالموضوع دا ويبحثو فيهو أكتر
عشان الحكاية تبقى علمية ما تجارب بس

إنت جيتني عديل لأني مستجد في المواضيع التي

ذكرتها اعلاه قريب لي زي ثلاثة شهور بكل ما ذكرت

حت القاود و حاجات تانيةحامياني ...


عشان كده بالله خش بدون روتش لو عايز بياض اتكلم !!!!

ما بين الخيرين حرج ..


دا انت وقعت لي في جرح كيف كمان بالله الكد لينا د نجاة

معاك علشان لو السكر اثر في سردك للمعلومات ممكن تديك

دفره شويه .

العزيز معتز القريش..

كيفك يا فنان..

على فكرة.. وحسب التجربة الشخصية برضك.. الصمغ العربي

برااااااااااهو بدون كركدي برضو ما ساهل..

أنا صراحة ما جربت الكومبنيشن دا..

لكن الصمغ مجرب تااااااب وما فيهو كلام..

..

أسمع..

بالنسبة لـ"رطوبة قطر" كيف؟؟

تحياتي..

..

.

Quote: العزيز معتز القريش.. كيفك يا فنان.. على فكرة.. وحسب التجربة الشخصية برضك.. الصمغ العربي برااااااااااهو بدون كركدي برضو ما ساهل.. أنا صراحة ما جربت الكومبنيشن دا.. لكن الصمغ مجرب تااااااب وما فيهو كلام.. .. أسمع.. بالنسبة لـ"رطوبة قطر" كيف؟؟ تحياتي..

كدي يا محمود يا أخوي جرب الكومب شنو دا وتعال لي بعد اسبوعين
شوف والله رطوبة القطب الشمالي ما تسويك شئ

الاخ معتز
ربنا يديم عليك الصحه

قلل من شراب الكركدي لانه بزيد من هورمونات الانوثه في الجسم . الايام ده المكنه البتخف ما برجعا الا الله ، مش لو شربت صمغ حتي لوشربت قرض ما في طريقه .

مع امنياتنا لك بدوام الصحه و العافيه

ابن العوام

Quote: بزيد من هورمونات الانوثه في الجسم

يا النبي نوح..

.
.

وأنا أقول اللذاذة شنو الواقعة على معتز دا؟؟

..

.

Quote: يا النبي نوح.. . . وأنا أقول اللذاذة شنو الواقعة على معتز دا؟؟

هسي عاجبك كدا يا ابن العوام ههههههه

Quote: الاخ معتز ربنا يديم عليك الصحه قلل من شراب الكركدي لانه بزيد من هورمونات الانوثه في الجسم . الايام ده المكنه البتخف ما برجعا الا الله ، مش لو شربت صمغ حتي لوشربت قرض ما في طريقه . مع امنياتنا لك بدوام الصحه و العافيه ابن العوام

هسي يا ابن العوام دا القدرت عليه ههههه
أنا مناسب لي تلاتة عوائل كان سمعو كلامك دا أنا أمشي وين
كان ترسلو لي في الخاص

الله يعوضنا في الرابعة غايتو

Quote: إنت جيتني عديل لأني مستجد في المواضيع التي ذكرتها اعلاه قريب لي زي ثلاثة شهور بكل ما ذكرت حت القاود و حاجات تانيةحامياني ... عشان كده بالله خش بدون روتش لو عايز بياض اتكلم !!!! ما بين الخيرين حرج .. دا انت وقعت لي في جرح كيف كمان بالله الكد لينا د نجاة معاك علشان لو السكر اثر في سردك للمعلومات ممكن تديك دفره شويه .

كان كدي خليك قريب آآآزول انت ممكون زيي تااااب

Quote: كل ما ساذكره هنا هو ما حدث معي أنا وليس بالضرورة أن يحدث مع غيري .. أكرر المواضيع الصحية ليس فيها مزح ومسؤوليتها كبيرة لذلك ساحاول أن أتحرى الدقة فيما اذكره من وقائع نسال الله ان ينفعنا بما علمنا وأن يعلمنا ما ينفعنا

وعشان في ناس ممكونين وقاعدين في بنابرم راجيت زبدة الكلام
سيبكـ من الحكي والردود وأدينا النجيضة
نجضتنـــــا

Quote: وعشان في ناس ممكونين وقاعدين في بنابرم راجيت زبدة الكلام سيبكـ من الحكي والردود وأدينا النجيضة نجضتنـــــا

أبييييييييت يا عمران
أنا ما منجض لي عشرة شهور وانتو عايزنها بااااردة
كورك للبت خليها تجيب ليك فنجان جبنة اتصبر بيهو

المهم واصلت في نفس البرنامج وأبيت أمشي للدكتور النصيحة خفت من قصة الغسيل دي
قلت تبقى علي قصة العريس الجا يتعرف باهل العروس مسكو عقدو ليه هههههه
بقيت أمشي للدكتور بتاع المساء عشان أجيب الأدوية ومرات بزوغ أمشي الصيدلية واشتري بالقروش
مع إنو الأدوية هنا للزول العندو بطاقة بتراب القروش

وبقيت مواصل في الصمغ والكركديه مع العلاج طبعا

والله حتى مرة كان عندي وجع اضان خالد مشعل ما يستحملوا استنيت لمن دوام الدكتور بتاعي انتهى
حتى مشيت المركز الصحي وفعلا طلع طبلة الأضان مقدودة عديل كدا
شلت علاجاتي وشتت ..

والأسوأ من كدا حتى التحاليل الكنت بعملا في البيت خليتا
ما خلاص بني ىدم دا لمن يشم العافية بعمل فيها اسد

الأستاذ معتز القريش تحياتى لك و للدكتورة نجاة ، عندما أقرأ لك أتذكّر الأستاذ مصطفى سيد احمد الذى احس أنّه صديقى رغم أنّى لم ألتقيه و لم أحضر له حفل ، شكرًا لك على هذا البوست الذى أرى أنّه مفيد لى رغم أنّى و الحمد لله لا أعانى من سكرى أو ضغط أو كولسترول أو حتى كرش و لكنّى حرصت على متابعته لأنّ به معلومات هامّة و طالما أنّك قد جرّبتها فأنا اصدّقك و لا يهمّنى إختلافنا الفكرى لأنّى أقرأ فيما تكتب الصدق و ذلك يكفى و ليس يهمّنى غير الصّدق قول و لذا سأهتم كثيرًا بالصمغ العربي الذى قرأت عن فوائده الكثير و ها أنت تؤكّد لى ذلك . أنا و أنت و بعض القرّاء مدينين للدكتورة نجاة بهذه المعلومة الهامّة فلها و لك منّا كل الشكر . كونوا بخير و عافية .

التعديل بسبب التنسيق و تعديل أخطاء طباعة

Quote: الأستاذ معتز القريش تحياتى لك و للدكتورة نجاة ، عندما أقرأ لك أتذكّر الأستاذ مصطفى سيد احمد الذى احس أنّه صديقى رغم أنّى لم ألتقيه و لم أحضر له حفل ، شكرًا لك على هذا البوست الذى أرى أنّه مفيد لى رغم أنّى و الحمد لله لا أعانى من سكرى أو ضغط أو كولسترول أو حتى كرش و لكنّى حرصت على متابعته لأنّ به معلومات هامّة و طالما أنّك قد جرّبتها فأنا اصدّقك و لا يهمّنى إختلافنا الفكرى لأنّى أقرأ فيما تكتب الصدق و ذلك يكفى و ليس يهمّنى غير الصّدق قول و لذا سأهتم كثيرًا بالصمغ العربي الذى قرأت عن فوائده الكثير و ها أنت تؤكّد لى ذلك . أنا و أنت و بعض القرّاء مدينين للدكتورة نجاة بهذه المعلومة الهامّة فلها و لك منّا كل الشكر . كونوا بخير و عافية .

تسلم يا وليد على كلامك الطيب
ودائما الإختلاف في الآراء لا يفسد للود قضية

وكان إختلافك معاي زمن كنت مؤتمر وطني
أنسى يا أخوي دا زمن عدى وراح

خليك قريب

مبالغه..سرد مشوق..قعدت اقرأ لما عيوني وجعتني..هاميني جانب الكوليسترول..في انتظار المزييد ونتيجة الصمغ؟؟

Quote: مبالغه..سرد مشوق..قعدت اقرأ لما عيوني وجعتني..هاميني جانب الكوليسترول..في انتظار المزييد ونتيجة الصمغ؟؟

تسلمي يا ندوية
مع معتز القريش والصمغ مش ح تعرفي تغمضي عينيك

Quote: عارفكم يا الكيزان جنكم قروش

ياخي انا متأكدة مابس الصمغ عالج جسدك بل اداك مليون فولت وبقيت مستنير وركلت الكيزان

يالطريقة دي الكيزان حيمنعوا الصمع ويحظروه واي زول يلقوه معاه صمغ طويل لبيوت الاشباح


بالله شوفو الصمغ دا غير معتز كيف من ضلامي كبير لمستنير

يا زول ما تهظر بكلام ذي دا ناس المنبر ديلعل الهبشة اسع يقولو وشهد شاهد من اهلها

Quote: ياخي انا متأكدة مابس الصمغ عالج جسدك بل اداك مليون فولت وبقيت مستنير وركلت الكيزان يالطريقة دي الكيزان حيمنعوا الصمع ويحظروه واي زول يلقوه معاه صمغ طويل لبيوت الاشباح بالله شوفو الصمغ دا غير معتز كيف من ضلامي كبير لمستنير يا زول ما تهظر بكلام ذي دا ناس المنبر ديلعل الهبشة اسع يقولو وشهد شاهد من اهلها

صحي والله يا دكتورتي الصمغ خطير
وناس المنبر ديل بكرة يكبشرو كلامي
ومحل ما تمشي يلصقوه ليكي

هوووي يا ناس أنا بهضر مع دكتورتي دي ساي
لزوم النفسيات وكدا مش قالو ارتياحك للدكتور نصف العلاج هههههه

الجزء الأول من حلقة اليوم :

بعد المدة دي كلها وأنا بتزاوغ من دكتوري
جاء عيد الاستقلال وناس الجالية عندنا هنا عملو يوم صحي من ضمن الفعاليات
حقيقة كان يوم جميل ومفيد .
أها أنا لقيتا فرصة قمت مشيت للدكتور وحكيت ليهو تاريخي المرضي
أداني بعض النصائح وكتب لي تحاليل كاملة قال لي تعملا وتمشي تراجع الدكتور
وعمل لي تحويل لدكتور العيون (الاستشاري) في مستشفى حمد
شلت أوراقي وتاني يوم مشيت لأخونا (عمر سعد) بارك الله فيه
في مركز الريان وأنا صائم من الساعة سبعة مساء لغاية مواعيد أخد العينة

دكتور عمر ما قصر سحب لي العينة بتاعة الدم وقال لي الدكتور ما عامل ليك تحليل بول
ساقني ومشى معاي لدكتور المركز بتاعهم وعمل لي ورقة تحليل بول وورقة حضور للمركز
طبعا أنا في بالي اسأل عمر برا برا وأشوف النتيجة وبعد داك اقرر أمشي للدكتور ولا لا

وطبعا عمر دا ذاتو عمل لي تحليل زمان ووراني النتيجة
وبرضو كان منيّل بستين نيلة وعمر يشهد على الكلام دا
كلو كلو زفت مافي حاجة طبيعية

غايتو يا عمر سعد إن شاء الله يوم شكرك ما يجي
وما يحوجك لي عشان أسحب ليك عينة

واصل يا ود القريش تجربتك ده حتكون زاد لناس كتيرين .... ربنا يديك العافيه

Quote: الجزء الأول من حلقة اليوم :

بالنسبة لي إني رحلت في بيت جديد
ولسة ما نقلت خط الانترنت
وهسة داخل من المكتب وبما إنو الدوام انتهى

إذن اشوفكم بكرة كان ربنا مد في العمر وأواصل ليكم
القصة العجيبة عن الصمغ السحري

فتكم بعافية ....

ده شنو يا زول؟؟

يعني ننتظر الحلقة الجاية بكره إن شاء الله؟؟؟

Quote: ده شنو يا زول؟؟ يعني ننتظر الحلقة الجاية بكره إن شاء الله؟؟؟

ياسر منصور كيفنك يا أخوي

أها بكرة وبعد بكرة جوك
إن شاء الله تكون اتفشيت هههههههههه

تحياتي ود قريش وزوار هذا البوست الهام ... والحمد لله الذي بفضله تتم الصالحات

ولو تكرمت عايز أشارك بالرابط ادناه .. عسى أن تكتمل الصــورة ...

الصمغ العـــربي .. فوائد وأســرار " عــلاج المستقبل "

Quote: تحياتي ود قريش وزوار هذا البوست الهام ... والحمد لله الذي بفضله تتم الصالحات ولو تكرمت عايز أشارك بالرابط ادناه .. عسى أن تكتمل الصــورة ... الصمغ العـــربي .. فوائد وأســرار " عــلاج المستقبل "

تسلم دكتور أحمد على الاضافة الثرة للموضوع
وعليك النبي خليك قريب

Quote: واصل يا ود القريش تجربتك ده حتكون زاد لناس كتيرين .... ربنا يديك العافيه

مواصلين إن شاء الله أخي سامي
وربنا يديك العافية وما تحتاج صمغ

يا قريش الصمغ ده موجود في الدوحة؟
و بتباع وين ؟
ولا نرسل نجيب من السودان؟

##################

ربنايديك ويدينا العافية.

.

Quote: يا قريش الصمغ ده موجود في الدوحة؟ و بتباع وين ؟ ولا نرسل نجيب من السودان؟ ################## ربنايديك ويدينا العافية.

موجود يا محمد يوسف في البيت السوداني

الحبيب معتز

سلام كتير

اخوك عندو اكياس صمغ كتيرة لكن ما عارف المانعني منها شنو

دكتورة نجاة

تسلمي يا اصيلة

Quote: الحبيب معتز سلام كتير اخوك عندو اكياس صمغ كتيرة لكن ما عارف المانعني منها شنو دكتورة نجاة تسلمي يا اصيلة

قرجة يا غالي
ربنا يديك الصحة والعافية
بس عليك الله كل يوم الصباح قبل الشاي أخد ليك كباية
وتعال بعد شهر كدا قول لينا الحصل شنو ؟

Quote: وأنا أقول اللذاذة شنو الواقعة على معتز دا؟؟

Quote: وشايفك بقيت جنك قمصان حمر كمان

*()

أجر وعافية يا معتز..

الصمغ ما عارف بقى لى زى سائل تنظيف المحركات البكبو مع الزيت أو البنزين
حسب الحالة وحسب الحاجة,,
تنضيف بلوفة وبساتم وقمصان وبخاخات...
الصمغ العربى دا ثروة قومية من هين,,

تحياتى..

تسلم يا أيمن ياخي وما تشوف شر

Quote: أجر وعافية يا معتز.. الصمغ ما عارف بقى لى زى سائل تنظيف المحركات البكبو مع الزيت أو البنزين حسب الحالة وحسب الحاجة,, تنضيف بلوفة وبساتم وقمصان وبخاخات... الصمغ العربى دا ثروة قومية من هين,, تحياتى..

كتلتو كتلة ياخ

تعرف الصمغ دا طلع عمرة كاملة
غايتو على الأقل معاي أنا ههههه

الحبيب معتز

سلام كتير

اخوك عندو اكياس صمغ كتيرة لكن ما عارف المانعني منها شنو

دكتورة نجاة

تسلمي يا اصيلة

فوق حتى تعم الفائدة






________________

شكراً معتز

Quote: فوق حتى تعم الفائدة ________________ شكراً معتز

لا شكر على واجب يا زين يا أخوي
وربنا إن شاء الله يجعلنا سبب لعلاج كل المرضى

كده ما عصرتي علينا كتير خلاص

قمنا من شويه شدينا السلك لبنت الشيخ

في السودان و قلنا ليها يا زولة الظاهر

الفرج قرب و تاني لا خبز بر و لا رياضة ولا

سلايق و لا فحص سكر صباح و مساء ولا التكتح

ما في معتز و دكتور نجاة جابوا لينا النجيضة

و حاجة ساهلي طب بس رسل ليكي اردب صمغ و خليني

نتابع بوست المعتز دا و نجيك راجع تقوم تقول لي

الدوام الدوام لله يا اخ نعم بس ما تقعد لينا شويه

كده وبعدين تكسح لكن اقول ليك بكره قريب انشاء الله

للحي بس بكره ما طول علينا بالمدارس و كده نحن

قاعدين انشاء الله

تحياتى أخى معتز
نسأل الله العلى القدير أن يتم شفاءك شفاءاً لا يغادر سقماً
و التحية للأخت دكتورة نجاة
موضوع الصمغ و علاجه لأمراض الكلى عرفت عنه فى منتصف التسعينيات
و قتها كنت فى مدينة جدة و سكن فى الشقة المقابلة لى العم / حسين حسن .. أول
وزير للتربية و التعليم بدولة جيبوتى بعد الأستقلال و جاء للعلاج و الغسيل بأمر
ملكى من الملك فهد بن عبدالعزيز رحمهما الله جميعاً لأجراء الغسيل بمستشفيات
مدينة جدة و كان يغسل بمستشفى الملك عبدالعزيز .. بمعدل ثلاث مرات فى الأسبوع
و كانت ترافقه زوجته تلك السيدة الفاضلة ( أم على ) و توطدت علاقتهم بنا و كانوا
لا ينادونى ألا بأبنى و ينادوا زوجتى ب يا بنتى كان عندما يتعب فى الليل تأتى أم على
و تقول لى عمك تعبان تعال وصلوا المستشفى كان يتعب كثيراً خاصة فى الأيام التى
لم يكن فيها غسيل ..
جاءنى يوم فرحاً بأن هنالك طبيب أخبره بأن الصمغ العربى ينفع لأمراض الكلى
و هذا الصمغ يوجد فى السودان بكثرة و أذكر مع أول شخص قادم أرسلوا لنا كيسين
من الصمغ العربى و بدأ يبل الصمغ و يشربه على الريق فى الصباح ...
و ربما لأن الفشل كان مزمن لم تكن هنالك نتائج واضحة و سافر بعد ذلك مع زوجته
للقاهرة و توفى هناك ...
موضوع الصمغ موضوع قديم ومتجدد ليت بعد تجربتك أخى معتز أن نقرأ هنا عن بعض
التجارب ... عسى ولعل يجد كل مريض ضالته .. ونسأل الله أن يشفى كل مريض .

تحية وحمدا لله على السلامة اخي معتز

الصورة قبل الصمغ أم بعد الصمغ ؟؟؟
فإن كانت بعد الصمغ فإن صمغك طلع ماسوووووووووووووورة
فالكرش لازالت بكامل هيبتها

Quote: قلل من شراب الكركدي لانه بزيد من هورمونات الانوثه في الجسم

وانا كل يوم امشي السوق اول شيء اشرب كركدي
وتاريهم الناس على حق
يوم تشرب ليك كباية كلهم يقولوا ليك والله الليلة وشك منور

اها من يوم الليلة دي ولاليمون ماعاوزين

قال منوّر قال !!!

يا ود القريش

كعكول الصمغ زمان كنا بناكلو من الشجرة


مباشرة ، وما عمل فيها زي ما سوى فيك


حسنة وأجر إن شاء الله

معتز قريش إن شاء الله كفارة وربنا يواليك بالصحة والعافية،

موضوع الصمغ فعلا حيوي وهو ثروة قومية هامة تحتاج للدراسة والاهتمام.

تعرف الأمريكان بيقاطعوا كل شيء في السودان إلاّ الصمغ العربي.
http://www1.american.edu/ted/gumarab.htm

لكن ما تقولي كترت من الكركدي لمن هدَّ في قميصك! هه

Quote: وانا كل يوم امشي السوق اول شيء اشرب كركدي وتاريهم الناس على حق يوم تشرب ليك كباية كلهم يقولوا ليك والله الليلة وشك منور اها من يوم الليلة دي ولاليمون ماعاوزين قال منوّر قال !!!

اوسكاااار

سلامات للجميع وربنا يشفي جميع مرضانا..

Quote: Display Settings:AbstractSend to: Nat Prod Res. 2008 Jan 10;22(1):12-21. The effects of gum arabic oral treatment on the ####bolic profile of chronic renal failure patients under regular haemodialysis in Central Sudan. Ali AA, Ali KE, Fadlalla AE, Khalid KE. Source Faculty of Medicine, Department of Biochemistry and Nutrition, University of Gezira, Wad Medani, Sudan. Abstract This study aimed at assessing the effect of gum arabic (Acacia senegal) oral treatment on the ####bolic profile of chronic renal failure (CRF) patients. A total of 36 CRF patients (under regular haemodialysis) and 10 normal subjects participated in this study. The patients were randomly allocated into three groups-group A: 12 CRF patients under low-protein diet (LPD) (<40 g day(-1)) and gum arabic (50 g day(-1)) treatment; group B: 14 CRF patients under LPD and gum arabic, iron (ferrous sulphate, 200 mg day(-1)) and folic acid (5 mg day(-1)) treatment; group C (control group): 10 CRF patients under LPD and iron and folic acid treatment and group D: 10 normal volunteers (on normal diet) under daily dose of 50 g gum arabic. Each of the above treatments was continued for three consecutive months. Blood samples were collected from each subject before treatment and twice per month "pre-dialysis" for 3 months. Biochemical parameters measured were: serum urea, serum creatinine, serum uric acid, serum calcium and serum phosphorus. By the end of the 3 months of treatment, serum urea levels significantly decreased by 31.2 and 44.18% for group A and B, respectively, compared with the baseline (0.01 < p < 0.001) and control group (p < 0.05). Serum creatinine levels significantly decreased in the groups of gum users (A, B and D) by 9.94, 12.65 and 11.7%, respectively, compared with the control group (p < 0.001). There was a significant decrease (p < 0.05) in serum uric acid levels by 14 and 19.9% for group A and B, respectively, compared with the baseline. Serum calcium levels increased by 12.64, 15.75 and 8.75% for group A, B and D, respectively, and these increases were significantly different (0.05 < p < 0.001) from baseline and control group for groups A and B. Serum phosphorus levels significantly decreased by 22.54% for group A, 17.69% for group B and 7.71% for group D, compared with the baseline (0.05 < p < 0.001). From this study, we conclude that oral administration of gum arabic could conceivably alleviate adverse effects of CRF. PMID: 17999333 [PubMed - indexed for MEDLINE] Publication Types, MeSH Terms, Substances LinkOut - more resources

دا ابستراكت لدراسة استعملت في واد مدني واتنشرت 2008 ومن قبل سنة 2000 كان العلاج بالصمغ العربي جزء من البروتوكول لكتير من المرضى في مركز د. سلمى لأمراض الكلى

Quote: الله يلعن ابو الكرش كرهتني حياتي ما عرفت ليها دواء

ركز فقط في علاج الحاجات الثانية. لا تتعب نفسك في موضوع الكرش. ما عندها اي علاج لا بتنزل بي رياضة و لا نظام غذائي و لا غيرو. فقط عملية زي بتاعة ماردونا.

أيام كنت في الخليج إشتركت في الجيم و نزلت تدريبات شديدة و حسيت بإنو بقيت خفيف و الكرش نزلت. بعد أكثر من ثلاثة شهور قابلت إبن عمي حسن عبد المنعم أول ما شافني قال لي وزنك نزل بس كرشك كبرت. قلت ليهو حرام عليك بعد كل المجهود ده. رد قال: ما تعب نفسك في موضوع الكرش. دي وراثة ما شايف عمك حافظ أحمد فضيل.
عشان كده يا ود القريش نقول ليك ماتعب نفسك ماك شايف كرش اخوك الوزير. (أوع يجي زول يقول لي دي كرش كيزان).

ربنا يكتب الشفاء ان شاء الله لكل المرضى
متابعين معاك

هناك اعتقاد وسط بعض الباحثين بوجود فوائد علاجية لبدرة الصمغ العربى
اول محاولة جادة لدراسة فوائد الصمغ العلاجية بدات على يد الدكتورة الراحلة سلمى محمد سليمان منتصف التسعينات فى مركز الخرطوم للكلى
(قرب جامع الجيش فى وسط الخرطوم) و كانت النتائج الاولية مشجعة للمضى قدما فى اجراء ابحاث متقدمة, لكن الموت عاجلها فى حادثة غرق عبارة
فى النيل اوائل الثمانينات, و للاسف لم كان يبدو اى حماس وسط زملائها فى طب الخرطوم لمجمل الامر و انتهت الابحاث بوفاتها و ليس هناك حسب علمى اى نتائج منشورة فى المجلات العلمية لابحاثها

معتز سلامات
واحتياطي كدة صباح الخير
ياخي في صمغ بيباع معبأ عن طريق شركة نصر
وفي واحد كركدي مخلوطب الصمغ العربي
هل الاثنين ديل بينفعوا يعني بيشتغلوا ولا لاززم صمغ (ود أمه)
تحياتي

Quote: يا قريش الصمغ ده موجود في الدوحة؟ و بتباع وين ؟ ولا نرسل نجيب من السودان؟

سلام يا معتز وربنا يديم عليك الصحة والعافية

محمد يوسف سلامات
موجود فى البيت السودانى فى مدينة خليفة الجنوبية
الكيس يمكن 10 او 15 ريال ما متذكر

Quote: موجود فى البيت السودانى فى مدينة خليفة الجنوبية الكيس يمكن 10 او 15 ريال ما متذكر

بعد بوست معتز ده
الظاهر الكيس بيصل ال50
من الطرائف الليلة قلت للولد ونحن راجعين زكرني وقول لي مدينة خليفة(البيت السوداني)
قبل مانرجع للبيت
زكرني بعدما رقدت في سريري 10مساءً
مودتي لك وصاحب البوست

الظـــلامي معتز القريش

ربنا يديم عليك نعمة الصحة والعافية ويشفيك
لكن!
غايتو حكاية الهرمونات الأنثوية دي ورطوبة قطر
مسألة ما مطمئنة كلو كلو ......... والله صحي ()

عارف مرة في الرياض أقترب مني واحد مصري
وقال لي ما بلقى عندك لالوب ... آي والله لالوب الواحد دا
قلت له: ليه يعني بتسأل من اللالوب تحديداً
قام قال لي كان عندي ضغط وكنت بستعمله ونفع معاي شديد
لدرجة تركت بلع حبوب الضغط
غايتو عندنا حاجات كتيره محتاجة لبحوث ودراسات
الصين بتخم في الصمغ العربي لتصنيع الدواء
..
..


قبل ما افوووت ياخ النصيحة الكرش في الزول القصير شينة
فشـــنو شوف ليها حل معاك عليك الله

تحياتي

اها ياجاه الرسول عايز حاجة ما تخليك تحتاج للولد يذكرك
براك تذكر عليك بالقرفة كباية على الريق وكباية قبل النوم

انا بالصورة دي افتح لي عيادة هنا
اصلا هنا التخصصات ملخبطة خريج فيزياء ممكن يكون ناقد ادبي
يعتد بقوله
وانا خريجة نقد عالجت ليكم الضلامي دا وادهشت اطباء قطر
المافي شنو لقول الواد قيقا

Quote: اها ياجاه الرسول عايز حاجة ما تخليك تحتاج للولد يذكرك براك تذكر عليك بالقرفة كباية على الريق وكباية قبل النوم انا بالصورة دي افتح لي عيادة هنا اصلا هنا التخصصات ملخبطة خريج فيزياء ممكن يكون ناقد ادبي يعتد بقوله وانا خريجة نقد عالجت ليكم الضلامي دا وادهشت اطباء قطر المافي شنو لقول الواد قيقا

'سوعال يادكتورة طيب - اول كباية معتز ولا كباية القرفة ؟
أما ود قريش سنجعله تحت الملاحظة حتى تكتمل الصورة
دُمتي لنا ..

Quote: بعد بوست معتز ده الظاهر الكيس بيصل ال50 من الطرائف الليلة قلت للولد ونحن راجعين زكرني وقول لي مدينة خليفة(البيت السوداني) قبل مانرجع للبيت زكرني بعدما رقدت في سريري 10مساءً مودتي لك وصاحب البوست

قالوا التسوي بإيدك يغلب أجاويدك

أها أمس أنا مشيت أجيب بدرة صمغ من مطعم الخرطوم لقيتو باباباح مافيييييي خلص
اشتريت كعاكيل والراجل لما عرف إنو أنا الكتبت في النت عن الصمغ عمل لي تخفيض (7) ريال

مفتري والله سبعة ريال بسسسسسسس ؟

Quote: ركز فقط في علاج الحاجات الثانية. لا تتعب نفسك في موضوع الكرش. ما عندها اي علاج لا بتنزل بي رياضة و لا نظام غذائي و لا غيرو. فقط عملية زي بتاعة ماردونا. أيام كنت في الخليج إشتركت في الجيم و نزلت تدريبات شديدة و حسيت بإنو بقيت خفيف و الكرش نزلت. بعد أكثر من ثلاثة شهور قابلت إبن عمي حسن عبد المنعم أول ما شافني قال لي وزنك نزل بس كرشك كبرت. قلت ليهو حرام عليك بعد كل المجهود ده. رد قال: ما تعب نفسك في موضوع الكرش. دي وراثة ما شايف عمك حافظ أحمد فضيل. عشان كده يا ود القريش نقول ليك ماتعب نفسك ماك شايف كرش اخوك الوزير. (أوع يجي زول يقول لي دي كرش كيزان).

أها يا ابو النسب رأيك شنو بعد شفت الصور ههههه

Quote: دا ابستراكت لدراسة استعملت في واد مدني واتنشرت 2008 ومن قبل سنة 2000 كان العلاج بالصمغ العربي جزء من البروتوكول لكتير من المرضى في مركز د. سلمى لأمراض الكلى

شكرا دكتورة رشا على الدراسة

بس كان ترجمتيها لينا ينوبك ثواب

معتز سلام ..

عندى تحفظ شديد فى الموضوع ده ..
اولا توجد تجارب شخصية كويسه ..
الا انو مافى اى برهان علمى عليها ..

ثانيا لى رؤيتى أن الصمغ قد يقلل معدلات الامتصاص فى الجسم..
وقد يشمل ذلك امتصاص العديد من المواد التى نحتاجها بجانب تفليل امتصاص الدهون ..
والاخطر من ذلك تقليل معدلات امتصاص الادويه ..

لمن لا يريد الاقتناع بذلك ..
عليه ان يفصل بين استعمال الادوية والصمغ لمدة اربعة ساعات على الاقل ..
هذا لا يمنع التأثير ولكن يقلل احتماله ..

سلام اخونا معتز
تشكر على فتح بوست كهذا
واسأل مجرب ولاتسال طبيب
واصل مستمتعين معاك بالحكي اللذيذ
بس في النهاية يطلع بنزل الكرش ده اهم حاجة
حفظك الله من كل مكروه والم

استطراد ..

فكرة انو مادة محددة تمنع امتصاص المواد فكرة تم استخدامها فى الصيدله ..
المشكلة كانت فى توفير مادة مزاجيه جدا تجاه المواد الضاره كالدهون فى حالة السمنه ..
بمعنى انها عندها انتقائية عاليه للدهون دون غيرها ..
ودى فكرة دواء مشهور اسمو الزانيكال ..
يبقى من المهم جدا اثبات انو الصمع عندو انتقائية للدهون ..


فى فكره تانية معقدة جدا ..
مسألة التحاليل دى بقت ليست المؤشر الوحيد ..
بى معنى انو واحد عندو كليسترول عالى بقومو يخفضو ليهو الكليسترول بالادوية عشان يقللو احتمال الجلطات ..

يلا ..
لقوا انو فلان استعمل الدوا (أ)
وعلان استعمل الدوا (ب)
والاتنين الكوليسترول بتاعهم نزل للمعدلات المطلوبه ..
لكن لقوا ايضا انو فلان (أ) جاتو جلطة .. و علان (ب) ما جاتو جلطة
قاموا عملو دراسات كتيرة جدا لقو انو البقلل احتمال الجلطات هو الدوا (ب) باكثر من خفض الدهون ومعدلاتها القياسيه ..

بمعنى انو تقليل الدهون ليست هدفا نهائيا .. الهدف النهائي هو منع الجلطات ..

وكذلك الضغط .. وعلى ذات منوال المثال السابق .

المهم جدا حافظ على أدويتك التى وصفها لك الطبيب ..
حافظ على فحوصاتك فى مواعيدها ..
واستشر الصيدلانى

التحية لى معتز ولى دكتوره نجاة وليكم كلكم ..
وأتمنى القيام بدراسات علمية جادة حول الصمغ العربى ..

عليك بالنعناع والجنزبيل

بسم الله الرحمن الرحيم
اصبحنا وأصبح الملك لله وصباحكم نور وسرور

طبعا المداخلات كتيرة وكلها مهمة وإن شاء الله ح أرد عليها بس خلوني أكمل الموضوع
إحتمال بعض المداخلات تجد الرد ...

دكتور المشرف مداخلاتك دي كايسنها لأنك زول مختص في الموضوع
وح أجي ارد ليك .. بس انتظر الأكتر من السكر والضغط والكلسترول
ودا الجوكر بتاعي وح أجرك خمسين لمن تصدع
وح أخليك لافي في المعامل لمن تشوف النجوم عز الضهر

ما تستعجلو تقولوا لي نزل الجوكر من هسي
ما بنزلو ما بنزلو بسسسسسسس

نرجع للموضوع ...
بعد ما عملت سحب العينة بواسطة دكتور عمر سعد
وطبعا عمر خدمني في إنو حول التحاليل لمعمل مستشفى حمد
عشان تنزل في السيستم وتقدر تعرضا على اي دكتور
بس برقمك الصحي ..
قعدت في قلق وزي ما قلت ليكم قلت اسال عمر سعد تحت تحت

بعد حوالي اسبوع من التحاليل جاني إلتهاب حلق فظيع
صبرت عليهو يومين في اليوم التالت اللي هو كان يوم (أحد)
وهو يوم عيادة الدكتور بتاعي .. عملت نايم لغاية نهاية الدوام
ومشيت المركز الصحي بعد الساعة تلاتة ونص لضمان عدم وجود الدكتور

أخدت رقم وقعدت والحمد لله دكتوري ما كان موجود دخلت على دكتور تاني
رجل وقور كدا وملتحي ووجهو صبوح استقبلني بكل إحترام .. وقعدت
سألني خير إن شاء الله
قلت ليه والله أنا عندى إلتهاب شديد في الحلق .. عمل الكشف اللازم
وبعدها قلت ليه أنا عندي سكري وضغط وعملت تحاليل قبل اسبوع
لو ممكن تشوفا لي ؟
قال لي خير إن شاء الله بس أول امشي أعمل لي قياس للحرارة وتعال
فعلا طلعت مشيت عملت قياس الحرارة ولمن جيت راجع لقيت الدكتور

خاتي يدينو على خدودو وشكلو متحير مندهش مصدوم

أنا حقيقة جسمي برد تماما .. قلت خلاص يا زول
غسيل غسيل ورربك يهون يعني إنت ح تهرب لمتين .

سألت الدكتور : خير يا دكتور في شنو في التحاليل

الدكتور طوالي سحب ورقة بيضاء من قدامو وقال لي ...

ما نجضتنا يا ضلامي

الاستاذ القريش
مع انك نجضتنا نجاض لكن نسوى شنو متابعيين ومنتظرين وخادم الفكى مجبورة على الصلاه وركز لينا على موضوع (الكوليستروول)

Quote: ما نجضتنا يا ضلامي

سلامتك من النجاض إن شاء الله دينق هههه

الدكتور : شوف يا المعتز في حاجتين محيرات
يا إما التحليل دا ما حقك ودي مستحيلة اذا ركبو ليك استكر على العينة
ويا إما توريني انت عملت شنو ؟

قلت : والله يادكتور ركبو استكر على العينات
لكن في شنو

قال لي التحاليل دي كلها نضييفة وما بتتناسب مع تحاليل السابقة

قلت ليه كيف يعني ؟
قال لي السكر التراكمي 7 (الطبيعي من 6-7)
قوة الدم 13.9 (دي أظنها الهيموغلبين) لأني سألت عنها
بت خالتي دكتورة
قلت ليه طيب البروتين
قال لي مافي بروتين
ولا كوليسترول
ولا زلالي ولا أي شئ

طيب يا دكتور البول أخبارو شنو

قال لي نضيف تماما

جريت نفس طوييييل وحمدت الله وشكرت دكتورة نجاة
وعرفت إني جعلي تجاري سااااي

الدكتور : يلا قول لي عملت شنو ؟
ومسك الورقة والقلم

أخوكم بصراحة اتنفخ نفخة كدا من أمها

قلت لي شوف يا دكتور الموضوع بسيط جدا
عندنا في السودان الصمغ العربي بتعمل مسحون
أنا لي حوالي تسعة شهور من التحليل الفات
بشرب كباية كركديه مع تلاتة معالق كبيرة ضمغ عربي على الريق
ولو قدرت خلال اليوم برضو بشرب ولو ما قدرت خلاص بشربو الصباح

تاني ما عملت اي حاجة ولا حتى قاعد أتريض
ولا وقفت أكل لحوم ولا دهون ولا اي شئ
مديها كدا بس ..

والدكتور يكتب ويكتب في ورقتو

لما جيت طالع قال لي خد دي أدوية الإلتهاب
ولو عاوز أدوية سكري وضغط بكتب ليك
وكمان إجازة يوم بكرة عشان ترتاح

وما خلا كلمة شكر ما قالا لي
وجزاك الله خير دي ردمني بيها ردم زي ردم ود الباوقة

وقام معاي ووصلني لغاية الباب ـ التقول أنا الدرستو الطب ههههه

أها بعد كدا أخوكم قوى قلبو واتصل على الدكتور الأصلي بتاعو
وبالمناسبة الدكتور الأصلي دا فردة وصاحبي وبنجيهو في اي وقت بدخلنا
ومبسوط من قصة إني متزوج تلاتة دي وبهاظر المدام وهو دكتور ظريف شديد
ومحبوب في المركز الصحي وهو استشاري الأسرة وجنو بحوث
ومرة كدا خدمتو في موضوع بخص إدارتنا والراجل حافظ لي الجميل
بقينا نجي يوم العيادة ما يوم العيادة بدخلنا (أنا والمدام طبعا .. برضها سكري)

المهم اتصلت عليهو بعد أسبوع تقريبا من مقابلة الدكتور الأول
وقلت ليه نحنا جايينك في المركز يا دكتور إنت موجود ولا برا المركز
بلطف كدا قال لي اهلا بيكم ولو ما موجود أتواجد عشانكم

ركبنا العربية أنا والمدام نزلنا الولد في المدرسة وعلى المركز الصحي

وصنا ودخلنا ما كان في زحمة رحب بينا
أها مالكم في شنو يا أزوال
قلت ليه والله أنا كان عندي التهاب وجيت هنا قبل اسبوع وقابلت الدكتور
وأداني الأدوية دي (طلعت ليه نشرات الأدوية) بس حاسي إنو لسة الالتهاب
وتاني شئ عندي تحاليل عملتها في اليوم الصحي للجالية عايزك تشوفا
والمدام عايزة أنسولين بتاع القلم لأنو بتاع الحقن دا تعبا

قمت على السرير وفتح خشمي ودخل خشبتهم العويرة ديك بي جاي وبي جاي
قال لي يا زول انت ما عندك التهاب ولا شئ إنت مش قبل كدا جيتني بخصوص (الجيوب الأنفية)
قلت ليهو ايوة قبل سنة تقريبا ـ
(كويس انو ما غتذكر إنو عمل لي تحويل عاجل لعادة الأنف والأذن والحنجرة وأنا طنشت الموضوع)
قال لي :
طيب انت تمشي تعمل لي صورة للراس في مركز المطار وتجيني راجع

رجعنا لكراسينا وفتح الكمبيوتر وطق طق طق طق على الكيبورد
وبعد شوية رجع للملف الورقي قلبو زيييين
قال لي انت وين من زمان ما عملت تحاليل آخر تحليل كان شهر واحد 2012
قلت ليه والله بس سافرت ورجعت وتاني سافرت والمشغوليات

رجع تاني طقطق في الكيبورد واتلفت علي وعاين لي في ود عيني

يا زووووول انت متأكد الدم الأخدو منك دا دمك
ابتسمت ابتسامة خبيثة طبعا أنا عارف الموضوع وسبب السؤال
قلت ليه والله دمي يا دكتور وحتى ركبو عليهو استكرات قدام عيني
ليه في شنو يا دكتور
قال معقولة البروتين من 300 الى نورمال
ومافي لا زلالي لا دهون والبول نضيف
والسكر من 13 الى 7
في شنو يا زول عملت شنو ...

قلت ليه والله ما عملت اي شئ بس
كيت وكيت وكيت القلتها للدكتور الأول

الدكتور : لالالالا دا شي مستحيل دا خرافي قلت لي شنو

قلت ليك الصمغ العربي يا دكتور مع الكركدية الصباح ع الريق

والصمغ دا بتجيبو من وين هنا ولا السودان
قلت ليه هنا في وفي السودان في
المدام قالت ليهو ما تعمل فيهو بحث من بحوثك العذبتني بيها دي
قال ليها والله كلامك فكرت فيهو أنا اصلا مفروض اعمل بحث عن القرفة
لكن موضوع الصمغ دا جذبني أكتر وحاسي إنو فيه شئ لازم يدرس
عشان كدا ح اغير البحث من القرفة للصمغ العربي
ضحكت معاهو وقلت ليه أوعة تنسى حقوقي في البحث
قال لي كيف لازم انت اساسي وأخد لي صورة بالموبايل بتاعو
ورسل لي منها بالبلوتوث ح أنزلا ليكم تحت في المداخلة دي
بعد داك قام
كتب في قوقل (الصمغ العربي) وطلعت ليهو عدة عناوين
بعدها قال لي خلاص أمشي أعمل الصورة وتعال لي راجع

طلعنا أنا والمدام ومعنا بنتنا أمنية مشيت نزلتهم في العالم الجديد
وسييييدا على مركز المطار عملت الصورة ورجعت للدكتور

وأنا قاعد برة منتظر جات مرأة إيرانية عجوزة قعدت جنبي منتظرة تدخل للدكتور
بعد شوية فتح الدكتور الباب وهو يودع أحد المرضي يبدو أن بينه وبين المريض معرفة

فوجدنا أنا والمرأة في الخارج ـ قلت ليهو دخل المرأة أول أنا بنتظر
دخلت المرأة وبعد خمسة دقائق تقريبا فتح الدكتور الباب وناداني تعال يا زول

الحاجة دي عندها سكري وطوالي مرتفع جربنا ليها كل العلاجات ما نفعت
تنصحا بشنو ؟
قلت ليها أنصحا تستعمل صمغ عربي على الريق مع كركديه يوميا
قالت المراة طيب من وين أجيبو
قال ليها الدكتور تكلمي الحاجي يروح سوق واقف وكتب ليها ورقة فيها (ضمغ عربي)
يشيل الورقة دي ويروح يجيب ليك الصمغ دا وتطحنيه ناعم وتجيبي قلاص مي كبير
وتحطي فيه تلات دفشات من الصمغ دا وتدوبيه زييين وتشربيه

أخذت المرأة الورقة وانصرفت ـ قلت ليه بعد كدا تقسم معاي الراتب
أها خلاص قمت تجرب في المرضى
قال : إيه بدينا البحث خلاص

هات الصورة

أديتو الصورة ختاها في الشاشة حقتم ديك

* ودا الجوكر بتاعي يا دكتور المشرف (الصورة)
ما ح أنزلو ليك الآن إلا في الآخر ....
ويمكن أرميهو ليك بايظ كمان ههههههه

الأعزاء
والله ما ماعاوز أضيع من أختنا د.نجاة البياض والخروف.
لكن أستاذتنا د.سلمى عليها رحمة الله كان عندها أبحاث في الصمغ وكانت بتستعمله لمرضاها
بحثت لواحده من أبحاثها لرفدها بالبوست فلم أوفق
ولكم هذه الصله في نفس الموضوع
http://www.sudaneseonline.com/arabic/permalink/6701.html
ربنا يتمم عليكم الصحه والعافيه
لكم الود

أخو الوزير

Quote: تاني ما عملت اي حاجة ولا حتى قاعد أتريض ولا وقفت أكل لحوم ولا دهون ولا اي شئ مديها كدا بس ..

دي ريحتني فيها خلاس
لأنو اخوك بصراحة زيك كدة ضعيف قدام الطيبات بأنواعها

تحياتي ياخي وأنا طبعاً ما عندي الحاجات العندك دي كلها
شوية منها لكن (( بوستيك )) دا بالحيل عجبني وكان لي مراد
ولا أقول ليك ((( خليها في حنانك )))
ياخي تسلم
وبعد كدة بوستيك دا لو وقف ذاتو ما في مشكلة

ياخي ياخي تسلممممممم

أبو الجزل الأصلي

تخريمة
أسمع اها ا
1) لأدوية ح تستمر فيها
2) ولا ح تستمر على العلاج البلدي بس
3) ولا الاثنين معاً
تختر الاجابة الصجيجة

الاخ معتز
حمدا لله علي السلامه

الاخ عوض الله محمد احمد

قلت المرحومه د. سلمي عندها ابحاث في منتصف التسعينات و توفيت في حادث عباره في بدايه الثمانينيات ، و الله ده قلبت فيها الهوبه ، عليك يا عوض الله ما تجننا .

الزبير

ود القريش سلااااااااام

تعرف عندي في درج المكتب صندوق مليان بظروف مسحوق الصمغ ليهو سنة وكم شهر
ما فتحتو .. وصفوهو لي للكلسترول وما اشتغلت بيهو فلسفة مني ساااااي
بعد قراءة البوست دا أول حاجة عملتها فتحت لي ظرفين في قزازة موية وقرطعتهم زي الترتيب
مشكور على المشاركة متعك الله بالصحة والعافية

Quote: أسمع اها ا 1) لأدوية ح تستمر فيها 2) ولا ح تستمر على العلاج البلدي بس 3) ولا الاثنين معاً تختر الاجابة الصجيجة

هههههههه خالد واصل في أدويتك عادي

بس أنا ح ابدأ أتخلى عن العلاجات بالترتيب وح أعمل الفحوصات اللازمة
وكان ربنا حيانا من الموت برجع ليكم بالجزء التاني من تجربتي الشخصية مع الصمغ العربي

والله يا أخوانا بشكركم كتير على مداخلاتكم وإن شاء الله ح ارجع ليكم واحد واحد
بس خلونا نكمل باقي الموضوع لسة الحكاية فيها الكثير المثير

وطبعا الجوكر قصة صورة الشعة في الآخر

الحلقة القادمة عن تجربتي مع زوجتي صاحبة السكري من النوع الأول
وتأثيره على الكلى وماذا فعل معها الصمغ العربي ؟؟؟

والحلقة التي بعدها عن صديقي الذي حمل على الاسعاف الى المستشفى لإرتفاع السكري والضغط
وبداية الجلطة التي صاحبت ذلك وماذا فعل معه الصمغ العربي بعد ساعتين فقط من تناوله


خليكم قريب عندي شوية شغل اخلصو وبرجع ليكم

Quote: خليكم قريب عندي شوية شغل اخلصو وبرجع ليكم

اها حكيت ليكم قصة الود زكرني بالموضوع بعد ما جيت البيت
وحاتكـ الليلة من الصباح اول زبون للبيت السوداني
قلت الصفوف بتقابلني جنب جامع عمر
لكن لقيت الشارع زاتو مافيهو مارة ولاحركة للسيارات


عبوات جاهزة - لتعم الفائدة





مودتي

Quote: تنسى حقوقي في البحث

قمنا لحركات الضلاميين خلاس؟؟؟؟؟

Quote: قمنا لحركات الضلاميين خلاس؟؟؟؟؟

قمنا للحسادة خلاس ؟؟؟؟؟؟؟؟؟

الأخ معتز القريش
سلام ....
.
.
الحمد لله الذي شفاكم ....أتمنى أن ترسل هذا البوست للصحف السودانية
لأنه ذو فائدة عظيمة للجميع .....وماتنسى ( حقوق ) الأخت د.نجاة محمود.
.
.
تحياتي

إلى ابو النسب عمار يس وكل المشككين في قدرة الصمغ على التــخــسيس وإزالة الكرش

هاكم معتز القريش قبل الصمغ (مع ملاحظة إنو الجلابية واسعه)
مخصوص جبت الصورة دي لأنو باقي الصور الكرش متنبلة شديد ههههههه




ودي معتز القريش بعد الصمغ (بالله شوفو الكرفتة دي مستقيمة كيف)
ولد دا ههههههه

للمشاركة من خارج المنبر نرجو مراسلتنا على العنوان التالي

[email protected]

مع خالص التقدير والاحترام

والله يا عاجبالك طلع باب النجار مخلع
قمنا بارسال رسالة سريعة لوصال لاحضار كمية كبيرة من بدرة الصمغ

Quote: والله يا عاجبالك طلع باب النجار مخلع قمنا بارسال رسالة سريعة لوصال لاحضار كمية كبيرة من بدرة الصمغ

بس ما تنسي ترسلي البياض يا دكتورة

معتز القريش....

انا من المتابعين للبوست بتاعك ده من بدايته، والحقيقة ما كنت ناويه أعلق لانه ما حأفيد زول بكلامي، وانا المستفيده... لكن بعد ما شفته صورتك دي، رد فعلي اني فتحته خشمي قدر الضربة وفضلت مقهية كم دقيقة كده لما خشمي نشف!



ما شاء الله ما نسحرك... ما شاء الله

Quote: معتز القريش.... انا من المتابعين للبوست بتاعك ده من بدايته، والحقيقة ما كنت ناويه أعلق لانه ما حأفيد زول بكلامي، وانا المستفيده... لكن بعد ما شفته صورتك دي، رد فعلي اني فتحته خشمي قدر الضربة وفضلت مقهية كم دقيقة كده لما خشمي نشف! ما شاء الله ما نسحرك... ما شاء الله

بت الحسين الله ما ضراك إن شاء الله
بس اقفلي خشمك سريع لا تدخلك ضبانة ههههههههه

مشاركة عبر الايميل

Quote: معتز القريش السلام عليكم ورحمة الله حقيقة انا من المتابعيين للمنبر من الخارج وأتصفح من بداية المنبر حتى النهاية لكن اليوم يكفينى موضوعك عن الصمغ العربى وبقية المواضيع بكرة إن شاء الله ان مد الله فى الاجل طارق عبد العزيز

تسلم يا طارق وخليك قريب
الكلام الفيهو الصمغ جاي وراء

الأخ معتز القريش

تحياتي ولله الحمد أن في غاباتنا ومزارعنا الكثير الكثير لم يجد حظه في التعريف والدراسات المناسبة لنقدمها للبشرية جمعاء ومعشر السودانيين لما لها من فوائد لا تُحصى ولا تُعد .


والله يا ود القريش في الزمان السابق ما أكلناه من صمغ وكداب في جناينه الطبيعية من صمغ أأأأصفر وبريالته التي تلكب في خشومنا حتى اليوم جدير بحمايتنا لسنوات طويلة قادمة.

وطبعن مع سخانة الجو الشد الكبااار بلد الصمغ يا ود القريش . ولله الحمد في السنوات الأخيرة حدثت زيادات كبيرة في أسعار الصمغ مع تراجع الخدمات المصاحبة لصالح المنتج مما كان له الأثر الكبير في تدني الإنتاجية ومن هنا نرفع صوتنا عاااااالي يا ود القريش ويدكم معانا في في إنصاف المنتج وزيادة نسبة الخدمات التي يحتاجها المنتج في كافة مناطق الإنتاج التقليدية والحديثة .

بحيراوي

ماقدرت اتابع فلو كلامي التحت ده قالوهو ليك رجعو لي

الزلال العالي مؤشر على احتمال اصابة الكلى
حصلت لي الحاجة دي قبل 10 سنوات وانقذني
دكتور مصري ممتاز في مركز خليفة الصحي
بحباية رينتك تن يوميا

تابعونا وفالكم طيب لسة الجاي أحلا

لكن خفت من قصة الوزن دي مع اللون الأسود للبراز
وانت البخليك تعاين لي اللون شنو و لا باقية عليك قصة الوالد قلبو حنين ههههههههههههههههههههههه
تحياتي يا استاذي الفاضل و ربنا يديم عليك تاج الصحة و العافية ومتابعين معاك الموضوع الجميل

يا معتزنا ....... عذبتنا

صمغنا ما فيهو كلام، وقيل انه المعني بالمن والسلوى
والمدام مهتميو بيهو شديد من زماان
وبيضاف عندنا الزامي يوميا للعصير وخلافه ولكن بكميات قليلة

بس بالله يا جماعة استصحبوا معاكم كلام د.المشرف
الصحة ما لعب

Quote: مسألة التحاليل دى بقت ليست المؤشر الوحيد ..

الكلام ده جدا خطير

انا معاي سكري قديم
من ايام الفحص بالشرايط للبول
والحمد لله محافظ تمام

في الايام الزمان برضو طلعت حاجات يقال انها تخفف او تزيل السكر
وبعدييين اتضح انها بتتلاعب كيميائياً في البول بحيث انها لا تمكن الشرايط من اكتشاف مكونات السكر

هسه برضو في اللالوب وخلافه
نتائجه مبهرة حتى على فحص الدم
جربتها لفترة
وفرحت وقللت جرعات الحبوب
لكن والله يا جماعة طوال الفترة كنت حاسس بي انو السكر ما زال موجود
فانتبهوا انتبهوا
الصحة ما لعب

محاذير استعمال الكركديه.
لا يجب تناول الكركديه لدى المرضى الذين يعانون من الإصابة بمرض النقرس، أو مرضى الروماتزم، أو المرضى الذين يعانون من تكون حصوات فى الجهاز البولى لديهم.

الاخ معتز
والف حمدا على السلامة ..

ايام الاحتفال بعيد الاستقلال طبعا كل الجماعة كانو مستغربين من الرشاقة و الخفة الكنت شغال بيها ..وبعضهم عزا ذلك الى التوجه الجديد لسعادتكم ولكن اتضح ان السبب هو الصمغ العربى ...وبالاشارة الى الصورة الاخيرة يبدو لى ان الامور تتجه بصورة حثيثة نحو الرابعة ...

بالمناسبة اعتقد انو فى الدوحة يوجد دكتور سودانى اسمو عصام لديه ابحاث فى مسالة العلاج بالصمغ العربى ومكتبه فى منطقة السد على مااعتقد...

تحياتى ياحبيب ..

معتز القريش يا ابو الصحب
سلامات ياخي
من ديك وعيك
.
.
بوستيك والتلفونات اشتغلت يا فريد ولدي جيب لي صمغ كبار ههههههههه
داير تلصق بيهو شنو يابا عارفني بتاع تلاصيق ههههههههه
.
.
والله كان اطعم خشمك بالقصة دي
زمان حبوبتي حليمة مشت لي حبوبتي رقية قالوا عيانة
اها مع دخلتها كدي سمعت ولدا قال ماش اجيب الكارو اوديها حكيم ام كوراك ههههههههه
يا ولد هوي هاك جيب ليها ببسي كولا
يا خالتي بيبسي كولا شنو ؟
آي جيب ليها بيبسي كولا يا جنا بتعالجا عشان فيها الدواشات ههههههههههههههه
.
.
شكرا عزو ..... واقع بذرة الكتان برضو قالو ممتازة تيزة جد
شكرا دكتورة نجاة

القريش
متعكـ الله بالصحة والعافية دوماً
( عشان كدا الأمريكان الحاجة الوحيدة الماشملها الحصار الأقتصادي الصمغ العربي)
يعنى الأبالسة طلعوا عارفين كل حاجة
والقريش آخر من يعلم !!!

تحياتي يا ود القريش وألف حمد لله على السلامة ..
بالإضافة للصمغ العربي بالكركدي ..
عندي ليكم وصفة بت ###### لحرق الدهون والمرارة والسكر .. بس خطيرة على القلب ..
إنو الواحد على الريق يشوف ود القريش فاتح بوس وين ويبدأ يتابعو ...!
ياخ نجضت حناننا زاتو ...

وفقعت مرارتنا ياخ ...!
واحد أخونا ممن فقعت مرارته بالجرجرة دي برضو ضرب لي وقال عايز تلفونك ؟؟
قلت ليهو ما عارفو عندي ولا لأ ... لكن كويس إنك قلت لي عشان أفتش ولو لقيتو عشان أمسحو ....!
طلعت روحنا ياخ ... ما كان ده صمغ ..

يا ود القريش عليك أيضاً بالليمون والجنزبيل الأخضر ولكن لا تُسرف فيهما ...
ألاّ يزيد تناولك اليومي عن 4 جرامات للجنزبيل الأخضر ...

الصمغ العربي له فؤائد جمه ..
وبعضها لم يكتشف حتى تاريخه ..
هو ترياق عجيب وفعال في علاج مشاكل الكلى ..
بكافة أشكالها .. إبتداءاً من الالتهابات الخفيفة ..
وحتى الفشل الكلوى التام ..
وكل مشاكل الحوالب ومجرى البول والمثانة ..
ماأنزل الله من داء إلا وأنزل معه دواء عرفه من عرفه وجهله من جهله ..
روى لي من أثق في روايته أن إمرأة في مناطق كيرلا بالهند ..
حين خضوعها لكشف روتيني للدم ..
أخبروها بانها مصابة بفيروس نقص المناعة ( الايدز )..
فهامت على وجهها وهربت خوفاً من الفضيحة والعار ..
وربما أشياء أسوأ من ذلكـ .. قد تواجهها إن هي بقيت ..
فهربت الى داخل الغابات ..
وظلت تقتات أوراق الأشجار والثمار ..
حتى نسيها الناس ..
وبعدها بشهورظهرت تلك المرأة التي ملت الهروب ..
فتم أخذها للكشف عليها مرة اخرى من قبل السلطات للتثبت من اصابتها بالايدز ..
فكانت المفاجاة خلوها من مرض نقص المناعة تماماً ..
وحين تم سؤالها عن ماذا تناولت داخل الغابة وماهي النباتات والأوراق التي أكلتها ..
أدلت بعدم علمها بذلكـ لأنها تناولت شتى انواع النباتات وأوراق الأشجار حين لم تكن تجد الثمار ..
للتغذى عليها .. فشفيت من الايدز بفضل خلاق البرية ..
والى ان يتم اكتشاف علاج ناجع للأيدز ومن الطبيعة والاشجار التي هي أصل كل دواء ..
سيظل هاجس الايدز يؤرق ويقض مضاجع العالم بأسره ..
في ماسردته عبرة وتذكير بان لكل داء دواء ..
عرفه من عرفه وجهله من جهله ...
اللهم اشفي مرضانا ومرضى المسلمين ..
وفرحنا ليكـ والله ياقريش .. وربنا يواليكـ بكامل الشفاء والعافية ..
والصمغ اكسير حياة .. وترياق عجيب ..
ليت جهات الاختصاص تهتم به وتجعله في اولوياتها وتبصر الناس بفؤائده ففيه العجب العجاب ..

مازال الجوكر فوق ومنتظر حكتور المشرف يرمي الخمسين
ومازالت قصة زوجتي وصديقي تحت الطبع

خليكم قريب

والله جنس تجدع هو لكن هههه

ود القريش و ضيوفه الكرام سلام من الله و رحمة

والدة زوجتى عليها رحمة الله كانت فى زيارة للدوحة

و قرر الاطباء عمل غسيل لها . صديق وصانى بالصمغ

العربى احضرته من السودان و بعد مقابلة الطبيب بفترة

و الله يا معتز ضرب اخماس باسداس و لم تغسيل ابدا

حتى توفاها الله بالقلب ، بعد سنوات طوال كمان.

غايته الظلامي لما يلقى فرصة في الناس ويتجدّع بتبقى مشكلة! ياخ خاف الله فينا أربعة صفحات مجرجرنا... خليت شغلي وبقيت مبارة الجوكر بتاعك ده..

تمام العافية ليك ياود القريش وكل مرضى السكرى
فوووووووووووووق

بسم الله الرحمن الرحيم

اصبحنا وأصبح الملك لله ولا حول ولا قوة إلا بالله

اسمحو لي أن اشكر كل من خط حرفا في هذا البوست وحقيقة كل المداخلات قيّمة
وتستحق الرد الضافي عليها ولكن ونسبة للنجاض الحاص للبعض
سنؤجل الردود

وان شاء الله سأواصل اليوم في سرد سحر هذه النعمة المسماة (الصمغ العربي)

زوجتي العزيزة (أم محمد)
مدام (A) للتوضيح للجماهة إياهم

مصابة بالسكر من النوع الأول يعني بتستعمل إنسولين منذ الطفولة
وعمل معاها السكر عايلو المعروفة في العيون والجسم عموما

ولكن وقبل فترة غير قصير بدأ السكر يؤثر على الكلى ليها

وفي يوم تفاجانا بتغيّر لون الأصبع الصغير والمنطقة حوله الى اللون الأزرق

اتجهنا فورا الى طوارئ مستشفى حمد وبعد خمس ساعات من التحاليل والفحوص
ودخول وخروج عدد كبير من الأطباء وحتى الاستشاريين ـ ذكروا أن الأمر يتعلق بالكلي
تم أخذ عينات للتحاليل وتحويلها الى عيادة الكلي

وعمل لها موعد في عيادة الكلى وعند الذهاب الى عيادة الكلى اتضح فعلا تأثر الكلي
وارتفاع مادة (الكيرياتن) بصورة كبيرة إذ بلغت (151)

حتى ذلك الوقت لم تكن المدام تستخدم معي الصمغ كنت أستخدمه لوحدي

بعد مدة أسبوع الى اسبوعين تقريبا من ذلك الموعد بدأت تشكو من الم فظيع في جنباتها
وخصوصا الجنب الأيسر وكانت لا تستطيع النوم ليلا ـ مع قلة في البول والم في المحسن ايضا

اقترحت عليها أن تستعمل معي الصمغ العربي فوافقت دون تردد لما تشعر به من الم

بدأت تستخدم معي الصمغ العربي قبل ثلاث اسابيع من الموعد المحدد لها لمقابلة دكتور الكلى
وكان الدكتور قد طلب منها عمل تحاليل قبل اسبوع من الموعد المحدد ..

النتيجة قبل الأسبوع الأخير لمقابلة الطبيب :
منذ الأيانم الأولى لاستخدام الصمغ اتهت آلام الجنبات نهائيا (نعم نهائيا) وليس تحسن
عودة كمية البول الى معدلة السابق بصورة كبيرة
انخفاض في معدل السكر في الدم وتكرر عمليات الهبوط (هبوط السكر) يوميا عند الساعة الخامسة صباحا

كانت تأخذ صباحا 30 وحدة انسولين ومساءا 20 وحدة أنسولين

راجعنا طبيبنا في المركز الصحي وذكرها استعمالها للصمغ وتكرر انخفاض السكر يوميا
فام بتخفيض الجرعة كالآتي
20 وحدة صباحا بدلا عن 30 وحدة
10 وحدات مساءا بدلا عن 20 وحدة

وجاء موعد طبيب الكلى وذهبنا الى العيادة وكانت النتيجة كما يلي

انخفاض ملحوظ في الكوليسترول والبروتين والزلالي

انخفاض مادة الكرياتين من 151 الى 76

طمانها الدكتور وأثنى على حالتها الصحية وأعطاها أوراق تحاليل أخرى
على أن تقوم بها قبل أسبوع من الموعد المحدد بعد أربعة اشهر وجاييكم تاني

الآن تواصل زوجتى استعمال الصمغ العربي معي يوما
ويتواصل انخفاض منسوب السكر لديها يوميا حتى بعد تخفيض الجرعة

أول امس كان السكر لديها حوالي الساعة السادة صباحا 59 فقط

ولا انسى أيضا غضافة القرفة ك (شاي) ظهرا أحيانا ومساء أحيانا

مشاركة عبير الايميل

Quote: معتز القريش سلام ليك ولي كل المتداخلين متابعين وهاك دي من طرف عمك قوقل فوائد الصمغ العربي منها الآتي 1/يحتوي الصمغ العربي على نسبه 98%من الالياف الذائبه في الماء والتي تساعد بصوره فاعله في عمليه الهضم 2/يساعد الصمغ العربي في عملية بناء الطبقه المخاطيه في جدار الامعاء والتي لها دور فعال في وقايه الجهاز الهضمي 3/الصمغ العربي يقلل من حدوث الاورام الحميده والخبيثه في الامعاء وبالاخص القولون الذي يعتبر من اكثر الاعضاء اصابه بالاورام بنوعيها 4/الصمغ العربي يعمل على تقليل نسبه جلكوز الدم بواسطه فسيولوجيا معينه 5/الصمغ العربي يساعد في الوقايه والعلاج من التهاب المصران العصبي 6/الصمغ العربي نوع الهشاب يعالج الامساك ونوع الطلح يعالج الاسهال هذا اضافه الى استعمالاته علاج امراض الكلى وقد نصح المحاضر بضرورة استعمال الصمغ العربي في الحياة اليوميه في الطعام بكل الطرق سواء في العصائراو الوجبات العاديه وقد اكد المحاضر ان الكميه التي ينصح بتناولها غير محدوده اضافه الى انه يحتوي على نسبه عاليه من الكالسيوم والتي تساوي عشرة اضعاف الكميه الموجوده في اللبن كما ان نسبة الالياف الذائبه في الماء تساوي اكثر من 12 ضعف الالياف الذائبه في الماء في التفاح وهو من اكثر الفواكه التي تتواجد فيها هذه الالياف ولك ودي جلال عيسي

شكرا اخي جلال عيسى

مشاركة عبر الايميل من الأخ الصادق عبد الله الحسن

Quote: لم أكن متابعاً منتظماً لكل البوستات في السنوات الأخيرة، ولكني أظن وفي حدود ما تابعته فإن موضوعكم عن الصمغ العربي يبقى من وجهة نظري هو الموضوع الأهم .. ولأنني لا أملك حساب في الموقع -وإن كان يُسمع لقصير في هذا المنبر رأي- فإنني أطالب من خلالكم الأخ بكري بأن يضع موضوعكم ويبقيه في الصفحة الأولى الرئيسة. هذا موضوع يبعث الحياة ويحيي الأمل في نفوس آلاف الناس. موضوعكم عن الصمغ جدير بأن يثبت عنوانه وبأكبر بنط ممكن ليس في أعلى قمة منبر المهندس بكري فقط، بل هو جدير بأن يكون المانشيت الرئيس في كل الصحف، والخبر العاجل في مختلف وسائل الإعلام. مرة ثانية، بل ومرات بلا حدود ...يديك الصحة و حسن العافيه..

تسلم أخي الصادق وربنا يشفينا ويشفى جميع مرضى المسلمين

سلام يا قريش

وشكرا على البوست المفيد ...بالله ركز لينا على علاج امراض صغار السن كبار السن دى عرفناه
من كرش وانتا ماشى:)

Quote: سلام يا قريش وشكرا على البوست المفيد ...بالله ركز لينا على علاج امراض صغار السن كبار السن دى عرفناه من كرش وانتا ماشى:)

بوب يا أخوي نحنا تخصص كبار بس
وزي ما قالو الشدر الكبار فيهو الصمغ
والصمغ موضوع البوست ههههههههههه

ومشاركة أخرى من الأخ الصادق عبد الله الحسن

Quote: الاخ معتز: يديك العافية برغم "الإنقاذ" و كم الأمراض التي تفشت وانتشرت خلال العقدين الأخيرين (بما فيها مرض حامد نفسه) إلا أنه- والحق يقال- فإن هذا البوست الذي تابعه نحو خمسة آلاف شخص في بحر يومين أو ثلاثة ، هو بوست مشحون بالأمل.. بوست يرد الروح ويبعث التفاؤل لدى مئات الآلاف ممن تعذبوا بسبب عناء التردد على المراكز الصحية والمستشفيات، وعذاب الوخز اليومي بالإبر لفحص الدم أو لأخذ الانسولين، إضافة إلى التهام كل ذلك الكم من الأدوية كثيرة الأنواع وباهظة الثمن وعديدة الأعراض الجانبية. وأظن (وليس كل الظن إثم) بأن الكثير من شركات الأدوية ومراكز الأبحاث الغربية لديها إحاطة كاملة بكل أسرار الدواء، ولديها الترياق الناجع للكثير من الأمراض المتفشية في أربع رياح الأرض، ولكنها تحجم عن تمليك معلوماتها للغير لأن مواصلة جني الملايين من الدولارات تتقدم لديهم عما سواها ، بما فيها حياة أو موت ملايين التعساء خاصة أمثالنا ممن يعيشون في هذا العالم الثالث... ولعلكم تذكرون ما أحاط بموضوع (الملكية الفكرية) وقيام تلك الشركات بمنع الناس من تصنيع الدواء و أخذ العلاج في الهند وجنوب أفريقيا وغيرها خلال السنوات الماضية. نشكرك أخي معتز على هذا الموضوع الهام، واسمح لنا أن نسألك بعض الأسئلة (الاختيارية): · كما كان وزنكم في بداية العام 2012 وكم هو الآن؟ · هل توقفت تماماً عن تناول علاجات السكري والضغط خلال فترتكم (الصمغية) هذه؟ · هل عانيتم خلال هذه الفترة من أمرض أخرى خلاف "الظلامية" وما ذُكر في البوست وهو ليس بقليل؟ · هل من أكسير ناجع يخلصنا مما هو ملتصق بنا منذ الثلاثين من يونيو 1989م.

تحياتي مرة أخرى أخي الصادق

بالنسبة لأسئلتك :

Quote: هل توقفت تماماً عن تناول علاجات السكري والضغط خلال فترتكم (الصمغية) هذه؟

لا لم اتوقف عن علاجات السكري أو الضغط خلال تلك الفترة
ولكنها اصبحت تسبب لي هبوط في الضغط والسكر
لذلك اوقفتها قبل خمسة ايام تقريبا وبدأت في عمل التحاليل اليومية
وسوف أنقل النتائج هنا بعد شهر إن شاء الله

لكن أطمنك لغاية الآن ماشي كويس وبدون علاجات

ولا أنصح بترك العلاجات بدون استشارة الطبيب

مشاركة أخرى من الأخ / حسين عمر محمد يوسف

Quote: الاخ العزيز معتز حقيقه انا من عشاق هذا الموقع منذ زمن كبير لا يقل عن السبع سنوات ...وطلبنا من بكري اب صلعه بان يجود علينا بالعضويه ولكن ... على العموم عجبني بوست الصمغ العربي دا شديد واخوك من بكره على البيت السوداني جزاءك الله خيرا اخي معتز واتمنى لك ولاسرتك الصحه والعافيه (تخريمه) والله بطنك كانت في بيت صديق البعيد في الخور لمن شفتك كانت رهيبه زي بطني ههههههههههه اخوك حسين عمر الفكي قطر للغاز

ربنا يجود عليك بالعضوية وبالله ورينا النتائج بعد الاستعمال

مع خالص تحياتي واحترامي

حا تستتخدم الجوكر متين يا فريق فاينهام ؟؟

ذكرتنا تيلي ماتش..

Quote: حا تستتخدم الجوكر متين يا فريق فاينهام ؟؟ ذكرتنا تيلي ماتش..

إن شاء الله بعد قصة صاحبي الوقع بالسكري والضغط
يعني تقريبا كدا بعد بكرة ههههههه

فوق ياريت بكري يعلق البوست دا لانه بالجد مهم شديد لاي زول

ود القريش... انا والشعب هنا جبنا اللبان وسحنّاه وذوبناه في موية الله والرسول وشربناه يومين ورا بعض... ياخ طعمه بايخ شديد... انا ضايقني... لكن في نقطة عايزه اسألك منها... قريت في مشاركة انه في نوع بسبب اسهال ونوع بسبب امساك... الفرق بيناتهم شنو من ناحية الشكل؟ انا طبعا شهادة عربية ما بعرف الفرق بين الهاشاب والطلح...

ومنكم نستفيد

يا مريم بت الحسين ( جمعتي بين افاضل الاسماء )

مُلاح روب أبيض، بي عصيده حااااااره

=============================================

قالت شهاده عربيه

و الله ديل نحن العرب


ابن العوام

Quote: جبنا اللبان

مريومة حبيبتي ما لبان صمغ Gum arabic
ما عنده طعم شديد والمسحن بشيه البراون شوقار

اللبان دا بعملو بخور ومر شديد بينفع الازمة وبيطلع البلغم

وعنده انواع منها المستكة واللبان اللادي

محبتي ليك

سلامات يا معتز،
وان شاء الله يشفيك ويشفي المدام، ويشفي جميع مرضانا...

ربنا يشفيكم وكل المرضى ..

حتى عند الخواجات الكلام دا من 2009 http://www.foodnavigator.com/Science-Nutritio...y-boost-heart-health

Quote: Modified gum arabic may boost heart health The modified gum arabic product 'SuperGum' may reduce blood pressure, even in people with normal levels, according to a new study from the UK and Japan.

Quote: قالت شهاده عربيه و الله ديل نحن العرب

ههههههههههههه يا الزبير... قلبك ابيض يا قول المصريين... انا شهادة عربية تجميع صيني، حسي شوف رد د.نجاة ده.. موش واضح اني طاشة شبكة!

Quote: مريومة حبيبتي ما لبان صمغ Gum arabic ما عنده طعم شديد والمسحن بشيه البراون شوقار اللبان دا بعملو بخور ومر شديد بينفع الازمة وبيطلع البلغم وعنده انواع منها المستكة واللبان اللادي محبتي ليك

الحبيبة د.نجاة
حسب وصفك ده، اعتقد احنا جبنا الصمغ الصاح... ده بتاع الهاشاب ولا الطلح؟ طعمه مافيه طعم... عارفه احساس انك بتشربي في حاجه وما بتشربي.... ذكّرني ولا مؤاخذة البزاغ... يخخخخ... اعتقد انه لو الزول لخبطوا في شي ما حيحس بي طعمه خالص... زي ما ما بعمل ود القريش

البوست ده كان وين ؟
تخشو سااااكت ولا تكلمونا
اولا يا مريم بت الحسين
اللبان المر مر وطعمو اجارك الله
ما بتبلع لكن لو عندك سكري وجاك جرح اشربي منو كل صباح شوية
وشك ببقى زي البنية وبتصرا وبتغمضي وبتجيك تجاعيد مبكرة لكن بتتعالجي
ولو عندك امساك اقعي السنمكة
اها ياناس انا لقيت الايام دي علاج نفع معاي في السكري بنزلو الارض
ثمرة الهجليج لي ناس الشهادة العربية
واللالـوب لي ناسنا والله تداوم على اكل اللالوب سكريك ينزل بصورة عجيبة
واليوم حابدا معاهو الكركدي بالصمغ النشوف اخرتها
سلام لكل الحبان

Quote: ذكّرني ولا مؤاخذة البزاغ

هههههههههههههههه
غايتو يا بت الحسين بالغتي معانا عدييييل كدا

عايني هنا اسمعيني كويس عشان ما تجي تقولي لي لبنا

مادام إنك ما شهادة عربية معناها انتي عندك صمغ (كعكول) ما مسحون
خلاص يا ستي الأفضل من السحن تقومي تشيلي ليك كمية منو بشكلو دا
وتبليه في جك موية وتختيه في التلاجة
الصباح تقومي عليه بالكمشة أو المعلقة الكبير وتسوطي وتسوطي
(الله يكفينا شر السواطة)
لامن تحسي بيهو بقى تقييييل وتقومي تصفيه في الكباية الشب الكبيرة
وكبي ليك معاه معلقتين تانج أو كركديه وحبة سكر

ثم إشربيه هنيئا مريئا


ملاحظة للجميع

الصمغ المبلول أنفع من الصمغ البدرة (حسب التجربة)

أما سؤالك عن النوعين بتاعين الصمغ يا بت الحسين
بصراحة أنا ما بعرفهم لكن أي صمغ وقع في يدي شربتو وما حاسي إنو في اي فرق

مداخلة مهمة من ناس الشعب لناس اللوج وجميع المتفرجين

Quote: Abdulrahman Khalifa · الأكثر تعليقا · جامعة السودان للعلوم والتكنولوجيا نفس التجربة .. بعد معاناة مع السكري و الكلوسترول و الضغط لمدة عامين.. ارسل لي صمغ عربي من السودان و كنت آخد حبوب للسكري منشطة للبنكرياس صباحا مع المنظم مساء .. بعد ستة شهور قال الدكتور : انت نظريا خرجت من نادي السكري!! واصل أخي معتز .. مع اني سمعت ان تناول الصمغ لفترات طويلة مضر ايضا .. ويجب التوقف عنه بعد ثلاثة اشهر و تناوله على فترات متباعدة .. على العموم الآن هناك صمغ معبأ صيدلانيا و توجد نشرة للاستخدام موجودة فيه ..

انصح باستعمال هذا الصمع أكثر من البدرة

ويا بت الحسين ياهو دا الصمغ مش تمشي تطني ليك لبان بخور هههههه

صديقي الفنان معتز القريش..

و الله أول مرة تنزل ليك بوست فيهو فايده.

يللا واصل و أحنا متابعين بكل أهتمام.

Quote: صديقي الفنان معتز القريش.. و الله أول مرة تنزل ليك بوست فيهو فايده. يللا واصل و أحنا متابعين بكل أهتمام.

ما عصرت علي يا شريف ياخ

أول مرة ؟؟؟؟ هههههههههههههههه
وبحليفتا كمان ؟؟؟؟؟


الله يسامحك

شكرا ياوزة

شكرا كتير

وياريت ياريس ترفع البوست فووووووووووووق

بوست الربع والارباع القادمة

Quote: شكرا ياوزة شكرا كتير وياريت ياريس ترفع البوست فووووووووووووق بوست الربع والارباع القادمة

هلا هلا يا هارون والله لي يومين عايز أتصل ليك

لو في المكتب اتصل بالله

وأهو الريس ما قصر رفع البوست وشارك معانا كمان

شفت كيف

شكرا يا حبيب و بوستك وقع لى فى جرح و بالله نبهونا لمثل هذه المواضيع المفيدة
حبيبنا معتر الله يشفينا و يشفيك من الامراض ...كنت بقول ليك رسل لى كيس صمغ نشوفه بقدر يعالج الناس العايشه فى اريزونا بنفس الامراض العندك................. لكن ما اظن اخوانا الامريكان بخلوه يخش بالبريد ....غايتو لو مهندسنا عمر بوب عندو نيه لامريكا فك لينا معاه كيس
وتشكر يا حبة و الحبيبة الدكتورة بيان

Quote: شكرا يا حبيب و بوستك وقع لى جرج حبيبنا معتر الله يشفينا و يشفيك من الامراض ...كنت بقول ليك رسل لى كيس صمغ نشوفه بقدر يعالج الناس العايشه فى اريزونا بنفس الامراض العندك................. لكن ما اظن اخوانا الامريكان بخلوه يخش بالبريد ....غايتو لو مهندسنا عمر بوب عندو نيه لامريكا فك لينا معاه كيس وتشكر يا حبة و الحبيبة الدكتورة بيان

والله يا ريس شرفتنا بالمشاركة وشكرا على رفع البوست
لو كنا عارفين الصمغ بجيبك كان صمغناك من زماااان

المهم يا سيدي الصمغ أكيد موجود في أمريكا لأنو الأمريكان حاظرين اي شئ من السودان ما عدا الصمغ
وبعدين ما ضروري يكون بدرة أنا فوق كتبت مع تجربتي العادي المبلول افضل من البدرة
المهم انت أسأل وكان ما لقيت نخلي أخوانا الكيزان التجار الماكنين ديل يعملوا ليهم وكالة صمغ هناك

وبرضو كيس كيسين ما كفاية لازم تواصل عليه اقل شئ تلاتة شهور بانتظام

وربنا يشفيك ويشفي جميع مرضى المسلمين

Quote: مادام إنك ما شهادة عربية معناها انتي عندك صمغ (كعكول) ما مسحون خلاص يا ستي الأفضل من السحن تقومي تشيلي ليك كمية منو بشكلو دا وتبليه في جك موية وتختيه في التلاجة الصباح تقومي عليه بالكمشة أو المعلقة الكبير وتسوطي وتسوطي (الله يكفينا شر السواطة) لامن تحسي بيهو بقى تقييييل وتقومي تصفيه في الكباية الشب الكبيرة وكبي ليك معاه معلقتين تانج أو كركديه وحبة سكر ثم إشربيه هنيئا مريئا

لاحولااااااااااااااا ... داير تكتلها ؟!

يمين انا اشرب الشي القلتو ده يجيني حيرقان من يوم ولدوني ولغاية ما اموت مايروح ويوم القيامة برضو القى عندي لسة باقي راجيني !!


تحياتي يامعتز ومتابعة باهتمام

Quote: لاحولااااااااااااااا ... داير تكتلها ؟! يمين انا اشرب الشي القلتو ده يجيني حيرقان من يوم ولدوني ولغاية ما اموت مايروح ويوم القيامة برضو القى عندي لسة باقي راجيني !! تحياتي يامعتز ومتابعة باهتمام

ههههههههههههه
يا زول انت عجوز دي وصفة للشباب زي بت الحسين وأنا هههههههه

ما تخافي يا بت الحسين الحبة دي ما بتجيكي أشربي ساي

Quote: ما تخافي يا بت الحسين الحبة دي ما بتجيكي أشربي ساي

اوعك اوعك هههههههه

ياود القريش بالله عليك وصفة فيها عبارات زي (تقييييييل) و (كباية الشب الكبيرة) و (معلقتيين تانك)
دي غير تكون وصفة قنبلة ... تكون وصفة شنو
هههههههه


تحياتي لكما ياخي

Quote: اوعك اوعك هههههههه ياود القريش بالله عليك وصفة فيها عبارات زي (تقييييييل) و (كباية الشب الكبيرة) و (معلقتيين تانك) دي غير تكون وصفة قنبلة ... تكون وصفة شنو هههههههه تحياتي لكما ياخي

هههههههه
يا خالد ما تخوف المرة يا زول
قنبلة شنو يا أخوي دا اسمو إكسير الحياة السحري
مش قالو ليك اسال مجرب ما تسال طبيب

وتيييييييب

تحياتي ياخ

سلام الاخ معتز .. وربنا يشفي كل المرضى

دي مشاركة مهمة من الأخ عبدالرحمن خليفة في الفيس بوك بتنبه الناس لضرورة إستخدام الصمغ لفترة قصيرة وأرجو أن تكون مفيدة

لك تحياتي

Quote: Abdulrahman Khalifa ·· جامعة السودان للعلوم والتكنولوجيا نفس التجربة .. بعد معاناة مع السكري و الكلوسترول و الضغط لمدة عامين.. ارسل لي صمغ عربي من السودان و كنت آخد حبوب للسكري منشطة للبنكرياس صباحا مع المنظم مساء .. بعد ستة شهور قال الدكتور : انت نظريا خرجت من نادي السكري!! واصل أخي معتز .. مع اني سمعت ان تناول الصمغ لفترات طويلة مضر ايضا .. ويجب التوقف عنه بعد ثلاثة اشهر و تناوله على فترات متباعدة .. على العموم الآن هناك صمغ معبأ صيدلانيا و توجد نشرة للاستخدام موجودة فيه ..

الاخ العزيز معتز لك التحية و التقدير
و للدكتورة بيان مثلها و ان شاء الله في ميزان حسناتكم

Quote: Quote: هل توقفت تماماً عن تناول علاجات السكري والضغط خلال فترتكم (الصمغية) هذه؟ لا لم اتوقف عن علاجات السكري أو الضغط خلال تلك الفترة ولكنها اصبحت تسبب لي هبوط في الضغط والسكر لذلك اوقفتها قبل خمسة ايام تقريبا وبدأت في عمل التحاليل اليومية وسوف أنقل النتائج هنا بعد شهر إن شاء الله

ما رأي الدكتور حيدر المشرف و بقية الإخوان الدكاترة و الأخصائيين في النقطة الأخيرة اللي ذكرها الاخ معتز
فالذي فهمته من احدي المداخلات بان الصمغ يمكن ان يضلل أشرطة التحليل فلا تظهر أي وجود للمرض
عند الفحص بينما هو كامن و موجود و هنا يتحدث معتز عن هبوط في الضغط و السكري اتمني ان نسمع
منكم

Quote: ما رأي الدكتور حيدر المشرف و بقية الإخوان الدكاترة و الأخصائيين في النقطة الأخيرة اللي ذكرها الاخ معتز فالذي فهمته من احدي المداخلات بان الصمغ يمكن ان يضلل أشرطة التحليل فلا تظهر أي وجود للمرض عند الفحص بينما هو كامن و موجود و هنا يتحدث معتز عن هبوط في الضغط و السكري اتمني ان نسمع منكم

سلامات يا محمدين

غايتو قصة الصمغ يضلل الشريط دي جديدة علي
ولنفرض انو ضلل الشريط هل يمكن أن يضلل شعوري بالتحسن
وطبعا مريض السكري بعرف تماما أعراض ارتفاع السكري وانخفاضو

أنا حاسي إنو حالتي الصحية أحسن ألف مرة وفي نشاط زيادة كمان
بدل الخمول الذي كان يصيبني من آثار السكر والضغط

وبرضو ننتظر رد الأطباء والصيادلة المتخصصين



أكرر للجميع

ما أكتبه هنا هو ما أشعر به تماما
لأن العلاج ليس لعبة ولا هظار كما ذكرت في بداية البوست

ياااااا معتز..

جاوب بسرعة..

الكومبنيشن دا..في التلاتة أيام الأولى بيعمل شوية فوضى في البطن؟

وخاصة الجزء العلوي من الجهاز الهضمي؟؟

هل بيعمل وجع حلق طوالي كدا ولا أنا براي؟؟

لكن أصلو ما حا أخليهو..

..

شايفك لسه ما جاوبت..مستني شنو طيب؟؟

ههههههههههه...

.

Quote: ياااااا معتز.. جاوب بسرعة.. الكومبنيشن دا..في التلاتة أيام الأولى بيعمل شوية فوضى في البطن؟ وخاصة الجزء العلوي من الجهاز الهضمي؟؟ هل بيعمل وجع حلق طوالي كدا ولا أنا براي؟؟ لكن أصلو ما حا أخليهو.. .. شايفك لسه ما جاوبت..مستني شنو طيب؟؟ ههههههههههه...

هههههههههه يا زول انت ما مذاكر كويس
في اول البوست ما قلنا ليكم بخلي البطن زي كمبريسر البنشري ههههههههه
وممكن يشتغل معاك غازات يخليك زي حصان الكارو

استحمل بس يا زول وحاول تخفف الجرعة شوية

وجع حلق دا ما معانا دا انت براك عندك وجع حلق

Quote: البوست ده كان وين ؟ تخشو سااااكت ولا تكلمونا اولا يا مريم بت الحسين اللبان المر مر وطعمو اجارك الله ما بتبلع لكن لو عندك سكري وجاك جرح اشربي منو كل صباح شوية وشك ببقى زي البنية وبتصرا وبتغمضي وبتجيك تجاعيد مبكرة لكن بتتعالجي ولو عندك امساك اقعي السنمكة اها ياناس انا لقيت الايام دي علاج نفع معاي في السكري بنزلو الارض ثمرة الهجليج لي ناس الشهادة العربية واللالـوب لي ناسنا والله تداوم على اكل اللالوب سكريك ينزل بصورة عجيبة واليوم حابدا معاهو الكركدي بالصمغ النشوف اخرتها سلام لكل الحبان

يا عمي السني كيفك ومشتاغون والله

تتذكر لمن وصفت ليك القرفة عملت معاك شنو ؟ هههههههههههههه

المهم الآن أديناك شيتا أخطر من القرفة جربو وح تشكرني أنا متأكد

يا محمود مصطفى الكلام دا كتبناه في الصفحة الأولى يعني ندرس ونراجع ونذاكر ليكم كمان هههههه

Quote: بس وصلتي الشغل يا دوب افتح الكمبيوتر والبوي يجيب لي كباية الشاي اشرب لي منها جغمة واحدة والتانية على عجل ويا الحمام جاك بلا لمن اصل الحما بكون خلاص في الرمق الأخير بس عينك ما تشوف إلا النور ـ كمبريسر بتاع بنشري ينفخ القديم والجديد واللون أسود زي زيت الرجوع وكميات ذاتها ما بعرفا جات من وين ما تقولوا لي قرّفتنا ياهو كدي العلاج

ياحبيب فى مداخلات فطيتها ....

الصمغ دا اوعى يكون بيجيب نسيان ....

Quote: ياحبيب فى مداخلات فطيتها .... الصمغ دا اوعى يكون بيجيب نسيان ....

أعد أعد المداخلات كترن علينا

نسيان شنو والله بعد ستة شهور ترجع عشرين سنة لوراء هههههه

معتز سلامات

سؤال هام وضروري الرد عليه بسرعة جداً
لدينا مريضة ارتفه الكرايتنين عندها مما ادى بالدكتور
أن يجري لها غسيل كلوي وقال لها سوف نعمل ليك ثمانية
جلسات كل 48 واربعين ساعة جلسة وبعد كدة ((( أتوقع)) ان الكلى تشتغل عادي
فهل تنصحها ببدء العلاج الصمغي بعد انتهاء هذه الغسلات الثمانية مباشرة
أما تستعمل العلاج الآن علماً بانها الان عملت اربعة جلسات في النصف الأول يعني
افيدنا بسرعة عل وعسى ان يكتب الله لها الشفاء وتنال الثواب بإذنه تعالى.

Quote: سؤال هام وضروري الرد عليه بسرعة جداً لدينا مريضة ارتفه الكرايتنين عندها مما ادى بالدكتور أن يجري لها غسيل كلوي وقال لها سوف نعمل ليك ثمانية جلسات كل 48 واربعين ساعة جلسة وبعد كدة ((( أتوقع)) ان الكلى تشتغل عادي فهل تنصحها ببدء العلاج الصمغي بعد انتهاء هذه الغسلات الثمانية مباشرة أما تستعمل العلاج الآن علماً بانها الان عملت اربعة جلسات في النصف الأول يعني افيدنا بسرعة عل وعسى ان يكتب الله لها الشفاء وتنال الثواب بإذنه تعالى.

عزيزي حامد ربنا يشفينا ويشفى الأخت
طبعا أنا ما بقدر أفتي لزول اقول ليه استعمل او ما تستعمل
أنا بذكر تجربة ويا ريت تخلي الطبيب هو اللي يقرر

تجربتي مع زوجتي في الكرايتيني كالآتي

المعدل عند التحليل الأول كان 151
بعد استعمال الصمغ لمدة عشرة ايام الى اسبوعين
انخفض الى 76

الدكتور قال ليها لو حافظتي على كدا ما تجيني تاني
وارجعي لدكتورك بتاع السكري عادي

أما رايي الشخصي حسب ما جربته وقرأته عن الصمغ
فهو إن لم ينفعها فلن يضرها فهو نبات طبيعي عادي
زيو وزي اي شئ بنعملو شربات

ود القريش يا حبييب
كيفنك وسلامتك وحمد لله على السلامة ..
أنا متأكككككد إني كتبت مداخلة في البوست ده ....
وجيت أفتش لي تعليقك عليها لكن ما لقيت تعليق ولا مداخلة من أساسو ...
الموضوع ده الصمغ ما بيساعد في تفسيرو ؟؟

يا أخوي حسب معلوماتك وتجربتك ... الشغلة دي بتعالج ناس السكري من الدرجة الأولى ؟ يعني بتاعين الأنسولين . ...
ولا بس بتاعين (الليق ) بتاعين الحبوب والكلام الفارغ ده ؟؟؟

لأنو نحن سكرينا سكري رجال عدييييل كده ... وبقينا نطعن ليهو الحقن يومياً ...
مافي مني مني ..!

Quote: ود القريش يا حبييب كيفنك وسلامتك وحمد لله على السلامة .. أنا متأكككككد إني كتبت مداخلة في البوست ده .... وجيت أفتش لي تعليقك عليها لكن ما لقيت تعليق ولا مداخلة من أساسو ... الموضوع ده الصمغ ما بيساعد في تفسيرو ؟؟ يا أخوي حسب معلوماتك وتجربتك ... الشغلة دي بتعالج ناس السكري من الدرجة الأولى ؟ يعني بتاعين الأنسولين . ... ولا بس بتاعين (الليق ) بتاعين الحبوب والكلام الفارغ ده ؟؟؟ لأنو نحن سكرينا سكري رجال عدييييل كده ... وبقينا نطعن ليهو الحقن يومياً ... مافي مني مني ..!

دغيس ذو الأنامل الذهبية

أنا ذاتي شفت مداخلتك وخفت أرد عليها تقوم تدي الراجل تلفوني ههههههه

شوف يا سيدي أنا زوجتي برضو سكريها سكري رجال عديييل كدا
ونفع معاها في الكلى وتخفيض السكر بس ما وقنا علاج لكن الدكتور نقص ليها الجرعة
أرجع الصفحة الفاتت بتلقى كلامي دا

وبما انو نحنا سكرينا كلام فارغ ساي تاني ما تجي البوست دا ههههههه
جابت ليها شتايم كمان في سكرينا ؟؟؟

سكرينا وعاجبنا انت مالك

معتز والاخوات والاخوة ..

مهم جدا رأى الدكاتره..
ولا أعلم سر إمتناعهم عن هذا البوست ..
بعدين العنوان بتاع بكرى ده ما صاح ..

اكتب على عجالة ..
وأؤكد على كلام مهم جدا..
مثلا السكرى (النوع التانى) ..
هدف العلاج ليس تقليل نسبة الجلكوز فى الدم .. وتقاس ب A1C (المثالى 6.5)
الهدف الاساسي هو المحافظة على الأعضاء الاخرى .. العين الكلى القلب الخ ..
وعكس عمليات التضرر التى حدثت لها ..
يبقى لو عندك سكرى ..
الحل بكون عند معتز فعلا لو قدر معتز بواسطة الصمغ انو يعكس عملية تضرر الاعضاء زى القلب والكلى ..
وبذلك يكون عنوان بكرى ده صاح !!

المعلومة المهمه انو عند التشخيص ..
وجدوا أن 50% من الناس قد تضررت أعضائهم بالفعل عند مرحلة تشخيصهم بالنوع الثانى من السكرى ..
بمعنى تضرر الاعضاء المذكورة قد حدث بالفعل
لا يعنى ذلك وصول مرحلة الاعراض ..
ولكن الضرر تم بالفعل ..

يبقى الفكره الاساسية انو الناس ما بتعالج نسبة الجلكوز فى الدم ..
وأتمنى من الأطباء التوسع فى الكلام ده وشرحو ..

انظر بالاحمر ..

Diabetes management: It is more than just (treating) blood glucose.
6. Diabetes is a cardiovascular disease (CVD) risk #####alent.
8. Fifty percent of patients with type 2 DM present with end-organ damage at the time of diagnosis.[/left]

Take-home points
(a) Type 2 DM is a multi-pathophysiologic disease.
(b) Combination therapy: Many drugs will be required to correct several pathophysiologic defects.
(c) Treatment should be based on reversal of known pathogenic abnormalities (not just on
reducing the A1c).
(d) Therapy must be started early to prevent/slow the progressive nature of the disease.

ما شاء الله
الف حمدا لله عن السلامه
وكمان تحدى لا حزام و لاحمالات

مداخلة عبر الايميل من الأخ عادل ماشي

ماشي وين ما تسالوني لأنو دا ما خاص بالصمغ

Quote: انا من المداومين لقراءة سودانيزاون لاين غثها وسمينهاومعظم الاسماء معروفة لدي واستمتع لبعض الكتاب واستهجن آخرين وهذه طبيعة المنتديات الى أن جاء بوستيك السمين الذي يجمع بين الجدية والهزل والله طول ما بتصفح في البوست وانا اضحك من مداخلة الكتاب الظريفين وردودك المغلفة بروحك الجميلة والظريفة انا مصاب بالسكر من الدرجة الثانية منذ 10 سنوات تقريبا ومنتظم في تناول الدواء دايمكرون وجولوكوفاج بالاضافة الى الكلوسترول والحمد لله على كل حال سؤالي يا استاذ دكتور قريش كم نسبة الماء الى الصمغ المراد اذابتهما وهل من الضروري خلطه باي نوع من انواع العصير او يشرب بدون وجزاك الله خيرا والدكتورة نجاة وجعله في موازين حسناتكما ومتابعين باقي البوست وفي انتظار الجوكر سلام

أنا يا سيدي بملا كباية شُب كركديه ما تقيل شديد
وبكب فيهو 3 معالق ضمع مسحون وحبة سكر
أي سكر على كيفي انت مالك

أما النوع التاني (الكعكول)
ببلو في جك موية والصباح بسوط واسوط واسوط وأصفيه وأكب ليه كردكيه واشربو

ليس من الضروري خلطه بأي عصير أنا بضيف ليهو كركديه عشان يخفض لي الضغط

Quote: معتز والاخوات والاخوة .. مهم جدا رأى الدكاتره.. ولا أعلم سر إمتناعهم عن هذا البوست .. بعدين العنوان بتاع بكرى ده ما صاح .. اكتب على عجالة .. وأؤكد على كلام مهم جدا.. مثلا السكرى (النوع التانى) .. هدف العلاج ليس تقليل نسبة الجلكوز فى الدم .. وتقاس ب A1C (المثالى 6.5) الهدف الاساسي هو المحافظة على الأعضاء الاخرى .. العين الكلى القلب الخ .. وعكس عمليات التضرر التى حدثت لها .. يبقى لو عندك سكرى .. الحل بكون عند معتز فعلا لو قدر معتز بواسطة الصمغ انو يعكس عملية تضرر الاعضاء زى القلب والكلى .. وبذلك يكون عنوان بكرى ده صاح !! المعلومة المهمه انو عند التشخيص .. وجدوا أن 50% من الناس قد تضررت أعضائهم بالفعل عند مرحلة تشخيصهم بالنوع الثانى من السكرى .. بمعنى تضرر الاعضاء المذكورة قد حدث بالفعل لا يعنى ذلك وصول مرحلة الاعراض .. ولكن الضرر تم بالفعل .. يبقى الفكره الاساسية انو الناس ما بتعالج نسبة الجلكوز فى الدم .. وأتمنى من الأطباء التوسع فى الكلام ده وشرحو .. انظر بالاحمر .. Diabetes management: It is more than just (treating) blood glucose. 6. Diabetes is a cardiovascular disease (CVD) risk #####alent. 8. Fifty percent of patients with type 2 DM present with end-organ damage at the time of diagnosis. Take-home points (a) Type 2 DM is a multi-pathophysiologic disease. (b) Combination therapy: Many drugs will be required to correct several pathophysiologic defects. (c) Treatment should be based on reversal of known pathogenic abnormalities (not just on reducing the A1c). (d) Therapy must be started early to prevent/slow the progressive nature of the disease.

الكلام دا مهم جدا يا جماعة ولازم تقروهو بعناية

بس يا دكتور تخفيض السكر ما مطلوب كيف ؟

مش الآثار الجانبية بتجي من ارتفاع السكر

أرجو التوضيح مع شكري على اهتمامك

Quote: ما شاء الله الف حمدا لله عن السلامه وكمان تحدى لا حزام و لاحمالات

شفت كيف ههههههههههههههههه

شكرا معتز
وربنا يجزيك خير
واصلهم ناس الدويم فوائدهم لا تحصى ولا تعد
لو الكرش راحت تكون خدمتنا خدمة كبيرة خلاص
أصلو الرياضة غلبتنا عديل كده

Quote: المهم يا سيدي الصمغ أكيد موجود في أمريكا لأنو الأمريكان حاظرين اي شئ من السودان ما عدا الصمغ

سلآمات يا دكتور معتز.

ولو حكمت الإنقاذ مليون سنة الأمريكان ما راح يتخلو عن صمغ السودان،
نسبةً لجودته العالية، ولأنه يدخل في مكونات صناعة حلوي الشكولاتة.
مواطني أمريكا الشمالية بيستهلكوا شيكولاتة في اليوم بما يعادل ميزانية
السودان والدول المجاورة.

سلآمتك والمدام يا دكتور.
غايتو أنا والحمد لله الأمراض دي كلها لحدي الآن بريئ منها. لكن عملاً
بإحتياطات جحا تاني كورية الصمغ مع كورية الجردقة تحت العنقريب
من تمسى لآمن تغيب.

قالوا جحا طلع النخلة بنعلاتو. سألوهو، يا جحا طالع بنعلآتك مالك ؟
قال ليهم، يمكن تجي سفرة علي هواء...

ود المدير يا جميل

Quote: سلآمات يا دكتور معتز. ولو حكمت الإنقاذ مليون سنة الأمريكان ما راح يتخلو عن صمغ السودان، نسبةً لجودته العالية، ولأنه يدخل في مكونات صناعة حلوي الشكولاتة. مواطني أمريكا الشمالية بيستهلكوا شيكولاتة في اليوم بما يعادل ميزانية السودان والدول المجاورة. سلآمتك والمدام يا دكتور. غايتو أنا والحمد لله الأمراض دي كلها لحدي الآن بريئ منها. لكن عملاً بإحتياطات جحا تاني كورية الصمغ مع كورية الجردقة تحت العنقريب من تمسى لآمن تغيب. قالوا جحا طلع النخلة بنعلاتو. سألوهو، يا جحا طالع بنعلآتك مالك ؟ قال ليهم، يمكن تجي سفرة علي هواء...

إن شاء دائما تنعم بالصحة والعافية

غايتو بس سوي زي جحا دا عوجة تب تاني ما بتجيك
وتاني الدكاترة والمستشفيات ح تشوفا طشاش طشاش

الاخ معتز القريش سلام

شكر جزيلا على هذا البوست والمعلومات القيمة التى اوردتها فيه

وساسعى الى الحصول على الصمغ العربى من محلات الاعشاب والمنتجات الطبيعية

فى امستردام عسى ان اجد ضالتى

ونسال الله ان يجزيك خير الجزاء بهذا العمل


--

كذلك الشكر للدكتورة نجاة محمود


سلام

متوكلين على الله وشاكرين له ولمعتز القريش
بديت اليوم اول جرعة من الصمغ
ملعتقين على الريق فى كباية عصير

اللهم نسألك الشفاء لكل المرضى

Quote: غايتو أنا والحمد لله الأمراض دي كلها لحدي الآن بريئ منها. لكن عملاً بإحتياطات جحا تاني كورية الصمغ مع كورية الجردقة تحت العنقريب من تمسى لآمن تغيب.

انا زي معاوية المدير ده... متلبّطة في الموضوع ساي من باب الصحّة وكده... لكن ما عندي النصايب دي... شجّعته أبو محمود عليه، وشايفاه الموضوع عجبه... كلمته بابا برضه، لكن مااااا حاسه مقتنع... قلت لماما خليه يسأل د.عصام المجمر (طبيبه وصاحبه) ايوه، اخو سهام وهشام.... اها بجي اديكم رد د.عصام... الوالد عنده كولسترول وضغط ...

اقرأ كلامك ( في البوست ده ) اصدقك .. اتذكر عمايلك ( تاريخك ) في المنبر ده اتوجس و اتردد
اقول يا رب الداهي ده مودينا لوين

عموماً توكلنا و على بركة الله .. ان شاء الله يوم شكرك يجي كن مسكتنا ضنب الككو قول وليد الشفت

Quote: اقرأ كلامك ( في البوست ده ) اصدقك .. اتذكر عمايلك ( تاريخك ) في المنبر ده اتوجس و اتردد اقول يا رب الداهي ده مودينا لوين عموماً توكلنا و على بركة الله .. ان شاء الله يوم شكرك يجي كن مسكتنا ضنب الككو قول وليد الشفت

يا الصداق أنا ما تبت خلاص ههههه

اتوكل على الله وتاني ح تصدقني أنا متأكد

Quote: انا زي معاوية المدير ده... متلبّطة في الموضوع ساي من باب الصحّة وكده... لكن ما عندي النصايب دي... شجّعته أبو محمود عليه، وشايفاه الموضوع عجبه... كلمته بابا برضه، لكن مااااا حاسه مقتنع... قلت لماما خليه يسأل د.عصام المجمر (طبيبه وصاحبه) ايوه، اخو سهام وهشام.... اها بجي اديكم رد د.عصام... الوالد عنده كولسترول وضغط ...

هسي يعني يا بت الحسين بعد البري البريتينا ليهو دا كلو طلعتي زي ود المدير
غايتو بس بركة البقيتي بعيدة مني هههههههههه

ربنا يشفي أبي محمود وبابا
وبالله ما تبخلي علينا برد د. عصام

Quote: متوكلين على الله وشاكرين له ولمعتز القريش بديت اليوم اول جرعة من الصمغ ملعتقين على الريق فى كباية عصير اللهم نسألك الشفاء لكل المرضى

يا زول اتوكل على الله تتتتتب وعوجة ما بتجيك
ومن توكل على الله فهو حسبه
وان شاء الله كان ما صلحك ما بضرك
أنا استعملتو لحاجة عالج لي حاجات كتااااار

Quote: الاخ معتز القريش سلام شكر جزيلا على هذا البوست والمعلومات القيمة التى اوردتها فيه وساسعى الى الحصول على الصمغ العربى من محلات الاعشاب والمنتجات الطبيعية فى امستردام عسى ان اجد ضالتى ونسال الله ان يجزيك خير الجزاء بهذا العمل -- كذلك الشكر للدكتورة نجاة محمود سلام

نسأل الله الشفاء لنا ولكم ولجميع المسلمين

أخوي العزيز جعفر سلام واحترام كتيرين

Quote: شكرا معتز وربنا يجزيك خير واصلهم ناس الدويم فوائدهم لا تحصى ولا تعد لو الكرش راحت تكون خدمتنا خدمة كبيرة خلاص أصلو الرياضة غلبتنا عديل كده

ربنا يشفينا ويشفي جميع مرضى المسلمين
ونسأل الله أن يجعلنا سببا لذلك

انت يا أخوي بس واصل في استعمال الصمغ وما تزهج وإن شاء الله الكرش بتروح
ولو ما مصدقنا أسأل العنبة الرامية في الدوحة ـ أخوك بقى سمبتيك عديييل كدة


واحتمال برضو الصلعة تروح وحتى اللحية الكبيرة دي

الله يلعن ابو الكرش كرهتني حياتي ما عرفت ليها دواء
ــــــــــــــــــــــــــــــ
سلام يا صديق
صحة وعافية وسلامتك كتير
وربنا يشفي الجميع
لمعرفة المزيد عن العلاج بالاعشاب وخاصة الصمغ العربي
الاتصال بخبير التداوي بالاعشاب في السودان

العطار/ خليل محمد الهادي
00249122993435
نحب ان يكون الفائدة للجميع
والحمدلله تم علاج من التهاب المصران بواسطة العطار خليل

المعجم الطبي:

استعمال الصمغ العربي كدواء
الصمغ العربي،
الاسم اللاتيني:أكاسيا السنغال
الإستخدام الطبي: خفض نسبة الكوليسترول، و أمراض الكلى, وأمراض اللثة وصحة الفم والتهاب الحلق, و الإسهال..

Medical dictionary

Gum Arabic as a medicine
gum Arabic,
Latin name:
Acacia senegal;
Uses
lower cholesterol, kidney conditions, gum disease,
oral health, sore throat, diarrhea

الف حمدا لله عن السلامه

Quote: والله طول ما بتصفح في البوست وانا اضحك من مداخلة الكتاب الظريفين وردودك المغلفة بروحك الجميلة والظريفة

سلامات يا اخو صاحبي
شفانا الله واياكم ـ
ياخي صاحبي الفرذدق سِقنلو طاشي مني ليهو زمن.
تم جميلك واجدعو لي في الخاس.
مشكور علي البوست والردود الظريفة

Quote: سلامات يا اخو صاحبي شفانا الله واياكم ـ ياخي صاحبي الفرذدق سِقنلو طاشي مني ليهو زمن. تم جميلك واجدعو لي في الخاس. مشكور علي البوست والردود الظريفة

شرّكِ ليهو بي كعكُول صمغ يا الفاضلابي ما بيجلي.

أخبارك والوِليدات ؟؟؟، يا زول إنت نحن القُراب ديل
غاتس مِننا، تمش تفتش للبُعاد ؟!!!.
إن شاء الله أتلفِنلك في اليومين الجايات ديل.


يا دكتور معتز نحن في البلد البعيدة دي ما عندنا صمغ.
ينفع نلحس ظروف الجوابات ؟؟؟.

بما اني انتهازية وبحب القروش وكدا(زول مدردق)
اي زول يعترف باستخدام الوصفة دي حنطالبو بالبياض
حتى ناس المساطب..لن نستثني احد

(يا دكتور معتز نحن في البلد البعيدة دي ما عندنا صمغ.
ينفع نلحس ظروف الجوابات ؟؟؟.)

اللحس ساهل يا معاوية اخوي

الخوف من الادمان..

ههههههه

Quote: يا دكتور معتز نحن في البلد البعيدة دي ما عندنا صمغ. ينفع نلحس ظروف الجوابات ؟؟؟.

موص الجوابات في موية وضيف عليها الكركديه وهنيئا مريئا

Quote: سلامات يا اخو صاحبي شفانا الله واياكم ـ ياخي صاحبي الفرذدق سِقنلو طاشي مني ليهو زمن. تم جميلك واجدعو لي في الخاس. مشكور علي البوست والردود الظريفة

تسلم يا فاضلابي يا غالي

ربنا يشفي جميع مرضى المسلمين وإيانا
عايز تلفون الفرزدق تقوم تتصل علي اسمع صوتك (عبر الآي فون) هههه
وأديك الرقم وهو الآن معانا هنا مقيم عدييييل كدا وشغال في وكالة الأنباء القطرية


تلفوني في البروفايل

Quote: الف حمدا لله عن السلامه

الله يسلمك يا محمد يا أخوي

Quote: المعجم الطبي: استعمال الصمغ العربي كدواء الصمغ العربي، الاسم اللاتيني:أكاسيا السنغال الإستخدام الطبي: خفض نسبة الكوليسترول، و أمراض الكلى, وأمراض اللثة وصحة الفم والتهاب الحلق, و الإسهال.. Medical dictionary Gum Arabic as a medicine gum Arabic, Latin name: Acacia senegal; Uses lower cholesterol, kidney conditions, gum disease, oral health, sore throat, diarrhea

شكرا يا خردة على الاضافة الثرة

ذو اليد شنو يا فردة إعلانات ساي كدا مجاني هههههه

Quote: الله يلعن ابو الكرش كرهتني حياتي ما عرفت ليها دواء ــــــــــــــــــــــــــــــ سلام يا صديق صحة وعافية وسلامتك كتير وربنا يشفي الجميع لمعرفة المزيد عن العلاج بالاعشاب وخاصة الصمغ العربي الاتصال بخبير التداوي بالاعشاب في السودان العطار/ خليل محمد الهادي 00249122993435 نحب ان يكون الفائدة للجميع والحمدلله تم علاج من التهاب المصران بواسطة العطار خليل

جزاك الله خير وربنا ينفع جميع المسلمين
وفي ميزان حسناتك إن شاء الله

ود القريش صباح الخيرات يا زول
صراحة قريت البوست بتاعك ده من الأول قلت كدي قبل ما أبدأ في الوصفة السحرية دي
أسأل لي دكتور من اهل الإختصاص قمت سألت طبيب اردني عن قصة الصمغ دي قال
إنتو السودانيين كلكم دكاتره كاعادة المهم باختصار قال لي كلم الجماعه ديل يبعدون من السكري باقي الأمراض
جربو الصمغ بتاعكم ده ....
دحين يا اخوي العمل كيف

Quote: ود القريش صباح الخيرات يا زول صراحة قريت البوست بتاعك ده من الأول قلت كدي قبل ما أبدأ في الوصفة السحرية دي أسأل لي دكتور من اهل الإختصاص قمت سألت طبيب اردني عن قصة الصمغ دي قال إنتو السودانيين كلكم دكاتره كاعادة المهم باختصار قال لي كلم الجماعه ديل يبعدون من السكري باقي الأمراض جربو الصمغ بتاعكم ده .... دحين يا اخوي العمل كيف

يا أمير كدي ارجع لكلامي من الأول
أنا ما قلت الناس تترك علاج السكري وانو الصمغ عالج السكري عندي
أنا قلت تجربتي بخصوص تثبيتو في معدل 7 (التراكمي)

استعمل الصمغ مع علاج السكري وافحص وراجع طبيبك بالنتائج

لكنني أضمن لك انخفاض البروتين والكوليسترول والزلالي والدهون الثلاثية الى الطبيعي
بعد الاستعمال المتواصل والمنتظم للصمغ


يا أخوانا لابد من مراجعة الطبيب ما ذكرته أنا تجربتي الشخصية كما ذكرت في أول البوست
وكل كلمة قلتها أنا مسؤول عنها ...

قريش يا خوى

الدكتور جى وقال قولته وشايفه استعان بصديق..والاصدقاء عملوا نايمين
يعنى صمغك ده ما بقدروا عليهو ..عشان كدا حبيب جر خمسينك دى برتيااااااااح وما تتلفت
خلينا ندردم سفتنا دى بمزاج ...كيسنا قرب انشف

ــــــ
عظم الله اجرك

Quote: قريش يا خوى الدكتور جى وقال قولته وشايفه استعان بصديق..والاصدقاء عملوا نايمين يعنى صمغك ده ما بقدروا عليهو ..عشان كدا حبيب جر خمسينك دى برتيااااااااح وما تتلفت خلينا ندردم سفتنا دى بمزاج ...كيسنا قرب انشف ــــــ عظم الله اجرك

وعد ووعد الحر دين عليه
كان ربنا حيانا من الموت بكرة بنجر الخمسين ونرمي الجوكر

خليك قريب يا بوب وجهز سفتك ههههه

ود القريش
لك التحية والإحترام
وتمنياتى بدوام الصحة والعافية !
تجربتك مثيرة ومعقدة ..
وأنا عارف إنك زول برئ والفى قلبك على لسانك !
المسائل الصحية مسائل حساسة عشان كده فى تشدد فى إستعمال الأدوية من غير إستشارة طبية !
بإحتصار أنا عاوزك تخلى مسئوليتك من إستخدام وصفتك العلاجية لأى شخص يريد إستخدام هذه الوصفة .
كأن تقول بالضبط :
هذه تجربة شخصية وأنا غير مسئول من أى نتائج تترتب على إستخدام هذه الطريقة أو التجربة فى علاج أى شخص آخر !
الدنيا دى يا معتز فيها ناس عكاليت بطريقة إنت ما بتقدر تتخيلها .
ولك كامل ودى وإحترامى

الاخ صلاح ابو دية

سلام

ده نفس الكلام القالو ود القريش في الاول..

قال هي تجربة شخصية وليس بالضرورة ان تصلح للاخرين..

مع ودي

كتب الأخ صلاح ابو دية

Quote: ود القريش لك التحية والإحترام وتمنياتى بدوام الصحة والعافية ! تجربتك مثيرة ومعقدة .. وأنا عارف إنك زول برئ والفى قلبك على لسانك ! المسائل الصحية مسائل حساسة عشان كده فى تشدد فى إستعمال الأدوية من غير إستشارة طبية ! بإحتصار أنا عاوزك تخلى مسئوليتك من إستخدام وصفتك العلاجية لأى شخص يريد إستخدام هذه الوصفة . كأن تقول بالضبط : هذه تجربة شخصية وأنا غير مسئول من أى نتائج تترتب على إستخدام هذه الطريقة أو التجربة فى علاج أى شخص آخر ! الدنيا دى يا معتز فيها ناس عكاليت بطريقة إنت ما بتقدر تتخيلها . ولك كامل ودى وإحترامى

فرد عليه الأخ ياسر منصور

Quote: الاخ صلاح ابو دية سلام ده نفس الكلام القالو ود القريش في الاول.. قال هي تجربة شخصية وليس بالضرورة ان تصلح للاخرين.. مع ودي

شكرا لكما على الاهتمام وربنا يشفينا ويشفيكم
ونعود ونكرر (هذه تجربتي الشخصية ليس بالضرورة أن تصلح مع غيري كما وأنني غير مسئول من أى نتائج تترتب على إستخدام هذه الطريقة أو التجربة فى علاج أى شخص آخر)

والآن نجي للجوكر ونجر صاحبنا المشرف الخمسين

في نفس الفترة التي كنت أعاني فيها من البروتين والكلسترول والخ ...
كنت أعاني من صداع شديد جدا لدرجة دموعي بتجري براها كدا
صداع مهما وصفتو ليكم ما بتتخيلوه ـ ربنا ما يجيبو لي زول فيكم

المهم يوم تعبت شديد وما باقي لي إلا اصرخ من الصداع
أخدني إبن عمي لطوارئ حمد(مستشفى حمد)
وبعد الفحص والتحاليل والدكتور الهندي الشاطر
اتضح إنو عندي (جيوب أنفية)
أداني مضاد حيوي وقطرة للأنف دا طبعا بعد حقنة لتخفيف الم الصداع

مشيت البيت واستعملت الحبوب وخلصت الحبوب والقطرة

بعد كم يوم كدا رجع الصداع تاني

المرة دي مشيت لدكتوري ذاتو وحكيت ليهو الحصل معاي في مستشفى حمد
طلب مني أمشي أعمل صورة للرأس وأرجع ليهو تاني

فعلا مشيت عمللت الصورة ورجعت عندو
شاف الصورة وقال لي : يا زول إنت راسك مليان (ما علم) طبعا(مليان صديد)
من الجيوب الأنفية وكتب لي تحويل لعيادة الأنف والأذن والحنجرة
وقال لي لو ما لقيت موعد قريب تعمل موعد في العيادة المسائية(بالقروش)
لأنو راسك معفن عديييل كدا وما بتحمل أي تأخير .

شلت الورقة والصورة ورميتهم في العربية وعملت طناش
باقي أنا زول خوّاف من قصة سريع ومستعجل وراسك ح يطرشق دي
لا مشيت عيادة صباحية ولا عيادة مسائية قلت يا ولد خليك في صداعك دا
الله ما كتّر إلا البروفين والبندول .
وكان هو ذاتو كتب لي بخاخ قال لي تستعملو بخة واحدة في اليوم

بقيت كلما أحس بالصداع أديها واحد بندول وواحد بروفين وواحد بخة

لم أستعمل اي علاج لهاذا الرأس المعفن بالجيوب الأنفية
وكنت مواصلا في استعمال عمي (الصمغ العربي)

أؤكد أنني لم استعمل أي علاج ولم تتغير طريقة غذائي

الشي الجديد هو استعمال الصمغ ..

في زيارتي الأخيرة للطبيب (الزيارة المدهشة)
وكما ذكرت في أول البوست طلب مني الطبيب عمل صورة للرأس
وذلك لعدم وجود إلتهاب في الحلق وللتأكد من وضع الجيوب الأنفية

وكانت المفاجأة للدكتور حين إكتشف زوال الجيوب الأنفية نهائيا

وقرر أنني أشكو من حساسية فقط وصرف لي حبوب تستعمل مرة واحدة
يوميا عند النوم .

الآن أستطيع أن أجزم أنه بعد عون الله وفضله فإن علاج الجيوب الأنفية
والتي كادت أن تفجر رأسي كان بسبب إستعمال (الصمغ العربي)

لأنه الشئ الوحيد الجديد الذي دخل إلى نظامي الغذائي
ومما علمته من إحتوائه على الكثير من الفوائد العلاجية

أها يا دكتور المشرف أنا رميت جوكري واتوكلت على الله
والصورة موجودة معاي وتايخ الصورة موجود

المطلوب منكم انت وزملاك في مجال الطب البحث عن هذه الحقيقة

هل الصمغ العربي وبموكوناته المعروفة لديكم يمكن أن يكون علاجا ناجعا
للجيوب الأنفية ولا القصة شنو ؟؟؟؟؟

معتز القريش لك التحايا وماتشوف شر

انا عندي سكري النوع الثاني جاني قبل سنة كدا
المهم عملت فحص تراكمي قبل شهرين ونص المعدل 7.9

ومن خشيت علي موضوعك دا طوالي مشيت اشتريت صمغ من المنتجات السودانية
كيسين 20 ريال

وبدا الاستعمال ... وبواصل في استعمالوا 15 يوم بعدين بمشي اعمل فحص تراكمي

لو طلع الفحص كويس برسل ليك البياض طوالي في رقم حسابك

اما لو طلع مطين طوالي باخذ اجازة يومين وبجيك جاري في قطر وعينك ماتشوف الا النور
اصلا نحن جنبكم في السعودية الدمام

اها الزينا ديل ..ما عندنا جيوب انفية والحمد لله..

الشيء ده ما يقوم يشيل باقي الفي راسنا ..

Quote: معتز القريش لك التحايا وماتشوف شر انا عندي سكري النوع الثاني جاني قبل سنة كدا المهم عملت فحص تراكمي قبل شهرين ونص المعدل 7.9 ومن خشيت علي موضوعك دا طوالي مشيت اشتريت صمغ من المنتجات السودانية كيسين 20 ريال وبدا الاستعمال ... وبواصل في استعمالوا 15 يوم بعدين بمشي اعمل فحص تراكمي لو طلع الفحص كويس برسل ليك البياض طوالي في رقم حسابك اما لو طلع مطين طوالي باخذ اجازة يومين وبجيك جاري في قطر وعينك ماتشوف الا النور اصلا نحن جنبكم في السعودية الدمام

خضر يا غالي ربنا يشفينا ويشفيك إن شاء الله

15 يوم ما كفاية والتراكمي لازم بعد شهرين من التحليل الأول

واصل في الصمغ مع كباية قرفة بعد الغداء وبعد العشاء

وما توقف علاجك وبعد داك أنا مستعد تعمل فيني العايزو هههه

Quote: اللحس ساهل يا معاوية اخوي الخوف من الادمان..

سلآمات يا ياسر.

أخوك حويط يا ياسر. أنا ايّ حاجة بجربا وأخليها
لفترة لو عملت لي وجع راس بجليها علي طول.


يا ياسر حبابك ألف في حوش ابو صلعة...

سلام تاني اخونا معتز
سؤال بسيط
كم المدة التي تظهر النتائج اسبوعين تلاتة شهر
لي شراب الصمغ مع الكركدي على الريق صباحا
وحمدا لله على سلامتك
وطمنتنا على موضوع الكرش

(سلآمات يا ياسر.

أخوك حويط يا ياسر. أنا ايّ حاجة بجربا وأخليها
لفترة لو عملت لي وجع راس بجليها علي طول.


يا ياسر حبابك ألف في حوش ابو صلعة...)




ايوه يا مدير خليك حويط وحريف (الظروف) مي معروفة..

تشكر على الترحاب يا حبيب

المدة البتظهر فيها النتائج على الشخص وبحسها بنفسو هي من ثلاث أسابيع إلى شهر
دا طبعا حسب تجربتي أنا. بس التحاليل عملتها بعد 9-10 شهور

Quote: بس وصلتي الشغل يا دوب افتح الكمبيوتر والبوي يجيب لي كباية الشاي اشرب لي منها جغمة واحدة والتانية على عجل ويا الحمام جاك بلا لمن اصل الحما بكون خلاص في الرمق الأخير بس عينك ما تشوف إلا النور ـ كمبريسر بتاع بنشري ينفخ القديم والجديد واللون أسود زي زيت الرجوع وكميات ذاتها ما بعرفا جات من وين

أخوي ود القريش

سلامتك و سلامة كل الأحباب و ربنا يشفي جميع المرضى

كنت منتظر أشوف آخرتها شنو ُقُبال ما أدخل معاكم عشان ما أتصمغ في محلي

غايتو إتوكلت على الله وجربت الصمغ من أمس 3 ملاعق كبيرة صمغ في كباية كبيرة كركدي الصباح على الريق و عملت حسابي ما أمرق من البيت عشان

الحاجات القولتها فوق دي

لكن ما في أي حاجة حصلت كل شي طبيعي لا كمبريسر لا لون أسود لا أي حاجة

يمكن أكون الصمغ الاخدتو بتاع طلح

غايتو ما عارف الحال شنو أرجو الإفادة

بالمناسبة : الصمغ الاخدتو هو المعبأ في أكياس

لا حولاااااا ..
لقيتك جارينى خمسين كمان يا صديقى ؟!

أسمعنى ..
وبالتأكيد وبنشرك للتجربة دى أعلم تماما صفاء النوايا .. وأنها نحو الخير .. وفيك الكثير من الخير يا معتز .. فأعلم ذلك عنى

الناس لا تحب .. أو بالاحرى الناس تحب الحلول الساهله
وكنت -بينى وبينك- متحسس شوية من مسألة أن أكون الغراب الناعق هنا ..
وكنت -قبلا- انتوى اعتزال الكتابة حينا من الدهر ..
الا أن دودة هذا المنبر قوية كما يبدو ..

دعنى أشرح مبدأ علمى بسيط تستند عليه التجارب العلمية على العلاجات وتدعى ال clinical trials
وهى - اى التجارب - مقسمة لى ثلاثة أقسام منفصله قبل تسويق الدواء ..
تسبقها جميعا تجارب ما قبل سريرية .. pre-clinical (على الفيران والقرود والارانب)
وتعقبها المرحلة الرابعة .. phase 4 ... وهذه بعد التسويق ..

كل ذلك لدراسة الأثر او ال effect .. على الانسان
وبالتالى اى زول بيآخد دوا .. بالميت كده بكونوا جربوهو على تلاته اربعه الف زول وبشروط قياسية تسمح بعمليات الاستدلال الصحيح على الأثر الطبى خارج إطار التجارب العلمية .. بمعنى آخر الأثر فى المجتمعات الانسانية المختلفه ..

المبدأ العلمى الذى أود الإشاره اليه أن الافتراض الاساسي من أى تجربة على مادة دوائية ..
بكون انو المادة دى "غير فعالة" ..
ويجتهد العلماء لاثبات انو الماده دى ما فعالة ..
وانو اذا فى اى اثر علاجى فهو نتيجة الصدفة العشوائية ليس الا ..

اها لما ينجحوا فى اجتهادهم فمعناها انو الافتراض صحيح وانو المادة بتاعتهم دى غير فعالة وبالتالى تجربتهم (غير ناجحة) ..
واذا فشلوا فى مساعيهم الدؤوبة لاثبات انو مادتهم دى غير فعالة .. فده معناهو انو المادة احتمال كبير ممكن تكون فعالة علاجيا .. وبالتالى تجربتهم "ناجحة"

شفت النزاهة العلمية دى كيف يا معتز ؟!!!
ولاحظ انو التجارب دى بالفعل بتكلف مليارات .. متوسط اتنين لى تلاته مليار دولار ..
بصرفوها ويجتهدوا فى اثبات انو مادتهم دى غير فعالة ؟!!!!!!!!!!

اها بعد داك تعريف الفعالية دى شنو ؟!
هل الفاعلية هى انو المادة (ولنقل انها الصمغ) قد خفضت الكليسترول ؟!!
لا ..
ولانو قلنا خفض الكليسترول ذاتو ما الفكره الاساسية ..
تكون الفعالية انو الناس الاستخدموا الصمغ انخفضت احتمال موتهم خلال عشرة سنوات مثلا من احتمال موت الناس التانين الاستخدموا احسن دواء مثبت علميا انو بخفض الكليسترول .. وبالتالى ينشرو نتيجة ابحاثهم بعد داك ويبدأوا فى تسويق المادة (الصمغ)

عشان كده بتلقى انو مع تطور العلوم الطبية ازداد عندهم متوسط الاعمار ..
لانو المسأله ما سااااكت .. جرانى خمسين وسيكتو فى قبولو ..
ولا فى دكاتره عالم تالت عايشين بى شهاداتهم الزماااان من جامعاتنا العتيقه ..

ده كلو كلام فارغ ساى ..
صدقنى يا صديقى ده كلام فارغ سااااى ..

ومشكلة الكلام ده تقديمو لحل سااااهل ..
عندك سكرى .. الحل عند معتز .. الصمغ آآآ زول .. أقع الصمغ .. الكمده بالرمده
كوليسترول ؟!.. الصمغ .. مافى حل غير الصمغ ..
الكرش ؟!.. الصمغ
صداع بالجنبه .. الصمغ .. نصفى .. الصمغ .. الدغت .. الصمغ .. القاوت .. الصمغ .. ملعتقين صغار على الريق .. لا تقول لى كليفلاند ولا مايو كلينيك .. تمشي مدينة خليفة البيت السودانى .. شفتو .. بس تقع الصمغ .. خلى يديك من الجووووه .. البره كعب ..

ويااا أمة سودانيزاونلاين .. وأمم العالم التحتانى كذلك
الكلام ده كلو الفاليدتى بتاعتو زيرو ..
الكلام ده كلو غير انو يقترح اجراء تجارب علمية على الصمغ .. مافيهو التكتح

سيييييك ..

سلام القريش يامنقذ
صاحبك دكتور المشرف حاسدك ساي عشان الشهرة اللقيتها هنا والاجر
هههههه
هاك النجيضة

وهاك دعما لتجربتك
والتجربة خير برهان

تسلم يا عادل خيري

بالله شفت حسادة ود المشرف دي حدها وين ههههه

Quote: لا حولاااااا .. لقيتك جارينى خمسين كمان يا صديقى ؟! أسمعنى .. وبالتأكيد وبنشرك للتجربة دى أعلم تماما صفاء النوايا .. وأنها نحو الخير .. وفيك الكثير من الخير يا معتز .. فأعلم ذلك عنى الناس لا تحب .. أو بالاحرى الناس تحب الحلول الساهله وكنت -بينى وبينك- متحسس شوية من مسألة أن أكون الغراب الناعق هنا .. وكنت -قبلا- انتوى اعتزال الكتابة حينا من الدهر .. الا أن دودة هذا المنبر قوية كما يبدو .. دعنى أشرح مبدأ علمى بسيط تستند عليه التجارب العلمية على العلاجات وتدعى ال clinical trials وهى - اى التجارب - مقسمة لى ثلاثة أقسام منفصله قبل تسويق الدواء .. تسبقها جميعا تجارب ما قبل سريرية .. pre-clinical (على الفيران والقرود والارانب) وتعقبها المرحلة الرابعة .. phase 4 ... وهذه بعد التسويق .. كل ذلك لدراسة الأثر او ال effect .. على الانسان وبالتالى اى زول بيآخد دوا .. بالميت كده بكونوا جربوهو على تلاته اربعه الف زول وبشروط قياسية تسمح بعمليات الاستدلال الصحيح على الأثر الطبى خارج إطار التجارب العلمية .. بمعنى آخر الأثر فى المجتمعات الانسانية المختلفه .. المبدأ العلمى الذى أود الإشاره اليه أن الافتراض الاساسي من أى تجربة على مادة دوائية .. بكون انو المادة دى "غير فعالة" .. ويجتهد العلماء لاثبات انو الماده دى ما فعالة .. وانو اذا فى اى اثر علاجى فهو نتيجة الصدفة العشوائية ليس الا .. اها لما ينجحوا فى اجتهادهم فمعناها انو الافتراض صحيح وانو المادة بتاعتهم دى غير فعالة وبالتالى تجربتهم (غير ناجحة) .. واذا فشلوا فى مساعيهم الدؤوبة لاثبات انو مادتهم دى غير فعالة .. فده معناهو انو المادة احتمال كبير ممكن تكون فعالة علاجيا .. وبالتالى تجربتهم "ناجحة" شفت النزاهة العلمية دى كيف يا معتز ؟!!! ولاحظ انو التجارب دى بالفعل بتكلف مليارات .. متوسط اتنين لى تلاته مليار دولار .. بصرفوها ويجتهدوا فى اثبات انو مادتهم دى غير فعالة ؟!!!!!!!!!! اها بعد داك تعريف الفعالية دى شنو ؟! هل الفاعلية هى انو المادة (ولنقل انها الصمغ) قد خفضت الكليسترول ؟!! لا .. ولانو قلنا خفض الكليسترول ذاتو ما الفكره الاساسية .. تكون الفعالية انو الناس الاستخدموا الصمغ انخفضت احتمال موتهم خلال عشرة سنوات مثلا من احتمال موت الناس التانين الاستخدموا احسن دواء مثبت علميا انو بخفض الكليسترول .. وبالتالى ينشرو نتيجة ابحاثهم بعد داك ويبدأوا فى تسويق المادة (الصمغ) عشان كده بتلقى انو مع تطور العلوم الطبية ازداد عندهم متوسط الاعمار .. لانو المسأله ما سااااكت .. جرانى خمسين وسيكتو فى قبولو .. ولا فى دكاتره عالم تالت عايشين بى شهاداتهم الزماااان من جامعاتنا العتيقه .. ده كلو كلام فارغ ساى .. صدقنى يا صديقى ده كلام فارغ سااااى .. ومشكلة الكلام ده تقديمو لحل سااااهل .. عندك سكرى .. الحل عند معتز .. الصمغ آآآ زول .. أقع الصمغ .. الكمده بالرمده كوليسترول ؟!.. الصمغ .. مافى حل غير الصمغ .. الكرش ؟!.. الصمغ صداع بالجنبه .. الصمغ .. نصفى .. الصمغ .. الدغت .. الصمغ .. القاوت .. الصمغ .. ملعتقين صغار على الريق .. لا تقول لى كليفلاند ولا مايو كلينيك .. تمشي مدينة خليفة البيت السودانى .. شفتو .. بس تقع الصمغ .. خلى يديك من الجووووه .. البره كعب .. ويااا أمة سودانيزاونلاين .. وأمم العالم التحتانى كذلك الكلام ده كلو الفاليدتى بتاعتو زيرو .. الكلام ده كلو غير انو يقترح اجراء تجارب علمية على الصمغ .. مافيهو التكتح سيييييك ..

شكرا جزيلا دكتور المشرف على المعلومات القيمة
بس في حاجة أنا جريتك خمسين
وانت قلت سييكتني في قبولي
دي تجي كيف يعني الأربعطاش قلبت وست ولا كيف
كان تقول لي خمسينك غلط ...

المهم كلامك مهم وتجربتي مهمة برضو وعندي حاجات تانية ما قلتها في البوست دا
وعندي إستعداد أكون ليك واحد من فئران التجارب ومستعد تآخد مني أي عينة إنت عايزا

أها اديك كلاما إتحديت بيهو دكتوري يوم الخميس الفات دا

قلت ليهو أنا لي اسبوعيم ما بعلت حبة ضغط وبقول ليك بالفم المليان يا دكتور أنا ما عندي ضغط
قال لي طيب أطع في السرير وجاب جهاز الضغط وقاس الضغط وكان طبيعي ..

قلت ليه الآن بقول ليك كمان لي أسبوعين ما بلعت أماريل ونقصت القولوكوفاج من تلاتة الى حبة واحدة
والسكري ما زاد عندي من 133 وبفحص كل يوم مرتين صباح ومساء ووريتو النتائج

قلت ليه انت كنت شاهد على الجيوب الأنفية صاح قال لي نعم
طيب يا دكتور وحسب الصورة الأخيرة أنا عندي جيوب أنفية
قال لي لا ...

كلامي دا ياناس ما معناها توقفو علاجكم واصلوا في العلاج مع الصمغ وراجعوا دكتوركم
وأعملو فحوصاتكم وأكرر ما حصل معي ليس بالضرورة أن يحصل مع غيري وأنا غير مسؤول عما يترتب

أنا اذكر تجربتي بكل الصدق للفائدة (ومن أحياها فكأنما أحيا الناس جميعا)

وفي كلام بقولوا ليك براك يا ود المشرف اتصل علي أو رسل لي تلفونك في الخاص

سلامات يا معتز
افتكر انك ما توقف الادوية تستمر فيها صديقتي مرة اشترت دواء عشبي للازمة
وبعداك يوم جاتها نوبة كادت تودي بحياتها لولا لطف الله
الادواء العشبية لا تغني عن الادوية الكيماوية


انا شخصيا توقفت عن استخدام اي ادوية عشبية وبقيت بستخدم دواي العادي
بعد عدد من التجارب ..
لكن رسلناللصمغ دا ناخدو مع دوا الحكيم

يا معتز اصحاب كتار قالو ليك كرهتنا الصمغ ذاتو بالمطاولات والجرجرة دي

الناس اخلاقها بقت ضيقة وجنهم وجن الجرجرة تفك بايظك طوالي

دكتور نجاة

Quote: الناس اخلاقها بقت ضيقة وجنهم وجن الجرجرة تفك بايظك طوالي

دا كلام زي الجبادة
ههههه
تحياتي

معتز وهسع دى ترجع تبلع ادوية الضغط ..
ما عارف انت بتاخد شنو وجرعاتك شنو ..
لازم الدكتور يعمل ليك معايرة للجرعات بحسب الضغط ..
الهدف بتاعك اقل من 130 على اقل من 80 لانو عندك سكرى ..

طالما انت عندك سكرى فحتكون بتاخد يا اما ACE INHIBITOR او ANGIOTENSIN BLOCKER
زى الديوفان والرينتيك وليستريل والكوزار الخ ..
أها ديل لو ما عند ضغط نهائيا مفروض تاخدهم عشان الكلى للحماية طالما عندك سكر واحتمال كبير يكون عندك مايكروالبيومنوريا او ماكروالبيومنيوريا "نسبة بتاعت بروتينات بتطلع مع البول" ومن مضاعفات السكر ..


ادوية السكرى ..
أماريل ممكن يقيف "فى خطورة بتاعت انخفاض سكر"..
لكن جلوكوفاج اصلو ونهائيا ما ممكن توقفو ..
جلوكوفاج ما بعمل هبوط فى السكر ..
وبشتغل على المدى البعيد على منع المضاعفات بتاعت القلب والشرايين والدورة الدموية ..

الكلام ده مهم يا صديقى ..
مهم جدا ..

Quote: الكوزار

دا خلاهو قبل الصمغ.



خبرك آ ود المشرف ؟

Quote: دا خلاهو قبل الصمغ.

Quote: معتز وهسع دى ترجع تبلع ادوية الضغط .. ما عارف انت بتاخد شنو وجرعاتك شنو .. لازم الدكتور يعمل ليك معايرة للجرعات بحسب الضغط .. الهدف بتاعك اقل من 130 على اقل من 80 لانو عندك سكرى ..

سلام يا دكتور
أنا فعلا الضغط عندي ما قاعد يزيد عن ال 130 بس بزيد عن ال 80 لغاية 90 (مرات)

Quote: طالما انت عندك سكرى فحتكون بتاخد يا اما ACE INHIBITOR او ANGIOTENSIN BLOCKER زى الديوفان والرينتيك وليستريل والكوزار الخ .. أها ديل لو ما عند ضغط نهائيا مفروض تاخدهم عشان الكلى للحماية طالما عندك سكر واحتمال كبير يكون عندك مايكروالبيومنوريا او ماكروالبيومنيوريا "نسبة بتاعت بروتينات بتطلع مع البول" ومن مضاعفات السكر ..

أها ديل ما عندي كان عندي حبة واحدة للدهون ووقفتها زماااان

Quote: ادوية السكرى .. أماريل ممكن يقيف "فى خطورة بتاعت انخفاض سكر".. لكن جلوكوفاج اصلو ونهائيا ما ممكن توقفو .. جلوكوفاج ما بعمل هبوط فى السكر .. وبشتغل على المدى البعيد على منع المضاعفات بتاعت القلب والشرايين والدورة الدموية ..

أماريك وقفتو لغاية الآن قريب الشهر
القولوكوفاج ما وقفتو والحمد لله السكر مظبوط مليون المية

Quote: الكلام ده مهم يا صديقى .. مهم جدا ..

تسلم والله يا دكتور وكلامك شغال بيهو مية المية

سلامات يا معتز
افتكر انك ما توقف الادوية تستمر فيها صديقتي مرة اشترت دواء عشبي للازمة
وبعداك يوم جاتها نوبة كادت تودي بحياتها لولا لطف الله
الادواء العشبية لا تغني عن الادوية الكيماوية


انا شخصيا توقفت عن استخدام اي ادوية عشبية وبقيت بستخدم دواي العادي
بعد عدد من التجارب ..
لكن رسلناللصمغ دا ناخدو مع دوا الحكيم

يا معتز اصحاب كتار قالو ليك كرهتنا الصمغ ذاتو بالمطاولات والجرجرة دي

الناس اخلاقها بقت ضيقة وجنهم وجن الجرجرة تفك بايظك طوالي

----------------------------

أدوية شنو البرجع ليها يا دكتور كدي قولي يا لطيف
ياخ الربو غير السكر والضغط إيه رأيك أنا معدتي ذاتا ارتاحت

ورجعت الحمد لله نشيط وسمبتيك وشباب وكايس للعروس الرابعة ههههه