Post: #1 Title: قدر ما فكرت أنسى الماضي .. يا Muna Khugali Author: يحي قباني Date: 01-16-2013, 02:04 AM
غريـــــــــــــــــــــــب
قَدْرِ مَا فكرت أنسى الماضي آلامه و ويله ... القي نفسي زي غريب تايه في ليله ...
اروع ما غني محمـــــد ميرغني
و اروع ما كتب اسماعيــــل حسن
و اجمــــــل ما لحن حســـــن بابكر
هدية للاستاذة مني خوجلي ... وكل اصحاب الذوق العالي ... كاملة اوركسترا ... في الاول
Post: #2 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-16-2013, 02:12 AM Parent: #1
من الاغاني التي ظلمها اعلامنا السوداني ( الفذ ) ...
Post: #3 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-16-2013, 01:57 PM Parent: #2
هدية بت خوالي دي لازم أرفعها ليها
Post: #4 Title: Re: قدر ما فكرت أنسى الماضي .. يا Muna Khugali Author: محمد أبوالعزائم أبوالريش Date: 01-16-2013, 02:20 PM Parent: #3
Quote: من الاغاني التي ظلمها اعلامنا السوداني ( الفذ )
فعلاً ....
ياخ ما نعمل بحث (يعني تعملو إنت ونحن نشجّع) للأغاني المظلومة.
وكمان إزيّك
Post: #5 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-16-2013, 02:40 PM Parent: #4
يا ود قباني الله يسعدك محل ماتقبل..قول آمين!
....... .......
هي قطعا أغنية مظلومة..وعندما سمعتها أول مرة كان من تسجيل خاص هدية منه هو شخصيا.. وعلقت بتعليق يشبه تعليقك فوق عنها وأنا اسأله عن أغنية "غريب"
تخيل ماذا كان رده؟؟
ذكر بأنها تكاد تكون الأقرب الي قلبه حتي وهي لم تلق نفس الدرجة من الشهرة كباقي أغنياته!
برجع ليك..
Post: #6 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-16-2013, 02:49 PM Parent: #5
ابوالريش و بت خوجلي ...
راجع ليكم بي مزاج ....
Post: #7 Title: Re: قدر ما فكرت أنسى الماضي .. يا Muna Khugali Author: كمال ادريس Date: 01-16-2013, 02:52 PM Parent: #5
يشهد الله انكم الاتنين .. كنوز محبة
Post: #8 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-16-2013, 06:10 PM Parent: #7
Quote: فعلاً ....
ياخ ما نعمل بحث (يعني تعملو إنت ونحن نشجّع) للأغاني المظلومة.
وكمان إزيّك
كان باريتني في الغنا و الطرب ده ...بتتعب يا ابو حميد ...
التشجيع ياهو المحمدك ...
وانا كان كده كل اسبوع بجيك مارق بي واحده ...
Post: #9 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-16-2013, 06:13 PM Parent: #8
Quote: يا ود قباني الله يسعدك محل ماتقبل..قول آمين!
احلي دعوة من اجمل زول ... الله يخليك يا مني ...
Quote: هي قطعا أغنية مظلومة..وعندما سمعتها أول مرة كان من تسجيل خاص هدية منه هو شخصيا.. وعلقت بتعليق يشبه تعليقك فوق عنها وأنا اسأله عن أغنية "غريب"
تخيل ماذا كان رده؟؟
ذكر بأنها تكاد تكون الأقرب الي قلبه حتي وهي لم تلق نفس الدرجة من الشهرة كباقي أغنياته!
برجع ليك..
ياخي عليك الله تجي راجعة و تكلمينا عن الأستاذ ...
محمد ميرغني ده حكاية لسة ما انحكت ...
واذاعتنا ظلمته كتير في اجمل اغانيه ... بس انحنا بنوثق الجمال ده ...
Post: #10 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-16-2013, 06:14 PM Parent: #9
Quote: يشهد الله انكم الاتنين .. كنوز محبة
مشتاقين يابو كمال ...
تغيب يا حبيب و ما نشوفك ...
طمنا علي المعاك ... وانشالله امورك بَسِــــط ...
Post: #11 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-16-2013, 06:55 PM Parent: #10
دي ذكريات لأيام مستحيل تتنسي.. زي كلمات إسماعيل حسن نور الله قبره في أغنية "غريب"
أحب غناء محمد ميرغني حب عجيب حتي تعرفت به وصار صديقا عزيزا أحب حديثه ونقده القوي.. طبعا الأستاذ مدرس...لذلك يا ويل من يغني بجانبه ولا ينطق الحروف نطقا صحيحا. أو يستبدل كلمة محل أخري في ابيات الغناء.. لذلك يخافه الكثير من الشباب..
....... .......
آسيا ربيع صديقتي الجميلة كانت تعلم بحبي له.. في ذلك المساء نظم لي صديقي معاوية حفل وداع في منزل أسرته.. كنت في طريق رجوعي للندن بعد إجازة في السودان.. المهم آسيا إتصلت وقالت لي عندي ليك مفاجأة.. الأستاذ كلمته بإنه في زولة بتحب أغانيك جدا..وكان نفسها تشوفك.. طبعا قبل كده كان في حفلة هو المفروض يغني فيها وإتلغت بسبب موت في أسرته.. وبالطبع لم أتمكن من لقاءه..أسيا حكت ليه عن سوء حظي في لقائه.. المهم الأستاذ قال ليها أنا مشغول..لكن المسا الساعة 8 بمر عليكم في محل الحفلة علشان أهديها إسطوانه هاسجلها ليها دلوقتي مخصوص..
آسيا لما كلمتني بقت الدنيا ما شايلاني.. الاستاذ هايسجل لي إسطوانة! وفعلا الساعة 8 مساء ظهر الأستاذ ومعاه صديقه علي ابوراس..ومعاهم الإسطوانة.. الحفلة كان فيها مجموعة حلوة جدا أغلبهم من أصدقاء من المنبر وبعضهم من خارجه بجانب أسرة معاوية.. وإذا ذاكرتي ما خانتني كان فيها الاستاذ سيف الجامعة.. المهم الحفل البسيط إتقلب بسرعة لحفل فخم بوجود الأستاذ والذي غني لنا العديد من أغنياته وسعدنا كثيرا ونحن نغني معه "إن قدرت تغيب عليا" بيتهيألي كمال سالم كان موجود في الحفلة وأحد منظميها (معليش الحفلات كانت كتيرة) برضه خالد المنسي وإحتمال محمد المشرف.. وكانت تلك بداية صداقة بيننا جلبت معها الأيام مفاجأة جميلة..
عايز تعرفها؟؟
Post: #12 Title: Re: قدر ما فكرت أنسى الماضي .. يا Muna Khugali Author: خالد علي محجوب المنسي Date: 01-16-2013, 09:32 PM Parent: #11
Quote: تخيل ماذا كان رده؟؟
ذكر بأنها تكاد تكون الأقرب الي قلبه حتي وهي لم تلق نفس الدرجة من الشهرة كباقي أغنياته!
الأخ قباني لك التحية على هذا الذوق الرفيع .. والأذن السليمة سمعا فعلاً هذه الأغنية ظُلمت اعلامياً .. وظلم.. لا اعلم هل كان مقصود أو جهل سمعي ... لكلماتها ولحنها وطريقة الاداء. أم ماذا ؟ لكن لا تضل أو تظلم من اصحاب الذوق الرفيع سمعا.. وكما ذكرت الاخت منى خوجلي ( الحبوبة ) انها كانت من الاغاني القريبة لقلبه وبحبها ... محمد ميرغني متعه الله بالصحة والعافية مطرب فنان وبحق فنان لآن الفنان هو الجامع لمجموعة أبداعات فنية محمد ميرغني صوته يدخل لاعماقك دون أن يطرق باب القلوب ويفوق الضوء نفوذا فالضوء ينكسر عندما يسقط على سطح عاكس لكن صوت تطريب الكلم عند ابوعوف يكسر كل الاسطح العاكسة وينفذ متخللا المشاعر يداعبها فنطرب ونميلسُكرى بخمر من دن صوته الشجي الذي يطرب أكثر وأجمل في القصائد التي تحمل لمحة من حزن و تباريح الهوى محمد ميرغني أداء من الأعماق تحسه أن الأغنية التي يؤديها قصة حب عنيف له يعيشها بكل خصلة مشاعر في جسده يهتز ويغمض العينين ليزيد في الغوص داخل الكلم شبرا ... حضوره المسرحي يزيد من جماله جمال وحسنا تراه يتحرك حركته المعهودة بكل جسده يحاكي البان ميلا ( كل الجسد كتلة واحدة ) محمد ميرغني الإنسان محمد ميرغني المعلم والمربي وقد حكت لي بنت خالتي متعها الله بالصحة عفاف عبدالمنعم كيف كان لهم استاذ ومربي ومعلمّا وكيف نال أحترام وتقدير كل الطالبات في كلية المعلمات بشخصه دون هرشة وعصا .. محمد ميرغني مطرب الفنانين
الحديث يطول عن ابوعوف وهو فناني المفضل من صفوة اصطفيه هو ( محمد ميرغني ) لك مني اخي قباني كل التقدير على هذه اللفتة البارعة تسليط بعض الضوء لعمل جميل
Post: #13 Title: Re: قدر ما فكرت أنسى الماضي .. يا Muna Khugali Author: اسماعيل يوسف محمد Date: 01-16-2013, 10:21 PM Parent: #12
عزيزى يحيى قبانى تحية واحتراما اى تعليق على هذا الابداع يفسده فقط علينا ان نستمع ونستمتع وربنا يديك العافيه على هذه الدرر ولمحمد ميرغنى التجلة والاحترام هكذا هم فنانى بلادى فى الزمن الجميل
Post: #14 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-17-2013, 06:13 AM Parent: #13
Quote: وكانت تلك بداية صداقة بيننا جلبت معها الأيام مفاجأة جميلة..
Post: #15 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-17-2013, 06:16 AM Parent: #14
Quote: الحديث يطول عن ابوعوف وهو فناني المفضل من صفوة اصطفيه هو ( محمد ميرغني ) لك مني اخي قباني كل التقدير على هذه اللفتة البارعة تسليط بعض الضوء لعمل جميل
لك الود يا منسي ...
وارجوك ان تزيدنا متعة بالحديث عن الأستاذ ...
لم يسعدني الحظ سوي الجلوس معه مرة واحده في منزله في بحري بصحبة
الزميل المهندس مرتضي علي في اوائل الثمانينات ...
رغم انها مرة واحده ... لكنه يرحب بك ترحاب معرفة السنين ...
واصل يا بديع ... فمحمد ميرغني كبير ... و يستحق منا كل ما نملك ان نقوله ...
متعونا انت و بت خوجلي ...
Post: #16 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-17-2013, 06:19 AM Parent: #15
Quote: عزيزى يحيى قبانى تحية واحتراما اى تعليق على هذا الابداع يفسده فقط علينا ان نستمع ونستمتع وربنا يديك العافيه على هذه الدرر ولمحمد ميرغنى التجلة والاحترام هكذا هم فنانى بلادى فى الزمن الجميل
العزيز اسماعيل ...
لك من الود أأقصاه يا ملك ...
والله صدقت ... فقط نجلس و نتأدب في حضرة هؤلاء العمالقة ...
تحياتي و احترامي ...
Post: #17 Title: Re: قدر ما فكرت أنسى الماضي .. يا Muna Khugali Author: عادل عبد الرحمن حسن Date: 01-17-2013, 07:25 AM Parent: #16
كنت أتمنى لو نسيت الماضي ....فتحت كميه من الأبواب والشبابيك ما عارف تتقفل كيف ...كل الحب ياخ....
Post: #18 Title: Re: قدر ما فكرت أنسى الماضي .. يا Muna Khugali Author: خالد علي محجوب المنسي Date: 01-17-2013, 08:42 PM Parent: #17
Quote: فمحمد ميرغني كبير ... و يستحق منا كل ما نملك ان نقوله ...
تحياتي قباني وتشكرات كثيرة ومستنيرة يا منير اسمع له كلما يعترني بعض من كدر ..
لم ألتقيه لكن أمني النفس أن أقابله احببت شخصه وفنه ابداعه
محمد ميرعني أحب فيه الأداء الرائع الذي تفرد به من بين المبدعين عندما تتابع طريقة أدائه للأغنية تجده ياخذ اللحن وبعدها يسكب علية تلك الصُبغة الخاصة به وكيف يتنقل بنبرات صوته ولك كلمة يعطيها حقها لتخرج معبرة عن حزن عن فرحة عن وعن تابعوا طريقة أدائه في اغنية ( لا بتسالمي ) كلمات الأغنية بسيطة من المفردة العامية المتناولة ولا أقول اللحن سما بها وحده بل الأداء واللحن أكسبوها طعم وشكل طعم مذاقه حلو متغلغل تهتز له روح مستمعيه وشكل وهذه صعب شرحها وتفسيرها لكن يسهل الأحساس بها ( انا من اللذين يتخيلون لون المفردة مثال ) نعم عندي لونها ابيض وشكل حدوده حروفها لا لونها اسود فاتح يا قباني هذا ليس ضرب من جنون لكنه شئ فيّا ويجعلني أعيش الكلمة لونها وشكلها ومعناها ووقع نطقها نرجع لاغنته لا بتسالمي نتابعها لنرىكيف طوع كلماتها بأدائه الذي سما باللحن عوالي
شوف كيف تخرج كلمة (إنتِّ تعيشي ).. ( هالكاني ) ( كاتلاني ) ( قُبْـــــال يومي ) يعطيك بطريقة أدائه معنى العيش اللذي تمناه لها اي ان يعصر كلمة إنتِّ تعيشي دي عصر يخليك تيقن أنه تمنى لها الحياة الكريمة رغم أنها حبه لها كان سبب هلاكه سبب مماته .. كيف يكون الهلاك في خضم عُباب حبها .. وكيف الموت ويحلةو لو كان في حبها وقس على ذلك يعني يا قباني بقصدان اداء محمد ميرغني وكيف يؤدي اللحن بمثابة دكشنري يشرح وحتى للذي لا يعرف العربية لو تابع أدائه يعرف اين الحزن واين الفرح في أغانيه التحية والتقدير لابوعوف اسف انا مرات اسهب في الكلام ويغلبني التعبير لكن الغربية بكون عارف عاوز اقول شنو ( ان شاء الله تقدر تجني ثمرة من ما اردت قوله وتوضيحه
Post: #19 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-18-2013, 05:04 PM Parent: #18
Quote: يعني يا قباني بقصدان اداء محمد ميرغني وكيف يؤدي اللحن بمثابة دكشنري يشرح وحتى للذي لا يعرف العربية لو تابع أدائه يعرف اين الحزن واين الفرح في أغانيه التحية والتقدير لابوعوف
كلامك زين يا منسي ..
لابد من أجيك راجع ... بي مزاجاً كارب ...
Post: #55 Title: Re: قدر ما فكرت أنسى الماضي .. يا Muna Khugali Author: Muna Khugali Date: 02-01-2013, 11:46 PM Parent: #17
كنت أتمنى لو نسيت الماضي ....فتحت كميه من الأبواب والشبابيك ما عارف تتقفل كيف ...كل الحب ياخ.... _______________________________________
يا ود قباني عوقت زميلنا عادل عبدالرحمن بالأغنية دي ياخ..
مرحب بيك يا عادل في المنبر وفي البوست..
Post: #20 Title: Re: قدر ما فكرت أنسى الماضي .. يا Muna Khugali Author: عادل عبد الرحمن حسن Date: 01-18-2013, 10:38 PM Parent: #16
كنت أتمنى لو نسيت الماضي ....فتحت كميه من الأبواب والشبابيك ما عارف تتقفل كيف ...كل الحب ياخ....
Post: #21 Title: Re: قدر ما فكرت أنسى الماضي .. يا Muna Khugali Author: محمد عوض السيد Date: 01-19-2013, 00:50 AM Parent: #20
سلامات عوافي
الجميل / قباني
محمد ميرغني فنان مبدع ..
ولا زلت اذكر تلك الحلقة العاشرة ببرنامج اغاني واغاني لعام 2009م
وفيها تحدث السر قدور عن بداياته الفنية واول اغنياته التي دندن بها ..
ووالله انا بفتش علي اغنية من زمن طويل لمحمد ميرغني وهي (الكانوا قبلك)
واكيد لو قلبت سحارتك بتلقاه لي اكون شاكراً وممتن بذلك ..
وتكون طالبني كم برنامج من اوائل تسجيلات الاذاعة زماااااااااان
مع ودي واحترامي
Post: #23 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-21-2013, 10:03 PM Parent: #20
ياخي عليك الله تجي راجعة و تكلمينا عن الأستاذ ...
محمد ميرغني ده حكاية لسة ما انحكت ...
واذاعتنا ظلمته كتير في اجمل اغانيه ... بس انحنا بنوثق الجمال ده ... ______________________________
كان الاستاذ يعمل في معهد للمكفوفين ..هو من أفتتحه وعمل مدرس به..يدرس كل المواد بطريقة برايل للمكفوفين..وكانت هي زميلته في التدريس..مع الأيام والتعامل بينهما نشات بينهما قصة حب قوية..
حدثني الأستاذ...قويت علاقتنا بسرعة..نما الحب بيننا سريعا وقويا..وعلي الرغم من أننا كنا لاوقات طويلة معا الا أننا كنا نرجع لمنازلنا لنكتب لبعضنا...ظللت أكتب لها بدم وريدي..أملا دواية الحبر به وأكتب لها في نوتة خاصة..وكان إن جمد الدم بالدواية وتجلط كنت أضيف له ملح وليمون حتي يسيل ويمكنني الكتابة به..وكانت تفعل المثل..وعندما تمتليء النوت كنا نتبادلها ونعود لنملأ أخريات.. كل ذلك ولقاءنا اليومي بالمعهد مستمر يبدأ اول كل النهار وحتي كل المساء.. بداية القصة كانت في 1961
....... .......
Post: #36 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-22-2013, 07:29 PM Parent: #23
....... .......
فكرت كتيرا ..أي درجة من الحب تلك والأشواق تجعل أي إنسان يكتب طل ما بداخله بدم من وريده؟؟
هل يسعي الحبيب لأن يخلد كلماته أكثر؟؟ بأن يجعل لها معني أقوي في قلب الحبيبة؟؟ أم لشرح درجة من الحب صادقة لم يكن فيها الحبر كافيا لأن يشرح عمقه؟؟ كنت أظنها فقط درجه من البلاغة في وصف حالة الحب..إلا أنها كانت وصف لفعل حدث بالفعل بسبب الحب! هي قطعا درجة في افق من المشاعر عميق في التعبير عن الحب والإرتباط والسعي للتقارب أكثر...
ذلك زمن يبدو بعيدا وغريبا..تلك الدرجة من الحب لابد أن تكون قد ماثلتها درجة من الإخلاص..فتصير العلاقة وجود وأنصهار.. الإنصهار الذي يجعل الفكرة واحدة والخاطرة تلك التي تقفز ثم تجول في رأسه في نفس وقت جولانها في رأسها ...اي زمن كان ذلك؟!
لكن الأمر الصعب هو كيف يمكن لإثنين أن تجمعهم عاطفة تكون لكلاهما كل الوجود وسببه ونستطيع نحن أن نوصفها بكل قوتها وعنفوانها دون تقصير؟؟ بل كيف يفهمها أغلبنا في حين ضاعت فيه بساطة الاشياء واصبح الحديث فيه عن العاطفة الصادقة شيئا ساذجا؟؟
............ ............
مضت الشهور..وإتفق كل من الأستاذ وحبيبة عمره علي أن الوقت قد حان لإعلان العلاقة للأهل ..أخبر الأستاذ أهله وطلب من خاله ذو الرتبة الكبيرة في الجيش أن يصحبه مع بعض افراد الأسرة للتقدم وطلب يدها من أسرتها.. الحبيبة من أسرة معروفة..وكان للأم القوة والسطوة في إتخاذ القرارات..
فكان قرار الرفض المر..
........ ........
Post: #50 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-27-2013, 04:39 PM Parent: #36
...........
...........
يقول الأستاذ..
قررت أم الحبيبة أن تزوجها لقريبهم ضابط الجيش..إعتبرتني فقيرا لا يمكن أن يسعد إبنتها..فمرتبي أنا المدرس لن يكفي لمنحها حياة سهلة وسعيدة.. كان ذلك الرفض نهاية كل أحلامي وحياتي ..فقد صارت هي كل شيء في حياتي..فلم أتحمل فكرة غيابها مني.. وبمجرد سماعي بخبر الرفض دخلت في غيبوبة منذ 15 سبتمبر 1963 ولم افق منها الا في فبراير 19964 ظنت أمي وإخواتي أنني ذهبت للابد..فالغيبوبة كانت كاملة ولم يظهر فيها اي مؤشرات برجوعي للحياة مرة أخري!
إنعزلت لمدة وأوقفت الغناء بعد ذلك..الا أنني رجعت وبدأت مشواري الغنائي الإحترافي..وكانت أغنية أنا والأشواق من الأغاني التي عبرت عن حالي وقصتي..قصتي التي كان يعلمها صديقي الشاعر إسماعيل حسن وصديقي الشاعر محمد بشير عتيق..ونتجت بيني وبين عتيق اغنية لم تلق إنتاجا كاملا من حيث التسجيل والرواج..أغنية تقول بداية أبياتها أول حب كتمته كنت ختامه إنت.. ثم كانت أغنياتي غريب ..وغيرها مثل ما قلنا ليك..وكلها كانت تتحدث بحالي..كنت أحكي قصتي للشاعر فيترجمها هو لكلمات تعبر عني تماما!
......... .........
شاءت الايام أن يتقدم أحد أصدقائي الضباط للزواج من إحدي الحسان..وطلب مني الغناء في زواجه..ويوم الحفل ذهبت الي عنوان محل الزواج فإذا به منزل حبيبتي..وإذا بالتي كان سيتزوجها شقيقة حبيبتي..بالطبع لم اتراجع..تمالكت نفسي ودخلت للغناء.. لم أراها أثناء تلك المناسبة ولم أحاول رؤيتها في أي وقت آخر..قفلت ذلك الباب للأبد وأستمريت في حياتي العملية.. وفيما بعد فتزوجت وأنجبت وسعدت باسرتي..
Post: #29 Title: Re: قدر ما فكرت أنسى الماضي .. يا Muna Khugali Author: الطيب شيقوق Date: 01-22-2013, 06:58 AM Parent: #20
قباني
ما بتقول لي ؟
اتاري المولد بهنا وانا بهناك مع الجادين؟
Post: #61 Title: Re: قدر ما فكرت أنسى الماضي .. يا Muna Khugali Author: Muna Khugali Date: 02-17-2013, 10:17 PM Parent: #20
Quote: كنت أتمنى لو نسيت الماضي ....فتحت كميه من الأبواب والشبابيك ما عارف تتقفل كيف ...كل الحب ياخ....
اخونا عادل عبدالرحمن..
الابواب والشبابيك إتقفلوا ولا لسة؟؟
الأستاذ ذاتو ما أظن ابوابه إتقفلت..كان بيكتب الجوابات بدم وريده!
تحياتي لك..
Post: #22 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-20-2013, 00:22 AM Parent: #7
يشهد الله انكم الاتنين .. كنوز محبة ___________________
يا كملي خليك معانا..
أخبارك مقطوعة..لعلك والأسرة بخير..
Post: #24 Title: Re: قدر ما فكرت أنسى الماضي .. يا Muna Khugali Author: كمال سالم Date: 01-21-2013, 11:02 PM Parent: #22
Quote: المهم الحفل البسيط إتقلب بسرعة لحفل فخم بوجود الأستاذ والذي غني لنا العديد من أغنياته وسعدنا كثيرا ونحن نغني معه "إن قدرت تغيب عليا" بيتهيألي كمال سالم كان موجود في الحفلة وأحد منظميها (معليش الحفلات كانت كتيرة)
يحى قبانى مالك ياخ بتوجع فينا ؟ يامنى دى كانت امسيه من الف ليله وليله حيث كنا فى ضيافة الصديق معاويه الطيب بمنزلهم الانيق بالخرطوم بحرى . وكان الحضور ايضا انيقا وجميلا حيث اجتمع فى تلك اللحظه عدد من البورداب والبوردابيات اذكر منهم منى ومنال خوجلى وانعام عبد الحفيظ واسمهان واسيا ربيع وصديقكم الفنان الجميل ( نسيت اسمه ) والموسيقار عثمان محى الدين وعندما انتصف الليل وهدات الخرطوم وكنا قد تخمنا من الغنا دخل علينا فجاة الفنان العملاق محمد ميرغنى وبدات السهره من الصفر مرة اخرى وهزمنا الليل بروائع الغنا . وقد جمل الامسيه ايضا صديقنا المترع بالطرب نجيب نور الدين . سوف استنجد بمعاويه الطيب ليمدنى بالصور والتسجيل . تحياتى ليك وليحى قبانى وللاستاذ محمد ميرغنى اطال الله عمره .
Post: #25 Title: Re: قدر ما فكرت أنسى الماضي .. يا Muna Khugali Author: د.ماجدة ميرغني Date: 01-22-2013, 05:39 AM Parent: #24
Quote: يشهد الله انكم الاتنين .. كنوز محبة
الاخت الدرة منى بتستاهلي كدة وكمان اكثر مع كل الاعزاز والمودة
Post: #26 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-22-2013, 05:43 AM Parent: #25
Quote: كل ذلك ولقاءنا اليومي بالمعهد مستمر يبدأ اول كل النهار وحتي كل المساء.. بداية القصة كانت في 1961
الرائعة دوما مني خوجلي ...
بديتي تكتبي بي مزاج ...
وانحنا في انتظار الجمال القادم ...
و آآآآدي قعده ...
Post: #27 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-22-2013, 05:44 AM Parent: #26
Quote: يحى قبانى مالك ياخ بتوجع فينا ؟ يامنى دى كانت امسيه من الف ليله وليله حيث كنا فى ضيافة الصديق معاويه الطيب بمنزلهم الانيق بالخرطوم بحرى . وكان الحضور ايضا انيقا وجميلا حيث اجتمع فى تلك اللحظه عدد من البورداب والبوردابيات اذكر منهم منى ومنال خوجلى وانعام عبد الحفيظ واسمهان واسيا ربيع وصديقكم الفنان الجميل ( نسيت اسمه ) والموسيقار عثمان محى الدين وعندما انتصف الليل وهدات الخرطوم وكنا قد تخمنا من الغنا دخل علينا فجاة الفنان العملاق محمد ميرغنى وبدات السهره من الصفر مرة اخرى وهزمنا الليل بروائع الغنا . وقد جمل الامسيه ايضا صديقنا المترع بالطرب نجيب نور الدين . سوف استنجد بمعاويه الطيب ليمدنى بالصور والتسجيل . تحياتى ليك وليحى قبانى وللاستاذ محمد ميرغنى اطال الله عمره .
شرفتنا أخي كمال سالم ..
كم تمنيت ان اكون حضورا في تلك الليالي ...
ناس جميلين و زمن جميل ...
زيدنا من العندك يا كمال ...
Post: #28 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-22-2013, 05:47 AM Parent: #27
اهل الفيس بوك الاساتدذة شمس الخليفة و طارق محمود ...
محمد ميرغني وما ادراكم ما محمد ميرغني ...
درة من درر الفن السوداني ...
اعلامنا كالعادة ...تقصير في تقصير ...
Post: #30 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-22-2013, 07:08 AM Parent: #28
Quote: قباني
ما بتقول لي ؟
اتاري المولد بهنا وانا بهناك مع الجادين؟
مولد و لسه ما بدا ...
بت خوجلي حتبدع هنا كعادتها ...
وكمال سالم و ود المنسي عندهم كلام كتير ...
و الكلام السمح عن الناس السمحين بيكيف الراس يا ود شيقوق ...
عليك الله كمان كان جبته خالك ينجمه ليهو انجمامه صغيره بي هنا ...
المطارات و المحطات بتكون لفت راسو ....
Post: #31 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-22-2013, 12:01 PM Parent: #30
يالله عليكم مكان مليئ بالناس الجميلين استاذ الاجيال علماً وفناً محمد ميرغني وودقباني وبت الخليفة وود المنسي وضيوفهم الكرام شكراً لكم
Quote: يالله عليكم مكان مليئ بالناس الجميلين استاذ الاجيال علماً وفناً محمد ميرغني وودقباني وبت الخليفة وود المنسي وضيوفهم الكرام شكراً لكم
مرحب بيك يا شمس خليفة..أو Shams Khalifa
طبعا أول مرة أكتب رد علي الفيس بوك من سودانيزلونلاين.. ومش كده وبس.. أنا الفيس بوك ده عديل كده ما قدرت افهمه.. لما تجيني طلبات عضوية بفكر إنه الهوت ميل براهو بيرسلها.. في زول صديق لقي كياشتي زادت..عمل لي عضوية في الفيس بوك وسلمني الباسوورد وأنا مازلت "محلك سر"! الحكاية دي تكون من شنو؟؟
......... ......... شوفت استاذ محمد ميرغني ده جميل كيف؟؟ أغنياته كلها إبداع من ناحية الكلمات واللحن والأداء..
طيب أديك معلومة.. عارف أكتر بلد بيحبها الأستاذ وين بعد السودان؟؟ أسمرا وبعدها القاهرة..
...... ...... شكرا علي كلماتك الطيبة.. وخليك معانا..
Post: #32 Title: Re: قدر ما فكرت أنسى الماضي .. يا Muna Khugali Author: محمد عوض السيد Date: 01-22-2013, 02:41 PM Parent: #31
Post: #33 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-22-2013, 03:09 PM Parent: #32
يا ود قباني.. أنا كتيبت مساهمة فيها رد علي ناس الفيس بوك هنا.. جيت اسة لقيت مكانها فاضي.. عندك فكرة يكون حاصل شنو؟؟
أنا مستغربة لأنه عندي كتابات في بوستات حقتي برضه ما بلقاها.. مش حاجة غريبة؟؟!
Post: #34 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-22-2013, 03:10 PM Parent: #33
الرد ما زال موجود ...
اعملي رفرش للصفحة ...
الان انا بقرا فيهو ...
Post: #35 Title: Re: قدر ما فكرت أنسى الماضي .. يا Muna Khugali Author: ماجدة عوض خوجلى Date: 01-22-2013, 03:11 PM Parent: #32
سلام ود قبانى ومنى وضيوف البوست معقوله البوست ده فى الصفحة التانية حقتو وانا ماجايبه ليه خبر الظاهر علينا بقينا ماعارفين اى حاجه فى الحوش ده ...
الفنان الجميل محمد ميرغنى يستحق مننا كل الاحترام وياريت تواصلو لينا فى الكتابه عنو والتواثيق للاغانى المانالت حظها فى الانتشار ... عن نغسى انادى اول مرة اسمع اغنية قدر مافكرت انسى الماضى .
الأستاذ محمد ميرغني فنان عظيم وصاحب رصيد ذاخر من الأغاني الجميلة التي لحن أغلبها الملحن العظيم الأستاذ حسن بابكر، وصاغ كلماتها شعراء كبار منهم اسماعيل حسن، حسن الزبير، صلاح حاج سعيد، السر دوليب، تجاني حاج موسى، محمد عبد القادر ابو شورة، السر قدور وغيرهم.. هذه الأغنية (غريب) أغنية مختلفة، فهي مزيج من الشجن والحنين والشكوى.. صدقني لم أعرف أن صاحب الأغنية الحقيقي هو محمد ميرغني وأن شاعرها هو اسماعيل حسن إلا قبل عدة شهور عبر لقاء مع محمد ميرغني في قناة النيل الأزرق.. كنت أداوم على سماع هذه الأغنية من المرحوم مصطفى سيد أحمد الذي أداها (كعادته) بإبداع متناهي وكنت أعلم أنها ليست من أغانيه لكنني أجهل صاحبها الحقيقي.. ولعل اختيار مصطفى لها ـ بجانب جمال لحنها وروعة كلماتها ـ أن الظرف الزماني الذي غناها فيه كان يشبه هذه الأغنية.. شكراً ليك يا يحي على الهدية الحلوة..
Post: #38 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-22-2013, 11:00 PM Parent: #37
Quote: سلام ود قبانى ومنى وضيوف البوست معقوله البوست ده فى الصفحة التانية حقتو وانا ماجايبه ليه خبر الظاهر علينا بقينا ماعارفين اى حاجه فى الحوش ده ...
الفنان الجميل محمد ميرغنى يستحق مننا كل الاحترام وياريت تواصلو لينا فى الكتابه عنو والتواثيق للاغانى المانالت حظها فى الانتشار ... عن نغسى انادى اول مرة اسمع اغنية قدر مافكرت انسى الماضى .
ماجده الماجده ...
مشتاقين و الله ...
معليش لكن تشوفي من وين مع القبقبة و البنية المدورة دي ...
المهم بركه اللقيتينا ...
فنحن يا سيدتي ... نبحث عن الجمال و عن الناس الجميلين ...
اما بالنسبة لي مولانا محمد عوض السيد ...
فما عليكي مولانا ده ما زولي ... وزول مليان طرب و فن جميل ...
بس ما داير يصبر علي ...
Post: #39 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-23-2013, 02:44 PM Parent: #25
الاخت الدرة منى بتستاهلي كدة وكمان اكثر مع كل الاعزاز والمودة ___________________
إزيك يا ماجدة.. أتمني إنك تكوني من محبي الأستاذ الجميل محمد ميرغني.. وبتمني أكتر أكون عند حسن ظنك..
شكرا علي كلماتك الطيبة..حقيقي اسعدتني..
Post: #40 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-24-2013, 06:10 AM Parent: #39
الأستاذ محمد ميرغني فنان عظيم وصاحب رصيد ذاخر من الأغاني الجميلة التي لحن أغلبها الملحن العظيم الأستاذ حسن بابكر، وصاغ كلماتها شعراء كبار منهم اسماعيل حسن، حسن الزبير، صلاح حاج سعيد، السر دوليب، تجاني حاج موسى، محمد عبد القادر ابو شورة، السر قدور وغيرهم.. هذه الأغنية (غريب) أغنية مختلفة، فهي مزيج من الشجن والحنين والشكوى.. صدقني لم أعرف أن صاحب الأغنية الحقيقي هو محمد ميرغني وأن شاعرها هو اسماعيل حسن إلا قبل عدة شهور عبر لقاء مع محمد ميرغني في قناة النيل الأزرق.. كنت أداوم على سماع هذه الأغنية من المرحوم مصطفى سيد أحمد الذي أداها (كعادته) بإبداع متناهي وكنت أعلم أنها ليست من أغانيه لكنني أجهل صاحبها الحقيقي.. ولعل اختيار مصطفى لها ـ بجانب جمال لحنها وروعة كلماتها ـ أن الظرف الزماني الذي غناها فيه كان يشبه هذه الأغنية.. شكراً ليك يا يحي على الهدية الحلوة
لك الود أخي نصر الدين ...
محمد ميرغني من ميزاته أن اغانية تأخذ مكانها في الطليعة
و تحتل مكانها في القمة علي مر السنين ..
أغاني راسخة ... كل ما مر بنا الزمان تزداد ألقا و جمالا
و في انتظار الذكريات البديعة من أساتذتنا مني خوجلي ...
Post: #41 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-24-2013, 11:28 AM Parent: #40
Quote: من الصدف استاذة منى ..ـأول مرة أقابل الأستاذ محمد ميرغني ..مع علي أبوراس في بيت المرحوم صلاح حمدنا الله ...وكانت ونسة أحلى من الغنا ...يكفيهو (يا حياتي و نور عينيا ... وين تروح من حبي وين ) دمتي و الباشمهندس قباني بألف خير
سلامات طارق محمود..
الأستاذ وعلي ابوراس كالتوأم..ما بيتفارقوا الا خلال النهار بسبب إلتزامات كل منهما.. التفاهم بينهم يجعل الجلوس معهما متعة ..
أنا كمان زيك أول مرة اقابل الأستاذ كانوا مع بعض ومعرفتي بيهم الإتنين إستمرت منذ ذلك الوقت.. يعني لو واحد فينا فاقد الإتصال بواحد بيعرف الأخبار من الواحد التاني..
......... ......... لو قدرت تغيب عليا..اغنية عجيبة ولها أيضا أسبابها العاطفية.. تابع معانا من كتب معظم أغنياته..من لحنها ومن عاصر قصة حبه الكبيرة من الشعراء..
شكرا يا طارق سعيدة بمساهمتك معنا..
Post: #42 Title: Re: قدر ما فكرت أنسى الماضي .. يا Muna Khugali Author: نادر الفضلى Date: 01-25-2013, 03:42 AM Parent: #41
عزيزى يحى قبانى
سحارتك صحى مليانة .. أول مرة أسمع أغنية قدر ما فكرت أنسى الماضى .. أغنية روعة .. التحية للأستاذ محمد ميرغنى ..
المتميزة منى خوجلى .. إزيك .. كما عهدناك .. تضيفين جمالاً لجلسة الإستماع والإبداع هذه .. واصلى الحكى .
Post: #43 Title: Re: قدر ما فكرت أنسى الماضي .. يا Muna Khugali Author: خالد علي محجوب المنسي Date: 01-25-2013, 01:34 PM Parent: #42
Quote: لو قدرت تغيب عليا..اغنية عجيبة ولها أيضا أسبابها العاطفية.. تابع معانا من كتب معظم أغنياته..من لحنها ومن عاصر قصة حبه الكبيرة من الشعراء..
شكرا يا طارق سعيدة بمساهمتك معنا..
كلمات الشاعر الجميل روحاً ونفسا السر دوليب
لو قدرتَ غيب عليّا وأبقى بي وصلك ضنين يا حياتي ونور عينيّى وين تروح ؟ من حبي وين ...
النسيم الماري هادي فيهو من أشواقي نفحة والقمر النورو بادي فيهو من ضي حُبي لمحة لو غبتَّ ضديت يا حنون وبعدتَّ تابعتَّ الظنون للقلوب إحساس يقرب وحتى للأرواح عيون
كُل زهور زيّك عبيرا فايحة بي الشوق والهُيام كُل عطور إنتَّ بتريدا شايلا ليك مني السلام وأنا راجيك بالأماني بي كل اشواق وحناني لو بعـــد طيفك عليَّ بطولو بي الفن والمعاني
شَعرك الليل الطويل يحكي ليك سُهدي في غيابك وجهك الناير جميل نورو زي أملي في غيابك وأنا برضاهو السهر لو إنتَّ حُسنك بي أمر وليلي يستناك تهل عَليَّ يا أجمل قمر
Post: #44 Title: Re: قدر ما فكرت أنسى الماضي .. يا Muna Khugali Author: خالد علي محجوب المنسي Date: 01-25-2013, 01:53 PM Parent: #43
Quote: لو قدرتَ غيب عليّا وأبقى بي وصلك ضنين يا حياتي ونور عينيّى وين تروح ؟ من حبي وين ...
في كثير من اللحظات عندما أستمع للجميل العميق في تطريبه الأستاذ محمد ميرغني تتملكني فكرة أأكدها وايقن معناها في نفسي أن الأستاذ محمد ميرغني صاحب الكلمات واللحن والأداء وأن كان غير ذلك مثال هذه الأغنية من كلمات الشاعر السر دوليب فأخلص لفكرة أخرى ان الاستاذ محمد صار اكبر وأعلى مقام عندما تغمص روح الشاعر وكان حسن الأداء متعنا الاستاذ بكل حرف تغنى به ربنا يعطيه الصحة والعافية أذوب في حب الأستماع له كلما هبت غيمة من حزن في حياتي التي كلها كدر
أوقدي النار فينا بنت خوجلي منى بحروف هذا الجميل المنشر فينا بطول النيل
لك التحية مرات عدد قباني على هذه المساحة
Post: #45 Title: Re: قدر ما فكرت أنسى الماضي .. يا Muna Khugali Author: خالد علي محجوب المنسي Date: 01-25-2013, 01:54 PM Parent: #43
Quote: لو قدرتَ غيب عليّا وأبقى بي وصلك ضنين يا حياتي ونور عينيّى وين تروح ؟ من حبي وين ...
في كثير من اللحظات عندما أستمع للجميل العميق في تطريبه الأستاذ محمد ميرغني تتملكني فكرة أأكدها وايقن معناها في نفسي أن الأستاذ محمد ميرغني صاحب الكلمات واللحن والأداء وأن كان غير ذلك مثال هذه الأغنية من كلمات الشاعر السر دوليب فأخلص لفكرة أخرى ان الاستاذ محمد صار اكبر وأعلى مقام عندما تغمص روح الشاعر وكان حسن الأداء متعنا الاستاذ بكل حرف تغنى به ربنا يعطيه الصحة والعافية أذوب في حب الأستماع له كلما هبت غيمة من حزن في حياتي التي كلها كدر
أوقدي النار فينا بنت خوجلي منى بحروف هذا الجميل المنشر فينا بطول النيل
لك التحية مرات عدد قباني على هذه المساحة
Post: #46 Title: Re: قدر ما فكرت أنسى الماضي .. يا Muna Khugali Author: خالد علي محجوب المنسي Date: 01-25-2013, 06:13 PM Parent: #45
Quote: كُل زهور زيّك عبيرا فايحة بي الشوق والهُيام كُل عطور إنتَّ بتريدا شايلا ليك مني السلام وأنا راجيك بالأماني بي كل اشواق وحناني لو بعـــد طيفك عليَّ بطولو بي الفن والمعاني
التعليق هنا لا يجوز دا كلام وحديث نحسه بمشاعرنا وبس تسلما السر دوليب والراقي الجميل محمد ميرغني
Post: #47 Title: Re: قدر ما فكرت أنسى الماضي .. يا Muna Khugali Author: الطيب شيقوق Date: 01-25-2013, 06:40 PM Parent: #46
ود قباني
Quote: و الكلام السمح عن الناس السمحين بيكيف الراس يا ود شيقوق ...
عليك الله كمان كان جبته خالك ينجمه ليهو انجمامه صغيره بي هنا ...
عليك النبي يا قباني سوق معاك ام عروض وقول لخالي خالك مسك ليك في كراعك عشان ترضى منو وتطيب خاطرو
هو فاكر الزعل دا حاجة ساهلة ساي
Post: #64 Title: Re: قدر ما فكرت أنسى الماضي .. يا Muna Khugali Author: Muna Khugali Date: 03-10-2013, 03:54 PM Parent: #46
شكرا يا خالد.. مساهماتك عظيمة في البوست..
....... .......
Post: #63 Title: Re: قدر ما فكرت أنسى الماضي .. يا Muna Khugali Author: Muna Khugali Date: 03-09-2013, 02:04 PM Parent: #42
Quote: عزيزى يحى قبانى
سحارتك صحى مليانة .. أول مرة أسمع أغنية قدر ما فكرت أنسى الماضى .. أغنية روعة .. التحية للأستاذ محمد ميرغنى ..
المتميزة منى خوجلى .. إزيك .. كما عهدناك .. تضيفين جمالاً لجلسة الإستماع والإبداع هذه .. واصلى الحكى .
يا نادر النادر وجوده..مالك غايب طوالي؟؟
أنا زيك سمعت الأغنية بعد مالأستاذ أهداني الإسطوانة! أغاني تلك الفترة كلها كانت بتعبر عن حزنه..
شكرا يا نادر علي كلماتك الطيبة..
Post: #49 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-26-2013, 06:57 PM Parent: #40
Quote: يحى قبانى مالك ياخ بتوجع فينا ؟ يامنى دى كانت امسيه من الف ليله وليله حيث كنا فى ضيافة الصديق معاويه الطيب بمنزلهم الانيق بالخرطوم بحرى . وكان الحضور ايضا انيقا وجميلا حيث اجتمع فى تلك اللحظه عدد من البورداب والبوردابيات اذكر منهم منى ومنال خوجلى وانعام عبد الحفيظ واسمهان واسيا ربيع وصديقكم الفنان الجميل ( نسيت اسمه ) والموسيقار عثمان محى الدين وعندما انتصف الليل وهدات الخرطوم وكنا قد تخمنا من الغنا دخل علينا فجاة الفنان العملاق محمد ميرغنى وبدات السهره من الصفر مرة اخرى وهزمنا الليل بروائع الغنا . وقد جمل الامسيه ايضا صديقنا المترع بالطرب نجيب نور الدين . سوف استنجد بمعاويه الطيب ليمدنى بالصور والتسجيل . تحياتى ليك وليحى قبانى وللاستاذ محمد ميرغنى اطال الله عمره .
يا كمال إتذكرت أنا اسه أكتر.. الحفلة كانت لوداعنا الإتنين..وبرضه غنت فيها حنان..تتذكر؟؟ كانت أجمل حفلة.. والأستاذ اليوم داك برضه كان مبسوط لأنه أول مرة يقابل معظم المجموعة..وكبعا وجود آسيا ربيع وحنان ساعد علي التلقائية والفرح.. أول مرة أتذكر موضوع الصور ده..يارب معاوية يكون محتفظ بيها.. نجيب نور الدين برضه غنا ليناواحدة من أغاني الأستاذ..صح؟؟
......... .........
Post: #48 Title: Re: قدر ما فكرت أنسى الماضي .. يا Muna Khugali Author: هاشم أحمد خلف الله Date: 01-25-2013, 07:36 PM Parent: #1
يحيي قباني إختيار صادف اهله فعلا اغنية رائعة وتشبه الملكة منى خوجلي لا اجد إي سبب يدعو لعدم إنتشار هذه الاغنية المكتملة الاركان كلمة لحن اداء
Post: #51 Title: Re: قدر ما فكرت أنسى الماضي .. يا Muna Khugali Author: إبراهيم عبد الحليم Date: 01-28-2013, 08:57 PM Parent: #48
بوست جميل اخ قبانى
صادف خلال أجازتى الاخيرة بالسودان ان التقيت بمناسبة وفاة اخ الشاعر مصطفى ودالمأمور رحمه الله الاستاذ الملحن المعروف حسن بابكر. احببت العم حسن بابكر جدا لالحانه العذبة واخلاصه الشديد للفن السودانى الذى احبه انا ايضا. والجميل ان حسن بابكر اراد ان يتونس مع شخصى الضعيف ويستمع لاغنيات منى فدعانى وآخرين الى شاى مغربية بمنزله بحى الزهور. احمد الله توفقت فى تلبية الدعوة ومعى الفنان غاندى السيد. المهم بعكس ما توقعت ان يسهب الاستاذ حسن بابكر فى ذكرياته مع محمد ميرغنى اسهب لدهشتى فى الحديث عن اسماعيل حسن وانه اى اسماعيل حسن هو من اكتشف محمد ميرغنى وعرف حسن بابكر به. وبل وحلف طلاق ان يلغى حسن بابكر لبحرى ويذهب معه لامدرمان ليستمع لمحمد ميرغنى.
Post: #52 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-29-2013, 06:25 AM Parent: #51
Quote: يحيي قباني إختيار صادف اهله فعلا اغنية رائعة وتشبه الملكة منى خوجلي لا اجد إي سبب يدعو لعدم إنتشار هذه الاغنية المكتملة الاركان كلمة لحن اداء
استاذنا الشفيف هشام خلف الله ...
كلماتك دايما تسعدنا ...
السودان فيهو مفارقات عجيبة ...
التلفزيون و الاذاعة ظلموا فنانين كتار و حرمونا من سماع اشياء بديعة كثيره ...
ابقي داخل يا فنان ....
Post: #53 Title: Re: قدر ما فكرت أنسى الماضي .. يا Muna Khugali Author: يحي قباني Date: 01-29-2013, 06:27 AM Parent: #52
Quote: بوست جميل اخ قبانى
مشتاقين يا دكتور ...
بالله زيد و فيض من الكلام السمح ده ...
Post: #54 Title: Re: قدر ما فكرت أنسى الماضي .. يا Muna Khugali Author: Muna Khugali Date: 01-31-2013, 02:02 PM Parent: #48
يحيي قباني إختيار صادف اهله فعلا اغنية رائعة وتشبه الملكة منى خوجلي لا اجد إي سبب يدعو لعدم إنتشار هذه الاغنية المكتملة الاركان كلمة لحن اداء ____________________________________
سلام يا هاشم.. دي من الأغنيات المابتقدم أصله.. أفتكر وعلي حسب ما فهمت من كلامه الأغنية موجودة من النصف الثاني من الستينات..
شكرا علي مشاركتك..
Post: #56 Title: Re: قدر ما فكرت أنسى الماضي .. يا Muna Khugali Author: Emad Ahmed Date: 02-05-2013, 07:53 PM Parent: #54
سلام أستاذ يحي قباني بوستاتك زانت البورد وأصبح بعضها ينافس بعضها لتميزها عوضتنا غياب د. أحمد طراوه ود. أحمد القرشي يديك العافية ومافي أحلى من كده ياباشمهندس.
مجموعة صور للفنان محمد ميرغني في مراحل عمره المختلفة وصورة للموسيقار حسن بابكر ملحن الأغنية وصورة للشاعر إسماعيل حسن عليه الرحمة والمغفرة شاعر الأغنية
غريب كلمات : إسماعيل حسن لحن : حسن بابكر غناء محمد ميرغني
قدر مافكرت أنسى أنسى .. الماضي وآلامو وويلو ألقى نفسي زي غريب تائه في ليلو نفسي أوقد شمعة في ليل الحيارى تبقى تهدي المتلي لو فارق دليلو *** ياحليل الزي سارح في خيالو كل زول نشوفه يبكي لحالو الدموع كملن قبيل من بدري سالو مافضل في الدنيا زولا ما اشتكالو *** ياحليل الفي الشروق شايف زوالو ديما مهموم .. ديما متحسر لحالو ياحليلو كنت داير لو تغير يوم نشوف اتنين أحبه زي عصافير هايمة طايرة سارحة في دنيا المحبة في الرياض تبني ضراها ياحبيبي حبه .. حبه وانت تابعت العوازل والمحب عايش في غربة لو كشفت المستحيل تعرفني تاني الشباب راح وانطوى ماقايلو .. فاني الهوى عذبني بناره وكواني كل شئ فات وانتهى قول لي مين .. حيعيدوا تاني
Post: #57 Title: Re: قدر ما فكرت أنسى الماضي .. يا Muna Khugali Author: Muna Khugali Date: 02-05-2013, 08:48 PM Parent: #56
يا سلام عليك يا عمده.. أضفت للبوست كتير بصور الأساتذة..
أرجو أن لا تبخل علينا بما عندك..
لك المودة والتقدير..
Post: #58 Title: Re: قدر ما فكرت أنسى الماضي .. يا Muna Khugali Author: Emad Ahmed Date: 02-07-2013, 11:56 PM Parent: #57
Quote: ياسلام عليك يا عمده.. أضفت للبوست كتير بصور الأساتذة..
أرجو أن لا تبخل علينا بما عندك..
لك المودة والتقدير..
حاضر ياملكة .. طلباتك أوامر.
Post: #59 Title: Re: قدر ما فكرت أنسى الماضي .. يا Muna Khugali Author: يحي قباني Date: 02-13-2013, 05:51 AM Parent: #58
لقاء فني مع الفنان محمد ميرغني عام 1983
مع فريد عبدالوهاب ...
تحياتي يا مني ... و كل الاخوة و الاخوات ...
بالله اسمعي كلام محمد ميرغني لما بيتكلم عن دور الموسيقي في المدارس ...
Post: #60 Title: Re: قدر ما فكرت أنسى الماضي .. يا Muna Khugali Author: Emad Ahmed Date: 02-17-2013, 09:24 PM Parent: #59
Post: #62 Title: Re: قدر ما فكرت أنسى الماضي .. يا Muna Khugali Author: Emad Ahmed Date: 03-01-2013, 09:35 PM Parent: #60
Post: #65 Title: Re: قدر ما فكرت أنسى الماضي .. يا Muna Khugali Author: Muna Khugali Date: 04-25-2013, 00:04 AM Parent: #62
