الأهمال الطبي في السودان- مستشفي البراحة نموذجآ (صور)

مؤسف ماحال اليه الحال فى بلادى اليوم
الادهي و الامر ان يصبح فلذات اكبادنا الضحية نتيجة للاهمال
بل الادهى والامر ان يكون الاهمال على ايدى من نعتقد انهم ساهرون على رعايتنا

مستشفى البراحة والموت براحة او ( ايزي )
ده قصصو طويلة جدا



وطن لايحترم فيه الانسان غير جدير بالاحترام

الخميس الموافق 31 يناير الساعة العاشرة والنصف صباحآ

توجهت زوجتى وشقيقى الأصغر بعد توجيهى لهم عبر الهاتف الى مستشفى البراحة الطبى لأجراء فحوصات معملية نسبة لمرض ابنى احمد والبالغ من العمر عامين وثمانية اشهر الذى عانى من الحمى لليلة كاملة وكلى امل فى ان يجد العناية الكاملة .. كل ذلك اثناء تواجدى مع طبيب آخر فى امدرمان نسبة لأصابتى بحصوة فى الحالب اسأل الله ان يعافي جميع القُراء منها.

تم اخذ عينات من الدم والفُسحة بأشراف تيم المعمل الطبى للمستشفى وتم توجه زوجتى وشقيقى برفقة ابنى الى المنزل الى حين استلام النتيجة لمقابلة الطبيب المُختص وابنى يتلوى من الالم فى صورة يفجع لها القلب.

تمت مقابلة الطبيب بعد استلام النتيجة وافاد بأنه مُصاب بدسنتاريا واميبا والتهاب فى الدم ولابد من ان يأخذ العلام السريع والذي يتكون معظمه من مضادات حيوية ومحاليل وريدية لسرعة الاستجابة واُودع غرفة الطوارئ .

اجتمعت بشقيقى وزوجتى وابنى المريض بعد فراغى من الطبيب الخاص بى عند الساعة الثالثة بالمستشفى اثناء اعطائه العلاج الذى انتهت جرعته عند الساعة الخامسة وعندها غادرنا المستشفى بعد افادتهم لنا بانه يتوجب علينا العودة عند الساعة الثانية صباحآ لأخذ الجرعة الثانية.

عدنا الى المنزل وكلى امل فى ان تتحسن حالة ابنى المريض الى كاد ان يبكينى وهو يتلوى من الألم.

بعد ادائى صلاة المغرب قمت بمحاولة تهدئة صغيرى عسى الله ان يفرج عنه ولكن باءت كل المحاولات بالفشل فلم يطمئن قلبى للحالة التى هى عليها.. وكان الجميع بمن فيهم انا اعتقد ان المغص بسبب المرض هو السبب فى ذلك ولكنى تنبهت بان يده اليسرى بدات بالتورم
فقمت بسؤال زوجتى عن السبب فأجابت بأنه تم اخذ عينة للدم فى المعمل من يده اليُسرى .

الهمنى الله ان اتحسس يده رغمآ عن صراخه لأُفاجأ بأنها مازالت مربوطة بشريط بلاستيكى عبارة عن لستكة قفازات طبية تُستخدم كوسيلة لأظهار الشرايين والاوردة عند اخذ العينات.

صراحة كدت ان ابكى مما رات عيناى من الم تحمله صغيرى واهمال كان من الممكن ان يتسبب فى فقدانه ليده جراء عدم انسياب الدم اليها طوالة الوقت من الساعة الحادية عشر صباحا وحتى السابعة والنصف مساء (8 ساعات ونصف).

الذى حالنى من العودة الى المستشفى مباشرة بعد ازالة الرباط فى ذلك الوقت هو استسلام ابنى للنوم الذى لم تراه جفنيه منذ ليلة كاملة والذى ساهم فيه الشخص الذى قام بربط يده بأداة لا اراها المناسبة لمثل هذا العمل ولاتليق بمستوى المستشفى ولا المهنية الطبية.

عدت الى المستشفى فى الموعد الثانى لاخذ الجرعة بصحبة ابنى واستفسرت عن المسؤول فى ذلك الوقت وتم توجيهى الى المدير الأدارى المناوب الذى استمع الى قصتى فى تمحُن كامل وقام برؤية ابنى وهو بغرفة الطوارئ ليتأكد بأُم عينه فى ذهول تام ووعدنى بأجراء اللازم والاتصال بى.

أخُط اليكم السطور اعلاه وابنى بالكاد يُحرك يده والحمد لله وانا أُفكر فى ما اذا اصبح اليوم الثانى على ابنى بعد عودته من المستشفى ولم اعرف سبب بكائه هل كان من المُمكن ان يستخدم يده مجددآ.

معليش يا أحمد ياولدى.... حقك على

قطعة البلاستيك التى تم بها ربط اليد لاستخراج عينة الدم

لا حول و لا قوة الا بالله.
يا محمد عوض لازم تشوف اخصائي اوعية دموية او بالعدم اخصائي جراحة للتأكد من وضع يد ابنك و الآن عاجلا و ليس بكرة او بعده
ما تنتظر حتى يحدث ما لا يحمد عقباه, اقل حاجة يعملوا صورة بالموجات الصوتية او ما يعرف بالدوبلر للأطمئنان على الوضع.
انت بنفسك حاول تحس النبض في معصم الولد و في مفصل الكوع من الامام و لاحظ اذا في تغير في اللون او لا.
يا جماعة دي مصيبة شنو دي.

صورة لليد وهى فى حالة تورم بعد ازالة الرباط

لا حول ولا قوة إلا بالله العلي العظيم
غلطة فادحة وكانت ممكن تؤدي لمصيبة أفدح واعظم
ما تخلي حقك وأرجوك انك تكتب شكوى رسمية وتقدمها للإدارة وتنتظر الرد.. ولازم يكون رد مكتوب
ما كلمتين يطيبو بيهم خاطرك.. ما ضاع حق وراءه مطالب

الاخ محمد عوض
احمد الله على سلامة يد ابنك
منع تدفق الدم لانسجة اليد لمدة ساعتين عن طريق الربط كافى لان يؤدى الى موت الانسجة
وتكون النتيجة الحتمية بتر اليد فما بالك فى تمانية ساعات
عموما حمدلله على سلامته و ارجو ان تتاكد بعرضه على اخصائى جراحة و كذذلك اخصائى مخ و اعصاب


و لله درك يا وطنى

قبل أكثر من ستة سنوات أرسلت أُسرتي للسودان وكان الهدف أن يمكثوا ثلاثة سنوات علي الأقل علي أمل أن يلتقط أبنائي وبنتي الوحيدة اللغة واللهجة السودانية مع الدين وجمال أهلنا
وكانت إبنتي صغيرة .... كما كانت تعاني من شئ يُمكن أن يشرحه الأطباء في المنبر ... وهو التشنج لدرجة أقرب للموت عندما تجتاحها (الحُمي) .. وقد قال لي طبيبها هنا بأن هذه الحالة
تصيب الكثيرين من الأطفال حتي عُمر خمسة سنوات .
ولسوء الحظ فقد إستأجر لهم شقيقي شقة بالقُرب من مُستشفي (البراحة) هذه .... ولسوء الحظ مرة أُخرى فقد إرتفعت حرارتها بعد منتصف أحد الليالي فإذا بشقيقي وزوجتي يسرعون
لإيصالها لأقرب مستشفي ... وكانت للأسف (البراحة) التي لم تكُن براحاً لإبنتي .... فإذا به يقول الموظف لشقيقي أن يدفع مبلغ (نصف مليون) جنيه حتي يراها الطبيب ...... لكم أن تتخيلوا !
فقال شقيقي .... ياخي قمنا من النوم منزعجين ... ولم نفكر في أى شئ غير إنقاذ الطفلة ... وحالياً لا أملك هذا المبلغ .... ولكن سأكون مسؤولاً عن أى مبلغ ستقررونه لاحقاً ... فقط أنقذوها الآن من الموت !


هل تصدقوا .............. لقد رفضوا إنقاذ طفلة لا يتعدى عُمرها أكثر من عامين من (الموت) المُحقق .......... مما إضطر شقيقي لأن يذهب بها لمُستشفي بحرى الحكومي
ليقوموا بإنزال درجة الحرارة بمواد أكثر من بدائية لا تُكلف أكثر من (خمسة قروش) ..... وبالتالي تم إنقاذ الطفلة ................. ونحمد الله أنها لا تزال علي قيد الحياة

وفي هذا البوست أشكر كل الذين واللائي ساعدوها في مستشفي بحرى الحكومي ... وهي الآن تتوجه لصفها الدراسي الرابع .............

براحة إيه !
وكلام فارغ إيه !

ومن هنا أيضاً أطالب الجميع بعدم التعامل مع هذه المُستشفي ........ إلا عند الضرورة القصوى ............ وليكُن ذلك عقاباً شعبياً لهم ... إن كانوا من الذين يشعرون ويحسون !



-----------------------------

وحبذا .... لو يرفع الباشمهندس بكرى هذا البوست عالياً ..... عملاً بمقولة أن الإعلام يُمثل السلطة الرابعة في أى دولة .
وأقسم بالله ثلاثاً .... يعني قسماً مغلظاً .... بأن ما حدث مع إبنتي التي لم يزيد عُمرها حينها أكثر (من عامين) ..... لم تهتم به هذه المستشفي ... وهي تعلم تمام العلم بأنها من المُمكن أن تموت بعد لحظات من وصولها إليهم .. إن لم يتم إنقاذها ..... ولم يفعلوا !



-

انا مستغربه كيف الام ما لاحظت الشريط المربوط طيلة الفترة دى كلها ؟؟؟؟

الظاهر الاهمال لايقع على المستشفى وحده ,,,,,

ماتخليهم اصلو !!!
الف حمداً للسلامة !!!

Quote: انا مستغربه كيف الام ما لاحظت الشريط المربوط طيلة الفترة دى كلها ؟؟؟؟ الظاهر الاهمال لايقع على المستشفى وحده ,,,,,

تحية طيبة يامنال وانشالله طيبة
حقيقة مداخلتك وقفت عندها وحاليآ بحاول بقدر الأمكان اتخير الكلام البكتب فيهو...
صراحة والشهادة لله انا من ما اتزوجت والحمد لله اطفالى 2 احمد واسيل ربنا يحفظهم ويحفظ جميع الأطفالمن كل سوء
ماحسيت بأى تقصير من اتجاه امهم تجاهى ولا تجاه اولادى وربنا يديها العافية ترعاهم لغاية ما يكبروا انشاء الله..
وشهادة لله هى مساهرة فوقو لمن طلعت الشمس ولغاية ما مشت المستشفى وجات راجعة عينا ما شافت النوم...

بديهيا لمن وصلت المستشفى انا وانت واى زول بمشى المستشفى لى علاج بفتكر انو هو فى المكان المناسب وبين ايدى امينة
وناس عارفين هم بيعملو فى شنو بالتالى ما بتدخل فى شغلهم مالم الاحظ حاجة مُلفتة للنظر...

السبب التانى بحكم انو عندنا برد اليومين ديل الولد امو ملبساهو فنيلة بردى ذات اكمام طويلة
تحسبآ مايصيبو التهاب ولا نزلة برد ويمكن دا سبب رئيسى فى انو لا هى ولا انا ولا واحد غيرنا فكر فى انو ممكن يكون الحاصل
من الأسباب الانا وضحتها فوق دى...

قلب الاُم يامنال عالم تانى واسع جدآ.. ربنا لمن ضرب مثل بى الرحمة حقتو
قال انا احن على العبد اكتر من الأم على ابنها وانتى انثى ويمكن تكونى ام مفروض تكونى عارفة الحاجة دى..

لو بتتخيلى امو لامت نفسها كيف لمن اكتشفت الموضوع دا مابتقولى كلامك دا
ولغاية اسى حاسة بالذنب وانا ذاتى حاسى بالذنب بسبب خطأ زول اختصاصى قرا علم أحسن منى ومنك ومن ام احمد.
ولو قلت ليك انا مشيت اعمل صورة ملونة عشان الحصوة ماخد فيها حقنتين بالوريد الواحدة فيهم قدر كوز الموية
وكنت متألام جدا ويدى واجعانى والله حنيت على ولدى اكتر من روحى . وقالوا تشوف مصايب الناس تهون عليك مصيبتك
وانا شفت مصايب الناس فى ولدى فلذة كبدى... فمقارنة بالعاناهو هو انا والله ماعانيت الحبة...

فيا منال ولدى لاطقتو كهربا ولا وقع فى بير سايفون ولا طقتو ركشة فى الشارع
اذا كان اخصائى المعمل اللى دا اختصاصو عمل كدا تفتكرى ام احمد ممكن تعمل شنو؟

اخيرآ يامنال كتر خيرك على سؤالك عن ولدى وهو طيب الحمد لله اسى واسأل ربنا يتم ليهو الشفا
ويدو بتتحرك لكن فى حدود ومازال بيتألم منها لكن بيطيب انشاء الله...
شفت معظم المداخلات فى البوست لكن الفرق بين مداخلتك وبين مداخلاتهم فرق السما من الأرض.
وبوصى ام احمد المرة الجاية اذا ماشة تفحص ليهو تشيل معاها حبل الغسيل تربطو ليهو
بالمرة لو مانست فكتو فى المستشفى تتذكر تفكو لمن تجى البيت تشُر فيهو الهدوم...

شكرآ يامنال...

. حمــدا للـــه لسلامتـــك وابنــــك لولا عنايــة الله ثــم يقظتــــك لحدثت ما لاتحمــد عقبــاه . اهمـــال وعــدم المـــام مهني في المعمل الطبي نســال الله العافيــة والسلامـــة لاحمـــد .

الف الف سلامة يا محمد لابننا وانشاء الله ما يشوف شر

ارجو الاهتمام بتوجيهات دكتور سيف وتنفيذها كما هي باسرع ما يمكن ...والشروع في اجراءات قضائية

ربنا يكتب السلامة لأحمد ويشفيه ويعافيه
آخر مرة كنت في اجازة بالأولاد في عيد الأضحى الماضي وبعد ما مرضو الولد والبت وعانيت ما عانيت مع الخدمات الصحية عندنا .. جيت من السودان مقرر ومتيقن تماماً إنهم ما حا يزوروه بعد كدة

حمد الله بالسلامة .


من المؤسف مازال كثير من السودانيين يخلط بين القضاء والقدر
والإخطاء الطبية الجسيمة والإهمال الذى يصل لمرحلة الجريمة .


يتهوب الكثرين من مسالة إثبات الأخطاء الطبية قضائيا
ويطن البعض عدم تعاون الأطباء فى ذلك .

مع العلم المسألة بقت واجب اخلاقى وإنسانى ليس فى مواجهة المخطيء والمقصر طبيا

بل إلى حماية مجتمع من عدم مبالاة فى أعز مايملك الإنسان

قلناها من قبل
عليكم بحوادث المستشفى الحكومى عند الطوارئ فهى افضل من فنادق المستوصفات الخاصة

الف حمدلله بسلامة الوليد وبسلامتك وربنا يتم عليكم نعمة الشفا الكامل ...حقك ماتخليهو اصلو ... هسه دى حالتين موكدات من البراحه دى
الله يستر على الناس ... ويغطيهم من جنس المستشفيات التجاريه دى ديل ناس همهم القروش وبس ...واحد عمل ليهو مستشفى وبقى يسترزق بارواح الناس
ناس مابتخاف الله فى خلقو ...
تسلم يارب ...

حمدالله علي سلامتك وسلامة الابن عليك بنقل الملف كله لوسائل الاعلام هذا المستشفيات تهاب الاعلام كثيرا.

الف حمدلله على السلامه

حمدالله سلامة وربنا لطف يامحمد

سبق وان علقت على هذا المستشفي في بوست فتحه الاخ عوض المسلمي
ويقع منزلنا جنوب هذا المستشفى مباشرا وكلما اكون في اجازة بالسودان
وعلى قلة ايام الاجازة اشاهد وانا داخل او خارج من المنزل اناس امام
بوابة المستشفى وهم يرفعون ايديهم لاعلى لقراءة الفاتحة (حالة موت)
ومصنف على انه من افضل المستشفيات ...فتأمل

ياخ حمدلا على سلامه الطفل و سلامتك انت

التعامل مع الاطفال يختلف عن المرضى الراشديين
على الاقل الراشد يمكنه ان يفصح عن اوجاعه


الله يحفظ الجميع من دقسات الدكاتره

حمد لله علي السلامة ..ولا اظن ان الشكوي واتخاذ اجراءات قانونيه مجدي مع ادارة هذه المستشفي

حمدالله علي سلامتك وسلامة الابن عليك بنقل الملف كله لوسائل الاعلام هذا المستشفيات تهاب الاعلام كثيرا.

يحدث في السودان (الطب اتطًور)


نهاية هذه القصة الحزينه ..براءة الطبيب ورفع دعوي تعويض من ادارة مستشفي البراحة علي اهل المرحوم والمطالبه بتعويض مالي 20 مليون جنيه سوداني

كتبت عضو المنبر منال

انا مستغربه كيف الام ما لاحظت الشريط المربوط طيلة الفترة دى كلها ؟؟؟؟

الظاهر الاهمال لايقع على المستشفى وحده ,,,,,


هل تريدين ان تحملي مسؤليه هذا الاهمال الشنيع لاسره الطفل

الف حمد لله على السلامة
وربنا ينجي اهل السودان من هذا الاهمال المستشري
ياريت يا محمد عوض لا تتنازل عن حقك مثقال ذرة.

مسألة قانونية للمتسبب
إقرار بالخطأ و إعتذار مكتوب من المستشفى
تعويض مادي ومعنوي لك ولاسرتك
لانو صراحة السودان دا ضاع بسبب
عدم المحاسبة دي
وفي ناس كتار تضرروا من جهات مختلفة
ولكن
و بسبب الطيبة / القهر/ عدم المقدرة / عدم المعرفة /الخوف
لم يستطيعوا المطالبة بحقوقهم
ارجوا ان تكون قدوة لهم و لنا
ربنا معاك وقلوبنا كذلك

مستشفى البراحة مستشفى زبااااله
افضل انو يتعمل كوشه يستفيد منها اهل الحي لأنو عندهم مشكله في الكوش
عندهم شرخ اداري واضح بالذات في الكادر الطبي
واضح انو اسياد الحق بيبخلو انهم يدفعو المال and#65271;كوادر الجيده

حمداً لله على ســلامة الولد وربنا يتمم شفاؤه ...

بالإضافة لنصائح زوار البوست الهامة بالشكوى ضد المشفى أو عرض إبنك على أخصائي
شرايين أو جراحة أو مخ وأعصاب ..
فإنني أجد أن أهم فائدة يمكن أن نستفيدها من البوست هي رأي د. عوض ..

Quote: قلناها من قبل عليكم بحوادث المستشفى الحكومى عند الطوارئ فهى افضل من فنادق المستوصفات الخاصة

فقد ذكره في بوست سابق وكرره هنا معضداً بالأسباب ... وهو رأي تصدقه كثير من الأحوال ...

فأمسكوا فيه قوي ....

هذا ما كتبه د. عوض في بوست آخر سابق ...
أنقله هنا لأهميته ....

Quote: بكل صراحة افضل مكان لعلاج الحالات الطارئة هو حوادث المستشفيات الحكومية زحمة.... نعم مليانة ناس شينين.... نعم لكنها الافضل: يوجد فى لحظة ملا يقل عن عشرات الاطباء المناوبين اقلهم نائب اخصائ بخبرة طيبة و كذا كوادر التمريض و الاشعة و المختبر: جاهزين ستاندباى لا بضربوا ليهم تلفون و لا برسلو ليهم عربية تجيبهم من بيتوهم بنك الدم فاتح 24 ساعة يوميا على مدار الاسبوع لا باجزو لعيد و غيرو الوضع فى معظم المشافى الخاصة مختلف تماما: يضيع وقت كثير فى الاستدعاءات القى لكم بسر: اول وصية و اخر وصية لاهلنا فى حال سفرنا الى خارج البلاد او العاصمة: فى حالة اى طوارئ اذهبوا للتو و اللحظة الى حوادث اقرب مستشفى حكومى!!!!!

الف حمد الله على السلامة

هل البلاستيكة دي هي المعمول بيها في حالة اخذ عينة ولا الزول الربطها دا قاطعها من راسو ؟

ألف حمدلله علي سلامة أحمد..
وبركة أطمئن قلبك وقلب أم أحمد عليه..
حقيقي ليس هناك اقسي من مرض الطفل ..لو في طريقة ممكن تشيل عنه المرض بدله كنت وأمه بتشيلوه..
لما العيال جوني إجازة في السودان..طول الوقت كنت خايفاهم يمرضوا..والخوف من المرض معناتها الخوف من العلاج..
والحمدلله لغاية ماسافروا ربنا ستر ورجعوا كويسين..

مساكين السودانيين..المستشفيات بقت واحدة من اسباب الموت زيها زي الأمراض..
ومرات يقتلوك بعد ما يشيلوا قروشك كلها!

الزملاء والزميلات المتداخلون فى البوست
عاجز عن شكركم لجل اهتمامكم وتقديركم وماتشوفوا شر انشاء الله
وربنا يحفظ اولادنا جميعآ من الأمراض والأخطاء الطبية الزى قصتنا دى
صراحة داير اعقب عل جميع المداخلات لكن معاناة دخول البورد فى السودان سبب
والكمبيوتر الوحيد القدرت ادخل بيهو مافيهو كيبورد عربي وصراحة شغال بي كيبورد الموقع
والمداخلة القبل دى اخدت منى وكت طويل بقدر ماحاولت اتفادى الكتابة...

لى عودة انشاء الله

الف حمدلله علي السلامه

الأخ محمد عوض
تحياتى
وسلامة ولدك

بصفتى طبيب (ونادرا ما أكتب هنا بصفة طبيب) عايز أطمنك بخصوص يد إبنك حسب المعطيات وحسب صورة يده الفوتوغرافية..

- ربط اليد يعمل لإيقاف الدم فى الأوردة وخصوصا السطحية بغرض إظهارها..
- الضغط فى الأوردة أقل بكثير عن الضغط فى الشرايين..
- ضغط الربطة بغرض العينة لايؤثر على الشرايين, أى لايقفل الشرايين..
- الخطورة دائما فى انسداد الشرايين ووقوف سريان الدم فيها..
- واضح من الزمن الذى ظلت اليد مربوطة ولون يد أحمد أن الشرايين لم تكن متأثرة وإلا لكنت رأيت سواد فى اليد مع الورم أو بدونه وفى خلال زمن وجيز جدا..
- الأوردة عندما يقف الدم فيها بسبب الربط يزيد الضغط فيها مما يجعل الماء وجزء من الأملاح تتسرب خارج الأوردة والشعيرات الى الأنسجة مما يسبب الورم..
- هذا الأمر (الورم) خطورته لاتذكر مقارنة بالغرغرينة التى تحدث بسبب انسداد الشرايين..

ولدك بخير ودائما أرفعوا يده المتورمة الى مستوى أعلى فى مستوى الصدر خصوصا عندما يكون واقفا ( يعنى يده لاتترك متدليه) وان شاء الله سوف يذهب الورم دون أى علاج آخر.

مافعلته المستشفى إهمال كبير ولو تركت حقك تكون ساهمت فى هذا الإهمال فلاتترك حقك, وطالب بتعويض مالى وانفقه كرامة لإبنك إن لم ترد أخذه وهو حلال عليك.

سلامتو الف سلامة
وربنا يكتب ليهو كامل الشفاء بإذن الله

ربنا كتب سلامة الولد يا محمد
تصدقو و ادعو الله انه يتم باقي الامور علي خير و ان شاء الله بكل خير الولد الان.

يا منال، من الضروري القاء اللوم علي الجاني بالاول المستشفي، و بعديها ممكن الواحد يتسائل ليه ناس البيت ما لاحظو للشريط. انا بالنسبة لي ممكن عادي جدا بتحصل في ظروف زي دي، لو الابن لابس جلابية ولا نايم ولا اي حاجة، لا تعلمي ظرف الناس و صدقيني الوالدين احن مني و منك عليه، ممكن يكون درس للمستقبل لنا كلنا، عشان القصص الغريبة الفي السودان دي، انا غايتو من هنا و لي قدام اول حاجة بشوفها الشريط ده كان الله لا قدر وداني مستشفي في السودان.

البراحة مشيت ليها في الفين و ثمانية، كنت حامل بابني ياسين و جينا من انجلترا زيارة، و داهمني الم عجيب في الجنبة الشمال من ورا، ماف اي الم في الرحم، و كنت تقريبا غايبة عن الوعي من شدة الالم و لكن بحاول اتابع لقلقي، اول ما دخلنا من باب المستشفي اذا بي اسمع قصة القروش دي، دفعو ناس البيت و ختوني في كرسي متحرك و للدكتورة المناوبة في الطواريء، عاينت لي كدددة و من غير ما تلمسني قالت لامي ربنا يعوضكم خير في الجنين، هههههههههههها
الوالدة زولة واعية جدا و مركزة و بتفكر بعقلها اولا، سكتت اول مرة، تاني كررتها لم شافت مافي رد فعل من امي، و من غير ما تقوم من مكانها و اتبعتها بمقولة ادعو الله انه يصبرها، تاني سمعت ليك امي بتقول ليها بنهرة، و نعم بالله في كل شيء، لكن انتي السالك من الجنين اسي منو؟ شوفي لي بتي التعبانة، دي الاهم من الجنين كان انتي واعية، الطبيبة زعلت ههههها
صادف انه زميلتي بالدراسة كانت طبيبة مداومة بالمستشفي و ما عارفاها للان عرفتني هناك كيف، جات و انقذت الموقف
ربنا يحفظة ياسين الان في المدرسة.
و الله ناس البلد ليهم الله، الواحد قلبه في ايده و هو بيزورهم، خليك منهم هم ناس الوجع الجد في بلدنا الفيها الناس هاملين ديل.

يا منال، من الضروري القاء اللوم علي الجاني بالاول المستشفي، و بعديها ممكن الواحد يتسائل ليه ناس البيت ما لاحظو للشريط. انا بالنسبة لي ممكن عادي جدا بتحصل في ظروف زي دي، لو الابن لابس جلابية ولا نايم ولا اي حاجة، لا تعلمي ظرف الناس و صدقيني الوالدين احن مني و منك عليه،

****************************************

رحاب صباحك خير

طبعا يارحاب اللوم على الجانى اولا دى مافيها نقاش

لكن عشان انا برضو ام استغربت كيف الام مالاحظت البلاستيكه دى ولو لاحظتى فى الصورة حجمها كبير
بعدين حسب ماقال الاب الفترة كانت 8 ساعات ,,,, معقول طيلة ال8 ساعات دى مالاحظت
والطفل عمرو سنتين وكان ببكى وبتألم يعنى 8 ساعات انا لاشلتو لا وديتو الحمام ولا غيرت ليهو معقول بس


ياخ لو ابره فى جسمو كان لاحظتها مابالك بلاستيكه بالحجم الكبير ده ,,,,

Quote: فإذا به يقول الموظف لشقيقي أن يدفع مبلغ (نصف مليون) جنيه حتي يراها الطبيب

تصويب لابد منه :

قالت زوجتي بعد أن إطلعت علي البوست وبالتالي مُداخلتي السابقة .......
أن الذى طلب مبلغ ال (نصف مليون) قبل أن يرى إبنتي الطبيب المُختص ..... كان (طبيباً) ....... وليس مُوظفاً ... كما ذكرت في مُداخلتي السابقة !


* هذا مع أُمنياتي لإبننا الذى تعرض لهذا الخطأ الفادح بالصحة ودوام العافية .........



-------------------

شكر أكيد للباشمهندس بكرى أبوبكر ...... لرفعه للبوست عالياً
ونتمني أن يتركه لفترة حتي يطلع عليه أكبر عدد من القُراء والقارئات.

حمدلله على السلامة وربنا يتم العافيّة ان شاء الله
وينبغي محاسبة المستشفى والشروع في فتح بلاغات جنائية ضده

حمدا لله على سلامة الولد, ربنا يواليهو بالعافية و يحفظو من كل شر.

لابد من محاسبة جادة و قاسية لهذا النوع من الاهمال و اللا مبالاة

الف حمد لله على السلامة

ألف لا بأس علي احمد
وربنا يشفيه

ما بعرف على أي اساس يقاس أداء المستشفيات الخاصة
ومن وين بجيبوا الدكاترة ديل

زمان قالو دكاترنا شاطرين بس الأمكانيات
هسه المستشفيات الخاصة بتوفر كل الأمكانيات المطلوبة
طيب المشكلة وين ؟؟

الله يستر على ناس السودان

منال يامنال

ياخ ذبحتينا

حمدلله على السلامة
هذا يشجعني شخصيا في المضي قدما في رسالة الدكتوراة التي اعكف في إعدادها عن الخطأ الطبي والتعويض عنه نظرا لتزايد حالات الإهمال والتي لا تعرض أمام المحاكم بسبب القبول الإجتماعي لها تحت عذر القضاء والقدر ، نعم كلنا ي}من بالقضاء والقدر خيره وشره ولكن من أجل حقوق الناس وترقية الخدمة ومحاسبة الخاطئين يجب أن تعرض هذه الحالات للقضاء الجنائي والمدني بل لابد من إيجاد قضاء ونيابة متخصصة في هذا المجال الحقوقي .
ويجب أن تضطلع الدولة بدورها في المساءلة عبر الجهات المختصة وزارة الصحة والمجلس الطبي السوداني فقد دفع ويدفع الناس حياتهم بسبب تلك الأخطاء والتي لا عذر فيها كحالة هذا الإبن والتي تمثل إخلالا واضحا بأوجب واجبات الرعاية الصحية ولكن قد اسمعت حيا
اللهم الطف بنا فأنت وحدك المتكفل بنا

منال يامنال

ياخ ذبحتينا

***********************

انا بشوف من غير ما تلون بالاحمر ^__^
لكن ذبحتينا دى معناها شنو ؟؟

حمداً لله علي السلامة ، لا بأس عليكم
طمئنا علي الولد

طبنجة !
مالكم إنتو الأيام دى ؟
دخلت فيكم عين حاااارة !
بخر البيت والأولاد وإنت زاتك إتكمد معاهم !
تحياتى لك ولأم أحمد ولى أحمد وسلامتو وشمبات كلها كرامتو

حمدا لله على سلامة ابنك..اهمال شنيع.

Quote: حمدالله علي سلامتك وسلامة الابن عليك بنقل الملف كله لوسائل الاعلام هذا المستشفيات تهاب الاعلام كثيرا.

و الصحف تتجنب النشرخوفا على سوق الاعلانات!!

كفارة يا محمد و الف سلامة لي أبنك وليك
قصة آلمتني كثيراًَ مع اني بتوقع اي شيء لعلمي بحال الطب و العلاج بالسودان
زي ما قالوا ليك الاخوة الفوق...لازم تسك الموضوع و ما تخلي حقك..امشي للصحف بالخرطوم وانشر قصتك..يجب فضح ممارسات هذا المستشفى على اوسع نطاق...
...
منال
نقدك للأسرة والام تحديداً مافي محلو و يشتت التركيز من الضغط الاعلامي على المستشفى المذكور
يكفي الام و الاسرة مصائبهم فلا تحمليهم فوق طاقتهم

حمد الله على سلامتك وسلامة ولدك يامحمد

الف حمد الله على السلامه ...اتمنى من الله ان يعوض المه بعافيه لاتبرححه

ــــــــــــــــ
العالم دى ما تخليها ..لو تمسك الدكتور او الدكتوره وتربط ليهم يديهم بنفس الشريط
لنفس المده...العين بالعين والسن بالسن

الحاصل شنو اليومين ديل
سلامتو أحمد و سلامتكـ يا طبنجة ياخ
عليكـ بالصدقة و الإستغفار.

الف سلامة يا محمد
ربنا يوالي ابنك بالعافية ويجعله كفّارة و طهور له

الاخ محمد عوض
والله تالمنا كثيرا لهذا الحدث الفادح والغير مسؤول من جهة المستشفى.

ضعف الرقابة والمتابعة من الجهات المرخصة .
جشع اصحاب المؤسسات الخاصة وجلبهم للمال باي وسيلة .

الف سلامة لولدنا احمد وربنا يتمم الشفاء ويطمنكم عليه
فعلا الاخطاء الطبية بقت كتيرة ومتكررة بشكل مخيف
وربنا يصلح الحال

الف حمد لله على السلامة
الوالده ربنا يعطيها الصحة والعافيه
جبناها المستشفي عتدها كسربالرجل
وأجريت لها عمليه
وأتضح أن العملية خطأ
وأجريت لها عملية أخري
وتطور الامر
من كسر الي بترالرجل
الله يجازي الكان السبب
حضرت حلقة في التلفزيون عن الاخطاء الطبيه
وكان هنالك أشخاص لهم شكاوي
واضحه لكن بكل أسف
تحايل علي القوانين
لمن تكره نفسك

حسبنا الله ونعم الوكيل

وحمدا لله على سلامة ولدك ...

الف سلامة للبطل الجميل ده وربنا يحفظو ويخليه ان شاء الله
مسلسل الاخطاء الطبية في السودان يستمر .... بلا توقف ... والسبب ضعف التأهيل ثم الاستخفاف والتهاون والاستهتار ( والاستهتار دي بالذات عندي قصص معاها ) ثم قصور التشريعات وعدم مواكبتها لما يحدث من اخطأ طبية فظيعة في مستشفياتنا الخاصة والعامة ، في السعودية مثلاً توجد محكمة متخصصة في نظر الاخطأ الطبية تسمى ( اللجنة الطبية الشرعية) يرأسها قاضي محكمة عامة من وزارة العدل واعضائها أطباء من وزارة الصحة ، المهم .. ان هذه المحكمة تفصل في الاخطاء الطبية المهنية وتنظر الحق الخاص والعام ، وفي حالة تنازل المصاب او اولياء الدم عن حقهم في مقاضاة الطبيب او المستشفى كما يحدث عادة عندنا في السودان من باب (القضاء والقدر ،، ومستقبل الزول ما تضيعوهو) ، ولو تنازل اصحاب الحق لا تنتهي القضية بذلك التنازل بل تستمر المحكمة في نظر الدعوى في الحق العام ،، أي حق المجتمع الذي لا يسقط لا بتنازل ولا بغيره ، وتصدر احكام رادعة جداً في مواجهة المهملين والمقصرين من الكوادر الطبية تصل الى حد الشطب من السجل والسجن والغرامة بالاضافة الى التعويض . وتنظر المحكمة من تلقاء نفسها في اي خطأ طبي مهني لو كانت نتيجته الوفاة او تلف اي عضو من اعضاء الجسم ولو لم يشتكي المصاب او اولياء الدم .
----
ارى ان الجميع قد انتقدوا منال بقسوة ، ربما لان الخط العام للبوست موجه فقط لادانة المستشفى ، نعم المستشفى وفني التحاليل الطبية مدانين بلا ادني شك ، ولكن رأي منال ايضاً لا يخلو من وجاهة فكيف لم تلاحظ العائلة الشريط البلاسيكي على يد الطفل لاكثر من ثمان ساعات ،، ربما بسبب الشفقة والانزعاج والحمد لله الجات لحدي هنا .
---
قبل اسبوع اصيب طفلي (ثلاث سنوات) بكسر في اسفل عظمة العضد عند الساعة الحادية عشر ليلاً اخذته على عجل الى طواريء مستشفى قريب من المنزل ، وجدنا في استقبالنا طبيب الطواريء وكان اخصائي عظام عملنا صورة اشعة ثم قام باعادة العظم المكسور الى مكانه وقام بتجبير اليد ، وامرنا بعمل صورة اشعة اخرى بعد الجبس كي يتأكد من ان العظم رجع الى مكانه ، ثم شدد علينا بأن نعود بالطفل صباح اليوم التالي لمقابلة الاستشاري بنفس قيمة الكشف الحالي للتأكد من سلامة الاجراء الذي قام به ، وكرر لي ذلك اكثر من مرة وقال لي بانه قد اخلى مسئوليته بذلك ، وبالفعل عدنا في اليوم التالي وقابلنا الاستشاري وكان كل شيء على ما يرام ، على كل .. ما اردت قوله هو الاهتمام الظاهر الذي لمسته .. فكل معالجة تمت في حالة طفلي قام بها الاخصائي بنفسه رغم الازدحام الكبير على المستشفى فلم يحولنا على نائب اخصائي او طبيب عام أو ممرض ( كما يحدث عندنا عادة لان الاخصائي اكبر من أن يقوم بهذه الاشياء البسيطة بنفسه) ، والاكثر من ذلك اصراره على مراجعة الاستشاري .... ولعل السبب في ذلك انه يعلم يقيناً انني سوف ( أنعل خاشه) اذا اخطأ في علاج طفلي ، وإن لم افعل انا ... فالدولة سوف تتولى ذلك .
تحياتي ،،،

الف حمدلله علي سلامتك وسلامة ابنك وجعلها الله في ميزانات حسناتك

الاخ محمد عوض الحمد لله علي سلامة ابنك

Quote: - ربط اليد يعمل لإيقاف الدم فى الأوردة وخصوصا السطحية بغرض إظهارها.. - الضغط فى الأوردة أقل بكثير عن الضغط فى الشرايين.. - ضغط الربطة بغرض العينة لايؤثر على الشرايين, أى لايقفل الشرايين.. - الخطورة دائما فى انسداد الشرايين ووقوف سريان الدم فيها.. - واضح من الزمن الذى ظلت اليد مربوطة ولون يد أحمد أن الشرايين لم تكن متأثرة وإلا لكنت رأيت سواد فى اليد مع الورم أو بدونه وفى خلال زمن وجيز جدا.. - الأوردة عندما يقف الدم فيها بسبب الربط يزيد الضغط فيها مما يجعل الماء وجزء من الأملاح تتسرب خارج الأوردة والشعيرات الى الأنسجة مما يسبب الورم.. - هذا الأمر (الورم) خطورته لاتذكر مقارنة بالغرغرينة التى تحدث بسبب انسداد الشرايين.. ولدك بخير ودائما أرفعوا يده المتورمة الى مستوى أعلى فى مستوى الصدر خصوصا عندما يكون واقفا ( يعنى يده لاتترك متدليه) وان شاء الله سوف يذهب الورم دون أى علاج آخر.

اتفق مع ما جاء في مداخلة د بلة اعلاه فقط اضيف ان توقف سريان الدم في الاوردة لساعات قد يؤدي الي تكوين جلطات دموية
قد تنتقل من اليد الي القلب ثم الرئتين و لهذا انصح بعمل Doppler كما قال الدكتور سيف و triplex للتاكد اكثر
و ايضا اعطائه جرعات من دواء يساعد علي زيادة سيولة الدم تحوطا بعد استشارة الطبيب المعالج

رقم هاتفي موجود في البروفايل اذا احتجت لاي استشارة

الاخ محمد عوض حمداً لله على سلامه ولدكم احمد وربنا يديه الصحه والعافيه ويحفظوا ليكم
الاخطاء الطبيه اصبحت تتكرر بصوره كبيره وللاسف الكثير من الاطباء يلقون باللائمه على ضعف المرتبات وعدم توفير المعينات دون بذل اقل جهد بالاضافه لضعف التأهيل ...!

الف حمدلله علي السلامه

الف حمدا لله على السلامة يازوول

الهم يا شافي اشفي احمد و قومو بالسلامة ... و معليش يا ايو حميد شدة و تزول انشأ الله

اما بخصوص ما تسمس بمستشفي البراحة ... ما علينا الا ان نقول حسب الله و نعم الوكيل ,,, لانو مافي زول تشتكي ليهو غير الله ,, و الله الواحد بقي كل يوم بصبح بكرة ام الحكومة دي

Quote: ارى ان الجميع قد انتقدوا منال بقسوة Abdelmagid

ما تعمم يا عبد الماجد.

حمد الله علي السلامة يا محمد و إن شاء الله يد أحمد تكون سليمة
لكن لا تأمل في محاسبة مستشفي خاص طالما وزير الصحة نفسه يملكـ عدداً من المستشفيات الخاصة في تضارب مصالح أوضح ما يكون

الف حمد الله علي سلامة الولد .. وربنا يتمم شفاهو يا رب ..

بعد ما تطمن علي الولد طوالي ارفع قضية .. أصلو ما تخليهم .

ألف سلآمة ليك وللوِليد يا محمد.

حسبنا الله ونِعّمَ الوكيل...

كنت في زيارة للاهل بعد سنين طوال قضيتها في بلاد العم سام .... في اليوم الرابع من الزيارة لما فيني وجع بطن واسهال عجييييب ... نصحني اهل بيتي بمعاودة طبيب باطنية
وكان ردي ليهم واااااضح جدا .... عندكم دوا بلدي ادوني ليهو عالجني عالجني ما عالجني ولااااااا بلعب في رويحتي دي حا اضطر اقطع اجازتي وارجع محل ما جيت ... ربك
رب الخير لطف اديناها شوية حلبة وزبادي وقصص زي ومشى الحال ... لكن اصلا ما كنت حا اتردد في اني اقطع اجازتي واعود ادراجي حيث اتيت لانو براحة كان ممكن نتيجة
الفحص تطلع ازمة وللا كسر في المخروقة وللا اي شي ما عندو علاقة بالبطن اصلا.

دي قصة
القصة التانية يا اااا عزيزي ( المشاهد ) عندنا جارة لينا هنا في بلد عمكم سام دي , ابوها السكري تعبو شديييييييد في السودان فقررت تجيبو امريكا تشوف ليهو علاج من الموضوع دا
وبالفعل جا عمنا راااااااجل كبير رأيته في اول يوم لزيارته وكان يبدو عليه الاعياء والمرض ... عمنا ربنا يديه طول العمر والصحة اخدوهو لمستشفي كبيييييييييير جدا واجريت له
الفحوصات اللازمة وكانت النتيجة ان عمنا ما عندو سكري ولا يحزنون ..... واهلنا الطيبين في السودان هناك يشيييييلو ويدو فيهو في علاج السكري .... السكري المسكييييين دا الااااااي
زول ممكن بابسط تحليل للدم يمكن يعرفو..... فتامل يا عزيزي المشاهد .


اهلنا غايتو ليهم الله

حمدا وسلاما على الجات الى حد كدا
للاسف الكل يسعى وراء الكسب والربح دون مراعاة لأداء الواجب مقابل هذا الكسب
الامر وصل للاستثمار فى القطاع الصحى وهو امر محمود ويجب ان يطور من الخدمات العلاجية ، ولكن للاسف لم يحدث بالرغم من استعدادنا لسداد التكاليف الباهظة .
صدقونى ما زالت المستشفيات الحكومية هى الافضل اذا ما قورنت بالخاصة من حيث الرعاية الطبية.
نحن ينقصنا الكادر الطبى المدرب خاصة التمريض وناس المعامل.

انا اسكن جوار مدينة البراحة الطبية
تعاملت معها كثيرا
فضلت مؤخرا الذهاب الى مركز الهودج ( العون البريطانى)
رخيص ويؤدى نفس الغرض

الغرض المقصود ( الحصول على مؤشرات اولية لنوع المرض)

نقوم بالاستعانة بالصيادلة للحصول على انسب علاج

نستجلب القرض والكركدى وبذر خلى والثوم والعسل وووووالخ
من اجل الاستخدام المضاد للامراض.

نسأل الله الشفاء للجميع
والسلامة للجميع

لا حولة ولا قوة الا بالله

ما هذا البلاء !!!!

معقول بث هذا الهراء

يعنى لا انت لا اموا انتبهتوا لهذه الربطة

المصيبة فى السودان مش الاطباء الغير مؤهليين المصيبة الكبرى فى الممرضات كمان

المهم

الف حمد لله على السلامة
يجب عرض ابنك على طبيب اخصائي اوعية دموية

باسرع فرصة

ربنا يكتب الشفاء

الف حمدلله علي السلامه



قبل سنتين عندي بت عمره 3سنه تاكل اي شي ولاتشرب استفراق واسهال شديد النخره سايله طول الوقت الجماعه في البيت نصحوني بي طبيب اطفال في الخرطوم3

بعد الفحص وشيل دم ادانا العلاج قال تشرب سفن اب ماقتنعت بي كلمو ومشيت مستوصف خاص تاني قالو دايرين فحص بعد الفحص الدكتور قرر عمليه استاصل الوزات

عشان ملتهبه وقلبي ماكلني قلت مابعمل العمليه وشايف البت بتتعذب جنبي في االنهايه عملت العمليه وتم استاصل الوزتين بعد العمليه رقدت 10 ايام في الموستوصف لم يتغير شي

بعدها رجعت فرنسا واول طبيب بعد 10دقايق قال لي البنت عنده حساسيه من الحليب ومشتقات الحليب .

بعد وقفنا من الحليب البنت رجعت ميه ميه ولان عمره 5سنه الحمد الله

تحية طيبة لجميع المتداخلين والقُراء
ومانعدمكم يارب ولا تشوفوا شر وآسف للأنقطاع
يادوب انتهينا من جرعات العلاج يوم امس والحمد لله الود بخير لكن مازالت اليد تحمل آثار الرباط
ومازالت الحركة فى حدود لكن الحمد لله ماشى كويس...

تلقيت اتصال من ادارة المستشفى وتم استدعائى انا وزوجتى لسرد القصة من جديد
والتعرف على فنى المعمل الذى قام بربط اليد وتم التعرف عليه ووعدونى بأجراء اللازم وتم عرضه
على طبيب اطفال من ذات المستشفى ليطمئننا على وضع اليد وأهو قال كويسة والموضوع بسيط... (وجهة نظر برضو)

صراحة توقعت منذ اليوم الأول ومنذ اخطارى لأدارة المستشفى بالموضوع ان تقوم
الأدارة على الأقل بأحضار طبيب مُختص للكشف على اليد لمجرد الأطمئنان عليها نسبة لحساسية الموقف
والعكس ان كل ذلك قد حدث صباح الأحد وذلك عندما تم الأتصال بأدارة المستشفى من قبل المدير العام المتواجد خارج البلاد
والذى على ما اعتقد انه اما رأى او سمع عن الموضوع من خلال البوست الذى أدى ومازال يؤدى غرضه...
ومشكور الحبيب بكرى على العناية بوضع البوست فى الأعلى وادراجه تحت اولويات الموقع...

الذى دفعنى لكتابة البوست العدد المحسوب من الأخطاء التى طالما تحملنا اوزارها طوال السنين الماضية منذ ان كنا صغارآ
كنت ارى الكم الهائل من الحسرة والألم فى اعين والدى رحمة الله عليه كلما تذكر والدته التى لاقت حتفها بسبب حقنة خاطئة كان من المُفترض
ان تُعطى الى المريض المجاور لها فى العنبر.. وذلك عند غياب والدى لأحضار العربة لأخذها للمنزل بعد بلوغها العافية وعند عودته كانت قد فارقت الحياة..

وكنت أُحس بنفس الكم الهائل من الألم والحسرة عند فقدانى لأختى ذات السبعة أعوام بسبب جُرعة زائدة من العلاج
والذى لم يكُن متوفرآ بالبلاد وتحصلنا عليه من المانيا بفضل المولى عز وجل ليُخطئ الطبيب فى جُرعة العلاج لتُلاقى الصغيرة حتفها كجدتها..

واختبرت نفس الاسى والألم عند فقدان والدى العام الماضى بسبب العلاج الذى كان من المُفترض ان يُجرى معه غسيل كلوى
نسبة لقوة العلاج والذى علمنا فيما بعد بانه لم يتم بالطريقة الصحيحة مما ادى لفقدانى والدى

وكدت ان اختبر فوق كل ذلك ولدى العزيز
القضاء والقدر يندرج تحت ايمانى كمُسلم ولكن الأسباب واضحة ولابد من حسااااااااااااااب
ويكفينى ماعانيت ...وما أكتبه الآن لكى لا يعانى غيرى المثل فى المستقبل اذا كان من أُذن صاغية او عين ترى او قلب مازال ينبض بالحياة

مازلت فى انتظار ادارة المستشفى والذى توقعت منه اقلاها اعتذار مكتوب اذا تبقى شيئ من الكرامة

حمداَ لله على السلامة
الاداة غير مناسبة وخطيرة وخطورتها في لو تركت يوم كامل أو أكثر
وعليك الآن أن تمسك بساعد ابنك(العضو الذي حبس عنه الدم) فتقبض وتطلق كأنك تمسك بمنفاخ
فترة من الزمن فتساعد هذه الطريقة لجلب الدم من العضد لاسفل اليد
وعليك عمل هذه العملية برفق فترة بين ربع إلى نصف الساعة.
وهذه العملية مجربة ويمكن أن يقوم بها الانسان فيما هو أخطر من ذلك
في حالات يبتر لاجلها العضو فالعضو الميت الذي لم يصله الدم يمكن ممارسة هذه العملية
وهي قبض الجزء المتضرر واطلاقه بطريقة متكررة حتى يدخل الدم من الجزء السليم إلى المتضرر
ولتأدي العملية مفعولها تكون بلطف دون ضغط زائد .
كما ذكرت الأداة غير مناسبة وهناك شريط كالذي يستخدم في قياس ضغط الدم يربطه الفحيص
ويفكه ونسيانه مربوط مسئولية المستشفى وأهمال منهم فلو كانت الأداة مناسبة لما حدث ما حدث
لكنها الجربندية والاهمال .

ما تخليهم يآعزيزي محمد عوض
اشتكيهم
ده اهمال
كل الامور بيأخذوها بالعفوية
حتي ولو راحه ضحيتها انسان

الف سلامة لولدنا احمد وربنا يتمم الشفاء ويطمنكم عليه
فعلا الاخطاء الطبية بقت كتيرة ومتكررة بشكل كبير في المستشفيات الخاصة
ربنا قدر ولطف يا محمد لازم ترفع دعوة قضائية عليهم وتواصل فضحههم بكل
الوسائل الاعلامية
قبل فترة تعرضت بنت صديق لنا هنا لحادث وذهبوا بها لمستشفيين هناك واحدهما الذيتونة
وحدث ولا حرج الراجل تصرف سريعا وأخذ بنته إلي هنا بالمملكة والحمدلله الآن احسن بكتير
ولوفضلت بالسودان لكانت فقدت روحها والآن يملك تقرير طبي مفصل بالحالة من هنا ويمكن
ان يفرد قصته بعد استقرار الحالة الصحية لأبنته الدكتورة والتي كانت ضحية لطيش شاب من افراد
الأمن تسبب بموتر في الحادث وربنا يحفظ أبناء البلد من هولاء المستهترين بالارواح.

،،،،أبوقصي،،،،