رئيس ومسؤول وحال بلد : قالوا للبغل مين ابوك قال الفرس خالى

رئيس ومسؤول وحال بلد : قالوا للبغل مين ابوك قال الفرس خالى


03-30-2013, 01:30 PM


  » http://sudaneseonline.com/cgi-bin/sdb/2bb.cgi?seq=msg&board=420&msg=1364646652&rn=5


Post: #1
Title: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:30 PM
Parent: #0

303332_10200837071952620_1742625214_n.jpg Hosting at Sudaneseonline.com

Post: #2
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:33 PM
Parent: #1

Quote: نعلم زهدكم فى الحكم


دا على اساس انو الرئيس المجاهد يحكمنا منذ يومين فقط وليس 25 عاما بالتمام والكمال ولد خلالها جيل وتزوج هذا الجيل وخلف وعيالهم دخلوا المدارس .. ومات من مات وهو ينتظر على رصيف العمر جديدا يشفى غليل عينيه قبل الممات ..
ينعل ام الزهد يا شيخ
وبما انى رجل زاهد ارجو من هذا الب... ان يتكرم باعلان اخر يرشحنى فيه لرئاسة بنك السودان عشرين سنة بس .. ما عايز اكتر من كدا فانا رجل زاهد بطبعى

انتو البنقو دا اشتغل فى مكاتب الدولة كمان

Post: #3
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:45 PM
Parent: #2

Quote: اننا نبعث لسيادتكم بهذه المناشدة ونثق كل الثقة فى ان وجودكم فى قيادة هذا الوطن هو صمام امان للوحدة والامن وحفاظ على مكتسبات هذا الوطن ومقدراتها

دا طبعا على اساس ان دولة الجنوب انفصلت فى عهد نيازى باشا وليس فى حضرة الرئيس المجاهد ودا على اساس ان الامن متوفر والحمد لله وما يحدث فى دارفور وكردفان والنيل الازرق مجرد تسلية يقوم بتمثيلها البعض للترويح على الشعب هناك لانهم دخلوا بحبوحة من العيش ويشعرون بالملل من رتابة الحياة والراحة
مكتسبات ومقدرات الوطن البيحافظ عليها الرئيس المجاهد دى ما عرفت شن جنسها
لكن من خلال هذا الاعلان انصح الشعب السودانى بالمخدرات
يبدو ان للمخدرات فائدة عظيمة لم نكن نعرفها
على الاقل تنسيك ان الجنوب كان جزءا من الوطن وانفصل فى عهد الرئيس المجاهد دا طبعا قبل ما تنسى حبوبتك اسمها مين

Post: #4
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:46 PM
Parent: #3

Quote: باسم جماهير ولاية النيل الابيض الذين كثيرا ما امتدحت اهلها ومجاهداتهم عبر التاريخ


لا دى ملعوبة دى ..
دى تمريرة مقشرة تخلى هيثم مصطفى شخشيا يقيف محتار
طبعا عندما تجد جملة (باسم جماهير الولاية ) نعلم ان الرجل لم يحوم الولاية حارة حارة وشارع شارع وزنقة زنقة ليتحدث باسمهم جميعا بدون فرز هذا بافتراض ان الولاية كلها ماشاء الله كيزان وبيحبوا الرئيس موت .. لك ان تعلم فقط ان اعلان مدفوع القيمة فى صحيفة يومية وبهذا الحجم لا يقل ثمنه عن 300 او 250 الف جنيه وطبعا عندما يكون الاعلان من جماهير الولاية كلها يفرق عن اعلان باسم هذا الرجل .. حينها يخرج الثمن من ام الخزينة بتاعت الولاية الفلسانة اصلا
لا ملعوبة فعلا

Post: #5
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:48 PM
Parent: #4

Quote: وباسم اهلك الغبش الذين اعدت اليهم البسمة واضات فى وجدانهم شموع الامل بالانجازات الكبيرة التى تحققت على يديكم


لا لا .. دا مش حير هيثم مصطفى دا فات ميسى بغادى
كونه يلعب تمريرة كما فى المثال السابق دا عادى ممكن يعملها هيثم مصطفى لكن تلعب تمريرة زى ديك وكمان لنفسك وتلحق تجيب قون دى ما علمها ميسى ولا حتى طيب الذكر مارادونا ..
طبعا يا سيادة الرئيس انا رئيس المجلس التشريعى للولاية والغبش ديل اهلك واهلى وانا واحد منهم والغبش ديل عايزنك تبقى رئيس تانى وانا عايزك تبقى رئيس تانى وطبعا الغبش ديل لما انت تبقى رئيس تانى انا كمان حيخلونى رئيس مجلس تشريعى تاااااااااانى ..
ينعل ام القون يا شيخ

Post: #6
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:50 PM

Quote: وباسم المجلس التشريعى المعبر عن ارادة الجماهير وامالها وتطلعاتها


فرمالة بت ستين ######
دا طلع مدافع خطير كمان يخلى الايطاليين يخجلوا من دفاعهم ..
يعنى الراجل اتحدث باسم كل الجماهير واتحدث خصيصا باسم الغبش كووووووووولهم (كلهم) وما اكتفى بكدة زاد عليها كمان الجماهير(المُُعبّّر عنها ) عشان مافى واحد يزوغ من الاجماع دا ويجى يقول لينا ان ما من الغبش وما وكلتكم تتكلموا باسمى ولة يطلع ليك معارض فى الولاية المسبحة بحمد الرئيس وينط من الاجماع .. ولا كمان ايه قال ليك المجلس التشريعى دا يعبر عن ارادة وامال وتطلعات الولاية كوووووووووولها مش بس رأى وتعبير دا حتى الامل ما بتاعك ولا التطلعات الفى المستقبل حقتك انت , دى من اختصاصات المجلس التشريعى هو يعبر عنك وهو يامل بدلك وكمان هو يشوف تطلعاتك فى المستقبل شنو ....
نسى هذا الرجل ان يختم على اعلانه بالاية (ان هو الا وحى يوحى )

Post: #7
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:52 PM
Parent: #6

Quote: نجزم انك قد عبرت بالسودان الى بر الامان


فى الجزئية دى صدقت يا سيدى
بما انو الدنيا دى بقت ما معروفة كيف كيف لا الغنى فيها سعيد ولا الفقير مرتاح وبما انو الدنيا دى جارية وكل يوم بجديد وعشان نلحقها نفسنا قايمة وروحنا متشحتفة وما قادرين نحصل ..بقى مافى امان يحلنا منها غير الموت .. ونشهد الله ان البشير لم يقصد سوءا من الحروبات المنتشرة فى السودان والمجازر التى تحدث والارواح التى تفارق الحياة بل كان يقصد ان يوفر لهم الامان ويريحهم من الدنيا ال######ة الما لاقين ليها حل دى ..
آسفين يا ريس ..غلطانين نحنا لانو فهمنا مقاصدك غلط
نحنا شعب يستاهل ضرب الشباشب ..معقول 25 سنة ما فاهمنك

Post: #8
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:54 PM
Parent: #7

Quote: فكان الجهاد والمجاهدة والصبر والمصابرة والنصر والسلام والاستقرار والرخاء

وهل هناك الا حاقد ينكر هذا او عميل صهيونى فى عينه رمد
ان كان على الجهاد والمجاهدة فقد رأينا حتى القرود شايلة كلاشنكوف تستشهد فى الجنوب ايمانا برسالة مولانا البشير
وان كان على الصبر والمصابرة سيدنا ايوب زات نفسو محتار من الشعب السودانى دا والجمل شاف عوجة رقبتو
ان كان على النصر والسلام والله الاتنين ما شفناهن لكن بيكون حصل ونحنا الشعب ما واخد باله كان فتشنا بنلقاها فى ساحات الفداء بس نحن شعب كسول ما بيحب يفتش
الاستقرار والرخاء .. ممكن نستثنى دارفور وجنوب كردفان والنيل الازرق وبكدة نقول باقى السودان مستقر والحمد لله .. بالنسبة للرخاء الحمد لله المسؤولين وابناءهم واسرهم والمنافقين والمسبحين بحمد الريس مرتاحين ..تانى عايزين شنو اكتر من كدا ؟؟
شعب لا يحمد الله على النعم
اسفين يا رئيس المجلس التشريعى
نورنا الله يزيدك نور على نور

Post: #9
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 01:59 PM
Parent: #8

Quote: نناشد سيادتكم العدول عن قراركم بعدم الترشح لدورة رئاسية اخرى


بس كدا !!!
يعنى الاعلان والفلوس والكلام الكتير عن الغبش والجماهير والتطلعات والزيت والبيبسى
عشان كدا بس ؟؟
يا سيدى حتى ولو
حتى لو تكرم الرئيس وبزهده المعروف عنه واكتفى فقط بال 25 سنة
ما تشيل هم ..
على بالطلاق مكانك دا محفوظ ولا تخاف
انت بس جهز حالك وجهز اعلان بمساحة اكبر شوية للبيعة وتأييد الرئيس القادم بديلا للبشير والعوجة ما بتجيك
حتى لو كان رئيس من غير المجاهدين

Post: #10
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: هشام عباس
Date: 03-30-2013, 02:11 PM
Parent: #9

ما فيها حاجة يا جماعة لما يطلع رئيس المجلس التشريعى المعبر عن الولاية
باعلان تكلفته فقط 300 الف جنيه من خزينة الجوعى ... فهذه لله لا للسلطة ولا للطماطم
علينا ان ننتظر الكبيرة :
المسيرات ابو 3 مليار التى سوف تجوب اركان الولاية لاثناء الرئيس عن قراره مسألة مهمة جدا

عشان تانى ما يطلع لينا رئيس مخبوت على دماغو ويعمل فيها زاهد
يعنى احنا احسن من دول الخليج اللى بيموت فيها الرئيس وهو ماسك الكرسى بايديه واسنانو
ولة يعنى كنا احسن من جماعة بشار والقذافى ومبارك وبن على ما فكوها الا بالرجالة .

Post: #11
Title: Re: رئيس ومسؤول وحال بلد : قالوا للبغل مين ابوك قال الفرس خالى
Author: فرح الطاهر ابو روضة
Date: 03-30-2013, 02:19 PM
Parent: #10

سلام يا هشام عباس
والله يا اخوي لو ما التوقيع تحت كان الواحد قال
الخطاب دا كاتبه احد العمرين بالمنبر

خالص الود