عيد ميلاد !!!

عم صباحا أيها الصقر المُجَنح
عم صباحا .
سنة تمضي , و أخرى سوف تأتي ..
فمتي يقبل موتي ..
قبل أن أصبح – مثل الصقرِِ –
صقراً مستباحا ؟!

----------
أمل دنقل

قلنا نحجز لوج وننتظر يا بروف

باقي انت ابو اللمين بتاع البورد

يكفي يقولوا الحفلة بيك

في اواخر ثمانينيات القرن الفائت، و في مثل هذا اليوم تماما، كنت في محاضرة بالقاعة الرئيسية لكلية الاقتصاد بجامعة الخرطوم و هو شئ نادر الحدوث إذ لم يكن الحضور مطلوبا و لم أكن ممن تستهويهم المحاضرات....لسبب ما دخلت المحاضرة .
قبلها بأيام كنت أحس بحركة غريبة من (الفِرد) سكتو كم مرة عند حضوري و إجتمعو في بيت احدهم بدون علمي، و لما كانت و ما زالت البينا عامرة، لم تعبث بي الظنون .

بعد أن بدأت المحاضرة بقليل، عبر شباك القاعة رأيت واحد من (الفرد) يشير علي بالخروج ، بهزتين من راسي أعلنت رفضي، إنصرف ثم جاء و معه اتنين من الفرد كلهم يشيرون علي بالخروج من المحاضرة، و لما لم أعرهم إهتمام، كتبو لي في ورقة بيضاء و رفعوها عالية ( أمرق مرق جلدك ) !!!
و لما كنت لا أحب أن "يمرق جلدي " "مرقت" من المحاضرة لا الوي علي شئ !!

ظننت أن الشباب قد قررو برنامج خارج الجامعة، لكني ما تخيلته حفلا نهاريا في القولدن قيت بالمريديان دعيت له نصف الجامعة علي شرف عيد ميلادي !!
و لما كنت امرء من ابوروف و في ظني أن الاحتفال بعيد الميلاد للاطفال أو للناس الما شاده حيلها، ساءني أن يحتفل الناس بعيد ميلادي !!
لكني كنت سعيدا بكل هذا الحب و كل التقدير، و لعلها المرة الوحيدة التي احتفلت فيها بعيد ميلادي .

الان بعد أن ارتخت العينان و تقلوزت الشفتان و فقد شعر الرأس الرغبة في النمو، هل يستقيم أن يحتفل الناس بعيد ميلادهم ؟
هل تغيرت ثقافة الأحتفال بعيد الميلاد في السودان الشقيق ؟
هل تحتفلون بعيد ميلادكم ؟
افيدونا أفادكم الله .

كل عام وانت (وجلدك الما مرق) بخير يا بروف يا غالي
في ظني أن لحظتي الميلاد والموت هما اللحظتان اللتان لا تتكران في حياتنا
وما بينهما نعاني ونقلق ونخاف ونظلِم ونُظلم .. نسعد ونحزن، ويظل العمر هو
الشء الوحيد الذي كلما زاد ... نقص!

قصة حزينة ..




عمر مديد يا بروف ياخ

ارتقيت بي مرتقا صعبا يا درديري ..
كتر خيرك ياخ ...

طبعا يا طلحة إنت كان عملت عيد ميلادك في البشاقرة، زول بديك سلام الله تاني مافي !!
شكرا ياخي علي تمنياتك الطيبة

نسيت تقول لينا الكم ؟

Quote: نسيت تقول لينا الكم ؟

You are so mean

يا بروف الناس دي احتفلت بيك من وراءنا والا ايه !!!!

Quote: You are so mean

انقليزي ده يا مرسي .. اقصد يا وضاحة ؟!

كل سنة وانت طيب يا بروف.
اظن ان الاحتفال بعيد الميلاد بيبدا من عمر 4 سنوات, اى زول عمره اقل من 4 سنوات ما بيتذكر شيء, عشان كده الاهل ممكن يطنشوا (او اهلى انا عملوا كده). بعده الناس بتختفل حدى سن 28 سنة. بعد 28 سنة الناس بتحس بالكبر و بيقبي يوم عيد الميلاد يوم للدبرسة التامل فى حال الدنيا و الزول عمل شنو فى حياته و الحجات دى. الحالة دى بتستمر لحدى سن 35 سنة. بعدها الزول بيكون عرف و اقتنع انه كبر و عجز عشان كده الناس بتبدا تانى تحتفل بعيد ميلادها. لحدى ما فى يوم كده يلاحظوا انهم وصلوا 40 سنة. و دى بتكون كبيرة شديد. 40 سنة!. و فيها الناس بتدخل فى ازمة منتصف للعمر :).
بعد الاربعين الناس بتتذكر اعياد ميلادها كل 10 سنوات. ملم تكون فى بلاد الفرنجة و ناس الشغل بيحبوا البرمجة. او اولادك و امهم مهتمين بيك (شوية كده).
_____________________________
اها ...ما قلتا لينا تميت كم???

أمير و وضاحة
شكرا علي التمنيات الطيبة ...
----------
46 يا شفت يا mean !!
----------
يا اخوانا البوست مفتوح عشان نعرف هل ثقافة عيد الميلاد للجلاكين الزينا ديل بقت عادية ولا لسه النظرة القديمة بتاعة عدم شددان الحيل لسه قايمة ؟!! يعني نحتفل بعيد ميلادنا عادي ولا ناكل باسطة ؟!!

الخال سلام
غايتوا نحن ماعندنا عيد ميلاد اهلنا ناس خلا وعقيدة االسلف الصالح ان عيدالميلاد عندهم يحتفل به المصطفي صلي الله عليه وسلم بالصيام كل اتنين
لكن النجيضة حوارك مع الجماعة ديلك ماشي مرتب ومفيد للمتابع شايفك عملتة بي الوصية وخلينا نحتفل معاك كل مرة بي كتاباتك الجميلة دي

يا بروف

مرة في جلسة مع شباب الحلة قالوا لي إتا أمبارح كتا وين ؟ قلت ليهم كنا معزومين حفلة عيد ميلاد ..
وحات خوتك لى يوم الليلة يتحجوا بالنادرة دي ..
والرجالة تقول الله أكبر ..

يا نوته
46 بالقديم وand#65275; بالجديد ؟!







_____________
46 !!!!
نوتك دي براها اربعين

بروف يا حبيب

ذات بوست من بوستات المناكفة التي جمعتنا وأصدقائك ( المسـتـوسـخيـن ) الناس
قلت لصديقتنا الغالية د. رحاب خليفة ما أذكر أنه

" يا رحاب أنا ولدي الوحيد الشايفاهو في الصورة إسمو أمين .... إنت قايلا البروف دا نحن بنريدو من شوية ؟؟ "

ولا أزال أذكر خلعتها الـ ( نصها إنجليزي ونصها عربي ) بأن Pleeeeeeease say no وقل أنو الشغلانية كانت مصادفة

لا أدري ماذ سوف تقول أنت أو ماذا تقول غاليتنا رحاب إن عرفتما

أن اليوم 29 مارس هو عيد ميلاد إبني ( محمد الأمين )

كل عام وأنتما بالف خير



____________________

أما بخصوص سؤالك فأحيلك لقصة أحد أصدقائي الذي بعد أن تم قبوله بجامعة الخرطوم وذاق ( حلاوة المدنية ) ورق طبعه بفعل الإختلاط
جاء في إجازة دراسية لأهله في رفاعة
إستيقظ فجراً ووجد أباه على مصلاية الصلاة
بتلقائية حيا أباه

" صباح الخير يا أبوى "

نظر إليه الأب شذراً ورد بغضب

" تقول لى صباح الخير ..؟؟ يا باطل... دي لقطتها من وين ؟؟ "

تعبت اصابعى وعملته دخول وانهكت نفسى بي باسورد بكرى الطويل ده
بس عشان اقول للزول الجميل امين محمد سليمان كل سنة وانت طيب

وواصل لينا في الحوارات الحلوة المثمرة وبرضو واصل لينا في البل[IMG]http://www.sudaneseonline.com/db/attention/010_Smile.gif[/IMG
بالذات ود الصايم صحبي الشليق ده

]

بسم الله الرحمن الرحيم

Quote: أما بخصوص سؤالك فأحيلك لقصة أحد أصدقائي الذي بعد أن تم قبوله بجامعة الخرطوم وذاق ( حلاوة المدنية ) ورق طبعه بفعل الإختلاط جاء في إجازة دراسية لأهله في رفاعة إستيقظ فجراً ووجد أباه على مصلاية الصلاة بتلقائية حيا أباه " صباح الخير يا أبوى " نظر إليه الأب شذراً ورد بغضب " تقول لى صباح الخير ..؟؟ يا باطل... دي لقطتها من وين ؟؟ "

تقول لى عيد ميلاد يا بروف



على كلٍ كل سنة وانت طيب ...


عارف مجتمعنا دا تقول عندو حساسية من الرومانسيات والحاجات الفيها
تعبير عن الحب باى شكل من اشكالو .. يعنى اتخيل معاى لو الواحد جا راجع
البيت المسا ولقى المدام عاملة كيكة وهى بستقبلو بكل سنة وانت طيب رد فعلو
حا يكون شنو .. اما ما قبل الزواج فاصلاً مافى زول بتذكرا ليك ..

غايتو عيد ميلادى دا مافى زول قاعد يتذكرو غير المدام ( والفيس بوك )


وكل سنة وانت طيب
والجاتك فى جضومك وشعرك سامحتك


ارتيقا

فيصل
سمارت
وليد ال mean
أبو المسلمي
طلحة
عاطف
شذى
ارتيقا
و كل من تكبد مشاق الكتابة أو أبرق معزيا ... الشكر من هنا لعندكم ... مبلول هسي ... ساعود للرد علي الجميع إن شاء الله .

كل سنة وانت بالف خير يا امين

ياخ انا كنت قايلاك قدر ساى
الولد ده عمرو مخجلنى والله

Quote: قبلها بأيام كنت أحس بحركة غريبة من (الفِرد) سكتو كم مرة عند حضوري و إجتمعو في بيت احدهم بدون علمي، و لما كانت و ما زالت البينا عامرة، لم تعبث بي الظنون .

لكن يا بروف أنا عبثت بى الظنون !
ياربى يكون الجماعه ديل مالهم ؟!
كدى سيبك من قصة عيد الميلاد الميته دى
وأرجع لينا بالذاكره لتلك الأيام وحاول تجد لينا
تفسير ليه ( الفرد ) عملو كده ؟
يأخ ده شمار تقيل ما تفوتوا لينا ساكت .
ثم يأخى ليك تحياتى ,,

كل سنة وإنت طيب..

زمان كنت بحتفل وأزعل لو اي واحد من ناس البيت ما إتذكر!
دلوقتي قبله بشهرين بكون مدبرسة وبفرح لما مافي زول بيتذكرو..
عيد ميلادي كان يوم 13 مارس
آية والعيال أصروا يحتفلوا ويفاجئوني بالإحتفال..فكانت التورتة والزهور والهدية وأهو يوم مر وخلاص..

ربنا يسعدك ويطول في أيام سعادتك..

وكل سنة ومحمد الامين طيب يا عاطف..

كل سنة وانت طيب يا الحبيب..وربنا يطيل عمرك بالصالحات من الأعمال



................................

Quote: " صباح الخير يا أبوى " نظر إليه الأب شذراً ورد بغضب " تقول لى صباح الخير ..؟؟ يا باطل... دي لقطتها من وين ؟؟ "

تعرف يا عاطف نفس القصة دي حصلت مع واحد صاحبنا وزميلنا ايام الجامعة

قال لي ابوه : صباح الخير يا ابوي
ابوه عاين ليه كدة: صباح الخير !! دي خياسة * جديدة ولا شنو؟؟




* الكلمة كانت اتقل من كدة وما بتعدي من كاروهات بكري

Quote: * الكلمة كانت اتقل من كدة وما بتعدي من كاروهات بكري

بتعدي بتعدي .. لكن انت كيشة

Quote: يا اخوانا البوست مفتوح عشان نعرف هل ثقافة عيد الميلاد للجلاكين الزينا ديل بقت عادية ولا لسه النظرة القديمة بتاعة عدم شددان الحيل لسه قايمة ؟!! يعني نحتفل بعيد ميلادنا عادي ولا ناكل باسطة ؟!!

عيد سعيد يا بروف ...

معليش اخد من وقتك دقيقتين ...

كنت بشتغل في اول تسعينات القرن الماضى مع أمير سعودى من العائلة المالكة ... ماسك اعمالهم الهنسية ...

استأذنت ذات مساء اني ما حأجي المكتب لأنو عيد ميلاد بتى الاول و عامل عزومة كبيرة ...

جات زوجته للأمير و قالت لي كيف تعمل احتفال بعيد ميلاد بنتك ( هادى بدعة ) ...

قلت ليها و الله اول مره اعرف حكاية بدعة دي ... لانو في السودان دي ما بدعة ...

وطبعا اتذكرت انو مولد الرسول ذاتو الشباب ديل عاملينو بدعة ...

المهم يا بروف شاءت الايام ان بنات نفس الامير ... كانو عاملين حفل ( قالت ) امهم انو لصاحباتهم ...

وحياتك كان عندي شغل في احدي الفلل قريب من مكان الحفل المزمع اقامته ..... و مشيت اشوف الشغل ... والقي ليك ديك يا اليفط

HAPPY BIRTH DAY TO YOU NOFA

و البلونات ما تديك الدرب ... و شغالين يرتبوا لي حفلة بالليل ...!!!

و لقيت امهم واقفة ... و ( دارت ) خجلتها مني ...

فيا بروف استمتع ... و احتفل ... و عِد الفات ...و ما تعد الباقي ...

Many Returns

Quote: كل سنة وانت طيب يا بروف. اظن ان الاحتفال بعيد الميلاد بيبدا من عمر 4 سنوات, اى زول عمره اقل من 4 سنوات ما بيتذكر شيء, عشان كده الاهل ممكن يطنشوا (او اهلى انا عملوا كده). بعده الناس بتختفل حدى سن 28 سنة. بعد 28 سنة الناس بتحس بالكبر و بيقبي يوم عيد الميلاد يوم للدبرسة التامل فى حال الدنيا و الزول عمل شنو فى حياته و الحجات دى. الحالة دى بتستمر لحدى سن 35 سنة. بعدها الزول بيكون عرف و اقتنع انه كبر و عجز عشان كده الناس بتبدا تانى تحتفل بعيد ميلادها. لحدى ما فى يوم كده يلاحظوا انهم وصلوا 40 سنة. و دى بتكون كبيرة شديد. 40 سنة!. و فيها الناس بتدخل فى ازمة منتصف للعمر :). بعد الاربعين الناس بتتذكر اعياد ميلادها كل 10 سنوات. ملم تكون فى بلاد الفرنجة و ناس الشغل بيحبوا البرمجة. او اولادك و امهم مهتمين بيك (شوية كده).

سلام يا سمارت ...و شكرا علي التمنيات الطيبة
شايفك قسمتي إحتفال الناس بعيد عيد ميلادهم بناء علي اعمارهم، و قد يكون تقسيمك ده صحيح للناس الما عندهم مشكلة بالاحتفال بعيد ميلادهم، لكن في نسبة مقدرة - ما عايز أقول الاغلبية - من الناس في السودان الشقيق ما عندها ثقافة الاحتفال بعيد الميلاد أساسا و بفتكرو ترف يرقي لعدم شددان الحيل، الكلام ده لحدي ما أنا مرقت من السودان قبل قريب العشرين سنة، you'd think إنو بالعولمة و وسائط الاتصال الخلت الدنيا تبقى أصغر من بوروف الحاجة دي تتغير لكن يبدو إنو ده ما حاصل.
--------------
فيصل يا حبيبنا .... الناس دي بتتأمل في الصلعة !!

و عليكم السلام يا أبا المسلمي

Quote: الخال سلام غايتوا نحن ماعندنا عيد ميلاد اهلنا ناس خلا وعقيدة االسلف الصالح ان عيدالميلاد عندهم يحتفل به المصطفي صلي الله عليه وسلم بالصيام كل اتنين لكن النجيضة حوارك مع الجماعة ديلك ماشي مرتب ومفيد للمتابع شايفك عملتة بي الوصية وخلينا نحتفل معاك كل مرة بي كتاباتك الجميلة دي

السلف الصالح ما إحتفلو بعيد ميلادهم، هل ده بعني إنو الاحتفال بعيد الميلاد حرام ؟!
و هل صيام الرسول صلى الله عليه و سلم كل اتنين و خميس كان إحتفالا بعيد ميلادو ؟!
ما أظن إنو الناس في السودان الشقيق ما بتحتفل بعيد ميلادها لاسباب دينية، و إن كان الدين مكون أساسي لثقافة الناس.
كتر خيرك علي طيب كلامك و حسن ظنك .
-----------
يا أخطبوط

Quote: يا بروف مرة في جلسة مع شباب الحلة قالوا لي إتا أمبارح كتا وين ؟ قلت ليهم كنا معزومين حفلة عيد ميلاد .. وحات خوتك لى يوم الليلة يتحجوا بالنادرة دي .. والرجالة تقول الله أكبر ..

ده ما النحن خايفين منو ذاتو !!

أبو أمين يا حبيبنا

Quote: بروف يا حبيب ذات بوست من بوستات المناكفة التي جمعتنا وأصدقائك ( المسـتـوسـخيـن ) الناس قلت لصديقتنا الغالية د. رحاب خليفة ما أذكر أنه " يا رحاب أنا ولدي الوحيد الشايفاهو في الصورة إسمو أمين .... إنت قايلا البروف دا نحن بنريدو من شوية ؟؟ " ولا أزال أذكر خلعتها الـ ( نصها إنجليزي ونصها عربي ) بأن Pleeeeeeease say no وقل أنو الشغلانية كانت مصادفة لا أدري ماذ سوف تقول أنت أو ماذا تقول غاليتنا رحاب إن عرفتما أن اليوم 29 مارس هو عيد ميلاد إبني ( محمد الأمين ) كل عام وأنتما بالف خير ____________________ أما بخصوص سؤالك فأحيلك لقصة أحد أصدقائي الذي بعد أن تم قبوله بجامعة الخرطوم وذاق ( حلاوة المدنية ) ورق طبعه بفعل الإختلاط جاء في إجازة دراسية لأهله في رفاعة إستيقظ فجراً ووجد أباه على مصلاية الصلاة بتلقائية حيا أباه " صباح الخير يا أبوى " نظر إليه الأب شذراً ورد بغضب " تقول لى صباح الخير ..؟؟ يا باطل... دي لقطتها من وين ؟؟ "

متذكر كلامك ده و متذكر تعليق رحاب عليهو، و حقيقة صدفة عجيبة ... خلاص يا عاطف من الليلة إنت شيخي رسمي.
بالنسبة لابو صحبك، إذا كانت صباح الخير ساي جابت ليها بطالة، عيد الميلاد كان مرقو من الملة.
ياخي واضح إنو قصة عيد الميلاد دي بره السيستم حقنا تماما.
--------------
سلام يا شذى

Quote: تعبت اصابعى وعملته دخول وانهكت نفسى بي باسورد بكرى الطويل ده بس عشان اقول للزول الجميل امين محمد سليمان كل سنة وانت طيب وواصل لينا في الحوارات الحلوة المثمرة وبرضو واصل لينا في البل[IMG]http://www.sudaneseonline.com/db/attention/010_Smile.gif[/IMG بالذات ود الصايم صحبي الشليق ده

ياخي تسلمي و تسلم أصابعك و كتر خيرك علي تمنياتك الطيبة و كلامك الأطيب.
الصايم ما بتبله يا شذى، كان بليناه بالغلط بنرجع نسلم عليه في راسو، لكن ده ما بمنع من إنو شليق !!

عيد ميلاد سعيد يا بروف وعقبال مية شمعة


ورينا يبارك في أيامك

بختك يا بروف, قلت لي في الميرديان....خطرييييييي
نحن غايته في حياتنا ما عملنا عيد ميلاد, والشهادة ذاتها تسنين هههههه

ألف مبرررك, إن شاء الله عقبال المائة سنة

Quote: يا اخوانا البوست مفتوح عشان نعرف هل ثقافة عيد الميلاد للجلاكين الزينا ديل بقت عادية ولا لسه النظرة القديمة بتاعة عدم شددان الحيل لسه قايمة ؟!! يعني نحتفل بعيد ميلادنا عادي ولا ناكل باسطة ؟!!

يا امين ياخى 46 دا عز الشباب ما شايف رشا قالت كده

يعنى ممكن نعرس ليك تانى

تبرى من الجلاكين الجلاكين ديل ناس شيقا ياخى

عارف يا امين
ابوى ربنا يطول عمروا هسي فى الستين والله بنعمل ليه عيد ميلاد ومفاجات هو بكون ناس ومشغول يجى البيت فجاة داخل نقول ليه ماشين شيرتون او اى فندق كده نتعشاء يقوم يقول تمام مافى مانع تغير
ونحن بنكون عاملين ليه برنامج كامل بتاع عيد ميلاد فى الفندق الحا نتعشاء فيه واخوانى بكون حريصين يكونوا موجودين علشان نتلم كلنا ونبوسوا فى راسوا

لانوا رجل عظيم وادانا كتير ومهما عملنا ما حنوفي جزء صغير من العملوا لينا

في مشكلة تقنية في الاحتفال يا بروف
اكتر من نص الشعب مولود في الفاتح من يناير !



ولا انسي تمنياتي لك بمزيد من الشهادات العلمية ولا سيما غير العلمية !

البروف الجميل جدا أمين

كل سنة وانت طيب وعقبال مئة شمعة يا حبيب





















_________
بما انو عيد ميلادي يوم 1ابريل
مافي زول يقول لي دي الكذبة ..
دا تاريخ ميلادي ... والله صحي
ف من بوستك الجميل دا بهني
نفسي بعيد ميلادي الرابع والعشرين
واذكر اصحابي انو الما =جاب لي هدية ح اقطع علاقتي بيهو

Quote: بتعدي بتعدي .. لكن انت كيشة

ولِي يا شفت .. أخبارك؟؟!!
غايتو دي دردقة من أمها ..لكن أبيييييييييت ما بعديها..

معقولة يا شفت نكون قاعدين في المنبر دا من سنة تريس وما عارفين نعدي الحاجات ...

ارتيقا يا حبيبنا ( ياخي اسمك سمح عديل والله، كان بريتنا بالمعنى نكن لك من الشكرين )

Quote: عارف مجتمعنا دا تقول عندو حساسية من الرومانسيات والحاجات الفيها تعبير عن الحب باى شكل من اشكالو .. يعنى اتخيل معاى لو الواحد جا راجع البيت المسا ولقى المدام عاملة كيكة وهى بستقبلو بكل سنة وانت طيب رد فعلو حا يكون شنو .. اما ما قبل الزواج فاصلاً مافى زول بتذكرا ليك .. غايتو عيد ميلادى دا مافى زول قاعد يتذكرو غير المدام ( والفيس بوك ) وكل سنة وانت طيب والجاتك فى جضومك وشعرك سامحتك

الرومانسيكيات دي يا ارتيقا خليها ساي ... دي عيب عديل كده ... و العجب كان قلت لزوجتك كلمة ظريفة علي ملأ من الناس، يكسو بجلدك العرايا !!

(كل سنة و إنت طيب) و (هديه من العيال و أمهم) دي بتحصل طوالي، أنا بسأل من الأحتفال بتاع يعملو ليك كيكة و حرباشات و تكلم كم نفر من أصحابك و أهلك يجو يشربو شاي معاكم .

شكرا علي التمنيات الطيبة لكن الجاتني في شعري ما سامحتني كلو كلو !!

-------------

Quote: كل سنة وانت بالف خير يا امين

و انتي و مجتبى و عيالكم بخير و صحة و عافية .

Quote: ياخ انا كنت قايلاك قدر ساى الولد ده عمرو مخجلنى والله

ده إنجليزي ده يا سهام ؟!!

كمال يا سالم، كيفك يا حبيب و لعلك بخير

Quote: لكن يا بروف أنا عبثت بى الظنون ! ياربى يكون الجماعه ديل مالهم ؟! كدى سيبك من قصة عيد الميلاد الميته دى وأرجع لينا بالذاكره لتلك الأيام وحاول تجد لينا تفسير ليه ( الفرد ) عملو كده ؟ يأخ ده شمار تقيل ما تفوتوا لينا ساكت . ثم يأخى ليك تحياتى ,,

الفكرة يا كمال إنو كانو بجهزو لعيد ميلادي و إنو يكون مفاجأة، أنا لو كنت عارف البتاع ده ما كان بتم .

كلام الشاعر بتاع "الا ليت الشباب يعود يوما" ده ما بقع للزول إلا لمن ترتخي العينان و تتقلوز الشفتان، الكتابة عن الزمن داك ساي ترد الروح .

كان الله مد في العمر ح اكتب مذكراتي في الخمسين إن شاء الله ... علي بعد هبشة يعني .

شكرا تمنياتك الطيبة .
-----------------

Quote: كل سنة وإنت طيب.. زمان كنت بحتفل وأزعل لو اي واحد من ناس البيت ما إتذكر! دلوقتي قبله بشهرين بكون مدبرسة وبفرح لما مافي زول بيتذكرو.. عيد ميلادي كان يوم 13 مارس آية والعيال أصروا يحتفلوا ويفاجئوني بالإحتفال..فكانت التورتة والزهور والهدية وأهو يوم مر وخلاص.. ربنا يسعدك ويطول في أيام سعادتك..

و إنت و المعاك كلهم طيبين يا منى.

لو ما زوجتي ( و في السنين الاخيرة عيالي ) يوم عيد ميلادي الصباح بقولو لي كل سنة و إنت طيب، إستحالة أتذكر ... اليوم ده لا يعنى لي أي شئ علي الاطلاق. إحتمال دي ظروف النشأة، ما بتذكر لي عيد ميلاد في بيتنا .

العولمة شكلها ما أثرت كتير بحيث إنو هذا الأمر أصبح شائع بدليل ردود الناس الهنا .

شكرا يا منى علي طيب التمنيات

Quote: كل سنة وانت طيب يا الحبيب..وربنا يطيل عمرك بالصالحات من الأعمال

جدنا يا حبنا، ياخي كتر خير علي الأمنيات و الدعوات.

بالمناسبة، وليد ال mean كلامو صاح... أي كلمة ممكن تعدي كاروهات بكري .

--------------

أيم الله وضاحة أبدعت في لقب وليد الجديد ده ... موباااالغة !!

-------------
يحى يا حبيبنا، لعلك بخير ياخي

و اسمح لي أقول ليك إني متابع بوستاتك العميقة دي كلها، المرة الفاتت جيت أعلق في بوستك ، لقيتك كاتب كلمات طيبات في حقي ...قلت لو علقت ليك ح تفتكرني بجامل فيك لمجاملتك لي.

Quote: يد سعيد يا بروف ... معليش اخد من وقتك دقيقتين ... كنت بشتغل في اول تسعينات القرن الماضى مع أمير سعودى من العائلة المالكة ... ماسك اعمالهم الهنسية ... استأذنت ذات مساء اني ما حأجي المكتب لأنو عيد ميلاد بتى الاول و عامل عزومة كبيرة ... جات زوجته للأمير و قالت لي كيف تعمل احتفال بعيد ميلاد بنتك ( هادى بدعة ) ... قلت ليها و الله اول مره اعرف حكاية بدعة دي ... لانو في السودان دي ما بدعة ... وطبعا اتذكرت انو مولد الرسول ذاتو الشباب ديل عاملينو بدعة ... المهم يا بروف شاءت الايام ان بنات نفس الامير ... كانو عاملين حفل ( قالت ) امهم انو لصاحباتهم ... وحياتك كان عندي شغل في احدي الفلل قريب من مكان الحفل المزمع اقامته ..... و مشيت اشوف الشغل ... والقي ليك ديك يا اليفط HAPPY BIRTH DAY TO YOU NOFA و البلونات ما تديك الدرب ... و شغالين يرتبوا لي حفلة بالليل ...!!! و لقيت امهم واقفة ... و ( دارت ) خجلتها مني ... فيا بروف استمتع ... و احتفل ... و عِد الفات ...و ما تعد الباقي ... Many Returns

دي يا يحى اسمها نفاق إجتماعي، الناس دي ممكن تبلك بحرمة الاحتفال باعياد الميلاد و يحتفلو باعياد ميلاد عيالهم . و حقيقة أنا داير أعرف رأي الدين شنو في الحته دي، ما ممكن تكون بدعة لانها حاجة مافي الدين أساسا.

أول ما جيت البلد دي كنت بدرس و في الصيف بشتغل سواق و مترجم لكثير من العرب و أسرهم، كتير منهم بخافو علي مظهرهم قدام الناس أكتر من خوفهم من الله. نسأل الله السلامة بس .
شكرا علي تمنياتك الطيبات .

Quote: عيد ميلاد سعيد يا بروف وعقبال مية شمعة ورينا يبارك في أيامك

شكرا يا مأمون علي الدعوات و التمنيات الطيبة
----------------
ادروب يا حبيبنا

Quote: بختك يا بروف, قلت لي في الميرديان....خطرييييييي نحن غايته في حياتنا ما عملنا عيد ميلاد, والشهادة ذاتها تسنين هههههه ألف مبرررك, إن شاء الله عقبال المائة سنة

زي ما قلت سابقا، في الاول كنت متاخد شوية من قصة العيد ميلاد دي، لكن بعد شوية أخوك إنسجم كأحلى ما يكون الانسجام

شكرا ياخي علي التمنيات الطيبة.

كل سنة وانت طيب يا بروف - دي التهنئة



عيدميلاد شنو يا معلّم, دي حركات وليدات الفيس بووك ساي - دا البل

سنة حلوة يا بروف

وانا هديتي هذه اللقطة السودانية المعبرة استلفتها من بوست جمال محمود حق الصور ..

شوف للبقرة هيئت نفسها بتوسيع رجليها الخلفية لارضاع الصغير كأنه ابنها ..

__________________________________________________________________

حقيقة انا عيد ميلاد الكبار دا يصيبني بالقشعريرة ..وخاصة في مجال العمل يجيك واحد من المصريين او الهنود او الفلبينيين شايل حلاوة تقول له في شنو يا زول يقولك عيد ميلادي ..وتلاقيه فرحان ..

بالرغم من انه مجموعة من الناس يكونوا حافظينن تاريخ يوم معين ويتذكرونهه كل عام ليحتفلوا صاحبه اعتقد انه لا شئ اعظم من ذلك ونحن ظلمنا انفسنا بهذا الجفاف الغير مبرر ..

وضاحة يا فجر المشارق ...

Quote: يا امين ياخى 46 دا عز الشباب ما شايف رشا قالت كده يعنى ممكن نعرس ليك تانى تبرى من الجلاكين الجلاكين ديل ناس شيقا ياخى عارف يا امين ابوى ربنا يطول عمروا هسي فى الستين والله بنعمل ليه عيد ميلاد ومفاجات هو بكون ناس ومشغول يجى البيت فجاة داخل نقول ليه ماشين شيرتون او اى فندق كده نتعشاء يقوم يقول تمام مافى مانع تغير ونحن بنكون عاملين ليه برنامج كامل بتاع عيد ميلاد فى الفندق الحا نتعشاء فيه واخوانى بكون حريصين يكونوا موجودين علشان نتلم كلنا ونبوسوا فى راسوا لانوا رجل عظيم وادانا كتير ومهما عملنا ما حنوفي جزء صغير من العملوا لينا

ياخي أنا ممنون ليك و إنت بتحاولي ترفعي من روحنا المعدنية التي اغتالها الزمن، لكن زي ما قال بكة الذي باركنا حوله : (نحن في الثلث الاخير من العمر ) !!

بالنسبة لاحتفالكم بعيد ميلاد الوالد أسأل الله أن يمد في عمره، فواضح انكم من علية القوم ما زينا نحن ناس كلو و أشربو ... و علية القوم ديل يا ستهم لا تسري عليهم قوانين الرجرجة و الدهماء أمثالنا و بالتالي لا يقاس عليهم .
--------------
هيثم طه يا دكتور ... علم الله بشوقنا ياخي

Quote: في مشكلة تقنية في الاحتفال يا بروف اكتر من نص الشعب مولود في الفاتح من يناير ! ولا انسي تمنياتي لك بمزيد من الشهادات العلمية ولا سيما غير العلمية !

إنت قايل إحتفالات الشعب السوداني الشقيق بالفاتح من يناير دي شنو ؟! ده عيد ميلاد جماعي للناس المولودة زورا و بهتانا يوم واحد واحد !!

أنا انتهيت من كل الشهادات الما علمية، بعد ده ما فاضل لي غير ادعي النبوة زي ما قمر بوبا قال لي ذات بوست !!

Quote: البروف الجميل جدا أمين كل سنة وانت طيب وعقبال مئة شمعة يا حبيب _________ بما انو عيد ميلادي يوم 1ابريل مافي زول يقول لي دي الكذبة .. دا تاريخ ميلادي ... والله صحي ف من بوستك الجميل دا بهني نفسي بعيد ميلادي الرابع والعشرين واذكر اصحابي انو الما =جاب لي هدية ح اقطع علاقتي بيهو

أنقا يا حبيب، كتر خيرك علي الكلام الطيب و الامنيات الجميلة .

لكن يا حافظ ياخي إتلومت بقصة 24 سنة دي !!


------------

Quote: كل سنة وانت طيب يا بروف - دي التهنئة عيدميلاد شنو يا معلّم, دي حركات وليدات الفيس بووك ساي - دا البل

و إنت و حتوت و توتة و أمهم بخير و صحة و عافية .

ما عارف ليه يا البشرى عندي إحساس انك بتحتفل بعيد ميلادك بالدس !!
------------

Quote: حقيقة انا عيد ميلاد الكبار دا يصيبني بالقشعريرة ..وخاصة في مجال العمل يجيك واحد من المصريين او الهنود او الفلبينيين شايل حلاوة تقول له في شنو يا زول يقولك عيد ميلادي ..وتلاقيه فرحان .. بالرغم من انه مجموعة من الناس يكونوا حافظينن تاريخ يوم معين ويتذكرونهه كل عام ليحتفلوا صاحبه اعتقد انه لا شئ اعظم من ذلك ونحن ظلمنا انفسنا بهذا الجفاف الغير مبرر ..

شكرا يا درديري علي الهدية .

الهنود و المصريين كويسين، على الاقل بجو الشغل يوم عيد ميلادهم، الرجل الابيض حقنا ده بياخد يوم عيد ميلادو إجازة !!

كنت شغال في شركة بتديك يومين floating days إجازة، معظم الناس بياخدو واحد منهم يوم عيد ميلادهم.

في مدارس العيال لازم تجيب سناكس و مشروبات للفصل كلو يوم عيد ميلاد ولدك ولا بتك.

ما اتخيل لي نحن جافين يا درديري، لكننا ما بنبوح بمشاعرنا الطيبة لبعض إلا حدود معينة جدا .

لو كان ظهور (يوم) الميلاد إجباري في الفيسبوك لما اشتركت :)

يوم الميلاد ما مشكلة يا حسين، الكلام سنة الميلاد !!
و بالمناسبة دي دايرين لينا زول mean زي وليد ال mean يفتح بوست يسأل الناس من اعمارها، نشوف البخشو منو !!

Quote: يحى يا حبيبنا، لعلك بخير ياخي و اسمح لي أقول ليك إني متابع بوستاتك العميقة دي كلها، المرة الفاتت جيت أعلق في بوستك ، لقيتك كاتب كلمات طيبات في حقي ...قلت لو علقت ليك ح تفتكرني بجامل فيك لمجاملتك لي.

بروف يا جميل ...

لو اردت مجاملتك لترصدتك ... لكننا نخرج كلمة الحق و لو علي حواف المقاصل ...

اتشرف بمتابعتك لما اكتب ... و انا كذلك من معجبي قلمك ( الحريف ) ...

Quote: دي يا يحى اسمها نفاق إجتماعي، الناس دي ممكن تبلك بحرمة الاحتفال باعياد الميلاد و يحتفلو باعياد ميلاد عيالهم . و حقيقة أنا داير أعرف رأي الدين شنو في الحته دي، ما ممكن تكون بدعة لانها حاجة مافي الدين أساسا.

وما ادراك ما هو يا بروف ...

احساسي بهم ... كإحساسي بمن يخفي كاس الخمر خلف ظهره حينما يري الآخرين ...

اعتقد ان الدين براء منهم ... و السعودين يخلطون بين عاداتهم ( القبيحة ) .. وبين الدين ...

ولا يقع في ( الفخ ) الا ضعاف النفوس ...

شكرا يا يحى ياخي ...
عجبني جدا تعبيرك ده :

Quote: احساسي بهم ... كإحساسي بمن يخفي كاس الخمر خلف ظهره حينما يري الآخرين ...

غايتو فارق العشرة سنين دا برفع من نسبة خطأكـ
في قصة البلّةّ المسيخة في موضوع البطل الأمسخ منو!!


ياخ كل سنة وإنت طيب!
لو صبرت شوية كـدا محمد البشرى ممكن يلحقكـ
حسي ضرب الأربعين مرتاح يحمد ربو



بعدين خليكـ جادي شوية
هسي دي صلعة 46 سنة؟
بالميّت ممكن توصلكـ 64!!