Post: #7 Title: Re: عايز لي مره بيضاء وشعرها طويل وبت ناس! Author: usama Babiker Date: 03-23-2013, 08:24 AM Parent: #4
حلوة وملعوبة تجدني اتفق معاك تماما وانا عايز واحدة لونه داكن وطويلة وبرضو مش علي كيفي ؟؟؟؟؟
Post: #5 Title: Re: عايز لي مره بيضاء وشعرها طويل وبت ناس! Author: سرالختم عباس Date: 03-23-2013, 08:22 AM Parent: #3
والله يا بشاري هو خيار شحصي بالتأكيد ودربك اخدر كان ما عتروا ليك ناس الاستلاب
Post: #6 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 08:23 AM Parent: #3
يا ريت تكون متعلمة وجامعية وتتحدث اللغتين العربية والانجليزية
Post: #9 Title: Re: عايز لي مره بيضاء وشعرها طويل وبت ناس! Author: عبد الناصر الخطيب Date: 03-23-2013, 08:29 AM Parent: #6
الامين ود البشاري صباحك زين ,,,
ياخي لو قبل مده بسيطة كان طلبك متوفر هسه البياض فيهوا ندّرة ....حصلت وقلة في المعروض
----------------------------------------------------------------- *كنت تقول كلامك ده قبل ما يفتحوا التصدير للكويت
Post: #10 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 08:33 AM Parent: #6
أي زول حر في خياراته ياخ .. مرة واحد مغترب بكلم في اهله وقال ليهم .. عايز لي مره بالمواصفات دي .. قامت واحدة من بنات عمه الكانت قافله عليهو قالت ليهو: والله لو داير واحدة زي دي إلا تمشي تشوف بنات النيل الأزرق
Post: #17 Title: Re: عايز لي مره بيضاء وشعرها طويل وبت ناس! Author: وليد عبد اللطيف Date: 03-23-2013, 09:22 AM Parent: #6
Quote: ويلقوها ليك وين دي ياللمين أخوي
إلا في الجنه
Quote: يا ريت تكون متعلمة وجامعية وتتحدث اللغتين العربية والانجليزية
انت عايز تعرسها ولا عايز تشغلها سكرتيره
Post: #16 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 09:16 AM Parent: #3
تحياتي... غايتو كلامك الشين دا يحول للأخوات للرد عليه يا جمال منو القال ليكـ ماف ياخ؟ طلبنا موجود ومتوفر بكثرة .. .. ..
__ يا نعمات حمود تعالي شوفي شغلك مع جمال عبد الناصر دا
Post: #8 Title: Re: عايز لي مره بيضاء وشعرها طويل وبت ناس! Author: أشرف الرحال Date: 03-23-2013, 08:27 AM Parent: #1
الاخ / البشاري ،،، تحياتي
ده رايي في مكتب ابو جمال او دولة الكويت من حقها تحدد المواصفات العايزها وسبق ان رديت لمن قال محاسبة مكتب الاستقدام (ابو جمال ) ابو جمال او دولة الكويت زي العريس البفتش ليهو على عروسة بمواصفات معينة ممشوقة القوام وشعرها طويلة واكيد ناعم وجهها مدور عيونها كبيرة واكيد واسعة وكمان يقول لناس بيتهم لو لقيتوها رسلو لي منها صور متعددة الاتجاهات والزوايا ... مش الحاجات دي عادي قاعدة تحصل ولكن المختلف هو كيف لصحيفة ووزارة تمرر هذا الاعلان بهذه المواصفات التي تختلف تماما مع توجه الدولة ومشروعها الحضاري من حق المكتب و دولة الكويت تحديد المواصفات ومن حق الصحيفة والوزارة ان ترفض وكل هذا في اضابير قنواتهما بعيدا عن النشر زي حكاية العريس البفتش ليهو على عروسة بهذه المواصفات
عكســـة :- ما في شرط آخر مثلا مريخابية
مودتي
الرحـــال
Post: #11 Title: Re: عايز لي مره بيضاء وشعرها طويل وبت ناس! Author: فايزودالقاضي Date: 03-23-2013, 08:36 AM Parent: #8
Quote: عايز لي مره بيضاء وشعرها طويل وبت ناس!
عندنا طلبك ..لكن هي كمان عايز راجل ابيض وشعره طويل وود ناس وهلالابي (للصبر والتحمل ) ..
Post: #12 Title: Re: عايز لي مره بيضاء وشعرها طويل وبت ناس! Author: Jamal Mustafa Date: 03-23-2013, 08:40 AM Parent: #8
Quote:
وتتحدث اللغتين العربية والانجليزية
ياود البشارى ماقالوا العرس لغتو واحدة !! مصعبنها على الجمهور مالكم !! الله إكفينا شر الأحلام التعسفية
Post: #13 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 08:46 AM Parent: #12
اها تعالوا النحدثكم جد .. جد العبارة الفوق دي ممكن يقولها أي سوداني .. من الشرق ولا الشمال ولا الغرب ولا الجنوب زااااتو .. .. ..
__ طيب الغاغا فوق كم ياخ؟ ولا أحكي ليكم نكتة أبكر وبنكـ الثروة الحيوانية
Post: #14 Title: Re: عايز لي مره بيضاء وشعرها طويل وبت ناس! Author: سيف اليزل سعد عمر Date: 03-23-2013, 08:47 AM Parent: #12
نزل ليك إعلان فى الانتباهة اصلها عايرة وادوها صوط
Post: #15 Title: Re: عايز لي مره بيضاء وشعرها طويل وبت ناس! Author: امجد محمد الأمين Date: 03-23-2013, 09:03 AM Parent: #14
المراة عندنا بيضاء فاقع لوناه يسر الناظرين ..
عارف انو اللون الابيض لا تستخدمه معه لفظة فاقع عشان ما يجي زول ناطي يعمل لينا فيها خبير الوان .
حدد يا نادر .. الخدره الدقاقة الاباك كسره مره حقكـ ولا ينازعك فيه احد ..
****
اسامة ود عمنا بابكر
كيفك يا زول ...
Quote: حلوة وملعوبة تجدني اتفق معاك تماما وانا عايز واحدة لونه داكن وطويلة وبرضو مش علي كيفي ؟؟؟؟؟
اتفاقات مجانية ما معانا يا حاج وبعدين خلي اخوكـ يضمن وبعدين تعال مد قرعتك دي يا اسامة يعني في السودان الكلام دا في لو واحد عايز ليهو سكرتيره بختارها حلوه وشعرها طويل ... الخ الخ وصغيروووووووونه دي ركّــز عليها شديد باللاي
*** سر الختم .... حبابك
Quote: والله يا بشاري هو خيار شحصي بالتأكيد ودربك اخدر كان ما عتروا ليك ناس الاستلاب
مش بالله .. واصلاً دربي اخضر في حد ممكن يعترض مثلاً؟
كن بخير
***
عبد الناصر الخطيب
ولدنا ياخ انا شايلك لعوزة كبيرة سيبك من البياض دا
Quote: ياخي لو قبل مده بسيطة كان طلبك متوفر هسه البياض فيهوا ندّرة ....حصلت وقلة في المعروض
كدا باصر لينا واحدة ياخ
Post: #20 Title: Re: عايز لي مره بيضاء وشعرها طويل وبت ناس! Author: garjah Date: 03-23-2013, 09:32 AM Parent: #1
Quote: عايز لي مره بيضاء وشعرها طويل وبت ناس!
طلعت عنصري قذر يا الامين
معليش يا حبيبنا وصف زي ماداير لكن غير بت عمك الخدراء مافي ليك
Post: #23 Title: Re: عايز لي مره بيضاء وشعرها طويل وبت ناس! Author: Abdlaziz Eisa Date: 03-23-2013, 09:49 AM Parent: #20
عزيزي الصفوي ودالبشاري
ممكن تقدم اعلان طلبك ده للانتباهة وبينشر مجانا لحين ميلاد العروس وتنشئتها وبلوغها.. كما في الاعلان اعلاه
تحياتي
Post: #24 Title: Re: عايز لي مره بيضاء وشعرها طويل وبت ناس! Author: درديري كباشي Date: 03-23-2013, 09:52 AM Parent: #23
Quote: عايز لي مره بيضاء وشعرها طويل وبت ناس!
ممكن يا سعادة الباشمهندس وكيل عريس
تشرح لنا اكثر عن المقصود بعبارة بت ناس
لانه ما شفنا واحد عرس واحدة بت قرود او اي نوع آخر من ذوات الثدي ..
Post: #25 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 09:53 AM Parent: #20
وليد يا حبيبنا
Quote: انت عايز تعرسها ولا عايز تشغلها سكرتيره
ما بتفرق يا وليد ...
***** أشـــرف الرحال
ازيك يا رشاشة
Quote: عكســـة :- ما في شرط آخر مثلا مريخابية
دي اهم حاجة ياخ عشان بعدين ما نقعد في نقه وغلاط كمان
****
ود القاضي
ازيك يا تسفاي ..
Quote: عندنا طلبك ..لكن هي كمان عايز راجل ابيض وشعره طويل وود ناس وهلالابي (للصبر والتحمل ) ..
ههههههههههههه صعبتها بهلالابي دي بس
***
جمال مصطفى
ازيك يا ملك ..
Quote: ياود البشارى ماقالوا العرس لغتو واحدة !! مصعبنها على الجمهور مالكم !! الله إكفينا شر الأحلام التعسفية
بالعكس ياخ دي احلام مشروعة ....
****
سيف الليزل سعد ... سلام
Quote: نزل ليك إعلان فى الانتباهة اصلها عايرة وادوها صوط
تحياتي .. ما عندي حق الاعلان وعشان كده نزلته في وطن من لا وطن له دا والله كريم ياخ .... والله صحي
Post: #26 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 10:05 AM Parent: #25
أمجد مرحب يك
***
احمد ابنعوف ... احكي وانداح ياخ
***
Quote: أهذه صيحة ضد الخوف وضد الابتزاز ؟
ابداً والله... بس انا مستغرب في الهيعة والخجة دي منو ممكن يشغل ليهو سكرتيره شينة يا محمد والاعلان اكتر من عادي ..
***
الخال حمزاوي
Quote: يحال إلى الاخ محمد الصائم .. للتخصص
ما تخاف ابو الزمل حيقيف معاي..
**** عبد العزيز عيسى
حمد لله على السلامة .. وابشر حأقدم طوالي
Quote: ممكن تقدم اعلان طلبك ده للانتباهة وبينشر مجانا لحين ميلاد العروس وتنشئتها وبلوغها.. كما في الاعلان اعلاه
***
دريري كباشي
سلام يا صديق ... وبطل تحريف وحساسية زائدة
Quote: ممكن يا سعادة الباشمهندس وكيل عريس
تشرح لنا اكثر عن المقصود بعبارة بت ناس
لانه ما شفنا واحد عرس واحدة بت قرود او اي نوع آخر من ذوات الثدي ..
بت ناس يا دريري تعبير سوداني شائع ليس له علاقه بالعنصرية ولا ذوات الثدي ولا الفقاريات ومنها قولنا : والله دا زول ناس ... فشنو خليييييييييك كووووول يا حبه
Post: #27 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 10:09 AM Parent: #26
قرجه الطيرة
أول حاجة تأدب ... وأنت بتتكلم معاي
Quote: طلعت عنصري قذر يا الامين
معليش يا حبيبنا وصف زي ماداير لكن غير بت عمك الخدراء مافي ليك
تاني حاجة أي زول ما معتز بنفسه حقو طوالي يقوم يولع فيها بالجاز والكبريت كلامي الفوق كان قعدته مليون سنة ما بتفهمو .. فشنو الله يرضى عليك أختانا كده ولا كده
اوووووووووووف ياخ
Post: #50 Title: Re: عايز لي مره بيضاء وشعرها طويل وبت ناس! Author: garjah Date: 03-23-2013, 04:05 PM Parent: #27
يا حبيبنا انت زعلت والا شنو
الواحد اصلو ما يهظر معاك يا صفوة
ياخ قووم لف يا معقد
وهل العنوان جادي حتى نكون معك جادين
قووم لف
Post: #30 Title: Re: عايز لي مره بيضاء وشعرها طويل وبت ناس! Author: عماد قريش Date: 03-23-2013, 10:18 AM Parent: #26
تعرف ياالأمين الأتراك الأساسا لونهم أبيض بيحبوا اللون الفاقع البياض ولمن يجوا يعبروا عن الموضوع ده يقولوا ليك البت دى لونها ( طاووق قبى) يعنى بيضاء زى لحم الدجاج أو ( باليك قبى) يعنى بيضاء زى السمك
وبرضو تقول لى
Post: #31 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 10:46 AM Parent: #30
Quote: يعبروا عن الموضوع ده يقولوا ليك البت دى لونها ( طاووق قبى) يعنى بيضاء زى لحم الدجاج أو ( باليك قبى) يعنى بيضاء زى السمك
عماد كيفك يا حبيب ..
عارف انا شخصياً ما شايف في الاعلان ما يســـئ للسودان :) اعلان عن وظيفة ومن حق أي زول يختار موظفيه بالطريقة البتعجبه بعدين الكلام دا متواتر بيننا في السودان .. ليه هسي بقى لينا حار؟ وكشف الهيئة موجود حتى في السودان وانا عملته عند التقديم لوظيفة في شركة شل في السودان وطبيعي أي زول بختار سكرتيره ح يختار واحدة بالمواصفات دي ببساطه لأنها واجهة للمكتب وللعمل ... دي كل الحكاية الحاجة التانية الناس شبكونا ليك تجارة بشر وتجارة اعراض ودعارة ياخي تح ثم تح العايز ليهو بنات عشان الحاجات دي ما اظن يمشي وزارة تنمية الموارد البشرية ولا صحيفة الانتباهة عشان يعلن عن حاجته
تحياتي
Post: #66 Title: Re: عايز لي مره بيضاء وشعرها طويل وبت ناس! Author: سلافة الصديق أبو ضفيرة Date: 03-24-2013, 10:00 AM Parent: #31
Quote: عارف انا شخصياً ما شايف في الاعلان ما يســـئ للسودان :)
يا بشاري الإنتباهة وصاحبها في كل يوم يسيئون للسودان . إذا الإعلان بالنسبة ليك ما فيهو حاجة معناها لو عندك أخت أو قريبة بالمواصفات دي وعاوزة تشتغل ما ح يكون عندك مشكلة إنها تقدم وتشتغل وكمان يصوروها صور بزوايا مختلفة ( ربما نهود ومؤخرة وشفايف ) ولازم تكون زكية وسريعة الفهم ؟؟؟ يعني شنو ؟؟ ده لزوم الشغل ولا لزوم لو عجبت ليها زول تقوم تتجاوب معاهو سريع وما تعمل فيها البت تقيلة O o .. الأخ بشاري الما بشوف من الغربال يبقى أعمى . وعليك الله ما تشكر لي الراكوبة في الخريف (الطيب مصطفى وصحيفته) .. تعرف يا بشاري بعد الإعلان ده الطيب وقع عليه المثل البيقول ( يا خسارة أكل الفكي للمرارة ، يعديها بي ريقو ولا بي موية إبريقو ) .. ولك أن تتخيل موقف الجماهير من الصحيفة ومنظر الطيب مصطفى ده لو كان أصلاً طيب .
Post: #78 Title: Re: عايز لي مره بيضاء وشعرها طويل وبت ناس! Author: جابر برمه Date: 03-26-2013, 11:22 AM Parent: #31
الطلب رخيص وهاك دي من اقوال المرحوم د. عوض دكام عمرو مافي شاعر او فنان تغني قال صفاري الا ويقول خضاري و فسرها بعد ذلك في عصر الكريمات التي تجعل العين تزغلل
Post: #28 Title: Re: عايز لي مره بيضاء وشعرها طويل وبت ناس! Author: أحمد الشايقي Date: 03-23-2013, 10:11 AM Parent: #25
شكرا ود البشاري,
الإعلان الذي نشرته (الوزارة) نزولاً على رغبة الشركة المستقدمـة في صحيفة الخال المهندس الطيب مصطفى الصحيفة التي تنبه من (الغفلـة) هو إعلان لا يتناقض مع توجهات حزب الإخوان المسلمين الحاكم في السودان فحسب وإنما يتناقض مع قوانينه التي ظل يجلد بها الشباب في قسم الكبجاب وغيره من الأقسام تحت مسمى قانون النظام العام,
هذا الإعلان يتطابق تماماً مع المتطلبات التي تطلبها هذه المكاتب عند استجلاب الفتيات من (روسيا ودول الإتحاد السوفيتي السابق وبولندا ورومانيا وغيرها للخدمة في أغراض الأعمال غير الكريمة عموماً في بعض الدول الخليجية ...
لو نشرت صحيفة أخرى (كصحيفة الميدان مثلاً) مثل هذا الإعلان لرأيت هيئة علماء السودان في الشوارع تقود المظاهرات وتنادي بنفي كل من يحمل توجه (صحيفة الميدان) خارج البلاد أو ربما خارج الكرة الأرضية ...
لكن الوزارة الكريمة حلال عليها والإنتباهة معروف أنها فوق القانون .. ومع ذلك فإنها تشكر على الاعتذار أما البرلمان ونائبه دفع الله حسب الرسول فهم لا يرون مثل هذا الإعلان ...
أحمد الشايقي
Post: #32 Title: Re: عايز لي مره بيضاء وشعرها طويل وبت ناس! Author: عباس محمود Date: 03-23-2013, 10:58 AM Parent: #28
أخي الأمين البشاري .....تحياتي
طبعا انت حر في مواصفاتك البتطلبها لكن والله اول ما قريت العنوان اتذكرت الأعلان سيء الذكر.
بالمناسبة .....الخدرة الدقاقة مع اللغات السودانية لغير الناطقين بها عيبها لي.
Post: #35 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 12:29 PM Parent: #28
حبيبنا احمد الشايقي
تحايا واشتياقات بالكوم ..
Quote: لو نشرت صحيفة أخرى (كصحيفة الميدان مثلاً) مثل هذا الإعلان لرأيت هيئة علماء السودان في الشوارع تقود المظاهرات وتنادي بنفي كل من يحمل توجه (صحيفة الميدان) خارج البلاد أو ربما خارج الكرة الأرضية ...
لكن الوزارة الكريمة حلال عليها والإنتباهة معروف أنها فوق القانون .. ومع ذلك فإنها تشكر على الاعتذار أما البرلمان ونائبه دفع الله حسب الرسول فهم لا يرون مثل هذا الإعلان ...
أحمد الشايقي
تجدني أتفق معك فيما ذهبت اليه ولكن مع ذلك ليست هذه فكرة البوست حاول تشوف للجانب الاخــر .. يا الشايقي ما معقولة ياخ كل ما العرب ديل يقوموا يجيبوا سيرة السواد نقوم نســـكلـــب ونبكي واي دقونا .. واي نبذونا اعتزازنا بأنفسنا مفروض يكون قيمة كبيرة عندنا ولا شنو؟
**** عباس محمود
التحايا النواضر يا حبيب ..
Quote: بالمناسبة .....الخدرة الدقاقة مع اللغات السودانية لغير الناطقين بها عيبها لي.
والخدرة الدقاقة ليس فيها ما يعيبها ولكن مزاااج مني ساي بحب الحمار والبياض ياخ .. يا عباس أقرأ البوست كويس وما تشطح كما شطح الذين من قبلك وانا ما عارف المشكلة شنو في واحد يقول عايز مره بيضاء ولا سكرتيرة جميلة .. بطريقتكم دي انتوا بتنقصوا من قدر بناتنا ياخ
يا عباس الجداد دا مش لحم ابيض؟ وتييييييييييييييب الجداد واحد في السودان ولا غيره .. وما يميزه في السودان طريقة الطبخ
كن بخير
*** جمال يا حبه
Quote: بعدين تعال هنا .. القال ليكـ منو الدعوه عرس .. يأخ دي طقطيق ضهر .. وبدون أي فاتورة ... بعدين دي طقه .. وديكـ طقه .. فماتضرب المثل بين الفيل والنمله يأخ .... اوعكـ تقول لي النمله ياتا ؟؟ ........
لكن لقيتك من القوز صحي صحي .. والله صحي هســـي كلامك الفوق دا (غير المقتبس) ما مشاغله راسها عديييييييييل عاين يا جمال الحاجة دي موجودة عندنا بكثرة والبياض ماف زول ما عايزه اتا ماك شايف بيناتنا ديل يشيلن ويتجلبطن بالكريمات أها تفتكر لشنو يعني؟!
Quote: تهديفه في التمنيات ....
يشهد الله نفسنا قام من العنصرية دي .....
قصدك زي قووون الثعلب في يور ....... وين العنصرية هنا يا حبيبنا؟
مش على كيفي دايرها بيضاء ... والله صحي
___
Quote: سارع بالذهاب إليها فهي فموجودة .. في ديوان أبي نواس ..
Post: #52 Title: Re: عايز لي مره بيضاء وشعرها طويل وبت ناس! Author: محمد طه الحبر Date: 03-23-2013, 04:08 PM Parent: #28
الصدر كيف لازم تكون دفع امامي ولا 4X4 امامي وخلفي
الله يجازي الكان السبب تحياتي ليك اخ الأمين وعبرك لصاحبي الضلالي ناصر حسين محمد
Post: #29 Title: Re: عايز لي مره بيضاء وشعرها طويل وبت ناس! Author: جمال ود القوز Date: 03-23-2013, 10:14 AM Parent: #25
كدي عيب لي الخدوريه ... الخدار أقعد جالس .. والبياض لمحة فارس ........... يا ... ياعنصري يامتقيح .........
ـــــــــــــــــــــــــــــــــــــــــ
بعدين تعال هنا .. القال ليكـ منو الدعوه عرس .. يأخ دي طقطيق ضهر .. وبدون أي فاتورة ... بعدين دي طقه .. وديكـ طقه .. فماتضرب المثل بين الفيل والنمله يأخ .... اوعكـ تقول لي النمله ياتا ؟؟ ........
تهديفه في التمنيات ....
يشهد الله نفسنا قام من العنصرية دي .....
Post: #33 Title: Re: عايز لي مره بيضاء وشعرها طويل وبت ناس! Author: Nazik Eltayeb Date: 03-23-2013, 11:08 AM Parent: #29
انا ايضاً انصح بالنشر في الانتباهة
----------------------------- كان الانقاذ دي استمرت امانة ما الطيب مصطفى يدق الجرس في سوق نخاسة الرقيق الابيض كان اصلي كان معدل وكله بثمنه العنوان: وسط الخرطوم جنب المسلخ المخصص لذبح الحيوانات السوداء اللون
Post: #34 Title: Re: عايز لي مره بيضاء وشعرها طويل وبت ناس! Author: الصادق عبدالله الحسن Date: 03-23-2013, 11:52 AM Parent: #33
- نضت عنها القميص لصب ماء فورّد وجهها فرط الحياء وقابلت الهواء وقد تعرّت بمعتدل أرق من الهواء ومدت راحـة كالمـاء منها إلى مـاء معـد في إناء فلما أن قضت وطراً وهمَّت على عجل إلى أخذ الرداء رأت شخص الرقيب على التداني فأسبلت الظلام على الضياء فغاب الصبح منها تحت ليل وظل الماء يقطر فوق ماء فسبحان الإله وقـد براهـا كأحسن ما يكون من النساء
موجودة
وبنت ناس ومن النساء
سارع بالذهاب إليها فهي فموجودة .. في ديوان أبي نواس ..
هاك هاتين القصتين عن إشتراط الصفات في معدن الزوجات :
خالد بن صفوان عندما وجد إمرأة خارج مسجد في البصرة تعمل كخاطبة ، فأتاها و قال لها :
أريد أن أتزوج من إمرأة فأنظري لي كما أصف لك...... فقالت : صفها لي... فقال : أريدها بكراً كثيب أو ثيباً كبكر ، مليحة من قريب و فخمة من بعيد ، حَصانة عند جارها ، و ماجنة عند زوجها ، كانت في نعمة فأصابتها فاقة .. ففيها أدب النعمة و ذل الحاجة ، لها عقل وافر و خلق طاهر و جمال ظاهر ، صَلْتَة الجبين سهلة العرنين سوداء المقلتين نبيلة المعتقد كريمة المحتد رخيمة المنطق لم يداخلها صلف و لم يشن وجهها كلف ، ريقها أريج و وجهها بهيج تنثني تثني الخيزران و تميل ميل السكران ، إذا إجتمعنا كنا أهل دنيا و إذا إفترقنا كنا أهل دين و آخرة.
فقالت له الخاطبة : لقد وجدتها لك. فقال أين ؟ قالت له : في الرفيق الأعلى من الجنة ، فإن مثل ما طلبتَ لا توجد في الدنيا.
كما يقال أن خالد بن صفوان هذا نفسه ، خطب إمرأة فقال لها : أنا خالد بن صفوان ، و حسبي و نسبي كما تعرفينه ، و كثرة مالي قد جاءك خبره ، و عندي خصال سأوردها لك ، فإما قبلتي بي أو تباعدت عني.
فقالت : ما هي خصالك ؟
فقال : إن المرأة الحرة إذا دنتْ مني ، ملَتْ مني ، و إذا تباعدتْ عني أعَلَّتْني و لا سبيل إلى درهمي و ديناري. ، و تأتيني ساعة ملل ، لو أن رأسي بين يدي لرميتها.
قالت : فيك بحمد الله خصال لا نرضاها لبنات إبليس فإنصرف رحمك الله.
***
غايتو يا البشاري ، أنا من أنصار خالد بن صفوان دة.
كن بخير
Post: #46 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 03:08 PM Parent: #38
أوووووووووو الريس ابو جهينة
حبابك ألف ياخ وشنو من ديكـ وعيييييييييييييك
Quote: عفيت منك يا البشاري
أنا كنت قايل روحي براي ، أتاريك عندك نفس الطموح
عاين جاي يا ريس كل زول حر في خياراته ولما الزول يحدد الشكل العايزه ما معناتها عنصرية أبداً والله والناس اغلبها معانا فشـــنو ....... سير سير يا ريس ونحن وراك
Post: #36 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 12:45 PM Parent: #33
نازك الطيب ..
تحايا واحترامات بالكوم ..
Quote: انا ايضاً انصح بالنشر في الانتباهة
ليه الانتباهة بس؟ يعني عشان نشرت الاعلان دا .. هســـي يا نازك في ذمتك دي لو أي زول سوداني عايز ليهو سكرتيرة مش كان ممكن يخت نفس الاعلان دا؟ وهل الحاجة موجودة عندنا في مجتمعنا ولا لا؟ طيب يا نازك .. البياض والحمار دا عقدة متأصلة عندنا وفي كل انحاء السودان بالذات عندنا نحن الرجال وهذا لا ينكره الا مكابر أو مجافي للحقيقة الانتباهة ليست قدوة لنا .. ولعلمك أنا استنكرته الاعلان لكن الحيرني وزعلني أكتر هبتنا دي لأن العرب ديل نكأوا الجرح البوجعنا اعتزاز بسوادنا وسمرتنا محل شك كبير يا نازك (رجال/نساء) وحاجات زي ما مفروض تأثر علينا لو صحي نحن بنعتز بخدرتنا ولا شنو؟ طيب كريمات تفتيح البشرة وحقن البنسلين .... الخ الخ لزومها شنو لو المسألة دي ما مسببه لينا عقده وعقدة متأصلة فينا كمان .. ...
شوته ضفاري: _________
طيب يا نازك انت وكثيرين مما ساقتهم عواطفهم للتعليق دون فهم مقاصد البوست دا .. هل لما الزول يقول عايز ليهو سكرتيره ولا مره بيضاء وجميلة الشكل هل دي عنصرية في نظرك ونظر الكثيرين؟
إن كانت اجابتك بنعم فتلك عنصرية منكم ايضا تجاه اصحاب البشرة البيضاء والله صحي :)
.. .. خروج آمن: _______
Quote: كان الانقاذ دي استمرت امانة ما الطيب مصطفى يدق الجرس في سوق نخاسة الرقيق الابيض كان اصلي كان معدل وكله بثمنه العنوان: وسط الخرطوم جنب المسلخ المخصص لذبح الحيوانات السوداء اللون
لا حاجة لي بالتعليق على ما تفضلتي به في المقتبس أعلاه لأن قلمي وحرفي يحددان أين موقعي بالضبط مما ذكرتي
كوني بخير
Post: #37 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 01:00 PM Parent: #36
Quote: واحد ساخر قابل واحد عايز يتزوج ومواصفاته نفس مواصفاتك دي!! فرد عليهو المسطول والله الا نعرس ليك دحيشة عمي أحمد بشير دي !!! وكان لي احمد بشير دحيشة مولودة جديدة بيضاء وعيونا كبار وفيها كل مواصفات الجمال .هههه
كخخخخخخخخخخخخخخخ الدحشه عديل يا حبيب ما عصرته على بنياتنا ديل ياخ
____
أحمد أبو رباب
Quote: يا البشاري طلبك متوفر في المغرب بدون إعلان وعلى الطبيعة-- ما تعتب حالك هنا زي تحلية الخليج للموية -- عايز فلاتر وتبخير -- وأمكانيات
وفي السودان متوفر يا احمد بدون فلاتر وبدون تبخير ولعلمك ماف أحلى من السودانية أيا كان لونها بس اخوك بحب البياض ..
___
Abu Mohd Foad Mohd
Quote: ** ود موسى البشارى.. ** سلام ومساءك خير.. ## مواصافاتك ناقصه :- لم تحدد عدد الصور وأوضاعها ,, ماذا بشأن العمليات الجراحيه السابقه ؟؟ لم تحدد المواصفات القياسيه للبودى من الناحيه الأماميه العلويه (مقاس من 30 الى 38) - الخلفيه دش ولى عادى - الإستخدام السابق للعروس (إستعمال مُغترب) (إستعمال تجار) - لك الود والتقدير -
عندك 6 شنكل ولا شنو؟
___
Awad Osman
Quote: يا بشاري نحكي ليك نكته المغرتب القال لاهله داير مره بيضاء وطويله قاموا اهلوا رسلوا ليه تلاجه هههههه المواصفات دي في بلدنا مافي يا اللخو
رش النكته يا عمكـ لأنك لغاية هسي في البر بكرة كان بقيت عضو معانا ما بتقدر ترشها .. والله صحي
____
Mohamed Elmokhtar Mohamed
يا عمكـ الرابط ما اشتغل معاي ...
Post: #39 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 01:11 PM Parent: #37
الناس البقولوا يمشــوا البنات الخدر بس ... دي برضو ما عنصرية لو افترضنا إنو الواحد لما يطلب ليهو مره بيضاء سكرتيرة ولا زوجه؟ .. ..
النحكي ليكم الحكاية دي عندنا عمنا كبير عمده الحلة (ابراهيم كابر) عليه رحمة الله كان زول حكيم جدا وقيادي محنك ..
في يوم من الايام ناس الحلة اتلموا وقالوا ليهو يا عمده ياخ نحن عايزين نوحد المهور وكلها نخليها 150 جنيه بس الفكرة عجبت الجمهور وكلهم قالوا والله فكرة طيبة ياخ
اها عمنا دا الله يرحمه وببعد نظر بعيد قال ليهم: خلاص كملتوا كلامكم؟ الجماعة : ايوا يا عمدة انت رايك شنو؟ عمنا ابراهيم كابر(الله يرحمه): يا جماعة كلامكم دا ما صاح زي بنات فلان دا أعملوهم ب 100 جنيه وزي بنات علان داك اعملوهم ب 150 جنيه وزي بناتي أنا دا اعملوهم ب 500 جنيه ........ لأنو بطريقتكم دي الشباب ح يعرسوا البنات السمحات بس والشينات ح يبورن ويعنسن .......
Post: #41 Title: Re: عايز لي مره بيضاء وشعرها طويل وبت ناس! Author: عادل الباهي عبدالرازق Date: 03-23-2013, 01:20 PM Parent: #39
Quote: عايز لي مره بيضاء وشعرها طويل وبت ناس!
والله يا الامين ياخوي قالوا أذا أطفأت الانوار تساوت النساء وأقول قولي هذا وجلابتي في خشمي ويافكيك
سلام ا مين ليك ولى ضيوفك البوست ده دمو خفيف مع بوستات الدقشمان الماليه المنبر ... حقيقة عن نفسى انا شيافه انو من حق اى انسان يحدد عايز شنو ... ويختار على كيف المواصفات البتنفع معاهو ... عندى صديق عزيز جدا جدا اتزوج الى الان تلات مرات ... مافى ولا واحده منهم كان اللون حقها فاتح ... طبعا السودانيات مابنقدر نقول عليهم لونم ابيض المهم الدايره اقولو انو الاختيار حق اصيل للانسان ... واصلو انا ماشيافه انو فيها اى عنصرية عادى جدا ناس تحب اللون الابيض ... وناس تانية كرهتا فى الدنيا اللون الابيض وبتختار الاسمر .... والقصه الحكيها هسه والله العظيم حصلت جد جد وانا شاهد عيان عليها ... واحد صديقنا دبلموماسى سابق وبيحمل مؤهلات علمية رفيعة جدا ... وعازب كنا معزومين فى بيت اسرة صديقة ... حقيقة كان قاعد متلش ومابيكلم كتير ولمن سالناهو مالو ...قال ا لينا نو العزومه واللمة الاسرية دى خلتو يحن لجو الاسرة ... وحسستو انو كبر وانو بدا يفكر جديا فى انو يستقر ويعمل اسرة ... قام زوج صحبتى طوالى قاليهو ده احسن قرار ممكن ان تتخذو هو الاستقرار وتشوف ليك بت حلال ...طوالى قان نط وقال انا عايزكم تساعدونى ... وطلبى ماكتير ابدا طبعا احنا اتوقعنا وعلى حسب نظراتنا ليو انو شرطو الاساسى انها تكون على قدر من التعليم يسمح بتجاوب فكرى يعنى ماشرط تكون فى نفس مستواه الاكاديمى ... لكن على الاقل عندها جزء منها والله لمن قال موصافاتو كلنا اتخلعنا ... قال عايز واحدة لونا يكون فاتح شديد شديد ... وتكون مكمله السماحه لدرجه انها لمن تجى مارة الناس دى كلها تتلفت ليها ...وكمان تكون من اسرة معروفه والمهم شديد فى شكلها عايز العيون سوده شديد وكبيرة .... والله العظيم ده كان الطلب حقو ماجاب سيرة التعليم ده من قريب ولابعيد واظنو ماكان عندو مانع تكون امية ... وبالمناسبه هو كل الموصفات الشكليه الطلبا ده ماكان بيملك فيهو ولا حتى صفه واحده ...وعلى النقيض منها تماما قامت طوالى صاحبتى الاحنا كنا ضيوف عندهم قالت ليهو اسمع انت زمان كان عندك رقشه لمن كنت دبملوماسى ... هسه ممكن تورينا العندها الموصفات دى كلها ممكن ترضى بيك على ياتو اساس ... تصدقو صديقنا ده ليوم الليله قاعد عازب .... تسلم يارب ...
Post: #43 Title: Re: عايز لي مره بيضاء وشعرها طويل وبت ناس! Author: وضاحة Date: 03-23-2013, 02:35 PM Parent: #42
ايمنوف اخوى
انا زاتى عاوزة راجل ابيض ويكون طووووويل اهم شى عندى الطول ويكون عريض المنكبين
وشعروا نااااعم سبيبيى نازل فى كتفوا واها تانى شنوا يا بت يا وضحة ايوا ويكون عيونوا كبار وانفوا رومانية ويجد السباحة وركوب الخير
ان شاء ما يكون عندوا شهادة ولا دخل المدرسة ظاتوا
Post: #44 Title: Re: عايز لي مره بيضاء وشعرها طويل وبت ناس! Author: Hatim Alhwary Date: 03-23-2013, 02:46 PM
Post: #49 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 03:57 PM
Quote: ايمنوف اخوى
هلا هلا هلا وضاحة
Quote: انا زاتى عاوزة راجل ابيض ويكون طووووويل اهم شى عندى الطول ويكون عريض المنكبين
شلولخ .....
Quote: وشعروا نااااعم سبيبيى نازل فى كتفوا واها تانى شنوا يا بت يا وضحة ايوا ويكون عيونوا كبار وانفوا رومانية ويجد السباحة وركوب الخير
ان شاء ما يكون عندوا شهادة ولا دخل المدرسة ظاتوا
تستاهلي يا وضاحة وربنا يديك لامن يرضيك من حقك تعزلي وتتمني يا قولات حبــوبتي حبوبتي قالت لي: يا ولدي انا جني وجن الولاد الشينين .... فشـــنو أوع تدقســــي .... والله صحي
Post: #45 Title: Re: عايز لي مره بيضاء وشعرها طويل وبت ناس! Author: جمال ود القوز Date: 03-23-2013, 03:05 PM Parent: #42
Quote: قصدك زي قووون الثعلب في يور ....... وين العنصرية هنا يا حبيبنا؟
مش على كيفي دايرها بيضاء ... والله صحي
يأخ ده توظيف سيئ وتوصيف أسوأ .. ديكـ كانت شنقه .... ثم ثانين انا في ( ديكـ )الأيام كنت دريفون هليفيت ساي ... ولم أبلغ (الرشد ) بعد ........ فارعوي ياهذا .. لايجوز ولاينبغي لكـ معايرتي بي قصة يور والثعلب دي ..
Quote: وين العنصرية هنا يا حبيبنا؟
نَفسنا قام ونِفسنا مرقت من الناس ( اللي مش إتـا ) ... الراكبه موجة العنصرية .. المنطلقة اليومين ديل في سايبر السجم والرماد ده .. ويحسبون كل صيحة عليهم .... تفتح قدومكـ ساي .. يقول ليكـ إتا عنصري .. يأخي كان إتا ماعنصري ذاتو .. قسم .. يبقوكـ عنصري .. شفت محن زي دي ..........
ـــــــــــــــــــــــــــــــــــــ اتنين في ( 1 )
قون الثعلب الفي التمنيات داكـ ... علي بالطرباق .. أجعصها مهاجم مابيقدر يجيبو .. يأخ ده خلي كل الهلالاب تجيهم كاروشه ... ..
يور رحمه الله عليه كان إنسان خلوق .. وقمة في التصالح مع نفسه ومع مجتمع الهلال ..
Post: #47 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 03:36 PM Parent: #45
عادل الباهي حبابك يا صاحب وبركة الجيت ... عسل أنت وبسكويت
Quote: والله يا الامين ياخوي قالوا أذا أطفأت الانوار تساوت النساء وأقول قولي هذا وجلابتي في خشمي ويافكيك
دحين اتا يا عادل أخوي حياتنا دي كلها نقضيها ليل في ليل ولا شنو؟!
ذكرتني نكته مونج العرس ليهو بت عرب اها قام جاب الشيلة والنسوان زعلانات كيف مونج يعرس بت العرب دي قامن قالن ليهو : يا مونج يعلم الله شيلتك ما قالت كلام علا نافصة شيتاً واحد بس مونج: اسي شيله دا ناقص شنو؟ والله انتوا يا مندكوروا كلام بتاعكم كتير خلاص النسوان : يا مونج الشيلة دي ناقصة قمصان نوم بس.. مونج: وه ... واااااااااااه ... هو منو بخلي ينوم زااااتو .. ..
___ بعد دردقـتــه اخوكـ يلا جهّــز عكازك المضبب وخليك قريب يا فقر اتا
Post: #65 Title: Re: عايز لي مره بيضاء وشعرها طويل وبت ناس! Author: صديق عيسى صالح Date: 03-24-2013, 09:46 AM Parent: #47
Quote: النسوان : يا مونج الشيلة دي ناقصة قمصان نوم بس.. مونج: وه ... واااااااااااه ... هو منو بخلي ينوم زااااتو
Post: #56 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 08:04 PM Parent: #45
ابو الجيم يا ود القوز
Quote: نَفسنا قام ونِفسنا مرقت من الناس ( اللي مش إتـا ) ... الراكبه موجة العنصرية .. المنطلقة اليومين ديل في سايبر السجم والرماد ده .. ويحسبون كل صيحة عليهم .... تفتح قدومكـ ساي .. يقول ليكـ إتا عنصري .. يأخي كان إتا ماعنصري ذاتو .. قسم .. يبقوكـ عنصري .. شفت محن زي دي ..........
والله يا ابو الجيم من ناحية نفسنا قام فهو قام وزي ما انت شايف اخوك أدوهو كع كرع في راسه في بداية البوست وطلعت عنصري قذر ... المهم يا زول ما علينا كل زول حر في خياراته الشباب ديل نصهم ضارب ليك المكيفات والضللة الاعلان واضح ولوظائف محددة وشوف كم واحد ممكن تشيل نفسها واسرتها وكم ارملة ومطلقة ممكن تستفيد من الاعلان دا وعييييييييييييك ياخ الشغل اصلو ما عيب وما عيب الا العيب ذات نفسه
Quote: قون الثعلب الفي التمنيات داكـ ... علي بالطرباق .. أجعصها مهاجم مابيقدر يجيبو .. يأخ ده خلي كل الهلالاب تجيهم كاروشه ...
والله يا جمال كان جيت للنصيحة هم قونين واحد منهم حق الثعلب دا والتاني بتاع مبارك سليمان غايتو القونين ديل مريحني جنس راحة هههههههههههههههه
تحياتي وودي الذي تعلم
Post: #48 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 03:47 PM Parent: #42
الفاضلة ماجدة عوض خوجلي
حبابك وسعداء بتشريفك البوست ..
Quote: سلام ا مين ليك ولى ضيوفك البوست ده دمو خفيف مع بوستات الدقشمان الماليه المنبر ... حقيقة عن نفسى انا شيافه انو من حق اى انسان يحدد عايز شنو ... ويختار على كيف المواصفات البتنفع معاهو ... عندى صديق عزيز جدا جدا اتزوج الى الان تلات مرات ... مافى ولا واحده منهم كان اللون حقها فاتح ... طبعا السودانيات مابنقدر نقول عليهم لونم ابيض المهم الدايره اقولو انو الاختيار حق اصيل للانسان ... واصلو انا ماشيافه انو فيها اى عنصرية عادى جدا ناس تحب اللون الابيض ... وناس تانية كرهتا فى الدنيا اللون الابيض وبتختار الاسمر .... والقصه الحكيها هسه والله العظيم حصلت جد جد وانا شاهد عيان عليها ... واحد صديقنا دبلموماسى سابق وبيحمل مؤهلات علمية رفيعة جدا ... وعازب كنا معزومين فى بيت اسرة صديقة ... حقيقة كان قاعد متلش ومابيكلم كتير ولمن سالناهو مالو ...قال ا لينا نو العزومه واللمة الاسرية دى خلتو يحن لجو الاسرة ... وحسستو انو كبر وانو بدا يفكر جديا فى انو يستقر ويعمل اسرة ... قام زوج صحبتى طوالى قاليهو ده احسن قرار ممكن ان تتخذو هو الاستقرار وتشوف ليك بت حلال ...طوالى قان نط وقال انا عايزكم تساعدونى ... وطلبى ماكتير ابدا طبعا احنا اتوقعنا وعلى حسب نظراتنا ليو انو شرطو الاساسى انها تكون على قدر من التعليم يسمح بتجاوب فكرى يعنى ماشرط تكون فى نفس مستواه الاكاديمى ... لكن على الاقل عندها جزء منها والله لمن قال موصافاتو كلنا اتخلعنا ... قال عايز واحدة لونا يكون فاتح شديد شديد ... وتكون مكمله السماحه لدرجه انها لمن تجى مارة الناس دى كلها تتلفت ليها ...وكمان تكون من اسرة معروفه والمهم شديد فى شكلها عايز العيون سوده شديد وكبيرة .... والله العظيم ده كان الطلب حقو ماجاب سيرة التعليم ده من قريب ولابعيد واظنو ماكان عندو مانع تكون امية ... وبالمناسبه هو كل الموصفات الشكليه الطلبا ده ماكان بيملك فيهو ولا حتى صفه واحده ...وعلى النقيض منها تماما قامت طوالى صاحبتى الاحنا كنا ضيوف عندهم قالت ليهو اسمع انت زمان كان عندك رقشه لمن كنت دبملوماسى ... هسه ممكن تورينا العندها الموصفات دى كلها ممكن ترضى بيك على ياتو اساس ... تصدقو صديقنا ده ليوم الليله قاعد عازب .... تسلم يارب ...
يا ماجدة مع الاسف كلنا ذلك الرجل (الا القله) حاجة كده لا شعورية عندنا وما عارف القال لينا الجمال في البياض منو
تسلمي ياخ على رفد البوست بهذه الحكاية الواقعية جدا
Post: #51 Title: Re: عايز لي مره بيضاء وشعرها طويل وبت ناس! Author: عمر مصطفى مضوي Date: 03-23-2013, 04:07 PM Parent: #48
اللمين البشاري / سلام ،،،،
صديقنا مغترب وابوهو إمام مسجد رسل ليهو وطلب منو يخطب ليهو وطبعا المواصفات كعادة مواصفات المغتربين منذ الازل قاليهو عايز لي واحدة تكون صفراء صفار فاقع وطبعا بكر وشعرها طويل وعيونها كبار ومليان حبة ،، رد عليهو ابوهو قاليهو والله ياولدي مواصفاتك دي إلا في بقرة بني إسرائيل .
تحياتي ،،،،،
Post: #53 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 04:19 PM Parent: #51
زمراوي
تحياتي ،،، ودي كيف معاك عيال اب جويلي
___
محمد طه الحبر
كيف حالك ياخ ...
Quote: الصدر كيف لازم تكون دفع امامي ولا 4X4 امامي وخلفي
الله يجازي الكان السبب تحياتي ليك اخ الأمين وعبرك لصاحبي الضلالي ناصر حسين محمد
تحياتك اعتبرها وصلت يا حبيب اتا مريخابي ولا شنو؟
___
Hatim Alhwary
حاتم بالله شوف أسمر جميل دي بقت حلوة كيف عند زينة افتميوس
__
عمر مصطفى
سلامي وتحياتي،،
Quote: صديقنا مغترب وابوهو إمام مسجد رسل ليهو وطلب منو يخطب ليهو وطبعا المواصفات كعادة مواصفات المغتربين منذ الازل قاليهو عايز لي واحدة تكون صفراء صفار فاقع وطبعا بكر وشعرها طويل وعيونها كبار ومليان حبة ،، رد عليهو ابوهو قاليهو والله ياولدي مواصفاتك دي إلا في بقرة بني إسرائيل .
كلنا ذاك الرجل ياخ وخصوصاً المغتربين ... والله صحي
Post: #54 Title: Re: عايز لي مره بيضاء وشعرها طويل وبت ناس! Author: Salah Habib Date: 03-23-2013, 06:18 PM Parent: #1
اللمين اخوى من حقك تطلب المواصفات البتعجبك وتدخل مزاجك طالما انك عاوز تتزوج بس ابو جمال دا عايز بيهن شنو؟؟ ولا اظنه فاتح مكتب للزواج مش مكتب استخدام!!
Post: #55 Title: Re: عايز لي مره بيضاء وشعرها طويل وبت ناس! Author: Nazik Eltayeb Date: 03-23-2013, 08:01 PM Parent: #54
اللمين هوي خت الرحمن في قلبك ياخي انا في صفك لكن والله ما قايلاك بقيت تجليها ثابتة ارجع اقرأ كلامي تاني.... كلمة اصلي و معدل دي ما لاقتك.....بعد دا البس الازرق و الابيض.... الاحمر و الاصفر خليهو و تاني مافي اي زول يستغل بوستك لتوصيل رسالة ... ثمح
بس عجبتني قصة خروج آمن دي ------------------ عارف يا اللمين معظم القطاع الخاص في السودان شغال بالمبدأ دا (القطاع الحكومي شغال واسطة ساي ودي ميزة الواحدة كان قرنتية تجد وظيفة) اديك مثال حقيقي شابة على صلة بي ملتزمة جدا و شعرها طويل جدا تقدمت لوظيفة مضيفة في شركة طيران سودانية محلية الشرط كان ان تترك شعرها منسدلا بدون طرحة فرفضت وفقدت الوظيفة شقيقتها تقدمت لوظيفة استقبال في فندق كبير طلب منها نفس الطلب و ان تلبس بنطالا مع الجاكت بدلا من الاسكيرت رفضت و فقدت الوظيفة كذلك لاحظت ان معظم موظفي الاستقبال في الفنادق و موظفي المبيعات في الشركات الكبرى (سيارات اجهزة كهربائية) الذكور من ذوي البشرة الفاتحة حتى خيل الي ان المؤهلات في هذا البلد لهكذا وظائف هي البشرة الفاتحة و الجل فمن حقك ياخ تأمن مستقبل اولادك بدل ما يقعدوا يستجدوا الناس اعطوهم او منعوهم
Post: #57 Title: Re: عايز لي مره بيضاء وشعرها طويل وبت ناس! Author: محمد محمود محمد Date: 03-23-2013, 08:25 PM Parent: #55
الأخ الأمين البشاري_____كيف الأحوال عندنا صاحبنا راجل على نياتو خالص..بيحكي لي ...الكلام ده في التمانينات..عصرية كده وهو راقد في الحوش و خاتّي سفّة كاربة ... جات داخلة جارةً ليهم ..زولة كمّلت القراية و ما اشتغلت ...وكانت ليها خالة ..من اجمل مذيعات التلفزيون الزمن داك.. الزول عايز يتظارف ..قال ليها (شنو لسة ما لقيتي شغل؟).. قالت لبه (لسة والله) قال ليها (ما تكلمي خالتك تشوف ليك طريقة معاها في التلفزيون) عاينت ليه بدلال كدة وردت(التلفزيون ده ما عايز مواصفات معيّنة و..كدة)...وانتظرت الأجابة ...وجاتا الطامة من زولنا ...قال لي بدون ما افكر قلت ليها (لالالالا والله في مذيعات كتيرااااات شينات!!!!!) قال ماعرفت نفسي جليطت ألأ بعد نظرت لي نظرة توقِدْ نار ..وهزت راسا و مشت .. ________تحياتي
Post: #58 Title: Re: عايز لي مره بيضاء وشعرها طويل وبت ناس! Author: عثمان الشريف اسحاق Date: 03-23-2013, 08:32 PM Parent: #57
مشتاقين وكدا يا امينوف وعلك طيب
Post: #60 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-24-2013, 07:52 AM Parent: #55
نازكـ الطيب
حبابك من تاني ،،
Quote: اللمين هوي خت الرحمن في قلبك ياخي انا في صفك لكن والله ما قايلاك بقيت تجليها ثابتة
هههههههههههههههه ما تخافي أخوك قلبو كبيييييييييير وفيهو الرحمن اما التجلية وهي ثابته فأغلب الظن من الكبر والزهايمر يا نازك
Quote: عارف يا اللمين معظم القطاع الخاص في السودان شغال بالمبدأ دا (القطاع الحكومي شغال واسطة ساي ودي ميزة الواحدة كان قرنتية تجد وظيفة) اديك مثال حقيقي شابة على صلة بي ملتزمة جدا و شعرها طويل جدا تقدمت لوظيفة مضيفة في شركة طيران سودانية محلية الشرط كان ان تترك شعرها منسدلا بدون طرحة فرفضت وفقدت الوظيفة شقيقتها تقدمت لوظيفة استقبال في فندق كبير طلب منها نفس الطلب و ان تلبس بنطالا مع الجاكت بدلا من الاسكيرت رفضت و فقدت الوظيفة كذلك لاحظت ان معظم موظفي الاستقبال في الفنادق و موظفي المبيعات في الشركات الكبرى (سيارات اجهزة كهربائية) الذكور من ذوي البشرة الفاتحة حتى خيل الي ان المؤهلات في هذا البلد لهكذا وظائف هي البشرة الفاتحة و الجل
ما ياهو دا كلامي نفسه .. حلال علينا وحرام على بلابلهم الدوح وقصة كل ما العرب ديل يجيبوا سيرة السواد وسمرة لون البشرة نقعد نكورك دي ما حلوة يا نازكـ ... نحن سمرتنا وسوادنا من لهيب نار الشهامة وبرضو الناس ما فكرت في الجوانب التانية ياخ أي زول في السودان عايز اطلع بره عشان الحياة بقت بالجد صعبة ودي فرص عمل شريفة بغض النظر عن طريقة الاعلان طيب ما في شباب طلعوا من البلد وهاجروا باساليب أكثر مهانة من هؤلاء ليه ما علمنا الغاغة دي؟
تحياتي
Post: #59 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-23-2013, 10:06 PM Parent: #54
Quote: بس ابو جمال دا عايز بيهن شنو؟؟ ولا اظنه فاتح مكتب للزواج مش مكتب استخدام!!
ابو صلاح
تحياتي ،، والبنات ديل ماشات يشتغلن ياخ ومن حق صاحب العمل تحديد المواصفات التي تعجبه ايضاً طالما ليس هناك قانون يجرمه ولا شنو؟ ابو جمال وسيط وكشح الاعلان زي ما هو وطالما الحاجة دي بنمارسها بيننا كسودانيين ليه زعلتنا لما جات من العرب؟
Post: #61 Title: Re: عايز لي مره بيضاء وشعرها طويل وبت ناس! Author: عبد الحكم ابراهيم الحاج Date: 03-24-2013, 08:29 AM Parent: #59
انت نسيت اهم حاجة يااخى - يكون عندها فلجة فى سنونا ( والله صحى )
Post: #62 Title: Re: عايز لي مره بيضاء وشعرها طويل وبت ناس! Author: Tragie Mustafa Date: 03-24-2013, 08:44 AM Parent: #59
الامين بشاري سلامات
ويا الامين الاعلان عنصري
ولو انتبهت لغويا جيا ستجد فيه اساءه
خليك من المحتوي و الهو اكدت انه بيشبه طلبك اياهو
عارف من ناحيه لغويه طلبك انت ده ما فيه اساءه
لكن الاعلان بصيغته الغبيه تلك فيها اساءه.
انت كتبت:
Quote: عايز لي مره بيضاء وشعرها طويل وبت ناس!
بينما اعلان الانتباهه قال:
Quote: اان تكون جميلة الشكل وغير داكنة البشرة
عارف معني الكلام ده شنو؟! هو اقرار انه هنالك جميلات في الشكل ولكنهن داكنات البشره!!
يبقى اقر لهن واعترف بانهن جميلات
ولكنه وضح ان مشكلتهن داكنات البشره!
بينما انت بحياد بلا تحذير بشع مثل ذلك قلت انك ترديها بيضاء!
يا امين خليك من نحن معقدين ولا بطيخ معاك
نحن فقط انتقلنا لمرحلة الدقه في الالفاظ ولعلمك هذه كل العالم شغال بيها.
فده النهم ضحايا للفضائيات العربيه البتمجد اليوم كله في الوان. وما تفتكر انت نفسك ما ضحيه ليها!اكيد قدر ما كنت بتحب اللون الفاتح فالحاله بتكون بقت(كرونيك) بعد الاقامه مع الناس ديل!
وبعترف معاك انه ما نضميك لوحدك وانما نضمي شعب كامل
اها نقومه ونساده يتصالح مع ذاته ولا نيزد مأساته بالاقرار بانه دي فعلا احلام الجميع؟!
وبعدين فاقد الشيء اصلا بيبحث عنه كما يبدو
اما الحمد لله انه الشعوب البيضاء على فكره ممكن تكون اكثر اقبالا على السمروات!
وعلى فكره للشعرا ءالعرب غزل كثيرا في السمار.السمار الحقيقي بتاع(زبيبه) والدة عنتر وليس السمار المدلع بتاع الحناكيش!
في بيت شعر لا اذكره جيدا قرأته قيدما في كتاب اسمه السود و الحضاره العربيه كتاب مهم جدا:
معني بيت الشعر: ان كنا نستحسن الخال في الخد(ويعني الشامه) فيكف بمن هي كلها خال! اي اذا استحسنا السمار في نقطه في الخد فكيف لا نستحسن فيمن كل لونها مثل الخال!
واهشعار كثيره لا اذكرها الآن....
المهم الشكلاته لا بديل لها!
هنا في كندا البيض عندنا بقولوا عن بناتهم البجربوا الرجال السمر:
When She Go Black She Will Never Come Back
وكذلك الرجال السمر اذا جربوا السمراوات فانه لن يعودوا لغيرهن.
فيا امين
نحمد ربنا انه لكل فوله كيال!!
وفي السودان برضو عندنا نفس الامر من يجرب السمر لا يعود لغيرهن.
وقد تذكر جيدا يا امين حينما كان الجلابه يتهمون ناسء الغرب بالسحر لما يتزوجوهن اولادهم
وما كانوا يصدقون انها مودة ورحمه واحترام.
حتى انا شاهدت مره في التلفزيون دارفوريه تتحدث عن الطيب سيخه(وكانت من عرب دافور اعني لهجتها)
قالت الطيب سألنا قال لينا اهلنا في الشمال كانوا بقولوا البمشي الغرب كله ما بيرجع
فانتو ماهو سر سحركم لرجالنا؟!
فقالت الدارفوريه:
قلنا ليه الراجل شن بدور منك غير (الشم و النم) قالت قال يعني شنو؟!
قلنا ليه ان لقي ريحتك طيبه وطعامك طيب ثاني ما بفوتك!!
بينما اهل الشمال ما كانوا يصدقون ويتوهمن ان بالامر سحر!
ومعليش بريتك! بريء ثاني تجيء المولد هههههههههههههههه
Post: #63 Title: Re: عايز لي مره بيضاء وشعرها طويل وبت ناس! Author: Tragie Mustafa Date: 03-24-2013, 08:52 AM Parent: #62
اها حاكمل بري
في بورتسودان في فتره وكأنها موضه
كل ابناء اليميانيه عايزين يتزوجوا سودانيات سمر!
وكل بنات اليمانيه عايزين يتزوجوا رجال سودانين سمر!!
الرجال منهم يقولوا لك بناتنا جمهم ثقيل!(وهذا ليس صحيحا)
و البنات منهم يقولوا لك( رجالنا دمهم بارد) وطبعا هذا ايضا غير صحيح.
المهم اختطلوا باهل البلد فانتوا اجمل السلالات!
وكل منم سيعد بشقه الاسمر و الدماء الحاره التي يرونها في السمر!!
ولسه امين بشاري يقول لك عايزها بيضاء وشعرها طويل!! حاجه تمخول!! هههههههههههههههههه
غايتو نحمد الله هذه العقد في بورتسودان ما عندنا
اسرة التباريز ايراينين كلهم تزجوا حاليا من السودانين
نحمد الله انه (الحب) هو المعيار و الناس بتتزوج اي حاجه المهم تحب.
ولو تأملت في نموذج ابو جيهينه الاول ستجد انه ركز على (الصفات) وليست تضاريس الجسد ولا البوهيه!!
Post: #64 Title: Re: عايز لي مره بيضاء وشعرها طويل وبت ناس! Author: عبد الله عبد العزيز Date: 03-24-2013, 09:36 AM Parent: #63
المشكله شنوا انو الزول اطلب مره بيضاء او خضراء او سوداء حتي ياخي حب الناس مزاهب
Post: #67 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-24-2013, 12:28 PM Parent: #64
صديق حبابك في دارنا جيتاً جيت وشكراً على المتابعة ...
Quote: ولد ابا شكلك خلاص قنعت (بكسر القاف)من خيطك يااخوى نحن متابعين بمزاج باللاى ما تجيب ضقلها مكركب
ابداً يا ول ابا ما قنعته منو ولا حاجة الخيط دا ســـير مرفعين يا ول ابا وبرضو زي أم جلجلك خلق المحنة نعالة السعف(الزعف) توديك ما تجيبك ارقد قفا الخيط ماشـــي مشي سمح الا عادل الباهي كان داير يحرفو
___
الأخت سلافة الصديق ..
سلامي وتحياتي.. وانتي مشيتي بعيد شديد يا اختي أعتقد لو الوظيفة بمثل ما ذهب اليه تفكيريك ما كان اعلنوا عنها اصلاً
Quote: إذا الإعلان بالنسبة ليك ما فيهو حاجة معناها لو عندك أخت أو قريبة بالمواصفات دي وعاوزة تشتغل ما ح يكون عندك مشكلة
دا حنكـ عاضي ساي يا سلافة وحيلة لارهاب المحاور البمنع شنو لو اختي/أختك منطبقه عليها المواصفات تمشي تقدم
Quote: ما ح يكون عندك مشكلة إنها تقدم وتشتغل وكمان يصوروها صور بزوايا مختلفة ( ربما نهود ومؤخرة وشفايف ) ولازم تكون زكية وسريعة الفهم ؟؟؟ يعني شنو ؟؟ ده لزوم الشغل ولا لزوم لو عجبت ليها زول تقوم تتجاوب معاهو سريع وما تعمل فيها البت تقيلة
ما عارف متين ربنا يحلنا من ربط كل اشارة أو كلمة تحتمل عدة معاني بالجنس عارفه ارهبونا من الجنس وبقى يتخيل لينا كل حاجة فيها جنس (قلة ادب) نفس المواصفات دي عند المضيفات ومذيعات التلفزيون وموظفات الخطوط الامامية وبعدين ليه ما افترضتي انهم اختاروا السودانيات لعفتهن مثلاً؟ لو هم أصلا بفتشوا للبياض والجمال والشفايف والصلب .... الخ أعتقد كان مشوا بلد تانية ووفروا على انفسهم عناء البحث في السودان عن موظفات غايتو يا سلافة مرات بتشيلن يديكن وتطبظن بيها عيونكن ... والله صحي :)
Quote: وعليك الله ما تشكر لي الراكوبة في الخريف (الطيب مصطفى وصحيفته)
يلا وين انا شكرته الزول الوســـخ دا؟
Quote: ولك أن تتخيل موقف الجماهير من الصحيفة ومنظر الطيب مصطفى ده لو كان أصلاً طيب .
أنا متخيل منظرنا ونحن متعقدين من لون بشرتنا وسمارها ومصرين انو ما عندنا ناس بيض وسمحين/ات شوفي كم واحدة ممكن تستفيد من الوظيفة (أرملة ، مطلقة ، عانس ، عاطلة ، قرفانه من البلد ومن الطيب دا زاتو) انظري للجانب الآخــر من الاعلان ومدى فائدته ياخ
__ صديق وسلافة ما تحشروا المداخلات في النص بالله هسي يلا .. يلا نكتها من بين المداخلات
Post: #68 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-24-2013, 12:40 PM Parent: #67
اخونا محمد محمود محمد
تحياتي وشكراً لرفد البوست بالحكاية الظريفة دي ياخ
Quote: قال ليها (ما تكلمي خالتك تشوف ليك طريقة معاها في التلفزيون) عاينت ليه بدلال كدة وردت(التلفزيون ده ما عايز مواصفات معيّنة و..كدة)...وانتظرت الأجابة ...وجاتا الطامة من زولنا ...قال لي بدون ما افكر قلت ليها (لالالالا والله في مذيعات كتيرااااات شينات!!!!!) قال ماعرفت نفسي جليطت ألأ بعد نظرت لي نظرة توقِدْ نار ..وهزت راسا و مشت ..
هناك العديد من الوظائف التي تتطلب جمال الشكل وما أظن دي فيها حاجة ..ربنا خلقنا كده والحاجة دي عندنا في سودانا دا ...
كن بخير
****
Quote: مشتاقين وكدا يا امينوف وعلك طيب
تحياتي يا صاحب .. واسمك الطويل الهنا دا اصلو ما واقع لي ياخ وعشان كده حأقول ليكـ شرفت البوست يا حريقه يا حبيب
***
Quote: انت نسيت اهم حاجة يااخى - يكون عندها فلجة فى سنونا ( والله صحى )
عبد الحكم اخوي الفلجة هينه بنسويها كدا خلينا نلم فيها الأول عارف واحدة بتحكي لي قالت مشت لطبيب اسنان عشان تعمل فلجه
تحياتي
***
Quote: المشكله شنوا انو الزول اطلب مره بيضاء او خضراء او سوداء حتي ياخي حب الناس مزاهب
عالم معقــــدة بس يا عبد الله أخوي موضوع عادي الوظائف المطروحة هي وظائف خطوط أمامية وناس الموارد البشرية والتسويق عندهم الحاجات دي علم يدرس عدييييييييييل
Post: #69 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-24-2013, 12:52 PM Parent: #68
تراجي
سلام يا ام حازم وسند وطبعاً متوقع حضورك من امبارح وفي يدك اليمين مقشاشة وفي اليسار مفراكة
بجيك برواقة يا ام حازم وسند والاعلان عادي الفرق الوحيد انو انتشر في جريدة
Post: #70 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-25-2013, 07:59 AM Parent: #69
تراجي
سلامات وها قد عدنا اليك... يا تراجي ما ممكن تحاكمي الناس بسوء النوايا طوالي كده الاعلان هو المسكوت عنه في مجتمعنا الفرق بس المرة دي الطيب مصطفى نشره وبعدين ليه طوالي جاريين لتجارة البشر ... وووو .. وووو ... الخ زي ما قلته لسلافه فوق اختبار كشف الهيئة اختبار اساسي للاختيار لأي وظيفة والاختيار دا من حق صاحب العمل فقط لا غيره .. وبعدين في زول سأل نفسه سؤال : ليه السودان؟ بالرغم من إنهم عارفين الوان بشرة السودانيين ... لو اصلاً كان بفتشوا على بشرة فاتحة وبشرة داكنه اعتقد كان مشوا دولة تانية .. ليه ما نقول هم جوا عشان بفتشوا للاخلاق والامانة والاخلاص .. وكل ما هو جميل ونتصف به... وبعدين الكويتيين انفسهم عندهم اللون الفاتح واللون الداكن وعندهم البدون ألوان .. الحاجة الأخيرة اختيار موظفين الخطوط الأمامية دا علم يدرس وأي زول بكون عايز .. واجهة لشركته او مؤسسته .. وعشان كدا انا ما شايف مشكلة في الاعلان .. ربما الخطأ الأكبر هو الاعلان عن ذلك صراحة في مجتمع لم يتعود الصراحة ويتحسس من ذكر الألوان..
تحياتي
Post: #71 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-25-2013, 08:35 AM Parent: #70
Quote: ووووول يا بشاري ياخ قالوا ليكم عاوزنها بيضاء تسُر الكويتيين وليس السودانيين ، إنت الشلاقة ليك شنو خليك فى الخُضرة الندية ، بعدين وزارة الموارد البشرية مجرد ( وساطة ) للحكومة الكويتية علشان يشوفوا ليهم دولة فيها ( بيض ) بكسر الباء ، لكن لقيتكم بقيتوا ( بيض ) بفتح الباء هههههههههه كما لا يفوتني أن أستغل الفرصة وأُطالب بكري بباسوردي الذي ضاع ! سلام لك ولضيوفك الكرام وضحكتونا والله بتعليقاتكم وأؤكد على ضرورة الإستعانة بمحمد الصائم .
التجاهل .. التجاهل .. التجاهل ..
المتصفحة (مها سليمان) لم تأتي لحوار .. شفتي عشان حسادتكـ دي بكري إن شاء الله ما يرجع ليكـ الباسويرد ..
Post: #72 Title: Re: عايز لي مره بيضاء وشعرها طويل وبت ناس! Author: سلافة الصديق أبو ضفيرة Date: 03-25-2013, 12:24 PM Parent: #67
ح أسألك سؤال واحد يا بشاري .. نوعية البنات العاوزنهم في الإعلان ديل في الكويت مافي ؟ إشمعنا الإعلان جانا في السودان بالقبح ده وكمان جا في أقبح صحيفة ؟ مع معلومة بتقول إنو نحنا شعب شبه متدين وكمان طلب بنات بالشكل ده دايماً بيكون ما مقبول عندنا وبيفسر إنو دي قلة أدب وامتهان للمرأة . أرجو الإجابة . أنا ح أديك سر .. الطيب مصطفى داير يقول والله يا جماعة نحنا ما سود زي ما معروف عننا في العالم وتحديداً العالم العربي والعقد بتاعتو خلتو يجيب إعلان زي ده عشان يتباهى قدام أسيادو العرب ويقول نحنا عندنا بنات بيض وحلوات ، كمان مش الزرق الشينين هههههههههههههه سبحان الله إنت براك قلتها لأنو عقلك الباطن في اعتقادي مليان بالعقد
Quote: أنا متخيل منظرنا ونحن متعقدين من لون بشرتنا وسمارها ومصرين انو ما عندنا ناس بيض وسمحين/ات
وبرضو بتربط السماحة باللون الأبيض !!!
Quote: نفس المواصفات دي عند المضيفات ومذيعات التلفزيون وموظفات الخطوط الامامية
وهنا أحب أضيف ليك إنو الناس اللونهم أبيض بيشتغلو سريع في الوظائف الزكرتها دي والكلام ده في السودان بيحصل بشكل مقرف بيوضح عقد ناس الإنقاذ كلها ، أما الناس اللونهم أسمر بيلقو صعوبة عشان يشتغلو في نوع وظائف زي دي في السودان بالزات المذيعات والمضيفات لأنو ناس الإنقاذ بيفتكرو إنو البنات لازم يكون لونهم أبيض في الشاشة عشان يشرفونا في دول العالم . (ياخي دي عقد ما أنزل الله بها من سلطان) . الكلام ده في أفضل قنوات العالم غير موجود والناس إتجاوزت موضوع الألوان والأشكال والبياض والطول وغيرو . ياخي ماشين للناس ليه ربنا حدثنا عن الموضوع ده وبشكل واضح لكن ناس الطيب والسافرين والفاحشين أمثالو اللي هرونا بالدين كان يقيفو في الآية دي شوية بعدين يجو يتبجحو أو تجي إنت تدافع عنهم ( ومن آياته خلق السموات والأرض واختلاف السنتكم وألوانكم إن في ذلك لآيات للعالمين) . تعرف يا بشاري أنا والمتداخلين المعاي كناس واعيين وفاهمين ، كوننا نعلق على موضوع عندو علاقة بالبشرة واللون ده بيعبر عن البلد الوهم والناس الوهم البيحكمونا والعايشين معاهم ، لكن نعمل شنو مواضيع زي دي بنتكلم فيها وبنرد على أصحابا غصباً عننا عشان نحاول نغير المفاهيم البالية دي لأنو العالم إتجاوزا . كل ما أتزكر إنو السودانيين عندهم هاجس إسمو اللون والجنس بطني بتطم وبحس بي فراغ وعدم موضوع في البلد دي. نسأل ربنا يولي علينا ناس عندهم موضوع يفيدنا في دنيتنا وآخرتنا . ويثبتو لينا مفاهيم كويسة وهادفة .
Post: #73 Title: Re: عايز لي مره بيضاء وشعرها طويل وبت ناس! Author: رانيه محمد الشيخ Date: 03-25-2013, 12:29 PM Parent: #72
حسى بعد الصفحه الثالثه دى لقيتها ولا ليساك بتفتش :)))
Post: #75 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-25-2013, 09:35 PM Parent: #73
Quote: حسى بعد الصفحه الثالثه دى لقيتها ولا ليساك بتفتش :)))
لســه قاعد افتش :)))) لو بتعرفي ليكـ واحدة ممكن تعرفيني عليها وينوبك ثواب وبارك الله فيمن وفق رأسين بالحــلال .. والله صحي :) أهو كلو عمل خير يا رانية ياخ
Post: #74 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-25-2013, 09:32 PM Parent: #72
ســـلافة
حباباك من تاني..
Quote: ح أسألك سؤال واحد يا بشاري .. نوعية البنات العاوزنهم في الإعلان ديل في الكويت مافي ؟ إشمعنا الإعلان جانا في السودان بالقبح ده وكمان جا في أقبح صحيفة ؟
يعني هســـي مشكلتنا كلها جات لأنو الاعلان جاء في الانتباهة نص الاعلان نفسوا ما بينفي الجمال عن السمراوات لكنهم يفضلون البياض زي كدا .. أها المشكلة شنو؟ السودان فيهو البيض والسمر وربنا ما شق حنكاً ضيعه الكلام دا وباعترافك معمول بيهو عندنا في السودان وقبل الاعلان ماف زول احتجه أها بعد الاعلان قامت القيامة .. ورروووووك الطيب مصطفى عايز يقنن الدعارة وبتاجر في أعراض بناتنا .... الخ الخ ياخ وظائف محدده ومعلن عنها العاجبها تمشي والما عاجبها ما تمشـــي
Quote: أنا ح أديك سر .. الطيب مصطفى داير يقول والله يا جماعة نحنا ما سود زي ما معروف عننا في العالم وتحديداً العالم العربي والعقد بتاعتو خلتو يجيب إعلان زي ده عشان يتباهى قدام أسيادو العرب ويقول نحنا عندنا بنات بيض وحلوات ، كمان مش الزرق الشينين هههههههههههههه سبحان الله إنت براك قلتها لأنو عقلك الباطن في اعتقادي مليان بالعقد
برجع أكرر ليك كلامي تاني .. ياخ هم لو كانوا بفتشوا على البياض بس كان مشوا أي بلد تانية لكن هم عايزين سودانيات .. وختي تحت سودانيات دي خطين عفيفات وشريفات وأمينات وعندهن عزة نفس ..... الخ الخ من الصفات الجميلة هم زادوا شرط إنها تكون جميلة وبشرتها فاتحة .. المشكلة شنو مش على كيفهم ياخ المشكلة عقلنا الباطني دا بصور لينا إنو السمار دا مشكلة وإنو العرب ديل حاقرين بينا المشكلة ماف قوانين تنظم الحاجة دي ولو اي جريدة تانية نشرت الخبر كان حتكون ردة الفعل اقل بالتأكيد ..
Quote: وهنا أحب أضيف ليك إنو الناس اللونهم أبيض بيشتغلو سريع في الوظائف الزكرتها دي والكلام ده في السودان بيحصل بشكل مقرف بيوضح عقد ناس الإنقاذ كلها
عارفه من هوانا وضعفنا وقلة حيلتنا أي حاجة نقوم نرميها في الانقاذ دي يا سلافة دي ثقافة مجتمع قمنا وربينا عليها ومتوارثه جيل عن جيل ولغاية هسي لما تمشي تطلب ليك بت اهلها بسألوا من اصلك وفصلك والكلام الفاضي القاعد يتعمل دا ... ولا دا ما حاصل يا سلافة؟ وزي ما قلت ليك من حق أي زول يختار موظفيه حسب حاجته وهواه وماف أي قانون ممكن يحاسبه على كده ... على الأقل عندنا في السودان
تحياتي
Post: #76 Title: Re: عايز لي مره بيضاء وشعرها طويل وبت ناس! Author: د.ماجدة ميرغني Date: 03-26-2013, 07:02 AM Parent: #74
Post: #77 Title: Re: عايز لي مره بيضاء وشعرها طويل وبت ناس! Author: صديق عيسى صالح Date: 03-26-2013, 09:32 AM Parent: #76
ولد ابا تعال شوف واسمع.. الناس بتموت فى الخضار السريحى والشعر اللافايا سجنوه من اجلها. ولكن كل انسان حر فى اختياراته
Post: #79 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-27-2013, 08:14 PM Parent: #77
Quote: يا حبيبنا انت زعلت والا شنو
الواحد اصلو ما يهظر معاك يا صفوة
ياخ قووم لف يا معقد
وهل العنوان جادي حتى نكون معك جادين
قووم لف
قرجـــه المهلة سمحة ... عنصري قذر .. ثم معقــد .. انا جادي جداد شديد في البوست دا ... والله صحي :) واظن وجهة نظري وصلت ...
طيب أنا ماشي ألف واجي ..
وعلي فكرة كلامك الفوق دا لا يرقى الى مستوى اعتذار
احترامي ...
Post: #80 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-27-2013, 08:16 PM Parent: #77
دكتور ماجدة
مشكورة على المرور
Post: #81 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-27-2013, 08:19 PM Parent: #80
Quote: ولد ابا تعال شوف واسمع.. الناس بتموت فى الخضار السريحى والشعر اللافايا سجنوه من اجلها.
يا ول ابا زولك دا ميت كنجم في الزولة دي .. شكراً على الفيديو ياخ
Post: #82 Title: Re: عايز لي مره بيضاء وشعرها طويل وبت ناس! Author: الامين موسى البشاري Date: 03-27-2013, 08:25 PM Parent: #81
Quote: الطلب رخيص وهاك دي من اقوال المرحوم د. عوض دكام عمرو مافي شاعر او فنان تغني قال صفاري الا ويقول خضاري و فسرها بعد ذلك في عصر الكريمات التي تجعل العين تزغلل
جابر برمه
حبابك ألف في الحوش أولاً .. عوض دكام زااااتو متزوج واحدة حمراااااء وشعرها طويل ما عندك خبر ولا شنو؟
