Post: #1
Title: تلفزيوني الصغييير ..!!
Author: عمر الفاروق
Date: 03-18-2013, 02:54 PM
Parent: #0
لا يخفى عليكم كرهي للمريخ أكتر من حبي للهلال وأبذل كل ما هو غالي ونفيس من أجل نصرة من هو ضد المريخ ..
أها وانا في بداية حياتي الإغترابية قمت إشتريت لي تلفزيون ماركة سوني لكن من النوع البيشيلوهو 7 رجال داك وكلللو حديد وضهرو لي ورا زي تلاتة أمتار ولمن تجي ماري بي جمبو حرارة الدوائر الكهربية جواهو تلفحك بي سموم غريييب..مع العولمة والدخول السريع في مكنة المغترب القديم وفي إطار تكملة طقم الإغتراب ونسيان الماضي من نوع التلفزيونات الكنا بنديهو ضربة أو لبعة حتى يشتغل ومن نوع التلفزيونات الأريلو لو مر نسيم على بعد مييل يخلي الشاشة طرباً تميل وعااادي لمن يرجع الارسال تلقى المسلسل إنتهى إضافة لي تلفزيون زماان كان عندنا الصورة بتطلع لي فوق على التوالي ومرة تتمط ومرة تضعف..مرة تقسم ليك الزول نصين الراس فوق والكرعين بي الجمبة ومرة مقلوب ومرة الشاشة تضلم وتجيك نقطة صغييييرة في النص ..
هيييه يا لها من أيام نرجع لي السوني أبو سبعة رجال وطقم الإغتراب ..قومت فجأة كده للإستمتاع بي الكورة من خلال قنوات الHD إتبوبرت وإشتريت دااك يا ال LCD الما خمج و وعلقتو في الحيطة وجبت ديك يا الكنبة وبقيت اليوم كلللو حارس ليك أييي كورة في العالم ..
أها من ضمن المباريات البحضرا مباريات المريخ والتي أحرص على متابعتها أكتر من مباريات الهلال عشان أقدر أمارس فيها كل انوع الدعوات والصلوات والخزعبلات من شاكلة التفاف بالجمبة وا وبلع الريق طمنطاشر مرة عشان فرص المريخ تضيع..
أها وانا بكون بحضر في مباريات المريخ في ال LCD بلاحظ طوااالي المريخ بيكون غالب بي قوت أو إتنين أو تلاتة ..أصصصلو ماحصل درن ولا خسر ..
اها مرة وانا قاعد في الغرفة اللي رحلنا فيها التلفزيون القديم وهي عبارة عن غرفة هكرة من نوع الغرفة والمخزن و واللمكن تقلبا حقت ضيوف لمن يداهموك ومرة تقلبا حقت الشفع نظام القشرة لي أصحابك وانت بتحكي لما كنت في غرفة الأطفال و و أها صدفة بحححتة لقيت ليك التلفزيون شغال قناة الشروق وكورة للمريخ شغالة قعدت حرست الكورة المريخ مغلوب ..السخانة والكتمة لفختني والمريخ مغلوب وحلللفت ما اقوم من التلفزيون القديم ..قووم يا الحكم صففر والمريخ مغلوب ..قمت بعد داك وواصلت يومي..
بعدها بي كم اسبوع المريخ تاااني كان لاعب ..كنت بحضر في الكورة في أبو LCD والمريخ غالب واحد..اها قمت اعمل حركات اختفي وأجي بعد شوية نظام أتفاجأ وكده ..مشيت الغرفة الفي الوقت داك قلبتها غرفة اطفال والتلفزيون القديم شغال ..قلبت على قناة الشروق ومع القلبة توووف اشوف ليك الفريق التاني بينطط وجاب الدرون ..حررست الكورة في القديم لحددي ما إنتهت ..أنقرو ما انتهت درون؟؟
من يومها قررت إنو تلفزيوني القديم ده سرررو باااتع ووالله يا جماعة وانا جااادي أي كورة حضرتها للمريخ في التلفزيون القديم ده فيا المريخ مضروب يا درون ..
أها بقت عندي مشكلة كبييرة جداً ..المتعة والمشاهدة للدوريات الأوروبية بحبها في الLCD وغلب المريخ في التلفزيون القديم ..وكتير من الأوقات بيكون في مباريات اوروبية في نفس وقت كورة المريخ وما حصل قلبت القناة في الLCD لقيت المريخ ده مغلوب.. وما بقد كمان ما احضر ناس مانشستر وريال وتوتنغهام ديل..
كورة امبارح ضحيت بي الدوري الإنجليزي بعد ما بديت احضر فيهو والمريخ جاب قونو إضطريت اقوم امشي التلفزيون القديم لحدي ما الله اداني الفي مرادي حتى رجعت لحقت باقي الكور..
أها يا جماعة شوفو لي حل للقصة دي ..
تلفزيوني الصغير ولا ال LCD??
|
Post: #2
Title: Re: تلفزيوني الصغييير ..!!
Author: محمد البشرى الخضر
Date: 03-18-2013, 03:32 PM
Parent: #1
أفا.. ودي عايزة سؤال؟ الصغييير طبعا
ما في أحلى من منظر الوصيف وهو مرشوش و بطوي في الملفات :)
|
Post: #3
Title: Re: تلفزيوني الصغييير ..!!
Author: أبوذر بابكر
Date: 03-18-2013, 04:11 PM
Parent: #1
فاروغ
اتا ما سمعت بى المسل اليوغسلافى البقول
عنب السغير ولا نبق الكبير
وتقرأ
شماتة السغير ولا حسرة ال LCD
اوع بالله تمش تمارس العادة البايخة دى مع برشلونة
الليغا شبه انضمنت
والعين على الشامبيونز
|
Post: #4
Title: Re: تلفزيوني الصغييير ..!!
Author: صبري طه
Date: 03-18-2013, 04:18 PM
Parent: #3
| Quote: هيييه يا لها من أيام نرجع لي السوني أبو سبعة رجال وطقم الإغتراب ..قومت فجأة كده للإستمتاع بي الكورة من خلال قنوات الHD إتبوبرت وإشتريت دااك يا ال LCD الما خمج و وعلقتو في الحيطة وجبت ديك يا الكنبة وبقيت اليوم كلللو حارس ليك أييي كورة في العالم .. |
يا عُمر ياخ .. عشان تستمتع بالصورة الـ HD لازم يكون:-
1- جهاز التلفزيون يدعم الـ Full HD
2- جهاز الرسيفر لازم يكون بيدعم الـ HD
3- القناة الناقلة لازم تكون HD
بالنسبة للقنوات العادية التي لا تُبث على نظام الـ HD وهي تُبث بنظام الـ SD فمُشاهدتها أوضح في التلفزيون العادي من شاشة LCD التي تدعم الـ HD
النجيضة: قناة الشروق وكل القنوات السودانية تُبث على نظام الـ SD
ـــــــــ
|
Post: #5
Title: Re: تلفزيوني الصغييير ..!!
Author: عزيز
Date: 03-18-2013, 04:29 PM
Parent: #3
صديقي ود الفاروق
الدخلتها فيني لسه ما مرقت ربنا يطول عمرك واسرتك يارب ويسعدكم.
جرب اشتري تلفزيون 3D واشترك في قنوات اسكاي وشاهد المتعة الحقيقية وكان المباراة في صالة منزلك.
بس المشكلة مباريات المريخ لسه بعد عشرات السنوات حتى تبث بهذه التقنية.
توقعت وجودك في أكثر من حوار ولم تسعدني بمداخلاتك.
لك الود الجزيل والأمنيات.
وأبقى عشره على تلفزيونك القديم and#128522;
عبدالعزيز خطاب
|
Post: #6
Title: Re: تلفزيوني الصغييير ..!!
Author: محمد البشرى الخضر
Date: 03-18-2013, 04:34 PM
Parent: #5
|
Post: #7
Title: Re: تلفزيوني الصغييير ..!!
Author: waleed dawash
Date: 03-18-2013, 05:16 PM
Parent: #6
المريخ خليه ..
كورة الهلال الاخيرة حضرتها في ياتو ؟
|
Post: #8
Title: Re: تلفزيوني الصغييير ..!!
Author: دينا خالد
Date: 03-18-2013, 05:26 PM
Parent: #6
يا عمر ما تشوف لى او( ما تقرا لى) معاك البطل دا فى تلفزيونك الصغيير !!
عسى ولعل ....
ــــــــــــــــــــــــــــ
الناس فى شنو والحسانية فى شنو ؟
غايتو خووتك خوت لستك
وان كان طبعا كدا احسن لينا ..
|
Post: #9
Title: Re: تلفزيوني الصغييير ..!!
Author: درديري كباشي
Date: 03-18-2013, 05:40 PM
Parent: #8
والله انت حاقد بشكل
بس لكن حقدك لذيذ
يا زول احضرها كلها في القديم في الحر وقرط على كدا عليك الله
انا بتبرع ليك بمكيف فريون .. ومرة كمان احضر لينا معاك ريال مدريد هناك ..
|
Post: #10
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:14 AM
Parent: #9
ود البشرى يا راقي ..
والله ما ح تصدق انا قاعد أعاني كيف في القصة دي ..ياخ انا تهيئة الظروف لي كورة المريخ البعملا ممكن يوم عااادي يلقوني مييت ..أولاً مع التلفزيون الصغير في طقم حاجات كده بيتعمل من نوع تقفل الشبابيك والمكيف والمروحة وتقعد ليك في درجة حرارة زي 53 كده كتمة زي الكتمة ..الغريبة بقفل الباب من الأولاد لكن عندي صلاح الصغيير ده مجهجه ليك أفكاري ..الولد ده كو كو كو يدق الباب أديهو نهرة كده تووف المريخ بيجيب قوون ..فالمعادلة بقت صعععبة وبقا في تضارب في الحاجات والشعوذات ..
تخريمة :
ياخ شكراً للضحكة في المداخلة التانية فقد أوفيت 
|
Post: #11
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:17 AM
Parent: #10
الغفاري أبا ذر ..
برشلونة ده إنت قايلني ما قعدت ليهو ؟؟ لكن غلبني عديييل والله
قدر ما قلت أشربو غلبني ..تحضر ليهو في القديم في الجديد بي الجمبة في الشارع مع الجيران في الرادي غالب غااالب ..
لكن أصبر ليي بحاول أتذكر القاسم المشترك العملتو في حضوري لي مبارياتو الاخيرة مع الريال وكورة ميلان الأولى شنو ..
تخريمة :
أملي كان في يوفنتس في تطفيشكم ولكن خاااب ..غايتو نشوف في دوري الاربعة
|
Post: #12
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:20 AM
Parent: #11
صبري يا حبوب..
ياخ بعد مداخلتك دي زي حا احاول اقرر تاني ما اغالطك..
وضح بما لا يدع مجالاً للشك إنك زول طييب وقلبك ابياااض كيف..
تخريمة :
ضحكة ود البشرى دي ما تفووتها ساااي كده
|
Post: #13
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:21 AM
Parent: #12
العزيييز عزيز :
ياخ انا لي اسة مخلوع خليك إنت :)
وتسلم يا راقي من كل شر..
اخوك متابع غير جيد لي سودانيز والبلقهو في وشي بشوت فيهو فياريت تبصرنا بي خيط خيطين عسى ولعل نقدر نخش..
|
Post: #14
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:22 AM
Parent: #13
يا وليد :
كورة الهلال الأخيرة حضرتها في كولزيوم .. :)
|
Post: #15
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:27 AM
Parent: #14
دينا ال خالد ..
والله البطل ده إلا يحضروهو ليك في الرادي ..تلفزيون مااا بيحلك ..
النصيييحة انا قلت أنتظر الصبح أليس الصبح بقريب ؟؟ لكن أظن فرق التوقيت ده بالجد مشكلة ..
لكن خمسين دي ما كتيرة ؟؟ الزول ده لو قال لحدددي 47 انا كنت دعمت فكرتو
تخريمة :
ربنا بريدك إنو أم كلثوم ماتت..والله لو كانت حية كان أسة شريطك مدوور في شارع الدكاترة ..
|
Post: #16
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:29 AM
Parent: #15
دردييري يا حبوب:
الريال ده بنحضرو في ال LCD مع كوب من الشاي الساخن وقطعة من كيكة الشوكولا وقليل من الفستق .. :)
|
Post: #17
Title: Re: تلفزيوني الصغييير ..!!
Author: صبري طه
Date: 03-19-2013, 06:38 AM
Parent: #16
Quote: صبري يا حبوب..
ياخ بعد مداخلتك دي زي حا احاول اقرر تاني ما اغالطك..
وضح بما لا يدع مجالاً للشك إنك زول طييب وقلبك ابياااض كيف.. |
يا عُمر ياخي أنا ما قصدي أفتح معاك باب غُلاط في هذا البوست ...
كل العملتو وضّحت ليك حقيقة علمية عشان ما تكون ماسك ضنب الككو وتفتكر إنّو مُشاهدة القنوات الـ SD على الـ LCD HD أفضل من مُشاهدتها على التلفزيون العادي ...
على البلازما ممكن تكون أفضل وأعتقد أنّها كذلك ...
بالنسبة لضحكة ود البُشرى .. هو الضحك بي قروش خليهو يضحك زي ما عاوز ...
|
Post: #18
Title: Re: تلفزيوني الصغييير ..!!
Author: أبوذر بابكر
Date: 03-19-2013, 06:41 AM
Parent: #11
شفت يا عمر
ايام عمك غوارديولا لسه كان قاعد فى البيت
رسلت وقلت ليه عليك ب
تياغو سيلفا
باصر ليك اى طريقة وجازفه وجيبو لينا
لأنه برشلونة ده مما فات جيوفنى فان بروكهورست الهولندى داك
تانى ما ضاق عافية
ياخ الدفاع ماسكنه ناس تشافى وبوسكتس
ماسكرانو طلع فشنك وكان على الفيش داك، الزول ده مهاجم راسو عديل خاتنه فى الدفاع بالغط
ما سمع كلامى
وجا كارلو انشيلوتى الشفت شاله ومشى بيهو للجرمان
تلاتة بالله العظيم
نحن نلقى تياغو ده ومعاه سيرجيو راموس ومعاهم حارس من نوع بوفون
تانى فريق اشلاق الملايكة ذاتو ما يغلبنا
داير اقول ليك شنو تانى
دورى اربعة بتاع شنو ؟
اتذكر زمان لما كنا فى حنتوب
لقينا واحد فى سنة تالتة الجماعة قالو لينا ده جابوهو من سنة اولى طوالى لى سنة تالتة
يعنى فططوه سنة تانية قالو مافى داعى
هسه بالله ناس بلاتينى ديل مش مفروض طوالى من دور التمانية ده يقولو لى برشلونة يقعد يس يصنقر
ويستنى النهائى
مش كلام عقل بالله
ولا شنو
|
Post: #19
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:43 AM
Parent: #18
Quote: يا عُمر ياخي أنا ما قصدي أفتح معاك باب غُلاط في هذا البوست ...
|
يا صبري ما فهمتني..غلاطي البقصدو ما عندو أييي علاقة بي مداخلتك دي نهااائي..بتكلم عن غلاط ما قبل ..
ولازلت عند رأيي بعد مداخلتك الHD دي ثبت شرعاً إنك كائن بشري طيب جداً ..
|
Post: #20
Title: Re: تلفزيوني الصغييير ..!!
Author: عمر الفاروق
Date: 03-19-2013, 06:47 AM
Parent: #19
أها يا ابوذر يا صاحب النديك النصيحةدي تلحق بيها كازانوفا بن فلانوفا ده ..
في زول إسمو آآقر بيلعب في ليفربول عمق دفاع حاجة كده مااا تخلص ومعاهو حاجة تانية إسمها وولكر بيلعب في توتنغهام طرف يمين زول نجااااضة ..
أييي فريق يسجل الإتنين ديل على ضمااانتي ما بيتغلب قريب..
سيلفا مشيتو من الميلان كسرت ضهرهم أكتر من مشية ابراهيموفتش عشان الناس تعرف وتفهم انو الكورة مااا هجوم بس..
|
Post: #21
Title: Re: تلفزيوني الصغييير ..!!
Author: أبوذر بابكر
Date: 03-19-2013, 06:57 AM
Parent: #20
والله يا عمر سيلفا ده انا عاجبنى عجب
وشكله وطعمه ذاته كاتالونى كاتالونى
سيلفا وكان معاه نيستا
دفاع تمام والله وطريقة اللعب عندهم تطربك عديل
ناس برشلونة ما قاعد يرييدو يجيبو ناس من الفرق الانجليزية
ما عارف السبب شنو، بس قلعو اولادهم ناس بيكيه وفابريغاس وصهينو على كده
هسه الود سونغ ده مع انه كويس والله مع حبة عدم تركيز لكين ما قاعد يكون اساسى كتير الا بالحيرة
لكين عموما الدفاع ده لو ما لحقوهو
الشغلانة حتكون صعبة جدا
خصوصا مع سلم ناس المطافى الاسمه ابراهيموفيتش ده
وعلى العليه كمان حاقد علينا مما فات
|
Post: #22
Title: Re: تلفزيوني الصغييير ..!!
Author: صبري طه
Date: 03-19-2013, 07:00 AM
Parent: #19
| Quote: ولازلت عند رأيي بعد مداخلتك الHD دي ثبت شرعاً إنك كائن بشري طيب جداً .. |
على كل حال سأحسن الظن بعبارة "كائن بشري طيّب جداً" وأنبّهك أنا ردّيت بحكم مروري على الجزئية التحت دي ...
Quote: ..قومت فجأة كده للإستمتاع بي الكورة من خلال قنوات الHD إتبوبرت وإشتريت دااك يا ال LCD الما خمج و وعلقتو في الحيطة وجبت ديك يا الكنبة وبقيت اليوم كلللو حارس ليك أييي كورة في العالم ..
أها من ضمن المباريات البحضرا مباريات المريخ |
بالمناسبة تعليقي في هذا البوست سبق وأن كتبت تعليق قريب منه وبصيغة مُختلفة هنا في المنبر ...
|
Post: #23
Title: Re: تلفزيوني الصغييير ..!!
Author: omer osman
Date: 03-19-2013, 07:06 AM
Parent: #22
اسمعني عليك الله كورة المريخ الجاية دي احضره بالموبايل مش بتلفزيونك الصغيييير برضو متأهلين هههههههههههههه
|
Post: #24
Title: Re: تلفزيوني الصغييير ..!!
Author: عمر الفاروق
Date: 03-19-2013, 07:18 AM
Parent: #23
يا صبري أحسن أحسن..والسبب ببساطة إني لمن أكون مقرر أقول كلام بقولوا عديييل ما بغتغتو وعليه كلامي الأسة ده كلام بتاع حسن ظن ..
كلامي بتاع سوء الظن بقولو برضو بي الدرب
|
Post: #25
Title: Re: تلفزيوني الصغييير ..!!
Author: عمر الفاروق
Date: 03-19-2013, 07:19 AM
Parent: #24
يا جنابو ..
أقعد أطمن لي كده وبكرة نبقا في السعودي بالغ وكانت ماشة القوون
|
Post: #26
Title: Re: تلفزيوني الصغييير ..!!
Author: عمران حسن صالح
Date: 03-19-2013, 07:24 AM
Parent: #23
| Quote: بالنسبة للقنوات العادية التي لا تُبث على نظام الـ HD وهي تُبث بنظام الـ SD فمُشاهدتها أوضح في التلفزيون العادي من شاشة LCD التي تدعم الـ HD |
كلامو صاح الصاح ما تفكها فينا ساي
|
Post: #27
Title: Re: تلفزيوني الصغييير ..!!
Author: أمير محي الدين محمد
Date: 03-19-2013, 07:27 AM
Parent: #23
| Quote: بالنسبة لضحكة ود البُشرى .. هو الضحك بي قروش خليهو يضحك زي ما عاوز ... |
كلموا ياصيري كلموا
و.بعدين لمن يكمُل ضحكاتو ما يجي ويكورك ياحمودي نزل لي ضحكة هنا
هو الوشوش دي بالساهل كدا خليهو لمّن يتزنق ليهو في وشّ نشوف اللي ح يباصيهوا ليهو منو
ـ
ود البشرى وشوشنا دي تاني الأ تلقاها في الشاشة الغشاشة الماااا LCD
|
Post: #28
Title: Re: تلفزيوني الصغييير ..!!
Author: لؤى
Date: 03-19-2013, 07:39 AM
Parent: #1
Quote:
كورة امبارح ضحيت بي الدوري الإنجليزي بعد ما بديت احضر فيهو والمريخ جاب قونو إضطريت اقوم امشي التلفزيون القديم لحدي ما الله اداني الفي مرادي حتى رجعت لحقت باقي الكور..
أها يا جماعة شوفو لي حل للقصة دي ..
تلفزيوني الصغير ولا ال LCD??
|
تلفزيونك الصّغيـّر طبعاً
LCD شنو كـمان ؟ 
مشتاقيـن ياخـي
|
Post: #29
Title: Re: تلفزيوني الصغييير ..!!
Author: حمد عبد الغفار عمر
Date: 03-19-2013, 07:53 AM
Parent: #28
سلام يا فاروق
تعرف أنا الحاجات الجديدة دائما بكون خائف منها
يعني مثلا أقوم أغير محفظة القروش ، طق تطقني ليك فلسة طيري على طول بقوم برجع لي محفظتي القديمة وأخت الجديدة في البيت لحدي ما تقدم
أقوم أغير الجوال طق يقوم الكفيل اتصل علي يقول لي دور ليك على كفيل غيري أقوم أرجع لجوالي القديم بالهه تاني سنة ما يتذكرني
فبالله دائما في مباريات المريخ دي أعصر لينا على تلفزيونك القديم دا يا شيخ عمر
|
Post: #30
Title: Re: تلفزيوني الصغييير ..!!
Author: عمر الفاروق
Date: 03-19-2013, 08:07 AM
معلومة صيرونة يا شباب ..
ال LCD البتكلم ليكم عنو عمرو معاي 5 سنوات ..عشان ما تفهموني غلط في قصة العولمة دي ..
|
Post: #31
Title: Re: تلفزيوني الصغييير ..!!
Author: طلحة عبدالله
Date: 03-19-2013, 08:55 AM
Parent: #30
Quote:
..الولد ده كو كو كو يدق الباب أديهو نهرة كده تووف المريخ بيجيب قوون |
هههههه
شايفك داخل علينا شوية شوية يا أبو عمير
بعد شوية تقول لينا لما أكوي فنيلتي الداخلية، ولما آكل ملاح البامية، ولما الديك يصيح .. الخ .
بالغت لكن .
|
Post: #32
Title: Re: تلفزيوني الصغييير ..!!
Author: عمر الفاروق
Date: 03-19-2013, 08:58 AM
Parent: #31
طلحة ياخ ومعليش ح ارد عليك قبل ما اواصل مع باقي الناس..
عندي طلب في شكل شحدة إسفيرية عاااجلة
شعار فريق العين الأصلي بالله الهوم والأوي ..
الناس ديل انا بحبهم من زمااان وبحب لبستهم أكتر ..
فبالله الحقني مع أي زول جاي من الامارات بهذه اللبسات بمناسبة الفنيلة الداخلية دي..
|
Post: #33
Title: Re: تلفزيوني الصغييير ..!!
Author: طلحة عبدالله
Date: 03-19-2013, 09:02 AM
Parent: #32
حاضرين والله يا أبو عمير
عندك كم ولد وأعمارم كم ..؟
إتا إلا تشتري براك لأنو ما قاعد أهدي لى أي راجل كبير أية حاجة.
|
Post: #34
Title: Re: تلفزيوني الصغييير ..!!
Author: أمير محي الدين محمد
Date: 03-19-2013, 09:12 AM
Parent: #30
Quote: معلومة صيرونة يا شباب ..
ال LCD البتكلم ليكم عنو عمرو معاي 5 سنوات ..عشان ما تفهموني غلط في قصة العولمة دي |
مصدقنك..مصدقنك ياعمر
خمسة سنين معاك تلفزيونك الصغير البشيلوهوا سبع رجال دا في حلّك وترحالك؟؟
الحكاية شنو ..!! شكلوا نهااااائي ماقاعد ترمي حاجة في البلدية
ــ
لكم إفتقد أساسي ..يا أساسي لو مررت من هنا نبلغك أشواقنا
ونأمل أن تكون كل أمورك كما ينبغى لها أن تكون
|
|