Post: #1
Title: دوبيت في رثاء د/ أبو حريرة
Author: محمد عمر الفكي
Date: 03-16-2013, 10:57 AM
الشاعر / الشفيع احمد الشفيع
رحل الليله دكتور الشريعه وقفه
رحل الكفو في درك المحول ما جفه
يا المن خشيتك صخر المناجم خفه
من ود حدو لي جنة عدن ينزفه
تتعدد محاسنك يا أب زنود أب كفه
كم شاقيت دروب ناسا وراك تتخفه
منسل طينو من عز الرجال ومصفه
ما مسك الخزينه ومهدولوا وعفه
رقد الليله دود كيده البلايم وغادر
رقد الخيرو وافر وبالمكارم بادر
كم قلقل حمول ناسا غلابه وسادر
أب هجبه العلي الفوق ندو صره وقادر
شيتا شايفو بنقال اصلو ما بندس
فقد العامه مو فقد البطاحين بس
بازل مالو ما أتحوا وبنالو مدس
سبب فقدو حزنا في الجبال بنحس
ميزان العداله البنصف المتظلم
رقد الليله خلى اليوم نهارو مضلم
جيش الأمه لي فقدك شديد متألم
يات من يبقى جادع عمتو ومتبلم
فقد الشعب كافه وأمة الإسلام
يا سيف الحرابه الغير مسن قوام
عرفتك المعارك قوي ماك منضام
بالعدد المتلت يا اللصم هزام
أب كفه النتر شكل متارس حاويه
رحل الليله دود خشه أب يسارا داويه
فاقداك التجاره الغير خدمتك خاويه
فقدك مو بسيط فقد الرجال الساويه
القانون تعرفو وفيهو زايد حرفك
ضربك جله للعاداك مبيت ظرفك
يا بحر العشامه الديمه ناتج جرفك
فقدك أثر اللاقاك والما بعرفك
ودعت ورقدت سبت البطون لي مريره
يا راحت عيونا الراقده مده غريره
وراك اسود غواب حاجره الطريق بي كريره
كت جرتق قبيلتك وفي الحقيقه حريره
|
Post: #2
Title: Re: دوبيت في رثاء د/ أبو حريرة
Author: الشامي الحبر عبدالوهاب
Date: 03-16-2013, 11:18 AM
Parent: #1
قمة الروعة وكل ما في هذا الرثاء ينطبق عليه من غير مبالغة
شكراً اخ محمد عمر
ورحم الله ابوحريرة وجعل الجنة متقلبه ومثواه
|
Post: #3
Title: Re: دوبيت في رثاء د/ أبو حريرة
Author: أحمد الشايقي
Date: 03-16-2013, 11:36 AM
Parent: #2
Quote:
أب كفه النتر شكل متارس حاويه
رحل الليله دود خشه أب يسارا داويه
فاقداك التجاره الغير خدمتك خاويه
فقدك مو بسيط فقد الرجال الساويه
|
رحم الله الفقيد الدكتور محمد يوسف أبو حريرة فقد كان مثل ما قال الشاعر الشفيع وأكثر,
أحمد الشايقي
|
|