حملة القلوب الحنونه لاطفال المايقوما,.,.,.,

من أخر زياره قومت بيها لدار وانا عاجزه عن نسيان نظرة عيون الاطفال واحساسى برغبتهم الشديده فى ونيس وحضن يحتويهم
وفكرت كيف ممكن اساعد ولو للحظه فى اشباع هذا الشعور لطفل واحد على الاقل
وكيف ممكن امد يد العون للمشرفات الحسيتهم مرهقات حد الاشباع
جاتنى فكره ولا اعلم هل سوف يقدر لها النجاح ام لا
ومنها اتواصلت مع الزميله ساره عبد النور شريف لثقتى بانها تؤمن بنفس الرساله لكثرت رؤيتى لها فى الشغل الخيرى التطوعى فى كثير من المناسبات وحرصها على دعم اى احتياج وحله
وبعد طرحى للفكره ادهشتنى بإضافت معلومه ان زميلنا التجانى طلب منها منذ فتره تطوع الشابات فى المساعده لتسريح شعر الاطفال واللعب معهم
عشان الزياده فى العدديه اصبحت تشكل عائق فى محاولات احتوائهم وتوفير هذه الاحتياجات المعنويه لهم
منها تشجعت واتصلت بالزميل التجانى ورحب بالفكره وطلب خطاب لتوضيح غرض الزياره وتحديد موعد ثابت اسبوعيا لها ليتمكن من استخراج اذن موافقه من وزارة الرعاية الاجتماعيه
,.,.,
بهذا ان شاء الله كل سبت من كل اسبوع سوف نكون فى دار المايقوما
وكل من يرى فى نفسه القدره على منح هؤلاء الاطفال الحب والدفىء والامان مرحب بيه
الحمله ليست فى حوجه لميزانيه نقديه
فنحن نرغب فى جهود ذاتيه وليست ماليه لتحقيقها والحفاظ على استمرارها
وحتى لو بدأت وحدى فلن اتوقف بإذن الله
وسوف احرص على اصحاب صديقاتى وقريباتى كل سبت
واسئل الله ان يعينا فى تحقيق الغايه ونكون فعلا عون للاطفال ونعوضهم ولو بالقليل من ما يفقدون
للانضمام لست فى حوجه لرقم هاتف لتواصل يكفى ان تأتى للمايقوما مباشرتا فتجدنا هناك ان شاء الله

الاستاذة رانيه
تحياتي
ومعكم أنشالله وجعل الله هذا العمل في ميزان حسناتكم

شكرا يا رانيا على البادرة اللطيفة
- ليه الزيارة مشروطة بتقديم طلب ؟
- ليه الزيارة ما تكون مفتوحة للكل في اوقات معينة ؟
انا خارج السودان - لو كنت داخله لحضرت

السبت غدا ان شاء الله ماشيه لاستطلاع الامور بطريقه اوضح وتسليم الخطاب لتجانى ومحاولة رسم شكل تصويرى معين لما يمكننا القيام بيه
البتحب او بيحب يشارك بحضوره وافكاره ومشاركته فمرحب بيها او به
,.,.,.



شكرا اخى زهير وحبابك
...


اخى ايمن
اكيد ما حتكون مسموح بالزيارات المفتوحه لانك ما بتضمن البيجوا يستغلوا وضع الاطفال بطريقة خاطئه لاستفادات الشخصيه
فلازم يكون فى كنترول على الحضور والدخول
يديك العافيه

اختنا رانيه Crystal،

سلام من الله يغشاك، ونور وسلام ومحبه تغمرك،
ما اروعك، والاحساس والحنان الذان في قلبك لو قُسما على اهل الارض لكفياهم.
مبادرة طيبة وجعلها الله في ميزان حسناتك،
انا ايضاً مقيم خارج السودان ولا استطيع الحضور بجسدي ولكني معكم بوجداني وكل خلجات نفسي.
لقد سميتك كرستل، رضيت بهذا الاسم ام لم ترضي. سميتك كرستل لنقاء قلبك وشفافيتك وصدق احاسيسك وحنانك الدفَّاق.
وفقك الله ومن معك لخدمة هذه النفوس البريئة وتعويضهم بعض الحنان الذي افتقدوه بتنكر والديهم لهم.

لك ودي واحترامي
عثمان دُنقس

رانيه محمد الشيخ
قررررضى على كده
وصدقبنى حتكونى من أروع نساء السودان ...

لك المجد والتجله

اليوم مشيت بحمدالله وسلمت الخطاب للاخ التجانى ووعدنى ان شاء الله بنفسه سوف يتابع اجراءات قبول الطلب
المتطلبات المحتاجين ليها من المتطوعين هو تسريح الشعر وتقليم الاضافر وتنظيف الاذنين
وممكن الفتره ما تتعدى الساعتين فى الصباح
فاتمنى ان نجد من المتطوعين والمتطوعات القبول والمشاركه والعون باى عدد حتى لو عشر اشخاص فقط
وربنا يجازى الجميع خير ويعينا على عون بعضينا فالله فى عون العبد مادام العبد فى عون اخيه

اخى عثمان
اخى ملهم
شكرا على ردكم الرائع وحسن ظنكم فى شخصى الضعيف
وادعو الله ان يثبتنا على خطاه جميعا ويقدرنا نكون خير عون لبعض فى السراء والضراء
ونكون عند حسن ظنكم دوما

رانيه الغالية

يا سلام عليك ياخى دائما جميلة وتسعى للخير

معاك يا رانيه باذن الله فى كل شى ترينه مناسب وبخدم الاطفال

تسلمى يا وضاحه
وفعليا شكلى حكون محتاجه ليكى فى الموضوع دا
لان لصراحه شكل المتطوعين مخستك
لو شوفت ناس فعلا مؤهلين يعرفوا بطريقه صحيحه تنظيف الاذنين وتقليم الاضافر وقص الشعر للاولاد بيكون اضمن واحسن ونشوف فى ساعتين بيكلفونا كم
ولا رأيك شنو؟؟؟؟؟؟؟؟
ساعدينى بالمقترحات عليكى الله

الاخت الغالية رانية

ادار دى ما فيها طبيب اطفال بمر عليهم بصفة دورية ؟؟؟؟؟
تنظيف الاذنين وتقليم الاظافر للاطفال يحتاج لى ممرضة

تكون فعلا دارسة ومؤهلة مش اى كلام

دا بالضبط البفتش عليه
التأهيل لدور دا
لان ما اى انسان بيقدر يعمل الشى دا
غايتو فعلا فكرة ممرضه كويسه شديد
انا كنت محتاجه اعرف افتش وين بالضبط

التحية أختي رانية والتهنئة بيوم المرأة العالمي وتمنياتي بغد أفضل لجميع نساء وأطفال السودان

Quote: في الحرب العالمية الثانية خصصت عنابر ليتامى الحرب من الأطفال، ولوحظ في حينها أن عنبرا منها كان أطفاله أكثر هدوءا وسكينة، وأقل نسبة وفيات من غيره، وكانوا طيعين أكثرلممرضاتهم، يستمعون لكلامهن وينفذون أوامرهن وطلباتهن، وكانت كل هذه الملاحظاتدافعا قويا لأحد الأطباء لطرح سؤال مهم على نفسه:لماذا أطفال هذا العنبر بالذاتيتصفون بهذه الصفات؟! وبدأ يقارن بين هذا العنبر وغيره فوجد أن طعامالعنابر كلها متشابه، والعناية الطبية فيها متشابهة، ولم يميز ذلك العنبر عن غيرهإلا أمر واحد فقط أن امرأة عجوزا تسكن بالقرب منهم تزورهم كل يوم تمسح على رؤوسهم وتحتضنهم، وكانت المفاجأة الكبرى أن نسبة الوفيات والمرض وكذلك التخلف العقلي عندالذين حرموا من اللمس أعلى ممن كانوا يٌلمسون!

جعلها الله في ميزان حسناتك..

ومن شاركك الحملة الحنونة..

وما تنسوا الأطفال الصغار.. من التحميم والتشطيف..

اخى سنارى
اخى عوض
يديكم العافيه
بالرغم لصراحه حاسه الموضوع حيفشل لان مافى اى مبادرات من اى مطوعين حصلت فعليا اصلا
وشكلى حفتش على اشخاص بقروش يقدروا يساعدوا فى توفير الامور دى لاطفال
:((((((((((

الاخت رانية .....

Quote: بالرغم لصراحه حاسه الموضوع حيفشل لان مافى اى مبادرات من اى مطوعين حصلت فعليا اصلا وشكلى حفتش على اشخاص بقروش يقدروا يساعدوا فى توفير الامور دى لاطفال

لداعى للغة التشاؤم اعقليها وتوكلى وحتما سوف يكون غدا اجمل

الفكرة رائعة ورائدة واكيد الاطفال فى امس الحوجة لها ....

لكم التحية والتجلة والمجد وانتى تجسدى الروعة فى عيد المرآة

كل سنة وانتى وكل نساء بلادى ألف خير

الأخت رانية

متعك الله بالصحة و العافية و أعانك على فعل الخير

كثير من الإخوة يرغبون في فعل الخير و قليل من يفعله فعلاً

جعل الله عملك و نواياك الصادقة في ميزان حسناتك و أعانك ووفقك على عمل الخير

كيف يمكن للمتواجدين خارج السودان المساعدة؟


لك التحية و الود

الفاتح

بحمدالله تم تصديق اذن الدخول
ومازال البحث جارى عن مختصين تنظيف الاذان والاضافر للاطفال
ومازالنا فى انتظار المتطوعين
غايتو لحسى ضمنت لى وحده كتر خيرها من الفيسبوك يديها العافيه
وشاكره لاخى زهير لانه بيعاونا فى ايجاد متطوعين
ومازلت فى انتظار البقيه
هى ساعتين
وما شرط تشاركونا كل سبت
لو سبت واحد فى الشهر
برضو مكسب معانا

اخى الفاتح
حاليا ساعيه انجز الموضوع بلا انفاق نقدى
الرغبه فى توفير قلوب حنونه ولو ساعه
ودى بتعتمد على المتطوعين
ولو فشلت حفتش على مختصيين لموضوع النظافه ويبقى اضعف الايمان سوينا شى
لو فى شى مكلف حبلغكم اكيد
يديكم العافيه

اخى بابكر
اكضب عليك
الموضوع حساه تقيل على الاغلبيه
لكن زى ما وضحت
حجتهد اعمل العليه بقدر البقدره والربنا رايده حيحصل

اخى عوض
دوما الجانب العاطفى بيحرز فوايد بتكون فى الجانب الملموس مستحيل
وبيحقق العقليا غير متوقع
عشان كده بتمنى نهتم على قدر اهتمامنا بتغطية الاحتياجات
باشباع العواطف والنفوس ومساندتها حتى ولو بابتسامه طيبه

تسلم اخى سنهورى وربنا يجعل كل ايامنا افضل على الكل

اختنا رانية،
سلامات

Quote: ومازال البحث جارى عن مختصين تنظيف الاذان والاضافر للاطفال

ليس بالضرورة ان يكون كل المتطوعين على دراية بتنظيف الاذان والاظافر للاطفال. فاذا وُجد شخص او اثنين من ذوي الخبرة بهذه الامور، يمكنهما تدريب بقية المتطوعين.

كما تكرَّم الاخ الفاتح التوم، نرجو اخبارنا بالطرق التي يمكننا نساهم بها من على البعد في انجاح هذه المبادرة الطيبة.

وفقك الله في مسعاك.

عثمان دُنقس

شكر رانيه علي هذا العمل الطيب وربنا يجعلوا في ميزان حسناتك

ربنا يجعله فى ميزان حسنات الجميع اخى عبده
:)

اكيد اخى عثمان ما كلهم
انا لو لقيت نفر وااااااااااااااحد خير وبركه
عدد الاطفال البحوجه لتنظيف ما كتير شديد
الاغلبيه نانو شديد
يعنى لو نفر واحد جيه معانا
الامور بتضبط
بس هو فييييييييييييييييييييييييييييييييييييييين

Quote: اكضب عليك، الموضوع حساه تقيل على الاغلبية

تعرفي يا رانيه كريستل،

لا زالت العقدة قائمة وربنا يحلها بتنوير قلوب الجميع وبث الرحمة فيها حتى تنظر الى هؤلاء كاطفال ابرياء ضعفاء لا حول لهم ولا قوة، و قد حُشروا في هذا الجب من غير ذنب جنوه، ويحتاجون للرعاية والحنان كبقية الاطفال.

اللهم انت القادر على ذلك.

حفظك الله

عثمان دُنقس

ما اي شخص بقدر على عمل الخير ...ربنا يعينك ويساعدك ...

شكل الموضوع فعلا مخستك
ومنى ومن غيرى الخستك
للاسف ما لقيت فعليا تطوع
برغم ان الاغلبيه حبيت تساهم ماديا
وانا ما عايزه تبرع مادى
انا عايزه مشاركه
لكن الوم الغير ليه وانا للاسف حتى ناس بيتنا رفضوا الفكره قلبا وقالبا لنفس الفهم والمعنى
غايتو كان نفسى بالجد تتحقق
لكن احتمال تقصير منى عشان كده ما قدرت انجزها
:(

أختنا Crystal
سلام،

تعرفي يا رانيه، لكل تغيير جذري للمفاهيم المجتمعيه السلبيه السائده على مر التاريخ، رُوَّاد ورائدات حاولوا وفشلوا واعادوا الكره مرات ومرات وعانوا في سبيل ذلك ما عانوا حتى كُتب لهم النجاح، او كانوا من زرع النواة للتغيير وجاء بعدهم من اتمَّه.
لا تيأسي أختي، وواظبي على هذا العمل ما دمت تؤمنين به ولا شك لي في ذلك، ولا تلتفتي لمنتقد ضيِّق الافق.
وفقك الله ودمت ودام امثالك من ذوي القلوب الرحيمة والعقول المتفتحه.

عثمان دُنقس