حكاوي ناس سمحين بالحيل...

كونوا وِجداننا، ووضعوا بصماتهم علي شخصياتنا،
وكان لهُم القِدح المعلى في ظهورنا علي مسرح الحياة،
فنحن بضع منهم نحمل ملامحهم. أسأل الله أن يتغمد
من رحل منهم برحمته، وأن يمُنَّ علي من بقي منهم
علي قيد الحياة بالصحة والعافية.
إنهم أجدادنا وحبوباتنا، واباءنا وأُمهاتنا.

ناس سمحين بالحيل، وبوست يعكس نوادرهم
وحكاويهم...

جدنا الحسين ود حاج عمر كان صديق شخصي لحاج حمد ود التكاوي، وكانوا الاثنين في فصل
محو الأُميّة.
طلب المدرس من الدارسين أن يجيبوا كلمة تبدأ بحرف الحاء، فما كان من الحسين إلا أن
رفع أصبعه بسرعة شديدة. المُدرس قالوا: أها يا حاج الحسين.
جدنا الحسين قالوا: حآ حاج حمد ود التكاوي...ـ

خالتنا عآشا بت أحمد. كانت تحب التلفزيون لدرجة الإدمان.
جاتنا مرة في أتبرا، وبمجرد ما بدا التلفزيون إستلمتو. طبعاً زمان التلفزيون قناة واحدة وبينتهي
الساعة 12 باليل، وهي كان ما يهمها نوع البرنامج المهم تشاهد التلفزيون لحدي ما ينتهي.
أها قاعدة وصادف بيتكلم بيويو كوان عن الإنقاذ بلغة عربية مكسرة, قال: بلد ده في هكومة
بتاع أهزاب وصلو مرهلة ختير جداً. لكن ثورة بتاع إنخاس ده جا وانخس كل الناس. فعلقت
بت أحمد في الحال قائلة: والله يا ولدي زول صدق غيرك إنت ما في. والله من يوم ما جو
نخسو الناس لي حدهم...

عمنا إبراهيم أب عجاج جا غاشينا في اتبرا بعد زيارة ولدو الخليفة في طريقو للباوقة.
هو والوالد قاعدين يتونسوا، وأنا قاعد معاهم، ابوي قال لي: قوم جهّز الحمام لي عمك.
مشيت مليت الجردل وختيت الصابونة وجيت. ابوي قال ليهو: الحمام جاهز قوم إستحمى.
ردّ عليهو: سمح يا المدير. وواصل في الونسة. تاني بعد مسافة أبوي قال ليهو: الحمام
جاهز قوم إستحمى. ردّ عليهو: قُت لك سمح يا المدير. راح داخل في الونسة, والظاهر
عليهو ما كان داير يستحمى. أبوي تاني قاطعو في الونسة: الحمام جاهز قوم إستحمى
من غبار القطر. فاجاب بحدة: المدير يازول أنا حاكيت لك القعوية؟ ما مستحمي في
كسلا اول البارح...



القعوية هي القعونجة وبس...

خالتي نفيسة بت همزة. كانت لمان تجي أتبرا دائماً تحب تمشي السوق. مرّة جات وقامت
ساقت سيف الدين أخوي معاها السوق، ومشو دكان بيرم. كان دكان أقمشة مشهور في
سوق أتبرا. قالت للولد الفي الدكان: جيب القماش داااااك. الولد طلع بالسلم نزلوا ختاهو
فوق البنك. فحصتو بيدها، وقالت لو: أها كمان جيب دااااااك. الولد طلع السلم نزّل القماش
ختاهو ليها فوق البنك. فحصتو، وقالت للولد: اها كمان نزّل داااااك. المهم كررت العملية
دي أكتر من مرّة، واصبحت في حكاية بتاعت سبعة طاقات مردومات فوق البنك. بعد ما
قامت بفحصهن مسكت لها قماش منهن، وقالت لسيف الدين: سيف الدين، باقيلك ربع
متر من دا ما بيكسي الإذاعة؟. ( تقصد الرادي. كانت دايرة غطاء للراديو )...

خالتنا بت العباس. كان عندها عتود ودران. مرقت منتصف النهار تفتش عليهو. الواطة
صاااانة والناس مقيلين ما في زول في الشارع. دخلت حِلة العمارنة. الحِلة صااااااانة
قدر ما فتشت لي زول عشان تسالوا من العتود ما لقت. غززت إيدنها في نصها وقالت:
قاااادر الله، عاد الليلة العمارنة صِننننننننننن فوق عتيدي...

عليكم الله شفتو نفر طعامة الناس ديل ؟؟؟!!!


و نواصل...

Quote: حكاوي ناس سمحين بالحيل...

ياخ هو فى اسمح منك انت دا ؟

علي الطماطم وعليك الدكوه ..اول مره احب لى شايقي

واصل ياحبيب

حبوبتنا الله يرحمها كانت تناقر اصغر خيلانا كثير عشان العرس
يوم وهي بتصلي في الحوش صلاة المغرب في اتبرا .... خالنا جاء داخل واتمدد في عنقريبا وقعد يضرَط
قالت ليهو ياولد قطعت لي صلاتي
اقعد باري لي (...) يملوك هوا وتجي داخل البيت زي الفيسبا طوطوطوط
قوووم صلي

-

عندن عمنا أكان بيريد اللحمة شدّيد، وكان بيضبح جنب الدكان يوم الجمعة يبيع اللحمة.
أهآ، وكت يلقى الناس كُتار، والخروف يبقى فضل فيهو نص، يقوم يقول للناس: هوي يا ناس
اللحمة الفضلت دي ما لحمة بيع. ويشيلها يمشي أهلو...

عمنا الدبان أكان عيان، وراقد. بعدين الجماعة بيشاورو مودينو اتبرا. زمان ما في بنطون مراكب.
آها في ناس قالوا: يا جماعة نحن باكر الصباح بدري نشيل الزول ده ونمشي نصلي فوق المشرع.
(طبعاً لازم يشيلوهو بالعنقريب ما بيقدر يمشي). وفي ناس قالوا نصلي حتا نمرق. هو رآقد يسمع
في الكلام، ومايّد راي الناس القالوا يصلوا فوق المشرع. المهم الناس بقو على الصلاة في البيت
وهو الكلام ده ما واقعلو. الجماعة صلوا، وشالوهو بالعنقريب وبقو ماشين على المُشرع. في واحد
عندو دُكان فوق درب المُشرع بيفتح بعد صلاة الصُبُح يبايع الناس. الراجل شاف الجماعة شايلين
العنقريب قفل دُكانو، وجا كابسُن: الفاتحة يا جماعة, الفاتحة. والدبان من فوق العنقريب يقول للراجل:
يا زول أرجع دُكانك أنا حي, ارجع يازول, ارجع أنا حي. المهم الراجل عرف الموضوع, ورجع.
الجماعة وِصلوا المُشرع نزلوا الدبان، الدبان اوات ما نزلوهو قال لهم: أنا ما بقولكم صلوا فوق
المشرع خايف من الشوم النفر ديل...

Quote: الدبان سالوة وقالو ليهو عثمان ولدك دا عمرو كم؟. قالهم الولد دا من يوم ما ربنا خلقنى شفتو فى حالتو دى. اب سوار الجماعة بيحفرو فى قبر جا وقف وفال: ان شاء الله ياربى ما تجعل لى فيهو قسمة. اب قلوتة كان يجى السوق وقبل مايدخل السوق يقيف فى الركن ويقول ياربى ترزقنى كان من حلالك كان من حرامك

عمتنا نفيسة بِت الخليفة الله يرحمها, في محو الأُميّة أدوهم ضاء، ضفدعة
وكت جا الدور عليها قالت: ضاء ضعوية...

أب قلوتة، كان يجي يكورك في سوق الباوقة: يا جماعة،
الشاف أبو القاسم أب قلوتة ليهو نُصو ولو كان ما فيو
فايدة...

أب قلوتة برضو كان يملأ الشوال تمر كعب وبفوق يضاريهو بي
تمر سمِح. الجماعة قالولوا: يأب قلوتة البيشتري تمرك السنة دي
السنة الجاية ما بيشتري مِنّك. وكان يقولهم: فوتو في شُغُلكُم كُلُ
سنتاً ليها غشيّمـــ...

عمتنا بت أب قناية في آخر عُمُرها بقت تودّر، أها ما بتدور تتونس مع كل الناس،
وكانت تحب تفتح ونسة مع أسيا أُختي. أها أسيا يوم مشت زارتها. بعد سلمت عليها
بت أب قناية سالتها: إنت مني؟. قالت لها أنا أسيا. بس بت أب قناية فتحت: أسيا والله
يا بنتي أنا زمان إتبرّد، وإتشطف، وإدلّك، وإسوّك,،وإتمسح، ود كُلوووو أسويهو.
الليلة من ما جات حيكومة الإنقاذ دي، والله موية الوضو دي بقيت يا الله الِم فيها...

Quote: ياخ هو فى اسمح منك انت دا ؟ علي الطماطم وعليك الدكوه ..اول مره احب لى شايقي واصل ياحبيب

هههههههههههههههههههه.

حتي إنت يا خدر ؟
كدي هاك الرابط دا:
يا عمر صِديّق أنهم ود جبرين و عبد المنعم و تعالوا لِ بجاي...

يا زول إنت غاتس وين ؟
الشوق ليك بحور.
والله صحي.

الصورة ما ظهرت عندي ؟!!!...

تسلم حبيبنا ود المدير

Quote: يا زول إنت غاتس وين ؟ الشوق ليك بحور. والله صحي. الصورة ما ظهرت عندي ؟!!!...

والله غبتا اربعه شهور كلها سفر

بقينا ذى ابن بطوطه .. الله غالب


الصوره ماظاهره

Quote: حبوبتنا الله يرحمها كانت تناقر اصغر خيلانا كثير عشان العرس يوم وهي بتصلي في الحوش صلاة المغرب في اتبرا .... خالنا جاء داخل واتمدد في عنقريبا وقعد يضرَط قالت ليهو ياولد قطعت لي صلاتي اقعد باري لي (...) يملوك هوا وتجي داخل البيت زي الفيسبا طوطوطوط قوووم صلي

ههههههههههههههههههههه،
يا حيدر النُقط دي ختلينا فيها حاجة حتي
لو من جنب السينما الجمهورية.


رجعت واللآ لِسّع ؟...

Quote: جدنا علي الكندو عليه رحمة الله كان بسافر سنار ومعاه جدنا بابكر ود عبد الرازق الله يرحمه كل سنه لابنته والدة ابن العمة ود الشيخ وطبعا سنار مشهورة بالبطيخ السناري الكبار ، جدنا علي جاء يحكي عن البطيخ وانه البطيخة نفرين مايقدرو يشيلوها قام عمنا عوض الحارث قاله ( حامد العجاجة ) جدنا علي قاله علي الطلاق يا العوض نفرين مايشيلوها لكن انت وحّدك تاكلها...

Quote: عبد العظيم جاويش راجل متدين شديد ومتزن جدا لكن بي يهظر مع الشباب. أها مرة قاعد يصحي في شباب لي صلاة الصبح - صحا الاول قام قعد وجر الكيس من تحت المخده وختا سفة ورقد راجع - مشى للتاني عمل نفس العملية سف ورقد مشى للزول التالت - قال له عادل يا عادل -- عادل قاله أيوا --- قال له قوم سف...

Quote: لو من جنب السينما الجمهورية.

-
بالضبط يامعلم .. طلعت مخَيت الشوارع ديك تب
(منزل احرار) ........ بس البيت البعدو قبل الناصية

المدرس أشر لصورة الخروف وقال ياولاد خ ..
كووولهم بصوت واحد كبش..
.
.
الله يرحم كبارنا مجالسم يا ود المدير كانت ملانه طرائف ..
عمي رحمه الله كان راجل طول وعرض يعني متل ما بقولو مالي مركزو ..
بس كان ملازمو سوء طالع عجيب ..
عرس ثلاته مرات ..
المرأة حدها معاه سنة أو سنتين ؤ تتكل ..
لامن اتعقدن منو النسوان ..
ناس البلد ملمومين في فراش الثالتة جو عرب من بره البلد معزين ..
طبعا ما شايفين الراجل البكتل نسوانو دا ..
واحد منهم وسوس لى واحد من ناس البلد قالو وينو راجل المرحومة ..
عمي في اللحظة ديك كان برة وجا داخل ..
الراجل قال للعربي ياهو دا راجل المرحومة ..
العربى عاينلو وقال : أي والله بكتلن .
..
يديك العافية.

في اتبرا، الواطة سخانة مولعة نار، واتبرا عدمانة أسم التلجة. الناس يكفحو في الموية زي السليقة.
في نسوان في الإسبتالية ينضمن قالن البلد ما فيها تلج، قام سمعن طارق تنقا،قالهن: التلج رااااقد ،
هسع أكان دايرتلكن تلج أجيبلكن.
قلن لو: إنت يا يابا تتبارك، بسراعك الحقنا بيهو.
يا زول تنقا مشى جابلهن كمية بتاعت تلج. والنسوان قعدن يبردن في الموية ويشربن، ويدعن
لتنقا وتلجن مطفح في المواعين. جا راجل سعلن من وين جابن التلج؟
قالن لو: جابو لينا الولد المبروك داك.
الراجل مشى سأل تنقا، تنقا قال ليهو: تعال معاي التلج راااااقد.
الراجل مشى مع تنقا، تنقا وداهو المشرحة. قالو: التلج ياهو دا!!!
الراجل مشى للنسوان قالهن: الولد دا جابلكن التلج من المشرحة!!!
يازول النسوان قامن يطرشن، ويسبن لتنقا، ويهرجن فوقوا.
طارق تنقا قالهن: هو زاتو الزول ما ميّت، التلج دايربو شنو؟؟؟...

إتنين من أهلنا ناس الباوقة مشو يزرعوا في العتمور.
أها زرعولن عيش، والعيش نجح نجاح سمح بالحيل، لكن إتلحن فار
تليحة كعبة خلاس.
واحد فيهن زهج زهج شديد خلاس، قاعد متمحن. رفيقو قالوا: قوم أمشاك
على الزراعة.
قالوا: يا زول ماني قايم الفار دا محنا. أنا ماشي للشيخ الجعلي يشوفلنا ليهو صِرفة!
صاحبو طوالي قالو: والله الشيخ الجعلي إلا يديك ليهن كدايس...

Quote: الوالد (رحمة الله عليه) وعمنا حسن عبدالله ( هم الاتنين ولاد أعم وولاد خالات جدى كان عندو سكرى وابوى برضو وعمنا حسن والدتو إتوفت وعمرها 60 أكان 70 وبرضو كان عندها سكرى) اها يا زول كنا قاعدين نتغدى وبعد الغدا جابو الحلو عمنا حسن قال لى ابوى يا زول انت ابعد من الشى الحلو دا باقى ابوك كاتلو السكرى.. أبوى قالو: عا########ى امك الماتت فى الوضوع........

مرّة جا واحد من ناس التبليغ والهجرة في الباوقة، وقعد في المسجد. أها عاد الناس
إتقدوا فوقو بالغدا، والفطور، والعشا، والشايات. يا زول قعدلوا تلاته يوم. بعد التلاته
يوم قالهن: أنا بدور أمشي، ودايركن توروني درب العمارة بوين، وبدور لي شباب منكم يمشو معاي خروج.
أُمحد أحمد ود الحسين أكان حاضر. قام مسكو من إيدو ووداهو وقفو في شارع العمارة، واداهو
عشرة جنيه وقالو: العشرة جنيه دى، أكان دُرت شرق بتوديك، وأكان دُرت غرب بتوديك، واكان دُرت
سافل بتوديك، واكان دُرت صعيد بتوديك، واكان دُرت العمارة تمسك الشارع ده طلقة بُندق بيمرقك في
العمارة، نحن ناس زراعة ونا صايب ومُشهاد ما عندنا جنوناً بيقعدوا ينطلقو معاك بالحلآل...

العوض ود حآجة حليمة بيوعظ في الجماعة، قالهم:
سيدنا إبراهيم تردولوا نار كبيرة خلآس، وجدعوهو
فيها. أها، النار دي تلآته أسابع موآقدة، وكت همدت
مشوا فقدوهوا، اكان لقوهو متحكر في نُصها وياكُلُوا
في بِتِيّخة...

Quote: المدرس أشر لصورة الخروف وقال ياولاد خ .. كووولهم بصوت واحد كبش..

ود المدير تحياتي وبوست جميل

والدنا محمد عمر رحمه الله كان في زيارة للخرطوم وكانوا يستغلون بوكس غمارة واحدة .. وهو كان يركب مع السائق.. وفي الخلف شقيقي وبعض الشباب

كانوا واقفين جنب بقالة .. جاءت إمراة كبيرة وقالت وصلوني قدام .. قالوا ليها أركبي .. همت بالركوب قدام .. أشر ليها الوالد أن تركب وراء مع الناس ديل

قالت ليهو : وراء في رجال .. الوالد عاين ليها مسافة كدا .. وقال ليها : نان أنا مرة؟

قالت ليهو : لكن إنت ما راجل عجوز ..

ضحك الجميع وأركبوها ووصلوها


شكرا ود المدير






عبد العزيز

بعد عملية لابوي في احدي عينينه ، الدكتور قال ممنوع الكلام لمدة اسبوع ، والشاش دا بعد اسبوعين انا بفكو ،
الكلام دا قدام الوالد ، بعد العملية بساعات دخلت العنبر لقيت الحجاج مربطين عين والتانية مغمدا ، ونضم شديد ،
قلت لابوي : ياحاج الدكتور مش قال ممنوع الكلام ، هسع شوف الحجاج الجنبك ديل صامتين كيف ،
رد ابوي : القالك منو ، والله ديل خرقوا العوائد ،
وبعد شوية لقيتو يحاول يفك الرباط والشاش حول العين ، ياحاج الصبر قدامك اسبوعين والدكتور هو البفكو ،
مشيت الحلة ، قابلني صديق ابي عم الحبر ؛ الراجل كيف يازول ؛
حكيت ليهو قصة الشاش الذي حاول ابوي ان يفكه ....
قال لي : ابوك مستعجل على الشوف التقول قبال كدة ما شاف ... 80 سنة يضاوي خلاص كفاهو ....
.......................................................
شحنا البوكسي ومشينا نزور صديقنا المرقد في مشتشفى بحري ، اها الدكتور خرجوا ، وجبناهو معانا قبال ما نصل الحلة البكسي عمل حادث
اها صاحبنا الكان مرقد تعب شوية من بعض جروح ، اقترح احدهم ان نرجع المستشفى تاني للاطمئنان ؛
علق صاحبنا الكان مرقد :
يعني يا جماعة ، من الباطنية للحوادث ...
.......................................................
احمد ولدي عندما كان في الثالثة كا يناديني :
بابا بابا ابوك ....
........................................................

سلام يا ود المدير ، ساعود مرة اخرى وتسلم يا امير

Quote: جدى أحمد اللمين (رحمة الله عليه) يحكى قال أكان راكب فى باص الجول واحد من أهلنا الجواله ديل ختَّا كراعو فوق السلم ووراهو بتِّو تكوركلو يابا يابا أمِّى قالت لك جيبلها معاك قميص نوم هو شكلو مزرقنه معاهو قالَّها : قوليلا النوم أكان جا براك بتنومى ماهو دايرلو قميص

Quote: حبوباتى فاطمة وزينب بنات عطا الله كانن كتير بغلطن فى الكلام قامت زينب مشت الحج بعد جات اتغلطن هى واختها فاطنة فى موضوع. بعدين زينب حلفت، دا تقول وحات النبى المسكته شبكو، قالت وحات النبى المسكته شنبو

ود المدير سالم وحكي طاعم

مرة جانا دكتور حسن في البادية ومعاهو الوالي وبعد ما قالو كلامهم ونضميهن
عندنا احد اعمامنا بطران وزو ل طرف وحكاوي قام دخل وفج الناس ومسك المايق وقال:-
ها ناس سلام الشيخ الجنن المجاغنة أياهو
الشّايب ابو نعلاتاً بيض دي


محبتي

Quote: جدنا محمد احمد عيسي ربنا يديهو الصحه والعافيه وهو من ارتولي عنده ولد ولده محتاج لجنسيه كان بطاقة. المهم، الولد ساق جده ومشوا للضابط. الضابط طلب من جدنا جنسيته قام ناولها الضابط نظر فيها وقال له ياحاج بطاقتك دي مدتها انتهت رد عليهو قلت شنو ؟؟؟ الضابط : ياحاج مدتها منتهيه. سأل الضابط: البطاقه دي لو لقيتها في مكان جريمه بتقبضني ؟؟؟ رد عليهوا الضابط طبعا بقبضك. رد عليهو: تقبضني ليه مامدتها منتهيه؟!!!

Quote: بالضبط يامعلم .. طلعت مخَيت الشوارع ديك تب (منزل احرار) ........ بس البيت البعدو قبل الناصية

مرّة وااااااحدة خشيت جانوار في السينما الجمهورية.
خلاس داير تسويني مخيتا كمان ؟؟؟!!!

برضو عما لينا كان صاحب طرفة ..
مشى عمرة وقام اشترالوا تلفزيون ملون ..
الزمن داك دابا التلفزيونات الملونة بقت تدخل السودان ..
أولانا المغتربين قالولو اعمل حسابك أوعك تقول لناس الجمارك ملون بدفعوك جمرك تقيل ..
الراجل وصل ايدو في قلبو ..
بتاع الجمارك بعد شخت على الشنط سألو :
يا حاج الكرتونه دي شنو ؟
عمي تمتم : ؤ بعدين المخرج شنو يارب أكضب وبوظ عمرتي من قبل اشيل أهلي ؟
آآن .. عمل الاضان تقيله ..قت شنو ياولدي بصوت حنيييين؟
* سألتك الكرتونه فيها شنو ؟
- تلفزيون ياولدي العيال جننونا ..
* ملون ؟
- غايتو بسييييييط..
بتاع الجمارك انفقع ضحك لامن الطبشيرة وقعت ..
تصدق دفعوا جمارك تلفزيون اسود وابيض.

Quote: قالت ليهو : وراء في رجال .. الوالد عاين ليها مسافة كدا .. وقال ليها : نان أنا مرة؟ قالت ليهو : لكن إنت ما راجل عجوز ..

هههههههههههههههههه،

سلآمات يا عبد العزيز.

هاك دي:

سعد الله ود صابرين عليه رحمة الله, كان جاء اتبرا لعلاج.
مشى قابل الدكتور وجاء. أُمي سالتو: أها الدكتور قالك شنو؟
قال لها: قال لي تمشي تقابل الجراح!!!
قالت لو: اها ومشيت؟
قال لها: يا بت همزة إنت جنيتي؟ بمشي للجراح عِشان يجرِحني؟؟؟

تشكر على المرور أخي عبد العزيز...

Quote: شحنا البوكسي ومشينا نزور صديقنا المرقد في مشتشفى بحري ، اها الدكتور خرجوا ، وجبناهو معانا قبال ما نصل الحلة البكسي عمل حادث اها صاحبنا الكان مرقد تعب شوية من بعض جروح ، اقترح احدهم ان نرجع المستشفى تاني للاطمئنان ؛ علق صاحبنا الكان مرقد : يعني يا جماعة ، من الباطنية للحوادث ...

هههههههههههههههههه،

عبد المنعم يا حبيب،
هاك أها:
واحد من أهلنا الرباطاب ديل رِكب القطر. أها قال الكمساري لامن يجي يتحايل عليهو،
ويقولوا: رِكِب من الكربة. قام زولك أخدتو نومة، والقطر خِرِب. وصلحوهو, ومشي
مسافة, وزولك نايم ما جايب خبر. الكمساري جا تورو: يا حاج تذكرتك. قالوا: ما عندي.
الكمساري قالوا: نقطّعك يا حاج. رِكِبت من وين؟. الرباطابي قالوا: رِكِب من الكربة.
الكمساري قالوا: يا حاج الكربة نحن لِسّع ما وصلناها!.
الرباطابي, بسرعة شديدة مع خُلعة قالوا: أها أعرِفني رِكِب من وين؟

راجينك...

Quote: يا سلاااام وقت اتذكر حكاوي حبوباتي كلام سمح وكلو حكم وبهجة

شكراً يا سماح علي الطلة البهية.

أب عجاج والحسين ود شريفي، ديل أجدادي. مشو يزرعو في العتمور.
أها، أهلنا الشريفاب ناس صلايين، واب عجاج ما قاعد يصلي.
الحسين توروا الدغش لصلاة الصبح، وأب عجاج عمل نايم.
تاني الحسين توروا، قالوا: يا اب عجاج قوم صلي الصبح.
أب عجاج قالوا: يا الحسين الخلاء ده ما فيهو موية!
الحسين قالوا: إتيمم.
أب عجاج قالوا: مالي جنيت، بقوم من صباح الرحمن أكتح في وشي بالواطة؟؟؟

شكراً سماح...

Quote: بوست ممتع يا ود المدير وشايقيتك دي هي الجبرتني علي الكتابة وهاك دي منهم .. خالتنا الكبار جو من الشمالية للمشاركة في عزاء خالي وشقيقهن المرحوم محمد عثمان العمدة. الخالة الكبيرة سألت امي هو الحصل شنو .. امي قالت ليها والله الدكتور قال عندو ألتهاب في البروستاتة وقام عمل ليه عملية ازالة و منها مات ..خالتي عاينت لي امي مسافة و عقبت .. الله يستر يا الزهرة اختي المرض ده لايكون ماسكنا و نحنا ما عارفين؟

ههههههههههههههههههههههههههههه،
مبالغة يا جلال.

مرّة مشينا أنا وود خالتي لخالنا أب سلوقة وكان زول بيركب الفيل.
لقيناهو راشي الحوش وعندو زهور زارعها خاتى العنقريب جنبها وقاعد بمزاج.
حبيت أشاغلو قتلو: والله لكن حديقتك مبالغة يا خال!
قال لي:والله الواحد فينا لو لاقى غردو يبقى فراشة زاتو...

أب عجاج الله يرحمو، كان كلما يشوف أُمحد عثمان ولدو
يقولو: إنت يا أُمحد عثمان ولدي شقي وماك لقي، واكان قالولك أضرب الواطة دى تجلى منها...

Quote: حبوبتنا بت خليل لها الرحمة والمغفرة في اواخر عمرها ولما اصابها الخرف كانت تخرمج في الصلاة الصبح اربعة ركعات والظهر ركعتين المهم لخبتة شديدة ..... قام خالنا المهدي ود احمد الماحي .... قال ليها يا حبوبتي صلاتك دي ربنا ما بيقبلا .... فقامت حبوبتنا بت خليل قالت ليهو :- يا ود ربنا ان بقي ما قبلا رب العالمين بيقبلا

بص العبيدية،
مرّة مليان لود عينو، والناس زهجانين والوآطة حر، جا عربي داير يركب،
دارع سيفو فوق كتفو، وفي الكتف الآخر دارعلو مُخلاة، وشايلو سوط في إيدو
الشمال واليمين طابق فيها عُكآز. يازول يدور يدخل بصفحتو اليمين السيف يعاكسو
يحوّل للصفحة الشمال المُخلاة تعاكسو، يجي بالجنبة الشمال السفروق. يمشي
بالجنبة اليمين السوط. واحد من ناس العبيدية قال: يا جماعة العربي ده ما تحسحِسو تخلوهو يركب...

Quote: ود المدير سالم وحكي طاعم مرة جانا دكتور حسن في البادية ومعاهو الوالي وبعد ما قالو كلامهم ونضميهن عندنا احد اعمامنا بطران وزو ل طرف وحكاوي قام دخل وفج الناس ومسك المايق وقال:- ها ناس سلام الشيخ الجنن المجاغنة أياهو الشّايب ابو نعلاتاً بيض دي

هههههههههههههههههه،
ما لقالوا بُكان فاضي غير النِعلات ؟؟؟

ود المقدم،
نعلّك طيّب ؟.

هاك أها:

Quote: مرة واحدة من حبوباتنا ديل جات الخرطوم لى عزا ومعاها رفيقتاً ليها.. رفيقتا ناقشة شوية قامت قصرت فى الصلاة.. سألتا مالك صليتى سريع كدى قالتلها أنا قاصرة حبوبتنا قالتلها يا دى بتروحى تتميها عند أهلك؟

Quote: Aiman Awad · حكى ممتع والله ومقدمتك يشهد الله ااروع من حقت اسماء فى حياتنا لك اصدق التحايا ايها الوفى

سلآمات يا أيمن.

جِد المرا زولاً جعلي كريم بالحيل، وعندو دكان في قرية من قرى الجزيرة.
أها راجي البضاعة تصلوا وما عندو في الدكان غير بساطين ومقاشيش. في
جماعة من الخرتوم ماشين لمناسبة في الجزيرة. قالوا يغشو يسلموا عليهو ويفوتو.
واحد قالهن: يا جماعة الجعلي ده اكان غشيناهو بيمسكنا.
واحد قال للجماعة: أقيفو بعيد وانا بمشي أشرحلو الحال وأحلف عليهو طلاق ما يمسكنا.
أها الراجل مشى قالوا: الجماعة ديل جايين يسلموا عليك، وعلي الطلآق ما عندنا طريقة
قعدة عشان مستعجلين، وحرّم بعد نسلّم عليك تدينا خاترك.
أها الجماعة جو سلمو عليهو وقالولوا: أها نحن بعد ده النمشي.

قالهن: إنتو قبيل حلفتو ما تقعدوا. دحين علي الطلآق بالتلآته عِلآ أيِّ
واحد فيكم يشيلوا باسطونة وحنقوق من الدكان ده حتا تمشو...

مودتي...

الدبان عليه رحمة الله، قالوا فالقلو واحد في الإندآية، والزول مشى إشتكاهو.
أها جابوهو في المحكمة وقعد يحكي للقاضي.
قالوا: عارف يا حضرة القاضي، أنا جيت داخل الإندآية واوآت ما ختو لي قرعتي قدامي
عيني للزول ده قام من هنآك يطوطح وجاي على قرعتي. اها في طوطيحو ده أنا خفتو يدفقا، وقعدت
أحاحي فيهو، يا زول اوّع القرعة، يا زول القرعة دي بتدفقا، يا زول حاسب القرعة. وهو
يطوطح وجاي عليها، وانا أقولوا يا زول أوّع القرعة. والله يا حضرة القاضي، الزول ده أكان
ما مكنتو قبل يصلها، أكان حقر جنون الإنقرياب لي حدهُن...

أهلنا الكراراب في اتبرا مشهورين بالمشاكل خاصةً واحد اسمو زين العابدين... اها مرّة مِداققين في
بعضُن، ومسولهن جُودية، وكان عمي الطاهر مع الأجاويد... اها يا زول عارف تفقوهن... بعد تمّ
الصُلُح، ناس المجلس دايرين يقومو يمشو بيوتُن... قاموا الكراراب قالولُن عِلا تقعدو تتعشو.
الجماعة قالولُن: يا جماعة العشاء دا أعفونا منّو...
اها الكراراب مُصرين على العشاء، والجماعة مُصرّين يمشو... وكت المحاججة كِترت. قام
زين العابدين شال عُكازو ووقف، وقال للأجاويد: على الطلآق الليلة يا تتعشو يا تدقو!!!
عمي الطاهر طوالي قال ليهو: ما في سبباً بيخلينا نِدقّا، جيبو عاشكم دا النتعشى...

Quote: Mohammed Mansor Albadri · Sudan University of Science and Technology حباب ود المدير - عمن لينا مشى يخطب لاخوه الأصغر في حلة جمبنا أها بعد التعارف والسلام دخلو في الجد وأمر الزواج والمهر الجماعة قالو ليهم المهر 5 مليون قام زعل منهم وقال ليهم علي الطلاق الحلة الورا ادونا مرا حمار العمدة ما اشيلا وبي مليون بس قوم ياخوي تقوم غيامتك

يديك العافية يا محمد منصور.

ود فرح، عربي من سيدون. دايماً يجي الحِلّة جالبلو، يا إمتاً عبور، او نعجة بجناها،
او عتود، وهكذا.
مرّة بيصلي مع الجماعة في صلآة المغرب، وجنبهم ساماً فيهو تمُر. اها ود فرح
فجأةً مرق من الصلآة، ومشى إتاوق في السآم وجا يردد: مِياهآ، مِياهآ، وواصل
الصلآة مع الجماعة.
ابو الجيّب قالوا: يا ود فرح صلآتك دي بآطلة.
ود فرح قالوا: يا زول صلآتي مِي باطلة.
ابو الجيب قالوا: يا زول إنت مرقت، وجيت تقول مِياهآ، مِياهآ. ما بطلت كيفِن؟
ود فرح قالوا: يا زول إنت قايلآ مرا ! الشي مِيِ مرا، نعجة، نعجة..

Quote: مرّة وااااااحدة خشيت جانوار في السينما الجمهورية.

اها فيلم جانوار ده وسرتانا لايرحم نهاية الصف بكون داقي في البيت ظاااتو
يعني ممكن تاخد ليك شدة وترجع الصف تاني

Quote: اها فيلم جانوار ده وسرتانا لايرحم نهاية الصف بكون داقي في باليت ظاااتو يعني ممكن تاخد ليك شدة وترجع الصف تاني

هوووووووي يا بتاع النبال إنت،
احضر فلمك وامش علي ود البي أُكُلك زبادي صاااااقط،
واغشي الحارث شِيل تساليك، والزم أهلك كداري.

عبد الحفيض ود قوّدر الله يرحمو. اكان زول مستعجل بالحيل.
مرّة قآم من النوم مِتأخِر، وكابس بسراع، بسراع مشى الورشة، وبعدين
جا يحكي للجماعة. قال لهُن: والله الليلة قمت من النوم مِتاخر وقوآم، قوآم،
شربت العجلة، وركبت الشاي، وقُمت طآير طيرآن، الورشة ضربت لي في
الصُفآرة.


يا حيدر الزين تعال سوق الزول
دا من هِنا...

خالي* شافتو جارة لينا واقف في الصف المابغباك
جات الحلة شالت حسَو
قال ليها انا مشيت بي غرضي ، إنتي الوداك هناك شنو؟؟
بقت تفتش في التخارجا

* من النوع البعضَي جلابيتو ويقاصد باب البيت وتوووش ينزرق
مرة تاكو الباب بي لستك مجروس
جانا مجبَص من نخريهو لى مركوبو

جدنا اب سروال ( مسمنو اب سروال عشان مابلبس سروال) والله جد
دخل محو الامية وبقا اتجهى في الكلمات وعمل فيها مقددا
يوم مرتو جابت ليهو دواء طوالي استلم كرتونة الدواء قراية
هذا الدواء يضر بصحتك .........
لحدي هنا خلاص نفسو انقطع وسكت ساكت قال خلاص الحكيم والمرة دايرين اغتسو حجرو
يا زول ما تشرب الدواء
اعاين ليها مغبون
خلاص مستعجلة علي
كوسيها عند امي انا خلاص بقيت متعلم
اولا بالتبادي اتي طلقانة
والحكيم حرم كان أكان اسقيهو ليهو بنخريهو
.
.
وعمك اب سروال دا ذاتو لمن مرض
جو الناس اكفروا ليهو
مالك يا اب سروال
عندي ايدز
كفارة يا اب سروال مالك بتشكي من شنو ؟
مسكني ايدز
اولاد قاليهو يا حاج اتا بتتكلم ساهي ات عارف ايدز دا معناهو شنو ؟
عارفو أئ مرض كعب
طيب لشنو بتقول للناس عندي ايدز
عشان امكم دي بعد اموت مافي زول اعرسا
.
.
سلام عليكن جت

Quote: جدنا اب سروال ( مسمنو اب سروال عشان مابلبس سروال) والله جد

سلآم يا ود البوش.

ود الكرار زول دلوكة وبيريد اللِعِب بالحيل. أها عارف، مرّة بعد رجع من
التِحتانية بي في الليل، قال كدي ملص جلآبيتو علقا فوق حبل الغسيل والسروال
زرقو تِحت العتنيبة ورقد. بعد خلاس النومة شعشعت في الراس، نسيم الليل
قال كدي جابلوا صوت الدلوكة جووووا أضانوا. ود الكرار فت خفس، لفح
جلابيتو من حبل الغسيل درعا في رقبتو وبِقى سايق علي الدلوكة. نزل علي
الدارة عرض زيييييين، والدلوكة قالت كدي عكلت وسوط العنجاوي إترفع
في السماء، ود الكرار أخدتو الهاشمية وقال كدي في نُص الدارة ملص
جلابيتو جدعا هناك. عليك أمان الله كان يلقى نفسو واقف حُوتة. جل عريان.

وحات الخوة يا ود البوش لي يومك دا
مسمينو فرعون...

ود المدير ... يبدو أنني سوف أستاجر غرفة في بوستيك دا

جدنا حبوب العدار .. رحمه الله .. من حلة يونس .. كان يعمل في هندسة السكة حديد .. ويأتون كل خميس للحلة

صادف في أحد الخمايس أن زمليهم في المصلحة سيتزوج في الباوقة .. وكلف زملاؤه جدنا العدار بجمع الكشف وأخذه معه

قبل الزواج بيومين توفيت واحدة من نساء الحلة ... وجدنا كان عنده الخبر..

فكر ثم قدر .. ثم قتل كيف قدر.. وقرر الذهاب إلى الزواج مباشرة في الباوقة وتأجيل العزاء...

بحجة أن الحي أولى من الميت..

جدنا .. زي ما بيقولوا .. كتل العرس تمام.. وجاء راجع الجمعة من الباوقة على عطبرة طوالي .. ما مشى البكاء

ناس البكاء كان عندهم الخبر.. وبقوا مطمبجين من جدنا..

الخميس اللي بعدو.. جدنا جاء مباشرة من المركب إلى بيت البكاء .. شايل مخلاتو وعصاتو

رمى المخلاية والعصايا .. وقال ليهم : الفااااااااااااتحة ..

الجماعة الزعلانين قالو ليهو : الفاتحة في منو يا ود العدار ؟

قال ليهم : الفاتحة في رقية ... قالو ليهو : رقية ما ماتت ...

شال مخلايتو وعصاتو وقال ليهم : عايزين توروني بــي موت رقية الميتة من عرسها ود الحسين






عبد العزيز

Quote: ذات صبح صحا الناس من النوم علي حركة قلابات التراب و لواري الطوب و كمية من عمال البناء يحفرون الاساسات في الساحة الكبيرة الممتده امام دار المرحوم شيخ العرب حاج الدالي بالدروشاب .. اها اتلم وفد كبير من اهلنا العرب والجيران و مشو لي حاج الدالي عشان يعرفو الحاصل وبعد السلام والمجاملة قاليهم داير ابنيلي جامع .. الجماعة قالولو خلاص ده عمل خير ونحنا دايرين نشارك معاك فوقو .رد عليهم الواطا واطاتي والبنا قادر عليهو و مشاركتكم ما بتلزمني ..اها الحجة قامت والاصوات علت فوقف علي حيلو وبصوت جهوري قال ليهم ..ها ناس ها .. صلوا علي الله..واحد من القاعدين جنبو لكدو وقال ليهو يا حاج بيقولو صلي علي النبي.. التفت اليه حاج الدالي قائلا,, ااازول ها كل زول يصلي حسب قدرتو ..اللهم ارحم موتانا و سائر اموات المسلمين اجمعين ,,اااامين..

هههههههههههههههههههه.

جلال يا رايق،
يا اخي طلتك مُتعة.
والله صحي.
دحين لا تحرمنا منها.

Quote: واحد من اهلنا العرب ديل جاء لي جماعة، وصادفلو صلاة تراويح والزول مو فالح في الصلاة. المهم اتوكل علي الله ووقف في الصلاة، وكانت بالجزء. أها، بقي يقوم ويقع مع الجماعة مو عارف لا صرفاً لا عدلاً. الصلاة انتهت وجابو العشا، الزول كرب في العشا ورقد نام. بلا كتير صحوه لي صلاة الصبح. : قوم الصلاة يازول. قالهم: صلاة إشنو ياناس ؟ قالولو: صلاة الصبح. قاللهن: والدفسيبة اللت الليل دي كلها مافيها الصبح ؟!!!

Quote: ود المدير ... يبدو أنني سوف أستاجر غرفة في بوستيك دا جدنا حبوب العدار .. رحمه الله .. من حلة يونس .. كان يعمل في هندسة السكة حديد .. ويأتون كل خميس للحلة صادف في أحد الخمايس أن زمليهم في المصلحة سيتزوج في الباوقة .. وكلف زملاؤه جدنا العدار بجمع الكشف وأخذه معه قبل الزواج بيومين توفيت واحدة من نساء الحلة ... وجدنا كان عنده الخبر.. فكر ثم قدر .. ثم قتل كيف قدر.. وقرر الذهاب إلى الزواج مباشرة في الباوقة وتأجيل العزاء... بحجة أن الحي أولى من الميت.. جدنا .. زي ما بيقولوا .. كتل العرس تمام.. وجاء راجع الجمعة من الباوقة على عطبرة طوالي .. ما مشى البكاء ناس البكاء كان عندهم الخبر.. وبقوا مطمبجين من جدنا.. الخميس اللي بعدو.. جدنا جاء مباشرة من المركب إلى بيت البكاء .. شايل مخلاتو وعصاتو رمى المخلاية والعصايا .. وقال ليهم : الفااااااااااااتحة .. الجماعة الزعلانين قالو ليهو : الفاتحة في منو يا ود العدار ؟ قال ليهم : الفاتحة في رقية ... قالو ليهو : رقية ما ماتت ... شال مخلايتو وعصاتو وقال ليهم : عايزين توروني بــي موت رقية الميتة من عرسها ود الحسين عبد العزيز

ههههههههههههههههههههههه.

مرحبتين حباب عبد العزيز، حباب أهلنا ناس خليوة.
غرفة شنو يا زول ؟ إنت البُكان دا هِيّلك تب، نعمِنّك
إنت زاااتك هِيلنا.
إتحكّر تب يا ود العدار.

Quote: الحرم بت الزبير عليها رحمة الله قالو سعلت لها من زول بعد عرسو بي تلاتة يوم . قالولآ: ليها الزول دا مشى شهر العسل. قالت لهم: وساق مرتو معاهو ؟؟؟

ماك نصيح عارفك انا

Quote: بعد فترة من الانقاذ الحالة بقت شلش و الناس تعبوا طبعا اول ما استلموا قالوا نعمل و نصلح وو المهم واحد من جماعتك السمحين ديل ياود المدير قال لى فى واحدة نصابة و جعانة راكبة حمارها الله يعزك لما قربت لى واحدة من الحلال شافت الشفع يكوركوا الطهارة جات الطهارة جات طوالى عرفت انهم منتظرين ليهم قابلة طوالى خشت فى الدور دخلت على البيوت ضربت اللحمة و الزلابيا اها قالوا ليها ادخلى طهرى البنية شالت الموسى و نظرت ليهم و قالت جنس حق بنتكم دا ما لاقانى و لا شفته ان قطعنا بى جاى يطول و يرق و كان قطعنا بى جاى يعرض و يقصر رمت الموس و طلعت منهم لا طهرت ليهم بنتهم لا خلت ليهم اكلهم دا حال ناسك ديل

ههههههههههههههههههههههههه،
يا ود المكي عِندك البِدع والهوايل.
يسعلني الله.

عارف، عندنا واحده من أهلنا ناس اتبرا، ساقت بِنياتا وراحت الخرتوم تحضر
طهارة بنات أُخُتا. أها، وكِت مشو للدكتور البنوت دايرين يطهروهن سُنّة.
بعد طهروهِن اللتنا اللت اتبرا دي، قالت للدكتور: دايراك تكشف لي علي
بِنياتي ديل. طهرتهن في اتبرا سُنّة، لكن شاكة في طهارتن دي.
صاحبنا الدكتور كشف عليهِن وقال لها: قلت لي طهرتيهِن في اتبرا؟؟؟.
قالتلو: أيِّ.
قال لها: أكان كدي بنات اتبرا لي حدهِن غُلُف.

ليك التحايا النواضر يا عبد العزيز،
ومشكور علي الطلة...

Quote: أكان كدي بنات اتبرا لي حدهِن غُلُف

شوفت ناسنا متقدمين بسنوات غلفاوية على باقي البشرية الضهبانة دي كيف ؟

-
دكتور رجعي تب

Quote: خالي* شافتو جارة لينا واقف في الصف المابغباك جات الحلة شالت حسَو قال ليها انا مشيت بي غرضي ، إنتي الوداك هناك شنو؟؟ بقت تفتش في التخارجا * من النوع البعضَي جلابيتو ويقاصد باب البيت وتوووش ينزرق مرة تاكو الباب بي لستك مجروس جانا مجبَص من نخريهو لى مركوبو

ههههههههههههههههههه،

لكن زنقا ليك جِنِس زنقة !!!
والله صحي.

لكن الزول التاكا الباب بلستك المجروس دا
كيفني تب. عطبراوي صح.

السر عُكاز بعد المُغربية كدا، طاشم ووقع في العراضة بتاعت
ميدان الحِلة. جات مرا فايته، شافت الحاجة المكومة في العراضة.
فجأة كدا لا حظت دا السر عُكاز، بي خُلعة قالت: سجمي،،،، السر
عُكاز.
السر عُكاز قال ليها: لا،،،، حامد بريمة...

Quote: ماك نصيح عارفك انا

حبيبنا ود جبرين،
يا اخي ما تدعو لينا كان ربنا يعدل
ختوتنا ونلآقيك في الخرتوم.

Quote: عمتنا السيدة الله يرحمها عملت صندوق (جمعية على قول بعض الناس) وكانت معاهم الله يرحمها عجب اليريد (عجوبة) فقامت عجوبة حجزت الختة الاولى وعمتنا الله يرحمها لمت القريشات وجات عجوبة شالتها.الشهر البعدو لمت القروش وماباقي الا عجوبة وساعة الحكاية طولت وكل يوم عمتنا ماشه وجايه من عجوبة قامت عجوبة قالت ليها شوفي يابت زين العابدين ماتزازيني تطبطبي في سفنجتك دي كل يوم قدامي سندوكك دا انا من الشهر الفات مرقت منو......

Quote: مرحبتين حباب عبد العزيز، حباب أهلنا ناس خليوة. غرفة شنو يا زول ؟ إنت البُكان دا هِيّلك تب، نعمِنّك إنت زاااتك هِيلنا. إتحكّر تب يا ود العدار.

يديك العافية يا ود المدير

أها .. ناس خليوة ديل كلهم أهلي .... وناس العدار أخوالي تب

لكن نحن ناس محمد عمر الشغيل ... في سوق عطبرة ....والحصايا

وكان ( مبارك المدير ) أخوك ... تبقى أنت شارب معاي جبنة قبل كدا

وخلينا نحكي سمر ناس عطبرة وبربر والباوقة برواااااااااااااقة







عبد العزيز

Quote: شوفت ناسنا متقدمين بسنوات غلفاوية على باقي البشرية الضهبانة دي كيف ؟ - دكتور رجعي تب

زولك دا الرجعية تب ما خلآ فيها فرضاً ناقص.
والله صحي.

التحية لعطبرة رائدة المُدن في كل شئ.

Quote: جدى أحمد اللمين (رحمة الله عليه) يحكى قال أكان راكب فى باص الجول واحد من أهلنا الجواله ديل ختَّا كراعو فوق السلم ووراهو بتِّو تكوركلو يابا يابا أمِّى قالت لك جيبلها معاك قميص نوم هو شكلو مزرقنه معاهو قالَّها : قوليلا النوم أكان جا براك بتنومى ماهو دايرلو قميص

*

مرحبتين حباب علي أحمد النعيم.
حبابك ألف.

Quote: عمي عليه الرحمة - كان رجل زاهد الدنيا وما فيها ولا يفهم في الحياة إلا الخلوة والزراعة والبهائم والناس كلها بتقول عنه زول درويش وسائح. المهم لما ولدو الكبير داير يتزوج ايامها كانت حكاية أوضة النوم في البلد زي موضة كدا واي عريس لازم يجيبها. النسوان قبل العرس بكم يوم نادنه، تعال يا عوض الله شوف أوضة النوم حقت محمد ولدك. لما دخل كان بيسأل بكل براءة دا شنو دا شنو -- فجأة قعد في سرير الدبل وطبعا السرير مفرش. قالهن: أسه دا عنقريب يرقدو فوقو ؟؟ قالهن ليه. أيوا -- قام اتلفت وراهو لقى السرير عريض طبعا، قالهن: والله شدة مو عريض يشيلو نفرين

لك مودتي أخي علي...

ود المدير دا ... غطس وين


أحد الإعلاميين المعروفين هذه الأيام كان يسكن معنا في بيت العذابة في شمبات الحلة... خالنا أيوب العدار بحكم
حفظه الله كان يأتي إلينا في فترات متقاربة.... بحكم أن لديه لوري سفنجة سفري
إبن عمنا محمد عثمان ذهب فجرا وأحضر الرغيف حااااار من الفرن
لزوم شراب الشاي باللبن .. هذا الإعلامي كان يلبس في بنطاله .. شاف الرغيف مشى طوالى عليهو
شال التوستاية من نصفها ... بفمه مباشرة .... وهو لا يزال يلبس البنطلون ..
خالنا لكلام ما عجبو ... لكن سكت ..
ود عمنا محمد عثمان قال ليهو يا فلان .. شكلك بقيت زي البقرة ..

خالنا هنا طوالي لقاها فرصة .. وقال ليهو : وفي البقرة بقرة عجووووووز






عبد العزيز