.... يا قمر .... - .. اللحن الضائع .....

.... يا قمر .... - .. اللحن الضائع .....

شكراً صاحبي الجميل (محمد علي ياسين) على إضافة (يا قمر) إلى العنوان

يا قمر سَلَم...
فيك الدلال عَلّم
صافيني وأتكلَم
يا قمر...
إيه الربيع دونك
والوردِ والأحلام
ليه سِبتَ مرساكَ
سافرتَ في الأوهام
خُد شوقي لي شوقك
وكِدا رونق الأنسام
يا قمر...
روعة مدار وهيام
دهشة كمال ومقام
معزوفة أحلى أنغام
في قلبِ زول رسام

راحت أمانينا
الورد بيبكينا
فتّق بأيدينا
وسِبناهُ للأيام


يا وردِ يا هتان...

إيه يعني أحوالنا
من غير قلِب خفاق
يا شوقي إيه قالوا
نَار الحياة عُشاق
الوقت قد يمضي
في اللهفة والأشواق
ليه نخنق الفينا
والبينا هو الترياق
نرعاهُ ... يتدفق
يملأ الحياة إشراق
يا قمر...
قرِب تعال ننسى
أيام فُراقنا الطال
يا سيدي ليه نقسى
ونتمادى في الإمطال
سِحر الحياة بيكَ
والحال وراك بَطال
صافيني يا نافِر
أنا دون رِضاكَ زوال
يا قمر...

18/1/2012م

يا بلة يحلنا الحلاك

كلام يتسرب الى الدواخل كما مطر الرشاش في رمال القاش


كيف يا جميل يا فنان

تسلم يا درديري
وبلل الله دواخلك
بالعطر...



بخير و (سعادة)
بركة بالشوفة

أسه أنا لو ملحن..
ومش ملحن أي كلام..بل ملحن متمكن..
كنت لحنتها وأديتها لأجمل فنان يغنيها..
لانها لا تستحق أقل من ذلك..

قصيدة جميلة وسريعة السكن في الروح..

تسلم يا بله الأستاذ..

ما أخفيك
بسوطي اللهاب دا
عملت ليك يا منى لحن مكعوج ومغبر
وكل كم يوم كدا بدوروا في البيت
وهاك يا قرقرة
والله تقول مشغل توم وجيري
هههههههه

رأيك شنو
والله واثق فيك
يلا حاولي
ومتأكد
أسوأ لحن منك
حيكون أجمل من لحني


تسلمي يا قمر

يعني يا منى
لا حاولتي
لا طلبتي تسمعيني
وأنا بلحلن (اللام التانية مقصودة)




والله مش بطال ما تخافي