يا رايد الْجمال حوِّد على الخرتوم، إهداء لمولانا محمد المرتضى حامد...

إلي أخي الحبيب وأُستاذي المحترم،
مولانا محمد المرتضى حامد.

كُنتُ أطوف حول مكتبتك العامرة، وفي هذه المرّة كان تطوافي بحثاً عن رقم تلفونك عسى ولعلّ
أن أنعم بمحادثتك، وفجأة إستوقفتني رسالة منك إلي زميلة صديقة. رحت أتجول بين أحرف
وسطور الرسالة التي جذبتني وشغلتني عن الإلتفات إلي المرفقات، وبعد إنتهائي من التهويمة
بين سطور رسالتك قررت أن أهديك هذا البوست.


من علمني حرفاً صرتُ له عبداً.
حياك الغمام اينما حللت، أخي
وأُستاذي مولانا محمد المرتضى حامد...

إنّ هذا الشعب النيلي شعب عظيم. شعب رقيق كماء النيل، له عاطفة جياشة
تنضح بالحنين والشجن، وعندما تتفجر تنثر الجمال في جميع الأمكنة،
فتسعد الروح المُعنى. يتفاعل هذا الشعب النيلي مع الجمال إلي أبعد حد
حتي لتصير القصيدة الشِعريّة حديقة غناء ينثر فيها ساكني ضفاف النيل
الزهور فتصبح مِلكاً للجميع يصعب علينا تحديد شاعرها الأصلي،
وتظل تتمدد علي ضفاف النيل يدعمها عاشقي الجمال ويطرزوا
حواشيها ببديع الكلم، وتمضي هكذا مظهرتاً شفافية ورِقة هذا الشعب
المُدمِن للجمال...

دنيا مسعود.
نعناع الجنينة.

دعني أقول أنها واحدة من تلك الأغاني (البروس)، وما أجمل البروس
عندما ينبت علي ضفاف النيل ويرضع من ثديه !. البروس دائماً تعافه
النفوس، لكن عندما يحتضنه النيل يكون أروع من المشتول في الجنائن.

هنالك العديد من الأغاني البروس التي نبتت علي ضفاف النيل، ومسّخت
مشتول الجناين، وما زال الناس يتلذذون بمزاقها النيلي السلسبيل، غير
عابئين بمعرفة شعرائها، ونعناع الجنينة وآحدة منها...

بعد أن فرغت من الرسالة لفت نظري الفيديو المُرفق، فدلفت نحوه ليسحرني بديع الكلم،
ونداوة الصوت، فأخذت نفسي في رحلة داخل قوقل و اليو تيوب ليدهشني هذا التقارب
بين هذه الأغنية والعديد من الأغاني التي وُلدت علي ضفاف النيل !!!

دينا مسعود.
نعناع الجنينة.

Quote: يَا سِت الْبَنَات عَلَى ايَه انتي نَوِيِتي عَايِنِي و أُنْظُرِي كَيْف الْشَبَاب سَوِيَّتِي جَرَّحَتْي الْقُلُوْب و الْعُيُون بْكِيْتِي حَرَام أَكْبَر حَرَام جَرَّحَتْي و لَا دَاويَّتِي **** نَعْنَاع الْجِنَيْنَه الْمَسْقِي فِي حِيَضانِه يَوْم سَافَر حَبِيْبِي سِبْت الْبَلَد عَّلَشَانُه نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه ** قَالَت لِي بِرِّيـــدَك يَا وُلَيِّد الْخَالـــــــة قَلْبِى بيعِشـــــقِك وَالْرُّوْح الَيْك مَيـّالة مِن بَعْد الْعِشَاء زَاير لِبَيْتِنَا تَعــــــالَى اهْي فُرْصَة ل الْلُّقَى و أَشْرَح لِأُمِّي الْحَالــــة **** الْامّس الْعَصْر بِالْحَارَه جِيّت مِتَمْشّي و لِيْه كُل مَا بِتِشُوفِيْنِي يَا حُلْوِه تكِشّي أُهْدِيْكِي الْسَّلَام تِأخَدي الْسَّلَام و تخْشَي و الْبَاب ذَنْبِه أَيُّه تُكسِرِيْه فِى وَشْي **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** هَب الْنَّسِيْم و سَامِع نَغَم كَلِمَاتِك و عَايِز اكَلِّمَك و عَامِل حِسَاب لَمَاتك مِن جِهَه الْادَب ... ادَبِك ادِب عَمَّاتِك وَمَن جِهَه الْجَمَال .. وَاخْدَه جَمَال اماتِك **** و حَيَاتَك يَا خَوْلِي عِنْدِي طَلَب و سُؤَال تعَيِّنِي فِى جَنايِنّك ازْرَع يَرُوْق الْحَال و بُسْتَانَك يَكُوْن الْزَّاد مَا يِهِمِّنِيش الْمَال و لَا الْسَّكَن و الَهَدمِه مَادَام فِى رَاحَة الْبَال **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** هَب الْنَّسِيْم و سَامِع نَغَم كَلِمَاتِك و عَايِز اكَلِّمَك و عَامِل حِسَاب لَمَاتك مِن جِهَه الْادَب ... ادَبِك ادِب عَمَّاتِك و مِن جِهَه الْجَمَال .. وَاخْدَه جَمَال اماتِك **** رَايْد اكَلِّمَك كُل سَاعَة ف وسِعَتِنا مِن بَعْد الْضُهُر نَرْكَب ضَهَر ناقْتِنا قَالَت نَعْمَل ايَه لَو الْعَرَب شَافَتِنا قُلْت قَوْلِي وُلَيِّد عَمِي و سَاقَتْه جَار سَاقْتِنا **** سَأَلْت ايْش الْاسْم قَالُوْا الْبَنَات نِعِمَّات ام صْبَعِين رَطْب و الْبَاقِى بَلَح امَّهَات يَوْم نَدَهْت عَلَيْنَا بِيَدِهَا الْنَّاعِمَات قُلْت نَعَّمِيْن تَلَاتَة و ارْبَع خَمْس نِعِمَّات **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** قَالَت بَابا بَابا رَيْت هنَاك خَيَالِه خَمْسِيْن نَاقِه لُجَح و الْعَبِيد شَيّاله قَالَلِي يَا بَت عَرِيْسَك جايلي فِى الْقْيالِه ارفَضْلَّه طَلَب و لَا انتى لِيَه مَيَّالَه **** و الْعِنَب الْبَنَاتِي طَالَل عَلَى الْمَحْبُوْبَة و الْلِي دَاقِه مَرَّة مَا يُعْرَف أَبَدا تَوْبَة و يَعُوْد لَه تَانِّي الْنَّوْبَة بَعْد الْنَّوْبَة مَا دَامَت قَسَمْتَه عَلَى الْجَبِين مَكْتُوْبَة **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** قَالَت تَقْصُد ايَه يَا الْلِّي انْت بِتُغَازَلْنا وَاقِف فِي طَرِيْقِنَا لَو طَلَعْنَا نَزَّلْنَا مَعَاهَدِيْن بَعْضَنَا مِن صَغَّرَنَا و مَا زِلْنَا مَا بْنُفَوّت بَعْض حَتَّى الْتُّرَاب يَعْزِلَنَّا **** يَا رَايْد الْجَمَال حَوِّد عَلَى الْخُرْطُوْم دَي بَنَات الْسُّوْدَان كَيْف الْسَّمَك بِيَعُوْم أَمَّا بَنَاتِك يَا مِصْر فَوَسَطِهُم مَبْرُوْم يَحْنُوْا لِلْغَرِيْب و ابْن الْبَلَد مَحْرُوم **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** سَقَوْنِي الْسُّم هَال عَلْقَم وِقَايَا وِقَايَا و حَرَّمُوْنِي الْنَّظَر مِن نَاس يُرِيْدُوْا لِقَايَا خَلَاص رَاح الْعُمْر ايَّام قَلِيْلُه بَقَايَا بِشْكِيك لِلَّه يَالَلَي كُنْت الْسَّبَب فِى شَقَايَا **** ملْكِه و بِنْت مُلُوْك و زَاد جَمَالِك رَبِّي و الْمَانِيكَيّر مَحْضَر و الْحَنَّن مِترَّبِي الْتِّلِيَفُوْن ضَرَب ع الْسَّفَرَة .. حِكْمَة رَبِّي قَالَت لِي أُلُو .. قَال لَهَا أَحْنَا جُروبّي **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** يَا ام عُقْد دَهَب تَلَاتَة و تْلَاتِين كَارِه مَا شَالَت بَطَن مَا وَرَدَت عَلَى بْكَارِه قَلَّت عَيْنَيْهَا فِيْنَا الْكُل وَقَعُوْا سكَارَى و سْقِطَت فِي الْحَلِيْب لَم بَيِّنَت لَه عَكَّارَه **** و حَبِيَت لِي بَنِيْه وَاخْدَه الاعْدَادِي قُلْت اسَافِر سِنِّه وَا رَجَع أَوَام لِّلْوَادِي رَجَعْت مِن الْسَّفَر و رُحْت بَيْتِهَا انَادِي لَقِيْتُهَا اتَجَوِّزِت شَايْلَه الْوَلَد بْتِدَادِي **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** فِى جَمَالِهَا مَا رِيَت لَا مُسْلِمِيْن لَا نَصَارَى رِيْقُهَا كَالْعَسَل كَمَا سُكَّر العْصارِه مَدَّيْت أَيْدِيَا اجَنّى الْجَمَال بِبْصارِه قَالَت مَّاستُوَاش اخْضَر و جُنَيْه خْسَارَه **** قَالَت لِى بَرِيْدُك يَا وَلِيّد الْعَمَه يَا وَرَدَة رَبِيْع وَسَط الْزُّهُوْر تَتَشَّم ضَمَّتُهَا عَلِي و حَسْت حَنّان الْضَمَّه قَالَت إِمْتَى فِى الْعُش السَّعِيْد نِتَّلَم **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** يَا سِت الْبَنَات مَا احْلَى الْجَمَال الْفِيكِي مهِمَّا اوْصِف و اسَوّي الْوَصْف مَا مْكَفِيكِي الْرُّوْح و الْجَسَد تَاخْدِي و مَا يَكَفِيكِي بَس خِلِّي الْعُيُوْن عَلَشَان تعَايِن فِيْكِي **** الْسَّبْت و الْأَحَد بَاب الْحَبِيْب دَقَيْتُه الَأَتِّنِين و التَلَات سَر الْقَلِيب حَكَيْتُه الْارْبَع و الْخَمِيْس عَلَى الْمُخَدَّه تَكَيَّتِه و لَيْلَة الْجُمْعَه مِن بَعْد الْهَزَار بَكَيْتُه **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه **** طُوِّل يَا لِيْل طُوِّل انَا فِيْك و لَا نَعْسَان و كُل مَا اقُوْل تَطوْل تَنْقُص تَزِيْد نُقْصَان و كُل مَا اتَذَكَرَك يَا وَرَدَة الْأَغْصَان اجِّي انْظُر لِغَيْرِك أَلْقَى الْنَّظَر يْعَصَاني **** قَالَت يَابَا يَابَا رَيْت هنَاك خَيَّالَة تِسْعِيْن نَاقَة لَقَّح وَالْرِّجَال شّيَّالَة قُلْتِلْهَا عَرِيْسَك جَانِي فِي الْقَيَّالَة ارْفَض لَه الْطَّلَب و الَا انتي لِيَه مَيّالَة **** نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه

هذه هي أُغنية نعناع الجنينة.
الملآحظ أنّ دنيا مسعود صدحت بجزء يسير من الأُغنية، والإقتباس أعلاه
لا يعني أنّ هذه هي الأُغنية كاملة. نعناع الجنينة أُغنية نيليلة مشتركة بين
قاطني ضفاف النيل فيها ما فيها من الإبداع ما يشغل الناس عن التفكير في
صاحبها الأصلي أو بالأصح مُفترعها.

يَا رَايْد الْجَمَال حَوِّد عَلَى الْخُرْطُوْم
دَي بَنَات الْسُّوْدَان كَيْف الْسَّمَك بِيَعُوْم
أَمَّا بَنَاتِك يَا مِصْر فَوَسَطِهُم مَبْرُوْم
يَحْنُوْا لِلْغَرِيْب و ابْن الْبَلَد مَحْرُوم...

الفنان الأسواني رشاد عبد العال.

لآحظ في هذا الأداء الكثير من الأبيات غير موجودة في
النص المُقتبس، وهذا يدل علي أنّ الأغنية قد أدلى فيها
الكثير بدلوهم، وهذا أكبر دليل علي أنّ الشعب النيلي
شعب مطبوع يقول الشعر بالفطرة...

معاوية المدير
عبرنا الى داخل البوست الهدية
فوجدناه كما توقعنا حامل المسك
وتطيبنا من طيب اهدائكم لمولانا محمد المرتضى
فشكراً لكم على هذا العطر الفواح

تعالوا نشِق العِرِق ونتجه قليلاً نحو الجنوب من منطقة
أسوان، ونقف بين ديار الشايقية والمناصير لنتأمّل في
أُغنية سارت علي نفس النمط...

أُغنية الله هوي المشتركة بين أهلنا الشايقية وأهلنا المناصير
واحدة من الأغاني البروس، وبينها وبين نعناع الجنينة شبه
في مناحٍ كثيرة منها طريقة النظم، والمُفترع المجهول،
والتشبيه... إلخ

Quote: داير انط الحوش دردرب وداير اشوف اللابسة الدهب وداير اضوق التين والعنب والعكاكيز فوقي رب رب وإلا سيفكم ياخدني تب داير اضوق سجنك يا الرايقة هوي. اللبيب وَلـّـف جاب فنون جاب كلاما يمشي موزون لي ام ضميرا ليني عرجون هي الدباسة الفوق الغصون وهي الضهب في البنك مخزون سمحي هَـبَـلت ابان دقون الجسيم ما طلعو صابون بالزباد والمسك مدهون زي الحرير الاصلي في اللون تشبه الجدي ... ود اللبون . داير اكاسر الهبرة العصير فوق محارب تيلات صقير إن غفلت وكان لاحلك الدير سوي فر القمري في الطير خضرتها المزروع في القرير مانجض لليلي خدير مانقر بالسوس تمرو خير يا اله الكون مو كتير سوي دارة الحلقة ام فقير. الله ياجرك ياعمتي فاطني في الحامداب ماها في فاطني راحت في ذمتي كاتله اب نشيان عسكري في العساكر ود كدكي والقصير حُمد علي. اماني يالقيقر مالقيت يا الاخدت ولاد فرد بيت يالبديوي الدابك حليت يالبشير للموت مابقيت. تبكي بنت نعمان الفتا تلي قرنك واملي واط زي ابوك ماولدتو مرا هد كبد القيقر رما. ابقى زرزور ابرا التمر انقد القنديل الحلو ومر السلام لي ست الامر . لبينة الصيف الحليب المنضفة من السبيب المعلقة في الهنبريب كان شربتك خاطري بيطيب. ياولاد جابر زولي راح لاغرق لاشالو تمساح شالو قطراً قام الصباح مابيجيب مهرك يا ام شلآخ. يابا شيخ زمراوي الولي شيخ منور ولدك علي ختو بالكم ياسيادي دي البنية الشاغلة بالي. الكريم يا الله سيدي ألقى تلبا عاتي وهدي الشوتال كاربو بطني والربيتون في صفحتي. في ضليل الشتلة انتكيت شفتها وشافتني وبكيت قالت لي اتفضل علي البيت نفسي صغرت ودرت المبيت قت شكراً كشكر مشيت. يافريع السلم الرقيق مابيشيل قمريتين طبيق واي انا الواقع لي في ضيق وحارة نار الغي يارفيق. يامسيكة الضربو ابنعوف ضربو بالمارتينه ام ضلوف ضربو منظوم بين الكتوف ضربو لامن حتحت الصوف أمن الحامداب من الخوف يامكاضبني ارحكا شوف. يا الدويحية أهل القبب يا غبش توري تقولوا كب داير أنط الحوش بردلب داير أضوق التين والعنب داير اشوف ام عكشاً دهب العكاكيز فيني رب رب ما بخليكـ إلا انضرب إلا سيفاً يآخدني تب داير أضوق سجنكـ يا صنب. يا مهيرة فارس اللعوب تلى ايدك ورفرفى التوب لقى شلاخك للهبوب وكان لقيتك مانى مغلوب. يا دباسة راس الفروع مالقيت لي دربك طلوع ابكي شن حيلتي بلا الدموع وسديني ايدك ورا الكوع والعذر ما بينفعه الجوع. ست حلقة تورها أرقوق وست جناينا تحجا وتسوق منطرد ليمونها روق روق مركبك فاجي الموج تتوق . ياقميرية برسلك سابقي الطيار والسلك روحي للفوق الجيل ملك دا الابوك رباك بالضحك عمرو مانهرك وزعلك. المراكب ياخواني جن فيهن القاعدات يضفرن فيهن امات حجلن يرن المرض يا اخواني هين خايفو سببك يبقالي جن. ياشيوخ شاطرابنا الكبار للرزينة السكني في البار الفراق ياخواني جد حار ان لقيتك ماني محتار. للدقون جات طامحي من فوق وبيتها يرفي الجضمه مطفوق ما تخلو اللت يا دلدلوق قرو للباشا الرخى السوق. مرة جيت انا بالحسيناب لقيتا فوسيب القمح كاب دابو زارق البوص للشراب سيدو زارعو وساعي الكلاب. الظريف مسواك الاراك داير اقيف اتحدث معاك ماب يطيقلي المجلس بلاك ربي عالم ريدي تالاك. الدويسة الحاجرا الضيب العلي انا دربك صعيب وليها زيف النيل همبريب واي انا الجنيت مستطيب. ياشتيل الكوع متردم سيدو فلسان رامي الهدم في وقاف الضل يحرم سوه في اكل الزرزور نضم. الفقير جاب لوحو وكتب قتلو اقيف ياشيخ العرب انت اصلك جاهل السبب الحسار وين شفتو ينطب. ريحتك الصندل مو خشب ريقك العسل الفي القرب نفسك العنبر في العلب لحمي بي ريدك انسلب وعقلي في دربك انجزب جات قميرية قوز رجب جات تدودر ونتقد الحب وتاكل الرزق المن الرب. بنده الله وبقرا ياسين وبنده الفقرا الصالحين يارجال الله البينين تجمعوني انا و الوزيزين. الشتيل القايم جديد . دابو فادع وتاكى الجريد . لا اتلمس لا دخلتو الليد .. سيدو حارسو يشوف البعيد وفوق سبيقو مسوى الحديد. الشتيل الفوق للفريق ..... دابو بقّع وماهو دفيق ... سيدو زاربو معلى السبيق وما يعشم فكة الريق .... مرة غفّل شفت ..........الحبيب .. ديسو نازل وهادلو..... السبيب .. بى صراح كان مشهد ... مهيب .. ومنو راس الولدان....... تشيب .. احمدالله انا ماني صياد وماني حوات في التريعات اضرب الفي ضنبو عاجات ومسكو يتفاشرنبو البنات. يالبحر تيبس وتبقى سُوح وتبقى اقل من دهن المسوح وتنقطع من قبل الشيوخ وداير ازور الرايقة أم شلوخ.

لآحظ هذه القصيدة تسير علي نفس نمط قصيدة نعناع الجنينة.
هذا بعض قصيدة الله هووووي التي نثر فيها الكثير من المبدعين
علي ضفاف النيل أجمل الزهور، فوصلنا منها ما وصلنا، وبقي
منها ما بقي علي ضفاف النيل يحمله أهلنا الطيبين بين حناياهم...

القمر بوبا أُغنية بروس أيضاً.

محمد منير،
والجنينة...

القمر بوبا عليك تقيل

Quote: السغيره شِديرة الأراك يا قمر عشره الفي سماك شاغله روحي وقلبي المعاك وين لقيتك لا من آباك القمر بوبا عليك تقيل الصغيرون الما كبير الرقيبه قزازة عصير السنون براقن يشيل العيون متل الفناجيل ما بتحش قش التناقير ما بتشيل جردل على الزير الزراق فوقا تقول حرير شتتي الشبال يا أم ضمير خلي قلوب الصبيان تطير إنت ريحتك دمور فرير ولا بت السودان أصيل القمر بوبا عليك تقيل الجزيره أم بحرا حمى فيها روحي وحبي النما ما بسيبا ان بقا في السما ما بخلي الناس تظلما روحي في دربك سايما يا غرقت يا جيت حازما القمر بوبا عليك تقيل الغزالة الفوق في السلم المحبه تزيدي الألم كل يوم أصبح لي في هم سيسبان عودك منظم شمعدان نفسك يا أم ختم القمر بوبا عليك تقيل الصغيرون أم الجنا يا كريم ربي تسلما تبعد الشر من حلتا جنن الأُم الولدتا الفي جبل عرفات وضعتا دي ترباية حبوبتا التميرة الفي سبيطتا الصفار صابغ خدرتا معذوره أمها كان دستا وا هلاكي الناس شافتا معذباني أنا ود حلتا القمر بوبا عليك تقيل الدفيفيق الدابو ني البسيمتو بتكويني كي أهلو ضنوا عليها وعلي حبها النساني والدي ما بخليه إن بقينت حي يا قصيبة السكر الني ووب على أمك وووبين علي القمر بوبا عليك تقيل القديمه قديم الحمام الوزيزين في موجو عام ياما رايقه قليلة كلام واحلاتا تقول السلام القمر بوبا عليك تقيل الديوان الديمه مقشوش بالزهور والورد معروش بالحرير الأصلي مفروش ريحتو ما يقوما بلا رتوش كان دوا أصلو ما هو مغشوش كتروا الزاد منو في الحوش القمر بوبا عليك تقيل بحر الدميره العبا ونزل مر يسقي الفل والنخل فيهو عام وزين أو قدل ياني أنا البيك عقلي انشغل بعت روحي عشان ليك أصل وإنت أبعد لي من زحل القمر بوبا عليك تقيل المبارك شيخ الظهر العليك ساسقت وفترت قولي جنيت ولا دسترت واي أنا المرضان مكنتر جابوا لي حكيم خير و شر قال لي يا زول مرضك كُُتر سببك أُم شلاخا خدر القمر بوبا عليك تقيل العيون الما بدمعن نامن أو صاحيات يبرقن لا بصيدن لا بعشقن سرهن في الجوف يحرقن كشفن رموشن أو غمضن كلو موت ما تقول برحمن القمر بوبا عليك تقيل...

ود المدير الرجل الحنين

كيفك ياخ

Quote: كان تطوافي بحثاً عن رقم تلفونك عسى ولعلّ أن أنعم بمحادثتك

اتاريك يوم اتصلت فيني يوم داك ما كان لحنان فيك - اتاريك قانص لود المرتضى؟

ياخ انت زول سمح بالحيل الله يديك العافية - ويا ريت تدق لي المرة جاية مخصوص ما تبقى تاني قنيصة

بعدين اقول ليك الشيئ العارفو انا ، في ود حامد ، اكان دقيتوا ليهو نحاس ما بجيكم مارق ، الراجل مزحوم وما قادر يحك راسو

الأخ العزيز / معاوية المدير

سلامات

شكرا جزيلا على هذا البوست الجميل

وشكرا على كلمات اغنية نعناع الجنينة

فلقد لفت نظرنا اليها سابقا الأخ محمد المرتضى حامد واستمعنا اليها بصوت دنيا مسعود

ولكن اليوم استمتعت بها بصوت الفنان الأسواني رشاد عبدالعال

وأكثر ما أعجبني نص القصيدة والذي قرأته اليوم لأول مرة ،ولقد انتابني إحساس بأن هذه

القصيدة قيلت في البطانة او في بوادي الكبابيش

لك كل الود والتقدير

الريلة.
وهذه ايضاً وآحدة من الأغاني البروس أوردها
حتي يكتمل وجه المقارنة...

Quote: الله ليلي .. شن تشبه بلا الداسنو فى بطن المطامير لدروبك انتى ما شقن بوابير يا قشيش نص الخلا الفوق فى العتامير البكركر رعدو و ديمة سماهو عكير السمح مرعاك يا قش التناقير الله ليلي .. الزول الولوف لى قلبى خراب أنا بمشى و اتلفت لما النهار غاب حديثك لى اكيد انا.. ولا كضاب حد ما لملموهن خاطرى ما طاب يا حليل أمونه فى غرب الضياباب الله ليلي .. يا عجو المحس التقيل التقيل فدع العراجين انتى ما بدوك لى زولا مسيكين الا واحدا نخلو مقرون فى البساتين سواقيهو تصحى الكانوا نايمين حليلك يا أم جبين يا بدر دورين صديرك عام تقول غرر الوزازين الله ليلي .. جات تندلى بالوديان عديلة الكاحلة بلا كحل.. بت القبيلة تمشى قدم قدم فى المشية ريلة و تشكى من الطريحة تقول تقيلة نفيسك شمعوه جوة الفتيلة

Quote: معاوية المدير عبرنا الى داخل البوست الهدية فوجدناه كما توقعنا حامل المسك وتطيبنا من طيب اهدائكم لمولانا محمد المرتضى فشكراً لكم على هذا العطر الفواح

سلآمات يا علي،
ولتطب لسودانيز العافية بوجود أمثالك.
أهلاً بيك في كرقة بكري، ولك عظيم
الشكر علي كلآمك الجميل، ويظل مولانا
محمد المرتضى وأمثاله مصدر وحي لنا
نحن العاجزين.

لك مودتي...

الأخ الحبيب دكتور
أحمد القرشي.
هاك أسمعها من سيد ركابي
علي بال ما جيتك برواقة.



مودتي...

أهلنا في منطقة أسوان وصعيد مصر ناس شاي، يحبونه ويعقدون له الجلسات
ولا يطيب لهم إلا وهو (منعنع)، يعني بالنعناع الذي يزرعونه ويحرصون علي
زراعته للنكهة التي يضفيها علي الشاي. ولمكانة النعناع في نفوسهم وحرصهم
عليه راحوا يشبهون به الغيد الحِسان. النعناع شكله جميل ورائحته جميلة وكذلك
طعمه، لذلك إستحقت البنت الجميلة أن تُشبه به. تشبيه البنت بالنعناع مُستوحاه
من البيئة.
يبدو لي أنّ هذه البنت سمراء، واللون الأسمر هو اللون اللخدر عندنا، وبنات
أسوان سمراوات. تشبيه البنت الصفراء أو البيضاء بالنعناع لا يليق، فالنعناع
خايل علي الخدرا.

في غنانا:
خُدرتك ليمونة وتينة بالزيتونة
وساحرآت عيناك.
دي البنت الخدرا.

منقة كسلا الحلوة وصافي لونا
تومتي البريدا غرب القاش سكونا.
دي البنت الصفراء.

نعناع الجنينة المسقى فى حيضانة
شجر الموز طرح ضلل على عيدانة.

هذا النعناع الذي إنتكاء عليه شجر الموز ليظله من الهجير تبدو عليه رقة
ولطافة متناهية، لذلك رأى شجر الموز أن يظله من الهجير كي لا يؤزيه.
هذا النعناع المرتوي المسقي في حيضانه مزروع داخل جنينة، وذلك
يعني أنّ دونه سياج وغفرا يحرسونه، فتصبح هنالك مشقة في الوصول
إليه.

قال غناينا:
السمحة يا دهب الخزاين
تشبهي الموز في الجناين
تهموني بيك أنا قالوا خاين
قصوا دربي ولقوهو باين
أنا ما سرقت بس جيت أعاين...

Quote: ود المدير الرجل الحنين كيفك ياخ اتاريك يوم اتصلت فيني يوم داك ما كان لحنان فيك - اتاريك قانص لود المرتضى؟ ياخ انت زول سمح بالحيل الله يديك العافية - ويا ريت تدق لي المرة جاية مخصوص ما تبقى تاني قنيصة بعدين اقول ليك الشيئ العارفو انا ، في ود حامد ، اكان دقيتوا ليهو نحاس ما بجيكم مارق ، الراجل مزحوم وما قادر يحك راسو

سلآمات يا ود شيقوق.

هسّع عليك الله أكان ختيت الرحمن في قلبك وقلت قريبي دا ضارب لي
مواصلة للأرحام، الله داير يحاسبك ؟
أنا ضربلك اليوم دآك للوساطة، لكن وساطتك طلعت فشوش ساكت، وبيني
وبيّنك، قلت كمان فد خترة أصل اللرحام. أها، شُفتَ كيف ؟.

قنيصة تب مافي، والتلفون الجاي حق في رقبتي. إن شاء الله بصلك.

دقنا يا الطيّب لود حامد دا حقاً في الرُقاب، مُو عشان يجينا مارق، لكن
كمان طلتو بالحيل بندورا.
ليك وليهو وللمعاكم كامل مودتي،
و إن شاء الله تغشاكم العافية محل تقبلوا...

وهكذا تزداد أبيات منظومة نعناع الجنينة علي نسق الأغاني البروس.
من الأغاني البروس عندنا في منطقتنا أغنية، أزري الليلة وبرآي
الليلة، حِرِق بي نار الكماين ديلا.

بنقول فيها:
حِرِقنا حريقة ونِجِضنا نجيضة
حراقاً شيّن شالوا بالمزيكا
يا خالي ويا عمي
النقوم الباوقة ويروق دمي
مشيت للقاضي قال لي ما فاضي
طريت الزول القميصو رمادي
مشيت للعمدة قال لي ما بمضى
طريت الزول الحماني الغمدة
ابوي قال ليا واخوي قال ليا
يبيعو الساقية ويعرسوا ليا...

Quote: يا ودالمدير ياخ ناس مسقط ديل كلهم مبدعين ودشيقوق و ودالقرشي و ودحامد.

بهاء الدين الصاحب،
يا صاحب.
كيف أخبارك والوليدات ؟.

ناس مسقط يا بهاء الدين مبدعين، وكمان
سمحين بالحيل.
والله صحي.

عليك الله شوف الدنيا دي صعبت علينا كيف ؟!!!
الوآحد بقى ما قادر يصل الناس.

سلآمي وتحاياي للجميع...

Quote: نَعْنَاع الْجِنَيْنَه الْمَسْقِي فِي حِيَضانِه يَوْم سَافَر حَبِيْبِي سِبْت الْبَلَد عَّلَشَانُه نَعْنَاع الْجِنَيْنَه الْمَسْقِي فِي حِيَضانِه شَجَر الْمَوْز طرِح ضَلَل عَلَى عِيْدَانُه

Quote: الشتيل القايم جديد . دابو فادع وتاكى الجريد . لا اتلمس لا دخلتو الليد .. سيدو حارسو يشوف البعيد وفوق سبيقو مسوى الحديد.

Quote: السغيره شِديرة الأراك يا قمر عشره الفي سماك شاغله روحي وقلبي المعاك وين لقيتك لا من آباك

لاحظ التشبيه في هذه القصائد النيلية.
في نعناع الجنينة ورد التشبيه بالنعناع، وفي الله هووووي، بشتلة
النخيل، وفي القمر بوبا بشديرة الأراك، وفي الريلة بقشيش نص
الخلا الفوق في العتامير.
كل هذه التشبيهات من صميم البيئة وكلما تغيرت البيئة إختلف نوع
التشبيه، لذلك لا نجد مثل هذه التشبيهات في الشعر العربي القديم.
يأتي التشبيه بهذه المزروعات لقيمتها العالية عند قاطني النيل،
وللجمال الطبيعي الذي تضفيه علي الجروف والبساتين، لذلك
يكون التعبير قوي ومتماسك...

Quote: وأكثر ما أعجبني نص القصيدة والذي قرأته اليوم لأول مرة ،ولقد انتابني إحساس بأن هذه القصيدة قيلت في البطانة او في بوادي الكبابيش

دكتورنا ود القرشي،
عساك طيّب.
يا أخي الجعافرة ديل تقول ناس بطانة وبوادي، أصلك ما تقول ناس
بحر. عموماً ناس اصوان ديل في إعتقادي أكثر ميولاً لجنوب الوادي
من شماله، ونعناع الجنينة بتشبهنا نحن. هسع عليك الله نمّة الركابي
دي اللت مصريين ؟؟؟.

كدي تمعّن في الرباعيات ديل، عليك الله :

Quote: يَا سِت الْبَنَات مَا احْلَى الْجَمَال الْفِيكِي مهِمَّا اوْصِف و اسَوّي الْوَصْف مَا مْكَفِيكِي الْرُّوْح و الْجَسَد تَاخْدِي و مَا يَكَفِيكِي بَس خِلِّي الْعُيُوْن عَلَشَان تعَايِن فِيْكِي

Quote: فِى جَمَالِهَا مَا رِيَت لَا مُسْلِمِيْن لَا نَصَارَى رِيْقُهَا كَالْعَسَل كَمَا سُكَّر العْصارِه مَدَّيْت أَيْدِيَا اجَنّى الْجَمَال بِبْصارِه قَالَت مَّاستُوَاش اخْضَر و جُنَيْه خْسَارَه **** قَالَت لِى بَرِيْدُك يَا وَلِيّد الْعَمَه يَا وَرَدَة رَبِيْع وَسَط الْزُّهُوْر تَتَشَّم ضَمَّتُهَا عَلِي و حَسْت حَنّان الْضَمَّه قَالَت إِمْتَى فِى الْعُش السَّعِيْد نِتَّلَم

لآحظ قالت لي (بريدك) يا وليد العمة،
وأيضاً يا رايد الجمال حوّد علي الخرتوم.
كلمة بريدك ورايد بمعني الحُب دا نضمينا
نحن، لذلك القصيدة فيها الكثير الذي يظهر ميولها
لجنوب الوادي، ولو أمعنا فيها النظر بنلقى فيها
لمحات كثيرة من السودان، نيله، وبواديه، وعتاميره،
وصحاريه.

لك كامل مودتي يا
أخي أحمد القرشي...

الإيقاع هنا نوبي 100%،
والفنان أورد صاحب اليو تيوب أنه إبن إخت الفنان
النوبي العالمي حمزة علاء الدين.


بعض التعليقات أسفل الشريط:

Quote: كرم مراد ابن اخت وتلميذ الفنان النوبى العالمى الراحل حمزه علاء

Quote: كلنا كمصريين نعترف ان الاغنية سودانية مائةand#65279; بالمائة ولا يعيب الاغنية ان يقوم بغنائها فنان بحجم محمد منير مش عارف الاخوة في السودان ليه بيكرهو منير رغم انهم المفروض يعتبره سفير للثقافة السودانية عند المصريين !!

Quote: الاغنيه سودانيه مائه بالمائه وهى فى الاساس كان يغنيها من يتولون توصيل الجمال من السودان الى دراوand#65279; والايقاع البطى الملازم للاغنيه لتنظيم خطوات الرعاه مع الجمال فى اثناء السير

Quote: الاغنيه دى من تراث او فلكلور لقبيلة الجعافره ومش نوبى وعلما بان الاغانى النوبى بتبقى بالرطانه والاخ اللى بيقول سودانيه كلامك صح لانand#65279; فيه جعافره فى السودان وهم امتداد لجعافرة اسوان ولكن هى من تراث مصرى جعفرى جنوبى تحيه لاصحاب الاصول والعادات والتقاليد اهل اسوان نوبه وعرب جنوب مصر الاصيل ... تحياتى اسامه النوبى

Quote: الاغنيه مصريه اسوانيه من تراث الجعافره واولاد العرب في اسوان والاغنيه تمتد لاكثر من 3 ساعات علما بان الاخوه النوبيين في شمال السودان اصولهم مصريه والدليلand#65279; على ذلك نظام الري الموجود في شمال السودان هو نفسه الموجود في دلتا النيل في مصر واغلب العادات والتقاليد في شمال السودان هو هي في صعيد مصر