هل من حلول لإجازة المغترب الرايحة شمار في مرقة ؟؟؟

المغتربين . . .
تلكم الفئة المغلوبة على امرها
الحائرة ما بين سندان السفارات والقنصليات خارج السودان . . .
ومطرقة جهاز المغتربين واجهزة الدولة المختلفة داخل الوطن

اكترها شهر إجازة سنوية ( لمن استطاع اليها سبيلا ) من الموظفين

نجد ان المغترب . . .
الجاي يتمتع بهذه الاجازة بين الاهل والاقارب والاصدقاء
ويقضي اياما سعيدة بعد فترة من العناء والتعب والارهاق
وهموم الغربة والتزاماتها ومكابداتها اللا منتهية

يغتنم الكثير منهم فرصة الاجازة . . .
ليقوم بإستكمال ومتابعة بعض الامور والالتزامات خاصته . . .
متابعة اعمال بناء - شراء قطعة ارض - متابعة اجراءات تخصه او اسرته . . . الخ

نجده يضيع اكتر من نصف اجازته ان لم يكن غالبيتها . . .
ما بين شئون المغتربين وبقية المؤسسات . . .
صفوف وطوابير الإجراءات . . .
مزاج الموظفين والموظفات . . .

وتلقى الإجازة السعيدة في النهاية . . .
راحت شمار في مرقة

هل من حلول مجدية يمكن ان نقدمها . . .
كل حسب تجربته وخبرته ومعايشته . . .
لتساهم في حل هذه المعضلة ؟ ؟ ؟

ملحوظة هاااااامة :

حقو ما تنسوا . . .
منتجع سواكن السياحي . . .
وموضوع التربتك.


كل الود

مع التحية

الإجازة في السودان ليست للإستجمام والراحة ، بل كد وتعب وجري لرؤية الأهل والأصدقاء والمعارف وخصوصاً إن كان لديك أهل في عدة جهات داخل السودان ، وهذه ضرورية ولازمة وفي سبيل ذلك أرى أن التعب راحة ، مادام أنني سوف أرى أهلي وأحبتي .

وفيما يخص جهاز المغتربين بالرغم من أنني لا أتفق جملة وتفصيلا في مهامهم ، لأن رعايا كل الدول يأشرون عند خروجهم من المطارات ، إلا أن إجراءاتهم بقت فينا وليس فيها مضيعة للوقت أكثر الاجراءات تأخذ لها ساعتين .

أما بالنسبة للإجراءات مع الجهات الأخرى فهي بالفعل فيها كثير من الاجراءات ومضيعة للوقت ، وإن يلزم الشخص بعض الاجراءات الطويلة يحبذ للشخص عمل توكيل لشخص مؤتمن قبل السفر بمدة ، حتى يقضي الاجازة ( لا تروح شمار وكسبرة في الشوربة) .

ولكم تشكراتي .

الحبيب - ولياب
تحياتي

ما قلنا الاجازة للاستجمام - لكنها بلا شك متعة
والراحة النفسية تساوي الدنيا بأكملها


ولو تدينا وصفتك بتاعة الساعتين في اجراءات جهاز المغتربين دي . . .
نكون من الشاكرين

إجراءات الجهات الاخرى فيها اول حاجة ( سمحة المهلة والمهلة نضوقة )
كل المصالح الحكومية الموظفين فيها إما . .
طلعوا الفطور
بيشربوا في الشاى
الموظف عيان وما جاء اليوم
والبتلقاهو في مكتبو بيوزعك لي بكرة او الاسبوع الجاى
وممهولين مهلة شديدة خلاص


ما حصل نزلت تريبتك يا جيش ؟ ؟ ؟


كل الود

الحل:

بدل تجي السودان ، رسل تذاكر لأمك وأبوك قابلهم في اي مكان في العالم . واكسب فيه اجر البر بالوالدين وارجع شوف شغلك بعد تاخد اجازة حقيقية وترتاح.


مالك ومال وجع القلب الاسمو السودان ؟

الاخ Hani Arabi Mohamed
تحياتي

لو انت شايف كده رسل ليهم التذاكر
بلدنا اجمل من أي بقعة في العالم


ما اظنه حل يا حبيب

كل الود

حتى الناس الفي السودان انشغلت بصورة مافي زول ممكن يكمل ليك أي اجراء حتى لو عملت ليهو توكيل

إجراءات التربتك وتخليص العفش في ميناء سواكن
عايز ليهو يومين على الاقل

ليه لازم يحضر المغترب لسواكن لتخليص العربية التريبتك ( خاصته ) ؟ ؟ ؟
ليه ما اكلف وكالة للقيام بإجراءات تخليص العربية التربتك دي وأستلمها منهم في الخرطوم أو أي مدينة داخل السودان ؟ ؟ ؟

تحياتي

Quote: الحبيب - ولياب تحياتي ما قلنا الاجازة للاستجمام - لكنها بلا شك متعة والراحة النفسية تساوي الدنيا بأكملها

الأخ العزيز / محمد

متفق معك وشوفة الأهل تساوي الدنيا كما أسلفت .

Quote: ولو تدينا وصفتك بتاعة الساعتين في اجراءات جهاز المغتربين دي . . . نكون من الشاكرين

أولاً : لو صادف إجازتك موسم الصيف ( من شهر 6 وحتى شهر9) أذهب يوم السبت لعمل الاجراءات ، حيث يعمل موظفو الجهاز والمراجعون قليلون جد حيث يعتقد معظم الناس أن الجهاز لا يعمل يوم السبت نظرا للإجازة الأسبوعية .

ثانياً : في الأوقات العادية عليك الذهاب مبكراً وستجد نفسك إنتهيت من الاجراءات بسرعة .

الوصفة الثالثة : هناك مكاتب خدمات حول الجهاز يمكن أن يقوموا بهذه المهمة مقابل مبلغ معين ويمكنك العودة لاحقاً لاستلام الجواز

Quote: إجراءات الجهات الاخرى فيها اول حاجة ( سمحة المهلة والمهلة نضوقة ) كل المصالح الحكومية الموظفين فيها إما . . طلعوا الفطور بيشربوا في الشاى الموظف عيان وما جاء اليوم والبتلقاهو في مكتبو بيوزعك لي بكرة او الاسبوع الجاى وممهولين مهلة شديدة خلاص

متفق عليه ولا تنسى أن شعارهم ( سمحــــة المهــــلة)

Quote: ما حصل نزلت تريبتك يا جيش ؟ ؟ ؟

نزلنا وأدونا عين وعدنا مسكرين ومقعدين لمدة عام كامل ومن ديك (نهي تربتك)

Quote: كل الود

ولكم أيضا عاطر صندل الوود

الأخ الغالي - ولياب
إحترام كميات والله

Quote: نزلنا وأدونا عين وعدنا مسكرين ومقعدين لمدة عام كامل ومن ديك (نهي تربتك)

أولا الف سلامة ياحبيب وانشاء الله تكون بلغت العافية.

Quote: هناك مكاتب خدمات حول الجهاز يمكن أن يقوموا بهذه المهمة مقابل مبلغ معين ويمكنك العودة لاحقاً لاستلام الجواز

( هى خدمة ممتازة اذا تم تنظيمها وتقنينها) وإليك مثالا . . .

صادف ان واحد مغترب سلم جوازو واتفق مع واحد في شبك الجهاز للقيام بكامل الاجراءات مقابل رسم معين . . .
وفوجئ بعد يومين من البحث . . . بمكالمة تفيد بوجود الجواز بطرف اشخاص في الحى الفلاني . . .
ولو عايز جوازك جيب معاك 5 مليون ( بالقديم ) . . . ولو بلغت البوليس ( عليك يسهل وعلينا يمهل )


قبل يومين في القناة السودانية كانوا مستضيفين نائب مدير جهاز شئون السودانيين العاملين بالخارج
وكان من ضمن المتحدثين واحد من بريطانيا. . .
ذكر انو ولسنين عددا رافض الجواز البريطاني ( مفتخر بالهوية السودانية ) . . .
ولكنه جاء السودان في اجازة واتبهدل اخر بهدلة من ناس الجهاز. . .
وقضى كل اجازتو ما بين مكاتب الموظفين وموافقات وترضيات المدراء.
واردف حزينا انو لما رجع لندن مشى عمل الجواز البريطاني مباشرة
ده حالنا

عموما . . .
المغترب يدعم الاقتصاد القومي . . .
سواء بالعملة الصعبة او تحمله عن الدولة هموم الصرف على كميات من الاسر والمساهمة في النشاطات المختلفة
لا يجد الاهتمام والرعاية والحماية خارجا
وخلينا نقول . . . ولا ( أيام الاجازة ) داخلا

كل إحترامي

اولا جهاز المغتربين دا لايقدم اي خدمة او اي تسههيلات للمغترب نظير المبالغ المدفوعة ...مجرد نهب صريح في مقابل حصولك علي التاشيرة ...اي شخص يعرف جيدا انة لولا الضرورة
لما اراد الدخول الي هذا المبني العشوائي ...الاجراءت معقدة بدون داعي عايزينك تمشي تدفع لكل زول في محلو تمشي ناس الخدمة تدفع وترجع تدفع لناس الزكاة والضرائب والخدمات وتمشي تصور الورق وبطاقة الخدمة وتفتش اورنيك التاشيرة وتدفع ..ولاحظ دايما المبلغ البتدفعو اكبر من قيمة الايصالات ..كم جنية كدا من كم زول مافارقة المهم تتخارج..وممكن جدا جوازك يطلع باقي ليهو شوية يقول ليك لازم تجددو وترجع تاني دوامة طويلة وترجع الضابط عشان يصدق وتمشي تدفع وتمشي الضابط الجنبو وتاني يطلع مفاجاة جديديدة مثلا ذي اسمك محظور وتقعد تلف تاني وتضطر تفك قروش تمشي البنك جوة تلاقيهو مقفل قاعد جنبو بنتاع عملة بسفة كبيرة يفك ليك واظرف حاجة عاملين بطاقة ضريبية تمشي لكل ناس في محلهم (عادة بكونو نايمين في كراسيهم..او بتونسو في بكاء فلان) تطلع سلم ازكاة وترجع تحت الخدمات وتاني الضرائب سلم اخر ....والبطاقة مدتها سنتين ولما تخلص تدفع عشان تجددها وعن تجربة مابتفيدك اذا نسيت ايصالاتك ....باختصار عالم تاني ماعندو علاقة بالمهنية ولاحتي مواكبة للانترنت والتقدم الحاصل في العالم نفس الاختام الكتيرة والورق والتكرار ....رغم ذلك اقول انو في تحسن وتسريع في الخدمة من زمان ...يعني زمان كانو في المدرسة بجلدونا بالخرطوش ومع تقدم الزمن صدر امر من الناظر بالجلد فقط بسوط عنج ..تحسن برضو!!!!!!

تحياتي للأخ Mohd Ibrahim

Quote: اولا جهاز المغتربين دا لايقدم اي خدمة او اي تسههيلات للمغترب نظير المبالغ المدفوعة ...مجرد نهب صريح في مقابل حصولك علي التاشيرة ...اي شخص يعرف جيدا انة لولا الضرورة لما اراد الدخول الي هذا المبني العشوائي

لا وجود لتسهيلات كما تفضلت
هى جبايات ليس الا وليتها مجدية او تخدم مصلحة عامة.
ولولا الضرورة لما كانت لنا الرغبة حتى في زيارة السفارة او القنصلية

Quote: ولاحظ دايما المبلغ البتدفعو اكبر من قيمة الايصالات .. كم جنية كدا من كم زول مافارقة المهم تتخارج

( كم جنيه كدا ) دي مشكلة في حد ذاتها
والكم جنيه البنتنازل عنها في مقابل نتخارج ونخارج نفسنا دي عملت شغل للمستفيدين كان الاولى بها خزينة الدولة.

Quote: وممكن جدا جوازك يطلع باقي ليهو شوية يقول ليك لازم تجددو وترجع تاني دوامة طويلة وترجع الضابط عشان يصدق وتمشي تدفع وتمشي الضابط الجنبو وتاني يطلع مفاجاة جديديدة مثلا ذي اسمك محظور وتقعد تلف تاني وتضطر تفك قروش تمشي البنك جوة تلاقيهو مقفل قاعد جنبو بنتاع عملة بسفة كبيرة يفك ليك واظرف حاجة عاملين بطاقة ضريبية تمشي لكل ناس في محلهم (عادة بكونو نايمين في كراسيهم..او بتونسو في بكاء فلان) تطلع سلم ازكاة وترجع تحت الخدمات وتاني الضرائب سلم اخر .... والبطاقة مدتها سنتين ولما تخلص تدفع عشان تجددها وعن تجربة مابتفيدك اذا نسيت ايصالاتك ....

دي مضيعة الزمن الاتكلمنا عنها
كلامك ده لا يرضي ابدا البعض . . .
لانهم بيعترو ان الحديث في مثل هذه المواضيع يعتبر جرم وذنب ومعصية
وفيهم من ينظر للمغترب وكأنه يستعلى على بلده وينظر اليها نظرة دونية.


من الغريب انك تدفع في اي من السفارات او القنصليات . . .
وعندما ترجع السودان تطالب بالايصالات المؤيدة للسداد
ولو ما كانت معاك حتدفع تاااااااااااااااااااااااااااني من اول
ويتم تحميلك ذنب انه لا يوجد ربط بين انظمة الخارج والداخل.


كل احترامي

الاعزاء
محمد ابوزيد
وليـــــاب
......وليكن شعارنا ((سمحة التــلتـــله))
______________________

من مواقف جهاز المغتربين
عمك كبير كده واقف اول الصف نصف ساعة
وكل دقيقة تجئ موظفة شايله جواز سفر وتزح
زميلتها من الكمبيوتر وتغضي غرضها وتتخارج
وعمك لسع واقف يتابع فيهن ،
بزهجه كده قالهن يا بناتي الشئ دي كمبيوتر ولا حفرة
دخان تتعازمن كده .
،،،،،،،،،،،،،،،،،،،،،،،،،مع فائق الود للجميع ،،،،،،،،

كل مرة جيب الناس البهمكـ أمرهم ..
ليقضوا معاكـ الاجازة ..
وفكـ نفسكـ من التلتلة ..وعصرة المغتربين .....

الاخ الغالي
Salah Ahmed Eisa
منور يا حبيب

عمك ده قال اخير يجيبها من الاخر

كل الود يا جيش