رسالة الى كل الطفيلين الجو سكنو الخرطوم ....

Post: #1
Title: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-08-2013, 05:47 PM

شوفوا ياناس الضهاري ....
وياناس البدو والخلا الجيتو بقيتو لينا زي الحسكنة ...
ويا عروب وغروب وشروق (بالشدة) ...
ويا كل الوهم الملو لينا الفجة ...

قسما عظما يجي يوم نسلكم من خرطومنا دي سلة المسمار المصدئ من الخشب الناشف ...

ونرج كل رايح لي بلدو ...!

Post: #2
Title: Re: رسالة الى كل الطفيلين الجو سكنو الخرطوم ....
Author: ABUHUSSEIN
Date: 02-08-2013, 05:49 PM
Parent: #1

دا كلام شنو يا زول هوي .......

دا كلام شين شديد .....

Post: #3
Title: Re: رسالة الى كل الطفيلين الجو سكنو الخرطوم ....
Author: سليمان القرشي
Date: 02-08-2013, 05:57 PM
Parent: #2

جيب شهاده البحث عشان نعرق
انكم اصحاب الخرطوم

Post: #4
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-08-2013, 06:01 PM
Parent: #1

الوافدين خصوصا الجدد (خصوصا الجابتهم الانقاذ) امتلكو كل البلد ...
ونحن ...
اسيادها الاصلين (ولو مجازا) بقينا ضيوف غير مرغوب فينا
والدليل اما نكون عطالة بنتفرج في الوهم ديل ..
او ...
ما قدرنا نستحمل وهاجرنا ...

Post: #5
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-08-2013, 06:05 PM
Parent: #4

غايتو ...

العملتيها فينا يا الانقاذ ليوم الدين ما بتطلع ..

Post: #6
Title: Re: رسالة الى كل الطفيلين الجو سكنو الخرطوم ....
Author: ABUHUSSEIN
Date: 02-08-2013, 06:06 PM
Parent: #4

Quote: الوافدين خصوصا الجدد (خصوصا الجابتهم الانقاذ) امتلكو كل البلد ...
ونحن ...
اسيادها الاصلين (ولو مجازا) بقينا ضيوف غير مرغوب فينا
والدليل اما نكون عطالة بنتفرج في الوهم ديل ..
او ...
ما قدرنا نستحمل وهاجرنا ...

يا زول هوي إنت عيان و ل شنو ...؟؟؟
أمشي حل مشكلتك مع ناس الإنقاذ...
ما تقعد تسئ للناس و بعدين إنتو أسايدها الأصليين كيف إتخلقتو معاها و ل شنو ...؟؟؟
و لو عاطل شوف ليك شغل و فكنا من المرض بتاعك دا ....

Post: #7
Title: Re: رسالة الى كل الطفيلين الجو سكنو الخرطوم ....
Author: Mahjob Abdalla
Date: 02-08-2013, 06:28 PM
Parent: #6

اجدني اتفق مع الكاتب من حيث اصل المشلكة بينما تطرق الكاتب للفروع.
الواقع انو كل حكومات المركز وضعت التنمية في العاصمة و مع مرور الزمن اصبح الريف لا يرضي طموحات الشباب المتعلم و بذلك تجد كل الذين تعلمو ام لا دخلو المدينة و استقرو فيها و الذين اغتربو ايضا الهم الاول هو اقتناء قطعة ارض في العاصمة و حواليها و بناءها.
و بذلك تجد ان كل سكان السودان الان في الخرطوم.
في الجانب الاخر ايضا الحكومة تريد تجفيف الريف من السكان حتي يتمكن من المتمردين او لا يكون هناك تمرد و لذلك اصبحت سياسة متبعة.
طبعا في كل هذه المعمعة سكان العاصمة و حواليها (هذه كانت حواكير لقبائل معينة) اصبحو من غير صوت و لا احد يفرزهم.

قبل فترة تقريبا كتب عضو البورد المكاشفي في ذات الموضوع و كان طرحة من منطلق الحواكير. اما صاحب البوست فتقريبا مشي خطوة بعيدة شوية بتسمية كل الوافدين طفيليين (من ضمنهم عمر البشير) و دي حاجة مطمئية لانو في ناس كتار السوط بهبشهم.

عموما الحل لن يكون بمنطق (نقلعهم واحد واحد) لانو بدخل فيهو القوانين الحديثة علي مثال (كل الارض ملك الدولة) زي ما هم الان بيرحلو ناس من مناطقهم لاستخراج البترول.
و في الاخر الحل السليم هو عدالة التنمية في كل مناطق السودان حتي يعود الناس الي اقاليمهم و تكون العاصمة منطقة صالحة للسكن.

Post: #8
Title: Re: رسالة الى كل الطفيلين الجو سكنو الخرطوم ....
Author: سيف النصر محي الدين
Date: 02-08-2013, 06:37 PM
Parent: #4

يا توفق الكلام ده توجهه لطفيليين الكيزان الحفاة العراة رعاة الشاة الذين تطاولوا في البنيان .
اما بقية الأهل الذين نزحوا اضطرارا فالدار دار ابوهم يقوموا و يقعدوا على كيفهم .
و أظن ان اقتراح الحزب الليبرالي بانشاء عاصمة جديدة فيه حل لمشاكل الخرطوم.

Post: #9
Title: Re: رسالة الى كل الطفيلين الجو سكنو الخرطوم ....
Author: يوسف السماني يوسف
Date: 02-08-2013, 06:50 PM
Parent: #8

Quote: شوفوا ياناس الضهاري ....
وياناس البدو والخلا الجيتو بقيتو لينا زي الحسكنة ...
ويا عروب وغروب وشروق (بالشدة) ...
ويا كل الوهم الملو لينا الفجة .

هذا الكلام لا يكتبة قلم سوي يعرف ان الوطن للجميع ,
والاهلو مامن الضهاري يبقي ما عندو اصل لان اهل الخرطوم جذورهم
من الضهاري الا الوافدين الذين اصحبو سودانيين بالمواطنة وهم لا ينكرون
اهل الضهاري . هذا الكلام الذي تكتبته اسواء من فعل الانقاذ التي حكمت السودان 23 عام

Post: #12
Title: Re: رسالة الى كل الطفيلين الجو سكنو الخرطوم ....
Author: حاتم محمد حاج المهدي
Date: 02-08-2013, 07:02 PM
Parent: #9

والأخو جا الخرطوم متلب ببراشوات ولا شنو؟!

وكمان قال شنو؟ المسمار المصدئ!!

والله ما في شئ صدئ غير طريقة تفكيرك إن كنت أصلاً تملك فكرة!

يا راجل إستغفر ربك وإعتذر عن كلامك الشين ده!

Post: #10
Title: Re: رسالة الى كل الطفيلين الجو سكنو الخرطوم ....
Author: حمد عبد الغفار عمر
Date: 02-08-2013, 06:55 PM
Parent: #8

غايتو لو مهاجر ولا مغترب خارج السودان

منظرك شين خلاس مع الناس المغترب عندهم ديل

الناس ديل جو شحادين؟

جو بقروشهم واشتروا بحقهم

انت الخرطوم دي غير بيتك الساكن فيهو دا ما عندك فيها أي شيء

وبعدين الخرطوم دي عمرها ما زايد من 200 سنة انت قبل الكلام دا كنت وين؟

Post: #11
Title: Re: رسالة الى كل الطفيلين الجو سكنو الخرطوم ....
Author: عمار عبدالله عبدالرحمن
Date: 02-08-2013, 06:59 PM
Parent: #10

ود الشيخ ما طيبه الليلة ولا الحاصل شنو ؟؟؟؟

Post: #13
Title: Re: رسالة الى كل الطفيلين الجو سكنو الخرطوم ....
Author: على محمد الخير
Date: 02-08-2013, 07:22 PM
Parent: #11

تحياتى للجميع

يا جماعة كدى روقوا المنقة ...توفيق أخونا ده أكيد ما جادي .....

Post: #14
Title: Re: رسالة الى كل الطفيلين الجو سكنو الخرطوم ....
Author: على ابراهيم رفاى حمد
Date: 02-08-2013, 08:02 PM
Parent: #13

بوستك يا توفيق مخستك خستكت السنين يااخى!!!

ورتب أفكارك اولا وبعدين تعال ورينا انت قاصد شنو !!! عشان الناس ما تفهمك غلط !!!

شخصيا كلامك دا انا بعتبروا كلام ساى !!!

لك السلام!!!

Post: #15
Title: Re: رسالة الى كل الطفيلين الجو سكنو الخرطوم ....
Author: عبد الله فقير
Date: 02-08-2013, 09:28 PM
Parent: #14

البوست حسب فهمى
يقرأ مع بوست ملاسى ؟
ممكن اكون غلطان انا فى فهمى برضو وارد

التعديدل لحذفة تبين عدم صحتها بخصوص انو صاحب البوست برلوم

Post: #16
Title: Re: رسالة الى كل الطفيلين الجو سكنو الخرطوم ....
Author: احمد الأمين على إدريس
Date: 02-08-2013, 09:30 PM
Parent: #14

توفيق السلام عليكم
غايتو صعبتها علينا شديد
واقصد كيفية الرد عليك ..
حالياً اكتفى ب
قةم لف

Post: #17
Title: Re: رسالة الى كل الطفيلين الجو سكنو الخرطوم ....
Author: وضاحة
Date: 02-08-2013, 09:33 PM
Parent: #16

هى الخرطوم بقى فيها منو غير الحبش

Post: #18
Title: Re: رسالة الى كل الطفيلين الجو سكنو الخرطوم ....
Author: محمد عوض السيد
Date: 02-08-2013, 09:35 PM
Parent: #16

..

والخرطوم ملك منو ؟

النعرف للزمن ؟؟؟؟

..

Post: #19
Title: Re: رسالة الى كل الطفيلين الجو سكنو الخرطوم ....
Author: علي محمد الفكي
Date: 02-08-2013, 09:50 PM
Parent: #18

حالة تحتاج العلاج

Post: #21
Title: Re: رسالة الى كل الطفيلين الجو سكنو الخرطوم ....
Author: Mohammed Sedeq
Date: 02-08-2013, 10:01 PM
Parent: #19

الشي البعرفو انا انو الخرطوم دي ما عندها سيد

ابوي الله يديه العافية بيحكي لي انو زمان لما كانو صغار الخرطوم دي كلها كانت عُشر
قال لي يجيك واحد يقول ليك لف بجملك ده في الواطة دي حدد انت عايز منها قدر شنو وادفع لي المبلغ الفلاني ابوي بقول لي مع انو مبلغ ######## جدا
بس كنت بقول ليه يازول الخلا ده الدايرو منو هههههههههه
يازول الخرطوم الشايفها دي سبعين سنة لورا كانت مافي
كل اهلها الحالين جوها من مدن السودان التانية عشان كده اسحب بوستيك ده ساي

Post: #20
Title: Re: رسالة الى كل الطفيلين الجو سكنو الخرطوم ....
Author: Alshafea Ibrahim
Date: 02-08-2013, 09:53 PM
Parent: #18

اسيادها الاصلين (ولو مجازا) بقينا ضيوف غير مرغوب فينا
===================================
هههههه
يازول رشهم ... يا أصلي أنت
الشفيع

Post: #22
Title: Re: رسالة الى كل الطفيلين الجو سكنو الخرطوم ....
Author: ناصر المحسى
Date: 02-08-2013, 10:04 PM
Parent: #20

انت من وين اصلا ياكوز ودخلك الخرطوم شنو

انت بتعرف من هم ساكن الخرطوم قبل خورشيد

باشا ؟

Post: #25
Title: Re: رسالة الى كل الطفيلين الجو سكنو الخرطوم ....
Author: ابوحراز
Date: 02-08-2013, 10:21 PM
Parent: #22

الآلاف من الشمالية سكنوا بالجزيرة
وآلاف مثلهم من كردفان ودرافور سكنوا بالجزيرة
انصهروا مع اهلها وتزاوجوا
وتشاركوا جميعاً في الأفراح والأتراح فهل مثل هؤلاء نطلق عليهم طفيليين ؟؟؟
واذا ذهب احدهم من الجزيرة واستقر بالجنينة أو دنقلا او سواكن فهل يطلق عليه طفيلي ؟؟؟
ألم يساعد هؤلاء الطفيلين في بناء الخرطوم
وتنميتها وازدهارها ؟؟
يا اخي الكريم السودان للسودانيين
والخرطوم ارض سودانية

Post: #23
Title: Re: رسالة الى كل الطفيلين الجو سكنو الخرطوم ....
Author: Balla Musa
Date: 02-08-2013, 10:11 PM
Parent: #20

Quote: شوفوا ياناس الضهاري ....
وياناس البدو والخلا الجيتو بقيتو لينا زي الحسكنة ...
ويا عروب وغروب وشروق (بالشدة) ...
ويا كل الوهم الملو لينا الفجة ...

قسما عظما يجي يوم نسلكم من خرطومنا دي سلة المسمار المصدئ من الخشب الناشف ...

ونرج كل رايح لي بلدو ...!

غايتو ياتوفيق لو مشيت على الوتيرة دى الربع الجايى حاتسب الدين..
بديت زمان بملكيتكم للحركة الاسلامية
ثم جيتنا يوم تشتم فى ناس جمعة لحس الكوع
ثم جيت بطلب فتاوى غريبة

ثم جيتنا اليوم بصك ملكية الخرطوم

والله انا شاكى أنى قاصد زول تانى اسمه مشابه لاسمك.
لو كان كدا معليش!!

Post: #26
Title: Re: رسالة الى كل الطفيلين الجو سكنو الخرطوم ....
Author: Hatim Alhwary
Date: 02-08-2013, 10:34 PM
Parent: #4

Quote:
ما قدرنا نستحمل وهاجرنا ...

مساء الخير

طبعاً المشكلة الحقيقية في الخرطوم و " المدينة" بشكل عام هو تغير المجتمع المديني نفسه و ظهوره في شكل السلوك العام وملامح ستايل الحياة نفسه
وتكاد حاليا تنعدم تماما مظاهر المدنية والحضرية التي تميز مجتمعات المدينة السودانية خلال عقود سابقة

ومدينة مثل الخرطوم تكاد اليوم ان تكون قرية كبيرة بعدد سكان كبير ومباني فخمة والسبب واضح هو التعرية المستمرة للطبقة الحضرية الهشة اصلاً واستبدالها بسكان جدد من الريف السوداني والاسباب كثيرة اهمها الاقتصادي والخدمي وان بات واضحا خلال العقدين الماضيين دخول السياسي كعامل تغيير منتظم ساهم في تسريع ازالة واضعاف الطبقة الحضرية واستبدالها بطبقة ريفية موالية

Post: #24
Title: Re: رسالة الى كل الطفيلين الجو سكنو الخرطوم ....
Author: Hani Arabi Mohamed
Date: 02-08-2013, 10:18 PM
Parent: #1

السلام عليكم ورحمة الله.
لاحظتُ تغيراً فجائياً في الرجل. فمن مواضيع تتكلم عن ماضي الحركة الإسلامية. ثم مؤسسها. ثم عائلة مؤسسها. ثم إعلان بيع وثائق.

رأيت الرجل فجأة في موضوع - حسبته شركاً مدنكلاً للأعضاء - يتحدث عن "البوس". كنتُ أنظر إلى موضوعه ذاك وأظن أنه سيأتي في نهايته ليقول للبورداب "معاكم الكاميرا الخفية" ثم يحدثنا عن فرق المشاهدات والمشاركات بين المواضيع الجادة وغير الجادة.
لكن الرجل خيب ظني ولم يحدث ذلك.

اليوم يبدو أن الرجل "جاب آخرو" ..... لكني لاحظت أنك لم تشمل أهلنا النوبة في أقصى الشمال ... مع من شملتهم .... فلماذا؟ ألم يضايقوكم أيضاً في الخرطوم التي تمتلكونها كما تقول ؟

-=-=-=-=-= الإنسان لا يمتلك حتى نفسه : فلماذا يتجبر ويتبطر؟ ؟

Post: #142
Title: Re: رسالة الى كل الطفيلين الجو سكنو الخرطوم ....
Author: Hani Arabi Mohamed
Date: 03-04-2013, 02:46 AM
Parent: #24

بوست الربع والارباع المجاورة

Post: #27
Title: Re: رسالة الى كل الطفيلين الجو سكنو الخرطوم ....
Author: ممدوح احمد
Date: 02-08-2013, 10:40 PM
Parent: #1

من متين الخرطوم كان عندها سيد؟؟

حتي المهدي لما فتح الخرطوم وجد السماهم الكفار (أتراك، أقباط، إغريق)

يعني كلكم في الهواء سواء

إستحمل وأصبر ياخوي كل الناس ناجعين

Post: #28
Title: Re: رسالة الى كل الطفيلين الجو سكنو الخرطوم ....
Author: امجد الجميعابى
Date: 02-08-2013, 11:53 PM
Parent: #27

Quote: ‏7‏ من التعليقات

Salah Salaburim · Khartoum, Sudan
كدى بالله يا توفيق شوف لينا الكلاكلة اللفة ضمن الخرطوم ولا تبع الضهارى ؟ عشان نحدد موقفنا من المسمار المصدى وكدا
تحياتى
رد · 1 · أعجبني · متابعة المنشور · منذ ‏4‏ ساعات

Sam Osman · الأكثر تعليقا
الاخ Mahjob Abdalla
وضعت النقات علي الحروف , ,,,,,,,,,,لكن الحاصل الان في الخرطوم مئليم لاصحاب الخرطوم . ود تور شين فرغ الخرطوم من سكانها وهدم جميع مبنيها و اخر عائله خرجه كانت عائله بسيوني اليهودي الان في بريطانيه, وعندما دخل كيتشنر اعاد سكان الخرطوم اليها,السودان بين غردون وكتسينر لمحمود فوزي . ثم قامت الكنيسه بجمع السودانيون وعددهم كان خمسين عائله ولهم صوره تايخيه, تعداد الخرطوم في عهد عبود كان 350 الف فقط
رد · 1 · أعجبني · متابعة المنشور · منذ حوالي ساعة

Mahmoud Kamal · Port Sudan
نشوف بعدين ناس الانقاذ لمن يخلصو مخططم و يقسمو باقي البلد لي حتت حتت و انتو تبقو دولة براكم ح تعملو شنو و الله الا تاكلو نيم و سيخ ... بس اول حاجة ناس الخرطوم يعملو شيرنق و يرجعو للاقاليم قروشا الاتصرفت علي الخرطوم من زمن الاستقلال يعني الموارد الكانت بتشيلا الحكومة و عائد بتاعا ما بيرجع منو ولا عشرو للاقاليم بعد داك تعال اتفاصح .. ( البترول بتاع الكم سنة الفاتت دي بس يبيعكم هدومكم عشان تسددو لمناطق الانتاج قروشم .. خلي مابالك لو جبنا ليك مشروع الجزيرة و وووووو و الله الا تشحتو ) اصغر مخي لسه ولا كدا كفايه
تخيل ( واحد اصلاً من الخرطوم لكن ما ساكن فيها ولا داير ) قال خرطوم قال
رد · أعجبني · متابعة المنشور · عدّل · منذ ‏5‏ ساعات

Sam Osman · الأكثر تعليقا
الاخ ممدوح احمد :حتي المهدي لما فتح الخرطوم وجد السماهم الكفار (أتراك، أقباط، إغريق)يعني كلكم في الهواء سواء ( هذا غير صحيح)
وضع حجر الأساس لمسجد الخرطوم في 17 سبتمبر 1900م وتم إفتتاحه عند زيارة الخديوي عباس باشا حلمي للسودان في 4 ديسمبر 1901 لجنة لإدارة المسجد من مواطني الخرطوم القديمة يرأسها عمدة المنطقة الشرقية للخرطوم المرحوم عثمان منصور (بشهادت الكيزان ) اول عمده للخرطوم وتوفي في عام 1935 وهو والد الشاعر حسين عثمان منصور , ومحمد عثمان منصور الذي قيله في زواجه تم دور ادور عم الحله
رد · أعجبني · متابعة المنشور · منذ ‏15‏ دقيقة

Hozyfa Ibrahim · متابعة · ‏‎System Engineer‎‏ في ‏‎Computer Engieering‎‏
شوف يامتخلف ياجاهل انت عار علي هذا المنبر عامل فيها ود الخرطوم وانت جاي قبل الانقاذ بستة شهور عالم رمم
رد · أعجبني · متابعة المنشور · منذ ‏3‏ ساعات

Mahmoud Kamal · Port Sudan
$ %ًَُ|*^%#((#!@@@$((and!@ّّّ@ ..... ولا اقوليك ... بلاش
رد · أعجبني · متابعة المنشور · عدّل · منذ ‏5‏ ساعات

Sam Osman · الأكثر تعليقا
تعداد العاصمه في عهد عبود كان 350 الف فقط
رد · أعجبني · متابعة المنشور · منذ حوالي ساعة

Post: #29
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-09-2013, 06:54 AM
Parent: #28

شكرا أخي امجد ...

Post: #30
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-09-2013, 07:12 AM
Parent: #29

ملاحظة :
الموضوع موضوع عام ما شخصي وبيناقش ظاهرة تستحق التحدث فيها ...

بالنسبة للقايلني جيت امبارح للخرطوم ساكي عربية الوزير او الوالي الكان ساكن في الفريق الوراني ...
اقول لهم ...
حبوبتي صافيناز (بتذكرها كانت بتحكي لينا كتير وكنا بنناديها باسم صفية) ابوها قصر من قصوره الان وزارة المالية الاتحادية او وزارة الاعلام

Post: #32
Title: Re: رسالة الى كل الطفيلين الجو سكنو الخرطوم ....
Author: شمس الدين التوم
Date: 02-09-2013, 07:35 AM
Parent: #30

Quote: شوفوا ياناس الضهاري ....
وياناس البدو والخلا الجيتو بقيتو لينا زي الحسكنة ...
ويا عروب وغروب وشروق (بالشدة) ...
ويا كل الوهم الملو لينا الفجة ...

قسما عظما يجي يوم نسلكم من خرطومنا دي سلة المسمار المصدئ من الخشب الناشف ...

ونرج كل رايح لي بلدو ...!

اللخو زودوا عليك الايجار والله شنو وجاي تعمل فيها ود قلبها والمؤمن مصاب

قال خرطوم قال وهذا زمانك يامهزل فامرحي

نوعية هذه مواضيع تنم علي حقد طبقي ونسأل الله السلامة

Post: #61
Title: Re: رسالة الى كل الطفيلين الجو سكنو الخرطوم ....
Author: النعمة عبدالرحمن
Date: 02-10-2013, 04:34 PM
Parent: #30

Removed and updated as below

Post: #64
Title: Re: رسالة الى كل الطفيلين الجو سكنو الخرطوم ....
Author: النعمة عبدالرحمن
Date: 02-10-2013, 06:19 PM
Parent: #30

الأخ توفيق للأسف الشديد لم يحالفك التوفيق فى إختيار الموضوع ولا العنوان للبوست. الخرطوم عاصمة السودان الكبير شئنا أم أبينا وبالتالى هي وجهة كل سودانى يرى ان فيها معاشه. ولايمكن لأى كأئن ان يحجر ذلك ويمنع أى سودانى من الإقامة فيها.كان الاجدر ان تتطرق الى الحد من الهجرة للخرطوم وذلك بتنمية الاقاليم وانشاء مشريع زراعية وصناعية مصاحبة تجعل الناس يجدون سبلا لكسب العيش في مناطقهم وحينها ما حيكون فى زول حتعجبو الخرطوم بكتاحتها وحرها.الحاجة التانية هى الخرطوم اصلا سيدها منو؟ الخرطوم يا توفيق اسسها اهلنا المحس وهم اسيادها ولكن ثق انو مافى واحد منهم بفكر بطريقتك دى وحسبك ترجع لكتاب طبقات ود ضيف الله لمعرفة المزيد عن هذا الموضوع.منطقة الخرطوم هى ديار المحس وجاورهم العبدلاب فى قرى، واهلنا المحس لهم ثقل سكاني حتى الان في المقرن، جزيرة توتي، حلفاية الملوك،الخوجلاب، برى وداخل الخرطوم المدينة وفى ضواحى الخرطوم في العيلفون والدبيبة وكترانج والشاقرة وودراوة والهلالية وامغد والنوبة والمسعودية وسلسلة من القرى الاخرى حول الخرطوم و التى يصعب حصرها.
يا توفيق يا أخوى الخرطوم اسسها اهلنا المحس وهم اسيادها ولكن ثق انو مافى واحد منهم بفكر بطريقتك دى. ويا سيدى نحنا اهل الخرطوم وحقتنا ولكن ما متضايقين من ضيوفنا الاصبحو اهل بلد زيينا لان الظروف ألادت للوضع الحالى موضوعية ومقبولة ولو ما المهاجرين ديل ما كانت الخرطوم هي التي تريد ان تخرج منها الناس ولكانت بلدة متواضعة كالأماكن الأخرى.عندما أقول الخرطوم أعنى الخرطوم وبحرى أما ام درمان كما معروف تأسست مع قيام الدولة المهدية وعمرها الفاتحون الذين سقطت الخرطوم على ايديهم وكانو يمثلون كل الوان الطيف لسودانى الذي كون جيش الامام المهدي. وعشان كده بقولو ام درمان العاصمة الوطنية وهى السودان حقا.
المهم فى الامر ان الخرطوم هى العاصمة وبما انها مستأثرة بكل خيرات السودان فلكل سودانى الحق ان يعيش فيها اذا استطاع الى ذلك سبيلا. وازيدك كيل بعير، فى زمن غير بعيد الكثير من اهل البحر بما فيهم اهل الخرطوم هاجروا وعملو واستوطنو - ولا زالو - فى المناطق التي تريد من اهلها مغادرة الخرطوم. كلامك يا توفيق للاسف يفهم فى سياق عنصرى بحت نحن فى غنى عنه.

للمزيد عن نشأة الخرطوم وتاريخها انقل الأتي من منتدى الهلالية مع حفظ حق الناشر صباحي عبد الملك:
(

الخرطوم عاصمة السودان الحديث وريث مجد سوبا عاصمة مملكة علوة المسيحية وقرى عاصمة العبدلاب عندها يلتقي النيل الأبيض والنيل الأزرق ومنها يبدأ النيل الكبير مجراه المبارك إلى الشمال. وفد إليها مع غروب شمس سوبا جماعة من المحس فعمروا توتي و من توتي عبر ولي من أوليائهم النهر ونزل الخرطوم ليبني فيه منزلا وخلوة يرتادها الصبيان و مع نار العلم التي أوقدها هذا الولي بدأ عمران الخرطوم . وظل المكان لعقب الولي من الولد والجيران ومن اجتمع إليهم حتى غربت شمس دولة الفونج ولما جاء الترك بنوا عاصمتهم في الخرطوم عوضا عن سنار عاصمة الفونج الأولى ).
هكذا ابتدر المؤرخ السوداني د.محمد إبراهيم أبو سليم كتابه تاريخ الخرطوم ويقول في فقرة أخرى من كتابه هذا (وقد ظلت الخرطوم نفسها منطقة غير مأهولة تغطيها الغابات وتأتيها مياه الفيضان فتغرق أجزاء كبيرة منها وكان يأتيها المسافرون ليعبروا عندها النيل ويرتادها صيادو السمك في مواسم الصيد يقضون حاجتهم ثم يعودون أدراجهم بما اصطادوا وفي حوالي عام 1691 ترك الفقيه أرباب العقائد جزيرة توتي التي اشتهر فيها وعبر النهر لينشأ في هذا المكان أول قرية مأهولة وكان من عادة الفقيه الذي يشتهر أمره وينشد الاستقلال أن يبحث له عن مكان جديد يبدأ فيه حياته الدينية ويجد فرص الاستقلال والشهرة المتاحة).
لا يختلف اثنان من المؤرخين على ما أورده د.محمد إبراهيم أبو سليم على أن بداية عمران مدينة الخرطوم كان بارتحال الشيخ أرباب العقائد من توتي إليها وبنائه مسجدا وخلوة ومنزلا له بها. فمن هو هذا الشيخ الذي تمر 400 عام على ذكرى ميلاده هذا العام .
نسبه و قبيلته :-
هو أحمد بن علي بن أرباب بن علي بن عون بن عامر بن صبح بن فلاح بن شرف الدين بن محمد الملقب بعجم بن زائد بن محمد محس (الذي تنتسب إليه قبائل المحس) بن مرزوق بن الملك سعد بن الملك جامع بن الملك حسن بن الملك أحمد بن الملك عامر بن عبد الله بن عبد الكريم بن يعقوب بن جابر بن سعد بن موسى بن أويس بن جامع سكر بن سالم بن عبد الرحمن بن علي بن سليمان بن محمد بن زيد بن قتادة بن حارثة بن عبادة بن أبي بن كعب البدري الأنصاري الخزرجى أحد كتاب الوحي على عهد الرسول صلى الله عليه و سلم.
إذا هو عونابي محسي خزرجى ولد بجزيرة توتي وقد أورد هذا النسب الشيخ النسابة الصديق حاج أحمد حضرة في كتابه المنشور بعنوان العرب التاريخ والجذور خلافا لما أورده صاحب الطبقات فقال أنه أرباب بن علي بن عون بن عامر بن أصبح بن فلاح مسقطا( أحمد بن علي ) والراجح عندي أنه كما أورد الشيخ النسابة الصديق حضرة .
ولقب بأرباب العقائد و أرباب الخشن لخشونة أطرافه من كثرة الوضوء و إسباغه على المكاره.
وقد اشتهر من أبائه أبناء فلاح الأربعة صبح وقنديل و مرزوق و غردقة . أما صبح فهو جد عالمنا الخامس مؤسس مدينة الخرطوم . أما قنديل فهو الجد الثالث للعارف بالله الشيخ إدريس ود أرباب محمد( 1507 -1650 ). أما مرزوق فهو جد إبراهيم ولد توتي البداني و لمن أحفاده الشيخ حمد ود حتيك و غيرهم من أهالي بري المحس. أما غردقة فهو أخيهم من أبيهم و أمه شايقية كندكابية وهو جد الغردقاب بتوتي ومناطق أخرى بالسودان و منهم الشيخ الأمين الضرير مميز علماء السودان في التركية السابقة.
أما والد فلاح فهو شرف الدين أو شرف جد المشيرفية و أحد أبناء محمد الملقب بعجم التسعة الذين يشكلون محس وسط السودان في توتي وشمبات و بري والعيلفون و واوسي وغيرها من قرى السودان الممتدة على طول النيل الأزرق من منطقة واوسي شمالا إلى كركوج في النيل الأزرق و على النيل الأبيض وفي كردفان ودارفور ومناطق كثيرة داخل الجزيرة.
و للفائدة فان أبناء محمد عجم هم:-
(1) شرف الدين والذي فصلت ذريته سابقا و يقال أنه كان فقيها وعالما .
(2) سعد الله وهو جد السعدلاب بتوتي وشمبات ومنهم الشكرتاب والعجيماب والعصملاب وغيرهم.
(3) كباني أو محمد كباني وهو جد الكبانية ومنهم العارف بالله الشيخ خوجلي أبو جاز و الشيخ أمام بن محمد الشهير بابي جنزير.
(4) عبودي جد العبودية ومنهم الآن بتوتي دار صليح و ضو البيت.
(5) سادر جد السدارنة مع الشكرية بأرض البطانة .
(6) زايد جد الزيادية مع قبيلة الحمر بكردفان .
(7) مزاد أبو شامة جد الشامية ويسكنون أم قحف بالقرب من العيلفون.
(8) شعبان و هذا قد نزل مع الجعليين بالسافل و لذلك ذابت ذريته مع أخوالهم الجعليين و لم يعد لهم وجود منفصل.
(9) صادر وهو جد الصواردة.
ويلتقي محس الشمال مع محس الوسط عند الملك جامع بن الملك حسن بن الملك أحمد فهم أبناء الملك ناصر و حسن و حسين و جلال أخوان الملك سعد و الملك مكن.
هذه قبيلة الشيخ أرباب العقائد والتي تنحدر من شمال السودان من منطقة سدلا بالقرب من مدينة دلقو وهي قبيلة كبيرة وممتدة على امتداد السودان الكبير منذ فجر دخول الإسلام وهم حملة مشعل العلم والمعرفة جاءوا يحملون هم الدعوة إلى الله و يعلمون الناس الإسلام الحق فكان منهم العلماء الشيخ إدريس ود الأرباب محمد (1507 -1650) وأرباب العقائد (1609 -1691 ) والشيخ حمد ود أم مريوم( 1645-1729 ) و الشيخ خوجلي بن عبد الرحمن (1655م-1742م) فأناروا طريق الحق و العدل في القرنين السادس عشر والسابع عشر و الثامن عشر الميلادي مما أثبته لنا التاريخ و لكن نقول أنهم قبل ذلك كانوا أئمة يهدون للإسلام.)

المصدر:
Read more: http://www.helalia.com/vb/showthread.php?t=3955#ixzz2KW6raG6z

Post: #71
Title: Re: رسالة الى كل الطفيلين الجو سكنو الخرطوم ....
Author: Mohammed Maher
Date: 02-11-2013, 10:52 AM
Parent: #30

Quote: حبوبتي صافيناز (بتذكرها كانت بتحكي لينا كتير وكنا بنناديها باسم صفية) ابوها قصر من قصوره الان وزارة المالية الاتحادية او وزارة الاعلام

اول مرة في حياتي اشوف لي زول اسمو توفيق عيسي وحبوبتو اسمها صافيناز كدي فهمني ليها عليك الله

كدي قول بسم الله يا اخونا

Post: #121
Title: Re: رسالة الى كل الطفيلين الجو سكنو الخرطوم ....
Author: aosman
Date: 02-15-2013, 02:55 PM
Parent: #30

رجالة النت دي ما بتنفع شيل سلاح وأمشي طلعهم, ومسمارك الذكرته ده ما حتقدر تطلعه خلي تطلع إنسان واحد

Post: #31
Title: Re: رسالة الى كل الطفيلين الجو سكنو الخرطوم ....
Author: خالد علي محجوب المنسي
Date: 02-09-2013, 07:19 AM
Parent: #29

البلد للجميع وللكل حق وفي كل شبر فيه
حتى جوبا ولو إنفصلت
تحرر من عقدة في ذات نفسك اخي

الله يشفيك

Post: #33
Title: Re: رسالة الى كل الطفيلين الجو سكنو الخرطوم ....
Author: Nasruddin Al Basheer
Date: 02-09-2013, 07:44 AM
Parent: #31

طيّب يا توفيق لو ده مستوى تفكيرك وطرحك، حا تطبف فكرة تنظيم الرايات الأربع كيف؟؟؟
أتمنى أن يتسع وقت سيادتكم للرد على هذا السؤال....

Post: #34
Title: Re: رسالة الى كل الطفيلين الجو سكنو الخرطوم ....
Author: haroon diyab
Date: 02-09-2013, 08:04 AM
Parent: #33

Quote: شوفوا ياناس الضهاري ....
وياناس البدو والخلا الجيتو بقيتو لينا زي الحسكنة ...
ويا عروب وغروب وشروق (بالشدة) ...
ويا كل الوهم الملو لينا الفجة ...

قسما عظما يجي يوم نسلكم من خرطومنا دي سلة المسمار المصدئ من الخشب الناشف ...

ونرج كل رايح لي بلدو ...!

علي قولة المصريين

الحق ماعليك.....

الحق علي الناس البترد عليك....!!!!!

Post: #35
Title: Re: رسالة الى كل الطفيلين الجو سكنو الخرطوم ....
Author: ود الباوقة
Date: 02-09-2013, 08:06 AM
Parent: #34

دا ما الكلام الكنا بنقول فيهو

نسال الله العافية

Post: #36
Title: Re: رسالة الى كل الطفيلين الجو سكنو الخرطوم ....
Author: الجنيد حمد
Date: 02-09-2013, 08:11 AM
Parent: #33

Quote: الى كل الطفيلين الجو سكنو الخرطوم

(دحين علوانك ده نردلك فيهو كيف)

و

عاش السودان

Post: #37
Title: Re: رسالة الى كل الطفيلين الجو سكنو الخرطوم ....
Author: Hassan Bakri Nugud
Date: 02-09-2013, 08:58 AM
Parent: #36

يا أخوانا الزول ده أدوهو معاكم فَرَقَــة ( تُقرأ شُهــرة ) شوفوهو داير يقول شنو .. طبعا أكيد ما قاصد كلامو دا !

::::::::::::::::::::::

وإن بقا قاصدو ؛ ماف حل غير نقول ليهو : الله يسامحك ياخ !!

Post: #38
Title: Re: رسالة الى كل الطفيلين الجو سكنو الخرطوم ....
Author: محمد علي البصير
Date: 02-09-2013, 09:25 AM
Parent: #37

يا
بالله لما تبقى على كنس الخرطوم من الطفيليين ، ما تنسى تخم معاك كل من :

الجزولي دفع الله
محمد الأمين
أبو عركي البخيت
عمر البشير
عبد العزيز المبارك
محجوب شريف
الهادي حامد
عبد القادر سالم
صلاح إبن البادية
فاروق أبو عيسى
أمين مكي مدني
عثمان عمر الشريف
صلاح إدريس
جمال الوالي
عبد العزيز شدو
عبد الباسط سبدرات
مامون سنادة
حسين خوجلي

.
.
.
والقائمة لا حصر لها من ( الطفيليين) الهجروا القرى وجأوا زاحموكم في العاصمة ـ ممكن أحسب ليك لما لا نهاية

وكمان ما تنسى تعرج معاك كدة على المقابر عشان تشيل معاك رفات كل من :

إسماعيل الأزهري
محمد خير المحامي
الشريف الحسين الهندي
بروفيسور محجوب عبيد
التجاني الماحي
جمال محمد أحمد
محمد توفيق أحمد
محمد إبراهيم نقد
محمد وردي
مصطفى سيد أحمد
عبد المنعم الخالدي
الأمين عبد الغفار
سيد خليفة
النعام أدم
أحمد المصطفى
بادي محمد الطيب

والقائمة تطول
ديل كمان عشان تستفيدوا من مساحات الأراضي الفيها قبورهم

القوائم دي كلها من الطفيليين يا سيد توفيق ـ ومستعد أحسب ليك لبكرة ـ
بالله ديل كلهم يا سعادة توفيق باشا ـ رجعلهم للقرى والبوادي عشان تتفسح زي ما دائر
ولا شنو سعادتك !!!!!!!!!!!!!

Post: #39
Title: Re: رسالة الى كل الطفيلين الجو سكنو الخرطوم ....
Author: الصادق صديق سلمان
Date: 02-09-2013, 10:13 AM
Parent: #38

كدي يا جماعة واحد يدي لينا توفيق دا جك حق كركدي بااااااااااارد يلبس لينا تريننق وشورت وياخد ليهو جكة في حر الخرتوم العاجباهو دي

Post: #40
Title: Re: رسالة الى كل الطفيلين الجو سكنو الخرطوم ....
Author: شمس الدين التوم
Date: 02-09-2013, 10:31 AM
Parent: #39

طيارة جاءت بفوق شال القنابل كوم جاءت تضرب الخرتوم
ضربت حمار كلتوم ست اللبن و,,,,,,,,,,,,,,,, جري
ياكاتب البوست بتعرف المرة لاسمه كلتوم عشان نعوضها حمارها المات
والله سالفتك زي الزول الجري .
ياخوي عملت ( جكه حضاره) والله شنو

Post: #41
Title: Re: رسالة الى كل الطفيلين الجو سكنو الخرطوم ....
Author: حاتم محمد حاج المهدي
Date: 02-09-2013, 12:04 PM
Parent: #40

Quote: حبوبتي صافيناز (بتذكرها كانت بتحكي لينا كتير وكنا بنناديها باسم صفية) ابوها قصر من قصوره الان وزارة المالية الاتحادية او وزارة الاعلام

Post: #42
Title: Re: رسالة الى كل الطفيلين الجو سكنو الخرطوم ....
Author: محمد علي البصير
Date: 02-09-2013, 12:22 PM
Parent: #41

Quote: محمد علي البصير : وعشان تستفيدوا من مساحات الأراضي الفيها قبورهم
هل تعلم ان جامع الخرطوم الكبير مبني في مقابر ناس الخرطوم الماتو عندما دخل الانصار الخرطوم (في قصه حلو هنا مابيت ود تورشيت و رجل هندي و الزخيره ) وده البفسر وجود الضرحين الموجدين الي الان
الازبيتاليه برضو مبنيه علي المقابر القديمه , مجاوره لمقابر الحلفاء او الانجليز الموجوده الان
اما اللسته بتعتك دي ممكن احكي ليك اي واحد دخل الخرطوم متين , كمثل سبدرات اول عمل ليهو كان مع ود العمده حسين عثمان منصور
الشريف الهندي ده نور نور البلد لكن مكانهم بري
عرررررره الباوقه :دا ما الكلام الكنا بنقول فيهو
ده حقدكم الخلكم تكتلو مجدت وجرجس الله يرحمهم , بذكرهم في ساعه الفطور في المدرسه .حسبي الله عليكم
قلبى على الشهيد
تحت التراب دافننو
وقلبى مع السجين
خلف الحديد رامنو
وقلبى مع المواطن
الحر اذى ملاحقنو
ديل سودانا
والباقين
يمين ما منــــــــو
( من اين أتي هؤلاء ؟) نجدد للناس سؤال أديبنا الراحل الطيب صالح

أخوي سام عثمان ـ ربنا يديك العافية
والله يا أخوي ناس الأنقاذ ديل أنا عمري ما أتفقت معاهم في حاجة ـ وما أظن في زول الدنيا كره النظام دا أكثر مني
لكن أخونا توفيق دا ـ أرتكب خطأ جسيم وهو يسئ لشريحة كبيرة من أبناء الشعب السوداني
السودان دا شهد ولا زال يشهد حركة نزوح غير محدودة أملتها ظروف الناس وضرورات الحياة من عمل ودراسة ، وسبل كسب المعيشة
وعادي تلقى أسرة مستقرة في حلفا ـ وبعد سنة تجري تقيم في الكلاكلة
وأخرى من الفاشر بعد شهور ممكن ترحل بروتسودان ، عشان عائل الأسرة نقل للعمل هناك
أو أسرة من الدمازين أشترت بيت في مدني ورحلوا فيها
والخرطوم ما إستثناء من حركة النزوح دي
وممكن أنا بكرة أجي أشتري البيت الساكن فيه سعادة الباشا توفيق دا
أيه الشئ البمنع مواطن سوداني يستقر في المكان الذي يروق له وسلك طريق القانون في سبيل تحقيق ذلك ؟
هل مدني مثلاً تكون حكر لأبناء مدني السني ـ ويمنع الأخرين من السكن فيها ؟
يا حبيب دا مفهوم عنصري بغيض ، وإستعلاء طبقي تأباه الفطرة والدين والعرف

وبكل أسف سعادة الباشا توفيق ربط الموضوع بسياسات الأنقاذ ـ أنا ضد أي خطوة عملتها الأنقاذ ـ لكن السكن في الخرطوم ما ليه صلة بذلك

والقائمة الأنا أوردتها ـ ديل كلهم نزحوا من الأقاليم وأستقروا في العاصمة قبل الأنقاذ ما يفكروا فيها حتى

Post: #43
Title: Re: رسالة الى كل الطفيلين الجو سكنو الخرطوم ....
Author: ناصر المحسى
Date: 02-09-2013, 01:24 PM
Parent: #42

Quote: والله يا أخوي ناس الأنقاذ ديل أنا عمري ما أتفقت معاهم في حاجة ـ وما أظن في زول الدنيا كره النظام دا أكثر مني
لكن أخونا توفيق دا ـ أرتكب خطأ جسيم وهو يسئ لشريحة كبيرة من أبناء الشعب السوداني

يا محمد مساء النور

توفيق انسان فارغ حياتو ما كتب بوست اتجاوب معه الناس اول بوست ليه يكون فيه

اكتر من شخصين يردو عليه

وبعد اناعاوز عرف متين بقى توفيق مالك الخرطوم ؟ منو توفيق ؟

على حسب اول من السكن هم سكان توتى وبرى

Post: #44
Title: Re: رسالة الى كل الطفيلين الجو سكنو الخرطوم ....
Author: حاتم عثمان
Date: 02-09-2013, 01:51 PM
Parent: #28

تعداد العاصمه في عهد عبود كان 350 الف فقط

Post: #45
Title: Re: رسالة الى كل الطفيلين الجو سكنو الخرطوم ....
Author: ناصر المحسى
Date: 02-09-2013, 02:20 PM
Parent: #44

سيبك من الخرطوم

هل فى طفيلى وانتهازى اكثر من المدعو توفيق فى السودان

Post: #46
Title: Re: رسالة الى كل الطفيلين الجو سكنو الخرطوم ....
Author: أبوبكر أبوالقاسم
Date: 02-09-2013, 02:52 PM
Parent: #45

Quote: على حسب اول من السكن هم سكان توتى وبرى

والدباسين الساكنين الرميلة ... كانوا يسكنون فى المقرن... قبل إفتتاح " الأسكلة".... وترحيلهم لمنطقة الرميلة.

Post: #47
Title: Re: رسالة الى كل الطفيلين الجو سكنو الخرطوم ....
Author: seham Abdeljleil
Date: 02-09-2013, 02:57 PM
Parent: #1

انت جادي والابتهظر......مش الخرطوم دي العاصمه ومش في كل العالم العواصم بتنموا وبتكبر بمرور الزمن سواء عمرانيا او سكانيا ممكن تناقش الزيادة الكبيره في ساكني الخرطوم بطريقه أحسن يعني ليه الزيادة أسبابها ...ضعف التنميه في باقي اجزاء السودان مثلااسباب كثيره ممكن تناولا من غير الاساءاه للناس بالطريقة دي.....لو جادي أحسن تحذف البوست لانه فيه أساءه كبيره لكل سوداني سكن الخرطوم لأي سببب والله يهديك.......

Post: #48
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-09-2013, 03:15 PM
Parent: #47

إمارة السودان الاسلامية ...... !!

طيب دي رسالة لكل الشعب والامة السودانية (طفيليين واصحاب حق )

ورونا رأيكم شنو ؟؟؟؟؟ (خمسة استفهامات)

انا من شعبة ساهمت في كثير من لوحات السودان السياسية المعاصرة والقديمة
آلمني ان اطرح موضوع ولا يجد تعليق سألت نفسي لم ذلك
فوصلت ان السودان الذي كنا نعرفه ويعرفنا قد تغير
نحن نعيش الان في سودان جديد
فهل ارتكبت جريمة في قول هو لب القضية والحقيقة
وهل نحن سكان السودان (اخص الخرطوم) القديم اصبحنا هكذا
يتندر فينا ناس الضهاري بدون خجل (لانهم اليوم يملكون مالنا وسلطتنا ... وشوارعنا )
اين الراسمالية الوطنية القديمة اليوم دون تحديد اسماء والتصريح بحالهم اليوم
(حليل السوق الافرنجي الكان الدخول له الا بالملابس الرسمية)
شيئ طبيعي ان ياتي تشادي ولا كمروني ولا من النيجر ويمتلك صف دكاكين في سوق امدرمان ويعرس ملكة جمال المدينة
او حتى جنس اخر ....
ان الادب ان نعطي لاصحاب المدينة التي تسكنوها ووجدتم فرصة بقهر ساكنيها ان تعطوهم بعض الاحترام

يا ناس جدادة الخلا الجات طردت جدادة البيت !!!!!!!!!!!!

Post: #49
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-09-2013, 03:19 PM
Parent: #48

انا مع الفكرة بانشاء عاصمة جديدة للسودان

شوفوا ليكم اي حتة اعملوها فيها

وشتتو وسيبو لينا البلد دي

خلو الخرطوم ترجع زي اول
زي القاهرة البتحترم سكانها الاصليين
زي بيروت اللسة ولي بكرة سكانها الاصليين ليهم صيت ورأي
وزي كل مدن العالم المتحضر
بلا قرف ..

Post: #50
Title: Re: رسالة الى كل الطفيلين الجو سكنو الخرطوم ....
Author: على ابراهيم رفاى حمد
Date: 02-09-2013, 03:38 PM
Parent: #49

انت لسة فى حنكك العاضى دا ناس ضهارى وميتين !!!
يازول الزم الضل أخير ليك من كلامك المخستك دا!!!
قالوا العارفين بأحوال الخرطوم الخرطوم حقت اى زول سوداني متى ما استطاع يتملك فيها فله حق السكن!!!
زميل قال ليك غير مساحة بيتكم ألفى الخرطوم دا تانى ما عندك حاجة!!!
عشان الخرطوم تبقى زى القاهرة انت عائز نخيلها ليك عشان حسب الفهم فى راسك دا (ماعصرت علينا)

كلمة قرف دى كبيرة خلاس وشينة كمان!!

قرق يقرفك يااخى ما عندك مستوى!!

Post: #51
Title: Re: رسالة الى كل الطفيلين الجو سكنو الخرطوم ....
Author: اسماعيل عبد الله محمد
Date: 02-09-2013, 03:50 PM
Parent: #49

هرتوم مهل ريس بنوم وتيارة بقوم و مرة ماشى فى شارى ما اندو هدوم.............ههههههههههههههههههههههههههه..........

المثل الدارفورى بقول الخرطوم مثل المرة البلا ولى ( المرأة التى لا ولى لها ) كل من هب ودب يجى ناطى

نط فيها المهدى وخليفته
ونط فيها كتشنر و جماعته
ونط فيها خليل و عصبته

و
و
والقائمة تطول

يا اخوى ابقى عشرة على خراطيمك الثلاث لانه يظهر ومن قرائن الاحوال ان الاجتياحة الاخيرة قادمة من جهة الجنوب و الغرب و الشرق , اربط اب تكة بتاعك تمام و اتحزم يا (توفيق) بالمناسبة اسم توفيق دا ما اسم سودانى شكلك من جذور مصرية - والله مهازل اولاد بمبة بقو يشرعوا فى عاصمة بلاد السود.

كلااااااااااام والله.

Post: #52
Title: Re: رسالة الى كل الطفيلين الجو سكنو الخرطوم ....
Author: عادل الباهي عبدالرازق
Date: 02-09-2013, 03:58 PM
Parent: #49

Quote:
حبوبتي صافيناز (بتذكرها كانت بتحكي لينا كتير وكنا بنناديها باسم صفية)

ياكافي البلاء نحن من حبوبة صلاح غريبة لحبوبتك أنت

الزول دا عيان هههههههههه
نسأل الله السلامة

Post: #53
Title: Re: رسالة الى كل الطفيلين الجو سكنو الخرطوم ....
Author: معاذ الفحل
Date: 02-09-2013, 05:02 PM
Parent: #52

توفيق
خلاصة القول
انت رجل فارغ المحتوى
كل اناء بما فيه ينضح

Post: #55
Title: Re: رسالة الى كل الطفيلين الجو سكنو الخرطوم ....
Author: جمال ود القوز
Date: 02-09-2013, 05:32 PM
Parent: #53

المشكلة ياتوفيق إنكـ ماقادر توصل فكرتك للناس ..
واخترت أبعد الاشارات ..
للوصول لهدفكـ المنشود ..
والأكيد إنت قاصد الناس الجات في فترة الانقاذ وتمتعت بخير البلد ..
بالفعل الانقاذ جففت الخدمة المدنية وكل مصالح الدولة إلا من منسوبيها ..
ووجهت معيار الاختيار ..وجعلته مقصوراً على الولاء دون الكفاءة ..
فأتت بكل صاحب غرض وهوى ومكنته من مقاليد الحكم وثروة البلد ..
وحتى رأسمالية زمان اتغيرت لان الحكومة وضعت كل امكانياتها في يد ثلة بعينها ..
ومنعت الباقين من السوق والتكسب بصورة غير مباشرة ..
فأتت برأسمالية جديدة .. والاكيد سيكون أغلبهم ممن تعنيهم ..
فأصبح القرش في يد أتباع الحكومة ومنسوبيها ومن لف لفهم ..
فشفطوا امكانيات البلد ..
وسكنوا القصور الفارهة واشتروا أغلى الأماكن في العاصمة ..
وهم في الأساس أتوا من خارج العاصمة ..
أما كان من الاولى عدم التعميم ...
الذي أخل تماماً بموضوع البوست ..
لأن رشاشه أصاب البتقصدهم والمابتقصدهم ..
الخطأ وارد ياتوفيق في الطرح وفي فهم الطرح ..
خصوصاً إن تم اطلاق الكلام على عواهنه كما فعلت ..

سكان الخرطوم الزمان ..
ناس توتي .. بري .. المقرن .. الرميلة .. القوز .. الجريف غرب ..
اللاماب .. الحماداب .. الدباسين .. ودعجيب ..
الكلاكلة القلعة .. الكلاكلة القبة .. ود عماره ..
ولو إنت مرقت من ديل يبقى إنت والجماعة إياهم في سرج واحد ..

Post: #54
Title: Re: رسالة الى كل الطفيلين الجو سكنو الخرطوم ....
Author: على عبدالله بشير
Date: 02-09-2013, 05:14 PM
Parent: #52

قال : توفيق الحكيم

Quote:
حبوبتي صافيناز (بتذكرها كانت بتحكي لينا كتير وكنا بنناديها باسم صفية)

ونحن ناس الضهارى برضو لينا قول :

الله يرحمك يا حبوبتى بخيته بت بشاره برضو كنتى بتحكى لينا ...

غايتو بس ياهو ذاتو ( خالف تٌعرف )

Post: #56
Title: Re: رسالة الى كل الطفيلين الجو سكنو الخرطوم ....
Author: جمال ود القوز
Date: 02-09-2013, 06:22 PM
Parent: #54

بعدين ماتنسى اهلنا الفلاتة الهوسا ..
كانوا ساكنين منطقة المقرن الحالية ..
فتم ترحيلهم لمنطقة الجامع الكبير بوسط الخرطوم ..
بعدين رحلوهم للمنطقة التي خلف كبري المسلمية أي منطقة الخرطوم ( 2) ..
بعدين رحلوهم لمنطقة الديم وحي الزهور ..
ومن ثم تم ترحيلهم لمنطقة العشش فلاتة المعروفة قرب السوق الشعبي وسباق الخيل ..
فكلما جات خطة اسكانية جديدة شالوهم بره وتعداهم التقسيم بحكم كونهم جايين من نيجيريا ..
وأخيراً تم تمليكهم أراضي في حي الانقاذ الحالي ..
وأصبحوا أصحاب ملكـ ..
فهم دون شك من سكان الخرطوم الأصليين ..
لانه بحسبة بسيطة يطلع ليهم حوالي 200 سنة في الخرطوم ..
وبكده بيكونوا أقدم من ناس كتاااااااااااار في خرطوم الفيل ....
...

Post: #57
Title: Re: رسالة الى كل الطفيلين الجو سكنو الخرطوم ....
Author: بدر الدين مهدي
Date: 02-10-2013, 02:32 PM
Parent: #56

ياخ الأرض لله ماحقت زول وبتموت ونصيبك منها شبر ومافي داعي للكلام الفارغ
فليسعد النطق إن لم يسعد الحال

Post: #58
Title: Re: رسالة الى كل الطفيلين الجو سكنو الخرطوم ....
Author: فايزودالقاضي
Date: 02-10-2013, 02:57 PM
Parent: #57

ياتوفيق رش الاجانب ديل ولا تغادر منهم حسكنيتا
اجانب ولاد لزينا آمنوا...
ماتخلى كوز ولا شيوعي ولا ختمي او انصار ..
الواحد جاى من الغرب والشمال والجنوب والوسط ودايرين تبقوا اسياد الخرطوم ؟
هي هاملة ولا هاملة ..

بقيتو زيكم زي الحبش في الخرطوم ياوضاحة وابوحسين

ــــــــــــــــــــــــــــــــــــــــــ
تحالف قوى الشرق مع الخرطوم الاصل

Post: #60
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-10-2013, 03:53 PM
Parent: #58

Quote: اسيادها الاصلين (ولو مجازا) بقينا ضيوف غير مرغوب فينا
===================================
هههههه
يازول رشهم ... يا أصلي أنت
الشفيع

تعرف يا الشفيع انو الفضلو من ناس الرطوم الزمان (الما من فقعة المرارة ما هاجر) اغلبهم فيهم جبن وعدم شد حيل
لو لقيت عشرة بس رجال زيك وزي اخونا ود القاضي ده

Quote: ياتوفيق رش الاجانب ديل ولا تغادر منهم حسكنيتا

والله البلد حا تتغير وحا يظهروا رجالها الاصليين
أسوأ صفة للانسان انه يكون ########

الخرطوم بمدنها الثلاثة كانت ليها مبادئ وقيم في التجارة وفي السياسة (ايام تلقى الاشقاء من بطن واحدة احدهما شيوعي والاخر اخو مسلم ولا يفترقاء في كل المناسبات والاماكن ايام كان الهم هو السودان وبس) وفي الرياضة (مش بتاعة جمال الوالي والبرير والمؤتمر الوطني ) وفي الحياة المجتمعية ...........

يا ناس الخرطوم الزمان ....
الهاجروا واللسة قاعدين عليكم الله ما فيكم راجل يشيل معاي حبة نرش الوهم ديل

Post: #59
Title: Re: رسالة الى كل الطفيلين الجو سكنو الخرطوم ....
Author: nazar hussien
Date: 02-10-2013, 02:57 PM
Parent: #57

جيب لينا بيبسي وإيسكريم في الضهاري...شوف كان ما رجعنا
اليوم قبل الغد...مسويين لبنكم الببيعوه ليكم الرجال دا!!!

ناس الضهاري اللبن بحلبوه من ضرع أمو شيييو شييييو..شيييو..حار
وانتو بجيبوه ليكم في خرج...ما معروف لبن حمير واللا لبن كلاب
(ناذر زاتو معاكم)...

كان ما ناس الضهاري ديل...يمين الجرجير دا فيه حاجة...ما كنت
بتشبع فيه شوف....

قدر فولكم الفي الشوارع...وحلل كوارعكم دي شادينها من
فول وكوارع الخرطوم؟؟؟

رغيفكم دا زارعين قمحو في الخرطوم؟؟؟

بناكم دا...ناولتو فيه مونة؟؟؟

أنا غايتو جابني البيبسي...مع إنو قبال أجي بي
شوية جابوه وصلوه لا عندنا....إلا ببيعوه لينا..
حار...النوع البمرق بي النخرة داك...لأنو ما عندنا
صبرا ببردوا...نتخاتفو...ستكت ستكت من صناديقو

Post: #111
Title: Re: رسالة الى كل الطفيلين الجو سكنو الخرطوم ....
Author: نافع الكوماوي
Date: 02-13-2013, 11:19 PM
Parent: #57

الزول دا أكيد مختل عقليا
شكلك الخرطوم دي ورثتها من حبوبتك صافيناز

Post: #62
Title: Re: رسالة الى كل الطفيلين الجو سكنو الخرطوم ....
Author: Omer Mustafa
Date: 02-10-2013, 04:35 PM
Parent: #1

Quote: شوفوا ياناس الضهاري ....
وياناس البدو والخلا الجيتو بقيتو لينا زي الحسكنة ...
ويا عروب وغروب وشروق (بالشدة) ...
ويا كل الوهم الملو لينا الفجة ...

قسما عظما يجي يوم نسلكم من خرطومنا دي سلة المسمار المصدئ من الخشب الناشف ...

ونرج كل رايح لي بلدو ...!

فكرة البوست كويسه لكن طرحك سمج كفكرك أنا ما عارف بكري بقي المعيار عندو شنوا في إختيار الكتاب !!!؟؟؟
يازول فتحت علي نفسك حمم جهنم ...
أولاً : إذا كنت مؤيد أو معارض للنظام فطريقتك غير مهذبة البته وغير ملائمة أبداً لطرح هذه المواضيع بهذه الركاكة و السطحية وو الخواء الفكري.
ثانياً: طريقة كتابتك تنم عن إنك إنسان غير مدرك لما تقول فأنت مبين عليك من إنتقاء كلماتك زول عنقالي سااااااااااااااااااي تود أن تلفت الإنتباه إليك بإي طريقة.
ثالثاً: مثلك يجب أن لا يكتب في منبر عام أو منبر خاص لعدم نموء وعيك وعقلك المريض.
رابعاً: أقترح أن يحزف هذا البوست من المنبر لعدم موضوعية صاحبة ولضعف طرحه.
خامساً:أذا لديك تصفية بعض الحسابات الشخصية لا تعمم ذلك في منبر عام خليك رجل شجاع ووأجه من تمغط بكل بسالة وشجاعة
سادساً: الهجرة دأخل الوطن ليست جريمة وليست شيء معيب ومنكر فهي تبادل مواقع الهجرة قديمة قدم التاريخ فنحن مجتمع مهاجر.
سابعاً:لقدأطلت الرد عليك ومن طرحك يبين إنني أهدر جزءاً غالي من وقتي لإنسان غير مؤهل للرد عليه علي الرغم بإنني أني عن الصراعات الإسفيرية ولا أود أن أجرح إنسان بنقدي .
ثامناً:إنسان الريف هجر قديماً إلي الريف بسبب المشاريع الكانت موجودة في كافة بقاع السودان وحدثت الهجرة العكسية بعد أن تم تدمير هذه المشاريع فكان إختيار بديل لأكتساب سبل العيش مثلاً يهاجر الناس للمشاريع المروية للزراعة و للمصانع في جميع أنحاء السودان و دور الخدمات كالسكة حديد و المواني .
تاسعاً:من أين أتي سكان الخرطوم مع العلم بإن في التاريخ الحديث بإن أخر عاصمة للسودان هي سنار ومن ثم تم نقها إلي مدينة ودمدني وأخيراً الخرطوم ممكن ترسل لي أصلك بوريك إنت نازح للخرطوم من وين ؟؟؟!!!
عاشراً:أستفد من وقتك وحاول القراءه و الإطلاع حتي تكتب مواضيع مفيده تثري القاري أو هذب نفسك حتي تستطيع أن تطرح طرحك بصوره موضوعية وحتي يكون مقبولاً.
أحدي عشر: أنت إحدي إفرازات العنصرية النتنه التي نهي عنها المصطفي صلي الله عليه وسلم والتي جادت لنا بها رياح المشروع الحضاري.
أثناء عشر: لأ أريد أن أزيدك فهذه جرعة كافية لك حتي تحاول أن لا تتطاول علي غيرك وتحترم نفسك بطرح الغبي وغير المنطقي وغير المقبول جملة وتفصيلاً.
أبو مصطفي
مهاجر من الخرطوم إلي الجزيرة سنة 1910م.
ومهاجر من الجزيرة إلي لخرطوم سنة 1998م.

التعديل :للصلاة علي النبي.

Post: #63
Title: Re: رسالة الى كل الطفيلين الجو سكنو الخرطوم ....
Author: ولياب
Date: 02-10-2013, 05:15 PM
Parent: #62

أرجو أن تكون مازحاً فيما تقول

يعني حركة عشان تفور دم البعض .

**********************************************************************

أما إذا كنت جاداً في طرحك ( أنت زول أناني وموغل في العنصرية ) .

*********************************************************************

Post: #65
Title: Re: رسالة الى كل الطفيلين الجو سكنو الخرطوم ....
Author: أسامه الكرور
Date: 02-10-2013, 06:42 PM
Parent: #63

انا غايتو جيت الخرطوم قريت . ووزعونى فيها ضد رغبتى .. وناس الإنقاذ رفتونى

إغتربت .. يعنى ما طفيلى حسب وصفك

لكن نصيحه ليك ... أمسك فى الوصيه دى

Quote: عاشراً:أستفد من وقتك وحاول القراءه و الإطلاع حتي تكتب مواضيع مفيده تثري القاري أو هذب نفسك حتي تستطيع أن تطرح طرحك بصوره موضوعية وحتي يكون مقبولاً

وبالمناسبه

وين جنابو عمر عثمان ؟؟

شايفو يتبسم ساااااى .. وما علق على الكلام دا .....

غايتو أولاد الخرتوم ؟؟ ؟؟؟؟ محن

Post: #66
Title: Re: رسالة الى كل الطفيلين الجو سكنو الخرطوم ....
Author: الجنيد حمد
Date: 02-10-2013, 07:15 PM
Parent: #65

Quote:
بقيتو لينا زي الحسكنة .....؟؟؟

ويا كل الوهم الملو لينا الفجة .؟؟؟؟؟

نسلكم من خرطومنا دي؟؟؟؟
كل رايح؟؟؟؟؟؟؟؟؟؟؟؟؟؟
الوهم ديل؟؟؟؟ .
(لانهم اليوم يملكون مالنا وسلطتنا ... وشوارعنا )؟؟؟؟؟؟؟؟؟؟؟؟؟
(حليل السوق الافرنجي الكان الدخول له الا بالملابس الرسمية)؟؟؟؟؟؟؟؟؟؟؟؟؟
شيئ طبيعي ان ياتي تشادي ولا كمروني ولا من النيجر ويمتلك صف دكاكين في سوق امدرمان ويعرس ملكة جمال المدينة؟؟؟؟؟؟
يا ناس جدادة الخلا الجات طردت جدادة البيت !!!!!!!!!!!!؟؟؟؟؟؟؟؟؟؟؟؟؟
شوفوا ليكم اي حتة اعملوها فيها؟؟؟؟ ؟؟؟؟؟؟؟؟؟؟؟
وشتتو وسيبو لينا البلد دي
بلا قرف ..؟؟؟؟؟؟؟؟؟؟؟؟؟؟؟؟؟؟؟؟؟؟
والله البلد حا تتغير وحا يظهروا رجالها الاصليين..............؟؟؟؟
ما فيكم راجل؟؟؟ يشيل معاي حبة نرش الوهم؟؟؟ ديل؟؟؟؟؟

تحية طيبة

قبيل قلنالك (العلوان بتاعك ده نردلك فيهو كيف )

وجبت خمجت خمجيك ده
دحين
يا زول انعدل وخليك في رايك ماف زول ساعلك تب

بس النبيذ ده ما كويس خالص وماهو بغلب زول والله

وفي الخلا الوهيط داك علمونا عشان عين نكرم مية عين

و

ربنا يهديك

Post: #67
Title: Re: رسالة الى كل الطفيلين الجو سكنو الخرطوم ....
Author: محمد عثمان الحاج
Date: 02-10-2013, 07:39 PM
Parent: #66

الموضوع بسيط يا توفيق!

سيب ليهم الخرطوم، وأمشي للحتات الخضراء الجميلة الرائعة اللي هم هجروها للخرطوم!
عندنا هنا أسياد البلد خلوا المدن الكبرى للمهاجرين وهربوا للمدن الصغيرة والضواحي، وأصبح قلب المدينة inner city يحتله المهمشون ينعمون بما فيه من تلوث وازدحام وفقر!

وأضرب ليك مثل واحد قريبي اتولد في فيلا في العمارات، هاجر لمنطقة نائية في السودان وهو في العشرينات من عمره وعمل ليهو مزرعة وجنينة ضخمة، والآن بعد أكثر من عشرين عاما من هجرته العكسية يعيش وسط كثرة من أبنائه وبناته سعيدا ثريا، ينتج جميع ما يحتاجه من طعام فاخر : خضروات ولحوم وألبان مجانية للعائلية وخضروات وفواكه يتم تصديرها للخرطوم!

الناس جات الخرطوم زمان عشان الكهرباء والتلفزيون، والآن هذه الأشياء يمكن توفيرها في تلك الأماكن النائية الجميلة، بعيدا عن زحمة الخرطوم وجوعها ومرضها وانهيارها الأخلاقي!

ياتوفيق أنا اندهشت قبل أيام عندما قرأت قصة عائلة روسية مسيحية هربت بدينها من الشيوعيين وسكنت في غابات سيبيريا وانعزلت عن العالم عشرات السنين أب وزوجته وأبناؤهما الثلاثة وبنتيهما. كانوا ينتجون طعامهم بنفسهم وعشاوا في صحة وعافية رغم ما مروا به من أحداث عجيبة، ولم يموت منهم أحد إلا بعد اتصالهم مرة أخرى بالعالم بسبب العدوى! فكر جديا في النجاة بنفسك من الخرطوم!

Post: #68
Title: Re: رسالة الى كل الطفيلين الجو سكنو الخرطوم ....
Author: مبارك محمداني
Date: 02-10-2013, 07:52 PM
Parent: #1

كلام يؤكد عدم معرفة استقراء حركة التاريخ ونم عن جهل بحقائق الأمور لشخص ينتابة شك في حقيقة أمره يبحث عن من يشاركة في هذا الرأي المقعد متناسي أن التاريخ ثابت وليس متحرك فالحقيقة تظل بكل رونقها لا يضار احد في رؤيتها كالشمس تماماً في رابعة النهار فلا عزر إلا للعمي الذي يري الأشياء بغير ما تبدو .

Post: #69
Title: Re: رسالة الى كل الطفيلين الجو سكنو الخرطوم ....
Author: النعمة عبدالرحمن
Date: 02-10-2013, 09:50 PM
Parent: #68

مرة تانية أعود وأقول لأخونا توفيق انه بالبحث فىي هذا المنير وجدت معلومات مهمه عن الخرطوم ولو قرايتا انا خايف تلقى روحك ما من أهل الخرطوم كما تظن وحادى اللنك تحت هنا للفايدة العامة. بعدين نسيت أقول ليك يا توفيق ذكرت إنو عندك حبوبتك إسمها صافيناز والإسم ده انا خايف إنو سيجعل الكثيرين يشككون فى إنك ما سودانى أصيل لأنو مثل هذه الاسماء لا وجود لها في السودان قبل الاحتلال التركى للسودان مما يوحى إنكم من المهاجرين الجدد لبلاد السودان، أها جداد البيت يبقى منو وجداد الخلا منو!!!؟.

للمهتمين بنشأة وتاريخ الخرطوم هذا الرابط:

الخرطوم .. نشأتها و تاريخها ... للتوثيق

Post: #70
Title: Re: رسالة الى كل الطفيلين الجو سكنو الخرطوم ....
Author: المسافر
Date: 02-11-2013, 06:22 AM
Parent: #69

وأنا أقول ياربي المرحوم عيسى ود المكي سمى ولدو توفيق ليه؟؟؟؟؟

تاريهو الحاجة صافيناز شغالة حكي عن جدها الباشا وقصوره

جدها ده كان اسمو توفيق برضو؟؟

Post: #72
Title: Re: رسالة الى كل الطفيلين الجو سكنو الخرطوم ....
Author: ABUHUSSEIN
Date: 02-11-2013, 11:14 AM
Parent: #70

Quote: الفضلو من ناس الرطوم الزمان (الما من فقعة المرارة ما هاجر) اغلبهم فيهم جبن وعدم شد حيل
لو لقيت عشرة بس رجال زيك وزي اخونا ود القاضي ده

يعني نبذت الطفيليين الجو سكنو الخرطوم و زدت عليهم ناس الخرطوم الأصليين الباقي منو طيب

باقي أولاد صافنياز البتنادوها صفيه بس ....

إنت زول مريض و جاهل و حاقد قوم لف إنت و كل أولاد و بنات صافيناز البتنادوها صفية بتاعتكم دي

Post: #73
Title: Re: رسالة الى كل الطفيلين الجو سكنو الخرطوم ....
Author: فايزودالقاضي
Date: 02-11-2013, 11:37 AM
Parent: #72

Quote: تعرف يا الشفيع انو الفضلو من ناس الرطوم الزمان (الما من فقعة المرارة ما هاجر) اغلبهم فيهم جبن وعدم شد حيل
لو لقيت عشرة بس رجال زيك وزي اخونا ود القاضي ده

يازول الطفيلين الوهم ديل مامحتاجين غيرك وغيري ومعانا الشفيع بس ..
انا كزول شرقاوى يعرف الاصول والاصليين اتضامن مع ناس الخرطوم الاصليين الزيك وضد الصور واقنعة الضهاري ..
Quote: ما فيكم راجل يشيل معاي حبة نرش الوهم ديل

انت شيل ونحن نرش ..وراك رجالة احفاد عثمان دقنة شركاء اجدادك في تحرير الخرطوم ومعا سنحررها من الضهاريين ..

ابوحسين عامل لي فيها بتاع وانت اكبر بتاع ضهاري ؟!!!!

Post: #75
Title: Re: رسالة الى كل الطفيلين الجو سكنو الخرطوم ....
Author: تيسير عووضة
Date: 02-11-2013, 11:53 AM
Parent: #73

Quote: حبوبتي صافيناز (بتذكرها كانت بتحكي لينا كتير وكنا بنناديها باسم صفية) ابوها قصر من قصوره الان وزارة المالية الاتحادية او وزارة الاعلام

هوي ها ..

يا طفيليين يا مسامير مصدية إنتو

أي زول حبوبتو ما اسمها صافيناز أو أقلو (هبة/ نانسي) ما يجينا حايم بي جاي ..

Post: #74
Title: Re: رسالة الى كل الطفيلين الجو سكنو الخرطوم ....
Author: ناصر احمد الامين
Date: 02-11-2013, 11:50 AM
Parent: #72

Quote: يعود تاريخ الخرطوم كمستوطنة بشرية إلى عصور سحيقة حيث أكدت المستحثات على أن الإنسان قد استوطن في موقع الخرطوم الحالي منذ سنة 400 قبل الميلاد، وتم العثور على أدوات تعود إلى العصر الحجري في منطقة خور أبو عنجة في مدينة أم درمان الحالية، إضافة إلى بقايا أثرية لمستوطنات يرجع تاريخها إلى عهد مملكتي نبتة ومروي في الفترة من 750 قبل الميلاد إلى 350 بعد الميلاد.[2] [3] وتقول مصادر أخرى ترجع في تاريخها إلى القرن السادس عشر الميلادي بأن المكان الذي تقوم عليه الآن الخرطوم كان عبارة عن أحراش وغابات، وكان يبعد عن مدينة سوبا عاصمة مملكة علوة، إحدى الممالك المسيحية القديمة في السودان، حوالي 15 ميلاً. وفي القرن السادس عشر قام سكان جزيرة توتي التي تقع في مجري نهر النيل المقابل للمكان - وكانوا ينتمون إلى قبيلة (المحس) النوبية - بزراعة المكان، قبل أن يقيم فيه أحد فقهائهم ويدعى الشيخ أرباب العقائد مدرسة لتعليم القرآن ويتحول تدريجياً إلى منطقة سكنية.[3][4][5][6]
المصدر الموسوعة العالمية

و طبعا سكان توتي (ينتمون الي قبيلة المحس) جاءوا من جزيرة بدين في شمال السودان عبر النهر و استقروا في توتي لانه تشبه الي حد كبير جزيرتهم الاصلية
و أقام فيها الشيخ ادريس ود الارباب و اصبحت المنطقة مأهولة بالسكان تدريجيا.

الخرطوم بي تاريخها و ناسها الاسسوها
زيها و زي امدرمان و اهلها و اصلها و فصلها.
و كل المدن دي هي لي كل السودانيين بالتأكيد

لكين ممكن اخونا توفيق اراد ان يبكي علي الماضي اللي راح و ايام زمان
لما كانت الخرطوم جنه بالفعل و واحة للراحة و الطمأنينة
خرطوم السوق الافرنجي و محلات شاشاتي و وكالة سنجر و محلات عم تادروس بتاع الكلف المجاورة
و فندق الشرق و القرين فيليدج و لوكوندات شارع الجمهورية و كازينو النيل الازرق و الملاهي و حديقة الحيوان
الهابي لاند و نادي ناصر الثقافي و المجمع الماسوني و نافورة القصر الجمهوري بابا كوستا و البان كافور البتوزعها العربات علي كل البيوت
و سباق الخيل ايام عزو و نادي التنس لما كان في تنس ............................. الخ الخ الخ
صراحة الحاجات دي ما بعرفوها الناس الاستقرت في الخرطوم حديثا.

كنت اتمني ان يكون الحديث عن هذه الاشياء مباشرة يا اخ توفيق دون التعرض للوافدين علي الخرطوم
فمن حق اي انسان سوداني ان يعيش في اي بقعة ملائمة له مما تبقي من وطن.

Post: #76
Title: Re: رسالة الى كل الطفيلين الجو سكنو الخرطوم ....
Author: نادر النور آدم
Date: 02-11-2013, 12:19 PM
Parent: #74

توفيق عيسى مكي حاقد على كل شيء بسبب ضياع استثماراته في السودان .. فأوجدوا لأخيكم العذر

Post: #77
Title: Re: رسالة الى كل الطفيلين الجو سكنو الخرطوم ....
Author: عثمان رضوان
Date: 02-11-2013, 12:53 PM
Parent: #76

Quote: حبوبتي صافيناز (بتذكرها كانت بتحكي لينا كتير وكنا بنناديها باسم صفية) ابوها قصر من قصوره الان وزارة المالية الاتحادية او وزارة الاعلام

مهم جداً توضح لينا قصر ( أبو حبوبتك ) ياتو واحد فيهم.. وزارة المالية ولا وزارة الإعلام؟؟ بتفرق كتير.

وياريت تورينا ( القصر الجمهوري ) كان قصر أبو منو في حبوباتك؟؟؟

Post: #78
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-11-2013, 01:13 PM
Parent: #77

Quote:
لما كانت الخرطوم جنه بالفعل و واحة للراحة و الطمأنينة
خرطوم السوق الافرنجي و محلات شاشاتي و وكالة سنجر و محلات عم تادروس بتاع الكلف المجاورة
و فندق الشرق و القرين فيليدج و لوكوندات شارع الجمهورية و كازينو النيل الازرق و الملاهي و حديقة الحيوان
الهابي لاند و نادي ناصر الثقافي و المجمع الماسوني و نافورة القصر الجمهوري بابا كوستا و البان كافور البتوزعها العربات علي كل البيوت
و سباق الخيل ايام عزو و نادي التنس لما كان في تنس ............................. الخ الخ الخ
صراحة الحاجات دي ما بعرفوها الناس الاستقرت في الخرطوم حديثا.

شكرا اخي ناصر احمد الامين ...

قرأت ماخلتك ففاضت اعيني بالدمع ...
وازددت بك ثقة ....

Post: #79
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-11-2013, 01:38 PM
Parent: #78

شكرا اخي محمد عثمان الحاج
اخجل ان لا ارد عليك

Post: #81
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-11-2013, 01:45 PM
Parent: #79

وايضا شكرا اخي النعمة للنك عن تاريخ الخرطوم وربنا يزيد من امثالك ....

فمرحبا بك بيننا (تخيلوا دي مشاركته السادسة فقط)

Post: #80
Title: Re: رسالة الى كل الطفيلين الجو سكنو الخرطوم ....
Author: ناصر احمد الامين
Date: 02-11-2013, 01:44 PM
Parent: #78

Quote: كانت خرطوم الستينات والسبعينيات زينة المدائن .. جميله ونظيفه تسر الناظرين .. كان سكانها محدودين وحدودها معروفه والجمال يمتد حتى لاسماء الاحياء.... العمارات وحى الزهور وحى الصحافه... ولم تكن هناك احياء مثل حكومه دقست وقانون مافى.... وكان سكان كل حى يعرفون بعضهم بل وحتى سكان الاحياء المجاوره وبالرغم من انهم من قبائل مختلفه فقد صهرتهم الخرطوم واصبحوا كاسره واحده متعاضده متكاتفه لها كبارها ومضحكيها وحتى صعاليقها ........ المواصلات متوفره والشوارع معبده والمواطنيين يحبون ويتعاطفون مع بعضهم البعض والسواقه كانت ذوق. كان التعليم الحكومى هو الاصل والفصول غير مزدحمه والتعليم مجانى والمعلم مؤهل ومؤتمن ويؤدى واجبه بالتزام وكنا لانعرف الدروس الخصوصيه وكانت درة التعليم وسنامه الجميله ومستحيله جامعة الخرطوم والتى يدخلها الطالب بالبوكسنق ولايدخلها لانه دباب فرقع دبابه (حسب افادات مدير الجامعه الاخيره) ولم تكن الجامعه مؤسسه تعليميه فقط وانما كانت مناره ثقافيه كانت الندوات الادبيه تعقد فى منتديات العاصمه. كانت الخرطوم تعمل نهارا وبجد ونزاهه وتسهر ليلا على انغام مصطفى سيد احمد ووردى وكابلى مع البنت الحديقه والحنينه السكره وياهاجر وكانت حدائق الخرطوم تتفتح فيها الازاهر وتفوح منها العطور وهى تحتضن قصص الحب البرىء لاتكدرها شرطه شعبيه او مجتمعيه او نظام عام فقد كانت الخرطوم آمنه ونظامها محفوظ قبل هذه المسميات... فالخرطوم كانت تبارك كل الاديان الاسلام والمسيحيه واليهوديه وحتى المجوسى يمارس طقوسه فى حريه ........ والخرطوم كما احتضنت كل الاديان كانت تحتضن وفى حنان كل الاجناس الامريكى والاوربى والاسيوى والافريقى يتمازجون فى مؤسساتها العلميه وفى اسواقها ويسهرون سويا فى النادى اليونانى والالمانى والامريكى والهندى وكانت صالة غردون جى.ام.اتش.. تستقبل اعرق فرق الموسيقى الاوربيه لتنشر الطرب الراقى فى اجواء الخرطوم والخرطوم استضاف مسرحها القومى فهد بلان وطربت بغناء مريم ماكيبا و الست ام كلثوم وفى قاعة الصداقه سعدت الخرطوم بنزار قبانى وعبد الرحمن الابنودى. اما خرطوم اليوم خرطوم الانقاذ فهى خرطوم اخرى خرطوم مشوهه ...خرطوم مسخ ...خرطوم شيطانيه .... ترتدى لبوس الرهبان وتفعل افعال الشياطين ...... خرطوم كسيحه متسخه تمتلى شوارعها بالعربات وحوادثها نهارا وبالرعب ليلا .
لقد افتقدنا الخرطوم الجميله الرائعه الشجاعه التى كانت تخيف الحكام ونحن نعيش اليوم فى خرطوم تنام مبكرا خائفه مرتجفه من كلاب مفترسه ومن عاشه ام ضنب !!

محمد الحسن محمد عثمان
قاضي سابق

يا شباب هدو اللعب ... مولانا محمد الحسن عثمان (مثلا)عندو نفس وجهة نظر اخونا توفيق (كما كتب اعلاه) .. بس مولانا كتب الموضوع صاح و توفيق لم يحالفه التوفيق في كتابة الموضوع

Post: #82
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-11-2013, 01:50 PM
Parent: #80

Quote: طيّب يا توفيق لو ده مستوى تفكيرك وطرحك، حا تطبف فكرة تنظيم الرايات الأربع كيف؟؟؟
أتمنى أن يتسع وقت سيادتكم للرد على هذا السؤال....

اخي نصر الدين البشير حول سؤالك لامير راية الطمئنينة انتظر الرد ...

Post: #83
Title: Re: رسالة الى كل الطفيلين الجو سكنو الخرطوم ....
Author: بدرالدين الطائف
Date: 02-11-2013, 01:58 PM
Parent: #82

Quote:
تعرف يا الشفيع انو الفضلو من ناس الرطوم الزمان (الما من فقعة المرارة ما هاجر) اغلبهم فيهم جبن وعدم شد حيل
لو لقيت عشرة بس رجال زيك وزي اخونا ود القاضي ده

والله البلد حا تتغير وحا يظهروا رجالها الاصليين
أسوأ صفة للانسان انه يكون ########

يا ناس الخرطوم الزمان ....
الهاجروا واللسة قاعدين عليكم الله ما فيكم راجل يشيل معاي حبة نرش الوهم ديل

توفيق .......... سيد الخرطوم.
غايتو ريحته الخضر والى الخرطوم فى حنانو.
...........................
نوم بدرى واتغطى كويس.

Post: #84
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-11-2013, 01:58 PM
Parent: #82

Quote: ود الشيخ ما طيبه الليلة ولا الحاصل شنو ؟؟؟؟

اخي عمار ...

انت اصلي ولا تقليد ..؟؟
وأظنك زول شاطر ما بليد ..؟؟
فهمت ..!!!!
ولا فهمك بعيد ..؟؟

Post: #85
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-11-2013, 02:07 PM
Parent: #84

Quote: هل فى طفيلى وانتهازى اكثر من المدعو توفيق فى السودان

يا ناصر المحسي انا محسي زيك (توفيق مكي بن الامير عثمان ازرق) مالك قارش ملحتي ياخ ..؟؟
كل القبايل بتناصر ناسها ....!!
الا انت ...
شيئ عجيب والله ..!!

Post: #86
Title: Re: رسالة الى كل الطفيلين الجو سكنو الخرطوم ....
Author: nazar hussien
Date: 02-11-2013, 02:24 PM
Parent: #85

Quote: يا ناصر المحسي انا محسي زيك (توفيق مكي بن الامير عثمان ازرق)
مالك قارش ملحتي ياخ ..؟؟
كل القبايل بتناصر ناسها ....!!

والله من جبت سيرة حبوبتك صافيناز أنا قلت الزول دا يكون جدو عثمان بك باشا
وليه حق ...في الزمن دا يجيب جدودو راجعين
ويجردو حملتهم ...تاني لغلق الخرطوم طلعت محسي زي أهلنا واحد وعايز تحمينا الخرطوم؟؟

Post: #87
Title: Re: رسالة الى كل الطفيلين الجو سكنو الخرطوم ....
Author: صديق الموج
Date: 02-11-2013, 02:30 PM
Parent: #82

معاً نحو عاصمة نظيفة من عوووك وهنووووك وبتراعى لى مالك ومندلى و دبنات تشيف
نحو عاصمة خالية ود شيقوق وتراجى مصطفى وخالد كودى واحمد الشايقى واسامة الكرور وفائز القاضى..
رشهم رشاهم البلاء ناس الدلقان والقطران ديل
اى زول ما نام بى بجامة وهو صغير، يشتت..
اى واحد ما قرأ روضة ولبس مريول وقرأ فى الخلوة ام قصداً كوز بليله بى عراقى ، يفرتق..
اى زول ما كان عنده زمزمية بمشى بيها المدرسة و كان بشرب على طريقة حلوقكم وكراع ابوك فى الجنة ،يختانا..
اى زول ماما ما ودته للتطعيم وعنده قروحه فى يده الشمال زى الطابعه، ما معانا..
اى زول ما اشتروا ليه شنظة جلد وقرأ بى خرتاية ، يشوف ليه حتة..
اى زول البيبسى فى حلتهم ببيعوهو من الرف زى حجار البطارية و كان بجيبوهو للقبضة فقط، يطلع جبلو..
اى زول ما اكل باسطرمة ومارتديلا واستكاوزا وبتزا وايسكريم من عمر اربعة سنوات، باى باى..
اى زول المنبه حقو عتود ينطط فيه من الصباح يصحيه من النوم، يتوكل..
اى زول كان بستحم من العيد للعيد بس ويصرخ من الحمام زى الوقع فى منقد، يلز.. .
انا غايظنى ود الباوقة و ود البوش اول مره يكون عندهم بيوت بى نمرة
لووووووووووووووووووووووووووووووووووووووووووووووووووووووووول

تجمع ابناء امدرمان بالبورد

Post: #88
Title: Re: رسالة الى كل الطفيلين الجو سكنو الخرطوم ....
Author: Mohammed Ahmed Saeed
Date: 02-11-2013, 03:17 PM
Parent: #87

معاً نحو عاصمة نظيفة من عوووك وهنووووك وبتراعى لى مالك ومندلى و دبنات تشيف
نحو عاصمة خالية ود شيقوق وتراجى مصطفى وخالد كودى واحمد الشايقى واسامة الكرور وفائز القاضى..
رشهم رشاهم البلاء ناس الدلقان والقطران ديل
اى زول ما نام بى بجامة وهو صغير، يشتت..
اى واحد ما قرأ روضة ولبس مريول وقرأ فى الخلوة ام قصداً كوز بليله بى عراقى ، يفرتق..
اى زول ما كان عنده زمزمية بمشى بيها المدرسة و كان بشرب على طريقة حلوقكم وكراع ابوك فى الجنة ،يختانا..
اى زول ماما ما ودته للتطعيم وعنده قروحه فى يده الشمال زى الطابعه، ما معانا..
اى زول ما اشتروا ليه شنظة جلد وقرأ بى خرتاية ، يشوف ليه حتة..
اى زول البيبسى فى حلتهم ببيعوهو من الرف زى حجار البطارية و كان بجيبوهو للقبضة فقط، يطلع جبلو..
اى زول ما اكل باسطرمة ومارتديلا واستكاوزا وبتزا وايسكريم من عمر اربعة سنوات، باى باى..
اى زول المنبه حقو عتود ينطط فيه من الصباح يصحيه من النوم، يتوكل..
اى زول كان بستحم من العيد للعيد بس ويصرخ من الحمام زى الوقع فى منقد، يلز.. .

واللة واللة كلامك دا يتنفذ تنفيذ حرفى امدرمان ما بفضل فيها الا قبة المهدى والخرطوم الا بيوتها وبحرى الا النقل النهرى قال بيتزا واستكوزا .قال
يازول انت زول فصيح وانا مابقدر عليك لكن ياود امدرمان العتودالبصحى الناس من النوم دا شفتو وين .
واستكاوزا دى واللة معظم ناس الخرطوم الاصليين ماشافوهالحدى الان . انت ياخوى ماك جعلى وارد ارياف شندى التركى ولا المتورك

Post: #89
Title: Re: رسالة الى كل الطفيلين الجو سكنو الخرطوم ....
Author: Hatim Alhwary
Date: 02-11-2013, 03:21 PM
Parent: #87

Post: #90
Title: Re: رسالة الى كل الطفيلين الجو سكنو الخرطوم ....
Author: امجد الجميعابى
Date: 02-11-2013, 04:02 PM
Parent: #89

Quote: الأمير عثمان أزرق [1845م-1898م] البديري وقيل [دنقلاوي محسي]... ولد بالقطينة وحفظ القرآن الكريم ودرس مبادئ العلوم الدينية.. ثم عمل هجاناً لنقل البوستة الأميرية بين الخرطوم وكردفان ودارفور في عهد التركية.

Post: #91
Title: Re: رسالة الى كل الطفيلين الجو سكنو الخرطوم ....
Author: صديق الموج
Date: 02-11-2013, 05:00 PM
Parent: #90

Quote: واللة واللة كلامك دا يتنفذ تنفيذ حرفى امدرمان ما بفضل فيها الا قبة المهدى والخرطوم الا بيوتها وبحرى الا النقل النهرى قال بيتزا واستكوزا .قال
يازول انت زول فصيح وانا مابقدر عليك لكن ياود امدرمان العتودالبصحى الناس من النوم دا شفتو وين .
واستكاوزا دى واللة معظم ناس الخرطوم الاصليين ماشافوهالحدى الان . انت ياخوى ماك جعلى وارد ارياف شندى التركى ولا المتورك

رش الحاقد ده يا ود الخرطوم الاصلى
النوع البقول ليك اشتريت القميص من جروبى !!
لووووووووووووووول،،،

Post: #92
Title: Re: رسالة الى كل الطفيلين الجو سكنو الخرطوم ....
Author: الشيخ أبوجديري
Date: 02-12-2013, 01:15 AM
Parent: #87

Quote:
معاً نحو عاصمة نظيفة من عوووك وهنووووك وبتراعى لى مالك ومندلى و دبنات تشيف
نحو عاصمة خالية ود شيقوق وتراجى مصطفى وخالد كودى واحمد الشايقى واسامة الكرور وفائز القاضى..
رشهم رشاهم البلاء ناس الدلقان والقطران ديل
اى زول ما نام بى بجامة وهو صغير، يشتت..
اى واحد ما قرأ روضة ولبس مريول وقرأ فى الخلوة ام قصداً كوز بليله بى عراقى ، يفرتق..
اى زول ما كان عنده زمزمية بمشى بيها المدرسة و كان بشرب على طريقة حلوقكم وكراع ابوك فى الجنة ،يختانا..
اى زول ماما ما ودته للتطعيم وعنده قروحه فى يده الشمال زى الطابعه، ما معانا..
اى زول ما اشتروا ليه شنظة جلد وقرأ بى خرتاية ، يشوف ليه حتة..
اى زول البيبسى فى حلتهم ببيعوهو من الرف زى حجار البطارية و كان بجيبوهو للقبضة فقط، يطلع جبلو..
اى زول ما اكل باسطرمة ومارتديلا واستكاوزا وبتزا وايسكريم من عمر اربعة سنوات، باى باى..
اى زول المنبه حقو عتود ينطط فيه من الصباح يصحيه من النوم، يتوكل..
اى زول كان بستحم من العيد للعيد بس ويصرخ من الحمام زى الوقع فى منقد، يلز.. .معاً نحو عاصمة نظيفة من عوووك وهنووووك وبتراعى لى مالك ومندلى و دبنات تشيف
نحو عاصمة خالية ود شيقوق وتراجى مصطفى وخالد كودى واحمد الشايقى واسامة الكرور وفائز القاضى..
رشهم رشاهم البلاء ناس الدلقان والقطران ديل
اى زول ما نام بى بجامة وهو صغير، يشتت..
اى واحد ما قرأ روضة ولبس مريول وقرأ فى الخلوة ام قصداً كوز بليله بى عراقى ، يفرتق..
اى زول ما كان عنده زمزمية بمشى بيها المدرسة و كان بشرب على طريقة حلوقكم وكراع ابوك فى الجنة ،يختانا..
اى زول ماما ما ودته للتطعيم وعنده قروحه فى يده الشمال زى الطابعه، ما معانا..
اى زول ما اشتروا ليه شنظة جلد وقرأ بى خرتاية ، يشوف ليه حتة..
اى زول البيبسى فى حلتهم ببيعوهو من الرف زى حجار البطارية و كان بجيبوهو للقبضة فقط، يطلع جبلو..
اى زول ما اكل باسطرمة ومارتديلا واستكاوزا وبتزا وايسكريم من عمر اربعة سنوات، باى باى..
اى زول المنبه حقو عتود ينطط فيه من الصباح يصحيه من النوم، يتوكل..
اى زول كان بستحم من العيد للعيد بس ويصرخ من الحمام زى الوقع فى منقد، يلز.. .
انا غايظنى ود الباوقة و ود البوش اول مره يكون عندهم بيوت بى نمرة
لووووووووووووووووووووووووووووووووووووووووووووووووووووووووول

تجمع ابناء امدرمان بالبورد
ههههههههههه سلام ياعم

Post: #93
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-12-2013, 01:22 PM
Parent: #92

الحبيب صديق الموج ...

يكفي ان تكون من امدرما....
من غير من تكملها لتنال حب جميع ناسنا الاصليين الزيك ...

طالما انا اقدر ان اكتب (ان لم تتدخل جهات بعينها لتمنعني ولن تقدر) ....

حا أكنس ليك ال###### من كل الشوارع والبيوت ..
لترجع لينا مدينتنا جميلة زي اول

Post: #94
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-12-2013, 02:45 PM
Parent: #93

اخي امجد الجميعابي ...
هذا التعريف من كتاب عصمت حسن زلفو عن الامير عثمان ازرق (ما ذكرته انت)
يوجد كتاب قيم عن الامير عثمان ازرق تاليف بروفسير ابو سليم وفيه ستجد انه قد جاء اهله من اكد طالبين ثأر لهم فاستقروا اولا بامدرمان (هذا قبل المهدية بزمن طويل) وتضارت ولادته ما بين الابيض وامدرمان والقطينة ولما اخذوا بثأرهم لم يرجعوا لموطنهم مرة اخرى فبقي بعض منهم بامدرمان والابيض وفي الابيض تصاهروا منها واتصلوا بالسادة الاسماعيلية والقصة المشهورة اذ عندما كان الامير عثمان ازرق ملازما الشيخ المكي وقت حصار الخرطوم وهو نائم رأى رؤية اذ جاءه اناس بلباس ابيض ونصحوه بان يذهب للامام المهدي مبايعا ففجرا شاور شيخه ونصحه السيد المكي بالذهاب للمهدي (وكان قبلها يعمل هجانا بين الخرطوم والغرب وايضا بين السودان ومصر وقيل درس في الاذهر الشريف ) وكان من احب الامراء للمهدي والخليفة معا لشجاعته وجسارته ويكفي ما قاله تشيرشل عنه في كتاب حرب النهر الشهير واصفا اياه بالمقاتل الشرس وافرد له صفحات تحكي قصته

Post: #95
Title: Re: رسالة الى كل الطفيلين الجو سكنو الخرطوم ....
Author: فايزودالقاضي
Date: 02-12-2013, 03:01 PM
Parent: #94

فووووووووق من اجل كنس الاجانب المناكيد سكان الضهاري من خرطومنا ..

تحالف قوى البجا والخرطوميون الاصل

Post: #96
Title: Re: رسالة الى كل الطفيلين الجو سكنو الخرطوم ....
Author: ناصر المحسى
Date: 02-12-2013, 03:28 PM
Parent: #95

Quote:
فووووووووق من اجل كنس الاجانب المناكيد سكان الضهاري من خرطومنا ..

تحالف قوى البجا والخرطوميون الاصل

ود عمى انت طلعت اجنبى وتوفيق طلع سيد الخرطوم حتى اهلى فى توتى وبرى احتمال اجانب

Post: #97
Title: Re: رسالة الى كل الطفيلين الجو سكنو الخرطوم ....
Author: صديق الموج
Date: 02-12-2013, 04:34 PM
Parent: #96

Quote: فووووووووق من اجل كنس الاجانب المناكيد سكان الضهاري من خرطومنا ..

تحالف قوى البجا والخرطوميون الاصل

الحبشى بالله شيل ودكك و حقة تمباكك وعدة قهوتك وخلالك وخنجرك وشوتلاك
و سلاتك واختانا، نحن قادرين ننظف عاصمتنا منكم انت ومن لف لفك
رش رشك يا توفيق لوووووووووووووووووووووووووووووووووووووووووووول،،،

Post: #100
Title: Re: رسالة الى كل الطفيلين الجو سكنو الخرطوم ....
Author: ناصر احمد الامين
Date: 02-13-2013, 07:45 AM
Parent: #97

Quote: الحبشى بالله شيل ودكك و حقة تمباكك وعدة قهوتك وخلالك وخنجرك وشوتلاك
و سلاتك واختانا، نحن قادرين ننظف عاصمتنا منكم انت ومن لف لفك
رش رشك يا توفيق لوووووووووووووووووووووووووووووووووووووووووووول،،،

ههههههههههههههه
أردم
أردم
يا توفيق

Post: #98
Title: Re: رسالة الى كل الطفيلين الجو سكنو الخرطوم ....
Author: طلحة عبدالله
Date: 02-12-2013, 04:36 PM
Parent: #96

كمحسي أصيل حفيد الشيخ أرباب العقائد والحاجة وقومة أرحب بجميع أخواني السودانيين في خرطومنا
ولهم يعتبروها بيتم عديل كدا ويعملوا العايزنو وتوفيق عيسي لا يمثلني .. بخ لبخ طرخ .. انتهى.

طلحة عبدالله حفيد أرباب العقائد مؤسس الخرتوم .

Post: #99
Title: Re: رسالة الى كل الطفيلين الجو سكنو الخرطوم ....
Author: saidahmed shami
Date: 02-13-2013, 07:23 AM
Parent: #98

يا زول خرطومك بخيته وسعيده عليك
عودنا فيها عود مره

Post: #101
Title: Re: رسالة الى كل الطفيلين الجو سكنو الخرطوم ....
Author: المسافر
Date: 02-13-2013, 07:54 AM
Parent: #99

Quote:

قد جاء اهله من اكد

أكد ولا العكد

بالك نطلع قرايب

يلا علينا جاي يا عكادة

Post: #102
Title: Re: رسالة الى كل الطفيلين الجو سكنو الخرطوم ....
Author: nazar hussien
Date: 02-13-2013, 08:02 AM
Parent: #99

يعني هي بالاقدمية ؟؟؟
الجد جدو من الخرطوم خرطومي
والباقين طفيليين؟؟؟

طيب ينوبكم ثواب يا ود الموج ( يا ملك الضهاري) ويا توفيق باشا
تعملوا لينا شخيط...تاريخي...تقولوا لينا آخر تاريخ كانت
الخرطوم لأرباب عقائدها ناس طلحة ديل متين؟؟؟

السؤال دا لا الفائده العامة أنا شخصيا ما بستفيد
منو لو عملتو الشخيط دا سنة 1990
لأني الزمن داك سارح بي غنمي في ود السواد وجدودي معاي.

Post: #103
Title: Re: رسالة الى كل الطفيلين الجو سكنو الخرطوم ....
Author: Hani Arabi Mohamed
Date: 02-13-2013, 10:01 AM
Parent: #102

قبل 350 سنة من الآن كان سكان الخرطوم هم:

1) عزّت باشا الدوغري
2) مهيتاب فيّاض الأحمر.
2) ميرفت عزّت الدوغري
3) فاروق عزّت الدوغري
4) نيفين عزت الدوغري
5) مَلَك عزت الدوغري
6) مؤيّد عزّت الدوغري
7) كريم عزّت الدوغري
8) فوقية عزّت الدوغري

-=-=-=-

من لم يمتد نسبه إلى السابقة أسماؤهم أعلاه فهو غريب ابن غريبة

Post: #104
Title: Re: رسالة الى كل الطفيلين الجو سكنو الخرطوم ....
Author: حاتم محمد حاج المهدي
Date: 02-13-2013, 10:33 AM
Parent: #103

سلامات ياهاني

لستتك دي فيها سبعة أتراك وواحد هندي.

توفيق زاتو شكلو من ناس الضهاري لأنو صافيناز وعثمان ود أزرق ما مكتوبين في اللستة..

أها يا توفيق جاتك تاره

Post: #105
Title: Re: رسالة الى كل الطفيلين الجو سكنو الخرطوم ....
Author: ناصر المحسى
Date: 02-13-2013, 02:09 PM
Parent: #104

بس بالله من تقول صافيناز حفيدة محمد على باشا

Post: #106
Title: Re: رسالة الى كل الطفيلين الجو سكنو الخرطوم ....
Author: Osman Dongos
Date: 02-13-2013, 07:12 PM
Parent: #105

الاخ توفيق والمتداخلون الكرام،
السلام عليكم،

كنت اظن في البداية انك تمزح، ولكن يبدو انك في غاية الجدِّية في كلامك. فبالاضافة على ما ذكر الاخوة اعلاه فأسمع الاتي من واحد زول ضهاري حسب فهمك:

هذا النوع من التفكير الصفوي الاقصائي عندما يكون في موقع صنع القرار، يمكن ان يؤدي الى نتائج كارثية، والمثال على ذلك ما حدث في اوائل الثمانينات من القرن الماضي ايام الرئيس جعفرنميري، في ما عرف بحملات تفريغ العاصمة من الوافدين (الكشَّة) التي استهدفت شرائح وسحنات بعينها من المواطنين السودانيين للقبض عليهم وتركيزهم في معسكرات اشبه بزرائب البهائم تمهيداً لترحيلم الى ما يسمى باقاليمهم الاصلية. هل تدري ما المآسي التي نجمت عن ذلك. لقد قلبت حيوات أُسر كثيرة رأساًعلى عقب، وادت الى وفيات وتشريد اطفال ونساء وشيوع كانوا في انتظار رب اسرة ليأتي لهم بجرعة دواء او لقمة غذاء ولكنه لم يعد لانه تم القبض عليه وترحيله الى جهة قد لا يكون يعلم عنها شيئاً.

فلماذا تسمى الخرطوم بمدنها الثلاث بالعاصمة القومية اذا كان لها اسياد بعينهم دون غيرهم من اهل هذا السودان الواسع المتعدد الاعراق والثقافات؟.

فاذا كنت تتباكى على انعدام النظافة والترتيب والمظاهر الحضارية الاخري التي كانت متوافرة في الماضي، فذلك تقصير من السلطات البلدية التي عجزت عن سن القوانين وتفعيلها ووضع البرامج الكفيلة بتحديث وترقية المدينة. فهنالك مدن في العالم اضعاف مدينة الخرطوم من حيث الحجم وعدد السكان ولكنها نظيفة ومنظمة وبيئتها صحية.
اما اذا كنت تريد شرائح معينة من البشر ان يقطنوا الخرطوم والبقية تذهب الي الضهاري ليظلوا فلاحين ورعاة وخدم منازل لرفاهية صفوة الخرطوم، فردي عليك هو ان الخرطوم عاصمة لكل السودان ومن حق اي مواطن سوداني ان يعيش فيها اذا استطاع الى ذلك سبيلا، ويرتقي فيها الى اعلى المراتب حسب تأهيله وخبرته.

اخي الكريم تنقل الانسان من مكان الى آخر هو من سنن الله في الارض. فلولا ذلك لما عمرت الارض بالبشر الذين مهد منشأهم افريقيا.
فبالامس القريب، هنري كيسنجر اعظم وزير خاريجية مرَّ علي امريكا، جاء مهاجراً من المانيا وعمل في وظائف بسيطة اثناء دراستة وصار من صناع السياسة العالمية وله لكنة غليظة عندما يتحدث الانجليزية الى يومنا هذا. والآن الرئيس اُوباما، جاء والده من كينيا من قلب افريقيا كطالب دراسات عليا وعاد الى بلاده بعد اتمام دراسته، فترك ورائه ابنه باراك حسين اُباما الذي صار رئيساً لاقوي واغنى دولة في العالم. والامثلة كثيرة يضيق المكان لحصرها.

فيجب علينا ان نتخلص من تلك القوالب الديناصورية المتخلفة حتى نستطيع ان ننطلق ببلادنا الى آفاق اوسع وارحب.

لكم الود

عثمان دُنقس

Post: #107
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-13-2013, 07:50 PM
Parent: #106

Quote: كمحسي أصيل حفيد الشيخ أرباب العقائد والحاجة وقومة أرحب بجميع أخواني السودانيين في خرطومنا
ولهم يعتبروها بيتم عديل كدا ويعملوا العايزنو وتوفيق عيسي لا يمثلني .. بخ لبخ طرخ .. انتهى.

طلحة عبدالله حفيد أرباب العقائد مؤسس الخرتوم .

طلحة يا ود عبد الله وياااا ... ود ارباب العقائد ؟!! ...الصفة الخلتنا نحارب الوهم ديل انهم ناس فاسدين وافسدوا لينا بعض ضعاف النفوس من ناسنا الزمان ......
ناس خرطومنا الاصليين عمرهم ما كانوا فاسدين ومفسدين (ناس بهجات واشياء من دي)

اها بتدافع عنهم ساكت وبتتبرا مننا ...

اكيد رشوك ............... (وللرشوة عدة صور) .........
بس ...
ان شاء حاجة تتساهل
قال حفيد قال ... والله جدك لو سمع وقرا كلامك الماسخ ده .....
كان صحى من موته وقام اداك عشرة جلدات ...
عرفنا ورم ناس الضهاري المورمنو لينا ...
ناس الخرطوم ..... احسن ما نتمها عشان خاطر اهلك الحلوين والطيبين والفي الاصل بنحبهم ونحترمهم

Post: #108
Title: Re: رسالة الى كل الطفيلين الجو سكنو الخرطوم ....
Author: مازن الجمّال
Date: 02-13-2013, 07:57 PM
Parent: #107

Quote: 2) مهيتاب فيّاض الأحمر.

يا سلام .. دي حبوبتي ياخ

Post: #109
Title: Re: رسالة الى كل الطفيلين الجو سكنو الخرطوم ....
Author: سامى عبد المطلب
Date: 02-13-2013, 10:46 PM
Parent: #108

font face="Simplified Arabic" size="4" color=blue>
غايتو الحمد لله الما طلعنا طفيليين ..... عجبتنى لجنابو عمر وطارق جبرين اما ود الصائم فهو قطعاً شيخ الطفيليين ....!
يا ابو حسين ما تتضايق ياخى الزول ده قال ليكم طفيليين يعنى ما حاجه كعبه شديد، اتحملوهو زى ما اتحملكم ...!

العم صديق الموج ربنا يديك العافيه ....

Post: #110
Title: Re: رسالة الى كل الطفيلين الجو سكنو الخرطوم ....
Author: حاتم محمد حاج المهدي
Date: 02-13-2013, 10:59 PM
Parent: #108

Quote: Quote: 2) مهيتاب فيّاض الأحمر.

يا سلام .. دي حبوبتي ياخ

يعرفوك زول ضهاري كيف!

مهيتاب ده راجل ياللخو! قال حبوبتي :)

توفيق باشا ود صافيناز هانم أصلو ما خاتي عليكم :)

Post: #112
Title: Re: رسالة الى كل الطفيلين الجو سكنو الخرطوم ....
Author: Magdi Algorashi
Date: 02-14-2013, 00:24 AM
Parent: #110

Quote: معاً نحو عاصمة نظيفة من عوووك وهنووووك وبتراعى لى مالك ومندلى و دبنات تشيف
نحو عاصمة خالية ود شيقوق وتراجى مصطفى وخالد كودى واحمد الشايقى واسامة الكرور وفائز القاضى..
رشهم رشاهم البلاء ناس الدلقان والقطران ديل
اى زول ما نام بى بجامة وهو صغير، يشتت..
اى واحد ما قرأ روضة ولبس مريول وقرأ فى الخلوة ام قصداً كوز بليله بى عراقى ، يفرتق..
اى زول ما كان عنده زمزمية بمشى بيها المدرسة و كان بشرب على طريقة حلوقكم وكراع ابوك فى الجنة ،يختانا..
اى زول ماما ما ودته للتطعيم وعنده قروحه فى يده الشمال زى الطابعه، ما معانا..
اى زول ما اشتروا ليه شنظة جلد وقرأ بى خرتاية ، يشوف ليه حتة..
اى زول البيبسى فى حلتهم ببيعوهو من الرف زى حجار البطارية و كان بجيبوهو للقبضة فقط، يطلع جبلو..
اى زول ما اكل باسطرمة ومارتديلا واستكاوزا وبتزا وايسكريم من عمر اربعة سنوات، باى باى..
اى زول المنبه حقو عتود ينطط فيه من الصباح يصحيه من النوم، يتوكل..
اى زول كان بستحم من العيد للعيد بس ويصرخ من الحمام زى الوقع فى منقد، يلز.. .
انا غايظنى ود الباوقة و ود البوش اول مره يكون عندهم بيوت بى نمرة
لووووووووووووووووووووووووووووووووووووووووووووووووووووووووول

تجمع ابناء امدرمان بالبورد

ود الموج سلام

ياحليل الجيبي ورويال ورمونا والكت كات ودولي والواحة وفندق الشرق
واكروبول وسان جيمس وفكتوريا وغردون ميوزكس هول وفندق الزهرا واتني
والنادي البريطاني ونادي الاطباء ونادي الخطوط وعمك زكي بتاع ال#####ار
وتقطع الكبري للريفيرا والجندول وفندق السطح وبعدها تشرب عصير عنب #####
وتتعشي سمك وتغني كانت لنا ايام ########

ودا السودان البنعرفو

ولكم الود

Post: #113
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-14-2013, 03:18 PM
Parent: #112

الله يجيب الكشات تاني (ما يفهموني غلط ناس الضهاري يقومو يكشونا نحن اصحاب البلد لانهم اليوم مستولين على كل شيئ) ويرجوا الرايحين الوهم ديل لي خلاهم ومراعيهم وقطاطيهم ورواكيبهم وعشان ما يزعلو العمرانة والجميلة والهواءها الطلق الجميل بس انكشحو وسيبو لينا بلدنا الخرطوم دي ......

نكورك يعني ....

طلعتو زيتنا الله يطلع ...

قديتونا جد
كرهنا جد
عيد مايو اشرق من جديد
عيد مايو اشرق من جديد

######تو لينا الفجة يلا بلا لمة انكشحو

Post: #114
Title: Re: رسالة الى كل الطفيلين الجو سكنو الخرطوم ....
Author: Osman Dongos
Date: 02-14-2013, 04:41 PM
Parent: #113

الغريب في الامر ان شخص يتباكى على الرقي والحضارة المفقودة يتكلم بهذه الطريقة الغريبة التي هي ابعد ما تكون عن الحضارة والرقي، ويكيل السباب يمنة ويسرة لمواطنيين سودانيين لهم نفس الحق في عاصمة بلادهم كما له هو، ولا يطرف له جفن لما عاناه بعض مواطنيه جراء تنفيذ ذات السياسات التعسفية التي يدعو لها ويطالب بكل بجاحة بتكرارها.
يبدو ان المنطق والحوار الهادئ المهذب لا يجدي معك، فاتركك لمن يجاريك في اسلوبك وشتائمك.
ضع في بالك بانك سوف تكون اول ضحايا الكشة الجاية.

ابقى عافية.

عثمان دُنقس

Post: #115
Title: Re: رسالة الى كل الطفيلين الجو سكنو الخرطوم ....
Author: مازن الجمّال
Date: 02-14-2013, 08:15 PM
Parent: #110

Post: #116
Title: Re: رسالة الى كل الطفيلين الجو سكنو الخرطوم ....
Author: Kamal Elmahi
Date: 02-14-2013, 11:21 PM
Parent: #115

يا توفيق الفهم قسمة و نصيب
انت عشان زعلان من الانقاذ تكسب عداء اكتر من
تمانية مليون نسمة
و ياريتك تكون سيد الخرطوم
لان الخرطوم ما عندها سيد
ولو انتو اسياد الخرطوم صحيح قول لينا اى حاجة قديمة كدا
تكون باسم جدك
و الله نخت الانساب اسى نطلعك من
سكان ضهارى الضهارى

Post: #117
Title: Re: رسالة الى كل الطفيلين الجو سكنو الخرطوم ....
Author: عباس فوراوى
Date: 02-15-2013, 08:38 AM
Parent: #116

الأخ توفيق عيسى مكى
لك التحية ولكل الأخوة
ما أورده هذا التوفيق يحتاج منا جميعاً للتفكر بتؤدة ومعقولية ، فقد تحدث عن معضلة
حقيقية لا يعانى من سوءاتها سكان الخرطوم الأصليين وانما نعانى منها نحن أولاً
كمتطفلين على هذه المدينة التاريخية التى كانت مجرد زيارتها ورؤيتها حلماً يراودنا
وأملاً يداعب مشاعرنا القروية البريئة . كانت عرائسنا تُرَقَّص بفستان اسمه ( الخرطوم بالليل)
وجدلات ذهبية من ( أبومرين ) ولم نك نملك من حاجيات عرائسنا سوى ( الرحط ) المصنوع
من شرائح جلود التيوس . أتذكر أن أول مرة أرى فيها الخرتوم كان فى العام 1963م لاستخراج
شهادة التسنين للمدرسة وأتذكر الهيبة العظيمة والجمال الساحر لهذه المدينة والنظافة والأناقة التى
كانت تغطى سوحها مع جمال أهلها وأناقتهم وصحتهم . أتذكر بكل جلال بنطون شمبات الذى قطع بنا البحر
الى أب روف بأمدرمان قبل افتتاح كبرى شمبات . أنا الآن أسكن أم درمان منذ السبعينات ولم أشعر بأننى من سكان الخرطوم
ولولا أن القرار أصبح بيد غيرى لما بتُّ ليلةً واحدة بها لأسباب عديدة منها أن هذه ليست الخرطوم التى رأيناها قبل نصف قرن من الزمان
فقد اختلط الحابل بالنابل وأصبحت الخرطوم قبلة لبعض الناس بأحقادهم وسوءاتهم وتقاليدهم غير المهضومة مع نذر قليل من
المبدعين أو أهل الاضافات الايجابية . لقد آن الأوان الى أن نثوب الى رشدنا ونرجع الى أصولنا ومراتع صبانا ومساقط
رؤوسنا ونترك أهل الخرطوم ليعيشوا حياتهم الهانئة فكفانا تكديراً ونكداً لهؤلاء القوم الصابرين . ان المتعة الحقيقية - كما أرى -
هى ليست السكن فى الخرطوم ولكن المتعة الحقيقية هى أن تأتيها بين الفينة والفينة لتستمتع بها كعاصمة حضارية مشعة ومضيئة
بكل أسباب المتعة والاشعاع والجمال ثم ترجع الى ديارك الأصلية وبطاطيرك مشحونة بكل خير . لقد آن الأوان لنرجع كلنا
غافلين الى أقاليمنا مع الاعتذار الشديد لأهل الخرطوم لأن تطفلنا الذى أشار اليه صاحب البوست قد استشرى وخالط الدم واللحم
والعظم فقد تطفل بعضنا على مجتمعهم المعافى فأمطره من الجرائم الغريبة ما فاق مطر الممطرين ، وتطفل بعضنا على حدائقهم ومنتزهاتهم
فأحالوها الى معتركات للغزل الخشن غير المرشد ، وتطفل بعضنا على جمال عمرانهم فأحالوه الى مسخ مشوه بالسكن العشوائى .
أرجو أن لا ينبرى البعض ويتحدث عن أسباب سياسية أو اجتماعية أو اقتصادية أو تعليمية أو صحية لأن مسألة النزوح أو قل التطفل هذا
لا زالت مستمرة رغم الحكم الفدرالى ورغم هيمنة أبناء الولايات على حكم ولاياتهم ...للأسف حتى الدستوريون والحكام الحاكمون
والقادمون من الولايات سكنوا الخرطوم وتطاولوا فى البنيان ويمارسون السلطة داخل ولاياتهم !!! يبدو أن الناس كلهم قد أصيبوا
بمرض اسمه ( الخرطوم ) ...اللهم عافهم أو عاف أهل الخرطوم منهم بما فيهم الكاتب !!
نصيحتى الأخيرة لكل راغب فى النزوح أو التطفل للخرطوم أن يراعى أو يمارس فضيلة التطفل التدريجى أى أن تتطفل فى أقرب مدينة
لمسقط رأسك ومن ثم ممارسة التطفل باحكام مراعاة للمصلحة العامة وحتى يكون تطفلكم للعاصمة الخرطوم تطفلاً سلساً ومبلوعاً
والا تم تصنيفك -عزبزى المتطفل - مع المتطفلين باهمال أو أنك تمارس تطفلاً مخلوطاً بالحقد الأعمى ...لكم من الودُّ جلُّه .

.

Post: #118
Title: Re: رسالة الى كل الطفيلين الجو سكنو الخرطوم ....
Author: ناصر احمد الامين
Date: 02-15-2013, 10:37 AM
Parent: #117

Quote: الوهم ديل لي خلاهم ومراعيهم وقطاطيهم ورواكيبهم وعشان ما يزعلو العمرانة والجميلة والهواءها الطلق الجميل بس انكشحو وسيبو لينا بلدنا الخرطوم دي ......

با وهم ... عليكم الله اتخارجو لينا من هنا
كرهتونا زاتو !!!!
يا نا س الخرطوم .. الرجاء عدم استلام اي قزازة عسل
و خاصة من فايز ودالقاضي و صديق الموج
اما هاني عربي ده .... سلام الله ما تدوهو ليهو
لووووووووووول

Post: #119
Title: Re: رسالة الى كل الطفيلين الجو سكنو الخرطوم ....
Author: Salah Habib
Date: 02-15-2013, 12:15 PM
Parent: #118

Quote: معاً نحو عاصمة نظيفة من عوووك وهنووووك وبتراعى لى مالك ومندلى و دبنات تشيف
نحو عاصمة خالية ود شيقوق وتراجى مصطفى وخالد كودى واحمد الشايقى واسامة الكرور وفائز القاضى..
رشهم رشاهم البلاء ناس الدلقان والقطران ديل
اى زول ما نام بى بجامة وهو صغير، يشتت..
اى واحد ما قرأ روضة ولبس مريول وقرأ فى الخلوة ام قصداً كوز بليله بى عراقى ، يفرتق..
اى زول ما كان عنده زمزمية بمشى بيها المدرسة و كان بشرب على طريقة حلوقكم وكراع ابوك فى الجنة ،يختانا..
اى زول ماما ما ودته للتطعيم وعنده قروحه فى يده الشمال زى الطابعه، ما معانا..
اى زول ما اشتروا ليه شنظة جلد وقرأ بى خرتاية ، يشوف ليه حتة..
اى زول البيبسى فى حلتهم ببيعوهو من الرف زى حجار البطارية و كان بجيبوهو للقبضة فقط، يطلع جبلو..
اى زول ما اكل باسطرمة ومارتديلا واستكاوزا وبتزا وايسكريم من عمر اربعة سنوات، باى باى..
اى زول المنبه حقو عتود ينطط فيه من الصباح يصحيه من النوم، يتوكل..
اى زول كان بستحم من العيد للعيد بس ويصرخ من الحمام زى الوقع فى منقد، يلز.. .
انا غايظنى ود الباوقة و ود البوش اول مره يكون عندهم بيوت بى نمرة
لووووووووووووووووووووووووووووووووووووووووووووووووووووووووول

تجمع ابناء امدرمان بالبورد

التحية اخى صديق الموج

انا سخسيا بعترف انو الحاجات دى اغلبها ما عملتها
اها بالتالى مفروض اشتت من كرش الفيل دى ..
الجيناها فقط عشان القراية
اهااسع توفيق ومن لف لفه عايزين يطردونا منها
لكين قول لى اقبل وين .؟؟
الحواشات نشفت
الاسبتاليات بتسرح فيها الحمير والغنم
المدارس مافيها ولا شباك والقعاد فى واطات الله دى
الموية قربنا نرجع نجيبا من البحر تانى
و و و ...

دحين رجعوا لينا الحاجات دى .. ويمين الله مادايرين نشوفكم تانى

تحياتى

Post: #120
Title: Re: رسالة الى كل الطفيلين الجو سكنو الخرطوم ....
Author: صديق الموج
Date: 02-15-2013, 12:55 PM
Parent: #119

صلاح حبيب .................سلام يا حبيب

اشكر صدقك انتو اقعدو فى بكانكم دواء الملاريا بجيكم .
مش عندكم طاحونة ودكان وبرنسه تتحركو بيها المافى شنو؟
الجامعات ترا الانقاذ اتعاملت مع الجامعات زى الاكشاك اى ناس حلة قالو ما عندنا
جامعه نزلت يافطة مدرستهم الابتدائية وركبت عليها يافطة وكتبت عليها (جامعة الحرازة ام قد )كلية التربية
اقروا قبلكم و كان مرضتو اقعوا القرض والحرجل والجردقة والمحريب والسنمكة وارحلو بهدوء ان تمت
المعدودة ما بنقصر معاكم بنذيعكم فى نشرة تمانية تانى شنو؟
كلمة حق فى حق المتطفل جنابو عباس فوراوى ، كما ذكر هو جاءنا متسنناً فى العام 1963 ولكننى
رايته متامدرناً فى العام 1978 حيث اتى ليقدم اوراقه لكلية البوليس، لكن اشهد الله جاء بحقه مهذباً
ودوداً ، مثقفاً مطلعاً ، تبدو على ملامحه سمة البداوة ومخائل الذكاء وامارة الصلاح واشهد الله كان حاذقاً
ماهراً فى كرة القدم حتى حسدناه وحتى ان بعض كبار الحى انتبهوا لموهبته الكروية و ارادوا ان يسجلوه فى احد
اندية المقدمة (هلال مريخ ) اذ كان مستواه لا يقل عن مستوى لعيبة الهلال والمريخ يومئذ ، ولكنه
رفض وكانت وجهته كلية البوليس وكان يحسب كرة القدم ضرب من اللهو وهو زول معايش و يحمل مسؤولية
اسرة خلفه وقد كان له ما اراد..
دحين كلام الراجل ده اخدوه بجدية ، اختونا شوية نرجع خرطومنا كما كانت الخرتوم بالليل وبعد داك تعالو،،،

Post: #122
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-17-2013, 12:51 PM
Parent: #120

Quote: كلمة حق فى حق المتطفل جنابو عباس فوراوى ، كما ذكر هو جاءنا متسنناً فى العام 1963 ولكننى
رايته متامدرناً فى العام 1978 حيث اتى ليقدم اوراقه لكلية البوليس، لكن اشهد الله جاء بحقه مهذباً
ودوداً ، مثقفاً مطلعاً ، تبدو على ملامحه سمة البداوة ومخائل الذكاء وامارة الصلاح واشهد الله كان حاذقاً
ماهراً فى كرة القدم حتى حسدناه وحتى ان بعض كبار الحى انتبهوا لموهبته الكروية و ارادوا ان يسجلوه فى احد
اندية المقدمة (هلال مريخ ) اذ كان مستواه لا يقل عن مستوى لعيبة الهلال والمريخ يومئذ ، ولكنه
رفض وكانت وجهته كلية البوليس وكان يحسب كرة القدم ضرب من اللهو وهو زول معايش و يحمل مسؤولية
اسرة خلفه وقد كان له ما اراد..

شكرا لكم الاثنين .................................

وارفع لكم القبعة تقديرا واكبارا ..... ومحبة ..

Post: #123
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-17-2013, 01:17 PM
Parent: #122

Quote: الغريب في الامر ان شخص يتباكى على الرقي والحضارة المفقودة يتكلم بهذه الطريقة الغريبة التي هي ابعد ما تكون عن الحضارة والرقي، ويكيل السباب يمنة ويسرة لمواطنيين سودانيين لهم نفس الحق في عاصمة بلادهم كما له هو، ولا يطرف له جفن لما عاناه بعض مواطنيه جراء تنفيذ ذات السياسات التعسفية التي يدعو لها ويطالب بكل بجاحة بتكرارها.
يبدو ان المنطق والحوار الهادئ المهذب لا يجدي معك، فاتركك لمن يجاريك في اسلوبك وشتائمك.
ضع في بالك بانك سوف تكون اول ضحايا الكشة الجاية.

ابقى عافية.

عثمان دُنقس

اخي عثمان روق المنقة وحاول ابتسم وأتفسح في الخرطوم بالليل فهي تروق الاعصاب وتبعث النشوى ونحن سكان الخرطوم القدماء ناس ودودين ومثاليين اكثر من اللازم وحبوبيين جدا نحب ونتحب مشكلتنا البجينا ما بيقدر يفوت مننا حتى لو طردناه بوش البيت

وده سبب المشكلة ...!!

اخي عثمان ومع احترامي ليك وبالجد الكتير انا ما داير اسوق البوسط لمستنقع السياسة وقرفها
فأعذرني فلغتي هي لغة القلب للقلب لذا كانت صادقة ومعبرة
اما الاسلوب فليس هذا مننا بالطبع فهذا اسلوب ناس الضهاري
وحاولت مخاطبتهم بالغة التي يفهمونها
ففهموها ...
وردوا عليها مستنكرين .... (وتحت تحت متكيفين)

احترامي وما تزعل ياخ وأؤيد كل كلمة قلتها واحي صبرك وجمال خطابك
بس ....
خلي الناس الوهم ديل يشتتو لينا من خرطومنا السمحة دي
عشان نقدر نتنفس ...

Post: #124
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-17-2013, 01:52 PM
Parent: #123

Quote: يا توفيق الفهم قسمة و نصيب
انت عشان زعلان من الانقاذ تكسب عداء اكتر من
تمانية مليون نسمة

يا كمال الماحي منو القال ليك انا زعلان من الانقاذ ؟؟؟
كل الناس عارفني هنا انا اسلامي للطيش واديت المؤتمر الوطني في الانتخابات وبكاتل البكاتلهم ...
وده مش عشان الوالد (الله يرحمه) مؤسس تنظيم الاخوان المسلمين ...
تأيدي لمواقف شخصية من مؤسسة الرآسة لشخصي الضعيف ولأسرتي الصغيرة المغلوب على امرها الذين لولا هم لكانوا في خبر كان ...
ونرجع تاني انو عشان بعض ناس الضهاري وحقدهم الاسود المر علينا ناس البلد الاصليين لو ما كانت مؤسسة الرآسة صاحية وبتراقب ووقفت مع الكثيرين الزيي كان خرطومنا خربت من زمان
وكان بدل برج الفاتح وفي محلة كان حا يكون راكوبة كبيييرة فيها واحد عنقريب وواحد زير وواحد تلفزيون شاشة 100 بوصة وعربة همر مرابطة بالخارج

Post: #125
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-17-2013, 02:13 PM
Parent: #124

شوفو يا ناس الضهاري يا وهم يا متطفلين .....
بعد الكلام الهادي الحلو القلناه ده ...
ان شاء الله تكون اعصابكم هدأت وحا تقدروا تستوعبوا الكلام الحا نقولوا ليكم ده

يا ناس عليكم الله عليكم الله اتخارجوا منها بهدوء زي ما جيتونا في غفلة وكنا قايلنكم راجعين راجعين لقراكم ورواكيبكم وعششكم
ما تخلونا نلجا لاساليب تانية وحا تزعلكم شديد ....

Post: #126
Title: Re: رسالة الى كل الطفيلين الجو سكنو الخرطوم ....
Author: فايزودالقاضي
Date: 02-17-2013, 02:27 PM
Parent: #125

Quote: يا ناس عليكم الله عليكم الله اتخارجوا منها بهدوء زي ما جيتونا في غفلة وكنا قايلنكم راجعين راجعين لقراكم ورواكيبكم وعششكم
ما تخلونا نلجا لاساليب تانية وحا تزعلكم شديد ....

نحن معاك بكل الوسائل عدا الاغتيالات والاغتصاب الجماعي والمتاجرة بالاعضاء ..

ولو أنهم فعلوا ما يوعظون به لكان خيرا لهم وأشد تثبيتا

تحياتي توفيق الاصلى ..

Post: #127
Title: Re: رسالة الى كل الطفيلين الجو سكنو الخرطوم ....
Author: عبد الله عبد العزيز
Date: 02-17-2013, 03:10 PM
Parent: #126

بوست ممتع جدا جدا

واخير الخرطوم طلع ليها اسياد

انا زول صعيد ساكت
الحمدلله الماسكنا البندر

Post: #128
Title: Re: رسالة الى كل الطفيلين الجو سكنو الخرطوم ....
Author: Kamal Elmahi
Date: 02-17-2013, 04:54 PM
Parent: #127

يا توفيق
ما وريتنا حاجة باسم جدك فى الخرطوم دى عشان نحلف نقول انها حقتكم
اما ابوك و انت مع الاسلاميين دى ما معناها الخرطوم حقتكم
الامراء جو امدرمان مع المهدية
و ناس بيت المال جو مع المهدية
يعنى تبقى ام درمان حقتهم
كدى مثلا جيب ليك شجرة نسب طلع لى فيها كتشنر جدك
و لا اصلك منسوب للاتراك مثلا
و لا اقول ليك خلينا مع الحديث قول الفاتح سيد برج الفاتج
كان عمك
خلاف كدا انت زاااااتك تشتت تشوف ليك ضهرة
تتاوى فيها

Post: #129
Title: Re: رسالة الى كل الطفيلين الجو سكنو الخرطوم ....
Author: شمس الدين التوم
Date: 02-17-2013, 05:16 PM
Parent: #128

Quote: يا ناس عليكم الله عليكم الله اتخارجوا منها بهدوء زي ما جيتونا في غفلة وكنا قايلنكم راجعين راجعين لقراكم ورواكيبكم وعششكم
ما تخلونا نلجا لاساليب تانية وحا تزعلكم شديد ....

نسأل الله السلامة اللهم لاشماتة
المؤمن مصاب
لكن الطب اطور والعلاج موجود
لا حوالله ولا قوة الا بالله
اللهم اللطف وخفف علي العباد

Post: #130
Title: Re: رسالة الى كل الطفيلين الجو سكنو الخرطوم ....
Author: عمر نملة
Date: 02-18-2013, 02:11 AM
Parent: #129

يا عيسى مسؤل من الخير جنياتنا النصفهم خرطومي نعمل ليهم شنو؟ والنسون الخرتوميات نخليهم ورانا ولا شنو الدباره؟
نحن برجع بس موية النيل تشمها قدحه. ها زول والله تشتهي اللحمه والسمك. وماتنسى لو قفلنا المويه السمك دا الا تجيبوا من السعوديه.
والجداد بتاع الخلاء وبيضه تشمه قدحه. والعجب اللبن. والله ماتقدر تخش المستراح بدون مويه .
ا عيسى العجب لو اسرائيل ضربت مطار الخرتوم ؟!!! ها جنى ها اسحن ليك اتقايض مع البشريه دي وطالما ما انك اسلامي اب عن جد
شوف محل اللهط والرسول تقش خشيمك بمنديل سجمك ما في مويه ولا كهرباء والله الخريتيم دي الا تبيعها في كرتله.
وتقول كدا مصر تزعل باقي كل شئ الا المويه وتسعل تقول ليه قفلتوا الميه. بنقول ليها فرزنا صدفنا وعيشتنا مع وليد توفيق باشا لو عندكم اي كلام
الزول دا في الخرتوم وانت عارف زعل المصرين اهل صافيناز. والعجب لو مالقيت مويه والله ريحتك وصنانتها ترمي الصقر واهو بتكون لقيت ليك
لحم صقور يعني الخرطوم تتملي صقور كايسه الصنانه.
ها جنى جهز الورق عشان نمضى ونوقع الاتفاقيه وبنسميها مويه ماشا. والله يخون البرجع في كلامه.

Post: #131
Title: Re: رسالة الى كل الطفيلين الجو سكنو الخرطوم ....
Author: أحمد ابن عوف
Date: 02-18-2013, 06:29 AM
Parent: #130

انا المستغرب ليهو كيف زول من ناس الخرطوم القدامى ويكون كوز واسلامي في نفس الوقت

ماااا بتجي

الا يكون زول بتاع مصالح وبلعب لصالح ورقه وجيبو بس، لكن زول كده من ناس الخرطوم القدامى
لا يمكن يحلج ليك راسك بمشروع اسلامي وحضاري وقضية وايمان بأن روسيا امريكا قد دنا عذابها

Post: #132
Title: Re: رسالة الى كل الطفيلين الجو سكنو الخرطوم ....
Author: Osman Dongos
Date: 02-18-2013, 07:44 PM
Parent: #123

الاخ توفيق،
سلام،

Quote: اخي عثمان روق المنقة وحاول ابتسم وأتفسح في الخرطوم بالليل فهي تروق الاعصاب وتبعث النشوى ونحن سكان الخرطوم القدماء ناس ودودين ومثاليين اكثر من اللازم وحبوبيين جدا نحب ونتحب مشكلتنا البجينا ما بيقدر يفوت مننا حتى لو طردناه بوش البيت وده سبب المشكلة ...!!

اخي عثمان ومع احترامي ليك وبالجد الكتير انا ما داير اسوق البوسط لمستنقع السياسة وقرفها. فأعذرني فلغتي هي لغة القلب للقلب لذا كانت صادقة ومعبرة.
اما الاسلوب فليس هذا مننا بالطبع فهذا اسلوب ناس الضهاري
وحاولت مخاطبتهم بالغة التي يفهمونها
ففهموها ...
وردوا عليها مستنكرين .... (وتحت تحت متكيفين)

احترامي وما تزعل ياخ وأؤيد كل كلمة قلتها واحي صبرك وجمال خطابك

تعرف، لقد قررت ان لا اعود للمداخلة معك ولكنك كتلت قلبي بالكلام الفوق دا.
اخي الكريم مزاحك تشوبه محامل الجد ووقعه قاسٍ على النفس رغم حسن نيتك، والكثير من المتداخلين فهم نفس الذي فهمته، وردَّ بعضهم ببعض الشتائم. ولكني اخذت عهداً على نفسي ان لا أُسئ الى اي احد في هذا المنبر او غيره، فاذا لم يعجبني الحال انسحب بهدوء.
ارجو ان تعود الخرطوم عروساً للنيل اجمل مما كانت عليه، وذلك بتضافر جهودنا جميعاً، القدامى والقاطنين الجدد (ناس الضهاري)، اهالي ورسميين، لنبني خرطوماً نظيفة، جميلة، متحضرة وفيها مكان لكل من اراد ان يقطنها من بني هذا الوطن وضيوفنا الكرام.

لك الود

عثمان دُنقس

Post: #133
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-20-2013, 02:01 PM
Parent: #132

Quote: ما وريتنا حاجة باسم جدك فى الخرطوم دى عشان نحلف نقول انها حقتكم

يا كمال الماحي ....
حي السيد المكي الفي امدرمان ما مالي عينك ....
ولا ... عندك كلام في السادة الاسماعيلية ؟؟!!

ولا قصدك جدي ابو حبوبتي صفية ؟؟؟؟؟؟

Post: #134
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-20-2013, 02:16 PM
Parent: #133

يا عمر نملة ...
نسوانكم الما اصليات ديل البعرسوا من طرف ديل اي واحد من ناس الضهاري عمل حبة كشكوش ....
ده طرفنا منهم رجوعهم معاكم ...
دي حاجة ...
انا مستغرب الضهاري فيها سمك ونيل كيف وفيها ... وفيها .... وفيها ... برضو كيف ؟؟؟
عندكم استاكوزا ....؟؟
اسكلوبانيه ..؟؟

قومو شتتو خلونا نلحق الرقي والتطور رجعتونا للعهد الحجري ياخ

Post: #135
Title: Re: رسالة الى كل الطفيلين الجو سكنو الخرطوم ....
Author: محمد كابيلا
Date: 02-20-2013, 02:31 PM
Parent: #134

Quote: انا مستغرب الضهاري فيها سمك ونيل كيف وفيها ... وفيها .... وفيها ... برضو كيف ؟؟؟
عندكم استاكوزا ....؟؟
اسكلوبانيه ..؟؟

الزول أكيد مريض !!

Post: #136
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-21-2013, 11:50 AM
Parent: #135

Quote: انا المستغرب ليهو كيف زول من ناس الخرطوم القدامى ويكون كوز واسلامي في نفس الوقت

ماااا بتجي

اخي احمد ابن عوف ......
ما تستغرب لان الخرطوم زمان ما كان فيها هذا الكبت الذي نراه والاقصاء الممنهج المدروس

Quote:
الا يكون زول بتاع مصالح وبلعب لصالح ورقه وجيبو بس، لكن زول كده من ناس الخرطوم القدامى
لا يمكن يحلج ليك راسك بمشروع اسلامي وحضاري وقضية وايمان بأن روسيا امريكا قد دنا عذابها

ما تنظر للدنيا بمنظور هؤلاء الهمج (ناس الضهاري وخليك زول خرطومي راقي)

Post: #137
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-21-2013, 12:29 PM
Parent: #136

شكرا اخي عمر ....
واشكرك على الكلمات الطيبات

Post: #138
Title: Re: رسالة الى كل الطفيلين الجو سكنو الخرطوم ....
Author: عادل الباهي عبدالرازق
Date: 02-21-2013, 12:34 PM
Parent: #136

شر البلية مايضحك

Post: #139
Title: Re: رسالة الى كل الطفيلين الجو سكنو الخرطوم ....
Author: عمر نملة
Date: 02-21-2013, 03:00 PM
Parent: #138

سلام توفيق باشا
اولا اعصابك وهدف البوست اننا نحن ناس الضهاري نشتت من الخرتوم وها زول ها موافقين
وجيناك بالدرب وعاوزن نشتت عشان تشم الهواء وكتمت النفس تروح منك تقوم من اول مداخله
تفز ونفسك يقوم.
Quote: يا عمر نملة ...
نسوانكم الما اصليات ديل البعرسوا من طرف ديل اي واحد من ناس الضهاري عمل حبة كشكوش ....
ده طرفنا منهم رجوعهم معاكم ...
دي حاجة ...
انا مستغرب الضهاري فيها سمك ونيل كيف وفيها ... وفيها .... وفيها ... برضو كيف ؟؟؟
عندكم استاكوزا ....؟؟
اسكلوبانيه ..؟؟

قومو شتتو خلونا نلحق الرقي والتطور رجعتونا للعهد الحجري ياخ

اولا شكرا انك اتنازلت عن عرضك( نسوانا الخرطوميات وبناتهم) الانت يا اخوهن او خالهن او عمهن
نحن السؤال الغرض منه انه العرض مشترك وقلنا الشوره برضو كويسه.كويس اتفقنا في الخطوه الاولى من بنود
موسم التشتيت الي الضهاري.
ايوه بالحيل عنا سمك ونيل ابيض ونيل ازرق وزمان كان عندنا السوباط والجبل والغزال الله يلعن الكان السبب
وخلى لينا الباقي. والله يبارك فيك انت عايز تفرز عيشتك بس كمان دي البند التاني بنسد الابيض والازرق.
اما الاستاكوزا والاسكوبانيه والروبيان واللوب ستار الحمد لله عندنا البحر الاحمر. والله يا باشا خيرنا كتير نحمد الله
بس تقول شنو عماء بصيره بارينا العلام وقلنا نبقى افنديه.
وشنو شايفك عملت طناش من الصنانه البتوقع الصقور وعملت نايم ولا الشغلانه وقعت ليك في جرح ودا هدفك من الاول
ها زول ها كانت اتبريت من عرضك وعايز الصقور الليله قبل بكره نحن مشتتين ونخليك تشتت زي ماعاوز مع صقورك.
اعصابك ياباشا.

Post: #140
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 02-22-2013, 10:30 AM
Parent: #139

يا عمر نملة ماعندنا مع امثالكم الناس الطيبين الجو اتطفلوا علينا صدفة ممكن بحنك حنكين نرجعكم معززين ومكرمين ونرضيكم حسب هواكم

المشكلة في الناس الراسها قوي ومكابرا في الفاضي ومتطنقعة وديل الا نسلهم سلة المسمار المصدي ...

الخرطوم كما عشنا فيها زمان ...
زهور وياسمين ..
ونساء زي الحور ..
الصقور حقتكم جات مبارياكم ..
شتتو بصقوركم وعجلاتكم ..
دخلتو لينا اساليب وطبائع كنا بقراها في المجلات الاجنبية ونخجل

Post: #141
Title: Re: رسالة الى كل الطفيلين الجو سكنو الخرطوم ....
Author: طارق جبريل
Date: 03-02-2013, 00:45 AM
Parent: #140

الزول دة بيكون عنده إمساك واقف ليهو في حلقه

Post: #143
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 03-05-2013, 02:37 PM
Parent: #141

Quote: الزول دة بيكون عنده إمساك واقف ليهو في حلق

يا طارق جبريل انت معانا ولا مع غانا ؟؟

Post: #144
Title: Re: رسالة الى كل الطفيلين الجو سكنو الخرطوم ....
Author: محمد جلال عبدالله
Date: 03-07-2013, 11:19 AM
Parent: #143

الأخ توفيق/ تحية طيبة
بالله ما هو رأي أمير الطمأنينة في هذا الطرح الذي قدمته؟
وهل تنظيم الرايات الأربع بأمرائه الأربعة موافق على هذا الطرح؟
أم أنها مبادرة شخصية منك؟
وهل كان النبي صلى الله عليه وسلم يطرد الأعراب الذين يأتون للمدينة المنورة؟
أليس قد قال: (من تبدى جفا) في إشارة لأن يسكن الأعراب في المدينة ليتعلموا الدين والآداب وأخلاق الإسلام

السؤال الأهم والجوهري:
الأمراء الأربعة كلهم من الخرطوم وللا فيهم من ناس الضهاري؟
ولو كانوا كلهم من الخرطوم كيف حتحققوا قومية التنظيم وعالميته من بعد؟
ولو كانوا من الضهاري .. هل حتطردوهم من الخرطوم؟

Post: #145
Title: Re: رسالة الى كل الطفيلين الجو سكنو الخرطوم ....
Author: عرفات حسين
Date: 03-08-2013, 07:13 PM
Parent: #144

توفيق عيسى مكي

من الذي اعطاك الحق ,

وباي حق

انت دخيل علي الخرطوم

ولا تتطاول علي المواطن

واخالاق الكيزان و عادتهم , بتزوير التاريخ اعملها في منطقه اخره

وامدرمان ماعندك فيها شئ ؟؟؟؟؟؟؟؟؟؟؟؟؟؟؟؟؟؟؟؟؟

مشي تكون مكي ود عروس

Post: #146
Title: Re: رسالة الى كل الطفيلين الجو سكنو الخرطوم ....
Author: توفيق عيسى مكي
Date: 03-09-2013, 01:54 PM
Parent: #144

Quote: الأخ توفيق/ تحية طيبة
بالله ما هو رأي أمير الطمأنينة في هذا الطرح الذي قدمته؟
وهل تنظيم الرايات الأربع بأمرائه الأربعة موافق على هذا الطرح؟
أم أنها مبادرة شخصية منك؟
وهل كان النبي صلى الله عليه وسلم يطرد الأعراب الذين يأتون للمدينة المنورة؟
أليس قد قال: (من تبدى جفا) في إشارة لأن يسكن الأعراب في المدينة ليتعلموا الدين والآداب وأخلاق الإسلام

اخي محمد جلال عبد الله ...
يقول لك امير راية الطمئنينة (قال تعالى الاعراب اشد .....
يا استاذ نحن في عهد سمة حياته وخطابه اضرب واهرب افتريدني ان املس القول واسهب ؟؟

Quote: السؤال الأهم والجوهري:
الأمراء الأربعة كلهم من الخرطوم وللا فيهم من ناس الضهاري؟

يا زول انت بتاع مشاكل ...
داير تعمل لي مشاكل مع الامراء بتاعني ولا شنو ؟؟؟؟؟؟