Post: #1 Title: التلفزيون التفاعلي الذكي ... Author: جمال محمود Date: 02-04-2013, 06:57 PM
امس سقت المدام ومشيت محل الكترونيات تم افتتاحو حديثا ...... وانا زول بطبعي بحب القشرات التكنولوجية وقبض الجو بالمعلومات عن المنتجات الجديدة .... وهكذا دخلنا المحل .... ولقيت ضمن ما لقيت في المحل تلفزيون ثمانين بوصة لفتني ليهو كبر شاشتو وسعرو ...... فسعرو ما يعادل التمانية وعشرين الف دولار يعني بالسوداني بالميت كدا ميتين مليون جنية ..... يعادل راتب سمراء حتى نزولها للمعاش ....طبعا الشمار اكلني ومشيت استفسر عنو واعمل فيها قندف .... المهم الهندي ود اللذينا عاين لي كدا من فوق لتحت وفوووو مشى وطنشني زي التقول ما بسألو ...... فزعلتني جدا القصة دي والحيت اني اسك لي هندي تاني يشرح لي واعرف فيهو شنو ... فبعداك عرفت انو دا جيل جديد من التلفزيونات اسمو التلفزيون التفاعلي الذكي .... يعني يتفاعل وينفعل معاك واذكى منك ومن كل البعرفوك .... وقال لي ان بيتعرف عليك وعلى وجاهتك وعلى جميع افراد العيلة ..... دا لو ما اتقدم وخطب بتك او اختك .... وانو بشتغل بالاشارة ولو غمزت ليهو يمكن يفصل كهرباء ... وممكن تتكلم معاهو وينفذ رغباتك واوامرك ..... وانو ممكن الشفع يلعبوا معاه .... وانو وانو .... وقفت اتامل الشاشة الكبيرة دي وحزنت اني ضيعت عمري مع ناس الواحد وعشرين بوصة ..... اتخيلت نفسي قاعد قدام المصيبة دا وفاتح قناة النيل الازرق وبتفاعل مع المذيعات العاجباتني .... واووو على قول الخواجات اسيكون تفاعلا مميزا ..... وينتشلني من هذا البورد والونسة والتفاعل مع ضكور البط الساكنين هنا ..... وفي نفس الوقت دار ببالي .... انا التلفزيون دا بشوفوا في المساء بس لما اجي من الشغل ... والمدام اليوم كلو مصاقراهو .... هو ما دام ذكي وفقري قدر دا ويتفاعل مع الوجوه وبتعرف على افراد العيلة وعندو كمرا ... طيب البمنع شنو بعد يومين الاقيهو بيتفاعل مع المدام .... وتكون قاعدة تتفرج في مسلسل مثلا يكون بصور فيها ويتبادل هذه الصور مع اصحابو الصعاليك من التلفزيونات الذكية التانية ... ودا معاناتو اني لازم الزمها بارتداء الحجاب عند الجلوس لمشاهدة المسلسل او المرور امام التلفزيون ..... وحتى تتضح الامور من ناحية شرعية في التعامل مع هذه التلفزيونات قررت عدم شراء التلفزيون والاكتفاء بالفرجة بتلفزيونا ابو صلب كما تسميه الحبوبات لتميزه عن التلفزيون المسطح .... وصراحة التكنولوجيا دي حيرتنا عديل كدا وعرفت ليه ناس هناي زمان بحرمو التلفزيون
من أروع تجليات الزميل TheBigBoss
Post: #2 Title: Re: التلفزيون التفاعلي الذكي ... Author: سامى عبد المطلب Date: 02-04-2013, 08:28 PM Parent: #1
ههههه هههههه والله صاحبك بالغ يا هندسه.... !
Post: #3 Title: Re: التلفزيون التفاعلي الذكي ... Author: جمال محمود Date: 02-05-2013, 04:42 AM Parent: #2
Quote: ههههه هههههه والله صاحبك بالغ يا هندسه.... !
والله يا سامى عبد المطلب
بيق بوس ده زول فنان وعندو كتابات فى قمة الروعة والابداع
مودتى
Post: #4 Title: Re: التلفزيون التفاعلي الذكي ... Author: الطاهر عثمان Date: 02-05-2013, 07:40 AM Parent: #3
من اجمل ما كان يمكن تخيله وصار واقعا
انك تدخل النت بالتلفزيون وتتفرج علي اليوتيوب وتشغل العايزو بالريموت وتدخل الاسكايب والفيس بوك
علم
Post: #6 Title: Re: التلفزيون التفاعلي الذكي ... Author: ناصر المحسى Date: 02-05-2013, 08:04 AM Parent: #4
Post: #5 Title: Re: التلفزيون التفاعلي الذكي ... Author: Mohammed Abuzaid Date: 02-05-2013, 08:01 AM Parent: #1
تحياتي للأخ جمال ولكاتب الموضوع
أسلوب جميل في الكتابة.
للأسف مضطرين نلغي الفكرة نحن كمان.
كل الود
Post: #7 Title: Re: التلفزيون التفاعلي الذكي ... Author: Hatim Alhwary Date: 02-05-2013, 08:16 AM Parent: #1
Quote: من أروع تجليات الزميل TheBigBoss
زميل وين؟
بورد مدرسة شغل حلة عامود جبهة ديمقراطية الخ ؟
لووووول
Post: #8 Title: Re: التلفزيون التفاعلي الذكي ... Author: ناصر حسين محمد Date: 02-05-2013, 08:23 AM Parent: #7
ههههههههههههههههه والله تحفة ماعرفتا اقتبس شنو وا اخلي شنو
Quote: المصيبة دا وفاتح قناة النيل الازرق وبتفاعل مع المذيعات العاجباتني
Post: #9 Title: Re: التلفزيون التفاعلي الذكي ... Author: جمال محمود Date: 02-05-2013, 08:28 AM Parent: #7
Quote: زميل وين؟
بورد مدرسة شغل حلة عامود جبهة ديمقراطية الخ ؟
لووووول
وانت حاكيها شديد كدا مالك ؟
الظاهر عايز تعرف درب البق بوس لتفاصيل اوفى
ولا الفار لعب فى عبك من الكلام ده :
Quote: وتكون قاعدة تتفرج في مسلسل مثلا يكون بصور فيها ويتبادل هذه الصور مع اصحابو الصعاليك من التلفزيونات الذكية التانية ...
