ماهى النصائح للمشاركة فى مواضيع المنبر

سلام ياشباب
أحاول أن اجد لى موطأ قدم فى هذا المنبر ، ولكى اختصر الطريق
ماهى النصائح من خلال تجاربكم فى المنبر ، يعنى اللعب الحر الممرحل
ولا الباصات القصيرة المضمونة.
وتسلموا

يعنى اللعب الحر الممرحل
ولا الباصات القصيرة المضمونة.

...................................................................


عندك فكرة عن حراسة المرمى

وشكرا

ابراهيم ..سلام..ويامرحب بيك لاعب جديد ..

الفريق اللاعب معاك هو البحدد خطتك ..
الحر الممرحل للبديك المساحة لذلك
واهمية المباراة هى البتحدد شكلها



وان شاء الله بعد ده تكون صفوة ..

تحياتي ،،

عبر عن رأيك بصراحة وصدق ووضوح ،،، وخلى الباقي على الله

إبراهيم ... لو ياكا اخو النذير ....

بس شوف النذير ماشي وين و امشي عكسه ...

تحياتي ليك يا جميل و للحبيب النذير ...

Quote: يعنى اللعب الحر الممرحل ولا الباصات القصيرة المضمونة.

شووووت ضفّاري ،،،
دي طريقة لعب مضمونة

Quote: بس شوف النذير ماشي وين و امشي عكسه ...

عبر عن رأيك بصراحة وصدق ووضوح ،،، وخلى الباقي على الله

يا ابراهيم مختصر الطريق لاحق شــنو !!!
عيش تجربتك دون إختصار ودون إنطباعات مسبقة

وذى ماقال أخونا أيمن قول رايك بصدق وصراحة والله كريم



مع التقدير ،،،

تحية...

معلوم ان ما يحفز علي الاهتمام هو نوع الاهتمام نفسه وموقفك بشانه ورغبتك وقدراتك في المشاركة بمايفيد او يحفز او يضيف هو المحدد...وطبعا هذا كلام نظري ازاء ما تراه سائدا من شلليات وفي بعض الاحيان تنابذ ومداخلات شوفونية بائسة... خلافا لذلك وبالتالي ما عليك الا أن تتبع ناس (توجد صور)

اعلاه دون الاخلال بالجهد الراكز لاصحاب المساهمات الموضوعية المحفزة للتناول الجاد او التفاكر والمؤانسة الحميدة.. او المعلومات ذات الاهمية..

وللجميع احترامي..

سلام
مرحبا بيك
اللعب الطويل احيانا افضل من الممرحل ركز على الباصات البينية .....

نصيحتي ليك: اقرأ كثيرا ولا تكتب إلا مضطرا.

سلامات يا ابراهيم
نصيحة على السريع كدا دايما قبل ما تضغط "أضف رد" اضغط "شاهده قبل نشره" و اقرا الكلام مرّة واتنين
لأنو الكلمة إن مرقت تاني ما بترجع
النصيحة دي انا زاتي بحاول التزم بيها لكن مرات مع العجلة و الإنفعال بنساها ولا ينفع الندم
تاني خلّي بالك من الياء و الألف المقصورة, معليش لكن في جماعة هنا هلكونا بيها هلاك :)

الأخ ود الباوقة
أولاً التحية عبرك لأهلنا ناس الباوقة الأصيلين
اما حراسة المرمى فما خاااالص، لكن لو الفريق فيه دفاع كويس اى
زول ممكن يحرس المرمى.
مثلاً لو جبهة الفريق الغربية (دارفور) منتهية والجبهة الجنوبية كذلك
(جبال النوبة) غير متماسكة وجبهة الشرق والوسط (حرائق جامعة
الخرطوم) و... و....يبقى الفريق اى كلام. وعلية يجب حل الفريق
وإعفاء المدرب وإتاحة الفرصة لآخرين لتقديم الأفضل .
على كل اترك لك حراسة مرمى ذلك الفريق المتهالك وشباكك
سوف تستقبل المزيد من الأهداف ، ذلك لا يعنى انك حارس
مرمى فاشل ولكن يعنى ...... الفريق الذى تلعب لصالحة هو
الفاشل ومدربك لايجيد سوى الرقص وهز الوسط رغم ....
الهزائم المتكررة.
وتسلم على المرور يا..... ملك

ابراهيم حجازي حبابك

ويا سلام يا اخي انت اخو النزير حجازي؟!

اولا البركه فيكم يا اخي في الوالد
ثانيا اعذرونا كمستجيدن لم نرحب بكم بما يكفي فصاحب الحوش قرضها علينا ومحدد المداخلات.

ثانيا:
سؤالك في محله وليس معناهو اننا بنقودك كسناير لكن فعلا للمنبر تكتيكات.


نصحية محمد الامين فعلا مهمه ان تقرأ اكثر مما تكتب... واكيد في كل مجال وليس في هذا المنبر فقط.

اما نصحيتي انا انك تحرص ان تفتح بوستاتك الخاصه و التي بدونها لن يكون لك ارشيف خاص بك او مكتبه مستقبليه.

صحيح انه تدخلك مع الاخرين مهم جدا لكن الاحظ بعض الاعضاء مدخلاتهم تدل عل عظمة حصيلتهم لكن رغم ذلك لا يبتدرون بوستاتهم

وبالتالي يحرمون انفسهم من مكتباتهم الخاصه.

تحياتي لك

ويا ريتك تطلع ما مصرج زي النزير هههههههههههه.

Quote: سلام ياشباب أحاول أن اجد لى موطأ قدم فى هذا المنبر ، ولكى اختصر الطريق ماهى النصائح من خلال تجاربكم فى المنبر ، يعنى اللعب الحر الممرحل ولا الباصات القصيرة المضمونة.

عشرات حبابك يا أخي الكريم
عشان تكون في السليم
خليك دائما (مراوق) و خلي بالك من الكرات العرضية
في بعض اللعبية هنا بيجلوها و هي واقفة و في كتير من الناس
بيلعبو بطريقة (القشاش) و ما اكثرهم و نصيحة ليك خلي بالك
من اللعب البيجي قادم من الخلف .....





نسيت حاجة كمان
أنت شايت أساسا وين

مرحب بك في أي شكل إيجابي توده لنفسك والكلمة الطيبة طريقك..



وهذا بشكل عام..

اول ما تخش الملعب ارجع اسال المدرب


فريقنا شايت على وين!!!!











ذي ما قال واحد هنا عن ود حلّتو

أولاً التحية عبرك لأهلنا ناس الباوقة الأصيلين
اما حراسة المرمى فما خاااالص، لكن لو الفريق فيه دفاع كويس اى
زول ممكن يحرس المرمى.
مثلاً لو جبهة الفريق الغربية (دارفور) منتهية والجبهة الجنوبية كذلك
(جبال النوبة) غير متماسكة وجبهة الشرق والوسط (حرائق جامعة
الخرطوم) و... و....يبقى الفريق اى كلام. وعلية يجب حل الفريق
وإعفاء المدرب وإتاحة الفرصة لآخرين لتقديم الأفضل .
على كل اترك لك حراسة مرمى ذلك الفريق المتهالك وشباكك
سوف تستقبل المزيد من الأهداف ، ذلك لا يعنى انك حارس
مرمى فاشل ولكن يعنى ...... الفريق الذى تلعب لصالحة هو
الفاشل ومدربك لايجيد سوى الرقص وهز الوسط رغم ....
الهزائم المتكررة.
وتسلم على المرور يا..... ملك

.........................................

عموما اعمل حسابك من البيضة

معظم الاهداف التي تلج شباك الخصم عن طريق البيضة

وشكرا

ماتلعب من بداية المباراة
خليك احتياطي
عشان تشوف الخاصل شنو
ولما تنزل الملغب بتكون عارف تعمل شنو

نصيحة من برلوم زيك خليك متاوق أحسن ليك

وسيب الشلاقة الكثيرة المنبر دا كلو محترفين

يعني لعب ليق مابينفع .. وماتثق في زول

شوت براك وضفاري

Quote: اما نصحيتي انا انك تحرص ان تفتح بوستاتك الخاصه و التي بدونها لن يكون لك ارشيف خاص بك او مكتبه مستقبليه. صحيح انه تدخلك مع الاخرين مهم جدا لكن الاحظ بعض الاعضاء مدخلاتهم تدل عل عظمة حصيلتهم لكن رغم ذلك لا يبتدرون بوستاتهم

مرحب بيك أخي،
وأمسك في كلام أختنا تراجي ده شديد، لأنو أنا واحد من الناس بنطبق على الحال وما عندي بوستات كتيرة ((رغم إنو عندي مكتبة ورغم أني عضو من 2004) وده لأني بركز في خدمة الموضوع والفكرة أكتر من التركيز على الأشخاص والشللية والشهرة، ولأنو ظروف العمل ما بتخليني أتابع وأرد، وأول أدب في فتح البوستات هو المتابعة) لدرجة مرات بيكون عندي مداخلات بلقى ناس عاملين بفكرتها أعمدة وتصريحات سياسية ورغم أنو مداخلاتي عند الزملاء لو تم تجميعها لألفت كتاب بلا فخر.

وورغم إيماني وعملي بالتجرد، لكن الشهرة مهمة وايجابية إذا كانت بالخير وللخير، لأنو مرات بيكون في موضوعات مهمة وبتحتاج إنو الزول يكون مشهور عشان يتناول الفكرة وتلقى الرواج اللازم والتبني.

وواحد من المواضوعات التي تمنيت إني أكون مشهور عشان ينجز هو موضوع قناة فضائية للتغيير.

وأتمني يجو البورد المزيد من الناس البيشتهروا بالعمل الصالح والقول الطيب والوقوف مع الحق.

وأتمنى يجي البورد المزيد من القراء الذين لا يريدون تزجية الوقت هدراً وهروبا من الواقع المرير، بل الذين يبحثون عن كيفية رسم صورة للغد الأفضل وتحقيقه.

وفي النهاية الواحد يتذكر ويحرص إنو ما يأسف لو عرضت عليه كل كتابته ومواقفه يوما ما.
مثلما يجب أن يحرص على أن لا يندم على كلمة كان يجب أن يقولها ولم يقلها ولزم الصمت لأن الصامت عن الحق شيطان أخرص.

ابراهيم ..سلام..ويامرحب بيك لاعب جديد ..

الفريق اللاعب معاك هو البحدد خطتك ..
الحر الممرحل للبديك المساحة لذلك
واهمية المباراة هى البتحدد شكلها



وان شاء الله بعد ده تكون صفوة ..

تحياتي ،،
الأكرم الأخ الراقى
فايز ود القاضى كلامك حكم وفعلاً الفريق اللاعب معاك
هو البحدد خطتك . لو حاولت ارد على مداخلتك سوف انقلها
وأكرر نفس كلامك . ولانه لا توجد خاصية اعجبنى فأقول اعجبنى
كلامك جداً وتسلم ياملك.

الأخ ايمن محمود
عبر عن رأيك بصراحة وصدق ووضوح ،،، وخلى الباقي على الله
فعلاً يا ايمن الإنسان تحكمه مبادئه والصدق والصراحة والوضوح
يمكن تطبيقها فى المواضيع المصيرية . يعنى يا ابيض يا اسود
والتاريخ لايرحم . والوقوف داخل الميدان دون المشاركة قد يضر
بالفريق وعلية يجب التحرك فى مساحات مدروسة والاستعداد
للتسديد المباشر متى ما أتيحت الفرصة.
تسلم كتير يا ملك

الأخ يحي قبانى
هههههه والله ريحتنى خالص خالص وأخلى النزير يرد عليك
تعرف فى واحد معانا فى مدينتنا قاعد يقرأ كتابات النزير
وعلى ضوئها حكم على آرائي مثل النزير هههه. قمت قلت
ليه كوننا إخوان لا يعنى أن آرائنا متطابقة مية المية. المهم
اقتنع واصبح يسمعنى حتى أكمل كلامى كشخص مختلف
عن النزير.
للأسف لا استطيع أن اذهب للاتجاه المعاكس عن النزير
لأننا نتفق فى بعض الأمور .
وتسلم يا ملك

غايتو من ردك على اخونا ود الباوقة، عرفنا مويتك

ومن هسه بنقول ليك
ح تتخبط وتتفرك وتتعاس هنا، و خوتك لصاحبنا النذير ما ح تشفع ليك


في حاجة مهمة دسوها منك السناير وما قالوها ليك
تعمل ليك "شلة" كاااربة
ولو ما عندك "مروّة" تشوف ليك واحدة تتلصق فيها



يا شباب
الزول ده بيدقس فيكم
جاء بي سنونو
ودخل بي نمرة خمسة من زمان
فتح ليهو بوست حلو، انا اداخلت معاهو فيهو، ما عارفو غتس وين

قبال ما امرق
امسك في كلام ود البشرى، وابعد من تراجي

شووووت ضفّاري ،،،
دي طريقة لعب مضمونة
الأخ ناصر حسين محمد
تعرف كلامك عين العقل ومرات الضفارى بكون هو الحل الأمثل .
لكن ما طوااالى فى بعض الأحيان .
تسلم يا راقى

غايتو من ردك على اخونا ود الباوقة، عرفنا مويتك

.....................................

اخي الشفيع

عليكم بردمه

وشكرا

الأخ بدر الدين الطائف
ههه اشووت عكس النزير يعنى؟
حتى الآن شخصين بيتفقوا على كدة، جداً ههههه

الأكرم جمال مصطفى
عندما نستفيد من تجارب ونصائح الآخرين نختصر مسافات
ونحصل الركب وذلك لا يعنى أن الأخطاء لن تقع ولكن ......نحاول
أن نقلل من عدد الأخطاء .
وفعلاً الصدق والوضوح يحددان مصداقية الكاتب.
وتسلم يا.... راقى

سلامات يادفعة
وسيبك من بعض النصائح البتغطس دي
إنت عارف ياريت لو كان عنوان بوستك

نصائح للإخوة (قديم علي جديد) عند المشاركة في مواضيع المنبر!

أصلوا أنحنا السودانيين دائماً مضيقين الماعون علينا و ماقادرين نتفكفك من حرارة النفس والنط في الرقبة من قولت تيت تلقي الواحد خانق أخو ...
ياخي مجمل مرتكزاتنا بُنيت علي عدم قبول الآخر مالم تجمعك به أي وصلة أو بالأحري صلة .... لم نتربي علي القانون والديمقراطية
يعني بالواضح كده (بأسنا بيننا شديد، تحسبنا جميعاً وقلوبنا شتي) يعني شايف الشتم والسب وشخصنة المواضيع ماشة كيف ....
لا أحد يتطرق للفكر ويحاور الفكرة بالفكرة والحجة بالحجة .... لكم ولطم .... ولكنه إنعكاس طبيعي للحالة السودانية بصفة عامة .... والبركة في المشروع الحضاري (الفاشل) وعمايله فينا
وحتي نحن ضحايا المشروع الحضاري نتباري في تنفيذه فيما بيننا .... حتي وإن كنا نعيش في قمة الحضارات ... و عقلية الوصاية و الطاعة العميا دي كمان ليها موال تاني ... وربك يصلح الحال ...
منو الأول؟
ومنو الأحسن؟
ناسي وناسك؟
ود بتين وعمرك كام سنير ولا جنير؟
وأتمني وجودنا في الحوش يخلق إضافة جديدة ... يادفعة ركز علي الفكر والمواقف الثابته .... والرأي بالرأي بكل أدب و إحترام ... بعد يومين تجد من يغالي و يخالفك الرأي يكن لك الإحترام

موفقين والله يستر علينا ونلحق باقي السودان الفضل

الأخ محمد الكامل عبد الحليم
كلامك سليم واتفق معاك فى المضمون والجهد المقدر
وذلك ما أنشده .
وتسلم يا.....ملك على المداخلة والنصيحة.
ولك منى كل ......التقدير والشكر

سلام
مرحبا بيك
اللعب الطويل احيانا افضل من الممرحل ركز على الباصات البينية .....
الأخ احمد قلوب
شكلك حريف كفر وبتعرف كيف تصل لمرمى الخصم فى اسرع وقت.
والباصات البينية فعلاً مهمة.
وتسلم كتير يا.... كابتن

نصيحتي ليك: اقرأ كثيرا ولا تكتب إلا مضطرا.
الأخ محمد الأمين موسى
كلامك والله حكم ويعنى الكثير . وعلشان كلامك دا
انا فتحت الموضوع دا طلباً للنصائح .
وتسلم يا ..... راقى وسوف أحاول ... أن اعمل بنصيحتك
والله يقدرنى.وتقبل تقديرى و.... امتنانى .

الأخ محمد البشرى الخضر
هههههه والله كلامك وصية مهندس بس، ومركز فى
شاهدة قبل نشرة شدييييد وبعدها أضف رد.
أما قواعد اللغة الله يعين وقاعدين فى الصقيعة وب....مزااااج
تسلم ياراقى على النصيحة ولك منى كل .... التقدير والشكر.

ابراهيم حجازي حبابك

ويا سلام يا اخي انت اخو النزير حجازي؟!

اولا البركه فيكم يا اخي في الوالد
ثانيا اعذرونا كمستجيدن لم نرحب بكم بما يكفي فصاحب الحوش قرضها علينا ومحدد المداخلات.

ثانيا:
سؤالك في محله وليس معناهو اننا بنقودك كسناير لكن فعلا للمنبر تكتيكات.


نصحية محمد الامين فعلا مهمه ان تقرأ اكثر مما تكتب... واكيد في كل مجال وليس في هذا المنبر فقط.

اما نصحيتي انا انك تحرص ان تفتح بوستاتك الخاصه و التي بدونها لن يكون لك ارشيف خاص بك او مكتبه مستقبليه.

صحيح انه تدخلك مع الاخرين مهم جدا لكن الاحظ بعض الاعضاء مدخلاتهم تدل عل عظمة حصيلتهم لكن رغم ذلك لا يبتدرون بوستاتهم

وبالتالي يحرمون انفسهم من مكتباتهم الخاصه.

تحياتي لك

ويا ريتك تطلع ما مصرج زي النزير هههههههههههه.
حباب تراجى مصطفى
ومرورك وترحيبك اسعدنى ياراقية
ونعم أخو النزير الأكبر
والبركة فى الجميع والبقاء لله وحدة
ترحيبك وصل يا ملكة وفعلاً الخبرة بتختصر الطريق
واكييد أريد أن اعرف التكتيكات .وفعلاً نصيحة محمد الأمين مهمة جداً
الاطلاع أكثر ينمى المعرفة والكتابة المدروسة والمقننة مهمة.
وفتح البوستات الخاصة لتكوين مكتبة مستقبلية دى اهم نصيحة للاستفادة
من كل النصائح التى ذكرت. نصيحتك دى هى الهدف الاساسى الذى من اجلة طلبت النصيحة.
هههههه والله لا جاب الصريج.
تسلمى كتييير يا ...... أم حازم وتقبلى ..... كل تقديرى و...... احترامى لمواقفك المشرفة يا .... أصيلة .

سلام يا شباب،

يا إبراهيم شايفك تعبان تعب المكوجي في حكاية الاقتباس دي
علشان تعمل اقتباس:
أول خطوة أعمل كوبي للكلام الذي تريد اقتباسه
تاني خطوة: اضغط على إضافة رد
تالت خطوة: إختار من الآكونز في وندو الرد على آكون "اقتباس" بجوار آكون ضع خط
رابع خطوة: ح يفتح معاك وندو جديد للاقتباس وداخله كتابة غير مفهومة أعمل ليها ريست ثم أعمل بيست فيها
خامس خطوة: أضغط أوكي

ولوووووووووووووووول @ قباني وتراجي
والله يا قباني وتراجي أخوتكم طلعت أخوة كاب وحدها الباب لوووووووووووول
ياخي في داعي تشيلو حالي قدام أخوي الكبير؟

تحياتي للجميع