Post: #1
Title: علوية مخدات .... او سيرة عرقى البلح
Author: عبد الله فقير
Date: 02-01-2013, 10:26 PM
تجمعنا الاربعة
اناوفخرى وعوض شفقة وحربى السندوق
سالتهم
اها ياشباب الليلة وين
اجاب فخرى بسرعة :-
تصدق انا الليلة من الصباح نفسى كوارع علوية مخدات
قاطعه شفقة بخبث :-
يافخرى ياخ عذبتنا بى كوارع مخدات دى ياخ على الطلاق انا خايف لامن تموت يقول ليك اتشهد تقول كوااااااااارع
افاق حربى السندوق من سرحته قائلا :-
يخوانا بالجد كدة فى سر فى كوارع المرة تقول بتخت فيهم حاجة قدر ماتاكل مابتشبع القصة شنو
رد فخرى بخبرة
انت ماعارف ولا شنو قالوك ياخى مخدات دى لامن كانت بتعمل العرقى زمان كان برضو نفس الحكاية دى انضف عرقى (بحرى الجدول ) كلها
قلت بخبث :-
والله يافخرى انت بتاع قنابل
اتنحنح فخرى قبل يقول
ياخ قنابل تطلع د.... يازول والله جد مرة عبد العزيز خالى حكى لى قال لى عرقى مخدات دة الا تمشى ليهو من العصر البدرى لانو لو اتاخرت شوية بكون قطع قال لى المرة دى كانت بتعمل كمية محدودة جدا جدا بجو بيشيلوها الناس المهمين فى البلد القاضى ... ضباط القسم ... بتاعين البلدية والناس المهمين زى ديل وبفضل شى بسيط بنكابس فيهو نحنا الغلابة ديل ياحصلنا ياما حصلنا
قاطعه السندوق سائلا
وطيب هى وكت بتعرف ناس مهمين زى ديل الخلاها تعرس عبد النبى المكنيكى الجربان دة شنو
تقمص فخرى دور العارف ببواطن الامور مرة اخرى قبل ان يقول:-
ياعمك انت قايلو هو عرسة كيف
سالت بلهفة :-
كيف ؟؟؟
قال:-
قالوك الزول دة كل يوم لامن يقفل الورشة
قاطعه السندوق :-
يازول ورشة شنو الزول دة من قمنا جينا ماعندو غير صندوقو حق العدة القاعد بيهو تحت الشجرة الفى اول السوق ديك
احتدت نبرة صوت خرى وهو يقول
ياخ انا قاصد الصندوق دة زاتوووو ... بعدين تعال ياسندوق انت وكت عارف قصدى اللو........ الليك شنو
قال السندوق مغتاظا من مناداته بلقبه :-
يازول انت ماتطلع بينا العالى ياتحكى زى الناس يا تبطل ماممكن كل ....
قاطعته خائفا من ضياع الجكاية
يافخرى ياخ سيبك من الزول دة وكمل
واصل فخرى الحكاية وهو يؤجل غيظه من السندوق الى سانحة اخرى
اها قالوك الزول دة كل يوم يقفل (صندوقو) دة ويمشى يلقى ليك العرقى كلو كنسو الجماعة اها يقعد يسب فى الدين ويشتم مايخلى زول ويمشى يجيب من اى ست عرقى تانىة وقالوك هو من يشرب الكاس الاول يقعد يعوعى
مخدات يامخدات
اديتى النضيف للناسات
ضحكناجميعا بصوت عال قبل ان بستمر فخرى فى الحكاية
اها لامن الحكاية دة غلبتو وماعرف ليها شاور عمك محجوب الجلاد بتاع السروج وقالوك محجوب دة زاتو كان خبير كبير بحرى الجدول اهاقام عمك محجوب قال ليهو ياعبد النبى ماعندك طريقة فى عرقى الزولة دى الاتعرسة اها وبى كدة حقك فى النضيف بكون محفوظ متين مامشيت بتلقى رااااقد لاقاضى ولا المحافظ زاتو بقدر بهبشو
يتبع ...
|
Post: #2
Title: Re: علوية مخدات .... او سيرة عرقى البلح
Author: عبد الله فقير
Date: 02-02-2013, 08:52 AM
Parent: #1
.
|
Post: #3
Title: Re: علوية مخدات .... او سيرة عرقى البلح
Author: عبد الله فقير
Date: 02-02-2013, 11:09 AM
Parent: #2
فوق لحدت ما نفضى شوية
|
Post: #4
Title: Re: علوية مخدات .... او سيرة عرقى البلح
Author: ASHRAF TAHA
Date: 02-02-2013, 11:18 AM
Parent: #3
.
|
Post: #5
Title: Re: علوية مخدات .... او سيرة عرقى البلح
Author: Shawgi Yassin
Date: 02-02-2013, 11:24 AM
Parent: #4
ماشي كويس يا عبد الله فقير
استمر
|
Post: #7
Title: Re: علوية مخدات .... او سيرة عرقى البلح
Author: عبد الله فقير
Date: 02-02-2013, 03:48 PM
Parent: #5
Quote: Author: Shawgi Yassin
ماشي كويس يا عبد الله فقير
استمر |
كتر خيرك يا Shawgi Yassin
|
Post: #6
Title: Re: علوية مخدات .... او سيرة عرقى البلح
Author: عبد الله فقير
Date: 02-02-2013, 03:46 PM
Parent: #4
Quote: .Author: ASHRAF TAHA
. |
سلامات يا اشرف
شكرا على رفع البوست
|
Post: #8
Title: Re: علوية مخدات .... او سيرة عرقى البلح
Author: محمد قسم الله محمد
Date: 02-02-2013, 06:01 PM
Parent: #6
شكلك كده تقليد تايواني..
هذا الضرب من السردمع الفارق بطبيعة الحال في التكنيك اللغويحصري علي الفطاحلة في المنبر..
1/المبدع حبيب نورة قدس الله سره
2/ المبدع طارق جبريل..
ومع ذلك قشه ما تعتِّر ليك..
حبابك في البورد.
|
Post: #9
Title: Re: علوية مخدات .... او سيرة عرقى البلح
Author: عبد الله فقير
Date: 02-02-2013, 07:52 PM
Parent: #8
Quote: محمد قسم الله محمد
شكلك كده تقليد تايواني..
هذا الضرب من السردمع الفارق بطبيعة الحال في التكنيك اللغويحصري علي الفطاحلة في المنبر..
1/المبدع حبيب نورة قدس الله سره
2/ المبدع طارق جبريل..
ومع ذلك قشه ما تعتِّر ليك..
حبابك في البورد |
شكرا يامحمد قسم الله
ولو انك ظلمتنى كتير فى مجرد ان جعلتنى تقليد لراوى محترف وصحفى محترف
ياراجل اين انا من هؤلا
فقط الذاكرة مليانة بصور كتيرة من المكان الجينا منو
ومنبر بكرى شايل كتير لا اعتقد انو حكاية حكايتين ضعيفات السرد بضروهو
|
Post: #10
Title: Re: علوية مخدات .... او سيرة عرقى البلح
Author: عبد الله فقير
Date: 02-05-2013, 09:32 PM
Parent: #9
اها ياعمك قالوك الزول تانى همل ورشتو ولا صنديقو من عصرا بدرى ويابحرى الجدول جاك بلا وطوالي راسو العديل على بيت الولية
سلا م حباب حق الله بق الله خش في الموضوع طوالي
سالت بدهشة
يازول خش في الموضوع كيف يعنى طوالى قال ليها انا عايز اعرسك ؟
قال فخرى المتفاخر بمعرفته لما لانعرف
يازول انت قاعد تسمع بس ومعاك جوز الوهم ديل ما منهم اى فايدة وحاة شيخ قيامة ما اكمل القصة دى
ساله السندوق ونبرة الغيظ واضحة في صوته
يازول ماتعمل لينا فيها مهم عايز تكمل كمل ماعاز تكمل الله مع حنانك زاتو
قاطعته والخوف يملاني من ضياع الحكاية
يابنى ادم هسي انت مالك .... الدخلك شنو
قال فخرى المنتصر بدفاعى عنه
اها عشان قلة ادبو دي كان ماجاب سفة مابكمل ليكم القصة
قلت وفي صوتى رجاء
اديهو سفة ياخ خلي يكمل لينا
قاطعنى السندوق قائلا
وحاة الله الزول دة كان شحد السفة ساي بديها ليهو انت قايل الربي الزول دة منو ثم اردف
ربيتو انا دي بي كيسي علي الطلاق يوم واحد مما عرفتو لا يوم الليلة كان عندو تمباك مافي
لم يكد يكمل عبارته الاخيرة حتى اشتبك معه فخرى في جدال صاخب وتطايرت الكلمات على شاكلة
تربي منو
عليك الله شوف الموهوم دة
بذلت جهدا كبيرا في اقناعهم بان يكفا عما هم فيه
رجوت فخرى لبرهة في ان يواصل حكايته
جيب جيبجيبة التاخدك قالها وهو يتناول كيس التمباك ليكور سفة ضخمة
|
|